MIHLAMULO YA BIBLIA
Lava va fileko va ta vuka ke?
A kufa zi fana ni ku etlela hakuva a munhu a fileko a nga tivi nchumu ne a nga zi koti ku maha nchumu. Kanilezi, a Muvangi wa wutomi wa zi kota ku vuxa vafileko. Kasi ku komba lezaku lezo za koteka, Nungungulu i lo nyika ntamu Jesu lezaku a vuxa vanhu vo tala nguvu va nga file. — Gonza Mutshawuteli 9:5; Johani 11:11, 43, 44.
Xana a kufa ku fana ni kuetlela hi ndlela muni?
Nungungulu i tsumbisa lezaku a vafileko lava va nga maalakanyweni yakwe va ta vuka va hanya misaveni yiswa yo lulama. A vanhu lavo va to vuxiwa, va fanele ku simama va file kala Nungungulu a tlhela a va nyika wutomi kambe. Nungungulu wa Ntamu Wontlhe i zi xuva nguvu a ku vuxa vafileko. — Gonza Joba 14:14, 15.
A kuvuxiwa ka vafileko ku tava ka tshamela muni?
A xikhati lexi Nungungulu a to vuxa vafileko, va ta ti tiva, va tiva vanghana ni maxaka yabye. Hambu lezi a miri wa munhu wu bolako, Nungungulu wa zi kota ku vuxa munhu yaloyi wa munwe na a hi ni miri muswa. — Gonza 1 Va Le Korinte 15:35, 38.
Vanhu va tsongwani nguvu va to vuxiwa va ya hanya tilweni. (Kuvululelwa 20:6) A kutala ka vanhu va ta vuxiwa kasi va hanya paradiseni kwalaha misaveni. Va ta nyikiwa masangulo maswa, na va rinzela ku hanya kala kupinzuka. — Gonza Tisimu 37:29; Mitiro 24:15.