Wa amukela “zakuga hi xikhati xi faneleko ke?”

HI HANYA ka xikhati xo nonoha nguvu matinwini wontlhe ya vanhu. (2 Tim. 3:1-5) A liranzo la hina ha Jehova ni kutiyimisela ka hina ka ku lava ku hanya hi milayo yakwe yo lulama ka ringiwa siku ni siku. Jesu i wa zi tiva lezaku a xikhati lexi xi wa ta chikela, hikwalaho i lo tiyisa valanzeli vakwe lezaku va wa ta kuma a kutiyiswa loku ku lavekako kasi va timisela kala magumo. (Mat. 24:3, 13; 28:20) Kasi ku va tiyisa i lo yimisa nanza go tsumbeka lezaku gi va nyika “zakuga [za moya] hi xikhati xi faneleko.” — Mat. 24:45, 46.

Kusukela loku a nanza lego go tsumbeka gi yimisilwe hi 1919, ku hlengeletwa timiliyoni ta “malanza” ya tirimi tontlhe hlengeletanweni ya Nungungulu ma tlhela ma nyikwa zakuga za moya. (Mat. 24:14; Kuv. 22:17) Kanilezi a hi mahungu wontlhe ma nga kona hi tirimi tontlhe, niku a hi vontlhe va zi kotako ku kuma mabhuku ya hina ya ku tira lomu ka michini. Hi xikombiso, a votala a va ti kumi a tividiyu ni tinzima ti humesiwako ka site jw.org ntsena. Xana lezo zi wula lezaku a vokari a va zi kumi zakuga lezi zi lavekako kasi ku simama va hanya khwatsi hi tlhelo ga moya? Kasi ku tiva a hlamulo wa lisine, wona mihlamulo ya mune wa ziwutiso-tshinya.

1. Hi wihi nchumu wo ranga ka zakuga lezi Jehova a hi nyikako?

A xikhati lexi Satani a nga ringa Jesu lezaku a hunzulusa maribye ma maha zibaba, Jesu i te ngalo: “A munhu a nga ta hanya hi xibaba xoce, kanilezi hi timhaka tontlhelele leti ti humako nonwini wa Nungungulu.” (Mat. 4:3, 4) A timhaka ta Nungungulu ti tsalilwe lomu ka Biblia. (2 Ped. 1:20, 21) Hikwalaho, a Biblia hi wona nchumu wo ranga ka zakuga za hina za moya.  —  2 Tim. 3:16, 17.

A hlengeletano ya Jehova hi humesile a Tradução do Novo Mundo das Escrituras Sagradas ga murumba kutani zipanze za gona hi tirimi to hunza 120, niku tiya ti engeteleka lembe ni lembe. Ahandle ka Biblia legi, ku na ni maBiblia manwani ya murumba kutani zipanze ma nga kona hi makume ya mazana ya tirimi. A zilo lezi zo hlamalisa zi yelana ni kuranza ka Jehova ka “lezaku vanhu vontlhe va hanyiswa, vava ni kutiva ka [lisine].” (1 Tim. 2:3, 4) Niku kota lezi ku nga hiko na “ximahwa xi fihlilweko mahlweni ka [Jehova],” hi nga tiyiseka lezaku i ta koka lava “va khatalako hi xilaveko xabye xa moya” lezaku va nghena hlengeletanweni yakwe a tlhela a va nyika zakuga za moya. — Maheb. 4:13; Mat. 5:3, 6, NM; Joh. 6:44; 10:14.

2. Xipanze muni xi tatiswako hi mabhuku ya hina kunyikeni ka zakuga za moya ke?

Kasi a munhu ava ni kukholwa ko tiya, ku laveka zo hunza ku gonza Biblia. I fanele ku zwisisa lezi a zi gonzako a tlhela a hanya hi zona. (Jak. 1:22-25) A thenwa wo kari wa muEtiopia ka zana ga malembe go sangula i wa yi zwisisa mhaka leyi. Na a kari a lera Mhaka ya Nungungulu, muvangeli Filipu i lo mu wutisa lezi: “Wa zi pima lezi u zi gonzako ke?” Yena i lo hlamula aku: “Nzi nga zi pima hikuyini loku nzi nga hi na mutlhamuseli?” (Miti. 8:26-31) Filipu i lo hlamula hi ku mu vuna ku kuma wutivi ga lisine ga Mhaka ya Nungungulu. Na a kuciwa hi lezi a nga zi gonza, a wanuna loye i lo bapatizwa. (Miti. 8:32-38) Hi kufanana, a mabhuku ya hina ma seketelweko ka Biblia ma hi vuna ku kuma a wutivi go mbhelela ga lisine. Ma hi khumba ma tlhela ma hi kuca ku hanya hi lezi hi zi gonzako. — Kol. 1:9, 10.

Hi ku tirisa a mabhuku lawa, a malanza ya Jehova ma nyikwa zilo zo tala za kuga ni kunwa. (Isa. 65:13) Hi xikombiso, A Murinzeli, a nga kona hi tirimi to hunza 210, i tlhamusela ziprofeto za Biblia, a hi vuna ku zwisisa khwatsi a lisine lo eta la moya, a tlhela a hi kuca ku hanya hi matshinya ya milayo ya Biblia. A revista Despertai!, gi humesiwako hi xipimo xa 100 wa tirimi, gi hi engetela ku zwisisa a zivangwa za Jehova gi tlhela gi hi komba tindlela ta ku tirisa wusungukati ga Biblia. (Mav. 3:21-23; Rom. 1:20) A nanza gi tsumbekileko gi humesa mahungu ma seketelweko ka Biblia hi xipimo xa 680 wa tirimi! Xana wa ti nyika xikhati xa ku lera Biblia siku ni siku? Xana wa gonza a marevista wontlhe ya maswa ni mabhuku wontlhe ma humesiwako lembe ni lembe hi lirimi la wena ke?

Ahandle ka mabhuku, a hlengeletano ya Jehova yi longisela tikanelo ti seketelweko ka Biblia leti ti vekiwako mitlhanganweni ya bandla ni ya xipanze ni ka migotsovanyano. Xana wa demba ndleve ka tikanelo, tidrama, mikombiso, ni kubhulisana loku ku mahiwako mitsombanweni leyo ke? Hakunene Jehova wa hi mahela mubuzo wa moya! — Isa. 25:6.

3. Loku a mabhuku lawa ma humesilweko ma nga hi kona wontlhe hi lirimi la wena, xana u tafa hi ndlala hi tlhelo ga moya?

A hlamulo wa kona i ahihi. Niku a hi faneli ku hlamala loku a malanza yo kari ya Jehova ma tshuka ma kuma zakuga zo tala za moya ku hunza vanwani. Hikuyini? Ehleketa hi vapostoli. Va wa gonzisiwa zotala ku hunza vapizani vanwani va zana ga malembe go sangula. (Mar. 4:10; 9:35-37) Hambulezo, a vapizani lavo a va wonzangi hi ndlala ya moya; va wa zi kuma lezi zi nga laveka. — Efe. 4:20-24; 1 Ped. 1:8.

Hi fanele ku alakanya kambe lezaku a zilo zo tala lezi Jesu a nga wula ni ku zi maha laha misaveni a zi tsaliwangi lomu ka tiIvangeli. Mupostoli Johani i tsalile lezi: “Zi kona zinwani zilo zo tala lezi Jesu a nga zi maha, lezi loku zi wa tsalilwe zontlhelele, nza alakanya lezaku hambu misava yontlhe yi wa nga ta zi kota ku kangatela a mabhuku wontlhe laya ma nga tsaliwako.” (Joh. 21:25) Hambu lezi a valanzeli va Jesu va zana ga malembe go sangula va nga tiva zo tala xungetano hi wanuna wo mbhelela Jesu ku hunza hina, a hi kiyelelwi hi nchumu. Jehova i mahile malulamiselo ya lezaku ku tsaliwa zontlhe zi lavekako xungetano hi Jesu kasi kuva hi lanzela nkonzo wakwe. — 1 Ped. 2:21.

Ehleketa kambe hi mapapilo lawa a vapostoli va nga ma rumela mabandleni. Hi wutsongwani ga kona, ku na ni ginwe ga wona gi nga hava lomu ka Biblia. (Kol. 4:16) Xana a zakuga za hina za moya za kiyela hi lezi hi nga hiko ni papilo lego? Ahihi. Jehova wa zi tiva lezi hi zi lavako niku wa hi nyika zakuga zo enela kasi hi simama hi tiyile hi tlhelo ga moya. — Mat. 6:8.

Inyamutlha, a mitlawa yo kari ya malanza ya Jehova yi na ni zakuga zo tala za moya ku hunza vanwani. Xana u wulawula lirimi li nga ni mabhuku ma tsongwani ntsena? Loku zi hi lezo, tiva lezaku Jehova wa ku khatalela. Gonza mabhuku lawa u nga nawo, niku loku zi koteka, yana mitlhanganweni ya lirimi leli u li zwisisako. Tiyiseka lezaku Jehova i ta ku nyika zontlhe zi lavekako kasi u simama u tiyile hi tlhelo ga moya. — Tis. 1:2; Maheb. 10:24, 25.

4. Loku u nga ma kumi mahungu lawa ma humesiwako ka site jw.org, u ta hola hi tlhelo ga moya ke?

Lomu ka site ya hina, hi chela marevista ni mabhuku manwani ma seketelwako ka Biblia. Ku na ni mahungu kambe ya ku vuna mipatswa, vaswa, ni vanana kwalomu ka site leyi. A mingango ya vuneka hi ku gonza mahungu lawo ka Wukhozeli ga Ngango. A ku hunza lezo, a site ya hina yi nyika mibiko ya zimaho zo hlawuleka, zo kota kuthwaziswa ka zigonzani za Gileadi ni mutlhangano wa lembe, niku yi tivisa vamakabye misaveni yontlhe xungetano hi makhombo ya ntumbuluko ni mahungu ma khumbako vanhu va Jehova xungetano hi milayo ya tiko. (1 Ped. 5:8, 9) A site leyi yi vuna nguvu kuxumayeleni kambe, hakuva yi maha mahungu yo saseka ma kumiwa hi vanhu hambu ka matiko lawa a ntiro wa hina wu beletelwako.

Hambulezo, u nga simama u tiyile hi tlhelo ga moya hambu loku u nga zi koti ku nghena ka site ya hina. A nanza gi ti karata nguvu kasi ku humesa mabhuku yo enela hi maphepha kasi ku a malanza wontlhe maga khwatsi hi tlhelo ga moya. Hikwalaho, u nga kurumeteki ku xava muchini hi ku lava ku nghena ka jw.org basi. A vokari va nga ha maha malulamiselo ya ku gandla mahungu matsongwani ya site ya hina va nyika lava va kalako va nga hi na xo nghena hi xona ka Internet, kanilezi a ku na xilaveko xa ku a mabandla ma maha lezo.

Ha mu bonga Jesu hi ku hlayisa xitsumbiso xakwe xa ku hi khatalela hi tlhelo ga moya. Laha masiku lawa yo gumesa ma yako ma mbhela, hi nga tiyiseka lezaku Jehova i ta simama ku hi nyika “zakuga [za moya] hi xikhati xi faneleko.”