Kwadru Ga Ziwutiso

◼ Xana za faneleka lezaku a mabandla kutani vanhu va tirisa a zifungo za tikoponi ta nayo ti tiriswako hi Timboni ta Jehova?

A xifungo i vito, mufananiso, kutani xikombiso xi mahelweko ku tivekisa hi kuolova a nchumu wo kari. A xifungo xa Watch Tower xi yimela a Sociedade Torre de Vigia de Bíblias e Tratados de Pensilvânia, EUA ni tikoponi tinwani ti tiriswako hi hlengeletano leyi. A Christian Congregation of Jehovah’s Witnesses gi tirisa a Biblia gi vulilweko ka tihloko ta mhaka ta mapapilo ya gona. A tikoponi tinwani ti tiriswako hi Timboni ta Jehova ti na ni zifungo zo hambanahambana.

A mabandla kutani vanhu a va faneli ku tirisa a zifungo kutani mavito ya tikoponi ta nayo ta hlengeletano, ge hambu zifungo kutani mavito yo fana nazo ka maSalawu yabye ya Mufumo, zikombiso, tihloko ta mhaka ta mapapilo, zibya za munhu, ni zinwani. A ku tirisa a zifungo lezo za hlengeletano zi nga ha kanakanisa a vatiri va mufumo, vahuweleli, ni vanwani xungetano hi kuyelana ku nga kona xikari ka bandla ni tikoponi ta nayo ta hlengeletano. Hi kufanana, ku nga ha alakanyiwa lezaku a mapapilo ma nga ni zifungo lezo ma vumelelwe kutani ku rumelwa hi tsinza ga misava yontlhe kutani hofisa ya ravi.

A xifungo xa Watch Tower, kutani zinwani zo fana naxo, a zi faneli ku tiriswa ka maSalawu ya Mufumo lawa ma to akiwa xikhatini xi tako hambu loku a Salawu leyo ya Mufumo yi lumba a koponi ya nayo yi tiriswako hi Torre de Vigia. A mabandla lawa a maSalawu ya wona ya Mufumo ma nga ni xifungo lexo a ma kurumetwi a ku tekela ku xi susa, kota lezi a ntiro lowo wu nga ha lavako kucica ka hombe, xikhati xo tala, mizamo, ni mali. Hambulezo, ku fanele ku alakanyelwa a ku xi susa loku zi hehuka. Loku zi nga koteki, xi nga susiwa a xikhati lexi a muako wu to aketwa.