Kwadru Ga Ziwutiso

◼ Hi nga maha yini kasi ku vuna maphayona?

Ka lembe ga ntiro ga 2009, a xipimo xa 800.000 wa vamakabye va xinuna ni va xisati misaveni yontlhe va tirile kota maphayona ya xikhati xontlhe ni yo hlawuleka. A vatireli lava va xikhati xontlhe va tirisa a xikhati xabye xa lisima, ntamu wabye ni titshomba tabye kasi ku hangalasa a mahungu yo saseka ya Mufumo. (Mav. 3:9) Hi nga wona a litsako leli Jehova a nga nalo hi kota ya mizamo yabye! Xana hi nga kombisisa kuyini lezaku hi na ni mawonela ya Jehova ni ku maha xo kari kasi hi engetela a litsako labye ni ku timisela ntirweni wa wuphayona?

Hakunene, a magezu ya hina ma hlawulilweko khwatsi ma nga va kuca a ku simama va tira kota maphayona. (Mav. 25:11) Xana hi nga cica a longoloko wa mitiro ya hina ya viki ni viki kasi hi tira navo wutirelini? A xikhati lexi hi tirako zinwe navo, hi nga ha va byela lezaku hi ta famba hi mova wa hina, wutshanwini ga lowu wabye. Niku loku hi famba hi mova wabye, kuzilava hi nga va nyika a malana yo kari kasi ku va vuna zilavekweni zabye. (1 Kor. 13:5; Fil. 2:4) Hi nga kombisa a kukhatala ka hina ka liranzo hi kuta na hi ramba maphayona lezaku ma taga laha kaya ka hina. — 1 Ped. 4:8, 9.

A Mitsalo yi tiyisa lezaku Jehova i ta khatalela a zilaveko za lava va rangisako a Mufumo wakwe. (Tis. 37:25; Mat. 6:33) A yinwe ya tindlela leti a ti tirisako kasi ku maha lezo vamakabye va hina va liranzo. (1 Joh. 3:16-18) Hi lisine, a maphayona a ma rinzeli ku nyikiwa mali hi vanwani kasi ku khatalela a zilaveko zabye. Niku a maphayona ma nga ta tekela ku byela vanwani lezi ma yimisanako nazo. Hambulezo, ha zi kota ku ma mahela xo kari a maphayona yo tsumbeka ni ku “vuna a kuvumala kabye” hi kuva vanhu vo tlhariha ni ku hatlisa hi pola a zilaveko zabye. — 2 Kor. 8:14, 15.

Laha Febe, a muvangeli wo hiseka wa Bandla ga Kenkrea ka zana ga malembe go sangula a ngaya Roma, Paule i lo kuca a vamakabye va le Roma aku: ‘Mu amukeleni Hosini kota lezi zi faneleko vobasa, mu mu vuna ka zontlhe lezi a ta nga zi lava ka nwina.’ (Rom. 16:1, 2) Hi na ni lungelo ga ku kombisa a liranzo lo fana ni lelo laha bandleni ga hina ka lava va kanelako a mahungu yo saseka va nga tsiki kota maphayona ya xikhati xontlhe ni yo hlawuleka. — Miti. 5:42.