U Nga Yentxa Yini Swaku U Hanya Ka Misava Ya Nyuwani?

Ka tinhlokomhaka ta ku sungula hi vone swaku a ku choti kule swaku Xikwembu xi helisa minchumu hinkwayu ya ku biha. Hi nga tshemba swaku leswo swi ta yentxeka. Hi mhaka muni? Hikusa Bibele ku nga Rito la Xikwembu se a li swi vulile:

“Misava ya hundza.” — 1 YOHANI 2:17.

Hi nga kholwa swaku vanhu van’wana va ta pona hikusa ndzimana leyi yi tlhela yi ku:

“Lweyi a yentxaka ku rhandza ka Xikwembu a ta tshama hi masiku.”

Hi mhaka leyo, loko hi lava ku ponisiwa hi fanele hi yentxa ku rhandza ka Xikwembu. Kambe swaku hi yentxa ku rhandza ka Xikwembu, ku sungula hi fanele hi xi tiva.

“KU TIVA” XIKWEMBU SWI NGA KU PONISA

Mafoto: 1. Mutirhi wa xibelhele lweyi a nga tshama hansi na a karhalile. 2. Hi nkama wa intervhalu a vona kolega wa yena na a lerha revhixta na a tsakile. 3. Kolega wa yena a mu lerhela ndzimana ya Bibele a tlhela a mu nyika cartão la site la jw.org.

Yesu a te: “Va ta kuma wutomi la ku kala li nga heli loko va tama va ku tiva, wena Xikwembu xi li xin’we xa ntiyiso”. (Yohani 17:3) Leswaku hi pona loko ku helisiwa misava leyi ya ku biha hi tlhela hi hanya wutomi la ku kala li nga heli, hi fanele hi tiva Xikwembu. A swi yenelanga ku kholwa ntsena swaku Xikwembu xi kona, hi fanele hi va vanghanu va xona. Loko hi lava swaku wunghanu la hina ni munhu mun’wana li kula, hi fanele hi heta nkama wa wunyingi na hi li na yena. Ni loko hi lava ku va vanghanu va Xikwembu hi fanele hi yentxa swoleswo. Vona minchumu ya lisima leyi Bibele li hi djondzisaka, leyi yi nga hi pfunaka ku va vanghanu va vakulu va Xikwembu.

Ntiyiso Lowu Hi Wu Djondzaka Ka Bibele

Hi djondza swaku Xikwembu xi lava hi hanya paradesi.

Xikwembu xi yentxe vanhu va ku sungula ku nga Adamu na Evha, xi tlhela xi va nyika ndhawu ya ku saseka swaku va hanya ka yona. Ndhawu ya kona a yi vitaniwa jaradi la Edeni. Vona a va nga na xidjoho, naswona Xikwembu a xi va nyika hinkwaswu leswi a va swi lava swaku va hanya wutomi la ku tsakisa. A swi ta koteka swaku va hanya wutomi la ku kala li nga heli loko a va yo yingisa Xikwembu va tlhela va va vanghanu va xona. Kambe va lange ku kala va nga wu yingisi nawu lowu Xikwembu xi nga va nyika.

Hi djondza swaku hi mhaka muni hi hlupheka.

Leswi Adamu a kalaka a nga wu yingisanga nawu wa Xikwembu a swa ha kotekanga swaku yena ni vanhu hinkwavu va hanya wutomi la ku kala li nga heli. Bibele li tlhamusela swaku: “Leswi xidjoho xi nga nghena misaveni hi munhu mun’we, na lona lifu li nghenile hi mhaka ya xidjoho, se lifu li tlulele vanhu hinkwavu”. (Varoma 5:12) Ku fana ni leswi munhu a nga tluletiwaka mavabyi hi vapsali va yena, vanhu hinkwavu va tluletiwe xidjoho hi Adamu. Hi mhaka leyo, ha guga hi tlhela hi fa.

Hi djondza leswi Xikwembu xi nga swi yentxa swaku xi hi pfuna.

Bibele li li: “Xikwembu xi rhandze misava swinene xi za xi nyikela hi N’wana wa xona lweyi a nga psaliwa a li yexe, swaku lweyi a pfumelaka ka yena a nga lovisiwi kambe a kuma wutomi la ku kala li nga heli.” (Yohani 3:16) Xikwembu xi rhume Yesu a ta lani misaveni swaku a ta hi fela. Prabhaka, wanuna wa le Índia lweyi a nga ni 86 wa malembe, a te: “Yehovhaa a ni kombe lirhandzu la ntiyiso. Lirhandzu la yena li ni nyike ntshembo wa ku kuma wutomi la ku kala li nga heli.”

Hi djondza swaku hi nga yentxa yini kuva hi kombisa swaku ha xi khensa Xikwembu.

Bibele li vula swaku hi nga kombisa swaku ha xi khensa Xikwembu hi ku ‘hanya hi minawu ya xona’. (1 Yohani 2:3) Yehovha a kombisa swaku wa hi rhandza hi ku hi byela leswi hi nga swi yentxaka swaku hi hanya wutomi la ku tsakisa swoswi. (Esaya 48:17, 18) Xikwembu a xi swi lavi swaku hi hlupheka. Xi hi tshembisa swaku loko hi yingisa minawu ya xona hi ta hanya wutomi la ku tsakisa swoswi hi tlhela hi kuma wutomi la ku kala li nga heli ka nkama lowu taka.

LERHA BIBELE SIKU NI SIKU

Mutirhi wa xibelhele lweyi a nga nyikiwa cartão a nghena ka site la jw.org na a li kaya. — U nga pona loko ku helisiwa misava leyi, loko u khongela ka Xikwembu u kombela ku pfuniwa, u tlhela u yentxa minchumu ya yinene

Siku ni siku hi lava swakudla swaku hi tama hi hanya, kambe Yesu a te: “Munhu a nga fanelanga a hanya hi pawu ntsena, kambe a fanele a hanya ni hi rito lin’wana ni lin’wana leli humaka ka nomo wa Yehovha.” — Matewu 4:4.

Namuntlha, marito ya Yehovha hi ma kuma ka Bibele. Loko u djondza Bibele u ta tiva minchumu ya lisima leyi Yehovha a nga yi yentxela vanhu va yena khale, leyi a yi yentxaka swoswi ni leyi a nga ta yi yentxa ka nkama lowu taka.

KHONGELA KA XIKWEMBU SWAKU XI KU PFUNA

U nga yentxa yini loko u lava ku yingisa minawu ya Xikwembu kambe swi ku karhatela ku tshika ku yentxa minchumu ya ku biha? Loko leswo swi ku yentxekela, ku tiva Xikwembu swi nga ku pfuna.

Vona leswi nga yentxekela wansati lweyi hi nga ta mu vitanaka Sakura, lweyi a a ni mahanyelo ya ku biha. Loko a sungule ku djondza Bibele, a djondze hi nawu wa Xikwembu lowu nge: “Balekani nsila ya swa masangu”. (1 Vakorinto 6:18) Sakura a khongelile ka Xikwembu swaku xi mu nyika ntamu naswona yena a a swi lava ku tshika mahanyelo ya ku biha, kambe minkama yin’wana a swi mu karhatela. Yena a li: “Loko ni teliwa hi mimpimiso ya ku biha, ni khongela ka Yehovha hikusa na swi tiva swaku a ni nge swi koti ku swi hlula noxe. Matimba lawa xikhongelo xi nga na wona ma ni pfuna ku titwa ni li kusuhi na Yehovha.” Ku fana na Sakura, vanhu va vanyingi va djondza hi Xikwembu, naswona xona xi va nyika ntamu swaku va txintxa wutomi la vona, va tlhela va hanya hi ndlela leyi yi xi tsakisaka. — Vafilipiya 4:13.

Loko u xi tiva kahle Xikwembu, na wena u ta ‘tiviwa hi xona’ u tlhela u va munghanu wa xona. (Vagalatiya 4:9; Tipisalema 25:14) Loko u yentxa leswo, u ta pona loko ku helisiwa misava leyi ya ku biha, u tlhela u hanya ka misava ya nyuwani ya Xikwembu. Kambe misava leyi ya nyuwani yi ta va yi tshamise ku yini? Hi ta kuma ntlhamuselo ya xivutiso lexi ka nhlokomhaka leyi landzelaka.

a Yehovha i vito la Xikwembu leli nga ka Bibele.