Zama Ku Tiva Ntiyiso

Leswi Yentxaka Swi Karhata

Hi ntolovelo, vanhu lava va nga ni xikheto a va wu tivi ntiyiso wa mhaka. Vona swikombiso leswi:

Vatirhi van’wana va pimisa swaku vavasati a va nge swi koti ku tirha hi swa siyensiya ni teknolojiya.
A khale, aEuropa a va pimisa swaku a Vayuda hi vona va yentxaka swaku ku va ni mavabyi hi ku chela vheneno ka swihlovo. Naswona a nkama na ku fuma partidu la Manazi a Vayuda a va dlayeleliwa na va lumbetiwa swaku hi vona va wisaka a ekonomiya ya Alemanha. Leswo swi yentxi swaku a Vayuda va nyenyiwa va tlhela va xanisiwa. Funtshi van’wana ni namuntlha va ha nyenyiwa.
Vanhu va vanyingi va pimisa swaku hinkwavu lava va nga limala a va tsakanga naswona va tshama na va kwatile.

Vanhu lava va kholwaka mavunhwa ya ku fana ni lawa va tinyimelela va vula swaku leswi va swi kholwaka i ntiyiso naswona vanhu lava va nga ni mavonelo ya ku hambana ni ya vona, va voniwa i nga ku a va tivi.

Leswi Bibele Li Swi Vulaka

“A swi kahle ku va munhu a nga na wutivi”. — SWIVURISO 19:2.

Swi vula yini leswi? Loko hi nga tivi ntiyiso wa mhaka, hi nga yentxa swilo swa ku kala swi nga li kahle. Leswo swi vula swaku loko hi kholwa mavunhwa hi ta gama hi yavanyisa vanhu va ku kala va nga na nandzu.

Ku Tiva Ntiyiso Swa Pfuna

Loko hi tiva ntiyiso hi vanhu van’wana swi ta hi yentxa hi nga ma kholwi mavunhwa lawa vanhu va ma hangalasaka hi vona. Phela loko u tsumbula swaku swilo swa ku biha leswi vanhu va swi vulaka hi vanhu volavu a hi ntiyiso, swi nga yentxeka ku ni swilo swin’wana leswi u swi tivaka hi vanhu van’wana swaku na swona a hi ntiyiso.

Leswi Nga Humelela Vanhu Van’wana: Jovica (Balcãs)

Jovica lweyi hi nga vulavula hi yena kusunguleni, a kule na a twa vanhu va vulavula ku biha hi ntlawa wa wutsongo lowu nga ka tiku la yena. A va vulavula ku biha hi wona hambi hi ka televhizori. A li: “A ni ni xikheto funtshi a ni va nyenya vanhu lava naswona a ni pimisa swaku ni ni razawu hileswi ni titwisaka xiswona.

“A nkama a ni li wusonchweni, a ni boheka ku tshama ni ku tirha ni sonchwa leli a li lumba ntlawa lowuyani a ni wu nyenya. Hi ku famba ka nkama ni va tive ku yampsa. Ni djondze lirimi la vona ni tlhela ni yingisela mamuzika ya vona. Ni sungule ku txintxa mapimiselo ya mina. Hambileswo, a na ha ni xikheto kambe lexi nga ni pfuna, i ku kala ni nga ha yingiseli mahungu, mafilmi ni swilo swin’wana leswi a swi vulavula ku biha hi vona. Na swi tiva swaku xikheto xi nga yentxa munhu a tshama na a kwatile a tlhela a nyenya vanhu van’wana.”

Leswi U Nga Swi Yentxaka

Khumbuka swaku loko vanhu va vulavula ku biha hi ntlawa wa vanhu, a swi vuli swaku vanhu hinkwavu ka ntlawa wolowo va tshamise xileswo.
Pfumela swaku a hi swilo hinkwaswu u swi tivaka hi vanhu van’wana.
Zama ku tiva ntiyiso wa mhaka.