Indjhe Lava Va Nga Fa Va Nga Tlhela Va Hanya?

BIBELE LI LI:

“Lava ku lulama ni lava kalaka va nga lulamanga va ta pfuxiwa.” — Mintirho 24:15, Wuhundzuluxeli La Misava Ya Nyuwani.

SWI KU KHUMBISA KU YINI LESWO?

Swi ta ku tiyisa loko u feliwa hi munhu lweyi u mu rhandzaka. — 2 Vakorinto 1:3, 4.

Swi ta ku pfuna swaku u nga chavi lifu ku tlula mpimu. — Vaheberu 2:15.

Swi ta ku nyika ntshembo wa ku tlhela u vona varhandziwa va wena lava va nga fa. — Yohani 5:28, 29.

HI NGA SWI KHOLWA HIKAKUNENE LESWI BIBELE LI SWI VULAKA?

Ina, vona swivangelo swinharhu:

• Xikwembu hi xona xi nga yendla wutomi. Bibele li li Yehovha Xikwembu i “xihlovo xa wutomi.” (Tipisalema 36:9; Mintirho 17:24, 25) Hi yena a nga nyika wutomi swilo hinkwaswu. Hi mhaka leyo, ha tiyiseka swaku Xikwembu xi nga swi kota ku tlhela xi nyika wutomi vanhu lava nga fa.

• Xikwembu xi pfuxe vanhu ka nkama lowu nga hundza. Bibele li vula swaku 8 wa vanhu, vavanuna, vavasati, vavakulu hambi majovhem va pfuxiwile swaku va tlhela va hanya lani misaveni. Van’wani ka lava nga pfuxiwa a va ha li ku fa, kambe mun’we se a ku hundze 4 wa masiku na a file! — Yohani 11:39-44.

• Xikwembu xa swi navela ku tlhela xi pfuxa lava va nga fa. Yehovha wa li nyenya lifu funtshi a ta li helisa. (1 Vakorinto 15:26) Hi ku tirhisa ku pfuxiwa ka vafi, Yehovha a ta helisa lifu. — Yobo 14:14, 15.