DJONDZO 03
U Nga Li Tshemba Bibele?
U nga yi tshemba minawu ya Bibele ni leswi li vulaka swaku swi ta yendleka, hambileswi i nga buku leli nga tsaliwa khale? Bibele li vulavula hi swilo swa swinyingi swa ku tsakisa leswi nga ta yendleka ka nkama lowu taka, naswona li ni minawu leyi nga hi pfunaka. Swi nga yendleka u swi tsakela ku tiva leswi Bibele li swi vulaka, kambe swi nga yendleka u kanakana. U nga swi kholwa leswi Bibele li swi vulaka hi ku va ni wutomi la ku tsakisa swoswi ni ka nkama lowu taka? Vanhu va vanyingi va swi kholwa leswo. Se wena ke, u nga swi kholwa?
1. Leswi Bibele li vulavulaka hi swona swi yendlekile hikakunene?
Bibele li vula swaku vatsali va lona va tsale marito ya “ntiyiso.” (Ekleziyaxta 12:10) Leswi Bibele li vulavulaka hi swona swi yendlekile hikakunene ni vanhu lava li vulavulaka hi vona va ve kona hikakunene. (Lerha Luka 1:3; 3:1, 2.) Tintivi tin’wani ni vakambeli va minchumu ya khale va vula swaku minchumu leyi nga ka Bibele leyi fambisanaka ni masiku, vanhu, tindhawu ni minchumu leyi nga yendleka i ntiyiso.
2. Hi mhaka muni hi nga vulaka swaku Bibele la tshembeka hambileswi li nga la khale?
Bibele i buku leli vulaka swilo na swi nge se yendleka. Hi xikombiso, li vulavula hi swilo leswi yelanaka ni siyensiya. Ka nkama lowu Bibele li nga tsaliwa hi wona, vanhu va vanyingi a va nga swi kholwi leswi a li swi vula hi siyensiya. Kambe namuntlha a siyensiya la pfumelelana ni leswi Bibele li swi vulaka. Marito ya Bibele ‘ma tshembekile swoswi ni hi masiku ni masiku.’ — Tipisalema 111:8.
3. Hi mhaka muni hi fanele hi tshemba leswi Bibele li vulaka swaku swi ta yendleka ka nkama lowu taka?
Bibele li ni wuprofetaa leli vulavulaka hi swilo “na swi nge se humelela”. (Esaya 46:10) Hi xikombiso, minchumu leyi yi nga yendleka khale se a yi tsaliwile ka Bibele swaku yi ta yendleka. Naswona Bibele se a li swi vulile leswi wutomi a li ta tshamisa xiswona ka masiku ya hina. Ka djondzo leyi, hi ta djondza hi wuprofeta la Bibele leli nga hetiseka hilani Bibele li nga vula hi kona!
DJONDZA SWIN’WANI
Vona swaku siyensiya li pfumelelanisa ku yini ni Bibele naswona kambisisa wuprofeta lin’wani la ku hlamalisa la Bibele.
4. Siyensiya la pfumelelana ni Bibele
Khale vanhu va vanyingi a va kholwa swaku misava yi henhla ka nchumu. Sixtirani VHIDIYO.
Vona leswi se a swi tsaliwile ka buku la Yobo kolomuyani ka 3.500 wa malembe lawa ma nga hundza. Lerhani Yobo 26:7, mi gama mi bula hi xivutiso lexi landzelaka:
Hi mhaka muni swi hlamalisa ku tiva leswaku Bibele se a li vulile swaku misava a yi le henhla ka nchumu, kumbe yi le ‘mpfhukeni’?
Loko dlambu li hisa li yendla swaku mati ma psha, loko mati ma psha ma yendla swaku ku va ni marhefu, se marhefu wolawo ma nisa mpfula leyi gamaka yi tata malwandle. Vanhu va sungule ku twisisa leswo ka 200 wa malembe lawa ma nga hundza. Kambe vona leswi Bibele se a li swi vulile khale swinene ka 3.500 wa malembe lawa ma nga hundza. Lerhani Yobo 36:27, 28, mi gama mi bula hi swivutiso leswi landzelaka:
I mpsini leswi swi ku hlamalisaka ka leswi Bibele li swi vulaka ka tindzimana leti?
Leswi u nga swi djondza ka tindzimana leti swa ku pfuna swaku u li tshemba hintamu Bibele?
5. Bibele li vulavule hi minchumu ya lisima leyi a yi nga se yendleka
Lerhani Esaya 44:27–45:2, mi gama mi bula hi xivutiso lexi landzelaka:
I mpsini leswi Bibele a li swi vulile hi ku helisiwa ka Babilona na ka ha chota 200 wa malembe swaku swi yendleka?
Mabuku lawa ma vulavulaka hi swilo leswi nga yendleka khale, ma kombisa swaku Korexe hosi ya Pérsia ni masonchwa ya yena va hlulile doropa la Babilona hi lembe la 539 A.E.C.b Vona va djikise mati ya nambu lowu a wu vhikela doropa va gama va nghena ka doropa hi swipfalu leswi a swi pfuliwile. Phela va hlule doropa la Babilona na va nga zanga va karhateka. Namuntlha, se ku hundza 2.500 wa malembe na leswo swi yendlekile naswona lani doropa la Babilona a li kumeka kona ku yo sala maribye ntsena. Vona leswi Bibele a li swi vulile.
Lerhani Esaya 13:19, 20, mi gama mi bula hi xivutiso lexi landzelaka:
Wuprofeta leli li hetisekise ku yini?
Leswi doropa la Babilona leli kumekaka aIraque li nga tshamisa xiswona namuntlha
6. Bibele se a li swi vulile leswi hi swi vonaka namuntlha
Bibele li hi byela swaku hi hanya “ka masiku ya wugamu” ya misava leyi ya ku biha. (2 Timotiya 3:1) Vona leswi Bibele li nga vula swaku a swi ta yendleka “ka masiku ya wugamu”.
Lerhani Matewu 24:6, 7, mi gama mi bula hi xivutiso lexi landzelaka:
I yini leswi Bibele li nga vula swaku a swi ta yendleka “ka masiku ya wugamu”?
Lerhani 2 Timotiya 3:1-5, mi gama mi bula hi swivutiso leswi landzelaka:
Bibele li vule swaku vanhu a va ta tshamisa ku yini ka masiku ya wugamu?
Ka leswi nga kombisiwa ka tindzimana leti, i mpsini u swi vonaka swi yendleka ka masiku ya hina?
VAN’WANI VA LI: “Bibele i buku la switoriya swa mavunhwa.”
Hi mavonelo ya wena, i mpsini leswi ku kholwisaka swaku Bibele li vulavula ntiyiso?
LESWI HI NGA SWI DJONDZA
Mabuku lama nga tsaliwa khale, siyensiya ni wuprofeta swi kombisa leswaku u nga li tshemba Bibele.
Ku kambela leswi hi nga swi djondza
Ku nga va swaku leswi Bibele li vulavulaka hi swona swi yendlekile hikakunene?
I mpsini leswi kombisaka swaku a siyensiya la pfumelelana ni Bibele?
Wa kholwa swaku Bibele li nga hi byela leswi nga ta yendleka ka nkama lowu taka? Hi mhaka muni?
LOKO U LAVA KU TIVA SWIN’WANI
Bibele la phazama loko li vulavula hi siyensiya?
“Ciência La Pfumelelana Ni Bibele?” (Nhlokomhaka leyi nga ka site la jw.org)
I yini leswi kombisaka swaku hi hanya ka “masiku ya wugamu”?
Vona swaku wuprofeta la Bibele leli vulavulaka hi mfumu wa Grécia li hetisekise ku yini.
Djondza hi leswi nga yendlekela wanuna mun’wani lweyi a a nga xi tshembi Xikwembu. Vona swaku wuprofeta la Bibele li ma txintxise ku yini mavonelo ya yena.
“A Ni Nga Kholwi Swaku Xikwembu Xi Kona” (Murindzi wa N.° 5 wa 2017)
a Wuprofeta ku vuliwa leswi Xikwembu xi hlayaka swaku swi ta yendleka ka nkama lowu taka.
b A.E.C., swi vula swaku “Na Yesu A Nga Se Ta Lani Misaveni,” E.C., swi vula swaku “Na Yesu Se A Tile Lani Misaveni.”