Tama U Chumayela Hi Lirhandzu!

1. I mpsini leswi hi nga swi djondza ka ntlhanganu wa lembe wa 2023?

KA NTLHANGANU wa lembe wa 2023,a ku ve ni ku yampsisiwa ka matwisiselo mayelana ni swin’wani leswi hi kholwaka ka swona, ni switiviso swa ku tsakisa mayelana ni ntirho wa hina wa ku chumayela. Hi xikombiso, hi kombiwe swaku swi nga yendleka vanhu van’wani va va ni nkateko wa ku tirhela Yehovha hambiloko Babilona Wamukulu se a helisiwile. Hi tlhele hi tivisiwa swaku ku sukela hi Novembro wa 2023, a swi nga ha ta laveka swaku vachumayeli va tsala hinkwaswu leswi va swi yendlaka ka ntirho wa ku chumayela. Ku nga va swaku ku txintxa loku ku yendla swaku ntirho wa hina wa ku chumayela wu nga ha na lisima hintamu? Ihim!

2. Hi mhaka muni ntirho wa ku chumayela wu li wa xihantla swoswi? (Marka 13:10)

² Ntirho wa ku chumayela wu ya wu va wa xihantla swinene siku ni siku. Hi mhaka muni? Hikusa a magamu ma ya ma tshinela hintamu. Vona leswi Yesu a nga swi vula hi ntirho wa ku chumayela ka masiku ya wugamu. (Lerha Marka 13:10.) Hi ku ya hi Matewu, Yesu a vule swaku mahungu ya ku tsakisa a ma ta chumayeliwa amisaveni hinkwayu na “magamu” ma nga se fika. (Mat. 24:14) Rito “magamu” li kombetela ka ku helisiwa ka misava ya Sathana. Yehovha se a li vekile “siku la kona ni nkama wa kona” leswaku a helisa misava leyi, naswona swoleswo swi ta yendleka ku nga li khale. (Mat. 24:36; 25:13; Min. 1:7) Siku leli li ya li tshinela swinene. (Rom. 13:11) Hi mhaka leyo, hi fanele hi chumayela hi xihantla na magamu ma nga se fika.

3. Hi swini swivangelo swi hi yendlaka hi chumayela?

³ Nkama hi pimisaka hi ntirho wa ku chumayela, hi fanele hi tivutisa xivutiso xa lisima xa ku fana ni lexi: Hi mhaka muni hi chumayela mahungu ya ku tsakisa? Hina hi chumayela hi mhaka ya lirhandzu. Hi chumayela hi mhaka ya leswi hi rhandzaka vanhu, hi rhandza mahungu ya ku tsakisa kambe xa lisima hintamu hileswi hi rhandzaka Yehovha ni vito la yena. A hi voneni pontu hi yin’we ni yin’we.

HI CHUMAYELA HIKUSA HA MA RHANDZA MAHUNGU YA KU TSAKISA

4. I mpsini leswi hi swi yendlaka loko hi byeliwa swilo swa ku tsakisa?

⁴ Wa khumbuka ndlela leyi u nga titwa hi yona nkama ku nga yendleka swilo swa ku tsakisa ka wutomi la wena? Swi nga yendleka mun’we ka ndjangu wa wena a psale n’wana, kumbe munhu mun’wani a ku nyike ntirho lowu a wu wu lava hintamu swinene. Ha tiyiseka swaku swi ku tsakisile hintamu ku yamukela mahungu wolawo ya ku tsakisa, funtshi a wu nga wu voni nkama wa ku byeletela maxaka ya wena ni vanghanu va wena. Phela ku yendleka minchumu ya ku fana loko hi yamukela mahungu ya ku tsakisa ya ku tlula hinkwawu, ku nga mahungu ya ku tsakisa ya Mfumu wa Xikwembu.

5. U titwise ku yini nkama u nga djondza mintiyiso ya le Bibeleni hi khambi la ku sungula? (Vona mafoto.)

⁵ Pimisa hi leswi u nga titwisa xiswona nkama u nga djondza mintiyiso ya le Bibeleni hi khambi la ku sungula. U tsumbule swaku Yehovha i Papayi wa wena lweyi a ku rhandzaka. A swi navela hintamu swaku u va mun’we wa vanhu lava va mu tirhelaka hi ku tshembeka. Naswona a tshembise ku helisa ku karhateka ni ku hlupheka hinkwaku. U tlhele u djondza hi ntshembo lowu nga kona ka lava va nga fa, wa leswaku hi ta tlhela hi va vona ka misava ya nyuwani. Leswi o va switsongo ka swona. (Mar. 10:29, 30; Yoh. 5:28, 29; Rom. 8:38, 39; Nhl. 21:3, 4) Mintiyiso leyi yi khumbe mbilu ya wena. (Luk. 24:32) Wena u swi rhandzile ku djondza hi swilo leswi. Naswona a wu nga ta swi kota ku tshama na swona, a wu lava ku swi byela vanhu van’wani! — Vona ni Yeremiya 20:9.

6. I mpsini leswi u nga swi djondza ka xikombiso xa makwerhu Ernest na Rose?

⁶ Pimisa hi leswi swi nga yendlekela Ernest.b Nkama na wa ha ni 10 wa malembe a feliwe hi papayi wa yena. Ernest a li: “A ni tivutisa swaku: ‘Indjhe papayi wa mina a ye tilweni? A ni nga ha ta tshuka ni mu vona ni siku ni lin’we?’ A ni va navela hintamu vana lava a va ha ni papayi.” Ernest a a ya ka simintela nkama ni nkama, a fika a khizama ka sirha la papayi wa yena a gama a khongela a ku: “Xikwembu na ku kombela, ni lava ku tiva swaku kasi papayi wa mina a kwini.” Loko se ku hundze kolomuyani ka 17 wa malembe na papayi wa yena a file, Ernest a nga yalanga ku djondzeliwa Bibele hi Timboni ta Yehovha. Swi mu tsakisile hintamu ku tiva swaku lava nga fa a va tivi nchumu, swi fana ni loko va yetlele wurhongo lalikulu. Naswona swi mu tsakisile hintamu ku tiva swaku Bibele li tshembisa swaku lava nga fa va ta pfuxiwa ka nkama lowu taka. (Ekl. 9:5, 10; Min. 24:15) Phela se a a ti kumile tinhlamulu ta swivutiso swa swinyingi leswi a swi mu karhata ku ringana malembe ya manyingi! Ernest a a swi rhandza hintamu ku djondza hi mintiyiso ya Bibele. Nsati wa yena Rose na yena a sungule ku djondza Bibele, naswona a a swi rhandza hintamu leswi a a swi djondza. Hi 1978, Ernest na Rose va tsakamisiwile. Phela a va swi rhandza hintamu ku byela maxaka ya vona, vanghanu va vona ni lava a va va yingisela mintiyiso ya lisima leyi a va yi djondzile. Hi mhaka leyo, Ernest na Rose va pfune vanhu va ku tlula 70 swaku va djondza ntiyiso va tlhela va tsakamisiwa.

7. Ku yendleka yini loko mintiyiso ya Bibele yi khumba timbilu ta hina? (Luka 6:45)

⁷ Loko hi yi rhandza mintiyiso ya Bibele, a hi nge swi koti ku miyela na yona. (Lerha Luka 6:45.) Hi titwa ku fana ni vadjondzisiwa va Yesu va minkama ya vapostolo lava va nga te: “Hina a hi nge tshiki ku vulavula hi leswi hi nga swi vona ni leswi hi nga swi twa.” (Min. 4:20) Phela hi yi rhandza hintamu mintiyiso ya Bibele lakakuva hi lava ku yi byela vanhu va vanyingi hilani hi nga kotaka hi kona.

HI CHUMAYELA HIKUSA HI RHANDZA VANHU

8. I ntxini xi nga hi pfunaka leswaku hi byela vanhu van’wanyani mahungu ya ku tsakisa? (Vona kwadru leli nge “Rhandza Vanhu — U Va Djondzisa.”) (Vona mufoto.)

⁸ Ku fana na Yehovha ni N’wana wa yena, hina ha va rhandza vanhu. (Swiv. 8:31; Yoh. 3:16) Hina ha va twela vanhu lava va ku a va xi “tivi Xikwembu” naswona a va “na ntshembo.” (Efe. 2:12) Hi mhaka ya leswi va nga taleliwa hi swikarhatu, swi fana ni loko va li ka xikhele xaxikulu swinene. Kambe hina hi ni goda leli li nga va pfunaka swaku va huma ka xikhele xolexo, ku nga mahungu ya ku tsakisa ya Mfumu. Lirhandzu leli hi nga na lona ni ku va twela wusiwana swi hi yendla hi yendla hinkwaswu leswi hi nga swi kotaka swaku hi va byela mahungu ya ku tsakisa. Mahungu lawa ya ku tsakisa ma nga khumba timbilu ta vona ni ku va nyika ntshembo. Ma va pfuna swaku va va ni wutomi la ku yampsa swoswi ni “wutomi la ntiyiso”, ku nga wutomi la ku kala li nga heli ka nkama lowu taka, ka misava ya nyuwani ya Xikwembu. — 1 Tm. 6:19.

9. I mpsini leswi hi va basopisaka hi swona vanhu, naswona hi mhaka muni? (Ezekiyele 33:7, 8)

⁹ Leswi hi va rhandzaka vanhu swi yendla leswaku hi va basopisa leswaku a misava leyi ya ku biha yi ta helisiwa ku nga li khale. (Lerha Ezekiyele 33:7, 8.) Phela ha va twela wusiwana vanhu hinkwavu, ku patsa ni maxaka ya hina lawa ma kalaka ma nga li Timboni ta Yehovha. Vanhu va vanyingi va khomekile hi swilo swa siku ni siku na va nga swi tivi leswi swi taka, ku nga “nhlomulu wawukulu lowu kalaka wu nga se tshama wu humelela wa ku fana na wona ku sukela misava yi va kona ku ta fikela swoswi, naswona a wu nga ha ta tlhela wu va kona.” (Mat. 24:21) Phela hi lava swaku vanhu hinkwavu va tiva leswi nga ta yendleka ka nkama wolowo wa ku yavanyisa, ku nga ku helisiwa ka wukhongeli hinkwalu la mavunhwa ni ku helisiwa ka misava hinkwayu ya ku biha ka nyimpi ya Armajedoni. (Nhl. 16:14, 16; 17:16, 17; 19:11, 19, 20) Hi khongelela swaku vanhu va vanyingi va yingisa leswi hi va byelaka swona, va tlhela va tipatsa na hina va langa ku gandzela Yehovha na ka ha li swoswi. Kambe, ku ta yendleka yini hi lava va kalaka va nga lavi ku yingisa, ku patsa ni maxaka ya hina?

10. Hi mhaka muni swi li swa lisima hintamu kuva hi tama hi basopisa vanhu hi leswi swi nga ta yendleka ku nga li khale?

¹⁰ Hilani swi nga tlhamuseliwa hi kona ka nhlokomhaka leyi nga hundza, swi nga yendleka vanhu van’wani lava va nga ta va na va vone ku helisiwa ka Babilona Wamukulu, va sungula ku kombisa lipfumelo ka Yehovha va tlhela va pona. Se loko ku li leswo, i swa lisima hintamu kuva hi tama hi basopisa vanhu. Pimisa hi leswi: Leswi hi va byelaka swona namuntlha, hi swona leswi va nga ta swi khumbuka ka nkama lowu taka. (Vona ni Ezekiyele 33:33.) Swi nga yendleka vanhu va khumbuka leswi hi nga tshama hi va basopisa hi swona ivi va tipatsa na hina swaku hi tirhela Yehovha xikan’we na nkama wa ha pfumela. Ku fana ni muvoneleli wa djele la Filipiya lweyi a nga sungula ku tirhela Yehovha ndzhaku ka loko ‘misava yi tsekatsekile’, swi nga yendleka vanhu van’wani lava swoswi va kalaka va nga lavi ku twa nchumu hi mahungu ya ku tsakisa, va txintxa loko va vona ku helisiwa ka Babilona Wamukulu swa kola na kola. — Min. 16:25-34.

HI CHUMAYELA HIKUSA HI RHANDZA YEHOVHA NI VITO LA YENA

11. Hi nga mu nyikisa ku yini Yehovha ku hloniphiwa, ku dzunisiwa ni matimba? (Nhlawutelo 4:11) (Vona mafoto.)

¹¹ Nchumu xa lisima hintamu lexi hi yendlaka hi chumayela mahungu ya ku tsakisa hileswaku ha mu rhandza Yehovha ni vito la yena la ku kwetsima. Ndlela yin’wani ya ku dzunisa Yehovha i ku chumayela mahungu ya ku tsakisa. (Lerha Nhlawutelo 4:11.) Ha pfumela swaku swa mu fanela Yehovha ku yamukela ku dzunisiwa, ku hloniphiwa ni matimba hi vanhu lava va mu tirhelaka hi mbilu hinkwayu. Hina hi nga mu nyika ku hlonipheka ni ku dzunisiwa Yehovha hi ku komba vanhu swaku impela hi yena ‘a nga tumbuluxa swilo hinkwaswu’ ni leswaku hina hi kona hi mhaka ya yena. Hi nga tlhela hi mu nyika matimba ya hina hi ku tirhisa ntamu, nkama ni swilo swa hina leswaku hi bula ni van’wani hi mahungu ya ku tsakisa hi ku ya hi swiyimu swa hina. (Mat. 6:33; Luk. 13:24; Kol. 3:23) Hi marito man’wani, hi chumayela hikusa hi rhandza Yehovha, Xikwembu xa hina xa lirhandzu. Naswona hi navela ku bula ni van’wani hi vito la Yehovha ni leswi a nga tshamisa xiswona. Hi mhaka muni?

12. Hi li kwetsimisisa ku yini vito la Yehovha nkama hi chumayelaka?

¹² Leswi hi mu rhandzaka hintamu Yehovha swi hi yendla hi lava ku kwetsimisa vito la yena. (Mat. 6:9) Hi kwetsimisa vito la Yehovha Xikwembu hi ku va hi byela vanhu swaku leswi Sathana a nga swi vula hi yena i mavunhwa. (Gen. 3:1-5; Yob. 2:4; Yoh. 8:44) Nkama hi chumayelaka hi swi lava hintamu ku vulavula ntiyiso hi Yehovha ni ku byela vanhu lava va lavaka ku hi yingisa swaku Yehovha i Xikwembu xa ku tshamisa ku yini. Phela hi swi lava hintamu swaku vanhu va swi tiva swaku a wumunhu la lisima hintamu leli a nga na lona i lirhandzu, ni leswaku ndlela leyi a fumaka hi yona i yinene naswona yi lulamile. Naswona Mfumu wa yena ku nga li khale wu ta helisa ku hlupheka hinkwaku, wu tisa ku rhula ni ntsaku ka vanhu hinkwavu. (Ps. 37:10, 11, 29; 1 Yo. 4:8) Phela loko hi vulavula hi Yehovha a ku chumayeleni, hi kwetsimisa vito la yena. Hi tlhela hi yendla leswi nyimeliwaka ka Mboni yin’wani ni yin’wani ya Yehovha. Hi mhaka muni hi vula leswo?

13. Hi mhaka muni ku li nkateko ka hina ku vitaniwa Timboni ta Yehovha? (Esaya 43:10-12)

¹³ Yehovha a hi langile swaku hi va “timboni” ta yena. (Lerha Esaya 43:10-12.) Ka malembenyana ma nga hundza, karta lin’wani la Ntlawa lowu Rhangelaka li vule leswi: “A nkateko wawukulu lowu munhu a nga vaka na wona i wa ku va a vitaniwa Mboni ya Yehovha.”c Hi mhaka muni hi vula leswi? Pimisa hi xikombiso lexi. A hi nge u lava munhu lweyi a nga ta ku nyimelela atribunali. Indjhe a wu nga ta langa munhu lweyi u mu tivaka kahle u tlhela u mu tshemba, lweyi a tiviwaka hi ku va munhu wa ku tshembeka? Phela hi leswo Yehovha a nga swi yendla. Nkama a nga hi langa swaku hi va Timboni ta yena a kombise swaku a hi tiva kahle naswona wa tiyiseka swaku hi ta byela vanhu van’wani swaku yena i Xikwembu xin’we xa ntiyiso. Ka hina i nkateko wawukulu ku va Timboni ta yena, hi mhaka leyo hi londzola nkama wun’wani ni wun’wani lowu hi pfulekelaka swaku hi byela van’wani hi vito la yena, ni swaku swilo hinkwaswu leswi Sathana a nga swi vula i mavunhwa. Hi ku yendla leswo, hi hanya hi ku pfumelelana ni vito la hina leli nge: Timboni ta Yehovha! — Ps. 83:18; Rom. 10:13-15.

HI TA CHUMAYELA ANZE MAGAMU

14. Hi swini swilo swa ku tsakisa leswi nga ta yendleka ku nga li khale?

¹⁴ Ku pimisa hi leswi swi nga ta yendleka ku nga li khale swa hi tsakisa swinene! Hi ku katekisiwa hi Yehovha, hi nyimela swaku vanhu va ku tala va pfumela ntiyiso na nhlomulu wawukulu wu nga se na sungula. Naswona ha tsaka hintamu swinene hi ku tiva swaku swi nga yendleka vanhu van’wani va tshika misava ya Sathana loko nhlomulu wawukulu se wu sungulile, ku nga nkama wa ku karhata swinene ka xitoriya xa vanhu, ivi va gandzela Yehovha swin’we na hina! — Min.13:48.

15-16. I mpsini leswi hi nga ta tama hi swi yendla, naswona anze siku muni?

¹⁵ Na ha ha nyimela swaku nkama wolowo wu fika, swoswi hi ni ntirho lowu hi faneleke hi wu yendla ku nga ntirho wa lisima hintamu lowu kalaka wu nga ta tlhela wu phindhiwa ni siku ni lin’we, ku nga ku chumayela mahungu ya ku tsakisa ya Mfumu wa Xikwembu amisaveni hinkwayu. Hi nkama wolowu wa wun’we hi fanele hi basopisa vanhu swaku a ku helisiwa ka misava leyi ya ku biha ku le kusuhi swinene. Se loko nkama wolowo wa ku yavanyisa wu ta fika, va ta swi tiva swaku leswi a hi swi chumayela a swi ta hi ka Yehovha Xikwembu. — Eze. 38:23.

¹⁶ Se i mpsini leswi hi lavaka ku swi yendla? Leswi hi rhandzaka mahungu ya ku tsakisa, hi rhandza vanhu funtshi ku tlula hinkwaswu hi rhandzaka Yehovha Xikwembu ni vito la yena, hi ta tama hi chumayela mahungu ya ku tsakisa hi xihantla ni ku hiseka, anze Yehovha a ku: “Xega!”