Chumayela Hi Ku Hiseka Ku Fana Na Yesu

1. I yini xi yendlaka hina vanhu va Yehovha hi hambana ni wukhongeli leli tivulaka Vakreste?

LEXI yendlaka hina vanhu va Yehovha hi hambana ni wukhongeli lin’wani leli tivulaka Vakreste hi mhaka hi tirha hi ku hisekaa ka ntirho wa ku chumayela. (Tit. 2:14) Kambe, ku vula ntiyiso minkama yin’wanyani hi nga ha godola, hi nga ha hiseki. Swi nga yendleka na wena u titwa ku fana ni doda lin’wani la ku hiseka leli nge te: “Minkama yin’wani swa ni godolisa ku ya ka ntirho wa ku chumayela.”

2. I mpsini leswi nga hi hetaka ntamu ka ntirho wa ku chumayela?

² Swi nga yendleka hi titwa ingaku mintirho yin’wani leyi hi yi yendlaka ka nhlengeletanu ya Yehovha ya tsakisa ku tlula ntirho wa ku chumayela. Hi xikombiso, swi nga yendleka hi tirha ka ku yaka Tiyindlo ta Wugandzeli, ku basisa, ku lunghisa ni ku pfuna vamakwerhu lava nga kumana ni tinghozi. Ka mintirho leyo hi tirhisana ni vamakwerhu lava va hi rhandzaka va tlhela va hi khensa hi leswi hi swi yendlaka funtshi hi tirhisana na vona hi ku rhula, se leswo swi nga hi yendla hi tsaka hintamu. Kambe loko hi li ka ntirho wa ku chumayela, swi nga yendleka se hi ni malembe na hi tirha ka ndhawu yoleyi ya yin’we naswona vanhu va vanyingi va nga ma yamukeli mahungu ya ku tsakisa; leswo swi nga hi heta ntamu ngopfungopfu loko va hi kaneta. Ha swi tiva swaku leswi magamu ma yaka ma tshinela hi ta tama hi kanetiwa hintamu. (Mat. 10:22) Se i yini lexi nga hi pfunaka swaku hi nga godoli, kambe hi tama hi hisekela ntirho wa ku chumayela?

3. Hi nga djondza yini ka xifaniso xa Yesu lexi nga ka Luka 13:6-9?

³ Lexi nga hi pfunaka ku hisekela ntirho wa ku chumayela i ku tekelela xikombiso xa Yesu. Nkama na a li lani misaveni a a wu hisekela ntirho wa ku chumayela naswona loko nkama wu ya wu famba a a ya a wu hisekela hintamu ntirho lowu. (Lerha Luka 13:6-9.) Ka khambi lin’wani a fananise ntirho lowu a a wu yendla ni minzamu leyi wanuna mun’wani lweyi a a ni nsimu ya mawuvha a a yi yendla swaku a hlayisa nsinya wa yena wa nkuwa. Wanuna lweyo a hete malembe manharhu na a hlayisa nsinya wa yena, kambe a wu nga psali; hi ku fana, Yesu a hete kolomu ka malembe manharhu na a chumayela Vayuda, kambe ku tala ka vona a va nga mu yingisi. Kambe ku fana ni wanuna lwiyani, a nga godolanga, a tame a chumayela mahungu ya ku tsakisa funtshi loko nkama wu ya wu famba a tame a wu hisekela hintamu ntirho wa ku chumayela.

4. Hi swini 4 wa swilo leswi nga pfuna Yesu leswi hi nga ta djondza hi swona?

⁴ Ka nhlokomhaka leyi hi ta vona swaku Yesu a swi kombisise ku yini swaku a a hiseka ka ntirho wa ku chumayela, ngopfungopfu ka 6 wa tiwheti ta yena ta wugamu lani misaveni. Ku djondza hi leswi Yesu a nga swi djondzisa ni xikombiso xa yena swi ta hi pfuna swaku na hina hi tama hi hiseka ka ntirho wa ku chumayela. Se swoswi a hi voneni 4 wa swilo leswi nga pfuna Yesu, leswi na hina swi nga hi pfunaka: 1) A a pimisa hi ku rhandza ka Xikwembu, 2) a a li tiva kahle wuprofeta, 3) a a tshemba swaku Yehovha a ta mu pfuna, kasi xa wu 4) a a tshemba swaku van’wani ka lava a a va chumayela a va ta ma yamukela mahungu ya ku tsakisa.

A A PIMISA HI KU RHANDZA KA XIKWEMBU

5. I yini lexi kombisaka swaku Yesu a a rhangisa ku rhandza ka Yehovha?

⁵ Yesu a a wu hisekela ntirho wa ku chumayela “mahungu ya ku tsakisa ya Mfumu” hikusa a a swi tiva swaku hi leswi Yehovha a a lava swaku a swi yendla. (Luk. 4:43) Phela ntirho wa ku chumayela a ku li wona wa lisima hintamu ka wutomi la yena. Hi leswo swi nga yendla swaku ka tiwheti ta wugamu ta yena lani misaveni a famba “hi madoropa ni swidoropani,” a djondzisa vanhu. (Luk. 13:22) A tlhele a trenara vadjondzisiwa van’wani swaku na vona va wu yendla ntirho lowo. — Luk. 10:1.

6. Mintirho yin’wani leyi hi yi yendlaka yi yelanisa ku yini ni ntirho wa ku chumayela? (Vona mufoto.)

⁶ Ninamuntlha a ntirho wa ku chumayela hi wona wa lisima ku tlula mintirho hinkwayu leyi Yehovha na Yesu va lavaka swaku hi yi yendla. (Mat. 24:14; 28:19, 20) Phela swilo hinkwaswu leswi hi swi yendlaka namuntlha swi fambisana ni ntirho wa ku chumayela. Hi xikombiso, hi yaka Tiyindlo ta Wugandzeli hikusa hi lava swaku lava djondzaka ntiyiso va ta gandzela Yehovha ka tona, ntirho hinkwawu lowu yendliwaka Betele wu seketela ntirho wa ku chumayela. Ntirho wa ku pfuna vamakwerhu loko va humeleliwe hi tinghozi wu va pfuna swaku va kuma leswi va swi lavaka va tlhela va tlhelela ka mintirho ya vona ya Wukreste ku patsa ni ka ntirho wa ku chumayela. Se loko hi khumbuka leswaku ntirho wa ku chumayela hi wona wa lisima ku tlula mintirho hinkwayu leyi Yehovha a lavaka swaku hi yi yendla, hi ta yendla hinkwaswu leswi hi nga swi kotaka leswaku hi wu hisekela. János, doda lin’wani la le Hungria a vule leswi: “Minkama hinkwayu ni tshamela ku tikhumbukisa leswaku ntirho wa ku chumayela hi wona wa lisima hintamu lowu Yehovha a lavaka leswaku ni wu yendla.”

7. Hi mhaka muni Yehovha a lava hi tama hi chumayela? (1 Timotiya 2:3, 4)

⁷ Xin’wani xi nga hi pfunaka ku tama hi hiseka ka ntirho wa ku chumayela i ku tekelela Yehovha. Yehovha a lava swaku ku tala ka vanhu va twa mahungu ya ku tsakisa leswaku va ponisiwa. (Lerha 1 Timotiya 2:3, 4.) Se a hi nyika swilo swa ku hambanahambana leswi hi pfunaka ku yampsisa ndlela leyi hi chumayelaka hi yona. Hi xikombiso, broxura leli nge Rhandza Vanhu — U Va Djondzisa la hi pfuna ku sungula mabulu leswaku hi kota ku djondza ni vanhu Bibele. Phela hambiloko vanhu lava hi va chumayelaka va nga hi yingisi swoswi, loko hi nga godoli, hi tama hi va chumayela hi ta va na hi va nyika nchumu lexi nga ta va pfuna leswaku va yendla xiboho na nhlomulu wawukulu wu nge se hela.

A A LI TIVA KAHLE WUPROFETA

8. Ku tiva wuprofeta swi mu pfunise ku yini Yesu swaku a wu tirhisa kahle nkama lowu a a li na wona?

⁸ Yesu a a swi tiva swaku a wuprofeta la Bibele a li ta hetisekisa ku yini ka yena. Hi xikombiso, a a swi tiva swaku a a to heta malembe manharhu ni hafu ntsena na a chumayela. (Dan. 9:26, 27) Funtshi a a wu tiva nkama lowu a a ta fa hi wona ni swaku a a ta dlayisiwa ku yini. (Luk. 18:31-34) Hi mhaka leyo a wu tirhise kahle nkama wa yena hi ku va a hisekela ntirho wa ku chumayela.

9. Ku twisisa wuprofeta leli nga ka Bibele swi hi pfunisa ku yini?

⁹ Na hina namuntlha ha swi vona swilo swa swinyingi leswi nga profetiwa ka Bibele na swi yendleka, funtshi leswo swi hi yendla hi tiyiseka swaku magamu ma kusuhi. Hi xikombiso, swilo leswi yendlekaka namuntlha ni ndlela leyi vanhu va hanyaka hi yona swi fambisana kahle ni leswi Bibele a li swi vulile hi masiku ya wugamu. A ku lwisana loku ku nga kona ka Mfumu wa Misava Hinkwayu wa Anglo-América ni Rússia ni matiko lawa ma mu seketelaka, ku hetisisa wuprofeta leli a li vula swaku ka nkama wa wugamu a hosi ya norte ni ya sul a va ta tshamela ku lwa. (Dan. 11:40) Naswona ha swi tiva swaku minkondzo ya xifaniso leyi ku vulavuliwaka hi yona ka Daniyele 2:43-45 yi nyimela Mfumu wa Misava Hinkwayu wa Anglo-América. Se leswo swi hi yendla hi swi vona swaku a ka ha choti kule leswaku Mfumu wa Xikwembu wu ta helisa mimfumu hinkwayu ya vanhu; funtshi ku twisisa wuprofeta hinkwalu leli swi hi yendla hi twisisa swaku a mahungu ya ku tsakisa ya Mfumu i ya lisima swinene naswona hi fanele hi ma chumayela hi xihantla hikusa nkama lowu nga sala i wutsongo hintamu.

10. Wuprofeta la Bibele li tlhela li hi pfunisa ku yini?

¹⁰ A wuprofeta la Bibele li tlhela li vulavula hi ntshembo lowu nga pfunaka vanhu vavanyingi. Hi xikombiso, makwerhu Carrie lweyi a tirhaka aRepública Dominicana a li: “Loko ni pimisa hi swilo swa ku hlamalisa leswi Yehovha a hi tshembisaka swona swi ni yendla ni swi lava hintamu ku byela van’wani leswaku na vona va swi tiva. Phela vanhu namuntlha va kumana ni swikarhatu swa swinyingi naswona swi laveka hintamu swaku va swi tiva switshembiso leswi.” Wuprofeta leli nga ka Bibele li tlhela li hi pfuna ku vona swaku Yehovha a na hina ka ntirho lowu wa ku chumayela. Hi xikombiso, makwerhu Leila wa Hungria a li: “Leswi buku la Esaya 11:6-9 li swi vulaka swi ni pfuna ku vona swaku vanhu va nga swi kota ku txintxa hi ku pfuniwa hi Yehovha, se ni lava ku yendla hinkwaswu leswi ni nga swi kotaka swaku ni chumayela vanhu hinkwavu hambi hi lava tikombaka ingi a va nge pfumeli.” Se makwerhu Christopher wa le Zâmbia a vula leswi: “A buku la Marka 13:10 li profete swaku a mahungu ya ku tsakisa ma ta chumayeliwa amisaveni hinkwayu. Se a ku vona swilo leswi na swi yendleka namuntlha ni tlhela ni wu yendla ntirho lowu, i nkateko wawukulu ka mina.” Se wena ke, hi lini wuprofeta la Bibele leli ku pfunaka swaku u tama u chumayela hi ku hiseka?

A A TSHEMBA SWAKU YEHOVHA A TA MU PFUNA

11. Hi mhaka muni a swi laveka swaku Yesu a tshemba Yehovha kuva a tama a chumayela hi ku hiseka? (Luka 12:49, 53)

¹¹ Yesu a a swi tiva swaku Yehovha a a ta mu pfuna swaku a tama a hisekela ntirho wa ku chumayela. Hambileswi a a tirhisa marito yamanene nkama lowu a a chumayela, a a swi tiva swaku vanhu van’wani a va ta mu kaneta funtshi a va nga ta ma tsakela mahungu lawa a a ma chumayela. (Lerha Luka 12:49, 53.) Naswona ntirho wa ku chumayela lowu Yesu a a wu yendla wu yendle swaku varhangeli va wukhongeli va zama ku mu dlaya makhambi ya manyingi. (Yoh. 8:59; 10:31, 39) Hambileswo, Yesu a nga godolanga ku tama a chumayela hikusa a a swi tiva swaku Yehovha a a li na yena, hi mhaka leyo a te: “A ni noxe, kambe Papayi lweyi a nga ni rhuma a na mina . . . a nga ni tshikanga noxe hikusa nkama hinkwawu ni yendla leswi mu tsakisaka.” — Yoh. 8:16, 29.

12. Yesu a va pfunise ku yini vadjondzisiwa va yena swaku va tama va chumayela hambiloko va hluphiwa?

¹² Yesu a pfune vadjondzisiwa va yena leswaku va tshemba swaku Yehovha a a ta va pfuna. A va tiyisekisile hi ku phindhaphindha swaku hambi vo hluphiwa, Yehovha a a ta va pfuna. (Mat. 10:18-20; Luk. 12:11, 12) Leswi a a swi tiva swaku vanhu van’wani a va ta va kaneta, a tlhele a va basopisa leswaku va tivonela nkama lowu va chumayelaka. (Mat. 10:16; Luk. 10:3) A tlhela a va byela swaku a va nga fanelanga va sindzisa munhu loko a nga swi lavi ku twa mahungu ya ku tsakisa. (Luk. 10:10, 11) Naswona a va byele swaku a va fanele va baleka loko va xanisiwa. (Mat. 10:23) Phela hambileswi Yesu a a hiseka ka ntirho wa ku chumayela a tlhela a tshemba Yehovha, a a nga veki wutomi la yena nghozini na swi nga bohi. — Yoh. 11:53, 54.

13. I yini xi ku tiyisekisaka swaku Yehovha a ta ku pfuna?

¹³ Ninamuntlha, swi lava hi pfuniwa hi Yehovha leswaku hi tama hi hisekela ntirho wa ku chumayela hambiloko hi kanetiwa. (Nhl. 12:17) Ha tiyiseka swaku a ta hi pfuna hikusa ka xikhongelo xa yena lexi nga gama xi tsaliwa ka Yohani ndzima 17, Yesu a kombele Yehovha swaku a pfuna vapostolo va yena. Naswona Yehovha a xi hlamulile xikhongelo xolexo. Hi vula leswo hikusa ka buku la Mintirho ku kombisiwa swaku Yehovha a va pfunile vapostolo leswaku va tama va hisekela ntirho wa ku chumayela hambiloko va kanetiwa. Nkama lowu Yesu a nga yendla xikhongelo lexiyani a tlhele a kombela ka Yehovha swaku a pfuna vanhu lava a va ta yamukela mahungu ya ku tsakisa lawa a ma chumayeliwa hi vapostolo. Phela na wena u mun’we wa vanhu volavo, leswi nge xikhongelo lexiyani xa tirha ni ka wena hikusa Yehovha wa ha tama a ku pfuna leswaku u hisekela ntirho wa ku chumayela; se u nga tiyiseka swaku minkama hinkwayu Yehovha a ta ku pfuna ku fana ni leswi a nga pfuna vapostolo. — Yoh. 17:11, 15, 20.

14. Hi mhaka muni hi tiyiseka swaku hi ta swi kota ku tama hi chumayela mahungu ya ku tsakisa hambiloko swi karhata? (Vona mufoto.)

¹⁴ Leswi magamu ya misava leyi ya ku biha ya Sathana ma nga kusuhi, swi nga ha hi karhatela ku tama hi chumayela mahungu ya ku tsakisa hi ku hiseka, kambe Yesu a hi byele swaku Yehovha a a ta hi pfuna minkama hinkwayu. (Luk. 21:12-15) Ku fana na Yesu ni vadjondzisiwa va yena, hina a hi va sindzisi vanhu leswaku va hi yingisa naswona a hi holovisani na vona, kambe ha pfumela leswaku mun’wani ni mun’wani a ta tiyendlela xiboho xa yena. Hambi ka matiko lawa ntirho wa hina wu tsimbisiwaka, vamakwerhu va tama va chumayela hi ku hiseka hileswi va tshembaka Yehovha. Ku fana ni leswi Yehovha a nga pfuna Vakreste va minkama ya khale, na hina a ta hi pfuna leswaku hi “chumayela mahungu ya ku tsakisa hi ku helela”. (2 Tm. 4:17) Se tshemba Yehovha, yena a ta ku pfuna swaku u tama u chumayela hi ku hiseka.

A A TSHEMBA SWAKU VAN’WANI VA TA MU YINGISA

15. Hi swi tivisa ku yini swaku van’wani a va ta kholwa ka Yesu loko a va chumayela?

¹⁵ Yesu a a tama a wu hisekela ntirho wa ku chumayela funtshi a a tsaka nkama lowu a a wu yendla hikusa a a swi tiva swaku van’wani ka lava a a va chumayela a va ta ma yamukela mahungu wolawo. Hi xikombiso, loko ku hundze kolomu ka lembe na a chumayela a swi vonile swaku vanhu vavanyingi lava a a va chumayela a va mu yingisela, funtshi a game a va fananisa ni masimu lawa ma nga wupfa swaku ma tshoveliwa. (Yoh. 4:35) Loko se ku hundze kolomuyani ka lembe a byele vadjondzisiwa va yena a ku: “Phela ntshovelo i wukulu.” (Mat. 9:37, 38) Naswona hi ku famba ka nkama a tlhele a phindha marito wolawo nkama lowu a nga te: “Phela ntshovelo i wukulu . . . kombelani N’winyi wa ntshovelo swaku a rhumela vatirhi ka ntshovelo wa yena.” (Luk. 10:2) Leswo swi kombisa swaku Yesu a a tiyiseka swaku vanhu lava a a va chumayela a va ta ma yamukela mahungu ya ku tsakisa funtshi nkama lowu a a vona leswo na swi yendleka, a a tsaka hintamu. — Luk. 10:21.

16. Swifaniso swimbirhi leswi Yesu a nga swi tirhisa swi va pfunise ku yini vadjondzisiwa va yena? (Luka 13:18-21) (Vona mufoto.)

¹⁶ Yesu a tirhise swikombiso swimbirhi leswaku a pfuna vadjondzisiwa va yena leswaku va nga godoli ku tama va chumayela ni ku tlhela a va komba swaku ntirho wa vona wa ku chumayela a wu ta tisa mihandzu yayinene. (Lerha Luka 13:18-21.) Ka xikombiso xa ku sungula a vule swaku ku fana ni mbewu ya sinapi leyi loko yi byaliwa yi gamaka yi va nsinya wawukulu, a ntirho wa ku chumayela mahungu ya ku tsakisa a wu ta ya wu kula. Se ka xa wumbirhi a vule swaku ku fana ni fermentu leli kukumukisaka trigu, a ntirho wa ku chumayela mahungu ya ku tsakisa a wu ta ya wu hangalaka amisaveni hinkwayu funtshi lava va ma pfumelaka a va ta txintxa mahanyelo ya vona hambiloko swi nga tekeli ku tikomba hi nkama wolowo. Yesu a tirhise swikombiso leswimbirhi swaku a komba vadjondzisiwa va yena swaku ntirho wa vona a wu ta pfuna vanhu vavanyingi.

17. I mpsini leswi hi yendlaka hi tama hi chumayela hi ku hiseka?

¹⁷ Ku vona swaku vanhu vavanyingi amisaveni hinkwayu va ma yamukela mahungu ya ku tsakisa swi hi yendla hi tama hi chumayela hi ku hiseka. Hi xikombiso, ma milhões ya vanhu va va kona ka Xitsundzuxu lembe ni lembe va tlhela va djondza Bibele. Naswona vanhu vavanyingi va tsakamisiwa va tlhela va chumayela mahungu ya ku tsakisa. A hi swi tivi swaku i vanhu vangaki lava nga ta pfumela mahungu ya ku tsakisa ka masiku ya hina, leswi hi swi tivaka hileswaku Yehovha a tama a hlengeletela xitshungu xaxikulu lexi nga ta pona nhlomulu wawukulu. (Nhl. 7:9, 14) Yehovha N’winyi wa ntshovelo, wa swi tiva swaku vanhu vavanyingi va nga ha ma pfumela mahungu ya ku tsakisa. Se ku tiva leswo swi hi yendla hi tama hi hiseka ka ntirho wa ku chumayela.

18. I mpsini leswi vanhu va nga ta swi twisisa loko va hi vona hi chumayela?

¹⁸ Ku sukela khale vadjondzisiwa va Yesu va tiviwa hi ku hiseka ka ntirho wa ku chumayela. Hi xikombiso, vapostolo a va chumayela hi ku hiseka va tlhela va nga chavi nchumu, leswi swi nga yendla swaku vanhu va nkama lowuyani “va swi twisisa swaku a va tshama na Yesu.” (Min. 4:13) Se ninamuntlha, loko vanhu va hi vona na hi hiseka ka ntirho wa ku chumayela va ta swi twisisa swaku hi tekelela Yesu.