Khanimambu Yehovha Hi Ku Hi Rivalela Swidjoho Swa Hina!

1-2. Hi mhaka muni xiyimu xa hina xi fana ni xa jovhem leli ku vulavuliwaka hi lona ka paragrafu 1?

PIMISA hi jovhem leli nga kula ka ndjangu lowu nga ganya. Siku lin’wani ku humelele swa ku twelisa ni wusiwana. Vapsali va lona va file ka nghozi; se leswo swi li tshove mbilu jovhem leli. Xin’wani lexi nga tlhela xi humelela, li tsumbule swaku vapsali va lona a va tirhise male hinkwayu va tlhela va siya swikweneti swa ku tala. Se handle ka ku va li tikhorisa hi tshomba leli nga siyiwa hi vapsali va lona, a li fanele li hakela swikweneti leswi va nga swi siya. Vanhu va sungule ku li londza leswaku li hakela swikweneti, kambe lona a li nga na male ya ku hakela swikweneti swoleswo.

² Na hina hi le ka xiyimu xa ku fana, hikusa vapsali va hina Adamu na Evha a va ni tshomba la linyingi naswona a va tshama ka ndhawu ya ku xonga lani a va ta hanya wutomi la ku kala li nga heli. (Gen. 1:27; 2:7-9) Kambe hi ku tsopeta ka tihlo hinkwaswu swi helile, naswona tshomba leli va nga li siyela vana va vona ku ve xidjoho ni lifu. (Ps. 49:8) Hi leswo Bibele li swi vulaka ka Varoma 5:12, loko li ku: “Hi mhaka leyo, leswi xidjoho xi nga nghena misaveni hi munhu mun’we na lona lifu li nghenile hi mhaka ya xidjoho, se lifu li tlulele vanhu hinkwavu hikusa hinkwavu va djohile.”

3. Hi mhaka muni swidjoho swa hina swi fana ni swikweneti?

³ Yesu a fananise swidjoho ni swikweneti. (Mat. 6:12; Luk. 11:4) Loko hi djoha swi fana ni loko hi txeneka nchumu ka Yehovha. Phela swi lava ku hakeliwa. Se xikweneti lexi hi to tshika ku va na xona ntsena loko hi fa, kambe na ha ha hanya hi ta tama hi va na xona. — Rom. 6:7, 23.

4. a) A ku ta yendleka yini hi hinkwavu lava va djohaka loko a vo kala va nga pfuniwi? (Tipisalema 49:7-9) b) Ka Bibele, rito leli nge “xidjoho” li vula yini? (Vona kwadru leli nge “Xidjoho.”)

⁴ Phela loko Yehovha a a yo kala a nga yendlanga nchumu, hina a hi nga ta za hi swi kota ku hakela xikweneti xa xidjoho. (Lerha Tipisalema 49:7-9.) Funtshi a hi nga ta va ni ntshembo wa ku hanya wutomi la ku kala li nga heli, ku pfuxiwa ka vafi kumbe ku tlhela hi kuma swilo hinkwaswu leswi Adamu na Evha va nga swi luza. Ku vula ntiyiso, a hi to fana ni swiharhi: Hi psaliwa namuntlha, mundzuku hi fa swi hela kolanu. — Ekl. 3:19; 2 Pe. 2:12.

5. Yehovha a hi pfunise ku yini ku hakela swikweneti swa swidjoho swa hina? (Vona mufoto .)

⁵ Pimisa hi xikombiso xa jovhem leli hi nga bula hi lona ku sunguleni. I mpsini leswi a swi ta yendleka loko a ko humelela munhu wa ku ganya lweyi a nga tinyimisela ku hakela swikweneti swa djaha leli? A hi kanakani swaku jovhem leli a li ta tsaka swinene, funtshi a li ta pfumela ku hakeleliwa swikweneti. Hilani ku fanaka, Papayi wa hina wa lirhandzu Yehovha a hi nyike prezenti leli li nga swi kota ku hakela swidjoho swa hina, leswi hi nga swi kuma hi mhaka ya Adamu. Yesu a tlhamusele prezenti leli hi ndlela leyi: “Xikwembu xi rhandze misava swinene xi za xi nyikela hi N’wana wa xona lweyi a nga psaliwa a li yexe, swaku lweyi a pfumelaka ka yena a nga helisiwi, kambe a kuma wutomi la ku kala li nga heli.” (Yoh. 3:16) Phela prezenti leli li hi pfuna leswaku hi va vanghanu va Yehovha.

6. Hi wani marito lawa ma nga tirhisiwa ka Bibele lawa hi nga ta ma twisisa ka djondzo leyi, naswona hi mhaka muni?

⁶ Leswi Yehovha a nga hi rivalela swidjoho, hi nga yendla yini leswaku hi mu khensa? Leswaku hi hlamula xivutiso lexi hi ta kambisisa marito man’wani lawa Bibele li ma tirhisaka ka mhaka leyi, ya ku fana ni ku tlhela hi twanana ni Xikwembu, ku tlhela hi va vanghanu va Xikwembu, nkutsulu, ku chunsiwa ni ku vuliwa va ku lulama. Hi ta tlhela hi tiva swaku ma vula yini marito lawa. Leswo swi ta hi pfuna leswaku hi ya hi mu khensa hintamu Yehovha hileswi a nga hi rivalela swidjoho.

YEHOVHA A LAVA LESWAKU HI TLHELA HI TWANANA NA YENA

7. a) I mpsini leswi Adamu na Evha va nga swi luza? b) Leswi hi nga vana va Adamu na Evha, i mpsini leswi hi lavaka ku pfuniwa hi swona? (Varoma 5:10, 11)

⁷ Adamu na Evha va luzekeliwe hi wutomi la ku kala li nga heli va tlhela va luzekeliwa hi wunghanu leli a va li na lona na Yehovha. Phela vona a va lumba ndjangu wa Yehovha. (Luk. 3:38) Kambe hi mhaka ku kala va nga mu yingisanga Yehovha, yena a va hlongolile va nga ha lumbi ndjangu wa yena. (Gen. 3:23, 24; 4:1) Se na hina leswi hi nga vatukulu va vona hi fanele hi lwela ku tlhela hi twanana ni Xikwembu. (Lerha Varoma 5:10, 11.) Hi marito man’wani, hi fanele hi va ni wuxaka la ku tiya na Yehovha. Rito la ku sungula la Xigriki leli nga hundzuluxeliwa li va “ku twanana” li vula swaku “nala a nga tlhela a va munghanu.” Phela Yehovha a swi kotile ku tlhela a va munghanu wa hina.

YEHOVHA A YENDLE SWAKU HI TLHELA HI VA VANGHANU VA YENA

8. a) I yini leswi Yehovha a nga swi yendlela vatukulu va Adamu? b) A buku la Varoma li yi tlhamuselisa ku yini mhaka leyi?

⁸ Yehovha a yendle malulamiselo ya leswaku hina vatukulu va Adamu lava nga ni xidjoho, hi tlhela hi swi kota ku va vanghanu va yena. Kambe leswaku leswo swi koteka, a swi lava a nyikela nchumu lexi a xi ta yendla leswaku hi tlhela hi swi kota ku va ni swilo hinkwaswu leswi Adamu na Evha va nga swi luza. Funtshi loko li tlhamusela mhaka leyi, a buku la Varoma li tirhisa rito la Xigriki leli li hi pfunaka ku vona swaku Yehovha a yendle hinkwaswu swaku swi koteka ku tlhela hi va vanghanu va yena ni ku tlhela hi va ni ku rhula na yena. — Rom. 3:25.

9. I mpsini leswi Yehovha a nga swi yendla swaku Vayisrayele va rivaleliwa swidjoho?

⁹ Yehovha a yendle malulamiselo ya leswaku swi koteka leswaku swidjoho swa Vayisrayele swi rivaleliwa ni ku tlhela va va vanghanu va yena. Lembe ni lembe Vayisrayele a va tlangela Siku La Ku Rivaleliwa. Hi siku lolelo Muprista Wamukulu a a nyikela magandzelo ya swiharhi swaku va kombela ku rivaleliwa swidjoho swa vona. Kambe magandzelo wolawo a ma nga hakeli swidjoho swa vona hi ku helela, hikusa loko xiharhi xi pimanisiwa ni munhu i xitsongo hintamu. Hambileswo, loko Muyisrayele a nyikela gandzelo leli Yehovha a a li lava, a a mu rivalela. (Heb. 10:1-4) Leswi Vayisrayele a va nyikela magandzelo hi ku tirhisa swiharhi nkama ni nkama, a swi va khumbukisa swaku i vadjohi. Se hi mhaka leyo, a ku laveka nchumu xaxikulu hintamu swaku xi kota ku va pfuna swaku va kota ku rivaleliwa swidjoho swa vona hi ku helela.

10. Yehovha a yendle yini swaku vanhu hinkwavu va rivaleliwa swidjoho?

¹⁰ I mpsini leswi Yehovha a nga swi yendla swaku vanhu va rivaleliwa swidjoho swa vona hi ku helela? Yehovha a nyikele hi N’wana wa yena lweyi a mu rhandzaka swaku “a rhwala swidjoho swa vanhu va vanyingi.” (Heb. 9:28) Yesu a nyikele hi “wutomi la yena leswaku li kutsula vanhu va vanyingi.” (Mat. 20:28) Kasi i yini nkutsulu?

NKUTSULU WU YENDLA LESWAKU HI RIVALELIWA SWIDJOHO

11. a) Hi ku ya hi Bibele, li vula yini rito leli nge “nkutsulu”? b) I mani lweyi a a ta swi kota ku hakela swidjoho swa hina?

¹¹ A Bibele li vula leswaku kuva Yehovha a hi rivalela swidjoho swa hina a tlhela a hi vona na hi li vanghanu va yena, a ku laveka leswaku ku hakeliwa nkutsulu.a Kambe i mpsini leswi a swi fanele swi yendliwa leswaku ku hakeliwa leswi Adamu a nga swi luza? Khumbuka swaku Adamu na Evha va luze wutomi la ku hetiseka ni ntshembo wa ku hanya hi masiku ni masiku. Se nkutsulu lowu a wu fanele wu hakeliwa a wu fanele wu fana ni leswi a swi luziwile. (1 Tm. 2:6) Se a nkutsulu lowu a wu to hakeliwa ntsena hi wanuna lweyi 1) a a hetisekile; 2) a a ta hanya hi masiku ni masiku lani misaveni ni 3) lweyi a a swi lava ku nyikela hi wutomi la yena leswaku a hi kutsula.

12. Hi mhaka muni Yesu a a ta hakela swidjoho swa hina?

¹² Hi mhaka muni a swi fanela kuva Yesu a hakela a nkutsulu? Vona 3 wa swilo. Xa ku sungula, yena a a hetisekile, a a nga na xidjoho. (1 Pe. 2:22) Xa wumbirhi, a a ta hanya hi masiku ni masiku lani misaveni. Xa wunharhu, a a tinyimiselile ku fa ni ku nyikela wutomi la yena leswaku a hakela swidjoho swa hina. (Heb. 10:9, 10) Yesu a a li wanuna wa ku hetiseka, ku fana na Adamu na a nga se djoha. (1 Ko. 15:45) Hi mhaka leyo, ku va Yesu a file leswaku a hakela swidjoho swa hina swi kombisa swaku a a ta swi kota ku hakela hinkwaswu leswi Adamu a nga swi luza. (Rom. 5:19) Hi ndlela leyo, Yesu a ve “Adamu wa wugamu.” Se a swa ha bohi swaku wanuna mun’wani wa ku hetiseka a ta a ta hakela swilo leswi Adamu a nga swi luza, hikusa Yesu a fe “kan’we swi helela kolanu.” — Heb. 7:27; 10:12.

13. Hi kwihi ku hambana loku nga kona ka ku rivaleliwa ni nkutsulu?

¹³ Hi kwihi ku hambana loku nga kona ka ku rivaleliwa ni nkutsulu? Ku rivaleliwa ku yendla leswaku swi koteka ku tlhela hi va vanghanu va Yehovha. Kasi nkutsulu hi leswi swi nga hakeliwa leswaku Yehovha a hi rivalela swidjoho swa hina. Phela Yesu Kreste a nyikele wutomi la yena la ku hetiseka leswaku a hakela swidjoho swa hina. — Efe. 1:7; Heb. 9:14.

YEHOVHA A HI CHUNSILE KA XIDJOHO NI LIFU, A HI VULA VA KU LULAMA

14. I mpsini leswi hi nga ta swi vona swoswi?

¹⁴ Hi pfunekisa ku yini hi leswi Yehovha a nga hi yendlela swona? Leswaku hi hlamula xivutiso lexi, a hi voneni leswi marito mambirhi lawa ma nga tirhisiwa ka Bibele ma hi pfunisaka xiswona ku vona swaku hi pfunekisa ku yini hileswi Yehovha a nga hi rivalela xidjoho.

15-16. a) Ka Bibele, li vula yini rito leli nge “ku chunsiwa”? b) Hi titwisa ku yini hi ku tiva leswaku hi chunsiwile ka xidjoho ni lifu?

¹⁵ Ka Bibele a rito leli nge ku chunsiwa li kombetela ka ku ponisiwa hi ku tirhisa nkutsulu. Mupostolo Pedru a vulavule hi ku chunsiwa koloko nkama a nga te: “Ma swi tiva swaku a mi chunsiwanga [hi Xigriki: kutsuliwanga] hi swilo leswi bolaka, hi prata kumbe hi woru ka swihena swa n’wina swa ku kala swi nga pfuni nchumu leswi mi nga swi kuma ka vavhovho va n’wina. Kambe mi chunsiwe hi ngati ya lisima ya Kreste, leyi fanaka ni ya xinyempfani xa ku kala xi nga soleki ni lexi kalaka xi nga na xivati.” — 1 Pe. 1:18, 19; ntlhamuselo.

¹⁶ Hi mhaka ya nkutsulu swa koteka swaku hi chunsiwa ka xidjoho, ku hlupheka ni ka lifu. (Rom. 5:21) Phela a hi kanakani swaku hi ni xikweneti xaxikulu ka Yehovha na Yesu. Hi nga chunsiwa hi ngati ya Yesu ni wutomi la yena. — 1 Ko. 15:22.

17-18. a) Swi vula yini ku vuliwa wa ku lulama? b) Leswo swi mu khumbisa ku yini mun’wani ni mun’wani wa hina?

¹⁷ Bibele li vula swaku lava va tirhelaka Yehovha va voniwa na va lulamile. Leswo swi vula swaku Yehovha a nga hi hakelisi hi swidjoho hinkwaswu leswi hi mu yendlelaka swona. Kambe ku va a nga yendli leswo a swi lavi ku vula swaku hi fanele hi hanyisa leswi hi swi lavisaka xiswona, hi nga yi yingisi minawu ya yena, kumbe swaku o tsakisiwa hi xidjoho. Kambe leswi a swi lavaka ka hina leswaku a hi vona na hi lulamile, i ku va hi kombisa lipfumelo ka gandzelo la lifu la N’wana wa yena Yesu Kreste. — Rom. 3:24; Gal. 2:16.

¹⁸ Leswo swi mu khumbisa ku yini mun’wani ni mun’wani wa hina? Lava va nga langiwa swaku va ya fuma na Yesu atilweni, se va vitaniwa va ku lulama tanihi vana va Xikwembu. (Tit. 3:7; 1 Yo. 3:1) Phela swidjoho swa vona swi rivaleliwile. Swi fana ni loko va nga se tshama va yendla xidjoho. Vona va langiwile leswaku va ta fuma matilweni. (Rom. 8:1, 2, 30) Ni lava nga ni ntshembo wa ku hanya wutomi la ku kala li nga heli lani misaveni, na vona va ta vitaniwa va ku lulama tanihi vanghanu va Xikwembu; ni swidjoho swa vona swi ta rivaleliwa. (Yak. 2:21-23) Lava va xitshungu xaxikulu, lava va nga ta pona ka nyimpi ya Armajedoni, swi ta koteka leswaku na vona va hanya va nga fi. (Yoh. 11:26) “Lava ku lulama ni lava kalaka va nga lulamanga” lava nga fa, va ni ntshembo wa ku pfuxiwa. (Min. 24:15; Yoh. 5:28, 29) Hi ku famba ka nkama, hinkwavu lava va tirhelaka Yehovha lani misaveni lava yingisaka va ta va ni “nchunseko wa ku hlamalisa wa vana va Xikwembu.” (Rom. 8:21) Swa hi tsakisa ku tiva swaku hi ta va vana va ku hetiseka va Xikwembu xa hina Yehovha!

19. Hi pfunekisa ku yini hileswi Yehovha a nga hi yendlela swona? (Vona kwadru leli nge “Swi Vula Yini Ka Hina?”)

¹⁹ Ku vula ntiyiso a xiyimu xa hina a xi fana ni xa jovhem leliya hi nga bula hi lona ku sunguleni ka djondzo leyi, leli li nga lahlekeliwa hi hinkwaswu li tlhela li va ni xikweneti xaxikulu lexi a li nga ta swi kota ku xi hakela. Kambe hi ku pfuniwa hi Yehovha, xiyimu xa hina xi txintxile hi mhaka ya ku rivaleliwa xidjoho ni ku hakeliwa ka nkutsulu. A lipfumelo leli hi nga na lona ka Yesu Kreste, li yendla leswaku hi chunsiwa ka xidjoho ni lifu, naswona swidjoho swa hina swi nga rivaleliwa. Funtshi ka Yehovha swi fana ni loko hi nga se tshama hi djoha. Kambe xa lisima hintamu hileswaku swoswi swa koteka swaku hi va ni wunghanu ni Papayi wa hina wa lirhandzu Yehovha.

20. Hi ta bula hi yini ka nhlokomhaka leyi landzelaka?

²⁰ Hina hi swi khensa hintamu leswi Yehovha na Yesu va nga hi yendlela swona. (2 Ko. 5:15) Loko a hi nga pfuniwanga hi vona, a hi nga ta va ni ntshembo. Se swi vula yini ka mun’wani ni mun’wani wa hina ku rivaleliwa hi Yehovha? Hi leswi hi nga ta bula hi swona ka nhlokomhaka leyi landzelaka.