NHLOKOMHAKA YA DJONDZO 7
LISIMU 15 A Hi Dzuniseni N’wana Wa Yehovha!
Ku Rivalela Ka Yehovha — Leswi Vulaka Swona Ka Wena
“Wena wa rivalela hikakunene.” — PS. 130:4.
LESWI HI NGA TA SWI DJONDZA
Ka nhlokomhaka leyi hi ta vona leswi Bibele li swi vulaka hi ku rivalela ka Yehovha ni leswi ku hi pfunisaka xiswona.
1. Hi mhaka muni swi karhata ku twisisa leswi vanhu va titwisaka xiswona hi mhaka ya ku rivalela?
LOKO u kwatise munhu se a ku byela swaku wa ku rivalela, swi tsakisa hintamu. Kasi ma vula yini marito lawo? Ku nga va leswaku munhu wa kona a lava ku vula swaku a wunghanu la n’wina la ha tama li fana? Kumbe leswaku a hume ka swona? A ntiyiso hileswaku leswo swi ya hi munhu wa kona. Ka van’wani ku vula swaku “na ku rivalela” a swi vuli swona swaku mhaka ya kona se yi helile.
2. I yini leswi Bibele li hi byelaka swona hi ku rivalela ka Yehovha? (Vona ntlhamuselo.)
2 Ndlela leyi Yehovha a hi rivalelaka hi yona yi hambanile swinene ni ndlela leyi hina vanhu hi va rivalelaka hi yona vanhu van’wani. Tipisalema 130:4 loko yi vulavula hi Yehovha yi li: “Hikusa wena wa rivalela hikakunene, swaku u ta hloniphiwa.”a Ndzimana leyi a yo vula swaku Yehovha wa hi rivalela ntsena, kambe yi vula swaku Yehovha wa hi “rivalela hikakunene.” Ka tindzimana tin’wani loko Bibele li vulavula hi rito leli nge “ku rivalela” li swi kombisa kahle leswaku ndlela leyi Yehovha a hi rivalelaka hi yona yi hambanile hintamu ni ndlela leyi hina hi va rivalelaka hi yona vanhu van’wani.
3. Ndlela leyi Yehovha a hi rivalelaka hi yona yi hambanise ku yini ni ndlela leyi vanhu va rivalelaka hi yona? (Esaya 55:6, 7)
3 Loko Yehovha a hi rivalela a nga ha swi khumbuki leswi hi nga swi yendla. Leswo swi yendla leswaku swi koteka kuva hi tlhela hi va ni wunghanu la ku tiya na yena. Phela hi mu khensa hintamu Yehovha hi leswo. — Lerha Esaya 55:6, 7.
4. Yehovha a hi pfunisa ku yini ku twisisa leswi ku rivalela ka ntiyiso swi vulaka swona?
4 Tanihi leswi ku rivalela ka Yehovha ku hambanaka ni ku rivalela ka hina, hi nga swi kotisa ku yini ku twisisa leswi ku rivalela ka ntiyiso ku vulaka swona hambileswi hi kalaka hi nga hetisekanga? Yehovha a tirhisa swikombiso swin’wani leswaku a hi pfuna leswaku hi twisisa ndlela leyi a hi rivalelaka hi yona. Se, ka djondzo leyi hi ta vona swin’wani swa swikombiso leswi Yehovha a swi tirhisaka leswi kombisaka ndlela leyi yena a hi rivalelaka hi yona ni ndlela leyi wunghanu la hina na yena li nga tlhelaka li fana ni le ku sunguleni. Ku kambisisa swikombiso leswi swi ta hi pfuna swaku hi ya hi mu rhandza hintamu Papayi wa hina Yehovha hi tlhela hi mu khensa hileswi a hi rivalelaka.
YEHOVHA A SWI YISA KULE SWIDJOHO SWA HINA
5. Ku yendleka yini loko Yehovha a hi rivalela?
5 Bibele li fanisa swidjoho ni xidjumba xa ku tika swinene. Hi xikombiso, loko Hosi Davhida a vulavula hi swidjoho swa yena a te: “Hikusa minandzu ya mina i yinyingi hintamu; yi ni tika ku fana ni xidjumba xa ku tika lexi ni tsandzekaka ku xi rhwala.” (Ps. 38:4) Kambe Yehovha wa hi rivalela loko hi tisola ka swidjoho swa hina. (Ps. 25:18; 32:5) Phela rito la Xiheberu leli nge “ku rivalela” li vula “ku tlakula” kumbe “ku rhwala.” Se, pimisa hi Yehovha na a tirhisa matimba ya yena yamakulu swaku a tlakula xidjumba kumbe swihoxo swa wena a swi teka a swi yisa kule na wena.
“U ni rivalele swona” (Ps. 32:5)
6. Yehovha a yendla yini hi swidjoho swa hina loko a hi rivalela?
6 Bibele li tlhela li tirhisa xifaniso xin’wani kuva li hi pfuna ku vona ndlela leyi Yehovha a hi rivalelaka hi yona. Tipisalema 103:12 yi vula swaku “ku fana ni leswi wuxeni ku nga kule ni wupeladlambu, ni swidjoho swa hina a swi veke kule na hina.” Leswo swi lava ku vula leswaku loko Yehovha a hi rivalela a teka swidjoho swa hina a swi veka kule ku fana ni leswi wuxeni ni wupeladlambu ku nga tindhawu ta kule na kule. Leswo swi lava ku vula swaku Yehovha wa hi rivalela hi ku helela naswona a nga ha tlheli a khumbuka swihoxo swa hina. Ku twa leswo swi pepisa mbilu!
“Ku fana ni leswi wuxeni ku nga kule ni wupeladlambu” (Ps. 103:12)
7. Mikiya 7:18, 19 yi vula swaku Yehovha a yendla yini hi swidjoho swa hina?
7 Hambileswi Yehovha a susaka swidjoho swa hina a swi veka kule na hina, ku nga va leswaku a tshama na swona swidjoho swa hina? Nada. Khambi lin’wani loko Hosi Hezekiya a vulavula hi ku rivalela ka Yehovha a te: “U swi txukumete kule swidjoho swa mina.” (Esa. 38:9, 17) Leswo swi kombisa leswaku loko Yehovha a za a mu rivalela munhu a nge he tlheli a swi khumbuka. Leswi Hezekiya a nga swi vula swi nga ha hundzuluxeliwa hi ndlela leyi: “Loko u rivalela u yendla leswaku swidjoho swa mina swi yendla ingaku a swi se tshama swi yendliwa.” Mhaka leyi ya basisiwa ka Mikiya 7:18, 19. (Lerha.) Ndzimana leyi yi vula leswaku Yehovha a txukumeta swidjoho swa hina alwandle. Phela loko hi txukumeta nchumu alwandle swa karhata ku tlhela hi xi kuma.
“U swi txukumete kule swidjoho swa mina” (Esa. 38:17)
“Wena u ta txukumeta swidjoho swa hina hinkwaswu andzeni ka lwandle” (Mik. 7:19)
8. Hi djondza yini ka swikombiso leswi hi nga swi vona?
8 Swikombiso leswi swi hi djondzisa leswaku loko Yehovha a hi rivalela swi fana ni loko a hi susela xidjumba lexi hi pezaka. Hosi Davhida a te: “Va tsaka lava mintirho ya vona ya ku biha yi nga rivaleliwa ni lava swidjoho swa vona swi nga mbhonyiwa, wa tsaka munhu lweyi Yehovha a nga ta kala a nga swi khumbuki swidjoho swa yena.” (Rom. 4:7, 8) Leswi hi swona ku nga ku rivalela hikakunene!
YEHOVHA A TIMA SWIDJOHO SWA HINA
9. Hi xini xikombiso lexi Yehovha a xi tirhisaka kuva a hi komba swaku wa hi rivalela hi ku helela?
9 Yehovha a tirhisa xifaniso xin’wani lexi hi pfunaka ku nyika lisima lunghiselelo la nkutsulu. Yena a basisa kumbe ku tima swidjoho swa lweyi a nga tisola. Bibele li vula swaku swi fana ni loko Yehovha a hlampsa ni ku basisa swidjoho. Leswo swi yendla leswaku munhu lweyi a nga djoha a tlhela a yamukeleka ka Yehovha ni ku tlhela a basa. (Ps. 51:7; Esa. 4:4; Yer. 33:8) Ka Esaya 1:18, Yehovha a tlhamusela swaku leswo swi yendlekisa ku yini; a li: “Hambiloko swidjoho swa n’wina swi pshukile, swi ta basisiwa swi ku baa; hambiloko swi pshuke ku fana ni panu ya ku pshuka, swi ta fana ni mavoya ya ku basa.” Phela swa karhata ku susa a nodwa la ku pshuka ka mpahla, hi mhaka leyo Yehovha a tirhise xifaniso lexi kuva a hi komba swaku swidjoho swa hina swi nga basisiwa swi fana ni loko hi nga se tshama hi djoha.
“Hambiloko swidjoho swa n’wina swi pshukile, swi ta basisiwa swi ku baa” (Esa. 1:18)
10. Hi xini xikombiso xin’wani lexi Yehovha a xi tirhisaka swaku a hi komba ndlela leyi a rivalelaka hi yona?
10 Hilani hi nga swi vona hi kona ka nhlokomhaka leyi nga hundza, swidjoho swa hina swi fanisiwa ni xikweneti. (Mat. 6:12; Luk. 11:4) Minkama hinkwayu loko hi mu djohela Yehovha, xikweneti xa hina xi ya xi kula. Phela xikweneti xa hina i xikulu swinene! Kambe Yehovha wa hi rivalela, naswona loko a hi rivalela swo fana ni loko a tima xikweneti xa hina xaxikulu, naswona loko Yehovha a hi rivalela a nga tlheli a hi londza hi swidjoho swa hina. Phela ku tiva leswo swa tsakisa hintamu!
“Hi rivaleli swidjoho swa hina” (Mat. 6:12)
11. Bibele li lava ku vula yini loko li ku swidjoho swa hina swa timiwa? (Mintirho 3:19)
11 Loko hi pimisa hi munhu lweyi a rivalelaka xikweneti hi nga ha pimisa hi munhu lweyi a tekaka kaneta, a tsala ndzhati henhla ka numeru ya male leyi a devhiwaka yona. Loko hi txuvuka kahle hi nga ha yi vona numeru leyi a yi tsaliwile hambileswi se yi nga pfhitiwa. (Lerha Mintirho 3:19.) Kambe loko Yehovha a vulavula hi ku rivalela swikweneti a swi fambisana ni leswi tinta ya khale a yi yendlisiwa xiswona, hikusa a swi vevuka ku tima leswi a swi tsaliwe hi tinta yoleyo. Loko u teka panu ya ku tsakama u zama ku tima leswi a swi tsaliwile a swo vhela swi suka, swi yendla ingaku a ku nga se tshama ku tsaliwa nchumu. Yehovha a hi rivalela hi ndlela ya ku fana hikusa a hi rivalela hi ku helela. Loko Yehovha a hi rivalela a nga ha swi khumbuki leswi hi nga swi yendla, swi fana ni loko hi nge se tshama hi yendla xidjoho. Ku tiva leswo swi tiyisana hintamu! — Ps. 51:9.
“Leswaku swidjoho swa n’wina swi ta timiwa” (Min. 3:19)
12. Swi vula yini kuva Yehovha a funengeta minandzu ya hina hi rhefu?
12 Yehovha a tirhisa xikombiso xin’wani leswaku a hi komba swaku a swi timisa ku yini swidjoho swa hina. Ka Esaya 44:22 a li: “Ni ta funengeta minandzu ya wena ku fana ni loko yi funengetiwa hi rhefu, ni swidjoho swa wena ku fana ni loko swi pfaliwa hi rhefu lalikulu.” Marito lawo ma kombisa swaku loko Yehovha a hi rivalela swo fana ni loko a tirhisa rhefu lalikulu leswaku a fihla swidjoho swa hina swaku swi nga ha voniwi hi munhu, hambi ku li hina vinyi.
“Ni ta funengeta minandzu ya wena ku fana ni loko yi funengetiwa hi rhefu” (Esa. 44:22)
13. Hi titwisa ku yini loko Yehovha a hi rivalela swidjoho?
13 Hi djondza yini? Loko Yehovha a hi rivalela swidjoho, a swi lavi ha ha tshamela ku pimisa hi swidjoho swa hina. Gandzelo la nkutsulu la Yesu Kreste li time hi ku helela swidjoho swa hina, swi fana ni loko swi nge se tshama swi va kona. Loko hi tisola swi suka mbilwini Yehovha a hi rivalela hi ku helela.
YEHOVHA A HI PFUMELELA SWAKU HI TLHELA HI VA VANGHANU VA YENA
Ku rivalela ka Papayi wa hina ku hi pfulela ndlela ya ku va vanghanu va yena vavakulu (Vona paragrafu 14)
14. Loko Yehovha a hi rivalela hi nga tiyiseka hi yini? (Vona mafoto.)
14 Loko Yehovha a hi rivalela hi nga tiyiseka swaku hi nga tlhela hi va vanghanu va yena ku fana ni khale. Leswo swi hi pfuna ku kala hi nga tshameli ku titwa nandzu hi leswi hi nga swi yendla. Phela a swi lavi hi chava, hi pimisa swaku Yehovha a hi vekele xiviti ni leswaku a nyimela nkama lowu a nga ta hi khatisa hi wona. Leswo a swi nge yendleki. Se, i mpsini swi nga hi pfunaka ku kholwa swaku Yehovha a hi rivalelile? Yehovha a byele muprofeta Yeremiya a ku: “Ni ta va rivalela xihoxo xa vona naswona a ni nge he xi khumbuki xidjoho xa vona.” (Yer. 31:34) Ni ka Vaheberu 8:12 Yehovha a te: “A ni nge he swi khumbuki swidjoho swa vona.” Kasi leswo swi lava ku vula yini?
“A ni nge he xi khumbuki xidjoho xa vona” (Yer. 31:34)
15. Swi vula yini ku va Yehovha a nga ha swi khumbuki swidjoho swa hina?
15 Loko Bibele li vulavula hi ku “khumbuka” a hi minkama hinkwayu li vulavulaka hi ku khumbuka lokuyani ka ku munhu a pimisa hi swilo leswi nga yendleka ka nkama lowu nga hundza. Kambe swi patsa ni ku va munhu a mu yendlela nchumu munhu mun’wani. Ha swi twisisa leswo loko hi vona marito lawa ma nga vuliwa hi xigevenga lexiya xi nga gongondzeliwa tlhelweni ka Yesu. Xona xi te: “Yesu, ni khumbuki loko u nghena ka Mfumu wa wena.” (Luk. 23:42, 43) Xigevenga lexiya a xi ngo kombela swaku Yesu a pimisa hi xona ntsena. Hi vula leswo hikusa a nhlamulu leyi Yesu a nga yi nyikela ka xigevenga lexiyani yi swi kombisa kahle swaku a a ta xi yendlela nchumu wawunene ka nkama lowu taka. Phela swi hi ku fana ni ka mhaka leyi ya ku va Yehovha a nga ha swi khumbuki swidjoho swa hina. A lava ku hlaya swaku ka nkama lowu taka a nga ta hi khatisa hi mhaka ya swidjoho leswi a nga hi rivalela ka nkama lowu nga hundza.
16. Bibele li swi tlhamuselisa ku yini leswi hi titwisaka xiswona loko Yehovha a hi rivalela?
16 Bibele li tirhisa xifaniso xin’wani leswaku li hi pfuna ku twisisa leswi hi titwisaka xiswona loko Yehovha a hi rivalela. Bibele li vula swaku hina hi “swikarawa swa xidjoho”. Kambe loko Yehovha a hi rivalela swi fana ni loko hi ‘chunsiwa ka swidjoho’ swa hina. (Rom. 6:17, 18; Nhl. 1:5) Loko Yehovha a hi rivalela hi chunseka hi ku helela ka xidjoho. Leswo swa hi tsakisa hintamu.
“Mi nga chunsiwa ka xidjoho” (Rom. 6:18)
17. Ku rivalela ka Yehovha ku fanisa ku yini ni ku dahiwa ka mavabyi? (Esaya 53:5)
17 Lerha Esaya 53:5. Xifaniso xin’wani lexi kombisaka swaku Yehovha wa hi rivalela, xi vulavula hi munhu lweyi a dahiwaka ka mavabyi. Yehovha a tirhisa lifu la Yesu leswaku hi ndlela ya ku fanekisela a hi daha ka xidjoho. (1 Pe. 2:24) Phela ku fana ni leswi munhu lweyi a vabyaka a tsakaka swinene loko a dahiwa ka mavabyi ya yena, na hina ha tsaka hi leswi swi kotekaka swaku hi tlhela hi va vanghanu va Yehovha a tlhela a hi rivalela swidjoho swa hina. Phela leswo swi koteka ntsena hi mhaka leswi Yesu a nga hi fela.
“Funtshi hi hanyisiwile hi mhaka ya swilondza swa yena” (Esa. 53:5)
U TITWISA KU YINI HI KU RIVALELIWA HI YEHOVHA?
18. Ku rivalela ka Yehovha ku hi djondzisa yini? (Vona kwadru leli nge “Yehovha A Hi Rivalelisa Ku Yini?”)
18 Hi djondza yini hi ku rivalela ka Yehovha loku Bibele li vulavulaka hi kona? Hi djondza leswaku loko Yehovha a rivalela, o rivalela hikakunene a huma ka swona, a nga tshameli ku swi khumbuka leswi a nga hi rivalela swona. Leswo swi hi pfuna ku vona swaku swi nga koteka kuva hi va vanghanu va yena hikakunene. Swi tlhela swi hi djondzisa swaku leswi hi nga vadjohi, Yehovha a ngo hi rivalela hileswi swi ngo hi fanela, kambe a hi rivalela hi leswi a nga ni lirhandzu ni timpsalu tatikulu. — Rom. 3:24.
19. a) Hi mhaka muni hi fanele hi mu khensa Yehovha? (Varoma 4:8) b) Hi ta bula hi yini ka djondzo leyi taka?
19 Lerha Varoma 4:8. Hi fanele hi mu khensa hintamu Yehovha hileswi a nga Xikwembu xa ku “rivalela”! (Ps. 130:4) Kambe leswaku Yehovha a hi rivalela ku ni nchumu xa lisima lexi hi faneleke hi xi yendla. Yesu a te: “Loko mi rivalela vanhu swidjoho swa vona, na yena Papayi wa n’wina wa le tilweni a ta mi rivalela; kasi loko mi nga va rivaleli, na yena Papayi wa n’wina a nga ta mi rivalela.” (Mat. 6:14, 15) Leswo swi lava ku vula swaku i swa lisima hintamu kuva hi mu tekelela Yehovha. Kambe hi nga swi yendlisa ku yini leswo? Ka djondzo leyi taka hi ta bula hi swona.
LISIMU 46 Haku Khensa Yehovha
a Ka Tipisalema 130:4 Wuhundzuluxeli La Misava Ya Nyuwani li vula swaku Yehovha wa rivalela hikakunene, leswi vulaka swaku ku rivalela koloko i ka ntiyiso, kambe Mabibele man’wani a ma li tirhisi rito lelo.