Tiyiseka Swaku Yehovha A Ku Rivalelile

1-2. Hi titwisa ku yini hi ku tiva swaku Yehovha wa hi rivalela? (Vona mufoto .)

HOSI Davhida a tshame a titwa nandzu hi mhaka ya swidjoho swaswikulu leswi a nga tshama a swi yendla. (Ps. 40:12; 51:3, xingheniso) Kambe leswi a nga tisola hi ku helela Yehovha a mu rivalelile. (2 Sa. 12:13) Phela Davhida a tsakile a tlhela a pepa hi ku tiva swaku Yehovha a a mu rivalelile. — Ps. 32:1.

² Ku fana na Davhida, na hina ha tsaka hi ku tiva swaku Yehovha a hi komba timpsalu a tlhela a hi rivalela swidjoho swa hina. Hambiloko hi yendle xidjoho xaxikulu swa hi tiyisa ku tiva swaku Yehovha wa hi rivalela loko hi tisola swi sukela mbilwini, hi kombela ku rivaleliwa, hi byela madoda xidjoho xa hina hi tlhela hi tinyimisela ku kala hi nga ha xi phindhi. (Swiv. 28:13; Min. 26:20; 1 Yo. 1:9) Phela ha tsaka hi ku tiva swaku loko Yehovha a hi rivalela swo fana ni loko hi nge se tshama hi yendle xidjoho xolexo! — Eze. 33:16.

3-4. a) Makwerhu mun’wani wa xisati a titwise ku yini loko se a tsakamisiwile? b) Hi ta djondza hi yini ka nhlokomhaka leyi?

³ Van’wani swa va karhatela ku pfumela swaku Yehovha a va rivalelile. Pimisa hi leswi nga yendlekela Jennifer lweyi a nga psaliwa ntiyisweni. Nkama na wa ha li jovhem a sungule ku va ni mahanyelo ya ku biha kambe a a swi fihlela vapsali va yena. Hi ku famba ka malembe Jennifer a tlhelele ka Yehovha a tlhela a tsakamisiwa. Yena a li: “Khale a ni rhandza male, ni yendla wuntunga la swa masangu, ni kukutlela byala ni tlhela ni kwata ku tlula mpimu. A ni swi tiva swaku Bibele li vula leswaku hi mhaka ya nkutsulu Yehovha a nga ni rivalela. Kambe a swi ni karhatela ku pfumela swaku se a ni rivalelile.”

⁴ Indjhe minkama yin’wani u vona ingi Yehovha a nga ku rivalelanga swidjoho leswi u nga swi yendla ka nkama lowu nga hundza? Phela Yehovha a lava leswaku ku fana na Davhida hi tiyiseka leswaku Yena a ni timpsalu. Se ka nhlokomhaka leyi, hi ta vona leswaku hi mhaka muni swi li swa lisima kuva hi tiyiseka swaku Yehovha wa hi rivalela; hi ta tlhela hi vona leswaku i mpsini swi nga ta hi pfuna kuva hi tiyiseka hi leswo.

HI MHAKA MUNI HI FANELE HI PFUMELA SWAKU YEHOVHA WA HI RIVALELA?

5. Sathana a lava leswaku hi pimisa yini? Nyikela xikombiso.

⁵ Loko hi tiyiseka swaku Yehovha a hi rivalelile a hi nga ta wela ka mintlhamu ya Sathana. Ntlhamu wun’wani a wu tirhisaka i ku zama ku hi yendla hi pimisa leswaku Yehovha a nge hi rivaleli. Pimisa hi leswi nga yendlekela wanuna mun’wani wa bandla la Korinto lweyi a a susiwe bandleni hileswi a a yendle wuntunga la swa masangu. (1 Ko. 5:1, 5, 13) Nkama wanuna yelweyo a nga tisola, Sathana a a lava leswaku vamakwerhu va nga mu rivaleli va tlhela va nga mu yamukeli bandleni. Naswona Sathana a a lava leswaku wanuna lweyi se a a tisolile a pimisa swaku Yehovha a nge mu rivaleli a tlhela a ‘kwata hintamu a za a godola’ ku tirhela Yehovha. Phela Sathana a nge se txintxa, ninamuntlha wa ha tirhisa ntlhamu wa ku fana. Kambe hina a nge swi koti ku hi phasa “hikusa ha ma tiva maplanu ya yena.” — 2 Ko. 2:5-11.

6. I yini xi nga hi pfunaka kuva hi nga titwi nandzu ku tlula mpimu?

⁶ Loko hi tiyiseka swaku Yehovha a hi rivalelile a hi nga ta titwa nandzu ku tlula mpimu. Hi ntolovelo, loko hi djoha hi titwa nandzu. (Ps. 51:17) Ku titwa nandzu i swinene hikusa swi nga hi yendla hi txintxa mahanyelo ya hina hi tlhela hi yendla swilo swaswinene. (2 Ko. 7:10, 11) Hambileswo, loko hi tama hi titwa nandzu ku ringana nkama wa ku leha, swi nga ha yendla leswaku hi tshika hambi hi ku mu tirhela Yehovha. Kambe ku pfumela swaku Yehovha a hi rivalelile swi nga hi pfuna leswaku hi nga titwi nandzu ku tlula mpimu; loko hi yendla leswo hi ta swi kota ku mu tirhela hilani a lavaka hi kona, na hi ni lipfalu la ku basa hi tlhela hi tsaka. (Kol. 1:10, 11; 2 Tm. 1:3) Kambe hi nga yendla yini leswaku hi tiyiseka swaku Xikwembu se xi hi rivalelile?

LESWI NGA HI PFUNAKA KU TIYISEKA LESWAKU YEHOVHA A HI RIVALELILE

7-8. I yini leswi Yehovha a nga swi byela Moxe naswona hi nga tiyiseka hi yini? (Eksoda 34:6, 7)

⁷ Pimisa hi leswi Yehovha a nga swi vula hi yena. Hi xikombiso, nkama lowu Moxe a a lava ku tiva swin’wani hi Yehovha, Yena a a ta va a vule swilo swa swinyingi leswi a nga swi yendla ni wumunhu la ku saseka leli a nga na lona, kambe a lange ku mu byela leswaku yena i “Xikwembu xa timpsalu ni ntwelawusiwana.”a (Lerha Eksoda 34:6, 7.) Indjhe swa twala ku pimisa leswaku Yehovha a nge mu rivaleli munhu lweyi a nga tisola? Nada, a swi twali! Phela loko a wo kala a nga mu rivaleli munhu yelweyo a a ta va na a kombisa swaku a ni mona funtshi a nga na timpsalu, ku nga swilo leswi a kalaka a nga li swona.

⁸ Hi nga tiyiseka swaku loko Yehovha a vula leswaku i Xikwembu lexi nga tala hi timpsalu a vula ntiyiso hikusa yena a nga hembi. (Ps. 31:5) Se loko swi ku karhatela ku kholwa swaku Yehovha a ku rivalelile ka swidjoho leswi u nga swi yendla khale, tivutisi leswi: ‘Indjhe na kholwa swaku Yehovha a ni ntwelawusiwana a tlhela a va ni timpsalu tatikulu naswona a rivalela mun’wani ni mun’wani lweyi a tisolaka ka swidjoho swa yena?’ Loko u kholwa ka leswo tiyiseka swaku na wena se a ku rivalelile?

9. Swi vula yini ku va swidjoho swa hina swi rivaleliwa? (Tipisalema 32:5)

⁹ Pimisa hi leswi Yehovha a nga pfuna vatsali va Bibele leswaku va swi vula hi ku rivalela ka yena. Hi xikombiso, pimisa hi leswi Davhida a nga swi tsala hi ku rivalela ka Yehovha. (Lerha Tipisalema 32:5.) Yena a te: ‘Wena u ni rivalele swidjoho swa mina’. Rito la Xiheberu leli hundzuluxeliwaka li va “ku rivalela” li nga ha vula “ku tlakula” kumbe “ku teka nchumu u famba na xona.” Nkama Yehovha a nga mu rivalela Davhida a swi fana ni loko a tlakula a tlhela a famba ni swidjoho swa Davhida. Se leswo swi yendle swaku Davhida a pepa, a nga ha twi nandzu ku tlula mpimu hi mhaka swidjoho swa yena. (Ps. 32:2-4) Na hina hi nga ha titwa hi ndlela ya ku fana. Phela loko hi tisola hi ku helela a hi fanelanga hi tama hi titwa nandzu hi swidjoho leswi Yehovha se a nga hi rivalela swona.

10-11. Bibele li lava ku vula yini loko li ku Yehovha a “lunghekele ku rivalela”? (Tipisalema 86:5)

¹⁰ Lerha Tipisalema 86:5. Davhida a vule swaku Yehovha a “lunghekele ku rivalela.” Leswo swi vula leswaku Yehovha wa hlwela ku kwata loko hi mu djohela funtshi minkama hinkwayu a swi navela hintamu ku hi rivalela loko hi tisola. Hi mhaka muni? Davhida a tlhele a ku: “[Wena Yehovha] u rhandza hinkwavu lava ku vitanaka.” Hilani hi nga swi vona hi kona ka nhlokomhaka leyi nga hundza, Yehovha a tshembisa ku komba vanhu va yena lirhandzu lalikulu funtshi a nge tshuki a va tshikile. Lirhandzu lolelo li tlhela li yendla leswaku a va “rivalela hi mbilu hinkwayu” lava va tisolaka. (Esa. 55:7) Se loko swi ku karhatela ku kholwa leswaku Yehovha a ku rivalelile u nga ha tivutisa leswi: ‘Indjhe na kholwa leswaku Yehovha a lunghekele ku rivalela hinkwavu lava va nga tisola va tlhela va kombela leswaku a va komba timpsalu?’ Loko u kholwa, tiyiseka leswaku a ku rivalelile nkama lowu u nga mu kombela leswaku a ku komba timpsalu a tlhela a ku rivalela.

¹¹ Bibele li tlhela li vula leswaku Yehovha wa swi twisisa hi ku helela leswi hi nga yendlisiwa xiswona ni swaku a hi hetisekanga; phela ku tiva leswo swa hi tiyisa swinene. (Ps. 139:1, 2) Se swoswi a hi voneni swin’wani leswi Davhida a nga swi vula leswi nga hi pfunaka ku ya hi tiyiseka swaku Yehovha wa swi lava ku hi rivalela.

U NGA KHOHLWI LESWI YEHOVHA A SWI KHUMBUKAKA

12-13. Hi ku ya hi Tipisalema 103:14, i yini leswi Yehovha a swi khumbukaka naswona i mpsini leswi a hi yendlelaka swona?

¹² Lerha Tipisalema 103:14. Loko Davhida a vulavula hi Yehovha a te: “Wa swi khumbuka swaku hi wuthulu.” Hi marito lawa, Davhida a tlhamusela xivangelo xin’wani lexi yendlaka Yehovha a hi rivalela loko hi tisola. Phela Yehovha wa swi khumbuka swaku hi vadjohi ni leswaku ha phazama. Swoswi a hi ma kambeleni kahle marito lawa ya Davhida.

¹³ Davhida a tlhele a vula swaku Yehovha “wa swi tiva kahle swaku hi yendlisiwe ku yini.” Yehovha a yendle Adamu “hi wuthulu la misava” se a swi tiva kahle leswaku hina vanhu hi yendlisiwe ku yini ni leswaku i mpsini leswi hi swi lavaka. Hi xikombiso, hambi vanhu va ku hetiseka swi lava va dla, va yetlela ni ku hefemula. (Gen. 2:7) Kambe leswi Adamu na Evha va nga djoha a marito lama nge munhu i wuthulu la misava ma ve ni ntlhamuselo wun’wani. Leswi hi kalaka hi nga hetisekanga swi lava hi lwa hi matimba akuva hi nga yendli swilo swa ku biha naswona Yehovha a swi tiva kahle leswo. Kambe nkama lowu Davhida a nga vula swaku Yehovha wa swi “khumbuka swaku hi wuthulu,” a a lava ku vula leswaku leswi Yehovha a swi tivaka swaku hi vadjohi a yendla hinkwaswu leswaku a hi komba timpsalu ta yena. Phela minkama yin’wani hi nga ha phazama kambe loko a vona leswaku ha tisola swi sukela mbilwini, Yehovha a hi komba timpsalu ta yena a tlhela a hi rivalela. — Ps. 78:38, 39.

14. a) I yini swin’wani leswi Davhida a nga swi vula hi ndlela leyi Yehovha a hi rivalelaka hi yona? (Tipisalema 103:12) b) Hi nga djondza yini ka ndlela leyi Yehovha a nga mu rivalela hi yona Davhida? (Vona kwadru leli nge “Loko Yehovha A Hi Rivalela A Nga Ha Swi Khumbuki.”)

¹⁴ I yini xin’wani lexi xi nga hi pfunaka ku vona ndlela leyi Yehovha a hi rivalelaka hi yona? (Lerha Tipisalema 103:12.) Davhida a vule leswaku loko Yehovha a hi rivalela a swi txukumeta kule swihoxo swa hina “ku fana ni leswi wuxeni ku nga kule ni wupeladlambu.” Phela wuxeni ni wupeladlambu a swi nge tshuki swi tlhangana. Se leswo swi hi djondzisa yini hi ndlela leyi Yehovha a hi rivalelaka hi yona? Buku yin’wani loko yi tlhamusela ndzimana leyi yi vula leswaku “Xikwembu xi swi txukumeta kule swinene swidjoho swa hina, ku fana ni nchumu lexi nga helisiwa ku nyamalala ni xeru la kona.” Phela xeru li nga hi khumbukisa swilo swin’wani leswi nga yendleka ka nkama lowu nga hundza. Kambe loko Yehovha a hi rivalela, a ku na nchumu lexi nga mu yendlaka a khumbuka swidjoho swa hina kumbe a hi khatisa hi mhaka ya swona. — Eze. 18:21, 22; Min. 3:19.

15. Hi nga yendla yini loko hi tshamela ku tisola hi swidjoho swa hina swa khale?

¹⁵ Marito ya Davhida lawa ma nga Tipisalema 103 ma nga hi pfunisa ku yini ku tiyiseka swaku Yehovha se a hi rivalelile? Loko u tshamela ku tisola hi swidjoho swa wena swa khale u nga tikambela kuva u vona kumbe a wo khohlwa leswi Yehovha a swi khumbukaka. U nga yendla leswo hi ku tivutisa u ku: ‘A no kholwa swaku Yehovha a ni tiva kahle ni leswaku wa swi tiva swaku mina ni mudjohi ni leswaku a nga ni rivalela loko ni tisola? Indjhe a no khumbuka swidjoho leswi Yehovha a nga langa ku ni rivalela a tlhela a nga ha swi khumbuki?’ Phela Yehovha a nga tshameli ku pimisa hi swidjoho leswi hi nga swi yendla khale, se na hina a hi fanelanga hi tshamela ku pimisa hi swona. (Ps. 130:3) Loko hi pfumela swaku Yehovha se a hi rivalelile, hi ta swi kota ku tirivalela na hina hi tlhela hi mu tirhela Yehovha na hi tsakile.

16. Nyikela xikombiso lexi hi pfunaka ku vona nghozi ya ku tshamela ku pimisa hi swihoxo leswi hi nga swi yendla ka nkama lowu nga hundza. (Vona mufoto.)

¹⁶ Pimisa hi xikombiso lexi. Munhu lweyi a fambisaka movha minkama yin’wani a txuvuka xipelhu akuva a vona leswi swi taka ndzhaku ka movha wa yena. Kambe loko o tshamela ku txuvuka xipelhu a nga tiveka nghozini; se leswaku a famba na a vhikelelekile swi lava a tama a txuvuka lomu a yaka kona. Hi ku fana, ku pimisa hi swihoxo leswi hi nga swi yendla ka nkama lowu nga hundza swi nga hi pfuna leswaku hi tinyimisela ku kala hi nga swi phindhi. Kambe ku tshamela ku pimisa hi swihoxo leswi Yehovha a nga hi rivalela, swi nga hi hetela ntsaku wa hina swi tlhela swi yendla leswaku hi nga mu tirheli Yehovha hilani hi nga kotaka hi kona. Se swi lava hi txuvuka lomu hi ya ka kona; phela hi ka ndlela leyi yisaka ka wutomi la ku a li heli ka misava ya nyuwani lani minchumu ya ku biha ‘yi nga ta khohlwiwa, funtshi yi kalaka yi nga ha ta ta ka mimpimiso.’ — Esa. 65:17; Swiv. 4:25.

TAMA U TIYISEKA SWAKU XIKWEMBU XI KU RIVALELILE

17. Hi mhaka muni hi fanele hi yendla hinkwaswu kuva hi tiyiseka leswaku Yehovha wa hi rhandza naswona wa hi rivalela?

¹⁷ Hi fanele hi yendla hinkwaswu hi nga swi kotaka swaku hi tama hi tiyiseka leswaku Yehovha wa hi rhandza naswona a tinyimisele ku hi rivalela. (1 Yo. 3:19) Ku yendla leswo i swa lisima hintamu hikusa Sathana a ta tirhisa matimba ya yena hinkwawu akuva a hi yendla hi pimisa swaku Yehovha a nga hi rhandzi naswona a nge hi rivaleli. Sathana a yendla leswo leswaku a hi tshikisa ku tirhela Yehovha ngopfungopfu leswi a swi tivaka swaku a saleliwe hi nkama wawutsongo. (Nhl. 12:12) Kambe hina a hi nge mu tshiki a hi hlula!

18. U nga yendla yini kuva u tiyiseka swaku Yehovha wa ku rhandza naswona wa rivalela?

¹⁸ Kuva u tiyiseka leswaku Yehovha wa ku rhandza, yendla leswi hi nga vulavula hi swona ka nhlokomhaka leyi nga hundza funtshi kuva u tiyiseka swaku Yehovha wa rivalela, pimisa hi leswi a swi vulaka hi yena n’winyi. Pimisa hi leswi vatsali va Bibele va nga swi vula hi ku rivalela ka Yehovha. Naswona u nga khohlwi swaku Yehovha a ku tiva kahle, wa swi tiva leswaku u mudjohi naswona a ta ku komba timpsalu. Nakambe khumbuka leswaku loko Yehovha a za a hi rivalela a nga ha swi khumbuki. Loko u yendla hinkwaswu leswi u ta tiyiseka swaku Yehovha a ni timpsalu naswona ku fana na Davhida u ta vula u ku: “Khanimambu Yehovha hileswi ‘u nga ni rivalela xidjoho xa mina’!” — Ps. 32:5.