Hi Djondzisiwe Hi Mudjondzisi Wa Hina Lwenkulu Wutomi La Hina Hinkwalu

XIKOMBISO XA VAPSALI VA MINA

A ku heleni ka ma 1950, vapsali va mina va rhurhile va suka aItália va ya Canadá ka doropa la Kindersley aSaskatchewan. Nkama va nga fika va djondze ntiyiso naswona hinkwerhu ka ndjangu wa hina hi sungule ku rhangisa ku tirhela Yehovha ka wutomi la hina. Ni khumbuka swaku nkama na ni li mutsongo vapsali va mina a va famba na mina nsin’wini funtshi a hi heta siku hinkwalu na hi chumayela. Hi leswi swi yendlaka swaku minkama yin’wani loko ni bula ni van’wani ni va tlangisa ni ku, ‘ni ve mupfuli wa ndlela wa ku pfunisa na na ha ni 8 wa malembe!’

Vapsali va mina a va li swisiwana; hambileswo, va hi vekeli xikombiso xaxinene xa ku titsona swin’wani swaku va rhangisa ntirho wa Yehovha. Hi xikombiso, hi 1963 va xavise ku tala ka swilo leswi a va li na swona swaku va kuma male ya ku ya kongresu internasiyonali aPasadena, Califórnia aEstados Unidos. Funtshi hi 1972 hi rhurhile hi ya Trail ka provhinsiya la Colúmbia Britânica aCanadá, ku nga ndhawu leyi yi kumekaka kolomu ka 1.000 wa makilometru loko u sukela lani a hi tshama kona. Hi ye seniyani leswaku hi ya pfunisa ku chumayela vanhu lava a va vulavula xiItaliyanu. Papayi a a tirha ka ku hamba malimpeza ni ku lunghisa swilo abazara, funtshi minkama ya yinyingi loko va lava ku mu khwelisa ntirhweni a a nga pfumeli hikusa a a lava ku rhangisa ku tirhela Yehovha ka wutomi la yena.

Ni va khensa hintamu vapsali va mina hileswi va nga hi vekela xikombiso xaxinene mina ni vamakwenu va mina vanharhu. Phela hi vona va nga va va ku sungula ku ni trenara ka ntirho lowu ni wu yendlelaka Yehovha funtshi leswi va nga ni djondzisa swona ni nge te tshuka ni swi khohlwa. Va ni djondzise swaku loko ni rhangisa ku tirhela Yehovha ka wutomi la mina, minkama hinkwayu Yehovha a ta ni hlayisa. — Mat. 6:33.

KU NGHENELA NTIRHO WA NKAMA HINKWAWU

Hi 1980, ni chade na Debbie, ntombhi ya ku saseka leyi rhangisaka ku tirhela Yehovha ka wutomi la yona. Phela hina a hi lava ku nghenela ntirho wa nkama hinkwawu, hi mhaka leyo loko se ku hundze tiwheti tinharhu na hi chadile, Debbie a sungule ku va mupfuli wa ndlela wa nkama hinkwawu. Loko se ku hundze lembe hi rhurhile hi ya ka bandla leli a li ni vachumayeli vavatsongo leswaku hi ya pfunisa, funtshi na mina ni game ni sungula ku va mupfuli wa ndlela.

Hi ku famba ka nkama hi sungule ku hela ntamu funtshi hi pimise ku muka kaya, kambe na hi nge se muka hi bule ni mudjikelezi. Yena a vulavule na hina hi lirhandzu kambe a nga djikadjikanga, a hi byele ntiyiso a ku: “Xikarhatu xi na n’wina hikusa mi pimisa hintamu hi swikarhatu leswi mi kumanaka na swona ka ntirho wa n’wina, kambe loko mo zama ku lavetela swilo swaswinene leswi swi mi yendlekelaka mi ta swi kuma.” Mudjikelezi lwiyani a hi pfunile swinene. (Ps. 141:5) Hi tekele ku txintxa mapimiselo ya hina hi gama hi swi vona swaku hikakunene a ku ni swilo swa swinyingi swaswinene leswi a swi yendleka. Hi xikombiso, vamakwerhu va vanyingi ku patsa ni vana ni vamakwerhu va xisati lava vanuna va vona a va nga li Timboni, a va lava ku yengesela ntirho lowu a va mu yendlela wona Yehovha. Phela leswo swi hi djondzise mhaka ya lisima hintamu, ku nga ku zama ku vona swilo swaswinene leswi swi hi yendlekelaka ni ku tshemba swaku Yehovha a ta hi pfuna ku tiyisela xikarhatu xin’wani ni xin’wani lexi hi kumanaka na xona. (Mik. 7:7) Se swi tlhele swi hi tsakisa ku tama hi tirha ka ndhawu liyani funtshi swilo swi game swi yampsa.

Vamakwerhu lava va nga hi djondzisa ka xikola xa hina xa ku sungula xa vapfuli va ndlela, va tshame va tirha ka matiko man’wani. Se va hi kombe mafoto va tlhela va vulavula hi minkateko ni swikarhatu leswi va nga kumana na swona nkama na va tirha. Funtshi ku sukela kolanu hi sungule ku pimisa hi ku va vamisiyonariyu.

Kuva hi ringa swaku ntirho wa wumisiyonariyu wu tshamise ku yini, hi 1984 hi rhurhile hi ya ka doropa la Quebec, lani ku vulavuliwaka xiFrança. Doropa leli li kumeka kolomu ka ku tlula 4.000 wa makilometru loko u sukela lani a hi tshama kona aColúmbia Britânica. Nkama hi nga fika Quebec swi lave hi titwananisa ni mahanyelo ya nyuwani hi tlhela hi djondzela lirimi la nyuwani. Xikarhatu xin’wani lexi hi nga kumana na xona i ku pfumala male. Hi xikombiso, ku ve ni nkama wa ku a ho hanya hi mazambhani ntsena, lawa wanuna mun’wani lweyi a a ni masimu a a hi tshika hi rholela loko a game ku tshovela. Nsati wa mina Debbie a a ma sweka ma nandzika funtshi a a ma sweka hi tindlela ta ku hambanahambana! Hambileswi a hi kumana ni swikarhatu leswi, hi yendle hinkwaswu leswi hi nga swi kota kuva hi tiyisela hi tlhela hi tama hi tirhela Yehovha na hi tsakile. Funtshi xa lisima hintamu a hi swi vona swaku minkama hinkwayu Yehovha a a tama a hi hlayisa. — Ps. 64:10.

Siku lin’wani, hi foneliwile na hi nga swi nyimelanga hi rhambiwa swaku hi ya tirha aBetele la Canadá. Hi tsakile hintamu, kambe hi nkama wolowo wa wun’we a hi karhateka hikusa a ha ha li ku prenxera a petição la ku ya ka Xikola xa Jiliyadi. Hambileswo hi pfumelile ku famba hi ya tirha Betele. Nkama hi nga fika hi vutise Makwerhu Kenneth Little wa Comissão la Betele hi ku: “Loko vo hi rhamba ka Xikola xa Jiliyadi ke, hi ta ku yini?” Se Makwerhu Kenneth a hi hlamulile a ku: “Mi nga karhatekeni, loko va mi rhamba hi ta swi vona swaku hi ta maha yini.”

Vhela hi swoleswo swi nga gama swi yendleka. Loko se ku hundze vhiki, mina na Debbie hi rhambiwile swaku hi ya ka Xikola xa Jiliyadi, se a swi lava hi yendla xiboho. Makwerhu Kenneth a te: “Ku nga na mhaka ntirho lowu mi nga ta wu langa, minkama yin’wani mi nga ha pimisa swaku a swi ta yampsa loko a mi lange ntirho lowun’wani. Kambe khumbukani swaku a ku na ntirho wa ku yampsa ku tlula wun’wani naswona Yehovha a nga mi katekisa ka ntirho wun’wani ni wun’wani lowu mi mu yendlelaka wona.” Hi pfumelile ku ya ka Xikola xa Jiliyadi, funtshi hi ku famba ka nkama, hi swi vonile swaku marito lawa makwerhu Kenneth a nga hi byela wona a ku li ntiyiso. Funtshi ha ma tirhisa marito wolawo swaku hi pfuna vanhu van’wani lava na vona swi lavaka va langa ntirho lowu va nga ta mu yendlela wona Yehovha.

NTIRHO WA WUMISIYONARIYU

Hi ve ni nkateko wa ku va ka turma la wu 83 la Xikola xa Jiliyadi naswona ka turma lolelo a hi li 24 wa va alunu. Xikola lexi xi yendleliwe aBrooklyn, Nova Iorque naswona xi sungule hi Abril wa 1987. Van’wani va nga hi djondzisa ka xikola lexi ku ve makwerhu Ulysses Glass na Jack Redford. Phela 5 wa tiwheti leti hi nga ti heta na hi djondza ti hundze hi ku kahlula! Hi game hi graduwara hi 6 ka Setembro wa 1987, naswona hi rhumeliwe swaku hi ya tirha aHaiti na makwerhu John na Marie Goode.

Se a ku hundza 25 wa malembe na ku nga rhumeliwi vamisiyonariyu aHaiti, tiko leli kumekaka ka tintshava. Naswona vamisiyonariyu va wugamu lava nga va kona ka tiko leliyani va sindziseke ku suka atikweni hi 1962. Loko se ku hundze mavhiki manharhu na hi graduwarile aJiliyadi, mina na Debbie hi sungule ku tirha ka ndhawu liyani. Bandla leli a hi li ka lona a li ni 35 wa vachumayeli. Phela a ha ha li majovhem funtshi a hi nga na xiperiyensiya naswona a hi tshama hoxe ka tiyindlo ta vamisiyonariyu. Vanhu va ndhawu liyani a va li swisiwana hintamu funtshi ku tala ka vona a va nga swi koti ku lerha. Nkama na hi li Haiti a ku ni swilo swa swinyingi swa ku karhata, swa ku fana ni tinyimpi, ku wutlelana mfumu, switereka ni swidzedze.

Hambileswi hi nga kumana ni swikarhatu, ku vona ndlela leyi vamakwerhu va ndhawu liyani va nga tiyisela hi yona va tlhela va tirhela Yehovha na va tsakile, swi hi djondzise swilo swa swinyingi. Phela vona a va ni wutomi la ku karhata, kambe a va mu rhandza swinene Yehovha va tlhela va rhandza ntirho wa ku chumayela. Ni khumbuka swaku a ku ni makwerhu mun’wani wa xisati lweyi a nga guga wa ku a a nga swi koti ku lerha, kambe a a tiva 150 wa tindzimana ta Bibele hi nhloko. Phela xiyimu xa ku karhata lexi hi nga kumana na xona ka ndhawu liyani, xi hi yendle hi navela ku tama hi chumayela swaku Mfumu wa Xikwembu hi wona wu nga lunghisaka swikarhatu swa vanhu lani misaveni. A hi swi koti ku yi tlhamusela ndlela leyi hi nga tsaka hi yona nkama hi nga tiva swaku swin’wani swa swidjondzo swa hina swa ku sungula swa Bibele se a swi li vapfuli va ndlela va nkama hinkwawu, vapfuli va ndlela va ku hlawuleka ni madoda.

Nkama na hi li Haiti ni tive djaha lin’wani leli vitaniwaka Trevor, leli a li li misiyonariyu wa wukhongeli leli vitaniwaka Mormon. A hi tolovela ku bula hi leswi Bibele li swi djondzisaka. Hi ku famba ka nkama ni hlamale hintamu nkama ni nga yamukela karta la Trevor na a ni byela leswi: “Ni ta tsakamisiwa ka asembleya leli taka. Ni lava ku tlhelela Haiti lani a ni li misiyonariyu wa Mormon leswaku ni ya va mupfuli wa ndlela wa ku hlawuleka.” Phela hi swoleswo swi nga gama swi yendleka. Trevor ni nsati wa yena va hete malembe ya manyingi na va li vapfuli va ndlela va ku hlawuleka aHaiti.

NKAMA HI NGA YA TIRHELA EUROPA NI AFRIKA

Ka matiko man’wani ya Europa, ntirho wa ku chumayela a wu ya wu pfumeleliwa; se hi rhumeliwe ku ya tirhela koseniyani. Hi 1992 hi fike Eslovênia ka doropa la Liubliana, ku nga doropa leli kumekaka kusuhi ni lani vapsali va mina va nga kulela kona na va nge se rhurha va ya Itália. Ka matiko lawa khale a ma lumba Iugoslávia a ku ni nyimpi. Se aBetele la Áustria, la Croácia ni la Sérvia hi wona a ma vonelela ntirho ka ndhawu liyani. Kambe nkama lowu hi nga rhumeliwa ku ya tirha kona, tiko lin’wani ni lin’wani a li ta va ni Betele la lona.

Ku ya tshama aEslovênia a swi lava leswaku hi djondzela lirimi la nyuwani ni mahanyelo ya nyuwani. Vanhu va seniyani a va vula va ku: “Jezik je težek,” leswi vulaka swaku “lirimi leli la karhata.” Vhela lirimi leliyani la karhata swinene! Kambe hi hlamale swinene hi ku vona swaku vamakwerhu a va tinyimisele ku titwananisa ni ku txintxa loku a ku yendliwa ka nhlengeletanu ya Yehovha naswona hi swi vone hi le kusuhi swaku Yehovha a va katekisile. Hi tlhele hi vona swaku Yehovha a lulamisa swilo hi lirhandzu naswona hi nkama wawunene. Swilo swa swinyingi leswi hi nga swi djondza ka mintirho leyi hi nga tshama hi yi yendla ka nhlengeletanu ya Yehovha, swi hi pfunile leswaku hi tiyisela swikarhatu aEslovênia naswona hi djondze swilo swin’wani koseniyani.

Swilo swi tame swi txintxa hi ku famba ka nkama. Hi 2000 hi rhumeliwe aCosta do Marfim, ku nga tiko leli nga Afrika Ocidental. Kambe hi Novembro wa 2002 ku ve ni nyimpi leyi nga yendla swaku hi baleka hi ya Serra Leoa. A xiyimu a xi yampsa ka tiko leli hikusa se a ku hele nyimpi leyi nga teka 11 wa malembe. Swi hi karhatelile ku suka aCosta do Marfim swa kola na kola, kambe swilo leswi hi nga swi djondza ka nkama lowu nga hundza swi hi pfunile ku tama hi tsaka ka ntirho wa hina.

Nkama hi nga fika aSerra Leoa hi ve ni minkateko ya yinyingi. Hi xikombiso, ku tala ka vanhu va seniyani a va lava ku djondza ntiyiso naswona vamakwerhu a va kombana lirhandzu funtshi a va tiyiselele swilo swa ku karhata ku ringana malembe ya manyingi. I ntiyiso swaku vamakwerhu va Serra Leoa a va li swisiwana, kambe a va yendla hinkwaswu va nga swi kotaka swaku va yavelana ni van’wani leswi a va li na swona. Ni khumbuka makwerhu mun’wani wa xisati lweyi a nga ke a nyika Debbie mpahla. Debbie a a nga lavi ku yi teka, kambe makwerhu lwiyani a mu sindzisile a mu byela leswi: “Nkama na ku ni nyimpi, vamakwerhu va matiko man’wani va hi pfunile; se swoswi i khambi la hina la ku pfuna van’wani.” Ku sukela kolanu, mina na Debbie hi tinyimisele ku tekelela xikombiso xa vamakwerhu lavayani hi ku pfuna van’wani.

Hi ku famba ka nkama hi tlhelelile Costa do Marfim, kambe swilo swi tlhele swi biha seniyani. Se hi Novembro wa 2004 swi lave hi tlhela hi baleka. Hi fambe hi xithandhamoya hi ya ka ndhawu leyi a ku tshama masonchwa ya França, naswona mun’wani ni mun’wani wa hina a wo va ni mala wun’we wa 10 wa makilu funtshi hi yetlele hansi ka ndhawu liyani. Hi mundzuku ka kona hi khwele avião hi ya Betele la Suíça funtshi hi fike hi ma zeru wora. Kambe vamakwerhu va Comissão la Betele ni vadjondzisi va Xikola xa Bibele xa Vavanuna Lava Nga Vakreste ku patsa ni vasati va vona va hi yamukele hi lirhandzu. Va hi barasarile, va hi nyika swakudla va tlhela va hi nyika maxokolati ya manyingi. Phela leswo swi hi khumbile swinene.

Hi tirhe nkama wawutsongo aGana hi gama hi tlhelela aCosta do Marfim nkama xiyimu xi nga yampsa. Ndlela leyi vamakwerhu va nga hi pfuna hi yona yi hi pfune ku tiyisela swikarhatu leswi hi nga kumana na swona ni ku txintxa ka mintirho leyi a hi yi yendla. Mina na Debbie hi swi vonile swaku lirhandzu leli vamakwerhu va nga hi komba lona li tolovelekile ka nhlengeletanu ya Yehovha amisaveni hinkwayu; hambileswo, hi tama hi swi nyika lisima hinkwaswu leswi vamakwerhu va hi yendlelaka swona. Hi ku famba ka nkama hi swi vonile swaku swilo leswi hi nga kumana na swona a swo hi trenara.

KU TIRHA A ORIENTE MÉDIO

Hi 2006 hi yamukele karta leli a li ta hi Sede Mundial leli a li vula swaku a hi nyikiwa ntirho wa nyuwani; ka khambi leli a hi ta ya hi ya tirha aOriente Médio. A hi tsakile hi ku tiva swaku a hi ta va ni swiperiyensiya swa ku tsakisa seniya, kambe a hi ta tlhela hi kumana ni swikarhatu ka ntirho wa hina; a swi ta lava hi djondza tirimi ta nyuwani ni mahanyelo ya nyuwani. A hi swi tiva swaku a hi ta djondza minchumu ya yinyingi ka ndhawu liyani a ku ni swikarhatu swa swinyingi swa ku fambisana ni politika ni wukhongeli. Kambe a swi tsakisa hintamu ku vona vamakwerhu lava a va tama va twanana va tlhela va hanyisana kahle hambileswi a va vulavula tirimi ta ku hambanahambana amabandleni, leswo a swi yendleka hi mhaka ya leswi a va yingisa minkongomiso ya nhlengeletanu ya Yehovha. A swi hi hlamalisa hintamu ku vona swaku vamakwerhu a va tama va tiya nhlana hambileswi a va kanetiwa hi maxaka, vavhizinyu, lava tirhaka na vona ni lava djondzaka na vona.

Hi 2012 hi ye ka kongresu la ku hlawuleka aTel Aviv, aIsrael. Phela vanhu va Yehovha va ndhawu liyani a va nge se tshama va va ni ntlhanganu wawukulu wa ku fana ni kongresu leliyani ku sukela hi Pentekoxta wa lembe la 33 E.C. Ntlhanganu lowo a hi nge wu khohlwi!

Nkama na hi tirhela aOriente Médio hi ye hi ya pfuxela tiko lin’wani lani ntirho wa hina wu tsimbisiwaka. Hi va fambele ni mabuku, hi ya ka ntirho wa ku chumayela hi tlhela hi ya ka masembleya lawa a ma yendliwa hi mintlawa yayitsongo. Nkama lowu na hi yendla mintirho leyo a hi tolovela ku vona masonchwa lawa a ma ni swibamu hi tlhela hi hundza hi ka tindhawu leti a ti ni maphoyisa, hi mhaka leyo a hi fanele hi tivonela hintamu nkama hi yendlaka mintirho leyi kambe a hi titwa na hi vhikelelekile hikusa a hi ni vamakwerhu va ndhawu liyani.

HI TLHELELE AFRIKA

Hi 2013 hi yamukele ntirho wa ku a wu hambanile ni leswi a hi swi tolovelile. Hi rhumeliwe ku ya tirha aBetele aKinshasa, aCongo, ku nga tiko leli nga ni tindhawu ta ku saseka hintamu kambe a li li wusiwanini naswona a ku tshamela ku va ni tinyimpi. Ku sunguleni a hi pimisa swaku leswi hi ku tivaka Afrika a swi nga ta hi karhatela, kambe hi djondze swilo swa ku tala nkama na hi yendza, ngopfungopfu hileswi tindhawu tin’wani a ti nga na switaratu kumbe mabuluwa. Hambileswo, a swi li kona swilo swaswinene leswi a swi yendleka. Hi xikombiso, hambileswi vamakwerhu va ku tala a va pfumala male, a va tshama na va tsakile va tlhela va tiyisela, naswona vona a va rhandza ku chumayela va tlhela va tikarhatela ku ya mintlhanganwini ni masembleya. Hi swi vone hi matihlo ya hina swaku a ntirho a wu ya wu kula hi ku katekisiwa hi Yehovha. Ku tirha aCongo swi hi pfunile hikusa hi kume vanghanu va ku tala lava a va fana ni ndjangu ka hina.

A ku heleni ka 2017, hi nyikiwe ntirho wa nyuwani wa ku ya tirha aBetele la Djoni. Betele leli i likulu ku tlula hinkwawu lawa se hi nga tshama hi tirha ka wona. Phela ni mintirho leyi hi nga yi kuma lani, a yi li ya nyuwani naswona a swi lava hi djondzela ku yi yendla kahle. Kambe leswi se a hi swi djondzile ka mintirho leyi hi nga tshama hi yi yendla swi hi pfunile. Swi tsakise swinene ku tiva vamakwerhu lava nga ni malembe ya manyingi na va tirhela Yehovha hi ku tshembeka, naswona swi hi tsakise hintamu ku vona swaku vamakwerhu va ndjangu wa Betele va tirha hi ku twanana hambileswi va nga va tindhawu ta ku hambanahambana naswona va nga kulisiwa hi tindlela ta ku hambana. Vanhu va Yehovha va tama va tikarhatela ku yampsisa wumunhu la vona, va tirhisa leswi Bibele li swi vulaka, naswona Yehovha a tama a va katekisa hi ku va nyika ku rhula.

Ka malembe lawa hinkwawu, mina na Debbie hi nyikiwe mintirho ya ku tsakisa hintamu, swi lave hi titwananisa ni mahanyelo ya nyuwani hi tlhela hi djondzela tirimi ta nyuwani. Leswo minkama yin’wani a swi nga vevuki. Kambe hi mu vonile Yehovha na a hi komba swaku wa hi rhandza hi ku tirhisa nhlengeletanu ya yena ni vamakwerhu. (Ps. 144:2) Ha tiyiseka swaku ntirho wa nkama hinkwawu hi wona wu nga hi pfuna leswaku hi mu tirhela hi ndlela yayinene Yehovha.

Ni swi khensa hintamu hinkwaswu leswi vapsali va mina va nga ni djondzisa swona, mpfunu lowu ni nga wu kuma ka nsati wa mina Debbie ni swikombiso swaswinene swa vamakwerhu amisaveni hinkwayu. Mina ni nsati wa mina hi tinyimisele ku tama hi djondzisiwa hi Yehovha, Mudjondzisi Lwenkulu.