Hi Mhaka Muni Hi Fanele Hi Kombela Switsundzuxu Ka Van’wani?

1. Hi nga yendla yini swaku hi yendla swiboho swa wutlharhi, ni leswaku maplanu ya hina ma famba kahle? (Swivuriso 13:10; 15:22)

PHELA hinkwerhu ha swi lava ku yendla swiboho swa wutlharhi, naswona hi swi lava hintamu swaku maplanu ya hina ma famba kahle. Se Rito la Xikwembu la hi byela swaku hi fanele hi yendla yini swaku leswo swi koteka. — Lerha Swivuriso 13:10; 15:22.

2. I yini leswi Yehovha a hi tshembisaka swona?

² A ku na mun’wani lweyi a nga hi nyikaka switsundzuxu swa wutlharhi ku fana na Yehovha Papayi wa hina. Hi mhaka leyo, ka Tipisalema 32:8 a hi tshembisa leswi: “Ni ta ku tsundzuxa naswona matihlo ya mina ma ta va ma ku txuvukile.” Marito lawo ma kombisa leswaku Yehovha a ngo hi nyika switsundzuxu a gama a hi tshika hi li hoxe kambe a tlhela a hi pfuna swaku hi swi tirhisa.

3. Hi ta djondza yini ka nhlokomhaka leyi?

³ Ka nhlokomhaka leyi, hi ta tirhisa Rito la Xikwembu leswaku li hi pfuna ku hlamula 4 wa swivutiso: 1) Hi lini wumunhu leli nga hi pfunaka ku yamukela switsundzuxu? 2) I mani a nga hi nyikaka switsundzuxu swaswinene? 3) Hi nga swi kombisisa ku yini swaku impela ha swi lava switsundzuxu? 4) Hi mhaka muni hi nga fanelanga hi kombela van’wani va hi yendlela swiboho?

HI LINI WUMUNHU LELI HI FANELEKE HI VA NA LONA?

4. Hi lini wumunhu leli hi faneleke hi va na lona swaku hi pfuneka hi switsundzuxu?

⁴ Leswaku hi pfuneka hi switsundzuxu hi fanele hi tiveka hansi. Hi fanele hi pfumela swaku akuva hi yendla swiboho swa wutlharhi ka mhaka leyi hi ngo sungula ku kumana na yona, swi lava hi pfuniwa hi vanhu van’wani hi tlhela hi pfumela swaku a hi tivi swilo hinkwaswu. Loko hi nga tiveki hansi, Yehovha a nge hi pfuni naswona hambiloko ho lerha Rito la yena a hi nga ta swi kota ku vona leswaku hi nga swi tirhisisa ku yini switsundzuxu swa yena. (Mik. 6:8; 1 Pe. 5:5) Kambe loko hi tiveka hansi, hi ta swi lava hintamu ku yingisela hi tlhela hi tirhisa switsundzuxu leswi swi nga ka Bibele.

5. I yini leswi a swi ta yendla Davhida a tibyela?

⁵ Vona leswi hi nga swi djondzaka ka Hosi Davhida. Phela yena a yendle swilo swa swinyingi swa ku hlamalisa leswi a swi ta mu yendla a tibyela. Hi xikombiso, na a nge se va hosi, vanhu va vanyingi a va mu tiva hi ku yimbelela a tlhela a chaya kahle lakaku a ze a rhambiwa leswaku a ya chayela haripa Hosi Sawulo. (1 Sa. 16:18, 19) Ndzhaku ka loko Yehovha a lange Davhida leswaku a va hosi leyi a yi ta landzela, a mu nyike moya wa ku kwetsima lowu nga yendla leswaku a va ni matimba yamakulu. (1 Sa. 16:11-13) Davhida a a ni ndhuma swinene hileswi a nga kota ku hlula valala va Vayisrayele anyimpini, ku patsa na Goliyadi wanuna lweyi a a ni matimba swinene a tlhela a leha hintamu. (1 Sa. 17:37, 50; 18:7) Phela Davhida loko a wo va munhu mun’wani a a ta va a tibyelile a tlhela a pimisa swaku a nga lavi switsundzuxu, kambe a nga swi yendlanga leswo.

6. Hi swi tivisa ku yini swaku Davhida a a swi yamukela switsundzuxu? (Vona mufoto.)

⁶ Nkama Davhida a nga va hosi, a lange vanghanu lava a va ta mu nyika switsundzuxu. (1 Tik. 27:32-34) Leswo a swi hi hlamalisi, hikusa hambi hi nkama Davhida a a nge se va hosi, minkama hinkwayu a a yingisa switsundzuxu leswi vanhu van’wani a va mu nyika swona. Phela a a nga yingisi vavanuna ntsena kambe a tlhele a yingisa wansati mun’wani lweyi a vitaniwaka Abigayili. Nabali nuna wa Abigayili, a a tibyela, a a nga lavi ku twa nchumu naswona a a nga va hloniphi vanhu van’wani. Ku hambana na yena, Davhida a a tiveka hansi naswona a yingise xitsundzuxu lexi a nga nyikiwa xona hi Abigayili. Leswo swi mu pfune leswaku a nga yendli xihoxo xaxikulu. — 1 Sa. 25:2, 3, 21-25, 32-34.

7. Hi nga djondza yini ka xikombiso xa Davhida? (Ekleziyaxta 4:13) (Vona mafoto.)

⁷ Hi nga djondza swilo swa ku tala ka Davhida. Hi xikombiso, swi nga yendleka hi kota ku yendla swilo swa ku tala kumbe hi va ni wutihlamuleli ka vanhu van’wani. Hambileswo, a hi fanelanga hi pimisa swaku a swi lavi hi nyikiwa switsundzuxu. Hi lava ku fana na Davhida hi ku yamukela switsundzuxu, ku nga na mhaka swaku i mani a hi nyikaka swona. (Lerha Ekleziyaxta 4:13.) Leswo swi nga hi pfuna kuva hi nga yendli swihoxo swaswikulu leswi nga hi tiselaka swikarhatu hina kumbe vanhu van’wani.

I MANI LWEYI A NGA HI NYIKAKA SWITSUNDZUXU SWASWINENE?

8. Hi mhaka muni Yonatani a a ta nyika Davhida xitsundzuxu xaxinene?

⁸ Ku ni swin’wani leswi hi nga swi djondzaka ka xikombiso xa Davhida. Phela yena a a yingisa switsundzuxu swa vanhu lava a va ni wunghanu la ku tiya na Yehovha va tlhela va xi twisisa kahle xiyimu lexi a a li ka xona. Hi xikombiso, nkama lowu Davhida a a lava ku yendla ku rhula na Hosi Sawulo, a yingise xitsundzuxu xa Yonatani n’wana wa Sawulo. Hi mhaka muni Yonatani a a ta mu nyika xitsundzuxu xaxinene? Hikusa Yonatani a a ni wunghanu la ku tiya na Yehovha a tlhela a mu tiva kahle Sawulo. (1 Sa. 20:9-13) Se hina hi nga djondza yini ka xikombiso lexi xa Davhida?

9. Hi fanele hi ya ka mani swaku a hi nyika switsundzuxu swaswinene? Nyikela xikombiso. (Swivuriso 13:20)

⁹ Loko hi lava switsundzuxu swaswinene hi fanele hi ya ka munhu lweyi a nga ni wunghanu la ku tiya na Yehovha naswona a yi tivaka kahle mhaka leyi hi lavaka ku pfuniwa ka yona. (Lerha Swivuriso 13:20.) Hi xikombiso, pimisa hi jovhem leli lavaka munhu wamunene wa ku chada na yena. Li nga swi kuma kwini switsundzuxu swaswinene? Swi nga yendleka munghanu wa lona wa ku kala a nga chadanga a li nyika switsundzuxu swaswinene hi ku tirhisa Bibele. Kambe li nga pfuneka swinene loko li nyikiwa switsundzuxu hi nuna na nsati lava nga ni wunghanu la ku tiya na Yehovha, lava va li tivaka kahle va tlhela va va ni malembe ya manyingi na va tsakile ka wukati la vona.

10. Hi ta bula hi yini swoswi?

¹⁰ Se hi bulile hi wumunhu leli hi faneleke ku va na lona ni swaku i vamani va nga hi nyikaka switsundzuxu swa kahle. Swoswi a hi buleni hi swaku hi nga swi kombisisa ku yini swaku impela ha swi lava switsundzuxu swa van’wani, ni leswaku i swinene ku va hi kombela van’wani swaku va hi yendlela swiboho kumbe nada.

HI NGA SWI KOMBISISA KU YINI SWAKU IMPELA HA SWI LAVA SWITSUNDZUXU?

11-12. a) I mpsini leswi hi faneleke hi fambela kule na swona? b) I mpsini leswi Hosi Robuwamu a nga swi yendla nkama swi nga lava a yendla xiboho xa lisima?

¹¹ Minkama yin’wani swi nga ha tikomba ingaku munhu a lava xitsundzuxu, kambe se a tiyendlele xiboho, o lava vanhu van’wani swaku va pfumelelana na yena. Loko munhu a yendla leswo a nga swi lavi switsundzuxu hikakunene. Swoswi a hi voneni swaku hi nga djondza yini ka xikombiso xa Hosi Robuwamu.

¹² Nkama Hosi Solomoni a nga fa, Robuwamu hi yena a nga mu pfaleta a va hosi ya Israyele. Nkama Robuwamu a nga va hosi tiko a li ganyile swinene, kambe vanhu a va nga tsakanga hikusa a va pimisa swaku Solomoni a a va yendle va tirha yi nga chayi. Se vanhu va yele Robuwamu va ya kombela ku pumbeliwa ntirho lowu a va wu yendla. Robuwamu a kombele nkama swaku a pimisa hi yona mhaka leyo swaku a yendla xiboho. Ku sunguleni, a yile ka vanhu lava va nga kula, ku nga vatsundzuxi lava a va tirhela papayi wa yena Solomoni. (1 Tih. 12:2-7) Kambe a game a huma ka swona leswi vatsundzuxi volavo va nga mu byela swona. Hi mhaka muni? Ku nga va swaku se a a tiyendlele xiboho ka mbilu ya yena, naswona a a lavetela vanhu lava a va ta nyima na xona? Loko ku li leswo, vanghanu va yena lava a va li majovhem lava a nga gama a ya va vutisa va nyime na xona xiboho xa yena. (1 Tih. 12:8-14) Robuwamu a game a hlamula xitshungu hi ku ya hi leswi vanghanu va yena va nga swi vula. Se xitshungu xi mu djikelile Robuwamu xi tlhela xi langa hosi yin’wani. Ku sukela kolanu swilo swi ye swi mu bavela hintamu. — 1 Tih. 12:16-19.

13. Hi nga swi kombisisa ku yini swaku ha swi lava switsundzuxu swa van’wani?

¹³ Hi nga djondza yini ka xikombiso xa Robuwamu? Loko hi ya kombela xitsundzuxu ka munhu a hi fanelanga hi famba kuve se hi tiyendlele xiboho. Hi nga ha tivutisa hi ku: ‘Indjhe ni famba ni ya kombela xitsundzuxu ni gama ni xi ba hi makatla hileswi ni kalaka ni nga twanga leswi a ni lava ku swi twa?’ A hi voneni xikombiso.

14. Hi fanele hi khumbuka yini loko hi nyikiwa xitsundzuxu? Tlhamusela. (Vona mufoto.)

¹⁴ A hi nge makwerhu wa xinuna va mu tshembise ku mu nyika ntirho lowu a male a ngo to maha hi ku yi nusa. Kambe na a nge se pfumela ntirho wolowo a ya kombela xitsundzuxu ka doda. Phela ntirho lowu wu ta mu yendla a tshama nkama wa ku leha kule ni ndjangu wa yena. Doda leli li mu khumbukisa leswi Bibele li swi vulaka hi ku wundla ndjangu, hi ku mu byela swaku xa lisima hintamu i ku wu pfuna leswaku wu va ni wunghanu la ku tiya ni Xikwembu. (Efe. 6:4; 1 Tm. 5:8) Se a hi nge, makwerhu lweyi a nga pfumelelani na swona leswi doda leli li nga swi vula. Se a ya vutisela vamakwerhu va ku hambanahambana abandleni hi mhaka yoleyi ya yin’we anze a kuma lweyi a nga ta mu byela leswi a lavaka ku swi twa. Ku nga va leswaku makwerhu lweyi a lavetela xitsundzuxu kumbe se a tiyendlele xiboho ka mbilu ya yena, o lavetela munhu lweyi a nga ta nyima ni xiboho lexi se a nga xi yendla? Hi fanele hi khumbuka leswaku mbilu ya kanganyisa. (Yer. 17:9) Phela minkama yin’wani xitsundzuxu lexi nga ta hi pfuna hi lexi xi kalaka xi nga hi tsakisi loko hi xi twa.

INDJHE HI FANELE HI KOMBELA VAN’WANI KUVA VA HI YENDLELA SWIBOHO?

15. I mpsini leswi hi faneleke hi tivonela ka swona, naswona hi mhaka muni?

¹⁵ Mun’wani ni mun’wani wa hina a fanele a tiyendlela swiboho hi yexe. (Gal. 6:4, 5) Hilani se hi nga swi vona hi kona, munhu wa ku tlhariha a sungula hi ku lavetela switsundzuxu ka Rito la Xikwembu ni ka Vakreste lava va nga wupfa na a nge se langa leswi a nga ta swi yendla. Hambileswo, hi fanele hi tivonela leswaku hi nga kombeli van’wani va hi yendlela swiboho. Van’wani va nga ha vutisa lava va va hloniphaka va ku ‘loko a wu li ka xiyimu xa ku fana ni xa mina a wu ta ku yini?’ Kasi van’wani vo ringisela leswi van’wani va swi yendlaka na va nga pimisanga kahle hi mhaka ya kona.

16. Hi xini xiyimu lexi Vakorinto va nga kumana na xona naswona i mani lweyi a a fanele a yendla xiboho? (1 Vakorinto 8:7; 10:25, 26)

¹⁶ Pimisa hi xiboho lexi Vakreste va le Korinto a va fanele va xi yendla lexi a xi fambisana ni ku dla nyama leyi a yi phahleliwe swifaniso swa mavunhwa. Ka mhaka leyi, Pawulo a va byele leswi: “Ha swi tiva swaku xifaniso xa mavunhwa a hi xa nchumu misaveni ni leswaku ku ni Xikwembu xin’we ntsena.” (1 Ko. 8:4) Hi mhaka marito lawa ya Pawulo, Vakreste van’wani va bohe leswaku a va ta dla nyama leyi a va yi xava abazara leyi ku sunguleni a yi phahleliwe swikwembu swa mavunhwa. Kasi van’wani va tiyendlele xiboho xa leswaku a va nga ta yi dla nyama yoleyo hi mhaka lipfalu la vona. (Lerha 1 Vakorinto 8:7; 10:25, 26.) Phela mun’wani ni mun’wani a a fanele a tiyendlela xiboho ka mhaka leyi. Pawulo a byele Vakorinto leswaku va nga yendlelani swiboho kumbe ku ringiselana hikusa mun’wani ni mun’wani wa vona a a ta “tihlamulela ka Xikwembu.” — Rom. 14:10-12.

17. Ku nga yendleka yini loko hi ringisela leswi van’wani va swi yendlaka? Nyikela xikombiso. (Vona mafoto.)

¹⁷ Mhaka leyi yi nga tirhisa ku yini namuntlha wa siku? Pimisa hi swiyenge swaswitsongo swa ngati. Phela Mukreste mun’wani ni mun’wani a fanele a tiyendlela xiboho xa leswaku a ta swi yamukela kumbe a nga ta swi yamukela swiyenge swaswitsongo swa ngati. Hambileswi swi nga hi karhatelaka ku yi twisisa kahle mhaka leyi, hi fanele hi khumbuka swaku Mukreste mun’wani ni mun’wani a fanele a tilangela hi yexe leswi a nga ta swi yendla. (Rom. 14:4) Loko hi ringisela leswi van’wani va swi yendlaka, a hi nga ta za hi va Vakreste va ku wupfa, hi to wupfa ntsena loko hi tiyendlela swiboho hi hoxe hi ku pfuniwa hi lipfalu leli nga trenariwa hi matshinya ya minawu ya Bibele. (Heb. 5:14) Kambe i ka swiyimu swini lani hi nga kombelaka switsundzuxu ka makwerhu wa ku wupfa? Hi fanele hi mu kombela loko se hi tiyendlele mapexkiza ya hina kambe hi vona leswaku a hi swi twisisi kahle swaku matshinya ya minawu ya Bibele ma nga tirhisa ku yini ka xiyimu xa hina.

TAMA U LAVETELA SWITSUNDZUXU

18. I mpsini leswi Yehovha a hi yendlelaka swona?

¹⁸ Yehovha a kombisa swaku wa hi tshemba hi ku hi tshika hi yendla swiboho hi hoxe. Yena a hi nyika Rito la yena ku nga Bibele a tlhela a hi nyika vanghanu lava va nga hi pfunaka ku twisisa matshinya ya minawu ya Bibele. Yehovha a hi hlayisa ku fana ni papayi wa lirhandzu. (Swiv. 3:21-23) Hi nga swi kombisa ndjhani swaku ha mu khensa Yehovha?

19. Hi nga yendla yini leswaku Yehovha a tsaka?

¹⁹ Vapsali va tsaka swinene loko va vona vana va vona va kula, va va ni wutlharhi, va tirhela Yehovha ni ku tlhela va pfuna van’wani. Hi ku fana, Yehovha wa tsaka loko a vona leswaku hi ya hi va Vakreste va ku wupfa, lava va kombelaka switsundzuxu ka van’wani hi tlhela hi yendla swiboho leswi swi kombisaka leswaku ha mu rhandza hi tlhela hi mu dzunisa.