U Nga Yendla Yini Swaku U Nyika Van’wani Switsundzuxu Swaswinene?

1. I mani lweyi a faneleke a nyikela xitsundzuxu? Tlhamusela.

INDJHE wa swi rhandza ku nyika van’wani switsundzuxu? Phela van’wani swa va vevukela ku yendla leswo kambe van’wani va chava kumbe swa va karhatela. Ku nga na mhaka leswaku hi titwisa ku yini ka mhaka leyi, siku lin’wani swi ta lava hi nyika van’wani switsundzuxu. Hi mhaka muni? Hikusa Yesu a vule leswaku vadjondzisiwa va ntiyiso a va ta tiviwa hi lirhandzu leli va kombanaka lona. (Yoh. 13:35) Phela ndlela yin’wani ya ku kombisa lirhandzu i ku va hi nyika vamakwerhu va hina switsundzuxu loko swi laveka. Bibele li vula leswaku ‘a wunghanu la ku tsakisa’ li nga sungula loko munhu a hi laya “na swi huma ambilwini.” — Swiv. 27:9.

2. I mpsini leswi madoda ma faneleke ma kota ku swi yendla naswona hi mhaka muni? (Vona kwadru leli nge: “Switsundzuxu Leswi Hi Nyikiwaka Ka Mintlhanganu Ya Xikarhi Ka Vhiki.”)

² Madoda ma fanele ma swi kota ku nyikela switsundzuxu swaswinene. Phela Yehovha a veke Yesu leswaku a veka madoda lawa a ma ta hlayisa bandla. (1 Pe. 5:2, 3) Ndlela yin’wani leyi madoda ma nga hlayisaka bandla hi yona i ku veka madixkursu lawa ma nga ni switsundzuxu leswi taka hi ka Bibele. Madoda ma fanele ma tlhela ma nyika switsundzuxu makwerhu mun’wani ni mun’wani abandleni ni ku pfuna lava nga tshika ku tirhela Yehovha leswaku va tlhelela bandleni. Se madoda na hina hinkwerhu hi nga swi kotisa ku yini ku nyikela switsundzuxu swaswinene?

3. a) I yini xi nga hi pfunaka ku nyikela switsundzuxu swaswinene? (Esaya 9:6; Vona kwadru leli nge: “Tekelela Yesu Loko U Nyikela Switsundzuxu.”) b) Hi ta djondza hi yini ka nhlokomhaka leyi?

³ Leswi nga hi pfunaka kuva hi nyikela switsundzuxu swa kahle i ku djondza hi xikombiso xa vanhu van’wani va le bibeleni; ngopfungopfu xikombiso xa Yesu lweyi Bibele li vulaka swaku “i Mutsundzuxi Wamunene.” (Lerha Esaya 9:6.) Ka nhlokomhaka leyi, hi ta vona swaku hi nga swi kotisa ku yini ku nyikela switsundzuxu swaswinene loko munhu a hi kombela ni swaku hi nga swi nyikelisa ku yini switsundzuxu swaswinene hambiloko munhu a nga hi kombelanga. Hi ta tlhela hi vona lisima la ku nyikela switsundzuxu hi nkama wawunene ni hi ndlela yayinene.

LOKO MUNHU A HI KOMBELA XITSUNDZUXU

4-5. I mpsini leswi hi faneleke hi tivutisa swona loko munhu a hi kombela xitsundzuxu? Nyikela xikombiso.

⁴ Hi fanele hi yendla yini loko munhu a hi kombela xitsundzuxu? Swi nga yendleka hi tsaka swinene hi ku vona swaku munhu yelweyo wa hi tshemba se hi lava ku tekela ku mu nyika xitsundzuxu hi nkama wolowo. Kambe na hi nge se yendla leswo hi fanele hi tivutisa leswi: ‘Indjhe hi mina ni nga ni mfanelo ya ku mu nyika xitsundzuxu ka mhaka leyi?’ Minkama yin’wani ndlela yayinene ya ku pfuna munhu yelweyo i ku kala hi nga mu nyiki xitsundzuxu, kambe hi mu komba munhu lweyi a yi tivaka kahle mhaka ya kona.

⁵ Hi xikombiso, munghanu wa wena wamukulu a ku byela swaku wa vabya swinene ni leswaku se a sungule ku lavetela tindlela ta ku dahiwa ka mavabyi ya yena. Se a gama a ku kombela swaku u mu pfuna ku langa ndlela leyi a nga ta dahiwa hi yona. Hambiloko ku ni ndlela leyi wena u nga yi tsakela, leswi u kalaka u nga na xiperiyensiya xa madahelo ya mavabyi wolawo, a xaxinene lexi u nga xi yendlaka i ku pfuna munghanu wa wena ku kuma dotori lweyi a nga mu pfunaka.

6. Hi fanele hi yendla yini na hi nge se nyikela xitsundzuxu?

⁶ Minkama yin’wani u nga ha pimisa swaku u nga swi kota ku mu nyika xitsundzuxu lweyi a nga ku kombela. Hambileswo, a hi swinene ku tekela ku mu hlamula. Hi mhaka muni hi vula leswo? Hikusa Swivuriso 15:28 yi vula leswaku ‘munhu wa ku lulama a rhanga hi ku pimisa na a nge se hlamula’. Se u ta ku yini loko u pimisa swaku se u na yona nhlamulu ya xivutiso lexi a nga ku yendla xona? Ka xiyimu lexo, i swinene ku tinyika nkama wa ku hamba mapexkiza hi mhaka ya kona, u pimisa hi yona u tlhela u khongela. Loko u yendla leswo, u ta swi kota ku nyikela xitsundzuxu lexi fambisanaka ni ku rhandza ka Yehovha. Swoswi a hi voneni leswi nga yendlekela muprofeta Natani.

7. Hi djondza yini ka leswi nga yendlekela muprofeta Natani?

⁷ Hosi Davhida a byele muprofeta Natani leswaku a a navela ku yakela Yehovha tempele. Natani a tekele ku pfumelelana na yena Davhida a tlhela a mu byela swaku leswi a a navela ku swi yendla a swi li swinene. Kambe Natani a a fanele a rhanga hi ku vutisa Yehovha leswaku a tiva leswi a a swi pimisa. Hi mhaka muni? Hikusa Yehovha a a nga swi lavi leswaku Davhida a mu yakela tempele. (1 Tik. 17:1-4) Xikombiso lexi xi hi djondzisa leswaku loko munhu a hi kombela xitsundzuxu a hi fanelanga hi tsutsumela ku mu hlamula. — Yak 1:19.

8. Hi wini nchumu wun’wani lowu faneleke wu hi yendla hi tivonela na hi nge se nyikela xitsundzuxu?

⁸ Pimisa hi nchumu wun’wani lowu faneleke wu hi yendla hi tivonela na hi nge se nyika munhu xitsundzuxu. Loko ho tsutsumela ku mu nyika xitsundzuxu, a gama a yendla xiboho hi ku ya hi leswi hi nga mu byela swona swi gama swi nga mu fambeli kahle, a ta rila hi hina. Phela leswo swi tiyisekisa mhaka ya leswaku hi fanele hi pimisa kahle na hi nge se nyikela xitsundzuxu.

LOKO HI NYIKELA XITSUNDZUXU NA HI NGA KOMBELIWANGA

9. Madoda ma fanele ma tiyiseka hi yini na ma nge se nyikela xitsundzuxu? (Vagalatiya 6:1)

⁹ Minkama yin’wani swi lava madoda ma nyikela switsundzuxu ka vamakwerhu lava va ‘humaka ndleleni’. (Lerha Vagalatiya 6:1.) ‘Ku huma ndleleni’ swi vula ku yendla swiboho leswi kalaka swi nga li swa wutlharhi, leswi nga yendlaka munhu a gama a yendla xidjoho xaxikulu. Se loko madoda ma vona xiyimu xa ku fana ni lexo, ma zama ku tlhelisela makwerhu ka ndlela leyi yisaka ka wutomi la ku kala li nga heli. (Yak. 5:19, 20) Kambe leswaku madoda ma nyikela xitsundzuxu xaxinene ma fanele ma rhanga hi ku tiyiseka swaku impela makwerhu o huma ndleleni. Ma fanele ma yendla leswo hikusa minkama yin’wani makwerhu a nga yendla swiboho swa ku hambana ni leswi madoda ma swi yendlaka kambe na swi nga mu kwatisi Yehovha. (Rom. 14:1-4) Kambe loko madoda ma vona swaku impela makwerhu o huma ndleleni naswona swi lava a tsundzuxiwa, ma nga yendla yini swaku ma mu nyika xitsundzuxu xaxinene?

10-12. I yini leswi madoda ma faneleke ma swi yendla loko ma nyikela xitsundzuxu ka munhu lweyi a kalaka a nga xi kombelaka? Nyikela xikombiso. (Vona mafoto.)

¹⁰ A swi vevuki ku va madoda ma nyikela switsundzuxu ka munhu lweyi a kalaka a nga kombelanga ku pfuniwa. Hi mhaka muni hi vula leswo? Mupostolo Pawulo a vule leswaku minkama yin’wani munhu a nga ha yendla xiboho xa ku pfumala wutlharhi kambe a nga swi voni. Se loko madoda ma nge se nyikela xitsundzuxu, ma fanele ma rhanga hi ku lunghiselela mbilu ya lweyi ma lavaka ku mu nyika xitsundzuxu.

¹¹ Ku nyikela switsundzuxu na hi nga kombeliwanga swi nga fanisiwa ni ku byala mbewu ka misava ya ku tiyela. Murimi a fanele a rhanga hi ku lunghiselela misava, se hi kona a byalaka mbewu ya yena a gama a regara leswaku yi kula. Hilani ku fanaka loko doda li nyikela xitsundzuxu na li nga kombeliwanga li fanele li rhanga hi ‘ku lunghiselela misava’; leswi nge li fanele li nyimela nkama wawunene leswaku li vulavula, li tirhisa marito ya ku nandzika li tlhela li kombisa lirhandzu ni ku kombisa swaku li ni mhaka ni munhu lweyi li lavaka ku mu nyika xitsundzuxu. Phela loko doda li tiviwa hi ku va munhu wa lirhandzu ni ku kombisa wunene, swi nga va vevukela van’wani ku pfumela switsundzuxu leswi lona li nga ta va nyika swona.

¹² Nkama lowu doda li bulaka ni lweyi li lavaka ku mu nyika switsundzuxu, li tama li lunghiselela mbilu ya yena hi ku mu khumbukisa swaku hinkwerhu ha phazama naswona minkama yin’wani swi ta lava hi nyikiwa switsundzuxu. (Rom. 3:23) Li vulavula na yena hi rito la ku rhula ni hi xihlonipho li tlhela li tirhisa Bibele kuva li komba makwerhu yelweyo xihoxo lexi a nga xi yendla. Loko makwerhu a pfumela swaku impela a phazamile, doda li byala “mbewu ka mbilu ya yena” hi ku mu tlhamusela hi ndlela ya ku vevuka swaku a fanele a yendla yini kuva a lulamisa xihoxo xa yena. Doda li gama li “regara” mbewu yoleyo hi ku byela makwerhu swilo swaswinene leswi se a swi yendlaka li tlhela li khongela na yena. — Yak. 5:15.

13. Madoda ma nga yendla yini leswaku ma tiyiseka swaku xitsundzuxu xa wona xi twisisekile?

¹³ Minkama yin’wani leswi lweyi a nyikiwaka xitsundzuxu a swi twisisaka swi hambanile ni leswi lweyi a nyikelaka xitsundzuxu a nga swi vula. Se kuva leswo swi nga yendleki, madoda ma nga tirhisa swivutiso swa wutlharhi leswaku ma tiyiseka swaku lweyi ma mu tsundzuxaka a xi twisisile xitsundzuxu ni leswi a faneleke a swi yendla swaku a tirhisa xitsundzuxu xolexo. — Ekl. 12:11.

NYIKELA XITSUNDZUXU HI NKAMA WAWUNENE NI HI NDLELA YAYINENE

14. Hi mhaka muni hi nga fanelanga hi nyikela xitsundzuxu loko hi kwatile?

¹⁴ Leswi hi kalaka hi nga hetisekanga, minkama yin’wani hi nga ha vula kumbe ku yendla nchumu lexi nga ta kala xi nga va tsakisi van’wani. (Kol. 3:13) Bibele li vula swaku minkama yin’wani hi nga kwata kumbe hi kwatisa vanhu van’wani. (Efe. 4:26) Kambe hi fanele hi tivonela leswaku hi nga nyikeli xitsundzuxu na hi kwatile. Hi mhaka muni? Hikusa Bibele li vula swaku “loko munhu a kwata a nga yendli leswi fambisanaka ni ku lulama ka Xikwembu.” (Yak. 1:20) Phela loko hi nyikela xitsundzuxu na hi kwatile, swi nga yendla swaku mhaka yi ya yi kula. Leswo a swi lavi ku vula swona swaku loko munhu a hi kwatisa a hi fanelanga hi mu byela leswi hi titwisaka xiswona; kambe hi fanele hi tikhoma, hi nyimela nkama wawunene wa ku vulavula, loko se hi rhulile. A hi voneni leswi hi nga swi djondzaka ka xikombiso xa Elihu, lweyi a nga nyika Yobo xitsundzuxu xaxinene.

15. Hi djondza yini ka xikombiso xa Elihu? (Vona mufoto.)

¹⁵ Elihu a hete masiku ya manyingi na a yingisela Yobo nkama lowu a a zama ku tinyimelela ka leswi a a lumbetiwa hi swona hi vanghanu va yena va vanharhu. Elihu a a mu twela wusiwana Yobo kambe leswi Yobo a a zama ku tinyimelela hi tindlela hinkwatu, a game a vula swilo swa ku kala swi nga li swinene ni leswi swi kalaka swi nga li ntiyiso hi Yehovha. Leswo swi mu kwatisile swinene Elihu, kambe a nga tsutsumelanga ku vulavula. Handle ka leswo a nyimele nkama wa yena wa ku vulavula naswona a vulavule hi ndlela ya ku rhula ni xihlonipho nkama lowu a nga tsundzuxa Yobo. (Yob. 32:2; 33:1-7) Hi nga djondza swilo swa lisima ka xikombiso xa Elihu: Nkama wawunene wa ku vulavula hi loko hi rhulile naswona ndlela yayinene ya ku nyikela xitsundzuxu i ku xi nyikela hi ndlela ya lirhandzu ni hi xihlonipho. — Ekl. 3:1, 7.

TAMA U NYIKELA U TLHELA U YAMUKELA SWITSUNDZUXU

16. Hi djondza yini ka Tipisalema 32:8?

¹⁶ Ndzimana leyi nga khoma nhlokomhaka leyi, yi vula swaku ‘Yehovha a hi tsundzuxa na matihlo ya yena ma hi txuvukile.’ (Lerha Tipisalema 32:8.) Leswo swi kombisa swaku Yehovha a ngo hi nyika switsundzuxu a gama a hi tshika hoxe; kambe a tlhela a hi pfuna leswaku hi tirhisa switsundzuxu swoleswo. Phela lexi i xikombiso xaxinene ka hina! Se loko swi lava u nyika munhu xitsundzuxu, tekelela Yehovha: Tama u veka tihlo ka munhu yelweyo u tlhela u mu pfuna leswaku a yendla swiboho swaswinene.

17. Hi mhaka muni swi li swinene ku va ni madoda lawa ma nyikelaka switsundzuxu swa ku kongoma hi ku tirhisa Bibele? (Esaya 32:1, 2)

¹⁷ Swoswi swi laveka hintamu leswaku hi yamukela ni ku nyikela switsundzuxu swaswinene. (2 Tm. 3:1) Madoda lawa ma nyikelaka switsundzuxu swa ku kongoma hi ku tirhisa Bibele, ma “fana ni minambu ka tiko leli kalaka li nga na mati.” (Lerha Esaya 32:1, 2.) Munghanu lweyi a swi tivaka leswi hina hi lavaka ku swi twa kambe a hi byelaka swilo leswi hi faneleke hi swi twa i wa lisima swinene. Phela leswi a swi vulaka swi fana ni “maçã ya woru lama nga ka swibya swa prata.” (Swiv. 25:11) Se hinkwerhu a hi tameni hi tikarhatela ku va ni wutlharhi leli nga ta hi pfuna ku yamukela ni ku nyikela switsundzuxu swaswinene.