Yehovha A Hi Pfunisa Ku Yini Ku Tiyisela?

1. Hi mhaka muni swi lava hi tiyisela naswona i mani lweyi a nga hi pfunaka? (1 Pedru 5:10)

LESWI hi hanyaka ka masiku ya ku karhata swi lava hi tiyisela. Van’wani va kumana ni mavabyi ya ku karhata, van’wani va feliwe hi vanhu lava a va va rhandza swinene kasi van’wani va hluphiwa hi maxaka ya vona kumbe hi mfumu. (Mat. 10:18, 36, 37) Kambe ku nga na mhaka xikarhatu lexi hi kumanaka na xona, hi nga tiyiseka swaku Yehovha a nga hi pfuna swaku hi tiyisela. — Lerha 1 Pedru 5:10.

2. Hi ma kuma kwini matimba ya ku tama hi tiyisela?

² Ku tiyisela swi vula kuva munhu a nyima a tiyile, a nga heleliwi hi ntshembo hambiloko a hluphiwa, a kumana ni swikarhatu kumbe mindzingo. Hina Vakreste a hi swi koti ku tiyisela hi matimba ya hina, ho swi kota ntsena hileswi Yehovha a hi pfunaka hikusa yena a hi nyika “matimba yamakulu lama tlulaka hinkwaswu”. (2 Ko. 4:7) Ka djondzo leyi, hi ta vona 4 wa minchumu leyi Yehovha a hi nyikaka swaku hi kota ku tiyisela hi ta tlhela hi vona swaku hi nga yi tirhisisa ku yini.

XIKHONGELO

3. Hi mhaka muni hi nga vulaka leswaku xikhongelo i singita?

³ Leswaku a hi pfuna ku tiyisela, Yehovha a yendle nchumu xa ku hlamalisa swinene. A yendle leswaku swi koteka swaku hina vanhu, hambileswi hi nga vadjohi hi swi kota ku vulavula na yena. (Heb. 4:16) Hi nga khongela ka Yehovha nkama wun’wani ni wun’wani hi tlhela hi mu byela xin’wani ni xin’wani; hi nga vulavula na Yehovha hi xikhongelo ka ndhawu yin’wani ni yin’wani ni hi lirimi leli hi li lavaka. Phela hi nga vulavula na Yehovha hambiloko hi li kule ni van’wani kumbe loko hi pfaleliwe djele. (Yon. 2:1, 2; Min. 16:25, 26) Loko hi karhateka hintamu lakakuva hi nga swi koti ni ku vula leswi hi titwisaka xiswona, Yehovha wa swi twisisa swaku a hi lava ku vula yini. (Rom. 8:26, 27) Impela, xikhongelo i singita la Yehovha!

4. Hi swi tivisa ku yini swaku ku kombela Yehovha kuva a hi pfuna ku tiyisela swi fambisana ni ku rhandza ka yena?

⁴ Bibele li vula leswaku “Xikwembu xa hi twa loko hi kombela xin’wani ni xin’wani lexi fambisanaka ni ku rhandza ka xona.” (1 Yo. 5:14) Leswo swi lava ku vula leswaku loko hi kombela Yehovha kuva a hi pfuna ku tiyisela wa hi twa hikusa leswo swi fambisana ni ku rhandza ka yena. Hi mhaka muni hi vula leswo? Phela loko hi tiyisela hi va hi pfunisa swaku Yehovha a hlamula nala wa yena wamukulu, ku nga Sathana Davulosi. (Swiv. 27:11) Bibele li tlhela li kombisa leswaku Yehovha a swi lava hintamu ku “pfuna lava mu tshembaka hi mbilu hinkwayu.” (2 Tik. 16:9) Hi mhaka leyo, hi nga tiyiseka swaku Yehovha wa swi lava ku hi pfuna a tlhela a hi nyika matimba ya ku tama hi tiyisela. — Esa. 30:18; 41:10; Luk. 11:13.

5. Ku khongela swi nga hi pfunisa ku yini swaku hi va ni ku rhula? (Esaya 26:3)

⁵ Bibele li vula leswaku loko hi khongela ka Yehovha hi mu byela leswi nga mbilwini a ta hi nyika ‘ku rhula ka Xikwembu loku tlulaka ku twisisa hinkwaku, naswona ku ta vonelela timbilu ta hina ni mimpimiso ya hina’. (Filp. 4:7) Phela i nkateko wawukulu ku va ni ku rhula koloko. Vanhu lava kalaka va nga mu tirheli Yehovha va kumana na swona swikarhatu naswona va yendla leswi va nga swi kotaka swaku va va ni ku rhula ka mimpimiso. Van’wani va yendla ma exercício ya mimpimiso leswaku va susa mimpimiso hinkwayu ku patsa ni ya ku biha leyi yendlaka swaku va vilela. Kambe ku yendla leswo swi ni khombo hikusa va va na va nyika ndhawu madimoni leswaku ma va fuma. (Vona ni Matewu 12:43-45.) Ku rhula loku Yehovha a hi nyikaka kona loko hi khongela ka yena a ku nge fanisiwi ni nchumu. Loko hi khongela hi kombisa swaku ha mu tshemba hi ku helela Yehovha, se yena a ta hi nyika “ku rhula nkama ni nkama.” (Lerha Esaya 26:3.) A swi yendlisa ku yini leswo? Ndlela yin’wani i ku hi khumbukisa tindzimana ta Bibele leti hi tiyisekisaka leswaku wa hi rhandza naswona a ni mhaka na hina. Tindzimana toleto ta hi rhulisa. — Ps. 62:1, 2.

6. U nga yi tirhisisa ku yini nyiko ya ku khongela? (Vona mufoto.)

⁶ Leswi u nga swi yendlaka. Loko u kumana ni xikarhatu “hoxa ndzhwalu wa wena ka Yehovha” hi ku mu byela leswi u titwisaka xiswona u tlhela u kombela swaku a ku nyika ku rhula. (Ps. 55:22) Mu kombeli leswaku a ku nyika wutlharhi kuva u kota ku tiyisela xikarhatu lexi u kumanaka na xona. (Swiv. 2:10, 11) Naswona mu khensi ka swikhongelo swa wena. (Filp. 4:6) Siku ni siku, zama ku vona leswi Yehovha a ku pfunisaka xiswona u tlhela u mu khensa. U nga pfumeleli swikarhatu swi ku sivela ku vona minkateko leyi se a nga ku nyika yona. — Ps. 16:5, 6.

RITO LA XIKWEMBU

7. Ku djondza Bibele swi nga hi pfunisa ku yini kuva hi tiyisela?

⁷ Yehovha a hi nyike Rito la yena ku nga Bibele leswaku li hi pfuna ku tiyisela. Loko hi djondza Bibele hi kuma tindzimana ta tinyingi leti hi tiyisekisaka swaku Yehovha minkama hinkwayu a ta hi pfuna. Hi xikombiso, Matewu 6:8 yi li: “Papayi wa n’wina wa swi tiva leswi mi swi pfumalaka na mi nge se swi kombela.” Marito lawa ma vuliwe hi Yesu, naswona a ku na munhu a mu tivaka kahle Yehovha ku tlula yena. Se, hi nga tiyiseka leswaku loko hi kumana ni swikarhatu, Yehovha wa swi tiva leswi nga hi pfunaka funtshi minkama hinkwayu a ta hi pfuna. Phela Bibele li ni tindzimana ta tinyingi ta ku fana ni leyi, leti hi pfunaka ku tiyisela swikarhatu. — Ps. 94:19.

8. a) Hi xini xitsundzuxu xa Bibele lexi hi pfunaka ku tiyisela? b) I mpsini swi nga ta hi pfuna ku khumbuka matshinya ya minawu ya Bibele?

⁸ Matshinya ya minawu ya Bibele ma nga hi pfuna ku tiyisela hikusa ma hi nyika wutlharhi leswaku hi yendla swiboho swaswinene. (Swiv. 2:6, 7) Hi xikombiso, Bibele li hi byela leswaku hi nga karhateki hi leswi swi nga ta yendleka mundzuku kambe hi tshemba Yehovha siku lin’wani ni lin’wani. (Mat. 6:34) Loko hi tolovela ku lerha Bibele hi tlhela hi pimisa hi leswi hi swi lerhaka swi ta hi vevukela ku khumbuka matshinya ya minawu ya Bibele loko hi lava ku yendla swiboho kumbe loko hi kumana ni swikarhatu.

9. Ku djondza hi swikombiso swa vanhu va ku tshembeka va Bibeleni swi hi pfunisa ku yini?

⁹ Ka Bibele hi tlhela hi kuma swikombiso swa vanhu va ku fana na hina, lava va nga tshemba Yehovha va tlhela va pfuniwa hi yena. (Heb. 11:32-34; Yak. 5:17) Ku pimisa hi swikombiso swoleswo swi tiyisa lipfumelo la hina ka leswaku Yehovha “i ndhawu ya ku tumbela ni matimba ya hina, ku pfuniwa loku kumekaka hi ku hantlisa hi nkama wa mahlomulu.” (Ps. 46:1) Ku djondza hi vanhu va ku tshembeka va le Bibeleni swi hi pfuna kuva na hina hi navela ku tekelela lipfumelo ni ku tiyisela ka vona. — Yak. 5:10, 11.

10. U nga yendla yini swaku u pfuneka hi Rito la Xikwembu?

¹⁰ Leswi u nga swi yendlaka. Lerha Bibele siku ni siku u tlhela u hamba lixta la tindzimana leti ku pfunaka. Vanyingi va pfuneka hintamu hi ku lerha Tsalwa La Siku na ka ha li mixo hikusa leswo swi va yendla va pimisa hi leswi va nga swi djondza ka Bibele siku hinkwalu. Hi leswo swi nga pfuna makwerhu Mariaa ku tiyisela nkama a a hlayisa vapsali va yena lava a va vabya hi kankru naswona a va li kusuhi ni ku fa. Yena a li: “Siku ni siku a ni lerha Tsalwa La Siku ni tlhela ni pimisa hi lona; ku yendla leswo a swi ni pfuna leswaku ni nga pimisi hintamu hi xiyimu xa mina xa ku karhata kambe ni pimisa hi Rito la Xikwembu.” — Ps. 61:2.

VAMAKWERHU

11. Hi titwisa ku yini hi ku tiva swaku vamakwerhu amisaveni hinkwayu va tama va tiyisela?

¹¹ Yehovha a tirhisa vamakwerhu leswaku a hi pfuna ku tiyisela. Ku tiva swaku ‘vamakwerhu amisaveni hinkwayu va kumana ni mahlomulu ya ku fana ni ya hina’ swa hi tiyisa swi tlhela swi hi pfuna ku vona swaku a hi hoxe. (1 Pe. 5:9) Amisaveni hinkwayu, vamakwerhu va kumana ni swikarhatu swa ku fana ni swa hina funtshi va tama va swi tiyiselela. Leswo swi kombisa swaku hambi ho kumana ni swikarhatu swa ku tshamisa ku yini na hina hi nga swi kota ku tama hi tiyisela! — Min. 14:22.

12. Vamakwerhu va nga hi pfunisa ku yini naswona hina hi nga yendla yini swaku hi va pfuna? (2 Vakorinto 1:3, 4)

¹² Leswi vamakwerhu va hi yendlelaka swona ni leswi va swi vulaka swi nga hi pfuna ku tiyisela. Hi leswo swi nga yendlekela mupostolo Pawulo. Ka makarta ya yena a vule mavito ya vamakwerhu lava nga mu pfuna nkama lowu na a li djele a tlhela a va khensa. Vamakwerhu lavayani va mu chavelelile, va mu tiyisa va tlhela va mu pfuna hi leswi a a swi lava. (Filp. 2:25, 29, 30; Kol. 4:10, 11) Ninamuntlha ku yendleka swa ku fana; vamakwerhu va hi tiyisa va tlhela va hi pfuna loko swi lava hi tiyisela; na hina hi maha swa ku fana loko va lava ku pfuniwa. — Lerha 2 Vakorinto 1:3, 4.

13. I mpsini swi nga pfuna Maya ku tiyisela?

¹³ Hi 2020 maphoyisa man’wani ya Rússia ma nghene kaya ka makwerhu Maya ma sungula ku sencha. Swi lave a ya tribunali leswaku a ya thethisiwa hileswi a a bula ni van’wani hi leswi a kholwaka ka swona. Hi nkama wolowo vamakwerhu va mu tiyise swinene Maya. Yena a li: “A ni titwa na ni karhalile, ni vilela ni tlhela ni hela ntamu kambe vamakwerhu a va ni fonela, va ni tsalela mamensajem ni makarta va ni byela swaku va ni rhandza. Phela ku sukela khale a ni swi tiva swaku vamakwerhu i ndjangu wawukulu lowu kombisanaka lirhandzu, kambe ku sukela hi 2020 ni sungule ku swi vona leswo hi ndlela ya ku hlawuleka.”

14. Hi nga yendla yini leswaku vamakwerhu va hi pfuna? (Vona mufoto.)

¹⁴ Leswi u nga swi yendlaka. Loko u kumana ni swikarhatu i swa lisima ku bula ni vamakwerhu u tlhela u heta nkama na vona. U nga chavi ku kombela ku pfuniwa hi madoda hikusa wona ma fana ni “ndhawu ya ku tumbela ka yona loko ku ni moya, ndhawu ya ku tumbela ka yona loko ku ni xidzedze”. (Esa. 32:2) Naswona khumbuka leswaku na vona vamakwerhu va kumana ni swikarhatu, se loko u pfuna makwerhu lweyi a kumanaka ni swikarhatu u ta tsaka naswona leswo swi ta ku pfuna leswaku u tama u tiyisela. — Min. 20:35.

NTSHEMBO WA HINA

15. Ntshembo wu mu pfunise ku yini Yesu naswona wu hi pfunisa ku yini namuntlha? (Vaheberu 12:2)

¹⁵ Ntshembo lowu Yehovha a hi nyikaka wona wu hi pfuna ku tama hi tiyisela. (Rom. 15:13) Hambi hi Yesu wu mu pfunile ntshembo. Yena a a swi tiva swaku loko a tama a tshembeka ka Yehovha a a ta pfunisa ku basiseni ka vito la Papayi wa yena. Yesu a a swi lava hintamu ku tlhela a ya tilweni a ya tshama ni Papayi wa yena funtshi hi ku famba ka nkama a va Hosi xikan’we ni vamakwavu va yena lava 144.000. Phela ntshembo wolowo wu mu pfunile Yesu leswaku a tiyisela swikarhatu swaswikulu leswi a nga kumana na swona hi siku leli a nga fa hi lona. (Lerha Vaheberu 12:2.) Swi hi ku fana na hina namuntlha, ntshembo wa hina wa ku hanya wutomi la ku kala li nga heli amisaveni ya nyuwani, wu hi pfuna ku tiyisela xikarhatu xin’wani ni xin’wani lexi hi kumanaka na xona ka misava leyi ya Sathana.

16. Ntshembo wu mu pfunise ku yini makwerhu Alla leswaku a tiyisela naswona u djondze yini ka xikombiso xa yena?

¹⁶ Ku pimisa hi ntshembo swi pfune makwerhu mun’wani wa xisati lweyi a vitaniwaka Alla lweyi a tshamaka Rússia. Nuna wa yena a petiwe djele na a ha nyimela ku thethisiwa. Yena a li: “Ku khongela ni ku pimisa hi ntshembo swi ni pfune leswaku ni nga heli ntamu. Phela na swi tiva swaku swikarhatu swa hina i swa nkamanyana; ku nga li khale Yehovha a ta hlula valala va yena a tlhela a hi katekisa.”

17. Hi nga swi kombisisa ku yini swaku ha wu khensa ntshembo lowu Yehovha a nga hi nyika wona? (Vona mufoto.)

¹⁷ Leswi u nga swi yendlaka. Tinyiki nkama wa ku pimisa hi leswi Yehovha a hi tshembisaka ka nkama lowu taka. Tipimisi na u tshama ka misava ya ku xonga na u ni maxaka ni vanghanu va wena na mi tsakile swinene; loko u yendla leswo u ta vona swikarhatu leswi u kumanaka na swona na swi li swa ‘nkamanyana naswona swi nga tiki hintamu’. (2 Ko. 4:17) Xin’wani u nga xi yendlaka i ku byela van’wani hi ntshembo lowu u nga na wona. Pimisa hi leswi wutomi li va karhatelisaka xiswona vanhu lava kalaka va nga tirheli Yehovha hileswi va kalaka va nga na ntshembo. Phela hambi hi mabulu ya ku goma ma nga yendla swaku munhu a navela ku tiva swa swinyingi hi ntshembo lowu hi nga na wona.

18. Hi mhaka muni hi nga swi tshembaka leswi Yehovha a hi tshembisaka swona?

¹⁸ Loko Yobo se a tiyisele swikarhatu swa swinyingi a byele Yehovha a ku: “Swoswi se na swi tiva swaku u kota ku yendla swilo hinkwaswu, naswona a wu tsandziwi hi nchumu.” (Yob. 42:2) Yobo a swi vonile leswaku a ku na nchumu lexi nga sivelaka Yehovha leswaku a hetisisa swikongomelo swa yena. Ku tiva leswo swi nga hi pfuna swaku hi tiyisela swikarhatu swa hina. Pimisa hi xikombiso lexi: Wansati mun’wani lweyi a nga ni malembe na a vabya a ye ka vadotori va vanyingi swaku a dahiwa kambe hinkwavu va tsandzekile. Se a ya ka dotori wamunene lweyi a nga ni xiperiyensiya. Dotori lweyi a mu byela swaku a vabya hi yini a tlhela a mu tlhamusela swaku a ta mu dahisa ku yini. Hambileswi wansati lweyi a kalaka a nga se dahiwa, a nga ha karhateki hintamu hikusa se a ni ntshembo wa leswaku a ta dahiwa. Hilani ku fanaka, na hina loko hi tiyiseka leswaku leswi Yehovha a hi tshembisaka ka nkama lowu taka swi ta yendleka hikakunene, hi ta swi kota ku tiyisela.

19. Hi fanele hi yendla yini leswaku hi tama hi tiyisela?

¹⁹ Hilani hi nga swi vona hi kona ka nhlokomhaka leyi, xikhongelo, Rito la Xikwembu, vamakwerhu ni ntshembo wa hina i tinyiko leti Yehovha a nga hi nyika tona leswaku a hi pfuna ku tiyisela. Loko hi ti tirhisa kahle tinyiko leti hi ta swi vona swaku Yehovha a kusuhi na hina leswaku a hi pfuna loko hi kumana ni swikarhatu naswona hi ta swi kota ku tama hi tiyisela xikarhatu xin’wani ni xin’wani lexi hi nga ha kumanaka na xona anze misava leyi ya Sathana yi helisiwa. — Filp. 4:13.