Kuma Ku Rhula Hambileswi Ku Nga Ni Tinyimpi
Gary lweyi a nga tshama a va musonchwa a li: “Na ni nge se djondza Bibele a ni nga swi tivi swaku hi mhaka muni ku ni wubihi, ku kala wululami ni swikarhatu swin’wani leswi nga kona misaveni. Kambe swoswi ni kume ku rhula. Na swi tiva swaku Yehovha a ta yendla leswaku misava leyi yi va ndhawu ya kahle ya ku tshama ka yona leyi nga vhikeleka.”
Gary a hi yena yexe a titwaka hi ndlela leyo. Vona leswi Bibele li nga va pfunisa xiswona vanhu van’wani.
I MPSINI LESWI BIBELE LI SWI VULAKA? “Hikusa u lulamile, wena Yehovha, naswona u lunghekele ku rivalela.” — Tipisalema 86:5.
HI MHAKA MUNI LESWI SWI PFUNA? “A ndzimana leyi yi ni tiyisekisa swaku Yehovha a ni timpsalu naswona yena a lunghekele ku ni rivalela ka swilo hinkwaswu swa ku biha leswi ni nga swi yendla nkama na ni li nyimpini.” — Wilmar wa Colômbia.
I MPSINI LESWI BIBELE LI SWI VULAKA? “Phela ni yendla matilo ya nyuwani ni misava ya nyuwani; minchumu ya khale yi ta khohlwiwa, funtshi a yi nge he ti ka mimpimiso.” — Esaya 65:17.
HI MHAKA MUNI LESWI SWI PFUNA? “Ni ni depressão hi mhaka ya swilo leswi ni nga swi hanya nkama na ni li nyimpini. Kambe a ndzimana leyi yi ni khumbukisa swaku ku nga li khale Yehovha a ta helisa swilo hinkwaswu swa ku chavisa leswi na ha swi khumbukaka. Phela a swi nga ha ta tlhela swi vuya ka mimpimiso ya mina ni siku ni lin’we. Swi ta tsakisa hintamu loko leswo swi ta yendleka!” — Zafirah wa Estados Unidos.
I MPSINI LESWI BIBELE LI SWI VULAKA? “Lweyi wa ku lulama a ta hluka hi nkama wa ku fuma ka yona, ku ta va ni ku rhula kakukulu anze n’weti wu nga ha li kona.” — Tipisalema 72:7.
HI MHAKA MUNI LESWI SWI PFUNA? “Mina minkama hinkwayu na ma khumbuka marito lawa, ku nga li khale ku chava hinkwaku loku hi nga na kona hi mhaka ya tinyimpi ku ta hela naswona a swi nga ha ta lava leswaku hi vilela hi ku hlayiseka ka vanhu lava hi va rhandzaka.” — Oleksandra wa Ucrânia.
I MPSINI LESWI BIBELE LI SWI VULAKA? “Vanhu va n’wina lava va nga fa va ta tlhela va hanya. . . . Pfukani, mi ba nkulungwani, n’wina lava tshamaka ka wuthulu!” — Esaya 26:19.
HI MHAKA MUNI LESWI SWI PFUNA? “Vanhu va vanyingi va ndjangu wa mina va dlayiwile nkama lixaka lin’wani li nga zama ku helisa vanhu hinkwavu va lixaka la hina. Kambe a ndzimana leyi ya ni tiyisekisa swaku ni ta tlhela ni ma vona maxaka ya mina hinkwawu. Phela ni swi nyimele hintamu ku tlhela ni va twa na va vulavula na mina loko va ta pfuxiwa!” — Marie wa Ruanda.
I MPSINI LESWI BIBELE LI SWI VULAKA? “Ku yo sala nkamanyana swaku lava ku biha va helisiwa . . . Kambe lava ku rhula va ta tshama misaveni, va ta tsaka hintamu hikusa ku ta va ni ku rhula kakukulu.” — Tipisalema 37:10, 11.
HI MHAKA MUNI LESWI SWI PFUNA? “A tikweni la mina a nyimpi se yi helile kambe ka ha yendleka swilo swa swinyingi swa ku biha, swa ku fana ni ku kala wululami naswona ku ni vanhu lava rhandzaka ku yendla swilo swa ku biha. A tindzimana leti ti ni tiyisa hintamu, Yehovha wa swi vona leswi ni yendlekelaka naswona wa swi twisisa. Yena a tshembisa swaku ku hlupheka hinkwaku ku ta hela naswona swilo hinkwaswu swa ku biha leswi hi humelelaka a hi nga ha ta swi khumbuka.” — Davron wa Tadjiquistão.
Vanhu lava ku vulavuliwaka hi vona ka revhixta leli, o va ntlawanyana ka ma milhões ya Timboni ta Yehovha leti ti nga kuma ku rhula hi ku pfuniwa hi Bibele. Timboni ta Yehovha ti djondze ku kala ti nga na xikheto lexi vangiwaka hi ku hambana ka kori ya vanhu, tinxaka ni swilo swin’wani. (Vaefeza 4:31, 32) Timboni ta Yehovha a ti ngheneleli ka swilo swa politika naswona a ti tipeti ka swa tinyimpi. — Yohani 18:36.
Timboni ta Yehovha ti tlhela ti tiyisana hi lirhandzu la tona la wumakwerhu amisaveni hinkwayu. (Yohani 13:35) Hi xikombiso, Oleksandra, lweyi hi nga vulavula hi yena ku sunguleni, a baleke nyimpi yena ni makwenu wa yena va ya ka tiko lin’wani, yena a li: “A nkama hi nga tlulela fronteira a nchumu wa ku sungula hi nga wu vona ku ve vamakwerhu va tiko leliyani se na va lunghekile ku hi yamukela. Ndlela leyi va nga hi yamukela hi yona yi hi pfunile swaku hi titoloveta ku hanya ka tiko lin’wanyani.”
Ha ku rhamba leswaku u va kona ka mintlhanganu ya hina, lani hi djondzaka hi leswi Bibele li swi vulaka hi ku va ni ku rhula ni leswi hi nga swi tirhisisaka xiswona ka wutomi la hina. Nghena ka site la jw.org leswaku u kuma ndhawu leyi nga kusuhi na wena kumbe leswaku u kombela ku va ni djondzo ya Bibele ya mahala ni Timboni ta Yehovha hi ku tirhisa a buku leli nge Tikhorisi Hi Wutomi La Ku Kala Li Nga Heli.