Eneru

Enga Moisesi Ejiptu anapu reiri kʼumanchikuarhu irekani japka, ima no kaxumbitispti. Xáni ikiamsïspti enga niárapka uándikuni achatini ma, jimboka ísï exespka eska ima no jurhimbitku úxapka ambe ma. Ima eratsispti eska Tata Diosï jeiapanhintapiringa ambe enga úpka. Jeoba kuarenta uéxurhini jarhuataspti Moisesini para kurhanguni eska para Israelini orhejtsïkuni, no solu uétarhisïrenga balori jukani, sino ístu eska kaxumbipiringa. Ka para kaxumbitini, jatsipirindi para kurhanderani ka sési pʼikuastpini. Niáraspti ambakiti orhejtsïkuti máeni, jimboka sési jorhenguarhispka indeni ambe (Éx. 2:11, 12; Uku. 7:21-30, 36). Ini jurhiatikuecha jimbo, imecha engaksï familiani o kúnguarhikuani orhejtsïkujka, sésiksï úsïndi engaksï májkueni újka eska Moisesi. Engaksïni máteruecha no janhanharhiaka, asï sóntku no sési exe je. Kaxumbikua jingoni jiókuarhi je ambe engajtsï no sési úaka (Ecl. 7:9, 20). Kurhajchaa je máteruechani ka sési péuanta je uandanhiatechani ísï eska Jeoba na uéjka ka asï sóntku ikia je (Prov. 15:1). Engaksï ísï újka familieri orhejtsïkuticha ka imecha engaksï kúnguarhikuani orhejtsïkujka, sésiksï pʼikuastasïndi Jeoba, úsïndiksï eska jauaka pínandikua ka ambakiti ejempluksï ma xarhatasïndi ambe enga arhikuekajka kaxumbitini. w19.02 8 párr. 1; 10 párr. 9, 10

¿Andisï Jesusi pʼamojpepi? Jimboka exespka eskaksï ima kʼuiripuecha “ísï jámasïrenga eska karichicha engaksï nómbe karichi erangutini jatsijka”. Jamberi kuenta íntskukuarhipti eskaksï máru ima kʼuiripuecha no jatsikuarhirispka ka jatsinksï para chúskutani ánchikuarhini paraksï úni tʼirekua jatsini. Jamberiksï máru uarhiranchapti nemani. Jesusi ini ambe jimbo úpti sési kurhangukuani na engaksï pʼikuarherani japka ima kʼuiripuecha, jamberi ménisï ima mismu nitamanchapti indeni ambe. Ka jimboka pendienti pásïrenga máteruecha jimbo, imani ambe aianguaspti enga sési pʼikuastantauenga (Isaías 61:1, 2). ¿Nénachi úa májkueni úni eska Jesusi? Iásï, ístuksï kʼuiripuecha ísï jámasïndi “eska karichicha engaksï nómbe karichi erangutini jatsijka” ka uánikua problemecha jingoni. Peruchi jucha mítiska imani ambe engaksï imecha uétarhinchajka: Tata Diosïri Reinueri ambe (Jaŋ. 14:6). Ísï jimbo, májkuenchi úsïnga eska juchari Jorhentpiri ka aianguasïngachi ambakiti ambe, jimbokachi pʼamojkusïnga “imani enga kaxumbitika ka pobrini” (Sal. 72:13). Pʼamojkusïngachi kʼuiripuni ka uékasïngachi úni ambe ma para jarhuatani. w19.03 21, 22 párr. 6, 7

Uánikua rasonichanchi jatsiaska parachi xénchani Jeobani. Aparte dejtsïni pauani pauani ambakiti ambe íntskuni, jorhendasïndijtsïni imeri ambe enga jurhimbitiika ka ambe enga uéjka úni (Juanu 8:31, 32). Kúnguarhikuajtsïni ma íntskusti parajtsïni arhistacheni ka jarhuatani. Ístujtsïni jarhuatasïndi juchari problemecha jingoni ka aiachesïndijtsïni eskachi sánderu orhepani irekaaka para méntkisï ka meru sési (Jaŋ. 21:3, 4). Engachi eratsintajka iámindu imani ambe enga xáni úkia parajtsïni xarhatachini imeri uékperakua, niárasïngachi xáni xénchani engachi chéjka no sési pʼikuastani. Indeni ambe jimbochisï jatsika para chéni. Engari méntkisï miáska na engakini xáni marhuachijka ambe enga Jeoba jorhentpijka, sánderuri xénchaaka imani ka ístu imeri juramukuechani. Jiájkani, ambe uéjki engakini Satanasi aiachiaka, no úati úni eskari nóteru marhuakuakia Jeobani. Engari eratsiska chíti bautismu jimbo ixú mili uéxurhini jimbo, uandaakari: “Ambakiti ambe erakuska úni”. w19.03 6 párr. 14; 7 párr. 19

Iámindu familiani marhuakusïndi enga mándani arhini familiarhu anapu jukaparharajka ambe. Enga achati o uarhiiti xarhatakuaka eska jukaparharasïnga ambe enga témba o uámba újka imani jimbo, sánderuksï májku kʼéri jauati ka no xáni úkua jukaati paraksï puátsperantani ambe engaksï no sési úaka. Achati enga jukaparharajka témbani, no solu exesïndi ambe enga uandajka o úni, sino ístu, sési jásï ambe arhisïndi (Prov. 31:28). Ka uarhiiti enga jánhastika, arhisïndi ambe enga jimbo jukaparharajka uámbani. Táticha, ¿nénajtsï úa jorhendaani chári sapiichani diosmeiamukua arhijpini? Miá je eskaksï imecha imani ambe úaka engajtsï cha újka ka uandani. Ísï jimbo, cha uéna je ísï úni, diosmeiamukua arhiparhiani imani ambe jimbo engaksï imecha úaka chánksïni jimbo. Ístu, jorhendaa je diosmeiamukua arhijpini engaksï máteruecha úaka ambe ma imecha jimbo. Jarhuataa je kurhanguni eskaksï jatsiska para mintsita jingoni ísï úni ka eska ambe engaksï uandaaka, kánikua jarhuatauaka máteruechani. w19.02 17 párr. 14, 15

Ini uandakuecha jingoni engaksï xáni jukaparhakueka, Jobu xarhataspti eska eratsitixapka iámu mintsita jingoni marhuakuni Jeobani ambe uéjki nitamakuarhini jarhani. Jánguarhintaspti orhepani uérani ka juchajtuchi úaka májkueni úni. Ambe enga Satanasi uandapka Jobueri ambe, ¿nénajtsïni pájtamasïni mándani arhini? Ima inchandimisïndi uandani eskachi no mintsita jingoni xénchasïnga Jeobani, eskachi jurajkuaka jimbokachi niáraka sánderu jukaparharani juchari tsípikuani ka eskachi no iámu mintsita jingoni marhuakusïnga (Job 2:4, 5; Jaŋ. 12:10). ¿Nénajtsïni pʼikuastasïni i ambe? No sési, ¿a no? Peru ju je arini ambe eratsini: Jeobajtsïni xáni mintsinharhisïndi enga jurajkujka eskajtsïni Satanasi tsʼéjkuaka parachi xarhatani eskachi iámu mintsita jingoni marhuakusïnga Jeobani ka eska Satanasi chkuandera máeska. Ístujtsïni Tata Diosï aiachesïndi eskajtsïni jarhuataaka (Ebr. 13:6). ¡Kʼéri kóntperata máesti engajtsïni Tata Diosï enga Juramutiika iámindu amberi, mintsikajka! ¿Exesïnchi andisï xáni jukaparhakue iámu mintsita jingoni marhuakuni Jeobani? Jimbokachi ísï xarhatasïnga eska Satanasi chkuandera máeska ka pímbinhajkuntasïngachi Jeobaeri nombrini ka ístuchi xarhatasïnga eska ambakiti juramuti máeska. w19.02 5 párr. 9, 10

Jesusi aianguaspti imeri disipuluechani imani tsʼéjkukuechani engaksï jatsipiringa para orhepani uérakuani. Tátsekua arhiaspti eskaksï balori jukapiringa májkueni eska ima (Juanu 16:1-4a, 33). Uánikua uéxurhini tátsekua, imeri disipuluechaksï seguirixapti májkueni balori jukani eska Jesusi ka jingontkuksï jarhani paraksï iáminduecha jarhuajperani, nájkirukaksï no sési nitamakuarhepiringa (Ebr. 10:33, 34). Ini jurhiatikuecha jimbo, ístuchi májkueni balori xarhatasïnga eska Jesusi. ¿Néna? Por ejemplu, jarhuatapariani imani erachichani engaksï no sési kánhajka imecheri jakajkukua jimbo. Ménisï, máruksï ísku jatini ónhanhasïndi. Enga inde ambe úkuarhiaka, jatsiskachi para kuájpiani ka jarhuataani xáni eskachi xáni úaka (Filip. 1:14; Ebr. 13:19). Máteru ambe engachi úaka úni parachi xarhatani eskachi balori jukaska, jindesti seguirini eianhpini “no sáni chéparini” (Úku. 14:3). Májkueni eska Jesusi, juchajtuchi seguiriuaka Reinueri ambe eianhpini, nájkirukaksï máteruecha no uékaaka ojtsïni no sési kámani. w19.01 22, 23 párr. 8, 9

¿Uákini jarhuatani engari íntsipiauaka komentariuechani enga uinhaperantaauaka juchari erachichani? Kánikua jukaparhakuesti arhutani tiempu parachi sési prepararikuarhini, sánderuchi seguru pʼikuarheraaka para komentarini (Prov. 21:5). ¿Ambechi úa parachi sési prepararikuarhini para tánguarhikua ma? Ambe engachi orheta jatsika para úni, jindesti Jeobani kurhakuni imeri espiritu santu (Luk. 11:13; 1 Juanu 5:14). Tátsekua, ju je exeni tituluni, subtituluechani, imajenichani ka rekuadruechani parachi kuenta íntskukuarhini ambe engachi exeaka artikulurhu. Jimajkani, ju je uénani estudiarini mándani párrafu jingoni ka arhiantani tekstuechani na engachi xáni úaka. Ju je eratsintani ambe enga arhijka informasioni ka sánderu imani ambe engachi uékapiringa komentarini. Engachi sánderu sési prepararikuarheaka, sánderujtsïni marhuachiati ka sánderu fásiliuati eskachi komentariuaka (2 Kor. 9:6). w19.01 9 párr. 6; 11, 12 párr. 13-15

Enga Jeoba úpka eska Abakuki karapiringa ambe enga xáni uandanhiatenga, ambakiti ambejtsïni jorhendasïndi: eskachi no jatsiska para chéni aianguni ambe engajtsïni uandanhiatajka o engachi dudarijka ambe ma. Sánderu sési, Tata Diosïjtsïni arhisïndi eskachi aiangukuarhiaka iámindu ambe (Sal. 50:15; 62:8). Abakuki mintsikasïrendi Jeobani enga imeri Amiguepka ka Táti. Jimbosï Abakuki uénapti kómarhini. Enbesi de mintsikani ambe enga ima eratsienga ka jurajkuni eska xáni uandanhiani no sési úkupiringa, aianguspti na enga pʼikuarherani japka ka ambe enga uandanhiatenga. Ísï úparini ambakiti ejemplujtsïni ma xarhatachesti. Jeoba enga kurhauajka juchari kómarhikuechani, uékasïndi eskachi xarhatakuaka na engachi xáni mintsikajka aianguparini ambe engajtsïni uandanhiatajka (Sal. 65:2). Engachi ísï úska, pʼikuarheraakachi na engajtsïni uékperakua jingoni kamanharhiaka enga mókuantauaka juchari kómarhikuechani ka engajtsïni jarhuataaka (Sal. 73:23, 24). Jarhuatatijtsïni ísï exeni ambe ma eska ima na exejka, no arhiparini ambe engajtsïni uandanhiatani jauaka. Mintsita jingoni kómarhini Jeobani, jindesti ma ambe engachi xarhatajka na engachi xáni mintsikajka. w18.11 13 párr. 2; 14 párr. 5, 6

Dabidi no solu erakuaspti amiguechani engaksï májkueni jatiripka eska ima. ¿Miásïniri na enga arhinhenga ma imeri sánderu ambakiti amigu? Jonatani. Na engaksï xáni sési pájperenga jindesti ma ejemplu enga Biblia uandajka. Peru ¿mítispiri eska Jonatani ma treinta uéxurhinisï sánderu jatirispka eska Dabidi? Jimajkani, ¿andiksïsï xáni sési pájpereni? Jimbokaksï tsimarhani mintsikasïrenga Tata Diosïni, janhanharperasïrendiksï ka exesïrendiksï eskaksï ambakiti kualidadichani xarhatasïrenga, komu na engaksï balori xarhatapka engaksï uarhiperapka Tata Diosïri enemiguecha jingoni (1 Sam. 13:3; 14:13; 17:48-50; 18:1). Májkueni eska Dabidi ka Jonatani, juchajtuchi uáka sési pʼikuarherani engachi imani amiguechani jatsiauaka engaksï xénchajka Jeobani ka xarhatanksï eskaksï mintsinharhisïnga imani. Pirenchi ma enga Kiera arhinhajka enga ióni marhuakukia Jeobani, uandasïndi: “Interu parhakpini jatsiaska amiguechani engaksï no májku jásï irekua ka pʼindekuechani jatsiaka eska ji”. Engari ísï úska eska i pirenchi, exeakari na enga Tata Diosïri Karakata ka espiritu santu újka eskachi májku kʼéri jauaka. w18.12 26 párr. 11-13

Uandakua ísku jándikua (griegu jimbo pornéia), iámindu imani ambe arhikuekasïndi komu enga ma temungurhiri enganiarperajka, enga tataka ka nanaka ma márkuksï irekani jarhajka ka nóksï sibilarikuarhitini jarhani, enga tataka ma mismu tataka ma jingoni o nanaka ma, nanaka ma jingoni ikichakueni jásï ambe újka o engaksï ísku jándikua ambe újka animalicha jingoni. Por ejemplu, ju je eranhaskani eska achati ma ísku jándikua ambe niátasïnga. Jimajkani, imeri témba jatsiati para exeni sini diborsiarikuarhia o nómbe. Ju je exeni eska Jesusi no uandaspka eska ísku jándikua jimbo (pornéia), témba o uámba enga no kulpa jatsika meru jatsiska para diborsiarikuarhini. Por ejemplu, uarhiiti ma úpirindi erakuni no diborsiarikuarhini nájkiruka imeri achati enganiaripiringa. Jamberi útasï xénchajti ka uékani puákuntani ka jánguarhintani uámba jingoni paraka imecheri temungurhirikua sési niántaaka. Jimboka sési eratsintaparini, enga diborsiarikuarhiska ka nóteru uambuchantania, jatsiauati máru problemechani. ¿Néna uá orhepani uérani enga niáraska uétarhinchani ambe ma o enga uékaaka relasioni sexuali jatsini? ¿Ka enga niáraakia jandiajku pʼikuarherani? (1 Kor. 7:14). Ísïsti, ima enga diborsiarikuarhijka nájkiruka no ima kulpa jatsika, jatsiauati uandanhiatechani. w18.12 12 párr. 10, 11

Jeoba kurhunhisïndi no sési jásï ambe ka no jurhimbikuani (Is. 61:8). Nájkiruka mítika eskachi ménisï no sési úsïnga ambe ma jimbokachi no perfektueska, arhisïndijtsïni eskachi májkueni kurhunhiaka no sési jásï ambe ísï eska ima. Eratsintani andisï Jeoba kurhunhijki no sési jásï ambe, jarhuatatijtsïni parachi juchajtu májkueni úni ka meru no jiókuarhini no sési jásï ambe. Májkueni exeni eska Jeoba imani ambe enga no sési jaka, ístujtsïni jarhuataati máteru ambe jimbo. Kurhanguakachi eskaksï máru úkuecha no sési jarhaska, nájkiruka Bibliarhu no uandaaka meru inderi ambe. Por ejemplu, parhakpinirhu sánderu etsakurhixati ikichakueni jásï ma uarhakua enga arhinhajka lap dance. Máruksï eratsisïndi eska i ambe no májkueniska eska relasioni sexuali jatsini ka eska jimbosï no no sési jaka. ¿Peru na exesïni Jeoba? Ju je miáni eska ima kurhunhisïnga iámindu no sési jásï ambe. Jimajkani, ju je jánguarhintani no pekadu ambe niátani pʼíngukuarhiparini ka kurhunhini imani ambe enga Jeoba kurhunhijka (Rom. 12:9). w18.11 25 párr.11, 12

Para apostuli Pablu, xáni jukaparhakuespti i karakata enga tanimu xanhari úrapka imeri kartecharhu (Rom. 1:17; Gal. 3:11; Ebr. 10:38). Engachi jakajkuska ka mintsikani Tata Diosïni, irekaakachi para exeni na engaksï kumplirikuarhiaka i aiatsperakuecha na uéjkichi no sési ambe nitamakuarhini. Jeobajtsïni arhisïndi eskachi imani ambe eratsini jauaka ambe enga sánderu orhepani úkuarhiaka, ka no ambe engachi iáiasï no sési nitamakuarhini jaka. Libru de Habacuc, ambakiti ambejtsïni jorhendasïndi iáminduechani engachi ini últimu jurhiatikuecha jimbo irekani jaka. Jeoba aiakusïndi íntskuni tsípikua iámindu imani kʼuiripu jurhimbitini enga mintsikajka imani. Ísï jimbo, ju je sánderu jakajkuni ka mintsikani Tata Diosïni, no arhiparini náki problemechani ka uandanhiatechanchi jatsiasïni. Ambe enga Jeoba arhipka Abakukini, asegurarichisïndijtsïni eska juchantsïni jingoni jauaka ka eskajtsïni salbariuaka. Uékperakua jingontsïni arhisïndi eskachi mintsinharhiaka ka tekantskua jingoni erokuarhini imani jurhiatikua enga imeri Reinu juramuaka iámu parhakpinirhu. Jiájkani, Echerirhuksï jauati kʼuiripuecha engaksï tsípikua ka pínandikua jingoni irekaaka engaksï imantku kómarhiaka (Mat. 5:5, TNM; Ebr. 10:36-39). w18.11 16, 17 párr. 15-17

Primeru siglurhu, jarhasptiksï máru engaksï uénani jámani jiókuarhipka ambe enga Jesusi jorhentpienga, peru tátsekuaksï jurajkuspti jurhimbikuani. Por ejemplu, ma xanhari Jesusi milagru ma úspti para uánikua kʼuiripuni tʼirerani enga chúxapani japka. Sánderu tátsekua, kʼuiripu parhikuspti mari de Galileani imani jingoni. Peru jima, Jesusi arini ambe arhiaspti engaksï no úpka kurhanguni: “Engajtsï no arhaska Uájpa Achatiri kuerpuni ka itsïmantsï imeri iurhirini, nójtsï jatsiaka tsípikua”. Enbesdeksï arhini eska eksplikarikuapiringa ambe enga arhiapka, uandasptiksï: “Meru úkua jukasti inde uandakua. ¿Né uá kurhanguni?”. Indeni ambe jimbo, ‘uánikua imeri jorhenguarhitichaksï kʼuanhatsintaspti’ oksï jurajkuspti ‘ka nóteruksï jámasïrendia imani jingoni’ (Juanu 6:53-66). Xáni no sési engaksï ini jurhiatikuecha jimbo, máru jurajkuka jurhimbikuani. Máruksï no sési exesti ambe ma jimbo enga úka o uandani erachi ma enga mítikateka. Máteruechaksï no sési exesti jimbokaksï Bibliaeri konseju ma intsïnhaska oksï no kurhangutsperani erachi ma jingoni. w18.11 9 párr. 3-5

Engachi no kurhanguska kʼamakʼamasï andisï organisasioni mójtakujki ambe ma, sési jauati eskachi eratsintaaka na enga tata Jesukristu orhejtsïkuapka ióntki Tata Diosïri marhuarichani. Josueri jurhiatikuecha jimbo ka ístu primeru siglurhu, méntkisï sési orhejtsïkuasti para kuájchakuani, uinhaperantani imecheri jakajkukuani ka paraksï méntkisï májku kʼéri jarhani (Ebr. 13:8). “Jántspiri enga mintsinharhikueka ka [enga jánhastika]” íntskusïndijtsïni jarhuajperata jiáni engachi uétarhinchajka (Mat. 24:45). I ambe xarhatasïndi na engajtsïni xáni xénchajka Jesusi ka na enga xáni interesi pájka eskachi sési jauaka Tata Diosï jingoni. Engachi exejka Kristueri jarhuajperatani, kuenta íntskukuarhisïngachi eskajtsïni uékasïnga jarhuatani parachi kʼéri jakajkukua ma jatsini. Ístu, tata Jesukristujtsïni jarhuatasïndi parachi úni ánchikuarhitani enga jindeka predikarini, ambe ma enga iásï sánderu jukaparhakueka (Mar. 13:10). w18.10 25 párr. 13-16

Ambakiti ejemplu ma engajtsïni jarhuataaka pʼíngukuarhini engajtsïni máteruecha ikiataaka exentasïngachi ixú 2 Samuel 16:5-13. Dabidi ka imeri marhuarichaksï tekantaspti enga Simeí, rei Sauliri parienti ma, no sési arhiapka ka no jurhimbikua jingoni kaani. Dabidi jatsispti uinhapikua para sési péntani indeni situasionini, peru tekantaspti. ¿Nani pʼiraspi uinhapikua para pʼíngukuarhini? Dabidi jiáni karaspti Salmo 3 enga uájpa Absalonini sïpakuarhikuni japka. Bersikuluecha 1 ka 2 sésiksï terokuntasïndi imani jingoni enga kapitulu 16 de 2 Samuel uandantajka. Salmo 3:4 xarhatasïndi na enga xáni Dabidi mintsinharhienga Jeobani. Ima uandaspti: “Uinhachaparini uandajpaaka Jeobani, ka imarini mókuchentaati”. Juchajtuchi uáka kómarhini engachi no sési kánhaaka. Jiájkani, Jeobajtsïni íntskuati imeri espiritu santu parachi úni tekantani. ¿Eranhaskasïnchi situasioni ma enga uétarhiaka parachi pʼíngukuarhini o puákuntani nemani engajtsïni ísku jatini úchiaka ambe ma? ¿Mintsikasïnchi eska Jeoba exesïnga na engachi no sési nitamakuarhini jaka ka eskajtsïni jarhuauaka? w18.09 6, 7 párr. 16, 17

Aianhpikuarhu, méntkisïchi jatsiska para kurhangukuani kʼuiripuechani ka respetu jingoni káni, ka parachi indeni ambe úni, jatsiskachi para sési mítini na jásïski kʼuiripu jima engachi jucha irekaka. Engachi kʼumanchikuecharhu predikarijka, kʼuiripuechajtsïni no erokani jarhasïndi, jimbokajtsïni no pʼímarhiska. Jimbosï kánikua jukaparhakueti eskachi ima jandora niuaka enga kʼuiripu uékaaka uandontskuarhini (Mat. 7:12). Por ejemplu, ¿juchari territoriurhu anapu kʼuiripu sánderu ióndasïni jauarani fin de semana? Enga ísïka, jamberichi úpiringa xanhari jimbo uénani aianhpini o karrituecharhu, o úpiringachi pʼorhembiantani imechani engachi mítika eskaksï tsínharhiskia. Kʼuiripu méntkisï okupadu jarhasïndi, ísï jimbo, sánderu sésipirindi eskachi no ióni uandontskuarhikuapiringa, sikiera jiáni engachi apenasi úndaaka pʼorhembiani (1 Kor. 9:20-23). Enga kʼuiripu exeaka eskachi kurhangusïnga eska kánikua okupadu jarhaska, máteru jimbojtsïni jiókaati. Engachi imani kualidadichani xarhatauaka enga espiritu santu úrpijka, jindeuakachi “[Tata] Diosïri jarhuajpiricha”. Astajtsïni jamberi Jeoba uáti úrani para andaparhaterani nemani jurhimbikuarhu (1 Kor. 3:6, 7). w18.09 32 párr. 15-17

Enga nema sési pʼikuastpijka, ¿andisï újki eska nema tsípikua jingoni irekaaka? Máru kʼuiripuechaksï ióntki no pʼamojpitispti, tsitinksï problema ambe jirinhani ka nóksï sési kámpini. Peruksï niárasti ambakiti jorhentperakua ma jatsini jurhimbikueri ka niárastiksïa jatsini ‘jimbanhi mintsita’ ma. Iásïksï uékpisïndia, pʼamojpini, sési kámpini, sési pʼikuastpini ka tekantstini (Kol. 3:9-12). Ini ambe jimbo, sésiksï pájperasïndi máteruechani jingoni ka felisinksï. Peru sánderu ambakiti ambe, Tata Diosïri Karakata aiantspisïndi eska echeri i kʼuiripuecheriuaka (Sal. 37:8-10, 29). ¿Ambe arhikuekasïni eska echeri ima kʼuiripuecheriuaka engaksï sési pʼikuastpijka? Para Jesusiri chúxapaticha engaksï erakukateka, i echeri imecheriuati engaksï saserdotiuaka ka engaksï gobernariuaka komu reicha (Jaŋ. 20:6). Ka ima uáni kʼuiripuecha engaksï no niuaka auandarhu, imecheriuati Echeri engaksï irekaaka para méntkisï no ma pekadu jingoni, pínandikua ka tsípikua jingoni. w18.09 19 párr. 8, 9

Sánderu ambakiti ejemplu íri ambe, jindesti Jeoba (Gén. 18:32; Jos. 10:14). Ju je exeni ambe engajtsïni jorhendajka (Éx. 32:11-14). Jeoba no uétarhinchasïrendi mítini ambe eratsisïreni Moisesi, peru jurajkuspti eska Moisesi arhipiringa na enga pʼikuarherani japka. ¿Juchachi uékapirini tekantskua jingoni kurhajchani nemani enga no sési ambe úka ka úpirinchi ambe engajtsïni arhipiringa? Buenu, Jeoba tekantskua jingoni kurhajchaasïndi imechani engaksï mintsita jingoni kómarhijka. Táchanisïchi jatsipiringa para kurhamarhikuarhini: “Enga Jeoba kaxumbikua jingoni kurhajchaajka kʼuiripuechani komueska na úpka Abraani jingoni, Rakeli, Moisesi, Josue, Manoa, Elíasi ka Esekiasi jingoni, ¿no jatsipirini para jíjtuni májkueni úni? ¿Uá sánderuni sési kaani erachichani respetaripariani, jingontku kurhauani imecheri konsejuechani ka ísï úparini ambe engajtsïni arhiaka? ¿Jarhaski nema kúnguarhikuarhu o familiarhu enga uétarhinchani jaka eskani jingontkuni kurhajchaaka? ¿Ambe uá úni ji ini ambe jimbo?”. (Gén. 30:6; Juec. 13:9; 1 Rey. 17:22; 2 Crón. 30:20). w18.09 6 párr. 14, 15

Irekani kʼuiripuecha jingoni engaksï uarhisika, uáti eska úkua jukaaka seguirini jarhani intsïmpitiini. Peru Jesusi uandaspti eska tsimani juramukuecha engaksï sánderu jukaparhakueka, jindeska uékani Jeobani iámindu mintsita, eratsikua, alma ka uinhapikua jingoni, ka uékani prójimuni eska májkumindu na uékakuarhijka (Mar. 12:28-31). Ima engaksï xénchajka Tata Diosïni, jánguarhintasïndiksï májkueni úni eska ima. Jeoba ka imeri Uájpa, intsïmpitistiksï ka arhisïndijtsïni eskachi juchajtu májkueni uáka, jimbokachi ísï uáka meru felisiini. Engachi jánguarhintaska intsïmpitiini imani ambe jimbo engachi Tata Diosïni jimbo újka ka kʼuiripuecha jimbo, kʼéri ambechi arhiaka Jeobani ka juchantsïni mismu sési nicheati ka ístu máteruechani. Jo, iáiasïchi jánguarhintaxakaia jarhuataani kʼuiripuechani ka sánderia juchari erachichani (Gal. 6:10). Engachi no kuatantaska, jamberiksï kʼuiripuecha agradeseriuati ka xénchantsïni indeni ambe jimbo ka juchachi felisiuaka. w18.08 22 párr. 19, 20

Jeoba no exesïndi rasani, nani enga anapueka, tribuni o idiomani. Jiókuarhiasïndi iámindu achatichani ka uarhiitichani engaksï janhanharhijka ka jurhimbitku ambe úni (Gal. 3:26-28; Jaŋ. 7:9, 10). Seguru eskachi iámindu kristianuecha mítika eska i ambe ísïska ka eratsinchi eskachi iáminduechani jukaparharaasïnga. Peru engachi lugari ma jimbo tʼarhexeka o familiarhu ma enga no xénchaajka máteruechani, jamberi uáti eska útasï juchari mintsitarhu inde jásï pʼikuarhinhikua ambe jauaka. Asta Pedru enga sésikua intsïnhapka para jarhuataani máteruechani exeni eska Jeoba iáminduechani jukaparharaasïnga, tiempu jingoni, Pedru xarhataspti eska útasï kueratasïrenga xénchaani iámindu jásï kʼuiripuechani (Gal. 2:11-14). Jiájkani, ¿nénachi uá nóteru jusgarpinia seguni eska na xarharaaka nema? Parachi kuenta íntskukuarhini sinchi útasï kueratanchasïni xénchpini, uétarhisïndi eskachi terokutantaaka juchari jánguani, imani ambe jingoni engachi Bibliarhu jorhenguarhijka (Sal. 119:105). Ístuchi uáka amiguni ma kurhamarhini enga mintsinharhikueka, sini útasï exesïni eskachi jucha no xénchaasïnga máteruechani (Gal. 2:11, 14). Uákachi útasï kueratanchani jarhani xénchaani máteruechani ka nochi kuenta íntskukuarhini. w18.08 9 párr. 5, 6

Ju je kurhamarhikuarhini: “¿Kuentaksï íntskukuarhisïni máteruecha eskani kʼamakʼamasï marhuakusïnga Jeobani? ¿Jánguarhisïni jirinhaani oportunidadichani parani xarhatani eskani Jeobaeri testigueska?”. Jeoba kánikua kómu pʼikuarherapirindi exeni eska ima kʼuiripu enga ima erakukia para imeri ireta jingoni úkuarhini, dudaripiringa arhiani máteruechani eska Jeobaeriska (Sal. 119:46; Mar. 8:38). Kánikua no sésisti, peru máru Testiguechaksï imani ambe úsïndi enga ‘parhakpini anapu espiritu’ úrpijka ka jimboksïsï sáno májkueni jámajti eska imecha engaksï no marhuakujka Jeobani (1 Kor. 2:12). Imecha engaksï parhakpinirhu anapu jángua xarhatajka, nóksï uandanhiasïndi máteruecha jimbo (Efes. 2:3). Por ejemplu, nájkirukachi xáni uáni konsejuechani intsïnhaakia, máruksï seguirixati imani ambe jukani ka ísï arreglarikuarhini enga no sési xarharajka. Imani takusïksï jukasïndi engaksï jukari márhekuarhiaka ka engaksï jukari xarhatajka ma parti kuerpurhu, asta engaksï tánguarhikuecharhu nirajka. Máteruksï kánikua no sési kuinakuarhisïndi, oksï no nani máru újtsïntani (1 Tim. 2:9, 10). Ka inde ambe úsïndi eska engaksï máteru kʼuiripuecha jingoni jauaka, úkua jukaaka mítini nésï parhakpinirhu anapue (Sant. 4:4). w18.07 24, 25 párr. 11, 12

Ma ambe jimbo engachi iáminduecha ermanueka, jindesti jimbokachi iáminduecha Adaniri desendientiska (Uku. 17:26). Ka eska Jesusi na uandapka, imeri chúxapatichachi ermanueska jimbokachi ísï exesïnga Jeobani eska juchari Táti auandarhu anapu (Mat. 12:50). Ístu, iáminduechachi niáraska Tata Diosïri familia jingoni úkuarhini enga májku kʼéri jaka uékperakua ka jakajkukua jimbo. Ísï jimbo, engaksï apostulicha kartechani axauenga kúnguarhikuecharhu, somenksï ermanu arhiasïrendi kristianuechani (Rom. 1:13; 1 Ped. 2:17; 1 Juanu 3:13). Enga Jesusi na uandapkia eskachi iáminduecha jatsiska para ísï exejperani komu ermanuecha, uandaspti eska kánikua jukaparhakueska kaxumbitiini (Mat. 23: 11, 12). Sánderu kʼéri exekuarhini eska máteruecha, ménisï úsïrendi eskaksï apostulicha no úpiringa sési pájperani. Ístu, Jesusiri jurhiatikuecha jimbo, kʼuiripu kʼéramakuarhisïrendi imecheri rasa jimbo. Uánikua judiuechaksï sánderu kʼéri exekuarhisïrendi eska máteruecha jimbokaksï Abraaniri desendientispka. Peru ima ambe no rasoni máespti paraksï ísï jámani, jimboka Juanu el Bautista arhiaspka eska “Diosï úpiringa [...] tsakapuechani jimbo uántani Abraniri uájpechani” (Luk. 3:8). w18.06 10 párr. 8, 9

Engachi imani ambe nitamanchani jauaka engajtsïni kuatajkujka, ochi no úni jarhani sési pájperani nema jingoni, ¿jánguarhintaachi no ikiani ka no no sési ambe uandani? (Prov. 10:19; 17:27; Mat. 5:22). Engajtsïni máteruecha ikiataaka, jatsiskachi para Jeobani jurajkukuni paraka ima xarhataaka imeri ikiatapu (Roma 12:17-21). Ísïchi uáka engachi Jeobani eraaska o andarherani ka tekantskua jingoni erokuarhini eska ima uáka ambe ma jiáni enga uétarhiaka. Engachi no ini ambe úska ka ambe ma jingonchi bengarikuarhintani, ísïpirindi komu no janhanharhini jarhani Jeobani. Engajtsïni Jeoba jimbanhi instruksionichani íntsaajka imeri kúnguarhikua jimbo, jatsiskachi para jirejiresï úni ambe engajtsïni arhiaka. Nochi afuersa uékaaka imani ambeteru úni enga antesi únhenga (Ebr. 13:17). Ka ístu, jingontkuchi jámaaka para no sánderu ambe uékani úni “ka eska enga karakata jaka” (1 Kor. 4:6). Engachi kumpliriska ini ambe, xarhataakachi eskachi Jeobani eraaxaka o andarherani. w18.07 15, 16 párr. 17, 18

Sáno méntkisï, lei ma uandasïndi ambe engachi jatsika para úni, peru prinsipiu ma, para mámaru ambejtsïni marhuachisïndi. Ísï jimbo, engachi sánhani arhini jarhajka sánderu jánhaskatiini, sánderuchi jukaparharaasïnga prinsipiuechani. Uákachi terokutantani imani ambe jingoni engaksï sapiicha nitamanchajka. Sapiichaksï no kurhangusïndi andisï peligru máe kúrhiani no ambarhati kʼuiripuechani ka paraksï tátembecha kuájchakuani, reglechanksï jatsikukuasïndi (1 Kor. 15:33). Peru engaksï na kʼuiripeni jarhajkia, sánhani arhisïndiksï sánderu jánhaskani, úrapariani Bibliaeri prinsipiuechani ka jorhenguarhini sési erakuani imeri amiguechani (1 Korintu 13:11; 14:20). Májkuenisti, engachi eratsiantaska Bibliaeri prinsipiuechani, juchari konsiensia sánhani arhisïndi jorhenguarhini ísï exeni ambe ma eska Jeoba na exejka ka ísï úparini, úsïndijtsïni sánderu jarhuatani parachi ambakiti ambe úni. Jatsiskachi ambe enga xáni uétarhijka para imani ambe úni enga Jeoba jeiapanhintajka. ¿Andichisï ísï uandajki? Jimboka leicha ka prinsipiuecha engachi Bibliarhu exeantajka, marhuasïngaksï paraka “Diosïri kʼuiripuecha no ma ambe kueratanchaaka, sino sésiksï jorhendakata jarhani para iámindu ambakiti ambe úni” (2 Tim. 3:16, 17). w18.06 19, 20 párr. 14, 16, 17

Ambe enga Jesusi uandantapka, xarhataspti eska samaritanu ma úpiringa jorhendaani judiuechani paraksï iámindu kʼuiripuechani uékaani (Luk. 10:25-37). Antesi de auandarhu karhanchintani, Jesusi arhiaspti imeri chúxapatichani eskaksï predikaripiringa “iápuru Judea ka Samaria ísï ka iápuru parhakpinirhu asta jima enga sánderu iauaniika” (Uku. 1:8). Paraksï ísï úni, jatsipirindiksï para jánguarhintani uékani iámindu jásï kʼuiripuni ka nóksï kʼéri exekuarhini. Antesi, Jesusi preparariuasptia paraksï predikarini, aianguapariani na engaksï ambakiti kʼuiripuepka imecha engaksï no judiuepka. Por ejemplu, Jesusi sési ambe arhispti ejersitueri ofisialini ma enga máteru nani anapuepka imeri kʼéri jakajkukua jimbo (Mat. 8:5-10). Ka enga Nasareti japka, uandaspti eska Jeoba jeiapanhiantaspka imechani engaksï no judiuepka, komu Sarepta anapu uarhiiti tsïndini ka Naamanini enga lepra pʼamenchapka jini Siria anapu (Luk. 4:25-27). Ka Jesusi no solu predikarikuspti samaritanani, sino ístu tsimani jurhiatikua Samaria pakaraspti, jimboka kʼuiripu jingontku kurhaaspka mensajini (Juanu 4:21-24, 40). w18.06 10 párr. 10, 11

Apostuli Pablu uandaspti eska kristianu ísïska eska soldadu ma enga uarhipejka. Ísïsti, juchachi no kʼuiripuecha jingonisï uarhipejka sino espirituecha jingoni. Juchari enemiguechaksï jindesti Satanasi ka demoniuecha. Nájkirukachi no exeajka, imaksï meru jarhasti, kánikuaksï jorhenasti uarhipeni ka iónisïksï inde ambe ústia. Ísï xarharasïndi enajkichi no uá andaani ka sánderia tumbiicha. Peru ¿ísïski? ¿Uáksï tumbiicha andaani ini espiritu no sési úrichani? Jo, uátiksï ka ísïksï úxatiia. ¿Nénaksï úxaki ísï úni? Jimboka Jeoba íntsaaxa uinhapikua. Ka ístu, komu ambakiti soldaduecha, jukantastiksï “uarhipetaraku[eri] xukuparhakuani enga Diosïrika” (Efes. 6:10-12). Enga Pablu uandapka ini xukuparhakueri ambe o armadurani, jamberi imani eranhaskani japti engaksï soldadu romanuecha jukenga. w18.05 27 párr. 1, 2

Sánderu jukaparhakua ambe engachi jimbo aianhpijka, jindesti paraksï kʼuiripuecha míteni eska Jeoba kʼéri ambeska ka parachi pímbinhajkuntani imeri nombrini (Juanu 15:1, 8). Ísïsti eskachi jucha no uáka sánderu pímbinhajkuntani Tata Diosïri nombrini, jimboka ima kʼamakʼamasï pímbinhasïska. Peru ju je exeni ambe enga karapka profeta Isaiasi: “Jeoba ejersituecheri... Imaesti engajtsï cha jatsika para pímbinhasï exeni” (Is. 8:13). Jimajkani, ma ambe engachi uáka úni para pímbinhajkuntani Tata Diosïri nombrini, jindesti ísï exeni eska kánikua jukaparhakueska, sánderu eska náki uéjki máteru nombri ka jarhuatapariani máteruechani kurhanguni eska pímbinhasïska. Por ejemplu, engachi eianhpijka na enga jásïika Jeoba ka ambe enga aiakuajka kʼuiripuechani, kuájpini jarhasïngachi Tata Diosïri nombrini chkuanderakueri ambe enga Noambakiti uandapka para no sési pakatani imeri nombrini (Gén. 3:1-5). Ístuchi pímbinhajkuntasïnga engachi jánguarhintajka territoriurhu anapu kʼuiripuni jarhuatani kurhanguni eska Jeoba ‘jukanchaska tʼíntskua intsïnhani ka arhinhani eska kʼéri ambeeska ka uinhapikua jatsini’ (Jaŋ. 4:11). w18.05 17, 18 párr. 3, 4

Primera rasoni engari jimbo jatsika para jatsikukuarhiani metechani, jindesti para xarhatakuni Jeobani na engari xáni agradeserijka imeri uékperakua ka ambe enga xáni úkia tʼungini jimbo. Uátsï ka tumbi, eratsi ambe engakini xáni íntskukia Jeoba: tsípiku, sésikua parari mítini imani ka imeri jurhimbikuani, Bibliani, kúnguarhikuani ka ambakiti erokuarhikua ma para sánderu orhepani. Engari orheta péraaska metechani engaksïni sánderu andarheterajka Jeobani, nori solu xarhatakuni jauaka eskari agradesidu jarhaska, ísturi sánderu ambakiti amigueuaka imeri. Engari jánguarhintajka andanguani metechani engaksïni sánderu andarheterajka Jeobani, ambakiti amberi úni jarhasïnga enga Jeoba exejka. Ka i ambekini ístu jarhuatasïndi parari ambakiti pájperakua ma jatsini imani jingoni. Apostuli Pablu arini ambe uandaspti: “Diosï jurhimbit[iisti], ísï jimbo ima no mirikurhiauati chári úkuechani ka níjtu indeni ambe engajtsï úni jaka xarhataparini eskajtsï uékasïnga” (Ebr. 6:10). No nema jukari sapichuesti para metechani jatsikukuarhiani. ¿Andirisï no exejki náki metechaniri sánderu jukaparharaasïni ka uénaniri ánchikuarhini parari andanguani? (Filip. 1:10,11). w18.04 26 párr. 5, 6

Kʼuiripu enga Roma irekapka, kánikua kʼéramakuarhisïrendi leicha jimbo, gobiernu jimbo ka libertadi jimbo engaksï jatsipka. Peru uinhapikua enga Roma jatsipka, jántspiricheri ánchikuarhita jimboespti. Niáraspti jarhani ma tiempu enga masi o menusi 30% kʼuiripu jántspiripka. Seguru eska kʼuiripu pobri uandanhiauenga libertadiri ambe jimbo o jántspiricha jimbo, ka ístu kristianuecha engaksï jima irekapka. Apostuli Pablu uánikua ambe karaspti libertadiri ambe. Peru no para sési péntaani parhakpiniri uandanhiatechani eska jiánisï anapu kʼuiripu na uékenga úni. Sánderu sési, Pablu ka máteru kristianuechaksï jánguarhintaspti jarhuatani kʼuiripuni para kurhanguni Tata Diosïri Reinueri ambe ka na enga xáni jukaparhakueka tata Jesukristueri uarhikua. Apostuli exeraaspti kristianuechani néski Ima enga újka eskachi meru libreuaka. w18.04 8 párr. 1, 2

Ima chúri ante de uarhini, Jesusi arhispti apostuli Pedruni ambe enga arhijka iásï anapu tekstu. Pedru niáraspti orhejtsïkuni primeru siglurhu anapu kúnguarhikuani (Gal. 2:9). Kánikua uinhaperantaaspti imeri ermanuechani imani balori jimbo enga Pentekostesirhu xarhatapka ka tátsekisï. Enga ióni páni japkia marhuani, karakuaspti ka arhiaspti: “Ini karakatani jimboksïni arhistachesïnga [o “uinhaperantani”, TNM] ka eiangunksïni eska i kóntperata engajtsï jimbo uinhamu anhaxurhitini jaka, sési jimbo Diosïriska” (1 Ped. 5:12). Pedrueri kartechaksï iónisï uinhaperantaastia kristianuechani. Ka iásïjtuchi uétarhinchasïnga eskachi uinhaperanhantaaka engachi jamberi erokuarhini jaka eskaksï Jeobaeri eiatsperakuecha kumplirikuarhiaka (2 Ped. 3:13). w18.04 17 párr. 12, 13

Máruksï uékasïndi libreeni paraksï uandani ambe engaksï eratsijka, úni ambe engaksï sánderu sési exejka ka irekani néna engaksï uékaaka. Iáminduechaksï uékasïndi libertadi. Para konseguirini, marchechaksï únhasïndi ka asta uarhiperanhasïndi. Peru enbesi de konseguirini ambe enga uékanhajka, masi úsïndi sufririnhani ka asta uarhinhani. Ka i ambe xarhatasïndi eska ísïska ambe enga rei Salomoni karapka: “Kʼuiripu juramukusïndi máteru kʼuiripuni solu para no sési ambe úkuni” (Ecl. 8:9). Santiagu uandaspti ambe enga arhijka iásï anapu tekstu, ambe engamindu uétarhijka para agustu irekani ka felisi. Jeobasï íntspiti indeni ambakiti jorhenguani ka ima sánderu sési mítisti ambe engachi uétarhinchajka parachi agustu irekani ka meruchi felisiini. Íntskuspti Adani ka Ebani ambe engaksï xáni uétarhinchenga paraksï felisiini ka ístu jurajkuaspti paraksï meru libreeni. w18.04 3 párr. 1-3