Febreru

Jesusi pʼamojkuasïrendi kʼuiripuechani ka uánikua ima kʼuiripu pʼikuarheraspti na enga xáni xénchauenga, jimboksïsï jiókuarhipti Reinueri ambe. Engachi sánderu ísï úska eska Jesusi, sánderujtsïni sési nicheati aianhpikuarhu. Parachi úni kurhangukuani imechani engachi predikarikuajka, jatsiskachi para eranhaskani ambe engaksï imecha eratsijka ka pʼikuarherani, ka ísï kaani eskachi na uékapiringa eskachi kánhapiringa (Mat. 7:12). Ju je eratsini ambe enga mándani kʼuiripu uétarhinchajka. Ka no iáminduechani májkueni ambe aianguani engachi predikarijka, sino jánguarhintani aianhpini ambe enga mándani kʼuiripu uétarhinchajka ka ambe enga eratsijka. Ju je janhanharhikua jingoni kurhamarhiani ambe ma parachi úni mítini indeni ambe (Prov. 20:5). Engachi ini ambe úska, kʼuiripujtsïni aianguati andiksïsï uétarhinchajki mítini Reinueri ambe. Engachi na mítiakia indeni ambe, úakachi pendienti jarhani ambe engaksï uétarhinchajka ka jarhuataani, ísï eska Jesusi na úpka (terukutanta je 1 Korintu 9:19-23 jingoni). w19.03 20 párr. 2; 22 párr. 8, 9

Adani ka Eba, xarhatasptiksï eskaksï méntku no sáni kʼuratsekua jukaspka, jimbokaksï no jeiapanhintaspka ambe enga Jeoba xáni úpka imechani jimbo. Iáminduechachi jatsiska ambe ma engachi jimbo úaka xarhatani na engachi no sáni jeipanhintajka ambe engaksï imecha úka. Engachi itsï atakuarhijka, xarhatakusïngachi Jeobani eskachi jakajkusïnga eska imasï jatsika para uandani ambe sésiski ka ambe nómbe. Ístuchi xarhatakusïnga eskachi xénchasïnga ka eskachi mintsikasïnga. Engachi na itsï atakuarhijkia, jatsisïngachi para pauani pauani kumpliriuani Jeobaeri juramukuechani ka no jucharichani. Ísïsti, no fásilisti, peruksï uánikua kʼuiripuecha ísï úsïndi mándani uéxurhini. Tʼuri úaka ísï úni eska imecha. Parari ísï úni, seguiri sánderu sési kurhanguni ambe enga Biblia arhijka, pʼinde erachicha jingoni úni ambe ma ka tsípikua jingoni aiangua máteruechani ambe engari jorhenguarhikia chíti Táti uékpitiri enga auandarhu jaka (Ebr. 10:24, 25). Ka engari erakuni jámaaka úni ambe ma, úraa imani konsejuechani engakini Jeoba íntsaajka imeri Karakata jimbo ka imeri organisasioni jimbo (Is. 30:21). Engari ísï úska, sésikini nicheati (Prov. 16:20). w19.03 7 párr. 17, 18

Jeobajtsïni uánikua ambe íntskusïndi parachi imeri ambe jorhenguarhini. Por ejemplu, kánikuachi informasioni intsinhasïnga juchari tánguarhikuecharhu, rebistecharhu ka Internetiri pájinecha jimbo. Engachi kánikua tsitijka diskursu ma, artikulu ma o programa ma enga kanali JW Broadcasting jimbo uérajka, ¿a no eskachi eratsisïnga eskachi meru imani ambesï uétarhinchani japka? Jiájkani, ¿nénachi úa diosmeiamukua arhini Jeobani iámindu imani ambe jimbo engajtsïni ima íntskujka? (Kol. 3:15, TDU). Ma ambe engachi úaka úni, jindesti someni diosmeiamukua arhini engachi kómarhiaka. Máteru ambe engachi úaka úni parachi diosmeiamukua arhini, jindesti eska sési ka limpiu jauaka nani engachi tánguarhijka para kʼéri ambe arhini Jeobani. Jimbochisï someni jarhuajpijka aseu úni ka arreglarini ambe enga xáni uétarhiaka Kʼumanchikua Reinuerirhu. Ístu, imecha engaksï kúnguarhikueri aparatuechani úraajka, sésiksï úraasïndi. Engachi sési kuidariska Kʼumanchikua Reinuerini, ióni marhuauati ka no xáni uétarhiati eskachi arreglariuaka imani ambe enga jukaparhaka. Engachi ísï úska, sánderu tumina jauati para úani ka sési jájkuantani máteru Kʼumanchikuechani Reinueri interu parhakpini jimbo. w19.02 18, 19 párr. 17, 18

Jobu, tiempu úraspti para eratsintani ambakiti ambe enga Jeoba kueraaka (Job 26:7, 8). Ísku pakaraspti enga eratsipka Echerini, auandani, nubechani ka enga charanchijka, nájkiruka jiókuarhipka eska no uánikua ambe mítispka ambe enga xáni Tata Diosï kueraaka. Ístu kánikua jukaparharaspti ambe enga Jeoba jorhendenga ka jimbosï uandapti: “Jukaparharasïnga ambe enga ima uandaka” (Job 23:12). Na enga xáni kʼéri ambe exenga Jeobani ka janhanharhini, úspti eska sánderu xénchapiringa ka uékani jaiapanherantani. Ka i ambe jarhuataspti para iámu mintsita jingoni marhuakuni. Ísï eska Jobu, jatsiskachi para tiempu úrani parachi eratsintani ambakiti ambe enga Jeoba kueraaka. Iásï, kʼuiripu sánderu ambe mítistia ambe enga Jeoba kueraaka ka eska Jobueri jurhiatikuecha jimbo. Ístuchi jatsiska Bibliani engajtsïni jarhuatajka sánderu sési mítini Tata Diosïni. Iámindu ambe engachi jorhenguarhiaka, úati eskachi sánderu kʼéri ambe exeaka Jeobani ka janhanharhini. Ka i ambe úati eskachi xénchaaka ka kurhajchani, ístujtsïni jarhuataati eskachi uékaaka iámu mintsita jingoni marhuakuni Jeobani (Job 28:28). w19.02 6 párr. 12

Desde iónisï, uánikua juramutichaksï no sési kámastia Jeobaeri iretani. ¿Andi? Jamberiksï uándajti eskachi no sési ambe úska, peru ambe engajtsïni jimbo no sési kámajka, jindesti jimbokachi sánderu kurhajchasïnga Tata “Diosïni ka eska kʼuiripuechani” (Uku. 5:29). Jamberijtsïni teresmarhujti, ónhantsïni o astajtsïni atani. Peru Jeobaeri jarhuajperata jimbo, nochi ikiasïnga nichi no sési úkuantajki engajtsïni no sési kámajka. Ju je eratsintani imani ejempluni engajtsïni tanimu ebreuecha xarhatachika engaksï Babilonia pánhapka jupikakata: Ananiasi, Misaeli ka Asariasi. Janhanharhikua jingonksï arhispti reini andiksïsï no kʼéri ambe arhipiringa imajenini. Sánderu sési, jiókuarhisptiksï ambe enga Jeoba jurajkupiringa eska úkuarhipiringa (Dan. 3:1, 8-28). Engachi tsʼéjkunhaska parachi no kurhajchani Jeobani, ¿nénachi úa májkueni úni eskaksï tanimu ebreuecha? Xarhataparini kaxumbikua ka mintsikaparini eskajtsïni Jeoba kuidariuaka (Sal. 118:7). Ka engajtsïni nema arhijka eskachi no sési úska ambe ma, iatsitakuarhuchi mókukuntasïnga ka janhanharhikua jingoni (1 Ped. 3:15). Ístuchi méntku no uékasïnga úni imani ambe engachi jimbo úpiringa nóteru sési pájperania juchari Táti auandarhu anapu jingoni. w19.02 10, 11 párr. 11-13

Ambe ma engajtsïni jarhuataaka para sánderu balori jukani, jindesti eratsini erokuarhikuani engachi jatsika Jesusiri uarhikua jimbo (Juanu 3:16; Efes. 1:7). Semanecha ante de Konmemorasionini, úsïndiksï eskachi sánderu agradeseriuaka pʼímutantskuani. Imani jurhiatikuecha jimbo, ju je arhintani Bibliaeri arhintskuani ka sési eratsintani iámindu ambe enga úkuarhipka ante de Jesusi uarhini. Ísï, engachi tánguarhintaaka para Tateeri Sena, sánderuchi sési kurhanguaka ambe enga xáni arhikuekajka kurhinda ka binu, ka Jesusiri uarhikua enga xáni kʼéri ambeka. Engachi kurhangujka ambe engaksï Jesusi ka Jeoba úka juchantsïni jimbo, ka na engajtsïni marhuachijka juchantsïni ka ístu imechani engachi xáni uéajka, niárasïngachi sánderu jakajkuni ambe enga úkuarhiaka sánderu orhepani ka inde ambe úsïndi eskachi balori jatsiaka para úni tekantani kʼamarhukuni jamberi (Ebr. 12:3). Mintsita jingonchi jeiapanhikuntasïnga Jesusini enga seguirini jaka xarhataani ini xáni ambakiti kualidadicha, iásï enga Kʼéri Saserdotika auandarhu ka engajtsïni kómarhijpichijka parachi pʼímutantskata uérani (Ebr. 7:24, 25). Parachi meru xarhatani eskachi agradesidu jarhaska, jatsiskachi para méntkisï kurhajchani ambe engajtsïni juramuchika, eskachi jatsiska para miántani imeri uarhikuani (Luk. 22:19, 20). w19.01 22 párr. 8; 23, 24 párr. 10, 11

Engachi íntspiajka komentariuechani, ístuksï jindesti komu “kéjtsitakua úkuni Diosïni” ka no nema uáti úni indeni ambe juchantsïni jimbo (Ebr 13:15). ¿Jeoba afuersa uékasïni eskachi iáminduecha májku jarhati kómentariuechani íntspiauaka? Nómbe. Tánguarhikuechaksï ísïsti komu amiguecha jingoni tʼireni. Engajtsïni máru erachicha pʼímarhiska barbakoa nirani arhani ka arhintsïni eskachi paaka ambe ma enga no xáni úkua jukaka para úntani, ¿ambechi úa? Jamberichi sánisï chéni pʼikuarheraaka, peru kʼóruchi kánikua jánguarhintaaka para imani ambe páni engaksï iáminduecha anhenchaaka. Tánguarhikuecharhu, Jeoba jindesti engajtsï pʼímarhijka, uánikua ambakiti ambejtsïni pérachisïndi mesa ma jimbo (Sal. 23:5; Mat. 24:45). Ima kánikua sési pʼikuarherasïndi engachi juchajtu íntskujka ambe ma enga no xáni kʼéri ambejka, peru engachi kánikua jánguarhintajka. Ísï jimbo, ju je sési prepararikuarhini ka jánguarhintani komentarini xáni eskachi xáni úaka. Indeni ambe úparini, no soluchi Jeobaeri mesa jimbo tʼireaka, sino ístuchi jarhuatauaka máteruechani ísï úni. w19.01 8 párr. 3; 13 párr. 20

Bibliaeri tiempuecha jimbo, ísku jándikua ambe sáno méntkisï úrakuarhisïrendi para diosï úkatechani kómarhiani (Os. 4:13, 14). Uánikua kʼuiripu diosï úkatechani kómarhiasïrendi jimbokaksï tsitisïrenga ísku jándikua ambe úni. Peru ini ambe úni, no úsïrendi eskaksï felisipiringa. Dabidi, Salmo 16:4 jimbo uandaspti eskaksï kánikua kómu nitamakuarhisïnga imecha engaksï diosï úkatechani kómarhiajka. Ima kʼuiripuechaksï niáraspti íntspiani uájpechani komu kéjtsïtakua ma para diosï úkatecha (Is. 57:5). Jeoba kánikua no sési exesïrendi imani xáni no sési jásï ambe (Jer. 7:31). Ini jurhiatikuecha jimbo, ístu relijioni no jurhimbitichaksï no no sési exesïndi ísku jándikua ambe úni ka ni omosexualidadi. Ini ambe jimboksï kʼuiripuecha úpirindi ísï pʼikuarherani eskaksï libreska, peru sési jimboksï kánikua kómu nitamakuarhisïndi (1 Kor. 6:18, 19). Jamberiri kuenta íntskukuarhikia eska ísïska. Ísï jimbo, kurhajcha chíti Táti auandarhu anapuni. Jánguarhinta exeni eska imani kurhajchani sánderu sésiska para tʼu. Asï méni mirikurhi eskari ma ratujkusï sési pʼikuarheraaka engari no sési ambe úska, peruri kánikua kómu nitamakuarhiaka imani ambe jimbo (Gal. 6:8). w18.12 27, 28 párr. 16-18

Enga kristianu ma ísku jándikua ambe uáka, imeri uarhiiti o achati jatsiati para exeni ambe uá. Jesusi uandaspti eska ima enga no kulpa jatsika, uáka diborsiarikuarhini ka úni ménderu tembuchantani o uambuchantani (Mat. 19:9). Peru ístu úpirindi puákuntani ka no diborsiarikuarhinia, no no sési japirindi enga ísï úpiringa. Biblia uandasïndi eska Oseasi ménderu pántaspka Gómerini imeri kʼumanchikuarhu. Jiáni uératini, Gómeri nóteru jatsipirindia para apondini máteru achati jingoni. Oseasi ma tiempu no apondispti Gómeri jingoni (Os. 3:1-3, nota). Peru seguru eska ísï tátsekua ménderu uénaspka apondini imani jingoni. I ambe xarhataspti na enga Jeoba uékapka ménderu jiókuarhintani imeri iretani ka ambakiti pájperakua ma jatsini imani jingoni (Os. 1:11; 3:4, 5). Ambe engachi jorhenguarhijka, jindesti eska enga achati o uarhiiti enga no kulpa jatsika erakujka no diborsiarikuarhini ka ménderu apondini imani jingoni, xarhatasïndi eska puákuntaskia uámbani o témbani enga enganiarika (1 Kor. 7:3, 5). Enga ísï úska nóteru uátia diborsiarikuarhini. Jiáni uératini, tsimarhanksï jatsisti para jánguarhintani ísï exeni temungurhirikuani eska Jeoba na exejka. w18.12 13 párr. 13

Engachi estudiarini jauaka, marhuasïndi eratsintani na exesïni Jeoba ambe ma, jimbokajtsïni jarhuataaka sánderu orhepani ambakiti ambe erakuni úni. Ísï úparini, mítiakachi ambechi jatsiski para úni engachi situasioni ma jimbo jauaka enga uétarhiaka sóntku erakuni ambe ma. Ju je eranhaskani ambe enga nitamanchapka Jose. Potifariri témba afuersa uékasïrendi eska Jose imani jingoni apondipiringa, peru Jose jirejiresï kéndikukuspti. Ísï xarhataspti eska eratsintaspka ambe enga Jeoba uandajka eskaksï temungurhiricha no jatsiska para enganiarperani (Gén. 39:8,9). Ístu, ju je miántani ambe enga arhipka imani uarhiitini: “¿Néna úpirini ji ini ambe úni, ka ini ambe jimbo kʼéri pekadu ma úni Tata Diosïri orhepatini?”. I ambe xarhatasïndi eska Jose ísï exesïrengia ambe ma eska Jeoba na exejka. Iásï ju je juchari ambe exeni, eranhaska je eska ánchikuarhitarhu anapu ma kompanierujtsïni uénasïnga koketearichini o eskajtsïni telefonurhu mensaji ma o fotu ma niárachisïnga enga ísku jándikueri ambeka. Engachi antesi eratsintaska na exesïni Jeoba ini ambe, ísï eratsini eska ima ka mítitini jarhania ambe úni, sánderu fásiliuati eskachi kurhajchaaka Jeobani. w18.11 25 párr.13-14

Máru jorhenatichaksï uandasïndi eska bersikulu arhikuekasïnga eska Abakuki tsanguarapiringa ka uantsïkuarhini xáni tsípini imeri Tata Diosïni jimbo. ¿A no eskajtsïni imeri ejemplu ambakiti ambe jorhendasïnga? Jeobajtsïni seguirixati ambakiti ambe aiachini ka asegurarichisïndijtsïni eska úxaka iámindu ambe enga xáni uétarhijka para kumplirini. Ísïsti, ima ambe enga libru de Habacuc arhijka kánikua jukaparhakuesti: jatsiskachi para Jeobani mintsikani (Hab. 2:4). ¿Ambejtsïni jarhuataa seguirini jarhani mintsikani? Sánderu ambakiti pájperakua ma jatsini Jeoba jingoni. Para i ambe jimbo, tanimu ambechi jatsiska para úni. Primeru, someni kómarhini Tata Diosïni ka eianguni ambe engajtsïni xáni uandanhiatajka. Segundu, jingontku jarhani ambe engajtsïni xáni arhijka imeri Karakata jimbo ka jarhuajperata engajtsïni íntskujka imeri organisasioni jimbo. Ka terseru, tekantskua ka mintsinharhikua jingoni erokuarhini eska ima uáka ambe ma. Inde ambesï úpti Abakuki. Nájkiruka imeri librurhu uénani jámani puru no sési pʼikuarherakueri ambe karapka, últimu karaspti eska tsípixapka ka mintsikani Tata Diosïni. Ju je májkueni úni eska ima ka ísïchi pʼikuarheraka eskajtsïni Jeoba ísï kamanharhisïnga komu táti ma. Ka i ambe jindesti engajtsïni sánderu sési uinhaperantaaka ini parhakpini jimbo enga xáni no sési jánhaskuarheni jaka. w18.11 17 párr. 18, 19

Jurhimbiti kristianuechachi jatsiska máteru rasoni parachi seguru jarhani eskajtsïni Jeoba xénchasïnga. Juanu 3:16 arhisïndi: “Diosï xáni uéasti parhakpini anapuechani, ísï jimbosï íntspiti imeri máechakua Uájpani paraka nákinterku nema enga imani jakajkuaka, no tsïnchiaka sino jatsini tsípikua para méntkisï”. Ka xáni engajtsïni kʼéri uékperakua xarhatachika Jesusi enga ísï íntspika imeri tsípikuani juchantsïni jimbo. Tata Diosïri Karakatajtsïni aiachesïndi eskaksï ni sikiera problemecha o uandanhiata ambe, uáka ‘eskajtsïni Kristu nóteru uékaakia’ (Rom. 8:35, 38, 39). ¿A no eska i jásï uékperakuajtsïni jarhuatasïnga parachi orhepani uérani? Engachi problemechani ambe jatsiajka engajtsïni niárajka kuatajkuni, kómu pʼikuastani o eskachi nóteru tsípikua jingoni marhuakuakia Jeobani, miántani na engajtsïni xáni uéjka Kristu, uátijtsïni balori íntskuni parachi úni aguantarini (2 Kor. 5:14). Jesusiri uékperakua, jarhuatasïndijtsïni parachi tsípikua jingoni irekani ka seguirinchi marhuakuni Jeobani. Úsïndi eskachi no kuatantaaka nájkirukachi no sési kánhaaka, no úkuarhini ambe ma engachi erokuarhini jauaka, uandanhiani jarhani o desastre naturali ambe úkuarhini. w18.09 14 párr. 8, 9

Para jurhimbikuarhu jarhani, jatsiskachi para jiókuarhini ka úni iámindu ambe engajtsïni Jeoba jorhendajka. Jatsiskachi para jurhimbikuani sánderu jukaparharani juchari irekuarhu ka úraani Bibliaeri prinsipiuechani. Ísï eska Dabidi, jatsiskachi para seguru jarhani eskachi uékasïnga jurhimbikuarhu jarhani. Engachi no seguru jaka, uákachi uénani eratsini ambe engachi xáni jurajkuka para konseguirini jurhimbikuani ka jamberichi ménderu uékani jatsini imani ambe. Peru nochi méni jatsipiringa para indeni ambe úni. Mítiskachi eskachi no uáka erakuni náki jorhentperakuechani jiókuarhiani ka náki nómbe, sánderu sési, jatsiskachi para jiókuarhini “iámindu ambe enga sési jimboeka” o enga jurhimbitiika (Juanu 16:13). Parachi no jurajkuni jurhimbikuani no kuenta íntskukuarhiparini, jatsiskachi para sési úrani juchari tiempuni. Engachi no jingontku jámaska, uákachi jukari tiempu úrani tsípikuarhita ambe jingoni, imani ambe jingoni engachi kánikua tsitijka, Internetirhu o telebisioni exeni. Nájkiruka i ambe no no sési jaka, úpiringachi úrani imani tiempuni engachi arhutajka para estudiu personali jatsini o para Jeobani marhuakuni. w18.11 10 párr. 7, 8

Enga juchari irekua ma repentku mójtakurhijka, no sésichi pʼikuarherasïnga ka uandanhiani (Prov. 12:25). Jamberi úkua jukaati pʼindeni ima ambe jingoni enga mójtakurhika. ¿Ambejtsïni jarhuata sési pʼikuarherantani ka no xáni uandanhiani engachi indeni ambe nitamanchaska? (Sal. 131:1-3). Ini jurhiatikuecha jimbo, nájkirukachi no sési jásï ambe nitamakuarhini jauaka uákachi pʼikuarherani na enga ‘Tata Diosïri pínandikua’ kuájchakujka juchari eratsikuani (Filip. 4:6, 7). Ísï jimbo, ju je kurhakuni Jeobani jarhuajperata engachi no sési pʼikuarherani jauaka. Jiájkani, imeri pínandikuajtsïni jarhuataati parachi jánguarhintani sánderu marhuakuni Jeobani ka ístu parachi no kuatantani. Aparti dejtsïni Tata Diosïri espiritu sési pʼikuastantani, jarhuatasïndijtsïni exeantani bersikuluechani engajtsïni jarhuatajka exeni ambe enga sánderu jukaparhakueka juchari irekuarhu (Juanu 14:26, 27). w18.10 27 párr. 2; 28 párr. 5, 8

¿Ambe jindeski enga sánderu no sési úkujka kʼuiripuni? Chkuanderakua, i ima ambesti enga mítinhaka eska no ísïska peru enga uandanhajka para enganiarpini. Tata Jesukristu uandaspti eska “tátemba chkuanderaricheri” jindeska Noambakiti, jimboka ima uénaspka chkuanderani (Juanu 8:44). ¿Káni uénaspi chkuanderani? Iónistia, jini jardini de Edenirhu. Adani ka Eba sésiksï irekaxapti paraisurhu enga Tata Diosï íntsaapka. Peru Jeoba arhiaspti eskaksï no akupiringa “anhatapu mímixekueri enga jindeka sési amberi ka no sési amberi”. Engaksï no kurhajchapiringa, uarhipirindiksï. Nájkiruka Satanasi mítipka ini ambe, úraspti akuitsini ma para Ebani arhini primeru chkuanderakua: “Nójtsï uarhiaka”. Ka arhispti: “Jimboka Tata Diosï mítiska eska ima jurhiatikua engajtsï cha auaka indeni frutani, uákajtsï kánikua ambe mítini, ka ísïuakajtsï eska Tata Diosï, mítiakajtsï ambe sésiski ka ambe no sésiski” (Gén. 2:15-17; 3:1-5). w18.10 6 párr. 1, 2

Paraka juchari mintsita pímbinhasïuaka, juchari eratsikuecha ka ambe engachi tsitijka, ístuksï jatsisti para pímbinhasïni. I ambe jukaparhakuesti paraka Jeoba jiókuarhiaka juchari kómarhikua (2 Kor. 4:2; 1 Tim. 1:5). Biblia arhisïndi eska no ma kʼuiripu úsïnga exeni Tata Diosïni ka útasï irekani jarhani (Éx. 33:20). Jimajkani, ¿andisï Jesusi uandapi eska imecha engaksï mintsita pímbinhasï jukaka exeaka Tata Diosïni? Uandakua griegu jimbo enga tradusirikuarhijka “exeni” uáti arhikuekani eranhaskani, kurhanguni ka mítini. Imecha engaksï mintsita jingoni újka exeni Tata Diosïni, imaksï jindesti engaksï niáraka sési mítini ka jukaparharanksï imeri kualidadichani (Efes. 1:18). Aparti de mítiani Jeobaeri kualidadichani, ¿nénateruchi uá exeni Tata Diosïni? Exeparini ambe enga xáni újka parajtsïni jarhuani (Job 42:5). Ístuchi úsïnga exeni Jeobani engachi no mirikurhiauaka imani ambakiti kóntperatechani enga jatsiaka para imecha engaksï jánguarhintajka pímbinhasï jarhani ka engaksï no jurajkujka. w18.09 20 párr. 13, 15, 16

Engachi úska imani ambe engachi mítika eska sési jarhaska, uánikua kóntperatechanchi jatsiauaka. Nájkiruka jánhaskakua, jupindaskuarhijka imani ambe jimbo engachi xáni mítika, ambe enga meru xarhatajka eskachi janhaskatiska, jindestiksï ima ambe engachi erakujka úni, no ima ambe engachi mítika. Biblia arhisïndi eskaksï asta sïrukicha jánhaskatiska, jimbokaksï beranu jimbo tántasïnga imecheri tʼirekua (Prov. 30:24, 25). Kristu enga arhinhajka Tata Diosïri jánhaskakua, méntkisï úsïndi ambe enga Táti jemba jeiapanhintajka (1 Kor. 1:24; Juanu 8:29). Tata Diosï mítisti eska ma ambeska mítini ambechisï jatsi para úni ka eska méntku máteru ambeska úni ambe engachi mítika. Ima kóndiantasïndi imechani engaksï xarhatajka kaxumbikua ka tekantskua ka engaksï újka imani ambe engaksï mítika eska sési jarhaska (Mat. 7:21-23). Ísï jimbo, ju je jánguarhintani úni eska kúnguarhikua jindeuaka lugari ma nani engachi iáminduecha kaxumbikua jingoni marhuakuaka Jeobani. Ísïsti, tiempu uétarhisïndi ka tekantskua parachi úni imani ambe engachi mítika eska sési jarhaska. Peru engachi úska, xarhataakachi eskachi kaxumbitiska ka tsípikua jingonchi irekaaka iásï ka para méntkisï. w18.09 7 párr. 18

Jiáni engajtsïni Jeoba kueraapka, uékasïrendi eskachi májku kʼéri ánchikuarhipiringa imani jingoni paraka úpiringa kumplirikuarhini ambe enga ima uékenga. Nájkirukachi iásï nóteru perfektuekia, ambakiti Tata Diosïri marhuarichachi uáka pauani pauani ánchikuarhini imani jingoni. Por ejemplu, Biblia arhisïndi eskachi “jindeska Diosïri jarhuajpiricha” engachi eianhpijka ka disipulu uáni (1 Kor. 3:5-9). Kʼéri ma kóntperatesti eska Kuerajpiri enga iámindu ambe újka úni, íntskuakajtsïni sésikua parachi jarhuatani úni ini ánchikuarhitani enga xáni jukaparharajka. Peru jarhasti máteru ambe engachi uáka úni para Jeoba jingoni ánchikuarhini. Ístuchi uáka jarhuatani juchari familiani ka erachichani, sési kámpini, aiatspikuarhini para ánchikuarhini para organisasioni ka sánderu marhuakuni Tata Diosïni (Kol. 3:23). Peru nóchi terokutantaaka ambe engachi xáni újka jucha Jeoba jimbo imani ambe jingoni na engaksï xáni újka úni máteruecha. Ju je miáni eskaksï máru pʼamenchasïnga, nochi iáminduecha májkueni jatiriska, májkueni jorhenani úni ambe ma o májkueni ambe nitamanchani jarhani. w18.08 23 párr. 1, 2

Jeoba arhispti Abakukini eska mókukuantapiringa imeri kurhamarhikuechani. No ióni jimbo nóteru uandanhiani japirindia. Ísïspti enajki arhini japi profetani: “Tekaanta ka mintsikarini. Nájkiruka ísï xarharaaka enajkini ióndaa, mókuchentaakakini”. Jeoba miátantaspti eska exerixapkia na enga jatini kumpliripiringa ambe enga aiatspipka ka arhispti eska seguiripiringa erokuarhini. Ka profeta niárapirindi exeni eska inde ambe kumplirikuarhipiringa. Engachi tekantskua jingoni erokuarhiska ka úni ambe engajtsïni Jeoba arhijka, sésichi pʼikuarheraaka nájkirukachi no sési nitamakuarheni jauaka. Jesusi uandaspti eskachi no uandanhiani jauaka imani ambe jimbo engajtsïni Tata Diosï nótki eianguni jaka káni úkuarhia ambe ma (Uku. 1:7). Ju je mintsikani eska Jeoba mítitixakaia káni sánderu sésiua para úni ambe ma. Ísï jimbo, ju je no kuatantani ka erokuarhini jarhani kaxumbikua jingoni, mintsinharhikua ka tekantskua jingoni. Enga jamberi ísï úkuarhiaka, ju je sési aprobecharini tiempuni para sánderu sési marhuakuni Jeobani (Mar. 13:35-37; Gal. 6:9). w18.11 16 párr. 13, 14

Ísï eskaksï máteru judiuecha, Pedru imani eratsikua jingoni tʼarhexespti para ísï exeani no judiuechani komu kʼuiripuecha engaksï no pímbinharhapka. Peru nitamakuarhispti máru ambe enga úpka eska ménderueni eratsipiringia. Por ejemplu, Pedru jánhaskua ma exespti milagru ma jimbo (Uku. 10:9-16). Ísï eska Pedru, jatsiskachi para kuidadu jingoni exekuarhini ka jurajkuni eskajtsïni máteruecha jarhuataaka exeni sini útasï juchari mintsitarhu jarhaski ambe ma engachi jimbo no xénchaajka máteruechani. ¿Ambeteruchi uá úni? Engachi mintsita jingoni jiókaaska iáminduechani, uékperakua uáti eskachi xénchaauaka iáminduechani (2 Kor. 6:11-13). ¿Pʼindeskichi solu imechani jingoni uandontskuarhini engaksï juchari idioma uandajka oksï juchari raseni, tribu, oksï májku lugarirhu anapueni eska jucha? Enga ísïika, ju je jánguarhintani kúnguarhini imecha jingoni engaksï máteru jásï pʼindekuechani jatsiaka. ¿Andichisï no pʼímarhiajki parachi májku kʼéri nirani eianhpini, ochi pʼímarhiani juchari kʼumanchikuarhu parachi arhani ambe ma o parachi májku kʼéri jarhani máteru erachicha jingoni? (Uku. 16:14, 15). Engachi ísï úska, juchari mintsitarhu puru uékperakua ambe jauati ka no jauati lugari para no xénchaani máteruechani. w18.08 9 párr. 3, 6; 10 párr. 7

Máru Testiguechaksï máteru úkuecha jingoni xarhatasïndi eskaksï útasï jiókuarhisïnga parhakpini anapu ambe. Por ejemplu, engaksï nirajka kʼuinchikuecharhu, uarhasïndiksï ka ísïksï jámani enga no sési jaka para kristianu ma. Imecheri fotuechanksï redesi sosialicharhu karhataasïndi ka komentariuechanksï uáni engaksï xarhatajka eskaksï no espiritualiska. Ísï jimbo, noksï jindesti ambakiti pájperakua ma para imecha engaksï jánguarhintani jaka ambakiti jángua ma jatsini (1 Ped. 2:11, 12). Iámindu ambe enga xáni parhakpinirhu jaka, puru ima ambesti “enga mintsita tamapu tsitijka, ka engaksï kʼuiripuecha xáni exenchajka, ka teparakuarhikua ambe o jatsikuarhikua ambe” (1 Juanu 2:16). Peru juchachi Jeobaeriska, imajtsïni jimbosï arhijti eskachi “méntku jurajkuaka pekaduni, ka indeni jásï ambe enga parhakpini anapuecha tsitijka, ka irekanchi iásï ini tiempu jimbo eska na jindeka para sési eratsini ka jurhimbitku jámani ka Diosïni janhanharhini” (Titu 2:12). Iámindu ambe juchari irekuarhu —na engachi uandajka, na engachi tʼirejka ka binu ambe arhani, xukuparhakua ambe ka na engachi arreglarikuarhijka ka na engachi ánchikuarhijka— jatsisti para xarhatani eskachi kʼamakʼamasï marhuakusïnga Jeobani. w18.07 25 párr. 13, 14

Engachi méntku Jeobani eraani jauaka o andarherani, nochi jurajkuaka eska ambe engaksï máteruecha uáka, niáraka úni eskachi nóteru tsípikua jingoni jámakia, o eskachi no sési jauaka Jeoba jingoni. Uétarhisïndi méntku miáni jarhani indeni ambe ka sánderu imecha engaksï responsabilidadichani jatsiaka Jeobaeri organisasionirhu, ísï eska Moisesi. Ísïsti eskachi táchanisï jatsiska para Jeobani kurhajchani parachi salbarikuarhini. Peru jatsiskachi para miáni eska Jeoba no iáminduechani jusgariuasïnga juramukua ma jingoni engachi no uáka kumplirini (Filip. 2:12). Engachi sánderu responsabilidadichani jatsiaska, Jeobajtsïni sánderu ambe kurhachintaati (Luk. 12:48). Engachi meru xénchajka Jeobani, no ma ambe uáti eskachi jurajkuaka imani ni eskajtsïni ima nóteru xénchaakia (Sal. 119:165; Rom. 8:37-39). Ini tiempu jimbo enga xáni úkua jukaka, ju je méntku exeni jarhani o andarhierani imani enga uaxakatini jaka imeri tronurhu jini auandarhu, parachi mítini ambe enga uéjka eskachi uáka (Sal. 123:1). Ju je no méni jurajkuni eska ambe engaksï máteruecha uáka, niáraka no sési úkuni juchari ambakiti pájperakua Jeoba jingoni. w18.07 16 párr. 19, 20

Kánikuachi tsípisïnga mítini na enga xáni uánenhani jaka Jeobaeri iretarhu. I ambe xarhatasïndi eskaksï Jeobaeri marhuaricha, meremerejkuxaka imecheri tʼíntskua. Uéxurhini 2017 jimbo, uáskachi jukari diesi miioni estudiu bíblikuechani. Ka ístu, miioni kʼuiripu niraspti Konmemorasionirhu ka jorhenguarhispti na enga Jeoba xarhatapka uékperakua enga axapka imeri Uájpani parajtsïni pʼímutantani (1 Juanu 4:9). Jeobaeri iretarhu, uánikua idiomecha uandanhasïndi. Peru inde ambejtsïni no pʼíngusïndi parachi no úni májku kʼéri kómarhini Jeobani (Jaŋ. 7:9). No arhiparini náki idiomachi uandasïni ochi nani irekaski, uákachi meremerejkuni komu tʼíntskua enga “erajkutarpijka parhakpinirhu” (Filip. 2:15). Na engachi sánderu uánini jaka, na engachi májku kʼéri jaka ka jingontku, úsïndi eskachi kʼéri ambe arhiaka Jeobani ka eskaksï máteruecha andaparhakueraaka jurhimbikuarhu. w18.06 21 párr. 1-3

Jesusi sési uandontskuarhixapti enga no jamberi kasu úpka tʼireni. Para ima, úni ambe enga Táti jemba uékenga ka aianhpini, ísïspti komueska imeri tʼirekua, jimbosï asta samaritanani ma predikarikupti (Juanu 4:32-34). Santiagu ka Juanu, nóksï kurhanguspti ambe enga Jesusi uékapka jorhendaani. Engaksï Samaria ísï nirani japka Jesusi jingoni, disipuluechaksï exexapti naniksï pakarapirini ima chúri. Peruksï Samaria anapuecha no jiókaaspti, jimboksïsï Santiagu ka Juanu uandapti sinksï úpirini kurhajkuarhini eska auandarhu uératini chpiri uekorhipiringa para kʼamajkuni imani iretani. Peru Jesusi uinhamu xukaaspti (Luk. 9:51-56). Engaksï Galilea anapuecha ísï kápiringa, nani engaksï Santiagu ka Juanu anapuepka ¿ísïksï ikiapirini? Jamberiksï jimbo xáni ikiapti jimbokaksï útasï no úsïrenga sési pájperani máteruecha jingoni. Ísï ióni jimbo, apostuli Juanu niraspti samaritanuechani predikarikuani ka uánikuaksï kurhajchaspti. Jamberi niárapti kʼuratseni enga miántapka imani ambe enga antesi úpka (Uku. 8:14, 25). w18.06 10, 11 párr. 12, 13

Engachi sési jónguarhintatini jauaka Bibliaeri jurhimbikuani, imani ambechi uáka engachi jorhenguarhijka ka méntkisïchi jurhimbitku ambe uandaaka. ¿Andichisï no jatsi para chkuanderani? Jimboka ma ambeska enga Satanasi sánderu úrajka. Ima enga chkuanderajka, jandiajku no sési úkuarhisïndi ka ístu máteruechani (Juanu 8:44). Ísï jimbo, nájkirukachi no perfektueka, jánguarhisïngachi para no méni chkuanderani (Efes. 4:25). Ísïsti, ménisï úkua jukasïndi. Abigaili enga 18 jatirika, uandasïndi: “Ménisï ísï xarharasïndi eska no uétarhisïnga méntkisï jurhimbitku uandantani ka sánderia engari ísï úparini, uáka orhepani uérakuni problemani ma”. Jimajkani, ¿andichisï jánguarhintajki no chkuanderani? Biktoria enga 23 jatirika, uandasïndi: “Engari no chkuanderaska ka kuájpindi ambe engari jakajkujka, uátiksïni bullying úcheni. Peruri uánikua kóntperatechani jatsiauaka: sánderuri segura pʼikuarheraaka, sánderuri andarheraaka Jeobani ka eskakini respetariuaka ima kʼuiripu engakini uékajka”. Ísï jimbo, jukaparhakuesti eskari méntkisï jurhimbitku ambe uandaaka. w18.05 28 párr. 3, 5

Eska na sánderu no sési jánhaskuarheni jauaka, jatsiakachi para sánderu jingontku jarhani. Peruchi mítiska eska Tata Diosï kʼamajkuaka ini parhakpinini jiáni enga ima eratsitini jakaia (Mat. 24:42-44). Mientrasi, jatsiskachi para tekaantani ka méntkisï jingontku jarhani. Ju je pauani pauani arhintani Tata Diosïri Karakatani ka méntku jauenani kómarhini (1 Ped. 4:7). Ju je exeani imani ambakiti ejempluechani erachicheri engaksï jingontku jaka ka engaksï meremerejkuni jaka imecheri tʼíntskua. Ju je méntkisï marhuakuni Jeobani, ambakiti ambe úni máteruecha jimbo ka arhutani tiempu para juchari erachicha jingoni jarhani. Ísï úparini, sánderuchi felisiuaka ka tiempu sánderu arisku niuati (Efes. 5:16). Nájkirukachi uánikua ambe no sési újka, Jeoba jurajkusïndi eskachi seguiriuaka marhuakuni. Ka parajtsïni jarhuatani jingontku jarhani ka seguirini ánchikuarhini, íntsaasïndijtsïni kúnguarhikuarhu anapu orhejtsïkutichani (Efes. 4:11, 12). Ísï jimbo, máteru jimbo engajtsïni orhejtsïkuti ma pʼorhembiaka, ju je aprobecharini ambe enga xáni mítika ima erachi. w18.06 24, 25 párr. 15-18

Jesusi arhiaspti imeri chúxapatichani eskaksï méntku jauenapiringa imeri uékperakuarhu jarhani. ¿Andi? Jimboka uétarhisïnga tekantskua jatsini para méntkisï kristianu máeni. Jesusi xarhataspti na enga xáni jukaparhakueka tekantani, someni úraparini uandakuani méntku jauenani, karakatarhu enga Juanu 15:4-10 jaka. ¿Nénachi xarhatasïni eskachi uékasïnga Jesusiri uékperakuarhu jarhani ka eskajtsïni jeiapanhintaaka? Úparini ambe engajtsïni juramuchijka, o sea kurhajchani Jesusini. Imajtsïni imani ambejkusï kurhachijti enga ima mísmu újka, jimbosï uandapti: “Májku jásï eskani ji na janhanharhijka ambe engarini juchiti Táti juramuchika, jíksïni méntku jauenaaka uékani májku jásï eskarini Táti na uékajka jíndeni”. Ísïsti, ima jindesti juchari ambakiti ejemplu (Juanu 13:15). Ístu, engachi kurhajchajka Jesusini ka niranchi eianhpini, xarhatani jarhasïngachi eskachi uékasïnga Tata Diosïni. ¿Andi? Jimboka ambe engajtsïni Jesusi juramuchijka terokuntasïnga imeri Tátemberi eratsikua jingoni (Mat. 17:5; Juanu 8:28). Jeoba ka Jesusi, ístujtsïni xarhatachisïndi uékperakua engachi juchajtu xarhatakuajka uékperakua. w18.05 18 párr. 5-7

Engari uátsïjka o tumbiini, jatsisïngari para erakuni amberi estudiariua, naniri ánchikuarhia ka máteru ambe. Engari sési mítitini jaka amberisï uéjki, sánderu fásiliuati exeni amberi jatsiski para úni. Entreri sánderu sóntku exeska amberisï uá ka jatsikukuarhiandi ambakiti metechani, sánderuri sóntku pʼiuauaka kóntperatechani. Interu parhakpini anapu kúnguarhikuecharhu, uánikua tumbiichaksï jarhasti engaksï jukanchaka eskachi felisitariuauaka, jimbokaksï mintsita jingoni marhuakusïnga Jeobani ka jánguarhintanksï jarhani imani metechani andanguani engaksï sánderu andarheterauaka Jeobani. Íksï tumbiicha tsípikuarhisïndi, peruksï ístu jorhenguarhisïndi exeni méntkisï ambe uandasïni Jeoba, asta familieri ambe. Salomoni karaspti: “Mintsika Jeobani iámu chíti mintsitani jingoni”. Ka ístu uandaspti: “Iámindu ambe engari uáka, ú imani eratsiparini, ka ima jurhimberaauati chíti xanharuechani” (Prov. 3:5, 6). Jeoba kánikua jukaparharaasïndi tumbiichani. Ima kánikua xénchaasïndi ka jimbosï kuájchakuajti, jarhuataani ka újchakuraani. w18.04 26, 27 párr. 7, 9

Apostuli Juanu, orhejtsïkuspti primeru siglurhu anapu kúnguarhikuani. Ambe enga karaka Jesusiri aianhpikueri ambe, iónisï uinhaperantaastia kristianuechani ka iásïjtujtsïni uinhaperantasïndi. Por ejemplu, imeri ebanjeliurhujkusï karakata jati eska Jesusi uandaspka eskaksï imeri marhuaricha, uékperakua jimbo mítikuarhintapiringa (Juanu 13:35). Imeri tanimu kartechaksï uánikua máteru jorhentperakuechani jukaasti engaksï jukaparhakueka. Por ejemplu, engachi kánikua no sési pʼikuarherani jarhajka juchari pekaduecha jimbo, ¿no ísïski eskajtsïni sési pʼikuastantasïnga arhintani eskajtsïni Jesusiri iurhiri pʼikurhiantasïnga “iámindu pekaduechani”? (1 Juanu 1:7). Ka enga juchari mintsita újka eskachi méntku kulpabli pʼikuarherani jauaka, ¿no ísïski eskajtsïni sési pʼikuastantasïnga arhintani eska “Diosï sánderu kʼéris[ka] ka eska juchari mintsita”? (1 Juanu 3:20). Juanujkusï karapti eska “Diosï jindeska uékperakua” (1 Juanu 4:8, 16). Ka segunda ka tersera kartarhu, felisitariuasïndi kristianuechani engaksï no jurajkujka jurhimbikuani (2 Juanu 4; 3 Juanu 3, 4). w18.04 18 párr. 14, 15