Marsu

Engachi arhintajka Génesis kapitulu 1 ka 2, exesïngachi eska Paraisurhu no jarhaspka pobresa, ni ambe ma engaksï jimbo úpiringa chéni o no sési kánhani. Adani ka Eba imani jásï libertadiksï jatsispti enga iásï kʼuiripu no újka jatsini. Nóksï jatsispti para uandanhiani tʼirekua jimbo, ánchikuarhita, pʼamenchakua ni uarhikua jimbo (Gén. 1:27-29; 2:8, 9, 15). Ambe ma enga jukaparhakueka engachi no méni mirikurhiaka, jindesti eska Jeobajkusï kʼamakʼamasï libreka. Ka i ambe ísïsti jimboka ima Kueraaska iámu ambe, ima sánderu uinhapitisti ka Juramutiini iámu amberi (1 Tim. 1:17; Jaŋ. 4:11). Peru iámindu ánjilicha engaksï auandarhu jaka ka ístu iámindu kʼuiripuecha ixú Echerirhu, nochi kʼamakʼamasï libreska. Ju je miáni eska Jeobajkusï jatsika derechu para uaxastaani límitechani enga exejka eskaksï uétarhisïnga ka eskaksï sési jarhaska. Ka indeni ambesï úpti desdeka kueraaka iámu ambe. w18.04 4 párr. 4, 6

Satanasiri parhakpini jimbo irekani, solujtsïni Jeoba jarhuatasïndi tekantani (2 Kor. 4:7, 8). Peru ju je eranhaskaani na engaksï irekajka imecha engaksï no jatsika ambakiti pájperakua Jeoba jingoni ka jánguarhintanksï jarhani orhepani uérani. Májkueni eska Jesusi, pʼamojkuasïngachi ka pákuasïngachi “ambakiti eianhperakuani, enga sánderu ambakiti ambeka”. Ísï jimbo, ju je tekantskua xarhatakuani imechani engachi Bibliaeri ambe jorhendaajka. Ju je miáni eskaksï jamberi apenasi uénani jaka kurhaani ambe enga Biblia jorhentpijka, imani ambe engachi jucha sési mítikia. Ístu, uánikuaksï úkua jukachasïndi jurajkuni imani ambe engaksï jakajkujka, jimbokaksï indeni ambe jingoni eratsisïnga eskaksï iretarhu ma anapueska ka eskaksï májku kʼéri jarhasïnga familia jingoni. Ante dechi nemani arhini eska jurajkuaka ambe enga antesi jakajkuenga, jamberichi orheta jatsiaka para jarhuatani jukaparharani ambe enga Biblia jorhentpijka, enga para ima jimbanhi ambeuaka. Ini ambe úparini, uékaati jurajkuni imani ambe enga antesi jakajkuenga. Ka para ísï úni, jamberi tiempu uétarhiati (Rom. 12:2). w19.03 22, 23 párr. 10, 12, 13

Ísï eska Jeoba na xarhatakupka Jesusini uékperakua ka uinhaperantani, juchajtuchi jatsiska para májkueni úni máteruecha jingoni (Juanu 5:20). Sésichi pʼikuarherasïnga engajtsïni ima kʼuiripu engachi uéjka, xarhatachijka uékperakua ka felisitarintsïni ambe ma jimbo engachi sési újka. Juchari familia ka ístu kúnguarhikuarhu anapuechajtuksï uétarhinchasïndi eskachi xarhatakuauaka uékperakua ka eskachi uinhaperantauaka. Engachi ísï úska, jarhuatauakachi paraksï sánderu mintsikani Jeobani ka nóksï jurajkuni. Ka sánderu jukaparhakuesti eskaksï táticha uinhaperantauaka imecheri uájpechani ka mintsita jingonksï felisitariuani ka xarhatakuani uékperakua. Ísïksï jarhuatauati paraksï jánguarhintani xáni eskaksï xáni uáka. Arini uandakuecha jingoni “ji tʼungini jimbosïni xáni tsípini pʼikuarherajka”, Jeoba xarhataspti eska seguru jarhaspka eska Jesusi úpiringa ambe enga ima uéjka. Enga ima xáni mintsinharhienga imeri uájpani, juchajtuchi úaka meru seguru jarhani eska Jesusi kumpliriuauaka iámindu Jeobaeri aiatsperakuechani (2 Kor. 1:20). Engachi eratsijka Jesusiri ejempluni na enga kurhajchapka Jeobani, sánderuchi uékasïnga jorhenguarhini imeri ambe ka úni eska ima na úpka (1 Ped. 2:21). w19.03 8 párr. 3; 9 párr. 5, 6

Engajtsïni nema sési jásï ma regalu íntskujka, juchachi kánikua agradeserikusïnga. Peru israelitechaksï no jukaparharaspti imani libertadini enga Jeoba intsïkuarhiapka jiáni enga Ejiptu uératini petatantaapka paraksï nóteru jántspirinia. Máru kutsï tátsekua, uénasptiksï jirinhantani imani tʼirekuani engaksï Ejiptu arhenga ka nóteruksï jaiapanhintasptia ambe enga Jeoba íntsauenga. Astaksï uandaspti eskaksï uékasïrenga kʼuanhatsintani Ejiptu. Para imecha sánderu jukaparhakuespti kurucha, pepinu, sandia, puerru, seboia ka ajusï, ka eska libreeni para Jeobani kómarhini. Jimbosï Jeoba xáni ikiapti imecha jingoni (Núm. 11:5, 6, 10; 14:3, 4). I ambejtsïni jukaparhakua ambe jorhendasïndi. Apostuli Pablu pʼímarhiaspti kristianuechani paraksï jukaparharani imani libertadini engajtsïni Jeoba íntskuka imeri Uájpa Jesukristuni jimbo. (2 Kor. 6:1). w18.04 9 párr. 6, 7

Iáminduchi uékasïnga pʼikuarherani eskachi xénchanhasïnga ka eskachi jurhimbikua jingoni kánhasïnga. Engachi méntku úndaska no xénchanhani ka ísku jatinchi no sési kánhani, jamberichi nóteru jánhaskakia ambe úni ka eratsini eskachi no ma ambe marhuasïnga. Jeoba mítisti eskachi iáminduecha mintsita jingoni uékasïnga eskachi xénchanhaaka ka jurhimbikua jingoni kánhani (Sal. 33:5). Úakachi seguru jarhani eskajtsïni ima kánikua xénchasïnga ka eska uékasïnga eskachi jurhimbikua jingoni kánhaaka. Ka xarharasïndi imani Lei jimbo enga Jeoba ireta Israelini íntskupka Moisesini úraparini. Engachi jorhenguarhijka Moisesiri Leini, exesïngachi na engajtsïni xáni xénchajka juchari Tata Diosï (Roma 13:8-10). ¿Andichisï újki uandani eska Moisesiri Lei xarhatasïrenga Jeobaeri uékperakua? Jimboka Jeoba uékperakua jimbo úsïnga iámindu ambe (1 Juanu 4:8). Ima jukari seisientu mandamientuecha engaksï jindepka Lei, uaxastakataksï jarhaspti tsimani mandamientuecha jimbo engaksï kánikua jukaparhakuepka: xénchani Tata Diosïni ka xénchaani máteruechani (Lev. 19:18; Deut. 6:5; Mateu 22:36-40). Mándani arhini i juramukuecheri, jorhendasïndijtsïni ambe ma Jeobaeri uékperakueri. w19.02 20, 21 párr. 1-4

Jobu janhanharhikua jingoni kaasïrendi nanakechani (Job 31:1). Ima mítispti eska no jatsispka para xénchani nanakani ma enga no imeri témbepiringa. Irekaxakachi nani enga iápurisï ísku jándikueri ambe xarharajka. ¿Ísïchi uá eska Jobu ka nochi jámani xénchani nemani enga no juchari uarhiitiuaka o acheeti? ¿Jánguarhintaachi no exeni ikichakueni jásï ambe o ísku jándikueri ambe nani uéjki xarharani? (Mat. 5:28). Engachi pauani pauani pʼíngukuarhiska, sánderuchi uékaaka iámu mintsita jingoni marhuakuni Jeobani. Ístu, na enga exenga Jobu jatsikuarhikueri ambe, xarhatasïrendi eska kurhajchasïrenga Jeobani. Uandaspti eska jatsikuarhikuani ambe mintsinharhini, kánikua no sési japiringa enga jamberi uétarhipiringa paraksï juesicha kastigarini (Job 31:24, 25, 28). Iásï, irekaxakachi nani engaksï sáno iáminduecha tsitijka jatsikuarhikua ambe. Engachi no xáni jukaparharaska jatsikuarhikua ambe ni tuminani, ísï eskaksï Bibliaeri konsejuecha na arhijka, sánderuchi uékaaka iámu mintsita jingoni marhuakuni Jeobani (Prov. 30:8, 9; Mat. 6:19, 20). w19.02 6, 7 párr. 13, 14

Ambe enga xáni úpka Jesusi, sési xarhataspti na engajtsïni Jeoba xáni xénchajka (1 Juanu 4:8-10). Uékperakua, úspti eska íntspepiringa imeri tsípikuani juchantsïni jimbo. Ia sea engachi erakukateka o máteru karichicheri, marhuachisïndijtsïni uékperakua engajtsïni Jeoba ka imeri Uájpa xarhatachika ini sakrifisiu jimbo (Juanu 10:16; 1 Juanu 2:2). Ístu, ju je exeni na enga ini tánguarhikua jimbo, enga jindeka Tateeri Sena, Jesusi xarhatakuajka eska uékaasïnga ka kurhangukuani imeri disipuluechani. Eskachi na exekia, Jesusi no juramukuaspti erakukatechani eskaksï uánikua ambe úpiringa, sino sena májku. Eska na nitamaka tiempu, erakukatechaksï jatsisti para mándani uéxurhini miántani Jesusiri uarhikuani, ambe uéjkiksï nitamakuarhini jarhani, ménisï asta engaksï ónhakata jarhajka (Jaŋ. 2:10). ¿Úxakiksï úni ambe enga Jesusi juramukuapka? Jo. Ambakiti kristianuechaksï méntkisï jánguarhintasti para miántani tata Jesukristueri uarhikuani ka seguirixatiksï ísï úni. w19.01 24 párr. 13-15

Jurhimbikua ambe mítini úsïndi eskachi nóteru jántspiriuakia relijioni no jurhimbitiri, eskachi uánikua ambe mítiaka ka eskachi nóteru ísku ambe ma jakajkuakia. Ka no solu inde ambe. Sánderu orhepani uáti eskari jatsiaka libertadi “jimajkani engaksï Diosïri uájpecha xarhantaaka tʼíntskua jingoni” (Rom. 8:21). Peru asta iásïri uáka marhuatani imani libertadini engari jatsika. ¿Néna? No jurajkuni imani ambe enga tata Jesukristu uandapka, enga jindeka úni ambe enga ima jorhentpipka (Juanu 8:31). Ísïri mítiaka jurhimbikuani, no solu jimbokari jorhenguarhini jauaka, sino jimbokari ísï úni jauaka. Ini parhakpini jimbo enga asta ima ambe enga arhinhajka “ambakiti irekua ma jatsini” no ióni marhuasïndi. No nema mítisti ambe enga úkuarhiaka pauani (Sant. 4:13, 14). Ísï jimbo, sánderu sésisti imani ambe erakuni úni engakini jarhuataaka jatsini “tsípikua [para] méntkisï” (1 Tim. 6:19). Ísïsti, Tata Diosï no uékasïndi eskachi afuersa uáka indeni ambe. Mándani arhini jatsiskachi para erakukuarheni. Ísï jimbo, ú eska Jeobaeuaka engakini íntskuaka iámindu ambe. Jukaparhara iámindu ambakiti ambe engakini íntskujka (Sal. 103:5). Ka mintsika eska ima uáka eskari ambakiti irekua ma jatsiaka ka tsípikua jingoni para méntkisï (Sal. 16:11). w18.12 28 párr. 19, 21

Iámindu kristianuechachi jatsiska para jánguarhintani janhanharhini temungurhirikuani, ísï eska Jeoba ka Jesusi. Peru ménisïksï máru no ísï úsïndi jimbokachi no perfektueska (Rom. 7:18-23). Jimbojtsïnisï no ísku pakatajti engaksï primeru siglurhu, máru kristianuecha engaksï temungurhiripka jatsiauenga problemechani. Pablu karaspti eska “uarhiiti no jarharintaaka imeri uámbani”, peru jarhasptiksï máru engaksï ísï úpka (1 Kor. 7:10). Pablu no uandaspti andiksïsï jurajperapi máru temungurhiricha. Por ejemplu, problema no jindespti eska achati ísku jándikua ambe úpiringa, jimboka enga ísïpiringa uarhiiti jatsipirindi rasoni ma para diborsiarikuarhini ka ménderu uambuchantani. Pablu karaspti eska uarhiiti enga jurajkupiringa uámbani, no jatsispka para uambuchantani o eska mejori kúnguarhintapiringa uámba jingoni. Para Tata Diosï, seguirixaptiksï temungurhiri máeni. Apostuli arhiaspti temungurhirichani eska enga no nema ísku jándikua ambe úpiringa, eskaksï jánguarhintapiringa puátsperantani no arhiparini náki uéjki problemechanksï jatsiani. Tsimarhanksï úpirindi jarhuajperata kurhakuani orhejtsïkutichani. w18.12 13 párr. 14, 15

Ini jurhiatikuecha jimbo, Jeoba uékasïndi eskachi imeri amigueuaka ka jánguarhintanchi eianhpini xáni eskachi na xáni uáka (Mat. 28:19, 20; Sant. 4:8). Peru, úpirindi eska nema sési ambe uékaparini úni, arhiakajtsïni parachi máteru ambe úni. Por ejemplu, ju je eranhaskani eskajtsïni juchari jefi aiachesïnga ambakiti ánchikuarhita ma engachi sánderu meiamunhaaka. Peru iásï problema jindeuati eskajtsïni inde ánchikuarhita ójkutaaka parachi sési marhuakuni Jeobani. O engari tumbi máeka, eranhaska eskari intsïnhasïnga oportunidadi ma parari seguirini estudiarini. Peru parari ísï úni, jatsiakari para máteru nani ísï nirani irekani. ¿Jiániua parachi Jeobani kurhakuni jarhuajperata, inbestigarini publikasionicharhu inderi ambe ka uandontskuarhini máteruecha jingoni parachi erakuni ambe úni? ¿No sánderu sésipirini desde iásï exeni na eratsisïni Jeoba inderi ambe ka jánguarhintanchi juchajtu májkueni eratsini? Ísï jimbo, enga sánderu orhepani i ambe úkuarhiaka, no jindeuati tsʼéjkukua ma para jucha. Sésichi mítitini jauaka eskachi uékasïnga sánderu marhuakuni Jeobani ka seguru jarhani eskachi uékasïnga ísï úni. Ka últimu, imani ambechi uáka engachi mítika eska sési jarhaska. w18.11 27 párr. 18

Salomoni kánikua sapichuespti enga niárapka reini Israeli. Enga uénapkia juramuni, Jeoba tsánharhikua ma jimbo xarhakuspti ka arhispti eska kurhakupiringa ambe enga ima uékapiringa. Ka Salomoni arhispti eska apenasi tumbi sapichu máespka enga no jánhaskatipka, ísï jimbo, kurhakuspti ambakiti mintsita ma (1 Rey. 3:5-10). Inde ambe enga kurhakupka, xarhataspti eska kaxumbitispka. Jimbosï Jeoba xáni xénchendi (2 Sam. 12:24). Komu Jeoba xáni jeiapanhintapka ambe enga Salomoni kurhakupka, úspti eska Salomoni mímixekua ka jánhaskakua jingoni jámapiringa (1 Rey. 3:12). Mientrasi enga Salomoni kurhajchani japka Jeobani, uánikua kóntperatechani intsïnhaspti. Intsïnhaspti sésikua para templuni úni para Jeobaeri nombri, Israeliri Tata Diosï (1 Rey. 8:20). Salomoni kánikua mítikatespti imani mímixekua jimbo enga Jeoba íntskupka. Asta Tata Diosïri jarhuajperata jimbo, karaaspti tanimu libruechani engaksï Bibliarhu jaka, ma jindesti Proverbios. w19.01 14 párr. 1, 2

Máru kʼuiripuechaksï no jurajkusïndi eskaksï máteruecha eratsiaka imecha jimbo. Uandasïndiksï: “No uékasïnga eska nema eratsiaka jíndeni jimbo”. Jamberi, ambe engaksï arhikuekajka, jindesti eskaksï imecha mismu erakusïnga ambe úni, ka inde ambe no no sési jarhasti. Nóksï uékasïndi ísï pʼikuarherani eskaksï máteruecha arhiauaka ambe úni ni eskaksï májkueni exeauaka eska máteru kʼuiripuechani. Peru uákachi seguru jarhani eska jorhenguarhini ísï eratsini eska Jeoba, no arhikuekasïnga eskachi nóteru ambe ma uákia erakuni. Eska na arhijka 2 Korintu 3:17, “jima enga jarhajka juchari Tateeri Espiritu, jima nóteru nema jántspiristi”. Tata Diosïjtsïni íntskusti sésikua parachi erakuni na engachi jásï ma kʼuiripu uéjka jindeni ka para ambe engachi sánderu uéjka o tsitini. Ambe engachi kʼóru no uáka úni, jindesti ísï jámani enajkichi méntku iámindu ambe uá úni (1 Pedru 2:16). Engachi jatsiaka para exeni sini ambe ma sési jarhaski o nómbe, Jeoba uékasïndi eskachi úraaka ambe engajtsïni jorhendajka imeri Karakatarhu. w18.11 19 párr. 5, 6

Engachi jorhenguarhipka Jeobaeri ambe, sánderuchi jukaparharaspkia imeri ambe ka eska jatsikuarhikua ambe. Tsípikua jingonchi mójtakuspka ambe ma parachi úni jurhimbikuarhu jarhani. Peru tiempu jingoni, jamberichi exeaka eskaksï máteruecha kámaxaka sánderu jimbanhi aparatu ma oksï máteru jásï jatsikuarhikua ambe jatsini ka a lo mejorichi ísï exeni eskachi tsïtakuarhixaka ambe ma. Engachi nóteru konformi jakaia imani ambe jingoni enga meru uétarhijka, jamberichi niáraaka jurajkuni Jeobani solu para konseguirini sánderu jatsikuarhikua ambe. I ambejtsïni Demasiri ambe miátantasïndi. Ima xáni tsitispti “ini parhakpinirhu anapu ambe” enga nóteru pámbipkia apostuli Pabluni para aianhpini. Bibliajtsïni no aiangusïndi sini Demasi sánderu xénchaspi jatsikuarhikua ambeni ka eska Tata Diosïni marhuakuni, o sini nóteru uékaspkia jánguarhintani para Pablu jingoni marhuani. Ambe uéjki jimboeni, i ambejtsïni jorhendasïndi eskachi no jatsiska para ménderu uéntani tsitini jatsikuarhikua ambe, jimboka inde ambe uáka eskachi nóteru jukaparharaaka jurhimbikuani. w18.11 10 párr. 9

Satanasiri chkuanderakua jindespti para no sési útspini, jimboka sési mítitixapka eska enga Eba jakajkukupiringa, uarhipirindi enga apiringa frutani enga no jatsipka para arhani. Eba ka uámba, nóksï kurhajchaspti Jeobani ka tiempu jingoni, uarhisptiksï (Gén. 3:6; 5:5). Peru ambe enga sánderu no sésika, jindesti eska pekadu jimbo uarhikua pakaraska “para iámindu kʼuiripuecha”, ka asta para imecha jamberi engaksï no “pekadu úpka eska Adani na no janhanharhipka Tata Diosïni” (Rom. 5:12, 14). Kʼuiripuechaksï no úsïndi perfektu irekani para méntkisï, ísï eska Tata Diosï na uékenga desde uénakuarhu, sino jatsisïndiksï para konformarikuarhini engaksï niárajkia 70 jatirini o engaksï útasï jatsiaka uinhapikua, niáranksï 80 jatirini. Ka nájkirukaksï niáraaka xáni jatirini kánikuaksï uandanhiasïndi ka no sési ambeksï nitamanchani imecheri irekuarhu (Sal. 90:10). ¡Xáni no sési ambe! Ka i ambe niárasti jarhani Noambakitiri chkuanderakua jimbo. Enga Jesusi eksplikarini japka na enga jámajka Satanasi, uandaspti: “No jeiapanhintasïndi [ambe] enga ísïka jimboka no méni jurhimbitku uandasïnga” (Juanu 8:44). Ka útasï májkueni jámasïndi. Noambakiti seguirixati enganiariuani “iámindu parhakpini anapuechani” chkuanderakuaparini (Jaŋ. 12:9). Peru juchachi no uékasïnga eskajtsïni enganiariuaka. w18.10 6, 7 párr.1-4

Imecha engaksï újka eska kʼuiripu sési pájperaaka,jatsiastiksï ambakiti rasonichani paraksï felisiini, jimboka disipulu Santiagu karaspka: “Ima enga újka eska kʼuiripuecha sési pájperaaka, pínandikua jingoni úsïndiksï ambe enga sési uérajka para jurhimbitku jámani” (Sant. 3:18). Engachi problema ma jatsika kúnguarhikuarhu anapu ma jingoni, o familiari ma jingoni, ju je kómarhini Jeobani parachi úni sési péntani problemani. Jeobajtsïni íntskuati imeri espiritu santu parachi xarhataani kualidadichani ka parachi sánderu felisini. Jesusi someni uandaspti na enga xáni jukaparhakueka eskachi jucha uénaaka úni eska pínandikua jauaka enga uandapka: “Engari peeraka ma kéjtsïtakua altarirhu, ka jimari miántani eska chíti ermanuti ikiaxaka tʼungini jingoni, jurajku jima chíti kéjtsïtakuani altarirhu orhepani, ka ní orheta puátantani chíti ermanutini. Ka tátsekua kʼuanhatsinta ka íntspi chíti kéjtsïtakuani” (Mat. 5:23, 24). w18.09 21 párr. 17

Últimu chúri enga Jesusi imeri disipuluecha jingoni japka, sáno treinta xanhari úraspti uandakuani uékperakua. Arhiaspti eskaksï jatsispka para uékperani máteru ka máteruni jingoni (Juanu 15:12, 17). Inde uékperakua jatsipirindi para kánikua xarharani engaksï máteruecha exepiringa eskaksï meru Jesusiri chúxapatispka (Juanu 13:35). Inde jásï uékperakua enga Jesusi uandapka no solu pʼikuarherakua máesti, sino ambakiti kualidadi ma enga úkuecha jingoni xarharajka no ma ambe erokuarhiparini. Uandaspti: “No nema jarhasti enga sánderu uékpijka ka eska ima enga tsípikua íntspiaka imeri amigu jembechani jimbo. Chájtsï jindeska juchiti amiguecha engajtsï úska ambe engaksïni ji juramuchijka” (Juanu 15:13, 14). Iásï, imecha engaksï Tata Diosïni marhuakuni jaka, ménderuenistiksï jimbokaksï ambakiti uékperakua xarhatasïnga no ma ambe erokuarhiparini ka engaksï xáni sési májku kʼéri jaka (1 Juanu 3:10, 11). Jánguarhintasïngachi inde jásï uékperakua xarhatani no arhiparini nanichi anapueski, nákichi idioma uandasïni, o na engachi kʼuiriperanhaka. w18.09 12 párr. 1, 2

Jeoba erokuarhisïndi eskaksï imeri marhuaricha kuidariuauaka imecheri familiechani. Por ejemplu, máruksï jatsisti para ánchikuarhini paraksï úni kéndani imeri familiani. Uánikua nándichaksï jatsisti para kʼumanchikuarhu pakarani paraksï uájpechani tʼarhexeraani. Ka máru kristianuechaksï jatsisti para kuidariuani tátembechani engaksï jatirikia. I ambe jindesti enga meru uétarhijka para úni. Engachi jatsiaka máru i járhati responsabilidadichani, jamberichi no újka marhuakuni Jeobani xáni eskachi na xáni uékapiringa. Peru ju je no kuatantani. Tata Diosï sési exesïndi eskachi kuidariuaka juchari familiani (1 Kor. 10:31). ¿Ambechi uá úni engachi no jatsiaka xáni kʼérati responsabilidadichani familiarhu? Jamberichi uáka jarhuataani erachichani engaksï jatirikia, pʼamenchani jaka o imechani engaksï máteru ambe uétarhinchani jaka. Ístuchi úpiringa imechani jarhuataani engaksï ini erachichani kuidariuani jaka. ¿Andichisï no eratsiajki kúnguarhikuarhu anapuechani ka exenchi nénchi uá jarhuatani? Ísï úparini, úpiringachi Jeobani jarhuatani jarhani mókuantani i erachicheri kómarhikuechani (1 Kor. 10:24). w18.08 24 párr. 3, 5

Komu Jakobu Joseni sánderu xénchenga, imeri ermanu jembechaksï enbidia jimbo íntspikuarhispti komu jántspiri ma enga ima 17 ísï jatiripka (Gén. 37:2-4, 23-28). Jatsispti para trese uéxurhini tekantani komu jántspiri ma ka ónhakata jarhani jini Ejiptu, enga iauani japka jima uératini enga tátemba irekapka. ¿Ambe jarhuataspi Joseni no ikiani ni kuatantani? Enga Jose xáni no sési nitamakuarhini japka kárselirhu, seguru eska sánderu miáxapka eska Jeoba kuidarixapka (Gén. 39:21; Sal. 105:17-19). Ístu, ima profesiecha enga tsánharhiapka jiáni enga sánderu sapichuepka uinhaperantasptiksï imeri jakajkukuani (Gén. 37:5-11). Seguru eska uáni xanhari eiangukuarhispka Jeobani ambe enga xáni nitamakuarhini japka (Sal. 145:18). Ka Jeoba jarhuataspti para seguru jarhani eska imani jingoni japiringa ambe uéjki enga úkuarhipiringa. w18.10 28 párr. 3, 4

Ma ambe enga uáka úni eskachi ménderueni exeauaka máteruechani, jindesti tumina. ¿Néna uá kʼuiripueri jatsikuarhikua ambe o pobrikua, úni eskachi ménderueni exeaka imani kʼuiripuni? Espiritu santuni jimbo, Salomoni karaspti ambe ma enga ísïika ka engaksï kʼuiripu imperfektuecha újka, meru ísï eska iásï anapu tekstu na uandajka. ¿Ambechi jorhenguarhisïni i proberbiueri? Eska engachi no kuidadu jatsiska, uákachi imani erachichani jingontku kúnguarhini engaksï jatsikuarherika ka nochi uékani kúrhiani imechani engaksï no káni jatsikuarherika. ¿Andisï xáni peligrosue sánderu jukaparharaani máteruechani imani ambe jimbojku engaksï jatsika? Jimbokachi indeni ambe úparini, uákachi úni eska kúnguarhikua no májku kʼéri jauaka. Primeru siglurhu, disipulu Santiagu adbertirikuaspti eska inde problema máespka enga úni japka eskaksï kúnguarhikuecha no májku kʼéri japiringa (Sant. 2:1-4). Ju je no jurajkuni eska í ambe úkuarhiaka juchari kúnguarhikuarhu ka eskachi no jámaaka jusgarpini seguni ambe engachi exeaka. w18.08 10 párr. 8-10

Na engachi kaajka juchari erachichani, xarhatasïndi eskachi agradesidu jarhaska engachi ambakiti pájperakua ma jatsika Jeoba jingoni. Imechajtuksï Jeobaeristi. Engachi no méni mirikurhiska ini ambe, méntkisïchi sési kaauaka ka uékperakua jingoni (1 Tes. 5:15). Jesusi arhiaspti imeri chúxapatichani: “Ka ini jimboksï mítiati iámindu kʼuiripuecha eskajtsï jindeska juchiti jorhenguarhiticha engajtsï uékperaaka máteru ka máteruni jingoni” (Juanu 13:35). Jukaparhakuesti exeni eska Malakiasi uandasïnga eska Jeoba pendienti jarhasïnga ka kurhaani engaksï imeri marhuaricha sési pájperajka máteru ka máteruni jingoni (Mal. 3:16). Tata Diosï “mítiasti imerichani” (2 Tim. 2:19). Kánikua pendienti jarhasïndi iámindu ambe jimbo engachi uandajka ka úni (Ebr. 4:13). Engachi no sési káuaka juchari erachichani, Jeoba kuenta íntskukuarhisïndi. Peru ístuchi uáka seguru jarhani eska Jeoba kuenta íntskukuarhisïnga engachi puátsperantajka ka engachi sési kámpiaka, intsïmpitiini ka engachi uékperakua jingoni kámberaaka (Ebr. 13:16). w18.07 26 párr. 15, 17

No nema jarhasti enga sánderu uinhapika, janhaskatiini ka uékpitiini eska juchari Tata Diosï. Jimbochisï jatsika para imani andarherani o no jurajkuni ka eskachi imeri parti jimbo jauaka (Sal. 96:4-6). Peru nájkiruka ísïka, máru Jeobaeri marhuarichaksï jurajkusti, jiáni enga sánderu uétarhenga eskaksï no jurajkupiringa Jeobani. Ju je exeni Kainiri ambe. Ima ísï exesïrendi eska solu Jeobantku kómarhisïrenga ka no máteru diosïni. Peru Jeoba no jaiapanhintasïrendi Kainiri kómarhikuani, jimboka exesïrenga eska Kainiri mintsitarhu no sési jásï ambe jarhaspka (1 Juanu 3:12). Jimbosï arhipti Kainini eska ima jaiapanhintapiringa enga mójtakurhipiringa ka imani ambe úni enga sési japka. Peru adbertirikuspti eska enga no mójtakurhipiringa, pekadu seguirini japiringa no sési ambe uékani úrani. Tátsekua kurhamarhispti: ‘¿Uári pʼíngukuarhini?’ (Gén. 4:6, 7). O sea, Jeoba arhixapti eska enga moantapiringa ka imeri parti jimbo jarhani, Jeobajtu Kainini jingoni japiringa. Peru Kaini no kurhajchaspti Jeobani. w18.07 17, 18 párr. 1, 3, 4

Reinueri ambe eianhpini ka disipulu uáni, ambe máesti enga újka eska meremerejkuaka juchari tʼíntskua (Mat. 28:19, 20). Ístu, juchari ambakiti jángua jingonchi úsïnga kʼéri ambe arhini Jeobani. Engachi predikarini jarhajka, kʼuiripu exesïndi na engachi jámajka. Engachi tsípikuauaka ka sési uandajpaani, sési ambeksï uandaati juchari ambe ka imani Tata Diosïri engachi marhuakujka. Jesusi arhiaspti imeri chúxapatichani: “Engajtsï inchaakuni jámaaka kʼumanchikuarhu, uandajpauakajtsï iáminduechani” (Mat. 10:12). Jimesïsï engaksï imecha predikariuenga, normalispti eska kʼuiripu pʼímarhipiringa inchaakuni kʼumanchikuarhu nemani enga no mítipiringa. Jamberi jimesïsï engachi jucha irekaka, no jati i pʼindekua. Ka uánikua kʼuiripu chésïndi o asta ikiani enga nema engaksï no mítika, kústajka imecheri puertarhu. Peru engachi sési uandajpauaka, jamberiksï nóteru xáni chéatia. Uánikua xanhari, kánikua jarhuajpesïndi tsípikuani. Ka májkuenisti engachi xanharu jimbo eianhpini jauaka karrituecha jingoni. Exesïngachi na enga jarhuajpijka sési uandajpaani kʼuiripuechani ka tsípikuani. w18.06 22 párr. 4, 5

Apostuli Pedru pʼindespti solu judiuecha jingoni kúnguarhini. Peru enga Jeoba xarhatapka eskaksï kristianuecha jatsispka para iáminduechani sési kaani, Pedru soldadu romanuni ma predikarikuspti enga Korneliu arhinhenga (Uku. 10:28, 35). Jiáni uératini, uénaspti tʼireni ka májku kʼéri jarhani jakajkuticha jingoni engaksï no judiuepka. Peru máru uéxurhini tátsekua, nóteru uékasïrendia tʼireni máru kristianuecha jingoni engaksï no judiuepka jini Antiokia (Gal. 2:11-14). Jiáni, Pablu jurhimberantaspti Pedruni ka ima jiókuarhispti imani ambe. ¿Nénachi mítiski eska jiókuarhispka? Jimboka enga Pedru primeru karta karakuapka kristianu judiuechani ka ístu no judiuechani Asia Menor anapuechani, uékperakua jingoni uandaspka iámindu erachicheri ambe (1 Ped. 1:1; 2:17). Seguru eska Jesusiri ejemplu jingoni, apostulichaksï jorhenguarhispka uékaani iámindu jásï kʼuiripuechani (Juanu 12:32; 1 Tim. 4:10). Nájkirukaksï tiempu uétarhinchapka, úsptiksï mójtakukuarhini ka uékaani iáminduechani. Engaksï primeru kristianuecha na mójtakurhipkia, niárasptiksï iámindu kʼuiripuechani ísï exeani eska Jeoba na exeajka (Kol. 3:10, 11). w18.06 11 párr. 15, 16

Primeru siglurhu, ma jásï korasa engaksï soldadu romanuecha jukenga, lámina tiámueri jingoni úkata jarhaspti. Kánikua jukaparhakuepti eska soldadu seguidu exeni japiringa eska korasa sési japiringa paraksï no atani mintsitarhu o máteru nani ísï enga jimbo úpiringa uarhini. Tata Diosïri juramukuechaksï sési terokuntasïndi korasa jingoni, na engaksï kuájchakujka imani ambe enga juchari mintsitarhu jaka (Prov. 4:23). Ísï eska soldadu ma na no mójtakupiringa korasa tiámuerini ma, imani korasa jingoni enga no xáni ambakiti materiali jingoni úkata japiringa, juchajtuchi no jatsiska para mójtakuani Tata Diosïri juramukuechani, imani ambe jingoni engachi jucha eratsijka. Nochi xáni jánhaskatiska para úni kuájchakuni juchari mintsitani (Prov. 3:5, 6). Jimbosï xáni jukaparhakueti eskachi méntku exeni jauaka eskaksï Jeobaeri juramukuecha, kuájchakuaka imani ambe enga juchari mintsitarhu jaka. Engachi sánderu jukaparharaska jurhimbikuani, sánderu fásiliuati jukani korasa jurhimbikuerini, o sea, ísï irekani eskaksï na arhijka Tata Diosïri juramukuecha (Sal. 111: 7, 8; 1 Juanu 5:3). w18.05 28 párr. 3, 4, 6, 7

Nájkiruka Moisesi ióni orhejtsïkuapkia israelitechani, kʼuiripu uénaspti no sési uandani, jimbokaksï no jatsispka itsï ka ístuksï no sési uandaspti Moisesiri ambe, enajki imeri kulpepi engaksï no jatsipka itsï (Núm. 20:1-5, 9-11). Enga inde ambe úkuarhini japka, ikiatapu úspti eska Moisesi no kaxumbipiringa. Enbesi de mintsikaparini uandajpani kʼerendani, ísï eska Jeoba na arhipka, kurhurjaxeparini uandajpaaspti israelitechani ka arhiaspti eska milagru ma úpiringa. Jiájkani, tsimani xanhari uanharhitaspti kʼerendani ka kánikua itsï uéraspti. Enga ísï ikiapka ka kʼéramakurhini, niáraspti úni ambe ma enga kánikua no sési japka (Sal. 106:32, 33). Enga ma ratitujku no kaxumbipka, Jeoba no jurajkuspti inchani imani Echerirhu engaksï Aiaminhapka (Núm. 20:12). ¿Ambe ambakiti ambechi jorhenguarhisïni ambe enga Moisesi úkuarhinchapka? Ma ambe jindesti eskachi jatsiska para seguirini jarhani jánguarhintani kaxumbitini. Engachi ma ratitujku no jingontku jarhaska, úakachi sóntku ikiani ka uandani o úni ambe ma enga no sési jaka. Máteru ambe, engachi jukari uandanhiani jauaka, úkua jukaati kaxumbitini, ísï jimbo, ju je jánguarhintani nájkirukachi jukari uandanhiani jauaka. w19.02 12, 13 párr. 19-21

¿Karga máeua para jucha kumplirini Jesusiri juramukuani de eianhpini? Nómbe. Enga na ubasïri ambe uandapkia, Jesusijtsïni asegurarichispti eskachi májkueni jásï tsípikuarhita jatsiaka eska ima engachi eianhpiska Reinueri ambe (Juanu 15:11). ¿Andi? Jimboka Jesusi ísï terokutakuarhispka komueska ubasïri planta ma ka uandaspti eskaksï imeri disipuluecha ramechespka (Juanu 15:5). Ramechaksï itsurhisïndi plantarhu uératini itsï ka nutrientichani mientrasi engaksï jima jukaxkurhitini jauaka. Sáno májkueni, juchajtuchi ísï tsípini pʼikuarheraaka eska Jesusi enga újka ambe enga imeri Táti uéjka, mientrasi engachi no méni jurajkuska Jesusini ka chúngumanchi imeri ejemplu (Juanu 4:34; 17:13; 1 Ped. 2:21). Hanne, pirenchi ma enga jukari kuarenta uéxurhini prekursorekia, uandasïndi: “Tsípikuarhita engani pʼikuarherajka engani kʼamarajkia eianhpini, úsïndi eskani seguiriuaka marhuakuni Jeobani”. Ísïsti, i tsípikuarhita uinhaperantasïndijtsïni parachi seguirini predikarini, asta territoriuecharhu engaksï úkua jukaka (Mat. 5:10-12). w18.05 17 párr. 2; 20 párr. 14

Apostuli enga sánderu ambe úpka para uinhaperantaani imeri ermanuechani, jamberi Pabluepti. Espiritu santu úspti eska apostuli Pablu nipiringa grieguechani ka romanuechani eianguani engaksï uánikua diosïchani kómarhiauenga (Gal. 2:7-9). Pablu iámu jimesï jámaspti enga iásï ísï mítikatekia komu Turquía ka ístu Grecia ka Italia ísï ka uáspti kúnguarhikuechani kʼuiripuecheri engaksï no judiuepka. Ima jimbanhi kristianuechaksï uétarhinchasïrendi eskaksï uinhaperanhantapiringa jimbokaksï imecheri mísmu iretarhu anapuecha no sési kaasïrenga (1 Tes. 2:14). Uéxurhini 50 jimbo ísï, Pablu karta ma karakuspti jimbanhi kúnguarhikua Tesalonika anapuni ka arhiaspti imeri erachichani: “Jucha méntkisï diosmeiamukua arhisïnga Diosïni iámindu chánksïni jimbo. Ka méntkisï engachi kómarhijka, miántasïngaksïni kómarhijpichini, jimbokachi presenti pásïnga Diosï juchari Tátini japarini, na engajtsï xáni sési ánchikuarhini jaka Diosïni mintsikaparini, ka ístu sési marhuakuntsï jarhani Diosïni” (1 Tes. 1:2, 3). Ka ístu arini juramukua íntsaaspti: “Mintsita jatsikpera je, ka uinhaperperantani máteru ka máteruni jingoni” (1 Tes. 5:11). w18.04 18, 19 párr. 16, 17

Uátsï ma o tumbi ma jatsisti para kánikua jukaparharani eianhpikuani enga uéjka eska Jeoba jaiapanhintaaka. Eskari na exejka, eianhpikua, ambe máesti engari jatsika para orheta peerani. Ísï jimbo, ¿ménisïri eratsiskia sánderu seguidu uérani eianhpini o asta prekursoriini? Peru engari no káni tsitijka eianhpini, ¿amberi uá úni? Ka ¿ambekini jarhuataa parakini sánderu sési nicheni engari Jeobaeri ambe eianhpiaka? Ú ini tsimani ambe: sési prepararikuarhi ka méntkisï eiangua máteruechani ambe engari mítika. A lo mejoriri ísku pakaraaka engari exeska na engari xáni sési pʼikuarheraaka. Orheta, prepararikuarhi parari mókukuantani chíti kompanieruechani engaksïni kurhamarhiska ambe ma, komu andirisï jakajkujki Tata Diosïni. Juchari pájina Internetirhu jw.org/tsz ka máteru publikasionicharhu, jarhastiksï artikuluecha para jarhuataani tumbiichani mókuantani máru kurhamarhikuechani engaksï sánderu únhajka. Jimini, jarhuataatikini preparariuani mókuntskuechani para kurhamarhikuecha komu: “¿Jakajkusïniri Tata Diosïni?”. w18.04 27 párr. 10, 11

Nájkirukaksï uénani jámani Adani ka Eba kánikua libertadi jatsipka, Jeoba jatsikukuaspti máru límitechani. Para imecha, máruksï normalispti. Por ejemplu, paraksï no uarhini, jatsisptiksï para jirejtani, tʼireni, kʼuíni ka máteru ambe. Peruksï no eratsisïrendi eska i ambe úsïrenga eskaksï nóteru xáni librepiringuia, jimboka Jeoba asegurarikuarhispka eskaksï agustu japiringa asta engaksï ini ambe úpiringa (Sal. 104:14, 15; Ecl. 3: 12, 13). Jeoba juramukuspti Adani ka Ebani eskaksï uinirapiringa Echerini ka kuidarinksï. ¿Úspi i juramukua eskaksï nóteru xáni librepiringuia? Nómbe. Ini ambe jingoni, Tata Diosï íntsaaspti sésikua iáminduechani paraksï jarhuajpini paraisu ma úni Echerini nani engaksï iáminduecha irekapiringa para méntkisï (Sal. 127:3; Is. 45:18). Eskachi na exejka, Adani ka Ebaksï úpirindi méntkisï sési irekani temungurhirini ka uájpecha jingoni. w18.04 4, párr. 7, 8

Engachi tekantaaka kʼuiripuecha jingoni, nochi erokuarhiaka eskaksï jirejiresï kurhanguaka o jiókuarhini ambe enga Biblia jorhentpijka. Por ejemplu, ju je eratsini ambe enga Biblia aiatspijka para irekani méntkisï Paraisurhu ma ixú Echerirhu. Uánikuechaksï jakajkusïndi eska iámindu ambe jima kʼamakurisïnga enga ma uarhijkia ka máteruksï eratsisïndi eskaksï ambakiti kʼuiripuecha auandarhu nirasïnga. Erachi ma uandasïndi ambe enga ima újka. Orheta, arhintasïndi Génesis 1:28 ka kurhamarpini, nani ka néna uékasïreni Tata Diosï eskaksï irekapiringa kʼuiripuecha. Sáno iáminduechaksï mokuntasïndi eska Echerirhu ka tsípikua jingoni. Tátsekua, erachi arhikuantasïndi Isaías 55:11 ka kurhamarpisïndi sini Tata Diosï seguirini jaki májkueni eratsini. Kʼuiripuechaksï uandasïndi eska jo. Últimu, arhikuantasïndi Salmo 37:10, 11 ka kurhamarpisïndi: “Eska na arhijka Biblia, ¿nénaksï irekaa kʼuiripuecha sánderu orhepani?”. Ini kurhamarhikuecha jingoni, ústi eskaksï uánikua kʼuiripuecha kurhanguaka eska Tata Diosï seguirixaka uékani eska ambakiti kʼuiripu irekaaka para méntkisï Paraisurhu ma ixú Echerirhu. w19.03 24 párr. 14, 15; 25 párr. 19

Jeoba uandaspti eska uékasïnga eskachi kurhajchaaka ka úni ambe enga imeri Uájpa uandajka. Jesusi jorhendaaspti imeri chúxapatichani paraksï nirani uandantani ambakiti ambe Reinueri ka someni arhiaspti eskaksï jingontku japiringa (Mat. 24:42; 28:19, 20). Ka ístu méntku úndaspti arhiani eskaksï jánguarhintapiringa xáni eskaksï xáni úpiringa ka eskaksï no kuatantapiringa (Luk. 13:24). Ístu arhiaspti eska uétarhisïrenga eskaksï uékperapiringa iáminduecha, márku jarhani ka eskaksï úpiringa ambe enga ima juramukuapka (Juanu 15:10, 12, 13). Ísïsti, ima konsejuechaksï iásï jamberi májkueni marhuaxati. Jesusi uandaspti: “Iámindu ima enga tsitijka enga sési jimboeka kurhajchasïndirini” (Juanu 18:37). Xarhatasïngachi eskachi kurhajchasïnga ambe enga ima uandajka engachi újka ísï eska i konseju na arhijka: “Tekatsperanta je ka puatsperantani” (Kol. 3:13; Luk. 17:3, 4). Ístuchi ísï úsïnga engachi tsípikua jingoni aianhpijka Tata Diosïri ambe jiáni engachi agustu jarhajka ka ístu engachi no sési nitamakuarhini jarhajka (2 Tim. 4:2). w19.03 10 párr. 9, 10