Abrili

¿Ka juchaia? ¿Ísïchi eratsisïni eska Tata Diosï o eska kʼuiripuecha? Seguru eskachi úni jakaia ambe enga Jeoba uéjka. Peru ¿nénachi eratsisïni? ¿Jánguarhintaxakichi ísï exeni ambe ma eska Jeoba na exejka? Parachi ísï úni, uétarhisïndi eskachi kánikua jánguarhintaaka. Peru fásilisti ísï eratsini eska Satanasiri parhakpini jimboka iápurisï jarhaska inde jásï eratsikua (Efes. 2:2). Ístu, ísï eratsini eskaksï kʼuiripuecha engaksï no marhuakujka Jeobani uáti ísï xarharani eska sési ambeska, jimboka úsïnga eskachi juchajkumindu pendienti pákuarhiaka. Ini ambe jimbo, úkua jukasïndi ísï eratsini eska Jeoba, peru fásilisti ísï eratsini eska kʼuiripuecha engaksï no marhuakujka imani. Engachi jurajkuska parachi ísï eratsini eska kʼuiripuecha, pʼindeakachi juchajkumindu pendienti pákuarhini ka uékanchi uandani ambe sési jarhaski ka ambe nómbe (Mar. 7:21, 22). Jimbosï xáni jukaparhakueti eskachi jorhenguarhiaka ísï eratsini eska Jeoba ka no ísï eska kʼuiripuecha. w18.11 18 párr. 1; 19 párr. 3, 4

Jesusi kánikua uinhapintapti míteni eska Jeoba jeiapanhintasïrenga enga tanimu uelta uandapka auandarhu uératini. Enga Jesusi na itsï atakuarhipkia ríu Jordanirhu, Jeoba ini ambe uandaspti ambe enga iásï anapu tekstu arhijka. Aparti de Jesusi, solu Juanu el Bautista kurhaspti imani uandakuechani. Masi o menusi ma uéxurhini ante de Jesusi uarhini, tanimu imeri apostulichaksï kurhaaspti Tata Diosïni enga uandapka: “I jindesti juchiti uátsï engani ji xáni uékajka ka engani jimbo xáni tsípikuarhijka, kurhajcha je” (Mat. 17:5). Últimu, Jeoba ménderu uandajpaspti imeri Uájpani auandarhu uératini máru jurhiatikua ante de Jesusi uarhini (Juanu 12:28). Jesusi mítispti eska ísï uándikunhapiringa komueska nema enga no sési ambe uandajka Tata Diosïri, ambe ma enga no ísïpka. Nájkiruka ísï uándikunhapiringa, kómarhispti eska Jeobaeri eratsikua úkuarhipiringa ka no ambe enga Jesusi uékenga (Mat. 26:39, 42). Ima ‘tekaantasti [...], no kasu úparini indeni kʼuratsekua ambeni enga arhinhapka’ ka no uékaspti eska parhakpini anapuecha jeiapanhintapiringa, sino eska imeri Tátijku jeiapanhintapiringa (Ebr. 12:2). w18.07 10, 11 párr. 15, 16

Enga na uaxastapkia Tateeri Senani, Jesusi xarhataspti eska kánikua balori jukaspka. ¿Néna? Úspti ambe enga Tata Diosï uékenga, nájkiruka mítipka eska indeni ambe jimbo no sési nitamakuarhepiringa, jimboka arhinhapiringa eska no sési ambe uandaspka Tata Diosïri ambe ka uándikunhapirindi (Mat. 26:65, 66). No méni jurajkuspti Jeobani ka kʼéri ambe arhispti imeri nombrini, uandaspti eska Tata Diosïjkusï jukanchaka para juramuni ka ústi eskaksï kʼuiripuecha engaksï moantaaka imecheri pekaduecheri, jatsiaka tsípikua para méntkisï. Ístu, preparariuaspti imeri chúxapatichani paraksï úni orhepani uérani imani ambe jimbo engaksï sánderu orhepani nitamakuarhepiringa. Ístu Jesusi xarhataspti balori enga no imeri uandanhiatechani eratsiani japka, sánderu sési, jingontku jarhaspti ambe engaksï imeri apostulicha uétarhinchenga. Enga arhipkia Judasïni eska uéntapiringa jima engaksï japka, no uánikua ambe úparini uaxastaspti Tateeri Senani, enga miátantaapiringa imeri chúxapatichani engaksï erakukatepiringa, na enga xáni marhuapiringa Jesusiri iurhiri ka ístu jimbanhi pakatperakuarhu jarhani (1 Kor. 10:16, 17). w19.01 22 párr. 7, 8

Jeoba auandarhu uératini mókukuntaspti Jesusini: “Úskania eska kʼéri ambe arhinhaaka ka ménderuni ísï úaka”. Ambe enga Jesusini uandanhiatani japka, jindespti eska kʼéri responsabilidadi ma jatsispka para kurhajchani Jeobani. Mítispti eskaksï kʼuikirhipiringa ka uándikuni (Mat. 26:38). Peru ambe enga sánderu jukaparharenga, jindespti Táti jemberi nombrini pímbinhajkuntani. Uandanhiaxapti enga imeri uarhikua jimbo no sési pakatapiringa Tata Diosïri nombrini, jimbokaksï arhispka eska ima no sési ambe uandaspka Tata Diosïri ambe. Májkueni eska Jesusini, jamberijtsïni juchantsïntu uandanhiatajti eska Tata Diosïri nombri no sési exenhaaka. Jamberichi no sési kánhaaka, ísï eskaksï Jesusini na kámapka. O jamberichi uandanhiajka engaksï máru kʼuiripuecha chkuaderakua ambe etsakujka juchari ambe. Jamberichi eratsijka na engaksï xáni no sési pakatajka Jeobani. Peru i ambejtsïni no jatsisti para uandanhiatani. Engachi ini ambe nitamakuarhini jauaka, kánikuajtsïni sési pʼikuastantasïndi ambe enga Jeoba arhipka Jesusini. Jeoba méntkisï pímbinhajkuntaati imeri nombrini (Sal. 94:22, 23; Is. 65:17). w19.03 11, 12 párr. 14-16

Jesusiri chúxapatichaksï no úsïrendi jakajkuni ambe engaksï kʼamarapka kurhani. Mintsikaxaptiksï eska Jesusi sési péntapiringa Israeli anapu juramukuani, peru ima arhiaspti eska no sési kánhapiringa ka uándikunhani. Ka apostuli Pedru arhispti: “Pʼamojkukuarhi Tata, nóminduri ísï úkuarhinchaaka”. Peru Jesusi mókukuspti: “Késtakuchirini ixú Satanasi, tʼurini uékasïnga terongutani, jimbokari tʼu no eratsisïnga indeni ambe enga Diosïrika sino solu enga kʼuiripuecherika” (Mat. 16:21-23; Uku. 1:6). Ísï úparini, Jesusi xarhataspti na enga eratsijka Tata Diosï ka na enga ménderueni eratsijka Satanasiri parhakpini (1 Juanu 5:19). Ambe enga Pedru arhipka Jesusini, xarhataspti na engaksï eratsijka kʼuiripuecha. Peru Jesusi sési mítitixapti eska Jeoba ménderueni eratsisïnga. Ambe enga Jesusi arhipka Pedruni, xarhataspti eska no sáni uékasïrenga ísï eratsini eska kʼuiripuecha jimboka ísï exesïrenga ambe ma eska Tátemba. w18.11 18 párr. 1, 2

¿Ambe exesïni Jeoba engaksï uánikua kʼuiripuecha tánguarhintajka interu parhakpinirhu para Tateeri Senani miántani? No solu exesïndi eskaksï uánikua jarhasïnga, sino mándani kʼuiripuni enga jima jarhajka. Por ejemplu, exeasïndi imechani engaksï mándani uéxurhini nirajka. Máruksï jamberi nirajti nájkirukaksï kánikua no sési kánhajka. Máteruechaksï no méntkisï nirasïndi tánguarhikuecharhu, peruksï exesïndi eskaksï jatsiska para nirani Konmemorasionirhu. Ístu, Jeoba exeasïndi imechani engaksï primeru xanhari uénajka nirani, jamberi jimbokaksï uékasïnga exeni néna úkuarhisïni. Seguru eska Jeoba sési pʼikuarherajka engaksï xáni uáni kʼuiripuecha nirajka Konmemorasionirhu (Luk. 22:19). Peru para Jeoba, ambe enga sánderu jukaparhakueka jindesti andiksïsï nirajki. ¿Kánikuachi tsitisïni eskajtsïni Jeoba jorhendaaka ka ístu organisasioni enga ima úrajka? (Is. 30:20; Juanu 6:45). w19.01 26 párr. 1-3

Jesusi no solu imeri chúxapatichani jimbo uarhisti, sino pauani pauani, orheta imeri disipuluecheri ambe jimbo uandanhiasïrendi ka no imeri ambe jimbojku. Por ejemplu, nájkiruka kuataratini japka ka kánikua uandanhiani jarhani, tánguarhintaspti imecha jingoni (Luk. 22:39-46). Ka sánderu eratsisïrendi ambe enga úpiringa íntsaani máteruechani ka no ambe enga úpiringa intsïnhani (Mat. 20:28). Imani kúnguarhikua jimbochi jarhaska engaksï jurhimbiti kristianuecha jaka ka tsípikua jingonchi úrasïnga juchari tiempuni para kʼuiripuechani pʼímarhiani, paraksï imechajtu andaparhakuni kúnguarhikuarhu. Peru sánderuchi uékasïnga jarhuaatani “imechani engaksï Diosïri kʼumanchikuarhu anapueka”, peru engaksï nóteru nirajkia tánguarhikuecharhu ni aianhpini (Gal. 6:10). Uékperakuachi xarhatakuasïnga engachi pʼímarhiajka paraksï ménderu jurhani tánguarhikuecharhu, sánderia paraksï nirani Konmemorasionirhu. Ísï eska Jeoba ka Jesusi, juchajtuchi kánikua sési pʼikuarheraaka engachi exeaka eska nema enga nóteru tánguarheguia, ménderu kʼuanhatsintaska Jeoba jingoni (Mat. 18:14). w19.01 29 párr. 12, 14; 30 párr. 15

Enga Jesusi uaxastapka para miánhantani imeri uarhikua, solu kurhinda no xarhiperakua jukari úraspti ka binu enga Paskua jimbo pakarapka. Arhiaspti imeri apostulichani eska ima tsimani ambe engaksï úrapka, arhikuekasïrengaksï imeri kuerpu perfektu ka imeri iurhiri, enga no ióndani íntspepiringa imechani jimbo. Apostulichani no ísku pakataapti enga imani sena jimbo no uánikua ambe uétarhipka para úni. ¿Andi nómbe? Máru mesi antesi, enga Jesusi imeri amiguechani pʼorhembiani japka, Lasaruni, Martani ka Mariani, uénaspti jorhendaani. Nájkiruka Marta kʼumanchikuarhu japka, masi arhixapti tʼirekua úmantani enga kánikua úkua jukapka, para ima kʼuiripu enga kʼéri ambepka. Peru Jesusi uékperakua jingoni arhispti eska no méntkisï uétarhisïrenga kʼéri tʼirekua ma úmantani (Luk. 10:40-42). Tátsekua, enga sánderku kueratani japkia para imeri tsípikuani íntspini, úspti ambe enga Martani arhipka. Prepararispti tánguarhikua ma enga no uánikua ambe uétarhipka. w19.01 20, 21 párr. 3, 4

Jeoba xarhatakuspti eska jeiapanhintaspka, úparini ambe ma enga Jesusi no erokuarhenga. Tsítantasti ka ústi eska “kʼéri ambeuaka”. Ístu, íntskuspti ambe ma enga nótki nema intsïnhani japka imani tiempuni: tsípikua ma auandarhu enga no méni uarhiaka (Filip. 2:9; 1 Tim. 6:16). ¡Xáni kʼéri kóntperata ma enga no méni jurajkuka Jeobani! ¿Ambejtsïni jarhuata no jirinhani kʼuiripuecheri jeiapanhintskua? Miáni eska Jeoba méntkisï kóndiantaasïnga imechani engaksï no méni jurajkujka ka eska someni íntsaasïnga imani ambe engaksï no erokuarhini jarhajka. Nochi mítiska nénajtsïni kóndinta Jeoba sánderu orhepani. Mientrasi engachi aguantariuaka i parhakpini anapu problemechani, ju je méntkisï miáni eska parhakpini ka ístu kʼuiripuecheri jeiapanhintskua, nóteru ióndanksï kʼamajkunhaakia (1 Juanu 2:17). Juchari Táti uékpiti Jeoba, jurhimbitku jámasïndi ka no mirikurhisïndi ambe engachi újka ni uékperakuani engachi xarhatajka imeri nombri jimbo (Ebr. 6:10). Ísïsti, imajtsïni kóndintaati, jamberi imani ambe jingoni engachi iáiasï ni sikiera eranhaskajka. w18.07 11 párr. 17, 18

Últimu senarhu imeri apostulicha jingoni, Jesusi uandanhiaxapti nénaksï úpirini seguirini májku kʼéri jarhani. Enga kómarhini japka, uandaspti eska uékasïrenga eskaksï iámindu imeri chúxapaticha májku kʼéri japiringa, ísï eskaksï na jaka Jesusi ka imeri Táti (Juanu 17:20, 21). Engaksï disipuluecha májku kʼéri japiringa, xarhatapirindiksï eska Jeoba axaspka Jesusini Echerirhu. Inde uékperakua, xarhatapirindi eskaksï sési jimbo Jesusiri chúxapatispka ka inde ambe úpirindi eskaksï májku kʼéri japiringa (Juanu 13:34, 35). Ima chúri, Jesusi someni uandaspti eska kánikua jukaparhakueska májku kʼéri jarhani, jimboka exespka eskaksï apostulicha kueratanchasïrenga sési pájperani. Arhirperasptiksï “aberi né sánderu kʼéri ambepirini”, ka no ima primeru xanharispti (Luk. 22:24-27; Mar. 9:33, 34). Máteru xanhari, Santiagu ka Juanu arhisptiksï Jesusini eska íntsaapiringa imani lugarichani engaksï sánderu jukaparhakuepka imeri Reinurhu (Mar. 10:35-40). w18.06 8 párr. 1, 2

Jeoba uékasïndi eskaksï temungurhiricha kánikua xénchperaaka paraksï méntkisï márku jarhani (Mat. 19:3-6). Ísku jándikua ambe niátani ambe máesti enga sánderu no sési jaka. Jimbosï séptimu mandamientu uandendi eskaksï no jatsispka para indeni ambe úni (Deut. 5:18). Ísku jándikua ambe niátani májkuenisïndi komu no kurhajchani Tata Diosïni ka kánikua no sési úkusïndi témbani o uámbani enga no kulpa jatsijka (Gén. 39:7-9). Ka kánikua úkua jukasïndi paraksï úni mirikurhini indeni ambe. Ístu, Jeoba uékasïndi eskaksï sapiicha sési jauaka. Ima no solu arhiaspti tátichani eskaksï kéndaapiringa iámindu ambe, sino ístu eskaksï jorhendaapiringa Tata Diosïri ambe. Jatsisptiksï para méntkisï jorhendaani jukaparharaani mandamientuechani ka paraksï xénchani Jeobani (Deut. 6:6-9; 7:13). Israelita ma no jatsispti para ísï exeni uájpani komu ambe ma enga no uétarhienga kuidarini o enga úpiringa no sési kámani, sino komueska Jeobaeri intsïmperakua ma enga jatsipka para uékperakua jingoni kuidarini (Sal. 127:3). w19.02 21 párr. 5, 7

Jobu méntkisï miáspti eska Tata Diosï íntsaapiringa kóntperatechani. Ima seguru jarhaspti eska Jeoba jukaparharasïrenga eska iámu mintsita jingoni marhuakupiringa. Nájkiruka tsʼéjkukuechani nitamakuarhiapka, mintsikasïrendi eska Jeoba íntsaapiringa kóntperatechani ka i ambe jarhuataspti iámu mintsita jingoni marhuakuni. Jeoba xáni jeiapanhintaspti Jobuni enga kʼéri kóntperata ma íntskupka, nájkiruka no perfektuepka (Job 42:12-17; Sant. 5:11). Ka sánderu orhepani, sánderu kʼérati kóntperatechani intsïnhauati. Juchari Tata Diosï seguirixati májkuenini (Mal. 3:6). Miáni eska ima jukaparharasïnga eskachi iámu mintsita jingoni marhuakuaka, jarhuatatijtsïni mintsita jingoni seguirini jarhani mintsikani ambakiti ambe enga úkuarhiaka sánderu orhepani (1 Tes. 5:8, 9). Jamberichi ménisï ísï pʼikuarheraaka enajkichi juchajkue engachi uéjki ísï úni. Peru nochi jandiajku jarhaska. Interu parhakpinirhu, uáni erachichaksï jarhasti engaksï ístu jánguarhintajka iámu mintsita jingoni marhuakuni Jeobani. Ístu, kuenta úkuarheakachi imecha jingoni engaksï ióntki kʼéri jakajkukua ma xarhatapka ka iámu mintsita jingoni marhuakuni Jeobani, nájkirukaksï niárapiringa uándikunhani (Ebr. 11:36-38; 12:1). w19.02 7 párr. 15, 16

Enga na nitamani jauakia Konmemorasioni, sési jarhasti eskachi kurhamarhikuarhiaka: “¿Néna úa sánderuni sési xarhatani uékperakua ísï eska Jesusi? ¿Sánderuni uandanhiasïni imani ambe jimbo engaksï erachicha uétarhinchajka ka eska juchiti ambe jimbo? ¿Jukari jamberi erokuarhisïni erachicheri ambe o exesïni nani engaksï jamberi úaka úni ambe ma?”. Ju je méntkisï májkueni úni eska Jesusi ka kurhangukuani. Nóteru ióndani, nóteru uétarhiatia eskachi miántaaka Jesusiri uarhikuani. Enga Jesusi “junguaka” grani tribulasionirhu, auandarhu páuati “erakukatechani” engaksï útasï Echerirhu jauaka. Jiáni uératini, Miántskua nóteru únhantaatia (1 Kor. 11:26; Mat. 24:31). Úakachi seguru jarhani eska asta jiáni enga nóteru úkuarhiakia Tateeri Sena, sésichi pʼikuarheraaka miántani ini tánguarhikuani komu sánderu ambakiti ejemplu ma kaxumbikueri, baloriri ka uékperakueri enga no ma kʼuiripu xarhataka. w19.01 25 párr. 17-19

Kuidarini ambe enga juchari mintsitarhu jaka, májkuenisti eska kuidarikuarhini para no pʼamenchani. Por ejemplu, engachi no uéjka pʼamenchani, jatsiskachi para sési tʼireni ka someni úni ejersisiu. Májkueni, engachi uéjka ambakiti pájperakua ma jatsini Jeoba jingoni, uétarhisïndi eskachi sánderu jorhenguarhiaka imeri ambe ka úni ambe engachi jorhenguarhiaka, ístu uandantani ambe engachi jakajkujka, úati eska juchari jakajkukua sánderu uinhapiti jauaka (Rom. 10:8-10; Sant. 2:26). Máteru ambe, úpiringachi ísï eratsini enajkichi sési jaki, jimbokachi sési xarharasïnga ka jinichi pʼamenchani jarhani. Májkueni, imani ambe jimbo engachi úni jaka para Jeobani marhuakuni, úpiringachi eratsini eska juchari jakajkukua uinhapiti jarhaska, peru jini uénani jarhani ikichakueni jásï ambe eratsini (1 Kor. 10:12; Sant. 1:14, 15). Ju je miáni eska Satanasi uékasïnga eskachi májkueni eratsiaka eska ima. w19.01 15 párr. 4, 5

Ju je kurhamarhikuarhini: “¿Májkueni úsïni ji eska samaritanu? ¿Májkueni pʼamojpitiski? (Luk. 10:30-35). Engani exejka eskaksï máteruecha no sési nitamakuarhixaka, ¿xarhatakuasïni eskani pʼamojkuasïnga? ¿Ambe uá úni parani sánderu jarhuataani? Por ejemplu, ¿jarhuataasïni úparini ambe ma enga marhuakuauaka erachichani ka pirenchichani engaksï jatirikia, biudechani ka uátsï o tumbichani engaksï imecheri táticha no marhuakujka Jeobani? ¿Uá jí uénani exeni néna uinhaperantaua imechani engaksï kómu pʼikuarherani jaka?” (1 Tes. 5:14; Sant. 1:27). ¿Andichisï tsípikua jingoni irekajki engachi pʼamojpitijka? Engachi jarhuatajka máteruechani, exesïngachi eska “sánderu sésis[ka] intsïmpini, ka eska intsïmbinhani”. Ka ístu, mítiskachi eska ísï úparini, sésichi pʼikuastasïnga Jeobani (Uku. 20:35; Ebr. 13:16). Rei Dabidi ari ambe uandaspti imeri enga pʼamojpitika: “Jeoba mismu kuájchakuati ka uáti eska seguiriuaka irekani. Niáraati arhinhani parhakpinirhu eska felisiska” (Sal. 41:1, 2). Engachi xarhatakuaska pʼamojperakua máteruechani, Jeobajtsïni pʼamojperakua xarhatachiati juchantsïni ka i ambe uáti eskachi méntkisï felisiuaka (Sant. 2:13). w18.09 19 párr. 11, 12

Yoshiko, pirenchi ma enga sési marhuakuni japka Jeobani, no sési jásï ambe eiangunhaspti. Doktora arhispti eska nóteru ióni irekapiringia. ¿Ambe úspi i pirenchi? Jirejiresï miántaspti imani tekstuni enga sánderu tsitienga: i jurhiatikueri anapu karakata. No sáni uandanhiaparini arhispti doktorani eska no chéxapka jimboka Jeoba jupijtatixapka. I bersikulu, sési pʼikuastantaspti pirenchini ka jarhuataspti para mintsikani Jeobani iámu mintsita jingoni. Ka juchantsïntu májkueni jarhuataati engachi kʼérati uandanhiatechani jatsiauaka. Ióntki, Jeoba ini ambe arhispti Isaiasini para ima sési pʼikuastantaani judiuechani engaksï Babilonia pánhapiringa. Peru ístu, úspti eska karakata pakarapiringa para jarhuataani iámindu imeri marhuarichani engaksï desde jiáni uératini irekani jaka (Is. 40:8; Rom. 15:4). Ini tiempu jimbo engachi irekani jaka, kánikua úkua jukasti jimboka jarhaska “peligru”, jimbochisï xáni uétarhinchajka uinhaperantskua engajtsïni libru de Isaías íntskujka (2 Tim. 3:1). w19.01 2 párr. 1, 2

Uarhiiti ka acheeti ma engaksï jurajperajka, seguirinksï jarhasïndi temungurhiriini ka jatsiauatiksï problemechani nájkirukaksï táchani irekani jauaka. Apostuli Pablu arini ambe uandaspti engaksï jimbo uáka seguirini májku kʼéri jarhani: “Jimboka achati no jakajkuti pímbinhajkunhantasïnga imeri témbani jimbo. Ka ístu uarhiiti no jakajkuti pímbinhajkunhantasïndi imeri uámbani jimbo. Enga no ísïpiringa chári uátsïticha nó[ksï] pímbinhajkuntskatepirindi, peru iásïksï pímbinhajkunhantastia” (1 Kor. 7:14). Uánikua kristianuecha engaksï erakuka no jurajkuni imeri uarhiitini o achatini enga no Testigueka nájkirukaksï uánikua problemechani jatsiapka, sésiksï pʼikuarherasti engaksï ísï úka, sánderia jiáni enga imeri uarhiiti o achati niáraka Jeoba marhuakuni (1 Kor. 7:16; 1 Ped. 3:1, 2). Iásï, interu parhakpini anapu kúnguarhikuecharhu jarhastiksï uánikua temungurhiricha engaksï sési irekani jaka. Jamberi juchari kúnguarhikuarhuksï uánikua temungurhiricha jati engaksï felisika, jimboka achati xénchasïnga témbani ka no enganiarini ka ístu uarhiiti xénchasïndi ka janhanharhini uámbani. Iámindu imechaksï xarhatasïndi eska ma úsïnga jukaparharani ka respetarini temungurhirikuani (Ebr. 13:4, TNM). w18.12 14 párr. 18, 19

Uandakua Edeni arhikuekasïndi “sési pʼikuarherani” o “tsitini jima jarhani”, meru ambakiti ma nombri para ima lugari. Kánikua tʼirekua jarhaspti, sési járhati lugaricha ka kʼuiripu no ma animalini chérhisïrendi (Gén. 1:29-31). Uandakua enga ebreu jimbo jindeka jardini, griegu jimbo jindesti parádeisos. Ensiklopedia ma uandasïndi eska enga griegu ma kurhauenga inde uandakuani, eranhaskasïrendi sési jásï lugari ma enga kánikua kʼépka, kʼérati anhatapuecha jingoni engaksï mámaru jásï fruta jukenga, ka iorhekua ambe jingoni enga itsï kánikua pímbinhanharhienga nani engaksï sési járhati animalicha uitsakua arhani jarhenga uanamukutini (Gén. 2:15, 16). I ambejtsïni jarhuatasïndi kurhanguni andichisï uá arhini eska jardini de Edeni paraisu máeska. Tata Diosï inde jásï ma jardini jimbosï pérapti Adani ka Ebani, peru tátsekua petaantaspti jimbokaksï no kurhajchaspka. Ísï jimbo, imecha ka imecheri desendientichaksï nóteru paraisurhu irekapirindia (Gén. 3:23, 24). Nóteru nema irekasptia ima lugari jimbo enga xáni sési jándipka astaka Dilubiu janopka ka kʼamajkuni. w18.12 3, 4 párr. 3-5

Tátichaksï jánguarhintasïndi ambakiti ambe jorhendaani uájpechani paraksï jurhimbitku jámani, ánchikuarhirinksï ka paraksï pendienti páni máteruecha jimbo. Engaksï sapiicha úska ambe engaksï tátembecha jorhendaaka, sánderu segurueuati eskaksï no niáraaka no sési pʼikuarherani imani ambe jimbo engaksï erakuaka úni, ísï jimbo, nóksï xáni uánikua problemechani ni uandanhiatechani jatsiauati. Komu Jeoba ísïka eska ambakiti táti ma, uékasïndi eska imeri uájpechani kánikua sési nikuauaka (Is. 48:17, 18). Jimbojtsïnisï arhistachiajti prinsipiuechani engaksï jukaparhakueka parajtsïni jorhendani néna jámani ka néna kaani máteruechani. Jeobajtsïni pʼímarhisïndi parachi ísï eratsini eska ima ka májkueni jámani. ¿Inde ambe úsïni eskachi no uáka jandiajku erakuni ambe ma? Nómbe, úsïndi eskachi sánderu sési eratsiaka (Sal. 92:5; Prov. 2:1-5; Is. 55:9). Jarhuatasïndijtsïni ambakiti ambe erakuni enga uáka eskachi sési irekaaka ka eskachi tiempu jatsiaka para imani ambe úni engachi tsitijka (Sal. 1:2, 3). Meru kánikuajtsïni marhuachisïndi ísï eratsini eska Jeoba. w18.11 19, 20 párr. 7, 8

Para seguirini jurhimbikuarhu jarhani, nochi jatsiska para imani ambe úni engaksï máteruecha uéjka. Engachi jorhenguarhipka jurhimbikueri ambe, juchari pájperakua amiguecha jingoni ka familiaricha engaksï no Testigueka nóteru májkuenistia. Máruksï respetaristi ambe engachi iásï jakajkujkia, peru máteruksï meru no sáni jaiapanhintasti. Jamberijtsïni juchari familiaricha ka ánchikuarhitarhu o eskuelarhu anapu kompanieruecha pʼímarhiati máru kʼuínchikuecharhisï. ¿Ambejtsïni jarhuataa no nirani imani kʼuínchikuecharhu enga Jeoba kurhunhiajka? Sési mítitini jarhani andisï Jeoba kurhunhiajki. Ístu marhuasïndi ménderu arhiantani juchari publikasionichani engaksï arhijka nani engaksï uéraka inde pʼindekuecha. Engachi Bibliarhu jorhenguarhijka andichisï no nirajki imani kʼuínchikuecharhu, sánderuchi seguru jarhasïnga eskachi imani ambe úxaka enga Jeoba jaiapanhintajka (Efes. 5:10). Jeobani mintsikani ka imeri Karakatani, uáti eskachi no chéaka ambe engaksï máteruecha uandaaka (Prov. 29:25). w18.11 11 párr. 10, 12

Enga juchari irekuarhu mójtakurhiska ambe ma, fásilisti eskachi chéaka ka no jánhaskani ambe úni. Inde ambe úpirindi úkuarhinchani Jose. Peru iámindu ambe xarhatasïndi eska ima erakuspka jánguarhintani xáni enga úpiringa paraka Jeoba újchakurapiringa. Ísï jimbo, jánguarhintaspti sési úni iámindu ambe enga ofisiali enkargaripka, ísï eska jiáni enga Potifarini ánchikuarhikuenga (Gén. 39:21, 22). Ísï eska Jose, jamberichi májkueni ambe nitamanchani jaka engachi uáka ambe ma úni o no ma ambe. Peru engachi tekantaska ka jánguarhintani úni ambe engachi xáni uáka, uákachi eskajtsïni Jeoba újchakuraaka (Sal. 37:5). Jamberichi ménisï no mítisïnga ambe úni, peru eska na uandapka apostuli Pablu, no méni niáraati eskachi no uá orhepani uerani (2 Kor. 4:8). Ka ísïuati engachi sánderu okupadu jarhaska eianhpikuarhu. w18.10 29 párr.11, 13

Eranhaska je eskachi exentaska nemani engachi mítika ka respetarini, pero ima no miásïndi nachi arhinhasïni nijtsïni jamberi mítintani. ¿Nénachi pʼikuarherapirini? Seguru eska no sési, jimboka normaliska uékani eskajtsïni máteruecha miáuaka. Peruchi no uékasïnga eskaksï solu mítiaka néskichi, sino ístu nachi jásï kʼuiripueski ka ambe engachi újka (Núm. 11:16; Job 31:6). Ísï eska na úkuarhijka máteru ambe jingoni, juchari pekadu uáti úni eska uékani mítikateni, no no sési jauaka. Ístu, Satanasiri parhakpini uáti úni eskachi uékaaka kʼéri ambeni ka famosueni. Engachi ísï újka, nochi kʼéri ambe arhini jarhasïnga Jeobani, imani enga jukanchaka para kʼéri ambe arhinhani (Jaŋ. 4:11). w18.07 7 párr. 1, 2

Nójtsïni ísku pakatasïndi eska Satanasi ka demoniuechaksï úsïnga paraksï imecha engaksï kʼéri ambeka chkuanderaaka (1 Tim. 4:1, 2). Imecha engaksï relijioni no jurhimbitichani orhejtsïkuajka, imaksï sánderu kulpablisti. ¿Andi? Jimboka imecha engaksï jakajkukuajka imecheri chkuanderakuechani ka únksï imani ambe enga Tata Diosï kurhunhijka, uáti úni eskaksï no jatsiaka oportunidadi paraksï irekani para méntkisï (Os. 4:9). Jesusi mítispti eska imeri jurhiatikuecha jimbo, relijioniri orhejtsïkutichaksï chkuanderakusïrenga kʼuiripuni. Arhinharhikuaspti: “Lastima cha kararicha ka fariseuecha ísku aparicha, jimbokajtsï iápuru jámasïnga ka asta japonda [o mari] kʼérirhu parhikuni jamberi parajtsï jakajkutarani ma kʼuiripuni ísï eska cha na jakajkujka, ka engajtsï jakajkutarajkia, úsïngajtsï eska ima jindeuaka ma tsïnchikuarhu anapu tsimani uelta sánderu ka eska cha” (Mat. 23:15). Jesusi xukaaspti ka arhiaspti: “Chári táti jindesti Noambakiti”, enga uándikpiti máeka (Juanu 8:44). w18.10 7 párr. 5, 6

¿Andisï Jesusi ini ambe uandapi? Ima mismu mókuntaspti: “Tsípi je ka kánikua sési korhokani [o sési pʼikuarherani], jimbokajtsï kʼéri ma premiu intsïnhaaka auandarhu, jimbokaksï májku jásï no sési kásïrenga ióntki anapu uandajtsïkpitichani” (Mat. 5:12). Engaksï apostulichani ataapka ka juramukuanksï eskaksï nóteru predikaripiringia, apostulichaksï “uéntaspti jusgadurhu kánikua tsípiparini”. Ísïsti, imaksï no sési pʼikuarheraspti engaksï kʼuikirhinhapka, peruksï tsípispti “jimboka Diosï íntsaaspka sésikua no sési arhinhanksï Kristueri nombri jimbo” (Uku. 5:41). Ini jurhiatikuecha jimbo, jucha engachi Jeobani marhuakuni jaka, ístuchi tsípikua jingoni tekantasïnga engachi no sési kánhajka Jesusiri nombri jimbo o engachi kʼérati problemechani jatsiajka (Sant. 1:2-4). Ísïsti, juchajtuchi no tsitisïnga no sési nitamakuarhini. Peru engachi no jurajkuska Jeobani engachi tsʼéjkukua ambe jatsiaka, imajtsïni jarhuataati balori jingoni aguantarini. Engajtsïni Tata Diosï felisi, jeiapanhintajka, felisisïngachi nájkirukachi no sési kánhaaka relijioni jimbo ojtsïni familiarhu anapuecha uékani desanimarini (1 Tim. 1:11, TNM). w18.09 21 párr. 18-20

Jimbokachi ini jurhiatikuechani jimbo irekaxaka enga “peligru” jaka, uánikua kʼuiripuechaksï kánikua kómu pʼikuarherasïndi ka uánikuaksï nóteru uékasïndia irekani (2 Tim. 3:1-5). Uandanhasïndi eska mándani uéxurhini jukari 800,000 kʼuiripuechaksï uándikukuarhisïnga, o sea 1 kada 40 segundu. Astaksï máru erachicha ka pirenchicha niárasti ísï pʼikuarherani ka uandikukuarhinksï, xáni no sési ambe. Nájkirukaksï sánderu uáni juchari erachicha ka pirenchicha seguirini jaka orhepani uérani, uánikuaksï jatsisti para imani ambe nitamanchani enga no sési pʼikuastajka ka uétarhinchanksï eskachi xénchauaka ka uinhaperantaani. Máruksï no sési kánhasïndi ka teresmarhunhanksï. Máteruksï jatsisti para tekantani eskaksï imeri ánchikuarhitarhu anapu kompanieruecha no sési uandaaka imecheri ambe. O jamberiksï kuataratini jarhani jimbokaksï jatsiska para sánderu ánchikuarhini o jimboka imecheri ánchikuarhita jukari kuatajpisïnga. Ka máruksï kʼérati problemechani jatsiasïndi familiarhu, jamberiksï kánguarhijti témbani o uámbani ma enga no jakajkutika enga méntku no sési arhiani jarhajka. Ini uandanhiatechani jimbo ka máteruecha, úsïndi eskaksï uánikua kristianuecha kuataraaka ka no sésiksï pʼikuarherani. w18.09 13 párr.3, 5

Tátichaksï májku kʼéri ánchikuarhisïndi Jeoba jingoni engaksï animariuajka uájpechani paraksï sánderu marhuakuni Jeobani. Tiempu jingoni, uánikuaksï inde sapiicha niárasïndi marhuani tiempu kompletueri ka iauanisïksï nirani marhuani. Máruksï misioneruesti, máteruechaksï marhuaxati komu prekursoricha nani engaksï uétarhini jaka Reinueri eianhpiricha ka máruksï Beteli marhuaxati. Buenu, jimbokaksï iauani irekani jaka, imecheri familiechaksï no úsïndi exeani xáni eskaksï na xáni uékapiringa. Nájkiruka ísïika, táticha engaksï sakrifikarikuarhijka, animariuasïndiksï uájpechani paraksï seguirini jima marhuani nani engaksï jaka. ¿Andi? Jimbokaksï kánikua sési pʼikuarherasïnga exeni eskaksï imecheri sapiicha orheta péraxaka Tata Diosïri Reinuni. Uánikua i tátichaksï jamberi ísï pʼikuarherajti eska Ana, enga uandapka eska Jeobani kuanitaspka imeri uájpa Samuelini. Ima tátichaksï sési úsïndi ísï exeni eska kʼéri kóntperata máeska Tata Diosï jingoni ánchikuarhini ka engaksï no ma ambe jingoni mójtakupiringa (1 Sam. 1:28). w18.08 24 párr. 4

Jesusi no uandaspti eska meru no úpiringa. Ístu uandaspti: “Tsípisïngajtsï cha engajtsï xáni kómu nitamajka o pobricha, jimboka cháriska Diosïri irekakua” (Luk. 6:20). Peru ini ambe jingoni no arhikuekaxapti eskaksï iámindu pobriicha kurhajchapiringa ka kʼérati kóntperatechanksï intsïnhaani. Astaksï jarhaspti pobriicha engaksï no méni niárapka Jesusiri disipulu úkuarhini. I ambe arhikuekasïndi eskachi no uáka uandani eska kʼuiripu ma Jeobaeri amigueska o nómbe, imani ambe jimbo enga jatsika. Tata Diosïri iretarhu, jarhastiksï uánikua erachicha ka pirenchicha engaksï xénchajka Jeobani ka mintsita jingonksï marhuakuni. Máruksï rikuesti ka máruksï pobristi. Biblia juramukuasïndi rikuechani paraksï no jámani mintsikani “imecheri jatsikuarhikuani enga sóntku kʼamarajka, sino [...] Diosïni” (1 Tim. 6:17-19). Peru ístu arhiasïndi iáminduechani engaksï Jeobani marhuakuni jaka —ia seaksï rikueni o pobrini— eska peligrosueska kánikua tumina uékani jatsini (1 Tim. 6:9, 10). Engachi ísï exeaska juchari erachichani eska Jeoba na exeajka, nochi jusgariuauaka imani ambe jimbo engaksï jatsikuarhika. w18.08 10, 11 párr. 11, 12

Ísïsti, kánikuachi uékasïnga xarhatani eskachi agradesidu jarhaska Jeoba jingoni engachi jatsika kóntperata para imeri iretarhu jarhani. Mítiskachi eska sánderu ambakiti ambe engachi erakuka úni, jindeska aiakuni imani juchari tsípikua. Meruchi no jiókuarhisïnga no sési jásï ambe. Ka uékaasïngachi ka respetariuani juchari erachichani, jimbokaksï imechajtu Jeobaeriska (Rom. 12:10). Bibliajtsïni asegurarichisïndi: “Jeoba no jurajkuati imeri iretani” (Sal. 94:14). I aiatsperakua kumplirikuarhiati ambe uéjkichi úkuarhinchani. Ni sikiera uarhikua uá úni eskajtsïni Jeoba nóteru uékaakia (Rom. 8:38, 39). Ísï jimbo, engachi irekaaka o engachi uarhiska, juchachi Jeobaeriska (Rom. 14:8). Uékaxakachia eska Jeoba tsítantaauaka iámindu imeri ambakiti amiguechani (Mat. 22:32). Asta ini tiempu jimbo, uánikua kóntperatechanchi jatsiaska. Eska Biblia na arhijka, “tsípisïndi nasioni enga imeri Tata Diosï jindeka Jeoba, ireta enga ima erakuka para imeri erensia máeni” (Sal. 33:12). w18.07 26 párr. 18, 19

Máruksï jamberi uáti eratsini eska no nema uáka arhiani ambe engaksï jatsiaka para úni, komu eskueleri o ánchikuarhiteri ambe. Jiájkani, eskaksï jatsisïnga libertadi para úni ambe engaksï uékaaka enga imecheri konsiensia no no sési pʼikuastaajka. Jamberiksï uáti eratsini: “¿Andisïni jatsi para jusgarinhani máteru nemaeri konsiensia jimbo, indeni ambe jimbo engani libreka para úni?”. Ísïsti eskachi libreska para erakuni ambechi estudiariua ka ambechi uá juchari tsípikua jingoni. Peru uétarhisïndi miáni eskachi no kʼamakʼamasï libreska ka eska ambe engachi erakuaka úni, uáka sési ambe juáni o no sési ambe. Jimbosï Pablu uandapti ambe enga arhijka iásï anapu tekstu. I ambejtsïni jarhuatasïndi miáni engachi erakuni jámaaka ambe ma úni, eska no sánderu jukaparhakueska ambe engachi jucha uéjka. w18.04 10 párr. 10

Kristianu ma jamberi uandaati eska Jeobani marhuakuxaka peru no sési jásï ambe úni jarhani (Jud. 11). Jamberi méntku predikarini jarhajti ka méntkisï nirani tánguarhikuecharhu, peru ístu, ísku jándikueri ambe eratsini jarhani, jatsikuarhikua ambe tsitini o asta kurhunhini erachini ma (1 Juanu 2:15-17; 3:15). I ambe uáti úni eska pekariuaka. Jamberiksï máteruecha no mítijti ambechisï eratsijki o úni, peru Jeoba kʼóru iámindu ambe exesïndi ka mítisïndi sinchi kʼamakʼamasï imani jingoni jarhaski o nómbe (Jer. 17:9, 10). Nájkirukachi no sési jásï ambe újka, Jeobajtsïni no seguirisïndi jurajkuni. Enga ima exejka eskachi jarharixakaia, arhisïndijtsïni: “Andarhentajtsïni je”. Ima uékasïndi eskachi kurhunhiaka no sési jásï ambe, ka sánderu jiáni engachi jánguarhintani jauaka orhepani uérakuni tsʼéjkukua ma (Is. 55:7). Engachi ísï úska, imajtsïni aiachesïndi eskajtsïni íntskuaka jarhuajperata engachi uétarhinchajka para orhepani uérakuni tsʼéjkukua ma (Gén. 4:7). w18.07 18 párr. 5, 6