Disiembri

Ma ambe engachi tsitijka na enga jásïka Jesusi, jindesti eskajtsïni úsïnga kurhanguchini engachi uandanhiatechani ambe jatsiajka jimbokachi no perfektueska. Enga Echerirhu japka, tsipispti imecha jingoni engaksï tsipienga ka ueraspti imecha jingoni engaksï uerenga (Rom. 12:15). Por ejemplu, engaksï imeri 70 chúxapaticha tsipiparini kʼuanhatsintapka jimboka sési nikuaspka aianhpikuarhu, “Jesusi meru tsipini pʼikuarheraspti Espiritu Santuni jimbo” (Luk. 10:17-21). Peru Jesusi “kánikua no sési pʼikuarheraspti ka ístu uandanhiani” enga exeapka imechani engaksï xénchenga Lasaruni kómu pʼikuarherani jarhani imeri uarhikua jimbo (Juanu 11:33). Nájkiruka Jesusi perfektuepka, no jirejiresï xukaasïrendi kuiripuechani, sino pʼamojkuasïrendi. ¿Ambe jarhuataspi para inde jásï kʼuiripu máeni? Uékperakua. Meru xénchaasïrendi kʼuiripuechani (Prov. 8:31). Inde ambe jarhuataspti para sánderu mítini na engaksï eratsijka kʼuiripuecha. Apostuli Juanu uandasïndi: “Ima mítisp[tia] ambe enga eratsienga ma kʼuiripu” (Juanu 2:25). w19.03 20 párr. 1, 2

Satanasi úspti eska Jobu iámindu ambe tsïtapiringa, komu jatsikuarhikua ambe, uarhiranchaani jántspirichani ka eskaksï máteruecha no sési exepiringa. Ístu uándikuaspti Jobueri diesi uájpechani enga ima xáni xénchauenga. Tátsekua, úspti eska uinhamu pʼamenchapiringa, eska uxurhikuarhepiringa. Imeri uarhiiti enga xáni uandanhiani japka ka no sési pʼikuarherani iámindu ambe jimbo, arhispti eska nóteru jánguarhintapiringia, eska no sési arhipiringa Tata Diosïni ka eska uarhipiringa. Jobu niáraspti uékani uarhini, peru no méni jurajkuspti Jeobani. Jimajkani Satanasi máteru ambe úraspti para no sési úkuni. Tanimu imeri amiguechani úraaspti, engaksï uánikua xanhari pʼorhembipka, peruksï no méni sési pʼikuastantaspti. Masi úsptiksï no sési ambe uandani ka arhinchani. Arhisptiksï eska Tata Diosïsï úni japka eska kómu nitamakuarhipiringa ka eska no pendienti pásïrenga sini Jobu iámu mintsita jingoni marhuakusïreni o nómbe. Niárasptiksï arhini eska no sési jásï ma kʼuiripuespka ka eska sési jarhaspka ambe enga nitamanchani japka (Job 1:13-22; 2:7-11; 15:4, 5; 22:3-6; 25:4-6). w19.02 5 párr. 8

No méntkisï no sési jarhasïndi chéni pʼikuarherani. Por ejemplu, sésisti eskachi chéaka imani ambe úni enga Jeoba no jeiapanhintajka. Engaksï Adani ka Eba chépiringa imani ambe úni enga Jeoba no jeiapanhintajka, kurhajchapirindiksï. Peru engaksï no kurhajchapka, kurhangusptiksï eskaksï pekadu úspka. Iámindu imecheri desendientichanksï kéritaapirindi pekadu ka uarhikua. Ka jimbokaksï exespkia ambe engaksï úpka, kʼuratsesptiksï engaksï patsïkʼasï japka ka órhekuarhisptiksï (Gén. 3:7, 21). Sésisti eskachi chéaka para no imani ambe úni enga Jeoba no jeiapanhintajka. Peru nochi jatsiska para kánikua chérhini uarhikuani. ¿Andi nómbe? Jimbokajtsïni Tata Diosï íntskuska ambe ma engachi jimbo úaka irekani para méntkisï. Engachi pekadu ma úska ka mintsita jingonchi moantani, imajtsïni puáchentaati engachi jakajkuska imeri Uájperi uarhikuani. Ka para xarhatani eskachi jakajkusïnga, jatsiskachi para úni ambe ma enga kánikua jukaparhakueka: aiakukuarheni ka itsï atakuarhini (1 Ped. 3:21). w19.03 5, 6 párr. 12, 13

lsraelitechaksï uánikua rasonichani jatsiaspti paraksï diosmeiamukua arhini Jeobani. Ima, diesi plaga axakuaspti Ejiptu anapuechani para úni israelitechani petaatani jima uératini. Tátsekua, pʼímutaantaspti, úparini eska Ejiptu anapu ejersitu mari Charhapitirhu uarhipiringa. Imaksï xáni tsípispti engaksï pirekupka Jeobani jimbokaksï andaspka. Peru ¿na xánksï ióni jukaparharaspi ambe enga Jeoba úpka? Engaksï israelitecha ménderu jatsiapka ójkutakuechani, mirikurhisptiksï ambe enga xáni úpka Jeoba imecha jimbo ka nóksï jukaparharaspti (Sal. 106:7). Biblia arhisïndi eska iámindu ireta uénaspka no sési ambe uandani Moisesiri ka Aaroniri ambe, inde ambe arhikuekasïrendi eskaksï Jeobanisï no sési arhini japka (Éx. 16:2, 8). Xánksï no sési pʼikuastaspti Jeobani enga ima niárapka uandani eskaksï desierturhu uarhipiringa, menusi Josue ka Kalebi (Núm. 14:22-24). w19.02 17 párr. 12, 13

Jesusi no úspti kʼéri kʼuínchikua ma para imeri uarhikuani miántani, paraksï máteruecha kʼéri ambe exeni. Sánderu sési, arhiaspti imeri chúxapatichani eskaksï ma xanhari miántapiringa mándani uéxurhini, no uánikua ambe úparini ka enga sési japiringa (Juanu 13:15; 1 Kor. 11:23-25, TNM). Ísï úparini, xarhataspti eska no kʼéri ambe exekuarhisïrenga. Xáni engajtsïni sési pʼikuastajka mítini eska juchari auandarhu anapu Rei, kaxumbitiska (Filip. 2:5-8, TNM). Ma ambe engachi úaka úni parachi májkueni kaxumbitini eska Jesusi, jindesti sánderu uandanhiani máteruecha jimbo ka eska juchari ambe jimbo (Filip. 2:3, 4). Ju je eratsintani ambe enga úpka ima chúri ante de uarhini. Nájkiruka mítipka eska kánikua kómu nitamakuarhepiringa imeri uarhikua jimbo, sánderu uandanhiaspti na engaksï xáni no sési pʼikuarherapiringa imeri ambakiti chúxapaticha. Ísï jimbo, ima últimu chúri jorhendaaspti, uinhaperantaaspti ka sési pʼikuastantaani (Juanu 14:25-31). Xarhataspti eska sánderu uandanhiaxapka paraksï máteruecha sési jarhani ka eska imajkumindu uandanhiakuarheni. Xáni ambakiti ejemplu ma engajtsïni xarhatachika parachi kaxumbitini. w19.01 21 párr. 5, 6

¿Kánikuajtsï chésïni méntkisï engajtsï eratsijka tarhatani jájki tánguarhikuarhu? Engajtsï ísï pʼikuarherajka, nójtsï chájkueska. Sáno iáminduechachi sánisï chésïnga engachi komentarijka. Inde ambe ambakiti ambe xarhatasïndi, jimboka arhikuekasïnga eskajtsï kaxumbitiska ka eskajtsï máteruechani sánderu kʼéri ambe exeasïnga. Jeoba kánikua jeiapanhintasïndi enga nema kaxumbitijka (Sal. 138:6; Filip. 2:3). Peru ístu uékasïndi eskajtsï imani kʼéri ambe arhiaka ka eskajtsï uinhaperantauaka chári erachichani tánguarhikuecharhu (1 Tes. 5:11). Imaksïni xénchasïndi ka íntskuatiksïni balori engajtsï uétarhinchajka. Ju je exeani máru Bibliaeri prinsipiuechani. Tata Diosïri Karakatajtsïni miátantasïndi eskachi iáminduecha ménisï támisï arhisïnga ambe ma (Sant. 3:2). Jeoba no erokuarhisïndi eskachi perfektueuaka, níjtuksï juchari erachicha erokuarhijki indeni ambe (Sal. 103:12-14). Juchari familia espiritualistiksï ka uékasïndijtsïni (Mar. 10:29, 30; Juanu 13:35). Kurhangusïndiksï eskachi ménisï no úsïnga meru imani ambe uandani engachi uéjka. w19.01 8 párr. 3; 10, 11 párr. 10, 11

Ini jurhiatikuecha jimbo, no fásilisti ísï úni, pero ístu no jindesti ambe ma engachi meru no uáka úni. Jeoba uékasïndi eskari tsípikua jingoni irekaaka ka eskakini sési nicheaka, no solu iásï engari sapichku jaka, sino para méntkisï. Parajtsïni jarhuatani sési kurhanguni ini ambe, ju exeni ambe jarhuataaspi israelitechani paraksï úni pʼirani Echerini engaksï Aiaminhapka. Enga sánderku kueratani japkia paraksï israelitecha inchani Echerirhu engaksï Aiaminhapka, Tata Diosï no arhiaspti eskaksï jánguarhintapiringa para sánderu ambakiti soldaduecheni ni paraksï guerrarhu nirani (Deut. 28:1, 2). Sánderu sési, arhiaspti eskaksï kurhajchapiringa imani ka mintsikanksï (Jos. 1:7-9). Para kʼuiripuecha, i ambe ísï xarharasïrendi eska no jarhuataapiringa. Peru sánderu ambakiti konseju máespti para imecha jimboka Jeobaeri jarhuajperata jingoni, úsptiksï kananeuechani someni andaani (Jos. 24:11-13). Ísïsti, para kurhajchani Tata Diosïni, uétarhisïndi mintsikani. Engachi mintsikaska, méntkisïjtsïni sési nicheati. Ka ísï úni, desde iónisï marhuastia asta iásï jamberi. w18.12 25 párr. 3, 4

Ini jurhiatikuecha jimbo, máruksï jurajkusti jurhimbikuani jimboka iásï Bibliaeri karakata ma sánderu sési kurhangunhaskia. Jamberiksï máru apostatecha jingoni úkuarhiti o imani kʼuiripuecha jingoni engaksï no jiókuarhijka ambe engachi jucha jakajkujka. Ambe uéjki jimboeni, iámindu imechaksï uénasti ‘késtakukuni’ o jarharini Jeobani ka kúnguarhikuani (Ebr. 3:12-14). Sánderu sési japirindi engaksï seguiripiringa jakajkuni ka mintsikani Jesusini, ísï eska na úpka apostuli Pedru. Peru máteruksï sánhani arhisti mirikurhini jurhimbikuani no jamberi kuenta íntskukuarhiparini. Biblia ísï terokutantaasïndi imani kʼuiripuechani komu barku ma enga sánhani arhijka támisï nirani (Ebr. 2:1). Sáno méntkisï, nóksï eratsisïrendi jurajkuni jurhimbikuani, peruksï ísï ústi jimboka imecheri pájperakua Jeoba jingoni sánhani arhispka chkeni, astaksï nóteru jatsinia ambakiti pájperakua ma imani jingoni. w18.11 9 párr. 5, 6

Engachi uéjka parachi sánderu jorhendanhani parachi Jeobani marhuakuni, jamberichi kumpliriuajka rekisituechani para nirani Jorhentperakuarhu para Eianhpiricha Reinueri. Ixuksï jorhendaasïndi erachichani ka pirenchichani engaksï espiritualika ka engaksï tiempu kompletueri marhuani jaka paraka Jeobaeri organisasioni uáka sánderu sési úraani. Imecha engaksï uékaaka nirani ini jorhentperakuarhu, jatsistiksï para tsípikua jingoni jiókuarhini náki uéjki asignasioni ma engaksï intsïnhaaka ísï tátsekua engaksï kʼamaraakia. ¿Úpirinchi nirani ini jorhentperakuarhu ka ísïchi intsïnhaani sánderu kʼérati responsabilidadichani? (1 Kor. 9:23). Jeobaeri marhuarichachi uékasïnga intsïmpitiini, uékperakua xarhatani ka sési kámpini ka pauani pauanchi interesi páni máteruecha jimbo. I ambe uáti eskachi sési pʼikuarheraaka, eskachi pínandikua jatsiaka ka eskachi felisiuaka (Gal. 5:22, 23). No arhiparini ambe uéjkichi nitamakuarhini jarhani, uákachi sési pʼikuarherani engachi májkueni sési kámpiaka eska Jeoba ka engachi imecha jingoni kuenta úkuarhiaka engaksï imani jingoni ánchikuarhijka (Prov. 3:9, 10). w18.08 27 párr. 16-18

Jamberi nema kurhanguarhijti: “¿Jaki rasoni ma enga jurajkujka kristianuni ma diborsiarikuarhini ka ménderu tembuchantani o uambuchantani?”. Buenu, Jesusi uandaspti na enga exenga diborsiueri ambe: “Nákinterku nema enga chúntaaka imeri témbani ka tembuchantani máteru uarhiiti jingoni, ísku jándi úkuarhisïndi imani japarini. Ka enga ma uarhiiti jarharintaaka imeri uámbani ka tembunhantani máteru achatini jingoni, ístu ísku jándi úkuarhisïndi” (Mar. 10:11, 12; Luk. 16:18). Xarharasïndi eska Jesusi jukaparharasïrenga temungurhirikuani ka uékasïrendi eskaksï máteruecha májkueni úpiringa. Né enga diborsiarikuarhienga imeri uarhiiti jingoni ambe uéjki jimbo ka máteru jingoni tembuchantani, ísku jándikua ambe úsïrendi. I ambe ísïsti jimboka para Tata Diosï, diborsiarikuarhini ambe uéjki jimbo no arhikuekasïnga eska jimini kʼamakurhisïnga temungurhirikua. Para Jeoba, tsimarhanksï seguirixati máechakua kuerpuni. Ístu Jesusi uandaspti eska né enga diborsiarikuarhipiringa, úsïrendi eska témba niárapiringa ísku jándikua ambe úni. ¿Andi? Jimboka imani jurhiatikuecha jimbo, ima uarhiiti enga diborsiada japiringa exesïrendi eska uétarhinchasïrenga uambuchantani paraksï mantenerini. Ka uambuchantani májkuenispti eska ísku jándikua ambe úni. w18.12 11 párr. 8, 9

Enga Abakuki Jeoba jingoni uandontskuarhipka, úspti eska sési pʼikuarherantapiringa. Jimbosï seguirini japti erokuarhini mintsikaparini eska Jeoba úpiringa ambe ma. Mintsinharhikua enga Abakuki xarhatani japka, no jindespti para ma ratitu, jimboka sánderu orhepani ménderu uandaspka eska “tekantskua jingoni erokuarhixa[pka] jurhiatikua” enga xáni no sési jánhaskuarhepiringa (Hab. 3:16). ¿Ambechi jorhenguarhisïni ambe enga Abakuki úpka? Primeru, eskachi jatsiska para méntkisï kómarhini Jeobani, no arhiparini ambe uéjkichi nitamanchani jarhani. Segundu, eskachi jatsiska para kurhajchani ambe engajtsïni arhijka imeri Karakatarhu ka imeri kúnguarhikua jimbo. Ka últimu, eskachi jatsiska para tekantskua jingoni erokuarhini eska ima uáka ambe ma, mintsikaparini eska kénditaaka kómu nitamakuani jiáni enga tiempueuaka. Engachi úska iámindu i ambe eska Abakuki, ístuchi uáka sési pʼikuarherani ka i ambejtsïni jarhuataati aguantarini. Ambe engachi erokuarhini jaka uáti eskachi sánderu tekantstiuaka ka i ambejtsïni jarhuataati sési pʼikuarherani nájkirukachi problemechani jatsiauaka. Ambe engachi erokuarhini jaka, jarhuatatijtsïni mintsikani eska juchari Táti auandarhu anapu uáka ambe ma (Rom. 12:12). w18.11 15, 16 párr. 11, 12

¿Ambe eratsisïni Tata Diosï íri ambe? Jesusi uandaspti: “Nákinterku nema enga pekadu úraaka ma ini jásï sapichuni enga jíndini jakajkujka, sánderu sési japirindi eska jojchakunhapiringa ma molinurhu anapu tsakapuni, ka japondarhu kʼuanimanhani” (Mar. 9:42). Jesusi kánikua no sési exesïrendi ini ambe. Ka komu ima sési xarhatajka na enga eratsijka imeri Tátemba, uákachi seguru jarhani eska Jeoba májkueni no sési exesïnga enga nema no eratsintajka eskaksï imeri úkuecha uáka eska nema nóteru marhuakuakia Jeobani (Juanu 14:9). ¿Juchajtuchi májkueni eratsisïni eska Jeoba ka Jesusi? ¿Ambeksï xarhatasïni juchari úkuecha? Ju je eranhaskani eskachi pʼindeska arreglarikuarhini o imani xukuparhakua ambe jukani engachi tsitijka, peruchi kuenta íntskukuarhisïnga eska ísï arreglarikuarhini no sési pʼikuastaasïnga máru erachichani o eskaksï uáka ikichakueni jásï ambe eratsini. ¿Ambechi uá? Ima uékperakua engachi pʼikuarherajka erachichani jimbo, ¿uá eskachi nóteru ísï xukuparhakia o arreglarikuarhini? w18.11 25 párr. 9, 10

¿Andisï xáni jukaparhakue eskachi mándani arhini iámu mintsita jingoni marhuakuaka Jeobani? Jimboka Satanasi no sési uandasïnga Jeobaeri ambe ka ístu mándani arhini juchari ambe. Ima ánjeli enga no uékapka kurhajchani Jeobani, niárasti no sési pakatani Jeobaeri nombrini, uandaparini eska ima no ambakiti juramuti máeska, eska no nemani jimbo pendienti pásïnga ka eska no jurhimbitku jámasïnga. Peru xáni no sési engaksï Adani ka Eba Satanasini kurhajchapka ka no Tata Diosïni (Gén. 3:1-6). Mientrasi engaksï Edenirhu irekani japka, uánikua ambeksï jatsispti engaksï jimbo úpiringa sánderu xénchani Jeobani. Peru jiáni enga Satanasi nóteru uékapkia kurhajchani Jeobani, xarhatasptiksï eskaksï no iámu mintsita jingoni xénchasïrenga Jeobani. Ka tiempu jingoni, Jobueri jurhiatikuecha jimbo, uétarhisïrendi mókuntani máteru kurhamarhikuani: ¿Japirinksï kʼuiripuecha engaksï uékperakua jimbo kurhajchapiringa Jeobani? O, ¿uáksï kʼuiripuecha iámu mintsita jingoni marhuakuni Jeobani? Ísïsti, Jobu no perfektuespti ka no iámindu ambe úsïrendi sési úni, májkueni eska jucha. Peru Tata Diosï xénchasïrendi, jimboka iámu mintsita jingoni marhuakusïrenga. w19.02 3, 4 párr. 6, 7

Para xarhatani na engaksï xáni jukaparharajka imecha engaksï exentajka jurhimbikua Tata Diosïri Reinuerini, Jesusi uandaspti achatiri ma enga perlechani jámenga jirinhaani. Enga exentapka ma enga kánikua jukaparhapka, sóntku “íntspikuarhi[spti] iámindu ambe enga jatsikuarhipka” para piáni imani perlani (Mat. 13:45, 46). Májkueni, para jucha xáni jukaparhakuesti Tata Diosïri Reinu ka ístu máteru ambe enga Biblia jorhentpijka, engachi jurajkujka ambe enga xáni uétarhijka parachi úni jurhimbikuarhu jarhani. Engachi seguirini jauaka jukaparharani, nochi méni jurajkuaka (Prov. 23:23). Peru xáni no sési engaksï máru Tata Diosïri marhuaricha nóteru jukaparharakia jurhimbikuani ka niárastiksï jurajkuni. Ju je no méni úni inde ambe. Sánderu sési, jatsiskachi para úni ambe engajtsïni Biblia arhijka, eskachi seguirini jauaka jámani “eska na terokuntajka indeni ambe jingoni enga ísïka” o jurhimbitika (3 Juanu 2-4). I ambe arhikuekasïndi eskachi jatsiska para sánderu jukaparharani jurhimbikuani ka úni ambe engachi jorhenguarhijka. w18.11 9 párr. 3

Ístu, Jeoba arhiaspti eskaksï no jámapiringa Jeriko jingoni uarhipeni. Ambe engaksï jatsipka para úni, jindespti eskaksï seisi jurhiatikua jimbo pauani pauani ma xanhari marcharipiringa siudadirhu uirhipandani ka enga niárapiringia siete jurhiatikua, siete xanhariksï marcharipirindi. Né uéjki uandapirindi eska ísï úni no marhuapiringa. Jamberiksï máru soldaduecha úpirindi uandani eskaksï ísku jatini tsïtaxapka tiempu ka uinhapikua. Peru Jeoba enga Israelini Orhejtsïkuni japka, sési mítitixapti ambe enga úni japka. Ambe enga arhiapka eskaksï israelitecha úpiringa, úspti eska imecheri jakajkukua kʼépiringa ka eskaksï no uarhiperapiringa Jeriko anapu soldaduecha jingoni engaksï xáni uinhapipka (Jos. 6:2-5). ¿Ambechi jorhenguarhisïni i istorieri? Jamberichi ménisï no kurhangujka iámindu ambe enga Jeobaeri organisasioni uandajka para úni. Por ejemplu, jamberichi ióntki no kurhangupka andichisï úrapirini tableta o selulari ambe máeri jorhenguarhikuarhu, eianhpikuarhu ka tánguarhikuecharhu. Peru iásï kʼóruchi exesïngia na engaksï xáni marhuajka, buenu ka engachi jatsika modu para indeni ambe úrani. Ísï jimbo, nájkirukachi uénani jámani no kurhanguaka iámindu ambe, jatsiskachi para kumpliriuani instruksionichani engajtsïni Tata Diosïri organisasioni íntsajka. Engachi exejka na engaksï xáni marhuajka ajusticha, juchari jakajkukua sánderu kʼésïndi ka úsïngachi sánderu májku kʼéri jarhani. w18.10 23 párr. 8, 9

Ima ambe engaksï erokuarhini japka eska Mesiasi úpiringa, ístu eskaksï na erokuarhini japka Jesusiri chúxapaticha, úpti eskaksï galileuecha uékapiringa eska Jesusi imecheri reipiringa. Sési jimboksï ísï exesïrendi komu ambakiti juramuti ma, jimboka sési jorhentpisïrenga, uinhapikua jatsispka para tsinaani pʼamenchatichani ka asta tʼireraani imani engaksï no jatsikuarhipka. Enga na tʼireraapkia máru sinku mili achatichani, “Jesusi mítispti eska imecha jupiringa ka afuersasiksï páni paraksï rei úni, ísï jimbo ima mejori seguirispti késtakukuani ka niraspti juátarhu karhamani jandiajku” (Juanu 6:10-15). Ísï pauandikua, máteru ladurhu mari de Galilea, kʼuiripu ísku jarhasptia. Jimajkani, Jesusi arhispti kʼuiripuni eska jurhaspka Echerirhu para jorhendaani Tata Diosïri ambe ka no para jatsikuarhikua ambe íntsaani. Arhiaspti: “Ánchikuarhi je no para andani tʼirekua enga sóntku kʼamarajka, sino para andani indeni tʼirekuani enga jindeka para tsípikua méntkisï jatsini” (Juanu 6:25-27). w18.06 4 párr. 4, 5

Jesusi kurhangusïrendi na engaksï pʼikuarherenga imecha engaksï ísïpka komu arhó ma enga kuarhakurhitini jakia o komu mecha ma enga lámpara aseitiri jimbo jaka enga sánderku etskurhini jakaia. Jimbosï kurhangukuauendi, sési kaani ka tekantskua jingoni (Mar. 10:14). Ísïsti, jucha no úsïnga májkueni kurhangukuani ka jorhendaani kʼuiripuechani eska Jesusi. Peruchi úsïnga ka jatsiskachi para kurhangukuni imani kʼuiripuni engachi predikarikujka. Ju je exeni néna marhuasïni i ambe parachi mítini néna uandontskuarhini kʼuiripu jingoni, na jatinchi pʼorhembia ka na xáni ióni. Iásï, uánikua kʼuiripuechaksï ísï pʼikuarherasïndi eskaksï no sési kánhasïnga ka eskaksï no kuenta únhasïnga imani kʼuiripuecha jimbo engaksï kʼérati negosiuechani jatsiaka, politikuecha ka relijioniri orhejtsïkuticha jimbo engaksï no jurhimbikua jingoni jámajka ka no sésiksï kámpini (Mat. 9:36). Uánikuaksï no nemani mintsinharhisïndi ka nóksï ma erokuarhikua jatsisti. Jimbosï xáni jukaparhakueti eskaksï juchari uandakuecha ka na engachi uandontskuarhikuauaka, xarhataaka eskachi uékaasïnga ka kurhangukuani. Uánikua xanhari, kʼuiripu kurhaasïndi mensajini no solu jimbokachi mítiska Bibliaeri ambe o jimbokachi sési eksplikarikuasïnga, sino jimbokachi respetu jingoni kásïnga ka interesi xarhatakuani. w18.09 31, 32 párr. 13, 14

¿Nénachi xarhatasïni eskachi uétarhinchasïnga mítini Tata Diosïni ka úni ambe engajtsïni arhijka? Bibliani estudiariparini, kumpliripariani Tata Diosïri juramukuechani ka orheta péraparini para Jeobani marhuakuni. Engachi ísï úska, sánderuchi felisiuaka, ka juchari jakajkukua sánderu kʼéati Jeobaeri eiatsperakuechani jimbo engaksï nóteru ióndani kumplirikuarhiakia (Titu 2:13). Ambe ma enga kánikua jukaparhakueka parachi seguirini jarhani felisini, jindesti ambakiti pájperakua ma jatsini Jeoba jingoni. Apostuli Pablu karaspti: “Méntkisï tsípi je juchari Tata jimbo [o Jeoba jimbo]. Ka ménderuksïni arhisïnga: tsípi je” (Filip. 4:4). Para i jásï ambakiti pájperakua jatsini, uétarhisïndi Jeobaeri mímixekua jatsini (Prov. 3:13, 18). Peru parachi seguirini jarhani felisini, kánikua jukaparhakuesti eskachi seguiriuaka úni ambe engachi jorhenguarhiaka Bibliarhu. Jesusi uandaspti eska i ambe kánikua jukaparhakueska enga uandapka: “Engajtsï cha jánhaskajka ini ambe, ka úntsï eskaksïni ji na arhijka, tsípintsï jauaka” (Juanu 13:17; Sant. 1:25). Í ambesï uétarhijti úni para mítini Tata Diosïri ambe ka méntkisïchi felisini. w18.09 18 párr. 4-6

Epafrasi kánikua sési mítiaspti ka kánikua uandanhiasïrendi imecha jimbo. Ka nájkiruka jatsikuarhiapka imeri mismu problemechani, jimboka májku jásï ónhakata jarhaspka Pablu jingoni, útasï uandanhiasïrendi eskaksï máteruecha sési japiringa Tata Diosï jingoni (Filem. 23). Jarhuatasïrendi ka ísï xarhatasïrendi eska uékaasïrenga ka interesi páni imecha jimbo. Kómarhikua engachi újka erachichani jimbo, kánikua marhuasïndi, sánderia engachi nombri jimbo kómarhijpikuajka (2 Kor. 1:11; Sant. 5:16). ¿Náki erachichaksï uétarhinchaxaki eskachi kómarhijpikuauaka? Ju je úraani nombrichani. Májkueni eska Epafrasi, uánikua iásï anapu erachichaksï kómarhijpikuasïndi kúnguarhikuarhu anapuechani, o familiechani jimbo engaksï kʼérati uandanhiatechani jatsiaka o engaksï jatsika para erakuni ambe ma enga jukaparhakua ambeka o orhepani uérakuni tsʼéjkukuani ma. Ístu, nochi jatsiska para mirikurhiani imechani engaksï uarhiranchaka nemani, imechani engaksï tsípiti pakaraka desastre naturali ma jimbo o guerra ma jimbo ka imechani engaksï kómu nitamani jaka tumina jimbo. Xarharasïndi eskaksï uánikua erachicha jarhaska engachi jatsika para kómarhijpikuani. w18.09 5, 6 párr. 12, 13

Pablu no solu arhikuekaxapti íntspini jatsikuarhikua ambe, sino ístu uinhaperpintani, arhistatspini ka jarhuatani imani enga uétarhinchani jauaka (Uku. 20:31-35). Ambe enga Pablu uandapka ka úni, jorhendastijtsïni eskachi jatsiska para intsïmpitiini, úraparini juchari tiempu, uinhapikua, pendienti jarhani ka uékaani máteruechani. Inbestigadoricha engaksï kʼuiripuecheri jánguani ambe exejka (sociólogos) ístuksï uandasïndi eska intsïmpitiini, úsïnga eskachi felisiuaka. Seguni artikulu ma, kʼuiripuechaksï uandasïndi eskaksï sánderu felisisïnga engaksï ambakiti ambe újka máteruecha jimbo. Ísï eskaksï inbestigadoricha na uandajka, jarhuataani máteruechani úsïndi eskachi sési pʼikuarheraaka jimbokachi ambakiti ambe úsïnga enga kʼuiripu ma meru uétarhinchajka. Asta imecha engaksï mítikuka, arhijpisïndiksï eska para úni ambe ma máteruecha jimbo, úsïnga eska kuerpu no xáni pʼamenchakua ambe pʼiuaka ka para sánderu agustu pʼikuarherani. I ambejtsïni no ísku pakatasïndi juchantsïni engachi mítitini jaka eska Biblia Jeobaeri Karakateska, juchari Kueraajpiriri enga uékpitika (2 Tim. 3:16, 17). w18.08 22 párr. 17, 18

Ma profesiarhu enga Jesusiri ambe uandajka, Isaiasi uandaspti: “No jusgarpiati seguni eska na jáxeaka ma kʼuiripu, ni seguni eska na kurhajchpiaka. Ka jurhimbikua jingoni jusgariauati pobrichani” (Is. 11:3, 4). I uandakuechajtsïni kánikua uinhaperantasïndi. ¿Andi? Jimbokachi irekaxaka parhakpinirhu ma enga no xénchperanhajka. Iáminduechachi erokuarhixaka eska niáraaka ima jurhiatikua enga Jesusi jusgarpiaka, Juesi perfektu enga no solu imani ambe jimbojtsïni jusgariuaka seguni na engachi xarharaaka. Pauani pauani, niárasïngachi eratsini ambe ma máteruecheri. Jimbokachi no perfektueska, nochi úsïnga sési jusgarpini, ísï eska Jesusi na újka. Seguirisïngachi eratsini ambe ma imani ambe jimbojku engachi exejka. Peru nájkiruka ísïka, enga Jesusi Echerirhu japka, juramuchisptijtsïni parachi no jusgarpini seguni eska na xarharajka ma ambe, sino jusgarpini eska námindu jurhimbikueka. Eskachi na exekia, Jesusi uékasïndi eskachi seguiriuaka imeri ejempluni ka no imani ambejku exeni seguni eska na xarharaaka nema. w18.08 8 párr. 1, 2

Ísïsti, nochi kurhaasïnga imeri uandakuani auandarhu uératini. Peru arhisïndijtsïni ambe engachi úaka, úraparini imeri Karakatani, Bibliani. Ístu, espiritu santu jarhuatasïndi jántspirini parajtsïni seguirini jarhani jorhendani Tata Diosïri ambe komu publikasionicha jimbo, Interneti jimbo, bideuecha ka audiu jimbo (Luk. 12:42). ¿A no eskachi uánikua ambe intsïnhasïnga parachi jorhenguarhini Tata Diosïri ambe? Eska imeri uandakuecha engaksï Bibliarhu karakata jaka, úaka eskachi mintsikaaka eska ima iámindu ambe sési mítitixakaia ambe enga úaka ka eskajtsïni sési pʼikuastantaaka ambe uéjki engajtsïni Satanasi ka i parhakpini úchiaka. Ju je jingontku kurhajchani Jeobani. Engachi ísï úska, úakachi tekantani engachi no sési ambe nitamakuarhiaka iásï o sánderu orhepani. Bibliajtsïni miátantasïndi: “Ka uétarhisïndi eskajtsï nómindu kuatantaaka para eska engajtsï úska eska Diosï na jeiapanhintajka, chájtsï intsïnhaaka ambe engajtsï eiaminhaka” (Ebr. 10:36). w19.03 13 párr. 17, 18

Komu Moisesi jindepka enga ióni orhejtsïkupka iretani, jamberi Josue kurhamarhikurhipti néna exepirini ireta enga iásï ima orhejtsïkupiringia (Deut. 34:8, 10-12). Libru para inbestigarini, arini ambe uandasïndi ambe enga arhijka Josué 1:1, 2: “Desde iónisïa asta iásï jamberi, enga gobiernu ma mójtakurhijka, estadu jiáni menusi seguru jarhasïndi”. Josue no ísku jatinisï chéni japti, peru no ióni jimbo uénasptia ánchikuarhini Jeobani mintsinharhiparini (Jos. 1:9-11). Ka sési úspti enga ísï úpka. Biblia arhisïndi eska Jeoba jarhuataspka imani ka iretani ánjilini ma úraparini. Seguru eska ima ánjili jindepka “Uandakua”, orheta Uájpa Tata Diosïri (Juanu 1:1; Éx. 23:20-23). Jeobaeri jarhuajperata jimbo, ireta no úkua jukanchaspti imani ambe úni enga Josue arhiauenga jimboka iásï ima orhejtsïkutispkia. w18.10 22, 23 párr. 1-4

Jeoba jiókuarhiasïndi imechani engaksï tsípikua jingoni marhuakujka ka karasïndi imecheri nombri imeri ‘libru miántskuerirhu’. Peru paraka Jeoba no borrariuaka juchari nombri imeri ‘libru miántskuerirhu’, uétarhisïndi úni máru ambe. Malakiasi uandaspti eskachi jatsiska para janhanharhini Tata Diosïni ka eratsintani imeri nombrini. Engachi kómarhiska ambe ma o nemani enga no Jeobaeuaka, ima borrariuati juchari nombrini jima enga ísïika komueska libru ma tsípikueri (Éx. 32:33; Sal. 69:28). Ísï jimbo, aiakukuarheni Jeobani no solu arhikuekasïndi aiakuni eskachi imani ambe uáka enga ima uéjka ka itsï atakuarhini. Ma xanharkuchisï aiakukuarhejka ka itsï atakuarhini ka inde ambe sóntku tátsepani pakarasïndi. Parachi Jeobaeri parti jimbo jarhani ka imantku marhuakuni, arhikuekasïndi eskachi jatsiska para pauani pauani xarhatakuni úkuecha jingoni eskachi kurhajchasïnga (1 Ped. 4:1, 2). w18.07 23, 24 párr. 7-9

I ambe meru no ísku jatini úkuarhisïndi. Jatsiskachi para seguirini jarhani jánguarhintani. Parachi kristianu jánhaskati máeni, jatsiskachi para seguirini jarhani sánderu jorhenguarhini ka sánderu mímixetini. Jimbochisï someni pʼímarhinhajka pauani pauani arhintani Bibliani (Sal. 1:1-3). ¿Inde jindeski juchari meta? Pauani pauani arhintani Bibliani, jarhuataatijtsïni sánderu sési kurhanguani Tata Diosïri leichani ka konsejuechani. Para kristianuecha, lei enga sánderu jukaparhakueka, jindesti uékperani. Jesusi arhiaspti imeri chúxapatichani: “Ini jimboksï mítiati iámindu kʼuiripuecha eskajtsï jindeska juchiti jorhenguarhiticha engajtsï uékperaaka máteru ka máteruni jingoni” (Juanu 13:35). Santiagu, Jesusiri mediu ermanu uandaspti eska jindespka ‘lei enga sánderu kʼéri ambeka’ (Sant. 2:8). Ka Pablu uandaspti: “Uékperakua jimbo kumplirikuarhisïndi iámindu mandamientuecha” (Rom. 13:10). Biblia kánikua jukaparharasïndi uékperakuani, jimboka “Diosï jindeska uékperakua” (1 Juanu 4:8). w18.06 19 párr. 14, 15

Nájkirukaksï israelitecha Jeobanisï no kurhajchapka, Moisesi niáraspti kuatantani. Enga ísï no úpka pʼíngukuarhini, úspti eska uandapiringa no sáni eratsiparini ambe enga úkuarhinchapiringa. Moisesi jurajkuspti eska ima ambe engaksï máteruecha úpka, ójkutapiringa ka nóteru úsptia imani ambe enga Jeoba uékenga. Primeru xanhari engaksï israelitecha kejarikuarhipka itsï jimbo, Moisesi sési ambe úspti (Éx. 7:6). Peru jamberi iásï kuataraptia ka nóteru jánhaskania ambe úni imani kʼuiripu no kurhandirecha jingoni enga xáni ióni jámapkia. Jamberi sánderu eratsipti na enga pʼikuarherani japka ka eska Jeobani kʼéri ambe arhini. Enga ambakiti profeta ma komu Moisesi jurajkupka eska máteru ambe ójkutapiringa ka pekarini, juchajtuchi úpiringa májkueni nitamanchani. Ísï eska ima, nóteru ióndanchi jimbanhi parhakpinirhu jauakia engajtsïni Jeoba aiachika (2 Ped. 3:13). Nochi nema uékasïnga tsítakuarhini indeni kʼéri kóntperatani. Peru engachi uéjka jima jarhani, jatsiskachi para méntku eraani jarhani Jeobani ka méntkisï jánguarhintani imani ambe úni enga ima uéjka (1 Juanu 2:17). w18.07 15 párr. 14-16

Satanasijtsïni no uáti afuersa úrani imani ambe engachi jucha no uékaaka (Sant. 1:14). Uánikua kʼuiripuechaksï no kuenta íntskukuarhisïndi eskaksï imani ambe úxaka enga Satanasi uékajka. Peru engaksï jorhenguarhijkia jurhimbikuani, jatsistiksï para exeni nénksï uékasïni marhuakuni (Uku. 3:17; 17:30). Engachi mintsita jingoni uékaska kurhajchani Tata Diosïni, Satanasi no ma ambe uáti úni parachi jurajkuni Jeobani (Job 2:3; 27:5). Jarhasti máteru ambe engaksï Satanasi ka demoniuecha no újka úni. Por ejemplu, Bibliarhu, no nani arhisïndi eskaksï úsïnga mítini ambe engachi eratsijka o ambe enga juchari mintsitarhu jaka. Solu arhisïndi eska Jeoba ka Jesusijkusï újka ísï úni (1 Sam. 16:7; Mar. 2:8). Engachi jánguarhintaska xáni eskachi xáni uáka para uandani ka imani ambe úni enga Tata Diosï uéjka, uákachi seguru jarhani eska Jeoba no jurajkuaka eska Noambakiti uáka eskachi no intsïnhaaka tsípikua para méntkisï (Sal. 34:7). Uétarhisïndi eskachi mítiaka juchari enemiguni, peru nochi jatsiska para chérhini. Nájkirukachi no perfektueka, uákachi orhepani uérakuni Jeobaeri jarhuajperata jingoni. Engachi anhatsekuska Noambakitini, imajtsïni kéndikuchiati (Sant. 4:7; 1 Ped. 5:9). w18.05 26 párr. 15-17

Eranhaska eskari kʼéri ma biaji uáka autobusi jimbo parari tánguarhikuarhu ma nirani enga kánikua jukaparhakueka. Engari niárajka sentralirhu, uánikua autobusichaksï jarhasïndi jima. Peru jatsiakari para imani autobusini jatani engakini paaka nani engari uéjka nirani. Nori ísku jatini imani autobusini jataaka engakini máteru nani paaka. Tumbiichaksï ísïsti eska ima kʼuiripu enga sentralirhu jaka. Ka komuksï uánikua ambe jatsika para erakuni, uátiksï ménisï no jánhaskani ambe úni. Peru engaksï sési mítitini jaka naniksïsï uéjki nirani, sánderu fásiliuati eskaksï imani ambe erakuaka úni enga jarhuatauaka niárani jima engaksï uéjka. Uátsïcha ka tumbiicha, jánguarhinta je jaiapanherantani Jeobani. I ambe arhikuekasïndi úraani imeri konsejuechani irekuarhu para iámu ambe, komu para exeni sinksï estudiariua, ambeksï ánchikuarhia, sinksï uambucha o tembucha, o sinksï kaaua sapiichani. Ístu arhikuekasïndi andanguani imani metechani engaksïni andarheteraaka Jeobani (metas espirituales). Tumbiicha engaksï jánguarhintajka jaiapanherantani Jeobani, uátiksï seguru jarhani eska ima újchakurauaka ka eska sési nikuauaka irekuarhu. w18.04 25 párr. 1-3

Jefte kumplirispti ambe enga uandapka ka axaspti imeri uájpani Siló para tabernakulurhu marhuani para méntkisï (Juec. 11:30-35). Jefte úkua jukanchaspti ísï úni ka seguru eska imeri uájpa sánderia. Peru ima kumplirispti ambe enga táti jemba eiatspipka (Juec. 11:36, 37). I ambe arhikuekasïrendi eska no méni uambuchapiringa ni sapi kaani ka eska familiaeri erensia jima kʼamakurhipiringa. Jo, uétarhinchasïrendi eska kánikua uinhaperanhantapiringa ka jarhuatanhani. Biblia arhisïndi: “Niáraspti pʼindekua ma úkuarhini Israeli: Mándani uéxurhini, Israeli anapu uátsïchaksï nirasïrendi uinhaperantani Jefteri uájpa nanakani enga galaaditepka, tʼámu jurhiatikua mándani uéxurhini” (Juec. 11:39, 40). Iásï, ístu uétarhisïndi felisitariuani ka uinhaperantaani imani kristianuechani engaksï no tembuchatini jaka o uambuchatini ka ánchikuarhinksï jarhani “Diosïri ambe jimbo” (1 Kor. 7:32-35). w18.04 17 párr. 10, 11

Uánikua ánjiliksï Satanasi jingoni úkuarhisti. Ante de Dilubiu úkuarhini, Satanasi úspti eskaksï máru ánjilicha relasioni sexuali jatsipiringa nanakecha jingoni. Biblia ini ambe ísï xarhatasïndi enga uandajka eska dragoni ma, úsïnga eskaksï imani jingoni úkurhiaka tersera parti auandarhu anapu jóskuecha (Gén. 6:1-4; Jud. 6; Jaŋ. 12:3, 4). Engaksï ima ánjilicha jurajkupka Jeobaeri familiani, jurajkusptiksï para Satanasi kontrolariuani. Peruchi no jatsiska para eratsini eskaksï grupu máeska engaksï no organisadu jaka para no sési ambe úni. Satanasi sáno májkueni jásï juramukua ma ústi eska Tata Diosïri Reinu ka ima mísmu rei úkuarhisïndi. Organisariuasti demoniuechani gobiernuecha jimbo, íntsaasti juramukua ka interu parhakpiniri juramuti uásti (Efes. 6:12). Noambakiti úrasïndi ini organisasionini para imeri jájki jimbo jatsiani iámindu parhakpini anapu juramutichani. w18.05 23 párr. 5, 6

Komu Jeoba ambakiti Táti máeka ka uékantsïni, ménisïjtsïni jurhimberantasïndi. Dabidi jukaparharasïrendi indeni jurhimberantskuani. Eratsiantasïrendi Tata Diosïri konsejuechani ka jánguarhintasïrendi para ísï eratsini eska ima. Jurajkusïrendi eskaksï i konsejuecha jarhuatapiringa, o sea, eskaksï mójtakupiringa ka úni eska sánderu ambakiti kʼuiripu máepiringa. Engari tʼu májkueni uáka, sánderuri xénchaaka Jeobani ka sánderuri uékaaka kurhajchani. Ísturi niáraka ambakiti kristianu máeni. Pirenchi enga Christin arhinhajka, uandaspti: “Engani estudiarijka ka eratsintani ambe engani arhintajka, ísï pʼikuarherasïnga eska Jeoba karaska meru para ji”. Engari kʼuiripu máeka enga espiritualika, Jeobakini íntskuati mímixekua ka jánhaskakua parari ísï exeni eska ima na exejka parhakpinini ka ambe enga úkuarhiaka sánderu orhepani. Ísï uáti jimboka uékasïnga eskari mítiaka ambe enga sánderu jukaparhakueka irekuarhu, eskari ambakiti ambe erakuaka úni ka eskari no chéaka imani ambe jimbo enga úkuarhiaka sánderu orhepani. Profeta Isaiasi uandaspti eska Jeoba kuájchakuauaka imechani engaksï mintsita jingoni mintsikajka imani ka uáti eskaksï seguirini jauaka pínandikua jatsini (Is. 26:3). w18.12 26 párr. 9, 10