Nobiembri

Engachi marhuakujka Jeobani, úakachi erokuarhini eskajtsïni Jeoba íntskuaka iámindu imani ambe enga Adani ka Ebaeri kulpa jimbo no niáraka úkuarhini, enga jindeka irekani para méntkisï. Adani ka Ebaksï no uékaspti Jeobani marhuakuni, jimbokaksï no niáraspka mintsita jingoni xénchani. Nájkirukaksï ísï úpka, Jeoba jurajkuspti eskaksï seguiripiringa irekani paraksï kánguarhiani sapiichani ka eskaksï imecha mismu exepiringa néna kʼuiriperaani. Ambe enga niárapka úkuarhini engaksï Adani ka Eba nóteru uékapkia eska Jeoba juramukuapiringa, no ióndaspti xarharani eska no sési jarhaspka ambe engaksï erakupka úni. Imecheri orheta uájpa, uandikuspti ermanu jembani, ka tiempu jingoni, kʼuiripu niáraspti no sési kámpini ka no pendienti páni máteruecha jimbo (Gén. 4:8; 6:11-13). Peru Jeoba úpirindi ambe ma para pʼímutantaani Adani ka Ebaeri desendientichani engaksï uékapiringa imani marhuakuni (Juanu 6:38-40, 57). ¿A no eska Jeoba kánikua tekantstiska ka uékpitiini? Engari sánderu jorhenguarhiska na enga xáni tekantstiika Jeoba ka uékpitiini, jamberiri sánderu xénchaaka. Nori uékaaka májkueni no sési niátani eska Adani ka Eba, sinori uékaaka aiakukuarheni Tata Diosïni. w19.03 2 párr. 3; 4 párr. 9

Parachi úni kurhangutspini, ju je jánguarhintani kurhangukuani ambe engaksï nitamakuarhini jaka juchari familiarhu anapuecha ka erachicha. Ju je jarhuataani tumbiichani, imechani engaksï pʼamenchani jaka, engaksï jatirikia ka imechani engaksï uarhiranchaka nemani. Ju je kurhamarhiani nénaksï jámaxaki ka jingontku kurhajchaani ambe engajtsïni aianguaka. Ju je xarhatakuani eskachi meru kurhangukuasïnga ambe engaksï nitamakuarhini jaka. Ka aiakukuarhinchi para jarhuataani na engachi xáni úaka. Engachi ini ambe újka, ambakiti uékperakuachi xarhatasïnga (1 Juanu 3:18). Engachi jarhuataani jauaka máteruechani, ju je jánguarhintani kurhangukuani, jimbokaksï no iáminduecha májkueni ambe pʼikuarherasïnga engaksï uandanhiatechani jatsiajka. Maruksï no úkua jukanchasïndi uandantani uandanhiatecheri ambe, peru máruksï kʼuratsesïndi. Ísï jimbo, nájkirukachi uékaaka jarhuataani, nochi imani ambe kurhamarhiauaka enga no sési pʼikuastauaka (1 Tes. 4:11). Jamberichi no májkueni eratsiaka eska ima engajtsïni aiangukuarhijka na enga pʼikuarherani jaka. Peruchi jatsiska para kurhanguni eska ísïska ambe enga ima pʼikuarherani jaka. Ísï jimbo, jatsiskachi para jingontku kurhajchaani ka jurajkuni eskaksï uandaaka (Mat. 7:1; Sant. 1:19). w19.03 19 párr. 18, 19

¿Chésïndi jurhimbikueri ambe uandani uanikuechani japarhini? Ju je Neemiasiri ambe exeni enga rei ma jingoni ánchikuarhenga enga kánikua juramukua jatsipka. Enga kurhaapka eskaksï Jerusaleni anapu bardecha ka puertecha xerenhantaspka, Neemiasi kómu pʼikuarheraspti (Neh. 1:1-4). Úakachi jánhaskani na enga xáni chépka enga rei arhipka eska eiangupiringa andisï xáni kómu pʼikuarherani japi. Antesi de aianguni, Neemiasi jirejiresï kómarhikua ma úspti. Indeni ambe jimbo, rei kánikua jarhuataspti Tata Diosïri iretani (Neh. 2:1-8). Neemiasiri ejemplujtsïni jorhendasïndi eskachi jatsiska para kómarhini ante de mókuntani. Ístu, ju je exeni Jonasiri ejemplu. Enga Jeoba arhipka eska Nínibe nipiringa aianhpini, Jonasi xáni chéspti enga máteru ladu jimbo nípka (Jonás 1:1-3). Peru Tata Diosïri jarhuajperata jingoni, úspti úni imeri ánchikuarhitani ka ambe enga aianguapka ninibitechani, uánikuechani marhuakuaspti (Jonás 3:5-10). Jonasiri ejemplujtsïni jorhendasïndi eskajtsïni Jeoba úaka jarhuatani parachi marhuakuni, no arhiparini na engachi xáni chéni jauaka. w19.01 11 párr. 12

Engachi erakujka úni ambe engajtsïni Biblia juramuchijka, pájperakua máru juchari familiaricha ka amiguecha jingoni uáti mójtakurhini. ¿Andi? Jesusi kómarhispti Jeobani imeri chúxapaticha jimbo: “Pímbinhajkuanta indeni jimbo enga ísïka, chíti uandakua ísïsti” (Juanu 17:17). “Pímbinhajkuanta”, ístu úpirindi arhikuekani “támu péraa” o “jarharitaa”. Engachi jorhenguarhijka jurhimbikuani, nóteruchi parhakpini jingonisïngia jimbokachi nóteru májkueni ambe úsïngia. Kʼuiripujtsïni ménderueni exesïndia jimbokachi nóteru májkueni jámasïngia ka úsïngachi ambe enga Biblia uandajka. Nochi uékasïnga jarharperani, peru máru amiguecha o familiarichajtsïni jamberi jarhariati oksï no uékani eskachi jorhenguarhiaka jurhimbikuani. I ambejtsïni no ísku pakatasïndi, jimboka Jesusi uandaspka: “Kʼuiripuecheri ikiatspiticha jindeuatiksï mismu imecheri kʼumanchikuarhu anapuecha” (Mat. 10:36). Peru uandaspti eska engachi jurajkuska ambe uéjki jurhimbikua jimbo, kóntperatechani engachi intsïnhauaka sánderuksï ambakitiuati ka eska ima ambe engachi jurajkuaka. w18.11 6 párr. 11

Apostuli Pablu jukaparharaasïrendi imeri ermanuechani, ka xarhataspti indeni ambe na enga uandenga imecheri ambe. Por ejemplu, imeri kómarhikuecha jimbo méntkisï diosmeiamukua arhispti Jeobani imechani jimbo. Ka imani kartecha jimbo enga axakuapka, karaspti na enga xáni jukaparharauenga. Ju je exeni ejemplu ma. Roma 16:1-15 jamberi, uandaaspti 27 kristianuecheri nombrichani. Por ejemplu, miáspti eska Prisila ka Ákila uékasïrengaksï “íntspini tsípikua” imani jimbo ka uandaspti eska Fébe “jarhuataaspka uánikua kʼuiripuechani”, asta imani. Ísï jimbo, Pablu arhiaspti imeri ermanuechani enga xáni xénchauenga eskaksï kánikua sési úxapka na engaksï xáni jánguarhintani japka. Ima mítispti eskaksï imeri ermanuecha no perfektuespka. Nájkiruka ísïpka, sánderu ambakiti ambe karaspti imecheri ambe. Ísï jimbo, enga karta arhinhantapka kúnguarhikuarhu, imaksï kánikua sési pʼikuarherapti kurhaani ambe enga Pablu uandapka imecheri ambe. Ka seguru eskaksï sánderu xénchapka Pabluni. ¿Ísïskichi eska Pablu ka somenchi diosmeiamukua arhiasïni kúnguarhikuarhu anapu erachichani imani ambe jimbo engaksï uandajka ka úni? w19.02 16 párr. 8, 9

¿Uétarhisïni perfektueni para iámu mintsita jingoni marhuakuni Jeobani? Úpiringachi ísï eratsini jimbokachi míteska eskachi no perfektueska ka eskachi someni no sési ambe úsïnga. Peruchi no jatsiska para chéni jimboka Jeoba no méntku exeni jarhasïnga ambe engachi no sési újka. Imeri Karakata arhisïndi eska enga Jeoba solu imani ambe exeni japiringa engachi no sési újka, no nema úpiringa tsípiti jarhani (Sal. 130:3). Ima mítesti eskachi no iámindu ambe úsïnga sési úni ka eskachi no perfektueska ka jingontku jarhasïndi parajtsïni puáchentani (Sal. 86:5). Ístu, Jeoba mítesti nani engachi jamberi úaka úni ambe ma ka nójtsïni kurhachesïndi sánderu ambe (Sal. 103:12-14). Ambe engajtsïni jarhuataaka parachi iámu mintsita jingoni marhuakuni Jeobani, jindesti uékperakua. Jimboka Jeoba jindeska juchari Táti auandarhu anapu, jatsiskachi para xarhatakuni eskachi iámu mintsita jingoni xénchasïnga ka eskachi no méni jurajkuaka. Engachi seguiriska májkueni xénchani Jeobani, nájkirukachi tsʼéjkukuechani nitamakuarhiauaka, arhikuekasïndi eskachi iámu mintsita jingoni marhuakuxaka (1 Crón. 28:9; Mat. 22:37). Mítiskachi eska ambe enga Jeoba juramujka, sési jarhaska ka ambe engachi sánderu jukaparharajka, jindesti juchari Táti auandarhu anapuni jaiapanherantani. Uékperakua engachi Jeobani jimbo pʼikuarherajka, úsïndi eskachi antesi de erakuni úni ambe ma, orheta exeaka na eratsisïni Jeoba ima amberi ka ísïchi xarhatasïnga eskachi iámu mintsita jingoni marhuakuxaka. w19.02 3 párr. 4, 5

Méntkisï engachi exejka na engajtsïni xáni marhuachijka úni ambe enga sési jaka, juchari jakajkukua sánderu uinhapiti jarhasïndi (Sant. 1:2, 3). Engachi újka eska Jeoba tsípiaka arhintsïni eskachi imeri uájpeska, sésichi pʼikuarherasïnga ka sánderuchi uékasïnga jaiapanherantani (Prov. 27:11). Mándani tsʼéjkukua engachi nitamanchajka, oportunidadi máesti parachi xarhatani eskachi iámu mintsita jingoni marhuakuxaka Jeobani (Sal. 119:113). Mintsita jingonchi xénchasïnga Jeobani ka meruchi uékasïnga kumplirini ambe engajtsïni ima juramuchijka ka úni ambe enga ima uéjka (1 Rey. 8:61). Ísïsti, iáminduechachi niárasïnga no sési ambe úni, jimbokachi no perfektueska. Enga inde ambe úkuarhiaka, ju je miántani rei Esekiasiri ejempluni. Ima niáraspti no sési ambe úni, peru moantaspti ka seguirispti Jeobani marhuakuni iámu mintsita jingoni (Is. 38:3-6; 2 Crón. 29:1, 2; 32:25, 26). Ísï jimbo, ju je no jiókuarhini imani ambe eratsini enga Satanasi uéjka. Ju je kurhakuni Jeobani eskajtsïni jarhuataaka ambakiti mintsita ma jatsini ka nochi méni jurajkuaka (1 Rey. 3:9; Sal. 139:23, 24). w19.01 19 párr. 17, 18

Marhuachisïndijtsïni komentarini tánguarhikuecharhu (Is. 48:17). ¿Néna? Primeru, engachi jatsikukuarhiska meta para tarhatani jájki, sánderuchi sési prepararikuarheaka para tánguarhikuecha, sánderuchi sési kurhanguaka Tata Diosïri Karakatani ka sánderuchi úraaka juchari irekuarhu imani ambe engachi jorhenguarhiaka. Segundu, jamberichi sánderu sési pʼikuarheraaka tánguarhikuarhu jarhani, jimbokachi sánderu komentariuaka. Ka terseru, jimboka uétarhisïnga eskachi kánikua jánguarhintaaka para komentarini, nochi sóntku mirikurhiaka ambe engachi uandaaka.Ístu, Jeoba kánikua sési pʼikuarherasïndi engachi uandajka na engachi xáni jakajkujka. Úakachi seguru jarhani eska imajtsïni kurhaasïnga ka kánikua jukaparharani na engachi xáni jánguarhintajka para komentarini tánguarhikuecharhu (Mal. 3:16). Ístu, újchakurasïndijtsïni parajtsïni xarhatacheni eska jukaparharasïnga engachi jánguarhintajka ísï úni (Mal. 3:10). Ísï jimbo, kánikua sésisti komentarhini. w19.01 8 párr. 3; 10 párr. 7-9

Na engajtsïni kámajka Jeoba, xarhatasïndi na enga xáni jánhastiika. Enbesi dejtsïni uánikua leichani íntsaani, tekantskua jingontsïni jorhendasïndi néna úni iámindu ambe uékperakua jimbo. Uékasïndi eskachi úrauaka imeri prinsipiuechani ka eskachi kurhunhiaka no sési jásï ambe (Rom. 12:9). Sermoni del Monte jimbo, imeri Uájpa Jesusijtsïni jarhuatasti kurhanguni andiksïsï kʼuiripuecha no sési jásï ambe újki (Mat. 5:27, 28). Ka komu Rei Tata Diosïri Reinuerirhu, jimbanhi parhakpinirhujtsïni seguirini juáti jorhendani parachi ísï exeni imani ambe enga sési jaka ka enga no sési jaka eska ima na exejka (Ebr. 1:9). Ístu uáti eska juchari kuerpu ka eratsikua perfektueuakia. Eranhaska: nóteruri méni uékaka pekadu ambe úni, níteruri méni no sési nitamakuarhini pekadu jimbo. Jiáni kʼóruri ‘xarhantaakia tʼíntskua jingoni’ ori perfektueni ísï eskakini Jeoba na aiachika (Rom. 8:21). Ísïsti, nóchi méni jatsiaka iámindu libertadi, (1 Juanu 4:7, 8). w18.12 23 párr. 19, 20

Israelita ma úpirindi diborsiarikuarhini témberi enga kuenta íntskukuarhipiringa eska témba úspka “ambe ma enga no sési jaka”. ¿Ambe úpirini jindeni ima ambe “enga no sési jaka”? Lei no uandasïrendi ambespi inde ambe. Peru imani ambe arhikuekendi enga kánikua no sési japka o kʼuratsekua ambeni, no imani ambe enga no xáni kʼéri ambepiringa (Deut. 23:14). Xáni no sési enga Jesusiri jurhiatikuecha jimbo, uánikua judiuechaksï ambe uéjki jimbo uékenga diborsiarikuarhini (Mat. 19:3). Peru juchachi no uékasïnga ísïni eska imecha. Profeta Malakiasiri jurhiatikuecha jimbo, achatichaksï pʼindespti diborsiarikuarhini imecheri uarhiiticheri, jamberi paraksï sánderu sapichu uarhiiti ma jingoni tembuchantani enga no Jeobani kómarhienga. Malakiasi uandaspti na enga eratsenga Jeoba inderi ambe. Karaspti eska Jeoba kurhunhisïnga enga nema diborsiarikuarhijka (Mal. 2:14-16). Desde uénakuarhu, Tata Diosï májkueni exesïndi temungurhirikuani enga uandapka eska achati ma jatsiska para “kúnguarhini imeri uarhiiti jingoni” ka ‘tsimarhanksï májku kuerpueni’ (Gén. 2:24). Ka Jesusi xarhataspti eska apoiarisïrenga na enga eratsijka imeri Tátemba enga uandapka: “Imechani enga Diosï kúndaaka, asï nema jáme jarhangutaantani” (Mat. 19:6). w18.12 11 párr. 7, 8

Máru erachichaksï jatsisïndi modu para iauanisï mótsini para Jeobani marhuakuni. Imecheri eratsikua májkueni jásïsti eska profeta Isaiasiri. Jeoba kurhanguarhispti: “¿Néni axaa, ka né niua juchantsïni jimbo?”, Isaiasi mókuntaspti: “¡Ixú jarhaska ji! Jíndini axa” (Is. 6:8). ¿Uékasïnchi májkueni mókuntani enga jauaka oportunidadi ma ka modu para ísï úni? Aianhpikueri ambe uandaparini ka disipulu uáni, Jesusi uandaspti: “Kómarhichkanderu je pʼikuntskueri Dueniuembani eska axauaka máruteru ánchikuarhirichani imeri pʼikuntskuarhu” (Mat. 9:38). ¿Uáchi marhuani komu prekursoricha nani enga uétarhini jaka para sánderu aianhpini? O ¿uáchi jarhuatani máteru nemani para inde ambe úni? Para uánikua erachicha, paraksï úni sánderu sési xarhatani imecheri uékperakua Jeobani jimbo ka kʼuiripu, jindesti marhuani komu prekursoricha imani lugaricharhu nani engaksï uétarhini jaka aianhpiricha. ¿Jarhaskiksï máteru oportunidadicha para sánderu marhuakuni Tata Diosïni? Engachi aprobechariuaska, kánikuachi sési pʼikuarheraaka. w18.08 27 párr. 14, 15

Ebanjeliuechaksï sési xarhatasïndi na enga exejka Jeoba jatsikuarhikueri ambe. Ima sési erakuaspti Jesusiri táti jembechani paraksï tʼarhexerani ixú Echerirhu, temungurhirini ma engaksï no káni jatsikuarhiripka (Lev. 12:8; Luk. 2:24). Biblia arhisïndi eska enga Jesusi andajpenupka, Maria apontskaspti chekakuarhu ma jimboka nóteru jarhaspkia lugari paraksï imecha pakarani (Luk. 2:7). Enga Jeoba uékapiringa, úpirindi ambakiti lugari ma íntsaani para imeri Uájpa andajpenuni. Peru ambe enga ima sánderu uékenga, jindespti eska imeri Uájpa familiarhu ma tʼarhexepiringa enga orheta pérapiringa Tata Diosïri ambe. Engachi jorhenguarhijka ini istorieri ambe, kuenta íntskukuarhisïngachi na enga exejka Jeoba jatsikuarhikua ambe. Máru tátichaksï kánikua jánguarhintasïndi ambakiti ambe íntsani uájpechani, nájkiruka inde ambe uáka eskaksï nóteru jatsiakia ambakiti pájperakua ma Jeoba jingoni. Peru ambe enga sánderu jukaparhakueka para Jeoba, jindesti eskachi ambakiti pájperakua ma jatsiaka imani jingoni. ¿Ka juchachi niáraskia ísï eratsini eska Jeoba? ¿Ambeksï xarhatasïni juchari úkuecha? w18.11 24 párr. 7, 8

Tata Diosï úsïndi eska jauaka felisidadi, ka jimbosï uékajti eskachi jucha felisiuaka ka íntsasïndijtsïni rasonichani parachi felisini (Deut. 12:7; Ecl. 3:12, 13). Peru ini parhakpini jimbo, jamberi uáti no xáni fásilini para felisini. ¿Andi? Jarhasti mámaru ambe enga újka eskachi no uáka felisini, komu tsïtani ánchikuarhita, diborsiu ambe, enga nema ekspulsarinhajka o engachi uarhiranchajka nemani. Problemecha familiarhu, engajtsïni kompanieruecha ánchikuarhitarhu o eskuelarhu anapuecha teresmarhujka, engajtsïni no sési kámajka relijioni jimbo o engachi ónhanhajka, i ambejtu uáti ójkutakua máeni parachi nóteru felisinia. Ka ístu enga juchari kuerpu sánhani arhini jauaka chkeni o engachi kʼéri pʼamenchakua ma kánguarhiaka o depresioni. Peru ju je miáni eska Jesusi tsitisïrenga sési pʼikuastantaani kʼuiripuechani ka úni eskaksï felisipiringa (Mat. 11:28-30). Sermoni del Monterhu, Jesusi uánikua ambe uandaspti enga újka eskachi felisiuaka, nájkirukachi Satanasiri parhakpini jimbo uánikua ambe nitamakuarhiaka engajtsïni no sési pʼikuastaaka. w18.09 17 párr. 1-3

Para máru kʼuiripuecha, fásilisti jurajkuani pʼindekuechani engaksï na mítijkia eska Tata Diosï no jeiapanhiantasïnga. (Prov. 23:23) Para máteruecha uáti jindeni ambe ma enga kánikua úkua jukaaka jurajkuani paraksï úni konseguirini jurhimbikuani. Jamberiksï no uékani jauati jurajkuani pʼindekuechani jimbokaksï imecheri familiaricha, ánchikuarhitarhu anapu kompanieruecha ka amiguecha niáraaka no sési kaani. Ka uáti sánderu úkua jukani enga pʼindekua jindeka para kʼuínchikua úkuantani uarhirichani. Máteru erachicheri ejemplu engaksï balori xarhataka, uátijtsïni jarhuatani parachi mójtakuni ambe enga xáni uétarhiaka. ¿Ambeksï úspi Efesu anapuecha engaksï kristianu úkuarhipka? Biblia arhisïndi: Eskaksï juaspka imecheri libruechani ka kurhiraanksï iámindu kʼuiripuechani japarini, ka kuenta pʼikuntasptiksï imani libruecheri, sinkuenta mili pesu [“piesa plateri”, TNM]. (Uku. 19:19, 20). Imaksï kristianuecha uékaspti kurhiraani imani libruechani engaksï xáni jukaparhapka, peruksï kóntperatechani intsïnhaaspti engaksï kánikua sánderu jukaparhaka eska ambe uéjki. w18.11 7 párr. 15, 16

Ísï tátsekua enga ireta parhikupkia ríu Jordanirhu, Josue exespti achatini ma enga espada ma jupikatini japka. Ima jindesti “jefe Jeobaeri ejersitueri”, enga listu japka para kuájchakuni Tata Diosïri iretani (Jos. 5:13-15 ka nota). Ánjelini ma úraparini, Jeoba íntsaaspti Josueni instruksionichani néna enga úpiringa andani ireta Jerikoni. Jamberiksï ima instruksionicha ísï xarharendi enajkiksï no marhuapirini. Por ejemplu, Tata Diosï juramukuaspti eskaksï iámindu achamasïchani sirkunsidariuapiringa. Indeni ambe jimbo, soldaduechaksï no úpirindi uánikua jurhiatikua jimbo uarhipeni. (Gén. 34:24, 25; Jos. 5:2). Jamberiksï ima soldaduecha engaksï no úpiringa uarhipeni kurhamarhikuarhendi nénaksï kuájchakuapirini imecheri familiechani engaksï enemiguecha uékapiringa imecha jingoni uarhipeni. Peru Jeriko anapu achatichaksï chéspti enbesi deksï uarhipeni israelitecha jingoni, no nema erokuarhisïrendi eska inde ambe úkuarhipiringa. Biblia arhisïndi: “Jeriko sési míkuarhitixapti israelitechani jimbo; no nema úsïrendi uérani ni inchani” (Jos. 6:1). Seguru eska i ambe enga úkuarhipka, úspka eskaksï israelitecha sánderu mintsikapiringa Jeobaeri jarhuajperatani. w18.10 23 párr. 5-7

¿Nénachi uá májkueni kaxumbitini eska Pablu? Ma ambe engachi uáka úni, jindesti eskachi no jatsiska para tsitini eskajtsïni kʼéri ambe arhiaka imani ambe jimbo engachi Jeobaeri jarhuajperata jimbo újka. Jatsiskachi para kurhamarhikuarhini: “¿Néna exesïni kʼuiripuni engani predikarikujka? ¿No sési exesïni kʼuiripueri rasani ma ísï eskaksï máteru kʼuiripuecha?”. Kánikua sési jarhasti engaksï Jeobaeri testiguecha seguirini jaka jirinhantaani kʼuiripuechani engaksï jiókuarhijka jurhimbikuani. Para i ambe úni, ménisï uétarhisïndi eskaksï máru kristianuecha jorhenguarhiaka idiomani ka pʼindekuechani imani kʼuiripuecheri engaksï máteruecha no xénchajka. Íksï erachicha no sánderu kʼéri exekuarhisïndi eska imecha, sánderu sési, jánguarhintasïndiksï kurhangukuni mándani arhini kʼuiripuni paraksï mítini nénaksï jarhuataua jiókuarhini Reinueri ambe. w18.09 5 párr. 9, 11

Roma anapuechaksï uándikuspti Judasïni. Aparte de Judasï ka máteru kʼuiripuecha, sáno iámindu judiuechaksï uékaxaptia eska Mesiasi janopiringa, jimbokaksï erokuarhisïrenga eska politikeri orhejtsïkuti máepiringa enga pʼímutantaapiringa Romaeri juramukuarhu ka eskaksï judiuecha úpiringa ménderu jandiajku juramukuarhini (Luk. 2:38; 3:15). Uánikuaksï eratsisïrendi eska Mesiasi uaxastapiringa juramukua ma Israeli. Enga inde ambe úkuarhipiringa, uánikua judiuecha engaksï máteru nanisï irekani japka, úpirindiksïa imecheri iretarhu níntani. Asta Juanu el Bautista kurhamarhispti ma xanhari Jesusini: “¿Tʼu jindeski ima enga jupiringa o erokaachi máteruni?” (Mat. 11:2, 3). Jamberi uékendi mítini sini máteru kʼuiripuepirini enga kumpliripiringa ambe engaksï judiuecha erokuarhini japka. Enga Jesusi tsíntapkia, tsimani imeri chúxapatichaksï exentaspti Jesusini xanharu jimbo engaksï Emaúsi nirani japka ka arhisptiksï eska Mesiasi no úspka ambe engaksï erokuarhini japka eska úpiringa (Luk. 24:21). Ka ísï tátsekua, apostulichaksï kurhamarhispti Jesusini: “Tata, ¿tʼuri iásïtki íntsantaua juramukua Israeli anapuechani?” (Uku. 1:6). w18.06 4 párr. 3, 4

Jatsiskachi para sánderu jingontku jámani engachi chkuanderakua ambe kurhaska Tata Diosïri ireteri. Nochi mirikurhiaka eska Satanasi méntku no sési jásï ambe jauatakuani jarhasïnga Tata Diosïri ambakiti marhuarichani (Jaŋ. 12:10, TNM). Jimbojtsïnisï Jesusi adbertirichipti eskaksï juchari enemiguecha chkuanderakua ambe uandapiringa juchari ambe (Mat. 5:11). Engachi sési jimbo jakajkuska ini adbertensiani, nochi no sési exeaka engachi chkuanderakua ambe kurhaska Tata Diosïri ireteri ambe. ¿Tsitisïnchi axakuani korreu elektronikuechani ka mensajichani juchari amiguechani ka imani engachi mítiaka? Engachi exejka notisia ambe enga interesanti jaka o experiensia ma kurhaani engachi tsitiaka, ¿ísïskichi eska ima reporteru enga orhetku uéjka eianhpini? Antesi de axani mensaji ma o korreu ma, uétarhisïndi kurhamarhikuarhini: “¿Seguru jarhaski eska i informasioni ísïiska? ¿Jatsiski iámu informasioni?”. Engachi no seguru jaka, úpiringachi aianguani juchari erachichani informasioni enga no ísïika. Ísï jimbo, sánderu sésisti eskachi jaiaskuaka botonini para borrarini ka no imani enga jindeka para axani. w18.08 3 párr. 3; 4 párr. 6, 7

Jesusi uékasïndi eskachi tsípikua jingoni irekaaka ka jimbojtsïnisï arhijti eskachi intsimpitiuaka. Uánikuaksï sési jiókuarhisïndi engachi jarhuatajka. Ísïsti, no iáminduechaksï jiókuarhisïndi imani ambe engachi tsípikua jingoni íntsaajka, peru imecha engaksï jiókuarhijka, úsïndi eskaksï imajtu májkueni intsïmpitiuaka. Ísï jimbo, ju je intsïmpitiini nájkiruka ísï xarharaka eska kʼuiripu no jukaparharasïnga. Nochi mítiska na xáni uá jarhuataani engachi sapichitu ambejku úska máteruecha jimbo. Ima enga mintsita jingoni intsïmpijka, no erokuarhini jarhasïndi eska intsïnhantaaka ambe ma. Jesusi mítitixapti ini ambe, jimbosï uandapti: “Sino engari tʼu prebeniriaka ma tʼirekua, mejori kombidaria imechani engaksï pobriika ka ístu imechani engaksï tokojtaka o imechani engaksï nómindu újka xanharani ka sieguechani, ka ísïri sánderu sési uéraaka [o tsípiaka], jimbokaksïni imecha no uáka meiamuntani” (Luk. 14:13, 14). Biblia uandasïndi eska ima enga intsïmpitiuaka, kóntperatechani intsïnhauaka ka ístu uandasïndi eska felisisïnga ima enga sési kájka imechani engaksï uétarhinchani jarhajka (Prov. 22:9; Sal. 41:1). Meru ísïsti, intsïmpitiskachi jimboka jarhuataani máteruechani kánikua sési pʼikuarherakuarhisïnga. w18.08 21, 22 párr. 15, 16

Úkua jukasïndi jatsini iámu informasioni ambe máeri ka sési exeni imani ambe, jimboka sáno iámu informasioni engachi intsïnhajka no kompletuesïndi, uánikua ambe chkuanderakuesïndi ka jimbokachi no perfektueska. ¿Ambejtsïni uá jarhuatani? Eskachi jatsiska para kumpliriuani Bibliaeri prinsipiuechani. Ma prinsipiu arhisïndi eska sóntku mókuntani ante de kurhaani iámindu ambe, tontukueska ka kʼuratsekua ma (Prov. 18:13). Máteru prinsipiujtsïni miátantasïndi eskachi no jatsiska para iámindu ambe jakajkuni sini exeni eska ísïska (Prov. 14:15). Últimu, no arhiparini na xánchi ióni páxakia marhuakuni Jeobani, nochi jatsiska para mintsinharhikuarhini. Bibliaeri prinsipiuechajtsïni kuájchakusïndi engajtsïni jarhuatajka jirinhantani informasioni enga segurueka ka imani jarhuajperatechani úraani engaksï mintsinharhikueka para imani ambe eratsini enga ísïika ka ambakiti ambe erakuni úni. w18.08 7 párr. 19

Engachi itsï atakuarhijkia, jiókuarhisïngachi máteruechani japarini eskachi jucha Jeobaeriska ka eskachi uékasïnga kurhajchani. Jesusi sáno májkueni ambe úspti enga itsï atakuarhipka, jimboka ísïspka komu arhini imeri Tátini: “Úni imani ambe engari tʼu uéjka, oh juchiti Tata Diosï, kʼéri tsípikuarhita máesti” (Sal. 40:7, 8). ¿Néna pʼikuarheraspi Jeoba enga Jesusi itsï atakuarhipka? Biblia arhisïndi: “Eska na bautisarikuarhipka Jesusi, luejku uémintaspti itsïrhu, ka auanda mítakuarhispti, ka ima exespti Diosïri Espirituni kétsini jarhani ísï jásï komueska ma palomasï, ka andajtsïkuerani imani. Ka luejku kurhaakuarhispti ma uandakua auandarhu uératini enga arhienga: ‘I jindesti juchiti Uátsï engani ji xáni uékajka ka engani jimbo xáni tsípikuarhijka’ ” (Mat. 3:16, 17). Jeoba kánikua tsípispti enga imeri Uájpa aiakukuarhepka imantku marhuakuni nájkiruka Jeobaeripkia. Májkueni, Jeoba kánikua tsípikua jingoni jiókuarhisïndi engachi aiakukuarhejka ka újchakuraatijtsïni (Sal. 149:4). w18.07 23 párr. 4, 5

Enga uandapka “jucha”, jamberi úpirindi arhikuekani eska ima ka Aaroni. Ambe enga uandapka, xarhataspti eska no sáni janhanharhispka Jeobani, imani enga úpka milagruni. Salmo 106:32, 33 arhisïndi: “Úsptiksï eska [Jeoba] ikiapiringa jima enga Meribá anapu itsï japka ka imecheri kulpa jimbo no sési nikuspti Moisesini. Jimbokaksï kurhurajkuspkia Moisesini, ima uénaspti no sáni eratsiparini uandani” (Núm. 27:14). Ambe enga Moisesi úpka, no kʼéri ambe arhispti Jeobani. Jeoba arhispti Moisesini ka Aaronini: “Chájtsïni no kurhajchaska ambe engaksïni ji juramuchipka” (Núm. 20:24). Meruksï kʼéri pekadu ma úspti. Antesi, Jeoba no sésikua íntskuaspti eskaksï inchaakupiringa Kanaani méntku ma jenerasioni israelitecheri engaksï no kurhandirapka (Núm. 14:26-30, 34). Jimbosï jatsipti para májkueni úni Moisesini jingoni enga no kurhajchapka Jeobani. Ima no inchapirindi Echerirhu enga Aiaminhapka. w18.07 14 párr. 9, 12; 15 párr. 13

Enga erachi ma no arhajka alkoli jimboka imeri konsiensia no jurajkusïnga, ¿a no eskachi juchajtu tsípikua jingoni jiókuarhipiringa no arhani parachi no pekadu ambe úrani? Jo, ísïchi úpiringa. Jarhastiksï erachicha engaksï jukari kauienga ante deksï Testigueni, peru iásïksï jánguarhintaxati méntku no sáni alkoli arhani. Seguru eskachi no uékasïnga eskaksï ménderu uéntaaka kauini ka no sési ambeksï úkuarhinchani (1 Kor. 6:9, 10). Ísï jimbo, engachi kopa ma uékaaka íntskuni erachini ma ka ima no jiókuarhini, nochi uékperakua xarhatakuni japiringa engachi afuersa uékapiringa íntskuni. Ju je Timoteueri ejemplu exeni. Enga 20 ísï jatiripkia, jurajkutakuarhispti paraksï sïkuiri pʼikuni jima enga tatakenhaka (circuncisión), ima operasioni kánikua pʼamesïrendi, peru Timoteu úspti indeni ambe jimboka no uékasïrenga no sési pʼikuastaani judiuechani enga predikarikuapiringa. Imani ambe úparini, ísï jámaspti eska apostuli Pablu (Uku. 16:3; 1 Kor. 9:19-23). ¿Ka juchaia? ¿Tsípikua jingonchi uá sakrifisiu ma paraksï máteruecha sési jarhani? w18.06 18, 19 párr. 12, 13

Engari mítika nemani enga no Testigueka, ¿nari xáni mítiski imeri ambe? Jamberiri sántku mítika komu na enga arhinhajka ka na enga xarharajka. Peru kánikua ménderuenisti engari Testiguni ma mítijka. Mítiskari eska ima xénchasïnga Jeobani ka eska Tata Diosï ambakiti ambe exekuska jimbosï pʼímarhiti para imeri kúnguarhikuarhu jarhani (Juanu 6:44). Nájkiruka máteru rasa, kultura o paisirhu anapueuaka, uánikua amberi mítisïngia imeri ambe ka ima chíti ambe. Por ejemplu, sóntkuri kuenta íntskukuarhisïnga eska májku jásï “idioma” uandasïnga eska tʼu: “Pímbinhasï uandakua” jurhimbikueri. Tsimarhantsï májkueni ambe jakajkusïnga Tata Diosïri ambe, mítiaskajtsï imeri juramukuechani ka ambakiti ambe enga úkuarhiaka sánderu orhepani ka máteru ambe. Ka i jindesti ambe enga sánderu jukaparhakueka engachi uáka mítini máteru kʼuiripueri, jimboka i ambesï újka eskachi mintsikaaka imani ka enga újka eskachi ióni sési pájperaaka. w18.12 21 párr. 9, 10

Tata Jesukristueri jarhuajperata jimbo, kuerpu gobernanti uandaspti eskaksï kristianuecha engaksï no judiuepka nóksï uétarhinchasïrenga sirkunsidarikuarhini (Uku. 15:19, 20). Peru tátsekua, uáni kristianu judiuechaksï seguirixapti sirkunsidariuani imeri uájpechani. Buenu, jamberichi uandaaka: “Enga Jesusiri uarhikua jingoni Moisesiri Lei nóteru marhuajkia, ¿andisï Jesusi jurajkupi eska ióni jamberi japiringa problema?” (Kol. 2:13, 14). Máruksï ióndasïndi kurhanguni jimbanhi eksplikasioni ma ambe máeri. Judiuecha engaksï kristianuepka kánikuaksï tiempu uétarhinchaspti paraksï ménderueni exenia sirkunsisioniri ambe (Juanu 16:12). Máruksï úkua jukanchaspti kurhanguni eska sirkunsisioni nóteru arhikuekasïrengia seniali ma eskaksï ambakiti pájperakua ma jatsispka Tata Diosï jingoni (Gén. 17:9-12). Máteruechaksï chésïrendi eskaksï no sési kánhapiringa imecheri iretarhu jimbokaksï ménderuenispkia (Gal. 6:12). Peru tiempu jingoni, tata Jesukristu íntsaaspti sánderu jarhuajperata kartechani jimbo engaksï apostulicha karaapka (Rom. 2:28, 29; Gal. 3:23-25). w18.10 24, 25 párr. 10-12

Kaifási soldaduechani axaaspti paraksï chúrikua jupikani Jesusini. Peru ima tʼuini mítitixaptia imani ambe. Jimbosï últimu senarhu, arhiapti imeri apostulichani eskaksï jirinhaapiringa máru espadechani. Tsimani espadecha jingontku, ambakiti ambe jorhendaapirindi (Luk. 22:36-38). Ima mísmu chúrikua, Pedru kánikua no sési exespti ambe enga úkuarhini japka enga jamberi espada ma jingoni atapka soldaduni ma enga nípka Jesusini jupikani (Juanu 18:10). Peru Jesusi arhispti Pedruni: “Jatsiranta chíti espadani, jimboka iáminduecha engaksï espada jimbo atajpiaka, espada jimbo uarhiatiksï” (Mat. 26:52, 53). Ambe enga jorhentpipka jiáni, xarhataspti imani ambe enga Jesusi tʼuini uandapkia kómarhikuarhu: eskaksï imeri chúxapaticha no jatsispka para i parhakpini anapueni (Juanu 17:16). Jatsisptiksï para jurajkuni eska Jeoba sési péntapiringa imani ambe. Engachi juchajtu ísï úska, uákachi májku kʼéri jarhani ka pínandikua jingoni. Seguru eska Jeoba kánikua tsípisïnga exeni na enga imeri ireta májku kʼéri jaka ka no ísï eska parhakpini anapuecha engaksï no újka sési pájperani (Sof. 3:17). w18.06 7 párr. 13, 14, 16

Iásï, ju je exeni ambe xáni úrasïni Satanasi parachi jurajkuni Jeobani. Por ejemplu, úraasïndi gobiernuechani parajtsïni no jurajkuni eianhpini. Ka ístu úraasïndi ánchikuarhiteri o eskueleri anapu kompanieruechani parajtsïni teresmarhuni, jimbokachi uékasïnga Jeobaeri pímbinharhati juramukuechani kumpliriuani (1 Ped. 4:4). Ístu, uáti úraani juchari parientichani parajtsïni desanimarini parachi nóteru nirani tánguarhikuecharhu, nájkirukaksï sési ambe uéjka para jucha (Mat. 10:36). ¿Nénachi uá orhepani uérakuani ini tsʼéjkukuechani? Primeru, ju je jiókuarhini eska i ambe jatsiska para úkuarhini, jimboka Satanasi uarhiperaxaka juchantsïni jingoni (Jaŋ. 2:10). Segundu, ju je no jurajkuni eskaksï i problemecha uáka eskachi mirikurhiaka imani ambe enga Satanasi uandajka: eskachi solu jiáni marhuakusïnga Jeobani engachi sési jarhajka ka eskachi niáraaka jurajkuni engachi no sési kánhaaka (Job 1:9-11; 2:4, 5). Ka últimu, ju je kurhakuni Jeobani eskajtsïni íntskuaka uinhapikua parachi aguantarini. Ju je miáni eskajtsïni Jeoba no méni jurajkuaka (Ebr. 13:5). w18.05 26 párr. 14

Nóchi méni jatsiska para mirikurhini na enga xáni jarhuatajka kʼuiripuni juchari eianhpikua, nájkirukajtsïni ménisï no uékaaka kurhajchani. Ísïsti eskajtsïni uánikuecha no uékasïnga kurhajchani, peruksï exesïndi ambe engachi újka. Exesïndiksï eskachi sési xukuparhatini nirasïnga, eskachi sési kámpisïnga ka eskachi méntkisï tsípikua jingoni jámasïnga. Jamberi i ambe uáti eska tiempu jingoni, imechaksï nóteru no sési ambe eratsiakia juchari ambe. Sergio ka Olinda engaksï prekursorika, uandantasïndiksï: “Ma tiempuchi no niraspka plasa, jimbokachi pʼamenchaspka. Engachi ménderu nípkia, kʼuiripujtsïni kurhamarhisïrendi ambechi úkuarhinchaspi ka arhisïrendijtsïni eskajtsïni kánikua jirinhantaspka”. Biblia arhisïndi: “Asï jurajku eska chíti jájki mintsikuarhiaka”. Ísï jimbo, mientrasi engachi seguirini jauaka uandantani Reinueri ambe, jarhuajpinchi jauaka sikiera sánititu ini ánchikuarhitarhu para eska “iápuru anapu kʼuiripuecha mítitinksï jauaka” (Mat. 24:14). Peru ambe engajtsïni sánderu sési pʼikuastajka, jindesti mítini eskajtsïni Jeoba jeiapanhintasïnga, jimboka ima xénchaasïnga imechani engaksï “tekantskua jingoni ú[jka] jukani frutu” (Luk. 8:15). w18.05 16 párr. 16-18

Jeoba, Tata Diosï máesti enga uinhaperpentajka. Ka ísï ústia desdeka kʼuiripu uénaka pekarini ka imperfektu úkuarhini. Engaksï Adani ka Eba no kurhandirapka Jardini de Edenirhu, Jeoba seguirispti profesia ma íntspini enga uinhaperantaapiringa ka erokuarhikua ma íntsaani Adaniri desendientichani. Profesia enga Génesis 3:15 jaka eiatspesïndi eska tiempu jingoni, Satanasi ka imeri no sési járhati úkuechaksï kʼamajkunhaaka (1 Juanu 3:8; Jaŋ. 12:9). Noe jiáni irekaspti enga kʼuiripu no marhuakuenga Jeobani, Noe ka imeri familiajkuksïsï marhuakuendi. Enga exepka eska iápurisï uinintaspka atajperakua ambe ka ísku jándikua ambe, úpirindi deprimirikuarhini (Gén. 6:4, 5, 9, 11; Jud. 6). Peru Jeoba aianguspti eska kʼamajkuapiringa no sési úrichani ka arhispti ambe enga jatsipka para úni para imeri familia no uarhini (Gén. 6:13-18). Ima ambe kánikua uinhaperantapti Noeni. w18.04 15 párr. 1, 2

Engachi chéjka kʼuiripu jingoni uandaxeni ochi no káni uandariini, nochi jatsiska para eratsini eskachi no uáka uinhaperpentani. Ísï úni, no xáni úkua jukasti. Por ejemplu, engachi erachini ma saludariuaka, uákachi tsípikuni. Engajtsïni no tsípecheska, jamberi jindeti jimboka uandanhiaxaka ka uékani nema jingoni uandontskuarhini. A lo mejorichi uáka jarhuatani kurhajchaparintku (Sant. 1:19). Iáminduechachi uáka uinhaperantaani imechani engaksï uétarhinchajka. Rei Salomoni karaspti: “Uandakua ma ima tiempu jimbo enga uétarhini jauaka, ¡xáni enga sésiika!”. Ka ístu uandaspti eska ‘tsípetspeni, sési pʼikuastasïnga mintsitani’ ka eska “ambakiti ambe mítini, uinhapiti uásïnga únichani” (Prov. 15:23, 30). Ka Pablujtu uandaspti eska májku kʼéri pireani Reinueri pirekuechani, ístujtsïni uáka sési pʼikuastantani (Uku. 16:25; Kol. 3:16). Kánikua jukaparhakueuati eskachi májku kʼéri uinhaperperantaaka sánderi iásï engachi exeni jaka eska Jeobaeri jurhiatikua axuterku jarhaskia (Ebr. 10:25). w18.04 23 párr. 16; 24 párr. 18, 19