Oktubri

Ísïsti, juchachi no úsïnga mítini ambe enga kʼuiripuecheri mintsitarhu jarhajka ísï eska Jeoba ka Jesusi na újka, peruchi úaka kurhangukuani ambe engaksï pʼikuarherajka ka uétarhinchani (2 Kor. 11:29). Máteru kʼuiripuechaksï imecheri ambe jimbojku uandanhiasïndi, peru juchachi jánguarhintasïnga ísï úni eska Pablu na uandapka: “No solu pendienti páni para chájkumindu sési uérani, sino ístu pendienti páni para máteruecha” (Filip. 2:4). Kúnguarhikuarhu anapu orhejtsïkutichaksï jatsisti para sánderu kurhangutspini. Mítistiksï eskaksï jatsiaka para kuenta íntskuntani Jeobani na engaksï kájka imechani enga ima enkargariuaka (Ebr. 13:17). Paraksï úni jarhuataani erachichani, jatsistiksï para kurhangukuani. ¿Nénaksï úa ísï úni? Orhejtsïkuticha engaksï kurhangutspijka, úrasïndiksï tiempu para erachichani jarhuataani. Kurhamarhiasïndiksï ambe ma ka jingontkuksï kurhajchaasïndi ka tekantskua jingoni. I ambe kánikua jukaparhakuesti para ísï úni, sánderia enga erachi o pirenchi ma enga Jeoba xénchajka uéjka aiangukuarhiani ambe ma orhejtsïkutichani, peru no jánhaskani néna aianguani (Prov. 20:5). Engaksï erachicha listu jarhajka para úrani tiempu para erachichani jarhuataani, niárasïndiksï mintsinharperani, sési pájperani ka uékperani (Uku. 20:37). w19.03 17-19 párr. 14-17

Engachi diosmeiamukua arhiajka máteruechani, úsïngachi eskaksï imecha sési pʼikuarheraaka. ¿Andi? Jimbokaksï exesïnga eskajtsïni kánikua marhuacheska ambe engaksï imecha úka parajtsïni jarhuatani o íntskuntsïni ambe ma engachi uétarhinchani japka. Indeni ambe jimbo, sánderuchi sési pájperasïnga imecha jingoni. Kánikua jukaparhakuesti diosmeiamukua arhijpini, ísï eska na uandajka iásï anapu tekstu. ¿A no eska mansana ma orueri enga plateri adornu jukaka kánikua sési jáxepiringa? Ka ístu kánikua jukaparhapirindi. ¿Nénachi pʼikuarherapirini engajtsïni nema inde jásï ambe intsïkuarhipiringa? Jiájkani, sési járhati uandakuecha jingoni diosmeiamukua arhijpini, úati májkueni jukaparhakueni. Ístu, ísï eskachi na sési patsapiringa mansana oruerini, jamberi ima kʼuiripu méntkisï miáni jauati engachi diosmeiamukua arhiaka. w19.02 15 párr. 5, 6

Engaksï Adani ka Eba apka frutani ima anhatapueri mímixekueri enga jindeka sési amberi ka no sési amberi, xarhatasptiksï eskaksï no mintsinharhisïrenga Jeobani ni imeri juramukuechani. Erakusptiksï imecha mismu exeni ambe sési jarhaski ka ambe nómbe. Peru ¿ambe niáraspi úkuarhini? Nóteruksï úsptia sési pájperani Jeoba jingoni, níteruksï úpirinia irekani para méntkisï. Ístu kéritaasptiksï imecheri desendientichani pekadu ka uarhikua (Rom. 5:12). Méntku ménderuenisti ambe engaksï Adani ka Eba úpka ka ambe enga eunuku Etiopia anapu úpka enga Felipi predikarikupka. I kʼuiripu xáni jeiapanhintaspti ambe enga Jeoba ka Jesusi úpka imani jimbo enga jirejiresï itsï atakuarhipka (Uku. 8:34-38). Ka jucha, engachi aiakukuarhijka Tata Diosïni ka itsï atakuarhini ísï eska Etiopia anapu, xarhatasïngachi eskachi jeiapanhintasïnga ambe enga Jeoba ka Jesusi úka juchantsïni jimbo. Ístuchi xarhatasïnga eskachi mintsikasïnga Jeobani ka eskachi jiókuarhisïnga eska imajkusï újka uandani ambe sési jarhaski ka ambe nómbe. w19.03 2 párr. 1, 2

Iámu mintsita jingoni marhuakuni Jeobani, arhikuekasïndi xénchani, no ma ambe jimbo jurajkuni ka méntkisï úni ambe enga ima jeiapanhintajka. Bibliarhu, uandakua enga ebreu uératini ísï tradusirikuarhijka “iámu mintsita jingoni”, úrakuarhisïndi para arhikuekani eska no ma ambe kuerataaka o eska sési jauaka. Por ejemplu, engaksï israelitecha animali ma kéjtsïtakupiringa Jeobani, animali jatsisïrendi para sési jarhani (Lev. 22:21, 22). Tata Diosïri marhuarichaksï no jatsispti para animali ma kéjtsïtani enga no jukapiringa jantsiri ma, kutsïkua ma o éskua ma o enga pʼamenchani japiringa. Para Jeoba kánikua jukaparhakuespti eska no ma ambe kueratakupiringa animalini ka sési jarhani (Mal. 1:6-9). ¿Andisï Jeoba uéjki eska no ma ambe kueratakuaka ambe engachi íntskuaka? Ari ejemplujtsïni jarhuatati kurhanguni. Engachi fruta ma piájka, nóchi uékasïnga eska pʼorhoarhaaka o eska pedasu ma kueratakuaka. Uékasïngachi eska iámu fruta sési jauaka. Sáno májkuenisti, Jeoba uékasïndi eskachi xénchaaka ka uékani kurhajchani peru iámu mintsita jingoni. w19.02 3 párr. 3

Para mintsitani kuájchakuni, nochi solu jatsiska para no jiókuarhini no sési jásï ambe, sino ístu jiókuarhini imani ambe enga sési jaka. Ióntki anapu iretecharhu ima enga puertarhu jarhenga, sési míkaasïrendi puertechani para enemigu no inchaakuni. Peru ménichanisï mítaasïrendi para úni inchaatani tʼirekua ka máteru ambe enga kʼuiripu uétarhinchenga. Engaksï no ísï úpiringa, kʼuiripuechaksï uarhipirindi kʼarhingua jimbo. Májkuenisti, jatsiskachi para jurajkuni eska juchari mintsitarhu ima ambe jauaka engajtsïni Jeoba jorhendajka. Bibliarhu, úsïngachi arhintani na enga eratsijka Tata Diosï. Ísï jimbo, méntkisï engachi arhintajka, úsïngachi eskajtsïni jarhuataaka mójtakuni na engachi eratsijka, pʼikuarherajka ka jámani. Parajtsïni sési marhuachini ambe engachi Bibliarhu arhintajka, jatsiskachi para kómarhini parakajtsïni jarhuataaka ambakiti ambe exeni enga imeri Karakatarhu jaka (Sal. 119:18). Ka tátsekua, jatsiskachi para eratsintani imani ambe engachi arhintajka. Engachi ini ambe újka, Tata Diosïri Karakatajtsïni meru mintsitarhu niárachesïndi ka niárasïngachi tsitini na enga eratsijka Jeoba (Prov. 4:20-22). w19.01 18 párr. 14, 15

Jeoba mítisti eskachi no iáminduecha májkueni ambe jorhenaska úni, ni eskachi májkueni ambe nitamanchasïnga ka kánikua jukaparharasïndi ambe engachi újka íntskuni. Ju je eratsintani na enga jásï kéjtsïtakua jiókuarhienga israelitecheri. Imecha engaksï jatsikuarheripka, karichi o chibu sapichu maksï íntspisïrendi. Ka engaksï no jatsikuarheripka, úsïrendiksï tsimani palomasï o pájaruechani íntspiani. Peru enga israelita ma no uénga íntspiani tsimani palomasï sapirhatichani, Jeoba jiókuarhisïrendi sánititu jarina enga ambakitipiringa (Lev. 5:7, 11). Nájkiruka jarina sánderu baratuepka, Tata Diosï kánikua jukaparharasïrendi indeni kéjtsïtakuani, peru kʼóru jatsisïrendi para ambakiti jarineni. Iásï jamberi, juchari Tata Diosï seguirixati májkueni eratsini. Engachi íntspiajka komentariuechani, imajtsïni kurhanguchesïndi ka no erokuarhisïndi eskachi xáni sési uandaaka eska Apolusi o ísï seguru uandani eska Pablu enga uénga eskaksï máteruecha jakajkukupiringa (Uku. 18:24; 19:8). Ambe engajtsïni kʼóru kurhachijka, jindesti eskachi jánguarhintaaka xáni eskachi xáni úaka. Ju je miántani imani uarhiiti tsïndini enga íntspipka tsimani monedechani engaksï no jukaparhakuepka. Jeoba jeiapanhintaspti, jimboka íntspispka iámindu enga xáni jatsikuarhipka (Luk. 21:1-4). w19.01 8, 9 párr. 3-5

Mítitixakachi eskajtsïni parhakpini anapuecha ikiachiaka (Mat. 10:22). Jesusi uandasptia eskaksï imeri disipuluecha kánikua no sési kánhapiringa últimu jurhiatikuecha jimbo (Mat. 24:9; Juanu 15:20). Tsimani úni jámani, Isaiasiri profesiajtsïni no solu aiangusïndi eskajtsïni juchari enemiguecha ikiachiaka, sino eskaksï mámaru ambe úraaka parajtsïni no sési úcheni. Por ejemplu, uékaatijtsïni sïpatekuarku enganiarini, chkuanderakua ambeksï uandani juchari ambe ka kánikuajtsïni no sési kámani (Mat. 5:11). Jeoba jurajkuati eskaksï juchari enemiguecha ini ambe úaka (Efes. 6:12; Jaŋ. 12:17). Peru nochi jatsiska para chéni. Jeoba uandasïndi eska no ma arma engaksï úraaka parajtsïni no sési úcheni ‘úaka ísï úni’ (Is. 54:17). Májkueni eskajtsïni kʼéri barda ma na kuájchakujka enga kʼéri janikua jimbo no sési tarhiajka, Jeobajtsïni ísï kuájchakusïndi engajtsïni no ambarhati kʼuiripuecha no sési kámajka (Is. 25:4, 5). Ambe engajtsïni juchari enemiguecha niáraaka no sési úcheni, no jindeuati para méntkisï (Is. 65:17). Iámindu Tata Diosïri enemiguechaksï no ma ambe uáti ka uarhiatiksï (Is. 41:11, 12). w19.01 6, 7 párr. 13-16

Uátsïcha ka tumbicha, Jeoba uékasïndi eska jauaka libertadi ka ísïjtsïni kueraasti parachi juchajtu májkueni uékani eska jauaka libertadi. Peru ístu uékasïndi eskari sési úraaka, jimboka inde ambekini kuájchakusïnga. Jamberiri mítiaka máteruechani engaksï pornografia ambe exejka, ísku jándikua ambeksï úni, deporti ambeksï úni enga peligrosueka, droga ambeksï úrani oksï jukari alkoli arhani. Jamberiksï ma ratu tsípikuarhijti o sési pʼikuarherani. Peru sáno méntkisï, kánikuaksï no sési kʼamarasïndi: pʼindesïndiksï indeni ambe úni, pʼamenchasïndiksï ka asta niáranksï uarhini (Gal. 6:7, 8). Uandasïndiksï eskaksï uáka iámindu ambe úni, peru jandiajkuksï enganiarikuarhisïndi (Titu 3:3). Ístu, kurhajchani Jeobani marhuachisïndijtsïni. Sési úkusïndi juchari kuerpuni ka jatsisïngachi libertadi (Sal. 19:7-11). Buenu, engari sési úrajka inde libertadi engari jatsika, komu jánhaskakua jingoni erakuni úni ambe ma úrapariani Jeobaeri juramukuechani ka prinsipiuechani, xarhatakusïngari Jeobani ka chíti tátichani eskari kʼuiripu máeska enga responsablika. (Rom. 8:21). w18.12 22, 23 párr. 16, 17

Enga Adani pekaripka, uánikua ambe mójtakurhispti. Ma ambe jindesti eskaksï kʼuiripuecha uénaspka uarhini ka indeni ambe jimbo temungurhirikua nóteru májkuenipirindia. Apostuli Pablu eksplikarispti eska enga nema uarhijka, jima kʼamakurhisïnga temungurhirikua ka eska ima enga tsípiti pakarajka, uáka ménderu tembuchantani o uambuchantani (Rom. 7:1-3). Imani Lei jimbo enga Jeoba ireta Israelini íntskupka, exentasïngachi máru ambe enga temungurhirikueri ambeka. Por ejemplu, israelita ma úsïrendi jukari máechakua témbani jatsini, ambe ma enga ísï mítikateka komueska poligamia ka inde ambe tʼuini únhasïrendia ante de Tata Diosï íntsaani Leichani. Peru para kuájchakuani uarhiitichani ka sapiichani, Jeoba juramukuaspti israelitechani ambe engaksï úpiringa. Por ejemplu, enga israelita ma tembuchapiringa nanaka ma jingoni enga jántspiripka ka tátsekua máteruni tembuni, jatsispti para seguirini jarhani tʼirerani primeru témbani, xukuparhakua ambe íntskuni ka relasioni sexuali jatsini imani jingoni. Tata Diosï juramukuasïrendi eskaksï kuájchakuapiringa uarhiitichani ka kuidariuani (Éx. 21:9, 10). Iásï, juchachi no uétarhisïnga Moisesiri Leini kumplirini, peru jimini arhisïndi na enga xáni jukaparharajka Jeoba temungurhirikuani. Ka i ambejtsïni jarhuatasïndi májkueni jukaparharani eska ima. w18.12 10 párr. 3; 11 párr. 5, 6

Abakuki Jeobani jurajkukuspti iámu ambe enga uandanhiatenga. Peru jamberi kurhamarhikuarhipti na exepirini Jeoba imani ambe. Komu Jeoba ísïka eska táti ma enga kurhangukuajka imeri uájpechani ka pʼikuarherani na engaksï ima pʼikuarherajka, no xukaspti profetani enga iámindu ambe eiangukuarhipka. Tata Diosï mítispti eska ima ambe xarhataspka na enga xáni uétarhinchani japka, Abakuki jarhuajperata. Peru Jeoba arhispti ambe engaksï úkuarhinchapiringa judiuecha no ióni jimbo. Jamberi Jeoba Abakukini orheta aiangupti eska kʼamajkuapiringa ima kʼuiripu no sési úrini. Jeoba arhispti Abakukini eska listu jarhaspka para úni ambe ma. No ióni jimbo, kastigariuapirindi imani kʼuiripuechani engaksï no sési úripka ka no sési kámpini. Enga Jeoba uandapka “chári jurhiatikuecha jimbo”, arhikuekaxapti eska juisiu profeteri jurhiatikuecha jimbo janopiringa ka engaksï xáni ima tiempuni irekani japka. Peru ¿i ambespi enga profeta erokuarhini japka? Nómbe. Ambe enga Jeoba uandapka, úpirindi eska iámu Juda no sési jánhaskuarhepiringa. w18.11 15 párr. 7, 8

¿Nénachi exeasïni imechani engaksï nótki mítini jaka jurhimbikuani? Ísïsti eska apostuli Pablu niraspka sinagogaecharhu para jirinhantaani imechani engaksï sánisï mítipkia Tata Diosïri ambe. Peru no solu judiuechani predikarikuaspti, sino ístu imechani engaksï máteru diosïchani kómarhiauenga. Por ejemplu, enga Pablu uénapka imeri primeru biajini komu misioneru, Likaonia anapuechaksï ísï exespti eskaksï Pablu ka Bernabe jindespka diosïcha Seusi ka Ermesi engaksï kʼuiripu úkuarhintapka. ¿Jurajkuspiksï Pablu ka Bernabe eskaksï kʼéri ambe arhinhapiringa? ¿Ísïksï exespi eskaksï jukanchaspka paraksï ísï kánhani jimbokaksï no sési kánhaspka tsimani últimu iretechani jimbo engaksï nípka? ¿Eratsispiksï eska engaksï xáni mítikatepiringa marhuapiringa eianhpikuarhu? Nómbe. Jirejiresïksï karukuspti imecheri xukuparhakuani ka uinhachanksï kʼuiripuni japarini: “¿Andisïjtsï ísï újki? Juchajtuni májku jásï kʼuiripueska eska cha” (Uku. 14:8-15). w18.09 5 párr. 8, 9

Engachi uéjka jiókuarhini jurhimbikuani ka úni ambe engachi jorhenguarhiaka, jatsiskachi para uékani mójtakuni na engachi eratsijka ka jámani. Pedru arhini konseju íntspespti: “Jáma je eska Diosïri uájpecha engaksï sési jimbo janhanharhijka imani, ka asteru jáma je tsitini úni indeni ambe engajtsï úkuekenga engajtsï nótki ambe mítienga”. Ka seguirispti uandani: “Sino pímbinhasïnta je iámindu ambe jimbo” (1 Ped. 1:14, 15). Por ejemplu, ireta Korintu engaksï xáni no sési ambe uénga ka ísku jándikua ambe, kʼuiripuecha engaksï jiókuarhipka jurhimbikuani jatsisptiksï para uánikua ambe mójtakuni imecheri irekuarhu. Májkueni, iásïksï uánikuecha jatsisti para jurajkuni no sési jásï jánguani para úni jurhimbikuarhu jarhani. Ístu, Pedru arhiaspti kristianuechani imeri jurhiatikuecha jimbo: “Asteru indeni ambe úia je eska parhakpini anapuecha na újka, jimbokajtsï tsitisïrenga ikichakueni jásï ambe úni, ísku jándikua ambe niátani, kauintsï, nanderkuentsï tsípikuarhini, tánguarhintani solu para kauikua ambe arhani ka idoluechantsï kómarhiani enga xáni no sésika” (1 Ped. 4:3, TNM). w18.11 6 párr. 13

¿Nénachi uá exeantani imechani engaksï meru uéjka jatsini tsípikua para méntkisï? Májkueni eska primeru siglurhu, jindesti predikariparini. Ísï jimbo, jatsiskachi para seguirini úni ambe engajtsïni Jesusi arhika: “Engajtsï niáraaka ma ireta jimbo o ma ranchu jimbo, kurhanguarhi je aberi né jinde ambakiti kʼuiripu [ma]” (Mat. 10:11). Mítiskachi eskaksï no uékaaka kurhaani ambakiti eianhperakuani ima kʼuiripuecha engaksï no ambakiti mintsita ma jukaka, engaksï kʼéramakuarhijka o engaksï no interesi pájka Tata Diosïri ambe jimbo. Jirinhaantasïngachi imechani engaksï ambakiti mintsita ma jukaka ka kaxumbini, ka engaksï uéjka mítini jurhimbikueri ambe. Ju je exeni ejemplu ma. Enga Jesusi karpinteruepka, seguru eska ambakiti chkari jirinhenga para muebli uáni, puertechani ka uananchatarakuechani. Ka enga exentengia, sési úraasïrendi erramientechani para úratarani ambe ma. Buenu, juchajtuchi jatsiska para sáno májkueni úni: orhetachi jatsiska para jirinhaantani kʼuiripuechani engaksï ambakiti mintsita ma jukaka, ka iásï kʼória sési úraani erramientechani para disipulu uáni (Mat. 28:19, 20). w18.10 12 párr. 3, 4

Ju je exeni Felipiri ambe enga eianhpiripka, enga xarhataka ambe enga meru arhikuekajka okupadu jarhani eianhpikuarhu, nájkiruka mójtakurhijka ambe ma. Felipi jimbanhi responsabilidadi ma jatsisptia Jerusaleni anapu kúnguarhikuarhu (Uku. 6:1-6). Jimajkani, niáraspti kánikua no sési jásï ambe úkuarhini engaksï jamberi uándikupka Estebanini. Enga Felipi exeapka máteru Jesusiri chúxapatichani sïpakuarhinksï jarhani Jerusaleni uératini, no ísku pakaraspti. Samaria niraspti eianhpini, ireta ma enga apenasi eianhpinhapka ambakiti ambe (Mat. 10:5; Uku. 8:1). Felipi listu jarhaspi para nirani nani enga Tata Diosïri espiritu pápiringa. Ísï jimbo, Jeoba úraspti para uénani aianhpini jimesïsï enga nótki aianhpinhenga ambakiti ambe. Imani tiempunisï, judiuechaksï no xénchaasïrendi samaritanuechani. Peru komu Felipi no ísï káuenga, seguru eskaksï imecha sési pʼikuarherenga imani jingoni. Xarharasïndi eskaksï kʼuiripuecha jimbosï kurhaapka ambe enga Felipini eianguapka (Uku. 8:6-8). Nájkiruka uánikua ambe mójtakurhipka imeri irekuarhu, méntkisï okupadu jarhaspti eianhpikuarhu ka indeni ambe jimbo, Jeoba uánikua kóntperatechani intsaaspti imani ka imeri familiani (Uku. 21:8, 9). w18.10 30 párr. 14-16

Ma xanhari enga Jesusi Dekapolisi ísï jámani japka, kʼuiripu “pérakuspti ma pʼamenchatini enga no uénga kurhandini ka ni uandani” (Mar. 7:31-35). Jesusi támu péraspti ka tsinaspti. ¿Andisï no tsinapi kʼuiripu japarini? Jamberi kuenta íntskukuarhipti eska komu no uénga kurhandini, no agustu pʼikuarherendi kʼuiripu japarini. Ísïsti, juchachi no úsïnga milagruechani uáni, peruchi úsïnga ka jatsiskachi para pendienti jarhani ambe engaksï uétarhinchajka erachicha ka na engaksï pʼikuarherajka. ¿Nénachi uá májkueni úni eska Jesusi enga kurhangukupka imani kʼuiripuni enga no uénga kurhandini? Májkueni, ju je pendienti jarhani imecha jimbo engaksï jatirika ka engaksï pʼamenchani jaka. Ambe engachi jimbo mítinhantajka kristianuecha, jindesti uékperakua jimbo, ka no jimbokachi sési ánchikuarhisïnga (Juanu 13:34, 35). Inde uékperakua úsïndi eskachi jánguarhintaaka xáni eskachi xáni uáka para jarhuataani jatirichani ka imechani engaksï pʼamenchani jaka paraksï úni tánguarhikuecharhu nirani ka aianhpikuarhu. Ka úsïngachi indeni ambe nájkirukaksï imecha no uáka xáni úni eskaksï na uékapiringa (Mat. 13:23). w18.09 29, 30 párr. 7, 8

Para Jeoba, iámindu imeri marhuarichachi kánikua jukaparhakueska. Ka ístu para Jesusi, enga íntspika imeri tsípikuani juchantsïni jimbo (Gal. 2:20). Iámu mintsita jingonchi xénchaasïnga juchari erachichani ka uékasïngachi xénchperakua jingoni kuidariuani. Parachi úni uinhaperantaani erachichani, ju je “méntku jauenani úni jarhani ambe engachi jimbo sési pájperani jauaka ka uinhaperperantanchi” (Rom. 14:19). Kánikuachi uékaxakaia irekani Paraisurhu, nani engachi nóteru jatsiauakia rasonichani parachi kómu pʼikuarherani. Nóteru jauatia pʼamenchakua ambe, guerrecha, uarhikua pekadu jimbo, familieri problemecha, níteruchi no sési kánhania, ni no sési pʼikuarherani. Enga na kʼamaraakia mili uéxurhini, kʼuiripuechaksï perfektueuatia. Imecha engaksï tsípiti pakaraaka últimu pruebarhu, Jeoba ísï jiókuarhiauati komu imeri uájpecha ixú Echerirhu engaksï nóteru ma pekadu jukaraakia (Rom. 8:21). Ju je seguirini jarhani xarhatani uékperakua enga uinhaperpintajka ka ju je jarhuajperani máteru ka máteruni jingoni niárani imani xáni sési jásï jimbanhi parhakpinirhu enga Tata Diosï eiatspika. w18.09 14 párr. 10; 16 párr. 18

Estudiarini Tata Diosïri karakatani, sánderu ambe arhikuekasïndi eska solu arhintani ambe ma ka exeantani mókuntskuechani máru kurhamarhikuecheri. Engachi estudiarijka jorhenguarhisïngachi ambe enga uandajka informasioni Jeobaeri ambe ka na enga eratsijka ka úni ambe ma. Jánguarhintasïngachi kurhanguni andisï uandajki eskachi uáka máru ambe ka máteru ambe nómbe. Ístuchi eratsintasïnga ambe engachi jatsika para mójtakuni juchari eratsikuarhu ka irekuarhu. Ísïsti, engachi méni estudiariuaka jamberichi no uáka iámindu ini ambe eratsintani. Peru sésiisti eskachi eratsintaaka ma ratu imani amberi engachi arhintaaka, jamberi terujkani imani tiempueri engachi úrajka para estudiarini (1 Tim. 4:15). Engachi pʼindeka eratsintani ambe enga arhijka Tata Diosïri Karakata, kuenta íntskukuarhisïngachi eska ambe enga Jeoba eratsijka méntkisï sési jarhasïnga. Uénasïngachi kurhanguni na enga exejka ambe ma ka juchajtuchi niárasïnga májkueni úni. Engachi jimbanherantajka juchari eratsikuani, méntkuchi ménderueni eratsisïngia (Rom. 12:2). Sánhani arhisïngachi niárani ísï eratsini eska Jeoba. w18.11 24 párr. 5, 6

Primeru siglurhu, apostuli Pablu uandaspti eska ima ka máteru kristianuechaksï jindespka Tata “Diosïri jarhuajpiricha” jimbokaksï ikarasïrenga ka itsï jatsikuni semiia jurhimbikuerini enga Tata Diosïri Reinuerika (1 Kor. 3:6). Iásï, juchajtuchi uáka jindeni Tata “Diosïri jarhuajpiricha”. ¿Néna? Tsípikua jingoni úraparini juchari tiempu, jatsikuarhikua ambe ka uinhapikua parachi úni kumplirini imani ánchikuarhitani engajtsïni Jeoba enkargarika. ¡Xáni kʼéri kóntperata ma! Kánikuachi sési pʼikuarherasïnga engachi tsípikua jingoni úrajka juchari tiempu ka uinhapikuani eianhpikuarhu. Uánikua erachicha engaksï Bibliaeri ambe jorhentpijka, uandasïndiksï eska inde ambe úni, jindeska ambe ma enga sánderu sési pʼikuastaajka. Kánikua sési pʼikuarherakuarhisti exeni na enga tsípinharhijka kʼuiripu ma enga kurhangujka Bibliaeri jurhimbikua ambe, na enga kʼéjka imeri jakajkukua, na enga mójtakujka imeri irekuani ka na enga uénajka uandontskuarhini máteruecha jingoni ambe enga jorhenguarhijka. Jesusi sési pʼikuarheraspti engaksï 70 imeri chúxapaticha enga aianhpikuarhu axaapka, “kʼuanhatsinta[pkaksï] tsípiparini” jimboka sési nikuaspka (Luk. 10:17-21). w18.08 20 párr. 11, 12

Engachi jukari mintsinharhikuarhiska, uáti trampa máeni. Uákachi ísï exeni eskachi uáka kurhanguni ambe úni situasioni ma jingoni, nájkirukachi no jatsiaka iámu informasioni. Ístu, engachi no újka sési pájperani erachi ma jingoni ka ima erachi úni ambe ma, sánderuchi úkua jukanchaaka kurhanguni erachiri situasionini. Seguirini jarhanchi eratsini eskachi no úsïnga sési pájperani erachi jingoni, uáti úni eskachi ísku ambe ma eratsiaka erachiri. Ka inde ambe uáti eskachi sóntku jakajkuaka engachi kurhaska no sési jásï ambe erachiri. I ambejtsïni jorhendasïndi eska engachi jatanhekuaska erachichani, uáti úni eskachi ísku ambe ma eratsiaka imecheri (1 Tim. 6:4, 5). Parachi no niárani indeni ambe úni, ju je no jurajkuni eskachi uénaaka pʼikuarhinhini juchari mintsitarhu enbidia ambe ni selosueni. Ju je miáni eskachi jatsiska para uékaani erachichani ka mintsita jingoni puákuantaani (Kol. 3:12-14). w18.08 6, 7 párr. 15, 18

Jimboka ima kueraaska iámindu ambe, juchajtuchi imeriska (Sal. 100:3; Jaŋ. 4:11). Peru desdeka kʼuiripu uénaka irekani, Jeoba niárasti erakuani máru grupu kʼuiripuecheri paraksï imeri ireta espesialini. Por ejemplu, Salmo 135 arhisïndi eska ióntki anapu israelitecha engaksï no méni jurajkupka Tata Diosïni, jindespkaksï imeri “ireta espesiali” (Sal. 135:4). Ístu, libru de Oseas tʼuini uandasptia eskaksï máru no israelitecha niárapiringa Jeobaeri ireta jingoni úkuarhini (Os. 2:23). I profesia jiáni kumplirikuarhispti enga Tata Diosï uénapka erakuani imechani engaksï no judiuepka paraksï Jesusi jingoni juramuni auandarhu (Uku. 10:45; Rom. 9:23-26). Ini kʼuiripuechani engaksï espiritu santu jimbo erakunhaka, arhinhasïndiksï “kʼuiripu pímbinharhaticha”, Jeobaeri “míndakatecha” (1 Ped. 2:9, 10). Ka ístu, sáno iámindu kristianuechani engaksï jurhimbitku jámajka ka engaksï erokuarhini jaka Echerirhu irekani, Jeoba arhiasïndi eskaksï imeri ireteska ka imeri erakukatecha (Is. 65:22). w18.07 22 párr. 1, 2

Ambakiti kristianuechachi májkueni úsïnga eska Jesusi enga sési xarhataka asta nani jamberi uá ma kʼuiripu intsïmpitiini. Ima mismu uandaspti: “Ísï komueska Uájpa Achatiri na juka, no para marhuaminhani, sino para marhuatspini, ka íntspini imeri tsípikuani para uánikuechani euajpiantani” (Mat. 20:28). Ísï jimbo, sésisïndi engachi kurhamarhikuarhijka: “¿Uá sánderuni sési seguirini Jesusiri ejempluni?” (1 Ped. 2:21). Uákachi úni eskajtsïni Jeoba jeiapanhintaaka engachi seguiriska imani ambakiti ejemplu engajtsïni ima ka imeri Uájpa xarhatachika. Para indeni ambe úni, jatsiskachi para interesi páni máteruecha jimbo ka exeni nénachi uá jarhuataani imani ambe jimbo engaksï uétarhinchani jauaka. Enga Jesusi uandantapka ilustrasioni ambakiti samaritanueri, xarhataspti eska erokuarhisïnga eskachi imeri chúxapaticha jánguarhintaaka xáni eskachi na xáni uáka para jarhuataani máteruechani, no arhiparini nani uéjkiksï anapueni (Luk. 10:29-37). Ju je miáni eska Jesusi jimbosï uandantapka ini ilustrasionini jimboka judiu ma kurhamarhispka: “¿Néski juchiti besinu o prójimu?”. Ambe enga mókuntapka, xarhatasïndi eskachi jatsiska para listu jarhani ísï eska samaritanu parachi jarhuajpini, parajtsïni Jeoba úni jeiapanhintani. w18.08 19 párr. 5, 6

¿Xarhatakupi Jeoba eska jeiapanhintaspka Mariani enga sési kuidaripka ka kʼuiriperani imeri Uájpani? Jo. Primeru, ústi eska ambe enga Maria úpka ka uandani Bibliarhu karakata pakarapiringa. Peeka Maria no úpka pámbini Jesusini ima tanimu uéxurhini ka terujkani enga duraripka imeri eianhperakua. ¿Nasareti pakarapi jimboka biuda máepkia? Jamberi. Ísï jimbo, no úpti intsïnhaani uánikua kóntperatechani engaksï máru kʼuiripuecha intsïnhaapka. Peru kʼóru jima jarhaspti enga Jesusi uarhipka (Juanu 19:26). Ka ístu disipuluecha jingoni jarhaspti Jerusaleni ima jurhiatikua ante de Pentekostesi úkuarhini uéxurhini 33 jimbo engaksï espiritu santu intsïnhapka (Uku. 1:13, 14). Seguru eska niárapka erakunhani ísï eskaksï máteruecha. Jiájkani, i ambe arhikuekasïndi eska intsïnhaska kóntperata para Jesusini jingoni jarhani auandarhu para méntkisï. ¡Xáni kʼéri kóntperata ma imeri ambakiti ánchikuarhita jimbo! w18.07 9 párr. 11; 10 párr. 14

Enga Jesusi aianhpini jámani japka, jorhendaaspti imeri chúxapatichani jurhimbikuechani engaksï sánderu jukaparhakueka, para jarhuataani exeni ambe enga niárajka úkuarhini seguni eska na jámaaka nema ka na enga jásïuaka. Por ejemplu, uandaspti eska jatanhetspeni, úsïnga eska uarhiperanhaaka ka ístu, eska no sési jásï ambe eratsini jarhani, úsïnga eska nema ísku jándikua ambe niátaaka (Mat. 5:21, 22, 27, 28). Engachi jurajkuska eskajtsïni Bibliaeri konsejuecha jarhuataaka, sésichi jorhendani jauaka juchari konsiensiani ka imani ambechi uáka enga kʼéri ambe arhiaka Tata Diosïni. ¿Jatsiskichi para erokuarhini eskachi iáminduecha méntkisï májkueni ambe erakuaka úni? Nómbe. Jamberiksï tsimani kristianuecha enga imecheri konsiensia Biblia jimbo jorhendakata jaka, nóksï májkueni ambe erakuati úni. Por ejemplu, arhani imani ambe enga alkoli jukaka. Biblia arhisïndi eska kauini ka jukari alkoli arhani no sési jarhaska, peru no uandasïndi eska no sési jarhaska sánisï arhani (Prov. 20:1; 1 Tim. 3:8). Peru engachi exeni jámaaka sinchi aua sánisï alkoli o nómbe, ¿solu uétarhisïni exeni na xántkuchisï aua? Nómbe. Aparti de exeni eskajtsïni juchari konsiensia no no sési pʼikuastasïnga, jatsiskachi para kuenta úni máteru erachicheri konsiensiani. w18.06 18 párr. 10, 11

Jesusi juramukuaspti imeri chúxapatichani eskaksï no jámapiringa jeuekuarhini fariseuecheri, saduseuecheri ni Erodesiri partidurhu anapu ‘xarhipiti jingoni’, o sea imecheri jorhentperakuecha jingoni (Mat. 16:6, 12). Ka jukaparhakuesti mítini eska Jesusi arhiaspka ini ambe ísï tátsekua enga kʼuiripu uékapka rei úni. Enga relijioni jeuekuarhijka politika ambe jingoni, fásilisïndi eska no sési kámberanhaaka. Jesusi jorhendaaspti imeri chúxapatichani eska enga i ambe úkuarhipiringa nóksï jámapiringa nema jingoni úkuarhini. Jimboksïsï kʼérati saserdoticha ka fariseuecha úndapti eratsini néna uándikuni Jesusini. Ísïksï exesïrendi Jesusini komueska enemigu ma politikeri ka relijioniri ka enajki euantaapirini imecheri juramukua. Uandasïrendiksï: “Engachi jurajkuska, iáminduecha jakajkuati imani ka tátsekua juuatiksï Roma anapuecha ka xerentaatiksï juchari pímbinhasï iretani ka nasionini” (Juanu 11:48). Jimbosï Kaifási enga kʼéri saserdoti máepka, uénapti uandani paraksï Jesusini uándikuni (Juanu 11:49-53; 18:14). w18.06 6, 7 párr. 12, 13

Trampa ma enga kánikua marhuakujka Satanasini, jindesti sïkuamikua ambe. Ima no solu relijioni no jurhimbitini úrasïndi paraka nema uékaaka mítini demoniuecheri ambe, sino ístu iámindu jásï tsípikuarhita ambe. Úraasïndi pelikulechani, chʼanakuechani aparatuecha jingoni ka máteru ambe, paraka sïkuamikua ambe ísï xarharaaka eska ambakiti ambeska. ¿Ambechi jatsiski para úni parachi no uekorhini ini tramparhu? Nochi jatsiska para erokuarhini eska Jeobaeri organisasioni lista ma petaaka para xarhatani náki tsípikuarhita sési jarhaski ka náki nómbe. Táchanisïchi jatsiska para úni eska juchari konsiensia ambakiti ambe erakuaka úni enga terokuntaaka Jeobaeri juramukuecha jingoni (Ebr. 5:14). Uákachi ambakiti ambe úni engachi kurhajchaska apostuli Pablueri konsejuni eskachi jatsiska para uékperani. Ju je kurhamarhikuarhini: “Enga estudianti ma o rebisita ma exepiringa ambe engani jingoni tsípikuarhijka, ¿eratsipirini eskani úxaka ambe engani eianhpijka o eskani ísku apari máeska?”. Engachi uáka ambe engachi eianhpijka, no xáni fásiliuati eskachi uekorhiaka Satanasiri trampecharhu (1 Juanu 3:18). w18.05 25 párr. 13

¿Nénachi uá juchajtu májkueni úni eska Pablu? Primeru, jatsiskachi para meru mintsitarhu pʼikuarhinhini uékani exeantaani imechani engaksï uéjka jarhuajperata paraksï méntkisï irekani. Segundu, ju je kurhakuni Jeobani eska uáka eska ambakiti kʼuiripujtsïni uékaaka kurhajchani (Uku. 13:48; 16:14). Silvana, enga sáno treinta uéxurhini prekursorekia, uandasïndi: “Ante de kústani puerta ma, kurhakusïnga Jeobani eskarini jarhuataaka tsípikua jingoni eianhpini”. Ju je ístu kurhakuni Jeobani eskajtsïni ánjilicha jarhuataaka exeantaani imechani engaksï ambakiti mintsita ma jukaka (Mat. 10:11-13; Jaŋ. 14:6). Robert, erachi ma enga jukari treinta uéxurhini prekursorikia, uandasïndi: “Kʼéri ma tsípikuarhitesti ánjilichani jarhuataani, engaksï mítika ambe engaksï nitamanchani jarhajka kʼuiripuecha”. Ka terseru, ju je jánguarhintani ambakiti ambe exeni kʼuiripuecheri. Carl enga orhejtsïkutika, uandasïndi: “Jánguarhisïnga jirinhantani sapichitu ambe engarini exeraaka eska kʼuiripu ambakiti mintsita ma jukaska, komu engarini tsípichiaka, engarini sési erokaaka o kurhamarhindini ambe ma enga uéjka mítini”. Engachi ísï úska ini ambe, seguirini jauakachi jukani frutu, ísï eska Pablu. w18.05 15 párr. 13; 16 párr. 15

Ma ambe engajtsïni sési pʼikuastajka, jindesti mítini eskaksï ima engachi ióntki jarhuataaka, seguirixakaksï Jeobani marhuakuni. Apostuli Juanu karaspti: “No ma ambe jimbo sánderuni tsípisïnga ji ka eska para mítini jarhani eska juchiti uátsïcha jámaxaka eska na terokuntajka indeni uandakuani jingoni enga ísïka” (3 Juanu 4). Uánikua prekursorichaksï uandasïndi eska kánikua uinhaperantaasïnga mítini eska ima kʼuiripu engaksï ióntki Bibliaeri ambe jorhendapka, útasï marhuakuxaka Jeobani o eska prekursoriskia. Ísï jimbo, miátantani prekursorini ma enga desanimadu jaka ambe enga xáni úkia máteruecha jimbo, uáti sési pʼikuastantani. Uánikua sirkuitueri orhejtsïkuticha ka témbecha, uandantasïndiksï na engaksï xáni sési pʼikuarherajka enga erachi ma sïranda sapichurhu ma agradeserikuajka engaksï pʼorhembika kúnguarhikuani. Ka májkuenksï pʼikuarherasïndi orhejtsïkuticha, misioneruecha, prekursoricha ka betelitecha engaksï agradeseriminhajka jimbokaksï jánguarhisïnga marhuakuni Jeobani. w18.04 23 párr. 14, 15

Salomoni no kurhandiraspti ka tiempu jingoni niáraspti 700 témbechani jatsiani ka ístu 300 uátsïchani (1 Rey. 11:3). Uánikuaksï no israelitespti ka diosï úkatechanksï kómarhiasïrendi. Ísï jimbo, Salomoni ístu no kumplirispti leini enga uandenga eskaksï israelitecha no jatsispka para tembuchani nanakecha jingoni engaksï no israelitepka (Deut. 7:3, 4). Salomoni sánhani arhispti nóteru jukaparharaania Jeobaeri leichani ka kánikua no sési jásï ambe úspti. Altari ma úspti para diosa Astoreti ka máteru para diosï úkata Kemósi. Jima, imeri témbecha jingoni kómarhiaspti diosï úkatechani. Tekaaspti imani altarichani juátarhu ma jimbo uáni, meru jima orhepani enga Jerusaleni japka, nani enga Jeobaeri templuni úpka (1 Rey. 11:5-8; 2 Rey. 23:13). Jamberi jandiajku enganiarikuarhepti eratsiparini eska Jeoba no ma ambe arhipiringa mientrasi enga seguirini japiringa kéjtsïtakua ambe úkuni templurhu. Peru Jeoba no ísku pakarasïndi enga pekadu ambe úkuarhiaka. w18.07 18, 19 párr. 7-9

Máru “Noambakitiri lansecha [...] engaksï chpiririka” uátiksï jindeni chkuanderakua ambe, komu eskakini Jeoba no jukaparharasïnga ka eskakini no uékasïnga. Aida enga 19 jatirika, uandasïndi: “Sáno méntkisï, ísï pʼikuarherasïnga eska Jeoba iauani jarhaska ka eska no uékasïnga juchiti Amigueni”. ¿Néna úsïni orhepani uérakuni ambe enga pʼikuarherajka? Ima uandasïndi: “Tánguarhikuechaksï kánikua uinhaperantasïndi juchiti jakajkukuani. Antesi, solu uaxakasïrenga ka no méni tarhatani jájki. Ísï eratsisïrenga eska no nema jukaparharaasïrenga juchiti komentariuechani. Peru iásï prepararikuarhisïnguia para tánguarhikuecha ka jánguarhintasïnga tsimani o tanimu mókuntskuechani íntspiani”. Aideri experiensia jukaparhakua ambe xarhatasïndi. Eska eskudu engaksï soldadu romanuecha úrenga májku medida ma jukaspka, peru juchari jakajkukua úsïndi sánderu kʼéni o sánderu sapichu úkuarhintani. Na enga xáni kʼéaka, juchari jimbo pakarasïndi (Mat. 14:31; 2 Tes. 1:3). Jimbosï xáni jukaparhakueti eskachi uáka eska juchari jakajkukua sánderu kʼéaka. w18.05 29, 30 párr. 12-14

Kárseliri kuári mójtakuspti imeri eratsikuani ka kurhajkuarhini jarhuajperata enga na nitamapkia jenchekua (Uku. 16:25-34). Májkueni, a lo mejori máru engaksï no uéjka kurhani Bibliaeri ambe, jamberiksï jiáni mójtakuatia imecheri eratsikua ka kurhajkuarhinksï jarhuajperata engaksï no sési ambe nitamakuarhiaka. Por ejemplu, máruksï no jánhaskasïndi ambe úni engaksï tsïtajka ánchikuarhitani, pʼamenchakua maksï exeminhantani oksï uarhiranchani nemani. Kʼuiripu jiáni uénasïndi kurhamarhikuarhini tsípikueri ambe, ambe ma enga no méni kurhamarhikuarhipka. Jamberiksï ísï uandajti eska kárseliri kuári: “¿Ambe uétarhisïni eskani uáka parani pʼímutantskata jarhani?”. Engachi exeantajka eianhpikuarhu, jamberiksï jiáni uékaati kurhaani erokuarhikueri ambe. Ísï jimbo, engachi seguiriska eianhpini, uákachi sési pʼikuastantaani kʼuiripuechani, jiáni engaksï uékaaka kurhani eianhpikuani (Is. 61:1). w18.05 19, 20 párr. 10-12

Ini jurhiatikuechani, Satanasi úsïndi eska sáno iámindu kʼuiripu no kuenta íntskukuarhiaka ambe enga újka ka eska jántspiriuaka relijionicheri, jatsikuarhikueri ambe ka imani amberi engaksï újka para terokukuni kʼuiripuni (2 Kor. 4:4). Peru juchachi jatsiska pribilegiu para Jesusiri ejempluni seguirini ka jarhuatani kʼuiripuni para mítini ka marhuakuni Jeobani, imani Tata Diosïni enga íntspijka libertadi (Mat. 28:19, 20). I ambe no fásilisti ka uánikua ójkutakuechaksï jarhasti. Máru paisicharhu, kʼuiripu no uékasïndi kurhani Jeobaeri ambe ka máruksï asta ikiasïndi engachi predikarikuajka. Peru komujtsïni Jeoba juramuchika predikarini, jatsiskachi para kurhamarhikuarhini, ¿uá úrani juchiti libertadini parani sánderu apoiarini Reinueri ánchikuarhitani? Kánikuajtsïni uinhaperantasïndi exeni na engaksï xáni uáni Jeobaeri marhuaricha, arisku sáni irekani jaka paraksï úni tiempu kompletueri marhuani jimbokaksï kurhangusïnga eska kʼamakurhikua axuterku jarhaskia (1 Kor. 9:19, 23). Máruksï imecheri mísmu kúnguarhikuarhu ísï úxati ka máteruksï mótsisti nani enga sánderu uétarhini jaka jarhuajperata para predikarini. ¡Xáni enga sési ambe úkuarhijka enga nema sési úrajka imeri libertadini para Jeobani marhuakuni! (Sal. 110:3). w18.04 11, 12 párr. 13, 14