Septiembri

Jiáni enga Lasaru uarhipka, Jesusi kurhangukuaspti imeri pirembechani, Martani ka Mariani. Enga exeapka na engaksï xáni no sési pʼikuarherani japka, “pʼiaraspti uérani” (Juanu 11:32-35). Ima no ueraspti solu jimboka nóteru exepiringia imeri amigu jembani. Jimboka mítispka eska tsítantapiringa. Jesusi ueraspti jimboka no sési pʼikuarheraspka exeani imeri amigechani kómu nitamakuarhini jarhani. Nájkirukachi no perfektueka ísï eska Jesusi, kánikuajtsïni marhuachisïndi jorhenguarhini na enga kurhangutspenga ima. Ka xénchasïngachi jimboka pʼamojperakua jingoni káspka máteruechani. Kánikuajtsïni sési pʼikuastasïndi mítini eska iásï Reiskia Tata Diosïri Reinuerirhu ka eska no ióni jimbo kʼamajkuaka kómu nitamakuani. Jimboka Jesusi niáraska jindeni kʼuiripu ma, ima jindesti enga uáka sánderu sési pʼikuastpintani enga Noambakiti xáni no sési útspika. Xáni engachi sési pʼikuarherajka jimbokachi Reini ma jatsiska engajtsïni pʼamojkujka “juchantsïni engachi xáni debilika” (Ebr. 2:17, 18; 4:15, 16). w19.03 17 párr. 12, 13

Nájkirukachi jarhuatajka kʼuiripuni mítini Tata Diosïni, nochi juchesïnga engachi sánderu kʼéri ambe újka (1 Kor. 3:6, 7). Jeobasï újti eska kʼuiripu andarhieraaka imani. Ka últimu, mándani kʼuiripu jatsisïndi para erakuni sini jiókuarhia Tata Diosïri ambe o nómbe, seguni ambe enga jauaka imeri mintsitarhu (Mat. 13:4-8). Ju je miáni eska uánikua kʼuiripu no jiókuarhispka ambe enga Jesusi jorhentpienga ka nájkiruka ima sánderu ambakiti jorhentpiri máepka. Ísï jimbo, ju je no no sési pʼikuarherani enga uánikua kʼuiripu no uékaaka kurhaani Tata Diosïri ambe. Uánikua kóntperatechanchi jatsiauaka engachi kurhangukuaska kʼuiripuechani aianhpikuarhu. Tsípikua jingonchi aianhpiaka, sésichi pʼikuarheraaka engachi íntspiaka ka úakachi eskaksï sánderu no úkua jukanchaaka jiókuarhini Reinueri ambe imecha engaksï erakukata jaka “para tsípikua méntkisï jatsini” (Uku. 13:48). Ísï jimbo, “iásï engachi útasï tiempu jatsika, jaue sési úkuani iáminduechani” (Gal. 6:10). Jimajkani, sésichi pʼikuarheraaka kʼéri ambe arhini juchari Táti auandarhu anapuni, Jeobani (Mat. 5:16). w19.03 25 párr. 18, 19

Rei Dabidi karaspti: “Jeoba kʼéri ambesti ka jatsisti para kʼéri ambe arhinhani” (Sal. 145:3). Ima xénchasïrendi Jeobani ka inde uékperakua úspti eska kʼéri ambe arhipiringa “kúnguarhikuarhu” (1 Crón. 29:10-13; Sal. 40:5). Iásï, ma ambe engachi újka para k’éri ambe arhini Jeobani, jindesti komentarini tánguarhikuecharhu. Iáminduechachi tsitisïnga kurhajchani sapini ma enga mintsita jingoni komentarijka ka uandakuecha jingoni engaksï no úkua jukajka para kurhanguni. Kánikuachi sési pʼikuarherasïnga enga nema tsípikua jingoni eksplikarijka ambakiti ambe enga exentajka. Ka ískujtsïni pakatasïndi imecha engaksï balori jukajka para komentarini, nájkirukaksï timiduejka o engaksï apenasi uénani jaka juchari idioma jorhenguarhini (1 Tes. 2:2). ¿Nénachi uá xarhatakuani eskachi jukaparharasïnga na engaksï xáni jánguarhintajka? Ma ambe engachi úaka úni, jindesti diosmeiamukua íntsaani jiáni enga tánguarhikua kʼamakurhiakia ka arhiani eskajtsïni imecheri komentariu kánikua uinhaperantaska. Ístu, máteru ambe jindesti eskachi juchajtu komentariuaka. Ísï úparini, no solu juchachi uinhaperanhantaaka, sino ístuchi uinhaperpentaaka (Rom. 1:11, 12). w19.01 8 párr. 1, 2; 9 párr. 6

Ima diesi kʼuiripu lepraksï pʼamenchaxapti ka kánikuaksï no sési pʼikuarheraxapti. Mítisptiksï eska Jesusi úsïrenga kénditani na uéjki jásï pʼamenchakua ma. Ísï jimbo, ma jurhiani engaksï iauani uératini exepka, uinhachaparinksï arhispti: “Jesusi, Jorhentpiti, kóndintajtsïni sáni”. Jesusi kurhauaspti ka tsinaaspti iáminduechani. Seguru eskaksï iáminduecha kánikua jukaparharapka ambe enga Jesusi úpka. Peru solu maechakuajkusï diosmeiamukua arhipti. Ima achati enga Samaria anapuepka, uinhachaparini kʼéri ambe arhispti Tata Diosïni (Luk. 17:12-19). Ísï eska ima achati, juchajtuchi uékasïnga xarhatani eskachi jukaparharasïnga engaksï máteruecha ambakiti ambe újka juchantsïni jimbo. Jeobajtsïni íntskusïndi ejemplu parachi diosmeiamukua arhijpini. Ísï úsïndi enga újchakuraajka imechani engaksï jeiapanherantajka (2 Sam. 22:21; Sal. 13:6; Mat. 10:40, 41). Ka Bibliajtsïni arhisïndi: “Terokukunta je Diosïni komueska imeri uájpecha enga ima xáni uéajka” (Efes. 5:1). Jiájkani, uékasïngachi diosmeiamukua arhijpini jimbokachi uékasïnga májkueni úni eska Jeoba. w19.02 14 párr. 1, 2, 4

Pirenchi sapichku ma enga eskuelarhu jarhajka, janhanharhikua jingoni arhiasïndi iáminduechani eska ima no úntaaka imecha jingoni kʼuínchikua ma enga Tata Diosï no jaiapanhintajka. Erachi sapichu ma enga aianhpini jámani jaka, nájkiruka chéjka, nirasïndi uámutani nani enga irekaka imeri kompanieru ma eskuelarhu anapu enga arhinchaajka Jeobaeri testiguechani. Ka, táti ma imeri ánchikuarhitarhu jarhasti ka imeri patroni arhisïndi eska úaka ambe ma enga no sési jaka. Mítiparini eska úaka tsïtani ánchikuarhitani, arhisïndi patronini eska no úaka imani ambe, jimboka jurhimbitku jámasïnga ka eska úsïnga ambe enga lei uandajka, jimboka Tata Diosï ísïsï uéjka eskaksï úaka imeri marhuaricha (Rom. 13:1-4; Ebr. 13:18). Ini ejempluecharhu, ¿ambeksï xarhataski i tanimu Testiguecha? Jamberichi uandaaka eska balori ka jurhimbitku jámani. Peru jarhasti ambe ma engaksï sánderu xarhataka, eskaksï iámu mintsita jingoni marhuakusïnga Jeobani. Iáminduksï jánguarhintasïndi sési marhuakuni Jeobani ka úni ambe enga ima juramujka. Seguru eska Jeoba kánikua jeiapanhiantapiringa mándani arhini. Juchajtuchi uékasïnga eskajtsïni juchari Táti jeiapanhintaaka. w19.02 2 párr.1, 2

Lei, imechani sánderu kuájchakuasïrendi engaksï no uénga kuájpikuarhini komu uerandujupindichani, tsïndichani ka imechani engaksï uérakua anapuepiringa. Iámindu Israeli anapu juesi jatsisïrendi para kumplirini arini juramukuani: “Nori jatsiska para chkuanderani enga uérakua anapu ma o uerandujupindi ma jusgarinhani jauaka, ka nori jámaaka pakatakuarhini uarhiiti tsïndiri ma xukuparhakuani komu prenda” (Deut. 24:17). Jeoba sánderu uandanhiasïrendi imechani jimbo engaksï no jatsipka né enga kuájpiapiringa ka kuenta kurhakuantasïrendi imechani engaksï no sési kámpienga (Éx. 22:22-24). Jeoba uékasïndi eska imecha engaksï juramukua jatsika, pendienti jauaka máteruecha jimbo. Kurhunhisïndi ísku jándikua ambe ka uékasïndi eskaksï kuájchakuauaka ka jurhimbikua jingoni káuaka iámindu imeri marhuarichani ka sánderu imechani engaksï no jatsika né enga kuájpiauaka (Lev. 18:6-30). Engachi seguru jarhajka eskajtsïni Tata Diosï jurhimbikua jingoni kámasïnga, sánderuchi xénchasïnga imani. Ka engachi xénchajka Jeobani ka ístu ambe engajtsïni juramuchijka, xénchaasïngachi máteruechani ka jurhimbikua jingonchi kaasïnga. w19.02 25 párr. 22-26

Ju je exeni ejemplu ma na engachi jatsika para kuájchakukuarhini Satanasiri. Jeobajtsïni jorhendasti eskachi jucha no jatsiska para uandani ni ísku jándikueri ambe ni imani ambe enga ikichakueni jásïka (Efes. 5:3). Peru ¿ambechi úa engaksï ánchikuarhitarhu o eskuelarhu anapu kompanieruecha uénaaka ikichakueni jásï ambe uandani? Jiájkani, jamberijtsïni juchari konsiensia úati aianguni peligrueri ambe (Rom. 2:15). ¿Ambechi úa? ¿Kasu úkuachi juchari konsiensiani enga ísïka komueska kuári ma ka kéndikukuachi peligruni? Jamberichi uékaaka kurhajchaani ambe engaksï uandani jauaka o imajenichani exeani engaksï exerpiani jauaka. Peru ambe engachi jatsika para úni, jindesti máteru amberi uandani ochi kéndikuni. Balori uétarhisïndi parachi pʼíngukuarhini engaksï kompanieruecha afuersa uékaaka eskachi úaka o eratsiaka imani ambe enga no sési jaka. Úakachi seguru jarhani eska Jeoba exexaka na engachi xáni jánguarhintajka parachi no ísï eratsini eska Satanasi ka eskajtsïni íntskuaka uinhapikua ka jánhaskakua parachi ísï úni (2 Crón. 16:9; Is. 40:29; Sant. 1:5). w19.01 18 párr. 12, 13

Salomoni enga kánikua jatsikuarheripka ka juramukua jatsini, uékaspti úni ka jatsini ambe enga ima xáni uékapiringa (Ecl. 2:1-10). Kʼumanchikuechani uáspti, jardinichani ka parkichani ka úspti ambe enga ima xáni tsitipka. ¿Sési pʼikuarheraspi ka felisi? Ima mismu uandaspti eska na arhijka iásï anapu tekstu. ¿Marhuachiakini Salomoniri eksperiensia? Máru kʼuiripuechaksï jiáni jorhenguarhisïndi eska ambe ma no sési jarhaska engaksï na no sési ambe niátajkia ka niáranksï no sési jásï ambe nitamakuarhini. Jeoba no uékasïndi eskari inde ambe úkuarhinchaaka. Uékasïndi eskari kurhajchaaka. Parari ísï úni, uétarhinchasïngari jakajkukua jatsini, peru nori méni arrepentirikuarhiaka ambe engari erakuaka úni chíti jakajkukua jimbo. Ka Jeoba no méni mirikurhiati imani uékperakuani engari xarhataaka imeri nombri jimbo (Ebr. 6:10). Ísï jimbo, jánguarhinta xáni eskari xáni uáka parari sánderu mintsikani Jeobani. Engari ísï úska, tʼuri mismu exeaka eska iámindu ambe engakini chíti Táti auandarhu anapu arhijka jindeska parakini sési nicheni (Sal. 32:8). w18.12 22 párr. 14, 15

Kʼuiripu ma enga espiritualika, jakajkusïndi Tata Diosïni ka jánguarhintasïndi para ísï exeni ambe ma eska ima. Jánguarhintasïndi exeni ambe enga Tata Diosï uéjka eska uáka ka uékasïndi kurhajchani (1 Kor. 2:12, 13). Dabidi inde jásï ma kʼuiripuespti. Pirekua ma jimbo uandaspti eska Jeoba jindespka enga íntskuenga iámindu ambe enga uétarhinchenga, ini ambe jingoni arhikuekaxapti na enga xáni sési pájperenga imani jingoni (Sal. 16:5). Kánikua agradesidu jarhaspti enga Jeobaeri amiguepka ka imani mintsinharhisïrendi (Sal. 16:1). Jimbosï karapti eska kánikua tsípixapka. Ísïsti, no ma ambe sánderu tsíperasïrendi eska jatsini ambakiti pájperakua ma Jeoba jingoni (Sal. 16:9, 11). Imecha engaksï irekajka solu para tsípikuarhini o para tumina andani, nóksï úsïndi ísï sési pʼikuarherani eska Dabidi (1 Tim. 6:9, 10). Engari meru mintsikaska Jeobani ka marhuakundi, ambakitiri irekua ma jatsiaka ka tsípikua jingoni. Parari jatsini sánderu jakajkukua, jatsiskari para imani jingoni “jarhani”. ¿Néna? Arhintaparini imeri karakatani, exeparini ambe enga ima kueraaka ka eratsintapariani imeri kualidadichani, komu na engakini xáni xénchajka (Rom. 1:20). w18.12 25 párr. 7, 8

Pablu no ískusï uandapti temungurhirikueri ambe erachicha jingoni. Sánderu sési, juramukuaxapti kristianuechani eskaksï kánikua jukaparharapiringa temungurhirikuani. ¿Iáminduechachi ísï jukaparharasïni temungurhirikuani, ka sánderia imecha engaksï tembuchatika o uambuchatini? Engachi kánikua jukaparharaska ka janhanharhini temungurhirikuani, ísïchi úxaka eska Jesusi. Engaksï fariseuecha kurhamarhipka diborsiueri ambe, ima mókukuantaspti imani uandakuecha jingoni enga Jeoba arhipka primeru temungurhirini: “Ísï jimbosï ma achati jatsiti para jurajkuni imeri tátembani ka imeri amambani para kúnguarhini imeri témbani jingoni, ka imecha tsimarhani, solu máechakua kuerpu úkuarhiatiksï”. Ka ístu uandaspti: “Imechani enga Diosï kúndaaka, asï nema jáme jarhangutaani” (Mar. 10:2-12; Gén. 2:24). Eskachi na exekia, Jesusi sési mítispti eska Jeoba kueraaska temungurhirikuani ka uandaspti eska jindeska ambe ma para méntkisï. Jeoba no arhiaspti Adani ka Ebani eskaksï úpiringa diborsiarikuarini. Sánderu sési, ima uékasïrendi eskaksï “tsimarhani” márku japiringa para méntkisï. w18.12 10, 11 párr. 2-4

Engachi jorhenguarhijka Bibliaeri ambe kurhangusïngachi na enga xáni jukaparhakueka kumplirini ambe engajtsïni Tata Diosï juramuchijka. Peru, engachi sánderu jorhenguarhini jarhajkia Jeobaeri ambe, sánderuchi jorhenguarhisïnga na enga eratsijka ima: ambe enga tsitijka ka ambe nómbe, ka na exesïni máru ambe ka jurajkusïngachi eskajtsïni inde ambe jarhuataaka ambe ma úni o erakuni ambe ma. Nájkirukachi sési pʼikuarherajka jorhenguarhini ísï eratsini eska Jeoba, ménisï úkua jukasïndi ísï úni jimbokachi no perfektueska. Por ejemplu, jamberichi úkua jukanchajka kurhanguni na exesïni Tata Diosï arini ambe komu ambakiti jángua ma jatsini, jatsikuarhikueri ambe, aianhpikueri ambe ka iurhiriri ambe. ¿Ambejtsïni jarhuata parachi seguirini jarhani ísï eratsini eska Jeoba? jatsiskachi para Bibliani estudiarini parachi kurhanguni na enga eratsijka Tata Diosï, eratsintani indeni ambe ka jánguarhintani ísï exeni ambe ma eska Jeoba. w18.11 23, 24 párr. 2-4

Abakuki jiánisï irekaspti enga kánikua úkua jukapka. Kánikua kómu pʼikuarheraxapti jimbokaksï iáminduecha no sési úrispka ka no sésiksï kámpini. ¿Káni nóteru japirinia no sési jásï ambe? ¿Andisï Jeoba no ma ambe úni japi? I profeta imani ambejkusï exendi enga no sési kámberanhenga ka no jurhimbitku jánhani ka mismu israelitechesptiksï engaksï ini ambe uénga. Profeta ísï pʼikuarherasïrendi enajki jandiajku japi. Imani jurhiatikuecha jimbo enga xáni no sési jánhaskuarhepka, kómarhispti Tata Diosïni eska úpiringa ambe ma. Jamberi uénapti eratsini eska Jeoba no exexapka ambe enga úkuarhini japka ka eska jukari ióndaxapka úni ambe ma. ¿Ménisïchi niáraski ísï pʼikuarherani eska i ambakiti Tata Diosïri marhuari? ¿Abakuki jurajkuspia Jeobani mintsinharhini ka ambe enga eiatspipka? Nómbe. Enga ísï eiangukuarhipka Jeobani imeri problemechani ka ambe enga xáni uandanhiatenga ka no máteru kʼuiripuni, xarhataspti eska útasï mintsikaxapka Jeobani. Ísïspti eska kánikua uandanhiaxapka jimboka no kurhangusïrenga andisï Tata Diosï no ma ambe úni japi ka jurajkuni eska no sési nitamakuarhipiringa. w18.11 14 párr. 4, 5

Ju je eranhaskani Pedru ka Andresini engaksï kurucha pʼímatipka. Enga Jesusi pʼímarhiapka paraksï kʼuiripuechani nirani jorhendaani, jurajkuasptiksï kurucha pʼímatarakuechani ka nirasptiksï imani jingoni (Mat. 4:18-20). Buenu, i ambe no arhikuekasïndi eskaksï iáminduecha engaksï jorhenguarhijka jurhimbikuani, jatsiaka para jurajkuni imecheri ánchikuarhitani, jimbokaksï jatsiska para ánchikuarhini para úni irekani ka para kuidarini imecheri familiani (1 Tim. 5:8). Peru jamberiksï jatsiati para exeni ambe enga sánderu jukaparhakueka ka nóteru májkueni exenia jatsikuarhikua ambe. Ju je exeni Marieri eksperiensia. Meru kánikua tsitisïrendi golf chʼanani ka uékasïrendi ambakiti chʼanari máeni ka kánikua tumina andani. Jiájkani, uénaspti Bibliani estudiarini. Kánikua tsitisïrendi imani jurhimbikua ambe enga jorhenguarhienga ka na enga inde ambe jarhuatenga para jurajkuni ambe enga antesi uénga. Kurhanguspti eska kánikua úkua jukapiringa para jatsikuarhikua ambe uékani jatsini ka ístu uékani Jeobani marhuakuni (Mat. 6:24). Ísï jimbo, niáraspti jurajkuni imani ambe enga xáni tsitienga, ambakiti chʼanari máeni. Iásï prekursorestia ka uandasïndi eska agustu irekaxaka ka kánikua tsípikua jingoni. w18.11 5 párr. 9, 10

Enga 30 jatiripkia, nóteru ánchikuarhisïrendia komu karpinteru para iásï úni Reinueri ambe uandantani. Mítispti eska inde ambe jindespka enga sánderu jukaparhakuepka, jimboka uandaspka eska jindespka ma rasoni enga jimbo Tata Diosï axapka Echerirhu (Mat. 20:28; Luk. 3:23; 4:43). Jesusi úspti eska eianhpikua jindepiringa ambe enga sánderu jukaparharapiringa imeri tsípikuarhu, ka uékasïrendi eskaksï máteruecha májkueni úpiringa (Mat. 9:35-38). Sáno iámindu juchachi no karpinterueska, peru iáminduechachi jorhentpesïnga ambakiti eianhperakuani. I ánchikuarhita xáni jukaparhakuesti enga asta Tata Diosï jamberi partisiparijka. Biblia arhisïndi eskachi jindeska “Tata Diosïri jarhuajpiricha” (1 Kor. 3:9; 2 Kor. 6:4). Mítiskachi eska jurhimbikua, ambe máeska enga jukaparhakueka Tata Diosïri karakatarhu (Sal. 119:159, 160). Jimbochisï jánguarhintajka sési úrani eianhpikuarhu “uandakuani enga sési jimboeka” (2 Tim. 2: 15). Ka para ísï úni, jatsiskachi para jánguarhintani sánderu sési úrani Bibliani enga jindeka erramienta engachi sánderu úrajka para jorhentpini Jeobaeri, Jesusiri ka Reinueri ambe. w18.10 11 párr. 1, 2

Enga uámba ma seguiriska Jesusiri ejempluni, úsïndi eska témba kánikua janhanharhiaka (Efes. 5:22-25, 33). Jiájkani, témba kurhangukusïndi. Engaksï táticha kurhangutsperajka, ambakiti ejempluesïndiksï para uájpecha. Peru ístu, jatsistiksï para jorhendaani nénaksï jatsiska para kurhangukuani máteruechani. Por ejemplu, úpirindiksï arhiani eskaksï no uiriauaka Kʼumanchikua Reinuerirhu o eskaksï konbibiuecharhu, jatsiska para jurajkuni eskaksï kʼératicha orheta jatsirakuarhiaka tʼirekua. Enga sapi ma sési ambe uáka juchantsïni jimbo, komu mítachintsïni puerta, jatsiskachi para felisitarini. I ambe kánikua jarhuataati ka uáti eska no méni mirikurhiaka eska ‘sánderu sésiska intsïmpini, ka eska intsïmbinhani’. w18.09 29 párr. 5, 6

Na engajtsïni jarhuatajka tata Jesukristu, juchari Juramuti, jarhuataatijtsïni iásï ka para sánderu orhepani. Ísï jimbo, jatsiskachi para sési pʼikuarherani engachi eratsintaska na engajtsïni xáni marhuachijka jiókuarhini indeni ambe enga xáni mójtakurhikia. ¿Andichisï no juchari familieri jorhenguarhikuarhu exeajki ajustichani engaksï xáni úkuarhikia tánguarhikuecharhu ka eianhpikuarhu, ka nénajtsïni marhuachiskia i ambe? Seguru eskajtsïni kánikua uinhaperantaaka. Engachi exejka néri jarhuajperata jimboeski engajtsïni Jeobaeri organisasioni íntsaajka instruksionichani ka na engaksï xáni marhuajka, tsípikua jingonchi kumpliriuauaka. Seguru eskachi sési pʼikuarherasïnga exeni na enga nóteru xáni tumina úrakuarhijkia jimbokaksï nóteru xáni publikasionicha imprimirinhasïngia. Aparatuechani úrapariani, organisasioni úsïndia sánderu uáni kʼuiripuni eianguni ambakiti ambe. Jiájkani, ¿andichisï no sánderu úraajki publikasionichani elektroniku jimbo, audiuechani ka bideuechani? Engachi ísï úska, xarhataakachi eskachi juchajtu májkueni interesi pásïnga eska Jesusi, sési úraparini organisasioniri tuminani. Mintsita jingoni jiókuarhini Kristueri jarhuajperata, úsïndi eska juchari jakajkukua kʼéaka ka eskachi májku kʼéri jauaka. w18.10 25, 26 párr. 17-19

Engachi májkueni xénchpitiska eska Tata Diosï, imajtsïni úraati para úni mókukuantani kómarhikuechani ima kʼuiripueri enga uandanhiani jaka (2 Kor. 1:3-6). Peru ju je no erokuarhini eskaksï erachicha iámindu ambe sési uáka. No nema perfektuesti. Erokuarhini eskaksï iámindu ambe sési uáka, no sési jarhasti ka no sésijtsïni pʼikuastaati (Ecl. 7:21, 22). Ju je miáni eska Jeoba no jukari jamberi erokuarhisïnga juchari ambe. Engachi ísïuaka eska Jeoba, tekakuantauakachi máteruechani engaksï no sési uáka ambe ma (Efes. 4:2, 32). Nochi jatsiska para ísï kurhangutaraani eskaksï no jánguarhintasïnga ka ni terokutantaani jarhani máteruechani jingoni, jimbokaksï sánderu no sési pʼikuarheraaka. Enbesi de inde ambe úni, jatsiskachi para pʼindeni felisitariuani imani ambe jimbo engaksï újka. Inde ambe animariuauati ka jarhuatauati paraksï tsípikua jingoni marhuakuni Jeobani (Gal. 6:4). w18.09 16 párr. 16, 17

Ísï eska Jesusi, kurhajchani Tata Diosïni, para jucha ísïsti komu tʼireni. ¿Néna jimbo? Engachi ambakiti ambe tʼirejka, agustuchi pʼikuarherasïnga ka felisi. Májkuenisti, engachi újka ambe enga Tata Diosï uéjka, juchari jakajkukua sánderu kʼésïndi ka sésichi jarhasïnga Tata Diosï jingoni. Engachi újka ambe engajtsïni Jeoba jorhendajka, jánhaskatichi úkuarhisïnga (Sal. 107:43). Ka kánikua marhuasïndi ísï úni. Biblia arhisïndi eska no ma ambe enga kʼuiripu tsitijka úsïnga terokuntani jánhaskakua jingoni ka ístu eska jánhaskakua, ísïska komu “anhatapu tsípikueri para imecha engaksï jánhaskakua jingoni jámajka ka imecha engaksï no jurajkujka jánhaskakuani, arhinhaatiksï eskaksï felisiska” (Prov. 3:13-18). Ma xanhari, Jesusi arhiaspti imeri disipuluechani: “Engajtsï cha jánhaskajka ini ambe, ka úntsï eskaksïni ji na arhijka, tsípintsï jauaka” (Juanu 13:17). Seguirini japirindiksï felisini engaksï no jurajkupiringa kurhajchani Jesusini. Ka ísïksï úspti. Kumpliriuani Jesusiri instruksionichani ka májkueni jámani eska ima, no jindespti ambe ma engaksï no jukaparharapka, sino ambe ma engaksï úkuecha jingoni xarhatapka. w18.09 4 párr. 4, 5

Nájkirukaksï Adani ka Eba tsimarhantku japka jardini de Edenirhu, instruksionicha enga Jeoba íntskuapka jatsipirindiksï para úni eskaksï interesi pápiringa máteruecha jimbo. Tata Diosï újchakuraaspti ka arhiaspti eskaksï uánipiringa, eskaksï uinirapiringa Echerini ka ánchitani (Gén. 1:28). Ísï eska Kuerajpiri na pendienti jarhajka imeri kueraakata jimbo, imaksï jatsipirindi para exeni nénaksï úpirini imecheri desendienticha sési irekani. Paraksï iáminduecha agustu irekani paraisurhu, jatsisptiksï para úni eska iámu parhakpini paraisu máepiringa. I xáni kʼéri ánchikuarhita uétarhinchasïrendi eska iámu familia jarhuajpepiringa. Engaksï Adani ka Eba no pekaripiringa, Echerirhuksï kʼuiripu perfektuecha irekapirindi. Paraksï kʼuiripu perfektuecha úni eska paraisu kʼépiringa, uétarhipirindi eskaksï májku kʼéri ánchikuarhipiringa imani ambe jingoni enga Jeoba uékenga úni ka ísïksï andajkuarhini ‘mintsikuastanhani’ (Ebr. 4:11). Iásïchi nomasi úsïnga eranhaskani na engaksï xáni felisipiringa. Ístu, Jeoba kánikua újchakuraapirindi engaksï intsïmpitipiringa ka interesi páni máteruecha jimbo. w18.08 18 párr. 2; 19, 20, párr. 8, 9

Iásï, ¿ambechi jatsiski para úni engachi chkuanderakua ambe jauataminhaska? Inde ambeksïsï úkuarhinchapti Jesusi ka Juanu el Bautsita (Mat. 11:18, 19). ¿Ambe úspi Jesusi? Enbesi de úrani imeri tiempu ka uinhapikuani para kuájpikuarhini, pʼímarhiaspti kʼuiripuechani paraksï imani ambe exeni ambe enga úkuarhini japka, ambe enga ima uénga ka jorhentpini. Eska Jesusi mismu na uandapka, “ambakiti jorhengua xarharasïndi eska ambakiska imani jimbo engachi janhanharhijka o úkuechani jimbo”. Ambakiti ambechi jorhenguarhisïnga ixú. Jamberi ménisï, kʼuiripu mámaru ambe uandaati juchari ambe oksï imani ambe uandani engajtsïni no sési pakataaka. ¿Ambechi uá úni? Enga nema chkuanderakua ambe uandaska juchari ambe, uétarhisïndi eskachi ambakiti ambe uáka paraka xarharaaka eska ima ambe no ísïska. Ísï eska Jesusiri ejemplu na xarhatapka, engachi jánguarhintaska ambakiti kristianu máeni, xarhataakachi eska chkuanderakua ambeska ambe enga uandanhaka juchari ambe. w18.08 6 párr. 11-13

Ambe enga Biblia arhijka Kainiri, Salomoniri ka israelitecheri engaksï no kurhandirakpa, xarhatasïndi eskaksï sésikua jatsispka paraksï jukaparhakua ambe úni. Táchanisïksï sésikua jatsispti para moantani ka mójtakurhini (Uku. 3:19). Ísïsti, Jeobajtsïni no seguirisïndi jurajkuni engachi no sési ambe újka. Ju je miántani eska puákuntaspka Aaronini. Iásï, parajtsïni Jeoba arhistachini, uáti úraani Bibliaeri istoriechani, publikasionichani o imani konsejuechani engajtsïni erachi ma uékperakua jingoni íntsaajka. Engachi kurhajchajka ambe engajtsïni ima arhijka, seguruchi jarhasïnga eskajtsïni Jeoba niáraaka pʼamojkuni. Engajtsïni Jeoba xarhatachijka ambakiti uékperakua, ambe ma jimboesti (2 Kor. 6:1). Sésikuajtsïni íntskusïndi “eskachi méntku jurajkuaka pekaduni, ka indeni jásï ambe enga parhakpini anapuecha tsitijka” (Titu 2:11-14). Mientrasi engachi “iásï ini tiempu jimbo” irekani jauaka, niáraakachi tsʼéjkunhani sinchi Tata Diosïntku marhuakuxaki o nómbe. Ju je jánguarhintani méntkisï preparadu jarhani parachi xarhatani eskachi Jeobani jingoni jarhaska. w18.07 21 párr. 20, 21

¿Ambechi uá úni parajtsïni Jeoba jaiapanhintani ka no i parhakpini? Uétarhisïndi eskachi tsimani ambe miáni jauaka. Primeru, eska Jeoba méntkisï íntsaasïnga kóntperatechani imechani engaksï no méni jurajkujka (Ebr. 6:10; 11:6). Jeoba kánikua jukaparharaasïndi iáminduechani ka mándani arhini ka exesïndi eska no jurhimbitku úni japiringa enga no kasu úkuapiringa imeri marhuarichani. Jeoba jingontku jarhasïndi ambe engaksï nitamakuarhinchani jarhajka imeri marhuaricha ka mítisti néna úni paraksï orhepani uérakuani tsʼéjkukuechani (Sal. 1:6; 2 Ped. 2:9). Ka máteru ambe, eska Jeoba xarhatasïnga eskajtsïni jeiapanhintasïnga imani ambe úparini engachi no méni erokuarhini japka. Jeoba no kóndiantauati imechani engaksï ambakiti ambe újka nomasi paraksï máteruecha exeani. ¿Andi? Jimboka Jesusi uandaspka eska imajku jindeuaka imecheri kóntperata (Mat. 6:1-5). Peru ístu uandaspti eska Jeoba exesïnga enga nema no felisitarinhajka imani ambe jimbo enga máteruecha jimbo úka. w18.07 9 párr. 8, 10

Apostuli Pedru no úsïrendi kurhanguni ambe enga ima bosi uékenga arhini. Ísï no ióndani, niárasptiksï máru achaticha enga Korneliu axaapka. Ka espiritu santueri jarhuajperata jimbo, Pedru niraspti imani achaticha jingoni Korneliueri kʼumanchikuarhu. Judiuechaksï no méni inchaakusïrendi kʼumanchikuecharhu no judiuecheri jimbo. Ísï jimbo, enga Pedru imantku ambe exepiringa enga uérakisï xarharajka, no méni nipirindi Korneliueri kʼumanchikuarhu. Jimajkani, ¿andisï nípi? Niraspti imani ambe jimbo enga bisionirhu exepka ka ístu espiritu santueri jarhuajperata jimbo. Eska na kurhapkia ambe enga Korneliu uandantapka, Pedru kánikua sési pʼikuarheraspti enga jamberi Tata Diosïri jarhuajperata jimbo uandapka: “Iásï kʼóru sési jimbo mítiskani eska Diosï no nani kʼuetsapisïnga, sino eska jeiapanhintasïnga nákinterku ma nasioni anapu kʼuiripuni enga janhanharhijka imani, ka sési úni” (Uku. 10:34, 35). I jimbanhi jorhentperakua enga Pedru intsïnhapka, jarhuataapirindi iámindu kristianuechani. w18.08 9 párr. 3, 4

Seguru eskachi iáminduecha jánguarhisïnga no úni imani ambe enga Jeoba kurhunhijka. Peru ménisï jarhasïndi ambe ma enga Biblia no arhijka ambechisï jatsi para úni. Enga ísï úkuarhijka, ¿nénachi uá mítini ambe uékasïni Jeoba eskachi uáka? Enga juchari konsiensia sési jorhendakata jauaka Biblia jimbo, ambakiti ambechi erakuaka úni. Jeobajtsïni uékasïndi, jimbojtsïnisï íntsaati konsejuechani para konsiensia sési marhuani. Ima mismu uandasïndi: “Ji, Jeoba, chíti Tata Diosïska, Ima engakini jorhendajka parari sési jarhani, Ima engakini arhini jaka nani engari ísï xanharaaka” (Is. 48:17, 18). Engachi eratsiantaska Bibliaeri prinsipiuechani ka jurajkuni eskajtsïni mintsitarhu niárachiaka, uákachi eska juchari konsiensia sánhani arhiaka sánderu sési marhuani. Ísï úparini, uákachi ambakiti ambe erakuni úni. Prinsipiu ma, karakata máesti o jurhimbikua ma enga sánderu jukaparhakueka engajtsïni jarhuatajka eratsintani ambe ma o parachi ambakiti ambe úni. Sési kurhanguani Bibliaeri prinsipiuechani, jarhuatasïndijtsïni exeni na enga eratsijka Jeoba ka andisï kararkuarhia máru leichani. w18.06 17 párr. 5; 18 párr. 8-10

Trampa enga Erodesiri partidu úrapka, ariispti: enga Jesusi no sési uandapiringa impuestueri ambe, úpirindiksï Romaeri gobiernuni aianguni eska no respetarixapka, peru enga uandapiringa eska uétarhisïrenga íntspini, jamberiksï imeri disipuluecha jurajkupirindi. Paraka Jesusi xarhatapiringa eska no nema jingoni úkuarhisïrenga, jingontku mókukuantaspti. Ísïspti, Jesusi mítispti eskaksï uánikua kontribusioni kobrarpiticha no jurhimbitku jámasïrenga. Peru no uékasïrendi eska ima ambe ójkutapiringa para xarhatani ambe ma enga sánderu jukaparhakueka: eska solu Tata Diosïri Reinu kʼamajkuaka kʼuiripuecheri problemechani. Ísï úparini xarhataspti ambe ma engachi iáminduecha jatsika para úni. Nájkiruka ambe ma ísï xarharaaka enajki ambakiti ambe, nochi méni jatsiska para politikarhisï inchamukuni. Enbesi dechi méntku eratsini jarhani ambe sési únhaxaki ka ambe nómbe, o no sési uandani jarhani, kristianuechachi orheta peerasïnga Jeobaeri Reinuni ka jurajkusïngachi eska ima jurhimberantaaka ambe ma (Mat. 6:33). Uánikua Jeobaeri testiguechaksï jurajkustia politika ambe engaksï xáni tsitienga. w18.06 6 párr. 9-11

Jamberi Satanasi no solu úrapti ísku jándikua ambe komu trampa ma, sino ístu aiakuapti eskaksï úpiringa juramukuani kʼuiripuechani. Jamberi, ambe enga uékenga úni Satanasi, jindepti eska no niárapiringa jarhani “uarhiitiri desendensia” enga Tata Diosï aiatspipka (Gén. 3:15). Peru Jeoba Dilubiu ma juáspti ka ísï úparini, no jurajkuspti eska úkuarhipiringa ambe engaksï Satanasi ka demoniuecha uékenga úni. Jatsiska para kurhanguni eska kánikua peligrosueska ísku jándikua ambe úni ka jukari konfiarikuarhini. Ima ánjilicha engaksï Satanasi jingoni úkuarhipka, uánikua uéxurhinksï marhuakuspti Jeobani auandarhu. Peru uánikua ánjilichaksï jurajkuspti eskaksï uénapiringa no sési jásï ambe eratsini. Májkueni, jamberichi juchajtu uánikua uéxurhini páni jakaia marhuakuni Tata Diosïni imeri organisasionirhu, ixú echerirhu. Peru asta ini xáni ambakiti lugari jimbo, uáti uénani jarhani juchari mintsitarhu no sési jásï ambe (1 Kor. 10:12). Ísï jimbo, kánikua jukaparhakuesti eskachi méntkisï exeni jauaka ambe jarhaski juchari mintsitarhu ka nochi jámani jukari konfiarikuarhini ni ikichakueni jásï ambe eratsini (Gal. 5:26; Kol. 3:5). w18.05 25 párr. 11, 12

Pablu no sési pʼikuarheraspti engaksï sáno iámindu judiuecha no uékapka jiókuarhini Reinueri ambe. Peru ima no méni kuatantaspti. Ju je exeni ambe enga explikaripka ísï tátsekua imeri kartarhu para Roma anapu kristianuecha de na enga pʼikuarherenga judiuecha jimbo. Uandaspti: “Ambe enga juchiti mintsita uékajka ka engani ji kómarhijka Diosïni para Israeli anapuecha, sési jimbo jindesti eskaksï ima pʼímutantskata jauaka, jimbokani ji úsïnga uandantani eskaksï mintsita jingoni uékasïnga úni Diosïri ambe, peru nóksï mítisti na enga uétarhijka úni” (Rom. 10:1, 2). Pablu explikarispti eska aianguasïrenga jimboka imeri mintsita ísï uékasïrenga, o sea jimboka meru uékasïrenga eskaksï máru judiuecha niárapiringa salbarikuarhini (Rom. 11:13, 14). Ima kómarhispti Tata Diosïni eska jarhuataapiringa máru judiuechani eskaksï jiókuarhipiringa Reinueri ambe. Uandaspti eska jindespka jimbokaksï judiuecha mintsita jingoni uékasïrenga úni Tata Diosïri ambe. Pablu ambakiti ambe exesïrendi mándani kʼuiripueri. Ima mítispti eska ima judiuecha engaksï mintsita jingoni uékenga úni Jeobaeri ambe, úpiringaksï ambakiti disipuluecheni Kristueri, ísï eska ima. w18.05 13 párr. 4; 15, párr. 13, 14

Iáminduechachi jatsiska para pendienti jarhani juchari erachichani jimbo ka exenchi ambeksï uétarhinchaxaki. Pablu arhiaspti kristianu ebreuechani: “Tarhatantsï je jájkichani engaksï andatserani jakaia, ka jauataa je jurhintskuechani engaksï xúrini [o débili] jaka. Ka jurhimberantskantaa je xanharuechani engaksï no sési jándepka, eska ambakintaaka ima enga no újka xanharani, ka no sánderu kánerani pʼamenchakua” (Ebr. 12:12, 13, TDU). Astaksï tumbiicha uáti uinhaperantaani erachichani uandakuecha jingoni. Pablu arini konseju íntskuspti: “Ú je eskani ji kánikua tsípini pʼikuarheraaka, mítiparini eskajtsï májku ambe eratsixaka ka májku jásï uékperantsï, ka iáminduecha májku mintsita jingoni jámani ka májku ambe eratsini. Ka asï jáma je úni ni ma ambe enbidia jimbo o teparakuarhikua jimbo, sino kaxumbikua jingoni, ka sánderu kʼéri ambe exeani máruteruechani ka eska chájkumindu, ka no solu pendienti páni para chájkumindu sési uérani, sino ístu pendienti páni para máruteruecha” (Filip. 2:2-4). w18.04 22, 23 párr. 10, 12

Jeobajtsïni salbaristi pekadueri ka uarhikueri Jesusini jimbo parachi jucha méntkisï marhuakuni, komu “Diosïri ambarhati jántspiricha”. Ambe engajtsïni jarhuataaka no no sési úrani libertadini, ni ménderu jántspirini imani amberi engachi tsitijka o enga parhakpini uéjka, jindesti okupadu jarhani Jeobaeri ambe jingoni (Gal. 5:16). Ju je exeni Noeri ka imeri familiaeri ejemplu. Nájkiruka jiánisï kánikua ísku jándikua ambe japka ka atajperakua ambe, nóksï jurajkuspti eska ima ambe enga kʼuiripu uékenga, támisï paapiringa. ¿Ambe jarhuataaspi? Kánikua okupadu jarhani imani ambe jimbo enga Jeoba arhiapka eskaksï úpiringa: arkani úni, tʼirekua patsani para imecha ka animalicha ka aianguni kʼuiripuni eska kʼamakurhikua niáraxapkia. Biblia arhisïndi: “Noe ísï úspti iámindu ambe eska Tata Diosï na arhipka. Ísïmindu úspti eska na arhinhapka” (Gén. 6:22). Ini ambe jimbo, Noe ka imeri familiaksï salbarikuarhispti (Ebr. 11:7). w18.04 10, 11 párr. 8, 11, 12

Para enganiariuani “iámindu parhakpini anapuechani”, Satanasi ka demoniuecha no soluksï úraasïndi gobiernuechani, sino ístu relijioni no jurhimbitini ka parhakpiniri kʼérati negosiuechani (Jaŋ. 12:9). Úrasïndi relijioni no jurhimbitini para chkuanderakua ambe uandani Jeobaeri. Ka uékasïndi konseguirini eska uánikua kʼuiripu mirikurhiaka Tata Diosïri nombrini (Jer. 23:26, 27). Iámindu ini ambe jimbo, uánikua kʼuiripu eratsisïndi eskaksï Tata Diosïnisï kómarhini jarhajka, peru sési jimboksï demoniuechanisï kómarhiani jarhajti (1 Kor. 10:20; 2 Kor. 11:13-15). Parhakpiniri kʼérati negosiuechani úrapariani, Satanasi etsakusïndi máteru chkuanderakua. Por ejemplu, úsïndi eska kʼuiripu jakajkuaka eska para sési irekani, jatsiska para kánikua tumina jatsini ka jatsikuarhikua ambe (Prov. 18:11). Ima engaksï jakajkujka ini chkuanderakuani, úrasïndiksï imecheri tsípikuani paraksï puru “jatsikuarhikuani” ambejku uékani, enbesi de Jeobani (Mat. 6:24). Uékperakua jatsikuarhikua ambe jimbo, úsïndi eskaksï nóteru uékaakia Tata Diosïni (Mat. 13:22; 1 Juanu 2:15, 16). w18.05 23 párr. 6, 7