Eneru

Iámindu ambakiti Tata Diosïri marhuarichachi uékasïnga jorhenguarhini sési úni indeni ánchikuarhitani engachi intsïnhaka (2 Tim. 4:5). Ísïsti, i ánchikuarhita jindeesti enga sánderu jukaparhakueka ka enga meru uétarhini jaka para úni. Peru jamberichi no uáka xáni tiempu úrani aianhpikuarhu ísï eskachi na uékapiringa jimbokachi máteru ambe úsïnga enga jukaparhakueka ka kánikuachi tiempu úrasïnga ka uinhapikua. Jamberichi jatsijka para kánikua ánchikuarhini parachi úni kéndani juchari familiani. O ístuchi jatsijka para orhepani uérani pʼamenchakua ambe jimbo, depresioni jimbo, engachi jatirijkia o engachi jatsijka para familiarhu anapuechani jarhuataani. Nóchi jatsiska para no sési pʼikuarherani engachi no újka xáni tiempu úrani eskachi xáni uékapiringa para marhuakuni Jeobani. Jesusi mítespti eskachi no iáminduecha úpiringa májkueni xáni ánchikuarhini Reinueri ambe jimbo eska máteruecha (Mat. 13:23). Jeoba kánikua jukaparharasïndi ambe engachi xáni újka para marhuakuni, peru eskachi kʼóru mintsita jingoni uáka (Ebr. 6:10-12). w19.04 2 párr. 1-3

Noambakitiri chkuanderakuecha uarhiricheri ambe, no sésiksï pakatasïndi Jeobaeri nombrini. Ma i chkuanderakuecheri jindeesti ima jorhentperakua eskaksï uarhiricha kómu nitamakuarhisïnga infiernurhu. ¿Andiksïsï no sési pakatajki Tata Diosïni i eratsekuecha? Jimbokaksï ísï xarhatasïnga eska Jeoba, Tata Diosï enga xáni uékpitika, xásï kʼuiripu máeska eska Noambakiti (1 Juanu 4:8). ¿Nénajtsïni pʼikuastasïni i ambe? Ka sánderu jukaparhakua ambe, ¿néna pʼikuastasïni Jeobani i ambe? Ju je miáni eska ima kurhunhisïnga iámindu ambe enga no sési útspijka (Jer. 19:5). Chkuanderakuecha uarhikueri ambe, úsïndi eska no jukaparharanhaaka tata Jesukristueri uarhikua (Mat. 20:28). Enga ísïpiringa eskachi kʼuiripuecha ánima ma jatsiska enga no uarhijka, i ambe arhikuekapirindi eskachi jatsiskia tsípikua ma para méntkisï, ka eska tata Jesukristu no jatsipiringa para íntspini imeri tsípikuani parajtsïni pʼímutantani. Peru ju je miáni eska Jesusiri uarhikua, jindeeska sánderu ambakiti uékperakua engajtsïni Tata Diosï xarhatacheka (Juanu 3:16; 15:13). Eranhaska je na engaksï pʼikuarherajka Jeoba ka Jesusi i jorhentperakuecha jimbo engaksï újka eskaksï kʼuiripuecha no jukaparharaaka tata Jesukristueri uarhikuani, enga xáni ambakiti intsïmperakua máeka. w19.04 14 párr. 1; 16 párr. 8, 9

¿Nani karakata jarhaski ambe enga Jesusi jorhentpika? Tʼámu Ebanjeliuechaksï uánikua ambe uandasïndi enga Jesusi úpka ka uandani enga Echerirhu japka. Karakatecha engaksï Griegaecharhu jaka, jarhuatasïndijtsïni sánderu sési kurhanguni na enga eratsejka Jesusi, jimboka espiritu santu jarhuataaspka imechani engaksï karaaka, ka ísïksï eratsesïrendi eska Kristu. Ambe enga Jesusi jorhentpika, marhuachisïndijtsïni para iámindu ambe jimbo. Ísï jimbo, jatsisïngachi para kumplirini ‘Kristueri mandamientuni’ engachi kʼumanchikuarhu jarhajka, ánchikuarhitarhu o eskuelarhu ka kúnguarhikuarhu (Gal 6:2). Jorhenguarhisïngachi ini mandamientueri ambe engachi arhiantaajka Karakata Griegaechani ka eratsentani ambe enga arhijka. Ka ístuchi kumplirisïnga úparini ambe engajtsïni arhistachijka, juramuchijka ka engachi úraajka prinsipiuechani engachi indeni parti jimbo exeantajka Bibliarhu. Kurhajchani Kristueri mandamientuni, juchari Tata Diosï Jeobanchisï kurhajchani jarhajka enga xáni uékpitiika, nani enga uérajka iámindu ambe enga Jesusi jorhentpika (Juanu 8:28). w19.05 3 párr. 6, 7

Xáni no sési enga kʼuiripu imani ambe uáka enga Noambakiti jaiapanhentajka. Peru Jeoba sési mítesti ambe enga újka Noambakiti. Ima pendienti jarhasïndi engachi xáni no sési pʼikuarherani jarhajka ka uátijtsïni sési pʼikuastantani. Xáni engachi sési pʼikuarherajka marhuakuni Tata Diosïni “enga uinhaperpintajka iámindu ambe jimbo. Ima jindesti engajtsïni uinhaperantajka para iámindu juchari mískuarhitechani jimbo, paraka juchajtu uáka uinhaperaantani imechani engaksï nákinterku ma jásï mískuarhita jatsijka, indeni mismu uinhapikuani jimbo enga jimbojtsïni Diosï uinhaperantajka juchantsïni” (2 Kor. 1:3, 4). Jamberiksï imecha sánderu uétarhinchajti paraksï sési pʼikuastanhantani engaksï imecheri táti jémbecha no ma ambe úka paraksï kuájchakuani ka niáranksï ísku ambe ma úminhani o imecha engaksï parienti jémbecha ísku ambe ma úkuaka. Rei Dabidi mítespti eskachi uáka mintsikani eskajtsïni Jeoba méntkisï sési pʼikuastantaaka (Sal. 27:10). Dabidi seguru jarhaspti eska Jeoba uékperakua jingoni kuidariuasïnga méntkisï imechani engaksï imecheri familiaricha niárajka no sési kaani. ¿Néna? Úrapariani imeri ambakiti marhuarichani. Kúnguarhikuarhu anapuechaksï juchari familiauesti. Por ejemplu, Jesusi uandaspti eskaksï jindeespka imeri ermanuecha, ermanecha ka amamba engaksï imani jingoni kómarhienga Jeobani (Mat. 12:48-50). w19.05 15, 16 párr. 8, 9

¿Ambechi jatsiski para sánderu jukaparharani? Ísïsti, kurhangusïngachi eskachi jatsiska para pauani pauani arhutani tiempu para estudiarini Tata Diosïri Karakatani. Iásï, nóteru xáni kánistia programa Bibliaeri arhintskua semaneri para kúnguarhikua. Ísïchi sánderu tiempu jatsisïnga para eratsentani ambe engachi arhintajka ka jirinhantani sánderu informasioni. Nóchi solu jatsiska para kapituluechani arhiantani enga programarhu arhijka, sino eskajtsïni mintsitarhu niárachiaka ambe enga Biblia uandajka ka eskachi sánderu andarhieraaka Jeobani (Sal. 19:14). Jorhenguarhikua Aianhpiri jingoni, estudiarisïngachi Bibliani. Ísï jimbo, ju je sési kurhanguani Bibliaeri karakatechani, sánderu imechani engaksï arhinhantaaka jiáni enga kúnguarhikua exeaka artikuluni. Ju je exeni na enga terukuntajka Bibliaeri karakata ma imani ambe jingoni enga párrafu eksplikarijka enga jukaparhakueka. Ístu, ju je arhutani tiempu para eratsentani ambe engaksï Bibliaeri karakatecha arhijka ka nénachi uá úraani juchari irekuarhu (Jos. 1:8). w19.05 27 párr. 5, 9

Na enga exenga Jesusi aianhpikuani, ambakiti ejemplu máesti para jucha. Ambe enga sánderu jukaparhakuepka para ima, jindespti Tata Diosïri Reinueri ambe aianhpini. Kánikua xanharasïrendi para uánikua kʼuiripuni aianguni na enga xáni úpiringa. Méntkisï jánguarhintasïrendi kʼuiripu jingoni uandontskuarheni imecheri kʼumanchikuecharhu ka jimesïsï enga uánikua kʼuiripu jarhenga. Méntkisï orheta peeraspti aianhpikuani. Uákachi májkueni úni eska Jesusi parachi Reinueri ambe aianhpini na uéjki jatini ka nani uéjkini. Listuchi jarhaska para jurajkuni imani ambe engachi tsitijka parachi úni jarhuajpini ini ánchikuarhitarhu (Mar. 6:31-34; 1 Ped. 2:21). Máru kúnguarhikuarhu anapuechaksï uáti prekursori espesialini, regularini o auksiliarini. Máteruksï jorhenguarhisti máteru idioma, oksï máteru nani ísï nirani aianhpini nani enga uétarhini jaka. Ka nóchi mirikurhiasïnga aianhpirichani engaksï kánikua ánchikuarhijka para jorhentpini ka ístu engaksï jánguarhintajka xáni eskaksï xáni uáka. Ia sea engachi kánikua tiempu úrajka aianhpikuarhu o sánititu, Jeobajtsïni no kurhachisïndi sánderu eskachi xáni uáka úni. w19.04 4 párr. 7, 8

Úpiringachi arini ambe kurhamarhikuarhini: “¿Pʼikuarhinhisïni sánisï enbidia o selosi?” (1 Ped. 2:1). “¿Kʼéramakuarhisïni arini ambe jimbo, nani engani anapueka, jorhentperakua jimbo engani eskuela intsïnhaka o jatsikuarhekua ambe jimbo?” (Prov. 16:5). “¿Menosi uásïni imechani engaksï no májkueni ambe jatsikuarheka eska ji o engaksï máteru raseka?” (Sant. 2:2-4). “¿Tsitisïni ambe enga xáni parhakpinirhu jaka?” (1 Juanu 2:15-17). “¿Tsitisïni tsípikuarhini ísku jándikueri ambe jingoni ka enga atajperakueri ambeka?” (Sal. 97:10; 101:3; Amós 5:15). Engachi mókuantauaka ini kurhamarhikuechani, jamberichi kuenta íntskukuarheaka ambe engachi jatsika para mójtakuni. Niárasïngachi májkueni eratseni o jámani eska imecha engachi jingoni kúnguarhijka (Prov. 13:20). Eskuelarhu o ánchikuarhitarhu, kʼuiripuecha jingonchi jarhasïnga engajtsïni no jarhuatajka ísï eratseni eska Jeoba. Peru tánguarhikuecharhu, úsïngachi exeantani ambakiti amiguechani engajtsïni jarhuatajka uékperakua xarhatani ka ambakiti ambe úni (Ebr. 10:24, 25). w19.06 12 párr. 13, 14

Jeoba no uékasïrendi eskaksï kʼuiripuecha jatsiapiringa problemechani ka uandanhiata ambe enga xáni jaka iásï. Jimbosï Tata Diosïri marhuari ma niárajti no eratseparini uandani enga uandanhiata ambe jatsijka (Job 6:2, 3). Nájkiruka erachi uandaaka ambe ma Jeobaeri o juchari ambe enga no ísïka, nóchi jámaaka jirejiresï ikiani imani jingoni ni no sési ambe uandani imeri ambe. Ménisï, erachi ma enga no sési nitamakuarhini jarhajka kʼéri problema ma jimbo, ístu uétarhinchasïndi eska jarhuatanhaaka konseju ma jingoni (Gal. 6:1). ¿Nénaksï uá orhejtsïkuticha jarhuatani? Eliuri ejempluni úraparini enga kurhangukupka Jobuni enga ima aiangukuarhipka ambe ma (Job 33:6, 7). Antede Eliu konseju ma íntskuni, orheta asegurarikuarhispti sési kurhanguni na enga Jobu eratsenga. Orhejtsïkutichaksï uáti májkueni úni eska Eliu engaksï jingontku kurhajchaska nemani enga no sési nitamakuarhini jaka ka jánguarhintani kurhangukuni ambe enga ima kʼuiripu nitamakuarhini jaka. Engaksï ísï úska, jamberiksï konsejuecha sánderu mintsitarhu niárakuati. w19.06 22, 23 párr. 10, 11

¿Nénachi uá seguirini kʼéri ambe arhini Jeobani jiáni engachi nóteru jatsiaka sésikua para ísï úni? Beteli uératini, kúnguarhikuarhu anapu orhejtsïkutichaksï arhinhaati ambe engaksï uáka. Peru engaksï Beteli anapuecha no uáka orhejtsïkuticha jingoni uandontskuarheni, jiájkani orhejtsïkutichaksï Bibliani jupindaskuarhiparini ka juchari publikasionicharhu, arhiatijtsïni ambe engachi uáka parachi seguirini marhuakuni Jeobani (Mat. 28:19, 20; Ebr. 10:24, 25). Jeoba aiatspesti eskaksï imeri marhuaricha iámindu ambe jatsiaka para imecheri jakajkukua seguirini uinhapiti jarhani (Is. 65:13, 14; Luk. 12:42-44). Ísï jimbo, uákachi seguru jarhani eska imeri organisasioni jánguarhintaaka úni ambe ma parajtsïni íntskuni ambe engachi uétarhinchaaka parachi no jurajkuni Jeobani. Peruchi juchajtu uáka úni ambe ma. Engachi nóteru jurajkunhaskia úni juchari ánchikuarhitani, ju je exeni nanichi uá jískani Bibliani ka publikasionichani. Ísï jimbo, ju je jingontku jámani ka no jima jískani nani engaksï uáka sóntku exentani indeni xáni ambakiti ambe engachi sïranda jimbo jatsika, tabletarhu o selularirhu. Iáminduechachi jatsiska para úni ambe ma para juchari jakajkukua no chkeni. w19.07 10, 11 párr. 10, 11

Uánikua uéxurhinicha jimbo, sáno iámindu kʼuiripuechaksï jatsispti imecheri relijioni. Peru nótki xáni iónisïndi enga kánikua mójtakurhika inde ambe. Sánderuksï uánixati engaksï no tsitijka relijioniri ambe. Asta máru paisicha jimbo, sáno iámindu kʼuiripuechaksï uandasïndi eskaksï no ma relijionirhu jarhaska (Mat. 24:12). ¿Andi? Jamberi máruksï solu uékajti tsípikuarhini o imecheri problema ambe jámani sési péntani (Luk. 8:14). Máteruksï nóteru jakajkusïndia Tata Diosïni. Ka ístuksï jarhasti engaksï jakajkujka Tata Diosïni, peruksï eratseni eska relijioni iásï nóteru jarhuajpesïngia, no marhuasïnga ka eska no terukuntasïnga siensia jingoni ni na enga kʼuiripu eratsejka. Jamberiksï notisiecharhu ísï kurhaajti eska kʼuiripuni no nema kueraaska ka ístuksï ísï kurhajchaasïndi imecheri amiguechani ka maestruechani. Peruksï no káni kurhaasïndi ambakiti ambe paraksï úni jakajkuni Tata Diosïni. Máteruechaksï kánikua ikiasïndi exeni eskaksï relijioniri orhejtsïkuticha kánikua tsitisïnga juramukua ka tumina jatsini. Ka máteru nani ísï, juramutichaksï no káni jurajpesïndi para relijioniri ambe úni. w19.07 20 párr. 1, 2

Parajtsï úni seguirini mintsikani Jeobani ka sési marhuakuni, no uétarhisïndi eska juchari kuerpu uiuinhasï jauaka komueska ima kʼuiripueri enga meru uiriani jarhajka karrera ma jimbo. Asta uánikua engaksï nóteru xáni uiuinhasï jakaia ísï eska antesi, eratsitixatiksï seguirini sánderu sési marhuakuni Jeobani (2 Kor. 4:16).¿Iónichi marhuakuskia Jeobani ka iásï juchari kuerpujtsïni nóteru xáni jarhuatasïnia ísï eska antesi? Enga ísïka, ju je no kuatantani. Uákachi seguru jarhani eska Jeoba kánikua jukaparharasïnga ambe engachi xáni úkia ióntki (Ebr. 6:10). Ka ambe engachi úni jaka iáiasï, ju je miáni eska na engachi xáni marhuakujka Jeobani no arhikuekasïnga na engachi xáni xénchajka. Sánderu sési, xarhatakusïngachi eskachi xénchasïnga juchari ambakiti jángua jingoni ka engachi jánguarhintajka na engachi xáni uáka (Kol. 3:23). Jeobajtsïni kurhanguchisïndi ambe engachi újka úni ka ambe nómbe ka nójtsïni kurhachisïndi sánderu jamberi engachi no uáka úni (Mar. 12:43, 44). w19.08 3 párr. 6; 5, 6 párr. 11, 12

Jeoba imeri marhuaricheri ambakiti “jánguani” úrasïndi para úni eskaksï kʼuiripuecha andarhieraaka ( Mat. 5:14, 15; 1 Ped. 2:12). Enga chári acheeti o uarhiiti no Jeobaeri testigueka, ¿míteaski kúnguarhikuarhu anapuechani? Pʼímarhi je chári uarhiitini o acheetini tánguarhikuecharhu (1 Kor. 14:24, 25). Erokuarhisïngachi eska ma jurhiani iámindu juchari kʼumanchikuarhu anapuecha marhuakuaka Jeobani. Peru ístu, ísïsti eskaksï jamberi no méni niáraka marhuakuni Jeobani nájkirukachi kánikua jánguarhintaaka jarhuataani. Enga inde ambe úkuarhiska, ju je no no sési pʼikuarherani ambe engaksï imecha erakuaka úni. Jimbokachi no nemani uáka obligarini para jiókuarhini ambe engachi jakajkujka. Peru jarhuatauati juchari kʼumanchikuarhu anapuechani engaksï exeaka na engachi xáni tsípikua jingoni marhuakujka Jeobani. Ju je kómarhijpikuani, janhanharhikua jingoni aianguani Bibliaeri ambe ka seguirini jarhuataani (Uku. 20:20). Ju je mintsikani eskajtsïni Jeoba újchakuraaka engachi jánguarhintani jaka. Ka engajtsïni juchari kʼumanchikuarhu anapuecha uékaska kurhaani, pʼímutantskataksï uéraati. w19.08 18, 19 párr. 15-17

¿Ambe arhikuekaxapi Jesusi ini uandakuecha jingoni? Eskachi jatsiska para arisku sáni irekani, i ambe arhikuekasïndi eskachi jatsiska para orheta peerani imani ambe engachi eratsetini jaka úni ka eskajtsïni no ma ambe ójkutaaka. Jesusi ísï úspti enga orheta peerapka aianhpikuani ka arhistakuaspti imeri chúxapatichani paraksï orheta marhuakuni Jeobani ka aianhpini Reinueri ambe. Ka májkuenchi úsïnga eska Jesusi engachi xarhatajka eska aianhpikua sánderu jukaparhakueska juchari irekuarhu engachi orheta jirinhajka “Diosïri juramukueri ambe ka para jámani eska ima na jeiapanhintajka” (Mat. 6:33). Ma ambe engachi uáka úni para sési úni juchari ánchikuarhitani aianhpikuarhu, jindeesti arisku sáni irekani para sánderu tiempu arhutani para jarhuataani máteruechani míteni ka xénchani Jeobani. Por ejemplu, ¿uáchi mójtakuni máru ambe jima engachi ánchikuarhijka ka ísï úni sánderu tiempu úrani aianhpikuarhu semana jimbo? ¿Uáchi menusi tiempu úrani tsípikuarhita ambe jimbo engajtsïni jamberi kánikua tiempu euajka? w19.04 5, 6 párr. 12, 13

Ini uéxurhinicha jimbo, uánikua erachicha engaksï ióni marhuakukia Jeobani máteru ánchikuarhitaksï intsïnhasti. I erachichaksï úkua jukanchaspti indeni ánchikuarhitani únia Jeobaeri kúnguarhikuarhu, jimbokaksï kánikua tsitisïrenga imani ánchikuarhitani engaksï uénga. Uánikuaksï ióni páxaptia imani ánchikuarhita jingoni. Máruksï kánikua kómu pʼikuarheraspti peruksï niáraspti pʼindeni. ¿Andi? Jimbokaksï xénchasïnga Jeobani, imanksïsï aiakukuarhepti ka no ánchikuarhitani ma Jeobaeri kúnguarhikuarhu (Kol. 3:23). Sésiksï pʼikuarherasïndi seguirini marhuakuni Jeobani kaxumbikua jingoni náki uéjki ánchikuarhita ma jingoni. I erachichaksï Tata Diosïni jurajkukuasïndi uandanhiatechani jimbokaksï míteska eska ima pendienti jarhasïnga imecha jimbo (1 Ped. 5:6, 7). Engachi jánguarhintajka kaxumbitiini, juchantsïni mismu marhuachisïndi ka ístu máteruechani. Úsïngachi orhepani uérakuani uandanhiatechani jimbokachi xarhatasïnga kaxumbikua, ka sánderu jukaparhakua ambe, ísïchi úsïnga andarhierani juchari Táti auandarhu anapuni. w19.09 7 párr. 16, 17

Jeoba no solu úspti eska Dabidi imeri familiani orhejtsïkupiringa, sino ístu iámindu ireta Israelini. Dabidi kánikua uinhapikua jatsispti jimboka reispka. Peru ménisï no sési úraspti imeri juramukuani ka kánikua no sési ambe niátaspti (2 Sam. 11:14, 15). Nájkiruka ísï úpka, kurhajchaspti Jeobani enga jurajkupka eska jurhimberantapiringa. Mintsita jingoni kómarhisïrendi ka méntkisï jánguarhintani ísï úni eska Jeoba na arhistakuenga (Sal. 51:1-4). Ístu, xarhataspti kaxumbikua para úni kurhajchaani máteru acheetichani ka ístu uarhiitichani (1 Sam. 19:11, 12; 25:32, 33). Dabidi pʼikuarherakua jukasptia imani ambe jimbo enga no sési úpka ka jánguarhintaspti para Jeobani marhuakuni. Ima mítespti eska marhuasïnga kurhajchani Jeobani. Ini jurhiatikuecha jimbo, úsïngachi exeni eskaksï imecha engaksï kurhajchajka Jeobani, ménderueniska imecha jingoni engaksï no jiókuarhijka Tata Diosïri ambakiti jarhuajperatani. Imecha engaksï kurhajchajka Jeobani, kánikuaksï tsípikua jingoni irekasïndi jimboka imecheri mintsita kánikua sési jarhaska (Isa. 65:13, 14). w19.09 17 párr. 15; 19 párr. 21

Uéxurhini 1935, Jeobaeri testiguechaksï sési kurhangusptia néspiksï ima uánikua kʼuiripuecha enga Juanu exeapka. Niárasptiksï kurhanguni eska i grupu no uétarhinchasïrenga auandarhu nirani para úni kʼéri uaxantskuarhu orhepani jarhani ka Karichi sapichuni japarini ka eskaksï i uandakuecha arhikuekasïnga ambe ma. Nájkirukaksï uánikua kʼuiripuecha Echerirhu irekani jauaka, orhepanksï jauati kʼéri uaxantskuarhu engaksï jiókuarhiska eska Jeoba jindeeska juramuti iámindu amberi ka uékanksï kurhajchani (Is. 66:1). Ka Karichi sapichuni japarinksï jauati engaksï jakajkuska Jesusiri uarhikuani. Mateu 25:31, 32, sáno májkueni jásï ambe arhisïndi. Jima uandasïndi eskaksï “iámindu kʼuiripuecha”, asta no sési úricha, tánguarhintaaka Jesusini japarini ka imeri kʼéri uaxantskuarhu enga tʼíntskua jingoniika. Úsïngachi kurhanguni eskaksï i iámindu kʼuiripuecha Echerirhu jarhaska ka no auandarhu. Enga i ambe niáraka sési kurhangunhani, xarhatasïndi andisï Biblia no arhijki eskaksï uánikua kʼuiripuecha auandarhu niuaka. Solu ma grupu uáti irekani para méntkisï jini auandarhu: 144,000 engaksï Jesusi jingoni juramuaka ma parhakpini (Jaŋ. 5:10). w19.09 28 párr. 9

Jeoba uékasïndi eskachi méntku jurajkuaka Kʼéri Babiloniani. Peru ístu uétarhisïndi eskachi uáka máteru ambe. Jatsiskachi para eratsetini jarhani seguirini marhuakuni Jeobani. Ju je exeni tsimani ambe engachi uáka úni. Orheta, jatsiskachi para meru ísï úni eskaksï Tata Diosïri juramukuecha na uandajka. Nóchi jatsiska para jiókuarhini imani ambe engaksï kʼuiripuecha jorhentpijka ni na engaksï jámajka. Por ejemplu, méntkuchi no sáni jaiapanhintasïnga iámindu jásï ísku jándikua ambe, ni enga tataka ma máteru tataka jingoni témbuchajka o enga nanaka ma máteru nanaka jingoni uambuchajka ka ni enga tataka ma nanakeni jámajka o nanaka ma tatakeni jámajka (Mat. 19:4, 5; Rom. 1:26, 27). Tsimani úni jámani, jatsiskachi para seguirini Jeobani marhuakuni juchari erachichani jingoni. Ka ísïchi úsïnga nani engachi uáka, ia sea Kʼumanchikua Reinuerirhu, o enga uétarhiaka, erachicheri kʼumanchikuecharhu ka asta sïpatikuarku. Ambe uéjki úkuarhini, jatsiskachi para seguirini tánguarhini parachi marhuakuni Jeobani. Jatsiskachi para ísï úni, sánderia “iásï engachi exeni jaka eska juchari Tateeri jurhiatikua janoxamkia” (Ebr. 10:24, 25). w19.10 15, 16 párr. 6, 7

Jeoba uékasïndi eskachi sési nitamakuarhiaka ka uákachi ísï úni engachi tsípikuarhiska ambe ma jingoni. Asta Bibliarhu uandasïndi eska para kʼuiripu no jarhaska sánderu ambakiti ambe eska tʼireni, binu sáni arhani ka sési pʼikuarherani ánchikuarhita jimbo (Ecl. 2:24). Peru, sáno iámindu jásï tsípikuarhita enga parhakpinirhu jaka no sési útspisïndi, úsïndi eskachi no kúrhajchauaka Tata Diosïri juramukuechani ka asta úsïndi eska kʼuiripu niáraaka jiókuarhini o asta tsitini imani ambe enga Tata Diosïri Karakata no jaiapanhintajka. Juchachi uékasïnga Jeobantku marhuakuni, ísï jimbo, nóchi jatsiska para “arhani juchari Tateeri tʼirekuani ka ístu noambakitiri espirituecheri tʼirekuani” (1 Kor. 10:21, 22). Sáno méntkisï, nemani jingoni tʼireni arhikuekasïndi eskachi sési pájperasïnga imani jingoni. Imani ambe jingoni tsípikuarhini enga uarhiperakueri ambeka, sïkuamikueri, ísku jándikueri ka máteru jásï ambe jingoni engachi tsitijka ka ísï jámani eska parhakpini anapuecha, májkuenisti eska Tata Diosïri ikiatspiticha jingoni uaxakani tʼireni ka imani ambe arhani engaksï imecha úmantaka. Engachi indeni ambe újka, no soluchi jucha mismu no sési úkuarhinchasïnga, sino ístuchi nóteru sési pájperasïnguia Jeoba jingoni. w19.10 26 párr. 2; 29 párr. 11, 12

Ju je eratseni arini ejempluni, enga kʼuiripu ma uéjka eska tarhiata jarhuataaka para barku manakuarhini, jatsisti para tsimani ambe úni. Orheta, jatsisti para barkuni jima pérani enga tarhiani jarhajka, jimboka barku no manakuarhiaka enga uanamukunisï pakaraska. Tsimani úni jámani, jatsisti para karhataani ka sési pʼirakuani belechani, jimboka tarhiata solu ísï uáka manatani barkuni. Májkueni, soluchi ísï uáka seguirini marhuakuni Jeobani engajtsïni imeri espiritu jarhuataska. Ka parajtsïni úni jarhuatani, jatsiskachi para tsimani ambe úni. Uénani jámani, jima niárani enga tarhiani jarhajka, enga jindeeka marhuakuni Tata Diosïni parajtsïni imeri espiritu santu úni jarhuatani. Tsimani úni jámani, karhatani belani, o sea jánguarhintani na engachi xáni uáka para Jeobani marhuakuni (Sal. 119:32). Espiritu santujtsïni jarhuataati seguirini sési marhuakuni Jeobani nájkirukaksï máteruecha no uékaaka eskachi ísï uáka ochi kʼérati tsʼéjkukuechani jatsiani. w19.11 9 párr. 8; 10 párr. 11

Últimu jurhiatikua enga Jesusi irekapka komu kʼuiripu ma, kánikua uandanhiaxapti. Uénani jámani, mítispti eska nóteru ióni kuerataxapkia paraksï imecha engaksï ikiakuenga no sési kámapiringa astaksï uándikuni. Peru jarhaspti máteru ambe enga uandanhiatani japka. Jimboka kánikua xénchasïrenga Táti jembani, uékasïrendi jeiapanherantani. Ka mítispti eska enga no jurajkupiringa jiáni enga xáni no sési nitamakuarhipiringa, jarhuajpepiringa para Tata Diosïri nombri pímbinhaxentani. Ístu, xénchasïrendi kʼuiripuni ka mítispti eskachi solu jiáni úpiringa jatsini erokuarhikua parachi irekani para méntkisï enga ima no jurajkupiringa Jeobani asta uarhikuarhu jamberi. Nájkiruka Jesusi no sési nitamakuarhini japka, seguirixapti jatsini pínandikua. Jesusi jatsispti “Diosïri pínandikua”, i ambe arhikuekasïndi, sési pʼikuarherani ísï eska ima enga ambakiti pájperakua ma jatsijka Jeoba jingoni. Ísïsï pʼikuarherani japti Jesusi imeri mintsitarhu ka eratsikuarhu (Filip. 4:6, 7). Juchachi no méni jatsiaka para xáni ambe aguantarini eska Jesusi. Peruchi iámindu imeri chúxapaticha no sési ambe nitamakuarhiaka (Mat. 16:24, 25, TNM; Juanu 15:20). Ka májkueni eska ima, seguru eskachi méni kánikua uandanhiani jauaka. w19.04 8 párr. 1-3

Ju je kurhamarhikuarhini: “¿Jukaparharasïni engani Jeobaeri irhetarhu jaka?”. Jeobajtsïni xarhatachesti eska jarhuataxaka imeri iretani. Jiájkani, uánikua ambechi jatsiska engachi jimbo jatsika para agradeserikuni (1 Tes. 5:18). ¿Nénachi xarhatasïni eskachi apoiarixaka kúnguarhikuani enga Jeoba úrani jaka? Engachi kumpliriuajka Bibliaeri konsejuechani engaksï publikasionicharhu uérajka, tánguarhikuecharhu ka kʼéri tánguarhikuecharhu ka engachi jánguarhintajka aianhpini na engachi xáni újka ka ístu Jesusiri chúxapatichani uáni (1 Kor. 15:58). Ju je jánguarhintani parajtsïni Jeoba jaiapanhintani paraka jiókuarhiaka imani ambe engachi újka para marhuakuni. Ju je marhuakuni Tata Diosïni jimbokachi agradesidu jarhaska. Ka ju je seguirini sánderu ambakiti ambe íntskuni jimbokachi mintsita jingoni xénchasïnga. Ka ístu ju je kánikua apoiarini kúnguarhikuani enga Jeoba úrani jaka iásï. Engachi iámindu ini ambe úska, xarhatakuakachi Jeobani eskachi kánikua jukaparharasïnga engajtsïni íntskuka sésikua parachi marhuakuni ka imeri Testigueni. w19.11 25 párr. 17, 18

Jesusi no arhikuekaxapti eskaksï milagruechani uápiringa ísï eska ima, sánderu sési, eskaksï aianhpipiringa ka jorhentpini sánderu uánikua iretecha jimbo, sánderu uánikua kʼuiripuechani ka sánderu ióni eska ima. Engachi ánchikuarhita ma jatsika, ju je kurhamarhikuarhini: “¿Ísï mítekateski eskani ambakiti ánchikuarhiri máeska? ¿Tiempu jingoni kʼamarasïni juchiti ánchikuarhitani ka jánguarhintasïni sési úni?”. Engachi uandajka eska jo, jiájkani juchari jefijtsïni mintsikajti ka jamberiksï juchari kompanieruecha uékajti kurhaani ambakiti aianhperakuani. Peru iásï juchari ánchikuarhita jimbo enga jindeka nirani aianhpini ka jorhentpini, ju je kurhamarhikuarhini: “¿Ísï mítenhaski eska nema enga kánikua jánguarhintajka? Engani uénaaka pʼorhembini nemani, ¿sési exesïni ambe engani uandaaka? ¿No ióndasïni nirani pʼorhembiantaani imechani engajtsïni kurhajchajka? Ka ¿jánguarhisïni méntkisï aianhpini úparini iámindu ambe enga xáni uétarhijka para aianhpini?”. Engachi uandajka eska jo, jiájkani ambakiti aianhpirichi máeka ka engachi tsípikua jingoni nirajka aianhpini. w19.12 5 párr.14, 15

Enga temungurhiri ma uandaska eskaksï kaauaka sapiichani, jatsistiksï para exeni tsimani ambe enga jukaparhakueka: orheta, na jatinksï uékasïni kaani, ka tsimani úni jámani, namunksï uékasïni kaani. Peru, ¿káni sánderu sési jarhaski para íri ambe uandontskuarheni? ¿Ka andisï xáni jukaparhakue ísï úni? Sánderu sésisti eskaksï nobiuecha uandontskuarhiaka íri ambe ante deksï tembuperani, jimboka kánikua jukaparhakueska eskaksï tsimarhani májkueni eratsiaka íri ambe. Ístuksï jatsisti para sési eratsini sinksï listu jarhaskia paraksï sapiichani kánguarhiani. Máru engaksï apenasi tembuperaka, sánderuksï sési exesïndi erokuarhini ma o tsimani uéxurhini paraksï sapiichani kaani, jimboka para i ambe kánikua tiempu uétarhisïnga ka uinhapikua. Exesïndiksï eska erokuarhini, jarhuatauaka paraksï pʼindeni temungurhirini irekani ka paraksï sánderu sési pájperani. w19.12 23 párr. 4, 5 

Interu parhakpini jimbo, uánikua Jeobaeri marhuarichaksï no sési ambe nitamakuarhisïndi ka ini ambe jimboksï niárasïndi kánikua no sési pʼikuarherani. Máruksï uinhamu pʼamenchasïndi oksï uarhiranchani nemani engaksï kánikua xénchenga. Máteruechaksï kánikua kómu pʼikuarherasïndi jimboka kʼumanchikuarhu anapu ma o amigu ma nóteru uékaskia Jeobani marhuakuni. Ka máruksï ístu kómu nitamakuarhisïndi enga no sési ambe úkuarhijka komu kʼéri jenchekua ma o enga kʼéri janijka. Iámindu imechaksï uétarhinchasïndi eskachi sési pʼikuastantauaka. ¿Nénachi uá jarhuataani? Ju je ambakiti amigu máeni. Ambakiti amiguechaksï úrasïndi imecheri tiempu ka uinhapikua para jarhuataani imecheri erachichani. Ju je exeni ambe enga nitamakuarhipka erachi ma enga arhinhajka Pablo, ima kʼéri pʼamenchakua ma exeminhantaspti enga jimbo úpiringa uarhini. Imeri témba Catalina, uandasïndi: “Kúnguarhikuarhu anapu temungurhiri ma, pásptijtsïni doktori jingoni jiáni engajtsïni aiángupka ambe enga Pablo pʼamenchani japka. Jiáni mismuksï uandaspti eskajtsïni no jandiajku jurajkupiringa ka eskajtsïni jarhuatapiringa tekaantani engachi xáni no sési nitamakuarhini japka ka méntkisïksï juchantsïni jingoni jarhasïndi jiáni engachi uétarhinchajka”. ¿No ísïski eskajtsïni kánikua uinhaperantasïnga ambakiti amiguechani jatsiani engajtsïni jarhuatajka jiáni engachi tsʼéjkukuechani jatsiajka? w20.01 8, 9 párr. 1, 5, 6

Engajtsï chá jindepiringa ma Jesusiri chúxapati enga jima tánguarhitini japka kuartu ma jimbo enga karhakua japka, Pentekostesirhu uéxurhini 33 jimbo, ¿a no eskajtsï seguru japiringa eskajtsï espiritu santu jimbo erakunhaspka? (Uku. 2:5-12). Peru imecha engaksï espiritu santu jimbo erakukatejka, ¿Tata Diosï májkueni erakuasïni iáminduechani? Nómbe. Joperu, ¿káni erakunhasïni nema espiritu santu jimbo? Ima jurhiatikua, no solu ima 120 kristianuechaksï erakunhaspti espiritu santu jimbo. Ísï tátsekua ima mismu jurhiatikua jimbo, máteru 3,000 kʼuiripuechaksï intsïnhaspti espiritu santu ísï eska Jesusi na aiakuapka. I 3,000 kʼuiripuechaksï jiáni erakunhaspti engaksï itsï atakuarhipka (Uku. 2:37, 38, 41). Peru ísï tátsekua, nóksï iámindu erakukatecha intsïnhaspti erokuarhikua para auandarhu nirani jiáni engaksï itsï atakuarhipka. Samaritanuechaksï ísï tátsekua erakunhaspti engaksï na itsï atakuarhipkia (Uku. 8:14-17). Ka Tata Diosï jiáni erakuaspti Korneliuni ka imeri kʼumanchikuarhu anapuechani engaksï nótki itsï atakuarhini japka, ambe ma enga no méni ísï úkuarhini japka (Uku. 10:44-48). w20.01 20, 21 párr. 2-4

Tʼámu Ebanjeliuecharhu, Jesusi, ma 165 xanhari arhispti Jeobani, Táti. ¿Andisï xáni uandapi Jeobaeri ambe? Jimboka uékasïrenga eskaksï kʼuiripuecha sési mítetini japiringa eska Jeoba Táti uékpiti máeska (Juanu 17:25). Ju je exeni néna kámaspi Jeoba imeri Uájpani Jesusini ka ambejtsïni jorhendasïni imeri ambe. Tata Diosï méntkisï kurhauasïrendi imeri Uájperi kómarhikuechani ka ístu mókukuantaasïrendi (Juanu 11:41, 42). Jesusi méntkisï exespti eska Táti jémba xénchasïrenga ka jarhuatani ambe uéjki jimbo enga ima nitamakuarhini japiringa (Luk. 22:42, 43). Jeoba xarhataspti eska jindeeska Táti uékpiti ma, jimboka úspka eska Jesusi mítepiringa eska ima jarhuataxapka (Mat. 26:53; Juanu 8:16). Ísïsti, Jeoba no kuájchakuspti iámindu amberi enga úpiringa no sési úkuni Jesusini, peru kʼóru jarhuataspti paraka úpiringa tekaantani ambe enga xáni nitamakuarhipka. Jesusi mítespti eska ima ambe enga no sési úkupiringa, no jindeepiringa para méntkisï (Ebr. 12:2). Jeoba xarhataspti eska pendienti jarhaspka Uájpani jimbo jimboka kurhaasïrenga imeri kómarhikuechani, íntskusïrendi ambe enga uétarhinchenga, jorhendasïrendi ka jarhuatani (Juanu 5:20; 8:28). w20.02 3 párr. 6, 7, 9

Engachi jatsiaka para erakuni sinchi úntaa o nómbe pʼindekua ma, jatsiskachi para exeni máteruecheri konsiensiani, ka sánderia juchari erachicheri. Nóchi uékasïnga úni eskaksï máteruecha pekadu ambe uáka (Mar. 9:42). Ístuchi no uékasïnga ísku jatini no sési pʼikuastaani imechani engaksï no Testigueka. Uékperakua uáti eskachi janhanharhikua jingoni uandontskuarhekuauaka, ka i ambe uáti eska Jeoba kʼéri ambe arhinhaaka. Ka nóchi jatsiska para arhinchaani o arhirperani imecheri pʼindekuecha jimbo. Ju je miáni eska uékperakua kánikua jarhuajpisïnga. Engachi kurhangukuaska máteruechani ka janhanharhiani, astachi uáka úni eskaksï imecha engajtsïni no sési kámajka, mójtakurhiaka. Ju je aianguani juchari parientichani ka besinuechani eskachi Jeobaeri testigueska (Is. 43:10). Enga familiari ma uarhiska, chári familia ka amiguechaksï uáti kánikua ikiani engajtsï no úntaska pʼindekua ma. Sánderu fásiliuati orhepani uérakuni ini uandanhiatani engajtsï xarheni arhiaska ambe engajtsï jorhenguarhikia Bibliarhu. Ju je no méni kʼuratseni kuájpini ambe enga Biblia jorhentpijka (Rom. 1:16). w19.04 17, 18 párr. 14-16

Echerirhu, 12 apostulichaksï Jesusi jingoni jámaspti aianhpini, peru apostuli Pablu kristianu úkuarhispti ísï tátsekua enga Jesusi na uarhipkia ka tsíntani. Nájkiruka tátsekua niárapka jindeeni “apostuli no Israeli anapuecheri”, no kuenta úkuarhispti 12 apostulicha jingoni (Rom. 11:13; Uku. 1:21-26). Nájkiruka ísïpka, sési pʼikuarherasïrendi imani ambe jingoni enga jatsipka ka no enbidiariuasïrendi 12 apostulichani engaksï niárapka xáni sési pájperani Jesusi jingoni. Engachi kaxumbiska ka sésichi pʼikuarherani imani ambe jingoni engachi jatsika, ísïuakachi eska Pablu ka janhanharhiauakachi imani erachichani enga Jeoba juramukua íntsaaka (Uku. 21:20-26). Jeoba erakuasti erachichani paraksï orhejtsïkuni kúnguarhikuani. Nájkirukaksï no perfektueka, Jeoba ísï exeasïndi komueska intsïmperakua ma (Efes. 4:11). Engachi janhanharhiajka ka úni ambe engajtsïni imecha arhijka, xarhatasïngachi eskachi Jeobaeri amigueska ka sésichi pájperasïnga erachicha jingoni. w20.02 17 párr. 13, 14

Ante dejtsï Jeobaeri testiguecha jingoni jorhenguarhini, jamberijtsï tʼuini jukaparharasïrenguia Bibliani. Jamberijtsï ístu xénchenguia Jesusini. Ka iásï engajtsï míteakia Testiguechani, kánikuajtsï tsitijka imecha jingoni jarhani. Peru inde ambe no uáti eskajtsï aiakukuarheaka Jeobani ka itsï atakuarhini. Uékperakua enga nema pʼikuarherajka Jeobani jimbo, úsïndi eska itsï atakuarhiaka. Engajtsï niáraska sánderu xénchani Jeobani eska ambe uéjkini, no ma ambeksïni ójkutaati parajtsï marhuakuni. Ísï jimbo, xénchani Jeobani no solu úsïndi eskachi itsï atakuarhiaka, sino ístujtsïni jarhuatasïndi parachi méntkisï marhuakuni Tata Diosïni. Jesusi uandaspti eskachi jatsiska para xénchani Jeobani iámindu juchari mintsita, eratsekua ka uinhapikua jingoni (Mar. 12:30). ¿Ambeksïni jarhuataa parajtsï niárani xáni xénchani ka janhanharhini Jeobani? Eratsentani na engajtsïni ima xáni xénchajka. w20.03 4 párr. 4, 5

¿Ambe arhikuekasïni sési úni indeni ambe engachi enkargarinhaka? Jánguarhintani sési úni juchari ánchikuarhitani aianhpikuarhu, arhikuekasïndi nirani aianhpini na engachi xáni uáka ka ístu jorhentpini. Peru, para Jeoba, no solu jukaparhakuesti na engachi xáni tiempu úrajka para imani marhuakuni, sino ístu andichisï ísï újki. Engachi ísï úska jimbokachi xénchasïnga Jeobani ka kʼuiripuni, iámindu mintsita jingonchi ánchikuarhiaka aianhpikuarhu (Mar. 12:30, 31; Kol. 3:23). Ka para ísï úni, uétarhisïndi eskachi jánguarhintaaka na engachi xáni uáka para sánderu sési aianhpini. Engachi exejka eska aianhpikua kʼéri kóntperata máeska, jánguarhintaakachi sánderu uánikua kʼuiripuni aianguni ambakiti aianhperakuani. Juchachi no úsïnga xáni tiempu úrani aianhpikuarhu na engachi xáni uékapiringa. Ka indeni ambechisï meru tsitijka úni. Jánguarhintasïngachi sánderu sési aianhpini Reinueri ambe parachi mintsitarhu niárakuni kʼuiripuni. Ka orhetachi peerasïnga aianhpikuani. w19.04 2 párr. 3; 3 párr. 4, 6

Noambakitiri chkuanderakuechaksï úsïndi eska kʼuiripu sánderu no sési pʼikuarheraaka ka kómu nitamakuarhini. Por ejemplu, jamberiksï arhiajti tátichani engaksï sapini ma uarhiranchajka eska Tata Diosï auandarhu páska, jimboka ánjelituni ma uétarhinchaxapka. ¿A no eska i Noambakitiri chkuanderakua sánderu no sési pʼikuastaasïnga, enbesi de sési pʼikuastaantani? Ístu, úranhasïndi infiernueri ambe paraksï xarhatani eska sési jarhaska kastigarpini, komu chpirirhu kurhiraani imechani engaksï no jakajkujka ambe enga Iglesia jorhentpijka. Seguni libru ma enga grupu relijioniri ma uandajka (Inquisición española), máru inde grupueri engaksï xáni no sési kámpienga, ísïksï exesïrendi eskaksï solu “xarhatakuaxapka na engaksï no sési nitamakuarhipiringa para méntkisï” imecha engaksï no májkueni ambe jakajkuenga eska relijioni Katolika, parakaksï móantapiringa antedeksï uarhini ka nóksï nirani infiernurhu. Ka máru lugaricha jimbo, kʼuiripu exesïndi eska jatsiska para kómarhiani imecheri ióntki anapu parientichani engaksï uarhikia, kʼéri ambe arhiani o úni eskaksï jarhuatauaka. Máteruechaksï jánguarhintasïndi no ikiataani uarhirichani paraksï ícha no kastigariuani. Peru i chkuanderakuecha engaksï Noambakitirika, meruksï no sáni sési pʼikuastpentasïndi. Sánderu sési, ísku jatinksï uandanhiatpesïndi ka asta chérpini. w19.04 14 párr. 1; 16 párr. 10