Febreru

Enga Biblia úrajka uandakuani jurhimbikua, arhikuekasïndi úni ambe enga Tata Diosï uandajka eska sési jarhaska ka iámu ambe ísï úni. Ju je exeni ambe enga xáni úpka Jesusi enga xarhatajka ambe enga meru arhikuekajka jurhimbikua. Imani jurhiatikuecha jimbo, judiuecha engaksï relijioniri orhejtsïkutipka, kurhunhiasïrendiksï kʼuiripuechani engaksï máteru iretarhu anapuepiringa, nóksï xénchaasïrendi pobrichani ka nóksï janhanharhiasïrendi nanakechani. Peru Jesusi iáminduechani májkueni kaaspti ka jurhimbikua jingoni. Jiókuarhiaspti máteru iretarhu anapuechani engaksï jakajkupka imani (Mat. 8:5-10, 13). Iáminduechani predikarikuaspti, jatsikuarherichani ka pobrichani (Mat. 11:5; Luk. 19:2, 9). Méntkisï jiókuarhiaspti nanakechani ka no méni no sési kaaspti. Sánderu sési, janhanharhiaspti ka sési kaani, asta imechani engaksï máteruecha no xénchauenga (Luk. 7:37-39, 44-50). Uákachi májkueni úni eska Jesusi engachi pareju kámpiska ka predikarikuani iáminduechani engajtsïni kurhajchajka, no arhiparini sinksï jatsikuarheriski oksï pobrini, oksï máteru relijioni jatsini. Ka erachichaksï májkueni úsïndi eska ima engaksï janhanharhikua jingoni kaajka nanakechani. w19.05 2 párr. 1; 5 párr. 15-17

Ini jurhiatikuecha jimbo, engaksï ambakiti orhejtsïkuticha Bibliani úrajka paraksï uandontskuarhekuni imani enga uétarhinchani jarhajka jarhuajperata, iatsitakuarhu ka xénchperakua jingonksï úsïndi. No solu orhejtsïkutichaksï uáti uinhaperaantani imechani engaksï ísku ambe ma úminhaka. Iáminduechachi jatsiska para úni ambe enga ari karakata uandajka: “Uinhaperajpera je” (1 Tes. 4:18, TDU). Pirenchicha engaksï ambakiti pájperakua ma jatsika Jeoba jingoni, uátiksï kánikua jarhuataani imani pirenchichani engaksï uétarhinchani jaka paraksï sési pʼikuastanhantani. Asta Jeoba ísï terukutakuarhintasïndi komu nándi ma enga uájpani sési pʼikuastantajka (Is. 66:13). Bibliarhuksï uánikua ejempluecha jarhasti nanakecheri engaksï jarhuataapka imechani engaksï kánikua uandanhiani japka (Job 42:11). Jeoba kánikua sési pʼikuarherasïndi exeani pirenchichani engaksï jarhuataajka imani pirenchichani engaksï no sési pʼikuarherani jarhajka. Ménisïksï orhejtsïkuticha uáti kurhamarhini ambakiti pirenchini ma sini uá jarhuatani máteru pirenchini enga no sési pʼikuarherani jaka. Ísïsti, engachi jarhuatajka erachini o pirenchini ma, nóchi imani ambe kurhamarhisïnga enga ima no uéjka uandantani (1 Tes. 4:11). w19.05 16, 17 párr. 10-12

¿Andiksïsï tsimani testiguecha uétarhijki paraksï orhejtsïkuticha tánguarhini erachi ma jingoni enga arhinhaka eska kʼéri pekadu ma úska? Jimboka Biblia ísï arhisïnga. I, juramukua máesti enga jurhimbitiika. Enga no sési úri no uandantaaka imeri pekaduni, tsimani testiguechaksï uétarhisïndi engaksï exeka o sési míteni ambe enga úkuarhika paraksï orhejtsïkuticha úni tánguarhini imani jingoni enga pekadu úka (Deut. 19:15; 1 Tim. 5:19). Enga kʼuiripu no jiókuarhiska imani ambe enga arhinhani jaka eska no sési ambe úska, jiájkanksï orhejtsïkuticha jingontku kurhajchaasïndi ambe engaksï testiguecha uandaaka. Orhejtsïkutichaksï tánguarhisïndi imani jingoni enga arhinhani jaka eska no sési úska peru engaksï tsimani testiguecha xarhataakia eska meru pekadu ma úkuarhiska. Enga máechakuajku testigu jauaka, no arhikuekasïndi eska no ísïska ambe enga uandantajka i testigu. Asta engaksï no uáka xarhatani eska pekadu ma úkuarhiska tsimani testiguecha jingoni, orhejtsïkutichaksï niárasïndi kurhanguni eska ísïska eska nema kʼéri pekadu ma úska. Ísï jimbo, seguirini jarhasïndiksï jarhuatani imani enga no sési ambe úminhaka ka jingontkuksï jarhasïndi para kuájchakuni kúnguarhikuani imeri enga arhinhani jaka eska no sési ambe úska (Uku. 20:28). w19.05 11 párr. 15, 16

Kánikua jukaparhakuesti eskaksï táticha jorhendauaka uájpechani estudiarini. Sapiichaksï jatsisti para jorhenguarhini prepararikuarhini para tánguarhikuecha o paraksï sánderu informasioni jirinhantani imeri ambe engaksï eskuela nitamanchaka (Ebr. 5:14). Engajtsï kʼumanchikuarhu arhutaska tiempu para sánderu informasioni jirinhantani ambe máeri enga Biblia jorhentpijka, sánderu no úkua jukaati paraksï jingontku jarhani tánguarhikuecharhu ka kʼéri tánguarhikuecharhu. Buenu, jatsiskajtsï para miáni na engaksï xáni jatirikia chári sapiicha ka na engaksï jásïka parajtsï xáni tiempu arhutani para jorhenguarhini. Imecha engachi jorhendaajka Bibliaeri ambe, ístuksï jatsisti para jorhenguarhini estudiarini. Engaksï uénani jarhajka jorhenguarhini Bibliani, juchachi tsípisïnga engaksï imecha solu kuirutsiajka mókuntskuechani para jiáni engaksï Bibliaeri ambe jorhenguarhiaka o para tánguarhikuecha. Peru jukaparhakuesti eskachi jorhendauaka inbestigarini ka sánderu ambakiti ambe exentani jiáni engaksï jandiajku estudiariuaka Bibliani. Ini ambe úparini, jiáni engaksï problema ambe jatsiaka, míteatiksï jirinhantani juchari publikasionicharhu informasioni enga marhuakuauaka. w19.05 26 párr. 2; 28 párr. 10, 11

Noambakiti uékasïndi eskachi ménderueni eratseaka. Ima mítesti eskachi imani ambe eratsesïnga engachi Tata Diosïri Karakatarhu jorhenguarhijka. Jimbosï úrajti iámindu jásï kʼuiripuecheri jorhenguarhikua para úni eskachi ménderueni eratseaka ka eskachi nóteru xáni seguru jauakia ambe engachi jakajkujka. Noambakiti seguirixati májkueni jásï kurhamarhikua útspini eska enga Ebani úkupka jardini de Edenirhu: “¿Meruksïni Tata Diosï arhiski eskajtsï...?” (Gén. 3:1). Parhakpini jimbo enga Noambakiti juramuni jaka, uánikua xanharijtsïni imani ambe kurhamarhisïndi enga úpiringa úni eskachi uénaaka nóteru xáni seguru jarhania ambe engachi jakajkujka, komu arini ambe: “¿Ísïski eska Tata Diosï no jaiapanhentasïnga para tataka ma máteru tataka jingoni tembuchani o nanaka ma máteru nanaka jingoni? ¿Ísïski eskaksïni Tata Diosï no jurajkusïnga parajtsï Nabidadiri kʼuínchikua úntani o kumpleaniuechani? ¿Ísïski eska chári Tata Diosï no uékasïnga parajtsï iurhiri jatantani? ¿Ísïski eska Tata Diosï ma enga uékpitiika, no uékasïnga eskajtsï kúnguarhiaka chári parienticha jingoni engaksï nóteru Jeobaeri testiguekia?”. Jatsiskachi para seguru jarhani ambe engachi jakajkujka. Engachi no mókuntaaka imani ambe enga jukaparhakueka, uáti úni eskachi nóteru seguru jauakia ambe engachi jakajkujka ka inde ambe uáti eskachi imani ambe eratseaka enga no sési jaka ka eskachi nóteru jakajkuakia Jeobani. w19.06 12, 13 párr. 15-17

Juchari Táti xénchpeti, Jeoba, kánikuajtsïni uékasïndi (Juanu 3:16). Jimbokachi uékasïnga májkueni jámani eska ima, jánguarhintasïngachi máteruecheri lugari jimbo niárani, xénchpeni ka pʼamojkuani iáminduechani, peru sánderu “imechani engaksï Diosïri kʼumanchikuarhu anapueka”, engaksï jindeeka erachicha (Gal. 6:10). Uékasïngachi jarhuataani juchari erachichani engaksï no sési ambe nitamakuarhini jarhajka. ¿Nénachi uá sési pʼikuastantani nemani enga tsïndi pakaraka? Ambe engachi orheta jatsika para úni, jindeesti uandontskuarheni imani jingoni nájkirukachi no xáni sési pʼikuarheraaka o no jánhaskani ambe uandani. Paulina, enga imeri uámba mátirku uarhipka, uandasïndi: “Exesïnga eska uarhikueri ambe uandani, ambe máeska enga kʼuiripu no xáni tsitijka uandontskuarheni. Chésïndiksï imani ambe uandani enga no sési pʼikuastpiaka. Peru no ma ambe uandani, sánderu no sésisti eska imani ambe uandani enga no xáni sési pʼikuastpiaka”. Jamberi ima enga uarhirakuarhika nemani, no erokuarhini jauati eskachi imani ambe uandaaka enga meru mintsitarhu niárakuaka. Paulina uandasïndi: “Sési pʼikuarherasïrenga engajtsïni juchiti amiguecha arhienga eskaksï imechajtu no sési pʼikuarherasïrenga ambe engani nitamakuarhipka”. w19.06 20 párr. 1; 23 párr. 14

Enga niáraaka jurhiatikua engachi nóteru jurajkunhakia parachi úni juchari ánchikuarhitani, orhejtsïkutichaksï exeati néna engaksï úkuarhiaka tánguarhikuecha, peru eskaksï máteruecha no kuenta íntskukuarheaka. Jamberijtsïni arhiati eskachi grupu sapirhaticha jimbo tánguarhiaka ka jamberi someni mójtakurhini jauati nani engachi tánguarhiaka ka ora. ¿Ka aianhpikua jingonia? No iápurisï májkueni jánhaskuarhiati. Peru, jimbokachi xénchasïnga Jeobani ka kánikuachi tsitini Reinueri ambe uandantani, jánguarhintaakachi exeni néna aianhpini (Luk. 8:1). Emily Baran enga istoriaeri ambe exejka, arini ambe uandaspti Jeobaeri testiguecheri ambe jini enga antesi jindeepka Unión Soviética: “Enga gobiernu arhiapka Testiguechani eskaksï no úpiringa aianguani máteruechani ambe engaksï jakajkuenga, imechaksï uénaspti predikarikuani besinu jémbechani, ánchikuarhitarhu anapu kompanieruechani ka amiguechani. Ka engaksï ónhanhapka indeni ambe jimbo, predikarikuasptiksï imechani engaksï ístu ónhakata japka”. Juchari erachicha engaksï jima irekapka nóksï jurajkuspti aianhpini nájkirukaksï nóteru jurajkunhengia úni juchari ánchikuarhitani. Eskachi juchajtu májkueni eratsetini jauaka úni. w19.07 11 párr. 12, 13

¿Nénachi uá jarhuataani imechani engaksï no tsitijka relijioniri ambe paraksï xénchani Tata Diosïni ka Kristueri chúxapatiini? Jatsiskachi para mítetini jarhani eska kʼuiripu ma uáka ísï jiókuarhini ambe engachi aianguaka seguni nani enga kʼuiripeka. Por ejemplu, Asia anapu ma no májkueni uékaati kurhaani ambe engachi aianguaka eska Europa anapu ma. Europa, uánikua kʼuiripu mítesti sánisï Bibliaeri ambe ka kurhaasïndiksï eska Tata Diosï kueraaska iámindu ambe. Peru Asia, sáno iámindu kʼuiripu no ma ambe o kasi no ma ambe mítesti Bibliaeri ka jamberi no jakajkuni eska jarhaska Kuerajpiri ma. Ísï jimbo, ju je ambakiti ambe eratseni kʼuiripuecheri. Mándani uéxurhini, uánikua kʼuiripuecha Jeobaeri testigu úkuarhisïndi engaksï antesi no ma relijionirhu japka. Uánikuechaksï ambakiti jángua ma xarhatasïrendia, peru máteruechaksï no sési jásï ambe úsïrendi. Uánikua inde kʼuiripuechaksï jatsispti para imecheri pʼindekuechani jurajkuani. Jeobaeri jarhuajperata jingoni, uákachi exeantani imechani engaksï uéjka jatsini tsípikua para méntkisï (Uku. 13:48; 1 Tim. 2:3, 4). w19.07 20, 21 párr. 3, 4

Jatsiskachi para seguirini jánguarhintani astachi andani, iá sea para auandarhu nirani irekani para méntkisï o Paraisurhu ixú Echerirhu. No arhiparini ambe engachi nitamakuarhini jaka, ju je no miáni imani ambe enga nitamakia ni jurajkuni eskajtsïni ambe uéjki ójkutaaka parachi marhuakuni Jeobani (Filip. 3:16). Úpiringachi ísï exeni enajki ióndani jaki kumplirikuarhini ima ambe engachi erokuarhini jaka ochi jamberi nóteru xáni uinhapinia ísï eska antesi. Jamberichi tekaantaka engachi ióni jamberi no sési nitamakuarhika ochi no sési kánhani. Ambe uéjkichi nitamakuarhini jarhani, ju je no ma ambe jimbo uandanhiani, sánderu sési, ju je aiangukuarhini Tata Diosïni iámindu ambe engajtsïni uandanhiatajka ka eskajtsïni jarhuataaka. Ima uáti eskachi kánikua sési pʼikuarheraaka ísï engachi jamberi no újka jánhaskani (Filip. 4:6, 7). Ísï eska na jánguarhintajka nema para karrerani kʼamarhukuni, ju je jánguarhintani parachi kʼamarhukuni karrerani parachi andani tsípikua para méntkisï. Nani engachi jamberi uáka úni ka seguni ambe engachi nitamakuarhini jauaka, ju je seguirini sánderu sési marhuani ka jánguarhintani na engachi xáni uáka parachi andani imani ambakiti ambe enga sánderu orhepani úkuarhiaka. w19.08 7 párr. 16, 17

Jamberichi no míteaka ambechi úpirini arhini imani enga kánikua no sési pʼikuarherani jaka. Peru ju je miáni eska uerani sánderu ambe xarhatasïnga eska uandani. Jiáni enga Lasaru uarhipka, Maria, Marta, ka máteruechaksï ueraspti imecheri ermanu ka amiguni jimbo. Jesusi tʼámu jurhiatikua tátsekua niáraspti ka ístu “pʼiaraspti uerani” nájkiruka mítepka eska no ióndani tsítantapiringa (Juanu 11:17, 33-35). Enga Jesusi uerapka, xarhataspti na enga pʼikuarherapka Jeoba Lasarueri uarhikua jimbo. Ístu, xarhataspti eska Jesusi kánikua xénchasïrenga imani familiani, seguru eska inde ambe kánikua sési pʼikuastantapka Mariani ka Martani. Májkueni, engaksï erachicha pʼikuarherajka eskachi xénchaasïnga ka pendienti páni imecha jimbo, kuentaksï íntskukuarhisïndi eskaksï no jandiajku jarhaska ka kánikuaksï sési pʼikuarherasïndi engaksï imecheri amiguecha xénchaajka. Ménichanchi solu jatsiska para kurhajchani erachini ma. Ju je jurajkuni eska uénhikuarhiaka ka nóchi jámaaka no sési exeni enga no eratseparini uandaaka ka imani ambe uandani enga no jatsipka para uandani (Job 6:2, 3). Jamberi kánikua no sési pʼikuarherani jauati jimbokaksï imeri parienticha engaksï no Testigueka afuersaksï uékaaka úrani ambe ma. Ísï jimbo, ju je kómarhini imani jingoni ka kurhakuni imani enga “kurhauajka kómarhikuechani” eska íntskuaka balori ka jánhaskakua (Sal. 65:2). w19.04 19 párr. 18, 19

Iá seachi Beteli marhuani jarhani o máteru nani tiempu kompletueri, niárasïngachi xénchani kʼuiripuni ka asta tsitini imani lugarini engachi jarhajka. Ísï jimbo, engachi jatsijka para mótsini ambe ma jimbo, kánikuachi no sési pʼikuarherasïnga. Jirinhantaasïngachi imechani engachi jurajkuaka ka uandanhiauasïngachi, sánderu jiáni engachi jatsijka para mótsini jimbokajtsïni juchari ikiatspiticha nóteru jurajkusïngia úni juchari ánchikuarhitani (Mat. 10:23; 2 Kor. 11:28, 29). Ístu, máteru nani uénani marhuani kánikua úkua jukasïndi pʼindekuecha jimbo. Asta engachi jima kʼuanhatsentajka nani engachi anapuejka. Máteru ambe, jamberichi ménisï uétarhinchani jauaka tumina ka nóchi jatsini. Jamberichi no sési pʼikuarheraaka ka chkeni. ¿Ambejtsïni uá jarhuatani engachi indeni ambe nitamakuarhini jauaka? No jurajkuni Jeobani (Sant. 4:8). ¿Nénachi uá ísï úni? Mintsinharhiparini, jimboka ima jindeeska enga “kurhauajka kómarhikuechani” (Sal. 65:2). Jeoba kánikua sánderu kʼéri ambe úsïndi ka eska engachi jucha kurhakujka o eranhaskani (Efes. 3:20). Ima no solu imani ambe úsïndi ambe engachi kurhakujka kómarhikua jimbo. Parajtsïni jarhuatani juchari uandanhiatecha jingoni imani ambe úsïndi engachi no méni eranhaskapiringa. w19.08 21 párr. 5, 6

Máru kʼuiripuechaksï ísï exesïndi eska Armajedoni no sési ambeeska, komu kʼérati guerrecha o enga ma parhakpinirhu no sési ambe úkuarhiaka. Peru Biblia uandasïndi eska Armajedoni ambakiti ambe arhikuekasïnga engajtsïni sési pʼikuastajka (Jaŋ. 1:3). Enga Armajedoni úkuarhiaka no jindeuati para iámindu kʼuiripuni kʼamajkuni, sánderu sési, pʼímutantauati. ¿Néna uá ísï úni? Enga Tata Diosï kʼamajkuauaka parhakpini anapu juramutichani, no sési úrichani ka enga pʼímutantauaka imechani engaksï jurhimbitku jámajka ka no jurajkuati eska echeri ambendurhikuarheaka (Jaŋ. 11:18). Armajedoni, uandakua máesti enga ma xanharijku karakata jaka Bibliarhu ka ebreu jimbo jarhasti enga arhikuekajka “Juáta Meguido” (Jaŋ. 16:16). Meguido ireta máespti enga imani lugari jimbo japka nani engaksï israelitecha irekani japka (Jos. 17:11). Peru Armajedoni no meru lugari máesti. Sánderu sési, arhikuekasïndi engaksï iámindu parhakpini anapu reicha tánguarhintaaka paraksï uarhipini Tata Diosï jingoni (Jaŋ. 16:14). w19.09 8 párr. 1-3

Uarhiiti meru uétarhinchaxapti eskaksï jarhuatapiringa. Nájkiruka uánikua doktoricha jingoni nípkia, útasï no úsïrendi sési pʼikuarherani. Dose uéxurhini pʼamenchasptia. Ístu, Lei uandasïrendi eska kʼuiripu máespka enga no pímbinhasï japka (Lev. 15:25). Jimajkani, uarhiiti mítespti eska Jesusi tsinajpisïrenga, jimbosï nípti jirinhantani. Enga exentapkia, pʼárhikuspti imeri xukuparhakuani ka jirejiresï tsinakuarhispti. Peru Jesusi no solu tsinaspti uarhiitini, sino úspti eskaksï janhanharhipiringa. Por ejemplu, xénchperakua ka janhanharhikua jingoni arhispti “ija”. Ima uarhiiti kánikua sési pʼikuarherantapti (Luk. 8:44-48). Ju je exeni eska uarhiitisï uénapka úni ambe ma ka niraspti Jesusini jirinhantani. Juchajtuchi májkueni jatsiska para úni. Jatsiskachi para jánguarhintani Jesusini andarhierani. Ini jurhiatikuecha jimbo, Jesusi no uásïndi milagruechani para tsinaani imechani engaksï uéjka jorhenguarhini imeri ambe. Perujtsïni seguirixati pʼímarhini: “Ju jejtsïni andarhierani [...] ka jíksïni mintsikuastaaka” (Mat. 11:28). w19.09 20 párr. 2, 3

Profeta Sakariasi tʼuini sáno májkueni jásï ambe uandasptia. Karaspti: “Imani jurhiatikuecha jimbo, diesi acheetichaksï iámindu idiomecheri engaksï iretecharhu uandanhajka, jupikaatiksï, jo, uinhamuksï jupikakuati xukuparakua judiuni ma, arhiparini: ‘Uékasïngachi chánksïni jingoni nirani, jimbokachi kurhaaska eska Tata Diosï chánksïni jingoni jarhaska’” (Zac. 8:23). Jeobaeri testiguechachi míteska eska ambakiti aianhperakua jatsiska para uánikua idiomecha jimbo aianhpinhani paraksï úni tánguarhintani kʼuiripuecha engaksï mámaru jásï idioma uandajka. Ka nóchi méni xáni uáni idiomecha jimbo tradusirixapka eska no iásï, jimbokachi jukari sieni idiomecha jimbo tradusirisïnga. Xarharasïndi eska ini jurhiatikuecha jimbo Jeoba milagru ma úxaka: uánikua kʼuiripuni tántani engaksï iápurisï anapueka. Jimboka publikasionicha engaksï Bibliarhu pʼitakateka sánderu uáni idiomecha jimbo jarhaskia, íksï kʼuiripuecha engaksï mámaru jásï idioma uandajka úsïndiksï májku kʼéri marhuakuni Jeobani. Ka Testiguechaksï ísï mítenhasti eskaksï tsípikua jingoni aianhpisïnga ka xénchperanksï komueska erachicha. ¿A no eska iámindu i ambe úsïnga eska juchari jakajkukua sánderu kʼéaka? (Mat. 24:14; Juanu 13:35). w19.09 30, 31 párr 16, 17

Kʼéri mískuarhitarhu, kʼuiripuechaksï kánikua chéati jimbokaksï uénaaka exeni eska no marhuaxaka ambe engaksï xáni mintsikenga. Enga uénaakia no sési jánhaskuarheni, ambe ma enga no méni úkuarhini japka, kʼuiripuechaksï kánikua uandanhiauati ka nóksï uékaati uarhini (Sof. 1:14, 15). Ísï jimbo, jamberi kánikua úkua jukaati, asta para Tata Diosïri marhuaricha. Jamberichi no sési nitamakuarhiaka jimbokachi no parhakpini anapueska. Jamberichi no jatsiaka imani ambe enga meru uétarhijka. Jántspiri enga mintsinharhikueka ka jánhastiini, jorhendaxatijtsïni parachi no jurajkuni Jeobani kʼéri mískuarhitarhu (Mat. 24:45). Mámaru ambe ústia, peru ju je exeni ma ejemplu, kʼéri tánguarhikuecha rejioniri engachi jiáni jatsiapka engachi meru uétarhinchaani japka de 2016 a 2018. Íchajtsïni jarhuatasti parachi sánderu xarhataani máru kualidadichani enga jamberi janoaka Jeobaeri jurhiatikua. w19.10 14 párr. 2; 16 párr. 10; 17 párr. 12

Engachi na kunajkakia t’irekua, sïturhi uénasïndi ánchikuarhini, asta úni eska ima ambe enga tʼirekuarhu jukajka, marhuakuaka juchari kuerpuni. Imani ambe arhani engajtsïni sési úchijka, úsïndi eska juchari kuerpu sési jauaka, perujtsïni no sési úchesïndi engachi no sési tʼirejka. I ambe no mátirku xarharasïndi, sino ióni jimbo. Májkuenisti, engachi erakujka ambe jingonchi tsípikuarhia, juchachi uandasïnga ambe engachi péraaka juchari eratsekuarhu. Peru tátsekua, eratsekua uénasïndi ánchikuarhini asta úni eskachi ísï eratseaka ka pʼikuarherani seguni ambe engachi jingoni tsípikuarhiaka. Sésichi pʼikuarherasïnga engachi ambakiti ambe jingoni tsípikuarhijka, peru no ísï úkuarhisïndi engachi imani ambe jingoni tsípikuarhijka enga no sési jaka (Sant. 1:14, 15). Jamberi no sóntku xarharaati na engajtsïni xáni no sési úchiaka, peruchi tátsekua niáraaka kuenta íntskukuarhini. Jimbojtsïnisï Biblia arhijti: “Iámindu ambe enga ma kʼuiripu jukskaaka, indeni ambemindu pʼikuntaaka, jimboka ima enga jukskajka ambe enga imeri mintsita tamapu tsitijka, ístu pʼikuntaaka uarhikuani” (Gal. 6:7, 8). Jimbosï xáni jukaparhakueti eskachi no jámaaka imani ambe jingoni tsípikuarhini enga Jeoba kurhunhijka (Sal. 97:10). w19.10 29 párr. 12; 30 párr. 14

Jeobajtsïni xarhatachesti na engajtsïni xáni uéjka enga íntspika imeri Uájperi tsípikuani parajtsïni pʼímutantani (Juanu 3:16). ¿Nénachi uá májkueni uékpini eska Jeoba? Miáparini eskaksï juchari erachicha kánikua jukaparhakueska ka tsípikua jingonchi eroantani imechani engaksï jurajkupka Jeobani ka ménderuksï andarhientani (Sal. 119:176; Luk. 15:7, 10). Ju je jarhuataani erachichani, ísïchi xarhataaka eskachi xénchaasïnga, ka sánderu jiáni engaksï uétarhinchani jauaka ambe ma (1 Juanu 3:17). Jesusi juramukuaspti imeri chúxapatichani eskaksï sánderu uékaapiringa máteruechani (Juanu 13:34, 35). I juramukua jimbanhisti, jimboka no jarhaska imani Lei jimbo enga Jeoba Israelini íntskupka. Jesusi uandaspti eskachi jatsiska para xénchaani erachichani ísï eskajtsïni ima na xénchaka. Astachi jatsiska para sánderu xénchaani eska jucha mismu na xénchakuarhijka, xáni engachi jamberi listu jauaka para íntspini juchari tsípikuani imecha jimbo, ísï eska Jesusi na úka. Ka para ísï úni, uétarhisïndi eskachi sánderu uékauaka máteruechani. w19.05 4 párr. 11-13

Parajtsïni espiritu santu jarhuatani, jatsiskachi para sómeni kómarhini jarhani Tata Diosïni (Luk. 11:13). Jesusiri ejemplu enga Lukasʌ 11:5-9 jimbo jaka jarhuatasïndijtsïni kurhanguni andijtsïnisï Jeoba íntskua espiritu santu. Ima acheeti enga Jesusi ejemplurhu uandapka, uékasïrendi sési kámani imani kʼuiripuni enga xáni chúrikua niárapka. Uékasïrendi íntskuni ambe ma para arhani peru no ma ambe jatsispti. Jesusi uandaspti eska imeri besinu jémba kurhinda íntskuspka jimboka méntku úndaspka kurhakuni. ¿Ambejtsïni uékasïreni jorhendani? Eska enga kʼuiripu ma enga no perfektueka jarhuatajka besinu jémbani ma jimboka méntku úndasïnga kurhajkuarhini ambe ma, uákachi seguru jarhani eska juchari Táti enga auandarhu jaka, íntsauaka espiritu santu imechani engaksï méntku úndajka kurhajkuarhini. Ísï jimbo, uákachi kurhakuni Jeobani imeri espiritu santu mintsikaparini eskajtsïni íntskuaka (Sal. 10:17; 66:19). Uákachi seguru jarhani, nájkiruka Noambakiti xáni jánguarhintani jaka parajtsïni no sési ambe úchini, uákachi orhepani uérani. w19.11 13 párr. 17-19

Jesusi mítespti eska ima ka imeri apostulichaksï uétarhinchasïrenga ménisï mintsikuarhini. Peru májkueni eska iásï, imani tiempu jimbo uánikua kʼuiripuechaksï ísï eratsesïrendi eska acheeti jatsikuarhiri enga Jesusi uandantapka. I achamasï ísï arhikuarhisïrendi: “Mintsikuarhi ka tʼire ka itsïma ka tsípikuarhi” (Luk. 12:19; 2 Tim. 3:4). Ambe enga sánderu jukaparharenga ima acheeti, jindespti mintsikuarhini ka tsípikuarheni. Joperu Jesusi ka imeri apostulichaksï no uékaspti puru tsípikuarhini jámani. Juchachi jánguarhintasïnga májkueni jámani eska Jesusi, úraparini imani tiempuni engachi no ánchikuarhini jarhajka, no solu parachi mintsikuarhini sino parachi aianhpini ka tánguarhikuecharhu nirani. Xánchi jukaparharasïnga ini tsimani pímbinhasï ánchikuerhitechani engachi jánguarhintajka méntikisï ísï úni (Ebr. 10:24, 25). Asta nirasïngachi tánguarhikuecharhu ka jirinhakuntasïngachi néna uandontskuarhekuani kʼuiripuechani Tata Diosïri ambe, jiáni jamberi engachi uérakua ísï jámani jauaka mintsikuarhini sáni, no arhiparini nani engachi jauaka (2 Tim. 4:2). w19.12 7 párr. 16, 17

Jeobajtsïni jurajkusïndi erakuni ambechi uá juchari irekuarhu. Jorhendasïndijtsïni erakuni imani ambe enga sési jaka ka jarhuatasïndijtsïni parajtsïni sési nicheni engachi imani ambe erakuska úni enga ima jaiapanhintajka (Sal. 119:173). Úni ambe enga Tata Diosïri karakata uandajka, jarhuatasïndijtsïni imani ambe erakuni úni enga sánderu sési jaka (Ebr. 5:14). Peru nájkirukachi ambakiti ambe erakujka úni, jamberichi útasï kánikua jánguarhintajka para kʼamarani ambe engachi uénakia úni. Ju je exeani máru ejempluechani. Tumbi ma uandasti eska arhintaaka iámindu Bibliani. Ísï úsïndi máru semanecha jimbo, peru tátsekua jurajkusïndi. Pirenchi ma uandasti eska uénakia prekursoreni peru someni pʼakasïndi fechani. Ma kúnguarhikuarhu anapu orhejtsïkutichaksï uandasti paraksï sánderu pʼorhembiani erachichani paraksï jarhuataani, peru uánikua kutsïchaksï nitamastia ka nótkiksï nemani uénaxati pʼorhembini. Íksï ejempluecha no májkuenisti peruksï terukuntasïndi ambe ma jimbo: uandasptiksï eskaksï úpiringa ambe ma peruksï no ústi ísï úni. w19.11 26 párr. 1, 2

Jesusi terokutantaspti ini jurhiatikuechani Noeri jurhiatikuecha jingoni, ka meru ísïsti eska ini jurhiatikuecha jimbojtu kánikua úkua jukaska ka peligru jarhani (Mat. 24:37; 2 Tim. 3:1). Ini ambe míteparini, máru temungurhirichaksï eratsesti nótki kaani sapiichani paraksï úni sánderu marhuakuni Tata Diosïni. Engaksï temungurhiricha kurhamarhikuarhijka sinksï kaaua sapiichani o nómbe ka namuni, imecha engaksï jánhaskatiika jatsistiksï para “uénani kuenta úntani sentabu” (Luk. 14:28, 29). Táticha engaksï kʼuiriperaakia sapiichani, mítestiksï eska para sapiichani kaani, no solu tumina uétarhisïnga, sino ístu tiempu ka uinhapikua. Jimbosï jukaparhakueti eskaksï temungurhiricha kurhamarhikuarhiaka: “¿Jatsiachi para tsimarhani ánchikuarhini para úni kéndani ambe enga familia uétarhinchaaka? ¿Tsimarhanchi májkueni eratsesïni ambeski ima ambe enga meru uétarhinchajka familia ma? Engachi jatsipiringa para tsimarhani ánchikuarhini, ¿né kuidariuapirini sapiichani? ¿Né uá arhini juchari sapini na enga jatsika para jámani ka eratseni?”. Temungurhiricha engaksï sési eratsentajka ini ambe, exesïndiksï ambe enga arhijka iásï anapu tekstu. w19.12 23, 24 párr. 6, 7

Apostuli Pablu, someni sáno uarhispti (2 Kor. 11:23-28). Ístu, jatsispti para tekaantani ambe ma enga ísïpka komueska chekamikua ma, jamberi pʼamenchakua máepti (2 Kor. 12:7). Ístu, kánikua no sési pʼikuarheraspti enga Demasi, achamasï ma enga Pablu jingoni marhuauenga, jurajkupka jimboka xáni tsitispka “ini parhakpinirhu anapu ambe” (2 Tim. 4:10). Nájkiruka Pablu erakukata máepka enga no sáni chéparini jánguarhintenga jarhuataani máteruechani, ménisï niáraspti no sési pʼikuarherani (Rom. 9:1, 2). Pablu niáraspti sési pʼikuastanhantani jiáni enga uétarhinchani japka. ¿Nénaksï sési pʼikuastantaspi? Jeoba imeri espiritu santuni úraspti para uinhaperantani (2 Kor. 4:7). Peru ístu Jeoba úraaspti erachichani. Apostuli Pablu uandaspti eskaksï máru niáraspka kánikua uinhaperantani (Kol. 4:11). Ima uandaspti eskaksï máru engaksï sési pʼikuastantapka ka ístu jarhuatani para ima úni tekaantani, jindespkaksï Aristarku, Tíkiku ka Markusï. w20.01 8 párr. 2, 3

Jesusi uandaspti eska nema no úsïnga aianguni imani enga no erakukateka na enga pʼikuarherajka ima enga ménderu kánguarhinhantaka o enga espiritu jimbo kánguarhinhantaka (Juanu 3:3-8). Enga kristianu ma na erakunhajkia, ¿néna mójtakurhisïni imeri eratsikua? Antesi, kánikua jukaparharasïrendi míteni eska irekapiringa para méntkisï ixú Echerirhu. Meru uékasïrendi exeni na enga Jeoba kʼámajkuaka iámindu no sési jásï ambe ka Paraisu ma úntani Echerini. Jamberi eranhaskendi erontani imeri familiarini o amiguni ma enga tsintaaka. Peru iásï enga erakukatekia, nóteru májkueni eratsesïndia. ¿Andi? No jindesti jimboka nóteru tsitisïnguia Echerirhu irekani, ni uandanhiatecha jimbo, ni jimboka uénaska ísï exeni eska kuatantaaka irekani para méntkisï ini parhakpinirhu. Jeoba úrasti imeri espiritu santuni para ima iásï ménderueni eratsenia ka máteru erokuarhikua jatsini. w20.01 22, 23 párr. 9-11

Imani Lei jimbo enga Jeoba Israelini íntskupka, juesicha ka orhejtsïkutichaksï jatsisïrendi paraksï jorhentpini Jeobaeri ambe, jarhuajpini problemecha ambe jingoni ka jusgarini enga ambe ma no sési úkuarhipiringa. Peru “Kristueri mandamientu” jingoni, orhejtsïkutichaksï solu exesïndi néna jarhuatani para seguirini jarhani sési pájperani Jeoba jingoni (Gal. 6:2). Mítestiksï eska Tata Diosï parhakpini anapu juramutichani íntsaaska ánchikuarhita paraksï exeani kʼuiripuecheri problemechani ka enga nema no sési ambe niátajka. Ísï jimbo, juramutichaksï jatsisti sésikua para multa euajpini o paraksï nemani ónhani (Rom. 13:2-4). Jiájkani, ¿ambeksï úsïni orhejtsïkuticha enga nema kʼéri pekadu ma újka? Biblianksï úrasïndi paraksï exeni ambe enga úkuarhika ka mítenksï ambe engaksï uáka. Miánksï jarhasïndi eska Kristueri mandamientu uékperakua jimbo uaxastakata jarhaska. Uékperakua jarhuataasïndi exeni ambe enga jatsika para úkuarhini paraksï jarhuatani kúnguarhikuarhu anapuni ma enga no sési ambe úka pekadueri kulpa jimbo. Ka uékperakua jarhuataasïndi orhejtsïkutichani paraksï exeni sini ima enga pekadu úka móantaskia ka sinksï uá jarhuatani para úni ménderu jatsini ambakiti pájperakua ma Jeoba jingoni. w19.05 7 párr. 23, 24

Enga Jesusi iásï anapu tekstuni uandapka, arhikuekaxapti eska ima mítespka eska imeri Táti íntskuspka tsípikua ka iámindu ambe enga uétarhinchenga para úni irekani. Jesusi kʼamakʼamasï mintsikaspti Jeobani ka ima íntskuspti iámindu ambe enga uétarhinchenga para úni irekani. Peru ambe enga sánderu jukaparhakueka, jindesti eska Jeoba jarhuataspka Jesusini paraka no méni jurajkupiringa (Mat. 4:4). Ístu, Jeobajtsïni jarhuatasïndi parachi ambakiti pájperakua ma jatsini imani jingoni. Imeri Karakata jimbojtsïni aiangusti ambe enga ísïka imeri ambe, ambe enga uéjka úni, andichisï irekani jaki ka ambe enga úkuarhiaka sánderu orhepani. Xarhataspti eskajtsïni uékasïrenga jarhuatani jiáni engachi uénapka míteni jurhimbikuani ka úraaspti juchari tátichani o máteru nemani parajtsïni imeri ambe jorhendani. Ka útasïjtsïni uékperakua jingoni jarhuataxati úrapariani kúnguarhikuarhu anapu orhejtsïkutichani ka máteru ambakiti erachichani. Ístu, jorhendasïndijtsïni tánguarhikuecha jimbo, nani engachi újka májku kʼéri jorhenguarhini juchari erachicha jingoni. Ini ambe jingoni ka ístu máteru ambe úparini, xarhatasïndi eska Táti máeska enga pendienti jarhajka iáminduechani jimbo (Sal. 32:8). w20.02 3 párr. 8; 5 párr. 13

Nani enga enbidia jaka kʼuiripuechaksï no úsïndi sési pájperani. Jatsiskachi para juchari mintsitarhu méntku kénditani ka no úni eskaksï máteruecha uénaaka indeni ambe pʼikuarherani. ¿Ambechi uá úni parachi jarhuataani máteruechani paraksï no enbidiarpini ka jarhuajpini parachi iáminduecha sési pájperani? Na engachi jámajka ka ambe engachi újka uáti eskaksï máteruechajtu ísï uáka. I parhakpini jorhentpisïndi eskachi jatsiska para “jatsikuarhikua jimbo sési xekorheni” (1 Juanu 2:16, TDU). Peru inde ambe úsïndi eska jauaka enbidia. ¿Ambechi uá úni paraksï máteruecha no uénani enbidia pʼikuarherani? Ma ambe jindesti no jámani someni uandantani jarhani ambe engachi xáni jatsikuarheka o ambe engachi uékani jaka piáni. Máteru ambe jindesti kaxumbitiini ka no kʼéri ambe exekuarhini imani ánchikuarhita jimbo engachi kúnguarhikuarhu intsïnhajka. Someni uandani jarhani inderi ambe, úsïndi eska enbidia uénaaka jarhani. Peru engachi sánderu pendiente jarhajka máteruecha jimbo ka exeni imani ambakiti ambe engaksï újka, jarhuataasïngachi paraksï sési pʼikuarherani ka úsïngachi eskachi iáminduecha sési pájperaaka ka májku kʼéri jarhani kúnguarhikuarhu. w20.02 18 párr. 15, 16

Chájtsï uáka Jeobaeri ambe jorhenguarhini eratsentaparini imani ambe enga ima kueraaka (Jaŋ. 4:11). Exea je tsïtsïkichani ka animalichani ka eratsenta je na enga i ambe xarhatajka na enga xáni jánhaskatiika Jeoba. Sánderu inbestigari je na enga xáni sési úkata jaka juchari kuerpu (Sal. 139:14). Ka eratsenta je na enga xáni uinhapikua péraka Jeoba, Jurhiatarhu, míteparini eska i solu máechakua jóskueska xáni uánikua jóskuecheri engaksï jaka (Is. 40:26). Engajtsï ísï úska, sánderujtsï janhanharhiaka Jeobani. Joperu no solu uétarhisïndi míteni eska Jeoba jánhaskatiska ka uinhapitini parajtsï ambakiti pájperakua ma jatsini imani jingoni. Parajtsï úni xénchani Jeobani iámu mintsita jingoni, jatsiskajtsï para sánderu ambe jorhenguarhini imeri ambe. Uétarhisïndi eskajtsï sési mítetini jauaka eska Jeoba pendienti jarhaska chánksïni jimbo. Miá je eska engajtsï jirinhantaska, ima jurajkuati eskajtsï exentaaka (1 Crón. 28:9). Jeoba úska eskajtsï andarhierapiringa imani ísï eska na arhijka Jeremías 31:3. Engajtsï sánderu sési kurhanguaka ambe enga Jeoba úkia chánksïni jimbo, sánderujtsï xénchaaka. w20.03 4 párr. 6, 7

Apostuli Pablu ambakiti ejemplu máesti jimboka méntkisï orheta péraspti aianhpikuani. Enga Korintu japka jiáni enga imeri segundu biajini úni jámaenga para aianhpini, jatsispti para ma tiempu ánchikuarhini, úpariani kʼumanchikuechani sïkuiriri jimboka no kánikua tumina jatsispka. Ánchikuarhispti para mantenerikuarhini ka paraksï no Korintu anapuecha jatsini para maiampikuni ambe enga ima uétarhinchapiringa ka ísï úni aianguani jimbanhi aianhperakuani (2 Kor. 11:7). Nájkiruka jatsipka para ánchikuarhini, seguirispti jukaparharani aianhpikuani ka mándani sábadu aianhpisïrendi. Enga nóteru xáni no sési nitamakuarhini japkia, úraspti sánderu tiempu para nirani aianhpini. “Pablu mintsita jingoni aianguaxapti Israeli anapuechani eska Jesusi jindeespka Diosïri Mindakata” (Uku. 18:3-5; 2 Kor. 11:9). Ísï tátsekua enga tsimani uéxurhini japka ónhakata kʼumanchikua ma jimbo jini Roma, aianguasïrendi Tata Diosïri ambe imechani engaksï niraenga pʼorhembini ka kartechani uásïrendi (Uku. 28:16, 30, 31). Eratsetixaptia eska no ma ambe ójkutapiringa para Tata Diosïni marhuakuni. w19.04 4 párr. 9