Marsu

Xénchani Tata Diosïni ka imeri Karakatani, jarhuatasïndijtsïni parachi Jeobani kurhajchani jiáni engajtsïni parienticha o amiguecha engaksï ambakiti eratsekua ma jingoni afuersa uékaaka eskachi imecha jingoni úntaaka pʼindekua ma enga uarhiricheri ambeka ka enga no Bibliarhu pʼitakateka. Jamberiksï jánguarhintaati no sésijtsïni pʼikuastani, arhiparintsïni eskachi no xénchasïnga uarhirini ni janhanharhini. O jamberiksï uandani eska juchari kulpeuaka engaksï no sési ambe úkuauaka imechani engaksï tsípiti jaka. Paisi ma jimbo enga Caribe jaka, uánikuaksï ísï jakajkusïndi eska enga nema uarhijka, imeri ánima tsípiticha jingoni pakarasïnga para no sési úkuantani imechani engaksï no sési kámapka jiáni enga tsípiti japka. Seguni karakata ma, ánima asta jamberi “úsïndi no sési ambe úkuni iretani”. Máru iretecharhu jini África, pʼindenhasti ójchakuraani espejuechani uarhiriri kʼumanchikua jimbo ka imeri fotuechani paredirhu ísï eraatarani. ¿Andi? Jimbokaksï máru uandasïnga eska uarhiri no jatsiska para eratikuarhini. Jeobaeri marhuarichachi méntku no jiókuarhisïnga jakajkukua o pʼindekua ma enga újka eska Noambakitiri chkuanderakuecha sánderu etsakurhiaka (1 Kor. 10:21, 22). w19.04 16, 17 párr. 11, 12

Jesusi jorhendaaspti imeri chúxapatichani prinsipiuechani enga jarhuataapiringa paraksï jurhimbikua jingoni kámpini. Por ejemplu, ju je eratseni arini ambe, ísï kámpini eskachi na uéjka eskachi kánhaaka. Iáminduchi uékasïnga parachi jurhimbikua jingoni kánhani, ka ísïchisï jatsika para kámpini. ¿Ambe úkuarhia engachi ísï kámpiska? Eskajtsïni máteruecha uékaaka jurhimbikua jingoni kámani. Peru ¿engajtsïni no jurhimbikua jingoni kámakia? Jesusi ístu jorhendaaspti imeri chúxapatichani mintsikani eska Jeoba uáka eskaksï niáraaka jurhimbikua jingoni kánhani imecha engaksï “chúrikua ka jurhiakua uandajpani” jaka Jeobani (Luk. 18:6, 7). Íksï uandakuecha aiatsperakua máesti: juchari Tata Diosï enga jurhimbitku újka ambe, sési mítesti ambe engachi xáni no sési nitamajka ini últimu jurhiatikuecha jimbo ka ima uáti eskachi jurhimbikua jingoni kánhaaka jiáni enga ima exeaka eska uétarhisïnga ísï úkuarhini (2 Tes. 1:6). Engachi ísï úska eska Jesusi na jorhentpika, jurhimbikua jingonchi kámpiaka. Ka engachi kómu nitamakuarhika jimbokachi no jurhimbikua jingoni kánhaska, sésichi pʼikuarherantasïnga míteni eska Jeoba enkargarikuarhiaka parachi jurhimbikua jingoni kánhani. w19.05 5, 6 párr. 18, 19

¿Tumbi máeskiri o uátsï ma engari eskuela nirajka? Jamberiksï iámindu chíti kompanieruecha jakajkujti eska kʼuiripuni no nema kueraaska, sino eska ísku úkuarhiska. Uékapiringari xarhatani ambe enga Biblia jorhentpijka, peruri ísï pʼikuarherasïnga enajkiri no uá ísï úni. Ísï jimbo, jatsiskari para inbestigarini. Úpiringari tsimani ambe jimbo ísï úni. Orheta, segururi jarhani eska Tata Diosï kueraaska iámindu ambe. Ka tsimani úni jámani, sánderuri sési jorhenguarhini néna aianguani máteruechani ambe enga Biblia jorhentpijka (Rom. 1:20). Ambe engari orheta jatsika para úni, jindesti eskari kurhamarhikuarhiaka andiksïsï chíti kompanieruecha imani ambe jakajkujki. Ka tátsekua, iatsitakuarhu jirinhantani sánderu informasioni juchari publikasionicharhu enga imeri ambe uandajka. Kuentari íntskukuarheaka eska no úkua jukaska aianguani máteruechani ambe engari jakajkujka. Sáno iáminduechaksï jakajkusïndi eska kʼuiripuni no nema kueraaska solu jimboka nema enga kʼéri ambeka ka janhanharhinhani uandasïnga eska ísïska. Peru engari exentaska ma o tsimani ambe enga jukaparhakueka, uákari mókukuntani nemani enga meru uékaaka míteni Bibliaeri ambe (Kol. 4:6). w19.05 29 párr. 13

Jiáni enga profeta Eliasi sïpakuarhini japka jimbokaksï uékasïrenga no sési úkuni, xáni no sési pʼikuarheraspti enga uékengia uarhini. Jiájkani, Jeoba ánjeli uinhapitini ma axaspti para uinhaperantani. Ánjeli tʼirekua jorhepiti íntskuspti profetani ka arhispti eska apiringa (1 Rey. 19:5-8). I ejemplujtsïni ambakiti ambe jorhendasïndi, eska ménisï sapichitu ambe úni erachi ma jimbo enga no sési pʼikuarherani jaka, uáka kánikua jarhuatani. Por ejemplu, pʼímarhini tʼireni, sapichitu ambe ma intsïkuarhini o karakuni ambe ma, xarhatakuakachi eskachi xénchasïnga ka eskachi pendienti jarhaska imani jimbo. Uákachi ini ambe úni engachi no jánhaskaaka néna uandontskuarheni erachiri o pirenchiri ambe o imeri ambe enga no sési pʼikuastajka. Milagru ma jimbo, Jeoba uinhapikua íntskuspti Eliasini paraka nipiringa iámu imani xanharu jimbo asta niárani Orebi juáta jimbo, jima engaksï nóteru úpiringia no sési ambe úkuni. ¿Ambechi máteru ambe jorhenguarhisïni? Eska engachi uéjka jarhuataani imechani engaksï ísku ambe ma úminhaka, orhetachi jatsiska para úni eskaksï seguru pʼikuarheraaka, jamberi imecho o Kʼumanchikua Reinuerirhu. w19.05 16 párr. 11; 17 párr. 13, 14

Ju je eranhaskani eskachi Sakariasiri profesiani arhintaxaka kapitulu 12 jimbo enga Mesiasiri uarhikueri ambe uandajka (Zac. 12:10). Engachi bersikulu 12 arhintani jarhajka, exesïngachi eska Nataniri kʼumanchikuarhu anapuechaksï meru no sési pʼikuarheraparini uerasïnga Mesiasiri uarhikua jimbo. Enbesi dechi no xáni jukaparharani indeni sapichitu ambe, úpiringachi kurhamarhikuarhini: “¿Ambespi Mesiasi Nataniri familia jingoni?”. Jiájkani, inbestigarisïngachi. Ma referensia marjinali, pásïndijtsïni 2 Samuel 5:14 jimbo, enga arhijka eska Natani Dabidiri uájpa máespka. Máteru tekstu jindesti Lukasʌ 3:31, enga arhijka eska Jesusi Nataniri desendientispka enga Mariaeri ióntki anapu parienti máepka. Ambe máesti engajtsïni ísku pakatajka, ¿a no? Mítespkachia profesiani eska Jesusi Dabidiri desendientipiringa (Mat. 22:42). Peru Dabidi jukari beinte sapiichani kaaspti. Engachi exejka ini ambe, kurhangusïngachi andisï Sakariasi uandapi eska solu Nataniri familia jatsispka rasoni para uerani enga Jesusi uarhipka. w19.05 30 párr. 17

¿Ambechi jatsiski para úni? Estudiarini méntkisï, jarhuataatijtsïni seguru jarhani eska ísïska ambe engachi Bibliarhu jorhenguarhika. Ístu, meruchi seguru jauaka eskaksï sési jarhaska Jeobaeri juramukuecha. Engachi ísï úska, ísïuakachi komu anhatapu ma enga kʼérati sïranguechani jukaajka ka uinhamuchi jupikuarhitini jauaka, jakajkukua sési uaxastakata jauati (Kol. 2:6, 7). Miá je eska no nema uáka úni eska juchari jakajkukua sési uaxastakata jauaka; juchachisï uáka indeni ambe. Ísï jimbo, ju je seguirini mójtakuni na engachi eratsejka. Ju je méntkisï kómarhini Jeobani ka kurhakuni imeri espiritu. Ju je sési eratsentani, méntkisï kuenta íntskukuarheni na engachi eratsejka ka ambe engachi jimbo újka ambe ma. Ambakiti amiguechani jirinhaani; ju je imecha jingoni jarhani engajtsïni jarhuataaka mójtakuni juchari eratsekuani. Engachi iámindu ini ambe úska, uákachi orhepani uérakuni no sési jásï ambeni enga Noambakitiri parhakpinirhu jaka ka xereantauakachi “kʼuiripuecheri eratsekuechani, ka iámindu teparakuarhikua ambe engaksï jimbo nómindu uékajka míteni Diosïni” (2 Kor. 10:5). w19.06 13 párr. 17, 18

Ísï eska Ruti, enga no jurajkupka Noemini, jatsiskachi para seguirini jarhani jarhuataani imechani engaksï tsïndi pakaraka (Rut 1:16, 17). Paulina uandasïndi: “Ísï tátsekua enga juchiti acheeti uarhipka, kánikuajtsïni jarhuataspti. Tiempu jingoni, kʼuiripuechaksï seguirispti májkueni irekani eska antesi. Peru juchiti irekua méntku mójtakurhispti. Kʼéri jarhuajperata máesïndi engaksï máteruecha kurhangujka eska ima enga nemani uarhirakuarhika, uétarhinchasïnga jarhuajperata mesicha jimbo, o asta uéxurhinicha jimbo”. Ísïsti eska mándani kʼuiripu ménderueniska ka nóksï iáminduecha májkueni xáni no sési pʼikuarherasïndi eskaksï máteruecha. Máruksï ísï xarharasïndi enajkiksï újki sóntku pʼindeni ménderueni irekania. Peruksï máteruecha no sési pʼikuarherasïndi méni engaksï imani ambe újka engaksï antesi tsimarhani uénga. Ju je no mirikurhini eskajtsïni Jeoba ambakiti ánchikuarhita ma íntskuska parachi kuidariuani imechani engaksï tsïndi pakaraka. w19.06 24 párr. 16

Jiáni engachi nóteru jatsiakia sésikua parachi úni juchari ánchikuarhitani, jatsiskachi para míteni káni jindeeski “tiempu para pínasku pakarani” (Ecl. 3:7). Nóchi jatsiska para uandantani imani ambe enga no jatsika para mítekuarhini, komu na engaksï arhinhajka erachicha, nani engachi tánguarhijka, na engachi aianhpijka ka nani engachi pʼiuajka juchari publikasionichani. Nóchi jatsiska para indeni ambe aianguani juramutichani, ni amiguechani o parientichani engaksï juchari paisirhu jaka o máteru paisi jimbo. Engachi ísï úpiringa, juchari erachichaksï úpirindi no sési ambe úkuarhinchani. Ju je no jurajkuni eskaksï sapirhati problemecha uáka eskachi nóteru májku kʼéri jauakia. Noambakiti mítesti eska engaksï ma kʼumanchikuarhu anapuecha no májku kʼéri jarhajka, nóksï úsïnga orhepani uérani (Mar. 3:24, 25). Ísï jimbo, Noambakiti méntkisï jánguarhintaati parachi no májku kʼéri jarhani. Indeni ambe úparini, uékasïndi eskachi jucha mismu uénaaka uarhiperani enbesi de imani jingoni. Asta ambakiti erachichaksï jatsisti para jingontku jámani indeni ambe jimbo. Engachi jánguarhintaska sési peuantaani juchari problemechani erachichani jingoni, uákachi májku kʼéri jarhani (Kol. 3:13, 14). w19.07 11, 12 párr. 14-16

Uánikua xanhari, kʼuiripuechajtsïni kurhajchasïndi no imani ambe jimbo engachi aianguajka, sino na engachi aianguajka. Tsitisïndiksï eskachi sési káuaka, iatsitakuarhu uandontskurhekuani ka mintsita jingoni uékani jarhuataani. Nóchi afuersa uékasïnga eskajtsïni kurhajchaaka. Sánderu sési, jánguarhintasïngachi kurhangukuani na engaksï eratsejka ka andiksïsï ísï eratsejki, ka nóchi uékasïnga no sési pʼikuastaani. Por ejemplu, enga Pablu judiuechani predikarikuapka, Bibliani úraspti. Peru enga Grecia anapu kʼérati jorhenaticha jingoni japka Areopagurhu, no uandaspti eska karakatecharhu ísï uandasïrenga (Uku. 17:2, 3, 22-31). ¿Nénachi uá májkueni úni? Engachi uandontskuarheaka nema jingoni enga no jakajkujka Bibliaeri ambe, jamberi sánderu sésiuati eskachi no úraaka Bibliani. Engachi exeaka eska kʼuiripu no uékasïnga eska exenhaaka juchantsïni jingoni Bibliani arhintani jarhani, ju je exeraani karakatechani enga no xáni xarharaaka, por ejemplu, tableta o selulari ma úraparini. w19.07 21 párr. 5, 6

Noambakiti sési mítekuspti néna úni eskaksï israelitecha diosï úkatechani kómarhiapiringa, imani ambe úraparini engaksï imecha uétarhinchani japka, tʼirekua konseguirini. Engaksï Echerirhu japkia engaksï Aiaminhapka, jatsisptiksï para jorhenguarhini néna ikarani jima ambe ma. Engaksï Ejiptu japka, itsïksï ríu Nilu pʼitasïrendi paraksï úni ataatani nani engaksï ikarapiringa ambe ma. Peru imani Echeri jimbo engaksï Aiaminhapka, no jarhaspti kʼéri iurhekua ma engaksï úpiringa itsï pʼitani para úni ataatani jima engaksï ikarenga ambe ma, sinoksï imani itsï úrasïrendi enga xúmu jimbo úkuarhijka xarhentku ka imani itsï enga emenda jimbo jarhajka (Deut. 11:10-15; Is. 18:4, 5). Ísï jimbo, israelitechaksï jatsispti para jorhenguarhini ikarani ambe ma, peru ménderueni. ¿Andisï Jeoba arhiapi eskaksï no jámapiringa máteru diosï úkatechani kómarhiani, mientrasi enga arhiani japka néna ikarani ambe ma? Jeoba mítespti eskaksï israelitecha uékapiringa exeani máteru iretechani engaksï no marhuakuenga Jeobani paraksï jorhenguarhini néna ikarani ambe ma. Joperuksï Kanaani anapuecha jakajkusïrendi eska Baalini kómarhini úsïrenga eska andarapiringa ambe ma (Núm. 25:3, 5; Juec. 2:13; 1 Rey. 18:18). w19.06 3 párr. 4-6

Enga Pablu, Silasi, Lukasï, ka Timoteo Filipusi niárapka enga Roma ísï japka, exentasptiksï uánikua kʼuiripuni enga uékenga jorhenguarhini Reinueri ambe. I tʼámu ambakiti aianhpirichaksï jarhuajpespti para kúnguarhikua ma jarhani indeni iretarhu. Tánguarhintasptiksï iámindu kʼuiripuecha engaksï apenasi itsï atakuarhipka, jamberi pirenchi Lidiaeri kʼumanchikuarhu enga sési kámpienga (Uku. 16:40). Imani kúnguarhikuarhu anapuecha enga apenasi úkuarhipka, kánikuaksï no sési ambe nitamakuarhispti. Noambakiti úspti eskaksï kʼuiripuecha kurhunhiapiringa ka nóksï jurajkuani eskaksï ima tʼámu ambakiti kristianuecha aianhpepiringa Tata Diosïri ambe. Juramutichaksï jupikaspti Pabluni ka Silasini, pirimu jimboksï kʼuikirhiaspti ka ónhaanksï. Pauandikuaksï petantaaspti. ¿Ambeksï úspi imecha engaksï uéntapkia? Pʼorhempiasptiksï imechani engaksï apenasi itsï atakuarhipka ka uinhaperantaasptiksï. Tátsekua, Pablu, Silasi ka Timoteo uéakuntasptiksï iretarhu ka Lukasï jima pakaraspti. ¿Ambeksï úspi jimbanhi erachicha? Seguirisptiksï marhuakuni Jeobani espiritu santueri jarhuajperata jimbo (Filip. 2: 12). Pablu kánikua sési pʼikuarheraspti imecha jimbo. w19.08 8 párr. 1, 2

¿Apenasïjtsï mótsiski? Kánikua tumina úrakuarhisïndi para máteru nani mótsini irekani ka fásilisti kántspeni. Ísï jimbo, ju je no kuenta euajpini ambe ma engachi no uétarhinchajka (Prov. 22:3). Engachi uandanhiata ambe jatsijka engajtsïni kánikua no sési pʼikuastajka komu familiarhu anapuni ma kuidarini enga pʼamenchani jaka, jamberichi úkua jukanchaaka eratseni na xánchi tumina kuántpia. Engachi indeni ambe nitamakuarhini jauaka, miáni eska engachi kómarhiska Jeobani ka kurhakuni ambe engachi uétarhinchajka, jarhuataatijtsïni ambakiti ambe erakuni úni. Imeri pínandikua engajtsïni ima íntskujka, kuájchakuati juchari eratsekuani ka mintsitani ka jarhuataatijtsïni iatsitakuarhu sési eratseni ambe ma (Filip. 4:6, 7; 1 Ped. 5:7). Sési pájperani amiguecha ka familia jingoni. Ju je uandontskuarheni juchari amiguecha jingoni ambe engachi pʼikuarherajka ka nitamakuarhini, sánderia imecha jingoni engaksï májkueni ambe nitamakuarhika eska jucha. Inde ambe uáti eskachi sáni sési pʼikuarherantaaka (Ecl. 4:9, 10). Ima amiguecha engajtsï antesi jatsiapka, seguirinksï jauati chári amigueni nájkirukajtsï mótsikia. w19.08 22 párr. 9, 10

¿Jeoba andisï Meguido jingoni terukutantapi imeri últimu kʼéri guerrani? Jimboka Meguido ka baie de Jesreeli enga jima no iauani japka, uánikua xanhariksï úkuarhispka guerrecha. Ménisï, Jeoba jarhuataspti imeri iretani uarhipeni. Por ejemplu, jimesïsï enga Meguido anapu itsï japka, Jeoba jarhuataspti Barakini enga juesipka Israeli para Sísaraeri ejersituni kʼamajkuni engaksï Kanaani anapuepka. Baraki ka Debora enga profeta máepka, jaiapanhikuntasptiksï Jeobani enga jarhuataapka andaani. Piresptiksï: “Jóskuechaksï auandarhu uératini [...] Sísara jingonksï uarhipesti [...]. Eskaksï ísï niáraaka uarhini iámindu imecha engaksïni ikiachijka, oh Jeoba, peru eskaksï imecha engaksïni xénchajka niáraaka ísïni komueska jurhiata enga xáni uinhapikua jingoni andarajka” (Juec. 5:19-21, 31). Jiáni enga Armajedoni úkuarhiaka, ístuksï uarhiati imecha engaksï ikiakujka Jeobani ka imecha engaksï xénchajka, pʼímutantskateuatiksï. Peru jarhasti ambe ma enga jiáni úkuarhipka enga Baraki uarhipepka ka enga Armajedonirhu no úkuarhiaka. Armajedoni jimbo, Tata Diosïri marhuarichaksï no uarhipeati. Níksï sikiera paa uarhipetarakua ambe. No ma ambe úni ka mintsikani Jeobani ka imeri ánjelichani, uáti eskaksï uinhapikua jatsiaka (Is. 30:15; Jaŋ. 19:11-15). w19.09 9 párr. 4, 5

Ma ambe engachi uáka úni para Jesusini andarhierani, jindesti jorhenguarhini na engachi xáni uáka imani ambe enga ima úpka ka uandani (Luk. 1:1-4). Ísï jimbo, jatsiskachi para arhintani imani ambe enga imeri ambe uandajka. No nema uáti úni indeni ambe juchantsïni jimbo. Ístuchi andarhierasïnga Jesusini engachi erakujka imeri chúxapatiini ka itsï atakuarhini. Máteru ambe engachi uáka úni para andarhierani Jesusini, jindesti kurhakuani jarhuajperata orhejtsïkutichani jiáni engachi uétarhinchani jauaka. Imechaksï Jesusiri intsïmperakua máesti enga úraajka paraksï imeri karichichani kuidariuani (Efes. 4:7, 8, 11, TNM; Juanu 21:16; 1 Ped. 5:1-3). Peru nóchi jatsiska para erokuarhini eskaksï orhejtsïkuticha míteaka ambe engachi eratseni jaka ka exenksï ambe engachi uétarhinchajka, sino juchachisï jatsika para andarhieraani ka kurhakuani jarhuajperata. Ju je exeni ambe enga uandajka erachi ma enga Julian arhinhajka: “Arhiaspka eskajtsïni jarhuatapiringa ka sánderu ambakiti intsïmperakua máesti engani intsïnhaka”. Ambakiti orhejtsïkuticha, komueska imecha tsimani engaksï Julianini pʼorhembipka, uátijtsïni jarhuatani míteni “Kristueri eratsikuani”, i ambe arhikuekasïndi kurhanguni ka májkueni eratseni ka jámani eska Jesusi (1 Kor. 2:16; 1 Ped. 2:21). Ísïsti, kʼéri intsïmperata máesti engajtsïni orhejtsïkuticha íntskujka engajtsïni jarhuatajka. w19.09 21 párr. 4, 5

Biblia uandaasïndi ambakiti acheetichani, komu Juanu el Bautista ka Dabidi, ka uarhiitichani enga espiritu santu jarhuataapka, peruksï no kuenta úkuarhisïndi 144,000 erakukatecha jingoni (Mat. 11:11; Uku. 2:34). Imecha ka ístu uánikuechaksï tsíntaati Paraisurhu. Imecha ka uánikua kʼuiripuechaksï uáti xarhatakuni Jeobani eskaksï kurhajchaaka ka eskaksï no jurajkuaka. Desde iónisï, Jeoba no méni xáni uánikua kʼuiripuechani taantaxapti iápurisï anapuechani paraksï kʼéri ambe arhini. No arhiparini sinchi erokuarhixaki auandarhu irekani o ixú Echerirhu, jatsiskachi para jarhuataani kʼuiripuechani na engachi xáni uáka paraksï máteru karichicha jingoni kuenta úkuarhini, engaksï jindeeka uánikua kʼuiripuecha. No ióni jimbo, Jeoba uáti eska uénakuarhiaka kʼéri miskuarhita enga kʼamajkuauaka iámindu parhakpini anapu juramutichani ka relijioni no jurhimbitichani engaksï újka eska kʼuiripu kómu nitamakuarhiaka. Iámindu imecha engaksï uánikua kʼuiripuecha jingoni kuenta úkuarhijka intsïnhaatiksï kʼéri kóntperata ma: marhuakuni Jeobani para méntkisï ixú Echerirhu (Jaŋ. 7:14, TNM). w19.09 31 párr. 18, 19

Enga na sánhani arhini jauaka niárani ima jurhiatikua enga Noambakitiri parhakpini kʼamajkunhaaka, sánderuchi úkua jukanchaaka marhuakuni Jeobani ka imeri Reinuni. Jamberijtsïni kʼuiripuecha seguirini jauati teresmarhuni. Ma ambe jimbo engaksï indeni ambe uáka, jindesti jimbokachi no apoiarisïnga politikani. Jatsiskachi para desde iásï eratsetini jarhania no jurajkuni Jeobani parachi úni tekaantani kʼéri mískuarhitarhu. Kʼéri mískuarhitarhu, mójtakurhiati ambe ma imani erachicha jingoni engaksï orhejtsïkujka ánchikuarhitani ixú Echerirhu. Niáraati jurhiatikua engaksï iámindu erakukatecha engaksï pakarani jauaka Echerirhu, auandarhu niuaka paraksï uarhipeni Armajedonirhu (Mat. 24:31; Jaŋ. 2:26, 27). Ísï jimbo, nóteru juchantsïni jingoni jauatia Grupu enga Orhejtsïkuajka iámindu kúnguarhikuechani. Ambe uéjki úkuarhini, Tata Diosïri marhuarichaksï seguirini jauati sési ánchikuarhini ka májku kʼéri. Ambakiti erachicha engaksï máteru karichicha jingoni kuenta úkuarhijka, orhejtsïkuatiksï juchari ánchikuarhitani. Seguirinchi jauaka marhuakuni Jeobani engachi apoiariuaska ini erachichani ka kurhajchaani ambe engajtsïni arhiaka Tata Diosïri juramukua jimbo. Engachi ísï úska, uákachi tsípiti pakarani. w19.10 17 párr. 13, 14

Noemi ambakiti uarhiiti máespti enga xénchenga Jeobani. Peru, enga uámba uarhipka ka imeri tsimani uájpecha, uékaspti mójtakuni imeri nombrini Mará jimbo, enga arhikuekajka “kʼameri” (Rut 1:3, 5, 20, nota, 21). Ruti no méni jurajkuspti Noemini, méntkisï enga no sési nitamakuarhipka. No solu jarhuataspti úparini ambe ma, sino ístu sési pʼikuastantaspti imani ambe jingoni enga arhipka. Mintsita jingoni arhispti na enga xáni xénchenga ka uékani jarhuatani, úrapariani uandakuechani engaksï no úkua jukapka para kurhanguni. Enga erachi o pirenchi ma kúnguarhikuarhu anapu uarhirakuarhijka témbani o uámbani, uétarhinchasïndi eskachi jarhuataaka. Temungurhiri ma ísïsti komueskaksï tsimani anhatapuecha engaksï májku jásï kʼérajka. Enga ióni nitamaakia, sïranguechaksï tepekurhini ísï nirasïndi. Enga máechakua anhatapu murutanhajka ka niárani kʼarhini, máteru anhatapuni kánikua no sési úkusïndi. Májkueni, ia sea enga acheetiri témba o uarhiitiri uámba uarhijka, acheeti o uarhiiti niárasïndi ióni jamberi kánikua no sési pʼikuarherani. w19.06 23 párr. 12, 13

No solu uétarhisïndi jingontku exeni na engachi jásï ambe jingoni tsípikuarhiaka. Ístuchi jatsiska para exeni na engachi xáni tiempu úrajka, jimbokachi úpiringa sánderu tiempu úrani ka eska Jeobani marhuakuni. Orheta, ju je exeni na xánchi meru tiempu úrasïni para tsípikuarhini. Ka para ísï úni, úpiringachi kalendariu ma jimbo karani na engachi xáni tiempu úrajka ma semana jimbo para tele exeni, Internetirhu inchani ka chʼanani tabletarhu o selularirhu. Engachi kuenta íntskukuarhiska eskachi jukari tiempu úrasïnga ini ambe jimbo, ju je jánguarhintani karani ambe engachi orheta uáka. Ju je orheta karani imani ambe enga sánderu jukaparhakueka ka tátsekua arhutani tiempu para tsípikuarhini. Tátsekua, ju je kurhakuni Jeobani eskajtsïni jarhuataaka ísï úni. Ísïchi jatsiaka tiempu ka uinhapikua para Bibliani estudiarini, familieri jorhenguarhikua jatsini, tánguarhikuecharhu nirani, aianhpini ka Jesusiri chúxapatichani uáni. Ístuchi no no sési pʼikuarheraaka engachi arhutaska sáni tiempu para tsípikuarhini. w19.10 30 párr. 14, 16; 31 párr. 17

Uéxurhini 55 ísï, Korintu anapuechaksï eratsespti úni ambe ma enga jukaparhakuepka. Engaksï mítepka eskaksï Jerusaleni ka Judea anapu erachicha kómu nitamakuarhixapka korintu anapuechaksï uékasïrendi ambakiti ambe úni erachichani jimbo ka intsïmbiani ambe ma (1 Kor. 16:1; 2 Kor. 8:6). Peru ísï máru kutsïcha jimbo tátsekua, apostuli Pablu mítespti eskaksï imecha no ma ambe úxapka. Ísï jimbo, jamberi ima tumina engaksï imecha tánapiringa para Jerusaleni anapuecha, nótki listu japirindi paraksï májku kʼéri pákuantani máteru kúnguarhikuecheri jingoni (2 Kor. 9:4, 5). Korintu anapuechaksï ambakiti ambe eratsispti úni ka apostuli Pablu ambakiti ambe arhiaspti imecheri jakajkukua jimbo ka engaksï mintsita jingoni uékani japka jarhuajpini. Peru ístu arhiaspti eskaksï kʼamarapiringa ambe engaksï uénapkia úni (2 Kor. 8:7, 10, 11). Ambe engaksï Korintu anapuecha nitamakuarhipka, jorhendasïndijtsïni eska asta ambakiti kristianuechaksï jatsiaka para jánguarhintani úni ambe engaksï eratsekia úni. ¿Andi? Jimbokachi no perfektueska ka pʼakasïngachi ambe ma. Ístu, úpirindijtsïni ójkutani enga úkuarhijka ambe ma engachi no erokuarhini jarhajka (Ecl. 9:11). w19.11 26, 27 párr. 3-5

Ísï eska kʼéri kuájpikuarhitarakua ma na kuájchakujka sáno iámindu kuerpuni, mintsikani Jeobani, kuájchakusïndijtsïni ini parhakpiniri anapu ambe jimbo, komu ísku jándikueri, atajperakueri ambe, o máteru amberi enga no terukuntajka Tata Diosïri juramukuecha jingoni. Engachi ísï úska, méntkisïchi listu jauaka para uarhipeni jimbokachi uarhipexaka noambakitiri espirituecha jingoni (Efes. 6:10-12). ¿Nénachi uá listu jarhani para orhepani uérakuani tsʼéjkukuechani? Orheta, ju je kurhakuni Tata Diosïni eskajtsïni jarhuataaka. Tátsekua, arhintani imeri Karakatani parachi ísï exekuarhini eskajtsïni ima na exejka (Ebr. 4:12). Biblia arhisïndi: “Mintsika Jeobani iámindu chíti mintsitani jingoni, ka asï mintsika chíti eratsekuani” (Prov. 3:5, 6). Míteparini ini ambe, ju je miántani ambe engachi úka arini nótki xáni ióni. Por ejemplu, engachi kʼéri uandanhiata ma jatsipka tumina jimbo, ¿miáspichi ambe engajtsïni aiachijka Jeoba ixú Ebreu 13:5? Jimini arhisïndi: “Jíkeni no méni késtakuchiaka ka níjtukini méni jurajkuni jandiajku”. ¿Úspiksï i uandakuecha eskachi mintsikapiringa eskajtsïni Jeoba jarhuatapiringa? Engachi ísï úka, arhikuekasïndi eska juchari kuájpikuarhitarakua sési jarhaska enga jindeeka mintsikani Tata Diosïni. w19.11 14 párr. 1, 4

Táti ka nándi ma, jatsistiksï para kánikua tiempu ka uinhapikua úrani paraksï sapiicha jingoni jarhani. Ísï jimbo, engaksï sóntku kaaska uánikua sapiichani, jamberiksï sánderu úkua jukanchaati pendienti jarhani mándani sapi jimbo. Máru temungurhiricha engaksï indeni ambe nitamakuarhika, uandantastiksï eskaksï kánikua kuatarasïrenga. Jamberi nándi méntkisï kuataratini pʼikuarherani jauati enga jimbo no uáka estudiarini, kómarhini ni someni uérani aianhpini. Ístu jamberi úkua jukanchaati jingontku kurhaani tánguarhikuecharhu ka jorhenguarhini ambe ma. Peru acheeti enga xénchajka témbani, jánguarhintaati na enga xáni uáka para jarhuatani témbani tánguarhikuecharhu ka kʼumanchikuarhu. Por ejemplu, jarhuataati kʼumanchikuarhu anapu úkua ambe jingoni, jánguarhintaati mándani semana jatsini familiaeri jorhenguarhikua ka pʼindeni imeri familia jingoni uérani aianhpini. w19.12 24 párr. 8

¿Néna marhuakuasïreni israelitechani ima Uéxurhini engaksï Pʼimutantanhenga? Por ejemplu, ju je eranhaskani eska israelita ma kántspexapka ka para úni maiampeni, íntspikuarhintasïndi echeri ma. Imani Uéxurhini jimbo engaksï Pʼímutantanhenga, íntskuntasïrendiksï imeri echerini. Ísï jimbo, israelita ménderu pʼíkuntasïrendi imeri echerini ka uájpechaksï no tsïtasïrendi erensiani. O ju je eranhaskani israelitani ma enga no jatsikuarhipka tumina ka para úni maiampintani ambe enga kántspenga, jatsisïrendi para uájpani ma atarantani komueska jántspiri ma o asta ima mismu jántspiri úkuarhini. Imani Uéxurhini jimbo engaksï Pʼímutantanhenga, jántspiri kʼuanhatsentasïrendi “imeri familia jingoni” (Lev. 25:10). Ísï jimbo, iámindu jántspirichaksï erokuarhini jarhasïrendi eskaksï ma jurhiatikua jurajkunhapiringa. Ístu, Jeoba uandaspti: “No nema jatsisti para pobri pakarani, jimbokaksïni Jeoba meru kóndintaaka imani echeri jimbo engaksïni chári Tata Diosï Jeoba íntskuaka komueska erensia ma para cháriini” (Deut. 15:4). Méntku ménderuenisti ambe ma iásï, ini parhakpini jimbo, jatsikuarhirichaksï sánderu jatsikuarhixati ka pobrichaksï sánderu pobrixati. w19.12 8, 9 párr. 3, 4

Enga Jesusi tsʼéjkukuechani jatsiapka, “ueparini ka mískuarhiparini kómarhispti” (Ebr. 5:7). Ambakiti mintsita jingoni kómarhisïrendi ka inde ambe úspti eska uékapiringa méntkisï kurhajchani. Jeoba ísï exeaspti Jesusiri kómarhikuechani komu insiensu enga xáni sési jájkundenga. Iámindu ambe enga Jesusi úpka ixú Echerirhu, sési pʼikuastaspti Táti jémbani ka xarhataspti eska Jeobajkusï újka sési juramuni. Uákachi májkueni úni eska Jesusi engachi jánguarhintaska kumpliriuani Tata Diosïri juramukuechani ka engachi no méni jurajkuska. Engachi tsʼéjkukuechani jatsiajka, kómarhisïngachi Jeobani parajtsïni jarhuatani jimbokachi uékasïnga jaiapanherantani. Míteskachi eska ima no jiókuarhiauaka juchari kómarhikuechani engachi imani ambe úska enga ima no jaiapanhintajka. Peru engachi ísï irekaska eska Jeoba na uéjka, uákachi mintsikani eskaksï juchari kómarhikuecha engachi mintsita jingoni uájka, ísïuaka komueska insiensu enga xáni sési jájkundenga. Ka ístuchi uáka seguru jarhani eska juchari Táti auandarhu anapu sési pʼikuarheraaka engachi no méni jurajkuska ka méntkisïchi kurhajchani. w19.11 21, 22 párr. 7, 8

Uéxurhini 1919 jimbo, Jesusi erakuaspti namunitu kristianuechani paraksï jindeeni jántspiri enga mintsinharhikueka ka jánhastiini. I jántspiri, orhejtsïkusïndi aianhpikuani ka tʼireraasïndi o jorhendaani Tata Diosïri ambe Jesusiri chúxapatichani. Noambakiti ka imeri parhakpini someni jánguarhintastia ójkutani jántspirini enga mintsinharhikueka ka jánhastiini. Peru jántspiri no úpirindi jandiajku orhepani uérani enga no Jeobaeri jarhuajperata jimboepiringa. Niárastiksï tsimani kʼérati guerrecha úkuarhini ka uánikua paisicha no jatsini tumina; ka ístu, no sésiksï kaasti Tata Diosïri marhuarichani. Peru nájkiruka iámindu i ambe úkuarhika, jántspiri enga mintsinharhikueka ka jánhastiini, seguirixati jorhendaani Kristueri chúxapatichani Tata Diosïri ambe ixú Echerirhu. Ju je eratseni xáni uánikua publikasionichani engachi jatsiaka jukari nobesientu idiomecha jimbo ka iáminduksï gratisisti. I ambe meru xarhatasïndi eska Tata Diosï jarhuataxaka jántspirini. Aianhpikua ístu xarhatasïndi eska Jeoba jarhuataxaka jántspirini. Ambakiti ambe aianhpinhaxati “iápuru parhakpinirhu” (Mat. 24:14). w19.11 24 párr. 15, 16

Mándani uéxurhini, jarhaspti ma Jurhiatikua enga Jeoba Puátspintenga, kʼéri saserdoti orheta jatsisïrenga para insiensu kurhirani antede kéjtsïtani iurhirini. Enga ísï uénga, úsïrendi eska Jeoba jaiapanhintapiringa. Enga Jesusi Echerirhu japka, para úni íntspini imeri tsípikuani, orheta úspti ambe ma enga sánderu jukaparhakuepka eska kʼuiripuechani pʼímutantaani. Paraka Jeoba úpiringa jukaparharani Jesusiri uarhikuani, Jesusi jatsispti para méntkisï kurhajchani. Ísï úparini xarhataspti eska sánderu sésiska úni ambe enga Jeoba juramujka. Xarhataspti eska Jeoba jurhimbitku juramusïnga. Enga Jesusi echerirhu japka, iámindu ambe jimbo kumpliriuaspti Jeobaeri ambakiti juramukuechani. Nájkiruka jatsiapka tsʼéjkukuechani, méntkisï xarhataspti eska imeri Táti jémbajkusï újka sési juramuni (Filip. 2:8). w19.11 21 párr. 6, 7

Enga Jesusi aianhpini jámani japka, uánikua ambe nitamakuarhispti enga úkua jukapka. Peru ambakiti apostulichaksï xarhataspti eskaksï meru imeri amiguespka (Prov. 18:24). Ka Jesusi kánikua jukaparharaaspti. Ju je miáni eska jiánisï no ma imeri ermanu jémba jakajkusïrenga imani (Juanu 7:3-5). Ka jarhaspti ma tiempu engaksï imeri familiarhu anapuecha eratsienga eska loku úkuarhispkia (Mar. 3:21). Peru xáni engaksï ménderuenipka ambakiti apostulicha. Ima chúri antede uarhini, Jesusi uandaspti ambe enga arhijka iásï anapu tekstu. Imeri apostulichaksï ménisï no sési pʼikuastaspti. Peru ima no sánderu imani ambe exesïrendi engaksï no sési uénga, sino eskaksï jakajkusïrenga imani (Mat. 26:40; Mar. 10:13, 14; Juanu 6:66-69). Últimu chúri enga imecha jingoni japka engaksï no méni jurajkupka, arhiaspti: “Jíksïni arhiska eskajtsï jindeeska juchiti amiguecha jimbokaksïni ji eianguska iámindu ambe engani kurhajchaka juchiti Tátini” (Juanu 15:15). Meru ísïspti eskaksï imeri amiguecha kánikua uinhaperantaspka. w19.04 11 párr. 11, 12

¿Néna mítesïni nema eska pʼímarhinhaska para auandarhu nirani? Exentasïngachi mókuntskuani imani uandakuecharhu enga apostuli Pablu karakuapka imechani engaksï Roma japka ka engaksï ióarhinhapka paraksï pímbinhasïni. Enga na arhiapkia iásï anapu tekstuni, ístu arhiaspti: “Chájtsï no pʼiraska ma espirituni engaksïni jántspiri uáka parajtsï ménderu chéni pʼikuarherani, sino parakajtsï indeni espirituni engajtsï jimbo pʼíkunhantakia parajtsï jindeni Diosïri uájpecha ka imani jimbo arhisïngajtsï Diosïni: “Abba”, enga arhikuekajka “Táti” ” (Rom. 1:7; 8:15). Ísï jimbo, imeri espiritu santu jimbo Tata Diosï aianguasïndi erakukatechani eskaksï ióarhinhaska para auandarhu nirani (1 Tes. 2:12). Jeoba úsïndi eskaksï imecha engaksï pʼímarhinhaka para auandarhu nirani, meruksï mintsita jingoni seguru jauaka (1 Juanu 2:20, 27). Kristianuecha engaksï erakukateka, nóksï uétarhinchasïndi eska máteru nema arhiauaka eskaksï meru erakukateska. w20.01 22 párr. 7, 8

“Kristueri mandamientu” sánderu ambakiti ambe jimbo uaxastakata jarhasti enga jindeeka uékperakua (Gal 6:2). Jesusi iámindu ambe uékperakua jimbo ústi. Pʼamojperakua jimbo, jorhendaaspti kʼuiripuechani, tsinaani pʼamenchatichani, tʼireraani pobrichani ka tsítantaani uarhirichani, indeni ambe úparini, xarhataspti eska xénchpisïrenga (Mat. 14:14; 15:32-38; Mar. 6:34; Luk. 7:11-15). Jesusi tsípikua jingoni orheta jarhuataasïrendi máteruechani ambe engaksï uétarhinchani jarhenga. Ka sánderu kʼéri uékperakua enga xarhataka, jindeesti imeri tsípikua íntspini máteruecha jimbo. Uákachi ísï úni eska Jesusi engachi orheta jarhuataaska máteruechani ambe engaksï uétarhinchani jarhajka. Ístu, sánderu pʼamojkuani kʼuiripuechani aianhpikuarhu. Engachi pʼamojpiska ka niranchi aianhpini ka jorhentpini, kumplirinchi jarhasïnga Kristueri mandamientuni. w19.05 4 párr. 8-10

Jesusi jarhuataaspti kʼuiripuechani paraksï nóteru jántspirinia imani amberi engaksï relijioniri orhejtsïkuticha jorhentpienga. Uánikua judiuechaksï no jurhimbikua ambe jakajkusïrendi ka ístuksï kʼuiripuecheri pʼindekuechani chúxapaasïrendi (Mat. 5:31-37; 15:1-11). Imecha engaksï seguni jarhuatenga kʼuiripuni para kómarhini Tata Diosïni, nóksï marhuakusïrendi Tata Diosïni, ísïspti enajkiksï siegu japi. Engaksï ísï no jiókuarhipka Mesiasini ka ambe enga ima jorhentpenga, nóksï niáraspti míteni Tata Diosïni, pápkʼanduksï jarhaspti ka seguirisptiksï jántspiriini pekadueri (Juanu 9:1, 14-16, 35-41). Jesusi jurhimbikua ambe jorhendaaspti kʼuiripuechani ka ambakiti ejemplu ma íntsaaspti, ísï úparini, exeraaspti kaxumbitichani ambe úni paraksï nóteru jántspirinia no jurhimbiti jorhenguarhikuecheri (Mar. 1:22; 2:23–3:5). Ístu, Jesusi úspti eskaksï kʼuiripuecha nóteru jántspiripiringuia pekadueri. Imeri uarhikua jimbo, Tata Diosï úsïndi puákuantaani pekaduechani imechani engaksï jakajkujka indeni euajpintskuani ka engaksï úkuecha jingoni xarhatajka eskaksï jakajkusïnga (Ebr. 10:12-18). w19.12 10 párr. 8; 11 párr. 10, 11

Jeoba úrasïndi imeri espiritu santuni paraksï erakukatecha meru seguru jarhani eska ima erakuaskia. Jimajkani, espiritu santu jindesti ambe engaksï íntsinhaka paraksï “seguru jatsini” eskaksï sánderu orhepani irekaaka para méntkisï jini auandarhu ka no ixú Echerirhu (2 Kor. 1:21, 22). Enga kristianu ma espiritu santu jimbo erakunhajka, ¿arhikuekasïni eska meru segurueskia eska auandarhu niuaka? Nómbe. Solu arhikuekasïndi eska pʼímarhinhaska. Peru jatsisti para miáni arini ambe: “Ermanuecha, sánderu mintsita jingoni jánguarhi je xarhatakuarhini eskajtsï sési jimbo ióarhinhaska ka erakukatentsï”, jimboka engajtsï seguiriska iámindu ini ambe úni, “nójtsï méni terongutanhaaka” (2 Ped. 1:10). Ísï jimbo, nájkiruka kristianu ma erakukata jauakia, uáti nirani auandarhu solu enga no méni jurajkuska Jeobani (Filip. 3:12-14; Ebr. 3:1; Jaŋ. 2:10). w20.01 21, 22 párr. 5, 6

Ima tanimu kʼuiripuecha engaksï uandenga eskaksï Jobueri amiguespka, no sésiksï arhispti enbesi deksï sési pʼikuastantani. ¿Andiksïsï no pʼamojkupi? Ma ambe jimbo jindeespti eskaksï no jánguarhintaspka kurhanguni ambe enga Jobu nitamakuarhini japka. Niárasptiksï imani ambe eratseni enga no ísïpka ka nóksï sáni pʼamojperakua jingoni arhispti ambe ma. ¿Ambejtsïni jarhuataa parachi no májkueni úni? Orheta, jatsiskachi para miáni eska solu Jeobajkusï mítejka iámindu ambe enga kʼuiripu ma nitamakuarhini jarhajka. Ístu, ju je jingontku kurhajchani ambe engajtsïni aiangukuarhini jauaka erachi ma enga no sési nitamakuarhini jaka. Ju je no solu kurhaani ambe enga ima uandaaka. Jatsiskachi para májkueni pʼikuarherani eska ima. Solu ísïchi uáka imeri lugari jimbo niárani. Engachi pʼamojpiska, nóchi uandantani jámani jauaka ambe enga no sési nitamakuarhini jaka erachi ma. Kʼuiripu ma enga indeni ambe újka, úsïndi eskaksï kúnguarhikuarhu anapuecha no májku kʼéri jauaka (Prov. 20:19; Rom. 14:19). Ima uáti no sési pʼikuastani nemani enga no sési nitamakuarhini jakaia (Efes. 4:31, 32). Ísï jimbo, sánderu sésisti eskachi ambakiti ambe exeaka kʼuiripueri ma ka eratsentani nénachi uá jarhuatani para ima úni orhepani uérakuani uandanhiatechani. w19.06 21, 22 párr. 8, 9