Disiembri

Ménisïchi úpiringa úkua jukanchani kurhanguni ambe ma engachi arhintaaka Tata Diosïri Karakatarhu. Ojtsïni ménisï Jeoba no ísï mókuchiantani kómarhikuechani eskachi na erokuarhienga. I ambe úpirindi úni eskachi no seguru japiringa ambe engachi jakajkujka. Jatsiskachi para seguru jarhani, engachi no ísï úska, i ambe uáti eska juchari jakajkukua chkéaka ka eskachi no uáka sési pájperani Jeobani jingoni (Sant. 1:7, 8). Úpirindi úni, eskachi niáraaka jamberi tsïtani juchari erokuarhikua para sánderu orhepani. Apostuli Pablu terukutantaspti juchari erokuarhikuani ankla ma jingoni (Ebr. 6:19). I ankla úsïndi eska barku no xáni manakuarhiaka enga uinhamu janini jauaka ka eska no uátatakuarhiaka tsakapuecha jingoni. Peru jiántkusï marhuajti enga kadena no katsïkurhiaka. Enga ankleri kadena ma iámu iaratsejkia nóteru uinhapesïndia, májkueni engachi jucha no seguru jauaka ambe engachi jakajkujka, ístu no uinhapiti jauati juchari jakajkukua. Enga kʼuiripu ma no seguru jarhajka ambe enga jakajkujka ka no sési kánhani, i ambe uáti úni eska nóteru jakajkuaka eska Jeoba uáka ambe enga aiatspeka. Ka enga nema no jakajkujka nójtu úsïndi erokuarhini ambe ma. ¿Né úpirini tsípikua jingoni irekani enga i ambe nitamakuarhini japiringa? w21.02 30 párr. 14, 15

Jamberi Abraani jukari 70 uéxurhini jatiriptia enga uéakupka Uri imeri familia jingoni (Gén. 11:31–12:4). Ka ma sieni uéxurhinisï, irekaspti kʼumanchikuecha jimbo engaksï takusïripka o sïkuiriri ka iápuru Kanaani ísï jámaspti. Uarhispti enga 175 uéxurhini jatiripka (Gén. 25:7). Peru no exespti enga Jeoba íntsaapka imeri uájpechani imani echeri nani enga ísï ima jámapka, ísï eska na aiakupka. Ístu, no exespti imani iretani enga ima erokani japka, Tata Diosïri Reinu. Peru nájkiruka ísï úkuarhipka, Biblia uandasïndi eska uarhispka kánikua sési pʼikuarheraparini imeri irekua jimbo (Gén. 25:8). Nájkiruka uánikua uandanhiatechani jatsiapka, méntkisï kánikua mintsikaspti Jeobani ka eratsetixapti erokuarhini astaka Jeoba úpiringa ambe ma. ¿Néna úspi tekaantani? Jimboka Jeoba méntkisï kuájchakuspka ka ambakiti pájperakuaksï ma jatsispti tsimarhani (Gén. 15:1; Is. 41:8; Sant. 2:22, 23). Májkueni eska Abraani, juchajtuchi erokuarhixaka iretani enga sési uaxastakata jaka (Ebr. 11:10). Ísïsti, juchachi no erokuarhixaka eska i ireta uénaakia jarhani jimboka Tata Diosïri Reinu uaxastanhaskia 1914 jimbo ka iámu auandarhu juramuxatia (Jaŋ. 12:7-10). Peru ambe engachi kʼóru erokuarhini jaka jindesti eska uénaakia iámu Echerirhu juramuni. w20.08 4, 5 párr. 11, 12

Parachi úni jingontku kurhajchaani máteruechani, jatsiskachi para kaxumbitini ka tekaantstini. Kánikua jukaparhakuesti eskachi jánguarhintaaka ísï úni tanimu ambe jimbo. Orheta, jimbokachi ísï no eratseni jauaka ambe ma enga no ísïka. Tsimani úni jámani, jimbokachi ísï míteaka néna pʼikuarherasïni juchari erachi ka andisï újki ambe ma. I ambejtsïni jarhuataati parachi úni sánderu kurhangukuani erachichani. Ka tanimu úni jámani, jamberichi ísï uáka exerani ambe ma enga ima no mítepka eska sési úsïnga. Ménisï, ma kʼuiripu no úsïndi kurhanguni ambe enga pʼikuarherajka astaka na uandontskuarhejka nema jingoni. Máru erachichaksï úkua jukanchasïndi uandani ambe engaksï pʼikuarherajka imani ambe jimbo engaksï ióntki nitamakuarhika, pʼindekuecha jimbo o jimbokaksï xásïska. Jamberiksï tiempu uétarhinchaati parajtsïni úni mintsikani ka iámu ambejtsïni aiangukuarhini. Peru engachi ísï tekaantstiuaka eska Jeoba, juchari erachichajtsïni niáraati mintsikani ka tátsekuajtsïni aianguni ambe engaksï pʼikuarherajka. Ka jiáni engaksï ísï uáka, ju je jingontku kurhajchaani. w20.04 15, 16 párr. 6, 7

Kuruchechaksï sánderu imani lugaricha jimbo jámasïndi nani engaksï sési pʼikuarherajka itsï jimbo ka ístu nani enga kánikua tʼirekua jarhajka. Ístu kánikua jukaparhakuesti na enga jandora kʼuiripu ma nirajka kuruchechani pʼitamaani. Ju je exeni ambe enga islarhu anapu erachi ma arhipka misioneruni ma. Erachi pʼímarhispti parakaksï nipiringa kurucha pʼítamaani ka misioneru arhispti: “Pauanchi a las nuebe exejperantaaka” ka erachi arhispti: “No jindesïndi na engachi jandora jucha uékaaka, sino na engaksï jandora jámani jauaka kuruchecha”. Sáno májkueni, primeru sigluru anapu erachichaksï ima jandora nirasïrendi aianhpini ka imani lugaricha jimbo nani engaksï úpiringa exeantani kʼuiripuechani. Por ejemplu, Jesusiri chúxapatichaksï aianhpisïrendi templurhu, sinagogaecharhu, kʼumanchikuecha jimbo ka plasisï (Uku. 5:42; 17:17; 18:4). Juchajtuchi jatsiska para sési míteani kʼuiripuecheri pʼindekuechani imani lugaricha jimbo engachi aianhpijka. Jatsiskachi para exeni nani ka na jatinchi uá exeantani kʼuiripuechani (1 Kor. 9:19-23). w20.09 4 párr. 8-9

Ma ambe engachi uaaka úni parachi ambakiti pájperakua ma jatsini Jesúsi jingoni, jindeesti úni ambe enga Jeobaeri kúnguarhikua uandaaka. Sánderuchi ambakiti pájperakua ma jatsisïnga Jesusi jingoni, ima enga Orhejtsïkujka kúnguarhikuani, engachi jarhuataajka erachichani engaksï erakunhaka parajtsïni uékperakua jingoni kuidarini (Efes. 4:16). Por ejemplu, Jeobaeri kúnguarhikua uékasïndi eskachi sési úrauaka Kʼumanchikuechani Reinueri. Ka indeni ambe jimbo, máru kúnguarhikuechaksï májku úkuarhintasti. Ini ambe jingoni, nóteru xáni tumina úrakuarhisïndia enga míndakata jaka para Tata Diosïri kúnguarhikua. Ka ístu, máru aianhpirichaksï jatsisti para mójtakuni máru ambe. Jamberiksï i erachicha ióni páni japtia tánguarhini májku kúnguarhikuani jimbo ka kánikuaksï pʼinderhiani erachichani. Peru iásïksï arhinhastia eskaksï máteru kúnguarhikuarhu marhuauaka. Jesusi kánikua sési pʼikuarherajti enga exejka eskaksï imeri chúxapaticha úsïnga ambe engaksï arhinhajka. w20.04 24 párr. 14

Nortirhu anapu rei ka surirhu anapu rei, seguirixatiksï uarhiperani paraksï interu parhakpinini juramukuni. Por ejemplu, ju je eratseni ambe enga úkuarhipka enga na nitamapkia Segunda Kʼéri Uarhiperakua Interu Parhakpinirhu, Unión Soviética ka juramuticha engaksï imani jingonipka uénasptiksï uánikua lugarichani juramukuani engaksï Europa jaka. I ambe úspti eska surirhu anapu rei pakatperakua ma úpiringa máteru paisicha jingoni paraksï májku kʼéri uántaani imecheri ejersituechani, enga ísï mítekateka komueska OTAN. Íksï tsimani reicha seguirixati uarhiperani ka kánikuaksï tumina úrani paraksï xarhatani né sánderu kʼéri uarhipetarakua ambe úxaki. Ístu, seguirixatiksï uarhiperani engaksï jarhuataajka imani paisichani engaksï uarhiperani jaka jini África, Asia ka América Latina ísï. Arini uéxurhinicha jimbo, Rusia ka juramuticha engaksï imani jingonika, sánderuksï juramukua jatsistia interu parhakpinirhu. Ístu, uarhiperaxati surirhu anapu rei jingoni engaksï ísï sïpatsperani jaka informasioni Interneti jimbo komputadorechani úrapariani. Íksï tsimani reicha arhijperasïndi eskaksï úraaxaka komputadoreri programechani paraksï no sési útsperani tumina ambe jimbo ka politika ambe jimbo. Ka ísï eska Danieli na uandapka, nortirhu anapu rei seguirixati no sési kámani Tata Diosïri iretani (Dan. 11:41). w20.05 13 párr. 5, 6

Jiánisï enga Isaiasi irekapka, Jeoba arhispti imeri iretani: “¿Uá uarhiiti ma mirikurhini imeri charhakuni [...]? Nájkirukaksï i uarhiiticha mirikurhipiringa, jíkini no méni mirikurhipirhinga tʼunguini” (Is. 49:15). Jeoba no káni terukukuarhintasïndi nándi ma jingoni, peru jiáni ísï uandaspti. Para xarhatani na enga xáni xénchaajka imeri marhuarichani, úraspti ambe enga pʼikuarherajka nándi ma imeri uájpa jimbo. Uánikua nándichaksï májkueni uandasïndi eska pirenchi ma enga Jasmín arhinhajka: “Engari tʼirerajka chíti charhakuni, niárasïngari pʼikuarherani ambe ma enga no méni kʼamakurhijka”. Jeoba exesïndi enga imeri uájpa ma nóteru uérajkia aianhpini ni tánguarhikuecharhu nirani. Uánikua i erachichaksï kʼuanhatsentasïndi kúnguarhikuarhu ka juchachi tsípikua jingoni eroantasïnga. Jeoba uékasïndi eskaksï kʼuanhatsentaaka ka juchajtu ísï (1 Ped. 2:25). w20.06 18 párr. 1-3

¿Jarhaski intsïmperakua o jatsikuarhekua ambe enga no xarharajka? Jo, ima ambe enga no xarharajka jindestiksï engaksï sánderu jukaparhakueka. Enga Jesusi Juátarhu Arhijtsïkpipka, auandarhu anapu jatsikuarhekueri ambe uandaspti enga iauani sánderu ambakitiika eska náki uéjki máteru jatsikuarhekua ambe ixú echerirhu. Ístu uandaspti: “Jimboka nani enga jauaka chári jatsikuarhekua, jimajtu jauaka chári mintsita” (Mat. 6:19-21). Juchari mintsita uáti eskachi imani ambe jirinhaaka engachi sánderu jukaparharajka. Auandarhuchi patsasïnga juchari jatsikuarhekua ambe engachi jánguarhintajka ambakiti pájperakua ma jatsini Jeoba jingoni. Ísï eska Jesusi na uandapka, no ma ambe ni nema uáti kʼamajkuni o sïpani ini jatsikuarhekua ambe. Apostuli Pablujtsïni pʼímarhisïndi parachi pendienti páni “indeni ambe jimbo enga no xarharajka” (2 Kor. 4:17, 18). Ima jatsikuarhekua ambe enga no xarharajka, ístuksï jindesti ima kóntperatecha engajtsïni Tata Diosï jimbanhi parhakpinirhu íntsauaka. ¿Nénachi xarhataa eskachi jukaparhasïnga ini ambe? w20.05 26 párr. 1, 2

Ambe enga Moisesi jorhendaapka israelitechani, uinhaperantaaspti ka sési pʼikuastantaani, ísï komueska janintserani jarhani jimesïsï enga xuxunhandeka. ¿Ambechi uá úni parachi juchari jorhentperakua jingoni májkueni jarhuataani kʼuiripuechani? Engachi aianhpini jámaaka kʼumanchikuecharhu o xanharisï, ju je úrani Bibliani para jorhendaani kʼuiripuechani eska Tata Diosï arhinhasïnga Jeoba. Ístuchi uáka úni eska Jeoba kʼéri ambe arhinhaaka engachi íntspiaska publikasionichani, exerpiani ambakiti bideuechani ka arhini kʼuiripuni eska exeaka juchari pájina Internetiri. Engachi ánchikuarhitarhu jauaka, eskuelarhu o nani uéjkichi nirani jarhani, ju je jánguarhintani aianhpini juchari Tata Diosïri ambe ka na enga jásïka ima. Ju je aianhpini ambakiti ambe enga ima uáka juchantsïni jimbo ka ístu Echeri jimbo. Engaksï kʼuiripuecha kurhauaka ini ambe, jamberiksï jiáni uénaati exeni na engajtsïni xáni xénchajka Jeoba. Méni engachi jurhimbikua ambe jorhentpijka juchari Táti uékpitiri, pímbinhajkuntasïngachi imeri nombrini. Ka xarhatasïngachi eska no ísïska ima chkuanderakua ambe enga uandanhajka imeri ambe. No jarhasti máteru ambe enga xáni sési pʼikuastantaajka kʼuiripuechani ka eska ambe enga Biblia jorhentpijka (Is. 65:13, 14). w20.06 10 párr. 8, 9

¿Nénachi jatsiski para kaani imechani engaksï uéjka Jeoba jingoni kʼuanhatsentani? Ju je exeni ambechi uá jorhenguarhini uandantskueri uájperi enga tsïnchintapka (Luk. 15:17-24). Ima tumbi niárasïndi sési eratsentani ka kʼuanhatsentasïndi imeri kʼumanchikuarhu. Táti jemba uiriipasïndi kúntani ka uékperakua jingoni kamajchakusïndi para xarhatakuni eska útasï xénchasïnga. Tumbi kánikua no sési pʼikuarherasïndi imani ambe jimbo enga úka ka eratsesïndi eska nóteru jukanchaskia arhinhani eska imeri uájpeska. Táti pʼamojkusïndi jimboka exesïnga eska mintsita jingoni móantaskia. Ísï jimbo, kʼuínchikua ma úntasïndi ka juramusïndi eskaksï jatsikuntaaka sánderu ambakiti xukuparhakua ma. Ini ambe úparini xarhatakusïndi eska ísï exesïnga komueska imeri kʼumanchikuarhu anapu ma enga kánikua xénchajka. Jeoba xásïsti eska i uandantskuarhu anapu táti. Xénchaasïndi imechani engaksï jarharika kúnguarhikuani ka uékasïndi eskaksï imani jingoni kʼuanhatsentaaka. Ka engachi juchajtu májkueni uáka eska ima, uákachi jarhuataani paraksï kʼuanhatsentani. Ka parachi ísï úni, jatsiskachi para tekaantstini, uékpitiini ka kurhangutspini. w20.06 25, 26 párr. 8, 9

Jesusi uandaspti eskaksï máru “tsípikua jingoni” jiókuarhipiringa jurhimbikuani, peru eskaksï nóteru jakajkupiringuia enga uandanhiata ambe japiringa (Mat. 13:3-6, 20, 21). Jamberiksï no kurhangujti eska para Jesusiri chúxapatiini niárakaksï no sési nitamakuarhini ka tsʼéjkukua ambe jatsini (Mat. 16:24, TNM). Oksï ísï eratseni eska kristianu ma, no méni jatsiasïnga uandanhiatechani ka méntkisï sési irekani. Peru ini parhakpini jimbo no nema úsïndi no ma uandanhiata jatsini. Juchari irekua uáti mójtakurhini ka úni eskachi ma tiempu no xáni tsípikua jingoni irekaaka (Sal. 6:6; Ecl. 9:11). Sáno iámindu Jeobaeri marhuarichaksï xarhatasïndi eskaksï seguru jarhaska eska ísïska ambe engaksï jakajkujka. ¿Andi? Jimboka imecheri jakajkukua májkueni jarhasïnga nájkiruka erachi ma no sési pʼikuastaajka o úni ambe ma enga no sési jaka (Sal. 119:165). Méni engaksï újka orhepani uérakuni tsʼéjkukuani ma, imecheri jakajkukua niárasïndi sánderu kʼéni ka nóksï jámasïndi jurajkuni Jeobani (Sant. 1:2-4). Jatsiskachi para kʼéri jakajkukua ma jatsini. w20.07 8 párr. 1; 9 párr. 4, 5

Antedechi uénani jorhenguarhini Bibliani, ju je kurhakuni Jeobani eskajtsïni jarhuataaka kurhanguni ambe engachi arhintaaka. Engachi problema ambe jatsiaka, jatsiskachi para kurhakuni Jeobani eskajtsïni jarhuataaka exentani ambakiti konseju ma Bibliarhu parachi úni orhepani uérakuani uandanhiatechani (Filip. 4:6, 7). Úni eranhaskani, Jeobaeri intsïmperata máesti. Parajtsïni úni marhuacheni ambe engachi arhintani jauaka Bibliarhu, jatsiskachi para eranhaskani eskachi jima jarhaska, eskachi jucheska ima kʼuiripu enga Biblia uandajka. Ju je jánguarhintani exeni ambe enga ima exeni japka ka na enga pʼikuarherani japka. Ka eratsentani, jindesti iatsitakuarhu eratsentani ambe engachi arhintani jauaka. Engachi eratsentaaka ambe engachi arhintaaka sánderuchi sési kurhanguaka. No eratsentani ambe engachi arhintaaka Bibliarhu, ísïsti komu rompekabesa ma etsandurhikata jatsini mesarhu ka no úntani jarhani, peru engachi eratsentajka ísïsti komu eska indeni rompekabesani úntani jarhani. w21.03 15 párr. 3-5

Apostuli Pablu úpirindi ióntki anapu ambe miántani ka eratseni eska enga máteru ambe erakupiringa úni, jamberi no ónhakata japiringa. Úpirindi ikiani pakarani Asia anapuecha jingoni engaksï jurajkupka ka nóteru mintsinharhiania imeri amigu jémbecha. Peru no ísï úspti. Nájkiruka mítepkia eska nóteru ióndani uarhipiringia, no mirikurhispti sánderu jukaparhakua ambe, k’éri ambe arhini Tata Jeobani. Ístu, seguirispti jirinhakuntani néna jarhuataani máteruechani ka mintsikakua jingoni kómarhikuarhispti Tata Jeobani. No eratsentani pakaraspti andiksïsï máteruecha jurajkupi, sino agradeserikuaspti imeri amigu jémbechani engaksï no jurajkupka, engaksï xénchperakua xarhatakupka ka engaksï jarhuatapka. Ístu seguirispti jorhenguarhini Tata Diosïri Karakateri ambe (2 Tim. 3:16, 17; 4:13). Ka ambe enga sánderu jukaparhakueka, seguru jarhaspti eska Jeoba ka Jesusi xénchasïrenga. w21.03 18 párr. 17, 18

Ísï tátsekua enga nitamapkia uéxurhini 100, uánikua no jurhimbiti kristianuechaksï niáraspti jarhani Tata Diosïri jurhimbiti kúnguarhikuarhu. Íchaksï, chkuanderakua ambe jorhentpespti ka nóksï aianhpesïrendi jurhimbikua ambe enga Tata Diosïri Karakata uandenga. Jiáni uératini asta siglu diesinuebi kʼamarhukuni jamberi, no jarhaspti Echerirhu kúnguarhikua ma enga sési marhuakuni japiringa Tata Diosïni. No jurhimbiti kristianuechaksï niáraspti ísï tsikini komueska uitsakua ka ini ambe jimbo, úkua jukaspti míteni néksï jindespi jurhimbiti kristianuecha (Mat. 13:36-43). ¿Andisï jukaparhakue ini ambe miántani? Jimboka xarhatasïnga eska ambe enga Daniel kapitulu 11 jimbo uandajka nortirhu anapu reiri ka surirhu anapu reiri ambe, no úpiringa arhikuekaani juramutichani engaksï niárapka jarhani desde uéxurhini 100 asta 1870 jamberi. Imani tiempu jimbo, no jarhaspti Tata Diosïri marhuaricheri kúnguarhikua ma engaksï i juramuticha úpiringa no sési úkuani. Peru siglu diesinuebi kʼamarhukuni ísï, ménderu niárapirindi jarhani nortirhu anapu rei ma ka ístu surirhu anapu rei ma. w20.05 3 párr. 5

Joeli, profesia ma jimbo uandaspti eskaksï uánikua chochuecha kʼamajkuaka ambe enga Israeliri echeri jimbo jaka, eskaksï iámu ambe auaka (Joel 1:4). Uánikua uéxurhinicha jimbo, kurhangusïrengachi eska i profesia Jeobaeri iretani arhikuekasïrenga engaksï ísïka komueska uánikua chochuecha engaksï no kuatantajka jimbokaksï no jurajkusïnga aianhpini. Eratsesïrengachi eska aianhpikua, no sési úkusïnga paisini o imechani engaksï no jurhimbiti relijioniri orhejtsïkutichani chúxapaajka. Peru, engachi sési arhintajka iámu profesiani, exesïngachi eskachi jatsiska para mójtakuni na engachi kurhangujka. Exe je eska Joel 2:20 jimbo, Jeoba aiatspesïnga eska iauanisï paaka imani enga norti uératini jurhani jaka [engaksï jindeka uánikua chochuecha]. Engaksï i chochuecha Jeobaeri testiguechani arhikuekapiringa, engaksï aianhpijka ka Jesusiri chúxapatichani uáni ísï eska ima na juramupka, ¿andisï Jeoba iauanisï paapirini? (Ezeq. 33:7-9; Mat. 28:19, 20). Ísïsti, míteskachi eska Tata Diosï no iauanisï paasïnga imeri ambakiti marhuarichani, sino nemani o ambe ma enga ójkutaajka imeri marhuarichani. w20.04 3 párr. 3-5

Joperu, ¿ambechi úpirini engachi ísï exepiringa enajkijtsïni Jeoba no sóntku mókuchiantaajki kómarhikuechani? Santiagu uandasïndi eskachi jatsiska para seguirini jarhani kómarhini Tata Diosïni. Jeoba no kuatantaati ni ikiani engachi méntku úndaska kurhakuni eskajtsïni íntskuaka jánhaskakua parachi úni orhepani uérakuani tsʼéjkukuechani. Sánderu sési, juchari Táti auandarhu anapu kánikua tsípikua jingontsïni íntskuati jánhaskakua (Sal. 25:12, 13). Ima exeasïndi náki uandanhiatechanchi jatsiasïni, pʼamojkusïndijtsïni ka uékasïndijtsïni jarhuatani. ¿A no eskajtsïni i ambe kánikua sési pʼikuastasïnga? Joperu Jeoba, ¿nénajtsïni íntskusïni jánhaskakua? Imeri Karakata jimbo (Prov. 2:6). Parachi úni jatsini, jatsiskachi para jorhenguarhini Bibliaeri ambe ka publikasionichani engaksï Bibliarhu pʼitakateka. Joperu no solu uétarhisïndi míteni ambe ma, jatsiskachi para ísï irekani eska Jeoba na uandajka. Santiagu uandaspti: “Ú je eska Diosïri karakata na arhijka, ka no solu ísku kurhandintsï” (Sant. 1:22). Engachi újka ambe engajtsïni Tata Diosï arhijka, niárasïngachi sánderu sési pájperani máteruecha jingoni, sési kámpini ka pʼamojpini (Sant. 3:17). I ambejtsïni jarhuataati parachi úni orhepani uérakuani tsʼéjkukuechani kánikua tsípikua jingoni. w21.02 29 párr. 10, 11

Sánderu segurueuati eska Biblieri jorhenguarhiri ma niáraaka marhuakuni Jeobani ka itsï atakuarhini engaksï kúnguarhikuarhu anapu erachicha jarhuataska. Iámindu aianhpirichaksï uáti jarhuajpeni paraka kúnguarhikuarhu sánderu uáninhaaka. Prekursora ma uandasïndi: “Jarhasti uandakua ma enga arhijka eska iámu ireta uáka jarhuajpeni paraka sapi ma tʼarhexeaka. Ji exeasïnga eska sáno májkueniska engachi Jesusiri chúxapatichani uájka: sáno méntkisï, uétarhisïndi eska iámu kúnguarhikua jarhuajpeaka paraka nema jurhimbikuarhu jauaka”. Para sapi ma tʼarhexeranhani, uétarhisïndi eskaksï familiaricha jarhuajpeaka, amiguecha ka maestruecha, iáminduechaksï úsïndi uinhaperantani ka ambakiti ambe jorhendani. Sáno májkueni, aianhpirichaksï úsïndi jarhuajpeni paraka jorhenguarhiri ma niáraaka itsï atakuarhini engaksï konseju íntskuaka, uinhaperantaaka ka engaksï ambakiti ejemplu ma íntskuaka. Engachi jorhendani jaka nemani Bibliaeri ambe, ¿andichisï jatsi para jiókuarhini eskaksï máteru aianhpiricha jarhuataaka? Jimbokachi iáminduecha uaaka jarhuajpeni paraka jorhenguarhiri niáraaka sánderu sési pájperani Tata Diosï jingoni. w21.03 8 párr. 1-3

Kʼératicha o sapirhaticha, iáminduechachi jatsiska para jingontku jámani parachi no tsimani ambe úni jarhani: Jeobani marhuakuni ka ístu no sési ambe úni jarhani. Apostoli Juanu ini ambe arhikuekaxapti enga uandapka eskachi no uáka jurhimbikuarhu jarhani ka ístu ísku jándikua ambe niátani jarhani (1 Juanu 1:6). Engachi uéjka eskajtsïni Tata Diosï jaiapanhintaaka iásï ka para sánderu orhepani, jatsiskachi para méntkisï ísï jámani enajkijtsïni iáminduecha exeni jarhajki ambe engachi újka. No ma kʼamanharhintskua úsïndi jískakata jarhani, jimboka Jeoba iámindu ambe exesïnga (Ebr. 4:13). Ístuchi no jatsiska para májkueni exeni kʼamanharhintskuani ísï eskaksï kʼuiripuecha. Jiáni enga apostuli Juanu irekani japka, apostatechaksï uandasïrendi eska nema úpiringa uékaparini kʼamanharhintskua ambe úni ka útasï Tata Diosïri amigueni. Ini jurhiatikuecha jimbo, uánikuechaksï májkueni eratsesïndi. Uandasïndiksï eskaksï jakajkusïnga Tata Diosïni, peruksï no jiókuarhisïndi ambe enga Jeoba uandajka kʼamanharhintskueri ambe, ka sánderia seksueri ambe. Ambe enga Jeoba uandajka eska kʼamanharhintskueska, kʼuiripu uandasïndi eska no xáni no sési ambeska, sino eska nema uáka erakukuarhini néna irekani. w20.07 22 párr. 7, 8

¿Kuájpiasïnchi juchari pirenchichani jiáni engaksï uétarhinchani jarhajka? Ju je eranhaskani eskaksï erachicha exesïnga eska pirenchi ma enga imeri uámba enga no Testigueka, ióndasïnga niárani tánguarhikuecharhu ka ménderu jirejiresï níntani. Ístu, iauani méni paasïndi imeri sapiichani tánguarhikuecharhu. Ísï jimbo, erachichaksï uénasïndi no sési ambe uandani pirenchiri ka eratsenksï andisï pirenchi no mátirku arhijki uámbani eskaksï imecheri sapiicha jatsiska para nirani tánguarhikuarhu. Joperu juchari pirenchi jánguarhintaxati na enga xáni úni jaka. Uánikua ambe no imeri jájki jimbo jarhasti, ni imajkue enga exejka imecheri sapiicheri ambe. Engachi ambakiti ambe arhiska pirenchini imani ambe jimbo enga úni jaka ka aianguanchi máteruechani inderi ambe, jamberi nóteru nema no sési uandaatia pirenchiri ambe. Orhejtsïkutichaksï jatsisti para jingontku jarhani ambe engaksï uétarhinchaaka pirenchicha. Mítestiksï eska Jeoba exesïnga na engaksï kánhajka pirenchicha (Sant. 1:27). Ísï jimbo, májkuenksï úsïndi eska Jesusi ka nóksï ísku jatini juramusïndi ambe ma, sánderu sési, kurhangukuasïndiksï pirenchichani (Mat. 15:22-28). Engaksï orhejtsïkuticha exejka néna jarhuataani, jánguarhintasïndiksï paraksï pirenchicha míteni eska Jeoba ka imeri kúnguarhikua pendienti jarhasïnga imechani jimbo. w20.09 24, 25 párr. 17-19

Profeta Danieli méntkisï kaxumbikua xarhataspti ka mítespti eska no úsïrenga iámu ambe úni, jimbosï méntkisï jirinhendi Jeobaeri jarhuajperatani. Por ejemplu, jiáni enga Jeoba úrapka para uandantani ambe enga arhikuekenga Nabukodonosoriri tsánharhikua, Danieli no kʼéramakuarhispti imani ambe jimbo, sino úspti eska Jeoba kʼéri ambe arhinhapiringa (Dan. 2:26-28). ¿Ambechi jorhenguarhisïni? Eska engachi nitamataraska arhijtsïperata ma ka erachichaksï tsitini ochi sési uéranchani aianhpikuarhu, jatsiskachi para Jeobani kʼéri ambe arhini. Ju je kaxumbitini ka miáni eskachi no úpiringa ini ambe úni engajtsïni Jeoba no jarhuatapiringa (2 Kor. 4:7). Engachi ini ambe újka, májkuenchi úni jarhasïnga eska Jesusi. Jesusi méntkisï mintsikaspti Jeobani (Juanu 5:19, 30). No méni uékaspti sánderu juramukua jatsini eska imeri Táti auandarhu anapu. Filipusʌ 2:6 (TNM) arhisïndi eska Jesusi no méni eratsespka “euakuarhini Tata Diosïni imeri lugarini ka ísï úkuarhini eska ima”. Mítespti nani enga jamberi úpiringa juramuni ka janhanharhisïrendi Táti jémberi juramukuani ka kurhajchasïrendi. w20.08 11 párr. 12, 13

Máru engaksï uiriini jaka ini xanharu jimbo enga tsípikuarhu pájpijka, jatsiastiksï uandanhiatechani engaksï máteruecha no újka exeni ni kurhanguni. Engachi nóteru újkia uánikua ambe úni, ochi ísï pʼikuarherani enajkijtsïni no nema kurhanguchejki, ambe enga Mefiboseti nitamakuarhipka uátijtsïni uinhaperantani (2 Sam. 4:4). Ima no solu jatsispti para tekaantani imeri kʼéri pʼamenchakua jimbo, sino ístu tekaantaspti enga rei Dabidi no sési kámapka. Peru ima no jurajkuspti eska indeni ambe jimbo, méntkisï kómu pʼikuarheraparini jámapiringa. Sánderu sési, kánikua jukaparharasïrendi ambakiti ambe enga jatsipka. Jukaparharasïrendi enga antesi rei Dabidi sési kámapka (2 Sam. 9:6-10). Ísï jimbo, jiáni enga rei Dabidi no sési kámapka, Mefiboseti jánguarhintaspti kurhanguni andisï ísï úpi. No jurajkuspti eska no sési pʼikuastapiringa ambe enga rei Dabidi úpka ni uandapi eska Jeobaeri kulpespka. Sánderu sési, Mefiboseti jánguarhintaspti jarhuatani reini enga Jeoba erakupka (2 Sam. 16:1-4; 19:24-30). Jeoba úspti eska Bibliarhu karakata pakarapiringa Mefibosetiri ambakiti ejemplu parachi ambakiti ambe jorhenguarhini (Rom. 15:4). w20.04 26 párr. 3; 30 párr. 18, 19

Jamberiksï juchari kúnguarhikuecharhu jati misioneruecha, prekursori espesialicha o regularicha engaksï kʼamakʼamasï jámajka aianhpini ka Jesusiri chúxapatichani uáni. Nájkirukaksï sáno iámindu i erachicha no uánikua ambe jatsikuarheka, Jeoba uánikua kóntperatechani íntsaastia (Mar. 10:29, 30). ¿A no eskachi kánikua jukaparharasïnga engaksï i erachicha kúnguarhikuarhu jaka? Peru, ¿solu ima erachicha engaksï orhejtsïkujka kúnguarhikuani ka engaksï kʼamakʼamasï marhuakujka Jeobani, jindeskiksï engaksï jukaparhakueka Jeobaeri kúnguarhikuarhu? Nómbe. Para Jeoba ka para kúnguarhikua, iámindu aianhpirichaksï kánikua jukaparhakuesti (Rom. 10:15; 1 Kor. 3:6-8). Ka i ambe ísïsti, jimboka ambe enga sánderu jukaparhakueka para kúnguarhikua, jindesti Kristueri chúxapatichani uáni (Mat. 28:19, 20; 1 Tim. 2:4). Iámindu kúnguarhikuarhu anapu aianhpirichaksï, ia sea engaksï itsï atakuarhikia o nómbe, jánguarhintasïndiksï Kristueri chúxapatichani uáni ka eska i ambe sánderu jukaparhakua ambeuaka imecheri irekuarhu (Mat. 24:14). w20.08 21 párr. 7, 8

Eska na uandajka iásï anapu textu, Jesusijtsïni jarhuataati engachi uandanhiatecha jatsiauaka. ¿Andijtsïnisï uinhaperantajki i uandakuecha? Jimboka jarhasïnga ménisï engachi kánikua no sési nitamakuarhijka. Por ejemplu, engachi uarhiranchajka nemani, jamberichi uánikua uéxurhicha jimbo no sési pʼikuarherajka ka no solu máru jurhiatikuecha jimbojku. Máteruechaksï no sési nitamakuarhisïndi jimbokaksï jatiriskia. Ka máteruecha jimbokaksï depresioni pʼamenchasïnga. Nájkirukachi ini ambe nitamakuarhijka, úsïngachi orhepani uérani jimboka Jesusi juchantsïni jingoni jarhaska “méntkisï”, asta jiáni engachi sánderu no sési nitamakuarhini jarhajka (Mat. 11:28-30). Tata Diosïri Karakatajtsïni arhisïndi eskajtsïni Jeoba jarhuatasïnga imeri ánjelichani úrapariani (Ebr. 1:7, 14, TDU). Por ejemplu, ánjelichajtsïni jarhuatasïndi ka orhechepani engachi nirajka aianhpini ambakiti ambe Reinueri “iámindu nasionicharhisï, ka tribuechani ka imechani engaksï táchani jásï idioma uandajka ka iámindu kʼuiripuechani” (Mat. 24:13, 14; Jaŋ. 14:6). w20.11 13, 14 párr. 6, 7

Uékasïngachi eska Bibliaeri jorhenguarhiri kurhanguaka eska ambe enga jorhenguarhini jaka Tata Diosïri Karakateri ambeska (1 Tes. 2:13). Para ísï úni, ju je jarhuatani paraka uandaaka ambe enga jorhenguarhini jaka. Enbesi de jucha méntkisï arhini ambe arhikuekasïni máru karakatecha, ju je arhini eskajtsïni arhiaka ambe kurhanguski máru karakatecheri. Ju je jarhuatani paraka ima exeaka néna uá jarhuatani ima ambe enga Bibliarhu jorhenguarhini jaka. Ju je kurhamarhikuechani úkuani paraka uandaaka ambe enga eratsejka ka pʼikuarherani enga karakatechani arhiantauaka (Luk. 10:25-28). Por ejemplu, ju je kurhamarhini: “¿Úsïntsï cha exeni Jeobaeri kualidadi ma ini karakatarhu?”, “¿Nénaksïni uá marhuacheni i Bibliaeri karakata?”, “¿Nénaksïni pʼikuastaski i ambe engajtsï kʼamaraka jorhenguarhini?”. Ambe enga sánderu jukaparhakueka jindesti eska tsitiaka ambe enga jorhenguarhini jaka ka ísï úni ka no eska uánikua ambe jorhenguarhiaka. Jatsiskachi para jurajkuni eska Biblia jindeaka enga jorhentpiaka. Parachi sánderu ambakiti jorhentpiricheni jatsiskachi para kaxumbitiini. w20.10 15 párr. 5, 6

Uákachi seguru jarhani eska Reinueri aianhpikua, jiáni kʼamakurhiaka enga Tata Diosï exerini jakaia. Ju je eratseni ambe enga úkuarhipka Noeri jurhiatikuecha jimbo. Jeoba xarhataspti eska méntkisï úsïnga ambe ma jiáni enga sánderu sési jauaka. Ma siento beinti uéxurhinisï antesi, Jeoba uandaspti káni úkuarhipirini kʼéri janikua. Uánikua uéxurhinisï tátsekua, Jeoba arhispti Noeni eska úpiringa arkani ka Noe kánikua ánchikuarhispti ma kuarenta o sinkuenta uéxurhinisï. Ka ístu, nájkirukaksï kʼuiripuecha no kurhajchenga, ima no kuatantaspti aianhpini astaka Jeoba arhipka eska inchapiringuia arkarhu. Jiájkani, ima jurhiatikua enga Jeoba uandarini japkia, míkaspti puertani (Gén. 6:3; 7:1, 2, 16). No ióni jimbo Jeoba uandaatia eskachi nóteru aianhpiakia, kʼamajkuati Noambakitiri parhakpinini ka uáti eska jimbanhi parhakpini ma jauaka nani enga jurhimbikua jingoni jánhaaka. Enga jamberi niáraaka ima jurhiatikua, ju je májkueni úni eska Noe ka máteru ambakiti Tata Diosïri marhuaricha engaksï no kuatantani jaka ánchikuarhini. Ju je orheta peerani aianhpikuani, tekaantstini ka sánderu mintsikani Jeobani ka imani ambe engajtsïni ima aiachijka. w20.09 13 párr. 18, 19

Enga no uaxastakata japiringa né enga jatsika juramukua, no japirindi pínandikua ka no nema tsípikua jingoni irekapirindi. No nema mítepirindi nésï jatsi para uandani ambesï úkuarhia ka né uéna ísï úni. Enga xáni sésiika eskaksï acheeticha juramukua jatsiaka familiarhu, ¿andiksïsï xáni uánikua uarhiiticha ísï pʼikuarherajki enajkiksï no sési kaanhajki? Jimbokaksï uánikua acheeticha no úsïnga ambe enga Jeoba uandajka eskaksï uáka familiecha ka sánderuksï chúxapaasïndi imecheri pʼindekuechani. Ístuksï úpirindi no sési kámani témbani paraksï ima mismu sési pʼikuarherani. Úpirindi acheeti ma no sési kámani témbani jimboka uékasïnga xarhatani eska ima sánderu jukaparhakueska, ka eska ima “kʼóru tsʼiueska”. Jamberi eratsejti eska no uáka úni eska témba xénchaaka, peru eska uáka úni eska chérhiaka ka eska chétapu jimbo kurhajchaaka. Joperu ísï eratseni ka ísï kámani kánikua no sési jarhasti. Nóksï janhanharhiani jarhasïndi uarhiitichani eskaksï na jatsika para úni ka Jeoba méntku no sáni jaiapanhentasïndi ini ambe (Efes. 5:25, 28). w21.02 3 párr. 6, 7

Kánikuajtsï sési pʼikuarherantaaka engajtsï iámu mintsita jingoni kómarhiaka Jeobani jiáni engajtsï uandanhiani jauaka problemecha jimbo. Jeoba uáti mókuantani chári kómarhikuechani íntskuparinksïni “Diosïri pínandikua enga no nema újka jánhaskani” (Filip. 4:6, 7). Jeoba úrasïndi imeri espiritu santuni enga kánikua uinhapitika parachi no xáni uandanhiani (Gal. 5:22). Engajtsï kómarhiaka Jeobani, iámu ambe uénhikuarhi je. Aiangu je ambe jimbojtsïsï uandanhiani jaki ka na engajtsï pʼikuarherajka. Enga jaka ambe ma para sési peentani problemani, kurhaku je Jeobani eskaksïni jarhuataaka jánhaskani ambe úni ka paraksïni íntskuni uinhapikua parajtsï úni indeni ambe. Enga nóteru ambe ma jauakia para úni, kurhaku je Jeobani eskaksïni jarhuataaka no xáni uandanhiani. Engajtsï meru arhiska ambe engajtsï uétarhinchajka, niáraakajtsï exeni na engaksïni Jeoba mókuchiantauaka kómarhikuechani. Engaksïni no jirejiresï mókuchintaaka, asï kuatanta je kómarhini. Jeoba uékasïndi eskajtsï arhiaka ambe engajtsï uétarhinchani jauaka, joperu ístu eskajtsï no kuatantaaka kómarhini (Luk. 11:8-10). w21.01 3 párr. 6, 7

Juchari kúnguarhikuarhu, jarhastiksï temungurhiricha engaksï kaajka sapiichani ka ístu imecha engaksï no kaajka, peru ístuksï jarhasti uánikua erachicha ka pirenchicha engaksï no tembuchatika o uambuchatini. ¿Nénachi jatsiski para exeani ini erachichani ka pirenchichani? Ju ménderu exeni néna exesïreni Jesusi enga nema no tembuchatipiringa o uambuchatini. Enga Echerirhu japka, ima no méni tembuchaspti, sánderu sési, úraspti imeri tiempuni ka uinhapikuani para Tata Diosïri ambe aianhpini. No méni jorhentpispti eska kristianu ma jatsiska para tembuchani o uambuchani nijtu uandapi eskaksï no ísï úpiringa. Peru kʼóru uandaspti eskaksï máru erakupiringa no uambuchani ni tembuchani (Mat. 19:12). Ima janhanharhiasïrendi ka jukaparharaani imechani engaksï no tembuchatipka o uambuchatini ka no eratsesïrendi eskaksï kueratanchasïrenga ambe ma. Apostuli Pablu, Tata Diosïri marhuari máespti enga no tembuchatipka májkueni eska Jesusi. No méni jorhentpispti eska no sési jarhaska tembuchani o uambuchani. Ima mítespti eska mándani kʼuiripu jatsiska para erakuni indeni ambe. w20.08 28 párr. 7, 8

Apostoli Juanu ióni irekaspti ka ambakiti ambe nitamanchaspti. Ístu uánikua ambe nitamakuarhispti enga úpiringa úni eska nóteru xáni mintsikapiringia Tata Diosïni. Joperu méntkisï jánguarhintaspti ísï úni eskaksï Jesusiri juramukuecha na uandenga, komu xénchaani imeri erachichani. Juanu seguru jarhaspti eska Jeoba ka Jesusi xénchasïrenga ka eskaksï uinhaperantapiringa paraka úpiringa orhepani uérani na uéjki jásï uandanhiata ma jimbo (Juanu 14:15-17; 15:10). Noambakiti ka imeri parhakpini nóksï úspti eska Juanu no xénchaapiringa imeri erachichani ka xarhataspti i ambe uandakuecha ka úkuechani jimbo. Májkueni eska Juanu, Noambakitiri parhakpini jimbochi irekaxaka, enga kánikua kurhunhperanhajka (1 Juanu 3:1, 10). Ima uékasïndi eskachi nóteru xénchauakia juchari erachichani, joperu no uáti ísï úni engachi jucha no jurajkuska. Ísï jimbo, ju je jánguarhintani méntkisï xénchaani juchari erachichani ka xarhatakuani juchari uandakuecha ka úkuecha jingoni. Engachi ísï úska kánikuachi sési pʼikuarheraaka kuenta úkuarhini Jeobaeri familia jingoni ka kánikuachi tsípikua jingoni irekaaka (1 Juanu 4:7). w21.01 13 párr. 18, 19

Úpirindi úkua jukani ini parhakpini jimbo irekani enga Noambakiti juramuni jaka ka ménisïchi no jánhaskani ambe úni (2 Tim. 3:1). Peruchi no jatsiska para uandanhiani o chéni, jimboka Jeoba mítetixaka ambe engachi nitamakuarhini jarhajka. Engachi uétarhinchani jarhajka jarhuajperata imajtsïni aiachisïndi eskajtsïni jarhuataaka imeri jurhijkandani anapu jájkini jingoni enga kánikua uinhapitiika (Isa. 41:10, 13). Seguruchi jarhaska eskajtsïni Jeoba jarhuataaka ka Bibliajtsïni uinhaperantaati parachi úni orhepani uérakuani náki uéjki járhati uandanhiatechani. Bideuecha, Bibliaeri arhintskuecha engaksï uandantskueni arhikuarhintajka ka libru Ambe engani jorhenguarhijka Bibliaeri, xarhatasïndiksï na enga úkuarhipka ambe ma. Antede exeani, kurhauani o arhiantaani i ambe, kurhakuakachi Jeobani eskajtsïni jarhuataaka exeni na engajtsïni marhuacheaka i ambe. Ju je eranhaskani eskachi jucha ima kʼuiripueska enga Biblia uandajka. Eranhaskani ambe enga úpka ka néna enga jarhuatapka Jeoba imeri marhuarini para úni orhepani uérakuani uandanhiatechani ka tátsekua, ísïchi uáka eskachi na jorhenguarhika. Ka últimu, ju je uinhaperaantani ka jarhuataani máteruechani ka ísïchi xarhatakuni jauaka Jeobani eskachi agradeserikusïnga imeri jarhuajperatani. w21.03 19 párr. 22, 23

Engajtsï temungurhirika ka uékantsï jarhani sapiichani kaani, kurhamarhikuarhi je: “¿Erakupirintsïni Jeoba parachi charhakuni ma kuidarini jimbokachi kaxumbitiska ka jimbokachi xénchasïnga Jeobani ka imeri Karakatani?” (Sal. 127:4). Ka engajtsï kánguarhiajkia sapiicha, kurhamarhikuarhi je: “¿Jorhendasïnchi sapiichani na enga xáni jukaparhakueka ánchikuarhirini?” (Ecl. 3:12, 13). “¿Jánguarhintasïni kuájchakuani paraksï no no sési ambe úkuarhinchani?” (Prov. 22:3). Ísïsti eskajtsï no uáka iámindu ambe jimbo kuájchakuani. Joperujtsï uáka uékperakua jingoni jorhendaani parakaksï uáka orhepani uérakuani uandanhiatechani. ¿Néna? Jorhendaapariani eskaksï mintsikaaka ambe enga Biblia uandajka (Prov. 2:1-6). Por ejemplu, enga familiarhu anapu ma uandaaka eska nóteru marhuakuakia Jeobani, exeraa je chári sapiichani Tata Diosïri Karakata jingoni, andisï xáni jukaparhakue no méni jurajkuni Jeobani (Sal. 31:23). O engajtsï uarhirakuarhiska nemani, exeraa je Bibliaeri karakatechani enga jarhuatauaka orhepani uérani ka sési pʼikuarherantani (2 Kor. 1:3, 4; 2 Tim. 3:16). w20.10 27 párr. 7