Nobiembri

Jimbokachi no iámindu ambe míteka Jonasiri ambe, úpiringachi eratseni eska no mintsinharhikuespka ka eska jamberi no xáni ambakiti marhuari máespka. Jeoba juramukuspti Ninibe nirani aianhpini eska ima ireta kʼamajkunhapiringa. Peru no kurhajchaspti Jeobani, sánderu sési barku ma jataspti enga méntku máteru ladu jimbo nirani japka, nani enga iauani pakarenga jima uératini enga Jeoba axapka (Jon. 1:1-3). Jamberichi jucha nóteru sésikua íntskupiringuia para Jonasi imeri ánchikuarhitani úni. Peru Jeoba ménderu sésikua íntskuspti para ima imeri ánchikuarhitani úni (Jon. 3:1, 2). Uákachi míteni na enga jásï kʼuiripu máepka Jonasi, imani kómarhikua jimbo enga ima úpka jiáni enga kʼéri kuruchari sïturhirhu japka (Jon. 2:1, 2, 9). I kómarhikua, xáni uánikuecheri enga úpka, jarhuatasïndijtsïni exeni eska ima ambakiti kʼuiripu máespka ka no solu nema enga no uékapka úni imeri ánchikuarhitani. Imeri uandakuechaksï xarhatasïndi eska kaxumbitispka, jukaparharasïrendi iámindu ambe ka eska mintsita jingoni uékasïrenga kurhajchani Jeobani. Jimbosï Jeoba no solu imani ambe exepti ambe enga Jonasi úpka, mókukuntaspti imeri kómarhikuani ka jurajkuspti eska ima útasï profeta máepiringa. Kánikua jukaparhakuesti eskaksï orhejtsïkuticha orheta jingontku kurhajchauaka erachichani ka pirenchichani ante de konseju ambe íntsaani. w20.04 15 párr. 4-6

Primeru siglurhu anapu kristianuechaksï jiókuarhispti Kristueri jorhentperakuechani ka kurhajkuarhisptiksï espiritu santueri jarhuajperata paraksï úni kurhanguni Tata Diosïri Karakatani. Jirinhantasptiksï sánderu ambe paraksï seguru jarhani eskaksï ima jorhentperakuecha Tata Diosïri Karakatarhu pʼitakata jarhaspka (Uku. 17:11, 12; Ebr. 5:14). Imecheri jakajkukua no solu uaxastakata jarhaspti imani ambe jimbo engaksï imecha pʼikuarherenga ni ambe engaksï eratsenga, ka nóksï marhuakusïrendi Jeobani solu jimbokaksï sési pʼikuarherasïrenga máteru kristianuecha jingoni jarhani. Sánderu sési, imecheri jakajkukua uaxastakata jarhaspti Tata Diosïri jurhimbikua ambe jimbo (Kol. 1:9, 10). No méni mójtakurhisïndi ambe enga Biblia jorhentpijka (Sal. 119:160). Por ejemplu, no mójtakurhisïndi Bibliaeri jorhentperakua ambe jiáni engajtsïni erachi ma no sési pʼikuastajka o enga no sési ambe niátajka. Níjtu jiáni engachi uandanhiata ambe jatsijka. Ísï jimbo, jatsiskachi para sési míteni ambe enga Biblia jorhentpijka ka seguruchi jarhani eska inde ambe ísïska. Ísï eska anhatapu ma enga no kuarhatsejka jiáni enga kʼéri janijka jimboka iauani inchaskuaska imeri sïranguechani, juchari jakajkukua enga uaxastakata jauaka imani ambe jimbo enga Biblia jorhentpijka, májkuentsïni jarhuataati orhepani uérani engachi no sési nitamakuarhiaka. w20.07 9 párr. 6, 7

Jesusi ísï exesïndi enajkichi imani jimbo újki ambe ma engachi erakukatechani jarhuataajka (Mat. 25:34-40). Sánderuchi jarhuataasïnga engachi jánguarhintajka na engachi xáni uáka para Jesusiri chúxapatichani uáni, ísï eska ima na juramuka (Mat. 28:19, 20). ‘Máteru karichicheri’ jarhuajperata kánikua jukaparhakuesti paraksï Kristueri ermanuechani úni aianhpini interu parhakpinirhu ini jurhiatikuecha jimbo (Juanu 10:16). Méni engachi újka ini ánchikuarhitani jucha engachi “máteru karichichani” jingoni kuenta úkuarhijka, xarhatasïngachi eskachi xénchaasïnga erakukatechani ka ístu Jesusini. Ístuchi Jeobaeri ka Jesusiri amigu úkuarhisïnga engachi tumina íntspijka paraka imani ánchikuarhitarhu úrakuarhiaka engaksï imecha orhejtsïkujka (Luk. 16:9). Por ejemplu, uákachi íntspini tumina para jarhuajpini jimesïsï enga no sési ambe úkuarhijka. Ístuchi uáka íntspini tumina para juchari kúnguarhikua ka jarhuataani erachichani o pirenchichani engaksï uétarhinchajka ambe ma (Prov. 19:17). w20.04 24 párr. 12, 13

I profesia uandasïndi eska nortirhu anapu rei no janhanharhipiringa “imecheri táti jembecheri Tata Diosïni”. ¿Ambe arhikuekasïni i ambe? Unión Soviética kánikua jánguarhintaspti kʼamajkuani relijionichani parakaksï nóteru japiringuia. Ísï jimbo, 1918 uératini, Unión Soviética juramuspti eskaksï eskuelecharhu jorhentpepiringa eska no jarhaska Tata Diosï. ¿Ka néna jimbo kʼéri ambe arhispi diosïni uinhapikuerini? Kánikua tumina úraparini para imeri ejersitu sánderu kʼéni ka uinhapini, ka úpariani uánikua kʼérati bombechani (armas nucleares) para sánderu juramukua jatsini. Ísï tátsekua, nortirhu anapu rei ka surirhu anapu rei, niárasptiksï jatsini uánikua uarhipetarakua ambe engaksï jingoni úpiringa miionicha jimbo uándikuani kʼuiripuechani. Nortirhu anapu rei ka surirhu anapu rei, márkuksï ánchikuarhisïndi paraksï úni ambe ma enga jukaparhakueka: peerani “imani ikichakueni jásï ambe enga iámu ambe kʼamajkujka” enga jindeka Organización de las Naciones Unidas (Dan. 11:31). w20.05 6, 7 párr. 16, 17

¿Néchaksï uá jarhuajpini para jirinhantaani imechani engaksï jarharika kúnguarhikuani? Iámindu kúnguarhikuarhu anapuecha, imecheri familia, orhejtsïkuticha, prekursoricha ka aianhpiricha. ¿Jarhaski nema juchari familiarhu o amigu ma enga jarharika kúnguarhikuani? ¿Exentaskichi nemani enga jarharika kúnguarhikuani jiáni engachi aianhpini jámani japka xanharu jimbo o kʼumanchikuecharhu? Jiájkani, enga ima uékaska eska nema pʼorhembiaka, ju je arhini eskachi uáka kúnguarhikuarhu anapu orhejtsïkutichani íntsantaani imeri informasioni. Orhejtsïkuti ma enga Thomas arhinhajka uandasïndi: “Orheta uandontskuarhesïnga erachicha ka pirenchicha jingoni engaksï úpiringa míteni naniksï irekaxaki iásï imecha engaksï jarharika kúnguarhikuani. Ístu kurhamarhiasïnga aianhpirichani sinksï miásïni erachini ma enga nóteru nirajkia tánguarhikuecharhu. Tátsekua, engani na nirajkia pʼorhembini erachini o pirenchini, kurhanguarhiasïnga uájpechani ka parientichani. Máru i erachichaksï paasïrendi uájpechani tánguarhikuecharhu ka máruksï jamberi niáraspti aianhpiricheni. Ístuchi uáka jarhuataani imechani paraksï Jeoba jingoni kʼuanhatsentani”. w20.06 24 párr. 1; 25 párr. 6, 7

Iámindu amberi enga xáni kueraakata jaka ixú Echerirhu, kʼuiripuechajkuchisï újka ambakiti ambe jorhenguarhini ima amberi engachi nitamakuarhijka. Miáni ka eratsentani ambe engachi nitamakuarhikia, jarhuatasïndijtsïni parachi ambakiti ambe jorhenguarhini ka parachi mójtakuni na engachi eratsejka ka jámani (1 Kor. 6:9-11; Kol. 3:9, 10). Astachi uáka jorhendani juchari konsiensiani para úni míteni ambe sési jarhaski ka ambe nómbe (Ebr. 5:14). Úsïngachi jorhenguarhini parachi xarhatani uékperakua ka pʼamojperakua, ka ístuchi úsïnga jorhenguarhini parachi májkueni jurhimbikua jingoni jámani eska Jeoba. Ma ambe engachi uáka úni parachi xarhatani eskachi jukaparharasïnga engachi uánikua ambe miájka, jindesti jánguarhintani no mirikurhini na engajtsïni Jeoba xáni jarhuatakia ka uinhaperantani. Ísïchi uáka sánderu mintsikani eskajtsïni ima jarhuataaka sánderu orhepani (Sal. 77:12; 78:4, 7). Máteru ambe engachi uáka úni parachi xarhatani eskachi jukaparharasïnga indeni intsïmperakuani, jindesti miáni ambe engaksï xáni újka máteruecha juchantsïni jimbo ka diosmeiamukua arhipariani. Sientifikuechaksï uandasïndi eskaksï ima kʼuiripuecha engaksï diosmeiamukua arhijpijka, sánderuksï tsípikua jingoni irekasïnga. w20.05 23, 24 párr. 12, 13

Ju je eratseni na enga pʼikuarherapka Moisesi jini Orebi juáta jimbo jiáni enga kʼerendarhu ísï japka ka jánhaskakua ma jimbo exeni na enga imeri orhepani jimbo nitamani japka Jeobaeri tʼíntskua. Libru Perspicacia para comprender las Escrituras uandasïndi eska ambe enga Moisesi nitamakuarhipka ima jurhiatikua, jamberi nóteru nema nitamakuarhiptia ini ambe ante de Jesusi Echerirhu jurhani. Jeoba, ánjelini ma úraspti para ini ambe arhini Moisesini: “Jeoba, Jeoba, Tata Diosï uékpiti ma ka pʼamojpiti, enga ióndajka ikiani ka enga para méntkisï uékpijka ka jurhimbitini ka enga xénchaajka uánikuechani, enga puákuntajka imani enga no sési ambe újka, imani enga no janhanharhijka leini ka imani enga kʼamanharhintajka” (Éx. 33:17-23; 34:5-7). Méni enga úrenga Jeobaeri nombrini, jamberi Moisesi miántendi imani ambe enga uandajka tekstu iásï anapu. Engachi Jeobaeri nombrini eratsejka, sési jarhasti eskachi eratsentaaka na enga jásïka ima. Jatsiskachi para miáni eska ima uinhapitiska, jánhastiska, jurhimbitiska ka uékpitini. Eratsentani i ambe ka máteru ambakiti ambe enga Jeoba xarhatajka, uáti eskachi sánderu janhanharhiaka (Sal. 77:11-15). w20.06 8, 9 párr. 3, 4

Jesusi uandaspti eskaksï kʼuiripuecha niárapiringa exeni eskaksï iámindu imeri chúxapaticha uékperapiringa (Juanu 13:34, 35). Peru engachi uéjka eska juchari jakajkukua sánderu kʼéaka jatsiskachi para ístu sánderu ambe úni. Nóchi solu jatsiska para jakajkuni Tata Diosïni jimbokaksï ambakiti kristianuecha uékperasïnga. ¿Andi? Ju je uandani eska erachi ma, orhejtsïkuti ma o prekursori ma, kánikua no sési ambe niátasïnga, ojtsïni no sési pʼikuastani o apostata úkuarhini ka uandani eska no ísïska ambe engachi jakajkujka. ¿Ambechi úpirini enga i ambe úkuarhipiringa? ¿No sésichi pʼikuarherapirini ka nóteru marhuakunia Jeobani? I ambejtsïni jorhendasïndi eska engachi uéjka eska juchari jakajkukua kʼéaka, jatsiskachi para ambakiti pájperakua ma jatsini Jeoba jingoni ka no imani ambe jimbo engaksï máteruecha újka. Juchari jakajkukua ísïsti komueska kʼumanchikua ma enga no jatsika para uaxastakata jarhani imani ambe jimbo engachi pʼikuarherajka o ambe engachi eratsejka, sino imani ambe jimbo engachi jorhenguarhijka ka seguru jarhani eska ísïska. Jatsiskachi para jucha mismu exeni eska ísïska ambe enga Biblia jorhentpijka Jeobaeri ambe (Rom. 12:2). w20.07 8 párr. 2, 3

Jarhastiksï uánikua eksperiensiecha engaksï xarhatajka eskajtsïni ánjelicha jarhuatasïnga exeantaani imechani engaksï uékani jaka kʼuanhatsentani Jeoba jingoni (Jaŋ. 14:6). Por ejemplu, Silvio enga Ecuador anapueka, kómarhispti Jeobani paraka jarhuatapiringa kʼuanhatsentani kúnguarhikuarhu. Enga útasï kómarhini japka, tsimani orhejtsïkutichaksï uamutakuspti. Jiánksï mismu uénaspti jarhuatani ísï eska Silvio na uétarhinchani japka. Jarhuatani nemani para Jeoba jingoni kʼuanhatsentani, uáti eskachi kánikua sési pʼikuarheraaka. Ju je exeni ambe enga uandajka Salvador, prekursori ma enga jánguarhintajka jarhuataani imechani engaksï jarharika kúnguarhikuani: “Ménisï niárasïnga uerani xáni tsípini. Kánikua sési pʼikuarherasïnga eratseni na enga Jeoba pʼímutantajka Noambakitiri parhakpinirhu uératini imeri karichini ma enga xáni xénchajka ka engani ji újka jarhuatani Jeobani”. Engajtsï cha jarharika Jeobaeri kúnguarhikuani, uákajtsï seguru jarhani eskaksïni Tata Diosï útasï xénchasïnga ka uékasïndi eskajtsï kʼuanhatsentaaka. Jeoba erokuarhixati eskajtsï kʼuanhatsentaaka imeri familia jingoni ka uékperakua jingonksïni jióntaati. w20.06 29 párr. 16-18

Jimboka Jeoba jindeska juchari Ambakiti Jorhentpiri, imeri Karakatarhu jurajkuasti ejempluechani engajtsïni jorhendajka ambe ma (Is. 30:21). Uákachi eratsentani imani kʼuiripuecheri enga Biblia uandaajka engaksï kaxumbikua xarhatapka ísï eska Jeoba na jaiapanhintajka ka ístu ambe engaksï úkuarhinchapka imecha engaksï no kaxumbitipka (Sal. 37:37; 1 Kor. 10:11). Ju je eratsentani ambe enga úkuarhinchapka rei Sauli. Enga tumbipka, xáni kaxumbispti ka ísï exekuarhini enajki no ma ambepti enga jamberi kánikua úkua jukanchapka kʼéri ánchikuarhita ambe jiókuarhini (1 Sam. 9:21; 10:20-22). Peru ísï tátsekua enga reipkia, uénaspti kʼéramakuarhini ka úspti máru ambe enga no jatsipka para úni. Ma xanhari, kuatantaspti profeta Samuelini erokani ka kéjtsïtakua ma úspti nájkiruka ima no sésikua jatsipka para indeni ambe úni. Inde ambe jimbo, Jeoba nóteru jaiapanhintasptia ka sánderu tátsekua nóteru jurajkusptia eska reipiringa (1 Sam. 13:8-14). Ini ambe jingonchi jorhenguarhisïnga eskachi no jatsiska para úni ambe engachi no sésikua jatsika. w20.08 10 párr. 10, 11

Ísïsti eska Jeoba, tata Jesukristuni úraparini, peeraaska kúnguarhikuecharhu achamasïchani engaksï “intsïmperakua” máeka (Efes. 4:8, TNM). I achamasïchaksï imechesti engaksï jaka Grupurhu enga Orhejtsïkuajka iámindu kúnguarhikuechani ka imecheri jarhuajpiricha, imecha engaksï Grupurhu jaka engaksï Betelini ma Orhejtsïkujka, sirkuitueri orhejtsïkuticha, imecha engaksï arhistatspijka Bibliaeri jorhentperakuecharhu, kúnguarhikuarhu anapu orhejtsïkuticha ka orhejtsïkuticheri jarhuajpiricha. Iámindu i erachichaksï espiritu santu jimbo intsïnhasïndi ánchikuarhita ma paraksï kuidariuani Jeobaeri karichichani engaksï xáni jukaparhakueka ka paraka kúnguarhikua sési jauaka (1 Ped. 5:2, 3). Erachichaksï espiritu santu jimbo intsïnhasïndi mámaru jásï ánchikuarhita ambe kúnguarhikuarhu. Ísï eskaksï jájkicha, jantsiricha ka máteru particha kuerpueri na uánikua ambe újka paraka iámu kuerpu sési jauaka, erachichaksï mámaru ambe úsïndi paraka kúnguarhikua sési jauaka. Nóksï uékasïndi eskaksï imecha kʼéri ambe exenhaaka, sánderu sési, jánguarhintasïndiksï sési pʼikuastaani erachichani ka uinhaperantaani (1 Tes. 2:6-8). Kánikuachi jukaparharasïnga enga Jeoba peeraaka kúnguarhikuarhu ini ambakiti erachichani engaksï orheta peerajka máteruecheri ambe ka eska imecheri ambe. w20.08 21 párr. 5, 6

Ma ambe engachi jimbo aianhpijka, jindesti eskaksï kʼuiripuecha “jandiajku jámaxaka ka etsakuarhitini” ka uétarhinchaxatiksï jurhimbikua ambe míteni Reinueri (Mat. 9:36). Jeoba uékasïndi eskaksï iámindu jásï kʼuiripuecha míteaka jurhimbikuani ka eskaksï pʼímutantskata uéraaka (1 Tim. 2:4). Ma ambe engaksïni jarhuataaka aianhpini, jindesti eratseni eska i ánchikuarhita uáka pʼímutantaani kʼuiripuechani. Jucha p’ímutantaasïnga k’uiripuechani (Rom. 10:13-15; 1 Tim. 4:16). Uétarhisïngachi sési preparadu jarhani para juchari ánchikuata úni. Jesusi arhiaspti imeri chúxapatichani nénaksï jatsipirini para aianhpini. Arhiaspti ambe engaksï pápiringa, nani engaksï aianhpepiringa ka ambe engaksï uandapiringa (Mat. 10:5-7; Luk. 10:1-11). Ini jurhiatikuecha jimbo, Jeobaeri kúnguarhikuajtsïni íntsaasïndi publikasionichani engachi úrajka para Bibliaeri ambe jorhentpini engajtsïni kánikua marhuachijka ka ístujtsïni jorhendasïndi néna úraani. I ambejtsïni jarhuatasïndi parachi seguru pʼikuarherani ka parachi sési jorhentpini (2 Tim. 2:15). w20.09 4 párr. 6, 7, 10

¿Úsïnchi eranhaskani na enga xáni tsípini japka apostuli Juanu enga kurhaapka eskaksï ima kristianuecha enga ima jarhuataapka míteni jurhimbikuani, útasïksï Jeobani marhuakuxapka? Juanu ísï exeasïrendi ini ambakiti kristianuechani komu imeri uájpecha. Jimbokaksï uánikua uandanhiatechani jatsiaspka, apostuli kánikua jánguarhintaspti para imecheri jakajkukuani uinhaperantani. Juchajtuchi kánikua sési pʼikuarherasïnga engaksï juchari sapiicha o imecha engachi jorhendaaka Bibliaeri ambe, niárajka aiakukuarheni Jeobani ka seguirinksï jarhani marhuakuni (3 Juanu 3). Uéxurhini 98 jimbo, Jeobaeri espiritu santu úspti eska Juanu tanimu kartechani karaapiringa. Karaaspti imani kartechani para úni eskaksï ima ambakiti kristianuecha no méni jurajkupiringa jakajkuni Jesusini ka paraksï seguirini jurhimbikuarhu jarhani. Jiánisï, Juanu uandanhiaxapti jimbokaksï kúnguarhikuarhu jarhaspka no jurhimbiti jorhentpiricha engaksï támisï jánhastaani japka máteruechani (1 Juanu 2:18, 19, 26). Íksï apostatecha uandasïrendi eskaksï mítespka Tata Diosïni, peruksï no úsïrendi ambe enga ima juramuenga. w20.07 20 párr. 1-3

Jimbokachi jakajkusïnga ambe engachi aianhpijka, uékasïngachi eskaksï iámindu kʼuiripuecha míteaka. Mintsikasïngachi eska úkuarhiaka ambe enga Tata Diosïri Karakata uandajka (Sal. 119:42; Is. 40:8). Ini jurhiatikuecha jimbo exexakachi na engaksï úkuarhini jaka máru Bibliaeri profesiecha. Ístuchi exesïnga na engaksï kʼuiripuecha sánderu sési irekajka engaksï uénajka Bibliaeri konsejuechani úraani. Iámindu ini ambe jimbo, sánderuchi exesïnga eska iámindu kʼuiripu uétarhinchasïnga kurhaani ambakiti ambe Reinueri. Ístuchi, mintsikasïnga Jeobani jimbokachi imeri uandakuanisï aianhpijka ka ístu Jesusini enga ima erakuka para Reini Tata Diosïri Reinurhu. Ambe uéjki úkuarhini, Jeobajtsïni méntkisï kuájchakuati ka íntskuatijtsïni uinhapikua (Sal. 46:1-3). Ístu, sésichi mítetixaka eska Jesusi orhejtsïkuxaka aianhpikuani auandarhu uératini, imani uinhapikua ka juramukua jingoni enga Jeoba íntskuka (Mat. 28:18-20). Juchari jakajkukua jimbo, seguruchi jarhaska eskajtsïni Jeoba újchakuraaka engachi jánguarhintaska. w20.09 12 párr. 15, 17

Ménisï, máru juchari pirenchichaksï uétarhinchasïndi eska nema kuájpiauaka ka jarhuataani (Is. 1:17). Por ejemplu, pirenchi ma enga tsïndika o enga diborsiarikuarhika, jamberi uétarhinchaati eska imani ambe jingoni jarhuataaka enga antesi imeri acheeti uénga. Jamberi pirenchi ma enga jatirikia, uétarhinchaati eska nema uandapikuaka jiáni enga doktoricha jingoni niuaka. Ka prekursora ma enga máteru ambe jingoni jarhuajpijka Jeobaeri organisasionirhu, úpirindi uétarhinchani eska nema kuájpiaka engaksï máteruecha no sési ambe uandaaka imeri ambe jimboka no xáni uérasïnga aianhpini eskaksï máteru prekursoricha. Ju je exeni Jesusiri ejempluni. Jesusi no pínasku pakaraspti para kuájpiani pirenchichani engaksï máteruecha no sési ambe eratsepka imecheri ambe. Por ejemplu, kuájpispti Mariani enga Marta no sési ambe uandapka imeri ambe (Luk. 10:38-42). Ka ménderu kuájpispti engaksï máteruecha ísï exepka enajki ima no sési ambe úpi (Mar. 14:3-9). Jesusi mítespti andisï Maria ísï úpi. Asta uandaspti: ‘Naninterkisï parhakpinirhu enga aianhpinhaaka ambakiti aianhperakua, ístu uandanhantaati i ambe enga i uarhiiti úka’. w20.09 24 párr. 15, 16

Ambakiti karichi eranguti ma, mítesïrendi eskaksï karichicha úpiringa tsïnchini. Ka enga i ambe úkuarhienga, nóksï no sési kaasïrendi. Ju je exeni ambe enga úpka Jeoba engaksï máru imeri marhuaricha no úpka ambe enga ima uékenga. Profeta Jonasi no kurhajchaspti Jeobani ka no niraspti Nínibe. Peru Jeoba no xukaspti. Ísï eska na úpiringa ambakiti karichi eranguti ma, Jeoba jarhuataspti ka íntskuspti uinhapikua paraka ima úpiringa úni imeri ánchikuarhitani (Jon. 2:7; 3:1, 2). Tátsekua, úraspti purhueri planta ma para jorhendani eska mándani kʼuiripu kánikua jukaparhakueska para Jeoba (Jon. 4:10, 11). ¿Ambechi jorhenguarhisïni? Eskaksï orhejtsïkuticha no jatsiska para eratseni eska ima erachicha engaksï jarharika kúnguarhikuani, nóteru uákia Jeobani marhuakuni. Sánderu sési, jatsistiksï para kurhanguni andiksïsï jarhari kúnguarhikuani. Ka engaksï i erachicha kʼuanhatsentaaka Jeoba jingoni, jatsistiksï para uékperakua jingoni kaani ka pendienti jarhani imecha jimbo. w20.06 20, 21 párr. 10-12

Jiáni enga Unión Soviética nóteru jatsipkia juramukua 1991 jimbo, Tata Diosïri marhuaricha engaksï imani lugari jimbo japka nóteruksï xáni no sési kánhasptia ma tiempu jimbo, ísï eska Danieli na uandapka, jarhuatanhasptiksï sáni. Ini ambe jimbo, nóteruksï no sési kánhasïrendia engaksï aianhpini jámenga ka ísï no ióni jimboksï niáraspti uánikua aianhpiricha jarhani imani paisicha jimbo enga Unión Soviética juramukuauenga. Peru Rusia ka juramuticha engaksï imani jingonipka, sánhani arhisptiksï jindeni nortirhu anapu rei. Paraka ma juramuti niáraaka jindeni nortirhu o surirhu anapu rei, jatsisti para tanimu ambe úni: ma, kánikua no sési kámani Tata Diosïri iretani. Tsimani, imeri úkuecha jingoni xarhatani eska no sáni xénchasïnga Tata Diosïni ni imeri iretani. Ka tanimu úni jámani, íksï tsimani reicha méntkisï uarhiperani jarhasïndi. Rusia ka juramuticha engaksï imani jingonika, no sésiksï kámaxati Tata Diosïri iretani enga ísï nóteru jurajkuakia eskaksï aianhpiaka ka no sési kaani uánikua erachichani. Imani ambe jimbo engaksï úni jaka, xarhatasïndiksï eskaksï no sáni xénchasïnga Tata Diosïni ni imeri iretani. Ka ístu, méntku uarhiperaxati surirhu anapu rei jingoni enga jindeka Gran Bretaña ka Estados Unidos. w20.05 12, 13 párr. 3, 4

Para Jesusiri chúxapaticha uáni jatsiskachi para jorhentpini, ísï jimbo uétarhisïndi eskachi sési jorhentpiaka. Mándani semana uánikua kʼuiripuechanchi jorhendaasïnga Bibliaeri ambe. Ka iáminduechachi tsitisïnga jorhentpini Tata Diosïri Karakateri ambe, joperuchi jamberi jukari uékaaka uandani inderi ambe. Ísï jimbo, engachi nitamatarani jauaka Jorhenguarhikua Aianhpiri jingoni, Bibliaeri Jorhenguarhikua kúnguarhikua jingoni o engachi Bibliaeri ambe jorhentpini jauaka, nóchi jatsiska para jukari jamberi uandani. Ju je jurajkuni eska Biblia jindeuaka enga jorhentpiaka, ísï jimbo jorhentpiri jatsisti para pʼíngukuarhini ka no uékani iámindu ambe jorhentpini enga xáni míteka, temeri ma o Karakateri ma (Juanu 16:12). Eratsenta je na engajtsï xáni mítepka Bibliaeri ambe jiáni engajtsï itsï atakuarhika ka na engajtsï xáni mítekia iásï. Jamberijtsï imani ambejku mítepka engachi orheta jatsika para jorhenguarhini (Ebr. 6:1). Ambe engajtsï chá mítekia iásï, uánikua uéxurhini jimbojtsï míteska indeni ambe, ísï jimbo asï jánguarhinta je méntku ma xanhari jimbojku uékani iámu ambe jorhentpini. w20.10 14, 15 párr. 2-4

Jeoba ambakiti tátichani máru erakuaspti para Jesusi (Mat. 1:18-23; Luk. 1:26-38). Inde uandakuecha engachi Bibliarhu arhiantajka ka enga Maria imeri mintsita jingoni uandaaka, xarhatasïndiksï na enga xáni xénchenga Jeobani (Luk. 1:46-55). Ka enga José kurhajchapka ambe enga Jeoba arhipka, xarhatasïndi na enga xáni xénchenga ka eska uékasïrenga jaiapanherantani (Mat. 1:24). Ju je exeni eska Jeoba no erakuaspka tátichani máru engaksï jatsikuarheripka para Jesusi. Ambe engaksï kéjtsïtapka José ka Maria enga na andajpenupkia Jesusi xarhatasïndi eskaksï no jatsikuarherispka (Luk. 2:24). Ariskuksï sáni irekapti ka sánderia jimbokaksï siete uájpechanisï kaaspka (Mat. 13:55, 56). Jeoba kuájchakuspti imeri Uájpani máru peligruecheri, peru jurajkuspti eska ménisï no sési nitamakuarhipiringa (Mat. 2:13-15). Por ejemplu, jarhasptiksï máru Jesusiri parienticha engaksï no jakajkuenga eska ima jindespka Mesiasi (Mar. 3:21; Juanu 7:5). Ístu, jamberi José jiáni uarhipti enga Jesusi útasï sapichuepka ka inde ambe úpti eska Jesusi kánikua no sési pʼikuarherapiringa. w20.10 27 párr. 4-6

¿Ménisichi jandiajku pʼikuarheraski ka eska no nema juchantsïni jingoni jarhaska parajtsïni jarhuatani orhepani uérakuni uandanhiatani ma? Nóchi juchajkusï ísï pʼikuarherajka. Astaksï máru ambakiti Jeobaeri marhuaricha engaksï ióntki irekapka niárasptiksï ísï pʼikuarherani (1 Rey. 19:14). Engachi ísï pʼikuarherani jauaka, ju je miántani ambe engajtsïni Jeoba aiachijka: “Jíkeni no méni késtakuchiaka ka níjtukini méni jurajkuni jandiajku”. Ísï jimbo, mintsikaparinchi uáka uandani: Jeoba “jindesti juchiti jarhuajpiri, ísï jimbo ji no sáni chéaka” (Ebr. 13:5, 6). Apostuli Pablu ini ambe karakuaspti erachichani engaksï Judea irekapka uéxurhini 61 jimbo ísï. Ambe enga Apostuli Pablu uandapka, miátantasïndijtsïni ambe enga pʼikuarherapka ima enga karaka Salmo 118:5-7. Májkueni eska ima enga ini salmuni karaka, Pablu sési mítetixapti eska Jeoba jima jarhaspka para jarhuatani, jimboka antesi jarhuataspkia. Por ejemplu, jukari tsimani uéxurhini antesde karakuani imechani engaksï ebreu uandenga, apostuli biaji ma úspti barku ma jimbo enga kánikua peligrosuepka jimboka no sési jánhaskuarhispka marirhu (Uku. 27:4, 15, 20). Jeoba mámaru jarhuataspti Pabluni ini biaji jimbo ka ístu jiáni enga antesi uápka. w20.11 12 párr. 1, 2

¿Andisï no jánhasticheri méntku eratseni jarhani eskachi ióntki sánderu sési irekaspka? Jimboka komu pʼikuarherakua uáka eskachi puru imani ambe miántaaka engachi ióntki sési nitamakuarhipka. Ju je eratseni ambe engaksï ióntki nitamakuarhipka israelitecha: engaksï na uéntapkia Ejiptu uératini, sóntkuksï mirikurhispti na engaksï xáni kómu irekapka ka imantku ambeksï miántasïrendi na engaksï xáni sési tʼirekuarhienga jini. Uandasïrendiksï: “¡Na engachi xáni jirinhantajka kurucha engachi intsïmbinhenga jini Ejiptu, pepinu, sandia, [...], seboia ka ajusï!” (Núm. 11:5). Joperu, ¿ísïspi eskaksï intsïmbinhasïrenga? Nómbe, kánikuaksï kómu jámasïrendi paraksï andakuarhini ambe engaksï arhenga, jimbokaksï jini Ejiptu jántspirispka ka no sésiksï kánhasïrendi (Éx. 1:13, 14; 3:6-9). Peruksï sóntku mirikurhiaspti imecheri uandanhiatechani ka uénasptiksï miántani ambe enga nitamapkia. Enbesdeksï imani ambe miáni jarhani ambe enga Jeoba apenasi úpka imecha jimbo, sánderuksï imani ambe eratsexapti enga nitamapkia. I ambe kánikua ikiataspti Jeobani (Núm. 11:10). w20.11 25 párr. 5, 6

Engachi eratsejka eskachi no ióni irekasïnga ka eskachi uánikua uandanhiatechani jatsiasïnga, kómu pʼikuarherasïngachi (Job 14:1). Ióntki anapu kʼuiripuecha engaksï Jeobani marhuakuenga ísïksï pʼikuarheraspti. Asta máruksï nóteru uékasïrendia irekani (1 Rey. 19:2-4; Job 3:1-3, 11; 7:15, 16). Joperu Jeoba, imecheri Tata Diosï engaksï imecha mintsikenga, méntkisï sési pʼikuastantaaspti ka uinhaperantaani. Ístu, ústi eska ambe engaksï nitamakuarhipka imecha, Bibliarhu karakata pakarapiringa parajtsïni sési pʼikuastantani ka jorhendani (Rom. 15:4). Eratsi je Joséni, Jakobu uájpa, imeri tsípikua mátirku mójtakurhispti. Nóteru imesptia enga táti jémba sánderu uékenga, iásï jántspiri májkuesptia Ejiptu, acheetiri ma enga no mítepka Jeobani (Gén. 37:3, 4, 21-28; 39:1). Tátsekua, Potifariri témba chkuanderakua ambe uandaspti eska José uékasïrenga biolarini. Potifari, no kurhanguarhispti sini ísïspi inde ambe, ónhatarkuarhispti Joséni ka kadenecha jingoni jatsinhaspti (Gén. 39:14-20; Sal. 105:17, 18). José meru jatsispti ambe enga jimbo kómu pʼikuarherani japiringa. w20.12 16, 17 párr. 1-4

Jesusi uandaspti eska i ambe sánderu jukaparhakua ambeska engachi jatsika para kurhajkuarhini kómarhikua jimbo. ¿Ambe arhikuekasïni i ambe? Pímbinhajkuntani ambe ma, jindesti úni eska ambe ma pímbinhasï jauaka o sési jájkuntani. Peru jamberi nema úpirindi kurhamarhikuarhini: “¿Andi, Tata Diosïri nombri no pímbinhasïskia? ¿Andisï uétarhijki pímbinhajkuntani?”. Parachi ini ambe mókuntani, jatsiskachi para eratseni ambe xáni arhikuekasïni nombri ma. Nombri ma no solu uandakua máesti enga karanhajka o uandanhani. Biblia uandasïndi: “Sánderu sésisti ambakiti ambe jimbo mítekateni ka eska uánikua jatsikuarhekua ambe jatsini” (Prov. 22:1, nota; Ecl. 7:1). ¿Andisï xáni jukaparhakue nombri ma? Jimboka ístu i nombri arhikuekasïnga ambe engaksï máteruecha eratsejka kʼuiripueri ma enga ísï arhinhajka, o na enga mítekateka kʼuiripu ma. Ísï jimbo, ambe enga sánderu jukaparhakueka, no jindesti na enga karakuarhijka nombri ma o na enga kurhaakuarhijka, sino ambe engaksï eratsejka máteruecha engaksï exejka o kurhaajka nombri ma. Enga nema chkuanderakua ambe uandajka Jeobaeri ambe, no sési pakatani jarhasïndi imeri nombrini. w20.06 3 párr. 5-7

Úpiringachi xáni uandanhiani jarhani problemecha jimbo engachi no úpiringa máteru ambe eratseni. Úpiringachi uandanhiani jimbokachi no jatsiska sentabu para ima ambe engachi uétarhinchajka, ochi pʼamenchani ka nóchi úni ánchikuarhini o astachi ánchikuarhitani tsïtani. Ístuchi úpiringa uandanhiani no úni orhepani uérakuni tsʼéjkukuani ma enga uáka eskachi no kurhajchaaka Jeobani. Ka ístuchi jamberi uandanhiajka ambechi uá jiáni enga Noambakiti úraaka kʼuiripuni para no sési kámani Tata Diosïri iretani. Jamberichi kurhamarhikuarhijka: “¿No sési jarhaski ini ambe jimbo uandanhiani?”. Jesusi arhiaspti imeri chúxapatichani: “Asï jáma je jaakuarhini [o uadanhiani]” (Mat. 6:25). ¿Arhikuekaxapi eskachi no sáni jatsiska para uandanhiani? Nómbe. Máru ióntki anapu Jeobaeri marhuarichaksï niáraspti uandanhiani, joperu Jeoba seguirispti jaiapanheantani (1 Rey. 19:4). Sánderu sési, Jesusijtsïni sési pʼikuastantaxapti parakaksï problemecha no úpiringa eskachi nóteru uékapiringa sési marhuakuni Tata Diosïni. w21.01 3 párr. 4, 5

Acheeti jatsisti para Jeobani ka Jesusini kuenta íntskuntani seguni na enga káuaka témbani ka uájpechani (1 Ped. 3:7). Jeoba jindeesti enga orhejtsïkujka imeri familiani auandarhu ka Echerirhu, jimbosï újti uandani na engaksï jatsika para jámani imeri uájpecha ka úni eskaksï kurhajchaaka (Is. 33:22). Jesusi jindeesti enga orhejtsïkujka kúnguarhikuani, jimbosï imajtu újti uandani ambe enga jatsika para úkuarhini ka eska ísï úkuarhiaka (Gal. 6:2; Kol. 1:18-20, TNM). Májkueni eska Jeoba ka Jesusi, kristianu ma enga orhejtsïkujka imeri familiani, jatsisti juramukua para erakuni ambe enga úkuarhiaka imeri familiarhu (Rom. 7:2; Efes. 6:4). Joperu no iámu juramukua jatsisti. Ambe enga ima uandaaka eska úkuarhiaka jatsisti para Bibliarhu jupindaskuarhini (Prov. 3:5, 6). Ístu, familieri orhejtsïkuti ma no jatsisti juramukua para uandani ambe uá nema enga no imeri familiarhu anapueuaka (Rom. 14:4). Ka ístu engaksï imeri sapiicha tʼarhexejkia ka támuksï irekuarhinia, seguirisïndiksï janhanharhini joperuksï nóteru imeri juramukua jimbo jarhasïndia (Mat. 19:5). w21.02 2, 3 párr. 3-5

Ma ambe enga kánikua jukaparhakueka eska uáka familieri orhejtsïkuti ma para xarhatani eska xénchasïnga imeri familiani, jindeesti eska kéndauaka. Joperu jatsisti para méntkisï miáni eska ambe enga sánderu jukaparhakueka, jindeeska jarhuatani imeri familia parakaksï ambakiti pájperakua ma jatsiaka Jeobani jingoni (Mat. 5:3, TNM). Enga Jesusi cháparhakata japkia, ima útasï uandanhiaxapti imeri amamba Maria jimbo. Ka nájkiruka xáni kómu nitamakuarhini japka, kurhakuspti apostoli Juanuni eska kuidaripiringa amambani (Juanu 19:26, 27). Familieri orhejtsïkutichajtuksï úpirindi uánikua ambe jatsini para úni enga jukaparhakua ambeeka. Jatsistiksï para sési ánchikuarhini paraka imecheri jángua jimbo kʼéri ambe arhinhaaka Jeoba (Efes. 6:5, 6; Titu 2:9, 10). Ístuksï úpirindi uánikua ambe úkua jatsini kúnguarhikuarhu, komu kuidariuani ka uinhaperaantani erachichani ka orhekupaani aianhpikuarhu. Joperu, ístu imasï jatsiti para méntku jorhendaani jarhani témba ka uájpechani Bibliaeri ambe. Ísï úparini, imecheri familiechaksï kánikua jukaparharaati jimbokaksï no ma ambe kueratanchaaka, sésiksï pʼikuarheraati ka sésiksï jauati Tata Diosï jingoni (Efes. 5:28, 29; 6:4). w21.01 12 párr. 15; 13 párr. 17

Tata Diosïri Karakata uandasïndi ambe enga újka úni uarhiiti jánhasti ma, úsïndi exeni ambe enga uétarhijka kʼumanchikuarhu, piáni ka atarantani echerichani ka negosiu ambe úni (Prov. 31:15, 16, 18). No jántspiri máesti enga no uáka uandani ambesï eratsejki. Sánderu sési, uámba mintsinharhisïndi ka kuenta úsïndi ambe enga témba uandajka (Prov. 31:11, 26). Enga acheeti ma ísï janhanharhiska témbani, ima tsípikua jingoni kurhajchaati. Nájkiruka Jesusi xáni uánikua ambe úkia, no ísï pʼikuarherasïndi eska menusi úsïnga enga janhanharhijka Jeobaeri juramukuani (Juanu 6:38; 1 Kor. 15:28). Májkueni, uarhiiti ma enga jánhastiika ka enga májkueni újka eska Jesusi, no ísï pʼikuarherasïndi eska menusisïnga enga kurhajchajka uámbani. Jarhuatasïndi uámbani jimboka xénchasïnga, joperu sánderu jukaparhakua ambe, jimboka xénchasïnga ka janhanharhisïnga Jeobani. Pirenchi ma no kurhajchaati uámbani enga ima kurhakuska ambe ma enga Biblia no jaiapanhentajka. w21.02 11 párr. 14, 15; 12 párr. 19

Xénchani Tata Diosïni, méntkisï jarhuatasti Jeobaeri marhuarichani paraksï tekaantani engaksï no sési kánhajka. Por ejemplu, engaksï Judá anapu juesicha juramukuapka apostulichani eskaksï nóteru aianhpipiringia, inde uékperakua engaksï Tata Diosïni jimbo pʼikuarherenga jarhuataaspti paraksï sánderu janhanharhini Tata Diosïni ka eska kʼuiripuechani (Uku. 5:29; 1 Juanu 5:3). Inde mismu uékperakua engaksï juchari erachicha pʼikuarherajka Tata Jeobani jimbo, jarhuataxati paraksï no jurajkuni nájkirukaksï no sési kaani jaka juramuticha engaksï kánikua uinhapikua jatsika. Engajtsïni parhakpini anapuecha kurhunhijka nóchi chkétakuarhitini pʼikuarherasïnga, sinochi tsípisïnga (Uku. 5:41; Rom. 5:4, 5). Ambe enga sánderu úkua jukaka para úni tekaantani, jindeesti engajtsïni juchari familiarhu anapuecha no sési kámajka. Engaksï mítejka eskachi uékasïnga sánderu míteni Jeobaeri ambe, máru parientichaksï úpirindi ísï exeni eskachi támisï jánhastanhaxaka o eskachi loku úkuarhixakaia (terukutanta je Markusʌ 3:21 jingoni). Úpirindijtsïni asta atani uékani, joperu ju je no jurajkuni eskajtsïni inde ambe ísku pakataaka, jimboka Jesusi uandaspka eska “kʼuiripuecheri ikiatspiticha jindeatiksï mismu imeri kʼumanchikuarhu anapuecha” (Mat. 10:36). w21.03 21 párr. 6, 7

Engachi niuaka pámbetani nemani enga Bibliaeri ambe jorhentpiaka ju je kánikua jingontku kurhajchani jarhani jorhentpirini ka ístu jorhenguarhirini. Ísïchi uáka listu jarhani para jarhuajpeni enga uétarhiaka. Ísïsti, nóchi jatsiska para kánikua uandani, ójkutani jorhentpirini enga ima jorhendani jauaka, ochi máteru amberi uandani jarhani. Joperu uákachi uandani máru ambe, ejemplu ma úrani o kurhamarhikua ma paraka jorhenguarhiri sési kurhanguaka ambe enga jorhenguarhini jauaka. Ménisïchi úpiringa eratseni eskachi no kánikua jarhuajpexaka, joperu engachi felisitariska jorhenguarhirini ka engachi xarhataska eskachi uékasïnga jarhuatani, jarhuatanchi jauaka paraka niáraaka marhuakuni Jeobani. Engachi sési exeaka, uákachi sáni uandontskuarhekuni jorhenguarhirini nénachi jorhenguarhiski jucha jurhimbikuani, nénachi úski orhepani uérakuani uandanhiatechani o na engajtsïni Jeoba jarhuataka juchari irekuarhu (Sal. 78:4, 7). Jamberi i ambesï uétarhinchani jati kurhaani jorhenguarhiri ka úpirindi eska sánderu mintsikaaka Tata Diosïni o jarhuatani para úni imani ambe enga uétarhijka para itsï atakuarhini. w21.03 10 párr. 9, 10

¿Né jatsiski para kʼéri ambe arhinhani engajtsïni sési nichejka aianhpikuarhu? Ambe enga Pablu karapka Korintu anapu kúnguarhikueri ambe, mókuntasïndi ini kurhamarhikuani: “Jí ikaraska ka Apolusï itsï jatsikusti, kʼóru Diósïni jimbosï újti ambe kʼéni. Jimajkani Diósïjkusï kʼériti enga k’uiriperpejka, ikarati ka itsï jatsikuti nóksï úsïndi kʼuiriperpeni, ka nóksï ambemesti” (1 Kor. 3:6, 7, TDU). Méni engajtsïni sési nicheaka aianhpikuarhu, jatsiskachi para Jeobani kʼéri ambe arhini májkueni eska na úpka Pablu. ¿Nénachi uá xarhatani eskachi jukaparharasïnga kʼéri kóntperatani engachi újka májku kʼéri ánchikuarhini Jeoba, Jesusi ka ánjelicha jingoni? (2 Kor. 6:1). Jánguarhintaparini iámindu kʼuiripuechani aianguani ambakiti aianhperakueri ambe. Nóchi solu jatsiska para ma xanharijku uandontskuarhekuani kʼuiripuechani Reinueri ambe, sino someni pʼorhembiantani. Enga kʼuiripu ma tsitijka Bibliaeri ambe, jánguarhintasïngachi paraka ima uékaaka sánderu ambe jorhenguarhini ka uénani Bibliaeri jorhenguarhikua ma. Enga Bibliaeri jorhenguarhiri ma sánhani arhijka Jesusiri chúxapati úkuarhini, kánikuachi tsípisïnga engachi exejka na enga Jeoba jarhuatani jaka mójtakuni imeri eratsekuani ka mintsitani. w20.05 30 párr. 14, 16-18