Oktubri

Engachi niárajka sési míteni Jesúsini, ístuchi niárasïnga májkueni eratseni ka jámani eska ima. Ka engachi jánguarhintaska sánderu sési míteni ka májkueni eratseni eska ima, sánderuchi ambakiti pájperakua ma jatsiaka imani jingoni. ¿Nénachi uá májkueni jámani eska ima? Ju je exeni ejemplu ma. Para ima sánderu jukaparhakuespti máteruechani jarhuataani ka eska imani ambe úni enga ima tsitienga (Mat. 20:28; Rom. 15:1-3). Ka jimboka ísï eratsenga, orheta peerasïrendi máteruecheri ambe ka puákuantaani. No sóntku ikiasïrendi engaksï máteruecha no sési ambe uandenga imeri ambe (Juanu 1:46, 47). Ka no méntku miáni jarhasïrendi ambe ma enga nema no sési úpiringa (1 Tim. 1:12-14). Kánikua jukaparhakuesti májkueni úni eska ima, jimboka uandaspka: “Ka ini jimboksï míteati iámindu kʼuiripuecha eskajtsï jindeska juchiti jorhenguarhiticha engajtsï uékperaaka máteru ka máteruni jingoni” (Juanu 13:35). Ísï jimbo, ju je kurhamarhikuarheni: “¿Jánguarhintasïni na engani xáni uáka parani sési pájperani erachicha jingoni májkueni eska Jesusi na úpka?”. w20.04 24 párr. 11

Nájkirukachi ini parhakpinirhu jaka nani engaksï kʼuiripuecha no sési jásï ambe uandajka Jeobaeri nombriri ambe, juchachi uáka kuájpini ambe enga jurhimbitkueka: eska Jeoba pímbinhasïtiska, jurhimbitini, ambakitini ka uékpitini. Uákachi xarhatani eskachi uékasïnga eskajtsïni ima Juramuchiaka ka aianguani kʼuiripuechani eska imajkusï jurhimbikua jingoni juramujka ka eska imajkusï uáka eskachi tsípikua ka pínandikua jingoni irekaaka (Sal. 37:9, 37; 146:5, 6, 10). Engachi jorhentpijka Bibliaeri ambe, méntkisïchi uandasïnga eska Jeobajkusï újka sési juramuni. Ka ísïsti, Jeobajkusï jatsiti para juramukuni iámindu ambe enga xáni kueraakata jaka. Ka nájkiruka jukaparhakueka eskachi jorhentpiaka ambe enga Tata Diosï juramujka, ambe engachi sánderu uéjka jindesti jarhuataani kʼuiripuechani paraksï xénchani ka no jurajkuni juchari Tátini. Jimbochisï jatsika para xarhatani na enga jásïka Jeoba ka ambe enga xáni arhikuekajka imeri nombri (Is. 63:7). Engachi ísï úska, kʼuiripuechaksï xénchaati Jeobani ka kurhajchaatiksï jimbokaksï no méni uékaaka jurajkuni. w20.06 6 párr. 16; 7 párr. 19

Kʼuiripuecheri kamatsïta kánikua sési úkata jarhasti. Engachi juchari nándiri matrisirhu japka, juchari kamatsïta sánhani arhispti úkuarhini ísï eska Jeoba na uaxastakata jatsikia. ¡Ka mándani minutu, uánikua selulechaksï úkuarhixapti juchari kamatsïtarhu! Sientifikuechaksï uandasïndi eska kamatsïta kʼuiripu kʼériri ma jimbo, sáno 100,000 miioni neuronechaksï jarhaska, i járhati selulechaksï solu éjpurhuksï jarhasïndi enga solu 1,5 kilu (3,3 libras) kʼuetsapeka. Ma ambe enga juchari kamatsïta újka parachi ma uandakuajku uandani, juchari kamatsïta jatsisïndi para ma sieni muskuluechani manataani juchari katambarhu, gargantarhu, penchumikuarhu, kʼenchemekuarhu ka kʼénhekuarhu. Iámindu i muskuluechaksï no májku kʼéri manakuarhisïndi parakaksï uandakuecha uáka kurhangukuarhini. Uéxurhini 2019 jimbo uéraspti karakata ma enga xarhatajka eskaksï charhakuecha engaksï apenasi andajpenujka, úsïngaksïa jorhenguarhiani uandakuechani. I ambe terukuntasïndi imani ambe jingoni engaksï uánikua sientifikuecha uandajka: eskachi ísï andajpenusïnga parachi úni míteantani ka jorhenguarhiani idiomechani. Ísïsti, Tata Diosïri intsïmperakua máesti engachi újka uandani. w20.05 22, 23 párr. 8, 9

Abraani erakuspti jurajkuni iámindu ambakiti ambe enga Uri japka. ¿Andi? Jimboka erokuarhixapka imani iretani enga sési uaxastakata jaka (Ebr. 11:8-10, 16). Ireta enga Abraani erokuarhini japka, jindesti Tata Diosïri Reinu nani enga tata Jesukristu ka 144,000 erakukatechaksï juramuaka. Pablu arhisïndi ini Reinuni, ireta “enga Diosïrika enga tsípitika, ka enga jindeka ireta Jerusaleni auandarhu anapu” (Ebr. 12:22; Jaŋ. 5:8-10; 14:1). Jesusi jorhendaaspti imeri chúxapatichani paraksï kurhajkuarhini eska janopiringa Reinu paraka úkuarhipiringa ambe enga Tata Diosï uéjka “ixú parhakpinirhu májkueni jásï eska na úkuarhijka auandarhu” (Mat. 6:10). Abraani no sési mítespti néna úkata japirini Tata Diosïri Reinu. Uánikua uéxurhinicha jimbo jindespti ambe ma enga Tata Diosï no nemani aiangupka (Efes. 1:8-10; Kol. 1:26, 27). Peru ambe enga kʼóru Abraani mítepka, jindespti eskaksï máru imeri uájpecha niárapiringa reini, jimboka Jeoba ísï aiakuspka (Gén. 17:1, 2, 6). w20.08 2, 3 párr. 2-4

Jarhasti ambe ma engachi no jatsika para jiókuarhini: ambe engaksï apostatecha uandajka. Desde jiáni enga uénaka jarhani kúnguarhikua, Noambakiti uánikua kʼuiripuechani úraasïndi para úni eskaksï Jeobaeri ambakiti marhuaricha no seguru jauaka ambe engaksï jakajkujka. Ísï jimbo, jatsiskachi para sési míteni ambe jurhimbikua ambeski ka ambe chkuanderakua ambeski. Juchari ikiatspitichaksï uáti úrani Internetini ka redesi sosialichani paraksï úni eskachi nóteru mintsita jingoni mintsikaakia Jeobani ni xénchaani erachichani. Ju je no jakajkuni inde chkuanderakua ambe jimbokaksï Noambakitiriska (1 Juanu 4:1, 6; Jaŋ. 12:9). Engachi uéjka orhepani uérakuani Noambakitiri tsʼéjkukuechani, jatsiskachi para sánderu mintsikani Jesusini ka ambe enga úni jaka paraka úkuarhiaka ambe enga Tata Diosï uéjka. Ístuchi jatsiska para mintsikani jántspirini enga mintsinharhikueka ka jánhastini enga Jeoba úrani jaka para imeri kúnguarhikuani orhejtsïkuni (Mat. 24:45-47). Engachi méntkisï arhintaaka Tata Diosïri Karakatani, niáraakachi sánderu mintsikani indeni ambe ka juchari jakajkukua sánderu ísïuati eska anhatapu ma enga iauani inchaskuajka imeri sïranguechani. Pablu ini ambe uandaspti enga karapka ambe enga uandajka iásï anapu textuni. w20.07 23, 24 párr. 11, 12

Jimbokachi kʼamanharhintstiska, sóntkuchi eratsesïnga ambe ma máteruecheri ambe imani ambe jimbo engachi exejka (Juanu 7:24). Peru nóchi uáka uánikua ambe míteni ma kʼuiripueri ambe imani ambe jimbojku engachi exejka. Por ejemplu, na uéjki xáni jánhaskatini ka mítekuni doktori ma, enga solu exeska kʼuiripuni ma, no uáti sési míteni ambe enga pʼamenchani jaka. Jatsisti para jingontku kurhajchani kʼuiripuni para úni míteni ambesï pʼamenchajki, na jásï kʼuiripu máeski o néna pʼikuarherasïni. Jamberi arhiati imani kʼuiripuni eska niuaka radiografia ma pʼitakuarhini para exeni néna jarhaski imeri kuerpu. Enga doktori no úska iámindu ini ambe, no uáti sési aianguni kʼuiripuni ambe enga pʼamenchani jaka. Májkueni, nóchi uáka sési kurhangukuani juchari erachichani ka pirenchichani engachi solu exeaska na engaksï xarharajka. Ka nóchi méni uáka exeni ambe enga mintsitarhu jarhajka. Peruchi uáka jánguarhintani májkueni úni eska Jeoba. Ima kurhaasïndi ambe engaksï imeri marhuaricha arhijka; exesïndi ambe engaksï imecha ióntki nitamakuarhika ka ambe engaksï iásï nitamakuarhini jaka ka pʼamojperakua xarhatakuasïndi. w20.04 14, 15 párr. 1-3

Jatsiskachi para kaxumbitini, jimboka imecha engaksï kʼéramakuarhijka nóksï sési eratsentasïnga ambe ma. Úsïndiksï eska arhijperata ambe jauaka ka nóksï pendienti páni máteruecha jimbo. Ístu sáno méntkisï, no sésiksï nitamakuarhisïndi ka ístuksï no sési úkuasïndi máteruechani ima ambe jimbo engaksï eratsejka ka úni. Engaksï no mójtakuaka na engaksï eratsejka, Noambakiti uáti eska imecheri eratsekua ambenarhikuarhiaka ka tsïjpini (2 Kor. 4:4; 11:3). Peru kʼuiripuecha engaksï kaxumbitika, sésiksï eratsentasïndi ambe ma. Nóksï kʼéri ambe exekuarhisïndi sino ísï eska na jindeka, ka kurhangusïndiksï eskaksï máteruecha sánderu kʼéri ambeska uánikua ambe jimbo (Filip. 2:3). Ístuksï mítesti eska Tata Diosï “no jiókuarhiasïnga imechani engaksï teparakuarhijka, peru imechani engaksï kaxumbitika kóndiantasïndi” (1 Ped. 5:5). Imecha engaksï sési eratsentajka iámu ambe jimbo, jánguarhintasïndiksï para Tata Diosï jiókuarhiani. Engachi uéjka méntkisï kaxumbitini, jatsiskachi para úni ambe enga Biblia uandajka: “Nóterujtsï ísï jámaakia eskajtsï ióntki na jámempka, iásïjtsï ménderueni jáxentaskia”. Para ísï úni, jatsiskachi para jorhenguarhini Jesusiri ejempluni ka eskachi jánguarhintaaka ísï úni eska ima (Kol. 3:9, 10, TDU; 1 Ped. 2:21). w20.07 7 párr. 16, 17

Kʼéri kóntperata máesti Jeobaeri kúnguarhikuarhu jarhani. Tsípikua jingonchi marhuakusïnga Jeobani juchari erachicha ka pirenchicha jingoni. Peru, ¿náki ánchikuarhitachi úsïni kúnguarhikuarhu mándani arhini? Apostuli Pablu uandaspti eska kúnguarhikua ísïska komueska kʼuiripueri kuerpu ka eska kúnguarhikuarhu anapuechaksï ísïska komueska kuerpueri particha (Rom. 12:4-8; 1 Kor. 12:12-27; Efes. 4:16). Ambe engachi orheta jorhenguarhijka i ejemplueri enga Pablu úrapka, jindesti eskachi mándani arhini jukaparhakueska Jeobaeri familiarhu. Enga Pablu imani ejempluni úrapka, uandaspti: “Juchari kuerpu jukaasti jájkichani ka jantsirichani ka éskuechani ka mámaru ambe, peru no iámindu kuerpurhu anapu ambe májku ambe úsïndi. Ka ístu jucha nájkirukachi uánikueka, májku kuerpueskachi Kristuni jingoni, ka májku úkuarhintstixakachi máteru ka máteruni jingoni” (Rom. 12:4, 5). Ambe enga Pablu arhikuekani japka, jindesti eskachi no iáminduecha májku ánchikuarhita úsïnga kúnguarhikuarhu, peruchi iáminduecha jukaparhakueska. w20.08 20 párr. 1, 2; 21 párr. 4

¿Nénaksï uá táticha kaxumbikua xarhatani ísï eska Jeoba? Na engaksï jatini imecha exeaka eska sési jauaka, uátiksï kurhamarhiani sapiichani nénaksï exesïni eska uétarhisïnga úni ambe ma. Ka engaksï táticha exeaka eska uáka ísï úkuarhini eskaksï sapiicha na uandajka, uátiksï ísï úni. Ístu, Jeoba tekaantskua xarhatakuasïndi imeri marhuarichani engaksï kurhamarhijka andisï eratsejki úni ambe ma. Ju je miáni na enga kurhajchapka Abraanini jiáni enga kurhamarhipka Jeobani andisï uékeni kʼamajkuni Sodomani ka Gomorrani (Gén. 18:22-33). Ka ju je miáni ambe enga úpka Jeoba jiáni enga Sara, Abraaniri témba, terekuarhipka enga kurhaapka eska sapi ma kánguarhipiringa nájkiruka kánikua jatiripkia. Jeoba no no sési pʼikuarheraspti indeni ambe jimbo ni ikiapi, sánderu sési, janhanharhikua jingoni kámaspti Sarani (Gén. 18:10-14). Engajtsï táti máeka o orhejtsïkuti ma, ¿ambejtsï uá jorhenguarhini Jeobaeri ejemplueri ambe? Eratsi je ambejtsï úsïni engaksïni nema kurhamarhijka andijtsïsï ísï úni jaki ambe ma. ¿Jirejiresïjtsï uandasïni eska sési jarhaska ambe engajtsï erakuka úni? ¿Ojtsï jánguarhintasïni kurhangukuni? Xarharasïndi eska kánikua marhuakuasïnga familiechani ka kúnguarhikuechani engaksï imecha engaksï juramukua jatsika májkueni újka eska Jeoba. w20.08 10 párr. 7-9

Engachi uénapka Bibliaeri ambe jorhenguarhini, jamberichi tsípikua jingoni uékenga eskajtsïni máteruecha jarhuatapiringa, jimbokachi mítespka eskachi uánikua ambe kueratanchaxapka para jorhenguarhini Tata Diosïri ambe (1 Kor. 3:1, 2). ¿Ka iásïa? Engachi ióni páni jakaia Jeobani marhuakuni ka uánikua ambechi mítenia, jamberichi nóteru xáni uéjkia eskajtsïni máteruecha jarhuataaka, ka sánderu engajtsïni ima uékaaka jarhuatani enga nótki xáni ióni páni jaka kúnguarhikuarhu. Peru Jeoba someni úraasïndi erachichani ka pirenchichani parajtsïni uinhaperantani (Rom. 1:11, 12). Engachi uéjka eskajtsïni Jeoba íntskuaka imeri uinhapikua, jatsiskachi para jurajkuni eskajtsïni erachicha ka pirenchicha jarhuataaka. Para nema úni ambakiti ambe úni, jatsisti para kaxumbitini ka mintsikani Jeobani ka no májku mintsinharhikuarhini o imani ambe enga ma míteka, ni jatsikuarhekua ambe o máteru ambe. Ísï jimbo, ju je mintsikani Jeobani, jorhenguarhini imani kʼuiripuecheri ambe enga Biblia uandaajka ka jiókuarhini eskajtsïni erachicha jarhuataaka. Jiájkani, nájkirukachi ísï pʼikuarheraaka enajkichi no uá úni ambe ma, Jeobajtsïni íntskuati uinhapikua. w20.07 14 párr. 2; 19 párr. 18, 19

Engachi aianguajka Tata Diosïri ambe juchari familiarichani, jamberichi úpiringa úkua jukanchani tekaantskua xarhatani. Eclesiastés 3:1, 7 jimbo, exentasïngachi konseju ma engajtsïni uáka jarhuatani. Jimini arhisïndi: “Jarhasti [...] tiempu ma para pínasku pakarani ka tiempu ma para uandani”. Nájkirukachi juchari ambakiti jángua jingoni aianhpijka ambakiti ambe, méntkisïchi jingontku jarhasïnga parachi exeni na jatinchi uá uandantani jurhimbikueri ambe (1 Ped. 3:1, 2). Tsípikua jingonchi aianhpisïnga ka jorhentpini, peruchi tekaantstiska iámindu kʼuiripuecha jingoni, asta juchari familia jingoni. Jarhastiksï ambakiti ejempluecha ióntki anapu Tata Diosïri marhuaricheri engaksï xarhatapka tekaantskua ka ístu ini jurhiatikuecha jimbo. Abakuki uékaxaptia eska nóteru japiringa no sési jásï ambe, peru Tata Diosïni mintsikaparini uandaspti: “Anhandetini jauaka jima engani kuárini jauaka” (Hab. 2:1). Apostuli Pablu uandaspti eska tsípikua jingoni uékasïrenguia kʼamarani aianhpikuani. Peru tekaantskua jingoni útasï aianhpixapti ambakiti aianhperakuani (Uku. 20:24). w20.09 11, 12 párr. 12-14

Nájkiruka Jesusi, Jeobaeri Uájpeka ka kánikua uinhapitini, no méni kʼéri ambe exekuarhisïndi. Engachi Jeobaeri marhuaricha májkueni kaxumbitijka eska Jesusi, xarhatasïngachi eska Tata Diosïri ireta uékperasïnga (Luk. 9:48; Juanu 13:35). ¿Ambechi jatsipirini para úni engachi ísï exeni jaka enajki uandanhiata ambe jaki kúnguarhikuarhu ka ísïchi exeni enajki no sési úkuarhini jaki ambe ma? Ju je no uandauandamini, sánderu sési, kaxumbitini ka kurhajchaani imechani engajtsïni orhejtsïkujka (Ebr. 13:17). ¿Nénachi uá ísï úni? Ju je kurhamarhikuarhini: “¿Xánksï kʼéri ambeski uandanhiatecha engani exeajka? Enga uétarhini jaka sési péntani ambe ma, ¿uétarhisïni iáiasï sési peentani? ¿Jíski engani jatsika para sési peentani? Parani mátirku uandani, ¿ambesïni uéjki ji: eska iámu kúnguarhikua májku kʼéri jauaka o eskani ji kʼéri ambe exenhaaka?”. Jeoba sánderu jukaparharasïndi kaxumbikuani ka eska jorhenani úni ambe ma ka márku jarhani ka eska sóntku úni ambe ma. Ísï jimbo, ju je jánguarhintani kaxumbikua jingoni marhuakuni Jeobani. Ísïchi jarhuajpiaka paraka kúnguarhikua májku kʼéri jauaka (Efes. 4:2, 3). w20.07 4, 5 párr. 9-11

Jesusi jukaparharaasïrendi imani pirenchichani engaksï jarhuatenga “imecheri jatsikuarhekua ambe jimbo” (Luk. 8:1-3). Ka ambakiti ambe aianguaspti enga Tata Diosïri Karakata uandenga. Por ejemplu, aianguaspti eska uarhipiringa ka eska tsíntapiringa (Luk. 24:5-8). Ísï eska na úpka imeri apostulicha jingoni, jorhendaaspti pirenchichani nénaksï úpirini orhepani uérani jiáni engaksï no sési kámapiringa imani ka uándikunksï (Mar. 9:30-32; 10:32-34). Ka jarhasti ambe ma enga kánikua jukaparhakueka, jiáni engaksï Jesusini jupikapka ka apostulicha sïpakuarhini, máru pirenchichaksï no jurajkuspti Jesusini enga uarhini japkia chkarirhu (Mat. 26:56; Mar. 15:40, 41). Ka imecha engaksï exepka eska Jesusi tsíntaspkia, pirenchichesptiksï. Jesusi arhiaspti eskaksï aianguapiringa apostulichani eska ima tsíntaspkia (Mat. 28:5, 9, 10). Ka Pentekostesi uéxurhini 33 jimbo, jiáni engaksï kristianuecha espiritu santu intsïnhapka, jamberiksï japti nanakechaka ka iámindu imeecha engaksï jima japka intsïnhaptiksï sésikua paraksï uandantani “kʼéri ambe enga Diosï úka” mámaru jásï idiomecha jimbo (Uku. 1:14; 2:2-4, 11). w20.09 23 párr. 11, 12

I ánchikuarhita para jarhuataani kʼuiripuechani paraksï Jesusiri chúxapatini, uáti eskaksï pʼímutantskata uéraaka. ¿Andichisï ísï uandajki? Ju je miáni ambe enga Jesusi juramupka ixú Mateu 28:19, 20 TNM jimbo, ni je, jarhuataa je kʼuiripuechani parakaksï niáraaka juchiti chúxapatini ka itsï ataa je. Ka míteskachi eska itsï atakuarhini kánikua jukaparhakueska parachi úni pʼímutantskata uérani. Kʼuiripu ma enga uéjka itsï atakuarhini, jatsisti para jakajkuni eska solu ísï uáka pʼímutantskata uérani enga jakajkuska eska Jesusi uarhiska juchantsïni jimbo ka eska tsítanhantaska. Jimbosï apostuli Pedru arhiapti kristianuechani eskajtsïni “bautismu [...] pʼímutantasïnga jimboka Kristu tsíntaska uarhiricharhu” (1 Ped. 3:21). Ísï jimbo, enga nema niárajka itsï atakuarhini ambakiti erokuarhikua ma jatsisïndi, irekani para méntkisï. Para Jesusiri chúxapatichani uáni, jatsiskachi para “sési jorhentpini” (2 Tim. 4: 1, 2). ¿Andi? Jimbokajtsïni Jesusi juramuchiska ni je, jarhuataa je kʼuiripuechani parakaksï niáraaka juchiti chúxapatini ka jorhendaa je. Apostuli Pablu arhispti Timoteuni eska seguiripiringa jánguarhintani ini ánchikuarhitani jimbo ka arhispti: “Jiájkandi pʼímutantskurheaka ka imechanturi pʼímutantauaka engaksïni kurhajchaaka”. w20.10 14 párr. 1, 2

Pedru enga Jesusiri chúxapatipka, niáraspti kánikua tsitini Tata Diosïri ambe aianhpini ka Jeoba jarhuataspti paraka sési úpiringa ini ánchikuarhitani (Uku. 2:14, 41). Juchachi aianhpisïnga jimbokachi xénchasïnga Jeobani. I uékperakuajtsïni jarhuataati engachi ísï pʼikuarherajka enajkichi no uá Tata Diosïri ambe aianhpini. Enga Jesusi pʼímarhipka Pedruni para aianhpiri máeni, arhispti: “Asï jáma chéni” (Luk. 5:8-11). Jesusi no ísï arhispti Pedruni jimboka ima chéni japiringa eska no sési ambe úkuarhipiringa enga imeri chúxapatipiringa. Sino jimboka Jesusi, milagru ma jimbo úspka eskaksï imecha uánikua kuruchechani pʼitamaapiringa. Jimbosï Pedru ísku pakarapti ka eratseni eska no jukanchaspka Jesusi jingoni ánchikuarhini. ¿Ka cháia? ¿Ískujtsï pakarasïni engajtsï eratsejka ambe enga xáni arhikuekajka Kristueri chúxapatini? Enga ísïka, jánguarhinta je sánderu xénchani Jeobani, Jesusini ka kʼuiripuechani. Inde ambeksïni jarhuataati parajtsï jiókuarhini Jesusiri pʼímarperakuani para aianhpini Tata Diosïri ambe (Mat. 22:37, 39; Juanu 14:15). w20.09 3 párr. 4, 5

Tsípikua jingonchi úrasïnga juchari tiempu, uinhapikua ka ambe engachi jatsikuarheka parachi exeantani ‘imechani engaksï tsípikua jingoni xarhatajka eskaksï uékasïnga irekani para méntkisï’ (Uku. 13:48, TNM). Engachi ísï úska, májkuenchi úni jauaka eska Jesusi enga uandapka: “Juchiti tʼirekua jindesti eskani uáka ambe enga jaiapanhentajka ima engarini axaka, ka eskani kʼamaraaka úni imeri úkuani” (Juanu 4:34; 17:4). Juchajtuchi iámu mintsita jingoni uékasïnga kʼamarani ini ánchikuarhitani engachi intsïnhaka (Juanu 20:21). Ka uékasïngachi eskaksï iámindu juchari erachicha asta imecha engaksï jarharika kúnguarhikuani, seguirini jauaka ánchikuarhini juchantsïni jingoni asta kʼamarhukuni jamberi (Mat. 24:13). Ju je no mirikurhini eska úkua jukaska úni ambe engajtsïni Jesusi juramuchika. Joperuchi no jandiajku jarhaska, jimbokajtsïni ima aiachiska eska juchantsïni jingoni jauaka. Engachi Jesusiri chúxapatichani uájka, niárasïngachi jindeeni Tata “Diosïri jarhuajpiricha” ka májku kʼérichi jarhasïnga Jesusini jingoni (1 Kor. 3:9; 2 Kor. 2:17, TNM). Ísï jimbo, uákachi ísï úni. Kʼéri tsípikuarhita ka kʼéri kóntperata máesti úni juchari ánchikuarhitani ka jarhuataani máteruechani paraksï májkueni úni (2 Kor. 4:7). w20.11 7 párr. 19, 20

Sáno méntkisï, ambe engaksï táticha erakujka úni, úsïndi sési úkuani o no sési úkuani imecheri sapiichani ióni jamberi. Engaksï no sési erakuska úni ambe ma, uáti eskaksï uájpecha uandanhiatechani jatsiauaka, joperu engaksï sési erakuska úni ambe ma, jarhuatauatiksï paraksï tsípikua jingoni irekani. Joperuksï uájpechajtu jatsisti para sési erakuni úni ambe ma. Ambe enga sánderu sési jaka eskachi uáka, jindesti marhuakuni juchari Táti auandarhu anapuni enga xáni xénchpitika, Jeobani (Sal. 73:28). Jesusiri táti jémbechaksï uékasïrendi jarhuataani uájpechani paraksï marhuakuni Jeobani, ka ambe engaksï erakupka úni xarhataspti eska inde jindespka ambe engaksï sánderu jukaparharenga imecheri irekuarhu (Luk. 2:40, 41, 52). Ístu Jesusi sési erakuspti úni ambe ma enga jarhuatapka para imani ambe úni enga Jeoba uékenga (Mat. 4:1-10). Jesusi niáraspti ambakiti kʼuiripu máeni enga no méni jurajkupka Jeobani ka enga balori jukapka, náki uéjki táti ma enga xénchajka Jeobani sési pʼikuarherapirindi ka tsípipirindi xásï uájpani ma kámani. w20.10 26 párr. 1, 2

Ju je eratseantani arhini tanimu ejempluechani. Pirenchi ma enga jatirikia eratsentasïndi ambakiti ambe enga ióntki nitamakuarhipka. Joperu iásï sánderu úkua jukastia imeri irekua, peru ima jánguarhintaxati marhuakuni Jeobani na enga xáni uáka (1 Kor. 15:58). Pauani pauani eratsentasïndi na enga jindeuaka irekani Paraisurhu imecha jingoni enga ima xáni xénchaajka. Máteru pirenchi miántasïndi eska ma xanhari pirenchi ma kúnguarhikuarhu no sési pʼikuastaska, peru i pirenchi no jatanhekusti (Kol. 3:13). Ka erachi ma no mirikurhisïndi no sési jásï ambe enga ióntki úpka, peru iásï jánguarhintasïndia para no jurajkuni Jeobani (Sal. 51:10). ¿Nénaksï sáno májkueni nitamakuarhiski i tanimu erachicha? Eskaksï no mirikurhisïnga ambe engaksï nitamakuarhika, peruksï no méntku indeni ambejku miáni jarhasïndi. Sánderu sési, orhepanisïksï eraasïndi o ambe enga sánderu orhepani úkuarhiaka. ¿Andisï xáni jukaparhakue? Jimboka, májkueni eska kʼuiripu ma na no uáka jurhimbitku xanharani enga méntku tátsepanisï eraani jauaka, juchajtuchi no uáka sési marhuakuni Jeobani engachi méntku imani ambe eratseni jauaka enga ióntki úkuarhika (Luk. 9:62). w20.11 24 párr. 1-3

Goliati ísï úspti jimboka sánderu iójtarhaspka ka sési jorhendakata jarhani para uarhipini. Peru Dabidi solu tumbi sapichu máespti enga no jorhenapka uarhipini ni listu jarhani para guerrarhu nirani, peru kʼóru mintsikasïrendi eska Jeoba íntskupiringa uinhapikua. Ka ísï úkuarhispti jimboka úspka uándikuni imeri ikiatspiti Goliatini (1 Sam. 17:41-45, 50). Dabidi niáraspti máteru uandanhiata jatsini enga úpiringa ísï pʼikuastani enajki no úpirini orhepani uérakuni. Dabidi ambakiti jántspiri máespti Sauliri enga Jeoba erakupka para Israeli juramuni. Uénani jámani, Sauli janhanharhisïrendi Dabidini, peru tátsekua kʼéramakuarhispti ka uénani enbidiarini Dabidini. Úndaspti no sési kámani ka asta uékaspti uándikuni (1 Sam. 18:6-9, 29; 19:9-11). Nájkiruka Sauli no sési kámenga, Dabidi méntkisï janhanharhispti, jimboka mítespka eska ima jindespka rei enga Jeoba erakupka (1 Sam. 24:6). Dabidi mintsikaspti eska Jeoba íntskupiringa uinhapikua para tekaantani imani kʼéri tsʼéjkukuani enga jatsipka (Sal. 18:1, ka ambe enga arhijka antesi de Salmo 18 uénakuarhini). w20.07 17 párr. 11-13

Sáno iámindu profesia enga uandajka nortirhu anapu reiri ka surirhu anapu reiri, kumplirikuarhistia, ísï jimbo, uákachi mintsikani eska niáraaka kumplirikuarhini ambe enga kueratani jaka. Parachi úni kurhanguni profesiani enga Daniel kapitulu 11 jimbo jaka, jatsiskachi para miáni jarhani eska imani gobiernuechani ka juramutichantku arhikuekaasïnga engaksï no sési úkujka Jeobaeri iretani. Ka nájkirukaksï Tata Diosïri marhuaricha no xáni uánikueka terukuntapariani iámu parhakpini anapuecha jingoni, ¿andiksïsï juramuticha niárajki no sési úkuani? Jimboka ambe enga sánderu uéjka Satanasi ka iámu imeri parhakpini, jindeska kʼamajkuani imechani engaksï Jeobani ka Jesusini marhuakujka (Gén. 3:15; Jaŋ. 11:7; 12:17). Na engachi kurhangujka Danieliri profesiani, jatsisti para terukuntani máteru profesiecha jingoni engaksï Tata Diosïri Karakatarhu jaka. Parachi úni sési kurhanguni Danieliri profesiani, uétarhisïndi eskachi sési exeaka ambe enga uandajka máteru nani ísï Bibliarhu. w20.05 2 párr. 1, 2

Iásï, kʼuiripuecha mámaru ambe jakajkusïndi ambe enga úkuarhijka enga nema uarhijka. Joperu, ¿ambe jorhentpisïni Biblia? Enga nema uarhijka, imeri kuerpu teresïndi. Joperu Jeoba enga úka unibersuni no ma ambe jimbo, uáti tsítantani imani kʼuiripuni ka ménderu íntskuntani kuerpu ma (Gén. 1:1; 2:7). Apostuli Pablu ejemplu ma úraspti para uandani eska Tata Diosï no imani mismu kuerpu jingoni tsítantaasïnga, sino eska úsïnga íntskuantani kuerpu ma mándani arhini “eska ima na uékaaka”. Ima uandaspti semiieri ma enga jatsinhantajka echerirhu ka jimbanhi planta ma andarani. I planta kánikua ménderueni jáxesïndi ka eska ima sapichitu semiia. Pablu ístu uandaspti eskaksï jarhaska “auandarhu anapu kuerpuecha ka parhakpini anapu kuerpuecha”. ¿Ambe arhikuekaxapi? Eska juchari kuerpu engachi Echerirhu irekaka kʼuiripiteriska, joperu imecheri kuerpu engaksï auandarhu irekaka espiritueska, komueska ánjelicheri (1 Kor. 15:36-41). w20.12 9, 10 párr. 7-9

Iáminduechachi uékasïnga sési irekani ka pínandikua jingoni. Joperu, nájkirukachi no tsitiaka, iáminduechachi jatsiasïnga uandanhiatechani ka niárasïngachi ísï pʼikuarherani eska rei Dabidi enga kurhamarhipka Jeobani ambe enga arhijka iásï anapu tekstu. Uánikua ambe jarhasti engajtsïni uáka uandanhiatani ka ménisïchi jucha no ma ambe úsïnga úni para no ísï úkuarhini. Por ejemplu, mándani uéxurhini sánderu jukaparhasïndi tʼirekua, xukuparhakua ka kʼumanchikuecha. Ístuchi no ma ambe úsïnga úni engaksï juchari kompanieruecha ánchikuarhitarhu o eskuelarhu anapuecha uékapiringa parachi no jurhimbikua jingoni jámani o ísku jándikua ambe niátani. Ka nóchi uáka kénditani no sési jásï ambe enga úkuarhijka jimesïsï engachi jucha irekaka. Iámindu i ambe úkuarhisïndi jimbokaksï kʼuiripuecha no úsïnga ambe enga Biblia uandajka. Ístu Noambakiti enga jindeeka i parhakpini anapu tata diosï, mítesti eska kʼuiripu no marhuakuaka Jeobani jimboka sánderu ‘pendienti paaka para iásï anapu ambe jimbo’ (Mat. 13:22; 1 Juanu 5:19). Jimbosï parhakpinirhu xáni uánikua problemecha jati engaksï kánikua uandanhiatajka kʼuiripuni. w21.01 2 párr. 1, 3

Apostoli Juanu arhisïndijtsïni eskachi no jatsiska para kurhunhiani juchari erachichani. Engachi no ísï úska, imani ambechi úni japiringa ambe enga Noambakiti uéjka (1 Juanu 2:11). I ambeksï úkuarhinchaspti máru, jiáni enga primeru siglu kʼamarani jámengia. Imani tiempuni Noambakiti kánikua jánguarhintaxapti paraka Tata Diosïri marhuaricha kurhunhperapiringa ka paraksï no májku kʼéri jarhani. Enga Juanu karakuapkia ini kartechani, ima kʼuiripuecha engaksï ísï eratsenga eska Noambakiti tʼuinksï kúnguarhikuarhu jarhasptia. Komueska Diotrefesi, enga úni japka eska kúnguarhikua arhukurhipiringa. No sáni janhanharhiasïrendi imani orhejtsïkutichani engaksï nirenga pʼorhembiani kúnguarhikuechani enga Grupu enga Orhejtsïkuajka iámindu kúnguarhikuechani axauenga. Xáni kʼéramakuarhisïrendi enga jamberi uékenga petantaani kúnguarhikuarhu uératini imechani engaksï sési eroauenga imani erachichani enga Diostrefesi no jaiapanheantauenga (3 Juanu 9, 10). Ístu iásï, Noambakiti kánikua jánguarhintaxati paraka Tata Diosïri ireta arhukurhitini jauaka. Ju je no méni jurajkuni eskajtsïni kurhunhperakua arhukuaka. w21.01 11 párr. 14

Jiáni enga úkuarhini japka Primera Kʼéri Uarhiperakua, Alemania ka ístu Gran Bretaña anapu juramuti, nóksï sési kaaspti Tata Diosïri marhuarichani engaksï no uékapka nirani uarhipeni. Ka Estados Unidos anapu juramuti ónhaaspti imechani engaksï aianhpikuani orhejtsïkuenga. Ini ambe jimbo, niáraspti úkuarhini ambe enga Jaŋaskuecha 11:7-10 uandajka. Tátsekua, uéxurhini 1933 ísï ka enga úkuarhini japka Segunda Kʼéri Uarhiperakua Interu Parhakpinirhu, nortirhu anapu rei méntku no sáni pʼamojperakua jingoni kámaspti Tata Diosïri iretani. Hitler ka imecha engaksï imani jingonipka, nóteruksï uékasptia eska Tata Diosïri ireta úpiringa imecheri ánchikuarhitani. Nortirhu anapu rei uandikuaspti ma 1,500 Tata Diosïri marhuarichani ka máteru uánikuechani kárselicharhu paaspti nani engaksï kánikua no sési kánhenga. Nortirhu anapu rei no sáni janhanharhispti “pímbinhasï templuni” ka nóteru jurajkusptia para kéjtsïtanhani ísï eska na úkuarhini japka, i ambe arhikuekasïndi eska nóteru jurajkusptia para Tata Diosïri ambe aianhpinhani (Dan. 11:30b, 31a). Hitler, enga orhejtsïkuni japka Alemaniani, niáraspti jamberi uandani eska ima kʼamajkupiringa Tata Diosïri iretani indeni paisi jimbo. w20.05 6 párr. 12, 13

Uékperakua xarhatatsperani, uáti eskachi no andaperani jámaaka kúnguarhikuarhu. Ju je miáni eska Jonatani no ísï pʼikuarheraspka eska sánderu sési úpiringa ambe ma ka eska Dabidi, ni uékeni reiini Dabidiri kuenta (1 Sam. 20:42). Ju je májkueni úni ka no enbidiariuani erachichani imani ambe jimbo engaksï jorhenaka úni. Sánderu sési, ju je úni ambe enga Pablu uandapka: ‘Kaxumbikua jingoni, sánderu kʼéri ambe exea je máteruechani ka eska chájkumindu’ (Filip. 2:3). Ju je miáni eskaksï mándani arhini erachicha uáka jarhuajpini kúnguarhikuarhu. Engachi kaxumbitiska, uákachi sési járhati kualidadichani exeani juchari erachicheri ka imecheri ambakiti ejemplujtsïni jarhuataati (1 Kor. 12:21-25). Engachi xarhatatsperaska uékperakua, uákachi eska Tata Diosïri ireta sánderu májku kʼéri jauaka. Ístuchi xarhataaka eskachi meru Jesusiri chúxapatiska ka inde ambe uáti eskaksï sánderu uánikua kʼuiripuecha engaksï ambakiti mintsita jataka, uékaaka marhuakuni Jeobani. Joperu ambe enga sánderu jukaparhakueka, jindeesti eskachi kʼéri ambe arhiaka Jeobani, “Táti enga pʼamojpijka ka Diosï enga uinhaperpintajka iámindu ambe jimbo” (2 Kor. 1:3). w21.01 24 párr. 14; 25 párr. 16

Ini jurhiatikuecha jimboksï jarhasti kʼuiripuecha engajtsïni no xénchajka, engajtsïni teresmarhujka ka ísïjtsïni exeni enajkichi no ma ambe míti ni kʼéri ambeni. ¿Andi? Jimbokachi no májkueni jámasïnga ni exeni ambe ma eskaksï máteru kʼuiripuecha. Kʼuiripu sési exeasïndi imechani engaksï kʼéramakuarhijka, teparakuarhini ka engaksï no sési ambe újka. Peru juchachi jánguarhintasïnga kaxumbitini, sési pʼikuastpini ka kurhajchani Tata Diosïni. Ístu, nóchi inchamukusïnga politikarhisï níjtuchi uéjki jarhani ejersituecheri lista ma jimbo para paisini ma kuájpini. Jimbokachi no uékasïnga májkueni jámani eskaksï i parhakpini anapuecha, ísïjtsïni exesïndi eskachi no kʼéri ambeska (Rom. 12:2). Peru nájkirukajtsïni kʼuiripuecha ísï exejka, Jeobajtsïni úraxati parachi kʼéri ambe úni. Por ejemplu, sánderuchi aianhpixaka interu parhakpinirhu. Tata Diosïri marhuarichachi uásïnga rebistechani engaksï sánderu uánikua idiomecha jimbo tradusirinhajka ka engaksï sánderu etsakurhijka, ka úrasïngachi Bibliani para uánikua kʼuiripuechani jarhuataani paraksï sánderu sési irekani. Ka iámindu i ambe Jeobani jimboesti. w20.07 15 párr. 5, 6

Jesusi janhanharhisïndi Jeobaeri juramukuani, joperu enga i ambe újka no arhikuekasïndi eska no jánhastiiska o eska no jorhenaska úni ambe ma. Ima ambe enga jorhentpipka ka enga no úkua jukenga para kurhanguni xarhatasïndi eska ima kánikua jánhastiiska (Juanu 7:45, 46). Jeoba mítesti eska Jesusi kánikua jánhastiiska, jimbosï jurajkupti para imani jingoni ánchikuarhini jiáni enga Jeoba kueraapka iámu ambe Echerirhu ka auandarhu (Prov. 8:30; Ebr. 1:2-4). Ka desdeka Jesusi tsítanhantaka, Jeoba íntskusti iámindu juramukua auandarhu ka ístu parhakpinirhu (Mat. 28:18). Nájkiruka Jesusi uánikua ambe míteka úni, ima útasï jirinhasïndi Jeobaeri jarhuajperatani ka ísï úsïndi jimboka xénchasïnga imeri Tátini. Acheetichaksï jatsisti para miántani eska Jeoba no uandaska eska uarhiiti kurhajchaaka uámbani jimboka eratsesïnga eska uarhiiti no xáni jukaparhaska. Ka i ambe xarharasïndi jimboka Jeoba uarhiitichani erakuaska ka acheetichani paraksï Jesusini jingoni juramuni (Gal. 3:26-29). Jeoba xarhatasïndi eska mintsikasïnga imeri Uájpani jimbosï juramukua íntskuti, májkueni, acheeti enga jánhastiika, ístu juramukua sáni íntskusïndi imeri témbani. w21.02 11 párr. 13, 14

Tata Diosïri Karakata ísïsti komueska espeju ma ka jarhuatasïndijtsïni parachi exeni ambechi jatsiski para mójtakuni ka nénachi uá ísï úni (Sant. 1:23-25). Engachi kʼamaraakia jorhenguarhini Tata Diosïri Karakateri ambe, úpiringachi kuenta íntskukuarheni eskachi jatsiska para nóteru xáni ikiania. Jeobaeri jarhuajperata jingoni, jorhenguarhisïngachi tekaantstini, jiáni engajtsïni kʼuiripuecha o uandanhiatecha no sési pʼikuastaaka. Iásï úsïngachi sánderu sési eratseni ka ambakiti ambe erakuni úni (Sant. 3:13). ¡Xáni enga jukaparhakueka eskachi sési míteaka Bibliani! Ménisïchi jorhenguarhisïnga imani ambe jimbo engachi no sési újka. Sánderu sésisti, jorhenguarhini imani ambe jimbo engaksï máteruecha sési újka ka engaksï no sési újka. Joperujtsïni Santiagu pʼímarhisïndi parachi jorhenguarhini imecheri ambe engaksï Bibliarhu jaka komueska Abraani, Raabi, Jobu ka Elíasi (Sant. 2:21-26; 5:10, 11, 17, 18). I ambakiti Jeobaeri marhuarichaksï tekaantasti uandanhiatechani enga úpiringa eskaksï nóteru tsípikua jingoni irekapiringia. Imeri ejempluechajtsïni xarhatachesïndi eskachi juchajtu uáka tekaantani Jeobaeri jarhuajperata jingoni. w21.02 29, 30 párr. 12, 13

Bibliaeri jorhenguarhikua ma jimbo, jorhentpirisï jatsiti para jarhuatani jorhenguarhirini sési kurhanguni Tata Diosïri Karakatani. Engajtsïni jorhentpiri pʼímarhiska parachi nirani pámbetani, ju je miáni eskachi niuaka parachi jarhuatani (Ecl. 4:9, 10). Jimajkani, ¿nénachi uá sési jarhuatani? Ju je sési prepararikuarhini. Orheta uákachi arhini jorhentpirini eskajtsïni uandontskuarhecheaka máru ambe jorhenguarhiriri. Ambeksï jorhenguarhia ka ambe uékasïni eska jorhenguarhiaka ima jorhenguarhikua jimbo. Ístuchi úpiringa kurhamarhini ambechi uá uandani o úni ka ambe nómbe ka ambechi uá úni parachi uinhaperantani paraka niáraaka marhuakuni Jeobani. Ísïsti, jorhentpiri nójtsïni méni aianguati ambe ma jorhenguarhiriri irekueri ambe. Joperu ju je sési úrani imani ambe engajtsïni arhiaka. Misionera ma enga Joy arhinhajka uandasïndi: “I ambe jarhuatasïndi imani engareni pámbetajka paraka uékaaka jarhuatani jorhenguarhirini ka para míteni ambe uandani jorhenguarhikuarhu”. w21.03 9 párr. 5, 6

Parhakpini anapuechajtsïni kurhunhisïndi jimbokachi kurhajchasïnga Tata Diosïri juramukuechani ka íksï juramukuecha no sáni terukuntasïndi parhakpini anapu juramukuecha jingoni. Por ejemplu, ini jurhiatikuecha jimbo kʼuiripuechaksï no no sési exesïndi ísku jándikua ambe enga imani iretecha jimbo úkuarhienga engaksï Sodoma ka Gomorra arhinhenga ka enga jimbo Tata Diosï kʼamajkuapka (Jud. 7). Uánikua kʼuiripuechajtsïni teresmarhusïndi ka uandasïndiksï eskachi no sési exesïnga iámindu ambe jimbokachi úsïnga ambe enga Biblia uandajka íri ambe (1 Ped. 4:3, 4). ¿Náki kualidadichajtsïni jarhuataa parachi úni tekaantani engachi kurhunhinhaka ka engachi no sési arhinhaaka? Jatsiskachi para mintsikani eskajtsïni Tata Jeoba jarhuataaka. Jakajkukua ísïsti komu eska kuájpitarakua ma engachi jimbo újka párhutani “Noambakitiri lansechani engaksï chpiririka” (Efes. 6:16). Joperu ístuchi uétarhinchasïnga xénchperakuani. ¿Andi? Jimboka uékperakua no sóntku no sési exesïndi ambe ma ka tekaantasïndi iámindu ambe engajtsïni no sési pʼikuastajka (1 Kor. 13:4-7, 13). Xénchperakua Tata Jeobani jimbo, juchari erachicha jimbo ka asta juchari ikiatspiticha jimbo jarhuataatijtsïni tekaantani engachi kurhunhinhaaka. w21.03 21 párr. 3, 4

Ístuchi uáka xarhatakuani eskachi xénchaasïnga juchari erachichani ka pirenchichani engachi no úska máru ambe, komu no sóntku ikiani imani ambe jimbo engaksï máteruecha uandaaka. Ju je miáni ambe enga úkuarhipka antede Jesusi uarhini. Ima arhiaspti imeri chúxapatichani eskaksï jatsipiringa para arhani imeri kʼuiripeta ka imeri iurhirini paraksï úni jatsini tsípikua para méntkisï (Juanu 6:53-57). Uánikua imeri chúxapatichaksï no tsitispti ambe enga uandapka ka nóteruksï chúxapasptia. Joperu imeri ambakiti amiguechaksï komueska Juanu nóksï jurajkuspti ka imani jingonksï pakaraspti. Nóksï kurhanguspti ambe enga Jesusi uandapka ka seguru eska inde ambe ísku pakataapka, joperuksï no ikiaspti niksï uandapi eska no sési jarhaspka ambe enga Jesusi uandapka. Sánderu sési, mintsikasptiksï Jesusini, jimbokaksï mítespti eska méntkisï jurhimbikua ambe uandasïrenga (Juanu 6:60, 66-69). Ísï jimbo, kánikua jukaparhakuesti eskachi no sóntku ikiauaka imani ambe jimbo engaksï juchari erachicha uandaaka, sino kurhamarhiani ambe engachi no kurhanguaka (Prov. 18:13). w21.01 11 párr. 13