Septiembri

Jiáni enga Pedru uandapka Joeliri profesieri ambe, máteru jásï uandakuecha jingoni uénaspti (Uku. 2:16, 17). Jeoba úspti eska Pedru no ísï uénapiringa ini karakatani uandakua jingoni “tátsekua”, sino eska uénapiringa uandani eska “últimu jurhiatikuechani jimbo” —ixú arhikuekaxapti Jerusaleniri ka templueri últimu jurhiatikuechani— Tata Diosï íntsaapiringa espiritu santu “iámindu kʼuiripuechani”. I ambe xarhatasïndi eska ióni nitamaspka astaka Joeliri profesia kumplirikuarhipka. Enga Tata Diosï na íntsaapkia espiritu santu primeru siglurhu anapu kristianuechani, aianhpikua uénaspti sánderu uápurisï úkuarhini. Jiáni enga apostuli Pablu Kolosasi anapuechani karakuapka kartani, uéxurhini 61 jimbo ísï, uandaspti eska ambakiti aianhpikua “iápuru parhakpinirhu” aianhpikuarhispkia (Kol. 1:23). Enga Pablu uandapka “iápuru parhakpinirhu”, imani lugarichani arhikuekaxapti engaksï jiáni mítekuarhipka. Jeobaeri espiritu santueri jarhuajperata jimbo, iásï sánderu uápurisï aianhpinhaxatiia ka asta jimesïsï “enga sánderu iauanika parhakpinirhu” (Uku. 13:47). w20.04 6, 7 párr. 15, 16

Jeobajtsïni kánikua xénchasïndi ka ístu imechani engaksï jarharika kúnguarhikuani (Mat. 18:12-14). Tata Diosï aiatspespti eska jirinhantaapiringa imeri karichichani engaksï tsïnchipka ka eska jarhuataapiringa paraksï ménderu úni ambakiti pájperakua ma jatsini imani jingoni. Ka uandaspti ambe enga xáni úpiringa para jarhuataani. Májkueni úpirindi eska Israeli anapu karichi eranguti ma enga karichini ma tsïtenga (Ezeq. 34:12-16). Orheta, karichi eranguti jirinhantapirindi imeri karichini, jamberi ióndapirindi ka kánikua jánguarhintani. Enga exentapiringuia, ménderu pántapirindi máteru karichicha jingoni. Ístu, enga karichi atakuarhipiringa o kʼarhimani jarhani, uékperakua jingoni jarhuatapirindi, irhimakupirindi jima enga atakuarhika, kamanharhitini pántapirindi ka tʼirerani. Kúnguarhikuarhu anapu orhejtsïkuticha engaksï kuidariuajka Tata Diosïri karichichani, ístuksï jatsisti para ini ambe úni engaksï jarhuataani jauaka imechani engaksï jarharika kúnguarhikuani (1 Ped. 5:2, 3). Orhejtsïkutichaksï jirinhantaasïndi, jarhuataasïndiksï paraksï kʼuanhatsentani kúnguarhikuarhu ka xarhatakuasïndiksï na engaksï xáni xénchaajka jarhuatapariani paraksï ménderu ambakiti pájperakua ma jatsini Jeoba jingoni. w20.06 20 párr. 10

¿Uandaspi Jesusi eska tiempuespkia para pʼikuntani jimboka eratsexapka eskaksï sáno iámindu kʼuiripuecha niárapiringa imeri chúxapatiini? Nómbe. Tata Diosïri Karakata tʼuini uandasïrendia eskaksï namunitu kʼuiripuecha niárapiringa Jesusini jakajkuni (Juanu 12:37, 38). Ima úsïrendi míteni ambe enga kʼuiripuecheri mintsitarhu jarhenga (Mat. 9:4). Peru tsípikua jingoni aianguasïrendi iáminduechani ka jánguarhintaspti jarhuataani imani namunitu kʼuiripuechani engaksï jakajkupka imani. Ka jimbokachi jucha no úsïnga míteni ambe enga kʼuiripuecheri mintsitarhu jarhajka, ju je jánguarhintani no tʼuini eratsenia eska ma kʼuiripu no niáraaka marhuakuni Jeobani o no sési eratseni jarhani imani lugariri ambe nani engachi aianhpijka. Sánderu sési, ju je eratseni eskaksï ima kʼuiripuecha ma jurhiani niáraaka Jesusiri chúxapatini. Ju je miáni ambe enga Jesusi arhiapka imeri chúxapatichani. Eska iápurisï tsïpambispkia, eska tiempuespkia para pʼikuntani. Kʼuiripuechaksï úsïndi mójtakurhini ka niárasïndiksï Jesusiri chúxapatini. Jeoba kánikua jukaparharaasïndi kʼuiripuechani (Ageo 2:7). Engachi ísï exeaska eska Jeoba ka Jesusi na exeajka, jánguarhintaakachi kurhangukuani ambe engaksï imecha nitamakuarhijka ka ambe engaksï tsitijka. Ka nóchi ísï exeauaka enajkichi no mítea imani kʼuiripuechani, sino eskaksï sánderu orhepani niáraaka juchari erachicheeni. w20.04 13 párr. 18, 19

Bibliajtsïni jorhendasïndi eskachi jatsiska para xénchani Jesusini engachi uéjka jaiapanherantani Jeobani. Ka parachi úni Jesusiri amigueni, orhetachi jatsiska para míteni imani. Para ini ambe úni, ju je arhiantani ini Bibliarhu anapu libruechani: Mateu, Markusʌ, Lukasʌ ka Juanu. Engachi eratsentaaka ambe engaksï i libruecha uandajka Jesusiri ambe ka exeni eska sési kaasïrenga kʼuiripuechani, niáraakachi xénchani ka janhanharhini. Por ejemplu, nájkiruka ima juramukua jatsipka, no ísï kaaspti imeri chúxapatichani komueska jántspiricha. Sánderu sési, ísï kaaspti komueska imeri amiguecha ka aiangukuarhiaspti ambe enga xáni eratsenga ka pʼikuarherani. Engaksï imeri chúxapaticha kómu pʼikuarherani jarhenga ka uerani, imajtu májkueni pʼikuarherasïrendi (Juanu 11:32-36). Asta imecha engaksï no xénchenga Jesusini, niárasptiksï exeni eska sési pájperasïrenga imecha jingoni engaksï ísï uénga ambe enga ima aianhpienga (Mat. 11:19). Engachi jucha ísï káuaka máteruechani eska Jesusi na kaapka imeri chúxapatichani, sánderuchi sési pájperaaka imecha jingoni, sánderuchi tsípikua jingoni irekaaka ka sánderuchi xénchaaka ka janhanharhini Kristuni. w20.04 22 párr. 9, 10

Uéxurhini 1870 jimbo, Gran Bretaña jatsiaspti sánderu ambakiti soldaduechani ka kʼérati uarhipetarakua ambe ka niáraspti sánderu juramukua jatsini interu parhakpinirhu. Danieli uandaspti eska i kʼéri juramuti ísïspka komueska sïuangua sapichu ma enga andaapka máteru tanimu sïuanguechani, engaksï jindepka Francia, España ka Países Bajos (Dan. 7:7, 8). Gran Bretaña jindespti surirhu anapu rei asta jiáni jamberi enga úkuarhini japkia Primera Kʼéri Uarhiperakua Interu Parhakpinirhu. Jiánisï, Estados Unidos de América niáraspti sánderu kánikua jatsikuarhirini interu parhakpinirhu ka uénaspti sési pájperani Gran Bretaña jingoni. Jiáni enga úkuarhini japka Primera Kʼéri Uarhiperakua, Estados Unidos ka Gran Bretaña niárasptiksï kúndantaani imecheri soldaduechani. Ísï, Estados Unidos ka Gran Bretaña niárasptiksï jindeni sánderu kʼéri juramukua ma interu parhakpinirhu. Ísï eska Danieli na uandapka, i rei niáraspti jatsini “kʼéri ka uinhapiti ejersitu ma”. Ini últimu jurhiatikuecha jimbo enga Estados Unidos ka Gran Bretaña májku kʼéri úkuarhika, niárastiksï jindeni surirhu anapu rei. w20.05 4 párr. 7, 8

Echerirhu jarhasti itsï jimboka juchari planeta séskisï jarharitixaka Jurhiatani. Enga sánderu sáni andarhierapiringa, iámu itsï suárapirindi ka i ambe úpirindi eska Echeri kánikua jorhepepiringa ka eska no ma ambe japiringa. Joperu enga sánderu sáni iauani japiringa, iámu itsï ielu úkuarhipirindi ka ístu Echeri. Jimboka Jeoba, ambakiti lugari ma jimbo peeraska Echerini, itsï no méni kʼamakurhisïndi ka úsïndi eska tsípikua jauaka. ¿Néna jimbo itsï no méni kʼamakurhisïni? Jurhiata jorheperasïndi itsïni enga Echerirhu ka maricharhu ísï jaka, tátsekua niárasïndi suárani ka xúmu úkuarhini. Mándani uéxurhini, Jurhiata úsïndi eska itsï suáraaka sáno 500,000 kilometru kúbiku (120,000 millas cúbicas). Inde itsï, ma diesi jurhiatikua ísï pakarasïndi auandarhu ka tátsekua niárasïndi iauani o janini ka ménderu niántasïndi maricharhu o nani enga kánikua itsï jaka. Ka ménderu uéntasïndi i ambe úkuarhini. I ambe enga úkuarhijka itsï jingoni ka enga no méni kʼamakurhijka Echerirhu, xarhatasïndi eska Jeoba jánhaskatiska ka uinhapitiini (Job 36:27, 28). w20.05 22 párr. 6

Jesusi uandaspti eskachi jatsiska para someni kurhajkuarhini jarhani espiritu santu (Luk. 11:9, 13). Jeoba úrasïndi espiritu santuni parajtsïni íntskuni “uinhapikua enga xáni kʼéri ambeka” (2 Kor. 4:7). Tata Diosïri espiritu santueri jarhuajperata jingoni, úsïngachi tekaantani náki uéjki tsʼéjkukuani engachi jatsijka. Ístu, espiritu santujtsïni jarhuatasïndi parachi sési úni ánchikuarhita ambe engachi Jeobaeri kúnguarhikuarhu intsïnhajka. Uáti úni eskachi sánderu sési uáka imani ambe engachi jorhenakia úni. Míteskachi eska espiritu santueri jarhuajperata jimboeska ambe engachi újka para Jeobani marhuakuni ka no juchari uinhapikua jimbo. Para xarhatani eskachi jukaparharasïnga espiritu santuni, jatsiskachi para kurhakuni Jeobani eskajtsïni jarhuataaka exeni sinchi eratsesïni o tsitisïni imani ambe enga no sési jaka (Sal. 139:23, 24). Parajtsïni mókuchentani, Jeoba uáti úrani imeri espirituni parajtsïni exerani ambe engachi jatsiaka para mójtakuni. Ísï jimbo, ju je kurhakuni eskajtsïni espiritu santu jarhuataaka parachi kénditani indeni no sési jásï eratsekuani o ambe engachi tsitijka. Engachi ísï úska, Jeoba exeati eskachi no uékasïnga úni ambe enga no sési jaka ka imajtsïni uáti méntkisï jarhuatani imeri espiritu santu jingoni (Efes. 4:30). w20.05 29 párr. 10-12

Engachi kuájpijka Jeobaeri nombrini, májkuenchi úni jarhasïnga eska Jesukristu. Jesusi no solu aianhpispti na enga arhinhajka Táti jemba, ístu jorhentpispti na enga jásïka Jeoba. Por ejemplu, engaksï fariseuecha úpka eska Jeoba ísï exenhapiringa komu Tata Diosïni ma enga uinhamarhitspijka, no kurhangutspijka, no sési kámpijka ka no pʼamojpini, Jesusi jarhuataaspti kʼuiripuechani paraksï exeni eska imeri Táti kurhangutspisïnga, tekaantstiska, uékpitiska ka pʼamojpitini. Ístu, imeri jángua jingoni enga pauani pauani xarhatapka, jarhuataaspti kʼuiripuechani paraksï míteni na enga jásïka Jeoba, imeri Táti (Juanu 14:9). Májkueni eska Jesusi, uákachi aianhpini ambe engachi míteka Jeobaeri ambe, eska uékpitiska ka eska sési kámpisïnga. Ísïchi xarhataaka eska no ísïska ambe engaksï uandajka Jeobaeri ikiatspiticha. Pímbinhajkuntasïngachi Jeobaeri nombrini ka jarhuataasïngachi kʼuiripuechani paraksï exeni eska imeri nombri pímbinhasïska. Juchari uandakuecha ka úkuecha jingoni xarhatasïngachi na enga jásïka Jeoba. Kuájpisïngachi imeri nombrini engachi jarhuataajka kʼuiripuechani jurhimbikua ambe míteni Tata Diosïri ambe. w20.06 6 párr. 17, 18

Uákachi sési úraani redesi sosialichani para familiani ka amiguechani uandajpaani. Peru, ¿exeskichia eska sáno iámindu ambe enga kʼuiripu karhatajka redesi sosialicharhu jindeska paraksï máteruecha exeni ambe engaksï xáni újka? Ísï xarharasïndi enajkiksï uékajki eskaksï kʼéri ambe exenhaaka. Máruksï no sési jásï ambe karasïndi imecheri o máteruecheri fotuecheri ambe. I ambe no sáni terukuntasïndi imani ambe jingoni engaksï kristianuecha jatsika para xarhatani, por ejemplu kaxumbikua ka kurhangukuani máteruechani (1 Ped. 3:8). Engachi úraajka redesi sosialichani, ju je kurhamarhikuarhini: “¿Ambe karasïni ka náki fotuechani ka bideuechani karhataasïni redesi sosialicharhu? ¿Úpirini ísï xarhatani eskani sési xékuarhixaka? ¿Uá eskaksï máteruecha enbidia pʼikuarheraaka?”. Kristianuechachi no uétarhinchasïnga eskajtsïni máteruecha kʼéri ambe exeaka. Sánderu sési, úsïngachi ambe enga Biblia uandajka iásï anapu teksturhu. Engachi kaxumbitiuaka, nóchi kʼéri pʼikuarheraaka eska parhakpini anapuecha (1 Juanu 2:16). w20.07 6 párr. 14, 15

Ante de Kristueri chúxapatini, apostoli Pablu enga ísï mítekatepka komu Saulu, tumbi máespti enga no janhanharpienga ka enga no sési káuenga Jesusiri chúxapatichani (Uku. 7:58). Peru Jesusi auandarhu uératini uandajpaspti, úspti eska Pablu nóteru úpiringuia exeni ka nóteru jurajkusptia eska no sési kaapiringa kúnguarhikuarhu anapuechani. Paraka úpiringa ménderu exeni, Pablu imani kʼuiripuecha jingoni niraspti enga antesi no sési kaapka. Kaxumbikua jingoni jurajkuspti eska Ananiasi jarhuatapiringa, Jesusiri chúxapati ma enga úpka eska Pablu ménderu úpiringuia exeni (Uku. 9:3-9, 17, 18). Ísï tátsekua, Pablu niáraspti kʼéri ánchikuarhita ambe úni kúnguarhikuarhu, peru no méni mirikurhispti ambe enga Jesusi jorhendapka jiáni enga auandarhu uératini uandajpapka enga ima Damasku nirani japka. Méntkisï kaxumbikua xarhataspti ka tsípikua jingoni jiókuarhispti eskaksï erachicha ka pirenchicha jarhuatapiringa. Uandaspti eskaksï imecha kánikua jarhuataspka ka uinhaperantani (Kol. 4:10, 11). w20.07 18, 19 párr. 16, 17

Nájkiruka Jeoba újka iámu ambe úni, juramukua íntsaasïndi máteruechani. Por ejemplu, Rei ústi Jesusini imeri Reinurhu ka juramukua íntsauati imani 144,000 kʼuiripuechani engaksï Jesusi jingoni juramuaka.Ka jorhendasti Jesusini para jindeni Rei ka Kʼéri Saserdoti (Ebr. 5:8, 9). Ístu, jorhendaasïndi imechani engaksï Jesusi jingoni juramuaka, ka enga íntsauakia ini ánchikuarhitani, no méntku arhiani jauati na engaksï jatsiaka para úni ambe ma. Sánderu sési, mintsikaati eskaksï imecha uáka ambe enga ima uéjka (Jaŋ. 5:10). Enga juchari Táti auandarhu anapu íntsaajka máteruechani juramukua o ánchikuarhita nájkiruka no uétarhinchajka eska nema jarhuataaka, jiájkani juchajtuchi jatsiska para májkueni úni. Por ejemplu, ¿nénaksï uá májkueni úni táticha o kúnguarhikuarhu anapu orhejtsïkuticha? Ánchikuarhita ambe íntsapariani máteruechani ka jánguarhintani pʼíngukuarhini para no méntku arhijpini jarhani na enga jatsika para úkuarhini ambe ma. Engaksï ísï uáka, nóksï solu jurajkuáti eska úkuarhiaka ambe ma, sinoksï jorhendauati máteruechani ka jarhuatauatiksï paraksï no chéni ánchikuarhita ma úni (Is. 41:10). w20.08 9 párr. 5, 6

¿Néna uékasïni Jeoba eskachi exeauaka imeri karichichani engaksï tsïnchitini jaka? Jesusijtsïni jorhendasti imeri ejemplu jingoni. Ima mítespti eska Jeoba kánikua jukaparharaasïnga iámindu imeri karichichani. Ísï jimbo, kánikua jánguarhintaspti para jarhuataani “Israeli anapu karichichani engaksï tsïnchitini” japka paraksï Jeobani andarhientani (Mat. 15:24). Jimboka Jesusi jindeska sánderu ambakiti karichi eranguti, ístu jánguarhintaspti na enga xáni úpka para no ma karichi tsïtakuni Táti jémbani (Juanu 6:39). Apostuli Pablu arhiaspti orhejtsïkutichani engaksï Efesu anapu kúnguarhikuarhu japka eskaksï jatsispka para májkueni úni eska Jesusi. Arhiaspti eskaksï ánchikuarhipiringa para “jarhuataani imechani engaksï no uinhapitika, miántsparini tata Jesukristueri uandakuechani”, enga uandapka: “Sánderu sésisti intsïmpini, ka eska intsïmbinhani” (Uku. 20:17, 35). Eskachi na exekia, orhejtsïkutichaksï kʼéri ánchikuarhita ma jatsisti. España anapu orhejtsïkuti ma enga Salvador arhinhajka, ísï uandasïndi: “Engani eratsentajka na enga xáni jukaparharaajka Jeoba imeri karichichani engaksï tsïnchitini jaka, úsïndi eskani uékaaka jarhuataani na engani xáni uáka. Sési mítetixaka eska Jeoba uékasïnga eskani kuájchakuauaka imeri karichichani”. w20.06 23 párr. 15, 16

Jimboka Jeoba tekaantstiska, erokuarhiati eska mili uéxurhini nitamaaka parachi niárani perfektueni. Asta jiáni jamberi, imajtsïni puáchintani jauati juchari kʼamanharhintskuechani. Ísï jimbo, ju je májkueni úni eska Jeoba ka ambakiti ambe exekuani máteruechani ka ístu tekaakuantani. Jesusi ka ánjelichaksï kánikua tsípispti enga Echeri kueraanhapka. Ju je eranhaskani na engaksï xáni tsípiaka engaksï exeaka eskaksï Echerirhu irekaxaka kʼuiripuecha engaksï perfektueka, engaksï xénchajka ka marhuakujka Jeobani. Ka ju je eratseni na engaksï xáni sési pʼikuarheraaka imecha engaksï Kristu jingoni juramuaka engaksï exeaka eska imecheri ánchikuarhita marhuakuaxaka kʼuiripuechani (Jaŋ. 4:4, 9-11; 5:9, 10). Ístu, ju je eranhaskani na engachi irekaaka engachi nóteru ueraakia no sési pʼikuarherakua ambe jimbo, sino xáni tsípini jimboka nóteru jauakia pʼamenchakua ambe, kómu pʼikuarherakua ni uarhikua. Enga jamberi niáraka ima jurhiatikua, ju je jánguarhintani májkueni uékpini, jánhastini ka tekaantstini ísï eska juchari Táti. Engachi ísï úska, seguirinchi jauaka tsípikua jingoni irekani nájkirukachi tsʼéjkukua ambe jatsiaka (Sant. 1:2-4). Kánikuachi jukaparharasïnga engajtsïni Jeoba aiachijka eskaksï tsíntaaka uarhiricha (Uku. 24:15). w20.08 19 párr. 18, 19

Engajtsïni Tata Diosï intsïmbika Bibliani, xarhatasïndi na engajtsïni xáni xénchajka. Ima ústi eskaksï ióntki anapu achamasïcha karapiringa Bibliani jimbokajtsïni kánikua jukaparharasïnga. Imeri Karakata jimbo, Jeobajtsïni mókucheantasïndi imani kurhamarhikuechani engachi sánderu úkuarhiajka. Por ejemplu arichani: ¿nanichi uératini jurhaski?, ¿andichisï irekani jaki? ka ¿ambe úkuarhia sánderu orhepani? Jimboka Jeoba uékasïnga eskaksï imeri uájpecha míteaka ini ambe, jarhuajpixati paraka Biblia uáka uánikua idiomecha jimbo jarhani. Ini jurhiatikuecha jimbo, iámu o ma parti, Biblia jukari tresi mili idiomecha jimbo jarhasti. I jindesti libru enga sánderu etsakunhajka ka tradusirikuarhini desde iónisïa. ¿Nénachi uá xarhatani eskachi jukaparharasïnga Bibliani? Pauani pauani arhintaparini, eratsentaparini ambe enga jorhentpijka ka jánguarhintaparini úni ambe engachi jorhenguarhijka. Ístu, xarhatakusïngachi eskachi jukaparharasïnga Bibliani engachi jánguarhintajka na engachi xáni uáka para aianguani máteru kʼuiripuechani ambe enga Biblia jorhentpijka (Sal. 1:1-3; Mat. 28:19, 20). w20.05 25 párr. 15, 16

Jimesïsï enga profeta Jeremiasi aianhpipka kʼuiripuechaksï no uékaspti kurhajchani. Ima niáraspti xáni no sési pʼikuarherani enga jamberi nóteru uékengia aianhpini. Joperu no ísï úspti. ¿Andi? Ima mismu uandaspti eskaksï Jeobaeri uandakuecha ísïspka eska chpiri imeri mintsitarhu enga jimbo no úpiringa pʼimukukuarhini (Jer. 20:9). Juchajtuchi uáka májkueni úni eska Jeremiasi engachi pauani pauani jorhenguarhiska Bibliaeri ambe ka engachi eratsentaska ini ambe. Jiájkanchi sánderu tsípikua jingoni aianhpiaka ka sánderujtsïni sési nicheati aianhpikuarhu (Jer. 15:16). Ísï jimbo, ambe uéjkijtsïni no sési pʼikuastani, ju je aianguni Jeobani na engachi pʼikuarherajka ka kurhakuni eskajtsïni jarhuataaka. Imajtsïni jarhuataati imani ambe jingoni engachi kʼamanharhintskua jimbo újka ka parachi jurajkuni imani ambe enga no sési jaka, o jiáni engachi pʼamenchani jauaka ka ístu parachi no no sési pʼikuarherani engachi no intsïnhaaka ánchikuarhita ma imeri kúnguarhikuarhu ka jarhuataatijtsïni parachi tsípikua jingoni aianhpini. Imeri jarhuajperata jimbo, uákachi orhepani uérani jiáni engachi chketakuarhitini jauaka. w20.12 27 párr. 20, 21

Máru pirenchichaksï solu tánguarhikuecharhu úsïndi erachicha jingoni jarhani. Ísï jimbo, ju je sési eroaani, imecha jingoni uandontskuarheni ka xarhatakuani eskachi uandanhiasïnga imecha jimbo. Ju je arhutani tiempu parachi pirenchicha jingoni jarhani, májkueni eska Jesusi (Luk. 10:38-42). Jamberichi úpiringa juchiniu pʼímarhiani arhani ambe ma o solu parachi márku jarhani. Ka ju je imani ambe uandontskuarheni enga uinhaperantauaka (Rom. 1:11, 12). Kánikua jukaparhakuesti eskaksï orhejtsïkuticha májkueni uáka eska Jesusi. Ima mítespti eska para máru úkua jukasïnga no tembuchatini o uambuchatini jarhani. Peru uandaspti eska para ma tsípikua jingoni irekani, no uétarhisïnga tembuchani o uambuchani o sapiichani kaani, sánderu sési jindesti Jeobani marhuakuni (Mat. 19:12; Luk. 11:27, 28). Joperu sánderu orhejtsïkutichaksïsï jatsiti para ísï kaani kúnguarhikuarhu anapu nanakechani komueska imecheri nándichani ka ermanechani. Jatsistiksï para jánguarhintani arhutani tiempu ante de uénakuarhini tánguarhikua ka enga na kʼamakurhiakia paraksï pirenchicha jingoni uandontskuarheni. w20.09 21, 22 párr. 7-9

Jini Israeli, seisi kutsï ióndasïrendi kʼuiripini ima ambe enga ikaranhenga: oktubrini teruani ísï enga uénenguia janini, israelita ma semiia ambe jatsikusïrendi ka abrilini teruani ísï pʼikuntasïrendi jiáni enga nóteru xáni janienguia (Mar. 4:28). Engachi jánhaskatiska, májkuenchi tekantstiuaka eska ima enga jatsintajka ambe ma. Peru ménisï no fasilisïndi tekaantskua xarhatani. Jimbokachi kʼamanharhintstiska, kʼuiripuechachi sóntku uékasïnga exeni eskachi jánguarhintaxaka úni ambe ma. Peru enga nema uánikua plantechani ikarauaka ka uékani eskaksï ícha fruta jukaaka, jatsisti para jarhakuni, ikaraani, uitsakua pʼikundukuani ka itsï jatsikuani. Ka májkuenisti ánchikuarhita jingoni enga jindeka Jesusiri chúxapatichani uáni. Jatsiskachi para tiempu arhutani para jarhuataani Bibliaeri jorhenguarhirichani paraksï xénchaani kʼuiripuechani nani uéjkiksï anapueni. Engaksï kʼuiripuecha no uéjka kurhaani Tata Diosïri ambe, tekantskuajtsïni jarhuatasïndi parachi no no sési pʼikuarherani. Peru ístuchi jatsiska para tekaantstini enga kʼuiripu sési kurhaajka Tata Diosïri ambe jimbokachi no uáka úni eska jorhenguarhiri jirejiresï mintsikaaka Tata Diosïni. Asta Jesusiri chúxapatichaksï ióndaspti kurhanguni ambe enga ima jorhentpipka (Juanu 14:9). Ju je miáni eskachi jucha uáka ikarani ka itsï jatsikuni, peru Tata Diosïsï újti eska kʼéaka (1 Kor. 3:6). w20.09 11 párr. 10, 11

Iáminduechachi uékasïnga eskaksï Biblieri jorhenguarhiricha niáraaka itsï atakuarhini. Ma ambe engachi uáka úni enga kánikua jukaparhakueka, jindesti pʼímarhiani paraksï nirani tánguarhikuecharhu. Sáno méntkisï engaksï jorhenguarhiricha nirajka tánguarhikuecharhu sánderuksï sóntku niárasïnga marhuakuni Tata Diosïni. Uánikuaksï arhiasïndi imeri jorhenguarhirichani eskaksï útasï uánikua ambe jorhenguarhiaka engaksï niuaka tánguarhikuecharhu. Ju je arhintani jorhenguarhiri jingoni Ebreu 10:24, 25 ka ju je arhini na enga xáni marhuakuaka nirani tánguarhikuecharhu. Ju je tsípikua jingoni aianguni ambe engachi jorhenguarhika tánguarhikuarhu ma enga apenasi úkuarhika. I ambe sánderu marhuakuati ka eska solu pʼímarhini para nirani tánguarhikuecharhu. Ambe enga exeaka ka kurhaani primeru xanhari enga niuaka tánguarhikuarhu, sánderu ambakiti ambeuati eska náki uéjki máteru relijionirhu enga ima nika (1 Kor. 14:24, 25). Ístu, míteauati máteru kʼuiripuechani engaksï ambakiti ambe jorhendaaka ka engaksï jarhuataaka para niárani itsï atakuarhini. w20.10 10, 11 párr. 14, 15

Espiritu santujtsïni jarhuataati parachi ísï úni eskachi na arhintaaka ka jorhenguarhini Tata Diosïri Karakatarhu. Ju je májkueni ambe kurhakuni Jeobani eska salmista: “Oh Jeoba, jorhendarini nani enganisï jámaaka. Jí chíti jurhimbikuarhu jámaaka. Ú eskani iámu mintsita jingoni janhanharhiaka chíti nombrini” (Sal. 86:11). Ísï jimbo, ju je seguirini marhuatani ambe engajtsïni Jeoba jorhendajka imeri Karakatarhu ka imeri kúnguarhikua jimbo. Ísïsti, nóchi solu uékasïnga uánikua ambe míteni. Sánderu sési, ju je juchari mintsitarhu peerani jurhimbikuani ka ísï úni. Jeobaeri espiritujtsïni jarhuataati ísï úni. Ju je uinhaperantaani juchari erachichani ka pirenchichani jimbokaksï juchari familieska (Ebr. 10:24, 25). Ju je kómarhini Tata Diosïni eskajtsïni jarhuataaka imeri espirituni jingoni parachi mintsita jingoni komentarini tánguarhikuarhu ka parakachi sési nitamataraaka parti ma tánguarhikuarhu. Engachi úska ini ambe, xarhatakunchi jauaka Jeobani ka imeri Uájpani eskachi xénchaasïnga imeri karichichani engaksï ima xáni jukaparharaajka (Juanu 21:15-17). Engachi jánguarhintaska jorhenguarhini na engachi xáni uáka, kurhajchanchi jauaka sánderu Ambakiti Jorhentpirini. w20.10 25 párr. 15-17

¿Ambe úspi Jesusi jiáni engaksï imeri apostulicha kómu pʼikuarherani japka? Enga na tsíntapkia, Jesusi arhiaspti imeri chúxapatichani: “Asï ché je, sino ni je aianguani juchiti ermanuechani” (Mat. 28:10a). Nájkirukaksï jurajkupka, ju je exeni eska Jesusi útasï seguirispka arhiani “juchiti ermanuecha”. Jesusi májkueni úspti eska Jeoba, pʼamojkuaspti ka puákuantani (2 Rey. 13:23). Juchajtuchi kánikua uandanhiasïnga imecha jimbo engaksï nóteru aianhpijkia. Útasïksï juchari erachichesti ka xénchaasïngachi. Nóchi mirikurhisïnga na engaksï xáni ánchikuarhikuka Jeobani ka máruksï asta uánikua uéxurhinicha jimbo (Ebr. 6:10). Kánikuachi jirinhantaasïnga (Luk. 15:4-7). Jatsiskachi para p’imarhiani imechani engaksï jarharika kúnguarhikuani paraksï nirani tánguarhikuecharhu. Ka engachi exeaka nemani enga jarharika kúnguarhikuarhu inchani jarhani Kʼumanchikua Reinueriru, jatsiskachi para andarhierani ka sési erokani. w20.11 6 párr. 14-17

Santiagu, Juanu ka imecheri amamba májku kʼériksï kurhakuspti Jesusini eskaksï icha imeri jurhijkandani ka uikixkandani ladu jimbo uaxakapiringa Reinurhu. Jesusi uandaspti eska solu imeri Táti auandarhu anapu úsïnga indeni sésikua íntspini (Mat. 20:20-23). Jesusi ísï xarhataspti eska mítespka ambe enga uénga úni ka ambe nómbe. Kaxumbikua xarhataspti ka no méni úspti ambe enga Jeoba no íntskupka sésikua (Juanu 12:49). ¿Nénachi uá juchajtu májkueni úni eska Jesusi? Xarhatasïngachi kaxumbikua ísï eska Jesusi engachi újka ambe enga uandajka iásï anapu tekstu. Ísï jimbo, engajtsïni nema konseju ma kurhachiaka, ju je no méni afuersa uékani eskaksï máteruecha ísï eratseaka eska jucha, níjtuchi arhini ambe ma ante dechi sési eratsentani. Sánderu sési, ju je imani konsejuechani arhiani engaksï Bibliarhu jaka ka juchari publikasionicharhu. Ísïchi xarhatani jauaka eskachi kaxumbitiska, jimbokachi miásïnga eskachi no iámu ambe míteska ka eskaksï sánderu marhuasïnga Jeobaeri ambakiti juramukuecha ka eska ambe uéjki engachi jucha uáka uandani (Jaŋ. 15:3, 4). w20.08 11, 12 párr. 14, 15

Engachi ménisï jatsipiringa para amiguni ma konseju ma íntskuni, ¿ambechi jatsipirini para miáni? Antedechi imani jingoni uandontskuarheni ju je kurhamarhikuarhini: “¿No jukariminduni uékaxaki eska sési úkuarhiaka ambe ma?”. Kʼuiripu ma enga uéjka eska jukarimindu sési úkuarhiaka ambe ma, imeri eratsekuecha jingoni jusgariuasïndi máteruechani ka no Jeobaeri juramukuechani jingoni ka no káni pʼamojpisïndi. Engachi eratsentakia ini ambe ka útasïchi exeni eskachi jatsiska para juchari amigu jingoni uandontskuarheni, ju je jurhimbitku arhini náki jindesti problema ka ju je kurhamarhikuechani úkuani para exerani ambe enga no sési úni jaka. Jatsiskachi para seguru jarhani eskachi imani ambe arhiaka enga Bibliarhu jaka. Ka miáni eska Jeobanisï jatsika para kuenta íntskuntani ka no juchantsïni (Rom. 14:10). Ju je úrani imani jánhaskakuani enga Tata Diosïri Karakatarhu jaka ka engachi nemani konseju ma íntskuaka ju je májkueni pʼamojpitiini eska Jesusi (Prov. 3:5; Mat. 12:20). Ju je miáni eskajtsïni Jeoba májkueni kámaaka ísï eskachi jucha na kaajka máteruechani (Sant. 2:13). w20.11 21 párr. 13

¿A no eskachi no tsitisïnga eskaksï máteruecha eratseaka ambe ma juchari kolori jimbo, na engachi jánharhika o na engachi jáxeka? Jimbochisï sési pʼikuarherajka míteni eska Jeoba no imani ambejku exesïnga na engachi xarharajka. Por ejemplu, jiáni enga Samueli exeapka Jeseri uájpechani, no májkueni ambe exespti eska Jeoba. Tata Diosï arhispti eska Jese uájpa ma niárapiringa Israeliri reini. Peru ¿né jindepirini? Enga Samueli exepka imani enga kʼéripka, Eliabini, uandaspti: “Jeoba ini erakuti”. Eliabi ísï xarharasïrendi enajki úpirini rei máeni. “Peru Jeoba arhispti Samuelini: ‘Asï exe na enga jáxeka ni na enga xáni iójtarhaka, jimbokani no indeni erakuska’”. ¿Ambechi jorhenguarhisïni? Tata Diosï ístu uandaspti: “Kʼuiripu imani ambejkusï exejti ambe enga imeri éskuecha exejka, peru Jeoba, mintsitanisï exejti” (1 Sam. 16:1, 6, 7). Ju je májkueni kaani juchari erachichani ka pirenchichani ísï eska Jeoba na újka. w20.04 14 párr. 1; 15 párr. 3

Enga Jesusi Galilea nirani japka, jimesïsï nitamaspti nani enga tarekata japka, jamberi jimesïsï enga sebada uénapkia andarani (Juanu 4:3-6). Útasï tʼámu kutsï ísï kuerataxati para uarhotanhani. Jimajkani, Jesusi arhiasïndi imeri chúxapatichani ambe ma engaksï no újka sési kurhanguni: “Erajpa je iápurisï jimboka iámindu tsïpambiskia ka jarhastia para uarhotani” (Juanu 4:35, 36). ¿Ambe arhikuekasïni Jesusi? Jesusi arhikuekaxati eskaksï jorhendauaka kʼuiripuechani Tata Diosïri ambe. Ju je eratsentani ini ambe. Nájkirukaksï judiuecha no kúnguarhijka samaritanuecha jingoni, Jesusi aiangusïndi Tata Diosïri ambe jima anapu uarhiitini ma enga jingontku kurhajchajka. Enga Jesusi útasï arhiani jarhajka eska iápurisï “tsïpambiskia” ka eska “jarhaskia para uarhotani”, uánikua Samaria anapuecha enga uarhiiti Jesusiri ambe aianguapka, nirasïndiksï Jesusini andarhierani paraksï sánderu jorhenguarhini imeri ambe (Juanu 4:9, 39-42). Inbestigadori ma ari ambe karasti: “Engaksï kʼuiripuecha ísï tsípikua jingoni nípka jirinhantani Jesusini [...] xarhatasptiksï eskaksï ísïspka enajkiksï listu japia paraksï uarhotanhani”. w20.04 8 párr. 1, 2

Tánguarhikuecharhuchi jorhenguarhisïnga sánderu sési aianhpini ka jorhentpini. Por ejemplu, jorhendasïndijtsïni sánderu sési úrani publikasionichani ka bideuechani engachi úrajka para jorhentpini. Ísï jimbo, sésichi prepararikurhiaka para tánguarhikuecha ka jingontku kurhaani ambe enga uandanhaaka jima ka tátsekua úni ambe engachi jorhenguarhiaka. Engachi iámu i ambe ísï úska, mándani arhini jucha sésichi preparadu jauaka parachi jindeeni “ambakiti soldadu ma Kristueri” (2 Tim. 2:3). Ístuchi míteska eskaksï uánikua ánjelicha jarhaska engajtsïni uáka jarhuatani. Míteskachia ambe enga uáka úni máechakua ánjeli, ¿úpirinchi eranhaskani ambe enga uáka úni ma ejersitu ánjelicheri? (Is. 37:36). No ma kʼuiripu jarhasti ni demoniu enga xáni uinhapitika eska Jeobaeri ejersitu. Jeoba kánikua uinhapitisti, ka enga ima juchantsïni jingoni jauaka sánderuchi uinhapitiuaka eska juchari ikiatspiticha no arhiparini na engaksï xániuaka (Juec. 6:16). ¡I ambe meru ísïsti! Ju je miáni i ambe jiáni engajtsïni úchiaka o arhiaka ambe ma engajtsïni no sési pʼikuastaaka ánchikuarhitarhu o eskuelarhu anapu kompanieru ma o familiari ma enga no Testigueka. Ju je miáni eskachi no jandiajku jarhaska, Jeobajtsïni jarhuataxati jimbokachi úxaka ambe engajtsïni ima arhijka. w21.03 29 párr. 13, 14

Jamberi apostuli Pablu imani ambe uandani japti ambe enga Isaías 22:13 arhijka, jimini uandasïndi eskaksï israelitecha sánderu tsitisïrenga tsípikuarhini ka eska Tata Diosïni andarhierani. Ísï eska iásï anapu kʼuiripuecha, israelitechaksï uandasïrendi: “Tsípikuarhi, jimboka ma no ióni irekasïnga”. Mintsikani eska jauaka tsíntskua, jarhuataatijtsïni para exeni né jingonchi kúnguarhia. Korintu anapu kristianuechaksï no jatsispti para imechani kúrhiani engaksï no jakajkuenga tsíntskuani. ¿Ambejtsïni jorhendasïni i ambe? Eskajtsïni no ma ambe marhuachiaka imani kʼuiripuechani kúrhiani engaksï no uandanhiajka ambe enga úkuarhiaka sánderu orhepani ka soluksï uékani tsípikuarhini. I járhati kʼuiripuechani kúrhiani uáti eskachi jurajkuaka úni imani ambe enga sési jaka. Jamberichi niáraaka imani ambe úni enga Tata Diosï kurhunhijka. Jimbosï Pablu arini konseju íntspipti: “Jingontku je parajtsï jurhimbitku jámani ka nóterujtsï pekadu úni” (1 Kor. 15:33, 34). w20.12 9 párr. 3, 5, 6

I bersikulu uandasïndi na enga Jeoba organisadu jatsika imeri familiani auandarhu ka Echerirhu. Jeoba jindeesti enga juramutiika o enga iáminduechani juramukuajka. Joperu ístu íntsaasti juramukua sáni máteruechani, joperu imecha engaksï juramukua sáni jatsika, jatsistiksï para kuenta íntskuntani Jeobani na engaksï úrajka ini juramukuani (Rom. 14:12; Efes. 3:14, 15). Jeoba, Jesusini íntskusti juramukua para kúnguarhikuani orhejtsïkuni, joperu Jesusi kuenta íntskuntaati Jeobani seguni na engajtsïni kámaaka (1 Kor. 15:27). Ístu, Jeoba acheetini íntskusti juramukua para orhejtsïkuni témbani ka uájpechani. ¿Néna uá acheeti ma sési orhejtsïkuni imeri familiani? Orheta jatsisti para míteni ambe enga Jeoba uéjka eska uáka. Ístu, jatsisti para míteni andisï Jeoba sésikua íntskua máru kʼuiripuechani paraksï juramukuani máteruechani ka néna uá májkueni úni eska Jeoba ka Jesusi. ¿Andisï xáni jukaparhakue eska acheeti míteaka i ambe? Jimboka Jeoba juramukua sáni íntsaaska familieri orhejtsïkutichani ka erokuarhisïndi eskaksï sési úraaka (Luk. 12:48b). w21.02 2 párr. 1-3

Jucha májkueni úsïnga eska Jeoba engachi erakujka mirikurhini máru ambe. Por ejemplu, nájkiruka ima méntku no ma ambe mirikurhijka, imajtsïni puáchentasïndi ka erakusïndi mirikurhini ambe engachi no sési újka engachi jucha móantajka (Sal. 25:7; 130:3, 4). Ka ima uékasïndi eskachi jucha májkueni uáka imecha jingoni engajtsïni no sési pʼikuastajka ka engajtsïni kurhachijka eskachi puákuantauaka (Mat. 6:14; Luk. 17:3, 4). Xarhatasïngachi eskachi jukaparharasïnga juchari kamatsïtani enga xáni sési úkata jaka, engachi úrajka para kʼéri ambe arhini imani engajtsïni intsïmbika. Máru kʼuiripuechaksï no sési úrasïndi ini intsïmperakuani ka jandiajkuksï uandasïndi ambe sési jarhaski ka ambe nómbe. Peru jimbokajtsïni Jeoba kueraaska, jimbosï sánderu sésiiti ambe enga ima uandajka eska sési jarhaska ka no ambe engachi jucha jandiajku erakuakuarhijka (Rom. 12:1, 2). Engachi újka ambe engajtsïni ima juramuchijka, pínandikua jingonchi irekasïnga (Is. 48:18). Ka mítesïngachi ambe engachi jimbo irekani jaka: para kʼéri ambe arhini ka sési pʼikuastani juchari Kuerajpirini ka Tátini (Prov. 27:11). w20.05 24 párr. 13, 14

¿Ambechi uá úni parachi xénchaani juchari erachichani? Jánguarhintani sánderu sési míteani. Ísïchi uáka sánderu sési kurhangukuani ka niáranchi xénchaani. Uákachi imecheri amigueni, no arhiparini na engaksï xáni jatiriuaka ka náki uéjki pʼindekuechanksï jatsiani. Ju je miáni eska Jonatani kánikua sési pájperaspka Dabidi jingoni, nájkiruka ima 30 uéxurhinisï sánderu kʼéripka Dabidi jingoni. ¿Andijtsïsï no jánguarhintajki imeri amigu úkuarhini kúnguarhikuarhu enga sánderu kʼérika o sapichuni eska chá? Engajtsï ísï úska, xarhatantsï jauaka eskajtsï uékaasïnga erachichani (1 Ped. 2:17). Joperu, xénchaani erachichani, ¿arhikuekasïni eskachi májkueni sési pájperaaka iáminduecha jingoni? Nómbe, inde ambe no uáti ísï úkuarhini. Ístu, no no sési jarhasti eskachi máru erachicha jingoni sánderu sési pʼikuarheraaka jimbokachi sáno májkueni jásï ambe tsitisïnga. Por ejemplu, Jesusi iámindu imeri apostulichani ísï exeasïrendi komueska imeri amiguecha, joperu Juanuni kánikua xénchasïrendi (Juanu 13:23; 15:15; 20:2). Joperu Jesusi no sánderu sési kámaspti Juanuni eska máteruechani (Mar. 10:35-40). w21.01 23 párr. 12, 13

Apostuli Pablu no májkueni aianguasïrendi Tata Diosïri ambe Atenasi anapuechani engaksï no judiuepka ka eska judiuechani engaksï sinagoguecharhisï jarhenga. Jánguarhintasïrendi iámindu ambe exeni ka ístu imecheri relijioniri anapu pʼindekuechani (Uku. 17:23). Tátsekua, exesïrendi néna uénani uandontskuarheni ma amberi engaksï imecha jakajkuenga ka enga terukuntenga Tata Diosïri Karakata jingoni. Jimajkani, apostuli jirinhakuntasïrendi néna aianhpini. Arhiaspti Atenasi anapuechani eska ambe enga ima aianhpienga, imani Tata Diosïri ambespka “enga no nema míteka” engaksï imecha jánguarhintenga kómarhini. Nájkirukaksï no judiuecha no mítepka ambe enga arhienga Tata Diosïri Karakata, Pablu no méni eratsespti eskaksï imecha no méni niárapiringa Jesusiri chúxapatini. Sánderu sési, ísï exeaspti enajkiksï listu japia para uarhotanhani ka jirinhakuntaspti néna aianguani ambakiti aianhperakuani. Ísï eska Pablu, ju je jánguarhintani iámindu ambe exeni. Ju je jánguarhintani exeni imani ambe engajtsïni jarhuataaka míteni ambeksï jakajkusïni jima anapu kʼuiripuecha nani engachi aianhpijka. ¿Jarhaski ambe ma imecheri kʼumanchikuarhu o trokarhu? ¿Úpirinchi imeri arhinhakua jimbo, o na engaksï xukuparhajka o na engaksï uandajka, míteni náki relijioniri anapueskiksï? w20.04 9, 10 párr. 7, 8