Agostu

Solu imecha engaksï Jesusiri ambakiti amigueuaka, uátiksï intsïnhaani iámindu kóntperatechani Jesusiri uarhikua jimbo. Jimboka Jesusi uandaspka eska íntspepiringa tsípikua imeri amiguecha jimbo (Juanu 15:13). Tata Diosïri ambakiti marhuaricha engaksï irekapka ante de Jesusi Echerirhu jurhani, jatsiatiksï para imeri ambe jorhenguarhini ka niárani xénchani. Acheeticha ka uarhiiticha engaksï jurhimbitku jámenga, tsíntaatiksï, peru ístuksï imecha jatsiati para Jesusiri amigueni paraksï úni irekani para méntkisï (Juanu 17:3; Uku. 24:15; Ebr. 11:8-12, 24-26, 31). Ambakiti ánchikuarhitachi jatsiska, Jesusini jarhuatani aianhpini ka jorhentpini Reinueri ambakiti ambe. Jiáni enga Jesusi Echerirhu japka, jurhimbikua ambe jorhentpispti Tata Diosïri ambe. Ka jiáni uératini enga auandarhu kʼuanhatsentaka, seguirixati orhejtsïkuni ini ánchikuarhitani komu kúnguarhikuarhu anapu Orhejtsïkuti. Jesusi exesïndi ka jukaparharasïndi na engachi xáni jánguarhintajka máteruechani jarhuataani paraksï niárani imani míteni ka imeri Tátini. Ka solu Jeobaeri ka Jesusiri jarhuajperata jimbochi úsïngachi ini ánchikuarhitani úni (Juanu 15:4). w20.04 22 párr. 7, 8

Uénakuarhu, juramutichani engaksï nortirhu ka surirhu japka Israeliri echeri jimbo, imechanksï arhiasïrendi “nortirhu anapu rei” ka “surirhu anapu rei” (Dan. 10:14). Asta Pentekostesirhu uéxurhini 33 jimbo, israelitechaksï jindespti Tata Diosïri ireta. Peru jiáni uératini para ixúani, Jeoba xarhataspti eskaksï Jesusiri ambakiti chúxapaticha jindepiringa imeri ireta. Ísï jimbo, sáno iámindu profesia enga Daniel kapitulu 11 jimbo jaka, no Israelinisï arhikuekajti, sino Kristueri chúxapatichani (Uku. 2:1-4; Rom. 9:6-8; Gal. 6:15, 16). Ístu, imecha engaksï niárapka jindeni nortirhu anapu rei ka surirhu anapu rei, mójtakurhipasptiksï tiempu jingoni. Peru íksï juramuticha méntkisï terukuntaspti tanimu ambe jimbo. Ma, kánikuaksï no sési kámasïndi Tata Diosïri iretani. Tsimani, na engaksï kámajka Tata Diosïri iretani, xarhatasïndiksï eskaksï no sáni xénchasïnga Tata Diosïni enga jurhimbitiika. Ka tanimu úni jámani, i tsimani reichaksï méntkisï uarhiperani jarhasïndi. w20.05 2, 3 párr. 3, 4

Jeoba niárasïndi jindeni ambe enga xáni uétarhiaka paraka úkuarhiaka ambe enga ima uéjka. Ístu, nájkirukachi Jeobaeri marhuarhicha kʼamanharhintstika, úsïndi eskachi niáraka jindeni ambe enga uétarhijka parachi marhuakuni ka úni ambe enga ima uéjka (Is. 64:8). Ini ambe úparini, Jeoba úsïndi eska úkuarhiaka ambe enga ima uéjka. No ma ambe úsïndi ójkutani paraka úkuarhiaka ambe enga Jeoba eratsetini jaka úni (Is. 46:10, 11). ¿Ambejtsïni jarhuataa parachi sánderu kʼéri ambe exeni ka janhanharhini juchari Táti auandarhu anapuni? Eratsentani ambe enga úkia ka na engajtsïni jarhuatakia parachi úni ambe ma. Por ejemplu, ískuchi pakarasïnga engachi eratsentajka ambe enga Jeoba xáni kueraaka (Sal. 8:3, 4). Ka engachi eratsentajka na engajtsïni Jeoba jarhuatakia parachi úni ambe enga ima uéjka, niárasïngachi kánikua janhanharhini. Ísïsti, Jeobaeri nombri kʼéri ambesti. Arhikuekasïndi iámindu ambe enga ima jindeka, ambe enga xáni úkia ka ambe enga xáni uáka (Sal. 89:7, 8). w20.06 9, 10 párr. 6, 7

Tarhiata, ambe máesti enga újka eskaksï kʼuiripuecha ka animalicha tsípiti jauaka. Uandanhasïndi eska iámindu ambe enga tsípiti jaka, mándani uéxurhini kánikua tarhiata jirejtasïnga. Peru engaksï na jirejtajkia, úsïndiksï eska jauaka tarhiata enga no marhuajka (dióxido de carbono). Peru tarhiata ambakiti no méni kʼamakurhisïndi ka auanda no méni uinisïndi dióxido de karbonu jingoni. ¿Andisï tarhiata no méni kʼamakurhijki? Imani ambe jimbo enga úkuarhijka tarhiata jingoni. Jeoba, mámaru jásï plantechani uásti ka engaksï mámaru kʼéraka paraksï dióxido de karbonu úrani ka ambakiti tarhiataksï úntani. Ambe enga úkuarhijka para tarhiata no méni kʼamakurhini, sési xarhatasïndi ambe enga uandajka iásï anapu tekstu. Parachi sánderu jukaparharani Echerini ka iámindu ambe enga ixú jaka, jatsiskachi para eratsentani ambe enga xáni Jeoba kueraaka (Sal. 115:16). I ambejtsïni jarhuataati parachi pauani pauani diosmeiamukua arhini Jeobani iámindu ambakiti ambe jimbo engajtsïni ima íntskujka. Ka ístuchi uáka xarhatani eskachi jukaparharasïnga ambe engajtsïni ima íntskujka engachi méntkisï jánguarhintaska sési jándu jarhani nani engachi jucha irekani jaka. w20.05 22 párr. 5, 7

Jeoba sési peentaxati iámu ambe jánhaskakua jingoni, tekaantskua ka jurhimbikua jingoni. Ístu, mámaru ambe jimbo xarhatastia na enga xáni uinhapitiika. Ka imeri uékperakua sánderu xarharasïndi iámindu ambe jimbo enga újka (1 Juanu 4:8). Jeoba méntkisï ánchikuarhixati para pímbinhajkuntani imeri nombrini. Ini jurhiatikuechani jimbo, Noambakiti útasï chkuanderakua ambe jauatakusïndi Jeobani para no sési pakatani imeri nombrini. Jánguarhintasïndi parakaksï kʼuiripuecha no jakajkuaka eska Tata Diosï uinhapitiska, jurhimbitiska, jánhastiska ka uékpitini. Por ejemplu, uékasïndi eskaksï kʼuiripuecha no jakajkuaka eska Jeoba jarhaska. Ka enga nema jakajkujka Tata Diosïni, Noambakiti jánguarhintasïndi eska ísï exeaka eska no sési jarhaska ambe engajtsïni juramuchijka ka eska jukari úkua jukaska úni ambe enga ima uéjka. Ístu jorhentpesïndi eska Jeoba no sáni pʼamojpisïnga, jimboka infiernurhu kurhiraasïnga kʼuiripuechani. Engaksï kʼuiripuecha niárajka jakajkuni ini chkuanderakuani, jamberiksï sánderu no uékaati eska Tata Diosï juramukuauaka. Noambakiti jánguarhintaati parajtsï jurajkuni Jeobani. ¿Uá ísï úni? w20.06 5 párr. 13-15

Uánikua kúnguarhikuecharhuksï jarhasti erachicha engaksï jánguarhintani jaka idioma ma jorhenguarhini. Jamberiksï úkua jukanchajti uandontskuarheni, peru ju je no indeni ambejku exeni, sánderu sési, ju je exeni na engaksï xáni xénchajka Jeobani ka na engaksï jánguarhintani jaka marhuakuni. Inde ambe uáti eskachi mintsita jingoni janhanharhiauaka ka jukaparharaani. Nóchi niáraaka eratseni eskachi no uétarhinchaasïnga solu jimbokaksï no sési uandasïnga juchari idioma (1 Kor. 12:21). Kánikuachi sési pʼikuarherasïnga jimbokajtsïni Jeoba kánikua jukaparharasïnga imeri kúnguarhikuarhu. No arhiparini sinchi tatakeski o nanakeski, sinchi tembuchatixaki o uambuchatini o nómbe, sinchi sapichku jarhaski ochi jatiriskia, o sinchi újki sési uandani idioma ma o nómbe: iáminduechachi jukaparhakueska para Jeoba ka para erachicha (Rom. 12:4, 5; Kol. 3:10). Ju je méntkisï sánderu jánguarhintani para jukaparharani ánchikuarhitani engachi kúnguarhikuarhu újka ka ístu ambe engaksï máteruecha újka. w20.08 31 párr. 20-22

Ísïsti eskaksï Atenasi anapuecha diosï úkatechani kómarhiasïrenga, ísku jándikua ambeksï niátani ka relijioni no jurhimbiticheri jorhentperakua ambeksï jakajkuni. Peru apostuli Pablu no méni eratsespti eskaksï imecha no méni niárapiringa Jesusiri chúxapatini ka seguirispti aianhpini nájkirukaksï imecha no sési arhienga. Pablu mismu niáraspti kristianu úkuarhini nájkiruka antesi “no sési arhienga Diosïni, ka no sési kaani jakajkutichani ka xukajchaani” (1 Tim. 1:13). Ísï eska Jesusi na eratsepka eska Pablu niárapiringa imeri chúxapatini, Pablu májkueni eratsespti Atenasi anapuecheri ambe. Ka niáraspti ísï úkuarhini (Uku. 9:13-15). Primeru siglurhu, iámindu jásï kʼuiripuechaksï niáraspti Jesusiri chúxapatini. Jiáni enga Pablu, Korintu anapu kristianuechani karakuapka engaksï griegu uandenga, uandaspti eskaksï máru imecha antesi sïpani jámasïrenga ka eskaksï ísku jándikua ambe niátasïrenga. Ka tátsekua uandaspti: “Peru iásïjtsï juparhiminhantaskia chári mintsitechani” (1 Kor. 6:9-11). ¿Eratsepirinchi eskaksï ima kʼuiripuecha niárapiringa mójtakurhini ka Jesusiri chúxapatiini? w20.04 12 párr. 15, 16

Orhejtsïkuticha no jatsisti para tʼuini no sési ambe eratseni jarhania imani erachiri enga no seguru jarhajka sini jukaparhakueski marhuakuni Jeobani o nómbe. Jatsistiksï para jánguarhintani kurhangukuani andiksïsï ima erachicha ísï eratsejki ka jámani. Engaksï ísï úska, uátiksï sési úrani Bibliani para uinhaperantaani. Profeta Eliasi sïpakuarhikuxapti reina Jesabelini (1 Rey. 19:1-3). Eratsespti eska no marhuaxapka ambe enga ima úni japka, enga jamberi uékenga uarhini (1 Rey. 19:10). Jeoba no xukaspti Eliasini. Sánderu sési, arhispti eska no jandiajku jarhaspka, eska Jeoba jarhuatapiringa ka eska útasï uánikua ambe jarhaspka para úni. Pʼamojperakua jingoni kurhajchaspti enga Eliasi aiangukuarhini japka ambe enga uandanhiatenga ka Jeoba arhispti eska máteru ambe úpiringa (1 Rey. 19:11-16, 18). ¿Ambechi jorhenguarhisïni? Eskachi iáminduecha ka sánderia orhejtsïkuticha, jatsiska para pʼamojperakua jingoni kaani Jeobaeri karichichani. Enga nema niáraska ikiatku uandani ambe ma o uandani eska ísï pʼikuarherasïnga eska Jeoba no méni puákuntaaka, orhejtsïkutichaksï jatsisti para kurhajchani enga ima uandani jauaka ambe enga pʼikuarherajka. Tátsekua, jánguarhintaatiksï exerani eska Jeoba kánikua jukaparharasïnga. w20.06 21, 22 párr. 13, 14

Jeoba uékasïndi eskachi sési nitamakuarhiaka juchari amiguecha ka familia jingoni (Sal. 133:1). Jesusi niáraspti ambakiti amiguechani jatsiani (Juanu 15:15). Ístu Biblia uandasïndi na enga xáni marhuajka ambakiti amiguechani jatsiani (Prov. 18:24). Ka ístujtsïni arhisïndi eskachi no jatsiska para méntkisï uékani jandiajku jarhani (Prov. 18:1). Uánikuechaksï eratsesïndi eskaksï redesi sosialicha marhuasïnga para uánikua amiguechani jatsiani ka para no jandiajku pʼikuarherani. Peru engachi ini ambe úrajka, jatsiskachi para jingontku jámani. Uandanhasïndi eska imecha engaksï ióni exeani jarhajka fotuechani ka ambe engaksï máteruecha karhatajka redesi sosialicha jimbo, uákaksï sánderu no sési ka jandiajku pʼikuarherani. ¿Andi? Ma ambe úpirindi jindeni jimbokaksï kʼuiripuecha imani fotuechani karhataasïnga engaksï sánderu tsitiajka, por ejemplu, nani engaksï sánderu sési xarharajka, ístu imecheri amiguecheri ka imani xáni sési járhati lugaricheri engaksï nika miiuni. Imecha engaksï ini fotuechani exeajka, úpirindiksï eratseni eskaksï imecha no xáni tsípikuarhisïnga níjtuksï xáni sési nitamakuarhini eska máteruecha. w20.07 6 párr. 12, 13

La Atalaya 1 de oktubri 1988 anapu, arhisïrendi eskaksï orhejtsïkuticha jatsiska para kurhanguni eska Kristu espiritu santuni úraparini uáka jarhuatani náki uéjki kúnguarhikuarhu anapu orhejtsïkutini para sési péntani uandanhiata ma Biblia jingoni o erakuni úni ambe ma enga kánikua jukaparhakueka (Uku. 15:7-15). Espiritu santu jarhuataasïndi iámindu kúnguarhikuarhu anapu orhejtsïkutichani ka no máechakuantku. Enga orhejtsïkuti ma janhanharhiajka máteru orhejtsïkutichani, no méntkisï uékaati orheta uandani ambe ma jiáni engaksï iámindu orhejtsïkuticha tánguarhiaka. No imajku uandani jauati ni eratseni eska sánderu sési jauaka ambe enga ima uandaaka. Sánderu sési, kaxumbikua jingoni uandaati ambe ma ka jingontku kurhaani ambe engaksï máteruecha uandaaka. Ambe enga sánderu jukaparharaaka, jindeuati exeni ambe enga Biblia uandajka ka ísï úni eska “jántspiri” enga mintsinharhikueka ka jánhastini na uandajka (Mat. 24:45-47). Engaksï orhejtsïkuticha uékperakua ka janhanharhikua jingoni újka iámindu ambe, Tata Diosïri espiritu santu imecha jingoni jarhasïndi ka jarhuataasïndi paraksï imani ambe úni enga sési jaka (Sant. 3:17, 18). w20.08 27 párr. 5, 6

Apostuli Pablu uánikua ikiatspitichani jatsiaspti engaksï kánikua juramukua jatsipka. Ichaksï uánikua xanhari atarkuarhispti ka kárselirhu ónhani. Asta imecha engaksï jatsipiringa para jarhuatani, niárasptiksï no sési kámani. Ístu, máru kúnguarhikuarhu anapuechaksï nóteru uékasptia jarhuatani (2 Kor. 12:11; Filip. 3:18). Peru no méni jurajkuspti eskaksï imeri ikiatspiticha ójkutapiringa para ima seguirini Jesusiri chúxapatini. Méntkisï aianhpispti nájkiruka no sési kánhenga. No méni jurajkuaspti erachichani nájkirukaksï imecha no sési pʼikuastapka. Peru sánderu jukaparhakua ambe, no méni jurajkuspti Tata Diosïni astaka uarhipka (2 Tim. 4:8). Nájkiruka xáni no sési ambe nitamakuarhipka, úspti orhepani uérani jimboka Jeobani mintsikaspka ka no imeri uinhapikuani. ¿Jatsiskichi para tekaantani jarhani engajtsïni no sési arhijka o no sési kámani? Juchachi uékasïnga Bibliani úrani para mintsitarhu ka eratsekuarhu niárakuani imani kʼuiripuechani engaksï ambakiti mintsita ma jukaka. ¿Nénachi uá ísï úni? Bibliani úraparini para mókukuantani kʼuiripuecheri kurhamarhikuechani, sési kaani ka janhanharhiani imechani engajtsïni no sési kámajka ka ambakiti ambe úni máteruecha jimbo, asta imechani jimbo engajtsïni ikiachijka (Mat. 5:44; 1 Ped. 3:15-17). w20.07 18 párr. 14, 15

¿Sési jimbochi uá uandani eska Jeoba kaxumbitiska? Jo. Ka Dabidi sési mítespti i ambe (Sal. 18:35). Enga Dabidi ini ambe karapka, jamberi imani jurhiatikuani miántapti enga profeta Samueli imeo nípka para erakuni imani enga reipiringa Israeli. Nájkiruka Dabidi sánderu sapichuepka siete ermanuecheri, Jeoba imani erakuspti para reini enga rei Sauli nóteru reipiringuia (1 Sam. 16:1, 10-13). Seguru eska Dabidi májkueni eratsenga eska ima enga Jeobaeri ambe karapka salmu ma jimbo: “Ima kʼutitsesïndi para exeni auandani ka echerini, para tʼupurirhu uératini jauatantani kaxumbitini. [...] Jauatantasïndi imani enga no jatsikuarhirika para imecha jingoni uaxakatani engaksï juramukua jatsika” (Sal. 113:6-8). Ma ambe enga xarhatajka eska Jeoba kaxumbitiska, jindesti na enga kaajka imeri marhuarichani engaksï kʼamanharhintstika. No solu jiókuarhisïndi eskachi kómarhiaka, ístujtsïni ísï exesïndi eska imeri amiguecha (Sal. 25:14). Úsïngachi ambakiti pájperakua ma jatsini imani jingoni jimboka íntspiska imeri Uájpani juchari pekaduechani jimbo. ¡Kánikuajtsïni pʼamojkusti! w20.08 8 párr. 1-3

Jeoba erakustia káni ka na jandora kʼamajkua ini parhakpinini enga xáni no sési jánhaskuarhini jaka (Mat. 24:36). Nájkiruka uékani jakaia tsítantaani uarhirichani, tekantaati ka asta jiáni uáti ambe ma na enga jatini uandarini jakaia (Job 14:14, 15). Ka erokuarhixati eska niáraaka ima jurhiatikua (Juanu 5:28). Uánikua ambe jarhasti engachi jimbo jatsika para jukaparharani Jeobaeri tekaantskuani. Por ejemplu, Jeobaeri tekaantskua jimbo, uánikua kʼuiripuechaksï andajkuarhisti móantani, asta jucha jamberi. Jeoba uékasïndi eskaksï uánikua kʼuiripuecha niáraaka irekani para méntkisï. Ísï jimbo, ju je xarhatani eskachi jukaparharasïnga Jeobaeri tekaantskuani jánguarhintaparini exeantani imani kʼuiripuechani engaksï uéjka irekani para méntkisï ka jarhuatapariani paraksï xénchani ka marhuakuni Jeobani (Uku. 13:48). Ini ambe úparini, imechantu marhuakuauati Jeobaeri tekaantskua. w20.08 18 párr. 17

Ambe enga jorhenguarhiri ma jorhenguarhijka Bibliaeri ambe, no solu jatsisti para eratsekuarhu niárakuni, sino ístu mintsitarhu. ¿Andi? Jimboka mintsita —enga ístu arhikuekajka ambe engachi tsitijka ka pʼikuarherani— úsïnga eskachi niáraaka ísï úni ambe engachi jorhenguarhijka. Jesusi uánikua ambe jorhendaaspti kʼuiripuechani ka imechaksï tsitisïrendi ambe engaksï jorhenguarhienga. Joperuksï chúxapasïrendi jimboka ístu mintsitarhu niárakuasïrenga ima ambe enga jorhendauenga (Luk. 24:15, 27, 32). Ka jorhenguarhiri jatsisti para jakajkuni eska Jeoba meru jarhaska ka eska uáka niárani imeri Tátini, imeri Tata Diosï ka imeri amigu (Sal. 25:5). Engajtsï jorhenguarhini jauaka Bibliaeri ambe, exera je jorhenguarhirini na enga xáni sési járhati kualidadichani jatsiaka juchari Tata Diosï (Éx. 34:5, 6; 1 Ped. 5:6, 7). Náki uéjkichi tema jorhendani jarhani, ju je exerani na enga jásï kʼuiripu máeka Jeoba, ju je jarhuatani paraka jukaparharaaka na enga xáni uékpitika Jeoba, sési kámpini ka pʼamojpini. Jesusi uandaspti eska “primeru mandamientu enga sánderu kʼéri ambeka” jindeska “Uékaakari chíti Tata Diosïni” (Mat. 22:37, 38). Ju je jánguarhintani para jorhenguarhiri niárani kánikua xénchani Tata Diosïni. w20.10 9 párr. 12

Jesusi janhanharhikua jingoni kaaspti iámindu nanakechani (Juanu 4:27). Joperu sánderu jukaparharaasïrendi imani nanakechani engaksï uénga ambe enga imeri Táti jémba uéjka. Ka jiáni enga ima uandapka né engaksï jindepka imeri familia, uandaaspti tatakechani ka ístu nanakechani (Mat. 12:50). Ístu, Jesusi ambakiti amigu máespti para imecha. Ju je exeni na enga sési pájperenga Maria ka Marta jingoni engaksï no uambuchatipka (Luk. 10:38-42). Na enga káuenga ka uandontskuarhekuani, úsïrendi eskaksï pirenchicha sési pʼikuarherapiringa. Maria no sáni chéparini uaxakaspti imeri Jorhentpiriri jantsiricha jimbo para imeri ambe jorhenguarhini. Ka Marta no chéspti arhini Jesusini eska ikiaxapka jimboka Maria no jarhuataxapka. Ka ini ambe jimbo enga úkuarhipka, Jesusi ambakiti ambe jorhendaaspti. Ístu, nirasïrendi pʼorhembiani para xarhatakuani eska pendienti jarhasïrenga imechani jimbo ka ístu Lasaruni jimbo (Juanu 12:1-3). Ísï jimbo, enga Lasaru uinhamu pʼamenchapka, Maria ka Marta mintsinharhisptiksï Jesusini ka jarhuajperataksï kurhakuspti (Juanu 11:3, 5). w20.09 20 párr. 3; 21 párr. 6

Jesusiri chúxapatichaksï “tantiarixapti eska enga ima niárapiringa luejku xarharapiringa Diosïri juramukua” ka eska nóteru Roma juramukuapiringuia. Ka juchachi uékaxakaia eska januaka ima jurhiatikua enga Tata Diosïri Reinu kénditaaka no sési jásï ambe ka úni eska jauaka jimbanhi parhakpini ma nani enga jurhimbitku janhaaka (2 Ped. 3:13). Ísïsti, jatsiskachi para tekaantani ka erokuarhini imani jurhiatikuani enga Jeoba exerini jakaia na enga jatini uáka ambe ma. Jeoba kánikua tiempu íntskuspti Noeni paraka arkani úpiringa ka para aianhpini jurhimbikua ambe (2 Ped. 2:5; 1 Ped. 3:20). Jeoba jingontku kurhajchaspti Abraanini enga ísï someni uénapka kurhamarhini andisï ima eratsepi kʼamajkuani Sodoma ka Gomorra anapu no sési úrichani (Gén. 18:20-33). Jeoba ióni tekakuantaspti Israeli anapuechani engaksï someni no kurhajchapka (Neh. 9:30, 31). Ka ini jurhiatikuecha jimbo exesïngachi eska Jeoba tekaantstiska jimboka tiempu íntskuaxaka imani kʼuiripuechani enga ima uéjka eskaksï imeri amigueuaka (Juanu 6:44; 1 Tim. 2:3, 4; 2 Ped. 3:9). Jeobaeri ejemplu úsïndi eskachi tekaantstiuaka engachi jamberi aianhpiaka ka imeri ambe jorhentpini. w20.09 10 párr. 8, 9

Enga Jeoba tsítantauaka kʼuiripuechani, uáti eskaksï iámindu ambe miáuaka ka eskaksï xásï kʼuiripu máeuaka eskaksï na jásïpka ante de uarhini. Ju je eratseni ambe enga xáni arhikuekajka inde ambe. Jeobajtsïni xáni xénchasïndi mándani arhini enga jingontku jarhajka ambe engachi xáni eratsejka, pʼikuarherani, uandani ka úni. Ísï jimbo, engajtsïni tsítantapiringa, no sáni úkua jukanchapirindi úni eskachi iámu ambe miápiringa, májkueni eratseni ka ísïchi jáxeni eska ante de uarhini. Rei Dabidi mítespti eskajtsïni Jeoba sési míteska (Sal. 139:1-4). ¿Nénachi pʼikuarherasïni míteni eskajtsïni Jeoba kánikua jukaparharasïnga? Nóchi jatsiska para uandanhiani jimbokajtsïni Jeoba sési míteska. Ju je miáni eskajtsïni ima kánikua uékasïnga ka eskachi mándani arhini kánikua jukaparhakueska para ima. Ístu, sési miáxati ambe engachi nitamakuarhika ka andichisï xásï kʼuiripu máe. ¿A no eska inde ambe úsïnga eskachi no uandanhiauaka? Nóchi méni jatsiska para jandiajku pʼikuarherani jimboka Jeoba méntkisï juchantsïni jingoni jarhasïnga, jingontku jarhasïndi parajtsïni jarhuatani (2 Crón. 16:9). w20.08 17 párr. 13, 14

Jeoba tsitisïndi imeri iretani jorhendani. Uékasïndi eskaksï imeri uájpecha enga ima xáni xénchaajka, míteaka, xénchaaka ka eskaksï irekaaka para méntkisï. Iámindu i ambe uáti ísï úkuarhini jimbokajtsïni ima jorhendasïnga (Juanu 17:3). Primeru siglurhu, ima úraspti kúnguarhikua kristianani para jorhendani imeri iretani (Kol. 1:9, 10). Ka espiritu santu, enga jindeka “jarhuajpiri” enga Jesusi aiakuapka imeri chúxapatichani (Juanu 14:16). Jarhuataaspti Jesusiri chúxapatichani parakaksï kurhangupiringa Tata Diosïri Karakatani ka miátantaaspti imani ambe enga Jesusi úpka ka uandani ka engaksï tátsekua karakata pakarapka Ebanjeliuecharhu. Engaksï erachicha mítepka ini ambe, sánderuksï mintsikaspti ka xénchani Tata Diosïni, imeri Uájpani ka erachichani. Jeoba uandasptia eska “últimu jurhiatikuecha jimbo”, iámindu nasionirhu anapu kʼuiripu karharapiringa por ísï arhini juátarhu paraka ima jorhendaapiringa imeri ambe (Is. 2:2, 3). Iásïchi exexakaia eska ísï úkuarhixaka. w20.10 24, 25 párr. 14, 15

¿Ambe jimbo nema no jiókuarhipirini ambakiti konseju ma enga amigu ma íntskupiringa? Kʼéramakua jimbo. Imecha engaksï kʼéramakuarhijka tsitisïndiksï para imani ambe arhiani engaksï kurhandinchajka ka nóteruksï uékasïndia kurhandini imani ambe enga ísïika (2 Tim. 4:3, 4). Nóksï nemani kurhajchasïndi jimbokaksï eratsesïnga eskaksï sánderu míteska ka eskaksï sánderu kʼéri ambeeska eska máteruecha. Joperu apostuli Pablu karaspti: “Ima enga ísï exekuarhijka eska kʼéri ambe jindeeni no ma ambe jindeeparini, kʼarhakuarhisïn[di] jandiajkumindu” (Gal. 6:3). Rei Salomoni ari ambe uandaspti inderi ambe: “Sánderu sésisti sapi ma enga pobrika joperu jánhastiini ka eska rei ma enga tʼarhepikia peru no jánhastiini, enga nóteru újkia sési eratsekuntani para jiókuarhiani konsejuechani” (Ecl. 4:13). Ambakiti ejemplujtsïni ma íntskusti apostuli Pedru jiáni enga apostuli Pablu jurhimberantapka iáminduechani japarini (Gal. 2:11-14). Pedru úpirindi ikiani Pablu jingoni imani ambe jimbo enga arhipka ka nani enga arhipka. Joperu komu Pedru jánhastiipka, jiókuarhispti konsejuni ka no jatanhekuspti Pabluni. Sánderu sési, tiempu jingoni arhispti juchiti ermanu engachi xáni uékajka (2 Ped. 3:15). w20.11 21 párr. 9, 11, 12

Kánikua jukaparhakuesti eska Bibliaeri jorhenguarhiri niuaka tánguarhikuecharhu paraka niáraka Tata Diosïni marhuakuni. Ambe enga jima jorhenguarhiaka jarhuataati sánderu mintsikani Tata Diosïni ka para sánderu uékani (Uku. 15:30-32). Ístu, aianhpiri ma uaati arhini eska niáraspka kurhajchani Tata Diosïri juramukuechani jimboka niáraspka kánikua xénchani Jeobani (2 Kor. 7:1; 4:7). Ka enga Bibliaeri jorhenguarhiri ma niárajka míteani uánikua erachichani engaksï sési marhuakujka Tata Diosïni, niárasïndi exeni ambe enga arhikuekajka uékani Tata Diosïni ka máteru kʼuiripuechani ísï eska na juramuka tata Jesukristu (Juanu 13:35; 1 Tim. 4:12). Erachicheri ejemplu engaksï sáno májkueni ambe nitamakuarhini jaka eska jorhenguarhiri, uáti jarhuatani exeni eska uáka mójtakurhini ka niárani tata Jesukristueri chúxapati máeni (Deut. 30:11). Iámindu kúnguarhikuarhu anapuechaksï uáti jarhuataani jorhenguarhirichani parakaksï niáraaka marhuakuni Tata Diosïni (Mat. 5:16). w20.11 5 párr. 10-12

Jamberi apostuli Pablu arhikuekendi uarhipeni animalicha jingoni engaksï sirkuecharhu japka indeni ireta jimbo (2 Kor. 1:8; 4:10; 11:23). O jamberi arhikuekani japti na engaksï xáni no sési kámenga judiuecha ka máteru ikiatspiticha engaksï ísïpka komueska animali apejpiticha (Uku. 19:26-34; 1 Kor. 16:9). Nájkiruka Pablu no sési ambe nitamakuarhienga, méntkisï tsípikua jingoni mintsikasïrendi eska jatsipiringa ambakiti erokuarhikua ma (1 Kor. 15:30, 31; 2 Kor. 4:16-18). Juchajtuchi irekaxaka ini jurhiatikuecha jimbo enga xáni no sési ambe úkuarhijka. Máru juchari erachichaksï no sési ambe úminhasïndi. Máruksï jimesïsï irekasti enga no sáni segurueka jimboka guerra ambe úkuarhisïnga. Ka máru lugaricharhuksï Jeobaeri marhuarichani no jiárhetaasïndi para aianhpini, joperuksï juchari erachicha marhuakuxati Jeobani, nájkirukaksï uáka ónhanhani o uándikunhani. Ka i erachichaksï seguirixati kómarhini Jeobani ka jorhendasïndijtsïni parachi juchajtu májkueni úni. Nóksï chésïndi jimbokaksï míteska eska nájkirukaksï uarhiaka, Jeoba aiakuaxaka eska uáka sánderu ambakiti ambe íntsaani. w20.12 9 párr. 3, 4

¿Jimesïsïchi aianhpisïni nani engaksï no káni jarhajka kʼuiripuecha imeecho o engajtsïni no uéjka kurhajchani? Engajtsïni inde ambe no sési pʼikuastajka, ¿ambechi uá parachi sánderu tsípikua jingoni aianhpini? Uétarhisïndi eskachi exeaka andisï uétarhijki aianhpini. ¿Ambe arhikuekasïni i ambe? Ju je miáni eska ambe enga sánderu jukaparhakueka jindeeska Tata Diosïri nombrini aianhpini ka Reinuni. Jesusi uandaspti eskaksï no uánikua kʼuiripuecha exentapiringa xanharuni enga tsípikuarhu pájpijka (Mat. 7:13, 14). Ístu, engachi aianhpijka kʼéri kóntperatachi ma jatsisïnga jimbokachi ánchikuarhini jarhasïnga Jeoba, Jesusi ka ánjelicha jingoni (Mat. 28:19, 20; Jaŋ. 14:6, 7). Ka ístu, Jeobasï újti eskaksï niáraaka imeri kúnguarhikuarhu jarhani ima kʼuiripuecha engaksï uéjka marhuakuani (Juanu 6:44). Ísï jimbo, úpirindi jarhani nema engajtsïni iásï no uékaka kurhajchani, joperujtsïni máteru jimbo kurhajchani engachi uandontskuarhekuaka. Diana uandasïndi: “Engachi chketakuarhitini jarhajka, inde ambesï sánderu marhuakujti Noambakitini parajtsïni no sési úchini”. Joperu Jeoba sánderu uinhapitisti eska Noambakiti ka ima ambe enga úrajka parajtsïni no sési úchini. w20.12 26 párr. 18; 27 párr. 19, 21

Uánikua kristianuechaksï jatsisti para interu semana ánchikuarhini paraksï kéndaani imecheri familiechani. Nájkirukaksï ísï újka, jánguarhintasïndiksï mámaru ambe jimbo jarhuajpini Tata Diosïri kúnguarhikuarhu. Por ejemplu, ánchikuarhitarhu para jarhuajpini, máteruechaksï konstruksionirhu ánchikuarhisïndi ka iáminduechachi uáka íntspini donasioni para ánchikuarhita enga ma parhakpinirhu úkuarhijka. Ini ambe jimboksï xarhatasïndi eskaksï xénchasïnga Tata Diosïni ka ístu kʼuiripuechani. Ístu, mándani semanachi xarhatakuasïnga uékperakua juchari erachichani engachi nirajka tánguarhikuecharhu nájkirukachi kuataratini jarhajka ka engachi partisiparijka nájkirukachi chéni jarhajka. Ka engachi jánguarhintajka uinhaperaantani máteruechani antede tánguarhikua uénani ka ísï tátsekua, nájkirukachi juchajtu uandanhiatechani jatsiajka (Ebr. 10:24, 25). Kánikuachi jukaparharasïnga iámindu ambe engaksï újka juchari erachicha. w21.01 10 párr. 11

Imecha engaksï kʼéramakuarhijka kánikuaksï úkua jukanchasïndi ambakiti ambe arhiani máteruechani ka sánderuksï tsitisïndi eskaksï imecha ambakiti ambe arhinhaaka. Pʼindestiksï terukukuarhintani máteruecha jingoni ka méntkisïksï uékasïndi xarhatani eskaksï sánderu sési úsïnga ambe ma eska máteruecha. Enbesi deksï jorhendaani máteruechani ka jurajkuani eskaksï uáka ambe ma, iámindu ambeksï imecha uékasïndi úni, jimbokaksï eratsesïnga eska solu ísï uáka sési pakarani ambe ma o eskaksï imecha na tsitijka. Ístu, sáno méntkisïksï kánikua tsitisïndi kʼéri ambe exenhani ka ikiasïndiksï engaksï máteruecha ambakiti ambe újka. Ísï jimbo, engachi exeaka eskachi uénaxaka kʼéramakuarhini ju je kurhakuni Jeobani eskajtsïni jarhuataaka ménderueni eratseni parachi no xásï kʼuiripu máeni (Rom. 12:2). Kánikuachi jukaparharasïnga engajtsïni Jeoba xarhatachijka eska kaxumbitiska (Sal. 18:35). Ka míteskachi eska Jeoba kaxumbitiska, jimbokachi exesïnga na enga kaajka imeri marhuarichani ka uékasïngachi májkueni úni eska ima. Ístuchi uékasïnga májkueni úni eska ima kʼuiripuecha enga Biblia uandaajka, engaksï méntkisï kaxumbikua jingoni marhuakupka Jeobani. Ju je méntkisï kʼéri ambe arhini Jeobani ísï eska na jukanchaka (Jaŋ. 4:11). w20.08 13 párr. 19, 20

Temungurhirikua intsïmperata máesti Tata Diosïri ka i intsïmperata perfektuesti, joperu kʼuiripuechachi imperfektueska (1 Juanu 1:8). Ísï jimbo, Tata Diosïri Karakata arhiasïndi tembuchatichani eskaksï uandanhiatechani jatsiauaka. Jeoba erokuarhisïndi eskaksï acheeticha jarhuataaka imecheri familiani paraksï kómarhini Jeobani, kéndaani ambe engaksï uétarhinchaaka ka eskaksï sési pʼikuastauaka (1 Tim. 5:8). Joperu, pirenchicha engaksï uambuchatini jaka, jatsistiksï para arhutani tiempu paraksï pauani pauani arhintani Bibliani, eratsentani ambe engaksï arhintajka ka paraksï mintsitarhu uératini kómarhini Jeobani. Joperu i ambe úpirindi úkua jukani jimbokaksï uarhiiticha uánikua úkua ambe jatsisïnga, joperu jukaparhakuesti eskaksï arhutaaka tiempu. ¿Andi? Jimboka Jeoba uékasïnga eska mándani imeri marhuaricha niáraaka sési pájperani imani jingoni (Uku. 17:27). Ísïsti, uarhiiti jatsisti para jánguarhintani para janhanharhini ka kurhajchani uámbani enga imperfektueka. Joperu sánderu no úkua jukanchaati kurhajchani ambe enga Jeoba arhijka, enga kurhanguska ka jiókuarhini andisï Biblia arhijki eska jatsiska para kurhajchani ka janhanharhini imeri uámbani. w21.02 9 párr. 3, 6, 7

Úpiringachi terukutantaani tsʼéjkukuechani komu chpiri enga úrakuarhijka para espada tiámueri ma úni. Enga espada ma jorheperanhajka ka tátsekua tsʼiraperanhani, i ambe úsïndi eska sánderu uiuinhasï jauaka. Májkueni, engachi tsʼéjkukuechani nitamakuarhiajka, juchari jakajkukua sánderu uinhapiti úkuarhisïndi. Jimbosï Santiagu úpti uandani: “Ka uétarhisïndi eskajtsï jorhenguarhiaka sési jimbo tekaantskua jatsini parakajtsï iámindu ambe jimbo ísïmindu jindeuaka eska Diosï na uékajka” (Sant. 1:4). Engachi exejka eskaksï tsʼéjkukuecha uinhaperantasïnga juchari jakajkukuani, úsïngachi tsípikua jingoni tekaantani. Imeri karakata jimbo, Santiagu uandasïndi máru uandanhiatechani engaksï uáka úni eskachi jucha nóteru tsípikua jingoni irekaakia. Ma uandanhiata jindeesti no míteni ambe úni. Engachi uandanhiatechani jatsiajka, uékasïngachi imani ambe úni enga Jeoba jaiapanhintajka, enga marhuakuauaka juchari erachichani ka engajtsïni jarhuataaka parachi no méni jurajkuni Jeobani (Jer. 10:23). Uétarhinchasïngachi jánhaskakua parachi míteni ambe úni ka parachi úni mókukuantani imechani engajtsïni ikiachijka, úpiringachi chkéni pʼikuarherani engachi no jánhaskaaka ambe úni ka i ambe úpirindi úni eskachi sóntku no sési pʼikuarheraaka. w21.02 28 párr. 7-9

Jeobajtsïni íntskusïndi ejemplu. Imajtsïni kánikua uékasïndi, engachi no méni jurajkuska, no ma ambejtsïni uáti jarharitani imani jingoni (Rom. 8:38, 39). Uandakua enga Griegu jimbo jindeeka “kánikua” úpirindi arhikuekani kánikua jánguarhintani para xarhatani uékperakua, ka jamberichi i ambesï jatsika para úni máru erachicha jimbo. Bibliajtsïni arhisïndi ambe engachi jatsika para úni engachi no sési pʼikuastanhaaka: “[Tekaatsperanta je] máteru ka máteru jingoni, indeni uékperakua jimbo engajtsï jatsika. Jimajkani jánguarhi je irekani sési pájperakua jingoni parakajtsï xarharaaka eskajtsï májku ambeeska espiritu santu jimbo, míteparini eskajtsï májkueranhantaskia” (Efes. 4:1-3). Nóchi imani ambejku exeni jauaka engaksï erachicha no sési újka, sinochi jánguarhintaaka ísï exeani eska Jeoba na exeajka (1 Sam. 16:7; Sal. 130:3). Ménisï úkua jukasïndi uékperakua xarhatakuani erachichani ka sánderia engachi imantku ambe exeni jauaka engaksï no sési újka. I ambeksïsï úkuarhinchapti erachicha ka pirenchicha primeru sigluru anapu komu Ebodia ka Sintike. Apostoli Pablu arhiaspti imechani: “Eskajtsï májku ambe eratseaka juchari Tatani jimbo” (Filip. 4:2, 3). w21.01 22 párr. 10, 11

Tumbi sapichu, kúnguarhikuarhu anapu erachicha engaksï sánderu jatirika, kánikuaksï jukaparharasïndi engari ‘májku kʼéri’ marhuakuni jaka Jeobani imecha jingoni (Sof. 3:9). Tsípisïndiksï exeni na engari xáni tsípikua ka uinhapikua jingoni újka imani ánchikuarhitani engari intsïnhajka. Janhanharhisïndiksïni ka mintsikani. Asï méni mirikurhi eskakeni Jeoba xénchasïnga ka eskakeni mintsikasïnga. Ima uandaspti eska últimu jurhiatikuecha jimbo uánikua tumbiicha japiringa engaksï uékapiringa imani marhuakuni (Sal. 110:1-3). Ima mítesti eskari xénchasïnga ka eskari uékasïnga sési marhuakuni. Ísï jimbo, tekaantsti chíti ambe jingoni ka ístu máteruecha jingoni. Engari no uáka sési úni ambe ma, jiókuarhea konsejuechani ka engaksïni jurhimberantaaka. Miá eskakeni Jeobasï arhini jaka (Ebr. 12:6). Sési ú imani ánchikuarhitechani engari intsïnhauaka. Ka ambe enga sánderu jukaparhakueka, jánguarhinta paraka chíti Táti auandarhu anapu sési pʼikuarheraaka tʼungini jimbo (Prov. 27:11). w21.03 7 párr. 17, 18

Uánikua ambe jimbochi úpiringa chketakuarhini, komu engachi no sési újka ambe ma, engachi no újka jurajkuni ambe ma enga no sési jaka, pʼamenchakua ambe jimbo, engachi no intsïnhajka ánchikuarhita ma para Jeobani marhuakuni engachi jucha tsitipiringa o engachi jatsijka para aianhpini jimesï enga kʼuiripu no xáni sési kurhaajka. Engachi jukari imani ambe eratseni jauaka engachi kʼamanharhintskua jimbo újka, uáti eskachi no sési pʼikuarheraaka ka niáranchi eratseni eska Jeoba no uékasïnga eskachi jauaka jimbanhi parhakpinirhu. I jásï eratsekuajtsïni uáti kánikua no sési úchini. Biblia uandasïndi eska tata Jesukristujkusï perfektueka ka eskachi iámindu kʼuiripuecha kʼamanharhintstiska (Rom. 3:23). Joperu Jeoba no imani ambejkusï exeni jarhajti engachi no sési újka nijtu erokuarhijki eskachi perfektueuaka. Sánderu sési, Táti máesti enga uékpitika ka tekaantstini. Exesïndi na engachi xáni jánguarhintajka imani ambe úni enga sési jaka ka na engachi jánguarhintajka parachi no no sési eratseni juchari ambe ka jingontku jarhasïndi parajtsïni jarhuatani (Rom. 7:18, 19). w20.12 22 párr. 1-3

Iámindu kristianuecheri tsípikua ísïsti komu biajirhu ma nirani jarhani. Uékasïngachi niárani jimbanhi parhakpinirhu, nani enga juramuaka juchari Tata Diosï uékpiti, Jeoba. Pauani pauanchi jánguarhintasïnga imani xanharu jimbo nirani enga tsípikuarhu pájpijka. Joperu Jesusi uandasti eska inde xanharu no kórhuraska ka eska ménisï úkua jukasïnga inde xanharu jimbo nirani (Mat. 7:13, 14). Jimbokachi no perfektueska, sóntkuchi támisï nirasïnga (Gal. 6:1). Para no jurajkuni inde xanharuni enga no kórhuraka ka enga tsípikuarhu pájpijka, jatsiskachi para uékani mójtakuni na engachi eratsejka, jámajka ka na engachi jásïika. Indeni ambesï arhikuekani japti apostuli Pablu enga arhipka eskachi seguirini jauaka sési peentani ambe ma. Úkua jukasïndi exeni na engachi eratsejka ka pʼikuarherani. ¿Andi? Jimboka juchari mintsita traisionerueska ka úkua jukasïndi exeni ambejtsïni úraa (Jer. 17:9). Sóntkuchi támisï nirasïnga imani eratsekuecha jingoni engaksï no ísïka (Sant. 1:22). Jimbosï xáni uétarhijti eskachi Tata Diosïri Karakatani úraaka parachi exekuarhini. Bibliajtsïni jarhuatasïndi parachi incharinisï exekuarhini, ambe engachi “eratsejka ka pʼikuarhinheni” iauani incharinisï (Ebr. 4:12, 13). w20.11 18 párr. 1-3

Engachi kaxumbitiska ka miáni eskachi no iámu ambe úsïnga úni, uákachi sánderu tsípikua jingoni irekani. ¿Andi? Jimboka engachi miájka eskachi no iámindu ambe úsïnga úni, jukaparharaakachi engajtsïni máteruecha uékaaka jarhuatani. Ju je miáni jiáni enga Jesusi ambakerantaapka 10 kʼuiripuechani engaksï lepra pʼamenchani japka. Ma acheetijkusï kʼuanhatsentapti diosmaiamukua arhini Jesusini enga ambakerantapka imani xáni no sési jásï pʼamenchakueri. I acheeti kaxumbiti, mítespti eska no méni úpiringa jandiajku tsinakuarhini, ísï jimbo kánikua jukaparharaspti imani ambe ka kʼéri ambe arhispti Jeobani (Luk. 17:11-19). Sáno méntkisï, ima kʼuiripuecha engaksï kaxumbitika ka engaksï miájka eskaksï no úsïnga iámu ambe úni, sésiksï pájperasïndi máteruecha jingoni ka ambakiti amiguechanksï jatsiasïndi. ¿Andi? Jimbokaksï no úkua jukanchasïnga jiókuarhini eskaksï máteruechajtu ambakiti ambe xarhatasïnga ka mintsikaasïndiksï. Ístuksï tsípisïndi engaksï máteruecha ambakiti ambe újka para Jeobani marhuakuni ka ambakiti ambeksï arhiasïndi ka janhanharhiani. w20.08 12 párr. 17, 18