Juliu

Jatsiskachi para Jesusiri amigueni paraksï juchari kómarhikuecha mókuntanhani. I ambe arhikuekasïndi eska no solu jindeska pʼindekua jimbo uandani “tata Jesukristueri nombri jimbo” engachi na kʼamarajkia kómarhini. Jatsiskachi para sési kurhanguni néna úrasïni Jeoba, Jesusini para mókuantaani juchari kómarhikuechani. Jesusi arhiaspti imeri apostulichani: “Iámindu ambe engajtsï kurhakuaka Diosï Tátini juchiti nombri jimbo, jíksïni íntskuaka” (Juanu 14:13). Jeobaesti enga kurhauajka ka mókuantaani juchari kómarhikuechani, peru Jesusini íntskusti sésikua para úni ambe enga ima uéjka eska úkuarhiaka. Ante dejtsïni mókuchintani, exesïndi sinchi úskia ambe enga Jesusi jorhentpipka. Por ejemplu, ima uandaspti: “Engajtsï puákuantauaka máteruechani ambe engaksïni no sési úchiaka, ístuksïni puáchintaati chári Táti auandarhu anapu. Peru engajtsï no puákuantauaka máteruechani ambe engaksïni no sési úchiaka, ístu chári Táti nóksïni puáchintaati ambe engajtsï no sési uáka” (Mat. 6:14, 15). ¿A no eska jukaparhakueska pʼamojperakua xarhatakuani máteruechani májkueni eskajtsïni Jeoba ka Jesusi na xarhatachijka? w20.04 22 párr. 6

Apostuli Pablu exesïrendi ambe engaksï kʼuiripuecha tsitienga ka imeri ambe uandontskuarhikuasïrendi. Por ejemplu, imani kʼuiripuechani enga Listra aianguapka Tata Diosïri ambe, jamberiksï sánisï mítepti Tata Diosïri Karakateri ambe o nómbe. Ísï jimbo, Pablu uandontskuarhikuaspti ambe engaksï imecha úpiringa kurhanguni, por ejemplu, ambakiti pʼikuntskueri ambe ka tsípikua jingoni irekani. Úraaspti uandakuechani ka ejempluechani engaksï no úkua jukapka para kurhanguni. Ju je jánguarhintani míteni ambeksï tsitisïni ima kʼuiripuecha engaksï jimesïsï irekaka nani engachi jucha aianhpijka ka ju je ima amberi uandontskuarhekuani. ¿Nénachi uá míteni ambe tsitisïni ima kʼuiripu engachi andarhierani jarhajka para uandontskuarhekuni o engachi imeri kʼumanchikuarhu niárani jarhajkia? Ju je jánguarhintani iámindu ambe exeni. Jamberi ima kʼuiripu jima jámani jati nani enga tsiri jatsintaka, radiu kurhaani, karruni ma jatsintani o máteru ambe úni jarhani. Engachi exeaka eskachi uáka uandontskuarheni imeri ambe enga kʼuiripu úni jaka, ju je ísï úni (Juanu 4:7). Asta na enga xukuparhatini jauaka kʼuiripu ma, uákachi míteni nani anapueski, ambe ánchikuarhisïni o náki ekipuni tsitisïni. w20.04 11 párr. 11, 12

Ima erachicha engaksï méntkisï uandanhiani jarhajka, kánikuaksï chésïndi ka no sésiksï pʼikuarherani engaksï máteru kʼuiripuecha jingoni jarhajka. Jamberiksï no sési pʼikuarherajti xáni uánikua kʼuiripuecha jingoni jarhani, peruksï útasï nirasïndi tánguarhikuecharhu ka kʼéri tánguarhikuecharhu. Úkua jukanchasïndiksï uandontskuarheni imecha jingoni engaksï no míteaka peruksï útasï uérasïndi aianhpini. Engachi ini ambe nitamakuarhini jaka, nóchi juchajkueska, uánikua kʼuiripu sáno májkueni jásï ambe nitamakuarhisïndi. Ju je miáni eska Jeoba kánikua sési pʼikuarherasïnga engachi mintsita jingoni jánguarhintajka imani marhuakuni. Engachi no kuatantani jaka, xarhatasïndi eskajtsïni Jeoba újchakurasïnga ka íntskuntsïni uinhapikua engachi xáni uétarhinchajka (Filip. 4:6, 7). Engachi marhuakuni jaka Jeobani nájkirukachi pʼamenchakua ma kámajka ochi nóteru únia uánikua ambe úni, uákachi seguru jarhani eska inde ambe kánikua sési pʼikuastasïnga Jeobani. Uánikua juchachi nóteru úsïnguia uánikua ambe úni ochi pʼamenchakua ma kámani, peruchi útasï tekaantaxaka (2 Kor. 4:16). Jeobaeri jarhuajperata jingoni, iáminduchi uiriiuaka ini karrerarhu astakachi kʼamaraaka. w20.04 31 párr. 20, 21

Engachi jingontku exeska na enga kueraaka Tata Diosï Echerini, úsïngachi exeni na enga xáni jánhaskatiika (Ebr. 3:4). No jarhasti máteru planeta enga xásïka eska Echeri, jimboka ixújkusï jaka iámindu ambe enga xáni uétarhijka para kʼuiripu úni irekani. Úpiringachi uandani eska Echeri ísïska eska abioni ma enga uánikua kʼuiripu jatarini jaka ka enga unibersurisï kárani jaka. Joperu no májkuenisti abioni ma enga kʼuiripu úka ka juchari planeta. Por ejemplu, ¿náksï xáni ióni úpirini jámani kʼuiripuecha abionirhu engaksï jatsipiringa para imecha úkuarhini tarhiata, tʼirekua ka itsï, ka nóksï úni basura ambe kʼuanikuni uérakua ísï? ¿A no eskaksï no ióni jimbo uarhipiringa? Peru ixú Echerirhu, uánikua ambe jarhasti enga tsípiti jaka. Juchari planeta jimbo jarhasti na engachi xáni tarhiata, tʼirekua ka itsï uétarhinchajka. Ka no méni kʼamakurhisïndi i ambe enga xáni uétarhijka para tsípikua jarhani. Ka ístu, nájkiruka ixú pakarajka ambe enga nóteru marhuajkia, Echeri útasï kánikua sési jáxesti ka kʼuiripuechaksï útasï úxati irekani. ¿Néna úsïni i ambe úkuarhini? Jeoba ísï kueraasti Echerini paraka ménderu uéntaka úrani imani ambe enga nóteru marhuajkia. w20.05 20 párr. 3, 4

Indeni ambe uandaparini, Noambakiti arhixapti Ebani eska Jeoba chkuanderakuaspka. Ka ísï, Noambakiti niáraspti jindeni nema enga chkuanderakua ambe jauatatspijka. Eba jakajkuspti Noambakitiri chkuanderakuani (1 Tim. 2:14). Sánderu mintsikaspti Noambakitini ka eska Jeobani, ka inde ambe úspti eska Eba sánderu no sési jásï ambe erakupiringa úni: no kurhajchani Tata Diosïni ka arhani imani frutani enga Jeoba arhipka eska no akupiringa. Tátsekua, íntskuspti Adanini imani frutani (Gén. 3:6). Ju je eratsentani ambe enga Eba úpiringa mókukuntani Noambakitini. Ju je eranhaskani eska ini ambe mókukupiringa: “Nókini míteska tʼunguini, peru juchiti Táti Jeobani kʼóruni míteska. Xénchasïnga ka mintsikasïnga imani. Imajtsïni íntskusti iámindu ambe engachi jatsika. ¿Nénari tekaasïni no sési ambe uandani Jeobaeri ambe? ¡Kéndikucherini!”. Jeoba kánikua sési pʼikuarherapirindi enga Eba ísï mókukupiringa Noambakitini ka imeri uandakuecha jingoni xarhatani na enga xáni xénchenga Táti jembani ka eska no méni jurajkupiringa (Prov. 27:11). Peru ni Eba ni Adani pʼikuarhereni ambakiti uékperakua ma Jeobani jimbo. Jimboksïsï no kuájpipti Táti jemberi nombrini. w20.06 4 párr. 10, 11

Pirenchichaksï jukanchasïndi parachi diosmeiamukua arhiani iámindu ambe jimbo engaksï újka para Jeobani marhuakuni. Por ejemplu jarhuajpisïndiksï konstruksionirhu ka paraksï sési jatsiani kʼumanchikuechani engachi úraajka parachi Jeobani kʼéri ambe arhini, nirasïndiksï máteru idiomecha jimbo aianhpini ka jarhuajpisïndiksï Beteli. Ístuksï jarhuajpisïndi jimesïsï enga no sési ambe úkuarhijka ka ístuksï jarhuajpisïndi paraksï juchari publikasionichani tradusiriuani ka marhuasïndiksï komu prekursorecha ka misionerecha. Ístuksï jarhasti pirenchicha engaksï jarhuataajka imecheri acheetichani paraksï kʼéri ánchikuarhita ambe úni kúnguarhikuarhu ka Jeobaeri organisasioni jimbo. Engaksï i pirenchicha no jarhuataapiringa imecheri uámbechani engaksï intsïmperakua máeka, íksï erachicha no úpirindi úni imecheri ánchikuarhitechani (Efes. 4:8, TNM). Orhejtsïkutichaksï mítesti eskaksï uánikueska pirenchicha engaksï uéjka ánchikuarhini ka uánikuestiksï engaksï sési aianhpijka ambakiti ambe.Ístu, orhejtsïkutichaksï mítesti eskaksï ambakiti pirenchicha engaksï eratsekua jukarika, uáka jarhuataani pirenchichani engaksï sánderu sapirhatkueka imecheri uandanhiatecha jingoni (Titu 2:3-5). Ísïsti, juchari pirenchichaksï jukanchasti parachi jukaparharaani ka xénchaani. w20.09 23, 24 párr. 13, 14

Jeoba no mirikurhiasïndi imechani engaksï ióntki marhuakupka peru engaksï jarharika ma tiempu ka no mirikurhisïndi na engaksï sési marhuakupka (Ebr. 6:10). Profeta Isaiasi, sési jásï ma ejemplu úraspti para xarhatani na enga Jeoba kuájchakujka imeri iretani: “Komueska karichi eranguti ma, kuidariuauati imeri karichichani. Imeri jájki jimbo tánantaauati karichi sapirhatichani; ka kamanharhitini páuati” (Is. 40:11). ¿Néna pʼikuarherasïni Jeoba, Kʼéri karichi Eranguti, enga imeri karichi ma jarharijka? Jesusi xarhataspti na enga pʼikuarherajka Jeoba enga i ambe kurhamarhiapka imeri chúxapatichani: “¿Nájtsï exesïni cha? Enga ma acheeti kaapiringa ma sientu karichichani, ka enga máechakuani tsïtapiringa, ¿no jurajkuapirini máteru nobentainuebe karichichani korralirhu para nirani juátarhisï jirinhantani imani enga tsïtapiringa? Ka enga exentapiringuia, jíksïni sési jimbo arhisïnga eska sánderu tsípepiringa exeni imani enga tsïnchipka ka eska máteru nobentainuebe engaksï no méni tsïnchipka” (Mat. 18:12, 13). w20.06 19, 20 párr. 8, 9

Para jucha kʼéri kóntperata máesti marhuakuni Jeobani na engachi xáni uáka (Sal. 27:4; 84:10). Sésisti enga erachi ma uékaaka sánderu ambe úni Jeobaeri kúnguarhikuarhu. Peru enga ánchikuarhita ma intsïnhaska kúnguarhikuarhu, no jatsisti para kʼéri ambe exekuarhini (Luk. 17:7-10). Ambe enga jatsika para úni, jindesti kaxumbikua jingoni marhuakuani máteruechani (2 Kor. 12:15). Biblia uandasïndi máru kʼuiripuecheri engaksï niárapka kʼéri exekuarhini. Por ejemplu, Diótrefesi no kaxumbitispti ka tsitisïrendi kʼéri ambeeni kúnguarhikuarhu (3 Juanu 9). Usiasi xarhataspti eska kʼéri ambe exekuarhisïrenga enga uékapka úni ambe ma enga Jeoba no sésikua íntskupka (2 Crón. 26:16-21). Absaloni kánikua jánguarhintaspti paraka kʼuiripu sési exepiringa jimboka uékasïrenga reini (2 Sam. 15:2-6). Eskaksï na xarhatajka i ejempluecha, Jeoba no sáni jaiapanhiantasïndi kʼuiripuechani engaksï uéjka eskaksï kʼéri ambe exenhaaka (Prov. 25:27). No sésiksï kʼamarasïndi imecha engaksï tsitijka eskaksï kʼéri ambe exenhaaka ka uánikua ambeksï uékani jatsini (Prov. 16:18). w20.07 4 párr. 7, 8

Máru familiechaksï máteru paisirhu mótsesti paraksï ánchikuarhini o máteru ambe jimbo. Jamberiksï imecheri sapiicha imani eskuelarhu nirajti enga imani paisirhu anapu idioma uandanhajka ka jamberiksï tátichajtu jatsiati para jorhenguarhini imani idiomani paraksï ánchikuarhita ma exentani. Peru ju je eranhaskani eska kúnguarhikua o grupu ma jarhaska enga imani idioma jimboeka enga familia uandajka. ¿Náki kúnguarhikuarhuksï jatsipirini para nirani? ¿Jima enga imecheri idioma uandanhajka o imani kúnguarhikuarhu enga paisiri anapu idioma uandanhajka? Tátisï ma jatsiti para erakuni náki kúnguarhikuarhu niua iámu familia. Peru jatsisti para exeni ambe sánderu sésiski para iáminduecha. Jimboka i ambe máeska enga mándani kʼuiripu jatsika para erakuni, jatsiskachi para janhanharhini ambe enga táti ma erakuaka úni. Ju je no no sési exeni ambe enga táti ma erakuaka úni ka ju je iámu familiani tsípikua jingoni erokani kúnguarhikuarhu (Rom. 15:7). w20.08 30 párr. 17, 18

Engachi uéjka eskajtsïni Jeoba íntskuaka uinhapikua, nóchi jatsiska para eratseni eskachi úsïnga úni ambe ma juchari uinhapikua jimbo, ambe engachi míteka, nani engachi anapueka o juchari jatsikuarhikua ambe jimbo. No indeni ambe jimbojtsïnisï Jeoba úrajti. Tata Diosïri iretarhu, nóksï uánikuesti engaksï uánikua ambe mítekuka, ka ni engaksï uinhapitika ka níjtu engaksï kʼéri ambeeka eska parhakpini anapuecha na exejka (1 Kor. 1:26). Ísï jimbo, nájkirukachi uánikua ambe jatsika engajtsïni úpiringa ójkutani, uákachi marhuakuni Jeobani. Por ejemplu, enga nema uékaaka úni parachi nóteru seguru jarhania ambe engachi jakajkujka ka chérantsïni, ju je kurhakuni Jeobani eskajtsïni íntskuaka balori para kuájpini ambe engachi jakajkujka (Efes. 6:19, 20). O engachi jánguarhintani jaka orhepani uérakuni kʼéri pʼamenchakuani ma, ju je kurhakuni Jeobani eskajtsïni íntskuaka uinhapikua parachi seguirini marhuakuni na engachi xáni uáka. Méni engachi exejka na engajtsïni jarhuatajka, juchari jakajkukua sánderu kʼésïndi ka sánderuchi uinhapiti pʼikuarherasïnga. w20.07 17 párr. 9

Engachi uéjka orheta peerani Tata Diosïri Reinuni, jatsiskachi para ísïni eska Abraani ka jurajkuni máru ambe para Tata Diosïni jaiapanherantani (Mar. 10:28-30; Ebr. 11:8-10). Ju je no eratseni eskachi no méni jatsiauaka uandanhiatechani. Asta imechaksï jatsiasïnga uandanhiatechani engaksï kʼamakʼamasï marhuakujka Jeobani (Sant. 1:2; 1 Ped. 5:9). Iásï, sánderuchi uétarhisïnga miáni ambe engachi erokuarhini jaka. Ambe enga parhakpinirhu úkuarhini jaka xarhatasïndi eskachi imani jurhiatikuechani jimbo irekaxaka engaksï kʼamakurhiakia i parhakpiniri últimu jurhiatikuecha. Uánikua kóntperatechanchi jatsiauaka enga Tata Diosïri Reinu juramuni jauakia ka ma jindesti eskachi exeantauaka imechani engachi uarhiranchaaka. Jimajkani, Jeoba kóndintaati Abraanini imeri jakajkukua ka tekaantskua jimbo enga tsítantaaka imani ka imeri familiani ixú Echerirhu. ¿Cha jima jauaka parajtsï eroantani? Uákajtsï jima jarhani engajtsï, májkueni eska Abraani, jurajkuska máru ambe parajtsï orheta peerani Tata Diosïri Reinuni, engajtsï méntkisï mintsikaska Jeobani nájkirukajtsï uandanhiatechani jatsiauaka ka engajtsï tekaantskua jingoni erokuarhiska astaka Jeoba uáka ambe ma (Miq. 7:7). w20.08 5, 6 párr. 13, 14; 7 párr. 17

Míteskachi eskajtsïni Jeoba tsítantaaka engajtsïni juchari ikiatspiticha niáraska uándikuni. Sésichi mítetixaka eskaksï ambe uéjki úni, nóksï uáka eskachi jurajkuaka Jeobani (Rom. 8:35-39). Jeoba xarhatasïndi eska kánikua jánhastiska engajtsïni aiachika eska jauaka tsíntskua. Indeni ambe jingoni, úsïndi eskachi no chéaka engajtsïni juchari ikiatspiticha uékaaka uándikuni ka ístu úsïndi eskachi no méni jurajkuaka Jeobani. Engajtsïni juchari ikiatspiticha chéraska arhiparintsïni eskajtsïni uándikuaka, ¿mintsikaachi eskajtsïni Jeoba tsítantaaka? Parachi úni míteni i ambe, ju je kurhamarhikuarhini: “¿Xarhatasïni eskani mintsikasïnga Jeobani ima ambe engani pauani pauani újka?” (Luk. 16:10). “¿Xarhatasïni eskani mintsikasïnga eskarini Jeobani íntskuaka ambe engani xáni uétarhinchajka engani orheta peeraska Reinueri ambe?” (Mat. 6:31-33). Engachi mókuntaska eska jo, inde ambejtsïni jarhuataati parachi orhepani uérakuni náki uéjki tsʼéjkukuani (Prov. 3:5, 6). w20.08 17, 18 párr. 15, 16

Kristianuechachi jatsiska para jorhenguarhini sési úrani Tata Diosïri Karakatani. Tánguarhikuecha jimbo, exeasïngachi máru ejempluechani na engachi jatsika para úrani. Peru engachi uéjka eskaksï kʼuiripuecha exeaka na enga xáni marhuajka ambe enga Biblia uandajka, jatsiskachi para jandiajku estudiarini Bibliani. Tata Diosïri Karakata jingoni, jatsiskachi para sánderu mintsikani Jeobani. Joperu no solu jatsiskachi para arhintani, sino ístu eratsentani ambe engachi arhintaaka ka jirinhantaani publikasionicharhu parachi sési kurhanguani ka parachi úni máteruechani aianguani (1 Tim. 4:13-15). Ísïchi uáka listu jarhani parachi máteruechani jorhendaani Biblia jingoni. Ísïsti, no solu uétarhisïndi tekstu ma arhikuantaani. Uékasïngachi eskaksï kurhanguaka ka eskaksï exeaka néna marhuakuaua. Ísï jimbo, engachi someni estudiariska Bibliani, uákachi ambakiti jorhentpiri máeni (2 Tim. 3:16, 17). w20.09 28 párr. 12

Ambe ma engajtsïni jarhuataaka orheta peerani aianhpikuani, jindesti eratseni ambe enga xáni úkia Jeoba parajtsïni jarhuatani. Por ejemplu, uánikua ambejtsïni íntskusïndi komu publikasionichani engaksï sïranda jimbo uérajka, engachi újka exeani selulari o tabletarhu, audiuechani ka bideuechani ka ístu programa JW Broadcasting. Ju je eratseni ini ambe: juchari pájina Internetirhu jukari mili idiomecha jimbo jarhasti informasioni (Mat. 24:45-47). Ambe ma engajtsïni ístu jarhuataaka orheta peerani aianhpikuani, jindesti májkueni úni eska Jesusi. Ima no jurajkuspti eska ambe ma ójkutapiringa para aianhpini jurhimbikua ambe (Juanu 18:37). No jurajkuspti eska Noambakiti tsʼéjkupiringa enga aiakuapka “iámindu parhakpini anapu nasionichani ka [...] imeri tʼíntskuani”, ni enga kʼuiripu uékenga rei úni (Mat. 4:8, 9; Juanu 6:15). No jánguarhintaspti jatsikuarhikua ambe uékani jatsini ni chéni enga kʼuiripu no sési kámenga (Luk. 9:58; Juanu 8:59). Engachi niáraaka tsʼéjkunhani juchari jakajkukua jimbo, jánguarhintaakachi no kuatantani ni chketakuarhini ísï eska na uandapka apostoli Pablu iásï anapu teksturhu. w20.09 9, 10 párr. 6, 7

Kánikuachi sési pʼikuarherasïnga enga juchari kúnguarhikuarhu xáni uánikua pirenchicha jaka engaksï kánikua ánchikuarhijka. Partisiparisïndiksï tánguarhikuecharhu, uérasïndiksï aianhpini ka uandanhiasïndiksï erachichani jimbo. Ístu, máruksï jarhuajpisïndi para sési jatsini Kʼumanchikua Reinuerini. Peru ístuksï jatsiasïndi uandanhiatechani. Máruksï kuidariuasïndi táti jémbechani engaksï jatirikia. Máteruechaksï tekaantaxati engaksï imecheri familiaricha no káni jurajkuajka paraksï Jeobani marhuakuni. Ka máteru pirenchichaksï jandiajku tʼarhexeraaxati sapiichani ka kánikuaksï jánguarhintasïndi para kéndaani. ¿Andichisï jatsi para jánguarhintani pirenchichani jarhuataani? Jimboka parhakpinirhu, nóksï méntkisï janhanharhikua jingoni kaasïnga nanakechani. Ístu, jimbokajtsïni mismu Biblia arhisïnga eskachi jarhuatauaka. Por ejemplu, apostuli Pablu arhiaspti Roma anapu kúnguarhikuarhu anapuechani eskaksï sési erokapiringa Fébeni ka eskaksï jarhuatapiringa iámindu ambe jimbo enga uétarhinchapiringa (Rom. 16:1, 2). Pablu tʼarhexespti nani engaksï jakajkuenga eskaksï nanakecha no xáni jukaparhakuespka. Peru enga Kristueri chúxapati úkuarhipkia, májkueni úspti eska Jesusi ka pʼamojperakua ka janhanharhikua jingoni kaaspti nanakechani (1 Kor. 11:1). w20.09 20 párr. 1, 2

Parachi jarhuataani Biblieri jorhenguarhirichani paraksï uékani aianhpini ambakiti ambe, úpiringachi kurhamarhini: “¿Nénajtsï sánderu sési irekaskia desde engajtsï uénaka ísï úni eska Biblia na jorhentpijka? ¿Exesïntsï cha eskaksï máteruecha uétarhinchasïnga kurhaani ini ambe? ¿Ambejtsï úpirini úni imecha jimbo?” (Prov. 3:27; Mat. 9:37, 38). Ju je miáni eskajtsïni Jesusi arhiska eskachi jorhendauaka iámindu ambe úni ambe enga ima juramuka, enga ístu jindeeka kurhajchaani arini tsimani juramukuechani engaksï sánderu jukaparhakueka, uékani Tata Diosïni ka uékaani máteruechani (Mat. 22:37-39). Engachi jarhuataska jorhenguarhirini kurhajchaani ini tsimani juramukuechani, jarhuatanchi jauaka paraka uékaaka aianhpini. Ísïsti eskaksï máru jorhenguarhiricha chésïnga, joperuchi uáka arhiani eska Jeoba jarhuatauaka paraksï sánhani arhini nóteru chérhiania kʼuiripuechani (Sal. 18:1-3; Prov. 29:25). w20.11 3 párr. 6-8

Engachi prepararikuarhini jámaaka para Biblieri jorhenguarhikua ma, ju je kómarhini Jeobani juchari jorhenguarhirini jimbo ka imani ambe jimbo enga uétarhinchani jaka. Ju je kurhakuni eskajtsïni jarhuataaka sési úrani Bibliani paraka mintsitarhu niárakuaka ima ambe enga jorhenguarhiaka. Ambe engachi jucha uéjka, jindesti eska niáraaka itsï atakuarhini. Ístu, jorhenguarhiri jatsisti para kurhajchani ka uandontskuarheni Jeobani jingoni. Ka para úni kurhajchani Jeobani jatsisti para pauani pauani arhintani Bibliani (Jos. 1:8; Sal. 1:1-3). Jorhenguarhiri uáti uandontskuarhekuni Jeobani pauani pauani kómarhiparini. Méni engachi jorhenguarhiaka Bibliaeri ambe, ju je mintsita jingoni kómarhini Jeobani engachi uénani jámaaka ka engachi kʼamarani jámaaka ka ju je kómarhijpikuni jorhenguarhirini. Ísï, ima jorhenguarhiati mintsita jingoni kómarhini ka úrani tata Jesukristueri nombrini para Jeobani kómarhini (Mat. 6:9; Juanu 15:16). Ju je eranhaskani na enga xáni andarhieraaka Jeobani enga pauani pauani arhintaska Bibliani ka enga kómarhiska (Sant. 4:8). w20.10 8 párr. 8; 9 párr. 10, 11

Ini jurhiatikuecha jimbo, Jeobaeri kúnguarhikua kánikua ánchikuarhisïndi paraka iámindu ambe sési úkuarhiaka ka eska pínandikua jauaka iámindu kúnguarhikuecharhu, ísï eska primeru siglurhu (Uku. 16:4, 5). Por ejemplu, engachi nipiringa máteru kúnguarhikuarhu ka jorhenguarhinhani jarhani rebista Aianhpiri jingoni, nájkiruka máteru paisirupiringa, mítepiringachi na enga úkuarhijka jorhenguarhikua ka náki jorhenguarhikua exenhani japirini. Ísïchi pʼikuarherapiringa enajkichi juchari kúnguarhikuarhu japirini. Solu Tata Diosïri espiritu úsïndi eskachi májku kʼéri jauaka (Sof. 3:9, nota). Ambe engachi jucha uáka úni, jindesti kurhamarhikuarhini: “¿Jarhuajpisïni jí para pínandikua jarhani ka para kúnguarhikua májku kʼéri jarhani? ¿Kurhajchaasïni imani erachichani engaksï orhejtsïkujka? ¿Úpirintsïni máteruecha mintsikani, ka sánderia engani jatsika ánchikuarhita ambe kúnguarhikuarhu? ¿Xarhentkuni niárasïni nani, marhuatspisïni ka listu jarhasïni parani jarhuajpini?” (Sant. 3:17). Engachi exejka eskachi jatsiska para ambe ma sánderu sési úni, ju je kurhakuni Jeobani espiritu santu. Engachi sánderu jurajkuska eskajtsïni espiritu santu jarhuataaka juchari jángua ka juchari úkuecha jingoni, erachichajtsïni sánderu xénchaati ka jukaparharaani. w20.10 23, 24 párr. 12, 13

Tata Diosïri Karakata uáti ísïni komu espeju ma para jucha (Sant. 1:23-25). Pauani pauani, sáno iáminduechachi eratikuarhisïnga espejurhu ma antedechi uérani kʼumanchikuarhu. Ísïchi exesïnga ambe engachi jatsika para sési peentani antedejtsïni máteruecha exeni. Májkueni, engachi pauani pauani arhintajka Bibliani, exesïngachi sinchi jatsiski para sési peentani na engachi eratsejka o jámani. Uánikua erachichaksï arhintasïndi mándani jurhiatikua anapu karakatani antedeksï uérani imeecho ka inde ambe jarhuataasïndi paraksï sési eratseni. Ka tátsekuaksï exesïndi nénaksï uá ísï úni eska Tata Diosïri Karakata na arhijka. Ístu, jatsiskachi para pauani pauani arhintani Bibliani ka eratsentani ambe engachi arhintajka. Nájkiruka ísï xarharajka eska fásiliska para úni, jindesti ambe ma engajtsïni kánikua jarhuatajka parachi seguirini ini xanharu jimbo enga no kórhuraka ka enga tsípikuarhu pájpijka. Sáno májkuenisti eska mákina ma enga radiografia pʼitajpijka, enga újka eskachi exekuarhiaka incharinisï. Ísï jimbo, engachi uéjka eskajtsïni marhuachiaka Bibliaeri konsejuecha ka imecheri enga Tata Diosï úraajka, jatsiskachi para kaxumbitiini. w20.11 18 párr. 3; 20 párr. 8

Nájkirukaksï primeru siglurhu anapu kristianuecha someni no sési kánhapka, ístuksï niáraspti irekani jurhiatikuecha jimbo enga iámu ambe sési japka o pínandikua jarhani. ¿Ambeksï úspi imani jurhiatikuecha jimbo? Ima kristianuechaksï kánikua jánguarhintaspti ambakiti ambe aianhpini. Ukuecha uandasïndi eska kúnguarhikua janhanharhisïrenga Jeobani, ka sánderuksï uánixapti jimbokaksï no jurajkuspka aianhpini. I ambe xarhatasïndi eska Jeoba újchakuraaspka jimbokaksï tsípikua jingoni aianhpispka jiáni enga iámindu ambe sési japka (Uku. 9:26-31, TDU). Primeru siglurhu anapu kristianuechaksï méntkisï jánguarhintaspti ambakiti ambe aianhpini. Por ejemplu, apostuli Pablu jini Efesu pakaraspti enga exepka eska kʼéri ánchikuarhita jarhaspka imani ireta jimbo para aianhpini ka para Jesusiri chúxapatichani uáni (1 Kor. 16:8, 9). Kristianuechaksï kánikua jánguarhintaspti paraksï aianhpini Jeobaeri “uandakuani” ka “ambakiti aianhperakuani” (Uku. 15:30-35). ¿Ambe úkuarhispi tátsekua? Úkuarhispti ambe enga arhijka iásï anapu tekstu. w20.09 16 párr. 6-8

Enga Adani pekadu úpka, pori ísï arhini jandiajku uándikukuarhispti ka ístu imechani engaksï imani jimbo jupiringa. Útasïchi iásï jamberi no sési nitamakuarhixaka enga ima ísï no kurhandipka. Joperu kánikua ambakiti ambechi erokuarhixaka jimboka Tata Diosï tsítantaska imeri Uájpani. Pablu ísï uandaspti: “Ma kʼuiripuni jimbo [Jesusi] jurhas[ti] tsíntskua, jimboka eskaksï na uarhijka iámindu kʼuiripuecha Adanini jimbo, ístu iáminduecha tsíntaati Kristuni jimbo” (1 Kor. 15:21, 22). ¿Néchani arhikuekaxapi Pablu enga uandapka eskaksï uarhixaka “iámindu kʼuiripuecha Adanini jimbo”? Pablu iámindu kʼuiripuechani arhikuekaasïrendi engachi pekadu jukaraka, engachi no perfektueka ka engachi niáraaka uarhini (Rom. 5:12). Adani no kuenta úkuarhisïndi imecha jingoni engaksï niáraaka ‘tsíntani’. Ima no intsïnhauati kóntperatechani engaksï juuaka tata Jesukristueri uarhikua jimbo, jimboka ima perfektuespka ka jandiajku erakusti no kurhajchani Tata Diosïni. Ima intsïnhasti ambe engaksï intsïnhaaka imecha enga “Uájpa Acheetiri” junguaka para jusgariuani ísï eska ‘chibuechani’ i ambe arhikuekasïndi “kʼamajkukua para méntkisï” (Mat. 25:31-33, Mat. 25:46, TNM; Ebr. 5:9). w20.12 5 párr. 13, 14

Engachi no intsïnhaska ima ánchikuarhita engachi uékapiringa jatsini Jeobaeri kúnguarhikuarhu, ju je eratseani imani ánjelichani engaksï no méni jurajkujka Tata Diosïni. Ma xanhari, Jeoba kurhakuaspti ánjelichani eskaksï arhipiringa nénaksï úpirini támisï jánhastani rei Akabini. Uánikuechaksï uandaspti ambe ma, joperu Jeoba ma ánjelirkusï erakupti ka uandaspti eska sési uérapiringa ima ambe enga i ánjeli uandapka (1 Rey. 22:19-22). ¿No sésiksï pʼikuarheraspi máteru ánjelicha ka eratsenksï: “¿Andisïni uandani japi?”? No ma ambe xarhatasïndi eskaksï ísï uandaspka. Ánjelichaksï kaxumbitiisti ka uékasïndiksï eska Jeobajkusï kʼéri ambe arhinhaaka (Juec. 13:16-18; Jaŋ. 19:10). Ju je no méni mirikurhini eska sánderu kʼéri kóntperata engachi uáka jatsini jindeesti Jeobaeri testigueni ka aianhpini Reinueri ambe. Uákachi jatsini ánchikuarhita ma kúnguarhikuarhu. Joperu no indeni ambe jimbojtsïnisï jukaparharajti Jeoba ka erachicha, sánderu sési kaxumbikua jimboesïndi. Ísï jimbo, ju je mintsita jingoni kómarhini Jeobani eskajtsïni jarhuataaka parachi méntkisï kaxumbitiini. Ju je ambakiti ejempluechani eratseantani, imecheri engaksï xarhatapka kaxumbikua engaksï Bibliarhu jaka ka tsípikua jingoni marhuakuani juchari erachichani imani ambe jingoni engachi uáka úni (1 Ped. 5:5). w20.12 26 párr. 16, 17

Kasku pʼímutantskueri arhikuekasïndi ambe enga uáka Jeoba sánderu orhepani juchantsïni jimbo, engachi uáka ambe enga ima uéjka ka nájkirukachi uarhiaka imajtsïni tsítantaati (1 Tes. 5:8; 1 Tim. 4:10; Titu 1:1, 2). Erokuarhikua pʼímutantskueri, májkueni kuájchakusïndi juchari eratsekuani. Jarhuatasïndijtsïni parachi imani ambe eratseni ambe enga uáka Tata Diosï ka no jukari uandanhiani jarhani problemecha jimbo. Engachi jánguarhintajka ísï eratseni eska Jeoba, ísïsïndi enajkichi jukantani jarhani kasku p’ímutantskueri. Por ejemplu, nóchi mintsikasïnga jatsikuarhekuani enga sóntku kʼamarajka, sino Tata Diosïni (Sal. 26:2; 104:34; 1 Tim. 6:17). Espiritu santueri espada arhikuekasïndi Tata Diosïri Karakata, Biblia. I espada jatsisti uinhapikua para jorhendani máteru kʼuiripuechani jurhimbikua ambe ka paraksï nóteru chkuanderakua ambe jakajkunia ka imani ambe enga no ma ambe marhuajka (2 Kor. 10:4, 5; 2 Tim. 3:16, 17; Ebr. 4:12). Jiánchi jorhenguarhisïnga sési úrani Bibliani engachi jandiajku jorhenguarhijka Bibliani ka engajtsïni Tata Diosïri kúnguarhikua jorhendajka. w21.03 27 párr. 4; 29 párr. 10, 11

Nájkiruka ónhakata japka jimboka Jesusiri ambe aianhpisïrenga, apostoli Juanu xarhataspti eska xénchaasïrenga máteruechani. Pori ejemplu, ima karaspti imani jánhaskakuani enga intsïnhapka ka axakuaspti kúnguarhikuechani parakaksï mítepiringa “indeni ambe enga úkuarhiaka no ióni jimbo” (Jaŋ. 1:1). Tátsekua, enga na uéntapkia Patmosi, Juanu karaspti imeri Ebanjeliuni enga uandajka Jesusiri tsípikueri ambe ka imeri aianhpikueri ambe. Ístu, karasti tanimu kartechani para uinhaperantaani imeri erachichani. Juchajtuchi uáka májkueni úni eska Juanu nájkirukachi no sési kánhaaka. Uákachi xarhatani eskachi xénchaasïnga máteru kʼuiripuechani imani ambe jimbo engachi erakuska úni juchari tsípikuarhu. Noambakitiri parhakpini tsitipirindi eskachi úrapiringa iámu juchari tiempu ka uinhapikua parachi káni sentabu jatsikuarheni o parachi kánikua mítekateeni. Joperu interu parhakpinirhu, jarhastiksï kristianuecha engaksï aianhpini jaka ambakiti aianhperakuani ka engaksï jarhuataani jaka máteru kʼuiripuechani paraksï andarhierani Jeobani. w21.01 10 párr. 9, 10

Ístu, Jonatani úpirindi ikiakuni Dabidini ka inchandimintani para ima reiini jimboka Sauli uájpespka (1 Sam. 20:31). Joperu Jonatani kaxumbitispti ka no méni jurajkuspti Jeobani, jimbosï mintsita jingoni jiókuarhipti enga Jeoba, Dabidini erakupka para reiini. Ístu, no méni jurajkuspti Dabidini, nájkiruka inde ambe kánikua ikiatapka Saulini (1 Sam. 20:32-34). Jonatani xénchasïrenga Dabidini, jimbosï no enbidia pʼikuarherendi imani jimbo. Jonatani kánikua balori jukaspti ka uánikua xanhari niraspti uarhipeni ka kánikua sési úrasïrendi arkuni ka flechani. Uandanhasïrendi eska ima ka táti jémba sánderuksï “sóntku jámasïrenga eska aguilecha” ka ‘sánderuksï uinhapini eska leonicha’ (2 Sam. 1:22, 23). Ísï jimbo, Jonatani úpirindi kʼéri pʼikuarherani imani ambe jimbo enga úpka. Joperu no méni andaperani jámaspti Dabidi jingoni nijtu enbidia pʼikuarherapi imani ambe jimbo enga Dabidi úpka. Sánderu sési, sési exespti na enga xáni balori jukapka Dabidi ka na enga xáni mintsinharhienga Jeobani. Enga Dabidi uandikupka Goliatini, Jonatani jiáni uénaspti xénchani. w21.01 21 párr. 6; 22 párr. 8, 9

Iámindu kristianuechachi tata Jesukristueri juramukua jimbo jarhaska, enga jindeeka sánderu ambakiti juramuti. Joperu enga pirenchi ma uambuchajka, jatsisti para kurhajchani uámbani ka i ambe no méntkisï fásilisïndi. Ísï jimbo, engajtsï eratseni jauaka uambuchani erachi ma jingoni, sési japirindi eskajtsï kurhamarhikuarhipiringa: “¿Ambe xarhatasïni eska i erachi ambakiti familieri orhejtsïkuti máeuaka? ¿Jindeeski Jeobani marhuakuni ambe enga sánderu jukaparharajka? ¿Uá eskachi sánderu sési pájperaaka Jeobani jingoni?”. Ístu, pirenchi jatsisti para kurhamarhikuarhini: “¿Ambe uá úni parachi sési irekuarhini temungurhiri? ¿Tekaantstiski ka sési kámpisïni? ¿Na xáni sési pájperasïni ji Jeobani jingoni?” (Ecl. 4:9, 12). Enga pirenchi ambakiti ambe erakuska úni antede uambuchani, jarhuataati paraka uáka sési irekuarhini ka tsípikua jingoni. Uánikua pirenchichaksï ambakiti ejemplu ma íntspisïndi engaksï kurhajchajka uámbani. w21.02 8 párr. 1, 2

Ini últimu uéxurhinicha jimbo, uánikua erachichaksï uénasti máteru idioma jorhenguarhini para sánderu marhuakuni Jeobani. Mótsestiksï máteru kúnguarhikuarhu nani enga uétarhini japka aianhpinhani. Uékani sánderu marhuakuni Jeobani, ambe máesti engachi táchanisï jatsika para erakuni. Ka nájkiruka tiempu uétarhijka para nema sési jorhenguarhini idioma ma, íksï erachicha kánikua jarhuajpisïndi kúnguarhikuarhu. Jimbokaksï ambakiti kʼuiripuesïnga ka uánikua ambeksï míteni úni, kánikuaksï uinhaperantaasïndi erachichani. ¿A no eskachi jukaparharasïnga na engaksï xáni jánguarhintajka? ¿Sési japirini eskaksï kúnguarhikuarhu anapu orhejtsïkuticha no uékapiringa eska erachi ma niáraaka orhejtsïkutini o orhejtsïkutiri jarhuajpirini solu jimboka nótki sési uandasïnga idioma enga imani kúnguarhikuarhu uandanhajka? Nómbe. Orhejtsïkutichaksï jatsisti para exeni sini ima erachi úxaki ambe enga Biblia uandajka para orhejtsïkuticha ka para orhejtsïkutiri jarhuajpiricha ka no na enga xáni sési uandajka erachi kúnguarhikuarhu anapu idiomani (1 Tim. 3:1-10, 12, 13; Titu 1:5-9). w20.08 30 párr. 15, 16

Uánikua kʼuiripuechaksï eratsesïndi eskaksï jiáni uáka tsípikua jingoni irekani engaksï no pʼamenchaaka, engaksï kánikua sentabu jatsiaka ka enga imeri familia sési jauaka. Peru inde tsípikuarhita enga Santiagu uandapka Tata Diosïri espiritu santu jimbo jurhasïndi ka ísïchi úsïnga tsípikua jingoni irekani no arhiparini ambe engachi nitamakuarhini jauaka juchari irekuarhu (Gal. 5:22). Ambe enga újka eska kristianu ma tsípikua jingoni irekaaka, jindeesti míteni eska Jeoba jaiapanhentasïnga ka eska májkueni úxaka eska Jesusi (Luk. 6:22, 23; Kol. 1:10, 11). Úpiringachi terukutantani juchari tsípikuani lampara ma jingoni enga incharini tixarani jarhajka, chpiri kuájchakukata jarhasti para tarhiata ka janikua no pátani, ka ístu, juchajtuchi uáka tsípikuarhita jingoni irekani no arhiparini ambe enga úkuarhiaka juchari irekuarhu. Seguirisïngachi tsípikua jingoni irekani, nájkirukachi pʼamenchaaka ochi no jatsikuarheni kánikua sentabu. Seguirisïngachi tsípikua jingoni irekani nájkirukajtsïni teresmarhuaka ojtsïni juchari familia o máteru kʼuiripuecha no sésijtsïni kámani. Enga kʼuiripu újka ambe ma parachi jucha nóteru tsípikua jingoni irekania, i ambe úsïndi eskachi jucha sánderu tsípikua jingoni irekaaka. Tsʼéjkukuecha engachi nitamakuarhiajka xarhatasïndi eskachi jucha jindeeska Jesusiri chúxapaticha (Mat. 10:22; 24:9; Juanu 15:20). Jimbosï Santiagu uandapti iásï anapu tekstuni. w21.02 28 párr. 6

Engajtsï exentaska máru karakatechani Bibliarhu engaksï xarhatajka na enga xáni jukaparhakueka no xáni uandanhiani ka mintsikani Jeobani, jánguarhintsï je patsajtsïani indeni karakatechani. Jamberiksïni jarhuataati engajtsï bosi alta jimbo arhiantaska o karaani ka mémindu arhiantani. Jeoba juramukuspti Josueni eska chúrikua ka jurhiakua arhintapiringa Leiri libruni paraka úpiringa jánhaskakua jingoni jámani. Inde ambe jarhuatapirindi paraka no chépiringa orhekupani Jeobaeri iretani (Jos. 1:8, 9). Tata Diosïri Karakatarhu, uánikua ambechi uáka exentani engajtsïni jarhuataaka parachi no xáni uandanhiani imani ambe jimbo engajtsïni úpiringa no sési pʼikuastani o chérani (Sal. 27:1-3; Prov. 3:25, 26). Juchari tánguarhikuecharhu, kánikuajtsïni marhuachesïndi ambe engajtsïni jorhendajka arhijtsïkperatechani jimbo, ambe engaksï erachicha mókuntajka ka engachi uandontskuarhejka imechani jingoni (Ebr. 10:24, 25). Ístujtsïni uáti kánikua uinhaperantani engachi uénhikuarhiska kúnguarhikuarhu anapu erachi ma jingoni enga juchari amigueka. w21.01 6 párr.15, 16

Engari itsï atakuarhipka, xarhataspkari eskari jakajkusïrenga ka mintsikani Jeobani. Ka Jeobakini tsípikua jingoni jiókaspti imeri familiarhu. ¡I kʼéri kóntperata máesti! Iásï, ambe engari jatsika para seguirini úni, jindeesti jarhuajperata kurhakuni Jeobani. I ambe úpirindi ísï xarharani enajki no úkua juka engachi jukaparhakua ambe erakuni jauaka juchari tsípikuarhu. Joperu uétarhisïndi eskari májkueni uáka iámindu ambe jingoni engari erakuaka úni. Iá sea imani ambe jingoni engari tsípikuarhini uékaaka, ánchikuarhita jingoni ka ambe engari uékaaka úni chíti tsípikuarhu. Enbesde imani amberi úni enga tʼu exeaka eska sési jarhaska, exe ambe engaksï Bibliaeri karakatecha uandajka ima amberi engari nitamakuarhini jaka ka ísï ú (Prov. 3:5, 6). Engari ísï úska, sésiri pʼikuastaaka Jeobani ka uákari eskaksïni erachicha janhanharhiaka. Ísïsti, májkueni eska iámindu jucha, tʼujturi no perfektueska ka ménichandi nóri uáka sési úni ambe ma. Joperu i ambe, nókini jatsipirindi para ójkutani parari Jeobani marhuakuni xáni eskari na xáni uáka. w21.03 6 párr. 14, 15

¿Juchari familia no uékasïni eskachi marhuakuaka Jeobani? O ¿imani paisini jimbochi irekaxaki engajtsïni no jurajkujka para aianhpini? Enga ísïika, uátijtsïni uinhaperantani ambe enga arhijka 2 Timoteo 1:12-16 ka 4:6-11, 17-22. Apostuli Pablu jiáni karaaspti ini karakatechani enga ónhakata japka. Antede arhiantani ini karakatechani, ju je aianguni Jeobani juchari uandanhiatechani ka na engachi pʼikuarherajka. Meruchi imani ambe aianguaka ambe engajtsïni uandanhiatajka. Jiájkani engachi arhintani jauaka ambe enga nitamakuarhipka Pablu, ju je kurhakuni Jeobani eskajtsïni jarhuataaka exeantani konsejuechani engajtsïni juchantsïntu uáka májkueni jarhuatani. Jeoba aianguspti Pabluni eska niárapiringa no sési kánhani enga kristianuepiringia (Uku. 21:11-13). ¿Néna jarhuataspi Jeoba, Pabluni? Mókukuantaspti imeri kómarhikuechani ka uinhaperantaspti. Ístu Jeoba arhispti eska intsïnhapiringa kóntperatani enga jimbo xáni jánguarhintapka ka úraaspti Pablueri amigu jémbechani parakaksï jarhuatapiringa imani ambe jingoni enga ima uétarhinchani japka. w21.03 17, 18 párr. 14, 15, 19