Disiembri

Jesúsi uandaspti eskaksï ima ísï mítperaska imeeri chúxapatiicha jingoni, ísï eskaksï karichicha na sési mítperajka imeeri karichi eranguti jingoni (Juanu 10:14). Ka i ambe ísïisti, jimbokaksï karichicha mítesïnga né enga eranguajka ka kurhajchasïndiksï imani. Kʼuiripu ma exespti eska i ambe ísïiska. Ima uandantaspti: “Uékasïreengachi grabariuani máru karichichani, peruchi no úspka úni eskajtsïni andarhierapiringa, jimbokajtsïni no míchakuspka. Jimajkani, jurhaspti tumbi sapichu ma enga imeechani eranguauenga, ueenaspti uandajpaani ka imaksï jirejiresï chúxapaspti”. Ambe enga ima acheeti nitamakuarhipka, miátantasïndijtsïni ambe enga Jesúsi uandapka eskaksï úpiringa imeeri karichicha, engaksï jindeeka imeeri chúxapatiicha. Uandaspti: “Kurhauatiksï juchiiti uandakuani”. Joperu Jesúsi auandarhu jarhasti. Ísï jimbo, ¿nénachi uaa kurhajchani? Ma ambe engachi uaaka úni, jindeesti ísï úni eskajtsïni ima na jorhendaka (Mat. 7:24, 25). w21.12 16 párr. 1, 2

Apostoli Pablu no sési kaasïreendi kristianuechani. Peru niáraspti exeni eska no sési jarhaspka ambe enga úpka ka uékaspti mójtakukuarhini (1 Tim. 1:12-16). Tata Diosï Jeobaeri jarhuajperata jimbo, niáraspti orhejtsïkuti máeni enga sési kámpienga, pʼamojpienga ka kaxumbitiini. Ka enbesi de méntku miántani jarhani ambe enga no sési ueenga, mintsikasïreendi eska Tata Diosï Jeoba puákuntapiringa (Rom. 7:21-25). Mítespti eska no perfektuespka. Ísï jimbo, jánguarhintaspti para sánderu ambakiti kʼuiripu máeni ka kaxumbikua jingoni jurajkuspti eska Tata Diosï Jeoba jarhuatapiringa para úni aianhpini (1 Kor. 9:27; 2 Kor. 4:7). Erachiichaksï no niárasïndi orhejtsïkutiini jimbokaksï perfektueska, peru Tata Diosï Jeoba uékasïndi eskaksï exeaka ambe engaksï no újka sési úni ka eskaksï jánguarhintaaka ambakiti kristianu máeni (Efes. 4:23, 24). Jatsipirindiksï para Tata Diosïiri Karakata jingoni exekuarhini na engaksï jásï kʼuiripu máeka ka mójtakuni ambe enga xáni uétarhiaka. Engaksï ísï uaaka Tata Diosï Jeoba jarhuatauati paraksï sési pʼikuarherani ka ístu parakaksï uaaka úni imeecheeri ánchikuarhitani (Sant. 1:25). w22.03 29, 30 párr. 13-15

¿Ambechi jatsipirini para úni engachi kuenta íntskukuarheska eskachi jusgarixaka erachini ma? Ju je miáni eskachi jatsiska para xénchaani juchaari erachiichani (Sant. 2:8). Ístu, uaakachi kómarhini Tata Diosï Jeobani ka arhini eskajtsïni jarhuataaka parachi nóteru jusgarinia. Ka ísïchi uaaka úni eskachi na kurhajkuarhika kómarhikua jimbo ka niranchi uandontskuarheni erachi jingoni. Ístuchi uaaka pʼímarhini parachi márku aianhpini o tʼireni. Engachi sánderu sési míteni jauaka erachini, májkuenchi úni jauaka eska Tata Diosï ka Jesúsi, jánguarhintani imani ambe exekuni enga sési újka. Engachi ísï úska kurhajchanchi jauaka sánderu ambakiti karichi erangutiiri juramukuani enga uandajka asï jáma je jusgarpini. Ísï eskaksï karichicha na kurhajchajka imeeri erangutini enga ima uandajpaajka, Jesúsiiri chúxapatiichachi ísï úsïnga ambe engajtsïni ima arhijka. Ju je iáminduecha seguiriini jarhani ísï úni eskajtsïni na arhijka sánderu ambakiti karichi eranguti, nájkirukachi “namunitu karichicha” o “máteru karichicha” jingoni kuenta úkuarhijka (Luk. 12:32; Juanu 10:11, 14, 16). w21.12 19 párr. 11; 21 párr. 17, 18

Enga Reoboami niárapka Israeliiri reiini, kʼuiripuechaksï kurhakuspti eska no ísï ánchitaapiringa ísï eska na úpka imeeri taati Salomóni. Reoboami orheta sési ambe úspti: konseju kurhakuaspti Israeliiri orhejtsïkutiichani. Imeechaksï arhispti eska enga ísï úpiringa eskaksï kʼuiripuecha na kurhakuni japka, imeechaksï méntkisï imani jingoni japiringa (1 Rey. 12:3-7). Joperu Reoboami no jiókuarhispti imani konsejuni ka niraspti kurhamarhiani máteru acheetiichani engaksï imani jingoni tʼarhexepka. Imeechaksï arhispti eska sánderu ánchitaapiringa kʼuiripuechani (1 Rey. 12:9-11). Reoboami tsimani konsejuechani intsïnhaspti. Ima úpirindi kómarhini Tata Diosï Jeobani paraka jarhuatapiringa exeni ambe úni, peru no ísï úspti. Jiókuarhispti imani konsejuni enga sánderu tsitipka: acheetiicherini engaksï sánderu sapichku japka. Ka enga ísï úpka, kánikua no sési nikuspti imani ka ístu iretani. Juchajtuchi no méntkisï tsitiauaka konsejuechani engachi intsïnhauaka, joperu engaksï Bibliarhu pʼitakata jauaka, jatsiskachi para jiókuarhiani. w22.02 9 párr. 6

Kʼuiripu enga kaxumbitiijka ka enga mítejka asta nani jamberi uaa úni ambe ma, nóksï exesïndi ambe engaksï no újka sési úni tumbiicha, sino ambe engaksï újka sési úni. Ísïksï exeasïndi eska imeecheri kompanieruecha ka no eska nema enga euauaka imeecheri ánchikuarhitani. Erachiicha engaksï jatiriikia ísïksï exeasïndi sánderu sapichkuechani, komueska Tata Diosï Jeobaeri regalu ma ka kánikuaksï agradesidu pʼikuarherasïndi imani ambe jimbo engaksï újka. Jimbokaksï sánhani arhisïnga nóteru xáni uinhapiinia, jukaparharasïndiksï enga tumbiicha engaksï uinhapiti jaka, uéjka ka újka imani ánchikuarhita ambe enga kúnguarhikuarhu uétarhijka. Noemí enga Biblia uandajka ambakiti ejemplu máesti, jimboka agradesidespka ka jiókuarhispti eska sánderu sapichku ma jarhuatapiringa. Enga na uarhipkia Noemíiri uájpa, ima arhispti Rutini eska kʼuanhatsentapiringa imeeri familia jingoni. Joperu enga Ruti méntku úndapka arhini eska imani jingoni nipiringa asta Beléni jamberi, Noemí jurajkuspti eska ísï úpiringa (Rut 1:7, 8, 18). Ka inde ambe kʼéri kóntperata máespti para tsimarhani (Rut 4:13-16). Erachiicha engaksï jatiriikia ka kaxumbitiini májkuenksï úsïndi eska Noemí. w21.09 10, 11 párr. 9-11

Juchaari Taati auandarhu anapu sési mítesti ambe engachi mándani arhini újka úni. Jamberijtsï chá sánderu ambe uaaka úni eska chaari amiguecha o jamberijtsï no uaaka ísï úni eska máteruecha jimbokajtsï jatiriikia, pʼamenchani jarhani o responsabilidadichani jatsiani familiarhu. Joperu asï no sési pʼikuarhera je (Gal. 6:4). Tata Diosï Jeoba no méni mirikurhiati ambe engajtsï chá uaaka. Engajtsï méntkisï jánguarhintaska xáni eskajtsï xáni uaaka ka ambakiti mintsita ma jingoni, ima sési pʼikuarheraati. Tata Diosï Jeoba mítesti ambe engajtsï tsitipiringa úni. Uékasïndi eskajtsï tsípikua jingoni irekaaka ka eskajtsï sési pʼikuarheraaka imani ambe jingoni engajtsï uaaka úni para imani kómarhini. Desde iásïchi úsïngia sési pʼikuarherani jimbokachi míteska eska Tata Diosï Jeobajtsïni jarhuatasïnga engachi uandanhiateechani jatsiajka (Is. 41:9, 10). Uánikua ambe jarhasti engachi jimbo uaaka sési pʼikuarherani engachi kʼéri ambe arhiska juchaari Taatini enga kánikua xénchpetika, jimboka ima jukanchaska ‘tʼíntskua intsïnhani ka arhinhani eska kʼéri ambeeska’ (Jaŋ. 4:11). w22.03 24 párr. 16; 25 párr. 18

Uékasïngachi májkueni jámani eska Jesúsi, peruchi no jatsiska para no sési pʼikuarherani engachi no meru ísï úska eska ima na úpka (Sant. 3:2). Nema enga arteri ambe jorhenguarhini jaka, no uaati iámindu ambe májkueni úni eska imeeri maestru, joperu enga jorhenguarhijka ima ambeeri enga no sési újka ka enga jánguarhintaska májkueni úni eska imeeri maestru, sánhani arhiati sánderu sési úni ambe enga jorhenguarhini jaka. Sáno májkueni, engachi úska ambe engachi jorhenguarhiaka juchaari Biblieri jorhenguarhikuarhu ka engachi jánguarhintaska para sánderu sési úni ambe ma, májkuenchi úni jauaka eska Jesúsi (Sal. 119:59). Parhakpinirhu, kʼuiripuechaksï no uandanhiasïndi máteruechani jimbo, joperuchi Jeobaeri testiguecha no májkueni úsïnga. Mintsitarhujtsïni niárachesïndi ambe enga úpka Jesúsi máteruechani jimbo ka juchajtuchi uékasïnga májkueni úni (1 Ped. 2:21). Engachi jánguarhintaska xáni eskachi xáni uaaka para máteruechani jarhuataani ísï eska Jesúsi na úpka, sésichi pʼikuarheraaka jimbokachi míteaka eskajtsïni Tata Diosï Jeoba jaiapanhentaxaka. w22.02 24 párr. 16; 25 párr. 18

Ma ambe enga Tata Diosï Jeoba úrajka para orhejtsïkuni imeeri iretani jindeesti Biblia. Engachi arhutaska tiempu parachi eratsentani ambe engajtsïni jorhendajka Tata Diosï Jeoba, uaakachi úni ambe engajtsïni ima arhijka ka ístuchi seguiriini jauaka aianhpini (1 Tim. 4:15, 16). Tata Diosï Jeoba ístu úrasïndi “jántspirini enga mintsinharhikueka” ka jánhastiini para orhejtsïkuni imeeri iretani (Mat. 24:45). Ménichani i jántspirijtsïni arhisïndi ambe engachi jatsika para úni, joperuchi jucha jamberi no kurhangujka andiksïsï ísï uandajki. Jamberijtsïni arhiati ambe engachi jatsika para úni parachi no ma ambe úkuarhinchani enga desastre naturali ma úkuarhiaka, nájkirukachi jucha eratseaka eska jimeesïsï engachi jucha irekaka no méni úkuarhiaka desastre naturali ma. Jimajkani, ¿ambechi uaa úni engachi ísï eratseaka eska ambe engajtsïni arhijka no marhuauaka? Sési jauati engachi miántaaka imani ejempluechani engachi Bibliarhu arhiantaka. ¡Tata Diosïiri marhuariicha uánikua xanhariksï arhinhaspti eskaksï imani ambe úpiringa enga ísï xarhareenga enajki no ma ambe marhuapiringa paraksï úni tsípiti pakarani! (Juec. 7:7; 8:10). w22.03 18 párr. 15, 16

Jesúsi uandaspti ambe enga iásï anapu tekstu uandajka kánikua mintsikaparini. Ima mítespti eska imeeri tsípikua Jeobaeri jájkiicha jimbo jarhaspka ka seguru jarhaspti eska imeeri taati miápiringa imani. ¿Ambejtsïni jorhendasïni i ambe? Eskachi jatsiska para Jeobaeri jájki jimbo jurajkuni juchaari tsípikuani. Ka para indeni ambe úni, jatsiskachi para iámu juchaari mintsita jingoni mintsikani. Ju je eratseni Joshuari ejemplu erachi ma enga 15 jatiripka ka enga kʼéri pʼamenchakua ma kámeenga. Ima no jiókuarhiaspti tratamientuechani enga Tata Diosï no jaiapanheantajka. Antede uarhini, arhispti amambani: “Jeobaeri jájkiichani jimbo jarhaska. Uaakakeni seguru arhini i ambe eskarini Jeoba tsítantaaka. Ima mítesti ambe engani eratsejka ka na engani pʼikuarherajka ka eskani meru xénchasïnga”. Iáminduechachi jatsipiringa para kurhamarhikuarhini: “Engani tsʼéjkukua ma jatsiaka ka engani jamberi niárapiringa uarhini, ¿no jurajkua Jeobani ka mintsikaa eskarini Jeoba no mirikurhiaka ka eskarini tsítantaaka?”. w21.04 12, 13 párr. 15, 16

Tata Diosï Jeoba uinhaperantasïndi imeeri marhuariichani aianhpikuani jimbo. Kánikuajtsïni sési pʼikuastasïndi aianhpini ka uinhaperantasïndijtsïni, iá sea engaksï kʼuiripuecha kurhauaka o nómbe. Úpiringachi ísï pʼikuarherani eska, indeni ambe jimbo engachi nitamakuarhini jaka, nóchi uaaka xáni aianhpini. Joperu ju je no mirikurhini, eska engachi úska xáni eskachi xáni uaaka, Jeoba tsípini pʼikuarheraati juchantsïni jingoni. Asta engachi nóteru újkia uérani kʼumanchikuarhu, Jeoba exesïndi eskachi tsitisïnga aianhpini ka kánikua jukaparharasïndi. Ima uaati úni eskachi uandontskuarhekuauaka imeechani engajtsïni exejka o doktoriichani. Engachi terukutantaska na engachi xáni újka iásï imani jingoni engachi ióntki ueenga, uaakachi chkétakuarhini. Joperu engachi exeska na engajtsïni Jeoba jarhuatani jaka iásï, jatsiakachi uinhapikua parachi úni orhepani uérakuani na uéjki járhati tsʼéjkukuechani ka parachi seguiriini marhuakuni Jeobani tsípikua jingoni. Nóchi míteska náki jurhimbikueri semiia engachi jucha ikaraaka uaa sïrangua jukani ka tsikini (Ecl. 11:6). w21.05 24, 25 párr. 14-17

Ju je exeni ambe enga úkuarhinchapka rei Dabidi. Tata Diosï Jeoba uánikua ambe íntskuspti, jatsikuarhekua ambe, eskaksï uánikua kʼuiripuecha mítepiringa ka úspti eska andaapiringa imeeri enemiguechani. Dabidi kánikua agradesidu jarhaspti iámindu ambe jimbo ka uandaspti eska no méni úpiringa kʼamarani uandantani na enga xáni kánikua ambe íntskupka Tata Diosï (Sal. 40:5). Joperu ma xanhari, Dabidi mirikurhispti ambe enga xáni Tata Diosï Jeoba íntskupka. Nájkiruka uánikua témbeechani jatsiapka, ima ueenaspti tsitini máteru acheetiiri témbani, ambe ma enga Tata Diosï Jeoba no jaiapanhentajka. Uarhiiti arhinhasïreendi Bat-Seba ka imeeri uámba Uríasi enga itita máepka. Dabidi, sánderu ambe uékasïreendi, ka ísku jándikua ambe niátaspti Bat-Sebani jingoni ka ima embarasada pakaraspti. Joperu sánderu no sési ambe niátaspti, Dabidi úspti eskaksï uándikupiringa Uríasini (2 Sam. 11:2-15). ¿Ambe eratseni japi? ¿Eratsepi eska Tata Diosï Jeoba no exexapka? Nájkiruka Dabidi xáni ióni páani japkia marhuakuni Tata Diosï Jeobani, jukari uékaspti jatsini ambe ma ka inde ambe úspti eska kánikua no sési nikupiringa. Joperu tátsekua, Dabidi uandantaspti ambe enga no sési niátapka ka móantaspti. ¡Ka kánikua agradesidu jarhaspti enga Tata Diosï Jeoba puákuntapka! (2 Sam. 12:7-13). w21.06 17 párr. 10

Úpiringachi eratseni eskachi no uaaka jorhendani nemani Biblieri ambe. Jamberichi ísï eratsejka eskachi no xáni ambe míteska o eskachi jatsiska para sánderu sési jorhentpini. Enga ísïika, ju je tanimu ambe exeni engajtsïni jarhuataaka seguru jarhani eskachi uaaka jorhentpini. Orheta, Tata Diosï Jeoba exesïndi eskachi uaaka jorhendani máteru nemani. Tsimani úni jámani, Jesúsi enga ‘iámindu juramukua intsïnhaka auandarhu ka ístu parhakpinirhu’ juramuchisïndijtsïni eskachi jorhentpiaka (Mat. 28:18). Ka tanimu úni jámani, nóchi jandiajku jarhaska, májkueni eska Jesúsi, uaakachi mintsikani eskajtsïni Tata Diosï Jeoba jarhuataaka míteni ambe engachi uandaaka (Juanu 8:28; 12:49). Ístu, uaakachi uandontskuarheni erachi jingoni enga grupuni orhejtsïkujka aianhpikuarhu, prekursori o aianhpiri ma jingoni enga sési jorhentpijka parajtsïni jarhuatani ueenani nemani Biblieri ambe jorhendani. Engachi pámbetaska jorhendani nemani Biblieri ambe, uaakachi jorhenguarhini sánderu sési jorhentpini. w21.07 5 párr. 12

No ióni jimbo, kʼamakurhiatia iámindu ambe enga úkuarhini jaka parhakpinirhu. Ísï jimbo, jatsiskachi para mintsikani na enga újka Tata Diosï Jeoba ambe ma. Jimboka kʼéri mískuarhita jimbo, jamberichi arhinhaaka eskachi uaaka ambe ma engachi jucha ísï exeaka enajkichi no uaa ísï úni o eska no marhuauaka ísï úni. Ísïisti, nójtsïni meru Tata Diosï Jeoba arhiati ambe engachi jatsika para úni. Jamberi úrauati imeechani enga ima erakuaka parajtsïni orhejtsïkuni. Imani tiempuni jimbo, nóchi jatsiska para uandani sini ima ambe engachi arhinhani jaka Tata Diosï Jeobani jimboeski o siengaksï ima erachiicha engajtsïni orhejtsïkujka úxakaksï ambe ma eskaksï imeecha na uéjka. ¿Mintsikaachi Tata Diosï Jeobani ka imeeri kúnguarhikuani imani tiempu jimbo enga kánikua jukaparhakueka? Engachi iásï mintsikaska ambe engajtsïni arhijka Tata Diosïiri kúnguarhikua ka ísïchi úni, jamberichi májkueni uaaka jiáni enga k’éri mískuarhita úkuarhiaka. w22.02 6 párr. 15

Tata Diosï Jeobaeri jarhuajperata jimbo, Gedeóni ka imeeri 300 kʼuiripuecha engaksï imani jingoni jámeenga, andasptiksï guerrani ma engaksï jimbo úpiringa kʼéramakuarhini. Efraíniiri triburhu anapuechaksï niraspti uandontskuarheni Gedeónini jingoni, joperu no paraksï ambakiti ambe arhini, sino paraksï no sési arhini jimboka no pʼímarhiaspka paraksï nirani uarhipeni (Juec. 8:1). Gedeóni arhiaspti na enga Tata Diosï Jeoba újchakuraapka imeechani ka i ambe úspti eskaksï imeecha nóteru ikiapiringia (Juec. 8:3). Gedeóni tekaantaspti paraka Tata Diosïiri ireta úpiringa sési pájperani. Ka Efraíniiri tribueri, jorhenguarhisïngachi eskachi jatsiska para méntkisï sánderu jukaparharani kʼéri ambe arhini Tata Diosï Jeobani ka no jucha sési pakarani. Ka Gedeóniiri ambe, familiarhu anapu orhejtsïkutiicha ka orhejtsïkutiichaksï uaati jorhenguarhini, eska enga nema arhiaska ambe ma imani ambe jimbo engaksï ima úka, eskaksï jatsiska para jánguarhintani para ísï exeni ambe ma eska ima erachi na exejka. Ístuksï jatsisti para méntkisï sési arhini imani ambe jimbo enga sési úni jaka. Para i ambe úni uétarhisïndi kaxumbitiini. Joperu sánderu jukaparhakuesti eska kúnguarhikuarhu pínandikua jauaka ka eska xarhatakuani eska ambe engachi jucha uandani jaka ísïiska. w21.07 17 párr. 10-12

Tata Diosï Jeobajtsïni kánikua jukaparharasïndi jimbokajtsïni ísï úska eska ima na jásïika. Jimbokachi ísï úkata jarhaska eska ima na jásïika úsïngachi xénchpeni, pʼamojpeni, no méni jurajpini ka jurhimbikua jingoni jámani (Sal. 86:15; 145:17). Engachi jánguarhintajka ísï úni, kʼéri ambechi arhisïnga Tata Diosï Jeobani ka xarhatakunchi jarhasïnga eskachi agradesidu jarhaska (1 Ped. 1:14-16). Engachi újka ambe enga juchaari Taati auandarhu anapu jaiapanhentajka, sésichi pʼikuarherasïnga ka tsípisïngachi. Ístu, jimbokajtsïni Tata Diosï Jeoba ísï úska eska ima na jásïika, úsïngachi ima jásï kʼuiripueni enga ima uéjka jatsiani imeeri familiarhu. Tata Diosï Jeobajtsïni ambakiti lugari ma úchisti parachi irekani. Kánikua antesi de kueraani kʼuiripuechani, Tata Diosï úspti Echerini para kʼuiripu irekani (Job 38:4-6; Jer. 10:12). Jimboka kánikua sési kámpisïnga ka intsïmpitini, mámaru ambe ústi parakachi tsípikua jingoni irekapiringa (Sal. 104:14, 15, 24). Ménichani, eratsentani pakarasïreendi imani ambe jimbo enga kueraapka ka “exespti eska ambakiti ambeespka” (Gén. 1:10, 12, 31). w21.08 3 párr. 5, 6

Iámindu kristianuechachi jatsiska para aianhpini ka Jesúsiiri chúxapatiichani uaani (Mat. 28:19, 20; Rom. 10:14). ¿Uékapirinchi sánderu sési úni ini xáni k’éri ánchikuarhitani? Para úni ísï úni, uaakachi jorhenguarhini foietuni Jorhentpini ka meteechani jatsikukuarhiani engajtsïni jarhuataaka úni ambe engachi jorhenguarhikia. Ju je miáni eska meta ma engachi uaaka jatsikukuarhini ka enga kánikua jukaparhakueka, jindeesti xarhataani kualidadichani enga Tata Diosï jaiapanhentajka (Kol. 3:12; 2 Ped. 1:5-8). Ísïisti, iáminduchi uékasïnga sánderu marhuakuni Tata Diosï Jeobani ka eskachi na xáni úni jaka iásï. Jimbanhi parhakpinirhu engajtsïni Tata Diosï aiachini jaka, uaakachi sánderu marhuakuni. Enga jamberi niáraaka ima jurhiatikua, engachi jánguarhintaska úni na engachi xáni uaaka parachi sánderu marhuakuni Tata Diosïni, sánderuchi tsípikua jingoni irekaaka ka nóteruchi xáni no sési pʼikuarheraakia. Ka sánderu jukaparhakua ambe, k’éri ambechi arhini jauaka Tata Diosï Jeobani, juchaari “Tata Diosïni enga felisiika” (1 Tim. 1:11, TNM). Jiájkani, ju je sési pʼikuarherani imani ambe jimbo engachi újka Tata Diosï Jeobani jimbo. w21.08 25 párr. 18-20

Engajtsï chá familia ma jimbo tʼarhexeka engaksï Jeobaeri testigueka, jamberijtsï desde sapichku ueenaka jorhenguarhini Tata Diosï Jeobaeri ambe. Jorhenguarhiskajtsï eska ima jindeeska Kueraajpiri, eska ambakiti kualidadichani jatsiaska ka eska uékasïnga eskaksï kʼuiripuecha paraisurhu ma irekaaka ixú Echerirhu (Gén. 1:1; Uku. 17:24-27). Uánikua kʼuiripuechaksï no jakajkusïndi eska jarhaska Tata Diosï o eska ima kueraaska iámindu ambe. Imeechaksï jakajkusïndi eska ísku jatini úkuarhiska tsípikua ka eska sánhani arhispka mójtakukuarhipani astaka niárapka mámaru járhatiini. Máru inde kʼuiripuecha engaksï kánikua jorhenguarhika eskuelarhu, úpirindiksï uandani eska siensia xarhataskia eska ambe enga Biblia uandajka, no ísïiska ka eskaksï imeechajkusï jakajkujka Kueraajpirini engaksï no ma ambe míteka o engaksï no nika eskuelarhu ka engaksï iámindu ambe jakajkujka. Na uéjkichi xáni ióni páni jarhania Tata Diosï Jeobani marhuakuni, iáminduechachi jatsiska para sánderu jakajkuni Tata Diosïni. Engachi ísï úska, nóchi jurajkuaka eskajtsïni ima kʼuiripuecha engaksï jorhentpijka eska no ísïiska ambe enga Biblia uandajka, támisïjtsïni jánhastaaka mámaru járhati “jorhenguarhikuechani jimbo ka chkuanderakua ambe jimbo” engaksï “no marhuajka” (Kol. 2:8). w21.08 14 párr. 1-3

Abeli, Noé, Abraáni ka Jobu, xarhatasptiksï eskaksï janhanharhisïreenga ka xénchani Tata Diosï Jeobani jimbokaksï kurhajchaspka, mintsikaspti ka mámaru ambeksï úspti para imani marhuakuni. Jánguarhintasptiksï janhanharhini Tata Diosï Jeobani ka ima jaiapanhentaspti ambe engaksï imeecha úpka. Tátsekua Moisésini úraparini, Tata Diosï Jeoba íntsaaspti Leichani israeliteechani. Íksï Leicha uandasïreendi na engaksï jatsipka para kʼéri ambe arhini Tata Diosïni. Enga Jesúsi na uarhipkia ka tsíntani, Tata Diosï Jeoba nóteru erokuarhisïreendia eskaksï israeliteecha kurhajchapiringa Moisésiiri Lei (Rom. 10:4). Kristianuechaksï jatsipirindi para kurhajchani “Kristueri mandamientu” o lei (Gal. 6:2). Nóteruksï jatsipirindia paraksï miántani imani ambe engaksï no jatsipka para úni. Sánderu sési, jatsipirindiksï para ísï jámani eska Jesúsi ka úni ambe enga ima jorhentpipka. Iásï, kristianuechajtuksï jánguarhintasïndi para ísï jámani eska Kristu paraksï úni jaiapanherantani Tata Diosï Jeobani ka únksï sési pʼikuarherantani (Mat. 11:29). w22.03 20, 21 párr. 4, 5

Tata Diosï Jeoba kurhajchaasïndi imeeri uájpeechani. Seguruchi jarhaska eska kurhajchaspka jiáni enga Jesúsi mémindu kómarhipka enga ixú Echerirhu jámani japka. Kurhajchaspti Jesúsi jiáni enga jukaparhakua ambe úpiringa, komu jimajkani enga imeeri 12 apostoliichani erakuapka (Luk. 6:12, 13). Tata Diosï Jeoba ístu kurhajchaspti jiáni enga Jesúsi no sési nitamakuarhini japka. Sánisï antesi de Judasï traisionariini, kurhakuspti imeeri Taatini, eska jarhuatapiringa imani no sési jásï ambe jingoni enga nitamakuarhipiringa. Peru Tata Diosï Jeoba no nomasi kurhajchaspti imeeri Uájpani enga xáni xénchajka, ístu, ánjelini ma axaspti para uinhaperantani (Luk. 22:41-44). Iásïjtu, Tata Diosï Jeoba ístu kurhaasïndi engachi kómarhijka ka mókuchintasïndijtsïni jiáni enga ima sési exeaka ka imani ambejtsïni mókuchintasïndi engachi meru uétarhinchajka (Sal. 116:1, 2). India anapu pirenchi ma, meru i ambe nitamakuarhispti. Ima jukari uandanhiasïreendi ka kurhakuspti Tata Diosï Jeobani eska jarhuatapiringa. Ima uandasïndi: “Maiu de 2019 jimbo, programa JW Broadcasting^® uandasïreendi néna uaa ma orhepani uérani enga jukari uandanhiani jauaka ka no sési pʼikuarherani jarhani. Inde ambesïni meru uétarhinchani japka. Ísïrini mókuchiantaspti Tata Diosï Jeoba juchiiti kómarhikuechani”. w21.09 21, 22 párr. 6, 7

¿Eranhaskasïnchi na enga xáni úkua jukapka para primeru siglurhu anapu kristianuecha engaksï jatsipka para iámindu ambe jurajkuni? Uétarhinchasïreendiksï mintsikani eska Tata Diosï Jeoba íntsaapiringa ambe engaksï uétarhinchapiringa. Joperu sinko uéxurhini ante de Roma anapuecha uirhipandani Jerusalénini, apostoli Pablu íntsaaspti konsejuechani enga kánikua jarhuataapiringa, uandaspti: “Asï jáma je jatsikuarhekuekani, sino tsípi je indeni ambe jingoni engajtsï jatsika, jimboka [Tata] Diosï uandaska: ‘Jíkeni no méni késtakuchiaka ka níjtukini méni jurajkuni jandiajku’. Ísï jimbo jucha úsïnga no sáni dudariparini uandani: ‘[Tata] Diosï jindeesti juchiiti jarhuajpiri, ísï jimbo ji no sáni chéaka ambe engajtsïni kʼuiripuecha uékaaka úchini’” (Ebr. 13:5, 6). ¿Néna nikuaspi kristianuechani engaksï kurhajchapka ambe enga apostoli Pablu uandapka ante deksï Roma anapuecha inchaakuni Jerusaléni? Seguru eska no úkua jukakuapiringa arisku sáni irekani nani engaksï nipiringa. Seguruksï jarhaspti eska Tata Diosï Jeoba íntsaapiringa ambe engaksï uétarhinchapiringa. w22.01 4 párr. 7, 9

Engachi eratsentajka nemani enga pʼamojpitiijka jamberichi eratsejka nemani enga sési kámpijka, enga sési útspijka ka enga intsïmpiriijka. Jamberichi jirejiresï eratsejka imani samaria anapuni enga Jesúsi uandapka Bibliarhu. I achamasï enga no judiuepka pʼamojkuspti judiuni ma engaksï no sési úkupka kuarhukpiticha máru. I Samaria anapu “uéki jimbo pʼamojkuspti” judiuni ka uékperakua jimbo úspti eskaksï sési kuidaripiringa (Luk. 10:29-37). I uandantskua, xarhatasïndi ambakiti ambe juchaari Tata Diosïiri, engajtsïni mámaru ambe jimbo xarhatachejka ka pauani pauani: pʼamojperakua. Pʼamojperakua, ístu jindeesti no kastigarini nemani enga uétarhijka ísï úni. Tata Diosï Jeoba kánikuajtsïni pʼamojperata xarhatachesti juchantsïni, jimboka eska na uandapka salmueri karari ma, “nójtsïni no sési kámasïndi eskachi na uétarhinchajka juchaari pekaduechani jimbo” (Sal. 103:10). Joperu ménisï Tata Diosï Jeoba jatsisïndi para uinhamu jurhimberantani nemani enga pekadu ma újka. w21.10 8 párr. 1, 2

Tata Diosï Jeoba imeechantkusï xarhatakuajti ambakiti uékperakua engaksï ambakiti pájperakua ma jatsika imani jingoni, imeechantku engaksï marhuakujka. Ka i ambe xarharasïndi eska ísïiska, imani ambe jimbo enga rei Dabidi ka profeta Danieli uandapka. Dabidi karaspti: “Seguirii xarhatakuani chiiti ambakiti uékperakua imeechani engaksïni míteka” ka “Tata Diosï Jeobaeri ambakiti uékperakua jindeesti para méntkisï imeecha jimbo engaksï janhanharhijka”. Ka Danieli uandaspti: “Oh, Jeoba, Tata Diosï jurhimbiti, kánikuari kʼériiska, ima enga [...] xarhatakuajka ambakiti uékperakua imeechani engaksï xénchajka ka engaksï kurhajchaajka imeeri juramukuechani” (Sal. 36:10; 103:17; Dan. 9:4). Eskachi na exekia, Tata Diosï Jeoba ambakiti uékperakua xarhatakuasïndi imeechani engaksï marhuakujka, jimbokaksï míteska, janhanharhini, xénchani ka jimbokaksï kurhajchaasïnga imeeri juramukuechani. Tata Diosï, imeeri iretankusï xarhatakujti ambakiti uékperakua jimbokaksï ísï marhuakusïnga eska ima na uéjka. Ante dechi ueenani marhuakuni Tata Diosï Jeobani, imajtsïni tʼuini xarhatachesïreendia eskajtsïni xénchasïreenga ísï eska iámindu kʼuiripuechani (Sal. 104:14). Joperu, engachi ueenaka marhuakuni, ístuchi ueenaska jatsini imeeri ambakiti uékperakuani. w21.11 3, 4 párr. 8, 9

Ambe uéjki úkuarhini, eratsetixakachia kurhajchani Jesúsiiri uandakuechani enga iásï anapu tekstu uandaajka. Ini jurhiatikuecha jimbo, uánikua kʼuiripuechaksï kánikua tsípikua jingoni chúxapasïndi máru relijioniiri orhejtsïkutiichani ka niárasïndiksï jamberi ísï exeani eska diosï ma. Uánikuaksï nirasïndi imeecheri iglesiecharhu, piásïndiksï imeecheri libruechani ka kánikua sentabuksï íntskuasïndi para jarhuataani. Máruksï iámu ambe jakajkusïndi engaksï imeecha uandajka. ¡Nóksï xáni tsípipirindi engaksï Jesúsini exepiringa eskaksï na tsípijka engaksï íchani exeajka! Joperu jucha engachi sési marhuakuni jaka Tata Diosï Jeobani, nóchi ma kʼuiripuni chúxapasïnga. Nájkirukachi janhanharhiajka imeechani engajtsïni orhechepajka, kurhajchasïngachi ambe enga Jesúsi uandapka: “Chá iáminduecha ermanueska” (Mat. 23:8-10). Nóchi kʼéri ambe arhisïnga kʼuiripuni ma nájkiruka relijionini ma orhejtsïkuaka o juramuti máeni. Nóchi apoiarisïnga ambe enga ima újka, nóchi apoiarisïnga politikani ka nóchi ísï jámasïnga eska i parhakpini na jámajka. Iámindu i ambe jimbo, jucha no májkueniiska eska máteru relijionicha engaksï uandajka eskaksï kristianueska (Juanu 18:36). w21.10 20 párr. 6, 7

Iámindu kristianuecha engaksï uékajka pímbinhasïini, jatsistiksï para jánguarhintani paraka no ma ambe sánderu jukaparhakueuaka eska sési pájperani Tata Diosï jingoni. Ka jimbokachi Jeobaeri testigueska, nóchi uékasïnga úni ambe ma enga no sési pakatapiringa Tata Diosïiri nombrini enga pímbinhasïika (Lev. 19:12; Is. 57:15). Israeliteechaksï xarhatasïreendi eskaksï jiókuarhisïreenga Tata Diosï Jeobani, engaksï kurhajchauenga imeeri juramukuechani. Levítico 18:4 uandasïndi: “Kurhajchaa je juchiiti juramukuechani, ka ísï jáma je eskaksï juchiiti leicha na arhijka ka ísï ú je. Ji jindeeska Jeoba chaari Tata Diosï”. Máru juramukuecha engaksï israeliteecha intsïnhaapka, kapitulu 19 jimboksï jarhasti. Pori ejemplu, bersikuluecha 5 a 8, 21 ka 22 animalicheeri kéjtsïtakuecheri ambe uandasïndi. I ambe jatsispti para sési úkuarhini para no ikichakueni jásï ambe úni “ambe ma enga pímbinhasïika para Tata Diosï Jeoba”. Arhiantani ini karakateechani jarhuatapirindijtsïni parachi jaiapanherantani Tata Diosï Jeobani ka parachi kʼéri ambe arhini imani ambe jingoni enga ima jaiapanhentajka, ísï eskajtsïni na arhijka Ebreu 13:15. w21.12 5, 6 párr. 14, 15

Temungurhiriicha engajtsï sapichku jaka, chájtsï uánikua ambe uaaka jorhenguarhini imeecheri engaksï pʼindekia mintsinharhini Tata Diosï Jeobani. Máru temungurhiriichaksï ióni páxatiia tiempu kompletueri marhuani. ¿Andisïjtsï no konseju kurhakuajki engajtsï uétarhinchani jauaka jarhuajperata parajtsï exeni nénajtsï uaa sánderu marhuakuni Tata Diosïni? I jindeesti ma ambe engajtsï jimbo uaaka xarhatani eskajtsï mintsikasïnga Tata Diosï Jeobani (Prov. 22:17, 19). Miá je, temungurhiriikua Tata Diosï Jeobaeri intsïmperakua máesti ka ima uékasïndi eskaksï temungurhiriicha tsípikua jingoni irekaaka (Mat. 19:5, 6). Temungurhiriicha engaksï sánderu sapichku jaka, ¿andijtsïsï no eratsentajki ambejtsï úxaki chaari tsípikua jingoni? ¿Úxakijtsï ambe enga xáni uétarhijka parajtsï xarhatakuni Tata Diosï Jeobani eskajtsï agradesidu jarhaska imani ambe jimbo engaksïni xáni íntskuni jaka? Uandontskuarhi je Tata Diosï Jeoba jingoni, jirinha je imeeri Karakatarhu konsejuechani engaksïni uaaka jarhuatani ka ísï ú je eskaksïni ima na arhini jaka. Uaakajtsï seguru jarhani eska engajtsï orheta peeraska Tata Diosï Jeobani marhuakuni sánderujtsï tsípikua jingoni irekuarhiaka. w21.11 18, 19 párr. 16, 18

Santiagu no kʼéramakuarhisïreendi. Ima no jámaspti eratseni eska ima sánderu kʼéri ambeespka jimboka Jesúsiiri ermanu jémbeespka o jimboka kʼérati ánchikuarhiteechani jatsiaspka kúnguarhikuarhu. Ima ísï arhiaspti erachiichani “juchiiti ermanuecha engaksïni ji xáni uékajka” (Sant. 1:16, 19; 2:5). Ima no ísï jámasïreendi enajki iámu ambe sési ueeni. ¿Ambejtsïni jorhendasïni i ambe? Ju je miáni eskachi iáminduecha pekadoriiska. Ju je no jámani eratseni eskachi sánderu kʼéri ambeeska eska juchaari jorhenguarhiricha. ¿Andi? Jimboka engachi ísï úska, ima uaati eratseni eska no méni uaaka úni imani ambe enga Tata Diosï uékajka. Joperu engachi jiókuarhiska eskachi ménisï úkua jukanchasïnga úni eska Biblia na uandajka ka engachi aianguska jorhenguarhirini néna engajtsïni Tata Diosï Jeoba jarhuatani jaka parachi úni mójtakukuarhini, jarhuatanchi jauaka paraka ima exeaka eska imajtu uaaka marhuakuni Tata Diosïni. w22.01 11, 12 párr. 13, 14

Engachi jánguarhintaska ísï eratseni eska Jesúsi, sánderuchi uaaka ísï jámani eska ima (Ebr. 1:3). Jamberijtsï chá eratsejka: “Jesúsi perfektuesti. ¡Ji no uaaka meru ísï jámani eska ima!”. Engajtsï chá ísï eratsejka, miá je arini tanimu ambe. Primeru, chájtsï kueraanhaska parajtsï ísï jámani eska Tata Diosï Jeoba ka Jesúsi. Nájkirukajtsï no uaaka merumindu ísï jámani eska imeecha, chájtsï uaaka jánguarhintani para sáno májkueni jámani eska imeecha (Gén. 1:26). Segundu, Tata Diosïiri espiritu santu kánikua uinhapisti. Imeeri jarhuajperata jingoni chájtsï uaaka úni ambe engajtsï jandiajku no úpiringa úni. Terseru, Tata Diosï Jeoba no erokuarhisïndi eskajtsï chá iáiasï sési xarhatauaka imani kualidadichani enga imeeri espiritu santu úrpijka. Miánta je eska juchaari Taati enga kánikua xénchpejka 1,000 uéxurhini íntsauaka imeechani engaksï erokuarhini jaka Echerirhu irekani paraksï perfektueni (Jaŋ. 20:1-3). Ambe enga Tata Diosï Jeoba erokuarhijka iásï, jindeesti eskachi kánikua jánguarhintaaka iámindu kualidadichani xarhataani ka mintsikani eska imajtsïni jarhuataaka. w22.03 9 párr. 5, 6

Aparte de kómarhini, jatsiskachi para jorhenguarhini Tata Diosïiri Karakatani ka nirani tánguarhikuecharhu parachi úni sánderu sési pájperani Tata Diosï Jeoba jingoni. ¿Ambechi uaa úni parachi sánderu sési úrani tiempuni engachi jorhenguarhini jauaka ka engachi tánguarhikuecharhu jauaka? Ju je kurhamarhikuarhini: “¿Amberini ójkutasïni engani jorhenguarhini jarhajka Biblieri ambe ka engani tánguarhikuecharhu jarhajka?”. ¿Úpirintsïni ójkutani engajtsïni nema uandajpaska, korreu elektroniku ma axacheni, mensajichani telefonu jimbo o máteru aparatu jimbo? Engachi jorhenguarhini jauaka o tánguarhikuarhu jarhani ka exenchi eskachi máteru ambe eratsexaka, ju je kurhakuni Tata Diosï Jeobani eskajtsïni jarhuataaka. Engajtsïni ambe ma uandanhiatani jauaka jamberi no fásiliuati parachi Tata Diosïiri ambe úni, joperu kánikua jukaparhakuesti eskachi indeni ambe uaaka. Ju je kómarhini Tata Diosï Jeobani eskajtsïni íntskuaka pínandikua enga uaaka kuájchakuni juchaari mintsitani ka juchaari eratsekuani (Filip. 4:6, 7). w22.01 29, 30 párr. 12-14

Rei Usíasi no jiókuarhiaspti konsejuechani. Jimboka uékasïreenga insiensuni kéjtsïtani, inchaspti templurhu jima engaksï saserdotiichajku ueenga inchani. Imeechaksï arhispti: “¡Usíasi, tʼuri no sésikua jatsiska para kéjtsïtakuni insiensu Tata Diosï Jeobani! Saserdotiichajkuksïsï újti kurhirani insiensu”. ¿Ambe úspi Usíasi? Biblia uandasïndi eska kánikua ikiaspka. ¿Ka andisï no jiókuarhipi konsejuni? Jamberi eratsepti eska jimboka ima reispka, úpiringa úni ambe enga ima uékapiringa. Peru Tata Diosï Jeoba no ísï exesïreendi. Enga Usíasi kaxumbitiipiringa, jiókuarhipirindi konsejuni ka jirejiresï uéntapirindi templurhu ka jamberi Tata Diosï Jeoba puákuntapirindi. Peru jimboka úspka ambe ma enga no sésikua jatsipka, Tata Diosï Jeoba úspti eska lepra pʼamenchapiringa ka imani pʼamenchakua kámaspti asta jiáni enga uarhipka (2 Crón. 26:16-21). ¿Ambechi jorhenguarhisïni ima ambeeri enga Usíasi úkuarhinchapka? Eska no arhiparini náki responsabilidadichanchi jatsiaua, engachi no jiókuarhiaska Biblieri konsejuechani, Tata Diosï Jeoba nóterujtsïni jaiapanhentaatia. w22.02 9 párr. 7

Kʼuiripu ma enga seguiriini jarhajka ísï jámani eska ióntki, sáno méntkisï no sési ambe úsïndi ka no sési ambe eratseni pekaduni jimbo (Kol. 3:9). Jamberi sóntku ikiajti, imajku pendienti pákuarhini, desagradesidueni ka kʼéramakuarhini. Jamberi tsitijti pornografia ambe exeni ka pelikuleechani engaksï ísku jándikueri ambeeka o engaksï atajperakueri ambeeka. Ka nájkiruka ambakiti kʼuiripu máeuaka ka asta jamberi no sési pʼikuarherani indeni ambe jimbo enga uandajka o úni, inde kʼuiripu jatsisti para meru mintsita jingoni uékani mójtakurhini para nóteru no sési ambe eratsenia nijtu no sési ambe úni (Gal. 5:19-21; 2 Tim. 3:2-5). Jimbokachi no perfektueska, nóchi uaaka meru nóteru eratsenia imani ambe enga no sési jaka nijtu nóteru tsitinia imani ambe enga no sési jaka. Ménichanchi no sési ambe uaaka o uandani ka tátsekuachi no sési pʼikuarherani jarhania (Jer. 17:9; Sant. 3:2). Joperu engachi nóteru ísï jámajkia eska ióntki, nóteruchi jurajkutakuarhisïngia eskajtsïni pekadu no sési ambe úraaka ka iásïchi ménderueni jámasïngia (Is. 55:7) w22.03 3 párr. 4, 5

Orhejtsïkutiicha, ambakiti kualidadichani exekua je erachiichani. Ísïisti, imeechaksï no perfektueska, joperuksï ambakiti kualidadichani jatsiasti. Ménichantsï jatsiaka para jurhimberantani nemani. Peru ísï eska apostoli Pablu, jánguarhinta je no imani ambe exeni enga ima erachi no újka sési úni. Sánderu sési exe je eska xénchasïnga Tata Diosï Jeobani ka eska tekaantskua jingoni marhuakuxaka ka eska uaaka ambakiti kʼuiripu máeni. Ima orhejtsïkutiicha engaksï ambakiti ambe eratsejka erachiicheeri ambe, úsïndiksï eska sési pájperanhaaka ka xénchperanhani kúnguarhikuarhu. Miá je eska Tata Diosï Jeoba no erokuarhisïnga eskajtsï perfektueuaka, joperu uékasïndi eskajtsï sési marhuakuaka (1 Kor. 4:2). Uaakajtsï seguru jarhani eska Tata Diosï Jeoba jukaparharasïnga chaari ánchikuarhitani, jimboka eska na uandajka Ebreu 6:10, “ima no mirikurhiauati chaari úkuechani ka nijtu indeni ambe engajtsï úni jaka xarhataparini eskajtsï uékasïnga [Tata] Diosïni, jimbokajtsï jarhuataaska imeeri míndakatechani ka útasïjtsï jarhuataaxaka”. w22.03 31 párr. 19, 21