Eneru

¿Andisï Timoteu xáni sési marhuakupi Tata Diosï Jeobani? Jimboka ambakiti kualidadichani jatsiaspka (Filip. 2:​19-22). Ambe enga apostoli Pablu uandapka Timoteueri ambe, exesïngachi eska ima kaxumbitiispka, sési marhuakusïreenga Tata Diosïni, ánchikuarhirini ka mintsinharhikueni. Ka meru uandanhiasïreendi erachiichani jimbo. Jimbosï Pablu kánikua xéncheendi ka mintsikasïreendi eska úpiringa úni náki uéjki ánchikuarhita ma. Engachi juchajtu xarhataaska kualidadichani enga Tata Diosï Jeoba jaiapanheantajka, imajtsïni sánderu xénchaati ka sánderujtsïni úraati kúnguarhikuarhu (Sal. 25:9; 138:6). Ísï jimbo kómarhi Tata Diosï Jeobani parajtsïni jarhuatani míteni náki kualidadiichanchi uaa sánderu sési xarhataani. Ju je erakuni kualidadini ma ka jánguarhintani xarhatani. ¿Uétarhinchasïnchi sánderu kurhangukuani máteruechani? ¿Jatsipirinchi para sánderu sési pájperani máteruecha jingoni ka puákuantani? Engachi no seguru jaka, uaakachi kurhamarhini amiguni ma eskajtsïni arhiaka na engajtsïni exejka (Prov. 27:6). w22.04 23 párr. 4, 5

Tata Diosï Jeoba uékasïndi eskachi tsípini pʼikuarheraaka. Ka i ambe ísïisti, jimboka imeeri espiritu santu úsïnga eskachi tsípini pʼikuarheraaka (Gal. 5:22). Ka jimboka ma sánderu sési pʼikuarherasïnga enga intsïmpijka ka enga intsïmbinhajka, kánikuachi sési pʼikuarherasïnga engachi uánikua ambe jatsijka para úni aianhpikuarhu ka engachi jarhuataajka erachiichani (Úku. 20:35). ¿Ambejtsïni jarhuataa parachi seguiriini tsípini pʼikuarherani? Apostoli Pablu tsimani ambe uandaspti eskajtsïni uaaka jarhuatani, ka karakata jarhasti iásï anapu tekstu jimbo. Orheta, eskachi tsípini pʼikuarheraaka engachi sánderu ambakiti ambe íntskuska Tata Diosï Jeobani. Ka iáminduechachi uaaka ísï úni (Mat. 22:​36-38). Segundu, eskachi no jámaaka terukukuarhintani máteruecha jingoni. Engachi no pʼamenchani jaka, jorhendanhanchi úni ambe ma o engachi jorhenaka sési úni ambe ma, ju je diosmaiamukua arhini Tata Diosï Jeobani jimboka imajtsïnisï íntskujka indeni ambe. Joperu engaksï máteru erachiicha sánderu sési aianhpijka, ju je sési pʼikuarherani jimbokaksï úraxaka ambe engaksï jorhenaka úni paraksï Tata Diosï Jeobani kʼéri ambe arhini. w22.04 10 párr. 1, 2

Nasionichaksï ma repentku kʼamajkuauati relijioni no jurhimbitiichani ka i ambe ísku pakatauati iámindu kʼuiripuechani (Apok. 18:​8-10). Enga Kʼéri Babilonia kʼamajkunhaaka, parhakpini anapuechaksï kánikua no sési pʼikuarheraati ka jamberi i ambe uaati eskaksï problemecha jauaka. Joperu jucha engachi marhuakujka Tata Diosï Jeobani sésichi pʼikuarherani jauaka jimbokaksï nóteru jauakia relijioni no jurhimbitiicha engaksï Tata Diosïiri enemigueka desde iónisïa. Ka ístu jimboka nóteru ióni kueratani jauatia parachi pʼímutanhantani i parhakpini jimbo. Danieli uandaspti: “Jurhimbiti jánhaskakua kánikua úkuarhintaati”. Ka ísï úkuarhixati. Iásïchi sánderu sési kurhanguasïngia profesiechani engaksï i jurhiatikuecheri ambe uandajka (Dan. 12:​4, 9, 10). Profesiechaksï meru ísï úkuarhixati ka inde ambe úsïndi eskachi mintsita jingoni janhanharhiaka Tata Diosï Jeobani ka imeeri Karakatani (Is. 46:10; 55:11). Ísï jimbo, ju je seguiriini sánderu mintsikani Tata Diosïni. ¿Nénachi uaa ísï úni? Engachi jánguarhintaska Biblieri ambe jorhenguarhini ka engachi jarhuataaska máteruechani Tata Diosï Jeobaeri amigu úkuarhini. Juchaari Tata Diosï kuájchakuauati iámindu imeechani engaksï mintsikajka imani ka “íntsaani jaua[ti] pínandikua para méntkisï” (Is. 26:3). w22.07 6, 7 párr. 16, 17

Libru Apokalipsisi uandasïndi eska Tata Diosïiri Reinu juramuxakaia auandarhu ka eska Satanási kʼuanijpanhaska Echerirhu (Apok. 12:​1-9). I ambe kánikua sési pʼikuastaasti imeechani engaksï auandarhu irekaka, peru juchantsïni uánikua uandanhiateechani juáchiasti. ¿Andi? Jimboka Satanási kánikua no sési kaaxaka Tata Diosï Jeobaeri marhuariichani engaksï Echerirhu irekani jaka (Apok. 12:​12, 15, 17). ¿Ambechi uaa úni parachi no méni jurajkuni Tata Diosïni nájkirukajtsïni Satanási no sési kámani jauaka? (Apok. 13:10). Ma ambe engajtsïni jarhuataaka, jindeesti míteni ambe enga úkuarhiaka sánderu orhepani. Libru Apokalipsisi jimbo apostoli Juanu uandasïndi máru kóntperatechani engachi jatsiuaka sánderu orhepatini. Ma jindeuati eskaksï kʼamajkunhaaka Tata Diosïiri ikiatspitiicha. Primeru bersikulurhu libru Apokalipsisi jimbo, sési xarhatasïndi eska iámu ambe enga karakata jaka ini libru jimbo, jánhaskuecha o símboluecha jimbo jarhaska (Apok. 1:1). w22.05 8 párr. 1-3

Engaksï exeauaka eskaksï Tata Diosï Jeobaeri marhuariicha sési eratsetixaka imani marhuakuni, imeecha engaksï no apoiarijka Tata Diosï Jeobani kánikuaksï ikiauati. Ísï jimbo, grupu ma nasionicheri uarhipeati Tata Diosïiri ireta jingoni engaksï iámu parhakpinirhu jaka. Biblia uandasïndi eska i uarhiperata arhinhasïnga: uarhiperata Gog de Magog (Ezeq. 38:​14, 15). ¿Ambe uaa Jeoba engaksï uarhipeaka imeeri iretani jingoni? Ima mismujtsïni aiangusïndi: “Niáraaka kánikua ikiani” (Ezeq. 38:​18, 21-23). Apokalipsisi kapitulu 19 uandantasïndi ambe enga úkuarhiaka tátsekua. Jeoba axasti imeeri Uájpani para kuájpini imeeri iretani ka kʼamajkuani imeeri ikiatspitiichani. Ka Jesúsi no jandiajku jauati, imani jingonksï jauati auandarhu anapu sondaduecha engaksï jindeeka ambakiti ánjeliicha ka ístu 144,000 (Apok. 17:14; 19:​11-15). ¿Néna kʼamareraa i guerra? Kʼuiripuecha ka organisasionicha engaksï no apoiarijka Tata Diosï Jeobani, kʼamajkunhaatiksï (Apok. 19:​19-21). w22.05 17 párr. 9, 10

Ísï tátsekua engaksï Adáni ka Eba pekariipka, profesia ma jimbo enga kánikua jukaparhakueka, Tata Diosï Jeoba aiakuaspti ambe ma imeecheri uájpeechani. Uaakachi exeni ambe enga ima uandapka ixú Génesis 3:15 jimbo: “Ka uaaka eskajtsï ikiatsperaaka tʼu, uarhiitini jingoni, ka chiiti desendensia uarhiitiiri desendensia jingoni. Imakeni éjpurhu chʼatajtsïkuati ka tʼuri irhandurhakuarhu ataaka”. I profesia, primeru librurhu jarhasti Bibliarhu. Ka ambe engaksï iámindu máteru libruecha uandajka terukuntasïndiksï ini profesia jingoni. Májkueni eska libru ma jimbo náksï mátakuarhitini jarhajka iámindu pájinecha, inde uandakuecha engaksï Génesis 3:15 jimbo jaka, úsïndi eskaksï iámindu máteru libruecha engaksï Bibliarhu anapueka, terukuntaaka ka májku ambeeriksï uandani. ¿Ambe jorhentpisïni inde profesia? Eska Tata Diosï axapiringa nemani parajtsïni pʼímutantani ka kʼamajkuni Noambakitini ka iámindu imeechani engaksï imani jingoni úkuarhijka. ¡I kánikua ambakiti ambeesti para iámindu jucha engachi Tata Diosï Jeobani xénchajka! Bibliani estudiarini jarhuataatijtsïni parachi exeni néna kumplirikuarhixaki i profesia ka nénajtsïni jarhuatasïni iásï. w22.07 14 párr. 1-3

Para jarhuataani chaari sapiichani xénchani Tata Diosïni, chájtsï uétarhinchasïnga jánhaskakua. Ísï jimbo, kurhaku je eskaksïni jánhastaaka (Sant. 1:5). Tata Diosï Jeoba jindeesti enga sánderu ambakiti konsejuechani íntspiajka. ¿Andi? Mámaru ambe jimbo. Ma jindeesti jimboka ima jindeeska Taati ma enga sánderu eksperiensia jatsika (Sal. 36:9). Ka máteru, jimboka imeeri konsejuecha méntkisïjtsïni marhuachesïnga (Is. 48:17). Parakajtsï uaaka jarhuataani chaari sapiichani xénchani Tata Diosï Jeobani, imaksïni uánikua ambe jorhendasïndi imeeri Karakatani úraparini ka imeeri kúnguarhikuani (Mat. 24:45). Pori ejemplu, ambakiti konsejuechantsï exeantauaka partirhu “Jarhuajperata para familiecha”, enga uánikua uéxurhini uerapka rebistarhu ¡Despertad! ka iásïksï internetirhu jarhastia jw.org jimbo. Juchaari pájina internetirhu, ístujtsï exeantauaka bideuechani, entrebistechani ka máteru ambe engaksïni jarhuataaka ísï úni eska Tata Diosï na uandajka parajtsï kʼuiriperaani chaari sapiichani (Prov. 2:​4, 5). w22.05 27 párr. 4, 5

No nema jarhasti iámu parhakpinirhu enga ísï puátspentajka eska Tata Diosï Jeoba. Primeru, jimboka ima méntkisï uékasïnga puátspentani. Segundu, jimbokajtsïni sési míteska ka imajkusï míteti sinchi meru mintsita jingoni móantaskia. Ka terseru, jimboka engajtsïni Tata Diosï Jeoba puáchentajka, nójtsïni méntku miátantani jarhasïndi ambe engachi úka. Ka indeni ambe jimbo, úsïngachi ambakiti konsiensia ma jatsini ka imajtsïni jaiapanhentasïndi. Ísïisti, engachi jamberi imperfektueuaka seguiriinchi jauaka no sési ambe niátani. Peru kánikuajtsïni sési pʼikuastasïndi ambe enga uandajka Perspicacia para comprender las Escrituras, bolumeni 1, pájina 209: “Jimboka Tata Diosï Jeoba míteska eskaksï imeeri marhuariicha niárasïnga no sési jásï ambe tsitini, íchaksï no uétarhisïndi méntku no sési pʼikuarherani jarhani imani ambe jimbo engaksï no sési úka pekadueri kulpa jimbo (Sal 103:​8-14). Engaksï jánguarhintani jaka ísï irekani eska Tata Diosï na jaiapanhentajka, uaatiksï sési pʼikuarherani jarhani (Filip. 4:​4-6; 1 Juanu 3:​19-22)”. w22.06 7 párr. 18, 19

Satanási no gobiernuechantkusï úraajti parajtsïni chérani. Ménichanisï kʼuiripu chésïndi ambe enga uandaaka imeeri familia enga ima Testigu úkuarhiska ka Satanási ístu úrasïndi inde ambe. Máruksï sánderu chésïndi ini ambe jimbo ka eska engaksï ataapiringa. Jimbokaksï kánikua xénchaasïnga imeecheri familiarichani, uékasïndiksï eskaksï imajtu ma jurhiani niáraaka míteni ka xénchani Tata Diosï Jeobani, jimboksïsï no sési pʼikuarherajti engaksï kurhaajka eskaksï no sési ambe uandasïnga Tata Diosï jurhimbitiiri ka imeeri marhuariicheeri ambe. Peru ménichani, familiariicha engaksï no tsitienga Tata Diosïiri ambe, niárasïndiksï testigu úkuarhini. Joperu enga juchaari familiarhu anapu ma nóteru uékaakia juchantsïni jingoni pájperani, ¿ambechi uaa? ¡Kánikuajtsïni sési pʼikuastasïndi ambe enga arhijka Salmo 27:10! Engachi no mirikurhiska na engajtsïni xáni xénchajka Tata Diosï Jeoba, sésichi pʼikuarheraaka nájkiruka juchaari familia nóteru ambe ma uékaakia juchantsïni jingoni ka uaakachi seguru jarhani eskajtsïni ima kóndentaaka jimbokachi tekaantaska. No nema jarhasti engajtsïni sánderu sési kuidariuaka eska Tata Diosï Jeoba, imajtsïni íntskuati ambe engachi uétarhinchani jauaka, sésijtsïni pʼikuastaati ka uaati eskachi sési pájperaaka imani jingoni. w22.06 17 párr. 11-13

Enga Jesúsi Echerirhu japka, kʼuiripuechaksï chkuanderakua ambe uandaspti imeeri ambe. Uandasptiksï eska ima achamasï máespka enga xáni ʻtʼireenga ka enga xáni itsïmeenga binuʼ, eska Noambakitini marhuakusïreenga, eska no janhanharhisïreenga sábaduni ka eska no sési uandasïreenga Tata Diosïiri ambe (Mat. 11:19; 26:65; Luk. 11:15; Juanu 9:16). Joperu Jesúsi no méni no sési mókukuarhispti. Engajtsïni nema no sési arhiaka, jatsiskachi para májkueni úni eska Jesúsi ka no jámani májkueni úkuantani (1 Ped. 2:​22, 23). Ísïisti eska ménichani úkua jukasïnga pʼíngukuarhini (Sant. 3:2). ¿Ambejtsïni jarhuataa parachi pʼíngukuarhini? Engaksïni nema no sési arhiska aianhpikuarhu, asï pakara je indeni ambe eratsentani. Erachi ma enga Sam arhinhajka uandasïndi: “Jánguarhintasïnga eratseni eska ima kʼuiripu uétarhinchasïnga kurhaani jurhimbikueri ambe ka eska uaaka mójtakukuarhini”. Jamberi ístu kʼuiripu ma uaati ikiani jarhani jimboka no sési ambe nitamakuarhixaka. Engajtsïni kurhacheska nema enga ikiani jauaka, uaakachi kómarhini Tata Diosï Jeobani parachi arhini eskajtsïni jarhuataaka pʼíngukuarhini ka parachi no uandani imani ambe enga no sési jaka o enga no sési pʼikuastaaka kʼuiripuni. w22.04 6 párr. 8, 9

Ma ambe engaksï taatiicha uaaka úni ka enga kánikua jukaparhakueka, jindeesti májku kʼéri jorhenguarhini Biblieri ambe imeecheeri sapiicha jingoni paraksï imeecha andarhierani Tata Diosï Jeobani (2 Tim. 3:​14-17). Peru ístu Biblia uandasïndi máteru ambe engaksï tumbiicha uaaka úni paraksï sánderu jorhenguarhini Tata Diosï Jeobaeri ambe. Libru Proverbios jimbo, taati ma uandontskuarhekuxati imeeri sapini ka péringa arhini jaka eska eratsentaaka na enga jásïika Tata Diosï Jeoba, kueraakata ambe exeparini (Prov. 3:​19-21). Taatiicha, ¿a no eskajtsï kánikua sési nitamakuarhisïnga engajtsï uérajka xanharani chaari sapiicha jingoni? Úra je indeni tiempuni parajtsï jarhuataani chaari sapiichani na enga jásïika Tata Diosï Jeoba exeparini imani ambe enga ima kueraaka (Rom. 1:20). Exe je na enga úrapka Jesúsi kueraakatani para jorhentpini. Ma xanhari arhiaspti imeeri chúxapatiichani eskaksï exeapiringa kʼuákiichani ka tsïtsïkiichani (Luk. 12:​24, 27-30). Jesúsi jorhendaaspti imeeri chúxapatiichani eska imeeri Taati auandarhu anapu kánikua intsïmpitiiska ka sési kámpitiini. Arhiaspti eska Tata Diosï Jeoba tʼirerauaka ka xukuparhataani imeeri marhuariichani engaksï no méni jurajkujka ísï eska na újka kʼuákiicha jingoni ka juátarhu anapu tsïtsïkiicha jingoni. w23.03 20, 21 párr. 1-4

Diosmaiamukuachi íntskuntasïnga Tata Diosï Jeobani jimbokachi úsïnga kómarhini imeeri Uájpeeri nombri jimbo. Tata Diosï, Jesúsini úrasïndi parajtsïni íntskuni ambe engachi kurhakujka. Engachi kómarhijka Tata Diosïni imeeri Uájpeeri nombri jimbo, Tata Diosï Jeobajtsïni kurhajchaati ka mókuchiatijtsïni. Ka jimboka Jesúsi uarhiska juchantsïni jimbo, Tata Diosï Jeobajtsïni úsïndi puácheantani juchaari pekaduechani. Biblia uandasïndi eska Jesúsi jindeeska “kʼéri saserdoti” ka eska uaxakaskia “Tata Diosïiri kʼéri uaxantskuarhu jurhijkandani jimbo” (Ebr. 8:1). Ístu uandasïndi eskachi jatsiska “ma engajtsïni kuájpintajka Diosï Taatini japarini, ka jindeesti Jesukristu” (1 Juanu 2:1). Kánikuachi diosmaiamukua íntskuntasïnga Tata Diosï Jeobani engajtsïni íntskuka Kʼéri Saserdotini engajtsïni pʼamojkujka, enga kurhangujka na engachi xáni újka úni ka engajtsïni kómarhijpecheni jaka (Rom. 8:34; Ebr. 4:15). Enga Jesúsi no uarhipiringa juchantsïni jimbo, nóchi úpiringa kómarhini Tata Diosï Jeobani. Nóchi úsïnga uandakuecha jingoni diosmaiamukua arhini Tata Diosïni engajtsïni íntskuka ini xáni ambakiti regaluni: imeeri Uájpani enga xáni xénchajka. w22.07 23 párr. 10-12

Ima kʼuiripu enga mintsinharhikueka, jánguarhintasïndi ísï úni eska na aiatspejka ka jurhimbitku uandasïndi (Sal. 15:4). Ka máteruechaksï mítesti eskaksï uaaka imani mintsikani. Juchajtuchi uékasïnga eskaksï erachiicha májkueni eratseaka juchaari ambe. Parajtsïni máteruecha mintsinharhini, jatsiskachi para andakuarheni. Uandanhasïndi eska para ma mintsinharhinhani, ísïiska komueska sentabu: úkua jukasïndi andani, peru fásiliisïndi tsïtani. Tata Diosï Jeoba jindeesti enga sánderu mintsinharhikueka.“Iámindu ambe enga ima újka mintsinharhikuesti” (Sal. 33:4). Ka ima erokuarhisïndi eskachi juchajtu májkueni jámaaka eska ima (Éfes. 5:1). Kánikuachi agradesidu jarhaska Tata Diosï Jeobani jingoni engajtsïni andaparhateraka familiarhu ma nani engaksï erachiicha kánikua xénchperajka ka mintsinharperani. Iáminduechachi jatsiska para méntkisï jánguarhintani mintsinharhikueni. Engachi mándani arhini jánguarhintaska xénchpeni, kaxumbitiini, jánhastiini, jurhimbikua jingoni jámani ka pʼíngukuarhini, jarhuajpeni jauakachi paraka kúnguarhikuarhu mintsinharperanhaaka. Ju je májkueni jámani eska juchaari Tata Diosï Jeoba ka ju je seguiriini xarhatani eskachi mintsinharhikueska. w22.09 8 párr. 1, 2; 13 párr. 17

Nájkirukachi kúnguarhikuarhu uánikua erachiichani ka pirenchichani jatsiaka, ménichanchi jandiajku pʼikuarherasïnga ochi imani ambe eratseni engajtsïni no sési pʼikuastajka ka inde ambe úni eskachi ísï exeaka eskajtsïni no nema uaaka jarhuatani. Joperu Tata Diosï Jeoba no uékasïndi eskachi ísï pʼikuarheraaka. Eratsi je na enga Tata Diosï Jeoba jarhuatapka Elíasini. Ima arhispti eska aiangupiringa na enga pʼikuarherani japka. Tsimani xanhari kurhamarhispti: “¿Amberi úxaki ixú Elíasi?” (1 Rey. 19:​9, 13). Ka ini tsimani xanhari, Tata Diosï Jeoba jingontku kurhajchaspti Elíasini. Tata Diosï ístu arhispti eskaksï útasï uánikua israeliteecha jarhaspka engaksï ísï kómarhini japka Tata Diosïni eska ima na uéjka (1 Rey. 19:​11, 12, 18). Seguru eska Elíasi kánikua sési pʼikuarherapka enga uénhekuarhipka Tata Diosïni jingoni ka enga kurhaapka ambe enga Tata Diosï arhipka. Ístu, Tata Diosï Jeoba kʼérati ánchikuarhiteechani íntsaaspti: jatsispti para Asaelini erakuni para Siria anapu reiini, Jeúni para Israeli anapu reiini ka Eliseuni para profeteeni (1 Rey. 19:​15, 16). Enga Tata Diosï arhipka Elíasini eska úpiringa ini ambe, jarhuataspti paraka ambakiti ambe eratsepiringa ka ístu úspti eska Eliseu imeeri kompanieruepiringa. w22.08 8 párr. 3; 9 párr. 5

¿Chaari kúnguarhikua niáraski jarhuajpeni konstruksionirhu o para ménderu únhantani kʼumanchikua Reinueri ma? Enga ísïika, seguru eskajtsï miántajka primeru tánguarhikuani enga úkuarhipka imani Kʼumanchikua Reinuerini jimbo. Kánikuajtsï agradesidu japka Tata Diosï Jeobani jingoni. Jamberijtsï xáni sési pʼikuarherani japka engajtsï jamberi no ueenga pireni jimbokajtsï uenhenchaxapka. Ísïisti, juchaari sési járhati Kʼumanchikuecha Reinueriicha kʼéri ambeksï arhisïndi Tata Diosï Jeobani. Peruchi sánderu kʼéri ambe arhisïnga Tata Diosïni engachi uinhaperantaaka imani kʼuiripuechani engaksï jurhajka tánguarhini ini Kʼumanchikua Reinueriicha jimbo. Apostoli Pablu ini ambe eratsexapti enga uandapka ini uandakuechani engaksï iásï anapu tekstu uandaajka. Parachi úni uinhaperantaani juchaari erachiichani, uaakachi apostoli Pablueri ejempluni exeni. Ima kurhangukuasïreendi máteruechani. Ju je májkueni úni eska ima (1 Kor. 11:1). w22.08 20 párr. 1, 2

Kristianu ma enga uéjka ambakiti kʼuiripu máeni Tata Diosïni japarini, jatsisti para jurhimbikua jingoni jámani imeeri negosiuecharhu. Ístu, ima enga tsitijka Tata Diosïiri jurhimbikuani, no sáni jaiapanhentasïndi engaksï máteru kʼuiripuecha no sési kánhajka. Ka para jaiapanherantani Tata Diosïni iámu ambe jimbo, méntkisï eratsesïndi ambe enga uéjka Tata Diosï eska uaaka. Biblia arhisïndi eska Tata Diosï Jeobasï újka eska iámindu ambe jurhimbikua jingoni úkuarhiaka (Jer. 50:7). Jimboka imajtsïni Kueraaska, imajkusï újti uandani ambe enga sési jaka ka ambe nómbe. Ima sési mítesti ambe enga sési jaka ka ambe nómbe. Joperu jucha no úsïnga ísï úni jimbokachi pekadoriiska (Prov. 14:12; Is. 55:​8, 9). Peru, ¿uaachi ísï irekani eskaksï na uandajka Tata Diosïiri juramukuecha? Jo, jimbokachi ísï kueraanhaska “eska ima na jásïika” (Gén. 1:27). Ístu, kánikuachi tsitisïnga kurhajchaani imeeri juramukuechani. Ka jimbokachi kánikua xénchasïnga juchaari Taatini, jánguarhintasïngachi májkueni jámani eska ima (Éfes. 5:1). w22.08 27 párr. 5, 6

Engachi uandanhiani jarhajka o chkétakuarhitini pʼikuarherani, jamberichi uékaaka úni ambe ma engajtsïni jarhuataaka parachi mirikurhiani juchaari uandanhiateechani, ka inde ambe no no sési jarhasti. Peruchi jatsiska para jingontku jámani, parachi no úni imani ambe enga Tata Diosï Jeoba kurhunhijka (Éfes. 5:​10-12, 15, 16). Enga Pablu Filipusï anapu kristianuechani karakuapka, arhiaspti eskaksï méntku eratseni japiringa imani ambe enga jurhimbikueka, enga pímbinhasïika, imani ambe enga ambakiti ambe úrpijka ka enga újka eska uékperanhaaka (Filip. 4:8). Nájkiruka Pablu no meru indeeri ambe uandani japka enga ma jingoni tsípikuarhijka, imeeri uandakuechajtsïni uaati jarhuatani engachi erakuni jauaka néna tsípikuarhini. ¿Andichisï no újki arini ambe? Engachi erakuni jámaaka pirekuani ma, pelikulani ma, libruni ma o bideojueguechani, ju je kurhamarhikuarhini, ¿jurhimbikua ambe uandasïni, pímbinhasïiski, ambakiti ambe úrpisïni, úsïni eska uékperanhaaka? I ambejtsïni úpirindi jarhuatani exeni nákini jaiapanhentasïni Tata Diosï ka nákini nómbe. Uékasïngachi ísï irekani eskaksï na uandajka Tata Diosï Jeobaeri ambakiti juramukuecha (Sal. 119:​1-3). w22.10 9 párr. 11, 12

Ante deksï uarhini, máru imeecha engaksï “no káni sési jámaka” kánikua no sési ambe úspti. Ísï jimbo, uétarhiati eskaksï jorhenguarhiaka ísï irekani eskaksï Tata Diosï Jeobaeri juramukuecha na uandajka. Para jarhuataani, Tata Diosïiri Reinu uaati eska programa ma jauaka para jorhendaani iámindu ini kʼuiripuechani ka i jindeuati ánchikuarhita ma enga no méni úkuarhini jaka Echerirhu. ¿Neechaksï jorhendaua imani kʼuiripuechani engaksï no káni sési jámaka? Uánikua kʼuiripuecha ka imeecha engaksï sési jámaka engaksï na tsíntaakia. Ka, ¿ambeksï jatsiski para úni imeecha engaksï no káni sési jámaka paraka imeecheri nombriicha karanhaaka libru tsípikuerirhu? Jatsiatiksï para Tata Diosï Jeobaeri amigu úkuarhini ka aiakukuarhenksï para marhuakuni. Jesúsi ka erakukateecha engaksï juesiika, jingontkuksï jauati paraksï exeni sinksï úxaki eskaksï na jorhenguarhini jaka ima kʼuiripuecha engaksï no káni sési jámaka (Apok. 20:4). Enga nema no uékaaka úni ambe enga jorhenguarhini jauaka, kʼamajkunhaati, nájkiruka 100 uéxurhini jatiriuakia (Is. 65:20). Tata Diosï Jeoba ka Jesúsi, úsïndiksï exeni kʼuiripuecheri mintsitani ka nóksï jurajkuati eska nema no sési útspiaka jimbanhi parhakpinirhu (Is. 11:9; 60:18; 65:25). w22.09 17 párr. 11, 12

Ini karakata jimbo, uandakuecha imeecha “engaksï juramukua jatsika” arhikuekasïndi imani juramutiichani engaksï juramukua jatsika para máteruechani juramukuani. Kristianuechachi jatsiska para kurhajchaani ini juramutiichani. Jimbokaksï imeecha úsïnga eska no jauaka uarhiperakua ambe, úsïndiksï eskachi kurhajchauaka leichani ka ménichanksï kuájpisïndi Tata Diosï Jeobaeri iretani (Apok. 12:16). Jimbochisï arhinhajka eskachi maiampiauaka impuestuechani, kontribusioniichani, eskachi kurhajchauaka ka janhanharhiani (Rom. 13:7). Joperu i gobiernuecha jatsistiksï juramukua jimboka Tata Diosï sésikua íntskuaxaka. Jesúsi xarhataspti eska i ambe ísïiska enga juramuti Roma anapu Ponsiu Pilatu mámaru ambe kurhamarhini japka Jesúsini. Ima arhispti eska juramukua jatsispka para puákuntani o para uánditarkuarheni ka Jesúsi arhispti: “Tʼuri nómbe juramukua jatsipiringa para jíndeni jingoni engari no desde karhakua uératini intsïnhapiringa” (Juanu 19:11). Májkueni eska Pilatu, iámindu juramutiicha ka politikuecha engaksï iásï jaka, sántkuksï juramukua jatsisti. w22.10 14 párr. 6

Tata Diosï Jeoba úspti eska rei Dabidi karapiringa néna enga irekanhapiringa sánderu orhepatini, jiáni enga ambakiti rei ma juramuni japiringia ka enga kánikua jánhastiika (Sal. 37:​10, 11, 29). Sáno méntkisï engachi uandontskuarhejka Paraisueri ambe máteru kʼuiripuecha jingoni, arhikuantasïngachi Salmo 37:11. Ka sési jarhasti ísï úni, jimboka Jesúsi indeni karakatani úraspka enga Juátarhu Arhijtsïkpipka. Ísï, xarhataspti eskaksï i uandakuecha sánderu orhepatini úkuarhiaka (Mat. 5:5). Ambe enga rei Dabidi karapka, ístu xarhataspti na enga irenhapiringa jiáni enga Salomóni juramuni japiringa. Imani tiempu jimbo, israeliteechaksï pínandikua jingonksï irekaspti ka iámindu ambeksï jatsispti engaksï xáni uétarhincheenga imani echeri jimbo enga ʻlechi ka tekolmena japkaʼ. Tata Diosï uandaspti: “Engajtsï seguiriska ísï jámani eskaksï juchiiti juramukuecha na uandajka […], ji uaaka eska pínandikua jauaka paisirhu, ka chájtsï apondiaka ka no ma ambe jauati engajtsï jimbo chéaka” (Lev. 20:24; 26:​3, 6). I ambe niáraspti ísï úkuarhini jiáni enga Salomóni juramuni japka (1 Crón. 22:9; 29:​26-28). Uandakuecha engaksï Salmo 37:​10, 11, 29 jimbo jaka, niárasptiksï ísï úkuarhini ióntki ka ístuksï niárati ísï úkuarhini sánderu orhepani. w22.12 10 párr. 8

Jimbokachi jurhimbiti kristianueska, ju je úni ambe engajtsïni Tata Diosïiri kúnguarhikua arhijka. Biblia ini ambakiti konsejuni íntspisïndi: “Uaakari sési uarhipeni engakeni jánhasti ma arhistachiaka; ma úsïndi andani engaksï uánikuecha jarhajka engaksï konseju íntspijka” (Prov. 24:​6, noteecha). Ju je eratsentani na engajtsïni jarhuatajka i konseju parachi sánderu sési aianhpini ka jorhentpini. Nóchi ísï aianhpisïnga na enga jucha sési exeaka, sánderu sési, jánguarhintasïngachi ísï aianhpini eskajtsïni na arhijka Tata Diosïiri kúnguarhikua. Tánguarhikuechani jimbo ambakiti konsejuechanchi intsïnhaasïnga. Arhijtsïkperatechani jimbo ka demostrasioniichani jimbo engaksï juchaari erachiicha nitamataraajka, jorhenguarhisïngachi sánderu sési úrani Bibliani. Ístujtsïni Tata Diosï Jeobaeri kúnguarhikua íntskuasïndijtsïni publikasionichani ka bideuechani engachi uaaka úrani para jarhuataani kʼuiripuechani kurhanguni Bibliani. ¡Kánikuachi jukaparharaasïnga konsejuechani engaksï Tata Diosïiri Karakatarhu jaka! Engachi no jatsiapiringa indeni konsejuechani nóchi úpiringa tsípikua jingoni irekani. Ju je jánguarhintani méntkisï úni ambe engajtsïni Tata Diosï arhistachijka (Prov. 3:​13-17). w22.10 23 párr. 18, 19

Engachi tʼirejka ka engajtsïni inde tʼirekua incharhijka, juchaari kuerpu sánderu uiuinhasï jarhasïndi. Ka sáno májkueni, engachi arhintajka Tata Diosïiri Uandakuani ka eratsentani indeeri ambe, sánderuchi mintsikasïnga Tata Diosïni. Tata Diosï Jeoba uékasïndi eskachi kurhanguaka ambe engajtsïni uéjka arhini. Ka uaakachi indeni ambe úni engachi kómarhiaka Tata Diosïni, engachi arhintaaka imeeri Uandakuani ka engachi eratsentaaka ambe engachi arhintaaka. Orheta, jatsiskachi para kómarhini paraka juchaari mintsita listu jauaka para jiókuarhini ambe enga Tata Diosï eratsejka. Tátsekua arhintani ma parti Biblieri ka anhaxurhini parachi iatsitakuarhu eratsentani ambe engachi arhintakia. ¿Nénajtsïni marhuachea ísï úni? Engachi sánderu eratsentaaka, sánderuchi kurhanguaka Tata Diosïiri Uandakuani ka mintsitarhujtsïni niáracheati. ¿Andisï xáni jukaparhakue eskachi arhintaaka Bibliani ka eskachi eratsentaaka? Jimboka engachi ísï úska jatsiakachi uinhapikua engachi uétarhinchajka parachi úni uandantani Reinueri ambe iásï ka sánderu orhepatini jamberi uandantani ambe engaksï úkuarhinchaaka imeecha engaksï no kurhajchaaka Tata Diosïni. Ístu, engachi eratsentajka sési járhati kualidadiichani enga Tata Diosï Jeoba jatsiaka, sánderuchi sési pájperasïnga imani jingoni. w22.11 7 párr. 16, 17

Jesúsi xarhataspti eskaksï imeeri chúxapatiicha ka ístu máteru kʼuiripuecha míteantapiringaksï jurhimbiti kristianuechani jimbokaksï mintsita jingoni uékperapiringa. Ka na engaksï xáni xénchperajka Tata Diosïiri kúnguarhikuarhu, kánikua ambakiti ambeesti. Ísïisti, Jeobaeri testiguechachi no perfektueska (1 Juanu 1:8). Ísï jimbo, engachi sánderu míteajka erachiichani, jamberichi sánderu exeaka ambe engaksï no újka sési úni (Rom. 3:23). Ka máruksï nóteru marhuakusïndia Tata Diosï Jeobani imani ambe jimbo engaksï máteruecha újka. ¿Néna xarhataspi Jesúsi eska xénchaasïreenga imeeri apostoliichani? ¿Ka néna uaa májkueni úni eska Jesúsi? Ka engachi Jeobaeri testiguekia ístu sési jauati eskachi kurhamarhikuarhiaka indeni ambe. Ísï úni, jarhuataatijtsïni sánderu uékpini ka sánderia jiáni engaksï máteruecha imani ambe uaaka engajtsïni no sési pʼikuastaaka (Éfes. 5:2). w23.03 26, 27 párr. 2-4

Jimbokachi niáraxakaia ima jurhiatikua jimbo enga parhakpini kʼamajkunhaaka, nójtsïni ísku pakatasïndi enga kúnguarhikuarhu jauaka ambe ma enga úpiringa úni eskachi uékaaka jurajkuni Tata Diosï Jeobani. Ísï jimbo, jatsiskachi para méntkisï sési eratsentani iámindu ambe. Engachi eratseaka eskajtsïni erachi ma no sési kámaska, ju je no ikiani pakarani. Engachi jurhimberanhantaska, ju je no kʼuratseni, jiókuarhiani konsejuechani ka sési peentani ambe ma. Ka enga Tata Diosï Jeobaeri kúnguarhikua mójtakuska ambe ma engajtsïni jamberi juchantsïni afektariiska, ju je iámu mintsita jingoni apoiariini ka úni ambe engachi arhinhaaka. Ka ju je méntkisï mintsikani Tata Diosï Jeobani ka imeeri kúnguarhikuani enga jauaka ambe ma enga úkua jukaaka. Nóchi jatsiska para jukari uandanhiani sinochi sési eratsentani ambe ma ka ísï exeni ambe ma eska Tata Diosï Jeoba na exejka. Ju je kurhakuni Tata Diosïni eskajtsïni jarhuataaka parachi no méni jurajkuani kúnguarhikuarhu anapu erachiichani. Engachi ísï úska, ambe uéjki úkuarhini, Satanási no uaati eskachi jarhariaka Tata Diosï Jeobani ni imeeri kúnguarhikuani (Sant. 4:7). w22.11 24, 25 párr. 14-16

Orhejtsïkutiicha, jarhuata je erachiichani paraksï prepararikuarhini ante de no sési ambe úkuarhini. Ístu, jarhuata je iámindu kúnguarhikuarhu anapuechani paraksï míteni ambe engaksï uaaka úni paraksï kuájchakukuarhini ka paraksïni úni chánksïni uandajpani. ¿Ka chá ambe uaa úni para jarhuajpeni? Engajtsï jimeesïsï irekaka enga no sési ambe úkuarhika, kurhamarhia je orhejtsïkutiichani ambejtsï uaa úni parajtsï jarhuajpeni. Jamberiksï uaati chaari kʼumanchikuarhu pakarani ima erachiicha engaksï jurajkuapka imeecheeri kʼumanchikuechani o ístu imeecha engaksï jarhuajpeni jaka jima enga no sési ambe úkuarhika. O jamberijtsï uaaka jarhuajpeni para pákuani erachiichani tʼirekua ambe o máteru ambe engaksï uétarhinchaaka. Ka enga iauanisïika enga no sési ambe úkuarhika ístujtsï uaaka jarhuajpeni. ¿Néna? Kómarhijpikuani erachiichani ka donasioni íntspiparini jima enga jindeeka para ánchikuarhita enga iámu Parhakpinirhu úkuarhijka parachi úni jarhuajpeni jima enga no sési ambe úkuarhika (2 Kor. 1:​8-11; 8:​2-5). Peru engajtsï uaaka nirani jima enga no sési ambe úkuarhika, kurhamarhia je orhejtsïkutiichani nénajtsï uaa jarhuajpeni. Ka engajtsï pʼímarhinhaska, jamberijtsï jorhendanhaaka parajtsï úni jarhuajpeni jiáni ka jima enga sánderu uétarhini jauaka. w22.12 24 párr. 8; 25 párr. 11, 12

Máteru Biblia ísï tradusirisïndi iásï anapu tekstu: “Chájtsï imani mismu tsʼéjkukuechani jatsiaska eska iámindu máteruecha”. I uandakuechaksï jindeespti para Korintu anapuecha. Ka máru imeecha ísku jándikua ambeksï niátaspti, omoseksualisptiksï ka kauicheenksï (1 Kor. 6:​9-11). Engaksï ima kristianuecha itsï atakuarhipkia, ¿nóteruksï méni tsitispia indeni ambe úni? Jamberiksï útasï tsitiendi. Ísïisti, iámindu ima kristianuechaksï erakukateespti, joperuksï útasï imperfektuespti. Ísï jimbo, ménichanksï jatsiendi para jánguarhintani no úni imani ambe enga no sési jaka. Míteni ini ambe uinhaperantasïndijtsïni, jimbokajtsïni xarhatachesïnga eskaksï máteruechajtu májkueni ambe nitamakuarhiska eska jucha ka eskaksï úska orhepani uérani. Ísï jimbo, uaakachi mintsikani Tata Diosïni “míteparini eskaksï májku jásï tekaantaxaka [juchaari] ermanuecha iápuru parhakpinirhu” (1 Ped. 5:9). w23.01 12 párr. 15

Jesúsi kurhakuspti Tata Diosï Jeobani eska kuidariuapiringa imeeri chúxapatiichani (Juanu 17:11). ¿Andijtsïnisï jarhuatajki i ambe parachi balori jukani? Jimboka Tata Diosï Jeoba iauani sánderu uinhapitiiska eska náki uéjki juchaari enemigu ma (1 Juanu 4:4). Ka ima jingontku jarhasti iámindu ambe jimbo. Seguruchi jarhaska eska engachi imani jurajkukuska iámindu ambe, uaakachi orhepani uérakuni imani ambe engajtsïni chérajka ka balorichi jukaaka. ¿Ménichantsï kʼuratsesïni uandantani eskajtsï Jeobaeri testigueska? ¿Chésïntsï uérani aianhpini o itsï atakuarhini? Asï ché je imani ambe jimbo engaksï máteruecha uandaaka chaari ambe, jimboka inde ambeksïni no jurajkuati imani ambe úni enga sési jaka. Mintsita jingoni kurhaku je Tata Diosï Jeobani eskaksïni jarhuataaka ka eskaksïni íntskuaka balori parajtsï imani ambe úni enga ima uéjka. Ka engajtsï chá exeaka na engaksïni mókuchiantauaka chaari kómarhikuechani, sánderujtsï uinhapiti jauaka ka sánderujtsï balori jukaaka (Is. 41:​10, 13). w23.01 29 párr. 12; 30 párr. 14

Fariseuechaksï arhintasïreendi Tata Diosïiri Uandakuani, joperu para máteruechani arhinchaani. Jesúsi xarhataspti eska i ambe ísïispka enga kurhamarhiapka sinksï no arhintaspi ambe enga uandeenga Tata Diosïiri Karakata (Mat. 12:​1-7). Ima xanhari, fariseuechaksï uandaspti eskaksï Jesúsiiri chúxapatiicha no kurhajchasïreenga sábadueri leini. Para úni mókukuantani, Jesúsi tsimani ejempluechani uandaaspti engaksï Tata Diosïiri Karakatarhu jaka ka ístu uandaspti Oseasiiri bersikulueri ma. Ísï, xarhataspti eskaksï fariseuecha no kurhangusïreenga andisï uaxastanhapi sábadueri lei ka eskaksï no pʼamojpesïreenga. Íksï acheetiicha arhintasïreendi Tata Diosïiri Karakatani, joperu no marhuakuasïreendi. ¿Andi? Jimbokaksï kʼéramakuarhisïreenga ka soluksï arhintasïreendi paraksï máteruechani arhinchaani. Indeni ambe jimbo, nóksï úsïreendi kurhanguni ambemindusï arhikuekeeni ambe engaksï arhinteenga (Mat. 23:23; Juanu 5:​39, 40). Ístu, exe je eska Mateu 19:​4-6 jimbo jarhaska máteru ejemplu nani enga Jesúsi kurhamarhiapka fariseuechani sinksï no arhintaspi ambe enga uandeenga Tata Diosïiri Karakata. Nájkirukaksï fariseuecha arhintapka kueraakateri ambe, nóksï jiókuarhisïreendi ambe enga Tata Diosï eratseenga temungurhiriikueri ambe. Jesúsiiri uandakuechajtsïni jorhendasïndi eska uétarhisïnga Bibliani arhintani parachi jorhenguarhini ambe ma. Ju je no májkueni úni eska fariseuecha. Sánderu sési, ju je kaxumbitiini ka jurajkuni eskajtsïni Tata Diosï Jeoba jorhendaaka. w23.02 12 párr. 12, 13

Tata Diosï Jeoba íntsaaspti leiichani israeliteechani parakaksï no no sési ambe úkuarhinchapiringa kʼumanchikuarhu ka ánchikuarhitarhu (Éx. 21:​28, 29; Deut. 22:8). Enga kʼuiripu ma no uékaparini uándikupiringa máteru kʼuiripuni, kánikua no sési nikusïreendi (Deut. 19:​4, 5). Ka lei uandasïreendi eska kastigarinhapiringa ima enga no sési úkupiringa charhakuni ma enga nótki andajpenuni japiringa, nájkiruka no uékaparini ísï úpiringa (Éx. 21:​22, 23). Biblia sési xarhatasïndi eska Tata Diosï Jeoba uékasïnga eskachi jingontku jámaaka parachi no no sési ambe úkuarhinchani. Xarhatasïngachi eskachi agradesidu jarhaska tsípikua jimbo engajtsïni Tata Diosï íntskuka, engachi úska ambe ma parachi no no sési ambe úkuarhinchani kʼumanchikuarhu ka ánchikuarhitarhu. Jimeesïsïchi patsasïnga ambe ma enga atajka, kimiku o medisina ambe nani engaksï sapiicha no uaaka pʼíkuni. Ka engachi nóteru úrajkia indeni ambe, jimachi tsïtasïnga nani enga no nemani uaaka no sési úkuni. Ístuchi xéparini jámasïnga chpiri ambe jingoni, itsïini jásï ambe jingoni enga aparhijka ka erramienteecha jingoni ka engachi úrani jarhajka ini ambe pendientichi jarhasïnga. Ístuchi no manejarisïnga engachi pastiia ambe arhajka enga uaaka úni eskachi no uaaka sési manejarini, engachi alkoli ambe arhajka o engachi no sési mintsikuarhijka, nijtuchi jájkirhu kámani jarhajki telefonuni engachi manejarini jarhajka. w23.02 21 párr. 7-9

Tata Diosï Jeoba tekaantskua jingoni jorhentpisïndi, sési kámpisïndi ka kurhangutspisïndi ka méntkisï ambakiti ambe exesïndi imeeri jorhenguarhiriicheeri ambe (Sal. 130:3). Imajtsïni no méni kurhachesïndi ambe ma engachi jucha no uaaka úni. Ju je no mirikurhini eska imasï úka juchaari serebruni enga xáni ambakiti regalu máeka (Sal. 139:14). Ístu, ima uékasïndi eskachi seguiriuaka jorhenguarhini para méntkisï ka eskachi sési pʼikuarheraaka jorhenguarhini. Ísï jimbo, desde iásï ueenani ju je jánguarhintani tsitini jorhenguarhini ambe enga Biblia jorhentpijka (1 Ped. 2:2). ¿Ambeksïni jarhuata ísï úni? Jánguarhinta je imani ambe úni engaksïni jarhuataaka parajtsï arhintani ka jorhenguarhini Bibliani (Jos. 1:8). Tata Diosï Jeobaeri jarhuajperata jingoni, sánderujtsï tsitiaka arhintani ka jorhenguarhini imeeri ambe. Engachi jorhenguarhini jarhajka no jindeesti parachi kánikua ambe míteni. Ambe engachi uéjka jindeesti míteni Tata Diosï Jeobani, xénchani ka mintsikani (1 Kor. 8:​1-3). Seguirii je sánderu ka sánderu jorhenguarhini Tata Diosï Jeobaeri ambe ka seguirii je kurhakuni eskaksïni jarhuataaka sánderu mintsikani (Luk. 17:5). Ka imaksïni íntskuati ambe engajtsï chá kurhakuaka. w23.03 10 párr. 11, 13

¿Ískuksï pakarapirini Jesúsiiri chúxapatiicha enga jamberi Jerusaléni ka templu kʼamajkunhapiringa? Nómbe. Jesúsi arhiaspti eskaksï jatsispka para ánchikuarhita ma úni. Arhiaspti eskaksï jatsispka para aianhpini ambakiti aianhperakuani ʻJerusaléni, Judea, Samariaʼ “ka iápuru parhakpinirhu asta jima enga sánderu iauaniika” (Úku. 1:​6-8). Kʼéri ánchikuarhitaksï ma jatsispti. Joperu engaksï kánikua jánguarhintapiringa indeni ánchikuarhitani úni, sésiksï úrani japirindi imeecheri tiempu. Parachi juchajku mismu exekuarhini, uétarhisïndi eskachi exeaka na engachi úrani jaka juchaari tiempu. Ísï eska na arhijka Eclesiastés 9:​11, iáminduechachi úpiringa úkuarhinchani ambe ma engachi no erokuarhini jarhajka, astachi úpiringa ma repentku uarhini. Uaakachi sési úrani juchaari tiempu engachi imani ambe úska enga Tata Diosï Jeoba uékajka ka engachi jánguarhintaska sánderu sési pájperani imani jingoni (Juanu 14:21). Ísï jimbo, jatsiskachi para ísï úni eska i Biblieri konseju na uandajka: “Uinhapinta je ka asï jáma je chérakuarheni, sino méntku jauena je úni Diosïiri úkuani” (1 Kor. 15:58). Ísï jimbo, no arhiparini enga i parhakpini niáraaka kʼamajkunhani ochi niárani uarhini, nóchi pʼamondakuarhini jauaka eratseparini eskachi úpiringa sánderu marhuakuni Tata Diosï Jeobani (Mat. 24:13; Rom. 14:8). w23.02 18, 19 párr. 12-14