Disiembri

¿Listu jarhaspia para itsï atakuarhi i Etiopía anapu acheeti? Eratsenta je ini ambe: i acheeti “Jerusaléni niraspti [Tata] Diosïni kʼéri ambe arhini” (Úku. 8:27). Ísï jimbo, jamberi ima jiókuarhipti judiuecheri relijionini. Ima míteaspti Karakata Ebreaechani ka jima jorhenguarhispti Tata Diosï Jeobaeri ambe. Peru uékasïreendi sánderu ambe míteni. Enga Felipe xanharu jimbo exentapka ini acheetini, roiu ma arhintaxapti enga profeta Isaíasi karapka (Úku. 8:28). Ima uékasïreendi sánderu ambe míteni. Etiopía uératini niraspti asta Jerusaléniiri templurhu para kʼéri ambe arhini Tata Diosï Jeobani. Felipe jorhendaspti Etiopía anapu acheetini máru ambe enga ima no mítepka ka enga kánikua jukaparhakueka, komu eska Jesúsi jindeespka Mesíasi (Úku. 8:​34, 35). Niáraspti kánikua xénchani Tata Diosï Jeobani ka Jesúsini ka uékasïreendi itsï atakuarhini ka Jesúsiiri chúxapati úkuarhini. Felipe exespti eska listu jarhaspkia para indeni ambe úni, ísï jimbosï itsï atapti. w23.03 8, 9 párr. 3-6

Engachi no méntkisï jurhimbitku uandantaaka, Tata Diosï Jeoba no sési pʼikuarheraati juchantsïni jingoni (Prov. 6:​16, 17). Nájkiruka kʼuiripu no no sési exejka chkuanderani, juchachi uékasïnga ísï eratseni eska Tata Diosï Jeoba na eratsejka (Sal. 15:​1, 2). Ísïisti, nóchi méni chkuanderapiringa, joperu ístu no sési japirindi engachi no uandantapiringa iámindu ambe nomasi parakaksï kʼuiripuecha jakajkupiringa ambe ma enga no ísïika. Ístu, nóchi jatsipiringa para chisme ambe etsakuni jámani (Prov. 25:23; 2 Tes. 3:11). Engajtsï uandontskuarheni jauaka nema jingoni ka exentsï eska chisme ma úkuarhixakaia, jánguarhinta je máteru ambeeri uandani, ima ambeeri enga sési jauaka. Parhakpini ma jimbochi irekaxaka engaksï kʼuiripuecha no sési uandajka. Ísï jimbo, jatsiskachi para jánguarhintani ísï uandani eska Tata Diosï Jeoba na uéjka. Engachi jánguarhintaska xáni eskachi xáni uaaka parachi kʼéri ambe arhini Tata Diosï Jeobani juchaari uandakuecha jingoni aianhpikuarhu, tánguarhikuecharhu ka engachi máteruecha jingoni uandontskuarheni jauaka, imajtsïni újchakuraati. Ka enga Tata Diosï Jeoba kʼamajkuakia ini parhakpinini, sánderuchi no úkua jukanchaaka kʼéri ambe arhini imani juchaari uandakuecha jingoni (Jud. 15). w22.04 9 párr. 18-20

Engachi eratsentajka na engajtsïni xáni xénchajka Tata Diosï Jeoba ka Jesúsi, juchajtuchi uékasïnga májkueni xénchaani imeechani (1 Juanu 4:10). Ka útasïchi sánderu xénchaasïnga engachi kurhangujka eska Jesúsi uarhiska mándani juchantsïni jimbo. Apostoli Pablu kánikua agradesidu jarhaspti ini regaluni jimbo. Ísï jimbo, ini ambe karakuaspti Galasia anapuechani: Tata Diosïiri Uájpa “engareni xáni kánikua uékajka ka enga tsípikua íntspika jíndeni jimbo” (Gal. 2:20). Jesúsiiri uarhikua jimbo, Tata Diosï Jeoba ústi eskajtsï chá imani andarhierapiringa parajtsï úni imeeri amigueni (Juanu 6:44). ¿Nóksïni mintsitarhu niárachesïni míteni eskaksïni Tata Diosï Jeoba ambakiti ambe exechiska ka eska kánikua maianhpeska parajtsï chá úni imeeri amigueni? ¿No ísïiski eska i ambe úsïnga eskajtsï sánderu xénchaaka Tata Diosï Jeobani ka Jesúsini? Ísï jimbo, iáminduechachi uaaka kurhamarhikuarhini: “Na engani xáni xénchajka Tata Diosï Jeobani ka Jesúsini, ¿ambe úsïni eskani uaaka?”. Inde uékperakua engachi pʼikuarherajka Tata Diosïni jimbo ka Jesúsini jimbo, jarhuatasïndijtsïni parachi xénchaani máteruechani (2 Kor. 5:​14, 15; 6:​1, 2). w23.01 28 párr. 6, 7

Tata Diosï Jeoba úrasïndi Bibliani parakaksï imeeri marhuariicha ‘májku k’éri marhuakuaka’. Tata Diosï Jeoba úspti eska uánikua Biblieri partiichaksï ísï karanhapiringa parakaksï ima kʼuiripuechajku engaksï kaxumbitiika úpiringa kurhanguni (Luk. 10:21). Biblia libru máesti engaksï iápurisï anapu kʼuiripuecha arhintajka. Peru solu kaxumbitiichajkuksïsï újti kurhanguni ka úni eska Biblia na arhijka (2 Kor. 3:​15, 16). Máteru ambe enga jimbo Biblia xarhatajka Tata Diosï Jeobaeri jánhaskakuani jindeesti jimboka ima úrasïnga Biblia no solu para uánikuechani jorhendaani, sino ístu parajtsïni mándani arhini jorhendani ka sési pʼikuastantani. Engachi arhintajka imeeri Uandakuani, exesïngachi eska Tata Diosï Jeoba uandanhiasïnga mándani juchantsïni jimbo (Is. 30:21). Seguru eskachi arhintaspka Biblieri tekstu ma engajtsïni kánikua jarhuatapka. Peru enga Biblia karanhaka para xáni uánikua kʼuiripuecha, ¿andisï ima ambe enga arhijka útasï marhuani jaki ka andisï újki jarhuatani mándani kʼuiripuni imani ambe jingoni enga nitamakuarhini jarhajka? Jimboka ima enga kararkuarhika Bibliani kánikua jánhastiiska (2 Tim. 3:​16, 17). w23.02 4, 5 párr. 8-10

Kristianuechachi kánikua xénchasïnga Tata Diosï Jeobani ka uékasïngachi marhuakuni xáni eskachi xáni uaaka. Ka para ísï úni jatsiskachi para exeni ambechi uaa úni parachi sánderu sési marhuakuni imani, komu sánderu ambakiti kristianu máeni, sánderu sési úni ambe ma ka exeni na engachi uaaka jarhuataani máteruechani. ¿Andichisï jatsi para exeni ambechi uaa úni parachi sánderu marhuakuni Tata Diosïni ka jánguarhintani ísï úni? Jimbokachi uékasïnga jaiapanherantani juchaari Taatini enga kánikua xénchpetiika. Ima kánikua sési pʼikuarherasïndi engachi úrajka ambe engachi jorhenaka úni parachi imani marhuakuni. Ístuchi uékasïnga sánderu ambakiti kristianu máeni parachi úni jarhuataani máteru erachiichani (1 Tes. 4:​9, 10). No arhiparini na engachi xáni tiempu páni jakaia jurhimbikuarhu, iáminduechachi jatsiska para jánguarhintani sánderu ambakiti kristianu máeni. w22.04 22 párr. 1, 2

I parhakpini anapu politikuechaksï nóteru ióndani uarhipeati Kʼéri Babilonia jingoni engaksï jindeeka interu parhakpinirhu anapu relijioni no jurhimbitiicha. Ini uarhiperakua jingoni uénakuarhiati kʼéri mískuarhita. ¿Uaa i ambe eskaksï iásï kʼóru kʼuiripuecha uékaaka kómarhini Tata Diosï Jeobani? Nómbe. Sánderu sési, eska na uandajka kapitulu 6 libru Apokalipsisi, jiminisï xarharaati ambe engaksï erakuaka úni. Imeecha engaksï no marhuakuni jaka Jeobani, niuatiksï kuájchakukuarhini politikuecha ka komersianticha jingoni, enga ini kapitulu jimbo Biblia juáteecha jingoni terukutantajka. Jimbokaksï i kʼuiripuecha no apoiariuaka Tata Diosïiri Reinuni, Tata Diosï ísï exeauati komueska imeeri ikiatspitiicha (Luk. 11:23; Apok. 6:​15-17). Indeni tiempu jimbo enga xáni no sési jánhaskuarhiaka, iámindu kʼuiripuechaksï ambakiti Tata Diosï Jeobaeri marhuarichantku erauani jauati jimbokaksï imeechajkusï marhuakuni jauaka Tata Diosï Jeobani ka ístuksï no apoiarini jauati “animalini” (Apok. 13:​14-17). w22.05 16, 17 párr. 8, 9

Peruksï Tata Diosïiri marhuariicha no solu aianhpisïndi Tata Diosïiri Reinueri ambe (Mat. 24:14). Ístuksï jarhuataasïndi imani ánjeliichani enga Apokalipsisi kapitulu 8 a 10 jimbo uandajka. I ánjeliichaksï aianhpisïndi ambe engaksï úkuarhinchaaka imeecha engaksï no jiókuarhiaka Tata Diosïiri Reinuni. Ísï jimbo, Jeobaeri testiguechachi aianhpixaka ambe ma enga ísïika komueska “xanuata ka chpiri”. I aianhperakua xarhatasïndi ambe enga Tata Diosï úkuauaka imeechani engaksï Satanásiiri jájki jimbo jaka (Apok. 8:​7, 13). Kʼuiripuechaksï jatsisti para míteni eska nóteru ióni jimbo parhakpini kʼamajkunhaakia, soluksï ísï uaati mójtakurhini paraksï úni tsípiti pakarani jiáni enga Tata Diosï Jeoba xarhataaka imeeri ikiatapuni (Sof. 2:​2, 3). Joperu jimbokaksï kʼuiripuecha no uékasïnga kurhaani ini ambe, jatsiskachi para balori jukani. Enga kʼéri mískuarhita úkuarhini jauakia, kʼuiripuechaksï sánderu ikiauati engachi aianhpiaka eska Satanásiiri parhakpini kʼamajkunhaaka (Apok. 16:21). w22.05 7 párr. 18, 19

Eratsi je ambe enga úkuarhijka enga ma kʼuiriperaani jarhajka sapiichani. Jamberi temungurhiri ma uánikua arhijtsïkperateechanksï kurhauatia engaksï uandajka néna kʼuiriperaani sapiichani. Joperu engaksï kánguarhiajkia sapiichani ménderuenisïndia ambe ma. Iásïksï sánderu jukaparhakuesïndia para imeecha Biblieri prinsipiuecha engaksï indeeri ambe uandajka. ¡Xáni kʼéri ánchikuarhita ma para imeecha! Enga ambe ma mójtakurhijka, ístu mójtakurhisïndi na engachi exeajka Biblieri prinsipiuechani engachi sési míteakia. Ísï jimbo, Tata Diosï Jeobaeri marhuariichachi “pauani pauani” arhintasïnga Bibliani ísï eska Israeli anapu reiicha na ueenga ka eratsentasïngachi ambe engachi arhintajka (Deut. 17:19). Taatiicha, chájtsï kʼéri kóntperata ma jatsiska enga kristianu ma uaaka jatsini: jarhuataani chaari sapiichani parakaksï míteaka Tata Diosï Jeobani. Peru no solu uétarhisïndi aianguani Tata Diosïiri ambe, imaksï jatsisti para niárani xénchani Tata Diosïni iámu imeecheri mintsita jingoni. w22.05 26 párr. 2, 3

No solu uétarhisïndi eskachi no sési pʼikuarheraaka imani ambe jimbo engachi no sési úka, uétarhisïndi eskachi uaaka ambe ma, eskachi ménderueni jámaaka. Para exeni sijtsïni uaa puákuntani o nómbe, Tata Diosï Jeoba exesïndi eska ma kʼuanhatsentaaka o mójtakukuarhini. Enga kʼuiripu ma mójtakukuarhijka nóteru no sési ambe niátasïndia ka ísï irekasïndi eska Tata Diosï na uékajka (Is. 55:7). Kʼuiripu enga mójtakukuarhijka, jatsisti para ménderueni eratseni ka jurajkuni eska Tata Diosï Jeoba jarhuataka para sési ambe úni (Rom. 12:2; Éfes. 4:23). Jatsisti para nóteru eratsenia no sési jásï ambe nijtu no sési ambe niátani (Kol. 3:​7-9). Peru ju je no mirikurhini eskajtsïni Tata Diosï Jeoba úsïnga puáchentani ka kénditacheani pekaduechani engachi mintsikaska Jesúsiiri uarhikuani. Enga Tata Diosï Jeoba exejka eskachi jánguarhintaxaka para ménderueni jámani, puáchentasïndijtsïni pekaduechani Jesúsiiri uarhikua jimbo (1 Juanu 1:7). w22.06 6 párr. 16, 17

Desde ióni, kʼuiripuechaksï kánikua no sési útsperasïndi (Ecl. 8:9). Pori ejemplu, máru engaksï juramukua jatsika no sésiksï kaasïndi máteruechani ka máteruechaksï no sési ambe niátasïndi, oksï atajpini jámani, eskuelarhu anapu kompanieruechaksï no sési arhijperasïndi ka máteruechaksï asta niárasïndi no sési kámani imeecheri familiani. ¡Jimbosï kʼuiripu chérhiajti máteru kʼuiripuechani! ¿Ambe úsïni Satanási enga exejka eskaksï kʼuiripuecha chérhiasïnga máteruechani? Engachi chérhiajka kʼuiripuechani, Satanási úrasïndi indeni ambe parachi nóteru aianhpinia o parachi nóteru kurhajchania Tata Diosïiri juramukuechani. Ima úsïndi eskajtsïni máru juramutiicha nóteru jurajkuakia parachi aianhpini ka eskajtsïni no sési kámaaka (Luk. 21:12). Ini parhakpinirhu enga Noambakitiiri jájki jimbo jaka, uánikua kʼuiripuechaksï chkuanderakua ambe uandasïndi Jeobaeri testiguecheri ambe. Kʼuiripuecha engaksï jakajkuajka indeni chkuanderakuechani jamberijtsïni teresmarhuati ka astajtsïni jamberi atani (Mat. 10:36). Ka nójtsïni ísku pakatasïndi inde ambe enga Satanási újka jimboka desde primeru siglurhu úsïreengia indeni ambe (Úku. 5:​27, 28, 40). w22.06 16, 17 párr. 10, 11

¿Neechaksï jaua imani ʻuánikuechaʼ jingoni engaksï “jurhimbikuarhu” pánhajka? Imeecha engaksï tsíntaaka, engaksï tsípiti pakaraaka Armajedonirhu ka sapiicha engaksï jimbanhi parhakpinirhu andajpenuaka. Enga na nitamakia 1,000 uéxurhini, iámindu imeecha engaksï Echerirhu irekaaka, perfektueuatiksïa. Ju je miáni eska enga nema perfektueuakia, no arhikuekasïndi eska intsïnhaaka tsípikua para méntkisï. Ju je eratsentani Adáni ka Ebani. Nájkirukaksï perfektuepka jatsisptiksï para xarhatani eskaksï kurhajchasïreenga Tata Diosï Jeobani paraksï úni intsïnhani tsípikua para méntkisï. Peru xáni no sési engaksï imeecha no uékapka kurhajchani (Rom. 5:12). Enga na nitamaakia 1,000 uéxurhini, iámindu imeecha engaksï Echerirhu irekaaka, perfektueuatiksïa. ¿I kʼuiripuechaksï apoiariua Tata Diosï Jeobaeri juramukuani para méntkisï? ¿Oksï máru ísï jámaa eska Adáni ka Eba engaksï no kurhajchapka Tata Diosïni nájkirukaksï perfektuepka? Íksï kurhamarhikuecha niáraatiksï mókunhantani. w22.09 22, 23 párr. 12-14

¿Úkua jukanchasïntsï exeni eska sési niántaaka ambe enga xáni úkuarhini jaka parhakpinirhu? Uánikua familiechaksï nóteru uékperasïndia ísï eska antesi. Kʼuiripuechaksï sánderu no sési jámasïndi atajpini ka nóksï uandanhiasïndi máteruecha jimbo. Ka uánikua kʼuiripuechaksï úkua jukanchasïndi mintsikaani imeechani engaksï juramukua jatsika. Joperu i ambejtsïni exerasïndi eska ambakiti ambe jauaka para sánderu orhepatini. ¿Andi? Jimboka kʼuiripu meru ísï jámasïnga eska na uandajka profesia ma ʻúltimu jurhiatikuecheriʼ enga 2 Timoteu 3:​1-5 jimbo jaka. No ma kʼuiripu enga ambakiti mintsita jukaka uaati uandani eska no ísï úkuarhixaka eska na uandajka i profesia. Ka i ambe xarhatasïndi eska tata Jesukristu Reiiskia Tata Diosïiri Reinurhu. Joperu jarhastiksï máteru profesiecha engaksï uandajka i Reinueri ambe. Ísï eskaksï rompekabeseeri particha na sési jatanhentajka, profesiechajtuksï májkueni sési jateentasïndi ka jarhuatasïndijtsïni exeni eska nóteru ióni kuerataxakaia paraka Tata Diosï Jeoba uaaka ambe engajtsïni aiachika. w22.07 2 párr. 1, 2

Pandemia COVID-19 jimbo, arhinhaspkachi ambe engachi úpiringa parachi jatsiani tánguarhikuechani ka para aianhpini. Jirejiresïchi ueenaspka jatsiani juchaari tánguarhikuechani bideoiamada jimbo ka ueenaspkachi aianhpini karta ka telefonu jimbo. Tata Diosï Jeoba újchakurasti na engachi xáni jánguarhintaka. Uánikua beteliichaksï uandantasti eskaksï niáraska sánderu uánikua aianhpiriicha jarhani. Ka ístu, uánikua erachiichaksï niárasti jatsiani ambakiti eksperiensiechani. Jamberiksï máru erachiicha eratsepti eskajtsïni Tata Diosïiri kúnguarhikua jukari kuidarixapka pandemieri. Joperu uánikua uelta xarharastia eska ambe engachi arhinhapka, kánikua sési jarhaspka. Engachi eratsentaska na engajtsïni xáni uékperakua jingoni arhistachijka Jesúsi, uaakachi seguru jarhani eska ambe uéjki jarhani sánderu orhepatini, Tata Diosï Jeoba ka imeeri Uájpa juchantsïni jingoni jauati (Ebr. 13:​5, 6). w22.07 13 párr. 15, 16

Juchaari kómarhikuecharhu kʼéri ambechi arhisïnga Tata Diosï Jeobani joperu ístuchi uékasïnga diosmaiamukua íntskuntani iámindu ambakiti ambe jimbo engajtsïni íntskujka; pori ejemplu, xáni uánikua ka sési járhati tsïtsïkiicha jimbo, xáni áspiti tʼirekua jimbo ka jimbokachi ambakiti amiguechani jatsiaska. Iámindu i ambe ka máteru ambe engajtsïni íntskujka juchaari Taati engajtsïni xáni xénchajka, úsïndi eskachi tsípikua jingoni irekuarhiaka (Sal. 104:​12-15, 24). Peru sánderu ambakiti ambe jimbo engachi diosmaiamukua íntskuntajka, jindeesti ima xáni uánikua ambe jimbo engajtsïni íntskujka parachi jorhenguarhini imeeri ambe ka jimbokajtsïni aiachisïnga eska sánderu orhepatini ambakiti ambe jauaka. Fasilisti eskachi mirikurhiaka diosmaiamu íntskuntani Tata Diosï Jeobani iámindu imani ambe jimbo enga újka juchantsïni jimbo. ¿Ambechi uaa úni parachi no méni mirikurhini? Uaakachi karani iámindu ambe engachi kurhakuka ka tátsekua eratsentani na engajtsïni mókuchintakia Tata Diosï. Ka tátsekuachi uaaka kómarhikua ma úni parachi diosmaiamu íntskuntani (Kol. 3:15). w22.07 22, 23 párr. 8, 9

No solu uétarhisïndi jorhenguarhini jurhimbikueri ambe. Parakajtsïni i ambe marhuacheaka, jatsiskachi para jurhimbikuarhu jámani jarhani, i ambe arhikuekasïndi ísï irekani eskachi na jorhenguarhini jaka. Engachi ísï úska, Biblieri jurhimbikua ambejtsïni jarhuataati parachi tsípikua jingoni irekani (Sant. 1:25). ¿Ka nénachi uaa seguru jarhani eskachi jurhimbikuarhu jámaxaka? Erachi ma uandasïndi eskachi jatsiska para exekuarhini ambe engachi sési úni jaka ka ambe engachi uaaka sánderu sési úni. Ka apostoli Pablu uandaspti: “Joperu na uéjkichi xáni eratsekua jukarinia, ju je seguiriini jarhani sési jámani indeni xanharu jimbo” (Filip. 3:16). Ju je eratsentani na engajtsïni xáni marhuachejka jurhimbikuarhu jarhani. No solujtsïni marhuachesïndi parachi úni sési irekani, sino ístuchi sési pʼikuastasïnga Tata Diosï Jeobani ka juchaari erachiichani (Prov. 27:11; 3 Juanu 4). ¡Ini ambe jimbochisï kánikua tsitijka jurhimbikuarhu jarhani ka ísïchi irekani eskachi na jorhenguarhini jarhajka! w22.08 19 párr. 16-18

Orhejtsïkutiichaksï uaati ambakiti ambe úni paraksï xarhatani eskaksï xénchasïnga Tata Diosï Jeobani ka Jesúsini: uaatiksï xénchperakua jingoni kuidariuani Jesúsiiri karichiichani ( 1 Ped. 5:​1, 2). Tata Diosïiri Uájpa sési xarhatakuspti ini ambe apostoli Pedruni. Jimboka Pedru tanimu xanhari uandaspka eska no mítespka Jesúsini, jamberi uékani japti xarhatakuni eska xénchasïreenga. Enga Jesúsi na tsíntapkia, kurhamarhispti: “Simóni, Jonasi uájpa, ¿uékasïndini?”. Seguru eska Pedru úpiringa ambe uéjkini para xarhatakuni eska uékasïreenga. Ka tátsekua Jesúsi arhispti: “Kuidaria juchiiti karichiichani” (Juanu 21:​15-17). Jima para orhepatini, Pedru xénchperakua jingoni kuidariuaspti Jesúsiiri karichiichani ka ísï xarhatakuspti eska xénchasïreenga. ¿Orhejtsïkutiichaksï néna uaa xarhatani eskaksï jukaparharasïnga ambe enga Jesúsi arhipka Pedruni? Orhejtsïkutiichaksï uaati xarhatani na engaksï xáni xénchajka Tata Diosï Jeobani ka Jesúsini engaksï jánguarhintaska kuidariuani ka uinhaperantaani erachiichani ka engaksï ístu jánguarhintaska jarhuataani imeechani engaksï jarharika kúnguarhikuani (Ezeq. 34:​11, 12). w23.01 29 párr. 10, 11

Nóchi jatsiska para eratseni eska no nema úsïnga kurhanguni ambe engachi nitamakuarhini jarhajka. No sési jarhasti ísï eratseni. Jimboka inde ambe uaati úni eskachi jakajkuaka eskachi no méni uaaka orhepani uérani ka eskachi no uaaka jurajkuni indeni ambe enga no sési jaka. Joperu Biblia uandasïndi: “Engajtsï tsʼéjkunhani jauaka, jimajkanimindu Diosïksïni jánhastaa[ti] nani engajtsï na uaaka kuájpikuarhini”, o orhepani uérani. Ísï jimbo, nájkirukachi uinhamu tsitini jauaka imani ambe úni enga no sési jaka, uaakachi tekaantani parachi no jurajkuni Tata Diosï Jeobani. Imeeri jarhuajperata jingoni, uaakachi pʼíngukuarhini ka nóchi uaaka imani ambe enga no sési jaka. Ju je miáni eska jimbokachi no perfektueska seguiriini jauakachi imani ambe tsitini enga no sési jaka. Joperuchi jatsiska para sóntku úni ambe ma parachi no no sési ambe niátani, ísï eska José na úpka enga sïpakuarhikupka Potifariiri témbani (Gén. 39:12). Nóchi jatsiska para jurajkuni eskajtsïni andaaka ima ambe engachi tsitijka ka enga no sési jaka. w23.01 12, 13 párr. 16, 17

Kualidadi ma enga Tata Diosï Jeoba sánderu xarhatajka jindeesti jurhimbikua (Deut. 32:4). Nema enga jurhimbikua jingoni jámajka májkueni kaasïndi iáminduechani, ka Tata Diosï Jeoba ísï úsïndi (Úku. 10:​34, 35). Ka inde ambeksïsï xarhatajti ima idiomecha enga Tata Diosï erakuaka paraka Biblia karanhapiringa. Tata Diosï Jeoba aiatspespti eska últimu jurhiatikuecha jimbo, “jurhimbikua ambe” ʻkánikua mítenhapiringaʼ, i ambe arhikuekasïndi eskaksï uánikua kʼuiripuecha kurhangupiringa ambe enga Biblia uandajka (Dan. 12:4). Ma ambe enga újka eska i ambe ísï úkuarhiaka jindeesti eska Biblia ka Biblieri publikasionichaksï mámaru járhati idiomecha jimbo únhasïnga, tradusirinhani ka etsakunhani. Tata Diosï Jeobaeri ireta tradusirintastia Bibliani, iámu o ma parti, jukari 240 idiomecha jimbo ka iámindu kʼuiripuechaksï úsïndi jatsini Biblia ma no ma sentabu maiampiparini. Ini ambe jimbo, uánikua kʼuiripuecha engaksï táchanisï anapueka jiókuarhixatiksï “ambakiti aianhperakuani Diosïiri Juramukueri” ante de kʼamarani i tiempu (Mat. 24:14). Jeoba Tata Diosï máesti enga jurhimbikua jingoni kámpijka ka ima uékasïndi eskaksï iámindu kʼuiripuecha imani míteaka Bibliani arhintaparini. ¿Andisï ísï újki? Jimbokajtsïni kánikua xénchasïnga. w23.02 5 párr. 11, 12

¿Tsitisïntsï Tata Diosïiri jurhimbikuani? Seguru eska jo. Peru jimbokachi imperfektueska ka engachi no jingontku jámaska, úpiringachi eratseni eska ambe ma sési jarhaska nájkiruka no ísïiuaka, ísï eskaksï na újka parhakpinirhu anapuecha (Is. 5:20). Enga Jesúsi Echerirhu jámani japka, relijioniiri orhejtsïkutiichaksï ísï exekuarhisïreendi enajkiksï jurhimbitku jámeeni ka enajkiksï ambakiti kʼuiripuepi. Peru Jesúsi arhiaspti eskaksï kánikua no sési úxapka jimbokaksï uinhamarhikuasïreenga máteruechani ka jimbokaksï imeecha uandasïreenga ambe enga sési japka ka ambe nómbe (Ecl. 7:16; Luk. 16:15). Iásïjtuksï jarhasti kʼuiripuecha engaksï májkueni jámajka, eratsesïndiksï eska ambe engaksï újka no no sési jarhaska. Íksï kʼuiripuecha sánderu kʼéri ambe exekuarhisïndi eska máteruecha ka arhinchaasïndiksï máteruechani. Enga nema ísï jámajka nóksï kurhajchaani jarhasïndi Tata Diosïiri juramukuechani ka ima no sáni jaiapanheantasïndi. Jurhimbikua sési jásï kualidadi máesti. Enga nema jurhimbikua jingoni jámajka imani ambe úsïndi enga Tata Diosï uandajka eska sési jarhaska. Bibliarhu, uandakuecha engaksï ísï tradusirikuarhika komu “jurhimbikua” arhikuekasïndi eska nema jatsiska para ísï irekani eskaksï na uandajka Tata Diosï Jeobaeri juramukuecha, engaksï sánderu kʼéri ambeeka. w22.08 27 párr. 3-5

Jesúsi mintsikaaspti imeeri chúxapatiichani, nájkirukaksï no ueenga iámindu ambe sési úni (Juanu 15:16). Engaksï Santiagu ka Juanu kurhakupka ambakiti lugari ma Jesúsini imeeri Reinurhu, ima no kurhamarhiaspti ambe jimboksïsï marhuakuni japi Tata Diosï Jeobani, nijtu arhiapi eskaksï nóteru jindeepiringia imeeri apostoliicha (Mar. 10:​35-40). Ka ima chúri enga Jesúsi jupinhapka, iámindu imeeri chúxapatiichaksï jurajkuspti (Mat. 26:56). Joperu Jesúsi seguirispti mintsikaani. Nájkiruka mítepka eskaksï no méntkisï sési úsïreenga ambe ma, xénchaaspti “asta kʼamarhutani jamberi” (Juanu 13:1). Ka enga Jesúsi na tsíntapkia arhiaspti imeeri 11 apostoliichani engaksï no méni jurajkupka, eskaksï orhejtsïkupiringa ánchikuarhitani paraksï imeeri chúxapatiichani uaani ka paraksï kuidariuani imeeri chúxapatiichani enga ima xáni xénchauenga (Mat. 28:​19, 20; Juanu 21:​15-17). Ka kánikua sési úspti enga ísï mintsikaapka ini achamasïichani nájkirukaksï ícha no perfektuepka. Kánikuaksï sési marhuakuspti Tata Diosïni asta jiáni jamberi engaksï uarhipka. Jesúsi, mintsikaaspti kʼuiripuechani engaksï imperfektuepka ka imeeri ambakiti ejemplujtsïni jarhuatasïndi parachi juchajtu májkueni úni. w22.09 6 párr. 12

Satanásijtsïni no uaati chérani engachi seguru jarhaska eskajtsïni Tata Diosï Jeoba kánikua xénchasïnga ka eska juchantsïni jingoni jarhaska. Pori ejemplu, ima enga karapka Salmo 118, kánikua no sési ambe nitamakuarhispti. Uánikua enemiguechani jatsiaspti, ka máruksï kánikua juramukua jatsispti (bersikuluecha 9 ka 10). Ka ménichani niáraspti jukari uandanhiani (bersikulu 13). Ka ístu, Tata Diosï Jeoba jurhimberantaspti (bersikulu 18). Nájkiruka ini ambe nitamakuarhipka, imeeri pirekuarhu uandaspti: “No chéaka”. Ima sési mítetixapti eska nájkiruka imeeri Taati auandarhu anapu jurhimberantapka, ístu xénchasïreenga. Inde salmista seguru jarhaspti eska ambe uéjki enga úkuarhipiringa, imeeri Tata Diosï enga kánikua xénchpetika, jima japiringa para jarhuatani (Sal. 118:29). Iámindu kristianuechachi jatsiska para seguru jarhani eskajtsïni Tata Diosï Jeoba xénchasïnga mándani arini. Engachi seguru jauaka íri ambe, jarhuataatijtsïni parachi: 1) no chéni eratseparini eskachi no uaaka kéndani juchaari familiani, 2) no chérhiani máteru kʼuiripuechani ka 3) no chérhini uarhikuani. w22.06 15 párr. 3, 4

Jatsiskachi para jánguarhintani kʼéri ambe arhini Tata Diosïni ante de ambe uéjki. Jimboka Tata Diosï Jeoba jindeeska juchaari Kueraajpiri, ima jukanchasti eskachi kʼéri ambe arhiaka (Apok. 4:11; 14:​6, 7). Ísï jimbo, ambe enga sánderu jukaparhakueka jindeesti kʼéri ambe arhini Tata Diosïni ísï eska ima na uéjka, “eska espiritu na arhiauaka ka jurhimbikua jingoni” (Juanu 4:​23, 24). Jatsiskachi para jurajkuni eskajtsïni espiritu santu arhistachiaka parachi ísï kʼéri ambe arhini Tata Diosïni eska Biblia na arhijka. Tata Diosïni marhuakuni, jatsisti para jindeeni sánderu jukaparhakua ambe nájkiruka jima engachi irekani jaka gobiernu no sésikua íntspiaka para aianhpinhani. Iásïksï jukari 100 erachiicha ka pirenchiichaksï ónhakata jarhasti jimbokaksï Jeobaeri testigueska. Nájkiruka ísïika, sésiksï pʼikuarherasïndi jimbokaksï úsïnga kómarhini Tata Diosïni, jorhenguarhini ka aianguani máteruechani Tata Diosïiri ambe ka imeeri Reinueri ambe. Nájkirukachi no sési arhinhaaka o no sési kánhani, tsípinchi pʼikuarherasïnga jimbokachi míteska eska Tata Diosï Jeoba juchantsïni jingoni jarhaska ka eskajtsïni maiamuntaaka (1 Ped. 4:14). w22.10 9 párr. 13

Libru de Proverbios jimbo, ambakiti konsejuechaksï jarhasti engajtsïni méntkisï marhuacheaka ka engachi ísï úska eskaksï na arhijka uaakachi sánderu sési irekani. Ju je eratseani tsimani ambakiti konsejuechani. Orheta, ju je sési pʼikuarherani imani ambe jingoni engachi jatsika. Proverbios 23:​4, 5 ini konsejuni íntspisïndi: “Asï jánguarhinta jatsikuarhekua ambe jatsini. […] Jimboka aleechani jukaasïnga ísï eska águila ma ka auandarhisï kárasïndi”. Nájkiruka ísïika, iásï ini jurhiatikuechani jimbo, xáni imeecha engaksï jatsikuarheka ka engaksï no jatsikuarheka, kánikuaksï sentabu uékasïndi jatsini. Ísï jimbo, sáno méntkisïksï niárasïndi imani ambe úni enga tátsekua no sési pakatajka, nóteruksï úsïndia sési pájperani máteruechani jingoni ka astaksï niárasïndi pʼamenchani (Prov. 28:20; 1 Tim. 6:​9, 10). Máteru ambe jindeesti eskachi orheta eratsentaaka ambe engachi uandaaka. Engachi no eratsentaska ambe engachi uandaaka, uaakachi kánikua no sési pʼikuastaani máteruechani. Proverbios 12:18 uandasïndi: “Enga nema no eratseparini uandajka ísïisïndi komueska espada ma jingoni chʼurhurpini jarhani, peru ima enga jánhaskakua jingoni uandajka sési pʼikuastpentasïndi”. Engachi no jámaska uandatsiani máteruechani ima ambeeri engaksï no sési újka, uaakachi sési pájperani iáminduechani jingoni (Prov. 20:19). w22.10 21 párr. 14; 22 párr. 16, 17

Esekieli jatsispti para sési kurhanguni ambe enga jatsipka para uandantani. Ima jatsispti para jakajkuni indeni uandakuani para ísï úni mintsita jingoni aianguani. Tátsekua úkuarhispti ambe ma enga ísku pakatapka. Esekieli exespti eska roiu ʻxáni téspka eska tékolmenaʼ (Ezeq. 3:3). ¿Andi? Jimboka para ima, aianhpini ambe enga Tata Diosï Jeoba uandapka, kʼéri kóntperata máespka, ísïispti komueska tékua ambe o eska ambe ma enga kánikua sési pʼikuastpejka (Sal. 19:​8-11). Kánikua agradesidu jarhaspti enga Tata Diosï erakupka paraka imeeri profeteepiringa. Tátsekua Tata Diosï Jeoba arhispti Esekielini: “Kurhaa ka jiókuarhi chiiti mintsitarhu iámindu uandakuechani engakeni arhijka” (Ezeq. 3:10). Ini ambe jingoni, Tata Diosï arhixapti eska jánguarhintapiringa miántani ambe enga arhienga roiurhu ka eska eratsentapiringa indeni ambe. I ambe úpirindi eska Esekieli sánderu mintsikapiringa Tata Diosïni ka eska sési mítetini japiringa na enga xáni jukaparhakuepka ima ambe enga aianguapiringa kʼuiripuechani (Ezeq. 3:11). Enga Esekieli na sési kurhangupkia ka jakajkuni ambe enga Tata Diosï uandapka, listu jarhasptia para ueenani aianhpini ka úni imeeri ánchikuarhitani asta kʼamarhukuni. w22.11 6 párr. 12-14

¿Ambechi úpirini úni parachi no jurajkuni Tata Diosïini jiáni enga kúnguarhikuarhu mójtakurhiska ambe ma? Ju je iámu mintsita jingoni apoiarini ambe enga Tata Diosïiri kúnguarhikua mójtakuaka. Engaksï israeliteecha desierturhisï jámani japka, koatiteechaksï arka pakatperakuerinksï pásïreendi ka iámu ireta úsïreendi exeni indeni ambe (Núm. 3:​29, 31; 10:33; Jos. 3:​2-4). ¡Inde ambe kʼéri kóntperata máespti! Peru engaksï israeliteecha niárapkia imani Echeri jimbo engaksï Aiaminhapka, mójtakukuarhispti ambe ma. Nóteru uétarhipirindia eskaksï móskupiringa arkani. Ísï jimbo, koatiteechaksï arhinhaspti paraksï máteru ambe úni (1 Crón. 6:​31-33; 26:​1, 24). Biblia no uandasïndi eskaksï koatiteecha uandauandamisïreenga, o eskaksï sánderu kʼérati ánchikuarhiteechani kurhajkuarhiasïreenga jimbokaksï ióntki ambakiti ánchikuarhiteechani jatsiaspka. ¿Ambechi jorhenguarhisïni iiri ambe? Eskachi mintsita jingoni apoiariuaka enga Tata Diosï Jeobaeri kúnguarhikua mójtakuaka ambe ma nájkirukachi máteru ánchikuarhita ma intsïnhaakia. Ju je tsípikua jingoni úni náki uéjki ánchikuarhita ma. Ka miáni eska ma no indeni jimbosï sánderu jukaparhakuejka Tata Diosïiri kúnguarhikuarhu. Para Tata Diosï Jeoba, sánderu jukaparhakuesti eskachi kurhandiraaka ka eska náki uéjki responsabilidadi ma. w22.11 23 párr. 10, 11

Onesíforu jánguarhintaspti para apostoli Pabluni exentani, ka enga na exentapkia úspti ambe enga xáni uétarhienga para jarhuatani. ¡Ima no chésïreendi uarhini Pabluni jimbo! ¿Ambechi jorhenguarhisïni? Eskachi jatsiska para jarhuataani erachiichani engaksï no sési kánhani jaka ka no chéni ambe engajtsïni máteruecha arhiaka. Ju je jánguarhintani parachi kuájpiantani ka jarhuataani (Prov. 17:17). Imeechaksï uétarhinchasïndi eskachi xénchauaka ka eskachi no méni jurajkuauaka. Eratsi je ambe engaksï juchaari erachiicha ka pirenchiicha úni jaka jini Rusia engaksï máteru erachiicha ónhanhajka. Engaksï máru erachiicha jusgarinhani jarhajka, uánikua erachiichaksï nirasïndi tribunalirhu paraksï xarhatakuani eskaksï imeecha jingoni jarhaska. ¿Ambechi uaa jorhenguarhini? Eskachi no jatsiska para chéni engaksï chkuanderakua ambe uandaaka, no sésiksï kaani jauaka o astaksï ónhanhani erachiicha engaksï responsabilidadi ambe jatsika. Ju je kómarhijpikuani, kuidariuani imeeri familiechani ka exeni nénachi uaa jarhuataani (Úku. 12:5; 2 Kor. 1:​10, 11). w22.11 17 párr. 11, 12

Orhejtsïkutiichaksï jatsisti para uinhaperantaani erachiichani Biblia jingoni ka sési pʼikuastantaani (1 Ped. 5:2). Enga no sési ambe úkuarhijka, orhetaksï jatsisti para exeni eska mándani erachi sési jauaka, eska jatsiaka tʼirekua, xukuparhakua ka nani pakarani. Joperu jamberi i erachiicha engaksï no sési nitamakuarhika, ióni jamberiksï uétarhinchaati eskaksï jarhuatanhaaka Biblia jingoni ka eskaksï sési pʼikuastanhantaaka (Juanu 21:15). Harold enga Grupurhu jaka enga Betelini ma Orhejtsïkujka, uánikuecha jingoni uandontskuarhestia engaksï no sési nitamakuarhika, ima uandasïndi: “Tiempu uétarhisïndi para ma sési pʼikuarherantani. Jamberi erachiichaksï újtia ménderu ísï irentani eskaksï na irekapka, joperuksï úpirindi mémindu miántani ambe enga úkuarhipka, úpirindiksï miántani familiarini ma engaksï uarhiranchaka o ambe ma engaksï imeecha jatsipka o na engaksï xáni no sési nitamakuarhipka. Engaksï ini ambe miántajka, úpirindiksï ménderu ueenani no sési pʼikuarherani. Ka no no sési jarhasti ísï pʼikuarherani ka níjtu arhikuekajki eskaksï nóteru mintsikasïngia Tata Diosïni”. Jukaparhakuesti eskaksï orhejtsïkutiicha ísïiuaka eska na uandajka i konseju: “Uera je imeecha jingoni engaksï uerajka” (Rom. 12:15). w22.12 22 párr. 1; 24, 25 párr. 10, 11

Tata Diosï Jeoba intsïmpitiisti ka íntskusïndijtsïni imeeri espiritu santu parajtsïni jarhuatani imani ambe úni enga sési jaka. Engachi jorhenguarhijka Tata Diosïiri Uandakuani, jurajkusïngachi eskajtsïni Tata Diosïiri espiritu jarhuataaka. Ístu, engachi tánguarhikuecharhu nirajka intsïnhasïngachi espiritu santu. Ka jima úsïngachi juchaari erachiicha jingoni jarhani, engaksï májkueni eska jucha, jánguarhintani jaka paraksï ambakiti ambe úni ka inde ambejtsïni uinhaperantasïndi (Ebr. 10:​24, 25; 13:7). Ka engachi mintsita jingoni kómarhijka Tata Diosï Jeobani ka kurhakunchi eskajtsïni jarhuataaka jurajkuni ambe ma enga no sési jaka, imajtsïni íntskusïndi imeeri espiritu santu parajtsïni uinhaperantani ka únchi orhepani uérani. Ísïisti, jamberi inde ambe no uaati eskachi nóteru tsitiakia no sési ambe, joperujtsïni íntskuati uinhapikua parachi no niátania indeni ambe. Engachi ueenakia imani ambe úni engajtsïni jarhuataaka parachi sési pájperakua ma jatsini Tata Diosï Jeoba jingoni, kánikua jukaparhakuesti eskachi no jurajkuaka úni indeni ambe ka eskachi seguiriuaka jánguarhintani imani ambe úni enga sési jaka. w23.01 11 párr. 13, 14

Biblia no jindeesti libru ma enga medisineeri ambe uandajka, nijtujtsïni arhijki ambe engachi jatsika para arhani. Joperu kʼórujtsïni arhisïndi ambe enga uandajka Tata Diosï inde ambeeri. Pori ejemplu, íntskusïndijtsïni ini konseju: “Késtata chiiti kuerpurhu imani ambe enga no sési útspijka” (Ecl. 11:10). Máru ambe engajtsïni no sési úchijka ka enga Biblia uandajka eska no sési jarhaska, jindeesti jukari arhani ambe ma ka kauini (Prov. 23:20). Ísï jimbo, engachi exeni jauaka ambe ka na engachi xáni auaka ambe ma, Tata Diosï Jeoba erokuarhisïndi eskachi jorhenaaka pʼíngukuarhini (1 Kor. 9:25). Engachi uéjka xarhatani eskachi agradesidu jarhaska tsípikua jimbo engajtsïni Tata Diosï íntskuka, jatsiskachi para sési eratsentani ambe engachi uaaka (Sal. 119:​99, 100; Prov. 2:11). Pori ejemplu, jatsiskachi para sési eratsentani ambe engachi auaka. Engachi anhenchajka ambe ma, joperu engajtsïni no sési úchijka, sánderu sési jauati eskachi no auaka indeni ambe. Ístuchi míteska eskachi jatsiska para sési mintsikuarhini, someni ejersisiu úni, jánguarhintani limpiueni ka pímbinhasï jatsini juchaari kʼumanchikuani. w23.02 21 párr. 6, 7

¿Nénachi uaa exentani jukaparhakua ambe enga Bibliarhu jaka? Ju je exeni ambe enga arhijka 2 Timoteu 3:​16, 17. Jimini uandasïndi eska “ambe enga xáni karakata jaka […] marhuasïnga” para tʼámu ambe: para jorhentpini, para exerani kʼuiripuechani ambe engaksï no sési úni jaka, para sési peentaani iámindu ambe ka para jorhendaani kʼuiripuechani ambakiti ambe úni. Asta ima Biblieri libruecha engaksï no xáni úrakuarhejka marhuasïndiksï para ini ambe úni. Engachi Bibliani arhintani jauaka, ju je jánguarhintani exeni ambejtsïni jorhendasïni Tata Diosï Jeobaeri ambe, ima ambeeri enga uéjka úni o imeeri prinsipiuecheeri ambe. Ka parajtsïni Biblieri bersikuluecha exerani ambe engachi no sési úni jaka, jatsiskachi para exeni ambe engajtsïni jarhuataaka no úni nijtu tsitini imani ambe enga no sési jaka ka parachi no jurajkuni Tata Diosï Jeobani. Ístu ju je eratsentani na engaksï máru bersikuluecha uaaka sési peentani ambe ma o jurhimberantani ambe ma engachi jucha eratsejka ka enga no sési jaka, jamberi jindeeti ambe ma engachi aianhpikuarhu arhinhaka. ¿Ka ambechi uaa úni parajtsïni Biblieri bersikuluecha jorhendani ambakiti ambe úni? Jatsiskachi para exeni na engajtsïni ima bersikuluecha jarhuataaka parachi májkueni eratseni eska Tata Diosï. Engachi úska ini tʼámu ambe engachi Bibliani arhintani jauaka, sánderuchi jukaparhakua ambe exentaaka ka sánderujtsïni marhuacheati. w23.02 11 párr. 11

Danieliiri profesia ma, uandaspti eska Jesúsi jiáni ueenapiringa juramuni engaksï na kʼamarapiringia siete tiempuecha. ¿Nénachi uaa míteni káni úkuarhispi i xáni ambakiti ambe? (Dan. 4:​10-17). Siete tiempuechaksï 2,520 uéxurhini arhikuekasïndi. Inde uéxurhinichaksï ueenaspti 607 jimbo ante de Jesúsi, jiáni engaksï Babilonia anapuecha kénditapka últimu reiini enga Tata Diosï Jeobani jimbo japka jini Jerusaléni. Ka inde tiempu kʼamaraspti 1914 jimbo enga Tata Diosï Rei úpka imani “enga sésikua jatsika para juramuni” imeeri Reinurhu, Jesúsini (Ezeq. 21:​25-27). ¿Nénajtsïni jarhuatasïni i profesia? Kurhanguni ini profesiani siete tiempuecheri, úsïndi eskachi seguru jauaka eska Tata Diosï Jeoba meru ísï úsïnga eska na aiatspijka. Ima uandaspti káni enga uaxastapiringa Reinuni. Ka enga niárapka inde tiempu, ísï úspti. Ísï jimbo, uaakachi seguru jarhani eska ima kumpliriuaka máteru profesiechani jiáni enga ima uandarini jakaia. Ísï jimbo, Tata Diosï Jeobaeri jurhiatikua “no ióndaati janoni” (Hab. 2:3). w22.07 2, 3 párr. 3-5