Nobiembri

Kristianu ma no méni jatsipirindi para no sési jásï ambe uandani. Joperuchi jatsiska para jingontku jámani, jimbokachi jamberi no kuenta íntskukuarheparini úpiringachi no sési pʼikuastani nemani juchaari uandakuecha jingoni. Pori ejemplu, nóchi jatsipiringa para no sési uandani ima kʼuiripuecheri engaksï máteru járhati pʼindekuechani jatsiaka, máteru jásï raseka oksï máteru paisi anapueni. Ka ístuchi no jatsipiringa para imani ambe uandani enga no sési pʼikuastaapiringa máteruechani o ikiataani. Imani ambe uanda je enga jarhuatauaka máteruechani ka uinhaperantaani. Enbesi de no sési uandani máteruecheri ambe ka arhinchaani, jánguarhinta je méntkisï felisitariuani. Nóchi uékasïnga ísïini eska israeliteecha. Nájkirukaksï uánikua ambe jatsipka engaksï jimbo úpiringa agradesidu jarhani, méntkisïksï uandauandamini jarhasïreendi ka inde ambe úsïndi pájtampini. Pori ejemplu, engaksï 10 espiiecha no sési ambe uandantapka, “iámindu israeliteechaksï ueenaspti no sési ambe uandani Moisésiiri ambe” (Núm. 13:​31–14:4). Joperu engachi felisitariuajka máteruechani, inde ambe kánikua sési pʼikuastaasïndi. Ísï jimbo, jánguarhinta je exeni na engajtsï jatini uaaka felisitariuani máteruechani. w22.04 8 párr. 16, 17

Desde jiáni enga Biblia karanhapka, Tata Diosï Jeoba uánikua tumbiichani jarhuataastia paraksï niárani imeeri amiguni. Ka ístu uaati jarhuataani chaari sapiichani parakaksï niáraaka imeeri amigueni, engaksï imeecha ísï uékaska (1 Kor. 3:​6, 7). Nájkirukaksï chaari sapiicha no mintsita jingoni xénchaaka Tata Diosïni, ima kʼóru seguiriini jauati xénchaani (Sal. 11:4). Ka engaksï sánisï ueenaka xarhatani eskaksï uékasïnga jaiapanherantani Tata Diosï Jeobani, ima jarhuatauati paraksï niárani imeeri amigu úkuarhini (Úku. 13:48; 2 Crón. 16:9). Ístuksïni uaati jarhuatani parajtsï imani ambe arhiani engaksï chaari sapiicha uétarhinchani jauaka ka jiáni enga sánderu sési jauaka (Prov. 15:23). O ístu, Tata Diosï uaati úrani kúnguarhikuarhu anapu erachini ma o pirenchini ma paraka xénchperakua jingoni jarhuatauaka. Jamberi engaksï imeecha kʼéraakia, Tata Diosï Jeoba uaati úni eskaksï imeecha miántaaka ambe ma enga chá jorhendaapka (Juanu 14:26). Engajtsï jánguarhintajka jorhendaani chaari sapiichani imani ambe jingoni engajtsï uandajka ka úni, úni jarhasïngajtsï ambe ma paraksïni Tata Diosï Jeoba újchakuraani. w22.04 21 párr. 18

Jimboka Satanási nóteru úsïngia auandarhu kʼuanhatsentani, kánikua ikiakuasïndi kristianu erakukateechani engaksï útasï Echerirhu jaka, jimbokaksï imeecha jindeeska engaksï representarini jaka Tata Diosïiri Reinuni ixú Echerirhu ka “engaksï uandantani jaka Jesúsiiri ambe” (Apok. 12:17; 2 Kor. 5:20; Éfes. 6:​19, 20). Uéxurhini 1918 jimbo, ochu erachiicha engaksï orhejtsïkuenga aianhperakuani, chkuanderakua ambeksï jauataminhaspti ka indeni ambe jimbo arhinhasptiksï eskaksï ióni japiringa kárselirhu. Ísï xarharasïreendi enajkiksï nóteru úpirinia aianhpini Tata Diosïiri Reinueri ambe. Joperu marsuni 1919 jimbo, kristianu erakukatechaksï uéntaspti kárselirhu ka sánderu tátsekua kénditaminhasptiksï imani ambe engaksï jimbo ónhanhapka. Ka erachiichaksï ménderu jirejiresï ueenaspti aianhpini Tata Diosïiri Reinueri ambe. Peru Satanási no ísku pakaraspti. Desde jiáni uératini, mámaru ambe úxati enga ísïika komueska “kʼéri iurhekua ma” para no sési kaani Tata Diosïiri marhuariichani (Apok. 12:15). Ísï jimbo, iáminduechachi uétarhinchasïnga “tekaantskua” ka “mintsikani” Tata Diosïni (Apok. 13:10). w22.05 5, 6 párr. 14-16

Apostoli Pablu jánhaskakua ma jimbo tsimani grupuechani exeasïndi engaksï apoiarijka Tata Diosï Jeobaeri gobiernuni ka engaksï intsïnhajka tsípikua para méntkisï iámindu kóntperatecha jingoni. Primeru grupurhu, 144,000 kʼuiripuechaksï jarhasti. Imeechaksï Echerirhu anapuesti ka auandarhuksï nirasïndi paraksï Jesúsi jingoni májku kʼéri juramuni. Iáminduechaksï parhakpinirhu anapuechani juramukuasïndi (Apok. 5:​9, 10; 14:​3, 4). Juanu exeasïndi anhandetinksï jarhani Jesúsini jingoni juáta Sionirhu enga auandarhu jaka (Apok. 14:1). Desde jiáni engaksï apostoliicha irekapka asta iásï jamberi, uánikua kʼuiripuechaksï erakunhasti paraksï imani grupu jingoni úkuarhini engaksï jindeeka 144,000 (Luk. 12:32; Rom. 8:17). Peru Juanu arhinhasïndi eska últimu jurhiatikuecha jimbo solu grupu sapichu ma tsípiti pakarapiringa parhakpinirhu. Tátsekua enga kʼéri mískuarhita jauaka, ícha engateruksï pakarani japka, auandarhuksï pánhaati parakaksï máteruecha jingoni jauaka engaksï jindeeka 144,000 ka engaksï uarhika sési marhuakuparini Tata Diosïni. Juramuatiksï Jesúsini jingoni Tata Diosïiri Reinurhu (Mat. 24:31; Apok. 5:​9, 10). w22.05 16 párr. 4, 5

Jesúsi jorhendaaspti imeeri chúxapatiichani eskaksï jatsipiringa para sésku exekuarhini. Arhiaspti: “Asta chaari jauiri jamberi iámindu kuentukata jarhasti” (Mat. 10:30). Kánikuajtsïni sési pʼikuastantasïndi i uandakuecha ka sánderia engachi ísï exekuarhijka enajkichi no sáni jukaparhakua ambee. Miátantasïndijtsïni eska juchaari Taati auandarhu anapu pendienti pásïndi juchantsïni jimbo ka eskajtsïni kánikua jukaparharasïnga. Enga Tata Diosï Jeoba exejka eskachi uaaka marhuakuni ka irekani para méntkisï jimbanhi parhakpinirhu, ¿neeskichi jucha parachi arhini eska inde ambe no ísïiska? Ma 15 uéxurhini ísïistia engajtsïni rebista La Atalaya pʼímarhika parachi sésku exekuarhini. Uandaspti: “Ísïisti, eskachi no uékasïnga jukari jukaparharakuarhini enga uaaka eskachi kʼéramakuarhiaka, joperuchi nójtu uékasïnga méntku ménderueni exekuarhini ka uandani eskachi no ma ambe jukaparharaska. Sánderu sési, uékasïngachi exeni ambe engachi meru újka úni. Ísï jimbo, jatsiskachi para exeni ambe engachi sési újka ka ambe engachi no újka úni. w22.05 24, 25 párr. 14-16

¿Ambechi uaa úni parachi sánderu márku úkuarhintatini jarhani? Ju je jánguarhintani parachi iáminduecha sési pájperani (Mat. 5:9; Rom. 12:18). Engachi jánguarhintajka jucha ueenani sési pájperani kúnguarhikuarhu anapu erachiicha jingoni, sánderuchi sési ka májku kʼéri kómarhisïnga Tata Diosï Jeobani. Ju je no mirikurhini eska Tata Diosï Jeobasï úka eskaksï iámindu imeecha engaksï sési ka májku kʼéri kómarhijka imani pímbinhasï kómarhikuarhu jauaka (Juanu 6:44). Eranhaska je na enga xáni sési pʼikuarherajka Tata Diosï enga exejka eskachi imeeri marhuariicha jánguarhintasïnga sánderu sési pájperani ka májku kʼéri jarhani, jimboka para ima iáminduechachi kánikua jukaparhakueska (Is. 26:3; Ageo 2:7). ¿Ambechi uaa úni parachi sánderu marhuatani kóntperatechani engajtsïni Tata Diosï Jeoba íntskuajka? Ju je iatsitakuarhu eratsentani ambe engachi jorhenguarhijka Bibliarhu. Ístu, engachi jorhenguarhiska ka eratsentani, niáraakachi sési járhati kualidadichani jatsiani engajtsïni jarhuataaka parachi ‘uékperani máteru ka máteruni jingoni eska májku ermanuecha’ kúnguarhikuarhu (Rom. 12:10). w22.11 12, 13 párr. 16-18

Engachi jiókuarhiska eskajtsïni Tata Diosï Jeoba puáchentaskia, sésichi pʼikuarheraaka, nóchi uandanhiani jauaka ka ambakiti konsiensiachi ma jatsiaka. Ka soluchi uaaka ísï pʼikuarherani engajtsïni Tata Diosï Jeoba puáchentaaka (Úku. 3:19). Engajtsïni ima puáchentajka, úsïngachi ménderu imeeri amigueni. Ísïisïndi enajkichi no méni pekaripirini. Enga Tata Diosï Jeoba na puákuntajkia nemani, no méntku miátantani jarhasïndi o kastigarini jarhani imani ambe jimbo enga úpka (Is. 43:25). “Ísï eska na xáni iauani jaka nani enga uérajka jurhiata asta nani enga inchajtsïkujka”, Tata Diosï Jeobajtu ísï xáni iauani peerasïndi juchaari pekaduechani (Sal. 103:12). Engachi eratsejka na enga xáni puátspentajka Tata Diosï úsïndi eskachi agradesidu jauaka imani jingoni ka eskachi janhanharhiaka (Sal. 130:4). Tata Diosï Jeoba puákuntasïndi nemani no arhiparini na uéjki xáni no sési ambe niátani. Tata Diosï Jeoba jindeesti juchaari kueraajpiri, ima enga Leichani Peeraajka, ka Juesi ka úrasïnga iámindu ini ambe para uandani sini puákunta nemani o nómbe. w22.06 5 párr. 12-14

Tata Diosï Jeoba ambakiti ambe aiakuasti iámindu imeechani engaksï xénchajka. No ióni jimbo kʼamajkuati pʼamenchakua ambe, kómu pʼikuarherakuani ka uarhikuani (Apok. 21:​3, 4). Kaxumbitiichani engaksï imani mintsikajka, jarhuatauati parakaksï Echerini paraisu ma úntaaka (Sal. 37:​9-11). Ístu, uaati eskachi iáminduecha sánderu sési pájperaaka imani jingoni ka eska iásï. ¡Ambakiti ambeesti engachi erokuarhini jaka! Joperu, ¿andichisï seguru jaki eska Tata Diosï uaaka iámindu ambe engajtsïni aiachika? Jimboka ima méntkisï úsïnga ambe enga aiatspejka. Ka uánikua ambe jarhasti engachi jimbo uaaka mintsikani Tata Diosï Jeobani (Sal. 27:14). ¿Ka nénachi xarhatasïni eskachi mintsikasïnga imani? Engachi tsípikua jingoni ka tekaantskua jingoni erokuarhijka eska uaaka imani ambe engajtsïni aiachini jaka (Is. 55:​10, 11). Ju je no méni jurajkuni Tata Diosï Jeobani ka seguruchi jauaka eska ima “premiu íntsauaka imeechani engaksï jirinhantajka imani”. w22.06 20 párr. 1; 25 párr. 18

Jimboka Tata Diosï Jeoba jindeeska i familieri orhejtsïkuti, uaakachi seguru jarhani eska ima ísï uaaka eska na kurhakuajka iámindu familieri orhejtsïkutiichani ixú 1 Timoteu 5:8 jimbo. Engachi seguru jauaka eskajtsïni Tata Diosï Jeoba xénchasïnga juchantsïni ka juchaari familiani, mintsikaakachi eskajtsïni ima íntskuaka ambe engachi uétarhinchani jauaka (Mat. 6:​31-33). Tata Diosï uékasïndijtsïni íntskuni ambe engachi uétarhinchajka ka ísï úsïndi jimbokajtsïni xénchasïnga ka uánikua ambejtsïni íntskusïndi. Enga Echerini kueraapka, no solu úspti imani ambe enga újka eskachi tsípiti jauaka. Ístu, kánikua xénchperakua jingoni uánikua sési jásï ambe úspti parakachi úpiringa sési pʼikuarherani ka tsípikua jingoni irekani (Gén. 2:9). Ka nájkirukachi ménisï sántku ambe jatsiaka parachi nitamakuarhini, ju je diosmaiamukua arhini Tata Diosï Jeobani jimbokajtsïni jarhuataska jatsini ambe engachi uétarhinchani japka ka jimbokajtsïni seguiriini jarhasïnga íntskuni “tʼirekua engachi uétarhinchajka pauani pauani” (Mat. 6:11). Ka jatsiskachi para miáni eska ambe engajtsïni Tata Diosï Jeoba íntskuaka iásï ka sánderu orhepatini, sánderu jukaparhakua ambeeska eska ambe uéjki engachi uaaka jatsikuarheni iásï (Is. 65:​21, 22). w22.06 15 párr. 7, 8

No solu imeecha engaksï Biblieri ambe jorhenguarhijka jatsistiksï para sési jorhenguarhini Tata Diosïiri ambe, sino iáminduecha. Apostoli Pablu karaspti eska engachi uaaka ambe engachi jorhenguarhiaka, inde ambejtsïni jarhuataati parachi “úni míteni ambe enga jindeeka ambakiti ambe ka ambe enga no sésiika”. Iásï engaksï kʼuiripuecha kánikua no sési jásï ambe niátajkia, jamberi i ambe uaati eskachi kánikua úkua jukanchaaka kurhajchaani Tata Diosï Jeobaeri juramukuechani. Joperu Jesúsi úxati eskachi jorhendanhaaka Biblieri ambe parakachi seguiriuaka mintsikani Tata Diosïni. Ísï eska Jesúsi na úpka, juchajtuchi janhanharhixaka Tata Diosïiri nombrini (Juanu 17:​6, 26). Pori ejemplu, 1931 jimbo niáraskachi ísï arhinhani eska Biblia na uandajka: Jeobaeri testiguecha. Ísïchi xarhataxaka eskachi uékasïnga ísï mítekateni eska Tata Diosï na arhinhajka ka inde ambe kánikua jukaparhakuesti para jucha (Is. 43:​10-12). Ístu, Biblia Traducción del Nuevo Mundo jatsikunhantasti Tata Diosïiri nombrini jima enga jatsika para jukani Bibliarhu. w22.07 11 párr. 11, 12

Ambakiti ambe Tata Diosïiri Reinueri, ístu jindeesti jurhimbikua ambe enga Biblia jorhentpijka. Jesúsi terukutantaspti jurhimbikua Reinueri ambe, tesoru ma jingoni enga jískakata jarhajka. Uandaspti: “Auandarhu anapu Juramukua ísïisti eska jukaparhakua ambe enga jískakata japka ma solari jimbo, ka enga ma acheeti exentapka, túskuntaspti, ka xáni enga tsípini japka níntaspti ka íntspikuarhini iámindu ambe enga jatsipka para piáni imani solarini” (Mat. 13:44). Eskachi na exeka, i acheeti no jámaxapti tesoru ma jirinhantani. Joperu enga exentapka, uánikua ambe jurajkuspti para úni jatsini: íntspikuarhispti iámindu ambe enga jatsikuarhepka. ¿Andisï ísï úpi? Jimboka mítespka eska ima tesoru kánikua jukaparhakuespka. Míteskachi eska no ma ambe engajtsïni parhakpini aiachijka terukuntasïnga na engachi xáni tsípikua jingoni marhuakujka Tata Diosï Jeobani iásï ka engachi uaaka irekani para méntkisï engajtsïni Tata Diosïiri Reinu juramuchini jauakia. Sési pájperani Tata Diosïni jingoni sánderu jukaparhakua ambeesti eska ambe uéjki engachi jurajkuaka. Kʼéri kóntperata máesti imeeri amigueni. Ka kánikuajtsïni sési pʼikuastasïndi jaiapanherantani iámindu ambe jimbo engachi újka (Kol. 1:10). w22.08 15 párr. 8; 17 párr. 9, 12

¿Néna mítespi José eska para Tata Diosï ísku jándikua ambe “xáni no sési jásï” ambeeska? Ju je eranhaskani ini ambe, 200 uéxurhini kuerataxapti paraka karanhapiringa Moisésiiri Lei enga uandeenga: “Asï ísku jándikua ambe niáta” (Éx. 20:14). Joperu ambe enga mítepka José Tata Diosïiri ambe, jarhuataspti paraka ima exepiringa na enga exejka Tata Diosï ísku jándikua ambe. Pori ejemplu, seguru eska José mítespka eska Tata Diosï Jeoba úspka temungurhirikuani para acheeti ka uarhiiti ma. Ka jamberi niárapti kurhaani eska Tata Diosï tsimani xanhari úspka ambe ma para kuájchakuni Sarani, enga Joséeri bisabuelepka, jiáni engaksï tsimani reiicha imani jingoni uékeenga apondini. Enga ísï úpka jarhuataspti Sarani paraka no jurajkupiringa imeeri uámbani (Gén. 2:24; 12:​14-20; 20:​2-7). Enga José eratsentapka ini ambe, úspti kuenta íntskukuarheni ambe enga Tata Diosï sési exejka ka ambe nómbe. Jimboka xénchasïreenga Tata Diosï Jeobani, ístu kánikua jukaparharasïreendi imeeri juramukuechani ka mintsita jingoni uékasïreendi kurhajchaani. w22.08 26 párr. 1, 2

I profesia uandasïndi eskaksï kʼuiripuecha tsíntaaka. Antesichi eratsesïreenga eska inde profesia enga Daniel 12:2 uandajka, arhikuekasïreenga eskachi sánderu aianhpipiringa nájkirukajtsïni juchaari enemiguecha uékeenga pʼínguni 1918 jimbo. Peru sánderu sési, i profesia tsíntskuani arhikuekasïndi enga jimbanhi parhakpinirhu úkuarhiaka. ¿Andichisï ísï uandajki? Jimboka Job 17:16 ístu uandasïnga ʻtʼupuriniʼ ka ini tekstuni jimbo Tumbanisï arhikuekajti. Ísï jimbo, Daniel 12:2 meru uarhiriicheeri tsíntskueri ambesï uandani jati ka inde ambe jiáni úkuarhiati engaksï últimu jurhiatikuecha na nitamaakia ka ístu Armajedoni. Peru, ¿ambe arhikuekasïni Daniel 12:2 enga uandajka eskaksï máru tsíntaaka paraksï “jatsini tsípikua para méntkisï”? I ambe arhikuekasïndi eska imani 1,000 uéxurhini jimbo, imeecha engaksï tsíntaaka ka niáranksï míteni oksï seguiriini jarhani míteni Tata Diosï Jeobani ka Jesúsini ka kurhajchaanksï, intsïnhaatiksï tsípikua para méntkisï (Juanu 17:3). w22.09 21, 22 párr. 6, 7

I ambe no arhikuekasïndi eska Tata Diosï Jeoba uékasïnga eskachi jirejiresï mintsikauaka máteruechani. Sánderu sési, erokuarhisïndi eskachi mintsikauaka jimbokaksï xarhataskia eskaksï mintsinharhikueska. Tiempu uétarhisïndi parachi úni mintsikaani erachiichani. ¿Ambejtsï uaa úni parajtsï úni mintsikaani máteruechani? Sési mítea je. Uandontskuarhi je imeecha jingoni tánguarhikuecharhu. Márku aianhpi je. Tekaakuanta je ka jurajku je eskaksïni xarhatacheaka eskajtsï uaaka mintsikaani. Engajtsï nótki sési mítejka nemani, jamberijtsï ueenani nójtsï xáni aiangukuarhiaka ambe ma, peru engajtsï sánderu míteni jauakia, sánderu fásiliuati aiangukuarhini na engajtsï pʼikuarherajka (Luk. 16:10). Peru, ¿ambejtsï uaa úni engajtsï nóteru mintsikajkia erachini ma? Asï sóntku eratsi je jarharini, jurajku je eska tiempu nitamaaka. Ka asï jurajku je eska ambe engaksï máru újka, uaaka eskajtsï nóteru mintsikauakia máteruechani. w22.09 4 párr. 7, 8

Orhejtsïkuti ma enga Miqueas arhinhajka, ma xanhari ísï pʼikuarheraspti enajkiksï máru orhejtsïkutiicha no káni sési kámapi. Nájkiruka indeni ambe nitamakuarhini japka, ima méntkisï sési eratsentaspti iámindu ambe ka jánguarhintaspti no xáni no sési pʼikuarherani. Kánikua kómarhisïreendi Tata Diosï Jeobani paraka íntskupiringa imeeri espiritu santuni ka uinhapikua para úni tekaantani. Ístu, jirinhantaspti informasioni juchaari publikasionicharhu. ¿Ambejtsïni jorhendasïni inde ambe? Engachi eratsejka eskajtsïni kúnguarhikuarhu anapu ma erachi o pirenchi ma no sési kámaska, ju je no uandanhiani ka ju je jánguarhintani no no sési ambe eratseni. Jamberijtsïni ísï kámati ambe ma jimbo engachi jucha no míteka. Ísï jimbo, ju je aiangukuarhini iámindu ambe Tata Diosïni ka arhini eskajtsïni jarhuataaka ísï exeni ambe ma eska ima erachi na exejka. Ka ju je eratseni eskajtsïni erachi no uékaparinisï ísï kámaska ka ju je puákuntani (Prov. 19:11). Ju je miáni eska Tata Diosï Jeoba iámindu ambe exexaka ka eskajtsïni íntskuaka uinhapikua parachi úni tekaantani (Ecl. 5:8). w22.11 21 párr. 5

Imani amiguechani erakua engaksï xénchajka Tata Diosï Jeobani. Chiiti amiguechaksïni uaati kánikua jarhuatani parari sánderu sési marhuakuni Tata Diosïni (Prov. 13:20). Erachi ma enga Julien arhinhajka ka enga iásï orhejtsïkutiikia, miásïndi: “Engani sánderu sapichuepka, niáraspka sési pájperani imeecha jingoni engani jingoni uéreenga aianhpini. Imeechaksï tsípikua jingoni aianhpisïreendi ka jarhuatasptijtsïni exeni eska ma úsïnga tsípikua jingoni aianhpini. Ka kuenta íntskukuarhespka eskani ambakiti ambe tsïtakuarhixapka, sési pájperani máteruechani jingoni ka solu imeecha jingoni engaksï májkueni jatiripka eskani ji”. Ka engari exeska eska kúnguarhikuarhu jarhaska nema engakeni úpiringa támisï páni, ¿amberi uaa úni? Apostoli Pablu mítespti eska primeru siglurhu anapu kúnguarhikuarhu jarhaspkaksï kʼuiripuecha engaksï no xáni sési pájpereenga Tata Diosï Jeoba jingoni. Jimbosï arhipti Timoteuni eska no jámapiringa imeechani kúrhiani (2 Tim. 2:​20-22). Kánikua jukaparhakuesti sési pájperani juchaari Taati auandarhu anapu jingoni, ka jimbokachi kánikua jánguarhintasïnga ísï úni, nóchi uékasïnga eska nema uaaka eskachi nóteru sési pájperaakia imani jingoni. w22.08 5, 6 párr. 13-15

Juchachi no ísïiska eska imeecha engaksï no sáni jaiapanheantajka Tata Diosïiri konsejuechani. Sánderu sési, jánguarhintasïngachi tsitini ísï eratseni eska Tata Diosï ka ístu tsitiani imeeri juramukuechani. Engachi eratsentaska na enga nikuajka imeechani engaksï kurhandirajka ka ístu imeechani engaksï no kurhandirajka, sánderuchi uékasïnga ísï úni eskajtsïni Tata Diosï Jeoba na arhijka. Úsïngachi exeni eska imeecha engaksï no jiókuarhiajka Tata Diosï Jeobaeri ambakiti konsejuechani, uánikua uandanhiateechanksï jatsiasïnga. Joperu juchachi sési irekasïnga jimbokachi kurhajchasïnga Tata Diosïni (Sal. 32:​8, 10). Tata Diosï Jeoba iáminduechani íntsaasïndi imeeri ambakiti konsejuechani, peru no afuersa úsïndi eskaksï kʼuiripuecha kurhajchauaka. Peru kʼóru aianguasïndi na enga nikuauaka engaksï no jiókuarhiaska (Prov. 1:​29-32). Imeecha “nóksï sési nitamakuarhiati imeecheeri jángua jimbo”. Ka iichaksï sánderu orhepatini uandanhiateechanksï jatsiauati ka no sésiksï nitamakuarhiati ka últimu kʼamajkunhaatiksï. Joperu imeecha engaksï jiókuarhiajka Tata Diosï Jeobaeri ambakiti konsejuechani ka ísïksï úni, i ambeksï aiaminhasïndi: “Ima engareni kurhajchajka no chéparini irekaati, pínandikua jingoni irekaati nájkiruka uaaka no sési nitamakuarhini” (Prov. 1:33). w22.10 21 párr. 11-13

Janhanharhini Tata Diosï Jeobani arhikuekasïndi eskachi no uékasïnga imani ambe úni enga ima no jaiapanhentajka (Prov. 16:6). Jimbochisï seguirijka jánguarhintani kurhajchaani Tata Diosïiri juramukuechani engaksï Bibliarhu jaka engaksï uandajka ambe enga sési jaka ka ambe enga no sési jaka (2 Kor. 7:1). Engachi imani ambe úska enga Tata Diosï Jeoba jaiapanhentajka ka nóchi úni imani ambe enga kurhunhijka, uaakachi tsípikua jingoni irekani (Sal. 37:27; 97:10; Rom. 12:9). Jamberi nema míteti eska Tata Diosï Jeoba jatsiska juramukua para uandani ambe enga sési jaka ka ambe enga no sési jaka. Peru ístu, uétarhisïndi eska kurhajchauaka Tata Diosïiri juramukuechani (Rom. 12:2). Juchaari jángua jingoni uaakachi xarhatani sinchi meru exesïni eska kurhajchaani Tata Diosï Jeobaeri juramukuechani marhuasïnga parajtsïni sési nicheni (Prov. 12:28). Dabidi jakajkusïreendi eska inde ambe meru ísïispka, jimboka arhispka Tata Diosï Jeobani: “Jorhendasïngarini imani ambe úni enga tsípikuarhu pájpejka. Jima enga tʼu jaka kánikua sési p’ikuarherakuarhisïndi; chiiti jurhijkandani ladu jimbo kánikua sési pʼikuarherakuarhiati para méntkisï” (Sal. 16:11). w22.10 8 párr. 9, 10

Jesúsi méntkisï kaxumbikua jingoni jámasïreendi ka no kʼéri ambe exekuarhisïreendi. Ante de jurhani parhakpinirhu, uánikua sési jásï ambe úspti para Tata Diosïni marhuakuni. Kolosasi 1:16 uandasïndi eska ‘iámindu ambe imani jimbo kueraanhaska enga auandarhu jaka ka echerirhuʼ. Jamberi, jiáni enga Jesúsi itsï atakuarhipka miántapti ambe enga xáni úpka enga imeeri Taati jingoni japka auandarhu (Mat. 3:16; Juanu 17:5). Joperu no kʼéramakuarhispti indeni ambe jimbo ka no méni sánderu kʼéri pʼikuarheraspti eska máteruecha. Arhiaspti imeeri chúxapatiichani eska no jurhaspka parhakpinirhu “para marhuaminhani sino para marhuatspini ka íntspini imeeri tsípikuani para uánikuechani euajpiantani” (Mat. 20:28). Ístu uandaspti eska ima no jandiajku pʼitsikuarhiparini úsïreenga ambe ma. ¡Xáni enga kaxumbitiipka Jesúsi! ¿A no eskachi juchajtu májkueni uékasïnga jámani eska ima? w22.05 24 párr. 13

Para míteni sini uaa puákuntani nemani, Tata Diosï Jeoba exesïni sini ima enga no sési niátapka míteparini ísï úxapka. Jesúsi uandaspti eska ísïiska i ambe (Luk. 12:​47, 48) Enga kʼuiripu ma míteparini újka ambe ma enga Tata Diosï no jaiapanhentajka, kʼéri pekadu ma úni jarhasïndi. Ka Tata Diosï Jeoba úpirindi no puákuntani ini kʼuiripuni (Mar. 3:29; Juanu 9:41). Jiájkani, ¿Tata Diosï Jeoba nóteru méni puákuntaa? Jo. Jimboka Tata Diosï Jeoba ístu exesïndi sini ima enga no sési ambe niátaka mintsita jingoni móantaskia. I ambe arhikuekasïndi eska jatsiska para ménderueni jámania, ménderueni eratseni o imani ambe úni enga sési jaka. Ístu, kʼuiripu enga móantajka kánikua no sési pʼikuarherasïndi imani ambe jimbo enga úpka o jimboka no úspka ambe enga jatsipka para úni. Ka ísï pʼikuarherasïndi no solu jimboka no sési úspka, sino ístu jimboka nóteru sési jarhaspkia Tata Diosï Jeoba jingoni ka inde ambe úspti eska no sési ambe niátapiringa. w22.06 5, 6 párr. 15-17

Imeecha engajtsïni no xénchajka chkuanderakuechani etsakuasïndi erachiicheeri engaksï responsabilidadichani jatsiaka Tata Diosïiri kúnguarhikuarhu (Sal. 31:13). Máru erachiichaksï ónhanhaxati jimbokaksï arhiasïnga eskaksï no sési úxaka. Primeru siglurhu májkueni ambe úkuarhispti. Apostoli Pablu arhinhaspti eska no sési úxapka ka ónhasptiksï nájkiruka no no sési ambe ueenga. Enga apostoli Pablu ónhakata japka Roma, máru kristianuechaksï jurajkuspti (2 Tim. 1:​8, 15). Pablu kánikua no sési pʼikuarherapti ini ambe jimbo. Ima kánikua tekaantaspti ka sáno uarhisïreendia imeechani jimbo (Úku. 20:​18-21; 2 Kor. 1:8). Ju je no méni ísïini eska ima kristianuecha engaksï Pabluni jurajkupka. Ísï jimbo nójtsïni ísku pakatasïndi enga Satanási uéjka no sési kaani imani erachiichani engaksï responsabilidadi ambe jatsika. Satanási uékasïndi eskaksï imeecha jurajkuaka Tata Diosï Jeobani ka uékasïndijtsïni chérani (1 Ped. 5:8). Seguirii je jarhuataani ka no méni jurajkuani erachiichani engaksï responsabilidadichani jatsiaka (2 Tim. 1:​16-18). w22.11 16, 17 párr. 8-11

Jamberi judiuepti ima no sési úri enga móantapka jiáni enga Jesúsiiri máekandu cháparhakata japka. Judiuechaksï májku Tata Diosïni kómarhisïreendi, joperu máteru nasionirhu anapu kʼuiripuechaksï uánikua diosïichani kómarhiasïreendi (Éx. 20:​2, 3; 1 Kor. 8:​5, 6). Enga i no sési úri no judiuepiringa, ísï kurhamarhipirindi: “¿Andi nóri sáni chénharhiasïni diosïichani?”. Ístu, Jesúsi no axanhaspti para nasionirhu anapu kʼuiripuechani jirinhantaani “sino solu Israeli anapu karichiichani engaksï tsïnchetini ja[p]ka” (Mat. 15:24). Ka Tata Diosï aianguaspti israeliteechani eska ima tsítantaapiringa uarhiriichani. Ísï jimbo, ima no sési úri enga móantapka mítepti indeni ambe ka ambe enga uandapka xarhataspti eska kurhangusïreenga eska Tata Diosï Jeoba tsítantapiringa Jesúsini para juramuni Tata Diosïiri Reinurhu. Péringa inde acheeti ístu mintsikeenga eska Tata Diosï imantu tsítantapiringa. Enga ima no sési úri enga móantapka judiuepka, mítespti Paraisueri ambe, nani enga Tata Diosï Jeoba irestaapka Adáni ka Ebani. Ísï jimbo, ima eratsepti eska Paraisu enga Jesúsi uandapka sési jásï jardini máepiringa ixú Echerirhu (Gén. 2:15). w22.12 8, 9 párr. 2, 3

Juchachi no úpiringa aianhpini engajtsïni espiritu santu no jarhuatapiringa. ¿Andichisï ísï uandajki? Jimbokajtsïni Satanásisï no jurajkujka parachi aianhpini (Apok. 12:17). Para kʼuiripuecha úpirindi ísï xarharani eska Satanási kánikua uinhapikua jatsiska ka eskachi jucha no uaaka imani jingoni. Joperuchi andaxaka jimbokachi úxaka aianhpini (Apok. 12:​9-11). Engachi uérajka aianhpini, xarhatasïngachi eskajtsïni Satanási no chérasïnga. Méntkisï engachi aianhpijka Satanási tsïtani jarhasïndi. Ísï jimbo, engachi úni jaka aianhpini nájkirukachi no jurajkunhajka, xarharasïndi eskajtsïni espiritu santu jarhuataxaka ka eskajtsïni Tata Diosï Jeoba jaiapanhentasïnga (Mat. 5:​10-12; 1 Ped. 4:14). Espiritu santujtsïni uaati jarhuatani parachi úni orhepani uérakuni náki uéjki ójkutakua ma engajtsïni no jurajkuaka parachi seguiriini aianhpini (2 Kor. 4:​7-9). Jiájkani, ¿ambechi jatsiski para úni parakajtsïni Tata Diosï seguiriuaka íntskuni imeeri espirituni? Méntku úndani jarhani kurhakuni ka seguru jarhani eskajtsïni Tata Diosï Jeoba kurhajchaaka. w22.11 5 párr. 10, 11

Ambe engachi uaaka úni parachi xarhatani eskachi xénchaasïnga juchaari erachiichani, jindeesti jánguarhintani sési pájperani imeecha jingoni. Jánguarhintasïngachi ísï puátspentani eska Tata Diosï Jeoba na újka. Pori ejemplu, ju je eratsentani ini ambe: Enga Tata Diosï jurajkuka eska imeeri Uájpa uarhipiringa juchaari pekaduechani jimbo, ¿nóchi jatsipirini para sóntku puákuantani juchaari erachiichani engajtsïni úchiaka ambe ma? Juchachi no uékasïnga ísïini eska ima jántspiri enga xáni no noambakepka enga Jesúsi uandapka imeeri ejemplurhu ma. Imeeri patroni puákuntaspti enga ima kánikua sentabu kánguni japka, peru ima no puákuntaspti máteru jántspirini enga no xáni kánikua sentabu kánguni japka (Mat. 18:​23-35). Jiájkani, enga chá arhirperaka erachi ma jingoni, ¿andijtsïsï no chá ueenajki úni ambe ma parajtsï sési pájperantani imani jingoni ante de Miántskua úkuarhini? (Mat. 5:​23, 24). Engajtsï ísï úska, xarhatani jauakajtsï eskajtsï kánikua xénchasïnga Tata Diosï Jeobani ka Jesúsini. w23.01 29 párr. 8, 9

Ma ambe jimbo engaksï orhejtsïkutiicha uaaka míteni ambe engaksï erachiicha uétarhinchajka, jindeesti kurhamarhikuechani úkuani enga no no sési pʼikuastauaka (Prov. 20:5). Pori ejemplu, orhejtsïkutiichaksï uaati kurhamarhikuarhini: ¿Erachiichaksï jatsiski ambe engaksï uétarhinchajka komu tʼirekua o medisina ambe? ¿Úpirinksï tsïtani imeecheri ánchikuarhitani o kʼumanchikuani? ¿Uétarhinchasïnksï eskachi jarhuatauaka paraksï kurhajkuarhini jarhuajperata ambe enga Gobiernu íntspijka? Tata Diosï Jeoba iáminduechantsïni kurhachesïndi eskachi uinhaperantauaka ka eskachi jarhuatauaka máteruechani (Gal. 6:10). Asta sapichu ambe jingoni uaakachi xarhatakuni imani enga pʼamenchani jaka eskachi xénchasïnga ka inde ambe kánikua uinhaperantaati. Sapiichaksï úpirindi tarjeta ma karakuni o dibujitu ma úkuni erachini ma para uinhaperantani. Tumbiichaksï úpirindi aiakukuarheni para ánchperata ambe úkuni o para ambe ma piákuni pirenchini ma. Máteruechaksï úpirindi tʼirekua ambe úntani para nema enga pʼamenchani jaka. Ísï jimboksïsï máru erachiicha noteechani ambe karakuajti paraksï agradeserikuani. Kánikua sési jarhasti engachi iáminduecha jánguarhintajka ísï úni eska na uandajka i Bibliarhu anapu konseju: Seguirii je “uinhaperperantani máteru ka máteruni jingoni” (1 Tes. 5:11). w22.12 22 párr. 2; 23 párr. 5, 6

Nájkirukaksï saduseuecha sési míteapka orheta sinko libruecha Karakata Ebreaecheeri, nóksï jakajkusïreendi jurhimbikua ambe engaksï indeni libruecha jimbo jaka engaksï Tata Diosïni jimboeka. Pori ejemplu, eratsenta je ambe enga Jesúsi arhiapka saduseuechani engaksï imeecha tsíntskueri ambe kurhamarhipka. Jesúsi kurhamarhiaspti: “¿Nójtsï méni arhintaski Moisésiiri libruni jimbo na enga Diosï uandajpapka Moisésini sïtunirhu ka arhini: ‘Ji jindeeska Diosï Abraániiri ka Diosï Isaakiiri ka Diosï Jakobueri’?” (Mar. 12:​18, 26). Seguru eskaksï saduseuecha uánikua xanhari arhintapkia indeni ambe, peru ambe enga Jesúsi kurhamarhiapka xarhataspti eskaksï no jakajkusïreenga jurhimbikua ambe enga Biblia jorhentpijka tsíntskueri ambe (Luk. 20:38). ¿Ambechi uaa jorhenguarhini ima ambeeri enga Jesúsi arhiapka saduseuechani? Eska engachi Bibliani arhintaaka, jatsiskachi para exeni ambe engachi uaaka jorhenguarhini Biblieri bersikulueri ma o istorieri ma. Nóchi solu uékasïnga kurhanguni ima ambe enga fásiliika sino ístu jukaparhakua ambe jorhenguarhini ka prinsipiuechani engaksï Bibliarhu jískakata jaka. w23.02 11 párr. 9, 10

I kʼuiripuecha enga iásï anapu tekstu uandajka eskaksï uandantaska ambe engaksï exeka ka kurhandini, kánikuaksï no sési nitamakuarhispti, joperu iáminduksï niáraspti méntkisï marhuakuni Tata Diosï Jeobani asta uarhikuarhu jamberi (Ebr. 11:​36-40). ¿Marhuaspi engaksï xáni jánguarhintapka ka no kuatantani? Jo, kánikua marhuaspti. Ísïisti, nóksï niáraspti exeni iámu ambe enga Tata Diosï aiatspipka eska úkuarhipiringa, peruksï méntkisï mintsinharhispti imani. Ka seguruksï jarhaspti eska Tata Diosï Jeoba jaiapanhentasïreenga ka eskaksï niárapiringa exeni iámu ambe enga Tata Diosï aiatspeni jaka (Ebr. 11:​4, 5). Eratsentani imeecheri ejempluni uinhapikuajtsïni íntskusïndi parachi méntkisï mintsinharhini Tata Diosï Jeobani. Parhakpini pauani pauani sánderu no sési jánhaskuarhixati (2 Tim. 3:13). Ka Satanási seguirixati tsʼéjkuani Tata Diosïiri marhuariichani. Ambe uéjki úkuarhini sánderu orhepani, seguiriuakachi mintsita jingoni marhuakuni Tata Diosï Jeobani jimbokachi mintsikasïnga Tata “Diosïni enga tsípitiika” (1 Tim. 4:10). w22.06 25 párr. 17, 18

Ambe ma engachi jimbo uéjka kuidarikuarhini parachi no xáni pʼamenchani, jindeesti jimbokachi uékasïnga sánderu ambakiti ambe íntskuni Tata Diosï Jeobani (Mar. 12:30). Ísï jimbo, nóchi úsïnga imani ambe engachi jucha míteka eskajtsïni no sési úchiaka (Rom. 12:1). Ísïisti, nájkirukachi kánikua jánguarhintaaka, ménisïchi niáraaka pʼamenchani. Joperuchi jánguarhintasïnga xáni eskachi xáni uaaka parachi no xáni pʼamenchani, jimbokachi uékasïnga xarhatakuni juchaari Taati auandarhu anapuni eskachi kánikua agradesidu jarhaska jimbokajtsïni íntskuska tsípikua. Engachi kánikua jatiriikia ochi pʼamenchani jarhani, jamberichi nóteru uaakia úni imani ambe engachi antesi ueenga ka jamberi inde ambe uaati eskachi no sési pʼikuarheraaka ka kómu pʼikuarherani. Joperuchi jatsiska parachi seguiriini jánguarhintani kuidarikuarhini parachi no xáni pʼamenchani. ¿Andi? Jimboka nájkirukachi jatiriuakia ochi pʼamenchani jarhani, útasïchi úsïnga kʼéri ambe arhini Tata Diosï Jeobani májkueni eska rei Dabidi. Ka kánikuajtsïni sési pʼikuastasïndi míteni eskajtsïni juchaari Tata Diosï xénchasïnga ka eskajtsïni jukaparharasïnga nájkirukachi no perfektueka (Mat. 10:​29-31). Ka nájkirukachi niáraaka uarhini, imajtsïni aiachisïndi eskajtsïni tsítantaaka (Job 14:​14, 15). Ísï jimbo, engachi jamberi tsípiti jauaka jatsiskachi para kuidarikuarhini parachi no xáni pʼamenchani ka kuájchakuni juchaari tsípikuani. w23.02 20, 21 párr. 3-5

¿Seguiriuaksï karakata jarhani uánikua kʼuiripuecheeri nombriicha engaksï na tsípiti pakaraakia Armajedonirhu? Jo (Apok. 7:14). Jesúsi uandaspti eskaksï i kʼuiripuecha engaksï ísïika komueska karichiicha, intsïnhaakaksï “tsípikua para méntkisï” (Mat. 25:46). Peru imeecha engaksï tsípiti pakaraaka Armajedonirhu, nóksï jirejiresï intsïnhaati tsípikua para méntkisï. Enga Jesúsi Juramuni jauaka Mili Uéxurhini, kuidariuauati ini kʼuiripuechani ka páuati jima enga itsï tsípikueri uérajka. Imeecha engaksï kurhajchaaka tata Jesukristuni ka xarhatanksï eskaksï no méni jurajkuaka Tata Diosïni, imeecheri nombriichaksï karanhaati para méntkisï libru tsípikuerirhu (Apok. 7:​16, 17). Joperu chibuechaksï, Armajedonirhu kʼamajkunhaati. Jesúsi uandaspti eskaksï ʻi kʼuiripuecha méntku kʼamajkunhaakaʼ (Mat. 25:46). Ka Tata Diosïiri jarhuajperata jingoni, apostoli Pablujtu uandaspti eskaksï kastigarinhaaka “paraksï méntkisï tsïncheni [o kʼamajkunhani]” (2 Tes. 1:9; 2 Ped. 2:9). w22.09 16 párr. 7, 8

Ambe enga xáni kueraaka Tata Diosï Jeoba, úsïndi eskaksï familiecha sési pʼikuarheraaka ka eskaksï tsípikuarhiaka. Inde ambe úsïndi eskaksï familiecha sánderu májku kʼéri jauaka. Tata Diosï Jeoba sési járhati lugariichani kuerauasti, nani engachi uaaka úni ambe engachi tsitijka. Uánikua familiechaksï kánikua tsitisïndi parkerhisï nirani, juátarhisï o plaiarhu. Jimbanhi parhakpinirhu, taatiicha ka sapiichaksï uaati kánikua tsípikuarhini imani ambe jingoni enga Tata Diosï Jeoba kueraaka. Nóteruchi chérhiauakia animaliichani ka nijtujtsïni ima chérhia juchantsïni (Is. 11:​6-9). Kánikuachi tiempu jatsiaka parachi tsípikuarhini imani ambe jingoni enga Tata Diosï Jeoba kueraaka (Sal. 22:26). Peru taatiicha, asï erokuarhi je astaka niáraka ima jurhiatikua parajtsï jarhuataani chaari sapiichani kueraakatani exeni ka eratsentani ambe engaksï uaaka jorhenguarhini indeeri ambe. Engajtsï desde iásï úraska kueraakata ambe parajtsï jorhendaani chaari sapiichani Tata Diosï Jeobaeri ambe, seguru eskaksï imeecha májkueni uandaaka eska rei Dabidi. Ima uandaspti eska ʻno nema jarhaska enga ísïika eska Tata Diosï Jeobaʼ ka eska no nema úsïnga ʻúni ambe enga ima újkaʼ (Sal. 86:8). w23.03 25 párr. 16, 17