Oktubri

Iáminduechachi uaaka jarhuajpeni tánguarhikuecharhu engachi pireska ka engachi komentariska. Máru erachiichaksï úkua jukanchasïndi pireni ka komentarini tánguarhikuecharhu. ¿Chájtu májkueni úkuarhinchasïni? Jiájkani, jorhenguarhi je ambe enga jarhuataakia máteruechani paraksï nóteru chénia. Máruksï exesti eska para úni pireni, kánikua jarhuajpesïnga tsípikua jingoni pireni. Miá je eska ma ambe enga sánderu jukaparhakueka engachi jimbo pirejka, jindeeska parachi kʼéri ambe arhini Tata Diosï Jeobani. Ísï jimbo, engajtsï prepararikuarhini jauaka para tánguarhikuecha, ístu prepararikuarhi je pirekuecha jingoni ka jánguarhinta je exeni na enga terukuntajka ambe enga arhijka pirekua imani ambe jingoni engajtsï jorhenguarhini jauaka tánguarhikuarhu. Ístu, jánguarhinta je jingontku jarhani ambe enga arhijka pirekua ka no na engajtsï pirejka. Máru erachiichaksï úkua jukanchasïndi komentarini. ¿Ambeksïni uaa jarhuatani? Jánguarhintani sánderu someni ísï úni. Miá je eska sési jarhaska engajtsï mókuntaaka ambe enga kurhamarhikua uandajka ka no kánikua ambe uandani. Tata Diosï Jeoba kánikua jukaparharasïndi engachi komentarijka. w22.04 7, 8 párr. 12-15

Uandakua enga ísï tradusirikuarhijka “jarhuajpiri”, imani kʼuiripuni arhikuekasïndi enga uiriipajka jarhuatani nemani enga jarhuajperata kurhajkuarhini jarhajka. Eranhaska je Tata Diosï Jeobani uiriipani jarhani para jarhuatani nemani enga kʼéri uandanhiata ma jatsika. I ambe xarhatasïndi eskajtsïni Tata Diosï Jeoba no solu uékasïnga jarhuatani sino eska iámu imeeri mintsita jingoni uékasïnga ísï úni. Enga Tata Diosï Jeoba juchantsïni jingoni jauaka, uaakachi tekaantani tsʼéjkukuechani ka seguiriini tsípikua jingoni irekani. ¿Nénajtsïni jarhuatasïni Tata Diosï Jeoba? Libru de Isaías jimbochi exentasïnga mókuntskuani. Uánikua profesiecha enga Isaíasi karaaka Tata Diosïni jimbo ambakiti ambeksï uandasïndi para iásï anapu Tata Diosïiri marhuariicha. Ístu, uánikua uelta Isaíasi uandasïndi na enga jásïika Tata Diosï Jeoba, uandakuechani úrapariani engaksï no úkua jukaka para kurhanguni. Pori ejemplu, kapitulu 30 jimbo, sési jásï ambe jingoni terukutantasïndi para xarhatani na enga Tata Diosï Jeoba jarhuatajka imeeri iretani. Jima uandasïndi eska Tata Diosï Jeoba 1) kurhauasïnga ka mókuantani juchaari kómarhikuechani, 2) eskajtsïni arhistachisïnga ka 3) eskajtsïni újchakurasïnga iásï ka sánderu orhepatini. w22.11 8 párr. 2, 3

Jesúsi arhiaspti Esmirna ka Filadelfia anapu kúnguarhikuecha eskaksï no jámapiringa chéni engaksï no sési kánhani japiringa, jimboka Tata Diosï Jeoba kóndeantapiringa engaksï no méni jurajkupiringa (Apok. 3:10). Ju je eratsetini jarhani eskachi no sési kánhaaka ka eskachi jatsiska para preparadu jarhani para úni tekaantani (Mat. 24:​9, 13; 2 Kor. 12:10). Libru Apokalipsisi arhisïndijtsïni eska “Tateeri jurhiatikua” jimbo, engaksï jindeeka i jurhiatikuecha engachi irekani jaka, Tata Diosïiri marhuariicha no sési kánhapiringa (Apok. 1:10). Apokalipsisi kapitulu 12 uandasïndi eska enga Jesúsi Rei únhapkia Tata Diosïiri Reinurhu, guerra ma úkuarhispka auandarhu. Migueli, enga tata Jesukristueka ka imeeri ánjeliichaksï uarhiperaspti Satanási ka imeeri demoniuecha jingoni (Apok. 12:​7, 8). Peru íksï Tata Diosïiri ikiatspitiicha nóksï andaspti ka Echerirhuksï kʼuanijpanhaspti ka úxatiksï eskaksï kʼuiripuecha kánikua no sési nitamakuarhiaka (Apok. 12:​9, 12). w22.05 5 párr. 12, 13

Tata Diosï Jeoba méntkisï jurhimbikua jingoni úsïndi ambe ma. Ima iáminduechani májkueni kaasïndi. Enga Tata Diosï puákuntajka nemani no méni exesïndi na enga jáxeka ima kʼuiripu, sini jatsikuarheriski, kʼéri ambeeni o jimboka jorhenaska úni ambe ma (1 Sam. 16:7; Sant. 2:​1-4). Tata Diosï Jeobani no nema úsïndi afuersa úrani ambe ma nijtu maiamuni paraka uaaka ambe ma. Ima no méni úsïndi ambe ma ikiatapu jimbo o jimboka jukari pʼamojkuni jauaka nemani (Éx. 34:7). Ísïisti, Tata Diosï Jeoba jindeesti sánderu ambakiti Juesi enga jaka jimboka ima sési mítetixaka na engachi jásï kʼuiripueka ka ambe engachi nitamakuarhini jarhajka (Deut. 32:4). Imeecha engaksï karapka Karakata Ebreuechani, mítesptiksï eska no nema jarhaska enga ísï puátspentajka eska Tata Diosï Jeoba. Karakata ma uandasïndi eskaksï ménichani úraspka uandakua ma enga ebreu jimbo jiájkani úrakuarhienga enga Tata Diosï puákunteenga pekadorini ma. Ístu uandasïndi eska i uandakua no méni úrakuarhesïreenga jiáni enga kʼuiripu ma puákunteenga máteruni. Solu Tata Diosï Jeoba úsïndi meru puákuntani pekadorini ma enga sési jimbo móantajka. w22.06 4 párr. 10, 11

Enga chá jandiajku tʼarhexeraani jaka chaari sapiicha o chaari acheeti no marhuakuni jarhani Tata Diosï Jeobani, uaakajtsï seguru jarhani eska chaari ejemplu kánikua uinhaperaantasïnga ka jarhuataani máteruechani. ¿Ka ambejtsï uaa úni engajtsï ísï exejka eska chaari sapi no ísï úxaka eskajtsï na jorhendani jaka? Miá je eska paraka sapi ma sési jorhenguarhiaka, tiempu uétarhisïnga. Enga chá jatsintajka semiia ma, jamberijtsï kurhamarhikuarhijka sini niáraa andarani planta ma enga fruta jukaaka. Nájkirukajtsï no mítejka ambe enga úkuarhiaka, seguirisïngajtsï itsï jatsikuni paraka uaaka kʼéni ka sési jarhani (Mar. 4:​26-29). Naandicha, jamberijtsï chájtu kurhamarhikuarhijka sini mintsitarhu niárakuni jaki chaari sapini ambe engajtsï jorhendani jaka. Ísïisti, chájtsï no uaaka míteni ambe enga úkuarhiaka tátsekua, joperu engajtsï seguirini jauaka jánguarhintani parajtsï sési jorhendani, ima uaati Tata Diosïiri amigueni. w22.04 19, 20 párr. 16, 17

Enga Salomóni sési marhuakuni japka Tata Diosï Jeobani, sésku exekuarhisïreendi. Enga tumbiipka ka enga ueenani japka juramuni, ma xanhari exespti eska uánikua ambe no úsïreenga úni ka kurhakuspti Tata Diosïni eska jarhuatapiringa (1 Rey. 3:​7-9). Ístu, sési mítespti eska no sési jarhaspka eska ma niárapiringa kʼéramakuarhini. Xáni no sési enga tátsekua mirikurhiapka ini uandakuechani. Enga ióni sáni páni japkia juramuni, niáraspti kʼéramakuarhini ka nóteru kurhajchasptia Tata Diosïiri juramukuechani. Pori ejemplu, Lei arini ambe juramukuasïreendi rei ebreuechani: “Ístu no jatsisti para uánikua témbeechani jatsiani paraka imeeri mintsita no támisï niuaka” (Deut. 17:17). Peru Salomóni no kurhajchaspti ini leini ka 700 témbeechani jatsiaspti ka 300 uarhiitiichani (1 Rey. 11:​1-3). Jamberi eratsepti eska iámu ambe sési jarhaspka. Joperu tátsekua kánikua no sési úkuarhinchaspti jimboka jurajkuspka Tata Diosï Jeobani (1 Rey. 11:​9-13). w22.05 23 párr. 12

Ini jurhiatikuecha jimbo, iáminduechachi jatsiska para erakuni sinchi Jeobani apoiariua enga meru juramutika auandarhu ka echerirhu, ochi Satanásini jingoni úkuarhia enga Tata Diosïiri ikiatspitika. Jatsiakachi para meru erakuni ambechi uaa jimboka ixú xarharaaka sinchi jatsia tsípikua para méntkisï o nómbe (Mat. 25:​31-33, 46). Enga kʼéri mískuarhita úkuarhini jauakia, Tata Diosïiri marhuaricha engaksï no méni jurajkuaka imani, markaksï ma jatsikunhaati paraksï úni tsípiti pakarani (Apok. 7:14; Ezeq. 9:​4, 6). Ka ima kʼuiripuecha engaksï animaliiri marka jukaaka, kʼamajkunhaatiksï (Apok. 14:​9-11). Engajtsï chá apoiarini jakaia Tata Diosï Jeobaeri Reinuni, kánikuajtsï sési úxaka. Seguru eskajtsï uékani jaka jarhuataani máteruechani parakaksï májkueni uaaka. Uánikua kóntperatechaksï jatsiauati imeecha engaksï apoiariuaka Tata Diosï Jeobaeri juramukuani. Ísï jimbo, kánikua sési jauati eskachi exeauaka ini jorhentperakuechani engaksï xáni jukaparhakueka jimbokajtsïni jarhuataaka parachi eratsetini jarhani seguirini marhuakuni Jeobani. Ístuchi uaaka úrani indeni ambe engachi jorhenguarhikia parachi jarhuataani máteruechani parakaksï imajtu májkueni sési eratseaka ka nóksï jámani jurajkuni Tata Diosï Jeobani. w22.05 15 párr. 1, 2

Jatsiskachi para kurhajchani Tata Diosï Jeobani ka no juchaari ikiatspitiichani. Jobu jingontku kurhaaspti enga Tata Diosï uandontskuarhekuni japka. Para jarhuatani kurhanguni ambe ma, ima sáno ísï arhispti Jobuni: “Ji, jingontku exexaka iámu ambe engari nitamakuarhika. ¿Eratsesïniri eskakeni no uaaka kuidarini?”. Kaxumbikua jingoni ka kánikua sési pʼikuarheraparini jimboka Tata Diosï sési kámpisïnga, Jobu mókukuspti: “Juchiiti kutsïkuecha jingoni kurhaaspka chiiti ambe, peru iásïkini exexaka juchiiti éskuecha jingoni” (Job 42:5). Enga Jobu i ambe uandapka jamberi útasï uaxakatini japti tʼupuri jápurhu ka imeeri kuerpu iámu pisïrikuarhetixapti. Peru enga i ambe nitamakuarhini japka, Tata Diosï Jeoba arhispti Jobuni eska xénchasïreenga ka eska jaiapanhentasïreenga (Job 42:​7, 8). Iásï, jamberi kʼuiripuechajtsïni no sési arhijti ka ísïjtsïni pʼikuastani enajkichi no jukaparhakue. Jamberiksï jánguarhintajti parajtsïni no sési pakatani o no sésiksï pakatani Tata Diosïiri kúnguarhikuani. Ambe enga nitamakuarhipka Jobu, jorhendasïndijtsïni eska Jeoba mintsikasïnga eskachi no méni jurajkuaka nájkirukachi no sési nitamakuarhini jauaka. w22.06 24 párr. 15, 16

Nájkiruka auandarhu kánikua tsípini pʼikuarheranhaaka enga Kʼéri Babilonia kʼamajkunhaaka, sánderu kʼéri tsípikuarhita ma jauati (Apok. 19:​1-3). Uaakachi uandani eska sánderu kʼéri tsípikuarhita enga libru Apokalipsisi uandajka, jindeesti enga Karichi sapichueri tembuchakua jarhajka. Nájkirukaksï iáminduecha 144,000 auandarhu jauakia ante de ueenani Armajedoni, no jiániuati Karichi sapichueri tembuchakua (Apok. 21:​1, 2). Sánderu sési, jiániuati enga na nitamaakia guerra Armajedoniiri, engaksï iámindu Tata Diosïiri ikiatspitiicha kʼamajkunhaakia (Sal. 45:​3, 4, 13-17). ¿Ambe arhikuekasïni Karichi sapichueri tembuchakua para imeecha engaksï jima partisiparijka? Tembuchakuarhu ma, márkuksï úkuarhintasïndi tataka ma ka nanaka ma. Ísï jimbo, ini tembuchakuarhu enga no meru tembuchakueka, arhikuekasïndi eska Rei Jesukristu ka imeeri nobia engaksï jindeeka 144,000, márkuksï úkuarhintasïnga. Ini ambakiti ambe jingoni enga úkuarhijka, Jesúsi ka 144,000 ueenaatiksï juramuni iámu parhakpinirhu Mili Uéxurhini (Apok. 20:6). w22.05 17 párr. 11-13

Jesúsi uandaspti eska últimu jurhiatikuechani jimbo erakupiringa “jántspirini enga mintsinharhikueka” ka jánhastiini, parajtsïni jorhendani Tata Diosïiri ambe (Mat. 24:45). Ka meru ísï úxati. Jesúsi úraxati grupu sapichuni ma engaksï erakukateeka paraksï jorhendaani Biblieri ambe jiáni “engaksï uétarhinchaaka” Tata Diosïiri marhuariichani ka imeechani engaksï uéjka míteni Tata Diosïni. Íksï achamasïicha no uandasïndi eskaksï imasï “juramujka na enga[ksï] jatsika para jakajkuni” máteruecha (2 Kor. 1:24). Sánderu sési, uandasïndiksï eska tata Jesukristu jindeeska “orhejtsïkuti ka juramuti” imeeri iretarhu (Is. 55:4). Uéxurhini 1919 uératini, jántspiri enga mintsinharhikueka uánikua publikasionichani petaasti parakaksï kʼuiripuecha ueenaka jorhenguarhini ambakiti ambe enga Tata Diosïiriika. Uéxurhini 1921 jimbo, jántspiri petaspti inglesi jimbo libruni El Arpa de Dios para imani ambe jorhentpini enga ma orheta jatsika para jorhenguarhini Biblieri ambe. Engaksï tiempuecha na mójtakukuarhipani japka, petaapaxapti máteru libruechani. ¿Chá náki jingontsï niáraski míteni ka xénchani juchaari Taati auandarhu anapuni? w22.07 10 párr. 9, 10

Tata Diosï Jeoba jindeesti ima enga sánderu intsïmpitiika. No arhiparini ambe engajtsï chá íntskuaka, imaksïni sánderu ambe íntskuntaati (Mar. 10:​29, 30). Ka iásï ini parhakpini jimbo enga nóteru ióni jimbo kʼamajkunhaaka, imaksïni ambakiti irekua ma íntskuati engajtsï jimbo kánikua sési pʼikuarheraaka ka tsípikua jingoni. Ka no inde ambejkueuati. Ueenani jauakajtsï marhuakuni chaari Taatini engajtsï xáni xénchajka ka uaakajtsï seguiriini ísï úni para méntkisï. Chá ka Tata Diosï Jeoba, seguiriintsï jauaka sánderu xénchperani ka uaakajtsï irekani para méntkisï ísï eska Tata Diosï Jeoba. Engajtsï aiakukuarheska Tata Diosïni ka itsï atakuarhini, uaakajtsï íntskuni chaari Taatini ambe ma enga kánikua jukaparhakueka. Iámindu ambakiti ambe engajtsï jatsika ka iámindu sési jásï ambe engajtsï nitamakuarhika, Tata Diosï Jeobaksïni íntskusti. Ka chájtsï uaaka íntskuni imani enga kueraaka auandani ka Echerini ambe ma enga ima no jatsika: uaakajtsï no méni jurajkuni ka méntkisï marhuakuni (Job 1:8; 41:11; Prov. 27:11). No jarhasti sánderu ambakiti ambe engajtsï uaaka úni chaari tsípikua jingoni. w23.03 6 párr. 16, 17

Engachi tumbi sapichuejka o iurhitskiri máeni, ménisï niárasïndi pʼikuarherani relasioni seksuali uékani jatsini ka jamberiksïni máteruecha arhini eskari ísku jándikua ambe niátaaka. Ka Satanási uékasïndi eskari imani ambe uaaka enga no sési jaka. ¿Ambekini jarhuataa parari p’íngukuarhini? (1 Tes. 4:​3, 4). Engari kómarhiaka Tata Diosï Jeobani, aiangukuarhi na engari pʼikuarherajka ka arhi eskakeni íntskuaka uinhapikua (Mat. 6:13). Miá eska ima tʼungini jingoni jarhaska parakeni jarhuatani ka no parakeni xukani (Sal. 103:​13, 14). Asï jáma jandiajku orhepani uérakuani uandanhiateechani. Aiangu papani o mamani ambe engari nitamakuarhini jaka. Ísïisti, no fásiliisti parari chiiti ambe uandantani, joperu uétarhisïndi eskari ísï uaaka. Engari arhintaska Bibliani ka eratseantani prinsipiuechani, sánderu fásiliuati para t’u imani ambe úni enga sési pʼikuastaaka Tata Diosïni. Exeakari eskari no uétarhinchasïnga juramukua ma méni engari uékaaka úni ambe ma. Ka ísïri xarhataaka eskari kristianu máeska enga sési kurhangujka na enga eratsejka Tata Diosï. w22.08 5 párr. 10-12

Kristianuecha engaksï familieri orhejtsïkutiika, mítestiksï eskaksï jatsiska para kéndani imeeri familiani. Engajtsï chá familieri orhejtsïkutiika, jamberijtsï uandanhiani japka eskajtsï no úpiringa kéndani chaari familiani ojtsï no úni renta maiampini. Ka jamberijtsï eratseni eska engajtsï tsïtapiringa ánchikuarhitani, jamberijtsï no úpiringa exentani máteru. O jamberijtsï eratseenga eskajtsï no úpiringa arisku sáni irekuarhini. Ini ambe úraparini Satanási ústia eskaksï uánikuecha nóteru marhuakuakia Tata Diosï Jeobani. Satanási uékasïndi eskachi eratseaka eska Tata Diosï Jeoba no uandanhiasïnga mándani juchantsïni jimbo ka eskajtsïni no jarhuataaka jiáni engachi uétarhinchani jauaka parachi úni kéndani juchaari familiani. Engachi niáraska ísï eratseni, úpiringachi uandani eskachi no uaaka jurajkuni juchaari ánchikuarhitani nájkirukachi úni jauaka ambe ma enga Tata Diosï no jaiapanhentajka. w22.06 15 párr. 5, 6

Míteskachi eska ima pʼamojpesïnga ka sési kámpini, eska no sóntku ikiasïnga o eska tekaantstiiska ka enga kánikua uékpijka ka jurhimbitiini (Éx. 34:6). Ima kánikua jukaparharasïndi jurhimbikuani (Is. 61:8). Tata Diosï Jeoba kánikua no sési pʼikuarherasïndi engachi jucha no sési nitamakuarhini jarhajka ka uékaxatiia eska niáraakia ima jurhiatikua enga uandakia para kʼamajkuni kómu nitamakuani (Jer. 29:11). ¡Mintsita jingonchi uékaxakaia eska niáraaka inde jurhiatikua! Inde jindeesti ambe ma engachi jimbo kánikua xénchajka Tata Diosïni. Máteru ambe engachi jimbo kánikua tsitijka jurhimbikuarhu jarhani, jindeesti jimbokajtsïni kánikua jarhuatasïnga juchaari tsípikuarhu. Ju je exeni ejemplu ma. Bibliarhuchi jorhenguarhiska ambe enga Tata Diosï Jeoba uaaka sánderu orhepatini. Ísï eska ankla ma na újka eska barku ma no manakuarhiaka itsïirhu, ambe engajtsïni Biblia aiachijka para sánderu orhepatini, úsïndi eskachi no jukari uandanhiauaka engachi no sési nitamakuarhini jauaka. Enga Pablu uandapka ambe enga iásï anapu tekstu arhijka, kristianu erakukateechani eratseaxapti engaksï auandarhu niuaka irekani. Peru ístu inde ambe jindeesti para imeecha engaksï erokuarhini jaka irekani para méntkisï Echerirhu enga paraisu máeuakia (Juanu 3:16). Ísïisti, míteni eskachi uaaka irekani para méntkisï úsïndi eskachi tsípikua jingoni irekaaka. w22.08 14, 15 párr. 3-5

Uékperakuajtsïni jarhuatasïndi parachi máteruechani mintsikaani. Primera a Korintu kapitulu 13, uandasïndi ambe enga újka ima enga uékpijka ka engajtsïni jarhuatajka mintsikaani máteruechani o parachi ménderu ueenani mintsikaani (1 Kor. 13:​4-8). Pori ejemplu, bersikulu 4 uandasïndi: “Ima enga uékpijka tekaantasïndi ka sési útspini”. Tata Diosï Jeobajtsïni tekaachintasïndi, nájkirukachi ménichani imani ambe újka enga ima no jaiapanhentajka. Ísï jimbo, juchajtuchi jatsiska para tekaakuantani juchaari erachiichani engaksï niáraaka úni o uandani imani ambe engajtsïni no sési pʼikuastaaka o ikiatani. Ka bersikulu 5 ístu uandasïndi eska ima enga uékpijka, no ʻsóntku no sési exesïnga ambe engaksï máteruecha újkaʼ ka “nójtu pakarasïndi ikiatspini”. Nóchi uékasïnga méntku miáni jarhani ambe engajtsïni erachiicha úchika. Eclesiastés 7:9 uandasïndi eskachi no jatsiska para sóntku ikiani. Jánguarhinta je ísï exeani erachiichani eska Tata Diosï Jeoba na exeajka. Ima xénchaasïndi ka no méntku miáni jarhasïndi imeecheri pekaduechani. Ka juchajtuchi jatsipiringa para májkueni úni (Sal. 130:3). Enbesi de puru imani ambe exekuani jarhani engaksï no sési újka, jatsiskachi para exekuani imeecheri kualidadichani (Mat. 7:​1-5). w22.09 3, 4 párr. 6, 7

Ambe enga Daniel jimbo karakata jaka, aiangusïndijtsïni na enga úkuarhipaaka máru ambe últimu jurhiatikuechani jimbo. Pori ejemplu, Daniel 12:1 uandasïndi eska Migueli enga tata Jesukristueka, ʻanhandetixaka para kuájpiniʼ Tata Diosïiri iretani. I ambe 1914 jimbo ueenasti úkuarhini, jiáni enga Jesúsi Rei únhaka Tata Diosïiri Reinurhu enga auandarhu jaka. Peru ístu Danieli arhinhaspti eska Jesúsi jauarapiringa imani jurhiatikuechani jimbo “engaksï kánikua uandanhiakuarhiaka, ísï eska na no méni úkuarhini japka desde enga ueenakuarhipka jarhani ireta ma asta imani jurhiatikuechani jamberi”. Inde jurhiatikuecha engaksï kánikua uandanhiakuarhiaka, “kʼéri mískuarhita” arhikuekaxati enga Mateu 24:21 uandajka. Jesúsi jauaraati, o kuájpiati Tata Diosïiri iretani engaksï na kʼamaraakia inde jurhiatikuecha engaksï kánikua uandanhiakuarhiaka, jiáni enga ueenakuarhiakia Armajedoni. Ka libru Apokalipsisi uandasïndi eska inde ireta jindeeska ʻuánikua kʼuiripuechaʼ engaksï tsípiti pakaraka jiáni “engaksï xáni no sési kánhaka” (Apok. 7:​9, 14). w22.09 21 párr. 4, 5

Ima nombriicha engaksï karakata jaka ini librurhu uaatiksï borrarinhani, ísïisti enajki Tata Diosï orheta lápisi jingoni karaapirini (Apok. 3:5). Uétarhisïndi eskachi jánguarhintaaka paraka juchaari nombri seguiriini jauaka karakata jarhani librurhu astaka Tata Diosï Jeoba lapiseru jingoni karaaka juchaari nombrini. Ma grupu enga imeecheeri nombriichaksï karakata jakaia libru tsípikueri jimbo jindeestiksï imeecha engaksï erakukateeka paraksï Kristuni jingoni juramuni auandarhu. Apostoli Pablu arhiaspka Filipusï anapuechani, imeechani engaksï jarhuateenga, eskaksï erakukateecheeri nombriichaksï —imeecheeri engaksï pʼímarhinhaka paraksï Kristuni jingoni juramuni— karakata jarhaskia libru tsípikueri jimbo (Filip. 4:3). Joperu paraka imeecheeri nombriicha no borrarinhaaka librurhu, nóksï jatsisti para jurajkuni Tata Diosïni. Ka engaksï na mínda jukaakia, imeecheri nombriichaksï karakata jauatia para méntkisï libru tsípikuerirhu. Ka i ambe ísï úkuarhisïndi ante de imeechaksï uarhini o ante de kʼéri mískuarhita ueenakuarhini (Apok. 7:3). w22.09 14 párr. 3; 15 párr. 5, 6

Ju je eratseni eskajtsïni nema imani tʼirekua úchintaska engachi jucha kánikua anhenchajka, joperuchi jucha jukari uiriikuarhu ísï jámasïnga o uánikua uandanhiateechani jatsiani engachi sóntku arhajka ka nóchi jamberi aspemuntani. Engachi kʼamachajkia, exesïngachi eskachi jukari sóntku tʼireska ka eskachi no úska aspemuntani indeni tʼirekuani. Úpiringachi májkueni úkuarhinchani engachi Bibliani arhintajka. Jamberichi jukari uiriikuarhu arhintajka ka nóchi jamberi úni kurhanguni ambe engachi arhintani jarhajka. Ísï jimbo, ju je arhutani tiempu parachi eranhaskani ambe engachi arhintani jaka, kurhauani kʼuiripuechani enga Biblia uandaajka ka eratsentani ambe engachi arhintajka. Engachi ísï úska, uaakachi sánderu tsípikua jingoni irekani. Jesúsi íntskusti “jántspirini enga mintsinharhikueka” ka jánhastiini ánchikuarhita parajtsïni jorhendani Tata Diosïiri ambe jiáni engachi uétarhinchani japiringa ka ijtsïni kánikua sési jorhendaxati (Mat. 24:45). Iámindu ambe enga jántspiri újka parajtsïni jorhendani pʼitakata jarhasti Tata Diosïiri Karakatarhu (1 Tes. 2:13). w22.10 7, 8 párr. 6-8

Biblia uandasptia eska últimu jurhiatikuechani jimbo, i járhati kʼuiripuechaksï japiringa (2 Ped. 3:​3, 4). Inde kʼuiripuecha ísïksï úsïndi eskaksï “imeecheeri no sési járhati eratsekuecha na eratsetaraa[j]ka” (Jud. 7, 17, 18). ¿Ambechi uaa úni parachi no ísïini eska imeecha engaksï teresmarpejka? Ma ambe engachi uaaka úni jindeesti, no kúrhiani imeechani engaksï iámindu ambeeri uandauandamijka (Sal. 1:1). I ambe arhikuekasïndi eskachi no kurhaasïnga ni arhintani apostateecheri ambe. Engachi no jingontku jámaska, úpiringachi ueenani iámu ambeeri uandauandamini ka eratseni eska ambe engajtsïni arhijka Tata Diosï Jeoba ka imeeri organisasioni no sési jarhaska. Kurhamarhikuarhini arini ambe jarhuatatijtsïni parachi no ísï eratseni: “¿Pʼindeski uandauandamini engajtsïni organisasioni aiangujka na engachi kurhangujkia máru ambe iásï o engajtsïni arhijka néna úni ambe ma? ¿Méntkuni exeni jarhasïni ambe engaksï no sési újka erachiicha engajtsïni orhejtsïkujka?”. Engachi jánguarhintaska no ísï eratseni, Tata Diosï Jeoba sési pʼikuarheraati juchantsïni jingoni (Prov. 3:​34, 35). w22.10 20 párr. 9, 10

Tata Diosïiri espiritu íntskuspti uinhapikua Esekielini paraka úpiringa Tata Diosïiri ambe aianguani judiuechani, nájkirukaksï imeecha ‘méntku no nani máru uékeenga kurhanguni ka mintsita jingonksï no uékani kurhanguni’. Tata Diosï Jeoba arhispti: “Úska eska chiiti kánharhikua chopeaka ísï eska imeecheeri kánharhikuecha ka eska chiiti tsʼérhukua ísï chopeaka eska imeecheeri tsʼérhukuecha. Úska eska chiiti tsʼérhukua ísïiuaka eska diamanti, sánderu choperi eska pedernali. Asï chérhia, ka eskaksïni no chéraaka na engaksïni jánharhichintaaka” (Ezeq. 3:​8, 9). Ísïipirindi enajki Tata Diosï Jeoba arhini japirini: “Engaksï no nani máru uéjka kurhanguni, asï jáma chkétakuarhini. Ji uaaka eskari sánderu uinhapitiuaka”. Jiáni uératini, Tata Diosïiri espiritu páspti Esekielini nani enga aianhpepiringa. Ima karaspti: “Tata Diosï Jeobaeri jájkirini uinhamu jupikatixapti”. Profeta, ma semana jimbo úspti kurhanguni ambe enga jatsipka para aianhpini (Ezeq. 3:​14, 15). Tátsekua, Tata Diosï Jeoba arhispti eska nipiringa pákua ma jimbo, nani enga espiritu santu intsïnhapiringa (Ezeq. 3:​23, 24). Esekieli iásï kʼóru listu jarhasptia para ueenani aianhpini. w22.11 4, 5 párr. 8, 9

Profeta Abakuki uánikua uandanhiateechani jatsiaspti. Ka jamberi ísï pʼikuarhereendi enajki Tata Diosï Jeoba nóteru uandanhiauengia imani jimbo. Jimbosï aiangukuarhipti na enga pʼikuarhereenga. Tata Diosï Jeoba mókukuspti kómarhikuani enga i ambakiti acheeti úkupka (Hab. 2:​2, 3). Enga na eratsentapkia na enga Tata Diosï jarhuatapka imeeri iretani, Abakuki ménderu tsípintaspti. Iásï sánderu seguru jarhasptia eska Tata Diosï Jeoba uandanhiasïreenga imani jimbo ka eska jarhuatapiringa tekaantani náki uéjki tsʼéjkukuani (Hab. 3:​17-19). ¿Ambechi uaa jorhenguarhini? Eska engachi uandanhiateechani jatsiauaka, uaakachi kómarhini Tata Diosï Jeobani, aiangukuarhini na engachi pʼikuarherajka ka jarhuajperata kurhakuni. Uaakachi seguru jarhani eskajtsïni Tata Diosï íntskuaka uinhapikua parachi úni tekaantani. Ka engachi exeaka na engajtsïni jarhuatani jaka, sánderuchi mintsikaaka imani. Engajtsï chá úni jauaka iámindu ambe engaksïni jarhuataaka andarhierani Tata Diosïni, ni uandanhiateecha ni ima ambe engaksïni máteruecha arhiaka uaati úni eskajtsï jurajkuaka Tata Diosï Jeobani (1 Tim. 6:​6-8). w22.11 15 párr. 6, 7

Jesúsi ka tsimani no sési úriicha engaksï imeeri máekandu japka sánhanksï arhixapti uarhini (Luk. 23:​32, 33). I tsimani kʼuiripuechaksï teresmarhuxapti Jesúsini (Mat. 27:44; Mar. 15:32). Peru máechakua mójtakukuarhispti. Ka arhispti Jesúsini: “Jesúsi, miántarini sáni engari chiiti Reinurhu jauakia”. Ka Jesúsi mókukuspti ambe enga arhijka iásï anapu tekstu (Luk. 23:​39-42). Ambe enga Jesúsi arhipka imani no sési úrini, jatsipirindi parajtsïni eratsetarantani néna enga irekanhaaka Paraisurhu. Ma ambe engajtsïni jarhuataaka ísï úni, jindeesti miántani na enga pínandikua jingoni irekanhapka jiáni enga Salomóni juramuni japka. Biblia uandasïndi eska Jesúsi “sánderu kʼéri ambeeska ka eska Salomóni”. Ísï jimbo, uaakachi seguru jarhani eska Jesúsi ka imeecha engaksï imani jingoni juramuaka uaakaksï eska Echerirhu kánikua sési jándeaka (Mat. 12:42). Ka ístu ʻmáteru karichiichaksïʼ jatsisti para míteni ambe engaksï jatsika para úni paraksï úni irekani para méntkisï Paraisurhu (Juanu 10:16). w22.12 8 párr. 1; 9 párr. 4

Isaíasi arhisïndijtsïni eska Tata Diosï Jeoba jingontku kurhauaka juchaari kómarhikuechani ka eska sóntku mókuantauaka. Profeta ístu uandasïndi: “Imakeni jirejiresï mókuchintaati engakeni kurhajchaaka”. I uandakuechajtsïni miátantasïndi eska juchaari Taati no solu uékasïnga jarhuataani imeechani engaksï jarhuajperata kurhakujka, sino eska mintsita jingoni uékasïnga jarhuataani. Ini ambe míteni jarhuatasïndijtsïni tsípikua jingoni tekaantani. Tata Diosï Jeoba jingontku kurhauasïndi juchaari kómarhikuechani. ¿Andichisï ísï uandajki? Ueenani jámani Isaías kapitulu 30 jimbo, Jeoba uandasïndi “chá”, jimboka iámindu iretanisï arhini jaka. Joperu bersikulu 19 jimbo uandasïndi “tʼu”, jimboka mándani imeeri marhuarinisï arhikuekani jaka. Isaíasi uandasïndi: “tʼuri meru nóteru ueraakia”, “imakeni meru pʼamojkuati”, ʻimakeni mókuchintaatiʼ. Jimboka Tata Diosï Jeoba, Taati máeska enga kánikua uékpitiika, uandanhiasïndi juchantsïni jimbo ka mándani arhintsïni kurhajchasïndi engachi kómarhijka (Sal. 116:1; Is. 57:15). w22.11 9 párr. 5-6

Engachi aianhpijka ka jorhentpini jurhimbikueri ambe nájkirukachi no sési kánhaaka, úsïndi eskachi sési pʼikuarheraaka ka eskachi pínandikua jatsiaka. Primeru siglurhu, engaksï Judea anapu juramutiicha arhiapka apostoliichani eskaksï nóteru aianhpepiringia, i ambakiti achamasïichaksï kurhajchaspti Tata Diosïni. Seguiriisptiksï aianhpini ka sésiksï pʼikuarheraspti indeni ambe jimbo (Úku. 5:​27-29, 41, 42). Ísïisti, engachi nóteru sésikua intsïnhajkia parachi juchaari ánchikuarhitani úni, jatsiskachi para seguiriini aianhpini peru xéparintku. Engachi jánguarhintaska xáni eskachi xáni uaaka, pínandikuachi jatsiaka jimbokachi sési pʼikuastani jauaka Tata Diosï Jeobani ka jimbokachi aianguani jauaka kʼuiripuechani néna engaksï uaaka tsípiti pakarani. Ju je seguru jarhani eska asta jiáni engachi kánikua no sési nitamakuarhini jauaka, uaakachi pínandikua jatsini. Engachi ísï nitamakuarhini jauaka, jatsiskachi para miáni eskachi pínandikuachisï uétarhinchajka, engajtsïni solu Tata Diosï Jeoba újka íntskuni. Ju je imani mintsikani engaksï epidemiecha jauaka, enga no sési ambe úkuarhiaka o engachi no sési kánhaaka. Ju je no jurajkuni imeeri kúnguarhikuani ka no mirikurhini indeni xáni sési jásï ambe engajtsïni Tata Diosï aiachini jaka para sánderu orhepatini. Engachi ísï úska, Tata “Diosï enga pínandikua íntspijka” juchantsïni jingoni jauati (Filip. 4:9). w22.12 21 párr. 17, 18

Parachi jimbanhi kʼuiripu máeni, jatsiskachi para úni ambe ma. Pori ejemplu, jatsiskachi para kánikua jánguarhintani parachi nóteru májkueni jámania eskachi ióntki na jámeenga, komu jatanhetspini ka uinhamu ikiani (Éfes. 4:​31, 32). ¿Joperu andisï úkua juka nóteru ísï jámania? Jimbokachi pʼindeskia úni máru ambe enga no sési jaka ka no fásiliisti jurajkuni indeni ambe. Biblia uandasïndi ima kʼuiripuecheeri ‘engaksï sóntku ikiajka’ ka imeecheeri engaksï “sáno méntkisï uinhamu ikiajka” (Prov. 29:22). Engachi útasï ísï jámajka eska ióntki, jamberichi jatsiaka para seguiriini mójtakurhini ísï tátsekua engachi na itsï atakuarhiakia (Rom. 7:​21-23). Ju je aiangukuarhini Tata Diosï Jeobani ima ambeeri engachi no úni jaka jurajkuni, mintsikaparini eskajtsïni ima kurhajchaaka ka eskajtsïni jarhuataaka (1 Juanu 5:​14, 15). Ísïisti, Tata Diosï Jeoba no uaati milagru ma parajtsïni mójtakuni, perujtsïni íntskuati uinhapikua parakajtsïni inde ambe no andaaka (1 Ped. 5:10). ¿Nénachi uaa úni ambe engachi uandajka juchaari kómarhikuecharhu? Uétarhisïndi eskachi jánguarhintaaka no imani ambe úni enga uaaka eskachi májkueni jámaaka eska ióntki. Ka ju je no jámani eratseni imani ambe enga no sési jaka (Filip. 4:8; Kol. 3:2). w23.01 10 párr. 7, 9, 10

Ma ambe engachi uaaka úni parachi xarhatani eskachi xénchaasïnga máteruechani, jindeesti tsípikua jingoni aianguani iáminduechani Tata Diosïiri ambe. Ísï jimbo, aianguasïngachi iámindu kʼuiripuechani náki uéjki raseenksï, náki uéjki pʼindekuechanksï jatsiani ka no arhiparini sinksï jatsikuarheriiski o nómbe. Engachi ísï újka, májku kʼérichi ánchikuarhini jarhasïnga Tata Diosï Jeoba jingoni, jimboka ima uékasïnga “eskaksï iámindu kʼuiripuecha pʼímutantskateuaka, ka andajkuarhinksï míteni ambe enga ísïika” (1 Tim. 2:4). Máteru ambe engachi uaaka úni parachi xarhatani eskachi xénchasïnga Tata Diosïni ka Kristuni jindeesti, xénchaani juchaari erachiichani. Pori ejemplu, uandanhiasïngachi imeechani jimbo ka jarhuataasïngachi engaksï no sési nitamakuarhini jarhajka. Uinhaperantaasïngachi engaksï imeecha uarhiranchajka nemani, nirasïngachi pʼorhembiani engaksï pʼamenchani jarhajka ka úsïngachi ambe engachi xáni uaaka parachi sési pʼikuastantaani engaksï kómu pʼikuarherani jarhajka (2 Kor. 1:​3-7; 1 Tes. 5:​11, 14). Ístuchi kómarhijpikuasïnga jimbokachi míteska eska “kánikuamindu marhuasïn[ga] enga ma ambakiti kʼuiripu kómarhijka Diosïni” (Sant. 5:16). w23.01 28, 29 párr. 7, 8

Ísï eska nema enga konstruksionirhu ánchikuarhijka, tiempu jingoni na sánderu sési újka imeeri ánchikuarhitani. Juchajtuchi sánhani arhiaka jorhenguarhini máteruechani uinhaperantaani. Uaakachi uandontskuarhekuani juchaari erachiichani máteru Tata Diosïiri marhuariicheeri engaksï úka tekaantani parakaksï imeechajtu uaaka májkueni úni (Ebr. 11:​32-35; 12:1). Ístu, parachi úni eskaksï iáminduecha sési pájperaaka, uaakachi ambakiti ambe uandani máteruecheri ambe, no úni ambe ma engachi jimbo nóteru úpiringuia sési pájperani máteruecha jingoni ka sési peentani ambe engachi jatsika máteruecha jingoni (Éfes. 4:3). Ka ju je seguiriini jarhuatani erachiichani parakaksï mintsikaaka Tata Diosïni, uaakachi ísï úni engachi aianguaska jukaparhakua ambe Biblieri, engachi jarhuataska ka engachi úska ambe ma parachi jarhuataani imeechani engaksï nóteru xáni sési marhuakuni jakaia Tata Diosïni. Uaakachi sési pʼikuarherani engachi jarhuataaska juchaari erachiichani parakaksï sánderu mintsikaaka Tata Diosïni. Ambe engachi jucha újka para máteruechani uinhaperantaani, marhuasïndi para méntkisï ka no komueska kʼumanchikua ma enga tiempu jingoni niárajka xerekuarhentani. w22.08 21 párr. 6; 25 párr. 17, 18

Jesúsi uandaspti eskachi uétarhinchasïnga jánhastiini parachi úni kurhanguni ambe enga Biblia arhijka (Mat. 24:15). ¿Ambe arhikuekasïni jánhastiini? Kʼuiripu ma enga jánhastiijka úsïndi exeni néna terukuntasïni Biblieri bersikulu ma máteru bersikulu jingoni ka néna jimboksï no májkueniiski. Ístu úsïndi kurhanguni andisï ísï úkuarhijki ambe ma. Ísï jimbo, ísï eska Jesúsi na uandapka, jánhastiini jarhuataatijtsïni parachi exeni eska máru ambe enga úkuarhini jaka, xarhatasïnga eskaksï kumplirikuarhixaka Biblieri profesiecha. Ístu, jánhastiini jarhuatasïndijtsïni parajtsïni marhuacheni iámindu ambe engachi Bibliarhu arhintaaka. Tata Diosï Jeobasï újti eskaksï imeeri marhuariicha jánhastiuaka. Ísï jimbochisï jatsika para imani kómarhini ka kurhakuni eskajtsïni jarhuataaka sánderu jánhastiini. Peru ístu uétarhisïndi eskachi máteru ambe uaaka, jatsiskachi para sési jorhenguarhini ambe engachi arhintaaka ka exeni néna terukuntasïni ima ambe engachi arhintani jaka imani ambe jingoni engachi mítekia. Ju je jánguarhintani kurhanguni ambe engachi Bibliarhu arhintaaka ka uaakachi exeni ambe engachi uaaka para ísï úni eskachi na jorhenguarhiaka (Ebr. 5:14). Engachi eratsentaska ambe engachi arhintaaka sánhani arhiakachi sánderu sési kurhanguni Tata Diosïiri Uandakuani. w23.02 10 párr. 7, 8

Eranhaska je eskaksïni amigu ma kʼumanchikua ma intsïkuarhiska. No káni sési atantskata jarhasti ka tsʼorhenasïndi. Nájkiruka kʼumanchikua ísï jaka, uánikua miioni dolari jukaparhasti. Seguru eskajtsï chá jukaparharapiringa ka kuájchakuni indeni kʼumanchikuani. Sáno májkueni, Tata Diosï Jeobajtsïni ambakiti regalu ma íntskusti: tsípikuani. Ka xáni jukaparharasïndi juchaari tsípikuani enga íntspika imeeri Uájpani parajtsïni pʼímutantani (Juanu 3:16). Tata Diosï Jeobasï újti eska tsípikua jauaka (Sal. 36:9). Apostoli Pablu indeni ambesï arhikuekani japti enga uandapka: “Jimbokachi imani jimbosï irekani jaka, ka jámanchi jarhani ka jindeenchi” (Úku. 17:​25, 28). Ísï jimbochisï uaaka uandani eska tsípikua Tata Diosïiri regalu máeska. Imajtsïni xénchperakua jingoni íntskusti ambe engachi uétarhinchajka parachi tsípiti jarhani (Úku. 14:​15-17). Joperu Tata Diosï Jeoba no uaati milagru ambe parachi jucha tsípiti jarhani, sánderu sési, erokuarhisïndi eskachi jánguarhintaaka xáni eskachi xáni uaaka parachi no xáni pʼamenchani ka sési jarhani imani jingoni (2 Kor. 7:1). w23.02 20 párr. 1, 2

¡Kánikuachi agradesidu jarhaska Tata Diosï Jeoba jingoni engajtsïni íntskuka Bibliani! Jima, ima ambakiti konsejuechajtsïni íntskuasïndi engaksï kánikua marhuajka ka engajtsïni jarhuatajka míteni ambe úni engachi uandanhiateechani jatsiajka. Ístu, Tata Diosïjtsïni Bibliarhu arhisïndi eskachi ambakiti erokuarhikua ma jatsiska para sánderu orhepatini. Ka sánderu jukaparhakua ambe, xarhatachesïndijtsïni na enga jásïika ima. Eratseantani xáni sési járhati kualidadiichani enga Tata Diosï Jeoba jatsiaka, mintsitarhujtsïni niárachesïndi ka inde ambe úsïndi eskachi uékaaka sánderu andarhierani imani ka imeeri amigueni (Sal. 25:14). Tata Diosï Jeoba uékasïndi eskaksï kʼuiripuecha míteaka imani. Ióntki, ima tsánharhitaaspti kʼuiripuechani, jánhastaaspti ka asta ánjeliichani úraaspti parajtsïni aianguni imeeri ambe (Núm. 12:6; Úku. 10:​3, 4). Peru nóchi úpiringa jorhenguarhini iámindu i ambe enga no karakata pakarapiringa. Ísï jimbo, Tata Diosï Jeoba arhiaspti achamasïichani máru eskaksï karapiringa “librurhu ma” ambe enga ima uékeenga eskachi mítepiringa. Uaakachi seguru jarhani eska ima úska eska sési karakuarhipiringa i ambe engajtsïni kánikua marhuachejka, jimboka “Tata Diosï jurhimbitiiri xanharu perfektues[ka]” (Sal. 18:30). w23.02 2 párr. 1, 2

Ambakiti meteechani jatsikukuarhia. ¿Nákiiskiksï inde meteecha? Imeecha engaksïni jarhuataaka sánderu mintsikani Tata Diosï Jeobani ka engaksïni jarhuataaka sánderu ambakiti kristianu máeni (Éfes. 3:16). Pori ejemplu, úpiringari sánderu jánguarhintani jandiajku jorhenguarhini Biblieri ambe ka ístu arhintani (Sal. 1:​2, 3). Ori jamberi uaaka sánderu someni kómarhini Tata Diosï Jeobani ka mintsita jingoni. Jamberiri jatsiaka parari sánderu sési exeni ambe engari jingoni tsípikuarhiaka ka sánderuri sési úrani tiempuni (Éfes. 5:​15, 16). Engari jarhuataajka máteruechani, sánderuri ambakiti kristianu máesïnga. Pori ejemplu, kúnguarhikuarhu, úpiringari jarhuataani imeechani engaksï jatiriikia o ánchperata ambe úkuani imeechani engaksï pʼamenchani jaka o imeecheri aparatu elektronikuecha jingoni jarhuataani. Ísturi uaaka xarhatakuani uékperakua imeechani engaksï no míteka Tata Diosïni ka uaakari ísï úni engari niuaka aianguani ambakiti aianhperakuani Tata Diosïiri Reinueri ambe (Mat. 9:​36, 37). Ka engari uaaka, marhua tiempu kompletueri. w22.08 6, 7 párr. 16, 17