Septiembri

Engachi sési uandontskuarheska, máteruechaksï exeati eska no májkueniiska “ima enga marhuakujka Tata Diosïni ka ima enga no marhuakujka” (Mal. 3:18). Engachi ísï újka, xarharaati eskachi jucha marhuakusïnga Tata Diosï Jeobani. Ju je exeni ambe enga úkuarhinchapka pirenchi ma enga Kimberly arhinhajka. Enga ima ka imeeri kompaniera jémba ma májku kʼériksï úpka ánchikuarhita ma, imeeri kompaniera exespti eska Kimberly máteru jásï kʼuiripu máespka. No arhinchpesïreendi, sési uandajpisïreendi ka no no sési jásï ambe uandasïreendi. Imeeri kompaniera uékaspti míteni andisï ísï jámeeni ka tiempu jingoni uékaspti jorhenguarhini Biblieri ambe. ¡Tata Diosï Jeoba kánikua sési pʼikuarherasïndi engaksï máteru kʼuiripuecha uékajka andaparhakuerani jurhimbikuarhu jimbokachi jucha no no sési jásï ambe uandasïnga! Iáminduechachi uékasïnga eska ima ambe engachi uandaaka kʼéri ambe arhiaka Tata Diosï Jeobani. w22.04 5, 6 párr. 5-7

Jesúsi jarhuataspti María Magdalenani jimbokaksï siete demoniuecha incharhitixapka. Seguru eska María Magdalena kánikua agradesida jarhaspka. Ísï jimbo, Jesúsiiri chúxapati úkuarhispti para jarhuatani enga aianhpini jámani japka (Luk. 8:​1-3). Nájkiruka María kánikua jukaparhareenga ambe enga Jesúsi úpka imani jimbo, jamberi no mítepti ambe enga Jesúsi úpiringa sánderu orhepatini. Jesúsi íntspipirindi imeeri tsípikua paraka “nákinterku nema enga imani jakajkuaka” intsïnhaaka tsípikua para méntkisï (Juanu 3:16). Nájkiruka María no iámindu ambe kurhanguenga, enga ísï no jurajkupka Jesúsini xarhataspti eska kánikua agradesida jarhaspka. Ka enga Jesúsi cháparhakata japka chkarirhu, María jima pakaraspti para uinhaperantani imani ka ístu máteruechani engaksï jima japka (Juanu 19:25). Ka ístu enga Jesúsi tumbarhu japka, María ka máteru tsimani uarhiitiichaksï pʼuntsumikua ambeksï páspti paraksï Jesúsiiri kuerpuni atarhini (Mar. 16:​1, 2). ¡Na xáni sési pʼikuarherapi María enga exepka eska Jesúsi tsíntaspka ka enga úpka uandontskuarheni imani jingoni! I kʼéri kóntperata máespti engaksï no uánikua Jesúsiiri chúxapatiicha úpka jatsini (Juanu 20:​11-18). w23.01 27 párr. 4

Nóchi jatsiska para nóteru jánguarhintania eratseparini eskachi ióntki kánikua jánguarhintaskia Tata Diosï Jeobani marhuakuni. Jamberichi iásï nóteru újkia úni ambe engachi antesi ueenga, joperuchi jatsiska para seguiriini jarhani Tata Diosïiri ánchikuarhitani úni ka jingontkuchi jarhani astaka i parhakpini kʼamajkunhaaka (1 Kor. 15:58; Mat. 24:13; Mar. 13:33). Ju je tsípikua jingoni ka mintsita jingoni kʼéri ambe arhini Tata Diosï Jeobani. Enga Jesúsi uandakua axakuapka Laodisea anapuechani, máteru problemeri ambe arhiaspti. Imeechaksï no mintsita jingoni marhuakusïreendi Tata Diosï Jeobani. Jimbosï Jesúsi uandapti eskaksï imeecha no sáni tsípikua jingoni jámasïreenga ka “lastima” úkuenksï. Ísï jimbo, jatsisptiksï para mintsita jingoni marhuakuni Tata Diosï Jeobani ka xénchani (Apok. 3:​16, 17, 19). ¿Ambechi uaa jorhenguarhini íri ambe? Engachi nóteru tsípikua jingoni marhuakuni jakaia Tata Diosïni, jatsiskachi para eratsentani ambe engajtsïni xáni íntskujka ima ka imeeri kúnguarhikua (Apok. 3:18). Ka ju je no jurajkuni eskajtsïni ójkutaaka máteru ambe, sino orheta peerani marhuakuni Tata Diosïni. w22.05 3, 4 párr. 7, 8

Ióniistia enga Tata Diosï Jeoba lista ma úni jaka nombriicheeri ka ambakiti librurhu ma karaaxati. Lista Abelini jingoni ueenasïndi, primeru Testigu enga no méni jurajkupka Tata Diosïni (Luk. 11:​50, 51). Desde iónisïa, Tata Diosï seguirixati karaani nombriichani indeni libru jimbo ka uánikua karaastia (Mal. 3:16). Biblia ísï arhisïndi indeni libruni: “libru tsípikueri” (Apok. 3:5; 17:8). Ini librurhu, imeecheri nombriichaksï karakata jarhasti engaksï xáni kʼéri ambe arhijka Tata Diosï Jeobani kánikua janhanharhikua jingoni ka engaksï jukaparharajka imeeri nombrini. Íksï erokuarhixati paraksï auandarhu irekani o paraksï Echerirhu irekani para méntkisï. Juchaari nombri uaati karakata jarhani indeni librurhu engachi jánguarhintaska sési pájperani Tata Diosï Jeobani jingoni mintsikaparini tata Jesukristueri uarhikuani (Juanu 3:​16, 36). Iáminduechachi uékasïnga eska juchaari nombri karakata jauaka indeni librurhu, ¿a no? w22.09 14 párr. 1, 2

Libru Apokalipsisi (Jaŋaskuecha) ístu uandasïndi “ma kʼéri dragoni” charhapitiiri (Apok. 12:3). I dragoni uarhiperasïndi Jesúsi jingoni ka imeeri ánjeliicha jingoni (Apok. 12:​7-9). Ístu, no sési kámasïndi Tata Diosïiri iretani ka uinhapikua íntskuasïndi animaliichani engaksï jindeeka politikarhu anapu (Apok. 12:17; 13:4). ¿Né jindeeski i dragoni? Jindeesti “ióntki anapu akuitsi” enga jindeeka “Noambakiti ka Satanási” (Apok. 12:9; 20:2). Ima jindeesti enga juramukuajka iámindu Tata Diosïiri ikiatspitiichani. ¿Ambe úkuarhinchaa dragoni? Apokalipsisi 20:​1-3 uandasïndi eska ánjeli ma posurhu ma kʼuaninhaaka Noambakitini ka jima ónhaati. Noambakiti ónhakata jauati 1,000 uéxurhini ka nóteru uaati ʻkʼarhaani kʼuiripuechaniʼ astaka na kʼamakurhiaka i 1,000 uéxurhini. Ka últimu, Satanási ka imeeri demoniuechaksï kʼuanijpanhaati imani “japondarhu enga méntku kurhini jaka chpiri asufri jingoni”. I ambe arhikuekasïndi eskaksï kʼamajkunhaaka para méntkisï. ¿Eranhaskasïntsï na engachi irekaaka enga nóteru jauakia Satanási ka imeeri demoniuecha? ¡Xáni ambakiti ambe! w22.05 14 párr. 19, 20

Jesúsi kánikua ánchikuarhiriispti. Enga tumbiipka, karpinteruespti (Mar. 6:3). Taati jémbeechaksï meru agradesidu pʼikuarhereendi imani jingoni jimboka jarhuataasïreenga paraksï úni kéndani imeeri familiani enga kánikua kʼépka. Ka jimboka perfektuespka, sési uaasïreendi ánchikuarhiteechani ka jamberi uánikua klientichani jatsiapti. Úsïngachi eratseni na enga xáni sési pʼikuarhereenga Jesúsi imeeri ánchikuarhita jimbo. Joperu no jurajkusïreendi eska ójkutapiringa para Tata Diosïiri ambe úni (Juanu 7:15). Ka enga Tata Diosïiri ambe jorhentpini japkia, arini konsejuni íntspispti: “Ánchikuarhi je no para andani tʼirekua enga sóntku kʼamarajka sino para andani indeni tʼirekuani enga jindeeka para tsípikua méntkisï jatsini” (Juanu 6:27). Ka enga Juátarhu Arhijtsïkpipka, uandaspti: “Sino patsa je chaari jatsikuarhekuani auandarhu” (Mat. 6:20). Tata Diosï Jeobaeri jánhaskakuajtsïni jarhuatasïndi sésku exeni ánchikuarhitani. Kristianuechachi arhinhasïnga eskachi kánikua ánchikuarhiaka ka eskachi ambakiti ánchikuarhita ma uaaka. w22.05 22, 23 párr. 9, 10

Eunise ambakiti ejemplu ma íntskuspti Timoteuni. Timoteu exespti eska ambe enga ueenga amamba, jindeespka jimboka kánikua xénchasïreenga Tata Diosï Jeobani ka eska tsípikua jingoni irekaspka jimboka marhuakuxapka Tata Diosïni. Ka sáno májkueni, uánikua naandiichaksï jarhuataastia imeecheri familiani nájkirukaksï “no ma ambe aianguauaka” (1 Ped. 3:​1, 2). ¡Chájtujtsï uaaka ísï úni! ¿Néna? Sánderu jukaparhara je chaari pájperakua Tata Diosï Jeoba jingoni (Deut. 6:​5, 6). Seguru eskajtsï chájtu májkueni újka eska uánikua naandicha parajtsï kéndaani chaari sapiicha. Pori ejemplu, úraajkajtsï chaari tiempuni, sentabu ka astajtsï ménisï no mintsikuarhijka. Peru nájkirukajtsï xáni úkua ambe jatsijka, asï jurajku je eskaksïni i ambe ójkutaaka parajtsï nóteru sési pájperania Tata Diosï Jeoba jingoni. Arhuta je tiempu parajtsï jandiajku kómarhini Tata Diosïni, parajtsï Biblieri ambe jorhenguarhini ka parajtsï nirani tánguarhikuecharhu. Engajtsï ísï úska, sánderujtsï sési pájperaaka Tata Diosï jingoni ka ambakiti ejemplujtsï ma íntskuni jauaka chaari familiani ka ístu máteru kʼuiripuechani. w22.04 16 párr. 1; 19 párr. 12, 13

Jimboka Tata Diosï Jeoba jindeeska sánderu ambakiti Juesi enga jaka juchachi no jatsiska para uandani na engaksï jusgarinhaaka kʼuiripuecha, imasï uaati ini ambe (Rom. 14:​10-12). Uaakachi seguru jarhani eska ima méntkisï sési jusgarpiaka jimboka imajkusï míteka ambe enga sési jaka ka ambe nómbe (Gén. 18:25). Ima méntkisï jurhimbikua jingoni úsïndi iámu ambe. Tata Diosï Jeoba sési peentaati iámindu ambe enga no sési úkuarhini jaka pekaduni jimbo, ¡Meruchi uékaxakaia eska ísï úkuarhiaka! Tata Diosï Jeoba uaati eskachi nóteru méni pʼamenchaaka ka eskachi nóteru no sési pʼikuarheraakia (Sal. 72:​12-14; Apok. 21:​3, 4). Ka nóteruchi méni miántaakia ambe engachi úkuarhinchaka. Enga jamberi niáraaka inde jurhiatikua, ju je agradesidu jarhani engajtsïni Tata Diosï Jeoba jorhendaka puákuantani máteruechani ísï eska ima. w22.06 13 párr. 18, 19

Ambakiti juesi ma, uétarhisïndi sési míteani leichani ka sési míteni ambe enga sési jaka ka ambe enga no sési jaka. Ístu, ambakiti juesi ma jatsisti para sési mítetini jarhani iámindu ambe ante de uandani ambe enga úkuarhiaka. Ísï jimbo, Tata Diosï Jeoba jindeesti sánderu ambakiti Juesi enga jaka jimboka ima iámindu ambe míteska. Tata Diosï no ísï jusgarpisïndi eska kʼuiripu ma na újka. Enga ima jatsijka para nemani jusgarini, sési mítesïndi andisï ísï ú (Gén. 18:​20, 21; Sal. 90:8). No jusgarpisïndi imani ambe jimbojku engaksï kʼuiripuecha exejka o kurhandijka. Ima sési mítesïndi eska kʼuiripu ma niárasïnga úni ambe ma jimboka taati jémbeechani pʼiuaska, na enga kʼuiriperanhaka, nani enga irekaka ka ambe enga eratsejka ka pʼikuarherani. Ístu, Tata Diosï Jeoba exesïndi ambe enga juchaari mintsitarhu jaka, i ambe arhikuekasïndi andichisï újki ambe ma ka ambe engachi jucha tsitijka. Ima méntku iámindu ambe exesïndi (Ebr. 4:13). Ísï jimbo, Tata Diosï Jeoba puátspentasïndi jimboka meru sési mítesïnga ambe enga úkuarhijka. w22.06 4 párr. 8, 9

Kánikua sési jarhasti míteni ambe enga Noambakiti úrapka Jobu jingoni jimboka sáno májkueni ambe úsïnga iásï. Noambakiti arhikuekaxapti eskachi jucha no mintsita jingoni xénchasïnga Tata Diosï Jeobani ka eska enga juchaari tsípikua peligrurhu jauaka niáraakachi jurajkuni. Ístu uandasïndi eskajtsïni Tata Diosï no xénchasïnga ka eska no jukaparharasïnga na engachi xáni jánguarhintajka para marhuakuni. Peru juchantsïni engachi mintsinharhijka Tata Diosï Jeobani, Noambakitijtsïni no úsïndi támisï jánhastani jimbokachi míteskia ambe enga xáni úrajka. Engachi tsʼéjkukua ma nitamakuarhini jauaka, i ambejtsïni jarhuataati parachi úni sánderu sési mítekuarhini. No sési ambe enga Jobu nitamakuarhipka jarhuataspti paraka kuenta íntskukuarhepiringa eska jatsispka para mójtakuni máru ambe. Pori ejemplu, exespti eska jatsispka para kaxumbitiini (Job 42:3). Juchajtuchi uaaka uánikua ambe exeni engachi jatsika para mójtakuni engachi tsʼéjkukua ma nitamakuarhini jauaka. Engachi kuenta íntskukuarhejka eskachi no úxaka iámindu ambe sési úni, uaakachi mójtakuni indeni ambe. w22.06 23 párr. 13, 14

Tata Diosï Jeobajtsïni arhisïndi eskajtsïni jarhuataaka. Pori ejemplu, ante de uandani: “Chájtsï jindeeska juchiiti testiguecha”, ima uandaspti: “Engari itsïrhisï parhimeaka, ji tʼungini jingoni jauaka ka, engari iorhekuechani parhikuauaka, nóksïni ójchakuraati. Engari chpirirhu ísï nitamaaka, nóri kurhiaka ka chpirikini no sáni kurhiraati” (Is. 43:2). Engachi aianhpijka, ménichanksï jarhasïndi ójkutakuecha engaksï ísïijka eska iorhekuecha ka tsʼéjkukuecha engaksï ísïijka eska chpiri. Joperu Tata Diosïiri jarhuajperata jingoni, seguirisïngachi aianhpini (Is. 41:13). Sáno iámindu kʼuiripuechajtsïni no uékasïndi kurhajchani. Joperuchi míteskia eska inde ambe no arhikuekasïnga eskachi no ambakiti Jeobaeri testiguecheeska. Kánikuajtsïni sési pʼikuastantasïndi ka uinhaperantani míteni eska Tata Diosï Jeoba sési pʼikuarherasïnga engachi seguiriijka aianhpini. Apostoli Pablu uandaspti: “Eska mándani arhini maiamunhantaaka eskaksï na jukanchaaka imeecheeri ánchikuarhitani jimbo” (1 Kor. 3:8; 4:​1, 2). w22.11 4 párr. 5, 6

Ini jurhiatikuechani jimbochi exexaka eska Biblieri profesiechaksï meru ísï úkuarhixaka, kʼuiripuechaksï “iámindu idiomecheri engaksï iretecharhu uandanhajka”, jorhenguarhixatiksï uandani ‘pímbinhasï idiomaniʼ, enga jindeeka jurhimbikua enga Bibliarhu jaka (Zac. 8:23; Sof. 3:9). Iásï, jukari 240 paisiicha ka territoriuecha jimbo, jukari 8 miioni kʼuiripuechaksï niárastiksïa Tata Diosï Jeobaeri kúnguarhikuarhu jarhani. ¡Ka mándani uéxurhini uánikuechaksï itsï atakuarhisïndi! Joperu ambe enga sánderu jukaparhakueka no jindeesti na engaksï xáni itsï atakuarhijka, sino eskaksï i jimbanhi Jesúsiiri chúxapatiicha xarhataasïnga imani kualidadichani enga Tata Diosï jaiapanheantajka. Biblia arhisïndi eska inde ambe arhikuekasïnga “jimbanhi kʼuiripu máeni” (Kol. 3:​8-10). Uánikuaksï nóteru ísku jándikua ambe niátasïndia, niksï atajpini jámani, nijtuksï menusi újpini, oksï eratseni eska imeeri paisi sánderu ambakitiiska. Ísï úkuarhixati eska Isaías 2:4 na uandajka: “Nóteruksï jorhenguarhiatia uarhiperani”. Jimbokachi jánguarhintasïnga para jimbanhi kʼuiripu máeni, úsïngachi eskaksï kʼuiripuecha tsitiaka Tata Diosïiri kúnguarhikua jingoni úkuarhini ka xarhatasïngachi eskachi ísï úsïnga eskajtsïni juchaari orhejtsïkuti tata Jesukristuni na arhijka (Juanu 13:35). Ka no ma ambe ísku jatini úkuarhixati; Jesúsijtsïni jarhuataxati. w22.07 9 párr. 7, 8

Juchaari kómarhikuecha jimbo, jatsiskachi para kánikua janhanharhikua jingoni uandajpani Tata Diosïni. Ju je eratsentani imani jánhaskuechani engaksï Isaíasi, Esekieli, Danieli ka Juanu jatsiapka. Iáminduechaksï xarhatasïndi Tata Diosï Jeobani komueska k’éri Juramuti ma. Isaíasi exespti Tata Diosï Jeobani “k’éri uaxantskuarhu ma enga iótakuarhu ka karhakua japka” (Is. 6:​1-3). Esekieli exespti eska Tata Diosï uaxakatixapka imeeri auandarhu anapu karrurhu ka imeeri uirhipandani t’íntskua ma jarhaspti enga ísïipka “komueska arkoirisi” (Ezeq. 1:​26-28). Danieli exespti “imani enga kánikua jatiriikia” xukuparhakua urapiti jukarini ka uaxakatini jarhani tronurhu ma nani enga chpiri uéreenga (Dan. 7:​9, 10). Ka Juanu exespti Tata Diosï Jeobani tronu ma jimbo uaxakatini jarhani, ka imeeri uirhipandani jimbo jarhaspti ambe ma enga xáxepka eska arkoirisi “enga ísï meremerejkuenga komueska esmeralda” (Apok. 4:​2-4). Eratsentani na enga xáni kʼériika Tata Diosï Jeoba, miátantasïndijtsïni eska kʼéri kóntperata máeska imani kómarhini ka eska kánikua jukaparhakueska janhanharhikua jingoni ísï úni. w22.07 20 párr. 3

Satanási jánguarhintaati parakaksï tumbiicha ka uátsïicha no uaaka sánderu andarhierani Tata Diosï Jeobani nijtu mintsikani. Ima jánguarhintaati parakari nóteru seguru jauakia eska jurhimbikueska ambe engari jorhenguarhikia Bibliarhu. Pori ejemplu, niáraati jurhiatikua engakeni nema arhiaka eskajtsïni no Tata Diosï kueraaska, sino eskachi ebolusioni jimbosï jaka. Engari sapiipka jamberiri no eratseenga ini ambe, peru iásï engari uátsï o tumbiikia, jamberiri ueenakia kurhaani i ambe eskuelarhu. Ka jamberi uaati ísï xarharani enajki ísïi ambe engaksï maestruecha uandajka. Peruksï jamberi imeecha no méni arhutati tiempu paraksï exeani pruebechani engaksï xarhatajka eska jarhaska Kueraajpiri ma. Miá ambe enga uandajka Proverbios 18:17: “Enga orheta uandantajka ísï xarhatasïndi enajki ísïi ambe enga ima uandajka, astaka niárajka máteru ka sési kurhamarhini”. ¿Ambejtsïni jorhendasïni i tekstu? Eskari no jatsiska parari iámindu ambe jakajkuni ambe engaksïni eskuelarhu arhiaka. Sánderu sési, sési exe ambe enga uandajka Tata Diosïiri Karakata ka juchaari publikasioniicha. w22.08 2 párr. 2; 4 párr. 8

Uékasïngachi kurhanguni ambe engachi Bibliarhu arhintajka, jimboka engachi no ísï úska, ambe engachi arhintaaka nójtsïni marhuacheati. Ju je eratsentani ambe enga Jesúsi arhipka “Leiiri jorhentpirini” ma (Luk. 10:​25-29). Ima achamasï uékasïreendi míteni ambe enga jatsipka para úni para tsípikua jatsini para méntkisï. Ka para úni mókukuntani, Jesúsi úspti eska eratsentapiringa Tata Diosïiri Karakatani. Arhispti: “¿Ambe karakata jarhaski libru Leiiri jimbo? ¿Ambeeri arhintasïni?”. Ima acheeti sési mókukuntaspti. Ka úraparini ambe enga Tata Diosïiri Karakata arhijka uandaspti eska jatsispka para xénchani Tata Diosïni ka ístu máteruechani (Lev. 19:18; Deut. 6:5). Peru tátsekua kurhamarhispti Jesúsini: “¿Andi neeski juchiiti besinu [o prójimu]?”. Enga ísï uandapka, xarhataspti eska sési jimbo no kurhangusïreenga ambe enga arhinteenga. Ka indeni ambe jimbo no mítespti néna úni ambe enga arhintapka. Engajtsïni Tata Diosï Jeoba no jarhuataaka, nóchi uaaka kurhanguni ambe enga Biblia arhijka, ísï jimbochisï kurhakujka eskajtsïni íntskuaka imeeri espiritu santu parachi no máteru ambe eratseni jarhani engachi arhintani jauaka. Ka ju je kurhakuni eskajtsïni jarhuataaka ísï úni eskachi na arhintakia. w23.02 9 párr. 4, 5

“¿Nénari niáraski míteni jurhimbikuani?”. Seguru eskachi uánikua xanhari kurhamarhinhaskia i ambe. Ini ambejtsïni kurhamarhisïndi erachiicha engachi primeru xanhari ueenajka uandontskuarheni imeecha jingoni. Kánikuachi tsitisïnga kurhaani na engaksï juchaari erachiicha niáraka míteni jurhimbikuani ka xénchani Tata Diosï Jeobani. Ka ístuchi kánikua tsitisïnga aianguani na engachi xáni jukaparhajka Biblieri jurhimbikua ambe (Rom. 1:11). Engachi iiri ambe uandontskuarhejka, miátantasïndijtsïni na enga xáni kʼéri kóntperata máeka Jeobaeri testigueni. Ka ístujtsïni jarhuatasïndi parachi seguiriini jámani indeni uandakua jingoni “enga ísïika”, i ambe arhikuekasïndi eskachi mintsita jingoni uékasïnga ísï irekani eska Tata Diosï na uéjka ka eskachi uékasïnga eskajtsïni ima jaiapanhentaaka. Uánikua ambe jarhasti engachi jimbo kánikua tsitijka jurhimbikuarhu jarhani. Ka enga sánderu jukaparhakueka, jindeesti eskachi xénchasïnga Tata Diosï Jeobani, jimboka imasï jorhentpijka jurhimbikua ambe. Imeeri Karakatani jimbo, enga jindeeka Biblia, jorhenguarhiskachi eska ima úska auandani ka Echerini jimboka kánikua uinhapiska. Ka sánderu ambakiti ambe, eska ima jindeeska juchaari Taati auandarhu anapu engajtsïni xénchajka ka enga uandanhiajka juchantsïni jimbo (1 Ped. 5:7). w22.08 14 párr. 1, 3

Apostoli Pablu pʼímarhiaspti erachiichani paraksï uékperakua xarhatatsperani ‘ambakiti ambe úparini’ (Ebr. 10:24). No solu jarhuataaspti uandakuecha jingoni, sino úkuecha jingoni. Pori ejemplu, engaksï Judá anapu kristianuecha kʼéri kʼarhingua ma nitamakuarhipka, Pablu jindeespti ma ima erachi enga pákuapka ambe ma imeechani engaksï uétarhinchani japka (Úku. 11:​27-30). Ka nájkiruka Pablu kánikua ánchikuarhita jatsipka para aianhpini ka jorhentpini, méntkisï jirinhakuntasïreendi para jarhuataani erachiichani engaksï no kánikua jatsikuarhepka. Enga ísï ueenga jarhuataasïreendi erachiichani parakaksï imeecha mintsikapiringa eska Tata Diosï Jeoba méntkisï kuidariuapiringa. Iásï ini jurhiatikuechani jimbo, juchajtuchi uaaka jarhuataani erachiichani parakaksï uaaka sánderu mintsikani Tata Diosïni. Engachi úraska juchaari tiempuni, uinhapikuani ka ambe engachi jorhenaka parachi jarhuajpeni jima enga no sési ambe úkuarhijka ka engachi donasioniichani íntspiajka paraka seguiriuaka aianhpinhani iámu parhakpinirhu. Ini ambe jimbo ka engachi máteru ambe úska, uaakachi jarhuataani erachiichani parakaksï mintsikaaka eska Tata Diosï Jeoba no méni jurajkuauaka. w22.08 23 párr. 14

Bibliarhu uánikua profesiechaksï jarhasti engaksï ísï úkuarhikia, ka máruksï tʼuini ióntki karakata jarhasptia ante deksï kumplirikuarhini. Istoria xarhatasïndi eskaksï inde profesiecha niáraska ísï úkuarhini ka inde ambejtsïni no ísku pakatasïndi jimbokachi míteska eska Tata Diosï Jeobasï kararkuarhiapka. Ju je eratsentani na enga kʼamajkunhapka Babilonia, ireta ma enga kánikua uinhapikua jatsipka. Siglu ochu jimbo ante de Jesúsi, Tata Diosï Jeoba úspti eska profeta Isaíasi uandapiringa eska Babilonia inchakunhapiringa. Isaíasi uandaspti eska ima achamasï enga inchaakupiringa, Siru arhinhapiringa ka ístu uandaspti néna enga ísï úpiringa (Is. 44:​27–45:2). Ístu, Isaíasi uandaspti eska tiempu jingoni, Babilonia kʼamajkunhapiringa ka eska nóteru nema irekapiringia jima (Is. 13:​19, 20). Meduecha ka persechaksï inchaakuspti indeni kʼéri ireta jimbo uéxurhini 539 ante de Jesúsi, ka iásï imani lugari jimbo enga xáni sési jáxepka, tsakapu ambeterkusï jatiia. w23.01 4 párr. 10

Tata Diosï Jeobajtsïni kʼéri kóntperata ma íntskusti parachi kuenta úkuarhini imeeri marhuariicha jingoni engaksï interu parhakpini jaka. Ini ambe jimbochi úsïnga uánikua kóntperatechani jatsiani (Mar. 10:​29, 30). Iámu parhakpinirhu jarhastiksï erachiicha ka pirenchicha engaksï kánikua xénchajka Tata Diosïni ísï eska jucha ka engaksï jánguarhintajka kurhajchaani imeeri juramukuechani. Jamberi juchaari idioma, pʼindekuecha ka na engachi xukuparhajka, ménderueniiti, peru desde jiánchi ueenasïnga xénchaani erachiichani engachi míteajka. Ka kánikuachi tsitisïnga májku kʼéri kómarhini ka kʼéri ambe arhini juchaari Taati auandarhu anapuni. Uétarhisïndi eskachi májku kʼéri jauaka juchaari erachiicha jingoni (Sal. 133:1). Imeechajtsïni jarhuatasïndi orhepani uérakuani uandanhiateechani (Rom. 15:1; Gal. 6:2). Ístu, uinhaperantasïndijtsïni parachi seguiriini Tata Diosï Jeobani marhuakuni ka parachi seguiriini imeeri amigueni (Ebr. 10:​23-25). Kánikuachi kómu pʼikuarherapiringa engajtsïni kúnguarhikua no jarhuatapiringa parachi úni andaani juchaari enemiguechani: Satanásini ka imeeri parhakpinini enga xáni no sési ambe újka. w22.09 2, 3 párr. 3, 4

Ambe ma enga úpiringa úni eskachi no uaaka pʼíngukuarhini, jindeestiksï redesi sosialiicha. Engachi no jingontku jámaska, úpiringachi mítetaraani uánikua kʼuiripuechani ambe engaksï no jatsiaka para míteni. Engachi ísï úska, nóchi uaaka míteni na enga úranhaaka inde informasioni ka nijtu úni sési peentani problemechani engaksï jauaka indeni ambe jimbo. Ístu, uétarhinchasïngachi pʼímukukuarhini engajtsïni juchaari enemiguecha uékani jauaka enganiarini parachi aianguani ambe ma enga úpiringa no sési úkuani juchaari erachiichani. I ambe úpirindi úkuarhini engachi paisi ma jimbo japiringa engachi no jurajkunhajka parachi tánguarhini ka aianhpini ka polisieechajtsïni kurhamarhini juchaari kúnguarhikueri ambe. Enga i ambe úkuarhiaka o máteru ambe, kánikuajtsïni jarhuataati ísï úni eska ari prinsipiu na uandajka: “Ómutini jauaka ambe ma jingoni” (Sal. 39:1). Uétarhisïndi eskachi mintsinharhikueuaka para juchaari familia, juchaari amiguecha, juchaari erachiicha ka para náki uéjki kʼuiripu ma. Ka para i ambe úni, kánikua jukaparhakuesti eskachi jorhenaaka pʼíngukuarhini. w22.09 13 párr. 16

Parachi úni meru tsípikua jingoni irekani jatsiskachi para arhintani ka jorhenguarhini Tata Diosïiri Uandakuani. Ka uétarhinchasïngachi ísï úni. Jimbosï Jesúsi uandapti: “No solu kurhinda jimbojku uaati irekani ma kʼuiripu, sino iámindu uandakua jimbo enga [Tata] Diosï uandaka” (Mat. 4:4). Ísï jimbo, ju je no jurajkuni eska nitamaaka ni ma jurhiatikua ka jucha no arhintani Tata Diosïiri Uandakuani. Tata Diosï Jeobajtsïni kánikua xénchasïndi, ísï jimbojtsïnisï arhijti Bibliarhu ambe engachi jatsika para úni parachi tsípikua jingoni irekani. Pori ejemplu, jorhendasïndijtsïni andijtsïnisï kueraa, nénachi uaa imeeri amigueni ka ambechi jatsiski para úni parajtsïni puácheantani juchaari pekaduechani. Ístujtsïni jorhendasïndi ima ambakiti irekueri enga sánderu orhepani jauaka (Jer. 29:11). Míteni ambe engajtsïni Biblia jorhendajka, úsïndi eskachi sési pʼikuarheraaka juchaari mintsitarhu. Ísï jimbo, engachi no sési pʼikuarherani jarhajka problemecha jimbo, ju je arhutani tiempu parachi sánderu arhintani Tata Diosï Jeobaeri Uandakuani ka eratsentani ambe engachi arhintaaka. w22.10 7 párr. 4-6

Bibliajtsïni pʼímarhisïndi no ísï jámani eska imeecha engaksï no jánhastiika. Uaakachi jánhaskakua jatsini engachi jánguarhintaska ísï irekani eskaksï na uandajka Biblieri prinsipiuecha. Engachi ísï újka, sánhani arhisïngachi kuenta íntskukuarheni eskaksï Biblieri prinsipiuecha marhuasïnga parachi ambakiti ambe erakuni úni ka ísïchi no xáni uandanhiateechani jatsiani. Ístu kánikua sési jarhasti eskachi exeaka ambe engachi xáni úkia juchaari tsípikuarhu. Pori ejemplu, engajtsï ióni páni jakaia Bibliani jorhenguarhini ka tánguarhikuecharhu nirani perujtsï útasï nótki aiakukuarheni Tata Diosï Jeobani nijtu itsï atakuarhini, uaakajtsï kurhamarhikuarhini andisïjtsï no ísï úni jaki. O engajtsï itsï atakuarhikia, ¿sánderujtsï sési aianhpisïnia ka jorhentpini Biblieri ambe? ¿Ambe engajtsï erakujka úni xarhatasïni eskajtsï jurajkusïnga eskaksïni Biblieri prinsipiuecha jarhuataaka? ¿Ísïjtsï kaasïni máteruechani eska Jesúsi na kaapiringa? Engachi exeska eskachi uaaka sánderu sési úni ambe ma, ju je ísï úni eskaksï na uandajka Tata Diosï Jeobaeri konsejuecha engaksï mímixeti újka “imani enga no ma ambe míteka” (Sal. 19:7). w22.10 20 párr. 8

Esekieli exespti na enga xáni uinhapitiika Tata Diosïiri espiritu santu. Jánhaskua ma jimbo exespti na enga espiritu santu jarhuatauenga ánjeliichani engaksï xáni uinhapitiika ka na enga manatauenga auandarhu anapu karrueri ruedechani (Ezeq. 1: 21). Ima mismujtsïni aiangusïndi na enga pʼikuastapka inde ambe, aiangusïndijtsïni: “Engani exepka, tinguikuatsespka echerirhu”. Ísku pakaraspti enga jamberi tinguikuatsepka echerirhu (Ezeq. 1:28). Jamberi mándani xanhari enga miánteenga indeni jánhaskakuani, sánderu seguru jarhasïreendi eska úpiringa seguiriini aianhpini Tata Diosïiri espiritu santueri jarhuajperata jingoni. Jeoba juramukuspti Esekielini: “Acheetiiri uájpa, jauara parakeni uandontskuarhechini”. Ima ambe enga juramuminhapka ka Tata Diosïiri espiritu, uinhaperantaspti paraka úpiringa jauarani (Ezeq. 2:​1, 2). Ísï tátsekua ka iámindu imani tiempu jimbo enga jámapka aianhpini, úspti exeni eska “Tata Diosïiri jájki”, enga jindeeka imeeri espiritu santu, jarhuataspka (Ezeq. 3:22; 8:1; 33:22; 37:1; 40:1). w22.11 4 párr. 7, 8

Profeta Isaíasi uandasïndi eska Tata Diosï Jeoba jorhentpiri máeska enga imeeri jorhenguarhiriicheeri tátsepani jimbo nirani jaka para arhiani nani engaksï ísï niuaka. ¿Nénachi kurhaasïni iásï Tata Diosïiri uandakuani enga ísïika enajkitsïni tátsepani uératini uandajpani jaki? Engachi Bibliani arhintajka. Jimbokaksï ióntki ixú karanhaska Tata Diosïiri uandakua. Ísï jimbo, engachi arhintajka ísïipirindi enajkichi kurhaani japiringa Tata Diosï Jeobaeri uandakuani juchaari tátsepani jimbo (Is. 51:4). ¿Ambechi jatsiski para úni parachi úni marhuatani ambe engajtsïni Tata Diosï Jeoba arhijka? Isaíasi tsimani ambe uandasïndi. Orheta uandasïndi “I jindeesti xanharu”, ka tátsekua, “Jimini jáma”. Ísï jimbo no solu uétarhisïndi míteni “xanharuni”, ístuchi jatsiska para jima jámani. Biblia jimbo ka ambe engajtsïni Tata Diosïiri kúnguarhikua jorhendajka, mítesïngachi ambe enga Tata Diosï Jeoba uéjka eskachi uaaka ka néna engachi uaaka ísï úni eskachi na jorhenguarhijka. I tsimani ambejtsïni jarhuataati parachi tsípikua jingoni tekaantani engachi Tata Diosï Jeobani marhuakujka. Soluchi ísï uaaka seguru jarhani eskajtsïni ima újchakuraaka. w22.11 10, 11 párr. 10, 11

Sánisï tátsekua engaksï sáno iámindu Jesúsiiri apostoliicha uarhipkia, kúnguarhikuarhu ueenasptiksï jarhani no jurhimbiti kristianuecha (Mat. 13:​24-27, 37-39). Íchaksï, úndaspti “nánterkueni jorhentpini paraksï támu paani jorhenguarhiriichani imeechani jingoni” (Úku. 20:30). Tiempu jingoni, ma ambe engaksï ueenapka “nánterkueni jorhentpini” o imani ambe enga no ísïika, jindeespti eska Jesúsi no íntspispka imeeri kuerpuni “ma ueltajku [...] para késtataani uánikuecheeri pekaduechani”. Imeechaksï jorhentpisïreendi eska Kristu mémindu jatsiska para íntspini imeeri kuerpu, peru Biblia no ísï jórhentpesïndi (Ebr. 9:​27, 28). Iásï uánikua kʼuiripuecha engaksï ambakiti mintsita ma jataka, jakajkusïndiksï ini jorhenguarhikuani enga no ísïika. Ka mándani semanaksï nirasïndi iglesiarhu o asta pauani pauani paraksï imani ambe úntani enga ísï mítekateka komueska tata diosïni pʼirani. Ístuksï jarhasti relijionicha engaksï no someni miántajka Jesúsiiri uarhikuani, peru uánikuecha engaksï ini relijionicharhu jámajka, nóksï kurhangusïndi ambe enga arhikuekajka Jesúsiiri uarhikua. w23.01 21 párr. 5

Enga Jesúsi Mili Uéxurhini Juramuaka, tsítantauati uarhiriichani ka jarhuatauati paraksï perfektueni iámindu imani kʼuiripuechani engaksï kurhajchaaka Tata Diosï Jeobani. Ima kʼuiripuecha enga Tata Diosï Jeoba exeauaka eskaksï kaxumbitiiska, Echerirhuksï “irekaati para méntkisï” (Sal. 37:​10, 11, 29). Ka “últimu ikiatspiti enga andanhaaka, jindeuati uarhikua” (1 Kor. 15:26). ¡Xáni ambakiti ambe enga úkuarhiaka! Biblia xarhatasïndi eskachi uaaka irekani para méntkisï. Ini ambe erokuarhini jarhani jarhuatasïndijtsïni parachi no méni jurajkuni Tata Diosïni ini últimu jurhiatikuecha jimbo engaksï xáni úkua jukaka. Peru engachi uéjka jaiapanherantani Tata Diosï Jeobani, jatsiskachi para no méni jurajkuni imani ni Jesúsini ka ísïchi úsïnga jimbokachi kánikua xénchaasïnga, ka no solu jimbokajtsïni aiachixaka eskachi uaaka irekani para méntkisï (2 Kor. 5:​14, 15). Na engachi xáni xénchaajka imeechani, jarhuatasïndijtsïni parachi májkueni úni eska imeecha ka parachi aianguani máteruechani ambe engachi erokuarhini jaka (Rom. 10:​13-15). Engachi jánguarhintaska no juchajku pendienti pákuarhini ka intsïmpitiini, Tata Diosï Jeoba sánderu uékaati juchaari amigueni para méntkisï. w22.12 7 párr. 15, 16

Engachi no sési kánhani jarhajka, úpiringachi nóteru jatsinia imani ambe engajtsïni jarhuatajka parachi sési pʼikuarherani ka pínandikua jatsini. Jamberichi uandanhiajki ambe enga úkuarhiaka sánderu orhepani. Ka no no sési jarhasti ísï pʼikuarherani. Joperu ísï eska Jesúsi na arhiapka imeeri chúxapatiichani, ju je no jurajkuni eska inde ambe uaaka eskachi nóteru mintsikaakia Tata Diosïni (Juanu 16:​1, 2). Ísïisti, Jesúsi uandaspti eskachi no sési kánhapiringa, peru ístu uandaspti eskachi uaaka no méni jurajkuni Tata Diosïni (Juanu 15:20; 16:33). Engachi nóteru sésikua jatsiakia ochi nóteru jurajkunhania parachi Tata Diosïiri ánchikuarhitani úni, jamberijtsïni Beteli o orhejtsïkutiicha arhiati ambe engachi uaaka úni parachi kuájchakukuarhini, seguiriini jorhenguarhini Tata Diosïiri ambe ka parachi aianhpini xáni eskachi xáni uaaka. Enga ísï úkuarhiaka, ju je ísï úni eskachi na arhinhaaka (Sant. 3:17). Ka ju je no méni aianguani juchaari erachiicheeri imeechani engaksï no jatsika para míteni (Ecl. 3:7). w22.12 20, 21 párr. 14-16

Ísï eska na aiatspepka Jesúsi, ima seguiriixati iásï jamberi orhejtsïkuani imeeri chúxapatiichani engaksï aianhpini jámajka Tata Diosïiri Reinueri ambe iámu parhakpinirhu. Jesúsi úrasïndi Tata Diosï Jeobaeri kúnguarhikuani parajtsïni jorhendani néna aianhpini ambakiti aianhperakuani ka íntskusïndijtsïni ambe engachi xáni uétarhinchajka parachi ísï úni (Mat. 28:​18-20). Ambe engachi jucha jatsika para úni, jindeesti jánguarhintani aianhpini ka jorhendaani máteruechani ka jingontku jarhani enga jamberi Tata Diosï kʼamajkuaka ini parhakpinini. Ka seguruchi jauaka “asta kʼamarhutani jamberi” eska ísï úkuarhiaka eskachi na erokuarhini jaka engachi ísï úska eska na arhijka Ebreu 6:​11, 12. Tata Diosï Jeoba uandastia na enga jatini kʼamajkuaka Noambakitiiri parhakpinini. Enga niáraaka inde jurhiatikua, ima uaati eskaksï kumplirikuarhiaka Biblieri profesiecha. Ka nájkirukachi ménisï ísï exeaka eska inde jurhiatikua ióndaxaka niárani, Tata Diosï Jeobaeri jurhiatikua “no ióndaati janoni” (Hab. 2:3). Ísï jimbo, eratsetixakachi ísï úni eska na uandajka Miqueas 7:7: “Méntkisï jingontkuni jauaka Jeobaeri ambe jimbo, tékaantskua jingoni erokaaka Tata Diosïni enga juchiiti pʼímutantspitiika”. w23.02 19 párr. 15, 16

Enga nema kʼumanchikua ma úni jarhajka, ambe enga uéjka jindeesti kʼamarani ka jima irekani. Peru enga úni jarhajka, anhaxurhisïndi ka exesïndi na enga xáni kánikua úkia. Sáno májkueni, juchajtuchi jatsiska para anhaxurhini ka eratsentani na engajtsïni Tata Diosï Jeoba jarhuatani jaka parachi úni orhepani uérani engachi no sési nitamakuarhini jarhajka. Enga na kʼamarakia jurhiatikua ma, ju je kurhamarhikuarhini: “¿Nénarini kóndeski iásï Tata Diosï Jeoba? Nájkirukani útasï no sési nitamakuarhini jaka, ¿ambe úxaki Tata Diosï parareni jarhuatani tekaantani?”. Ju je jánguarhintani pauani pauani exeni sikiera ma ambe enga Tata Diosï Jeoba úka parajtsïni kóndentani. Tata Diosï Jeoba no no sési exesïndi ka kurhanguchisïndijtsïni engachi kurhakujka eskajtsïni kénditacheaka uandanhiatani engachi nitamakuarhini jarhajka (Filip. 4:6). Peru ju je no mirikurhiani kóntperatechani engachi iásï jatsiani jaka. Jimboka ambe uéjkichi nitamakuarhini jarhani, Tata Diosï Jeobajtsïni aiachisïndi eskajtsïni íntskuaka uinhapikua ka eskajtsïni jarhuataaka parachi úni tekaantani. Ísï jimbo, ju je méntkisï agradeserikuni Tata Diosï Jeobani imani ambe jimbo enga újka parajtsïni jarhuatani. Engachi ísï úska, exeakachi eskajtsïni Tata Diosï Jeoba jarhuataxaka parajtsïni sési nicheni jiáni jamberi engachi uandanhiateechani jatsiajka (Gén. 41:​51, 52). w23.01 19 párr. 17, 18

Ísï jimbo, ju je kurhamarhikuarhini: “¿Na engani irekaka xarhatasïni eskani kurhangusïnga eska nóteru ióni jimbo i parhakpini kʼamajkunhaakia? ¿Ambe engani erakujka eskueleeri ka ánchikuarhiteeri ambe, xarhatasïni eskani sánderu jukaparharasïnga Tata Diosï Jeobani marhuakuni? ¿Mintsikasïni eskarini Tata Diosï Jeoba kuidariuaka jíndeni ka ístu juchiiti familiani?”. Tata Diosï Jeoba kánikua sési pʼikuarherasïndi enga exejka eskachi jánguarhintasïnga ísï irekani eska ima na uéjka (Mat. 6:​25-27, 33; Filip. 4:​12, 13). Jatsiskachi para someni exekuarhini jarhani na engachi eratsejka ka jánguarhintani mójtakuni ambe enga xáni uétarhiaka. Pablu ini ambe arhiaspti Korintu anapu kristianuechani: “Eratsenta je chájkumindu siengajtsï sési jimbo jakajkuni jaka [Tata Diosïni] ka tsʼéjkukuarhi je chájkumindu” (2 Kor. 13:5). Ísï jimbosï uétarhijti eskachi méntku seguiriini jauaka mójtakuni juchaari eratsekuani arhintaparini Tata Diosïiri Uandakuani, jorhenguarhiparini ísï eratseni eska ima ka tátsekua mójtakuni ambe enga xáni uétarhiaka parachi jaiapanherantani (1 Kor. 2:​14-16). w23.01 9 párr. 5, 6