Agostu

¿Andisï Tata Diosï Jeoba karapirini librurhu ma imeecheri nombriichani engaksï uandakuecha jingoni xarhatajka eskaksï janhanharhisïnga ka eratsentasïnga Tata Diosïiri nombrini? Ambe engachi uandajka xarhatasïndi ambe enga juchaari mintsitarhu jaka. Jesúsi uandaspti: “Inde ambesï uandanhaj[ti] enga mintsitarhu uinirini jarhajka” (Mat. 12:34). Tata Diosï Jeoba uékasïndi eska imeecha engaksï xénchajka imani, irekaaka para méntkisï jimbanhi parhakpinirhu ma. Paraka Tata Diosï Jeoba jiókuarhiaka engachi kʼéri ambe arhiaka, ima exesïndi ambe engachi uandajka (Sant. 1:26). Uánikua kʼuiripuecha engaksï no xénchajka Tata Diosï Jeobani, no sésiksï uandontskuarhesïndi, ikiakuarhisïndiksï ka kʼéramakuarhini (2 Tim. 3:​1-5). Juchachi no uékasïnga ísïini eska imeecha. Sánderu sési, uékasïngachi eska Tata Diosï Jeoba sési pʼikuarheraaka imani ambe jingoni engachi uandajka. ¿Joperu sési pʼikuarheraa nemani jingoni enga sési uandontskuarhejka tánguarhikuecharhu ka aianhpikuarhu, peru imeo uinhamarhikuani ka no sési arhiani imeeri familiarhu anapuechani? (1 Ped. 3:7). w22.04 5 párr. 4, 5

Tata Diosï eratsetaraasïndi diesi sïuanguechani ka no sési jásï animalini paraksï kámajkuni Kʼéri Babiloniani. Ísïisti, Tata Diosï uaati eskaksï juramutiicha úraaka animali charhapitini enga jindeeka Naciones Unidas para no sési kaani relijioni no jurhimbitiichani ka kʼamajkuani para méntkisï (Apok. 18:​21-24). ¿Ambechi jorhenguarhisïni? Jukaparhakuesti eskachi seguiriuaka ísï kómarhini Tata Diosïni eska ima na uéjka ka no ma “kʼamanharhintskua jingoni” (Sant. 1:27). Ju je no jurajkuni eska Kʼéri Babilonia uaaka eskachi imani ambe jakajkuaka enga ima jorhentpijka, eskachi uántauaka kʼuínchikuechani engaksï no sési jaka, eskachi imani ambe eratseaka ka úni ambe enga ima uéjka o eskachi imani ambe uaaka enga demoniuecheri ambeeka. Ka ju je seguiriini arhiani kʼuiripuechani: “Uéakunta je indeni iretarhu”. Engaksï kʼuiripuecha ísï úska, Tata Diosï no arhiauati eskaksï imeechajtu imani pekaduechani uaaxaka enga Kʼéri Babilonia uaani jaka (Apok. 18:4). w22.05 11 párr. 17; 14 párr. 18

Taatiichaksï exeati na engaksï jatini uaaka jorhendaani sapiichani Tata Diosï Jeobaeri ambe ka iámindu ambakiti ambeeri enga ima úka chánksïni jimbo (Deut. 6:​6, 7). Ka sánderia enga chaari kʼumanchikuarhu nóksï iáminduecha Tata Diosï Jeobani marhuakujka ka chá no úni jorhendaani chaari sapiichani. Pirenchi ma enga Christine arhinhajka, uandantasïndi: “Kasi no úsïreenga uandontskuarhekuani juchiiti sapiichani Tata Diosïiri ambe, jimbosïni jánguarhinteenga uandontskuarhekuani jiáni engani úpiringa”. Ístu, sési uanda je Tata Diosï Jeobaeri kúnguarhikueri ambe ka erachiicheeri ambe. Asï arhinchaa je orhejtsïkutiichani. Ambe engajtsï uandaaka imeecheri ambe uaati úni eskaksï chaari sapiicha mintsikauaka imeechani jiáni engaksï uandanhiateechani jatsiauaka. Jánguarhinta je sési pájperani kʼumanchikuarhu. Jánguarhinta je arhini chaari acheetini ka chaari sapiichani eskajtsï xénchaasïnga. Ambakiti ambe uanda je chaari acheetiiri ambe ka janhanharhikua jingoni ka jorhendaa je chaari sapiichani paraksï májkueni úni. I ambe uaati úni eskajtsï iáminduecha sési pájperaaka ka sánderu fásiliuati parajtsï jorhenguarhini Tata Diosï Jeobaeri ambe (Sant. 3:18). w22.04 18 párr. 10, 11

Ambe enga Jesúsi arhiapka Éfesu anapu kristianuechani xarhatasïndi eskaksï tekaantaspka ka eskaksï seguirispka sési marhuakuni Tata Diosï Jeobani nájkirukaksï no sési nitamakuarhini japka. Peruksï nóteru ísï xénchasïreendia eska ueenakuarhu. Ka engaksï uékeenga eska Tata Diosï jaiapanhentapiringa ambe engaksï ueenga para kʼéri ambe arhini, jatsisptiksï para ménderu ísï xénchani eska ueenakuarhu. Ka májkueni úkuarhisïndi iásï, nóchi solu jatsiska para tekaantani, sino jatsiskachi para mintsita jingoni ísï úni. Tata Diosï Jeoba no solu exesïndi ambe engachi újka, sino ístu andichisï ísï újki. Para ima kánikua jukaparhakuesti ambe engachi jimbo újka ambe ma. Ima uékasïndi eskachi kʼéri ambe arhiaka jimbokachi xénchasïnga ka jimbokachi agradesidu jarhaska imani jingoni (Prov. 16:2; Mar. 12:​29, 30). Ju je seguiriini jingontku jarhani. Sardisi anapu kúnguarhikua máteru uandanhiateechani jatsiaspti. Nájkirukaksï ióntki sési marhuakuni japka Tata Diosï Jeobani, tátsekuaksï nóteru xáni jánguarhintaxaptia. Jesúsi arhiaspti eskaksï jatsispka para jingontku jarhani. Ka juchachi uaaka jorhenguarhini inde amberi enga arhiapka. Ísïisti, Tata Diosï no mirikurhisïndi ambe engachi újka para imani marhuakuni (Ebr. 6:10; Apok. 3:​1-3). w22.05 3 párr. 6, 7

Salomóni uandaspti eska engachi sési pʼikuarherajka ánchikuarhita jimbo, “Tata Diosïiri kóntperata” máeska (Ecl. 5:​18, 19). Ístu karaspti: “Ka ima no ísku jatinisï ísï uandani japti. Ima sési mítesti ambe enga jindeeka ánchikuarhini jimboka kʼumanchikuechani uaaspka, ubasï ambe jatsikuspti, jardiniichani uaaspti, posuechani para itsï pʼitani ka ireteechani (1 Rey. 9:19; Ecl. 2:​4-6). Salomóni meru kánikua ánchikuarhispti ka sési pʼikuarheraspti indeni ambe jimbo. Peru mítespti eska uétarhisïreenga sánderu ambe para ma úni meru tsípini pʼikuarherani. Ístu uánikua ambe úspti para Tata Diosï Jeoba. Pori ejemplu, orhejtsïkuspti para sési jásï templu ma úkuni para kʼéri ambe arhini, ka inde ánchikuarhita siete uéxurhini jimbo kʼamarakuarhispti (1 Rey. 6:38; 9:1). Enga na mámaru ambe úpkia, exespti eska Tata Diosïiri ambe sánderu jukaparhakua ambeespka. Karaspti: “Engari na kurhaakia iámindu ambe, ari ambesï jukaparhakueti: kánikua janhanharhi Tata Diosïni enga jurhimbitiika ka ú ambe enga ima juramujka” (Ecl. 12:13). w22.05 22 párr. 8

Biblia uánikuecheeri uandasïndi enga Tata Diosï iámu mintsita jingoni puákuantapka ¿Miásïntsï nemani? Jamberijtsï rei Manasésini eratseni jaka. Ima kánikua no sési úrispti ka kʼérati pekaduechani uaaspti para no sési pʼikuastani Tata Diosï Jeobani. Úspti eskaksï kʼuiripuecha no jurhimbiti diosïchani kʼéri ambe arhiapiringa ka kurhiraaspti uájpeechani para ini diosïichani kéjtsïtakuani. Ka no sáni kʼuratseparini incharaspti diosï úkatani ma Tata Diosï Jeobaeri pímbinhasï templurhu. Biblia i ambe uandasïndi imeeri ambe: “Kánikua no sési jásï ambe úspti Tata Diosï Jeobani japarini para ikiatani” (2 Crón. 33:​2-7). Peru enga Manasési sési jimbo móantapka, Tata Diosï Jeoba mintsita jingoni puákuantaspti (2 Crón. 33:​12, 13). Máteru ejemplu jindeesti rei Dabidi. Imajtu kʼérati pekaduechani uaaspti komu ísku jándikua ambe ka uándikpispti. Peru enga Dabidi jiókuarhipka eska no sési úspka ka enga mintsita jingoni móantapka, Tata Diosï Jeoba ístu puákuntaspti (2 Sam. 12:​9, 10, 13, 14). Ísï jimbo, uaakachi seguru jarhani eska Tata Diosï meru uékasïndi puátspentani. w22.06 3 párr. 7

No méntkisï fásiliisïndi mintsikani eska ísï úkuarhiaka ambe engachi erokuarhini jaka. Jamberichi uaaka kuatantani erokuarhini eska Tata Diosï ísï uaaka eska na aiatspeka. Peru Tata Diosï Jeoba no májkueni exesïndi tiempuni eska jucha ka ima méntkisï jauati (2 Ped. 3:​8, 9). Ima jánguarhiati ísï úni eska na eratsetini jakaia, peru no jiáni engachi jucha uékaaka. ¿Ambejtsïni jarhuataa parachi tekaantskua jingoni seguiriini mintsikani iámindu ambe enga Tata Diosï aiatspekia? (Sant. 5:7). Sánderu andarhieraani Tata Diosï Jeobani, jimboka imasï újka eska úkuarhiaka ambe engachi erokani jaka. Biblia uandasïndi eska para erokuarhikua jatsini, uétarhisïnga jakajkuni eska Tata Diosï jarhaska ka eska “premiu íntsauaka imeechani engaksï jirinhantajka imani” (Ebr. 11:​1, 6). Engachi sési jimbo jakajkuska eska Tata Diosï Jeoba jarhaska sánderuchi mintsikaaka eska ima kumpliriuaka ambe enga aiatspekia. Parachi úni sánderu mintsikani ambe engachi erokuarhini jaka. jatsiskachi para kómarhini Tata Diosï Jeobani ka arhintani imeeri Karakatani. Ísïisti, nóchi úsïnga exeni Tata Diosïni, peruchi uaaka imeeri amigueni. Engachi kómarhijka, uandontskuarhenchi jarhasïnga imani jingoni, ka imajtsïni meru kurhajchani jarhasïndi (Jer. 29:​11, 12). w22.10 26, 27 párr. 11-13

Ju je eranhaskani ambe enga úkuarhini japka. Jobu uaxakatixati tʼupuri jápurhu ka pauani pauani no sési pʼikuarherasïndi imani pʼamenchakua jimbo enga kámani jaka (Job 2:8). Imeeri amiguechaksï jánguarhintaxati paraka ima eratseaka eska no sési úri máeska ka eska iámu ambe enga úni jaka, méntku no ma ambe jimbo marhuasïnga. Xáni uánikua uandanhiateecha jimbo, Jobu ísï pʼikuarherasïndi enajki nóteru uaaia orhepani uérani ka no sési pʼikuarherasïndi imeeri mintsitarhu jimboka uarhiranchaska imeeri sapiichani. Orheta pínasku pakarasïndi (Job 2:13). Engaksï imeeri amiguechaksï eratsejka eska Jobu eratsexakaia jurajkuni Tata Diosïni jimboka no ma ambe uandasïnga, méntku no ísïisti. Ma repentku, jamberi eratepariani imeeri amiguechani, Jobu arhiasïndi: “¡Jiájkani jamberi marhuakuaka Tata Diosïni iámu mintsita jingoni astakani uarhiaka!” (Job 27:5). ¿Andisï úpi Jobu uinhapikua jatsini ka balori jukani nájkiruka xáni no sési nitamakuarhini japka? Jimboka kánikua mintsinharhisïreenga eska Tata Diosï jarhuatapiringa nájkiruka no sési nitamakuarhini japka. Mítespti eska nájkiruka uarhipiringa, Tata Diosï Jeoba tsítantapiringa (Job 14:​13-15). w22.06 22 párr. 9

Ima enga Kueraaka Echerini ka auandani, kʼéri kóntperatajtsïni ma íntskusti: úsïngachi uandontskuarhekuni imani engachi kómarhijka. Ju je eratsentani ambe enga arhikuekajka i ambe. Úsïngachi mintsitarhu uératini uandontskuarhekuni juchaari Tata Diosï Jeobani na uéjki jatini ka na uéjki idioma jimbo. Úsïngachi kómarhini juchaari Taatini engajtsïni xáni xénchajka nájkirukachi ospitalirhu jauaka o engachi ónhakata jauaka kárselirhu mintsikaparini eskajtsïni ima kurhajchaaka. ¿A no eskachi kánikua jukaparharasïnga ini xáni k’éri kóntperatani? Para rei Dabidi k’éri kóntperata máespti kómarhini Tata Diosïni. Pirekua ma jimbo, arhispti Tata Diosï Jeobani: “Eska juchiiti kómarhikua ísïiuaka chiiti orhepatini jimbo eska insiensu enga sési úkata jaka” (Sal. 141:​1, 2). Jiáni enga Dabidi irekapka úrakuarhesïreendi pímbinhasï insiensu para k’éri ambe arhini Tata Diosï Jeobani ka saserdotiichaksï kánikua kuidadu jingoni úsïreendi insiensuni (Éx. 30:​34, 35). Enga rei Dabidi insiensueri ambe uandani japka, arhikuekaxapti eska jatsispka para sési eratsentani ambe enga arhipiringa imeeri Taati auandarhu anapuni imeeri kómarhikuecha jimbo. Ka juchajtuchi májkueni uékasïnga úni jimbokachi uékasïnga eska Tata Diosï Jeoba jaiapanhentauaka juchaari kómarhikuechani. w22.07 20 párr. 1, 2; 21 párr. 4

Ju je jurajkuni eska Tata Diosï Jeoba uaaka ambe ma. Tata Diosï Jeobajtsïni no sésikua íntskusti parachi no sési úkuantani imeechani engajtsïni no sési ambe úchika (Rom. 12:​20, 21). Jimbokachi imperfektueka, nóchi úsïnga iámindu ambe kurhanguni ka nóchi úsïnga ísï jusgarpini eska Tata Diosï Jeoba (Ebr. 4:13). Ka ménichani, ambe engachi pʼikuarherajka úsïndi eskachi no sési ambe uaaka. Tata Diosïiri jarhuajperata jimbo, Santiagu karaspti: “Jimboka ma kʼuiripu enga sóntku ikiajka, no úsïnga [ambe] enga jurhimbikueka [Tata] Diosïni japarini” (Sant. 1:20). Uaakachi seguru jarhani eska Tata Diosï Jeoba imani ambe uaaka enga sési jaka ka eska justisia uaaka jiáni enga ima sési exeaka. Engachi puátspentajka xarhatasïngachi eskachi mintsikasïnga eska Tata Diosï Jeoba justisia uaaka. Engachi imeeri jájki jimbo jurajkuaka iámindu ambe, xarhatasïngachi eskachi seguru jarhaska eska ima sési peentaaka iámu ambe enga úkuarhini jaka pekadu jimbo. Jimbanhi parhakpinirhu engajtsïni Tata Diosï aiachika, nóteruchi miántaakia no sési jásï ambe “ka i ambe nóteru no sési pʼikuastaatia mintsitani” (Is. 65:17). w22.06 10, 11 párr. 11, 12

Engajtsïni kʼuiripuecha kurhunhijka, xarhatasïndi eskachi májkueni úxaka eska Jesúsi ka eskajtsïni Tata Diosï Jeoba jaiapanhentasïnga (Mat. 5:​11, 12). Noambakiti úxati eskachi no jurajkunhaaka parachi aianhpini, joperu ima no uaati Jesúsini jingoni. Tata Jesukristueri jarhuajperata jingoni, interu parhakpinirhu mítekuarhixati Tata Diosïiri Reinueri ambe. Máteru ambe engajtsïni ójkutajka, jindeesti xáni uánikua idiomecha engaksï jaka. Enga Jesúsi jánhastapka apostoli Juanuni, xarhatakuspti eska inde ambe no ójkutakua máepiringa para aianhpinhani ambakiti aianhperakuani (Apok. 14:​6, 7). ¿Nénachi úski orhepani uérakuni indeni ójkutakuani? Ma ambe engachi úka jindeesti jatsini informasioni enga Bibliarhu pʼitakata jaka juchaari pájinarhu jw.org jimbo jukari 1,000 idiomecha jimbo. Ístu, Grupu enga Orhejtsïkuajka iámindu kúnguarhikuechani, sésikua íntspisti paraka tradusirikuarhiaka jukari 700 idiomecha jimbo libru Tsípikua jingoni ireka je engachi úrajka para jorhentpini. w22.07 9 párr. 6, 7

Jesúsi pʼamojkuasïreendi kʼuiripuechani. Apostoli Mateu uandaspti: “Enga exeapka xáni uánikua kʼuiripuechani, lástima uaaspti jimbokaksï jandiajku jámaxapka ka etsakuarhitini komueska karichicha engaksï nómbe erangutini jatsijka” (Mat. 9:36). ¿Ka néna exeasïni Tata Diosï Jeoba kʼuiripuechani? Jesúsi ísï uandaspti imeeri Taatiiri ambe: Ima “nómindu uékasïndi eska ma iini jásï sapichu tsïncheaka” (Mat. 18:14). ¡Kánikuachi sési pʼikuarherasïnga míteni na engajtsïni xáni xénchajka Tata Diosï Jeoba! Engachi sánderu sési míteaka Jesúsini, sánderuchi xénchaaka Tata Diosï Jeobani. Máteru ambe engakeni jarhuataaka parari sánderu xénchani Tata Diosï Jeobani ka parari sánderu sési marhuakuni, jindeesti imeecheri amigu úkuarhini engaksï sési marhuakuni jaka imani chiiti kúnguarhikuarhu. Exe na engaksï i erachiicha méntkisï tsípikua jingoni jámajka. Nóksï pʼamondakuarhisïndi engaksï erakuka Tata Diosïni marhuakuni. Uaakari arhiani eskaksïni aianguaka máru ambe engaksï nitamakuarhika imani tiempu jimbo engaksï marhuakukia Tata Diosï Jeobani. Ka engari uékani jauaka jukaparhakua ambe úni arhia imeechani paraksïni jarhuatani. Jimbosï Biblia uandajti: “Engaksï uánikua arhistatspitiicha jarhajka sési uérasïndi ambe ma”. w22.08 3 párr. 6, 7

Iáminduechachi jatsiauaka uandanhiateechani. Joperu eskachi na jorhenguarhikia, nóchi jandiajku jarhaska. Ísï eska taati ma enga kánikua xénchajka uájpani ma na jingontku jarhajka imani jimbo, Tata Diosï Jeoba májkueni úsïndi juchantsïni jingoni. Ima juchantsïni jingoni jarhasti ka listu jarhasti parajtsïni kurhaani engachi mintsita jingoni kurhakujka eskajtsïni jarhuataaka ka merujtsïni uékasïndi jarhuatani (Is. 43:2). Seguruchi jarhaska eskachi uaaka orhepani uérakuani uandanhiateechani jimbokajtsïni Tata Diosï Jeoba íntskusïnga ambe engachi xáni uétarhinchajka, pori ejemplu, kómarhikuani, Bibliani, kánikua informasioni enga Bibliarhu pʼitakateeka ka erachiichani engajtsïni xénchperakua jingoni kámajka. Kánikuachi agradesidu jarhaska engachi jatsika Taati auandarhu anapuni ma enga jingontku jarhajka juchantsïni jimbo. “Ima jindeesti enga jimbo juchaari mintsita tsípijka” (Sal. 33:21). Engachi úraska iámindu ambe engajtsïni Tata Diosï Jeoba íntskujka, xarhatanchi jauaka eskachi agradesidu jarhaska imani jingoni. Ka parajtsïni Tata Diosï seguiriini kuidarini, jatsiskachi para úni ambe ma: méntkisï kurhajchani ka imani ambe úni enga ima sési exejka. Engachi ísï úska ima méntkisï jingontku jauati juchantsïni jimbo. w22.08 13 párr. 15, 16

Ini jurhiatikuechani jimbo kʼuiripuechaksï nóteru mítestia néni mintsikani. Uánikuechaksï sési exeasïndi politikuechani, sientifikuechani ka imeechani engaksï kʼérati negosiuechani jatsiaka, joperuksï kurhamarhikuarhisïndi sinksï iicha meru uéjki jarhuajpeni. Ístu, nóteruksï janhanharhiasïndia relijioniiri orhejtsïkutiichani engaksï uandajka eskaksï kristianueska. Ísï jimbo, nójtsïni ísku pakatasïndi engaksï no mintsikajka Bibliani, libruni engaksï i kʼuiripuecha uandajka eskaksï kurhajchasïnga. Tata Diosï Jeobaeri marhuariichachi seguru jarhaska eska ima jindeeska “Tata Diosï jurhimbikueri” ka eska méntkisï sánderu ambakiti ambe uékasïnga para jucha (Sal. 31:5; Is. 48:17). Seguruchi jarhaska eskachi uaaka mintsikani ambe enga Biblia uandajka. Ka juchajtuchi májkueni eratsesïnga eska achamasï ma enga karaka: “Iámu ambe enga Tata Diosï uandaka, no chkuanderakua ambeesti, ka iámindu ambe niáraati ísï úkuarhini. Tata Diosïiri ireta uaati mintsikani ambe enga ima uandajka jimbokaksï mintsikasïnga imani Tata Diosïni enga indeni ambe uandaka”. w23.01 2 párr. 1, 2

Juchachi uinhaperantauaka juchaari erachiichani engachi jarhuataaska parakaksï sánderu mintsikaaka Tata Diosï Jeobani. Máruksï tekaantaxati engaksï imeecha engaksï no testigueka teresmarhuajka. Máteruechaksï uinhamu pʼamenchaxati oksï no sési pʼikuarherani jarhani imani ambe jimbo engaksï máteruecha arhika. Ka máteruechaksï jamberi ióni páni jatiia engaksï seguiriini jaka erokuarhini eska kʼamaraaka i parhakpini. Iámindu i ambe uaati úni eska kristianu ma nóteru xáni mintsikaakia Tata Diosïni. Primeru siglurhu anapu kristianuechaksï májkueni ambe nitamakuarhispti. Apostoli Pablu úraspti Tata Diosïiri Karakatani parakaksï erachiicha sánderu mintsikapiringa Tata Diosïni. Pori ejemplu, kristianu judiuechaksï jamberi no mítepti ambe arhiani imeeri familiarichani, engaksï imeecha arhiauenga eska Judá anapu relijioni sánderu sésispka ka eska kristianuecheeri, seguru eska karta enga Pablu karakuapka judiuechani kánikua uinhaperantaapka (Ebr. 1:​5, 6; 2:​2, 3; 9:​24, 25). Ima kristianuechaksï úsïreendi úrani ambe enga Pablu karakuapka paraksï úni mókukuantani imeechani engaksï arhinchauenga. w22.08 23 párr. 12-14

Satanásiiri parhakpini jimbo, uánikua kʼuiripuechaksï no mítesti néni mintsikani. Méminduksï no sési pʼikuarherasïndi imani ambe jimbo engaksï újka imeecha engaksï kʼérati negosiuechani jatsiaka, politikuecha ka relijioniiri orhejtsïkutiicha, ístu imani ambe jimbo engaksï újka imeecheri amiguecha, besinuecha ka asta imeecheri familiariicha. I ambe no jatsipirindi parajtsïni ísku pakatani. Biblia uandasptia eska “últimu jurhiatikuechani jimbo”, kʼuiripuechaksï no mintsinharhikuepiringa, chkuanderakua ambeksï uandapiringa ka eskaksï traisionarpepiringa, májkuenksï jámapirindi eska i parhakpini anapu diosï, enga no sáni jukanchaka eskachi mintsikaaka (2 Tim. 3:​1-4; 2 Kor. 4:4). Joperuchi jurhimbiti kristianuechachi míteska eskachi uaaka iámu mintsita jingoni mintsikani Tata Diosï Jeobani. Seguruchi jarhaska eskajtsïni ima xénchasïnga ka eska no méni jurajkuauaka imeeri amiguechani (Sal. 9:10). Ístuchi uaaka mintsikani tata Jesukristuni jimboka ima íntspiska imeeri tsípikuani juchantsïni jimbo (1 Ped. 3:18). Ka míteskachi eskachi uaaka mintsikani ambe enga Biblia uandajka (2 Tim. 3:​16, 17). w22.09 2 párr. 1, 2

Tsípini pʼikuarherani, no jindeesti ambe ma enga ma ratujku ísï pʼikuarherakuarhijka sino ambe ma engaksï kʼuiripuecha uaaka para méntkisï ísï pʼikuarherani. Enga Jesúsi Juátarhu Arhijtsïkpipka uandaspti ambe enga uétarhijka para ma úni tsípikua jingoni irekani, uandaspti: “Tsípisïndiksï imeecha engaksï exejka eskaksï uétarhinchasïnga Tata Diosïni” (Mat. 5:3). Ima mítespti eskachi kʼuiripuecha kueraakata jarhaska parachi uékani míteni juchaari Kuerajpirini, Tata Diosï Jeobani ka kʼéri ambe arhini. Indeni ambesï arhikuekajti Biblia enga arhijka eskachi “uétarhinchasïnga Tata Diosïni”. Ka jimboka Jeoba Tata Diosï máeska “enga xáni tsípijka” juchajtu engachi imani marhuakujka uaakachi májkueni tsípikua jingoni irekani (1 Tim. 1:11). ¿Meru uétarhisïni eska iámindu ambe sési jauaka paraka ma uaaka tsípikua jingoni irekani? Nómbe. Enga Jesúsi Juátarhu Arhijtsïkpipka uandaspti eskaksï imeecha jamberi engaksï “kómu pʼikuarherajka” uaakaksï tsípikua jingoni irekani. Ístu, Jesúsi uandaspti eskaksï uaaka tsípikua jingoni irekani “imeecha engaksï no sési kánhajka jimbokaksï jurhimbitku jámasïnga” (Mat. 5:​4, 10, 11). Jesúsi jorhentpispti eska para ma úni meru tsípikua jingoni irekani no uétarhisïnga eska iámindu ambe sési jauaka juchaari irekuarhu, sino eskachi jorhenguarhiaka Tata Diosïiri ambe ka eskachi imani andarhieraaka (Sant. 4:8). w22.10 6 párr. 1-3

Jánhaskakua jarhuataati kristianuni ma para míteni káni tiempueski “para pínasku pakarani” ka káni tiempueski “para uandani” (Ecl. 3:7). Máru lugaricharhu uandanhasïndi eska uandani, ísïiska komueska plata ka pínasku pakarani komueska oru. I ambe arhikuekasïndi eska ménichani sánderu sésiiska pínasku pakarani ka eska uandani. Ju je exeni orhejtsïkutiiri ejempluni ma enga jánhastiika ka enga someni arhinhajka eska jarhuatauaka máteru kúnguarhikuechani kʼéri uandanhiateechani exeani. Máteru orhejtsïkuti, i ambe uandasïndi inde orhejtsïkutiiri ambe: “Méntkisï jingontku jámasïndi para no uandantani máteru kúnguarhikuarhu anapu ambe”. Jimboka i orhejtsïkuti jánhaskakua jingoni jámasïnga, imeeri kúnguarhikuarhu anapu orhejtsïkutiichaksï janhanharhisïndi jimbokaksï míteska eska no jámaaka uandantani ambe engaksï máteruecha no jatsika para míteni. Jurhimbikua jingoni úni ambe ma, jindeesti máteru ambe engajtsïni jarhuatajka parachi mintsinharhikueni. Jimbokaksï kʼuiripuecha engaksï jurhimbitku jámajka méntkisïksï jurhimbitku uandantasïnga, fásiliisïndi mintsikaani (Éfes. 4:25; Ebr. 13:18). w22.09 12 párr. 14, 15

Uánikuechaksï no uékasïndi kurhaani ambakiti jánhaskakuani enga “xanharuecharhisï uinhachajka” (Prov. 1:20). Biblia uandasïndi eska tanimu jásï kʼuiripuecha jarhaska engaksï no jiókuarhijka jánhaskakuani: “imeecha engaksï no jánhaskatiika”, “engaksï teresmarpejka” ka “tontuecha” (Prov. 1:​22-25). “Imeecha engaksï no jánhaskatiika” jindeestiksï ima kʼuiripuecha engaksï iámu ambe jakajkujka ka engaksï fásili enganiariuajka (Prov. 14:​15, nota). Uánikua kʼuiripuechaksï jarhasti engaksï imeeri relijioniiri anapu orhejtsïkutiicha ka politikuecha niáraka enganiariuani. Máruksï kánikua no sési pʼikuarherasïndi engaksï kuenta íntskukuarhejka eskaksï enganiariuaska. Peru imeecha enga Proverbios 1:22 uandaajka uékasïndiksï no jánhaskatiini jimbokaksï tsitisïnga ísï jámani (Jer. 5:31). Nóksï uékasïndi jorhenguarhini ambe enga Biblia uandajka ni kurhajchaani imeeri juramukuechani. Juchachi no sáni uékasïnga ísïini eska ima kʼuiripuecha engaksï no uéjka jánhaskatiini (Prov. 1:32; 27:12). w22.10 19 párr. 5-7

Tata Diosïiri kúnguarhikuajtsïni arhisïndi ambe engachi jatsika para úni parachi kuájchakukuarhini. Mémindujtsïni arhisïndi eskachi íntskuauaka kúnguarhikuarhu anapu orhejtsïkutiichani juchaari informasioni parajtsïni úni uandajpani o exentani jiáni enga úkuarhiaka ambe ma. Jamberijtsïni Tata Diosïiri kúnguarhikua arhiati eskachi uaaka pakarani juchaari kʼumanchikuarhu o máteru nanisï nirani o nénachi uaa jirinhani imani ambe engachi uétarhinchani jauaka. O jamberijtsïni arhiati na jatini ka ambechi uaa úni parachi máteruechani jarhuataani. Engachi no kurhajchaaska, úpiringachi ambe ma úkuarhinchani jucha ka ístu orhejtsïkutiicha engajtsïni kuidarijka (Ebr. 13:17). Uánikua erachiichaksï jurajkuasti imeecheri kʼumanchikuechani desastre naturaliicha jimbo ka engaksï kʼuiripuecha uarhiperajka. Imeechaksï jánguarhintasïndi sési pʼikuarherani imani ambe jingoni engaksï iásï jatsikia ka engaksï ménderu ueenajka sési marhuakuni Tata Diosïni. Ka seguirixatiksï uandantani ambakiti aianhperakuani ísï eskaksï na úpka primeru kristianuecha engaksï etsandurhinhapka jiáni engaksï no sési kánhani japka (Úku. 8:4). Aianhpini jarhuataasïndi paraksï Tata Diosïiri Reinueri ambe eratseni jarhani ka no imeecheri uandanhiateechani. Ísïksï úsïndi sési pʼikuarherani ka pínandikua jatsini. w22.12 19, 20 párr. 12, 13

Tata Diosï Jeobajtsïni mándani arhini jukaparharasïndi. Ante de Jesúsi axaani imeeri apostoliichani aianhpini, jarhuataspti paraksï no chéni engaksï no sési kánhapiringa (Mat. 10:​29-31). Para ísï úni, uandontskuarhekuaspti pájaru sapirhatiicheeri máru engaksï gorrioni arhinhajka ka engaksï kánikua jámeenga Israeli. Indeni tiempu jimbo inde pájaruechaksï no kánikua jukaparhaspti, peru Jesúsi arhiaspti imeeri chúxapatiichani: “No ma uarhisïndi enga chaari Taati no uékajka”. Ka ístu arhiaspti: “Sánderu[jtsï] jukaparhaska chá ka eska uánikua pájaruecha”. Ísï xarhatakuaspti eska Tata Diosï Jeoba mándani arhini jukaparharasïreenga. Ka inde ambe jarhuataaspti paraksï no chéni engaksï no sési kánhapiringa. Seguru eskaksï imeeri chúxapatiicha miánteenga ambe enga Jesúsi arhiapka méni engaksï exeenga pájaru sapichu ma engaksï aianhpini jarhenga ireteecharhisï. Sáno májkueni, méntkisï engajtsï exeaka pájaruni ma, miá je eskaksïni Tata Diosï Jeoba jukaparharasïnga chánksïni, jimbokajtsï chájtu ‘sánderu jukaparhaska eska uánikua pájaruechaʼ. Tata Diosïiri jarhuajperata jingoni uaakajtsï no chéni engajtsï no sési kánhani jauaka. w23.03 18 párr. 12

Ménichanchi jatsiaka para tekaantani engajtsïni juchaari familiarhu no sési kámaaka o engachi tsïtaaka ánchikuarhitani. Enga uandanhiata ma ióni jamberi jarhajka, jamberichi úpiringa eratseni eskachi nóteru uaaka orhepani uérakunia ka niáranchi chkétakuarhini. Satanási indeni ambesï úrajti parakachi jucha nóteru seguru jauakia eskajtsïni Tata Diosï Jeoba xénchasïnga. Ima uékasïndi eskachi ueenaaka kurhamarhikuarhini sini Tata Diosï Jeoba ka imeeri kúnguarhikua kulpa jatsiski indeni ambe jimbo engachi nitamakuarhini jaka. Sáno indeeni jásï ambe úkuarhinchasptiksï máru israeliteecha engaksï Ejiptu japka. Ueenakuarhu jakajkusïreendiksï eska Tata Diosï Jeoba erakuspka Moisésini ka Aarónini parakaksï petaantaapiringa jini uératini engaksï esklabuepka (Éx. 4:​29-31). Joperu enga faraoni sánderu no sési kaapka, ueenasptiksï uandani eska Moisési ka Aaróniiri kulpa jimboespka (Éx. 5:​19, 20). ¡Xáni no sési engaksï uandani japka eskaksï ima Tata Diosïiri marhuariicha kulpa jatsispka! Engajtsï chá ióni jamberi tekaantakia uandanhiata ma, kómarhi je Tata Diosï Jeobani, uénhekuarhi je iámu ambe ka kurhaku je eskaksïni jarhuataaka. w22.11 15 párr. 5, 6

Tata Diosï Jeobasï íntspijti tsípikua ka ima uaati tsípikua íntskuantani imeechani engaksï uarhikia. Profeta Eliásini íntskuspti uinhapikua para tsítantani uarhiiti tsïndiiri uájpani ma enga Sarepta anapuepka (1 Rey. 17:​21-23). Sánderu tátsekua, Tata Diosïiri jarhuajperata jingoni profeta Eliseu tsítantaspti uarhiitiiri uájpani ma enga Sunemi anapuepka (2 Rey. 4:​18-20, 34-37). Engaksï i kʼuiripuecha tsíntapka ka ístu máteruecha, xarhatasïndiksï eska Tata Diosï Jeoba uaaka tsítaantani imeechani engaksï uarhikia. Ka enga Jesúsi Echerirhu japka, ístu xarhataspti eska imeeri Taati, íntskuspka uinhapikua para tsítantaani uarhiriichani (Juanu 11:​23-25, 43, 44). Jesúsi iásï auandarhu jarhastia ka ʻiámindu juramukua intsïnhasti auandarhu ka ístu parhakpinirhuʼ. Ísï jimbo, uaati kumplirini ambe enga Tata Diosï aiatspeka eska “iámindu imeecha engaksï inchatsekurhitini jaka” tsíntaaka ka eskaksï uaaka irekani para méntkisï (Mat. 28:18; Juanu 5:​26-29). w22.12 5 párr. 10

Engaksï no kurhajchani japka profeta Ezekielini, Tata Diosï Jeobanksïsï no kurhajchani japti. Iásï anapu tekstueri uandakuechaksï sési pʼikuastantapti Esekielini, jimboka enga kʼuiripu no uékapiringa kurhajchani no arhikuekani japirindi eska ima no ambakiti profeta máespka. Ístu, Tata Diosï Jeoba arhispti eska enga na ísï úkuarhipiringia eska ima na uandapka, imeechaksï mítepirindi “eska profeta ma jarhaspka imeecha jingoni” (Ezeq. 2:5; 33:33). Seguru eska i xáni ambarhati uandakuechaksï kánikua sési pʼikuastantapka Esekielini paraka úpiringa seguiriini aianhpini. Juchantsïntu kánikua uinhaperantasïndi míteni eskajtsïni Tata Diosï Jeobasï axajka. Imajtsïni kʼéri kóntperata ma íntskusti parachi imeeri ambe uandantani (Is. 43:10). Májkueni eska Tata Diosï na arhipka Esekielini: “Asï ché”, juchantsïntujtsïni arhisïndi: “Asï ché je” (Ezeq. 2:6). ¿Andichisï no jatsi para chérhiani imeechani engajtsïni no xénchajka? Jimboka májkueni eska Esekielini jingoni, Tata Diosï Jeobajtsïnisï axajti juchantsïni ka imajtsïni jarhuatasïndi (Is. 44:8). w22.11 3, 4 párr. 4, 5

Iásïchi kánikua jukaparharasïnga ánchikuarhitani engaksï újka orhejtsïkutiicha ka orhejtsïkutiicheri jarhuajpiriicha, achamasïicha engaksï kánikua mintsinharhikueka. Meruchi exesïnga eskajtsïni i erachiicha kánikua sési kuidarisïnga ka diosmaiamukuachi íntskuntasïnga Tata Diosï Jeobani ini erachiichani jimbo. Peru juchachi, ¿néna uaa xarhatani eskachi mintsinharhikueska? Engachi xénchauaka juchaari erachiichani ka uandanhianchi imani ambe jimbo engaksï nitamakuarhijka. Peru jatsiskachi para jingontku jámani parachi no jukari inchakukuani. Primeru siglu anapu kúnguarhikuarhu, jarhasptiksï kʼuiripuecha engaksï uandatspini jámeenga, engaksï inchaakukuauenga máteruechani ka engaksï imani ambe uandeenga engaksï no jatsipka para uandantani (1 Tim. 5:13). Seguru eskachi no uékasïnga i jásï kʼuiripueni. Ju je eranhaskani eskajtsïni nema aiangusïnga imeeri ambe, mintsikaparini eskachi no nemani aianguaka. Pori ejemplu, pirenchi májtsïni aiangusïndi eska pʼamenchaxaka o eska uandanhiata ma jatsiska ka arhisïndijtsïni eskachi no nemani aianguaka. Jatsiskachi para ísï úni eskajtsïni ima na arhika. w22.09 10 párr. 7, 8

No solu uétarhisïndi eskachi máru ambejku sési uaaka. Sánderu sési, uétarhisïndi eskachi exekuarhiaka na engachi meru jásïika ka mójtakuni máru ambe juchaari irekuarhu parakachi kurhajchauaka Tata Diosï Jeobaeri juramukuechani xáni eskachi xáni uaaka. Ka no solu ma ueltajkuchisï jatsika para ísï úni, sino méntku ísï úni jarhani. Engachi perfektueuakia, uaakachi méntkisï jaiapanherantani Tata Diosï Jeobani iámindu ambe jimbo. Peru enga jamberi niáraaka inde jurhiatikua, jatsiskachi para jánguarhintani iásï jaiapanherantani Tata Diosï Jeobani. Roma 12:2 jimbo, apostoli Pablu uandaspti eska uétarhisïnga mójtakuni juchaari eratsekuani parachi úni míteni ambe enga Tata Diosï uéjka. Enbesi dechi májkueni eratseni eska i parhakpini anapuecha, uétarhisïndi eskachi exeaka na engachi xáni kuenta újka Tata Diosïni engachi meteechani jatsikukuarhiani jarhajka ka engachi erakuni jámaaka úni ambe ma. w23.01 8, 9 párr. 3, 4

Tata Diosï Jeoba no úsïndi ambe ma méni engachi nitamakuarhini jarhajka ambe ma jimbo. Ka no úsïndi eskachi no sési nitamakuarhiaka solu parachi jorhenguarhini ambe ma (Ecl. 8:9; 9:11). Peru jarhasti ambe ma engachi jimbo seguru jaka: eska jiáni engachi uandanhiata ma jatsijka, Tata Diosï Jeoba jingontku jarhasïnga iámindu ambe jimbo ka eska kurhaasïnga jiáni engachi mintsita jingoni kurhakujka eskajtsïni jarhuataaka (Sal. 34:15; Is. 59:1). Ka ístujtsïni jarhuatasïndi parachi úni orhepani uérakuani uandanhiateechani. ¿Néna ísï úsïni? Tata Diosï Jeobajtsïni mémindu uinhaperantasïndi ka sésijtsïni pʼikuastani jiáni engachi meru uétarhinchani jarhajka (2 Kor. 1:​3, 4). ¿Miásïnchi na engajtsïni Tata Diosï Jeoba uinhaperantapka ka sési pʼikuastantani, meru jiáni engachi uétarhinchani japka? Sáno méntkisï, nóchi kuenta íntskukuarhesïnga na engajtsïni jarhuatapka Tata Diosï Jeoba engachi no sési nitamakuarhini japka, sino asta jiáni enga na sési niántajkia iámindu ambe. w23.01 17, 18 párr. 13-15

I no sési jásï animali, sáno májkueni jáxesti eska animali enga siete éjpuechani jukaaka, peru i charhapitiisti. Libru Apokalipsisi uandasïndi eska i jindeeska animaliiri imajeni ka eska i jindeeska ‘rei ochu úni jámani’ (Apok. 13:​14, 15; 17:​3, 8). I reiri ambe uandanhasïndi eska xarharaspka ka eska tátsekua nóteru jarhaspkia ka eska tátsekua ménderu ueenaspka xarharani. I ambe sési terukuntasïndi ambe enga úkuarhipka Organización de las Naciones Unidas jingoni enga politikeri ambe exejka interu parhakpinirhu. Ueenakuarhu arhinhasïreendi Sociedad de Naciones. Tátsekua Segunda Guerra Mundiali jimbo, nóteru jarhasptia. Ka tátsekua ménderu ueenaspti jarhani imani nombri jingoni eskachi na mítekia iásï. Imani ambe jingoni engaksï uandaaka, juramutiichaksï uaati eskaksï kʼuiripuecha no jiókuarhiaka Tata Diosï Jeobani ni imeeri iretani. Pori ísï arhini, tánantauatiksï “reichani iápuru parhakpinirhu” anapuechani para Armajedoniri uarhiperakua, enga jindeeka uarhiperakua “kʼéri jurhiatikua jimbo [Tata] Diosïni jingoni enga Iámindu ambe újka Úni” (Apok. 16:​13, 14, 16). w22.05 10 párr. 10, 11

Enga Jesúsi jorhenguarhipka arhintani, ima jandiajku ueenaspti arhiantani karakateechani ka no solu niáraspti míteni ambe enga Tata Diosïiri Karakata uandeenga, ístu niáraspti tsitini ambe enga jima uandeenga ka jurajkuspti eska inde ambe jarhuatapiringa. Ejemplu ma enga xarhatajka eska i ambe ísïiska jindeesti ima ambe enga úkuarhipka enga ima 12 uéxurhintku jatiripka. Jorhentpiriicha engaksï sési mítekupka Moisésiiri Leini, ískuksï pakaraspti “enga ima xáni mítekupka ka enga xáni jurhimbitku mókukuarhienga” (Luk. 2:​46, 47, 52). Juchajtuchi uaaka niárani míteni ka tsitini ambe enga Tata Diosïiri Karakata arhijka engachi mémindu arhintaaka. Ju je exeni ambe enga Jesúsi arhiapka imeechani engaksï sési mítepka Leiiri ambe, komu karariichani, fariseuechani ka saduseuechani. Nájkirukaksï i relijioniiri orhejtsïkutiicha pʼindepka Tata Diosïiri Karakatani arhintani, nóksï marhuanchasïreendi. Jesúsi tanimu ambe uandaspti engaksï imeecha jatsipka para úni, paraka marhuakuapiringa ima ambe engaksï arhinteenga. Ka ambe enga Jesúsi uandapka jarhuataatijtsïni parachi 1) sánderu sési kurhanguni ambe engachi arhintajka, 2) jukaparhakua ambe exentani engajtsïni marhuacheaka ka 3) jurajkuni eskajtsïni Tata Diosïiri Karakata mójtakuaka. w23.02 8, 9 párr. 2, 3

Máru ambe engachi no jatsika para úni jindeesti koketearini, jukari kauikua ambe arhani o jukari tʼireni, imani uandakuechani úraani engaksï no sési pʼikuastpejka, ístu atajperakueri ambe exeni o pornografia ambe (Sal. 101:3). Noambakiti méntku jánguarhintani jarhasïndi úni ambe ma parachi nóteru sési pájperania Tata Diosï Jeoba jingoni (1 Ped. 5:8). Engachi no jingontku jámaska, ima uaati úni eskachi juchaari mintsitarhu úndaaka enbidia pʼikuarherani, no jurhimbikua jingoni jámani, jukari jatsikuarhikuekani, kurhunhpini, kʼéramakuarhini ka jatanhetspini (Gal. 5:​19-21). Engachi no jánguarhintaska nóteru ísï eratsenia ka pʼikuarherani, inde ambejtsïni kánikua no sési úchiati (Sant. 1:​14, 15). Ambe ma enga no fásiliika exeni eska no sési jarhaska jindeesti: imeechani kúrhiani engaksï no sési jámajka. Ju je miáni eska ima kʼuiripuecha engachi kúrhiajka úpiringaksï úni eskachi májkueni jámaaka ka eratseni eska imeecha (1 Kor. 15:33). Engachi exekuarhiska na engachi jámajka, nóchi xáni kúrhiauaka imeechani engaksï no janhanharhiajka Tata Diosï Jeobaeri juramukuechani (Luk. 21:34; 2 Kor. 6:15). Engachi exeska eska ambe ma no sési jarhaska, nóchi uaaka indeni ambe. w23.02 16 párr. 7; 17 párr. 10, 11

Jimbokajtsï chá sánderu jorhenguarhiskia Tata Diosï Jeobaeri ambe sánderujtsï xénchasïnga. Seguru eskajtsï meru uékasïnga sánderu sési pájperani imani jingoni iásï ka para méntkisï, ka uaakajtsï ísï úni. Chájtsï uaaka tsíperani Tata Diosï Jeobaeri mintsitani imani ambe jingoni engajtsï uandaaka ka úni. Ka imaksïni xénchperakua jingoni arhisïndi eskajtsï ísï uaaka (Prov. 23:​15, 16). Ambe engajtsï erakuaka úni chaari tsípikua jingoni, xarhataati sintsï sési jimbo xénchasïni Tata Diosï Jeobani. Ísï irekani eska Tata Diosï Jeoba na jaiapanhentajka, sánderu ambakiti ambeesti engajtsï uaaka úni. ¿Nénajtsï uaa xarhatani eskajtsï xénchasïnga Tata Diosï Jeobani? Orheta, jatsiskajtsï para mintsita jingoni kómarhini parajtsï aiakukuarheni Tata Diosïni enga jurhimbitiika (Sal. 40:8). Tátsekuajtsï, jatsiska para itsï atakuarhini máteruechani japarini parajtsï xarhatani eskajtsï aiakukuarheskia Tata Diosïni. Engajtsï itsï atakuarhiakia kánikuajtsï sési pʼikuarheraaka, ueenakajtsï jimbanhi irekua ma. Ka jiáni uératini nóterujtsï irekakia para chá sino para Tata Diosï Jeoba (Rom. 14:8; 1 Ped. 4:​1, 2). Jamberi inde ambe ísï xarharaati enajki kʼéri responsabilidadi máe ka ísïisti, peruksïni sésikua íntskusïndi parajtsï ambakiti irekua ma jatsini. w23.03 6 párr. 14, 15