Juliu

Jimbokajtsïni Tata Diosï Jeoba xénchasïnga ústi eskachi uaaka uandani. Peru inde regalu ueenanhaspti no sési úranhani. Satanási chkuanderakuspti Ebani ka indeni ambe jimbo, kʼuiripuechachi pekadoriiska ka nóteruchi perfektueskia (Gén. 3:​1-4). Adáni no sési uandaspti enga ísï Ebani kulparipka ka Tata Diosï Jeobani imani ambe jimbo enga ima mismu no sési úpka (Gén. 3:12). Kaíni chkuanderakuspti Tata Diosï Jeobani enga na uándikupkia imeeri ermanu jémba Abelini (Gén. 4:9). Pelikulecharhujtu no sési ambe uandanhasïndi. Ka májkueni úkuarhisïndi eskuelecharhu ka ánchikuarhitarhisï. Engachi no jingontku jámaska úpiringachi pʼindeni kurhaani no sési járhati uandakuechani ka juchajtuchi ueenani úraani. Kristianuechachi uékasïnga Tata Diosï Jeobani jaiapanherantani. Ísï jimbo, nóchi jatsiska para no sési jásï ambe uandani ka jánguarhintanchi imani ambe uandani enga kʼéri ambe arhiaka Tata Diosï Jeobani. w22.04 4 párr. 1-3

Jesúsi sésku exesïreendi jatsikuarhekua ambe. Tsitisïreendi tʼireni ka itsïmani (Luk. 19:​2, 6, 7). Ma xanhari, itsïni binu úntaspti enga kánikua ambakitiipka, ka inde jindeespti primeru milagru enga úpka (Juanu 2:​10, 11). Ístu, jiáni enga uándikunhapiringa, xukuparhakua ma jukarixapti enga kánikua jukaparhapka (Juanu 19:​23, 24). Joperu jatsikuarhekua ambe no jindeespti ambe enga sánderu jukaparhakua ambeepka para ima. Jesúsi jorhentpispti eska engachi orheta úska Reinueri ambe, Tata Diosï Jeoba uaaka úni eskachi jatsiaka ambe engachi uétarhinchani jauaka (Mat. 6:​31-33). Uánikuechani kánikua marhuakuasti ísï úni eskaksï Tata Diosï Jeobaeri konsejuecha na uandajka sentabueri ambe. Ju je erachiiri ejempluni ma exeni enga no tembuchatini jaka enga Daniel arhinhajka. Ima uandantasïndi: “Engani tumbi sapichuepka uandaspka eska marhuakuni Tata Diosï Jeobani sánderu jukaparhakua ambeespka”. Jimboka Danieli jánguarhintaska arisku sáni irekani, úspti úrani imeeri tiempuni ka ambe enga ima jorhenaka úni para jarhuajpeni ka para Beteli marhuani. Sentabu méntku no sáni terukukuarhintasïndi imani kóntperatecha jingoni engareni Tata Diosï Jeoba íntsaakia”. w22.05 21, 22 párr. 6, 7

Ma ambe engachi uaaka úni parachi xarhatani eskachi tsitisïnga Biblieri jurhimbikua ambe, jindeesti jánguarhintani jorhenguarhini Bibliani ka juchaari publikasionichani. Jimboka no arhiparini na engachi xáni ióni páni jakaia jurhimbikuarhu, méntkisï jarhasïndi ambe ma engachi jorhenguarhijka. Parachi Biblieri ambe jorhenguarhini jatsiskachi para kánikua jánguarhintani, peru kʼórujtsïni i ambe kánikua marhuacheati. Nóchi iáminduecha tsitisïnga arhintani ka jorhenguarhini Biblieri ambe, peru Tata Diosï Jeobajtsïni arhisïndi eskachi seguiriuaka jorhenguarhini parakachi sési kurhanguaka Biblieri jurhimbikua ambe (Prov. 2:​4-6). Engachi jánguarhintaska ísï úni, kánikuajtsïni marhuacheati. Erachi ma enga Corey arhinhajka, uandasïndi eska jingontku arhintasïnga mándani bersikulu Biblieri. Ima uandantasïndi: “Arhiantasïnga notechani engaksï pájinarhu kétsekua jaka, jirinhantaasïnga referensia marjinalichani ka sánderuni inbestigarisïnga. [...] Engani ísï újka kánikuarini marhuachesïndi”. Ia sea engachi ísï jorhenguarhijka o ménderueni, engachi arhutajka tiempu ka jánguarhintani Biblieri ambe jorhenguarhini, xarhatani jarhasïngachi eskachi kánikua jukaparharasïnga jurhimbikuani (Sal. 1:​1-3). w22.08 17 párr. 13; 18, 19 párr. 15, 16

Enga Jesúsi Echerirhu jámani japka, úraspti kueraakatani para jorhendaani imeeri chúxapatiichani uánikua ambe imeeri Taati jémbeeri. Ju je exeni máru ambe enga jorhentpipka. Tata Diosï Jeoba iáminduechani xénchaasïndi. Enga Jesúsi Juátarhu arhijtsïkpipka, uandaspti tsándeeri ka janikueri ambe, tsimani ambeeri engaksï uánikua kʼuiripuecha no xáni jukaparharajka. Peru i ambe kánikua uétarhisïndi paraka tsípikua jauaka. Tata Diosï Jeoba úpirindi no íntskuani ini ambe imeechani engaksï no marhuakujka, peru ima kánikua xénchpetiisti ka úsïndi eskaksï iáminduecha jatsiaka ini ambe (Mat. 5:​43-45). Jesúsi úraspti ini ejempluni para jorhendaani imeeri chúxapatiichani eska Tata Diosï Jeoba uékasïnga eskachi xénchauaka iámindu kʼuiripuechani. Ísï jimbo, jiáni engachi exeaka na enga xáni sési jánhaskuarhijka enga jurhiata inchajtsïkuni jarhajka o na enga xáni sési pʼikuarherakuarhijka enga janintserani jarhajka, ju je eratsentani na enga xáni xénchpetiika Tata Diosï ka eska iáminduechani májkueni kaasïnga. Imeeri ejemplu úsïndi eskachi májkueni xénchpeaka ka eskachi aianguauaka iámindu kʼuiripuechani imeeri ambe. w23.03 17 párr. 9, 10

¿Ambesï ísku pakatapi apostoli Juanuni? Uarhiiti ma enga uaxakatini nirani japka animali charhapiti ma jimbo. Biblia arhisïndi eska ísïiska komueska “kʼéri ísku jándi” ma ka imeeri nombri jindeesti “Kʼéri Babilonia”. Imani uarhiiti “jingonksïsï ísku jándi úkuarhiti parhakpinirhu anapu reiicha” (Apok. 17:​1-5). ¿Ambeeski “Kʼéri Babilonia”? I uarhiiti no jindeesti politikarhu anapu organisasioni ma, jimboka libru Apokalipsisi uandasïnga eska ísku jándi úkuarhisïnga parhakpinirhu anapu politikuecha jingoni (Apok. 18:9). Ka enga uandajka eska uaxakatini nirasïnga ma ini animalini jimbo, arhikuekasïndi eska uékasïnga juramukuani. Ka ístu no úpirindi arhikuekani kʼérati negosiuechani engaksï Satanásiiri parhakpini jimbo jaka, jimboka Apokalipsisi ísï tátsekua uandasïnga ícheeri ambe ka arhiasïndi “parhakpinirhu anapu komersiantiicha” (Apok. 18:​11, 15, 16). Ióntki anapu Babilonia, kʼéri ireta máespti nani engaksï uánikua relijioni no jurhimbitiicha japka. Ísï jimbo, Kʼéri Babilonia jindeesti iámindu relijioni no jurhimbitiicha engaksï no ísï kʼéri ambe arhijka Tata Diosïni eska ima na uéjka (Apok. 17:​5, 18). w22.05 11 párr. 14-16

No no sési jarhasti enga naandi ma ménisï kurhamarhikuarhiaka sinksï imeecheri sapiicha uékaa marhuakuni Tata Diosï Jeobani. Ka taatiichaksï sési mítesti eskaksï imeecheri uájpeecha uánikua tsʼéjkukuechani jatsiasïnga ini parhakpini jimbo enga Satanási juramuni jaka. Joperu ístu, uánikua naandicha úkua jukanchasïndi tʼarhexeraani uájpeechani jimbokaksï no kámasïnga uámbani o jimboka uámba no marhuakusïnga Tata Diosïni. Peru no solu imeechajkuksïsï úkua jukanchajti engaksï jandiajku jorhendaani jarhajka imeecheri sapiichani marhuakuni Tata Diosïni, ístuksï úkua jukanchasïndi ima taatiicha engaksï tsimarhani marhuakuni jarhajka Tata Diosïni. Peru asï uandanhia je, Tata Diosï Jeobaksïni jarhuataati. ístu, kurhamarhia je máteru taatiichani nénaksï úraasïni jarhuajperateechani engaksï jaka para familieri jorhenguarhikua (Prov. 11:14). Ístu, kurhaku je Tata Diosï Jeobani eskaksïni jarhuataaka sési uandontskuarheni chaari sapiicha jingoni parajtsï úni míteni ambe engaksï eratsejka ka pʼikuarherani (Prov. 20:5). w22.04 17 párr. 4, 7; 18 párr. 9

Máteru ambe engachi uaaka úni parachi sánderu xénchani Tata Diosï Jeobani, jindeesti sánderu sési míteni imeeri Uájpani, enga sési xarhatajka na enga jásïika imeeri Taati (Ebr. 1:3). Ka ambe engajtsïni uaaka jarhuatani parachi sánderu sési míteni Jesúsini, jindeesti arhiantani tʼámu Ebanjeliuechani. ¿Pʼindeskiria pauani pauani arhintani Bibliani? Engari nótki ísï úni jaka, uaakari iásï ueenani ísï úni. Engari arhintani jauaka ambe enga Jesúsi úpka ka uandani, jánguarhi exeni na enga jásïika. Kʼuiripuechaksï sési pʼikuarherasïreendi imani jingoni jarhani ka ístu imani jingoni uandontskuarheni, asta niáraspti sapiichani jamberi kamanharhiani (Mar. 10:​13-16). Jánguarhintasïreendi parakaksï imeeri chúxapatiicha sési pʼikuarherapiringa; jimboksïsï imeecha no cheendi iámu ambe aianguni (Mat. 16:22). Jesúsi ísï kámpisïreendi jimboka Tata Diosï Jeoba ísï kámpisïnga. Tata Diosï iáminduechani sési pʼikuastaasïndi. Ísï jimbo, engachi kómarhini jauaka, uaakachi imani jingoni uénhekuarhini iámu ambe. Ka engachi ísï uaaka, uaakachi seguru jarhani eska ima no no sési eratseaka juchaari ambe. Imajtsïni xénchasïndi ka pendienti jarhasïndi juchantsïni jimbo (1 Ped. 5:7). w22.08 3 párr. 4, 5

Tata Diosï Jeobajtsïni sési mítesti juchantsïni jimbokajtsïni ima kueraaska. ¿A no eskajtsïni ísku pakatasïnga engachi eratsejka eska ima sési míteska mándani kʼuiripuni enga ini parhakpini jimbo jaka? (Sal. 139:​15-17). Ístu, sési mítesti eskachi kéritanhaska juchaari taatiicheeri pekaduni. Joperu ístu, mítesti eskachi xásï kʼuiripu máeska imani ambe jimbo engachi nitamakuarhika. Indeni ambe jingoni enga Tata Diosï Jeoba míteka juchaari ambe, úsïndi eskajtsïni pʼamojkuaka (Sal. 78:39; 103:​13, 14). Tata Diosï Jeoba xarhatastia eskajtsïni uékasïnga puáchentani. Ima mítesti eska Adániiri kulpa jimbo juchachi pekadoriiska ka niárasïngachi uarhini (Rom. 5:12). Ka nóchi ambe ma úpiringa úni parachi pʼímutantaani máteruechani ka ni parachi jucha pʼímutantskuarhini pekadueri ka uarhikueri (Sal. 49:​7-9). Peru Tata Diosïjtsïni pʼamojkusti ka ústi ambe ma parajtsïni pʼímutantani. Ísï eska na arhijka Juanu 3:​16, Tata Diosï Jeobajtsïni xáni uékasti enga axapka imeeri máechakua Uájpani paraka uarhipiringa juchantsïni jimbo (Mat. 20:28; Rom. 5:19). w22.06 3 párr. 5, 6

Engachi puátspentaska, ístujtsïni Tata Diosï Jeoba puáchentaati. Míteskachi eska i ambe ísïiska imani ambe jimbo enga Tata Diosï Jeoba arhipka imeeri marhuari Jobuni. I Tata Diosïiri marhuari, tekaantaspti jiáni engaksï i tanimu acheetiicha Elifasi, Bildadi ka Sofari nóksï sési pʼikuastapka imani ambe jingoni engaksï arhipka. Tata Diosï arhispti Jobuni eska kómarhijpikuapiringa. Ka enga Jobu ísï úpka, Tata Diosï Jeoba újchakuraspti (Job 42:​8-10). Jatanhetspini kánikuajtsïni no sési úchisïndi. Jatanhekuni nemani, ísïisti komu kʼuetsapeti ambe páni jarhani ka Tata Diosï Jeoba no uékasïndi eskachi jucha ísï pʼikuarheraaka (Éfes. 4:​31, 32). Arhisïndijtsïni: “Jurajku ikiatapuni, asï ikia” (Sal. 37:8). Ísï úni eska i konseju na uandajka, kánikuajtsïni sési úchisïndi jimboka jatanhekuni nemani úsïndi eskachi pʼamenchaaka ka eskachi no sési eratseaka (Prov. 14:30). Jatanhekuni nemani, ísïisïndi komueska benenu atsïkuarhini jarhani: juchajkuminduchisï no sési úkuarhini jarhajka. Ísï jimbo, engachi puákuantaska máteruechani, sésichi pʼikuarheraaka ka uaakachi seguiriini jarhani marhuakuni Tata Diosï Jeobani. w22.06 10 párr. 9, 10

Erokuarhikua ísïisti komueska kájtsïkua tiámueri ma enga kuájchakujka juchaari eratsekuani ka jarhuatasïndijtsïni parachi no sánderu tsitini tsípikuarhini jámani, jimbokachi nóteru sési pájperapiringuia Tata Diosïni jingoni (1 Kor. 15:​33, 34). Erokuarhikuajtsïni kuájchakusïndi parachi no eratseni eskachi no uaaka jaiapanherantani Tata Diosï Jeobani. Ju je miántani eska Elifasi, Jobueri amigu arhikata ma, sáno májkueni ambe uandaspka: “¿Néna uaa kʼuiripu ma enga uarhijka pímbinhasïtiini […]?”. Ka ístu uandaspti: “Exe, Tata Diosï no mintsikaasïndi imeeri pímbinharhatiichani, ka ni auandechani jamberi ísï exeajki eskaksï pímbinharhatiiska” (Job 15:​14, 15). ¡I ambe chkuanderakua máesti! Ju je miáni eska Satanásisï uéjka eskachi ísï eratseaka. Ima mítesti eska engachi seguiriska ísï eratseni uaakachi nóteru mintsikani indeni erokuarhikuani. Ísï jimbo, ju je no jiókuarhini indeni chkuanderakuani. Ístu, ju je seguru jarhani eska Tata Diosï Jeoba uékasïnga parakachi iámindu imeeri marhuariicha irekaaka para méntkisï ka eskajtsïni jarhuataaka (1 Tim. 2:​3, 4). w22.10 25, 26 párr. 8-10

Satanási uékasïreendi eska Jobu eratsepiringa eska no sési nitamakuarhixapka jimboka Tata Diosï Jeoba nóteru jaiapanhentasïrengia. Ísï jimbo, úraspti kʼéri tarhiata ma paraka kuáskupiringa kʼumanchikuani nani engaksï tʼireni japka Jobueri 10 sapiicha (Job 1:​18, 19). Ístu úspti eska auandarhu uératini chpiri uekorhepiringa ka eska uándikuapiringa no solu Jobueri animaliichani, sino ístu imeechani engaksï animaliichani eranguani japka (Job 1:16). Jimboka tarhiata ka chpiri auandarhu uératinksï uekorhespka, Jobu eratsesïreendi eska Tata Diosïsï úni japka indeni ambe ka eska ikiaxapka imani jingoni. Nájkiruka xáni no sési nitamakuarhipka, Jobu no méni no sési ambe uandaspti Tata Diosïiri ambe. Miáspti eska desde iónisï Jeoba uánikua ambakiti ambe íntskuspka ka eska ísï eska na jiókuarhipka ambakiti ambe, ístu jatsispka para jiókuarhini no sési jásï ambe. Jimbosï uandapti: “Eska méntkisï kʼéri ambe exenhaaka Jeobaeri arhinhakua” (Job 1:​20, 21). w22.06 21 párr. 7

Jesúsi arhiaspti imeeri chúxapatiichani eskaksï no sési kánhapiringa, ísï eska na arhijka Juanu 17:14. Ka juchachi exexaka na enga úkuarhini jaka i parti i profesieri ka sánderia desde 100 uéxurhini para ixúani. ¿Andichisï ísï uandajki? Sánisï tátsekua enga Jesúsi Juramuti Mesíasi únhapka 1914 jimbo, petaantaspti Noambakitini auandarhu uératini. Iásï, Noambakiti solu úsïndi no sési útspini ixú Echerirhu ka erokuarhixati para kʼamajkunhani (Apok. 12:​9, 12). Joperu no ísku jarhasti. Kánikua ikiaxati ka kánikua jánguarhintaxati para no sési úkuni Tata Diosïiri iretani (Apok. 12:​13, 17). Jimbojtsïnisï i parhakpini xáni no xénchajti. Peruchi no jatsiska para chérhini Noambakitini ni imeechani engaksï imani kurhajchajka. Sánderu sési, uaakachi májkueni mintsinharhini eska apostoli Pablu enga karapka: “Enga [Tata] Diosï juchantsïni jingoniika, jimajkani ¿néjtsïni uaa no sési úchini?” (Rom. 8:31). Uaakachi kánikua mintsinharhini Tata Diosï Jeobani. w22.07 18 párr. 14, 15

Jesúsi seguru jarhaspti eska últimu jurhiatikuecha jimbo, uánikua ánchikuarhiriicha japiringa. Mítespti eska ísï úkuarhipiringa eska na uandajka ari profesia: “Chiiti ireta tsípikua jingoni aiatspikuarhiati imani jurhiatikua jimbo engari orhekupauaka chiiti ejersituechani” (Sal. 110:3). Engajtsï chá aianhpini jaka ambakiti aianhpikueri ambe, apoiarixakajtsï Jesúsini ka jántspirini enga mintsinharhikueka ka ísïjtsï jarhuajpexaka paraka ísï úkuarhiaka eska i profesia na uandajka. Nájkirukachi úni jaka aianhpini, ístu jarhasti máru ambe engajtsïni ójkutajka. Ma ambe engajtsïni ójkutajka parachi no úni aianhpini jindeesti eskajtsïni kʼuiripuecha no jurajkusïnga parachi ísï úni. Apostateecha, politikuecha ka relijioniiri orhejtsïkutiichaksï chkuanderakua ambe uandasïndi juchaari ánchikuarhiteeri ambe. Engaksï juchaari parienticha, imeecha engachi míteaka ka imeecha engachi jingoni ánchikuarhijka jakajkuaka indeni ambe, jamberijtsïni arhiati eskachi nóteru marhuakuakia Tata Diosï Jeobani ka eskachi nóteru aianhpiakia. Máru paisiicha jimbo, juchaari enemiguechajtsïni arhisïndi eskajtsïni no sési ambe úchiaka, no sésijtsïni kámasïndi, jupikantsïni ka ónhani. w22.07 8 párr. 1; 9 párr. 5, 6

Parakajtsïni sánderu marhuacheaka jarhuajperata engajtsïni Tata Diosï íntskujka imeeri Karakata jimbo, ima erokuarhisïndi eskachi pʼindeaka Bibliani jorhenguarhini ka eratsentani ambe engachi arhintajka. Engachi úska ambe engachi jorhenguarhiaka, sánderuchi mintsikaaka Tata Diosïni ka sánderuchi sési pájperaaka imani jingoni. Ka i ambejtsïni jarhuataati parachi úni tekaantani. Ka ístu, engachi mintsikaska Tata Diosï Jeobani, imajtsïni íntskuati imeeri espiritu santuni. Imeeri espiritu jingoni jatsiakachi “uinhapikua enga xáni kʼéri ambeeka” parachi úni tekaantani náki uéjki uandanhiata engachi jatsiaka (2 Kor. 4:​7-10). Tata Diosï úsïndi eska “jántspiri enga mintsinharhikueka” ka jánhastiini, uánikua artikuluechani, bideuechani ka pirekuechantsïni íntsauaka engajtsïni jarhuatajka sánderu mintsikani imani ka parachi no méni jurajkuni (Mat. 24:45). Tata Diosï Jeoba jorhendaasti imeeri marhuariichani paraksï xénchperani ka paraksï uinhaperperantani engaksï no sési nitamakuarhini jarhajka (2 Kor. 1:​3, 4; 1 Tes. 4:9). Juchaari erachiicha ka pirenchichaksï uékasïndijtsïni jarhuatani parachi no jurajkuni Tata Diosïni engachi no sési nitamakuarhini jarhajka. w22.08 12, 13 párr. 12-14

Engachi arhiaska erachiichani imani sési járhati kualidadichani engaksï máteruecha xarhataajka, jarhuajpenchi jauaka parakaksï imeecha sánderu xénchperaaka ka sánderuksï ambakiti amigueni. Ménisï asta ima kristianuecha engaksï sési marhuakuni jaka Tata Diosïni, uaatiksï arhirperata ma jatsini máteruecha jingoni. I ambe úkuarhispti apostoli Pablu ka Bernabé jingoni engaksï ambakiti amiguepka. Imaksï ueenaspti arhirperani jimboka ma uékasïreenga pájtani Markusïni ka máteru nómbe, engaksï ménderu nipiringia aianhpini máteru nanisï. ¿Néna kʼamaraspti i arhirperata? Biblia uandasïndi: “Xáni engaksï arhirperapka Pablu ka Bernabé mejori jarharperasptiksï” (Úku. 15:​37-39). Peru tátsekua, Pablu, Bernabé ka Markusï, jánguarhintasptiksï sési pájperantani. Sánisï tátsekua, Pablu sési ambe uandaspti Bernabéri ka Markusïiri ambe (1 Kor. 9:6; Kol. 4:10). Juchajtuchi jatsiaka para sési peentani náki uéjki jásï arhirperata engachi jatsiaka kúnguarhikuarhu anapu erachiichani jingoni, ka ístuchi jatsiska para exekuani imeecheri sési járhati kualidadichani. Engachi ísï úska, jarhuajpenchi jauaka paraka no jauaka arhirperakua ambe ka jarhuajpeakachi parakaksï iáminduecha sési pájperaaka kúnguarhikuarhu. w22.08 22, 23 párr. 10, 11

Nájkirukachi jánguarhintajka parachi ísï jámani eskaksï Tata Diosïiri juramukuecha na uandajka, nóchi jatsiska para máteruechani jusgariuani, nijtuchi eratseni eskachi jucha sánderu jurhimbikua jingoni jámasïnga eska imeecha. Sánderu sési, miántasïngachi eska Tata Diosï jindeeska “iámu parhakpinirhu anapu Juesi” (Gén. 18:25). Imajtsïni no sésikua íntskusti parachi jucha jusgarpini. Ju je eratsentani Joséeri ejempluni, achamasï ma enga jurhimbitku jámeenga. Ima no jusgariuaspti máteruechani ni sikiera jiáni enga no sési kánhapka. Mismu imeeri ermanu jémbeechaksï kánikua no sési kámaspti, íntspikuarhisptiksï paraka jántspiri máepiringa ka arhisptiksï imeeri taati jémbani eska ima uarhispkia. Máru uéxurhini tátsekua, José ménderu exejperantaspti imeeri ermanu jémbeechani jingoni, iásï ima kʼéri juramuti máesptia. Úpirindi no sési jusgariuani ka no sési ambe úkuantani. Ka imeeri ermanu jémbeecha inde ambeksïsï erokuarhini japti, nájkirukaksï kánikua no sési pʼikuarherani japka imani ambe jimbo engaksï úkupka Joséni. Peru José arhiaspti: “Asï ché je. ¿Andi ji Tata Diosïiri lugari jimbo jarhaski?” (Gén. 37:​18-20, 27, 28, 31-35; 50:​15-21). José kaxumbikua jimbo jámaspti ka jurajkuspti eska Tata Diosï Jeoba jusgariuapiringa imeeri ermanu jémbeechani. w22.08 30, 31 párr. 18, 19

¿Mítespijtsï eskaksïni Tata Diosï Jeoba uaaka chánksïni úrani para mókukuntani erachini ma enga kómarhijka? Juchachi uaaka jarhuajpeni no arhiparini engachi orhejtsïkutiika, orhejtsïkutiiri jarhuajpiriini, prekursoriini, publikadoriini, tumbiini ochi jatiriini, tatakeeni o nanakeeni. Enga nema enga xénchajka Tata Diosï Jeobani mintsita jingoni kómarhijka eska jarhuataaka, juchaari Tata Diosï sáno méntkisï úraasïndi orhejtsïkutiichani o máteru imeeri marhuariichani para sési pʼikuastantani indeni kʼuiripuni (Kol. 4:11). Kʼéri kóntperata máesti ísï marhuakuni Tata Diosï Jeobani ka juchaari erachiichani. Uaakachi ísï jarhuajpeni enga epidemia ambe jauaka, enga no sési ambe úkuarhiaka o engachi no sési kánhaaka. Jamberichi mintsita jingoni uékani jaka jarhuataani máteruechani, peru juchaari familiajtu no sési nitamakuarhini jarhani. Nájkiruka ísïika, uékasïngachi jarhuataani juchaari erachiichani ka Tata Diosï Jeoba kánikua sési pʼikuarherasïndi enga exejka na engachi xáni jánguarhintani jaka para jarhuajpeni (Prov. 19:17). w22.12 22 párr. 1, 2

Xénchperakua úsïndi eskachi mintsinharhikueuaka. Jesúsi uandaspti eska tsimani juramukuecha engaksï sánderu jukaparhakueka, jindeeska xénchani Tata Diosï Jeobani ka máteruechani (Mat. 22:​37-39). Jimbokachi xénchasïnga Tata Diosïni, uékasïngachi ísïini eska ima, jimboka ima jindeeska enga sánderu mintsinharhikueka. Pori ejemplu, na engachi xáni xénchaajka erachiichani jarhuataatijtsïni parachi no jámani aianguani máteruechani imeecheri ambe. Ju je no méni jámani uandantani imani ambe enga úpiringa kʼuratsetaani o no sési pʼikuastaani. Ístu, kaxumbikuajtsïni jarhuataati parachi mintsinharhikueni. Kristianu ma enga kaxumbitiika no jámaati orhetku uandantani ambe ma nomasi para ísku pakataani máteruechani (Filip. 2:3). Ístu, no jatsisti para máteruechani eratsetaraani eska ima míteska ambe ma engaksï imeecha no uaaka míteni. Ístu, engachi kaxumbitiiska nóchi jámaaka uandani na engachi eratsejka jucha ambe máeri enga Biblia no uandajka o juchaari publikasionicha. w22.09 12 párr. 12, 13

Ánjeli ma arhispti Danielini eska Tata Diosïiri ireta sánderu sési kurhanguapirindia profesiechani engaksï libru de Daniel jimbo jaka, joperu arhispti:“Iámindu no sési úriichaksï no kurhanguati”. Iásïchisï jatsika para xarhatani eskachi no imani grupu jingoni jarhaska engaksï no sési úriicha jaka (Mal. 3:​16-18). Tata Diosï Jeoba tánaantaxati iámindu imeechani enga ísï exeajka eskaksï imeeriska, o imeechani enga ima kánikua jukaparharaajka. ¿A no eskachi uékasïnga indeni grupu jingoni jarhani? Irekaxakachi jurhiatikuechani jimbo enga ambakiti ambe úkuarhini jaka. Peru no ióni jimbo, sánderu ambakiti ambe úkuarhiati. Niáraxatiia jurhiatikua enga iámindu no sési jásï ambe kʼamajkunhaaka. Tátsekua, exeakachi na enga úkuarhiaka ambe enga Tata Diosï Jeoba aiakupka Danielini. Ima arhispti: “Jauaraakari últimu jurhiatikuechani jimbo parari maiamunhantani” (Dan. 12:13). ¿Uékaxakijtsïa eska niáraaka ima jurhiatikua enga tsíntaaka Danieli ka imeecha engajtsï chá xénchaajka? Enga ísïika, jánguarhinta je parajtsï no méni jurajkuni Tata Diosïni, ka ísï chaari nombri karakata pakaraati libru tsípikueri jimbo enga Tata Diosï Jeoba karani jaka. w22.09 24 párr. 17; 25 párr. 19, 20

Inde ambe kánikua uinhaperantapti Esekielini. Seguru eska miánteenga eska Tata Diosï Jeoba sáno májkueni jásï ambe arhispka Moisésini ka Isaíasini jiáni enga erakuapka parakaksï imeeri profeteepiringa (Éx. 3:10; Is. 6:8). Esekieli ístu mítespti eska Tata Diosï Jeoba jarhuataaspka ini profetechani parakaksï úpiringa úni imani ánchikuarhiteechani engaksï kánikua úkua jukapka. Ísï jimbo, enga Tata Diosï tsimani uelta arhipka: “Axaxakakeni”, ima mítespti eska Tata Diosï meru jarhuatapiringa. Ístu libru Ezequiel jimbo uánikua ueltaksï jarhasti ari uandakuecha: “Tata Diosï Jeobareni arini ambe arhisti” (Ezeq. 14:2). Ka uánikua ueltaksï jarhasti ari uandakuecha: “Tata Diosï Jeobareni ménderu arhispti ini ambe” (Ezeq. 6:1). Ísï jimbo, profeta seguru jarhaspti eska Tata Diosïsï axapka. Ístu, jimboka imeeri taati jémba saserdotiispka, seguru eska jorhendaspka eska Tata Diosï Jeoba méntkisï arhiasïreenga imeeri profetechani eska jarhuataapiringa. Ístu Tata Diosï Jeoba arhispti Isaakini, Jakobuni ka Jeremíasini: “Ji tʼungini jingoni jarhaska” (Gén. 26:24; 28:15; Jer. 1:8). w22.11 2 párr. 3

Nájkirukaksï Adáni ka Eba pekarika ka imeecheri kulpa jimbo iámindu imeecheri uájpeecha uarhini jarhani. Tata Diosï Jeoba no mirikurhixati ambe enga uékani japka úni ueenakuarhu (Is. 55:11). Ima útasï uékaxati eskaksï ima kʼuiripuecha engaksï no méni jurajkuaka irekaaka para méntkisï. Eratsi je iámindu imani ambe enga ima uandakia ka úni paraka kumplirikuarhiaka ambe enga eratsetini jaka. Tata Diosï Jeoba aiatspesti eska tsítantauaka imani kʼuiripuechani engaksï uarhikia ka íntskuauati sésikua paraksï úni irekani para méntkisï (Úku. 24:15; Titu 1:​1, 2). Jobu enga sési marhuakupka Tata Diosïni, seguru jarhaspti eska Tata Diosï Jeoba mintsita jingoni uékaxaka tsítaantani imeechani engaksï uarhikia (Job 14:​14, 15). Ístu profeta Danieli mítespti eskaksï kʼuiripuecha tsíntapiringa ka eskaksï sésikua jatsipiringa paraksï irekani para méntkisï (Sal. 37:29; Dan. 12:​2, 13). Judiuecha engaksï Jesúsiiri jurhiatikuecha jimbo irekapka, ístuksï mítespti eska Tata Diosï Jeoba úpiringa íntskuani “tsípikua para méntkisï” imeeri ambakiti marhuariichani (Luk. 10:25; 18:18). Jesúsi mémindu uandaspti iiri ambe ka imeeri mismu Taati jémba tsítantaspti imani (Mat. 19:29; 22:​31, 32; Luk. 18:30; Juanu 11:25). w22.12 4, 5 párr. 8, 9

Tata Diosï Jeobajtsïni pʼímarhisïndi parachi andarhierani imani (Sant. 4:8). Uékasïndi jindeeni juchaari Tata Diosï, juchaari Taati ka juchaari amigu. Mókuchiantasïndijtsïni juchaari kómarhikuechani ka jarhuatasïndijtsïni engachi uandanhiateechani jatsiajka. Ístu, úrasïndi imeeri kúnguarhikuani parajtsïni jorhendani ka kuidarini. Uaakachi andarhierani Tata Diosï Jeobani engachi kómarhiska, engachi arhintaska Bibliani ka engachi eratsentaska indeeri ambe. Inde ambe uaati eskachi xénchaaka ka agradesidu jarhani imani jingoni. Niáraakachi uékani kurhajchani ka kʼéri ambe arhini, jimboka ima jukanchaska (Apok. 4:11). Engachi sánderu míteaka imani, sánderuchi mintsikaaka imani ka imeeri kúnguarhikuani enga ima jatsika parajtsïni kuidarini. Joperu Noambakiti jánguarhintasïndi parakachi sánhani arhiaka nóteru xáni mintsikania Tata Diosï Jeobani ka imeeri kúnguarhikuani. Joperuchi uaaka anhaxurhikuni. Engachi kánikua mintsikaska Tata Diosï Jeobani, nóchi jurajkuaka ni imani ni imeeri kúnguarhikuani (Sal. 31:​13, 14). w22.11 14 párr. 1-3

Uánikua kristianu jurhimbitiichaksï jurajkusïndi paraksï ónhanhani ka niárasïndiksï jamberi sáno uarhini jimbokaksï xénchasïnga Tata Diosï Jeobani, imeecheeri Kʼéri Juramutini. Ka eratsetixatiksï no méni jurajkuni Tata Diosïni ísï eskaksï tanimu ebreuecha engaksï pʼímutantskata uérapka engaksï chpirirhu kʼuanijpanhapka jimbokaksï kurhajchaspka imeecheeri Sánderu Kʼéri Juramutini. Dabidi enga salmuechani karaaka mítespti na enga xáni jukaparhakueka iámu mintsita jingoni jámani Tata Diosïni japarini. Ima karaspti: “Tata Diosï Jeoba jusgariuauati ireteechani. Oh, Tata Diosï Jeoba, ísïrini jusgarii eskari tʼu na exejka eskani jurhimbikua jingoni jámasïnga, ka ístu ambe engari exejka eskani kueratanchasïnga” (Sal. 7:8). Ka ístu uandaspti: “Eskarini kuájchakuaka engani ísï iámu mintsita jingoni jámajka ka jurhimbikua jingoni” (Sal. 25:21). Sánderu ambakiti ambe engachi uaaka úni jindeesti no méni jurajkuni Tata Diosï Jeobani. Engachi ísï úska, uaakachi májkueni pʼikuarherani eska salmista enga karapka: “Tsípisïndiksï imeecha engaksï iámu mintsita jingoni jámajka [...], engaksï ísï újka eska Tata Diosï Jeobaeri lei na uandajka” (Sal. 119:​1, nota). w22.10 17 párr. 18, 19

Jobu uánikuecha jingoni uandontskuarhespti enga tsípiti japka, peru kánikua ísku pakaraspti enga Tata Diosï Jeoba jingoni uandontskuarhepka. Tata Diosï Jeoba arhispti Jobuni eska exepiringa máru ambe enga ima kueraaka ka engajtsïni ísku pakatajka. Inde ambe jarhuatapirindi míteni Jobuni eska Tata Diosï Jeoba kánikua jánhastiiska ka mintsikani eska ima úsïnga kuidariuani imeeri marhuariichani. Pori ejemplu, Jobu exespti eska Tata Diosï íntsaasïnga animaliichani ambe engaksï xáni uétarhinchajka paraksï úni irekani ka eska imantu úpiringa íntskuni ambe enga uétarhinchapiringa (Job 38:​39-41; 39:​1, 5, 13-16). Enga Jobu eratsentapka ini ambe, uánikua ambe jorhenguarhispti na enga jásïika Tata Diosï. Juchajtuchi uaaka sánderu ambe jorhenguarhini Tata Diosïiri ambe engachi kueraakatani exejka. Peru jamberi no méntkisï fásiliuati ísï úni. Engachi siudadirhu irekaka, jamberichi no uaaka pauani pauani exeni kueraakata ambe. Ístu engachi ireta sapichu ma jimbo irekaka, jamberichi ísï exejka eskachi no tiempu jatsiska parachi kueraakata ambe exeni jarhani peru uétarhisïndi eskachi arhutaaka tiempu parachi kueraakata ambe exeni. w23.03 15 párr. 1, 2

Jesúsi uandaspti eska ante de parhakpini kʼamarani, japiringaksï ʻkʼérati jenchekuechaʼ ka máteru no sési jásï ambe (Luk. 21:11). Ístu, uandaspti eskaksï kʼuiripuecha sánderu no sési jásï ambe úpiringa ka exesïngachi eska i ambe ísïiska, iásï sánderu no sési kámberanhasïndia, atajperanhasïndi ka kʼuiripuechaksï no sési jámasïndi (Mat. 24:12). Jesúsi no méni uandaspti eska imeechajkuksïsï no sési nitamakuarhipiringa engaksï no marhuakujka Tata Diosï Jeobani, jimboka uánikua Tata Diosïiri marhuariichajtuksï kómu nitamakuarhisïnga no sési jásï ambe jimbo enga úkuarhijka (Is. 57:1; 2 Kor. 11:25). Jamberi Tata Diosï Jeoba no uaati milagru ma parajtsïni kuájchakuni, perujtsïni íntskuati ambe engachi uétarhinchaaka parachi no xáni uandanhiani ka parachi pínandikua jatsini. Enga no sési ambe úkuarhiaka, uaakachi no xáni uandanhiani engachi preparadu jauaka. Peru ísï úni, ¿arhikuekani japirini eskachi no mintsikasïnga Tata Diosï Jeobani? Nómbe. Sánderu sési, engachi sési preparadu jarhaska para jiáni enga no sési jásï ambe úkuarhiaka, xarhatani jarhasïngachi eskachi meru mintsikasïnga eskajtsïni Tata Diosï kuájchakuaka. ¿Andichisï ísï uandajki? Jimbokajtsïni Bibliani arhisïnga eskachi preparadu jauaka para jiáni enga no sési ambe úkuarhiaka. w22.12 18 párr. 9, 10

Enga José útasï ónhakuarhetini japka, Tata Diosï Jeoba úspti eska Ejiptu anapu juramuti, tsimani tsánharhikuechani jatsiapiringa engaksï kánikua uandanhiatapka. Ísï jimbo, enga mítepka eska José úpiringa aianguni ambe engaksï arhikuekeenga tsánharhikuecha, pʼitajkuarhispti. Tata Diosï Jeobaeri jarhuajperata jingoni, José no solu aianguspti ambe engaksï arhikuekeenga tsánharhikuecha, sino ístu arhispti ambe enga jatsipka para úni. Inde ambe ísku pakataspti faraonini. Ka enga kuenta íntskukuarhepka eska Tata Diosï Jeoba jarhuatasïreenga ini tumbini, erakuspti paraka ima exepiringa iámu Ejiptu anapu tʼirekueri ambe (Gén. 41:​38, 41-44). Ísï tátsekua, kʼéri kʼarhingua ma jarhaspti Ejiptu ka ístu Kanaáni jima enga Joséeri familia irekapka. Joperu jimboka iásï José juramukua jatsispkia, úpirindia jarhuatani imeeri familiani. Tiempu jingoni imeechaksï niárapirindi jindeeni ima familia enga jimbo Mesíasi jupiringa. Iámindu i ambe xarhatasïndi eska Tata Diosï Jeoba úspka eska iámindu ambe enga José ueenga sési uérakupiringa. Tata Diosï Jeoba no jurajkuspti eskaksï Joséeri ermanu jémbeecha uándikupiringa. Sánderu sési, úspti ambe ma paraka úkuarhipiringa ambe enga ima uékeenga. w23.01 17 párr. 11, 12

¿Ambe arhikuekasïni juchajkumindu exekuarhini jarhani? Arhikuekasïndi jingontku jarhani imani ambe jingoni enga uaaka eskachi nóteru sési pájperaakia Tata Diosï Jeoba jingoni ka eskachi jánguarhintaaka no no sési jásï ambe niátani. Engachi ísï úska, Tata Diosïjtsïni seguiriini jauati xénchani (Prov. 22:3; Jud. 20, 21). Apostoli Pablu arhiaspti kristianuechani eskaksï jatsispka para imajkuminduksï exekuarhini. Pori ejemplu, Éfesu anapu kristianuechani karakuaspti: “Kuidadu jingoni jáma je, ka no komueska imeecha engaksï no sáni eratsekua jukaka, sino komueska imeecha engaksï sési eratsejka” (Éfes. 5:​15, 16). Satanási mámaru ambe úsïndi parachi jucha nóteru sési pájperania Tata Diosïni jingoni. Ísï jimbo, Bibliajtsïni arhisïndi eskachi míteaka ambe enga uéjka Tata Diosï Jeoba eskachi uaaka ka ísïchi uaaka kuájchakukuarhini engajtsïni Satanási uékani jauaka no sési ambe úchini (Éfes. 5:17). Ka parachi úni sési míteni ambe engachi jatsika para úni, jatsiskachi para kurhanguni ambesï uéjki Tata Diosï Jeoba eskachi uaaka. Ka ¿nénachi úsïni indeni ambe? Engachi jorhenguarhijka imeeri Uandakuani ka engachi eratsentajka ambe engachi arhintajka. Engachi sánderu sési kurhanguaka ambe enga jaiapanhentajka Tata Diosï Jeoba ka engachi sánderu jánguarhintaska parachi májkueni eratseni eska Kristu, sánderu fásiliuati ísï jámani eska imeecha “engaksï sési eratsejka” ka uaakachi ísï úni nájkiruka Bibliarhu no jauaka lei ma enga uandaaka ambe engachi jatsika para úni (1 Kor. 2:​14-16). w23.02 16, 17 párr. 7-9

¿Najtsï xáni someni limpiarisïni chaari kʼumanchikuani? Jamberijtsï ante de jima irekani kánikuajtsï sési limpiaripka. ¿Peru ambe úkuarhipirini engajtsï nóteru limpiaripiringia? Eskachi na míteka, sóntku no sési jándepirindi ka tʼupuri ambe japirindi. Ísï jimbo, paraka kʼumanchikua ma uaaka méntkisï sési xarharani uétarhisïndi pauani pauani limpiarini. Ka sáno májkueni, uétarhisïndi eskachi méntku jánguarhintani jauaka mójtakuni na engachi eratsejka ka na engachi jásï kʼuiripueka. Ísïisti, ante dechi itsï atakuarhini jánguarhintaskachi mójtakuni juchaari irekuani ka pímbinhasïntani “para iámindu indeni no sési jásï ambe jingoni enga kuerpu újka ka enga mintsita tamapu eratsejka” (2 Kor. 7:1). Peruchi ístu iásï jatsiska para ísï úni eska apostoli Pablu na uandapka: jatsiskajtsï para seguiriini jarhani ‘jimbanherantani chaari eratsekuechani’ (Éfes. 4:23). Ambe engaksï i parhakpinirhu anapuecha újka úpirindi úni eskajtsïni Tata Diosï Jeoba nóteru pímbinhasï exepiringia. Ka parachi no indeni ambe úkuarhinchani ka seguiriini jaiapanherantani Tata Diosïni, jatsiskachi para someni exekuarhini ambe engachi eratsejka, na engachi jámajka ka ambe engachi tsitijka. w23.01 8 párr. 1, 2

¿Ménisiiichi eratsentaski na enga xáni ambakiti ambeepka kurhaani enga Jesúsi jorhentpini jarheenga? Ima mémindu memoria jimbo uandasïreendi ambe enga Tata Diosïiri Karaka arhijka. Enga Jesúsi itsï atakuarhipka ka espiritu santu jimbo erakunhani, jamberi miántapti na enga irekapka auandarhu ante de Echerirhu jurhani. Ka ambe enga uandapka ísï tátsekua enga na itsï atakuarhipkia ka ante de uarhini xarhatasïndi eska i ambe ísïiska (Deut. 8:3; Sal. 31:5; Luk. 4:4; 23:46). Ka tanimu uéxurhini ka terujkani enga aianhpini jámapka Jesúsi mémindu arhintasïreendi Tata Diosïiri Karakatani, uandaspti ambe enga arhienga ka aianguasïreendi máteruechani ambe enga arhikuekeenga (Mat. 5:​17, 18, 21; 5:22; Mat. 5:​27, 28; Luk. 4:​16-20). Asta ante de Jesúsi ueenani aianhpini pʼindespti arhintani Tata Diosïiri Karakatani ka kurhajchaani máteruechani engaksï arhintani jarheenga ka engaksï indeeri ambe uandani jarheenga. Seguru eska ima kurhajchasïreenga Maríani ka Joséni úrani Tata Diosïiri Karakatani (Deut. 6:​6, 7). Ístu, Jesúsi mándani sábadu nirasïreendi sinagogarhu imeeri familia jingoni ka kánikua jingontku kurhaasïreendi enga arhinhantani jarheenga Tata Diosïiri Karakata (Luk. 4:16). w23.02 8 párr. 1, 2

Jarhasti uánikua ambe engachi jimbo jatsika para xénchani Tata Diosï Jeobani. Pori ejemplu, chájtsï jorhenguarhiskia eska imasï újka eska ʻtsípikua jauakaʼ ka eskajtsïni íntskusïnga “iámindu ambakiti intsïmperakua, ka ístu iámindu ambakiti ambe enga sésiika” (Sal. 36:9; Sant. 1:17). Iámindu ambe enga chá jatsika, Tata Diosï Jeobani jimboesti ka ima kánikua intsïmpitiisti ka kánikuajtsïni xénchasïndi. Euajpintskua kʼéri regalu máesti Tata Diosï Jeobaeri. ¿Andichisï ísï uandajki? Ju je eratsentani na engaksï xáni xénchperajka Tata Diosï Jeoba ka imeeri Uájpa. Jesúsi uandaspti eska imeeri Taati uékasïnga ka eska imajtu uékasïnga Taati jémbani (Juanu 10:17; 14:31). Ka imeechaksï niárasti sánderu xénchperani jimbokaksï ióni májku kʼéri jarhaska (Prov. 8:​22, 23, 30). Iásï eratsenta je na enga xáni no sési pʼikuarherapka Tata Diosï Jeoba enga jurajkupka eska imeeri Uájpa kómu nitamakuarhipiringa ka uarhini. Peru jimboka Tata Diosï Jeoba xáni xénchaasïnga iámindu kʼuiripuechani íntspisti imeeri Uájpani para uarhini chánksïni jimbo ka ístu máteru kʼuiripuechani jimbo paraksï úni irekani para méntkisï (Juanu 3:16; Gal. 2:20). Ka inde jindeesti sánderu kʼéri ambe engachi jimbo xénchajka Tata Diosïni. w23.03 4, 5 párr. 11-13

Ju je no jiókuarhini ambe engaksï jorhentpijka apostateecha. Jesúsi xukaaspti Pérgamu anapu máru kristianuechani jimbokaksï úxapka eska kúnguarhikua arhukurhitini japiringa (Apok. 2:​14-16). Joperu felisitariuaspti Tiatira anapu kristianuechani jimbokaksï no jiókuarhispka ambe enga Satanási jorhentpienga ka pʼímarhiaspti parakaksï no jurajkupiringa jurhimbikuani (Apok. 2:​24-26). Kristianuecha engaksï nóteru sési marhuakuni japkia Tata Diosïni ka engaksï jakajkupka chkuanderakua ambe, jatsisptiksï para móantani. Ísï jimbo, juchajtuchi jatsiska para no jiókuarhini ambe enga no terukuntajka imani ambe jingoni enga Tata Diosï Jeoba uéjka. Jamberiksï apostatecha uandajti eskaksï janhanharhisïnga Tata Diosïni, peru ʻmintsitarhu nóminduksï janhanharhiniʼ (2 Tim. 3:5). Engachi sési jorhenguarhiska Tata Diosïiri Karakatani, uaakachi sóntku exeni ambe enga chkuanderakua ambeeka ka nóchi jakajkuaka indeni ambe (2 Tim. 3:​14-17; Jud. 3, 4). Kánikua jukaparhakuesti eskachi exeaka sini Tata Diosï jaiapanhentaxaki ambe engachi újka para kʼéri ambe arhini. Engachi úni jaka ambe ma enga no sési jaka, ju je sóntku jurajkuni inde ambe (Apok. 2:​5, 16; 3:​3, 16). w22.05 4 párr. 9; 5 párr. 11