Abrili

Ióntkiksï jarhaspti Tata Diosï Jeobaeri marhuariicha engaksï problemeechani jatsiapka engaksï no erokuarhiani japka. Ju je eratsentani ambe enga úkuarhinchapka Jakobu. Imeeri Taati jémba arhispti eska tembuchapiringa Labániiri uájpa ma jingoni, enga familiari máepka enga kómarhienga Tata Diosï Jeobani. Ka aiakuspti eska Tata Diosï Jeoba uánikua kóntperateechani íntsaapiringa (Gén. 28:1-4). Ka Jakobu ísï úspti: Kanaáni uératini niraspti asta jima enga Labáni irekapka, enga tsimani uájpeechani káuenga, Leani ka Rakelini. Jakobu tsitispti Rakelini enga sánderu sapichuepka ka uékaspti siete uéxurhini ánchikuarhikuni Labánini para úni Rakeli jingoni tembuchani (Gén. 29:18). Peru no ísï úkuarhispti eska Jakobu na erokuarhini japka. Labáni enganiarispti ka Leani íntskuspti enga sánderu kʼériipka paraka imeeri témbeepiringa. Ma semana ísï tátsekua jurajkuspti eska Rakeli jingoni tembuchapiringa, peru arhispti eska máteru siete uéxurhini ánchikuarhikupiringa (Gén. 29:26, 27). Peru no inde ambejkuespti. Labáni ístu no jurhimbikua jingoni kámaspti Jakobuni imeecheri negosiuecha jingoni. ¡Úspti eska 20 uéxurhini ánchikuarhikupiringa! (Gén. 31:41, 42). w23.04 15 párr. 5

¿Nénchi uaa andarhierani engachi uétarhinchani jauaka eskajtsïni nema uinhaperantaaka ka jánhastani? Juchachi míteskia nénchi uaa andarhierani. Uaakachi kómarhini Tata Diosï Jeobani ka imajtsïni pʼímarhisïndi parachi ísï úni. Ístuchi míteska eska ima uékasïnga eskachi someni uandontskuarheaka imani jingoni jimbokajtsïni arhisïnga ‘méntku jauena [je] kómarhini’ (1 Tes. 5:17). Uaakachi iámindu ambe aiangukuarhini Tata Diosïni ka kurhakuni eskajtsïni jánhastaaka iámindu ambe jingoni (Prov. 3:5, 6). Ka jimboka Tata Diosï Jeoba kánikua sési kámpisïnga, imajtsïni jurajkusïndi eskachi kómarhiaka namuni xanhari engachi jucha uékaaka. Jesúsi mítespti eska Tata Diosï Jeoba kánikua jukaparharasïnga engaksï kʼuiripuecha kómarhijka. Kánikua ante de Jesúsi Echerirhu jurhani, ima exespti na enga imeeri Taati mókukuantapka kómarhikuechani imeeri marhuariichani. Jesúsi imani jingoni jarhaspti jiáni enga ima mókukuantapka xáni sési járhati kómarhikuechani enga Ana, Dabidi, Elíasi ka uánikua máteruechaksï úkupka (1 Sam. 1:10, 11, 20; 1 Rey. 19:4-6; Sal. 32:5). Jimbosï Jesúsi úpti arhiani imeeri chúxapatiichani eskaksï mémindu kómarhipiringa Tata Diosïni ka eska ima kurhajchaapiringa (Mat. 7:7-11). w23.05 2 párr. 1, 3

Kʼéri saserdoti Jeoiadá chénharhisïreendi Tata Diosï Jeobani. Enga Atalía, Jesabeliiri uájpa, niárapka juramukua jatsini Judá, nájkiruka no sésikua jatsipka. Ima kánikua no ambakispti ka jimboka uékasïreenga juramukua jatsini, uándikuaspti sáno iámindu imeeri nimakuechani paraka úpiringa juramukua jatsini (2 Crón. 22:10, 11). Peru máechakitu sapi enga Jeoási arhinheenga úspti tsípiti pakarani jimboka Jeosabeati enga Jeoiadáeri témbeepka kuájchakuspka. Ima ka imeeri uámba, jískasptiksï ka kuidariisptiksï indeni sapini. Engaksï ísï úpka, úsptiksï eska japiringa Dabidiiri familia ma enga niárapiringa reiini. Jeoiadá no méni jurajkuspti Tata Diosï Jeobani ka imani ambe úspti enga sési japka nájkirukaksï kʼuiripuecha kánikua chérhienga Atalíani. Enga Jeoási siete uéxurhini jatiripkia, Jeoiadá ménderu xarhataspti eska méntkisï úpiringa ambe enga Tata Diosï Jeoba uandajka. Ísï jimbo, eratsespti úni ambe ma. Enga inde ambe sési uérakupiringa, Jeoási reiipirindi jimboka Dabidiiri familiarhu anapuespka. Peru enga no sési uérakupiringa, Jeoiadánksï uándikupirindi. Tata Diosï Jeobaeri jarhuajperata jingoni, iámindu ambe sési uéraspti. w23.06 17 párr. 12, 13

Rei Nabukodonosori, úpirindi eratseni eska Danieli imeeri enemigu úkuarhixapkia ka úpirindi uándikutarkuarhini, peru Danieli balori xarhataspti ka iámindu ambe aianguspti. ¿Ambe jarhuatapi Danielini para méntkisï balori xarhatani? Seguruchi jarhaska eska desde enga tumbiipka uánikua ambe jorhenguarhispka imeeri taatiicheeri ejemplu jingoni (Deut. 6:6-9). Danieli míteaspti Diesi Mandamientuechani, peru ístu mítespti máteru ambe enga Lei uandeenga. Pori ejemplu ima mítespti ambe engaksï israeliteecha ueenga arhani ka ambe nómbe (Lev. 11:4-8; Dan. 1:8, 11-13). Ístu, Danieli mítespti ambe enga Tata Diosïiri ireta nitamakuarhipka ka ambe engaksï úkuarhincheenga jiáni engaksï no kurhajchauenga Tata Diosï Jeobaeri juramukuechani (Dan. 9:10, 11). Ambe enga xáni nitamakuarhipka Danieli, úspti eska ima seguru japiringa eska Tata Diosï Jeoba ka imeeri ánjeliicha engaksï xáni uinhapitiika méntkisïksï jima japiringa para jarhuatani (Dan. 2:19-24; 10:12, 18, 19). w23.08 3 párr. 5, 6

Rebekeri ambechi uandani jauaka. Ima kánikua jánhaskatispti ka sési mítespti na jatini ka néna úni ambe ma (Gén. 24:58; 27:5-17). Peru ístu janhanharhikua jingoni jámasïreendi ka kurhandirasïreendi (Gén. 24:17, 18, 65). Engari tʼu májkueni jámaaka eska Rebeka, kaxumbitiini ka janhanharhiani imeechani engaksï orhejtsïkujka ambakiti ejemplueri máeuaka chiiti familiarhu ka ístu kúnguarhikuarhu. No kʼéramakuarhini, jindeesti kualidadi ma engachi iámindu kristianuecha uétarhinchajka. Esteri ambakiti Tata Diosïiri marhuari máespti enga xarhatapka ini kualidadini. Pori ejemplu, enga ima na reineepkia ima no méni niáraspti kʼéramakuarhini. Ístu, ima kurhajchasïreendi imeeri primu jémbani Mardokeuni (Est. 2:10, 20, 22). Tʼuri uaaka májkueni úni eska Esteri engari kurhakuska nemani eskakeni ambakiti konsejuechani íntsauaka ka ísïri úni (Titu 2:3-5). Ju je exeni na enga Esteri xarhatapka eska no kʼéramakuarhisïreenga. Ima “kánikua sési jánharhispti ka sési jáxespti”, peru no méni kʼéri ambe exekuarhispti (Est. 2:7, 15). w23.12 19, 20 párr. 6-8

Engachi méntkisï jukari kulpabli pʼikuarherani jauaka, ísïisïndi komueska kʼuetsapiti ambe páni jarhani, ka Tata Diosï Jeoba no uékasïndi eskachi ísï pʼikuarheraaka. Engachi uandantakia ambe engachi no sési niátaka, mintsita jingoni moántani ka ístu jánguarhintani nóteru únia indeni ambe, uaakachi seguru jarhani eskajtsïni Tata Diosï puáchentaskia (Úku. 3:19). Engachi na újkia ini ambe, Tata Diosï Jeoba no uékasïndi eskachi seguiriuaka kulpabli pʼikuarherani, jimboka ima míteska eska ióni jamberi ísï pʼikuarherani uaakajtsïni kánikua no sési úchini (Sal. 31:10). Engachi jucha méntku kómu pʼikuarherani jauaka indeni ambe jimbo, inde ambejtsïni chkéraati ka nóteruchi uaakia uiriini karrerarhu enga tsípikuarhu pájpejka (2 Kor. 2:7). Engajtsï méntku kulpabli pʼikuarherani jaka, miá je eska Tata Diosï mintsita jingoni puátspentasïnga (Sal. 130:4). Enga ma mintsita jingoni moántajka, Tata Diosï Jeoba kumplirisïndi i ambe: “Nóteruni méni miáuakia chaari pekaduechani” (Jer. 31:34). I ambe arhikuekasïndi eska engaksïni Tata Diosï Jeoba puáchentaakia, nóksïni méntku miátantani jauati ambe engajtsï no sési úka. Engajtsï iáiasï no uaaka jatsiani máru responsabilidadiichani kúnguarhikuarhu, asï uandanhia je. Tata Diosï Jeoba mirikurhistia ambe engajtsï ióntki no sési úka, ¿andijtsïsï chá no májkueni újki? w23.08 30, 31 párr. 14, 15

Pandemia COVID-19 jimbo uánikua chkuanderakua ambe uandanhaspti. Joperu ima Jeobaeri testiguecha engaksï úpka ambe enga organisasioni uandapka, nóksï xáni uánikua problemeechani jatsiaspti ka nijtuksï xáni uandanhiapi eska imeecha engaksï jakajkupka ini chkuanderakuechani (Mat. 24:45). Nóchi jatsiska para mirikurhini ambesï sánderu uétarhijka eska ma uaaka (Filip. 1:9, 10). Ima ambe engachi pauani pauani újka komu tʼireni, itsïmani, tsípikuarhini ka ánchikuarhini, úpirindijtsïni ójkutani parachi nóteru exenia ambe enga meru jukaparhakueka (Luk. 21:34, 35). Ístu, pauani pauanchi kurhaasïnga ka exeni eskaksï kʼuiripuecha marcheechani uaasïnga ka na engaksï méntku arhirperani jarhajka politikuecha. Nóchi jatsiska para jurajkuni eska i ambejtsïni ójkutaaka, jimboka inde ambe úpiringa úni eskachi ueenapiringa apoiariuani indeni kʼuiripuechani juchaari eratsekuarhu uératini. Satanási úrasïndi uánikua ambe parachi nóteru uékania úni imani ambe enga sési jaka. w23.07 16, 17 párr. 12, 13

Para imeecha engaksï Tata Diosï Jeobani marhuakujka, jurhiatikua enga sánderu jukaparhakuejka mándani uéxurhini jindeesti jiáni engaksï miántajka tata Jesukristueri uarhikuani. Tata Jesukristu indenkusï juramupti eskachi úntapiringa (Luk. 22:19, 20). Ístujtsïni jarhuatasïndi exeni néna ka néna engachi uaaka xarhatani eskachi agradesidu jarhaska tata Jesukristueri uarhikuani jimbo (2 Kor. 5:14, 15). Ístujtsïni jarhuatasïndi parachi juchaari erachiicha jingoni jarhani ka uinhaperperantanchi (Rom. 1:12). Ístu, uánikua kʼuiripuechaksï ísku pakarasïndi imani ambe jimbo engaksï jima kurhaajka ka exeni, ka uékasïndiksï jorhenguarhini Biblieri ambe. Ístuchi uékasïnga eska niárakia inde jurhiatikua jimbokachi úsïnga exeni eska Tata Diosï Jeobaeri ireta májku kʼéri jarhaska iámu parhakpinirhu. Jimbosï xáni jukaparhakueti para jucha miántani tata Jesukristueri uarhikuani. w24.01 8 párr. 1-3

Engachi sánderu eratsentaaka na engaksï xáni maiampika Tata Diosï Jeoba ka Jesúsi, sánderuchi kurhanguaka na engajtsïni xáni xénchajka iáminduechani (Gal. 2:20). Tata Diosï Jeoba no maiampisti nomasi para kumpliriini leini ka ísïjtsïni euajpintania, sánderu sési, ísï ústi jimbokajtsïni meru xénchasïnga. Jimbosï íntspipti imeeri Uájpeeri tsípikuani enga xáni jukaparhareenga, ka jurajkuspti eska kómu nitamakuarhipiringa ka uarhini juchantsïni jimbo. Eskachi na exekia, Tata Diosï Jeobajtsïni no solu arhisïndi eskajtsïni xénchasïnga, sino ístujtsïni xarhatachesïndi (Jer. 31:3). Jimbokajtsïni xénchasïnga, ústi eskachi andarhierapiringa (terukutanta je Deuteronomio 7:7, 8 jingoni). No ma ambe uaati úni eskajtsïni Tata Diosï Jeoba nóteru xénchaakia (Rom. 8:38, 39). Jiájkani, ¿nénajtsï pʼikuarherasïni chá míteparini ini ambe? w24.01 28 párr. 10, 11

Kristianu erakukateechaksï mintsita jingoni jukaparharasïndi indeni erokuarhikuani engaksï jatsika. Pori ejemplu, 1991 jimbo erachi Frederick Franz ini ambe uandaspti: “Juchaari erokuarhikua niáraati ísï úkuarhini, ka para iámindu jucha 144,000 Tata Diosïjtsïni íntskuati iámindu ambe engajtsïni aiachetini jaka, juchaari kóntperata iauani sánderu ambakitiuati ka eskachi na eratseni jaka”. ¿Néna pʼikuarherasïreeni ima enga xáni ióni marhuakupkia Tata Diosï Jeobani? Ima uandantaspti: “Májkuenchi jukaparharasïnga juchaari erokuarhikuani. Engachi sánderu tiempu erokuarhijka, sánderuchi jukaparharasïnga. Jindeesti ambe ma enga kánikua sési jaka erokuarhini. Iásï ini erokuarhikuani sánderu tsípikua jingoni erokuarhixaka eska antesi”. Iáminduchi erokuarhixaka kánikua sési irekani para méntkisï Echerirhu o auandarhu. I ambe engachi mintsikani jaka uaati pauani pauani sánderu uinhapiti jarhani. w23.12 9 párr. 6; 10 párr. 8

Ióntki anapu tabernakulurhu uérakua altari ma jarhaspti kobriiri, jimaksï kéjtsïtaasïreendi animaliichani para Tata Diosï Jeoba (Éx. 27:1, 2; 40:29). Joperu inde kéjtsïtakuechaksï no úsïreendi eskaksï méntku kʼamajkunhapiringa iretarhu anapu pekaduecha (Ebr. 10:1-3). Animaliicheeri kéjtsïtakuecha engaksï someni úkuarhienga altarirhu, imani kéjtsïtakuanisï arhikuekani japti enga méntku kʼamajkupiringa kʼuiripuecheeri pekaduni. Jesúsi mítespti eska Tata Diosï Jeoba axaspka Echerirhu para imeeri tsípikuani íntspini para úni kʼuiripuechani euajpiantani (Mat. 20:28). Ísï jimbo, enga Jesúsi itsï atakuarhipka, Tata Diosï Jeobaeri orhepatini jimbo niáraspti para úni ambe enga ima uékeenga (Juanu 6:38; Gal. 1:4). Jesúsi íntspispti imeeri tsípikua “ma ueltajku ka para méntkisï” para puákuantaani pekaduechani iámindu imeechani engaksï xarhatajka eskaksï mintsikasïnga (Ebr. 10:5-7, 10). w23.10 26 párr. 10, 11

Juchachi jandiajku no úpiringa kénditakuarhini pekaduni ka uarhikuani (Sal. 49:7, 8). Jimbosï Tata Diosï Jeoba íntspipti imeeri Uájpeeri tsípikuani parajtsïni pʼímutantani ka tsimarhanksï kánikua maiampisti. Engachi eratsentajka ambe enga Tata Diosï Jeoba ka tata Jesukristu úka juchantsïni jimbo, sánderuchi jukaparharaaka engajtsïni ísï euajpintaka. Enga Adáni na pekariipkia tsïtakuarhispti imani sésikuani para irekani para méntkisï ka niteruksï uájpeecha úpirinia irekani para méntkisï. Ísï jimbo, Jesúsi íntspispti imeeri tsípikuani enga perfektueka para ménderu piántani ambe enga Adáni tsïtapka. Iámu imani tiempu jimbo enga Jesúsi Echerirhu irekapka ‘no méni no sési ambe niátaspti ka no méni chkuanderaspti’ (1 Ped. 2:22). Jesúsi ísï uarhispti komueska kʼuiripu ma enga perfektuepka jimbosï imeeri tsípikua májkueni jukaparhapti komueska ima tsípikua enga Adáni tsitapka (1 Kor. 15:45; 1 Tim. 2:6). w24.01 10 párr. 5, 6

Enga Jesúsi na tsíntapkia, inchaspti Sánderu Pímbinhasï Kuarturhu enga Tata Diosïiri templurhu jaka. Eskachi na exeni jaka, iauani sánderu ambakitiisti ambe enga Tata Diosï Jeoba uaxastaka parachi kómarhini jimboka euajpintskuani úraska ka ístu jimboka tata Jesukristu Sánderu Kʼéri Saserdotiiska. Israeli anapu sánderu kʼéri saserdoti imani Sánderu Pímbinhasï Kuarturhu inchasïreendi engaksï kʼuiripuecha úpka ka animalicheeri iurhiri jingoni inchasïreendi, joperu Jesúsi inchaspti imani lugari jimbo enga iauani sánderu pímbinhasïika: “ima auandarhusï inchati” Tata Diosï Jeobani japarini. Ka juchantsïni jimbo, Tata Diosïni japarini peeraspti imeeri tsípikuani enga perfektuepka “para kʼamajkuni pekaduni ka ísï ústi enga kéjtsïtaka imeeri tsípikuani” (Ebr. 9:24-26). Iáminduechachi uaaka kómarhini Tata Diosï Jeobani imeeri templurhu, no arhiparini sinchi irekaa auandarhu o Echerirhu. w23.10 28 párr. 13, 14

Eranhaska je ambe enga xáni uaaka Jesúsi auandarhu komu Rei ka K’éri Saserdoti ma enga pʼamojpitiika. Jesúsini jimbo úsïngachi kómarhikua jimbo andarhierani “Tata Diosïiri kʼéri uaxantskuani [...] enga kánikua kóntpintajka” ka kurhakuni eskajtsïni pʼamojkuaka “jiáni engachi uétarhinchani jauaka eskajtsïni jarhuataaka” (Ebr. 4:14, 15). Pauani pauanchi jatsiska para eratsentani imani ambe engaksï xáni úkia Tata Diosï Jeoba ka Jesúsi ka ambe engaksï útasï úni jaka juchantsïni jimbo. Na engajtsïni xáni xénchajka, jatsipirindi parajtsïni mintsitarhu niáracheni ka úni eskachi tsípikua jingoni marhuakuaka Tata Diosï Jeobani (2 Kor. 5:14, 15). Ma ambe engachi uaaka úni para xarhatani eskachi agradesidu jarhaska, jindeesti jarhuataani máteru kʼuiripuechani paraksï Jeobaeri testigu úkuarhini ka Jesúsiiri chúxapatiinksï (Mat. 28:19, 20). Indeni ambesï úpti apostoli Pablu. Ima mítespti eska Tata Diosï Jeoba uékasïnga eska “iámindu jásï kʼuiripuecha pʼímutanhantaaka ka eskaksï niáraaka sési míteni jurhimbikua ambe” (1 Tim. 2:3, 4). w23.10 22, 23 párr. 13, 14

Aianhpikuarhu kánikuachi úrasïnga ini karakatani para sési pʼikuastantaani kʼuiripuechani ka para arhiani nénachi irekaa Paraisurhu. Jiájkani, ¿nénachi uaa jarhuatani máteruechani paraksï mintsikani eska ísï úkuarhiaka ambe enga Apokalipsisi 21:3, 4 arhijka? ¿Ka juchachi ambe uaa úni parachi sánderu mintsikani Tata Diosï Jeobani ka imani ambe engajtsïni aiachijka? Tata Diosï Jeobajtsïni no nomasi aiachisïndi ambakiti ambe, ístujtsïni arhisïndi andichisï uaa mintsikani ini aiatsperakuani. Ini karakateechani jimbo exeni jauakachi andichisï uaa mintsikani Tata Diosï Jeobaeri aiatsperakuani paraisueri ambe. Jimini arhisïndi: “Ima enga kʼéri uaxantskuarhu uaxakatini japka, uandaspti: ‘¡Exe! Jimbanhi úntaxaka iámindu ambe’. Ístu uandaspti: ‘Karaa ini uandakuechani jimbokaksï mintsinharhikueska ka jurhimbikua ambeesti’. Ka arhisptirini: ‘¡Inde ambe ísï úkuarhistia! Ji jindeeska Alfa ka Omega, ueenakua ka kʼamarhukua’” (Apok. 21:5, 6a). w23.11 3 párr. 3-5

Na enga xukuparhajka ka kuinakuarhini tumbi ma enga kristianueka, xarhatasïndi eska májkueni eratsesïnga eska Tata Diosï Jeoba. Imeecha engaksï xukuparhakua ambe újka ka atarantani, nóksï sáni janhanharhiasïndi Tata Diosï Jeobani ka ísku jándikua ambeksï niátasïndi. Ísï jimbosï inde xukuparhakua para tatakeecha jukari katsikatsijaxesïndi ka tatakeechaksï ísï xarharasïndi komueska nanakeecha. Tumbi ma enga jánguarhintani jaka para kristianu jánhaskati máeni, jatsisti para no mirikurhiani Biblieri prinsipiuechani ka exeani kúnguarhikuarhu anapu ambakiti ejempluechani enga erakuni jámaaka néna xukuparhani o arreglerikuarhini. Uaati kurhamarhikuarhini: “Ambe engani erakujka úni, ¿xarhatani jarhasïni eskani sési eratsesïnga ka eskani no uékasïnga no sési pʼikuastaani máteruechani? ¿Xarhatasïni juchiiti xukuparhakua jingoni eskani Tata Diosïni marhuakuxaka?” (1 Kor. 10:31-33; Titu 2:6). Juchaari Tata Diosï auandarhu anapu ka ístu juchaari erachiichaksï niárasïndi kánikua janhanharhiani tumbiichani engaksï sési eratsejka ante de úni ambe ma. w23.12 26 párr. 7

Ióntki, “surirhu anapu rei” no sési kámaspti Tata Diosï Jeobaeri iretani (Dan. 11:40). Pori ejemplu, Primera ka Segunda Guerra Mundialirhu, máru erachiichanksï ónhaaspti jimbokaksï no uékaspka guerrarhu nirani ka máru sapiichanksï petaantaspti eskuelarhu uératini jimbokaksï no uékasïreenga banderani saludarini. Peru ini jurhiatikuechani jimbo, Tata Diosï Jeobaeri marhuariichaksï máteru ambe jimbo tsʼéjkunhaxati paraksï xarhatani na engaksï xáni mintsikajka Tata Diosïiri Reinuni. Pori ejemplu, jiáni engaksï kampaniecha úkuarhijka para juramutiichani erakuantani, jamberi kristianu ma uékaati apoiarini partidu politikuni ma o kandidatuni ma. Ísïisti eska no botariuaka nemani jimbo, peru jamberi imeeri eratsekuarhu ka imeeri mintsitarhu uékani jati eska máisï andaaka. Peru, parachi meru no inchamukuni politikarhisï, nóchi solu jatsiaka para jingontku jámani imani ambe jingoni engachi újka, sino ístu imani ambe jingoni engachi eratsejka ka engachi pʼikuarherajka (Juanu 15:18, 19). w23.08 12 párr. 17

Parachi andani tsípikua para méntkisï, jatsiskachi para úni ambe enga ari konseju uandajka: “Jánguarhinta je para eskajtsï andajkuarhiaka pʼirani ma premiu” (1 Kor. 9:24). Jesúsi uandaspti eska juchaari mintsita sánderu uékapiringa puro tʼirekua ambe tantiarini jarhani, kauini jámani o sánderu tsitini iásï anapu ambe (Luk. 21:34). I Biblieri karakateecha ka máteruechajtsïni jarhuataati exeni ambe engachi jatsika para mójtakuni, parachi úni uiriini ini karrerarhu enga jindeeka para tsípikuani andani. Seguruchi jarhaska eskachi andaaka ini karrerani, jimbokajtsïni Tata Diosï Jeoba íntskuaka uinhapikua parachi andakuerani (Is. 40:29-31). Ísï jimbo, seguirii je uiriini. Májkueni ú je eska apostoli Pablu, enga jánguarhintapka xáni eska xáni úpka para andani karrerani (Filip. 3:13, 14). Ísïisti, no nema uaati uiriini chánksïni jimbo, peru Tata Diosï Jeoba chánksïni jingoni jauati paraksïni jarhuatani páni ambe enga uétarhijka karrerarhu ka parajtsï jurajkuni imani ambe enga no uétarhijka. Imeeri jarhuajperata jingoni uaakajtsï tekaantskua jingoni uiriini ka andani ini karrerani. w23.08 31 párr. 16, 17

Jiáni enga Jesúsi 12 uéxurhini jatiriipka, niraspti Jerusaléni imeeri familia jingoni kʼuínchikuarhu ma enga mándani uéxurhini úkuarhienga (Luk. 2:46-52). Engaksï José ka María níntani jámeengia, nóksï kuenta íntskukuarhespti eska Jesúsi no níntaxapka. Imeechaksï jatsipirindi para kuidariuani imeeri sapiichani parakaksï iámindu sési niántapiringa. Engaksï na exentapkia Jesúsini, María xukaspti enga ísï chéraapka. Nájkiruka Jesúsi úpiringa arhiani eska no no sési ambe úspka, no ísï úspti. Sánderu sési, respetu jingoni mókukuaspti. Joperuksï José ka María “no kurhanguspti ambesï arhikuekani japi”. Nájkiruka ísïipka, “Jesúsi méntkisï kurhajchaasïreendi”. Tumbi, engaksï chiiti taatiicha újka ambe ma enga no sési jaka oksïni no kurhanguchini, ¿difisiliiski para tʼu kurhajchaani? ¿Ambekini uaa jarhuatani? Eratsi na enga pʼikuarherajka Tata Diosï Jeoba. Biblia uandasïndi eska engaksï uájpeecha kurhajchaajka taati jémbeechani eska “inde ambe sési pʼikuastasïnga Tatani” (Kol. 3:20). Tata Diosï Jeoba exesïndi engaksïni chiiti taatiicha ma repentku no kurhanguchijka o engari úkua jukanchajka úni ambe engaksïni juramuchijka. Joperu engari tʼu kurhajchauaka, nájkiruka no fásiliuaka, Tata Diosï Jeoba kánikua tsípiati. w23.10 7 párr. 5, 6

Jamberi eskuelarhu anapu kompanieru ma uandaati eskaksï Jeobaeri testiguecha jatsipiringa para ménderueni eratseni omoseksualidadiiri ambe. Jamberichi jatsiaka para arhini eskachi uandanhiasïnga iámindu kʼuiripuecha jimbo ka eskachi respetarisïnga ambe enga erakujka mándani kʼuiripu (1 Ped. 2:17). Ka jamberijtsïni tátsekua jurajkuati parachi aianguni andisï sési jaki eskachi kurhajchauaka Biblieri juramukuechani. Enga nema enga no májkueni jakajkujka eska jucha, arhiska ambe enga ima eratsejka, ju je no jirejiresï uandani eskachi míteskia ambe enga jakajkujka. Eranhaska eskakeni eskuelarhu kompanieru ma arhiska eska ísku ambe máeska Tata Diosïni jakajkuni. ¿Eratsepirindi eska ima ebolusionini jakajkusïnga ka eska kánikua míteska indeeri ambe? Peru jamberi ima ísï uandati jimboka máteruechani kurhajchaaska indeeri ambe. Jamberiri uaaka axakuni enlasi ma para ima exeni bideu ma o artikulu ma enga kueraakateeri ambe uandajka ka enga jw.org jimbo jaka. Jamberi tátsekua uékaati exeni máteru ambeeri tʼungini jingoni. Respetu jingoni uandontskuarhekuni jamberi marhuauati paraka ima ménderueni eratseaka. w23.09 17 párr. 12, 13

Uaakachi seguru jarhani eska nájkirukachi úka ambe ma enga no sési jaka, uaakachi útasï marhuakuni Tata Diosï Jeobani ka intsïnhaani kóntperatechani, solu jiáni engachi jánguarhintaska mójtakurhini ka engachi mintsikaska Tata Diosï Jeoba (Prov. 28:13). Sansóni no perfektuespti, no chkétakuarhispti imani ambe jingoni enga úkuarhipka Dalila jingoni, sánderu sési, seguiriispti marhuakuni Tata Diosï Jeobani. Ka Tata Diosï seguiriispti úrani Sansónini paraka niárapiringa kʼéri ambe úni. Ima seguiriisïreendi ísï exeni Sansónini komueska achamasï ma enga kánikua mintsikeenga imani, jimbosï kararkuarhiti Sansóniiri nombrini imani listarhu engaksï imeeri marhuariicha jaka engaksï no méni jurajkupka ka engaksï Ebreu kapitulu 11 jimbo jaka. Kánikuajtsïni uinhaperantasïndi míteni eskajtsïni juchaari Taati auandarhu anapu xénchasïnga ka eskajtsïni uékasïnga uinhaperantani, sánderia jiáni engachi problemeechani jatsiajka ka engachi uétarhinchani jarhajka eskajtsïni jarhuataaka. Ísï jimbo, májkueni eska Sansóni, ju je ini ambe kurhakuni Tata Diosï Jeobani: “Jimboetakua asïrini mirikurhi. Oh, Tata Diosï, íntskurini uinhapikua” (Juec. 16:28). w23.09 7 párr. 18, 19

Jimbokachi míteska eska Tata Diosï Jeobaeri jurhiatikua axuterku jarhaskia, uékasïngachi aianguani kʼuiripuechani ambakiti ambe enga Tata Diosïiri Reinu uaaka. Joperuchi jamberi no tekaajka uandontskuarhekuani. ¿Andi? Jimbokachi chérhiasïnga. Inde ambesï pʼikuarherapti Pedru ima chúrikua enga Jesúsi jusgarinhapka. No uandantaspti eska Jesúsiiri chúxapati máespka ka uánikua xanhari uandaspti eska no mítespka (Mat. 26:69-75). Peru sánderu tátsekua, Pedru i ambe uandaspti jimboka nóteru chérhiasïreengia kʼuiripuechani: “Asï jáma je chérhini indeni ambe engaksï imeecha chérhijka ka asï jáma je uandanhiani” (1 Ped. 3:14). Ambe enga Pedru uandaka xarhatachesïndi eskachi uaaka nóteru chérhiania kʼuiripuechani. ¿Ambejtsïni jarhuataa nóteru chérhiania máteruechani? Pedrujtsïni ini konseju íntskusti: “Mintsita jingoni jiókuarhi je eska Kristu jindeeska Tata ka eska pímbinhajkunhantaska” (1 Ped. 3:15). I ambe ístu arhikuekasïndi eskachi jatsiska para eratsentani ánchikuarhitani enga intsïnhaka tata Jesukristu ka na enga xáni uinhapika juchaari Tata ka Rei. w23.09 27, 28 párr. 6-8

Juchajtuchi jatsiska para jingontku jámani parachi no “imani ambe úni enga méntku no marhuajka” enga pápkʼandekuarhu anapueka (Éfes. 5:11). Ima kʼuiripu enga exejka, kurhaajka o uandani ísku jándikueri ambe o ikichakueni jásï ambe, niárasïndi kʼéri pekadu ma úni (Gén. 3:6; Sant. 1:14, 15). Ambakiti trampa ma enga Satanási úrajka, jindeesti eskaksï kʼuiripuecha no míteaka ambesï sési jaki ka ambe nómbe (Is. 5:20; 2 Kor. 4:4). Jimbosï i parhakpini uéjti eskachi jucha eratseaka eska sési jarhaska ima ambe enga Tata Diosï uandajka eska ikichakueni jásï ambeeska (2 Ped. 2:19). Ísï jimboksïsï xáni uánikua pelikulecha jati, telebisionirhu anapu programeecha ka internetirhu anapu pájineecha engaksï imani ambe xarhatajka enga no terukuntajka Tata Diosïiri juramukuecha jingoni. Noambakiti uékasïndi eskachi no no sési exeaka ambe engaksï kʼuiripuecha újka, komueska ísku jándikua ambe ka na engaksï eratsejka irekuarhini. Uékasïndi eskachi eratseaka eska no no sési jarhaska indeni ambe úni (Éfes. 5:6). w24.03 22 párr. 8-10

Tabernakulu ístu mítekateespti komu “kʼumanchikua para tánguarhinhani”, jindeespti jima engaksï israeliteecha tánguarhienga para Tata Diosïni kómarhini ka para kéjtsïtakua ambe úkuni (Éx. 29:43-46). Engaksï israeliteecha desierturhisï jámeenga iápurisïksï pásïreendi engaksï mótsienga (Éx. 25:8, 9; Núm. 9:22). Joperu tabernakulu ístu xarhataxapti ambe ma enga sánderu orhepani jupiringa. Inde tabernakulu “auandarhu anapu ambe” xarhatasïreendi ka Tata Diosï Jeobaeri templuni arhikuekaxapti. Pablu uandaspti: “I tabernakulu xarhatasïndi ambe enga úkuarhini jaka iásï” (Ebr. 9:9). Ísï jimbo jiáni enga Pablu ini ambe karakuapka ebreuechani Tata Diosïiri templu jarhasptia ka ueenaspti jarhani uéxurhini 29 jimbo. Ima uéxurhini jimbo Jesúsi itsï atakuarhispti ka ueenaspti “sánderu kʼéri saserdotiini” Tata Diosï Jeobaeri templu jimbo (Ebr. 4:14; Úku. 10:37, 38). w23.10 25, 26 párr. 6, 7

Jatsiskachi para kurhanguni ka no inchandimentani enga ambe ma mójtakurhiaka juchaari irekuarhu parachi úni seguiriini tsípikua jingoni marhuakuni Tata Diosï Jeobani. ¿Nénachi uaa ísï úni? Engachi jirinhakuntaska néna ménderueni úni ambe ma enga juchaari irekua mójtakurhiaka ka engachi respetariiska na engaksï máteruecha eratsejka ka ambe engaksï erakujka úni. Iáminduecha engachi marhuakujka Tata Diosï Jeobani, uékasïngachi kurhanguni ka no inchandimentani. Ístuchi uékasïnga kaxumbitiini ka pʼamojpitiini. Biblia uandasïndi eska Tata Diosï Jeoba ʻkʼerenda máeskaʼ jimboka ima uiuinhasï jarhaska ka sési anhaxurhitini (Deut. 32:4). Peru ístu kurhangusïndi ka no inchandimentasïndi. ¿Andichisï ísï uandajki? Juchaari Tata Diosï ménderueni úsïndi ambe ma enga na mójtakurhipani jarhajka ambe ma parhakpinirhu paraka niáraaka úkuarhini ambe enga ima eratsetini jaka úni. Ka jimbokajtsïni Tata Diosï ísï kueraaska eska ima na jásïika, juchajtuchi úsïnga ménderueni úni ambe ma enga juchaari irekua ma repentku mójtakurhijka. Tata Diosï Jeobajtsïni íntsaasti prinsipiuechani engajtsïni jarhuatajka parachi ambakiti ambe úni náki uéjki problemachi jatsini. Néna enga újka Tata Diosï ambe ma ka imeeri prinsipiuecha, xarhatasïndiksï eska ima, Tata Diosï máeska enga uandajka na enga úkuarhiaka ambe ma, peru ístu eska kurhangusïnga ka no inchandimentasïndi paraka ambe ma meru ísï úkuarhiaka. w23.07 20 párr. 1-3

Bibliarhu, Tata Diosï Jeoba mismu uandasïndi eska ísïika eska naandi ma enga sési kámpijka (Is. 66:12, 13). Ju je eranhaskani naandini ma enga kánikua sési kuidarijka imeeri sapini, uékperakua jingoni kamanharhisïndi ka iatsitakuarhu uandajpasïndi ka pʼarhipʼarhitasïndi. Enga charhaku uerani jarhajka o nani pʼamerani jarhani, naandi uiriipasïndi exeni ambe úsïni. Ka májkueni úsïndi Tata Diosï Jeoba jiáni engachi kómu pʼikuarherani jarhajka, ima juchantsïni jingoni jarhasïndi. Nájkirukachi ménisï no sési ambe újka, imajtsïni seguiriini jarhasïndi xénchani (Sal. 103:8). Israeliteechaksï someni no sési pʼikuastaspti Tata Diosï Jeobani, joperu engaksï móanteenga ima xarhatakuasïreendi eska seguiriini jarhasïreenga xénchaani. Ma xanhari arhispti imeeri iretani eska ísï exesïreenga eska kánikua jukaparhakuespka, eska niáraspka kʼéri ambe exeni ka xénchani (Is. 43:4, 5). Ka Tata Diosï Jeoba seguiriixati májkueni eratseni, uaakachi seguru jarhani eskajtsïni májkueni xénchasïnga eska israeliteechani. Ka nájkirukachi kʼéri pekadu ma uaaka, imajtsïni no jurajkusïndi. Engachi móantaska ka andarhientani, imajtsïni seguiriini jauati májkueni xénchani eska antesi. Imajtsïni aiachisïndi eskajtsïni mintsita jingoni puáchentaaka (Is. 55:7). Biblia uandasïndi eskachi sési pʼikuarherantaaka engajtsïni Tata Diosï Jeoba puáchentaaka (Úku. 3:19). w24.01 26, 27 párr. 4, 5

Tata Diosï Jeobajtsïni uaati jarhuatani jiáni engachi no sési ambe nitamakuarhini jauaka. Pori ejemplu, jamberichi jatsiaka para arhini juchaari patronini eskajtsïni jurajkuaka nirani kʼéri tánguarhikuecharhu o eskachi sánderu kókuani uéntaaka ánchikuarhitarhu parachi úni nirani tánguarhikuarhu. Enga i ambe úkuarhiska, uaakachi exeni na engajtsïni jarhuataaka Tata Diosï Jeoba ka sánderuchi mintsikaaka. Esdrasi kaxumbitiispti ka kurhakuspti Tata Diosï Jeobani eska jarhuatapiringa. Jiáni enga uandanhiani jarheenga imani ambe jimbo enga jatsipka para úni, Esdrasi kaxumbikua jingoni kómarhisïreendi Tata Diosï Jeobani (Esd. 8:21-23; 9:3-5). Jimboka Esdrasi mintsikasïreenga Tata Diosï Jeobani, máteruechajtuksï májkueni úsïreendi (Esd. 10:1-4). Engachi jukari uandanhiani jauaka sentabu ambe jimbo o juchaari familia jimbo, kómarhiakachi Tata Diosï Jeobani mintsikaparini eskajtsïni jarhuataaka. w23.11 18 párr. 15-17

Engajtsïni Tata Diosïni Jeoba arhijka eskachi jatsiska para májku mintsinharhikua xarhatani eska Abraáni parajtsïni ima sési exeni, no arhikuekasïndi eskachi meru májkueni jásï ambe jatsiska para úni eska ima. Uaakachi uánikua ambe úni parachi xarhatani úkuechani jingoni eskachi mintsikasïnga Tata Diosïni. Uaakachi kánikua tsípikua jingoni eroani jimbanhiichani engaksï kúnguarhikuarhu niáraaka, jarhuataani erachiichani engaksï uétarhinchani jauaka ambe ma, ka ístu ambakiti ambe úni juchaari familiariicha jimbo. Tata Diosïni Jeobani kánikua tsitisïndi eskachi uaaka ini ambe (Rom. 15:7; 1 Tim. 5:4, 8; 1 Juanu 3:18). Ma ambe engachi uaaka úni enga kánikua jukaparhakueka para xarhatani eskachi mintsikasïnga jindeesti tsípikua jingoni aianhpini (1 Tim. 4:16). Iáminduechachi uaaka xarhatani úkuecha jimbo, eskachi mintsikasïnga eska iámindu ambe engajtsïni Tata Diosïni Jeoba aiachini jaka kumplirikuarhiaka ka eska kánikua sési jarhaska na enga újka ima ambe ma. Ka engachi ísï úska, uaakachi seguru jarhani eskajtsïni Tata Diosï sési exeaka ka eskajtsïni ísï exeaka eska imeeri amiguecha. w23.12 2 párr. 3; 6 párr. 15

Ante de rei Dabidi uarhini ini uandakuechani arhiaspti Salomónini (1 Rey. 2:1, 3). Iámindu tatakeecha engaksï kristianueka kánikuaksï sési úsïndi engaksï ísï újka eska i konseju na arhijka. Paraka tumbiichani méntkisï sési nikuauaka, uétarhisïndi eskaksï kurhajchaaka Tata Diosï Jeobani ka pauani pauanksï jánguarhintani ísï úni eskaksï Biblieri prinsipiuecha na arhijka (Luk. 2:52). ¿Andisï xáni jukaparhakue eskaksï jánhaskatiuaka? Erachi kristianuechaksï uánikua responsabilidadichani jatsiasïndi imeeri familiarhu ka ístu kúnguarhikuarhu. Engari tumbi máeka, seguru eskari eratsentakia náki responsabilidadiri uékapirini jatsini sánderu orhepatini. Jamberiri uékani jakaia prekursori úkuarhini o sierbo ministerialiini ka sánderu orhepatini niárani orhejtsïkutiini. O jamberiri uékani jaka tembuchani ka sapiichani kaani (Éfes. 6:4; 1 Tim. 3:1). Parari ísï úni ka parakeni sési nicheni, jatsiskari para kristianu jánhaskati máeni. w23.12 24 párr. 1, 2

Tata Diosï Jeoba arhiasïndi kúnguarhikuarhu anapu orhejtsïkutiichani eskaksï kuidariuauaka imeeri karichiichani. Ka orhejtsïkutiichaksï kánikua jukaparharasïndi indeni kóntperatani paraksï imeeri erachiichani marhuakuani ka jánguarhintasïndiksï ambakiti orhejtsïkutiini (Jer. 23:4; 1 Ped. 5:2). ¡Kánikuachi agradesidu jarhaska engaksï kúnguarhikuarhu jaka erachiicha engaksï ísï ánchikuarhijka! Orhejtsïkutiichaksï uaati kánikua ambe jorhenguarhini juesi Gedeóniiri ambe (Ebr. 6:12). Ima kuájchakusïreendi ka orhejtsïkuni Tata Diosïiri iretani (Juec. 2:16; 1 Crón. 17:6). Iásï anapu orhejtsïkutiicha májkueni eska Gedeóni, indenksï ánchikuarhitani jatsisti para kuidarini Tata Diosïiri iretani ini tiempu jimbo enga kánikua úku jukaka (Úku. 20:28; 2 Tim. 3:1). Ísï jimbo, orhejtsïkutiichaksï uaati ambakiti ambe jorhenguarhini engaksï exeska na enga Gedeóni kurhanguenga eska no úsïreenga iámindu ambe úni, eska kaxumbitiispka, eska kurhandiraspka ka eska kánikua tekaantaspka. Ístu, i juesiiri ejemplu jarhuatauati iámindu kúnguarhikuarhu anapuechani paraksï sánderu jukaparharani ánchikuarhitani engaksï orhejtsïkutiicha újka ka iámu mintsita jingoni jarhuataani (Ebr. 13:17). w23.06 2 párr. 1; 3 párr. 3