Marsu

Nótkichi úxaka exeni jimbanhi parhakpinini, peru ambe engachi kʼóru újka exeni jindeesti jóskuechani, anhatapuechani animaliichani ka kʼuiripuechani. Ka nájkiruka inde ambe no méntkisï japka, iásï no nema uaati uandani eska inde ambe no jarhaska. Jarhastiksï jimboka Tata Diosï Jeoba kuerauaska (Gén. 1:1, 26, 27). Májkueni, juchaari Tata Diosï aiatspesti eska jauaka jimbanhi parhakpini ma ka ima kumpliriuati ambe enga uandakia. Uaakachi irekani para méntkisï ka nóteruchi pʼamenchaakia. Ísï jimbo, uaakachi seguru jarhani eska Tata Diosï Jeoba juaaka jimbanhi parhakpinini jiáni enga ima uandakia (Is. 65:17; Apok. 21:3, 4). Enga jamberi niáraaka jimbanhi parhakpini, ju je seguiriini mintsikani eska jimbanhi parhakpini ma jauaka. Ju je eratsentani ambe enga xáni úka Tata Diosï Jeoba parajtsïni euajpintani, ju je eratsentani na enga xáni uinhapitiika Tata Diosï Jeoba ka ju je imani ambe úni engajtsïni andarhiteraaka imani. Engachi iámindu ini ambe úska, uaakachi imeecha jingoni jarhani engaksï “[Tata] Diosïni mintsikaparini ka tekaantskua jingoni pʼi[rajka] indeni ambe engaksï aiaminhapka” (Ebr. 6:11, 12). w23.04 31 párr. 18, 19

Jesúsi auandarhu ísï eranchesïndi ka iáminduechani japarini kómarhikua ma úsïndi. Uékasïndi eska Tata Diosï Jeoba kʼéri ambe arhinhaaka imani ambe jimbo enga uaaka. Ka tátsekua uinhachaparini uandasïndi: “Lásaru, juni uéntani” (Juanu 11:43). Ka Lásaru uéntasïndi tumbarhu. Máruksï no úsïndi jakajkuni ambe enga Jesúsi úka. I ambe jarhuatasïndijtsïni parachi jucha sánderu mintsikani eskaksï uarhiriicha tsíntaaka. Ju je miántani eska Jesúsi aiakuspka Martani: “Chiiti mimiti tsíntaati” (Juanu 11:23). Májkueni eska imeeri Taati jémba, Jesúsi uékasïndi tsítaantani uarhiriichani ka uaati ísï úni. Enga uerapka, xarhatasïndi eska mintsita jingoni uékasïnga kénditani uarhikuani ka eskaksï kʼuiripuecha nóteru kómu pʼikuarherakia indeni ambe jimbo. Ka enga Jesúsi tsítantapka Lásaruni, xarhataspti eska jatsiska uinhapikua para tsítaantani uarhiriichani. Ístu, ju je eratsentani ambe enga Jesúsi miátantapka Martani iásï anapu textuni jimbo. Uánikua ambe jarhasti engachi jimbo uaaka jakajkuni eska Tata Diosï Jeoba tsítantauaka uarhiriichani. w23.04 11, 12 párr. 15, 16

Engachi niárajkia kurhanguni ambesï uéjki Tata Diosï Jeoba eskachi uaaka, jamberichi jatsiaka para mójtakuni ambe engachi kurhajkuarhijka kómarhikuecharhu. Jatsiskachi para miántani eska Tata Diosï Jeoba eratsetixaka úni ambe ma, peru jiáni ísï uaati enga ima sési exeaka. Ima eratsetixati kʼamajkuni para méntkisï kómu nitamakua ambe, komu desastresi naturaliichani, pʼamenchakuechani ka uarhikuani. Tata Diosï Jeoba úraati imeeri Reinuni para úni ambe enga aiatspekia (Dan. 2:44; Apok. 21:3, 4). Peru asta enga jamberi niáraaka ima jurhiatikua jurajkuxati eska Satanási juramuaka parhakpinirhu (Juanu 12:31; Apok. 12:9). Enga Tata Diosï Jeoba sési peeuantapiringa iámindu kʼuiripuecheri uandanhiateechani, ísï xarharapirindi enajki Satanási sési juramuni jaki parhakpinirhu. Ísï jimbo, nájkirukachi jatsiaka para erokuarhini astaka Tata Diosï uaaka máru ambe engajtsïni aiachikia, inde ambe no arhikuekasïndi eskajtsïni ima no jarhuatasïnga. Tata Diosï Jeoba úsïndi máru ambe juchantsïni jimbo. w23.05 8 párr. 4; 9, 10 párr. 7, 8

¿Ambechi uaa úni parakaksï máteruechajtu miántaaka tata Jesukristueri uarhikuani? Orhetachi jatsiska para pʼímarhiani. Aparte de etsakuani pʼímarperakuecha aianhpikuarhu, úpiringachi eratseni neechanchi uékasïni pʼímarhiani, pori ejemplu juchaari parientiichani, imeechani engachi jingoni ánchikuarhijka o eskuelarhu anapuechani o ístu máteru kʼuiripuechani engachi míteaka. Engachi kʼamajkuauakia pʼímarperakuechani, uaakachi enlasi ma jimbo axakuani. Nóchi míteska namunksï uékaa nirani (Ecl. 11:6). Ju je miáni eska jamberi no iámindu ambe kurhanguaka ima kʼuiripu engachi pʼímarhiaka ka sánderia enga no méni nirani jaka juchaari tánguarhikuecharhu. Ísï jimbo, sési japirindi eskachi eratsentaaka ambe no úpirini kurhanguni ka nénachi uaa jarhuatani. Enga kʼuiripu na niuakia tata Jesukristueri uarhikuani miántani, jamberi uékaati sánderu ambe míteni. Uékasïngachi iámindu ambe úni ante de niárani inde jurhiatikua, ka enga na niáraakia ka ístu ísï tátsekua enga na nitamaakia para jarhuataani imeecha engaksï ambakiti mintsita ma jataka (Úku. 13:48). w24.01 12 párr. 13, 15; 13 párr. 16

Biblia uandasïndi ochu kʼuiripuecheeri engaksï tsíntapka ixú Echerirhu. ¿Andichisï no jánguarhintajki sánderu sési jorhenguarhini imeecheri ambe? Engachi jorhenguarhini jauaka, ju je jánguarhintani exeni ambe engachi uaaka jorhenguarhini. Ka ju je eratsentani na enga mándani ejemplu xarhatajka eska Tata Diosï meru uékasïnga tsítaantani uarhiriichani ka eska uaaka ísï úni. Ka sánderu jukaparhakua ambe, ju je eratsentani Jesúsiiri tsíntskueri ambe. Imanksï uánikua kʼuiripuecha exespti enga ima na tsíntapkia. Ka enga ima ísï tsíntapka, jarhuatasïndijtsïni seguru jarhani eska sánderu orhepani uarhiriichaksï tsíntaaka (1 Kor. 15:3-6, 20-22). Kánikuachi agradesidu jarhaska Tata Diosï Jeoba jingoni jimbokajtsïni aiachisïnga eska tsítantauaka uarhiriichani. Ka seguruchi jarhaska eska ima uékasïnga tsítaantani ka eska uaaka ísï úni. Ísïisti enajkijtsïni arhini jaki: “Imeecha engari uarhiranchaaka tsíntaatiksï” (Juanu 11:23). Ju je seguiriini sánderu mintsikani eskaksï uarhiriicha tsíntaaka. Engachi ísï úska, sánderuchi andarhieraaka Tata Diosï Jeobani, imani engajtsïni aiachini jaka ini xáni ambakiti ambe. w23.04 8 párr. 2; 12 párr. 17; 13 párr. 20

Kʼuiripu ma enga kaxumbitiika no kʼéramakuarhisïndi ka kurhangusïndi eska no úsïnga iámindu ambe úni. Nema enga kaxumbitiika, ístu janhanharhiasïndi máteruechani ka sánderu kʼéri exeasïndi máteruechani ka eska imajkumindu (Filip. 2:3). Gedeóni kaxumbitiispti ka no kʼéramakuarhisïreendi. Enga ánjeli ma arhipka eska Tata Diosï Jeoba erakuspka para israeliteechani pʼímutaantani engaksï Madiáni anapuecha juramukuani japka, Gedeóni kaxumbikua jingoni mókuntaspti: “Juchiiti familia jindeesti enga menusi jukaparhakueka engaksï Manasésiirika ka ji jindeeska engani menusi jukaparhakueka juchiiti taatiiri kʼumanchikuarhu” (Juec. 6:15). Ima eratsesïreendi eska no úpiringa indeni ánchikuarhita úni. Peru Tata Diosï Jeoba mítespti eska ima úpiringa ísï úni, ka Gedeóni úspti indeni ánchikuarhitani Tata Diosï Jeobaeri jarhuajperata jingoni. Orhejtsïkutiichaksï kánikua jánguarhintasïndi paraksï méntkisï kaxumbitiini (Úku. 20:18, 19). Nóksï jámasïndi kʼéramakuarhini imani ambe jimbo engaksï jorhenaka úni, níjtu imani ambe jimbo engaksï úkia. Ka ístu nóksï eratsesïndi eskaksï nóteru jukaparhakueskia jimbokaksï no úska sési úni ambe ma. w23.06 3 párr. 4, 5

Útasï jukari 1,000 uéxurhini kuerataxati paraksï Satanásini éjpurhu tʼauajtsïkunhaaka (Apok. 20:7-10). Joperu ante de i ambe úkuarhini Biblia uandasïndi eska uánikua máteru ambe úkuarhiaka. Ueenani jámani, nasionichaksï uandaati “¡Iásï kʼóru sési jánhaskuarhixatiia ka nóteruchi uandanhiaxakaia!” (1 Tes. 5:2, 3). Tiempu enga kánikua no sési nitamakuarhinhaaka, “ma repentku” ueenakuarhiati jiáni engaksï nasionicha kʼamajkuauaka iámindu relijioni no jurhimbitiichani (Apok. 17:16). Tátsekua, Jesúsi jusgariuauati iámindu kʼuiripuechani ka támu peerauati imeechani engaksï ísïika komueska karichiicha ka imeechani engaksï ísïika komueska chibuecha (Mat. 25:31-33, 46). Joperu Satanási no xántkisï pakaraati. Kánikua ikiaparini uaati eska grupu ma nasionicheeri, enga Biblia arhijka eska arhikuarhisïnga Gog enga Magog anapu echerirhu anapueka, ueenaka no sési kámani Tata Diosï Jeobaeri iretani (Ezeq. 38:2, 10, 11). Imani tiempuni jimbo, ima erakukateecha engaksï Echerirhu pakarani jauaka pánhaatiksï auandarhu. Jimaksï májku kʼéri úkuarhintaati Jesúsini jingoni ka imeeri ejersituni jingoni paraksï Armajedonirhu uarhipeni ka jiáni kʼamakurhiati inde tiempu (Mat. 24:31; Apok. 16:14, 16). Tátsekua kʼória Kristu ueenaati juramuni Mili Uéxurhini Echerirhu (Apok. 20:6). w23.10 20, 21 párr. 9, 10

Ini jurhiatikuecha jimbo, uánikua Tata Diosï Jeobaeri marhuariichaksï jimeesïsï irekasti nani engachi no jurajkunhajka juchaari ánchikuarhitani úni. Janhanharhiasïndiksï juramutiichani, peru májkueni eska Abdíasi, juchaari erachiichaksï kómarhisïndi Tata Diosï Jeobani ísï eska ima na jukanchaka (Mat. 22:21). Xarhatasïndiksï eskaksï chénharhisïnga Tata Diosïni jimbokaksï imani kurhajchasïnga ka no kʼuiripuechani (Úku. 5:29). Ísï jimbo, imeechaksï seguiriixati aianhpini ambakiti aianhperakuani ka sïpatikuarku tánguarhini (Mat. 10:16; 10:28). Ístuksï exeni jarhasïndi eskaksï imeecheeri erachiicha jatsiaka iámindu ambe paraksï no jurajkuni Tata Diosïni. Ju je exeni ambe enga úpka erachi Henri enga África anapu paisi ma jimbo irekaka nani engachi antesi no jurajkunheenga juchaari ánchikuarhitani úni. Indeni tiempuni jimbo, Henri aiakukuarhespti para publikasioniichani pákuani erachiichani. Ima karaspti: “Paraksïni mátirku arhini, ji ménichani sáni chésïreenga. Májkueni eska Henri chájtujtsï uaaka balori jukani engajtsï jorhenguarhiska chénharhini Tata Diosï Jeobani. w23.06 16 párr. 9, 11

Engaksï Adáni ka Eba ísï no kurhajchapka Tata Diosï Jeobani, ¿úpirini inde ambe úni eska Tata Diosï nóteru úpiringuia ambe enga eratsetini japka, uinirani Echerini kʼuiripuecha jingoni engaksï kurhajchapiringa ka perfektuenksï? Jamberi Satanási eratsepti eska Tata Diosï Jeoba nóteru ambe ma úpiringuia úni. Pori ejemplu, Tata Diosï Jeoba úpirindi uándikuni Adáni ka Ebani, ka máteru temungurhirini ma úntani para kumplirini ambe enga eratsetini japka. Joperu enga Tata Diosï Jeoba ísï úpiringa, Satanási úpirindi uandani eska ima chkuandera máeska. ¿Andi? Jimboka, Génesis 1:28 jimbo, Tata Diosï Jeoba arhispka Andani ka Ebani eskaksï imeecheeri desendientiicha uinirapiringa Echerini. Jamberi eratsepti eska Tata Diosï Jeoba jurajkupiringa eskaksï Adáni ka Eba kánguarhiapiringa uájpeechani, joperu eskaksï imeecha no méni niárapiringa perfektueni (Ecl. 7:20; Rom. 3:23). Enga ísï úkuarhipiringa, Satanási úpirindi uandani eska Tata Diosï Jeoba chkuandera máespka. ¿Andi? Jimboka no kumplirikuarhipiringa ambe enga ima eratsetini japka, eskaksï Echerirhu irekapiringa kʼuiripu perfektuecha. w23.11 5, 6 párr. 15, 16

Tata Diosï Jeoba imeeri Karakatani jimbo ka imeeri kúnguarhikuani jimbo arhisïndijtsïni ambe engachi meru jatsika para úni. No uétarhisïndi eskachi jucha sánderu ambe jatsikuntaaka (Prov. 3:5-7). Ísï jimbo, juchachi no jukari ambe jatsikuntasïnga ambe enga Bibliarhu karakata jaka ka nijtuchi újtsïkukuarheajki leiichani solu para máteruechani arhiani ambe engaksï jatsika para úni. Satanási úraasïndi jorhenguarhikuechani ka “chkuanderakua ambe [...] enga no marhuajka” para enganiariuani kʼuiripuechani ka paraksï arhukurhitini jarhani (Kol. 2:8). Pori ejemplu, primeru siglurhu Satanási úraspti ambe engaksï kʼuiripuecha jorhentpienga ka ístu judiuecheeri jorhenguarhikuechani engaksï no Bibliarhu pʼitakata japka. Ístu, úspti eskaksï kʼuiripuecha jakajkupiringa eskaksï kristianuecha jatsispka para útasï úni ambe enga Moisésiiri Lei uandeenga. Inde chkuanderakua ambe úspti eskaksï kʼuiripuecha nóteru kasu úpiringa ambakiti jánhaskakuani enga Tata Diosï Jeoba íntspijka. Iásïjtu, Satanási úraasïndi notisiechani ka redesi sosialiichani para chkuanderakua ambe etsakuni engaksï politikuecha uandajka. w23.07 16 párr. 11, 12

Satanási no méni úpirindi eratseni ambe enga úpiringa Tata Diosï Jeoba, ima mítetixaptia néna sési peentani para kumplirini ambe enga eratsetini japka úni, nájkiruka Satanási, Adáni ka Eba nóksï kurhandipka. Enga Tata Diosï jurajkupka eska Adáni ka Eba kánguarhiapiringa uájpeechani, xarhataspti eska no chkuandera máeska, sino eska méntkisï kumplirikuarhisïnga ambe enga ima uandajka. Ka ístu xarhataspti eska Tata Diosï Jeoba méntkisï úsïnga ambe enga ima eratsetini jarhajka. ¿Néna? Úspti ambe ma paraka úkuarhipiringa ambe enga ima eratsetini japka, úspti eska japiringa desendensia ma enga pʼímutantapiringa iámindu Adáni ka Ebaeri uájpeechani engaksï kurhandirapiringa (Gén. 3:15; 22:18). Satanási no méni eratsespti eska Tata Diosï Jeoba pʼimutantaapiringa kʼuiripuechani euajpintskua jimbo. ¿Andi? Enga Tata Diosï Jeoba ísï úpka xarhataspti na enga xáni xénchajka kʼuiripuni (Mat. 20:28; Juanu 3:16). Ka Satanási xáni no ambakisti enga no újka xénchpeni. Joperu, ¿ambe úkuarhia euajpintskua jimbo? Enga na kʼamakurhiakia 1,000 uéxurhini, iámindu ima kʼuiripuecha engaksï kurhajchaaka Tata Diosï Jeobani perfektueuatiksï ka irekaatiksï Echerirhu enga paraisu máeuaka. w23.11 6 párr. 17

Ju je jukaparharani tsípikuani ka iurhirini komueska ambe ma enga kánikua pímbinhasïika. ¿Andi? Jimboka Tata Diosï Jeoba uandasïnga eska iurhiri tsípikuani arhikuekasïnga, ka tsípikua sési jásï regalu máesti engajtsïni ima íntskuka (Lev. 17:14). Enga Tata Diosï Jeoba primeru uelta jurajkupka eskaksï kʼuiripuecha apiringa animaliicheeri kʼuiripetani, juramukuaspti eskaksï no apiringa iurhiri (Gén. 9:4). Tátsekua Moisésiiri Lei jimbo, ménderu juramukuaspti israeliteechani eskaksï no jámapiringa iurhiri arhani (Lev. 17:10). Ka primeru siglurhu, úspti eska grupu enga orhejtsïkuauenga iámindu kúnguarhikuechani arhiapiringa iámindu kristianuechani eskaksï no jámapiringa iurhiri arhani (Úku. 15:28, 29). Juchajtuchi kurhajchasïnga leini jiáni engachi exeni jarhajka náki tratamientu úrani engachi pʼamenchani jarhajka. Ístu kánikuachi jánguarhintasïnga parachi kurhajchani ambe enga Tata Diosï Jeoba uandajka ísku jándikueri ambe. Apostoli Pablu ini konsejujtsïni íntskusïndi: “Ú je eska uarhiaka iámindu parhakpini anapu ambe enga chaari mintsitarhu jaka”. Ini xáni ambakiti uandakuecha jingontsïni arhisïndi eskachi uaaka ambe enga xáni uétarhiaka parachi kénditani no sési jásï ambe engachi tsitijka. Pori ejemplu, nóchi exesïnga o imani ambe úni enga úpiringa eskachi ísku jándikua ambe niátaaka (Kol. 3:5; Job 31:1). w23.07 15 párr. 5, 6

¿Sansóni xáni mintsikasïreeni o xénchasïreeni Dalilani, para no kuenta íntskukuarheni ambe enga Dalila uékeenga úni? Ambe uéjki jimboeni, Dalila méntku kurhamarhini jarhasïreendi Sansónini andisï xáni uinhapipi, ka jimboka méntku ísï arhini jarhasïreenga, Sansóni niáraspti aianguni. Joperu indeni ambe jimbo kánikua no sési nikuspti Sansóni, jimboka ma tiempu jimbo nóteru jatsispkia uinhapikua ka ístu Tata Diosï Jeoba nóteru jaiapanhentasptia (Juec. 16:16-20). Sansóni sánderu mintsikaspti Dalilani ka eska Tata Diosï Jeobani, peru kánikua no sési uéranchaspti enga ísï úpka. Filisteuechaksï jupikaspti ka pʼitanharhikuasptiksï éskuechani. Tátsekuaksï Gasa ónhaspti, ka jimaksï jántspiri úspti para granu ambe urhuni. Tátsekuaksï filisteuecha kʼéri kʼuínchikua ma úspti ka kéjtsïtakuaksï ma úkuspti imeecheri diosï Dagónini, jimbokaksï eratsesïreenga eska ima jarhuataaspka jupikani Sansónini. “Petasptiksï Sansóni jima uératini enga ónhakuarhetini japka” paraksï tsípikuarhini, i ambe arhikuekasïndi eskaksï imeecha teresmarhuntsï uékeenga ka no sésiksï kámani (Juec. 16:21-25). w23.09 5, 6 párr. 13, 14

Jamberijtsïni ánchikuarhitarhu o eskuelarhu anapu kompanieru ma, kurhamarhiati andichisï kurhajchaajki Biblieri juramukuechani. Ísïisti, juchachi uékasïnga kuájpini ambe engachi jakajkujka, joperu ístuchi uékasïnga respetariini ambe engaksï máteruecha jakajkujka (1 Ped. 3:15). Ístu, ambe ma engajtsïni jarhuataaka jindeesti, ísï exeni kurhamarhikuani komueska oportunidadi ma parachi míteni ambe enga uandanhiatajka kʼuiripuni, ka no ísï exeni eskajtsïni uékasïnga no sési arhini o arhinchani. No arhiparini andisï kʼuiripu uéjki indeeri ambe uandontskuarheni, sési jauati eskachi iátsitakuarhu mókukuntaaka ka no ikiaparini. Ka jamberi inde ambe uaati eska kurhamarhikuarhiaka andisï ísï eratsejki. Eranhaska je eskaksïni ánchikuarhitarhu kompanieru ma kurhamarhisïnga andijtsïsï no uaantajki kumpleaniuechani. ¿Ambechi úpirini eratsentani ante de mókukuntani? ¿Jindee jimboka eratsesïnga eskachi no jurajkunhasïnga parachi tsípikuarhini? Úpiringachi arhini eska kánikua sési jarhaska enga uandanhiajka imeeri kompanieruecha jimbo. Jamberi inde ambe sési pʼikuastantaati ka uékani sánderu ambe míteni ambe enga Biblia uandajka kumpleaniuecheeri ambe. w23.09 17 párr. 10, 11

¿A no eska kʼéri kóntperata máeska sési úrani tiempuni enga pakarani jaka parachi iápuru ísï anapu kʼuiripuechani aianguani Tata Diosïiri ambe? Apostoli Pedrujtsïni arhispti eskachi “jingontku erokuarhini” jauaka Tata Diosï Jeobaeri jurhiatikuani (2 Ped. 3:11, 12). ¿Nénachi uaa ísï úni? Engachi jánguarhintaska, pauani pauani eratsentani na engachi xáni sési irekaaka jimbanhi parhakpinirhu. ¿Eranhaskasïntsï ambakiti tarhiata jirejtani ka imani tʼirekuantsï arhani jarhani engaksïni sési úchiaka? ¿Eranhaskasïntsï eroantani jarhani imeechani engajtsï uarhiranchaaka ka aianguani jarhani imeechani engaksï ióntki irekapka na engaksï kumplirikuarhika Biblieri profesiecha? Eratsentani ini ambe jarhuataatiksïni jingontku jarhani ka parajtsï no mirikurhini eskajtsï últimu jurhiatikuecha jimbo irekaxaka. Ka jimbokachi míteskia ambe enga úkuarhiaka sánderu orhepatini, nóchi jurajkusïnga eskajtsïni támisï paaka imeecha engaksï chkuanderakua ambe jorhentpijka. w23.09 27 párr. 5, 6

Tumbiichaksï uánikua kompanieruechani jatsiasti engaksï no kurhajchaajka taati jémbeechani (2 Tim. 3:1, 2). ¿Andiksïsï ísï jámajki? Jamberiksï máru exejti eskaksï taati jémbeecha mismu no úsïnga ambe engaksï juramukuajka, ka jamberiksï jimbosï no kurhandijti. Máteruechaksï eratsesïndi eska ima konsejuecha engaksï taati jémbeecha íntsaajka, nóteruksï marhuasïngia iásï ka eska jukari difisiliiska para ísï úni. Tumbi, ¿ménisïri niáraski ísï pʼikuarherani? Uánikuechaksï ísï exesïndi eska difisiliiska úni ambe enga Tata Diosï Jeoba juramujka. ¿Ambekini uaa jarhuatani parari kurhajchaani? Jesúsi jindeesti sánderu ambakiti ejemplu para kurhajchaani taatiichani (1 Ped. 2:21-24). Ima perfektuespti, joperuksï imeeri taati jémbeecha nómbe. Nájkiruka ísïipka, Jesúsi méntkisï respetariuaspti ka asta jiáni jamberi engaksï imeecha no ueenga sési úni ambe ma o nóksï kurhangukuni (Éx. 20:12). w23.10 7 párr. 4, 5

Apostoli Pablu arhiaspti eskaksï ima kéjtsïtakuecha enga Lei uandeenga, no úsïreenga kénditaani sési jimbo pekaduechani. Ísï jimbo, Moisésiiri Lei nóteru marhuasïreendia. Jimbosï apostoli Pablu jorhendaapti máru ambe engaksï jatsipka para sánderu sési jorhenguarhini. Miátantaaspti eska Jesúsiiri uarhikua jimbo, iásïksï úsïrengia ʻerokuarhini jarhaniʼ ambe ma enga sési jimbo jarhuataapiringa paraksï andarhierani Tata Diosïni (Ebr. 7:19). Pablu arhiaspti erachiichani engaksï ebreu uandeenga eska sánderu sési jarhaspkia na engaksï kómarhini japkia Tata Diosï Jeobani iásï engaksï kristianuepka ka eska na engaksï kómarhienga ióntki. Arhiaspti eska judiuecheri relijioni solu xarhataxapka “ambe enga sánderu orhepani jupiringa”. Ka ístu uandaspti: “Joperu iámindu inde ambe Kristunisï arhikuekajti” (Kol. 2:17). Ménisï, parachi úni kurhanguni ambe ma enga kánikua jukaparhakueka, jatsisïngachi para máteru ambe jingoni terukutantani. Sáno májkueni, na engaksï judiuecha kómarhienga Tata Diosïni ióntki, xarhataxapti ambe ma enga sánderu orhepatini jupiringa. ¿Andisï uétarhijki eskachi kurhanguaka ambeeski Tata Diosïiri templu o na enga ima uaxastakia parachi kómarhini? Jimbokachi ísï úsïnga puáminhantani juchaari pekaduechani ka ístujtsïni jarhuatasïndi parachi kómarhini Tata Diosïni ísï eska ima na uéjka. w23.10 25 párr. 4, 5

Daniel kapitulu 11, uandasïndi tsimani reiicheeri o juramutiicheeri engaksï no sési pájperajka jimbokaksï tsimarhani uékasïnga iámu parhakpinirhu juramuni. Terukutantaparini ini profesiani máteru profesiecha jingoni engaksï Bibliarhu jaka niárasïngachi kurhanguni eska iásï “nortirhu anapu rei” jindeeska Rusia ka ima paisiicha engaksï apoiarijka, ka eska “surirhu anapu rei” jindeeska Estados Unidos ka Reino Unido engaksï jindeeka kʼéri juramukua. “Nortirhu anapu rei” no sési kaaxati imani Tata Diosïiri marhuariichani engaksï imani lugariicha jimbo irekaka enga i rei juramuni jaka. Máru Jeobaeri testiguechanksï ataasti ka ónhaani imeecheeri jakajkukua jimbo. Peru juchaari erachiichaksï no chésïndi imani ambe jimbo enga “nortirhu anapu rei” úni jaka. Sánderu sési, sánderuksï mintsikasïndi Tata Diosïni. ¿Andi? Jimbokaksï míteskia eska libru enga Danieli karaka uandasïnga eskaksï ísï kánhapiringa (Dan. 11:41). Míteni ini ambe, ístujtsïni jarhuataati parachi no mirikurhini ambe enga úkuarhiaka sánderu orhepatini ka ístu parachi no méni jurajkuni Tata Diosï Jeobani. w23.08 11 párr. 15, 16

Ísïisti enajki Tata Diosï Jeoba uandani japirini: “Engaksïni nema no sési úchijka, no sési úkuni jarhasïndi imani ambe enga kánikua jukaparhakueka para ji”. Jimbokajtsïni Tata Diosï Jeoba xénchasïnga, kurhanguchisïndijtsïni engachi no sési nitamakuarhini jarhajka ka uékasïndijtsïni jarhuatani. Ísï jimbo, uaakachi arhini: “Kuájchakureni ísï eskari na kuájchakujka nanaka sapichuni [o pupilani] enga chiiti éskuarhu jaka” (Sal. 17:8). Tata Diosï Jeoba uékasïndi eska chá seguru jauaka eskaksïni ima xénchasïnga. Ima kurhangusïndi engajtsï úpiringa eratseni eskaksïni ima no xénchasïnga jimbokajtsï no sési nitamakuarhixaka iáiasï o ióntki anapu ambe jimbo. Ísï jimbo, ¿andisï xáni jukaparhakue seguru jarhani eskaksïni Tata Diosï Jeoba xénchasïnga? Ju je jorhenguarhini na enga xáni xénchajka Jesúsini, erakukateechani ka juchantsïni, míteni ini ambe, jarhuataatijtsïni seguru jarhani eska ísïiska. w24.01 27 párr. 6, 7

Esdrasi exespti na enga jarhuatapka Tata Diosï Jeoba imeeri iretani jiáni engaksï no sési nitamakuarhinchani japka. Máru uéxurhini antesi 484 jimbo, jiáni enga rei Asueru juramupka eskaksï uándikunhapiringa iámu judiuecha engaksï imani lugarichani jimbo irekani japka nani engaksï perseecha juramuenga, jamberi Esdrasi Babilonia irekapti (Est. 3:7, 13-15). Esdrasi ka ístu iámindu judiuecha, úpirindiksï uarhini. Ka engaksï mítepka ini ambe, xánksï uandanhiaspti engaksï jamberi nóteru tʼireengia. Ka ueparinksï kómarhispti Tata Diosï Jeobani eska jarhuataapiringa (Est. 4:3). Ju je eranhaskani na engaksï pʼikuarherapka Esdrasi ka ístu máteru judiuecha jiáni engaksï mítepka eskaksï imeechasï uándikunhapka engaksï uékeenga judiuechani uándikuani (Est. 9:1, 2). Ambe enga Esdrasi nitamakuarhipka imani jurhiatikuechani jimbo engaksï xáni úkua jukapka, preparariispti para orhepani uérakuani imani tsʼéjkukuechani engaksï sánderu orhepani jupiringa ka inde ambe úspti eska sánderu mintsikapiringa Tata Diosï Jeobani ka eska ima úpiringa kuájchakuni imeeri iretani. w23.11 17 párr. 12, 13

Apostoli Pablu indenisï arhikuekani japti enga “lei uandajka” para úni. ¿Náki lei? Ima lei enga Tata Diosï Moisésini íntskupka paraka israeliteechani íntsaapiringa (Rom. 3:21, 28). Jamberi uánikua kristianuechaksï no jiókuarhiendi eskaksï nóteru jatsispkia para úni imani ambe enga Lei uandeenga. Jimbosï Pablu Abraániiri ejempluni úrapti para xarhatani eska Tata Diosï úsïnga sési exeni kʼuiripuni ma, jimboka mintsikasïnga ka no jimboka úsïnga ambe enga “lei uandajka”. Ambe enga uandapka, kánikuajtsïni uinhaperantasïndi ka ístujtsïni jorhendasïndi eskachi uaaka sési jásï pájperakua ma jatsini Tata Diosïni jingoni engachi mintsikaska imani ka Kristuni. Imani “úkuechani” enga Santiagu kapitulu 2 jimbo uandajka no imanisï arhikuekani jati enga “lei uandajka” para úni ka enga Pablu uandapka. Santiagu imani úkuechanisï arhikuekani japti engaksï kristianuecha pauani pauani uaajka imeecheri irekuarhu (Sant. 2:24). Kristianu ma úkuecha jimbo xarhatasïndi eska meru mintsikasïnga Tata Diosï o nómbe. w23.12 3 párr. 8; 4, 5 párr. 10, 11

Pirenchiicha engaksï uékani jaka uambuchani, jatsistiksï para jánguarhintani sési erakuni né jingondi uambuchaa. I jindeesti sánderu kʼéri ambe engari erakuaka úni chiiti tsípikuarhu. Miá eska ima tata engari tʼu erakuaka, chiiti orhejtsïkutiuati (Rom. 7:2; Éfes. 5:33). Ísï jimbo: “¿Sési marhuakuxaki Tata Diosïni? ¿Xarhatasïni eska Tata Diosïiri ambesï sánderu jukaparhakueka para ima? ¿Sési erakusïni úni ambe ma? ¿Jiókuarhisïni enga no sési újka ambe ma? ¿Janhanharhiasïni nanakechani? ¿Uaarini kuidarini parani sési jarhani Tata Diosïni jingoni, parani no ma ambe kueratanchani ka engani no sési pʼikuarhenhini jauaka? Joperu ístu engari uéjka exentani ambakiti uámbani ma, tʼujturi jatsiska parari jánguarhintani ambakiti témba máeni. Ambakiti témba ma “jarhuajpiri máeska” enga jarhuatajka uámbani imani ambe jingoni enga uámba kueratanchaaka (Gén. 2:18). Ístu jimboka xénchasïnga Tata Diosï Jeobani, jánguarhintani paraka uámba sési exenhaaka (Prov. 31:11, 12; 1 Tim. 3:11). Uaakari prepararikuarhini sánderu xénchaparini Tata Diosï Jeobani ka jánguarhintaparini desde iásï uératini ambakiti jarhuajpiri máeni kʼumanchikuarhu ka ístu kúnguarhikuarhu. w23.12 22, 23 párr. 18, 19

Tata Diosï Jeobajtsïni aiachisïndi eskajtsïni íntskuaka jánhaskakua parachi ambakiti ambe erakuni úni. Ka jiánchi sánderu uétarhinchasïnga eskajtsïni jánhastaaka engachi imani ambe uékaaka úni enga mójtakuaka juchaari tsípikuani. Ístu íntskusïndijtsïni uinhapikua parachi tekaantani. Ísï eska na úpka apostoli Pablu jingoni, Tata Diosï Jeobajtsïni íntskuati uinhapikua parachi tekaantani engachi no sési nitamakuarhini jauaka (2 Kor. 4:7). Ma ambe enga úrajka jindeesti juchaari erachiichani. Ima chúrikua ante de Jesúsi uarhini, mintsita jingoni kómarhispti Tata Diosïni. Ka kurhakuspti eska no jurajkupiringa eskaksï kʼuiripuecha uandapiringa eska ima no sési ambe uandaspka Tata Diosïiri ambe. Peru Tata Diosï no ísï úspti, sánderu sési, axaspti ánjelini ma enga Jesúsiiri ermanuepka, para jarhuatani ka uinhaperantani (Luk. 22:42, 43). Májkueni, jamberi Tata Diosï Jeoba úraati erachini ma engajtsïni uandajpaaka ojtsïni pʼorhembini parajtsïni uinhaperantani. Ísï jimbo, iáminduechachi uaaka exeni káni engachi uaaka ‘ambakiti uandakuechani’ arhiani juchaari erachiichani (Prov. 12:25). w23.05 10, 11 párr. 9-11

Imeecha engaksï nóteru marhuakuni jakaia Tata Diosï Jeobani ka niranksï miántani tata Jesukristueri uarhikuani, jamberiksï cheendi eratseendi nénaksï erokaapirini erachiicha. Ísï jimbo, ju je no kurhamarhiani ni arhiani imani ambe enga úpiringa no sési pʼikuastaani. Imeechaksï útasï juchaari erachiicheesti ka juchachi kánikua tsípisïnga ménderu májku kʼéri kómarhini Tata Diosï Jeobani (Sal. 119:176; Úku. 20:35). Exeskachia andijtsïnisï Jesúsi juramuchi eskachi miántani imeeri uarhikuani mándani uéxurhini. Ísï úni, kánikuajtsïni marhuachesïndi juchantsïni ka ístu máteru kʼuiripuechani (Is. 48:17, 18). Jarhuatasïndijtsïni parachi sánderu xénchani Tata Diosï Jeobani ka tata Jesukristuni. Ístuchi úsïnga xarhatani na engachi xáni agradesidu jaka indeni ambe jimbo engaksï imeecha úka juchantsïni jimbo. Ka úsïndi eskachi sánderu májku kʼéri jauaka iámindu erachiicha jingoni ka eskachi jarhuatauaka máteru kʼuiripuechani míteni ambe engaksï jatsika para úni paraksï pʼiuani kóntperatechani engajtsïni Tata Diosï íntsauaka tata Jesukristueri uarhikua jimbo. Ísï jimbo, ju je jánguarhintani listu jarhani parachi miántani tata Jesukristueri uarhikuani jimboka inde jindeeska jurhiatikua enga sánderu jukaparhakueka ini uéxurhini. w24.01 13, 14 párr. 18, 19

¿Nénajtsïni arhistachisïni iásï Tata Diosï Jeoba? Orheta, Biblia jingoni. Joperu ístu úraasïndi erachiichani enga ima erakuakia. Pori ejemplu, úrasïndi ‘jántspirini enga mintsinharhikueka ka jánhaskatiini’ engajtsïni íntskuni jarhajka ambe engachi uétarhinchajka parachi úni sési erakuni ambe engachi jatsika para úni (Mat. 24:45). Joperu Tata Diosï Jeoba no ini erachiichantkusï úraajti parajtsïni jarhuataani. Úraasïndi sirkuitueri orhejtsïkutiichani ka kúnguarhikuarhu anapu orhejtsïkutiichani engajtsïni arhistachijka ka jarhuatantsïni parachi úni orhepani uérakuani uandanhiateechani. Kánikuachi tsípisïnga engajtsïni Tata Diosï Jeoba jarhuatani jaka ini últimu jurhiatikuecha jimbo enga xáni no sési jánhaskuarhini jaka. Ísïchi úsïnga seguiriini jarhani imeeri amigueni ka imani xanharu jimbo jámani enga tsípikuarhu pájpejka. Joperu ménichani no fásiliuati úni ambe engajtsïni Tata Diosï Jeoba arhijka, ka sánderia jiáni engajtsïni kʼuiripu ma enga no perfektueka arhini jauaka ambe engachi jatsika para úni. Enga i ambe úkuarhiska jiánchisï jatsika para sánderu mintsikani eska Tata Diosï Jeobasï jarhuatani jaka imeeri iretani ka eska sánderu sésiiska úni ambe engajtsïni ima arhijka. w24.02 20 párr. 2, 3

Parachi niárani sánderu xénchani Tata Diosïni, jatsiskachi para sési jorhenguarhini Tata Diosïiri Karakatani. Engachi Bibliani arhintani jauaka, ju je jánguarhintani exeni ambe engajtsïni jorhendajka Tata Diosï Jeobaeri ambe. Jatsiskachi para kurhamarhikuarhini: “¿Nénaksï xarhatasïni i karakateecha eskarini Tata Diosï Jeoba xénchasïnga? ¿Ka nénajtsïni jarhuatasïni sánderu xénchani Tata Diosï Jeobani?”. Máteru ambe engajtsïni jarhuataaka sánderu xénchani Tata Diosï Jeobani jindeesti pauani pauani aiangukuarhini na engachi pʼikuarherajka kómarhikua jimbo (Sal. 25:4, 5). Ka Tata Diosï Jeobajtsïni mókuchiantauati juchaari kómarhikuechani (1 Juanu 3:21, 22). Ju je jánguarhintani úni ambe ma para sánderu xénchaani máteruechani. Máru uéxurhinisï tátsekua enga Pablu kristianu úkuarhipka, mítespti ambakiti tumbini ma enga Timoteu arhinheenga. Ima xénchasïreendi Tata Diosï Jeobani ka ístu máteru kʼuiripuechani. Ma tiempisï tátsekua, Pablu i ambe arhiaspti Filipusï anapuechani Timoteueri ambe: “Jimboka no nema jarhaska ixú enga ísï jámajka eska inde, jimboka inde kánikua uandanhiasïnga chánksïni jimbo” (Filip. 2:20). Ambe enga Pablu exepka Timoteueri, jindeespti eska kánikua xénchaasïreenga erachiichani. Seguru eskaksï kúnguarhikuecha uékani jarheengia eska Timoteu pʼorhembiapiringa (1 Kor. 4:17). w23.07 9 párr. 7-10

Antedeksï israeliteecha inchani imani Echerirhu jimbo engaksï aiaminhapka, Moisési tʼuini uarhisptia. ¿Ambe úkuarhispi Tata Diosïiri ireta jingoni? Enga Moisési nóteru orhekupauengia, ¿jandiajkuksï pakarapi ka nóteru nema jarhuataani japia? Nómbe. Jimboka Tata Diosï Jeoba méntkisï imeecha jingoni jarhasïreenga, engaksï imeecha no jurajkuenga. Tata Diosï Jeoba arhispti Moisésini eska Josué orhekupapirhingia iretani enga ima na uarhipiringuia, jimboka Moisési uánikua uéxurhini páxapkia jorhendani de néna úni indeni ánchikuarhitani (Éx. 33:11; Deut. 34:9). Ístu, jarhasptiksï uánikua achamasïicha engaksï mítekupkia néna orhejtsïkuni iretani: orhejtsïkutiicha miliiri, sieniiri, sinkuenteri ka asta diesiiri (Deut. 1:15). Tata Diosïiri ireta méntkisï jatsispti jarhuajperata. Pori ejemplu, Elíasi uánikua uéxurhini jarhuataaspti israeliteechani para Tata Diosïni kómarhini. Peru ma repentku Tata Diosï Jeoba axaspti surirhisï, Judá (2 Rey. 2:1; 2 Crón. 21:12). ¿Jandiajkuksï pakaraspi Tata Diosï Jeobaeri marhuariicha engaksï 10 tribueri anapuepka? Nómbe. Jimboka Elíasi uánikua uéxurhini páxaptia jorhendani Eliseuni. Ísï jimbosï Tata Diosï Jeoba úpti kuidarini imeeri iretani ísï eska na uékeenga ka kuaani imeeri marhuariichani engaksï no méni jurajkuni japka. w24.02 5 párr. 12

Éfesu anapu kristianuechaksï ueenasptiksï ísï irekani eska Tata Diosï Jeobaeri Uandakua na arhijka, enga ísïika komueska lusi ma enga tʼíntskakuauenga paraksï úni exeni (Sal. 119:105). Nóteruksï jakajkusïreendia chkuanderakua ambe relijioni no jurhimbitiiri ka nóteruksï niátasïreendia ísku jándikua ambe. Sánderu sési, májkuenksï jámasïreendia eska Tata Diosï ka jánguarhintasïreendiksï jaiapanherantani ka kómarhini (Éfes. 5:1). Ante dechi ueenani jorhenguarhini jurhimbikueri ambe, juchajtuchi pápkʼandekuarhu jarhaspka jimbokachi imani ambe jakajkusïreenga enga relijioni no jurhimbiti jorhentpijka ka ísku jándikua ambechi niátani isï eskaksï Éfesu anapuecha. Jamberichi máru kʼuínchikuechani uaantauenga engaksï no sési jaka ka máruchi jamberi ísku jándikua ambe niáteenga. Joperu engachi mítepka Tata Diosï Jeobani, mójtakurhispkachi ka ueenaspkachi ísï irekani eskaksï imeeri juramukuecha na uandajka. Inde ambejtsïni niárasti kánikua marhuacheni (Is. 48:17). Joperu, ménichani no fásiliisti seguiriini ‘tʼíntskuarhu jarhani’ ka jurajkuni pápkʼandekuani. w24.03 21, 22 párr. 6, 7

Jamberijtsï chá ísï pʼikuarherajka enajkijtsï nótki uaa aiakukuarheni Tata Diosïni ka itsï atakuarhini. Jamberijtsï exejka eskajtsï jatsiska para máru ambe mójtakuni parajtsï úni kurhajchani Tata Diosï Jeobani, o jamberijtsï exejka eskajtsï uétarhinchasïnga sánderu tiempu parajtsï sánderu mintsikani Tata Diosïni (Kol. 2:6, 7). Asï mirikurhi je eskaksï jarhaska máru jorhenguarhiricha engaksï sánderu sóntku uéjka marhuakuni Tata Diosïni Jeobani ka eska máteruecha. Ka ístu, máru tumbiichaksï sapirhatku ueenasïndi marhuakuni Tata Diosï Jeobani ka máteruechaksï sánderu sáni ióndasïndi. Ísï jimbo, chá exe je sintsï uaa ísï úni o nótki ambe ka asï jáma je terukukuarhintani máteruecha jingoni (Gal. 6:4, 5). Enga chá exejka eskajtsï nótki listu jarhasïnga parajtsï aiakukuarheni Tata Diosï Jeobani, seguirii je jánguarhintani parajtsï ísï úni. Kurhaku je Tata Diosï Jeobani eskaksïni jarhuataaka mójtakurhini (Filip. 2:13). Uaakajtsï seguru jarhani eska Tata Diosï Jeoba kurhauaka chaari kómarhikuechani ka eskaksïni mókuchintaaka (1 Juanu 5:14). w24.03 5 párr. 9, 10

Ma uelta, Sara kánikua uandanhiaxapti, ka arhispti Abraánini na enga xáni ikiani japka ka asta arhispti eska Abraániiri kulpeespka. Abraáni sési mítespti eska Sara janhanharhisïreenga ka eska jiókuarhisïreenga ambe enga Abraáni erakuenga úni. Ísï jimbo, ima kurhajchaspti ka jánguarhintaspti sési peentani problemani (Gén. 16:5, 6). ¿Ambechi jorhenguarhisïni? Eska acheeti juramukua jatsiska para uandani ambe enga uaaka imeeri familia (1 Kor. 11:3). Jimboka uékasïnga imeeri témbani, kurhajchaspti ka kuenta úsïndi ambe enga ima eratsejka ante de erakuni úni ambe ma, ka sánderia enga ima ambe tsimarhaniriuaka (1 Kor. 13:4, 5). Máteru uelta, Abraáni pʼímarhiaspti imeecho máru acheetiichani engaksï ma repentku niárapka. Ísï jimbo, arhispti Sarani eska uánikua kurhinda úpiringa, nájkiruka ima no andajkuarhini japka máteru ambe jingoni (Gén. 18:6). Sara sóntku úspti ambe enga Abraáni arhipka. Uarhiitiicha, chájtujtsï uaaka májkueni úni eska Sara ka apoiarintsï ambe enga chaari acheeti erakuaka úni. Engajtsï ísï úska, sánderujtsï uékperaaka temungurhiri (1 Ped. 3:5, 6). w23.05 24, 25 párr. 16, 17

Ísï tátsekua enga Tata Diosï Jeoba arhipka Gedeónini eska orhejtsïkupiringa ireta Israelini, jatsipirindi para kurhandini ka balori xarhatani. Ima arhinhaspti eska úpiringa ambe ma enga kánikua úkua jukapka, eska xerentapiringa altarini enga imeeri taati jémba jatsipka nani engaksï kómarhienga Baalini (Juec. 6:25, 26). Sánderu tátsekua, Gedeóni kʼéri ejersitu ma úspti ka tsimani xanhari Tata Diosï Jeoba arhispti eska no xáni uánikua sondaduechani paapiringa uarhipeni (Juec. 7:2-7). Ka últimu, Tata Diosï Jeoba juramukuspti eska chúrikua nipiringa uarhipeni imeeri enemiguecha jingoni (Juec. 7:9-11). Orhejtsïkutiichaksï jatsisti paraksï méntkisï kurhandirani (Sant. 3:17). Enga orhejtsïkuti ma kurhandirajka, tsípikua jingoni úsïndi ambe enga arhijka Tata Diosïiri Karakata ka imeeri organisasioni, ka ísï, ambakiti ejemplu ma íntskuasïndi máteruechani. Jamberi ménichani úkua jukanchajti ísï úni eskaksï na arhijka instruksionicha enga Tata Diosïiri organisasioni íntspiajka. Ka ménichani úpirindi kurhamarhikuarhini sini sési jaki ísï úni eska instruksioni ma na arhijka o jamberi arhinhani eska uaaka ambe ma enga jimbo úpiringa ónhanhani. Enga i ambe úkuarhiska, ¿nénaksï uaa orhejtsïkutiicha májkueni kurhandini ísï eska Gedeóni? Jingontku kurhaa je ambe engajtsï arhinhaaka para úni ka ísï ú je. w23.06 4, 5 párr. 9-11