Febreru

Enga rei Esekíasi uinhamu pʼamenchapka kurhakuspti Jeobani eska tsinapiringa ka Jeoba ísï úspti (2 Rey. 20:1-6). Joperu enga apostoli Pablu kurhakupka eska kénditakupiringa ‘chekamikua ma kuerpurhu’, Tata Diosï Jeoba no ísï úspti (2 Kor. 12:7-9). Apostoli Santiagu ka Pedru sánoksï uándikunhaspti jimboka rei Erodesi uékasïreendi uándikuani. Santiagunksï uándikuspti joperu Pedruni nómbe, jimboka Jeoba kuájchakuspka milagru ma jimbo (Úku. 12:1-11). Jamberichi kurhamarhikuarhijka: ‘¿Andisï Jeoba kuájchakupi máechakuani ka máteruni nómbe?’. Nájkiruka Biblia no uandajka andisï ísï úpi. Uaakachi seguru jarhani eska Tata Diosï Jeoba jindeeska Diosï ma “enga no no sési ambe újka” (Deut. 32:4). Jamberi ménisï Tata Diosï Jeoba nójtsïni ísï mókuchintaati eskachi na uékajka, joperu nóchi no sési exesïnga na engajtsïni mókuchintajka jimbokachi míteska eska ima méntkisï úsïnga ambe ma uékperakua ka jurhimbikua jingoni (Job 33:13). w23.11 21 párr. 6

Santiagu, enga Biblieri libru ma karaka uandasïndi eska ima kʼuiripu enga jánhaskatiika ‘kurhandirasïnga’. ¿Ambe arhikuekasïni i ambe? Eskachi jatsiska para listu jarhani para kurhajchaani imeechani enga Tata Diosï Jeoba juramukua íntsaaka, joperu Tata Diosï Jeoba no uékasïndi eskachi kurhajchauaka imeechani engajtsïni arhiaka eskachi imani ambe uaaka enga ima no jaiapanhintajka (Úku. 4:18-20). Jamberichi ísï exejka eska sánderu fásiliiska kurhajchani Tata Diosï Jeobani eska kʼuiripuechani, jimboka ambe engajtsïni ima arhijka, méntkisï sésiisïnga (Sal. 19:7). Joperu ambe engajtsïni arhijka ima kʼuiripuecha engaksï juramukua jatsika, no méntkisï sési jarhasïndi. Nájkiruka ísïika, juchaari Taati auandarhu anapu íntskuasti sáni juramukua taatiichani, juramutiichani ka orhejtsïkutiichani (Prov. 6:20; 1 Tes. 5:12; 1 Ped. 2:13, 14). Ka engachi kurhajchaajka ini kʼuiripuechani, Tata Diosï Jeobanchisï kurhajchani jarhajka. w23.10 6 párr. 2, 3

Ma ambe engachi uaaka úni parachi mintsikani eska jimbanhi parhakpini ma jauaka, jindeesti eratsentani na enga xáni uinhapitiika Tata Diosï Jeoba. Ima uinhapikua jatsisti para ísï úni eska ima na aiatspejka. Jimboka ima jindeeska Tata Diosï enga Iámindu ambe újka Úni (Job 42:2; Mar. 10:27; Éfes. 3:20). Arhispti Abraánini ka Sarani eskaksï kánguarhipiringa sapini ma, nájkirukaksï jatiriipkia (Gén. 17:15-17). Ístu aiakuspti Abraánini eskaksï imeeri desendientiicha Kanaáni irekapiringa. Joperu israeliteecha, engaksï Abraániiri desendientiipka, iónksï jántspispti Ejiptu ka jamberiksï niárapti eratseni eska no méni úkuarhipiringa ambe enga Jeoba aiakupka Abraánini. Joperu niáraspti ísï úkuarhini. Aiakuspti Maríani eska ima kánguarhipiringa Tata Diosïiri Uájpani nájkiruka útasï uátsïipka. I ambe kumpliripirindi ambe enga Tata Diosï Jeoba aiatspipka jardini de Edénirhu uánikua uéxurhini antesi (Gén. 3:15). Engachi eratsentajka iámindu ambe enga Tata Diosï Jeoba aiatspipka ka ambe enga xáni úka para ísï úni, exesïngachi na enga xáni uinhapitiika ima. I ambe úsïndi eskachi sánderu mintsikaaka eska ima uaaka úni eska jimbanhi parhakpini ma jauaka (Jos. 23:14; Is. 55:10, 11). w23.04 28, 29 párr. 10-12

Tata Diosï Jeoba mókukuantaspti imeeri kómarhikuechani ka jarhuataspti (1 Sam. 19:10, 18-20; 2 Sam. 5:17-25). Ka juchajtuchi uaaka májkueni uandani (Sal. 145:18). Jamberijtsïni Tata Diosï Jeoba no ísï mókuchintaati eskachi jucha na erokuarhini jarhajka. Pablu kʼéri problema ma jatsispti enga ísïipka “komueska ma chekamita”, ima tanimu xanhari arhispti Tata Diosïni eska jarhuatapiringa. ¿Mókukuantaspi Tata Diosï Jeoba imeeri kómarhikuechani? Jo, peru no ísï eska Pablu na erokuarhini japka. Ima no kénditakuspti ambe enga nitamakuarhini japka, peru íntskuspti uinhapikua paraka ima seguiripiringa sési marhuakuni (2 Kor. 12:7-10). Jamberijtsïni Tata Diosï Jeoba no ísï mókuchintaati na engachi erokuarhini jarhajka. Peruchi uaaka seguru jarhani eska ima míteska ambe enga sánderu sésiika para jucha. Ka ima úsïndi ‘iauani sánderu k’éri ambe úni ka eska enga jucha kurhajkuarhijka o eratseni’ (Éfes. 3:20). Ísï jimbo, imajtsïni úpirindi mókuchintani jimajkani engachi jucha no erokuarhini jauaka ni ísï eskachi jucha na eratseni japka. w23.05 8, 9 párr. 4-6

Mémindu eratsentani eska jauaka tsíntskua, kánikuajtsïni jarhuataati. ¿Andi? Jimbokachi no míteska ambechi uaa úkuarhinchani pauani. Úpiringachi uinhamu pʼamenchani ochi ma repentku uarhiranchani nemani (Ecl. 9:11; Sant. 4:13, 14). Mintsikani eska jauaka tsíntskua, jarhuataatijtsïni parachi tekaantani engachi indeni ambe nitamakuarhini jauaka (1 Tes. 4:13). Tata Diosïiri Karakatajtsïni aiachisïndi eska juchaari Taati auandarhu anapu kánikuajtsïni sési míteska ka eskajtsïni kánikua xénchasïnga (Luk. 12:7). Ka jimbokajtsïni kánikua sési míteska imajtsïni uaati tsítantani ísï eskachi jucha na jásïika ka uaati eskachi miántaaka juchaari ambe. Ka jimbokajtsïni xáni xénchasïnga aiachisïndijtsïni eskachi uaaka irekani para méntkisï. Nájkirukachi uarhiaka imajtsïni tsítantaati. ¿Andichisï uaa mintsikani eska jauaka tsíntskua? Jimbokachi seguru jarhaska eska ima uékasïnga ísï úni ka eska jatsiska uinhapikua, o eska uaaka ísï úni. w23.04 8, 9 párr. 2-4

José ka María, májku kʼériksï jánguarhintaspti paraksï sési pájperani Tata Diosï Jeoba jingoni. Imeechaksï mítespti eska kánikua jukaparhakueska paraksï familiecha májku kʼéri kómarhini Tata Diosï Jeobani (Luk. 2:22-24; 4:16). ¡Ambakiti ejempluksï máesti para temungurhiriicha! Enga chá kaajka sapiichani, jamberi kánikua úkua jukajti tánguarhikuecharhu nirani ka arhutani tiempu para familieri jorhenguarhikua jatsini. Ístu, sánderu úkua jukajti temungurhiri jorhenguarhini Biblieri ambe ka májku kʼéri kómarhini. Joperu miá je, engajtsï májku kʼéri úska iámindu indeni ambe, sánderujtsï sési pájperaaka Tata Diosï Jeoba jingoni ka ístu temungurhiri. Ísï jimbo, jánguarhinta je orheta peerani Tata Diosï Jeobaeri ambe. Enga temungurhiri jatsiajka problemeechani, jamberiksï no tsitijti májku kʼéri jatsini familieri jorhenguarhikuani. Engajtsï ísï nitamakuarhini jaka, ¿andijtsïsï no imani ambe ueenajki jorhenguarhini enga no xáni kʼéka? Engajtsï ueenaska ini ambe úni, jarhuataatiksïni sánderu uékperani ka parajtsï tsitini májku kʼéri kómarhini Tata Diosï Jeobani. w23.05 22 párr. 7, 8

¿Néna jarhuataspi Abdíasini chénharhini Tata Diosï Jeobani? Jarhuataspti paraka jurhimbitku jámapiringa ka para mintsinharhikueni. Ini ambe jimbo, rei uandaspti eska ima exepiringa iámindu ambe imeeri kʼumanchikuarhu (terukutanta je Nehemías 7:2 jingoni). Ístu, jarhuataspti paraka balori jukapiringa, ambe ma enga meru uétarhinchapiringa. ¿Andi? Jimboka jimajkanisï enga ima irekapka, rei Akabi juramuxapti (1 Rey. 16:30). Ístu, Akabi tembuchatixapti Jesabeli jingoni enga Baalini kómarhienga ka enga mintsita jingoni kurhunhienga Tata Diosï Jeobani. Jimbosï uékeendi eska Israeli enga jindeepka norterhu anapu reinu nóteru kómarhipiringia Tata Diosïni ísï eska ima na uékeenga; asta niáraspti uándikuani uánikua Tata Diosïiri profeteechani (1 Rey. 18:4). Enga Jesabeli ueenapka jirinhantani Tata Diosï Jeobaeri profeteechani para uándikuani, Abdíasi jískaaspti kuebeecharhu 100 profeteechani, sinkuenteechani arhukuaspti ka ima pákuasïreendi kurhinda ka itsï (1 Rey. 18:13, 14). Enga Jesabeli mítepiringa ini ambe, i achamasï enga xáni balori jukapka uándikunhapirindi; ka ísï eska náki uéjki kʼuiripu ma, Abdíasi no uékasïreendi uarhini. Peru jimboka Abdíasi kánikua xénchasïreenga Tata Diosï Jeobani ka imeeri marhuariichani, úspti indeni ambe nájkiruka úpiringa uándikunhani. w23.06 16 párr. 9, 10

Juchaari jurhiatikuecha jimbo, Tata Diosï Jeoba seguiriixati arhistakuni imeeri iretani ísï na úpka ióntki ka jarhuatasïndi Bibliani jimbo ka imeeri Uájpani jimbo enga jindeeka kúnguarhikuarhu anapu orhejtsïkuti. ¿Jarhaski ambe ma enga xarhatajka eska Tata Diosï Jeoba seguiriixaka úraani kʼuiripuechani paraksï orhejtsïkuni imeeri iretani? Jo. Pori ejemplu siglu diesinuebe kʼamarhukuni jámani, Charles Russell ka imeeri jarhuajpiriichaksï kurhanguspti eska 1914 jindeepiringa uéxurhini ma enga kánikua jukaparhakuepiringa para Tata Diosïiri Reinu (Dan. 4:25, 26). ¿Andiksïsï niárapi ísï kurhanguni? Exeasptiksï Bibliarhu anapu profesiechani. Ka seguruchi jarhaska eska Tata Diosï Jeoba jarhuataaspka parakaksï ima úpiringa kurhanguni. Ambe enga úkuarhipka 1914 jimbo xarhataspti eska Tata Diosïiri Reinu ueenaspkia juramuni: Primera Guerra Mundiali úkuarhispti, kʼérati pʼamenchakuechaksï jarhaspti, jenchekuecha ka kʼarhingua ambe (Luk. 21:10, 11). Jimajkani sési xarharaspti eska Tata Diosï Jeoba úraaxapka ambakiti achamasïichani para jarhuatani imeeri iretani. w24.02 22 párr. 11

Tata Diosï Jeobaeri marhuariichachi míteska eskajtsïni ima kánikua xénchasïnga ka eska sánderu ambakiti ambe uékasïnga para jucha (Rom. 8:35-39). Ístuchi seguru jarhaska eska kurhajchaani Biblieri prinsipiuechani, méntkisïjtsïni marhuachesïnga (Is. 48:17, 18). Peru ¿ambechi uaa úni enga ima ambe úkuarhiska engachi no erokuarhini jauaka? Pori ejemplu, jamberi familiari ma uaati o uandani ambe ma engajtsïni no sési pʼikuastaaka. Ochi jamberi pʼamenchani jarhani ka indeni ambe jimbo nóchi úni marhuakuni Tata Diosï Jeobani ísï eskachi na uékapiringa. Ochi jamberi no sési nitamakuarhini jarhani desastre naturali ma jimbo. Ochi no sési kánhani jarhani imani ambe jimbo engachi jakajkujka. Engachi ini ambe nitamakuarhini jarhajka, úpiringachi kurhamarhikuarhini: “¿Andisïni ji ísï nitamakuarhini jaki? ¿Úski ambe ma enga no sési jaka? ¿I ambe xarhatasïni eskarini Tata Diosï Jeoba no újchakuraxaka?”. Enga chá ménisï niáraka ísï pʼikuarherani, asï chkétakuarhi je. Uánikua Tata Diosï Jeobaeri marhuariichaksï niáraspti ísï pʼikuarherani (Sal. 22:1, 2; Hab. 1:2, 3). w23.04 14 párr. 1, 2

Ka engachi uékani jarhajka úni ambe ma enga no sési jaka, sóntkuchi jánguarhintasïnga máteru ambe eratseni o úni, parachi no úni imani ambe enga uaaka eskachi nóteru sési pájperaakia Tata Diosï jingoni. Tata Diosï Jeoba uékasïndi eskachi “mintsita jingoni” kurhajchaaka (Rom. 6:17). Imeeri juramukuechaksï jindeesti parajtsïni méntkisï sési nicheni juchantsïni ka nóchi uaaka mójtakuani (Is. 48:17, 18; 1 Kor. 6:9, 10). Satanási úsïndi eskachi no sési kánhaaka ka eskachi no sési pʼikuastanhaaka para úni eskachi nóteru uiuinhasï jauakia. Ambe enga ima uéjka, jindeesti eskachi jucha méntku nóteru sési pájperaakia Tata Diosï Jeoba jingoni (1 Ped. 5:8). Primeru siglurhu anapu kristianuechanksï arhiaspti eskaksï no sési úkuapiringa, atasptiksï ka uándikuasptiksï, jimboka i kristianuechaksï uékasïreendi kurhajchani Tata Diosïni (Úku. 5:27, 28, 40; 7:54-60). Ka ini jurhiatikuecha jimbo, Satanási ístu úsïndi eskachi no sési kánhaaka. Pori ejemplu, na engaksï xáni no sési kánhani jaka juchaari erachiicha Rusia anapuecha ka máteru naniisï anapuecha, xarhatasïndi eska i ambe ísïiska. Ístu, kʼuiripuechaksï mámaru ambe úsïndi paraksï no sési kaani uánikua juchaari erachiichani. Satanási no solu úsïndi eskachi no sési kánhaaka, sino ístu máteru ambe úsïndi parajtsïni enganiarini (Éfes. 6:11). w23.07 15, 16 párr. 6-9

Engajtsï jorhenguarhiaka Tata Diosïiri Karakatani niáraskajtsï sánderu xénchani Tata Diosï Jeobani. Ka inde ambe úsïndi eskajtsï uékaaka ísï úni eskajtsï na jorhenguarhini jaka. Ueenakajtsï imani ambe úni enga sési jaka jimbokaksïni Biblieri prinsipiuecha jarhuataska. Ístujtsï ueenaka ménderueni jámani ka eratseni jimbokajtsï uékasïreenga Tata Diosïni jaiapanherantani. Ísï eska sapi ma na májkueni jámajka eska taati jémba, chájtujtsï ueena májkueni úni eska chaari Taati auandarhu anapu enga kánikua xénchpetiika (Éfes. 5:1, 2). Úpiringachi kurhamarhikuarhini: “¿Iásï sánderuni xénchasïnia Tata Diosï Jeobani eska jiáni engani itsï atakuarhika? ¿Sánderuni ísï eratsesïnia ka jámani eska Tata Diosï Jeoba, ka sánderia jiáni engani jatsijka parani uékperakua xarhatakuani kúnguarhikuarhu anapu erachiichani?”. Engachi nóteru xáni xénchpejkia ju je no chkétakuarhini. Primeru siglurhu anapu erachiichaksï indeni ambe úkuarhinchaspti. Peru Jesúsi no uandaspti eskaksï nóteru méni úpiringia xénchpeni, ka májkueni eratsesïndi juchaari ambe (Apok. 2:4, 7). Ima mítesti eskachi uaaka ménderu ísï xénchpeni eska jiáni engachi ueenaka Biblieri ambe jorhenguarhini. w23.07 8 párr. 2, 3

Apostoli Pedru uánikua ambe no sési úspti. Orheta, uandaspti eska ima no méni jurajkupiringa Jesúsini nájkirukaksï máteruecha jurajkupiringa (Mar. 14:27-29). Tátsekua someni kʼuíiraspti (Mar. 14:32, 37-41). Ka engaksï na jupikapkia Jesúsini, jurajkuspti (Mar. 14:50). Ka últimu, Pedru tanimu uelta uandaspti eska no mítespka Jesúsini asta jamberi jurariispti (Mar. 14:66-71). Ka enga kuenta íntskukuarhepka eska kánikua no sési ambe úspka, ¿néna pʼikuarheraspi? Xáni no sési pʼikuarheraspti enga pʼiárapka uerani (Mar. 14:72). Jesúsi no méni arhinharhikuspti Pedruni imani ambe jimbo enga úkupka, sánderu sési, arhispti eska sánderu ánchikuarhita ambe úpiringa (Juanu 21:15-17). Pedru mítespti eska kʼéri pekadu ma úspka, joperu no kuatantaspti jimboka seguru jarhaspka eska Jesúsi no jatanhekuspka ka eskaksï imeeri erachiicha jarhuatapiringa. ¿Ambechi jorhenguarhisïni? Tata Diosï Jeoba uékasïndi eskachi seguru jauaka eskajtsïni ima xénchasïnga ka eskajtsïni puáchentaaka (Rom. 8:38, 39). w24.03 18 párr. 13-15

Jamberi imeecha engaksï ísku jándikua ambe niátajka kʼuratsejtiksï, pʼikuarherajti enajkiksï no ma ambe jukaparha, embarasada pakarajti nájkirukaksï no uékaka, oksï xereni imeecheri familiani. Ísï jimbo, sánderu ambakiti ambe jindeesti no jiókuarhini pʼímarperakua ‘uarhiitiiri enga no jánhastiika’. Uánikua engaksï ísku jándikua ambe niátajka nóksï solu no sési pájperasïndia Tata Diosï jingoni, sinoksï ístu niárasïndi pʼirani pʼamenchakua ambe engaksï jimbo tátsekua niárajka uarhini (Prov. 7:23). Proverbios 9:18 ísï kʼamarasïndi: “Imeecha enga pʼímarhiaka Tumbarhuksï inchatsekurhitini jarhasti”. Jimajkani, ¿andiksïsï xáni uáni kʼuiripuecha jiókuarhijki pʼímarperakuani nájkirukaksï xáni no sési kʼamarajka? (Prov. 9:13-18). Pornografia kánikua no sési jarhasti ka iápurisï jarhasti. Máruksï eratsesïndi eska no no sési jarhaska exeni, peru no ísïisti. Pornografia kánikua no sési útspisïndi, úsïndi eska nema nóteru respetarikuarhiakia, níjtu máteruechani janhanharhiani ka ístu úsïndi eska nema pʼindeaka exeni. Ka nema no úsïndi sóntku mirikurhini ikichakueni jásï ambe enga exejka, pornografia exeni no jarhuajpesïndi para nóteru tsitinia ikichakueni jásï ambe niátani, sánderu sési, úsïndi eska nema sánderu tsitiaka indeni ambe niátani (Kol. 3:5; Sant. 1:14, 15). Uánikua engaksï pornografia ambe exejka niárasïndiksï ísku jándikua ambe niátani. w23.06 23 párr. 10, 11

Nájkirukaksï máteru nasionicha uékaaka kénditani ini kʼéri juramukuani nóksï uaati ísï úni, ka míteskachi ini ambe jimboka profesia uandasïnga eska “tsakapu”, enga Tata Diosïiri Reinuni arhikuekajka, purunduriauaka estatueri jantsiriichani (Dan. 2:34, 35, 44, 45). ¿Segurujtsï jarhaski eska ísïiska ambe enga Danieli uandaka estatueri jantsiriicheeri ambe? Enga ísïika, xarharaati chaari irekuarhu. Pori ejemplu, nójtsï sánderu arhiaka sentabu andani jimbokajtsï míteska eska i parhakpini no ióni jimbo kʼamajkunhaaka (Luk. 12:16-21; 1 Juanu 2:15-17). Ístu, kurhanguni ini profesiani jarhuataatiksïni sánderu jukaparharani nirani aianhpini ka Jesúsiiri chúxapatiichani uaani (Mat. 6:33; 28:18-20). Ísï jimbo, iásï engachi jorhenguarhikia ini profesiani, sési jauati eskajtsï kurhamarhikuarhiaka: “¿Ambe engani erakujka úni xarhatasïni eska Tata Diosïiri Reinu no ióni jimbo kʼamajkuauakia kʼuiripuecheeri juramukuani?”. w23.08 11 párr. 13, 14

Kaxumbitii je ka jiókuarhi je eskajtsï no uaaka iámindu ambe úni jimbokajtsï jatiriiskia, pʼamenchani jarhani o jimbokajtsï nitamakuarhixaka ambe ma jimbo. Májkueni ú je eska Barsilái ka asï jiókuarhi je imani responsabilidadichani engajtsï nóteru uaakia úni (2 Sam. 19:35, 36). O májkueni ú je eska Moisési, jurajku je eskaksïni máteruecha jarhuataaka ka eskaksï máteruecha uaaka ambe engajtsï chá úni jaka (Éx. 18:21, 22). Engajtsï kaxumbitiiska, nójtsï uékaaka imani ambe úni engajtsï no uaaka úni, jimboka inde ambe uaati eskajtsï nóteru xáni uinhapiakia. Ístuchi no jatsiska para kulpabli pʼikuarherani imani ambe jimbo engaksï máteruecha no sési erakuka úni. Juchachi no uaaka uandani ambe engaksï máteruecha jatsika para úni, nijtuchi uaa kuájchakuani imani ambe jimbo engaksï erakuka úni. Enga tataka ma o nanaka ma jurajkujka Tata Diosï Jeobani, taati jémbeechaksï kánikua no sési pʼikuarherasïndi. Peru imeecha engaksï no sési pʼikuarherajka imani ambe jimbo engaksï uájpeecha erakujka úni, inde ambe ísïisïndi komueska kʼuetsapiti ambe páni jarhani, ka Tata Diosï Jeoba no uékasïndi eskaksï taatiicha ísï pʼikuarheraaka. w23.08 29 párr. 11, 12

Ísï eska jucha, Sansóni no perfektuespti, ísï jimbo, ménichani niáraspti no sési ambe úni. Ma xanhari kánikua no sési nikuspti, jimboka no úxapka imani ánchikuarhitani enga Tata Diosï arhipka. Enga ióni sáni páni japkia komu juesi, “niáraspti tsitini nanakani ma enga Dalila arhinheenga ka enga baie de Soreki irekapka”. Ante de míteni Dalilani, uékasïreendi tembuchani nanaka ma jingoni enga filistea anapuepka. Peru Biblia uandasïndi eska “i ambe Tata Diosïni Jeobani jimboespka, enga exeni japka néna no sési úkuani filisteuechani”. Ísï tátsekua, Sansóni niraspti ireta Gasa enga filistea japka ka pakaraspti ísku jándiiri kʼumanchikuarhu ma. Jiáni Tata Diosï Jeoba íntskuspti uinhapikua Sansóni paraka pʼikuantapiringa iretarhu anapu puerteechani paraka ísï ireta nóteru kuájchakukata japiringia (Juec. 14:1-4; 16:1-3). Joperu Dalilani jingoni no májkueniispti, jimboka jamberi ima israeliteepti. Filisteuechaksï uékasïreendi eska Dalila traisionaripiriinga Sansónini, jimboksïsï uánikua sentabu aiakupti ka ima jiókuarhispti. w23.09 5 párr. 12, 13

Jánhaskakuajtsïni uaati jarhuatani para no ikiani. Kʼuiripu ma enga jánhastiika, jorhenasti pʼíngukuarhini jiáni enga nema kurhamarhijka ima ambeeri enga jakajkujka. Sáno méntkisï engajtsïni kʼuiripuecha kurhamarhijka ambe ma, juchachi no mítesïnga andijtsïnisï kurhamarhijki. Ísï jimbo, ante dechi mókuntani, sési jauati eskachi eratsentaaka andijtsïnisï uéjki kurhamarhini indeni ambe (Prov. 16:23). Ju je exeni Gedeóniiri ejempluni. Achamasïicha engaksï Efraíniiri triburhu anapuepka, kánikuaksï ikiaparini arhispti Gedeónini andisï no pʼímarhiapi imeechani paraksï nirani uarhipeni Israeliiri enemiguecha jingoni. ¿Andiksïsï xáni ikiani japi? ¿Jindeepi jimbokaksï no sési pʼikuarheraspka enga ísï no pʼímarhiapka? Ambe uéjki jimboeni, Gedeóni sési eratsentaspti ka respetarispti na engaksï pʼikuarhereenga ka iátsitakuarhu mókukuantaspti. ¿Ambe úkuarhispi enga ísï úpka? Enga ísï mókukuantapka, “imeechaksï nóteru ikiasptia” (Juec. 8:1-3). w23.09 16 párr. 8, 9

No nema sánderu sési pájperasïndi Tata Diosï Jeoba jingoni eska imeeri Uájpa. Tata Diosï Jeoba kánikua no sési pʼikuarherani japti enga exepka na engaksï no sési kámani japka Uájpani ka na engaksï no xéncheenga. Imeecha engaksï uarhiranchaka uájpani ma, mítestiksï na enga xáni no sési pʼikuarherakuarhijka. Ka nájkirukachi mintsikajka eskaksï uarhiriicha tsíntaaka, inde ambe no úsïndi eskachi no no sési pʼikuarheraaka engachi uarhiranchajka nemani. I ejemplujtsïni jarhuatasïndi kurhanguni na enga xáni no sési pʼikuarherapka Tata Diosï Jeoba ima uéxurhini 33 jimbo enga exepka imeeri Uájpani na engaksï xáni no sési kámani japka ka uándikunksï (Mat. 3:17). Enga jamberi niáraaka ima jurhiatikua para miántani tata Jesukristueri uarhikuani, ¿andijtsïsï no jorhenguarhijki na engajtsïni euajpintaka tata Jesukristu? Uaakajtsï ini ambe úni jiáni engajtsï jandiajku jorhenguarhiaka Biblieri ambe o engajtsï familieri jorhenguarhikua jatsiaka. Ka asï mirikurhi je exeni tsípa anapu jorhenguarhikuani enga jindeeka para ima jurhiatikua engachi miántaaka tata Jesukristueri uarhikuani. Engachi iásï uératini preparariiska juchaari mintsitani para inde jurhiatikua, uaakachi jarhuataani máteruechantu májkueni úni (Esd. 7:10). w24.01 11 párr. 10-12

Ma ambe engachi uaaka úni parajtsïni Tata Diosï Jeoba íntskuni imeeri uinhapikuani, jindeesti kómarhini. Ima mókuantasïndi juchaari kómarhikuechani engajtsïni íntskujka “indeni uinhapikua enga no ma kʼuiripu újka jatsini” (2 Kor. 4:7). Ístujtsïni marhuachesïndi arhintani Bibliani ka eratsentani ambe enga uandajka (Sal. 86:11). Ambe engajtsïni ima arhijka Bibliarhu “kánikua uinhapikua jatsisti” (Ebr. 4:12). Ísï jimbo, engajtsï kómarhiska Jeobani ka arhintantsï imeeri Uandakuani, jatsiakajtsï imani uinhapikuani engajtsï uétarhinchani jauaka parajtsï tekaantani, seguiriini tsípikua jingoni marhuakuni o parajtsï kumplirini imani responsabilidadi jingoni enga úkua jukaaka para chá. Ju je exeni na enga uinhaperantapka Tata Diosï Jeoba profeta Jonásini. Jimboka chéspka, Jonási barkuni ma jataspti ka máteru naniisï niraspti sïpakuarhini para no úni ánchikuarhitani enga Tata Diosï Jeoba íntskupka. Jonási ka iámindu imeecha engaksï barkurhu nirani japka sánoksï uarhispti k’éri janikua ma jimbo. Engaksï marineruecha itsïarhu kʼuanimapka Jonásini: k’éri kurucha ma kunajkaspti, Jonási imeeri sïturhirhu pakaraspti, jima kánikua pápkʼandespti ka chónharhikuarhispti. ¿Ambe úspi Jonási para uinhapikua jatsini enga kurucheeri sïturhirhu japka? Kómarhispti (Jon. 2:1, 2, 7). w23.10 13 párr. 4-6

Nájkiruka apostoli Pedru karaapka ini karteechani para primeru siglurhu anapu kristianuecha, Tata Diosï Jeoba úspti eskaksï i Bibliarhu pakarapiringa parajtsïni ístu jarhuatani juchantsïni (Rom. 15:4). Sáno méntkisï, kʼuiripu no jakajkusïndi ambe enga Biblia uandajka eska úkuarhiaka sánderu orhepani. Jimbokachi ióni paxakaia tsípikua jingoni aianhpini eska ambe enga parhakpinirhu úkuarhini jaka kʼamajkunhaaka, máru kʼuiripuechajtsïni jamberi teresmarhujti ka astajtsïni arhini eska inde ambe no méni ísï úkuarhiaka (2 Ped. 3:3, 4). Engajtsïni nema aianhpikuarhu, ánchikuarhitarhu anapu kompanieru ma o parienti ma ísï arhipiringa, jamberichi juchajtu ueenapiringa nóteru xáni mintsikania indeni ambe. ¿Peru ambejtsïni jarhuataa? Ju je exeni ambe enga Pedru uandapka. Jamberiksï máru kʼuiripuecha eratsejti eska Tata Diosï Jeoba ióndaxakaia kʼamajkuni ambe enga xáni úkuarhini jaka parhakpinirhu. Peru Pedru uandaspti ambe ma engajtsïni eratsetarantajka. Miátantasptijtsïni eska Tata Diosï Jeoba kánikua ménderueni exesïnga tiempuni eska kʼuiripuecha (2 Ped. 3:8, 9). Para Tata Diosï, mili uéxurhini ísïisti komueska ma jurhiatikua. Ístu, ima tekaantstiisti ka no uékasïndi eska nema kʼamajkunhaaka. Peru imeeri jurhiatikua janoati..., ka iámindu ambe enga parhakpinirhu úkuarhini jaka kʼamajkunhaati. w23.09 26, 27 párr. 2-5

¿Andisï Pablu karakuapi kristianuechani engaksï ebreu uandeenga ka engaksï judea irekani japka? Jamberi tsimani ambe jimbo. Primeru, para uinhaperantaani. Sáno iáminduechaksï judiuecheri relijioni jimbo tʼarhexespti, ka jamberi relijioniiri orhejtsïkutiichaksï teresmarhuauendi jimbokaksï kristianu úkuarhispka. ¿Andi? Jimbokaksï kristianuecha no jatsispka kʼéri templu ma paraksï jima kómarhini Tata Diosïni, ni altari ma paraksï kéjtsïtakua ambe úkuni, ístu, nóksï jatsiaspti saserdotiichani ísï eskaksï judiuecha. Jamberi inde ambe no sési pʼikuastaapti Kristueri chúxapatiichani ka úni eskaksï nóteru xáni mintsikapiringia Tata Diosïni (Ebr. 3:12, 14). Ka jamberiksï máru niárapti eratseni ménderu kʼuanhatsentani judiuecheri relijioni jimbo. Segundu, Pablu exeraaspti kristianuechani engaksï ebreu uandeenga eskaksï no jánguarhintaxapka para sési kurhanguni imani jimbanhi ambe engaksï jorhenguarhini japka o imani ambe enga no xáni fásiliika para kurhanguni, enga jindeeka “tʼirekua enga xaxanhajka” ka enga Tata Diosïiri Uandakuarhu jaka (Ebr. 5:11-14). Máruksï útasï seguirixapti úni ambe enga Moisésiiri Lei uandeenga. w23.10 24, 25 párr. 3, 4

Máru uátsïicha erakusïndi no uambuchani (Mat. 19:10-12). Uaakari seguru jarhani eska Tata Diosï Jeoba ka tata Jesukristu kánikuakeni jukaparharasïnga. Iámu parhakpinirhu ima pirenchiicha engaksï erakujka no uambuchani, kʼéri kóntperataksï máesïndi kúnguarhikuarhu, jimboka imeecheeri uékperakua ka engaksï mintsita jingoni pendienti pájka máteruechani, úsïndi eskaksï máteruecha ísï exeauaka komueska pirenchiicha ka komueska amámbeecha enga Tata Diosï íntspiaka (Mar. 10:29, 30). Úpiringari marhuakuni Tata Diosï Jeobani tiempu kompletueri. Pirenchiichaksïsï sánderu aianhpijti iámu parhakpinirhu (Sal. 68:11). ¿Uaari planiichani uaani iásï para marhuani tiempu kompletueri? Jamberi komu prekursora, konstruksionirhu o beteli. ¿Ambekini jarhuataa parari andanguni indeni metani? Kómarhi Tata Diosï Jeobani, uandontskuarhi imeecha jingoni engaksï tiempu kompletueri marhuani jaka ka kurhamarhia ambe uétarhisïni para úni ísï marhuani. Parari úni andanguani indeni meteechani, kara ambe ka amberi jatsiski para úni. Engari marhuaska tiempu kompletueri uánikua ambe jauati engari uaaka úni parari marhuakuni Tata Diosï Jeobani. w23.12 22 párr. 16, 17

Míteskachi eska ima jurhiatikua enga kánikua no sési nitamakuarhinhaaka, axuterku jarhaskia, ísï jimbosï xáni jukaparhakueti nirani aianhpini. Joperu engachi no sáni jatsikuarheaka sentabu, ojtsïni juramutiicha no jurajkuni parachi aianhpini, jamberi no xáni fásiliuati eskachi aianhpiaka. ¿Ambejtsïni jarhuataa orheta peerani Reinueri ambe? Méntkisï mintsikani eska Tata Diosï Jeoba enga orhekupaajka ejersituechani, juchantsïni jingoni jarhaska. Ísï jimbo nóchi jatsiska para uandanhiani. Engachi orheta peeraska Tata Diosïiri Reinueri ambe, imajtsïni jarhuataati (Ageo 2:4). Tata Diosï Jeoba uékasïndi eskachi jánguarhintaaka disipuluechani uaani, ánchikuarhita ma enga újka para pʼímutantani imeecheeri tsípikuani. Ageo uinhaperaantaspti judiuechani paraksï seguiriini úntani templuni. Ísïispti enajki arhiani japi eskaksï ménderu ueenapiringa templueri pítsekuechani uaantani ka eskaksï mirikurhipiringa imani uéxurhiniichani engaksï no ma ambe úpka. Tata Diosï Jeoba aiakuaspti eska engaksï ima kurhajchapiringa, eska ima újchakuraapiringa (Ageo 2:18, 19). Juchajtuchi uaaka seguru jarhani eskajtsïni Tata Diosï Jeoba újchakuraaka engachi orheta peeraaka imani ánchikuarhitani engachi intsïnhaaka. w23.11 16 párr. 8; 17 párr. 11

Karta para Roma anapuecha, apostoli Pablu uandaspti eskaksï iámindu kʼuiripuecha pekadoriiska. Jiájkani, ¿andisï Tata Diosï újki sési pʼikuarherani juchantsïni jingoni ka uandani eskachi sési jámasïnga? Pablu úraspti Abraániiri ejempluni para jarhuataani iámindu kristianuechani kurhanguni indeni ambe. Enga Abraáni Kanaáni irekapka, Tata Diosï Jeoba uandaspti eska Abraáni sési jámasïreenga. ¿Ísï uandaspi jimboka Abraáni iámindu ambe ísï úsïreenga eska na uandeenga Moisésiiri Lei? Nómbe (Rom. 4:13). ¿Nénachi míteski? Jimboka Israeliiri nasioni 400 uéxurhini ísï tátsekua intsïnhaspka indeni leini. Jiájkani Tata Diosï Jeoba kóndentaspti Abraánini ka uandaspti eska sési jámasïreenga jimboka mintsikasïreenga (Rom. 4:2-4). w23.12 3 párr. 4, 5

Ima mismu chúrikua profeta Natánini arhipka Rei Dabidini eska úpiringa ambe enga uékani japka úni, Tata Diosï Jeoba arhispti Natánini eska no Dabidiipiringa enga templuni úpiringa (1 Crón. 17:3, 4, 11, 12). ¿Ambe úspi Dabidi enga kurhaapka indeni ambe? Jánguarhintaspti para sentabu tánani ka materiali ambe enga imeeri uájpa Salomóni uétarhinchapiringa para templuni úni (1 Crón. 29:1-5). Enga Dabidi na mítepkia eska ima no úpiringa templuni, Tata Diosï Jeoba pakatperakua ma úspti imani jingoni: aiakuspti eska imeeri desendienti ma juramupiringa para méntkisï (2 Sam. 7:16). Jimbanhi parhakpinirhu enga Kristu juramuni jauaka Mili Uéxurhini, Dabidi kánikua sési pʼikuarheraati míteni eska ima enga juramuni jaka imeeri desendienti máeska. I ambe enga Dabidi nitamakuarhipka, jorhendasïndijtsïni eska nájkirukachi no uaaka iámindu ambe úni engachi uékapiringa para Jeobani marhuakuni, juchaari Tata Diosï uaatijtsïni újchakurani imani ambe jingoni engachi jucha no erokuarhini jauaka. w23.04 16 párr. 8-10

Bibliarhu jarhastiksï máru karakateecha engajtsïni kánikua uinhaperpentajka jiáni engachi chéni pʼikuarherani jarhajka, pori ejemplu ari libruecha: Job, Salmos, Proverbios ka ístu ambe enga uandapka tata Jesukristu jimini Mateu kapitulu 6 jimbo. Enga chá kómarhiska Tata Diosï Jeobani ka arhintani imeeri Karakatani exeakajtsï néna engaksïni ima sési pʼikuastantaaka. Asï mirikurhi je: nájkirukajtsï no sési nitamakuarhini jauaka, Tata Diosï Jeoba méntkisï jima jauati paraksïni jarhuatani. Nójtsïni méni jandiajku jurajkuati (Sal. 23:4). Ju je miáni eskajtsïni aiachiska eskajtsïni ima kuájchakuaka, uinhaperantani, jupijtani ka sési pʼikuastantani. Isaíasi arhispti Tata Diosï Jeobani: “Kuájchakuauakari imechani engaksï kʼamakʼamasï chíti jarhuajperata jirinhajka, tʼuri íntsaani jauaka pínandikua para méntkisï, jimbokaksïni tʼunguinisï mintsikajka” (Is. 26:3). Ísï jimbo, mintsika je Tata Diosï Jeobani ka sési úra je iámindu ambe engaksïni ima íntskujka paraksïni jarhuatani. Engajtsï ísï úska, jatsiakajtsï uinhapikua para tekaantani iámindu no sési jásï ambe engajtsï nitamakuarhiaka. w24.01 25 párr. 16, 17

Ambe enga uandajka iásï anapu textu kumplirikuarhixati ini jurhiatikuechani jimbo. Ka ístuksï kumplirikuarhixati arhi uandakuecha: “Ka iámindu chiiti sapiichani Jeoba jorhendauati, ka chiiti sapiichaksï kánikua pínandikua jatsiati. Sésiri uaxastakata jauaka jima enga iámu ambe sési úkuarhijka. [...], nókini ma ambe chéraati nijturi jatsia para manarantani jimbokakeni no ma ambe uaaka chérani” (Is. 54:13, 14). Ni sikiera “i parhakpini anapu diosï”, enga jindeeka Satanási, uaati pʼínguni Tata Diosïiri iretani paraka aianhpiaka ambakiti aianhperakuani (2 Kor. 4:4). Jurhimbiti kómarhikua sési peenhantastia. ¡Nóteru méni jurajkunhaati Tata Diosï! No ma arma enga únhaaka no sésijtsïni úchiati. w24.02 4 párr. 10

Kristianuechachi kánikua jukaparharasïnga engachi aiakukuarhejka Tata Diosï Jeobani. Ka xarharasïndi imani ambe jimbo engachi erakujka úni ka ambe engachi újka juchaari familiariicha jingoni. Jánguarhintasïnga jarhuatani familiani, joperuchi no méni orhetku peerasïnga indeni ambe ka eska Tata Diosï Jeobaeri ambe (Mat. 10:35, 36; 1 Tim. 5:8). Jamberichi ménisï nóteru xáni sési pájperaakia juchaari familiariicha jingoni jimbokachi sánderu uékasïnga jaiapanherantani Tata Diosï Jeobani. Ima kueraasti familiani ka uékasïndi eskaksï tsípikua jingoni irekaaka (Éfes. 3:14, 15). Engachi meromindu uékaaka tsípikua jingoni irekani, jatsiskachi para úni ambe enga Tata Diosï Jeoba uandajka. Ima exesïndi ka jukaparharaasïndi imani ambe engachi újka para imani marhuakuni ka engachi ístu jánguarhintajka kuidariuani juchaari familiariichani ka xénchperakua ka janhanharhikua jingoni kaani (Rom. 12:10). w24.02 17 párr. 11; 18 párr. 13