Eneru

Jesúsi ʻexespti uarhiitiniʼ ka tátsekua “lástima úspti” o kánikua pʼamojkuspti (Luk. 7:13). Ima no solu pʼamojkuspti indeni uarhiitini, sino úspti ambe ma para jarhuatani. Ka iátsitakuarhu arhipti: “Ásteru ueraia”. Peru Jesúsi no solu ini ambe arhispti uarhiitini, ístu tsítantaspti imeeri uájpani ka “íntskuntaspti” (Luk. 7:14, 15). ¿Ambechi jorhenguarhisïni ini milagru jingoni enga Jesúsi úpka? Eskachi jatsiska para pʼamojkuani imeechani engaksï uarhiranchaka nemani. Parachi ísï úni, orhetachi jatsiska para jingontku exeni ambe engaksï uétarhinchajka ka tátsekuachi jánguarhintani imani ambe uandani ka úni enga jarhuatauaka ka enga sési pʼikuastantauaka (Prov. 17:17; 2 Kor. 1:3, 4; 1 Ped. 3:8). Engachi arhiaska máru ambe ka engachi úska ambe ma para jarhuataani, kánikuachi sési pʼikuastantauaka. w23.04 5, 6 párr. 13-15

Nájkiruka Jesúsi mítejkia eska imeeri amigu uarhiskia, ima eratsesïndi útasï tsimani jurhiatikua pakarani jima enga jaka ante de Betania nirani. Ísï jimbo, enga na niárajkia, Lásaru tʼuini tʼámu jurhiatikua páni jarhasïndia uarhirini. Jesúsi uékasïndi úni ambe ma para jarhuataani imeeri amiguechani ka ístu para kʼéri ambe arhini Tata Diosïni (Juanu 11:6, 11, 17). Ini ambe jingoni enga úkuarhipka jorhenguarhisïngachi eskachi jatsiska para ambakiti amigu máeni. Engaksï María ka Marta uandakua axakupka Jesúsini, nóksï arhispti eska nipiringa Betania. Imeechaksï nomasi arhispti eska imeeri amigu jémba enga ima xáni xéncheenga pʼamenchaxapka (Juanu 11:3). Enga Lásaru uarhipkia, Jesúsi úpirindi tsítantani desde jima uératini enga japka. Joperu ima niraspti Betania para María ka Marta jingoni jarhani, engaksï imeeri amigaechepka. ¿Chá jatsiski amiguni ma engaksïni uékajka jarhuatani nájkirukajtsï chá no kurhakuaka? Enga ísïika, segurujtsï jarhaska eskaksïni ima jarhuataaka jiáni engajtsï uandanhiateechani jatsiauaka (Prov. 17:17). Engachi májkueni jámaska eska Jesúsi, ambakiti amigu máeuakachi. w23.04 10 párr. 10, 11

Engachi no sési nitamakuarhini jarhajka, úpiringachi eratseni eska Tata Diosï Jeoba no méni juaaka jimbanhi parhakpinini. Engachi niáraska ísï eratseni, ¿arhikuekasïni eskachi nóteru mintsikasïngia imani? Nómbe. Ju je exeni ejemplu ma. Enga pauani pauani janini jarhajka, úpiringachi eratseni eska jurhiata nóteru uéraakia. Peru jurhiata méntkisï uérasïndi. Sáno májkueni, engachi kánikua kómu pʼikuarherani jarhajka, úpiringachi eratseni eska jimbanhi parhakpini no méni niáraaka. Joperu engachi kánikua mintsikaska Tata Diosïni, seguruchi jauaka eska ambe enga ima uandajka, méntkisï úkuarhisïnga (Sal. 94:3, 14, 15; Ebr. 6:17-19). Mintsikani eska ísï úkuarhiaka, jarhuataatijtsïni sánderu jánguarhintani Tata Diosï Jeobani marhuakuni ka orheta peerani. Parachi úni aianhpini, ístuchi jatsiska para kánikua mintsikani eska jimbanhi parhakpini ma jauaka. Peru uánikua kʼuiripuechaksï eratsesïndi eska inde ambe no méni niáraka ísï úkuarhini (Mat. 24:14; Ezeq. 33:32). Nóchi jatsiska para májkueni eratseni eska ima kʼuiripuecha engaksï no jakajkujka ini ambe. Parachi no niárani ísï eratseni, jatsiskachi para jánguarhintani seguiriini mintsikani eska ambe engajtsïni Tata Diosï aiachika ísï úkuarhiaka. w23.04 27 párr. 6, 7; 30 párr. 14

¿Ménisïjtsï niáraski kurhamarhikuarhini sini Tata Diosï Jeoba mókuantajki chaari kómarhikuechani? Enga ísïika, nójtsï chájkueska. Uánikua erachiichaksï uandasïndi eskaksï niáraska indeni ambe kurhamarhikuarhini, ka sánderu jiáni engaksï no sési nitamakuarhini jarhajka. Jamberichi juchajtu úkua jukanchajka kuenta íntskukuarheni eska Tata Diosï Jeoba mókuantaxaka juchaari kómarhikuechani engachi no sési nitamakuarhini jarhajka. ¿Andichisï uaa seguru jarhani eska Tata Diosï Jeoba mókuantasïnga imeeri marhuariicheeri kómarhikuechani? Bibliajtsïni arhisïndi eskajtsïni Tata Diosï Jeoba kánikua xénchasïnga ka eskajtsïni kánikua jukaparharasïnga (Ageo 2:7; 1 Juanu 4:10). Ísï jimbo, imajtsïni arhisïndi eskachi kómarhiaka ka eskachi kurhakuaka eskajtsïni jarhuataaka (1 Ped. 5:6, 7). Imajtsïni mintsita jingoni uékasïndi jarhuatani parachi sési pájperani imani jingoni ka parachi úni tekaantani engachi uandanhiateechani jatsiauaka. Biblia uánikua uelta uandasïndi néna enga Tata Diosï Jeoba mókukuantapka kómarhikuechani imeeri marhuariichani. ¿Miásïntsï ejempluni ma? w23.05 8 párr. 1-4

María sési pájperasïreendi Tata Jeoba jingoni ka no erokuarhisïreendi eska José úpiringa ambe ma para ima sési jarhani Tata Diosï jingoni. Ima sési mítespti Tata Diosïiri Karakatani. Ístu, arhutasïreendi tiempu para eratsentani (Luk. 2:19, 51). María sési pájperasïreendi Tata Diosï jingoni jimbosï ambakiti témba máepti. Iásï uánikua pirenchichaksï jánguarhintasïndi májkueni úni eska María. Ju je exeni ambe enga uandajka pirenchi Émiko. Ima uandasïndi: “Engani uátsïipka, jandiajkuni jánguarhintasïreenga parani sési pájperani Tata Diosï jingoni. Joperu engani na uambuchapkia, juchiiti acheeti úsïreendia kómarhikua para tsimarhani ka ima exesïreendi ambe engachi úpiringa parachi sési jarhani Tata Diosï jingoni. Kuenta íntskukuarhespka eskani mintsikasïreenga Tata Diosïni indeni ambe jimbo enga juchiiti acheeti ueenga. Peruni mítespka eska jíjtuni jatsispka parani úni ambe ma parani sési pájperani Tata Diosï jingoni. Ísï jimbo, iásï arhutasïngia tiempu parani jandiajku jarhani ka úni kómarhini Tata Diosï Jeobani, Bibliani arhintani ka eratsentani” (Gal. 6:5). Uarhiitiicha, engajtsï jánguarhintaska sánderu sési pájperani Tata Diosï Jeoba jingoni, chaari acheetiichaksïni sánderu uékaati ka sésiksïni arhiati (Prov. 31:30). w23.05 21 párr. 6

Jatsiskachi para jorhenguarhini chénharhini Tata Diosï Jeobani jimbokachi no ísï andajpenusïnga. Ambe ma engajtsïni jarhuataaka ísï úni, jindeesti kueraakatani exeni. Engachi exejka ambe enga xáni kueraaka Tata Diosï Jeoba, exesïngachi na enga xáni jánhastiika, na enga xáni uinhapitiika, na engajtsïni xáni xénchajka ka inde ambe úsïndi eskachi sánderu janhanharhiaka ka eskachi sánderu xénchaaka (Rom. 1:20). Máteru ambe engajtsïni jarhuataaka chénharhini Tata Diosï Jeobani jindeesti pʼindeni kómarhini. Engachi sánderu uandontskuarhejka Tata Diosï jingoni, sánderuchi sési mítesïnga ka méni engachi kurhakujka eskajtsïni jarhuataaka tekaantani engachi no sési nitamakuarhini jarhajka, eratsentasïngachi na enga xáni uinhapitiika, ka engachi diosmaiamukua íntskuntajka jimboka íntspiska imeeri uájpani juchantsïni jimbo, miántasïngachi eskajtsïni ima kánikua xénchasïnga. Ístu, engachi mintsita jingoni kurhakujka eskajtsïni jánhastaaka parachi orhepani uérakuni problemani ma, úsïngachi exeni na enga xáni jánhaskatiika ima. I járhati kómarhikuechajtsïni jarhuataati parachi sánderu janhanharhini ka parachi jánguarhintani no méni úni imani ambe enga uaaka úni eskachi nóteru sési pájperaakia imani jingoni. w23.06 15 párr. 6, 7

Tata Diosï Jeoba Leiichani íntsasïndi imeeri iretani ka úsïndi eskaksï sési kurhanguauaka. Pori ejemplu, primeru siglurhu anapu grupu enga orhejtsïkuauenga iámindu kúnguarhikuechani, uandaspti tanimu ambe nani engaksï jatsipiringa para uiuinhasï jarhani o kurhajchaani Tata Diosïiri Leichani. Uandaspti eskachi no jatsiska para 1) kómarhiani diosï úkateechani o kʼuiripuechani, ka eska Tata Diosï Jeobantkuchisï kʼéri ambe arhiaka, 2) eskachi jatsiska para kánikua pímbinhasï exeni iurhirini ka 3) méntkisï kurhajchani ambe enga Biblia uandajka parachi no ísku jándikua ambe niátani (Úku. 15:28, 29). ¿Ambechi uaa úni iásï parachi kurhajchani i tanimu ambe? Tata Diosï Jeobantkuchisï kómarhiaka. Tata Diosï juramukuasti israeliteechani eskaksï imantku kʼéri ambe arhipiringa (Deut. 5:6-10). Ka enga Noambakiti tsʼéjkupka Jesúsini, ima uandaspti eskachi Tata Diosï Jeobantkuchisï jatsika para kómarhini (Mat. 4:8-10). Ísï jimbo, nóchi kómarhiasïnga imajeniichani engaksï relijioniicha úraajka. Nóchi kʼéri ambe arhiasïnga kʼuiripuechani; nóchi diosï erataasïnga relijionirhu anapu orhejtsïkutiichani, politikuechani, deportiisteechani, imeechani engaksï pelikulecharhu xarharajka o pireriichani. Ka imantkuchisï kʼéri ambe arhisïnga enga kueraaka iámindu ambe (Apok. 4:11). w23.07 14, 15 párr. 3, 4

Satanásiiri parhakpini kánikua tsitisïndi ísku jándikua ka pornografia (Éfes. 4:19). Jimbosï xáni jukaparhakueti eskachi chénharhiaka Tata Diosï Jeobani ka eskachi no niátaaka ambe enga no sési jaka. Proverbios kapitulu 9 uandaasïndi tsimani uarhiitiicheeri, ma jánhaskakuani arhikuekasïndi ka máteru imeechani engaksï no jánhastiika. Indeksï uandajpaasïndi imeechani engaksï nótki jorhenajka, “imeechani engaksï no jánhaskatiika”. Ísïisti enajkiksï pʼímarhiani japirini paraksï inchaakuni imeecho ka paraksï jima tʼireni (Prov. 9:1, 4, 6). Peru, ¿néna nikuasïni? Ju je ueenani uandani uarhiitiiri pʼímarperakueri enga no jánhastiika (Prov. 9:13-18). Ima no sáni kʼuratseparini uandasïndi: “¡Iámindu imeecha engaksï nótki jorhenajka, juue je ixú!”. Ísï pʼímarhiasïndi iámindu imeechani engaksï no jorhenaka paraksï nirani ambakiti tʼirekua ma arhani. ¿Nénaksï kʼamarhukusïni engaksï imeo inchaakujka? “Jimaksï jarhasti imeecha engaksï uarhikuarhu jaka”. Proverbios arhisïndijtsïni na engajtsïni nicheaka engachi kasu úkuska “uarhiitini enga támisï jámajka” ka “enga ísku jándiika”. Arhisïndijtsïni: “Imeeri kʼumanchikua uarhikuarhu pájpesïndi” (Prov. 2:11-19). Proverbios 5:3-10 ístujtsïni arhisïndi eskachi jingontku jámaaka máteru “uarhiiti jingoni enga támisï jámajka jimboka imeeri jantsiriichaksï uarhikuarhu pájpesïnga”. w23.06 22 párr. 6, 7

Orhejtsïkutiichaksï jatsisti para kurhanguni ka nóksï inchandimentani (1 Tim. 3:2, 3). Orhejtsïkuti ma no erokuarhisïndi eskaksï máteruecha méntkisï jiókuarhiaka ambe enga ima uandaaka solu jimboka sánderu kʼériiska. Mítesti eska Tata Diosï Jeobaeri espiritu uaaka náki uéjki orhejtsïkutini ma úrani, paraka uandaaka ambe ma enga jarhuajpeaka. Ka enga no uanajchakunhajka Biblieri prinsipiu ma, orhejtsïkutiicha engaksï kurhangujka ka engaksï no inchandimentajka, apoiarisïndiksï ambe enga uandanhaka eska úkuarhiaka, nájkirukaksï ménderueni exeaka ambe ma. Engachi kurhangujka ka nóchi inchandimentani, uánikua kóntperateechanchi jatsiasïnga. Pori ejemplu, sánderuchi sési pájperasïnga erachiichani jingoni ka kúnguarhikuarhu pínandikua jarhasïndi. Ístu, kánikuachi sési pʼikuarherasïnga enga Tata Diosï Jeobaeri iretarhu mámaru jásï kʼuiripuechachi jaka ka mámaru járhati pʼindekuecha jingoni. Ka ambe engajtsïni sánderu sési pʼikuastajka, jindeesti eskachi májkueni úxaka eska Jeoba, Tata Diosï ma enga kurhangujka ka enga no inchandimejka. w23.07 25 párr. 16, 17

Danieli estudiariuasïreendi Biblieri profesiechani ambakiti ambe jimbo. Uékasïreendi míteni jurhimbikuani. Ístu kaxumbitiispti. Ima mítespti eska Tata Diosï Jeoba jarhuataapiringa kurhanguani Biblieri profesiechani imeechani engaksï no méni jurajkupiringa, ka engaksï kurhajchaapiringa imeeri juramukuechani (Dan. 2:27, 28). Danieli xarhataspti eska kaxumbitiispka enga kurhakupka Tata Diosï Jeobani eska jarhuatapiringa (Dan. 2:18). Ístu, Danieli sési estudiariuaspti Karakateechani. Sési inbestigarisïreendi ambe engaksï arhienga ima Biblieri karakateecha engaksï jiánisï japka enga ima irekapka (Jer. 25:11, 12; Dan. 9:2). ¿Ka juchachi néna uaa májkueni úni eska Danieli? Exe je andijtsïsï estudiariuajki profesiechani. ¿Jindeeski jimbokajtsï uékasïnga míteni jurhimbikuani? Enga ísïika, Tata Diosï Jeobaksïni jarhuataati (Juanu 4:23, 24; 14:16, 17). Máru kʼuiripuechaksï estudiarisïndi Bibliani paraksï exentani ambe ma enga xarhataaka eska Biblia no Tata Diosïni jimboeska, paraksï ísï úni imeecha uandani ambe enga sési jaka ka ambe enga no sési jaka, ka paraksï imani ambe úni engaksï imeecha tsitijka. Peru engachi estudiariuani jauaka Biblieri profesiechani, jatsiskachi para imani ambe jimbo úni enga sési jaka. w23.08 9, 10 párr. 7, 8

Terukukuarhintani máteruecha jingoni, ísïisti komueska kʼuetsapiti ambe páni jarhani karrerarhu (Gal. 6:4). Engachi jucha pʼindeka ísï úni, tátsekuachi niáraaka máteruecha jingoni uékani andaperani ka enbidia pʼikuarherani máteruecha jimbo (Gal. 5:26). Engachi májkueni ambe uékaaka úni eska máteruecha, jamberichi afuersa uékaaka úni imani ambe engachi no uaaka úni. Eratsenta je ini ambe: Biblia uandasïndi eska “enga no niárani jarhajka úkuarhini ambe enga ma erokuarhini jarhajka, mintsita no sési pʼikuarherasïn[ga]” (Prov. 13:12). Joperuchi sánderu no sési p’ikuarheraaka erokuarhini jarhani ambe ma enga no méni uaaka ísï úkuarhini. Inde ambe úpirindi úni eskachi nóteru jatsiakia uinhapikua ka eskachi iátsitakuarhu uiriiuaka karrerarhu. Asï sánderu ambe uéka je úni eska ima ambe engaksïni kurhachejka Tata Diosï Jeoba, imaksïni no méni kurhacheati ambe ma engajtsï chá no uaaka úni (2 Kor. 8:12). Asï no sési pʼikuarhera je, imaksïni no méni terukutantaati máteru nema jingoni (Mat. 25:20-23). Tata Diosï jukaparharasïndi ambe engajtsï chá úni jaka, komu engajtsï ísï iámu mintsita jingoni marhuakuni jaka, engajtsï no jurajkujka ka engajtsï tekaantani jaka. w23.08 29 párr. 10, 11

¿Néna mókukuntaspi Tata Diosï Jeoba ambe enga Sansóni kurhakupka? Milagru ma jimbo, úspti eska itsï uérapiringa. Enga Sansóni itsïmapkia, “uinhapintaspti ka sési pʼikuarherantaspti” (Juec. 15:19, nota). Ima lugari enga Sansóni itsïmapka útasï jarhaspti imani tiempu jimbo enga Samueli karapka libru de Jueces. Engaksï israeliteecha exeenga imani lugarini nani enga itsï uéreenga, jamberiksï miánteendi eska engaksï Tata Diosï Jeobani mintsikapiringa, ima jarhuataapiringa engaksï no sési nitamakuarhini japiringa. Májkueni eska Sansóni, iáminduechachi jatsika para kurhakuni Tata Diosï Jeobani eskajtsïni jarhuataaka. No arhiparini ambe engachi jorhenaka úni o ambe engachi úkia Tata Diosïiri kúnguarhikuarhu, iáminduechachi uétarhinchasïnga eskajtsïni jarhuataaka. Jatsiskachi para kaxumbitiini ka jiókuarhini eskajtsïni jiántkusï sési nicheaka engachi mintsikaska Tata Diosï Jeobani. Sansóni jiáni uinhapintaspti enga itsïmapka imani itsïni enga Tata Diosï Jeoba íntskupka. Májkueni eska Sansóni, engachi jucha jurajkuska eskajtsïni Tata Diosï Jeoba jarhuataaka nóchi méni jurajkuaka imani (Mat. 11:28). w23.09 4, 5 párr. 8-10

Eranhaska je eska nema no sési ambe uandasïnga Tata Diosï Jeobaeri ambe ka ístu ima ambeeri enga Biblia jorhentpijka. ¿Ambejtsïni jarhuataa enga ísï úkuarhiaka? Kurhakuni Tata Diosï Jeobani eskajtsïni íntskuaka imeeri uinhapikuani ka jánhaskakua parachi úni iátsitakuarhu mókuntani. ¿Ka ambechi uaa úni engachi kuenta íntskukuarheska eskachi jatsipiringa para sánderu sési mókuntani? Uaakachi ménderu uandontskuarheni Tata Diosï Jeobani jingoni ka eratsentani ambechi uaa úni ménderu jimbo. Engachi ísï úska, Tata Diosï Jeobajtsïni íntskuati imeeri espiritu santuni parachi úni pʼíngukuarhini ka iátsitakuarhu jámani. Máru Biblieri tekstuechajtsïni uaati jarhuatani parachi iátsitakuarhu uandani jiáni enga no sési ambe úkuarhini jauaka. Espiritu santujtsïni jarhuataati miántaani indeni Biblieri bersikuluechani (Juanu 14:26). Libru de Proverbios jimbo, jarhastiksï prinsipiuecha engajtsïni jarhuataaka iátsitakuarhu jámani (Prov. 15:18). Ístu i Biblieri librujtsïni xarhatachesïndi andisï xáni marhuajki eskachi pʼíngukuarhiaka jiáni engajtsïni nema uékani jauaka ikiatani (Prov. 10:19; 17:27; 21:23; 25:15). w23.09 15 párr. 6, 7

Apostoli Pedru ióni sési marhuakuspti Tata Diosï Jeobani. Pámbetaspti Jesúsini enga ima aianhpini jámani japka, ima ueenaspti aianguani Tata Diosïiri ambe imeechani engaksï no judiuepka ka ístu niáraspti jarhani grupurhu enga orhejtsïkuauenga iámindu kúnguarhikuechani imani tiempu jimbo. Ka enga nóteru ióni kueratani japkia para ima uarhini, Tata Diosï Jeoba íntskuspti máteru ánchikuarhita. Uéxurhini 62 ka 64 jimbo ísï, Tata Diosï Jeoba úspti eska ima tsimani kartechani karaapiringa: Primera ka Segunda de Pedru engaksï Bibliarhu jaka (2 Ped. 1:13-15). Pedru jiáni karaaspti ini karteechani engaksï imeeri erachiicha “mámaru ambe nitamakuarhini” japka (1 Ped. 1:6). Imeecha jingonksï jarhaspti no ambarhati kʼuiripuecha engaksï chkuanderakua ambe jorhentpienga ka engaksï jánguarhinteenga paraksï kúnguarhikuarhu anapuecha no sési ambe niátani (2 Ped. 2:1, 2, 14). Ka kristianuecha engaksï Jerusaléni irekapka no ióni jimboksï exepirindi eska ‘iámindu ambe kʼamajkunhapiringa’, Roma anapuechaksï kʼamajkupirindi iretani ka ístu templuni (1 Ped. 4:7). Seguruchi jarhaska eskaksï Pedrueri karteecha jarhuataaspka jiáni anapu kristianuechani paraksï úni tekaantani tsʼéjkukuechani engaksï nitamakuarhini japka ka ístu paraksï preparadu jarhani imani tsʼéjkukuechani jimbo engaksï no ióni jimbo jatsiapiringa. w23.09 26 párr. 1, 2

Mémindu, juchajtuchi jorhenguarhisïnga kurhandirani jiáni engachi no sési jásï ambe nitamakuarhini jarhajka. Ju je eratsentani ambe enga úkuarhipka jiáni enga ueenakuarhipka pandemia COVID-19. Arhinhaspkachi eskachi nóteru tánguarhipiringia Kʼumanchikua Reinuerirhu ka eskachi nóteru nipiringia aianhpini kʼumanchikuecharhu. ¿Náksïni nichespi chánksïni? ¿Fásilispi para chá kurhandini? Iásïjtsï úskia exeni eska kurhandini, jarhuataskaksïni parajtsï chá no no sési ambe úkuarhinchani, parajtsï seguiriini sési pájperani erachiicha jingoni ka parajtsï sési pʼikuastani Tata Diosï Jeobani. Iásïchi sánderu preparadu jarhaskia para kurhajchani náki uéjki instruksioni engachi intsïnhaaka jiáni enga xáni no sési nitamanhaaka. Jamberi kurhandini uaati eskachi tsípiti pakaraaka (Job 36:11). Juchachi kurhajchasïnga Tata Diosï Jeobani jimbokachi xénchasïnga ka uékasïngachi jaiapanherantani (1 Juanu 5:3). Nóchi méni uaaka íntskuntani ambe enga ima xáni úkia juchantsïni jimbo (Sal. 116:12). Joperu jarhasti ambe ma engachi kʼóru uaaka úni: kurhajchani Tata Diosï Jeobani ka imeechani engaksï juramukua jatsika. Engachi kurhandiska, xarhatanchi jauaka eskachi jánhaskatiiska. Ka engachi jánhaskatiijka, tsíperasïngachi Tata Diosï Jeobaeri mintsitani (Prov. 27:11). w23.10 11 párr. 18, 19

Engaksïni ánjeli ma uandajpapiringa, ¿jánguarhintapirintsï kurhajchani? Jarhasti ánjeli ma enga uandajpaani jaka “iámindu kʼérati iretarhu, kʼumanchikueri anapuechani, imeechani engaksï táchani jásï idioma uandajka ka iretarhu anapuechani”. ¿Ambe arhiaxaki? “Chénharhi je Tata Diosïni ka kʼéri ambe arhi je […] kómarhi je imani enga úka auandani, echerini, marini ka enga iámindu itsïni úka” (Apok. 14:6, 7). Iáminduechachi jatsiska para kómarhini Tata Diosï Jeobani, ima jindeesti Tata Diosï jurhimbiti, kánikuachi agradesidu jarhaska engachi újka imeeri templu jimbo marhuakuni, jimboka inde ambe ¡kʼéri kóntperata máesti! ¿Joperu ambeeski Tata Diosïiri templu, ka nani uandasïni Biblia indeeri ambe? Tata Diosïiri templu, no meru edifisiuni masï arhikuekani jati. Sánderu sési, jindeesti na enga Tata Diosï Jeoba uaxastakia parachi kómarhini ísï eska ima na uéjka, ka úsïngachi ísï úni Jesúsiiri euajpintskua jimbo. Primeru siglurhu, apostoli Pablu karakuaspti imani kristianuechani engaksï ebreu uandeenga ka engaksï Judea irekapka ka aianguaspti na engaksï jatsipka para kómarhini Tata Diosï Jeobani. w23.10 24 párr. 1, 2

Uéxurhini 522 ante de Jesúsi, imeecheeri ikiatspitiichaksï úspti eskaksï nóteru úntapiringia Tata Diosï Jeobaeri templuni, joperu Sakariasi arhiaspti judiuechani eska Tata Diosï Jeoba úrapiringa imeeri espiritu santuni para kénditani ambe uéjki ambe enga ójkutaapiringa. Uéxurhini 520 jimbo, rei Dariu jurajkuaspti eskaksï seguiripiringa úntani templuni ka íntsaaspti sentabu parakaksï ísï úpiringa ka ístu juramukuaspti jimeesïsï anapu juramutiichani eskaksï jarhuataapiringa (Esd. 6:1, 6-10). Tata Diosï Jeoba aiakuaspti imeeri marhuariichani eska imeechani jingoni japiringa engaksï orheta peerapiringa imeeri templuni úntani (Ageo 1:8, 13, 14; Zac. 1:3, 16). Ka jimbokaksï profeteecha uinhaperaantaspka, judiuechaksï ueenaspti úntani templuni uéxurhini 520 jimbo ka menusi de sinko uéxurhini jimboksï kʼamaraspti. Nájkirukaksï uánikua uandanhiateechani jatsiapka, orhetkuksï peeraspti Tata Diosïiri ambe, jimbosï Tata Diosï jarhuataapti imani ambe jingoni engaksï uétarhincheenga ka ístu parakaksï no méni jarharipiringa ka ísïksï úspti tsípikua jingoni marhuakuni Tata Diosï Jeobani (Esd. 6:14-16, 22). w23.11 15 párr. 6, 7

Nájkiruka uánikua kʼuiripuecha kurhaakia Abraániiri ambe, nóksï xáni mítesti imeeri ambe. Joperu juchachi kʼóru míteska neeski Abraáni. Pori ejemplu, míteskachi eska Biblia ísï uandasïnga eska ima jindeeska “taati iámindu imeecheri engaksï mintsikajka” (Rom. 4:11). Jamberichi kurhamarhikuarhijka sinchi juchajtu uaa ísï mintsikani eska Abraáni. Uaakachi seguru jarhani eska jo. Ambe engajtsïni uaaka jarhuatani parachi juchajtu ísï mintsikani eska Abraáni, jindeesti eratsentani imeeri ejempluni. Ima méntkisï kurhajchaspti Tata Diosïni ambe enga ima juramukuenga: niraspti iauanisï mótsini, ióni irekaspti kʼumanchikua sïkuiririicha jimbo, ka enga arhinhapka eska kéjtsïtapiringa imeeri uájpa Isaakini, ima jiókuarhispti. Indeni úkuechani jingoni xarhataspti eska kánikua mintsikasïreenga Tata Diosï Jeobani, jimbosï Tata Diosï Jeoba arhipti eska jaiapanhentasïreenga ka eska jindeespka imeeri amigu (Sant. 2:22, 23). Tata Diosï Jeoba uékasïndi iáminduechani ísï exeani eska Abraánini, asta chánksïni jamberi, uékasïni eskachi imeeri amigueuaka. Jimbosï Tata Diosï Jeoba úpti eska Pablu ka Santiagu karapiringa Abraániiri ambe. w23.12 2 párr. 1, 2

Pirenchiicha, jánguarhi sési uandontskuarheni máteruecha jingoni. I ambe kánikua jukaparhakuesti para iámindu kristianuecha. Jingontku kurhajchani jarhani nemani engakeni uandontskuarhicheni jauaka, xarhatakuni jarhasïngari eskari kurhangukuni jarhasïnga (1 Ped. 3:8). Engari no seguru jaka eskari kurhanguxaka ambe engakeni uandontskuarhechini jaka ka na enga pʼikuarhinheni jaka, janhanharhikua jingoni kurhamarhi ka tátsekua eratsenta antederi mókukuni (Prov. 15:28, nota). Kurhamarhikuarhi: “¿Ísïiski ambe engani arhiaka? ¿Uinhaperantaa? ¿Xarhatakua eskani janhanharhisïnga? ¿Xarhatakua eskani xénchasïnga?”. Eratseanta imeechani engaksï sési marhuakuni jaka Tata Diosïni ka engaksï ini ambe újka ka jánguarhi ísï úni (Prov. 31:26). Exe ambe engaksï uandajka ka néna engaksï uandajka. Jánguarhinta ísï úni ka exeakari eskari sánderu sési pájperaaka máteruecha jingoni. w23.12 21 párr. 12

Ka parajtsïni juchantsïni jarhuatani, Tata Diosï Jeoba uaati úrani juchaari familiani, amiguechani o orhejtsïkutiichani. Engachi kánikua no sési pʼikuarherani jarhajka uékasïngachi jandiajkuni jarhani, ka inde ambe no no sési jarhasti. Joperu, ¿ambechi jatsiski para úni parajtsïni marhuacheni Tata Diosï Jeobaeri jarhuajperata? Ju je jánguarhintani no jandiajku jarhani, jimboka engachi jarhariajka máteruechani sánderuchi arhiaka indeni uandanhiateechani eratseani jarhani engachi jatsiaka. Ka inde ambe uaati eskachi no sési erakua ambe ma. Ísïisti, iáminduechachi ménisï uétarhinchasïnga jandiajku jarhani ka sánderu jiáni engachi no sési ambe úkuarhinchajka. Joperu engachi jukari uékapiringa jandiajku jarhani, nóchi jurajkuni japiringa eskajtsïni Tata Diosï Jeoba jupijtaaka o jarhuatani. Ísï jimbo, nájkiruka sáni úkua jukaaka ju je jiókuarhini jarhuajperatani engajtsïni juchaari familia, juchaari amiguecha ka orhejtsïkutiicha íntskujka. Ju je ísï exeani eska Tata Diosï Jeobasï úraani jaka parajtsïni jarhuatani (Prov. 17:17; Is. 32:1, 2). w24.01 24 párr. 12, 13

Nasareuechaksï no úsïreendi kuinakuarhini. Ísïksï xarhatani jarhasïreendi eskaksï janhanharhisïreenga Tata Diosï Jeobaeri juramukuani. Jarhasptiksï máru israeliteecha engaksï apostata úkuarhipka ka nóksï jukaparharaasïreendi ni janhanharhiani nasareuechani. Ménichani kánikua úkua jukasïreendi ménderueniini, jimbosï kánikua balori uétarhiendi (Amós 2:12). Engachi kurhajchajka Tata Diosï Jeobani, kʼuiripu úsïndi kuenta íntskukuarheni eskachi ménderueniiska. Balori uétarhisïndi parachi aianguani ánchikuarhitarhu o eskuelarhu anapuechani eskachi Jeobaeri testigueska. Ka jimbokaksï kʼuiripuecha sánhani arhixaka sánderu no sési jámani ka uandani, jiájkani sánderu úkua jukaati ísï irekani eskajtsïni Tata Diosï Jeoba na arhijka ka ístu aianhpini Reinueri ambe (2 Tim. 1:8; 3:13). Joperu ístuchi jatsiska para miáni eskachi tsíperasïnga Tata Diosï Jeobaeri mintsitani engachi balori jingoni xarhatajka eskachi ménderueniiska eskaksï máteruecha kʼuiripuecha (Prov. 27:11; Mal. 3:18). w24.02 16 párr. 7; 17 párr. 9

Ju je eratsentani Roma anapu kúnguarhikuani. Jimaksï mámaru járhati erachiicha jarhaspti, máruksï judiuespti engaksï ísï tʼarhexepka eska Moisésiiri Lei na uandeenga, joperu ístuksï jarhaspti máteru erachiicha engaksï máteru nasionicharhu anapuepka ka engaksï máteru jásï pʼindekuechani jatsiapka. Jamberiksï máru jántspiriipti ka máteruecha nómbe ka ístuksï jamberi máru jatsiapti jántspiriichani. ¿Ambe jarhuataapirini sánderu xénchperani nájkirukaksï ménderueniipka? Apostoli Pablu arini konseju íntsaaspti: “Sési jiókaa je máteruechani”. ¿Ambe arhikuekaxapi? Sési erokani nemani o intsïmpitiini, ísï komueska kʼuiripu ma enga sési erokajka imeo máteru nemani o enga ísï kámajka komueska imeeri amiguni ma. Pori ejemplu, Pablu arhispti Filemónini na enga jatsipka para kámani Onesimuni, enga imeeri kʼumanchikuarhu uératini sïpakuarhipka, arhispti: “Sési eronta” (Filem. 17). Prisila ka Ákila sési erokaspti Apolosini nájkiruka ima no xáni uánikua ambe mítepka kristianuecheeri ambe ísï eska imeecha, ka pásptiksï imeecha jingoni (Úku. 18:26). Nájkirukaksï iámindu i kristianuecha kánikua ménderueni jásïipka, nóksï jurajkuspti eska i ambe úpiringa eskaksï nóteru sési pájperapiringia. w23.07 6 párr. 13

Kánikua xénchani Tata Diosï Jeobani, jarhuataatiksïni parajtsï aiakukuarheni imani. Joperu no jimbokajtsï ma tiempujkusï xénchani pʼikuarheraka, sánderu sési, niáraskajtsï xénchani jimbokajtsï sánhani arhiska “sánderu sési míteni ambe Tata Diosï Jeoba uéjka” ka “kurhanguni” indeni ambe (Kol. 1:9). Engajtsï jorhenguarhini japka Biblieri ambe, niáraskajtsï sési míteni eska 1) Tata Diosï Jeoba meru jarhaska, 2) eska úraska imeeri espiritu santuni para Bibliani kararkuarhini ka 3) eska kúnguarhikuani ma jatsiska ka eska úraxaka para kumplirini ambe enga ima uéjka. Enga nema aiakukuarhejka Tata Diosï Jeobani, jindeesti jimboka míteskia ambe enga orhetku jatsipiringa para jorhenguarhini Biblieri ambe, ístu jimboka kurhajchaasïnga Tata Diosïiri juramukuechani ka jimboka jánguarhintasïnga aianguani máteruechani ambe enga iásï jakajkujkia (Mat. 28:19, 20). Ístu, kánikua xénchasïndi Tata Diosï Jeobani ka uékasïndi imantku marhuakuni iámu mintsita jingoni. ¿Ísïjtsï pʼikuarherasïni chá? w24.03 4, 5 párr. 6-8

Abigaíli Nabali témbeespti, Biblia uandasïndi eska inde acheeti kánikua no ambakispka ka eska no sési jásï ambe úsïreenga (1 Sam. 25:3). Abigaíli kánikua úkua jukanchapti imani jingoni irekuarhini. Ma jurhiani úkuarhispti ambe ma enga Abigaíli úpiringa jurajkuni imeeri acheetini. Dabidi, enga Israeli anapu reiipiringa, uékasïreendi uándikuni Nabalini jimboka ima no sési jásï ambe arhispka imani ka ístu imeeri jántspiriichani (1 Sam. 25:9-13). Abigaíli úpirindi sïpakuarhini ka jurajkuni eska Dabidi uándikupiringa. Joperu no jurajkuspti eska Dabidi indeni ambe úpiringa, sánderu sési, kurhakuspti eska no uándikupiringa imeeri acheetini (1 Sam. 25:23-27). ¿Andisï indeni ambe úpi? Abigaíli kánikua xénchasïreendi Tata Diosï Jeobani, ísï exesïreendi temungurhirikuani eska Tata Diosï Jeoba na exejka. Ima sési mítespti eska temungurhiriikua pímbinhasïska para Tata Diosï. Ka jimboka ima uékasïreenga sési pʼikuastani Tata Diosïni, jarhuataspti imeeri acheetini paraka no uándikunhapiringa nijtu imeeri kʼumanchikuarhu anapuecha. w24.03 16, 17 párr. 9, 10

¿Jarhaski nema chaari kúnguarhikuarhu enga uékani jaka jurajkuni máru ambe para sánderu marhuakuni Tata Diosï Jeobani? ¿Míteskijtsï tumbini ma enga balori jingoni jánguarhintani jaka ménderueniini eskuelarhu nájkiruka no fásiliika? ¿Eratsexakijtsï nemani enga imeeri familia jimbo úkua jukanchani jaka marhuakuni Tata Diosï Jeobani? Méntkisï engachi uaaka, ju je uinhaperaantani ka arhiani eskachi kánikua jukaparharasïnga imani balorini engaksï xarhatani jaka ka ambe engaksï úni jaka Tata Diosï Jeobani jimbo (Filem. 4, 5, 7). Tata Diosï Jeoba mítesti eskachi iámu juchaari mintsita jingoni uékasïnga jaiapanherantani ka eskachi uékasïnga úni máru ambe o ístu jurajkuni máru ambe parachi úni kumpliriini ambe engachi aiakuka. Ka ístu, íntskusïndijtsïni imani sésikua parachi xarhatakuni na engachi xáni xénchajka (Prov. 23:15, 16). Ísï jimbo, ju je seguiriini marhuakuni Tata Diosï Jeobani ka méntkisï mintsita jingoni íntskuni sánderu jukaparhakua ambe engachi jatsika. w24.02 18 párr. 14; 19 párr. 15

Ju je miántani ambe enga úkuarhipka enga kʼamarani japkia uéxurhini 29, jiáni enga Jesúsi apenasi ueenani japka aianhpini. Ima ka imeeri amamba tembuchakuarhuksï ma niraspti Kaná. María jamberi jarhuajpeni japti tembuchakuarhu. Peru binu kʼamakurhisïndi. María sóntku nirasïndi andarhierani Jesúsini ka arhisïndi eska nóteru jarhaskia binu (Juanu 2:1-3). ¿Ambe úsïni Jesúsi? Usïndi eska itsï “ambakiti binu” úkuarhintaaka (Juanu 2:9, 10). Jesúsi uaaspti máteru uánikua milagruechani enga Echerirhu jámani japka. Úraspti imeeri uinhapikua para jarhuataani uánikua kʼuiripuechani. Pori ejemplu, ma xanhari ma 5,000 acheetiichani tʼireraaspti ka máteru xanhari 4,000. Ini tsimani milagruecha jingoni enga uaapka, jamberi jukari 27,000 kʼuiripuechani tʼireraapti, kuenta úpariani uarhiti ka sapiichani engaksï jima japka (Mat. 14:15-21; 15:32-38). Inde tsimani xanhari jimbo, Jesúsi ístu ambakeraantaspti imeechani engaksï pʼamenchani japka (Mat. 14:14; 15:30, 31). w23.04 2 párr. 1, 2

Engachi kʼéri uandanhiata ma nitamakuarhijka, jamberichi méni ísï pʼikuarherajka enajkichi iámu chkéia ka kómu pʼikuarherani jarhani. Májkueni eska Elíasi, jamberichi no sáni jauaranchani jauaka ka soluchi uékani kʼuíni (1 Rey. 19:5-7). Imajtsïni aiachisïndi imeeri jarhuajperatani ísï eska na arhijka iásï anapu textu. Jiáni enga rei Dabidi no sési nitamakuarhini japka ka ístu engaksï imeeri enemiguecha no sési ambe uékeenga úkuni, exespti eska Tata Diosï Jeoba imani jingoni jarhaspka, jimbosï arhipti: “Chiiti jájki jurhijkandani anapu jupikatixatirini” (Sal. 18:35). Ménichani, Tata Diosï Jeoba máteru kʼuiripuechani úraasïndi parajtsïni jarhuatani. Pori ejemplu, ma uelta Dabidi kánikua no sési pʼikuarheraxapti, joperu imeeri amigu jémba Jonatani niraspti pʼorhembini para jarhuatani ka uinhaperantani (1 Sam. 23:16, 17). Ka Elíasini jingoni, Tata Diosï Jeoba Eliseuni erakuspti paraka jarhuatapiringa imani ambe jingoni enga Elíasi uétarhinchani japka (1 Rey. 19:16, 21; 2 Rey. 2:2). w24.01 23, 24 párr. 10-12

Tata Diosï Jeoba intsïmpitiisti ka uánikua ambakiti ambejtsïni íntskusïndi. Uarhiiti enga Proverbios 9 jimbo uandajka enga arhikuekajka ‘ambakiti jánhaskakuani’, xarhatasïndi eska i ambe ísïiska. Ima iámindu ambe listu jatsistia. Mesarhu peerasti kʼuiripeta ka binu (Prov. 9:2). Ístu, bersikulu 4 ka 5, arhisïndi eska “ambakiti jánhaskakua” arhiasïnga imeecha engaksï no jánhastiika: “Ju je, á je juchiiti kurhinda”. ¿Andichisï jatsipirini para jiókuarhini uarhiitiiri pʼímarperakuani? Jimboka Tata Diosï Jeoba uékasïnga kuájchakuani imeeri uájpeechani ka jánhaskakua íntsaani. Ima no uékasïndi eskajtsïni no sési nicheaka ka ni eskachi pʼamondakuarhini jauaka imani ambe jimbo engachi ióntki no sési úka. Ísï jimbo, “ima íntsaasïndi jánhaskakua imeechani engaksï jurhimbitku jámajka” (Prov. 2:7). Engachi chénharhiska Tata Diosï Jeobani, uékaakachi jaiapanherantani ka kurhajchaani imeeri ambakiti konsejuechani. Engachi ísï úska tsípikua jingonchi irekaaka (Sant. 1:25). w23.06 23, 24 párr. 14, 15

Engachi no uaaka úni xáni ambe engachi uékapiringa para marhuakuni Tata Diosï Jeobani, uaakachi seguru jarhani eska ima kánikua jukaparharasïnga xáni engachi xáni újka imani jimbo. ¿Andichisï ísï uandajki? Imani ambe jimbo enga Tata Diosï profeta Sakaríasini arhipka. Tata Diosï Jeoba kurhakuspti profeta Sakaríasini eska úpiringa korona ma imani oru ka plata jingoni engaksï judiuecha axapka engaksï Babilonia pakarapka (Zac. 6:11). I “kʼéri korona” “miátaantapirindi” eskaksï imeecha tsípikua jingoni íntspispka (Zac. 6:14, noteecha). Ísï jimbo, seguruchi jarhaska eska Tata Diosï Jeoba no méni mirikurhiaka na engachi xáni jánguarhintajka imani marhuakuni nájkirukachi no sési nitamakuarhini jauaka. Míteskachi eska ini últimu jurhiatikuechani jimbo sánhani arhiakachi sánderu no sési nitamakuarhini ka eska jamberi sánderu no sési jánhaskuarhipani jauaka (2 Tim. 3:1, 13). Joperuchi no jatsiska parachi jukari uandanhiani. Ju je miáni ambe enga Tata Diosï Jeoba arhiapka imeeri marhuariichani Ageoueri jurhiatikuechani jimbo: “Ji chánksïni jingoni jarhaska [...]. Asï ché je” (Ageo 2:4, 5). Juchajtuchi seguru jarhaska eska engachi úska ambe enga ima uéjka, Tata Diosï Jeoba juchantsïni jingoni jauati. w23.11 19 párr. 20, 21

Tata Diosï úpirindi no kararkuarhini Bibliarhu iámindu ambe enga Pedru no sési úpka, peru kararkuarhisti parajtsïni jorhendani ambakiti ambe (2 Tim. 3:16, 17). Engachi arhintani jarhajka Bibliarhu Pedrueri ambe, achamasï ma enga májkueni nitamakuarhipka ka pʼikuarherani eska jucha, exesïngachi eska Tata Diosï Jeoba no erokuarhisïnga eskachi perfektueuaka. Ambe enga ima uéjka, jindeesti eskachi no kuatantaaka sino eskachi seguiriuaka jánguarhintani nájkirukachi imperfektueka. ¿Andisï xáni jukaparhakue eskachi seguiriuaka jánguarhintani? Nájkirukachi eratseaka eskachi jurajkuskia ambe ma enga no sési jaka, jamberichi ménderu ueenaka indeni ambe úni. Peruchi seguiriisïnga jánguarhintani jurajkuni indeni ambe. Iáminduechachi úsïnga o uandani ambe ma engachi jimbo tátsekua no sési pʼikuarherani jarhajkia. Joperu engachi no kuatantaska, Tata Diosï Jeobajtsïni jarhuataati parachi seguiriini sánderu sési úni ambe ma (1 Ped. 5:10). Jesúsi pʼamojkuspti Pedruni nájkiruka ima no sési ambe ueenga, inde ambejtsïni jarhuataati parachi seguiriini marhuakuni Tata Diosï Jeobani. w23.09 20, 21 párr. 2, 3

Jesúsi úpirindi ambakerantani Lásaruni, ísï eska Marta na uándapka iásï anapu textu jimbo, joperu ima sánderu kʼéri ambe uékaxapti úni. Jesúsi aiakusïndi Martani: “Chiiti mimiti tsíntaati”. Ístu uandaspti: “Ji jindeeska tsíntskua ka tsípikua” (Juanu 11:23, 25). Ísïisti, Tata Diosï íntskusti uinhapikua Jesúsini para tsítaantani uarhiriichani. Asta jiáni jamberi, Jesúsi tsítantasptia nanaka sapichuni ma enga nótki ióni páni japka enga uarhipka ka tumbini ma, enga jamberi ima mismu jurhiatikua jimbo tsítantapka enga uarhipka (Luk. 7:11-15; 8:49-55). Peru, ¿úpirini tsítantani nemani enga tʼámu jurhiatikua páni japkia uarhirini ka enga imeeri kuerpu úndapkia tereni? María, máteru Lásarueri piremba, andarhierasïndi Jesúsini ka májkueni ambe arhisïndi eska Marta: “Tata, engari tʼu ixú japiringa, no uarhipirindi juchiiti mimi” (Juanu 11:32). Enga Jesúsi exeajka eskaksï imeecha ueraxaka, imajtu kánikua no sési pʼikuarherasïndi. Jimboka pʼamojkuasïnga imeeri amigu jémbeechani, ístu uerasïndi. Ima sési mítesti na enga pʼikuarherakuarhijka uarhiranchani nemani ka seguru eska uékaxakaia úni ambe ma paraksï imeecha nóteru no sési pʼikuarherania. w23.04 10, 11 párr. 12, 13