Septiembri

Tata Diosï uinhapikua íntskusti Jesúsini para kʼamajkuani iámindu problemechani enga kʼuiripu jatsiajka. Jarhastiksï problemecha engachi jucha no méni úpiringa sési peuantani. Peru imani milagruecha jingoni enga Jesúsi uaapka, xarhataspti eska ima kʼóru úsïnga ísï úni. Pori ejemplu, jatsisti uinhapikua para kʼamajkuni imani ambe enga újka eskaksï kʼuiripuecha no sési nitamakuarhiaka. Ima uaati kʼamajkuni pekaduni engachi jukaraka, pʼamenchakuechani ka uarhikuani enga pekadu jimbo jaka (Mat. 9:1-6; Rom. 5:12, 18, 19). Jesúsiiri milagruechaksï xarhatasïndi eska ima uaaka ambakeraantani kʼuiripuechani ‘mámaru jásï pʼamenchakuecheeri’ ka asta tsítaantani uarhiriichani (Mat. 4:23; Juanu 11:43, 44). Ístu, jatsisti uinhapikua para anhaxustani tarhiatani enga uinhamu tarhiani jauaka ka ístu para andaani no sési járhati espirituechani (Mar. 4:37-39; Luk. 8:2). ¿A no eskajtsïni kánikua sési pʼikuastasïnga míteni eska Tata Diosï Jeoba kánikua uinhapikua íntskuska imeeri Uájpani? Uaakachi seguru jarhani eska Tata Diosïiri Reinu uaaka eska úkuarhiaka ambe engajtsïni Tata Diosï aiachika. Milagruecha enga Jesúsi uaapka enga kʼuiripu máepka, xarhatastiksï ambe enga xáni uaaka sánderu orhepatini komu Juramuti Tata Diosïiri Reinuerirhu. w23.04 3, 4 párr. 5-7

Enga chaari kúnguarhikuarhu uánikua erachiicha jaka ka ménichantsï no ma komentariu intsïnhani. Jamberijtsï eratsejka eska sánderu sésiiska nóteru tarhatania jájki para komentarini. ¿Ambejtsï uaa úni? Uaakajtsï uánikua komentariuechani preparariuani. Engajtsï uánikua komentariuechani preparariuaska, uaakajtsï náki uéjki párrafurhu komentarini. Ka engajtsï prepararikuarhini jauaka rebista Aianhpiri jingoni, eratsenta je na enga mándani párrafu terukuntajka jorhenguarhikueri tema jingoni, ísïjtsï uaaka indeni ambe komentarini. Ístujtsï uaaka imani párrafuecha jingoni prepararikuarhini engaksï Biblieri jurhimbikua ambe uandajka enga úkua jukajka kurhanguni. Sáno méntkisï indeni párrafuecha jimbo, nóksï uánikua erachiicha tarhatasïndi jájki, jimboka sánderu úkua jukasïnga para eksplikarini. Engaksï uánikua tánguarhikuecha nitamaakia, ka chá útasï no intsïnhani jarhani komentariu ma, ¿ambejtsï uaa úni? Arhi erachini enga nitamataraaka jorhenguarhikuani nanijtsï tsitipirini komentariu ma íntspini. w23.04 21, 22 párr. 9, 10

José méntkisï úsïreendi ambe enga Tata Diosï Jeoba arhienga, ka inde ambe úspti eska ambakiti uámba máepiringa. Ma tanimu uelta ísï, Tata Diosï arhispti ambe enga úpiringa imeeri familia jingoni ka nájkiruka no fásiliipka ima jirejiresï ísï úspti (Mat. 1:20; 2:13-15, 19-21). Jimboka José kurhajchaspka Tata Diosï Jeobani, úspti sési kuidariini Maríani ka indeni ambe jimbo María sánderu xénchasïreendi ka janhanharhini. Acheetiicha, chájtujtsï uaaka májkueni úni eska José engajtsï Bibliarhu jirinhantaaska konsejuechani engaksïni jarhuataaka kuidariini chaari familiani. Engajtsï ísï úska nájkirukajtsï jatsiaka para mójtakuni máru ambe, xarhatantsï jauaka eskajtsï xénchasïnga chaari uarhiitini, ka inde ambe uaati eskajtsï sánderu uékperaaka. Vanuatu anapu pirenchi ma enga jukari 20 uéxurhini páni jakaia enga uambuchaka, uandasïndi: “Engani exejka eska juchiiti acheeti jirinhantaasïnga Tata Diosï Jeobaeri konsejuechani ka enga ísï újka sánderuni janhanharhisïnga. Ístu inde ambe úsïndi eskani segura pʼikuarheraaka ka eskani mintsikaaka eska sési uéraaka ambe enga erakujka úni”. w23.05 21 párr. 5

Judiuecha engaksï kʼuanhatsentapiringa Babilonia uératini, jatsisptiksï para ʻpímbinhasï ireta máeniʼ para imeecheri Tata Diosï (Deut. 7:6). ¿Arhikuekasïni i ambe eskaksï judiuecha iámindu ambe sési úxapka? Nómbe. Jatsisptiksï para mójtakurhini paraka Tata Diosï Jeoba jaiapanheantapiringa. Sáno iámindu judiuechaksï Babilonia andajpenuspti, ka jamberiksï májkueni eratseeni ka májkuenksï jámani eska jima anapuecha. Uánikua uéxurhini tátsekua engaksï máru judiuecha kʼuanhatsentapkia Israeli, juramuti Neemíasi ísku pakaraspti enga exepka eska inde judiuecheeri uájpeecha, nóksï jorhenaspka ebreu uandani (Deut. 6:6, 7; Neh. 13:23, 24). ¿Nénaksï úpirini xénchani ka kómarhini Tata Diosï Jeobani engaksï no kurhanguenga idioma enga jimbo karakata japka Tata Diosïiri Uandakua? (Esd. 10:3, 44). Judiuechaksï jatsispti para kánikua mójtakukuarhini, ka engaksï Israeli irekapiringa, sánderu fásiliipirindi, jimboka jima ménderu ueenanhaxapka ísï kómarhinhani Tata Diosï eska ima na uéjka (Neh. 8:8, 9). w23.05 15 párr. 6, 7

Ísïisti, nájkirukachi ménichani meru uékani jauaka úni ambe ma, úpirindi úkuarhini ʻambe ma engachi no erokuarhiniʼ jauaka ka inde ambe úni eskachi nóteru tiempu jatsiakia parachi úni ambe engachi uékani jaka (Ecl. 9:11). Ístu, jamberichi úpiringa problema ma jatsini enga uaaka eskachi nóteru uékaakia úni ambe engachi eratsetini jaka ka eskachi nóteru jatsiakia uinhapikua para indeni ambe úni (Prov. 24:10). Ka jimbokachi no perfektueska, úpiringachi úni ambe ma engachi jimbo sánderu úkua jukanchapiringa úni ambe engachi eratsetini jaka (Rom. 7:23). O jamberichi no újka indeni ambe úni jimbokachi kuataratini jarhasïnga (Mat. 26:43). ¿Ambejtsïni jarhuataa parachi seguiriini jánguarhintani? Miá je eska enga jauaka ambe ma engaksïni ójkutaaka, no arhikuekasïnga eskajtsï nóteru uaakia úni ambe engajtsï eratsetini jaka. Biblia uandasïndi eskachi jamberi uánikua problemeechanchi jatsiauaka, peru ístu eskachi uaaka orhepani uérani ka úni ambe engachi eratsetini jaka. Ísïisti, engachi seguiriijka jánguarhintani nájkirukachi problemeechani jatsiajka, xarhatakuni jarhasïngachi Tata Diosï Jeobani eskachi uékasïnga jaiapanherantani. ¡Tata Diosï Jeoba kánikua sési pʼikuarherajti enga exejka na engajtsï xáni jánguarhintajka úni ambe engajtsï eratsetini jaka! w23.05 30 párr. 14, 15

Enga tumbi ma prekursori úkuarhijka, jorhenguarhisïndi sési pájperani mámaru járhati kʼuiripuecha jingoni (Filip. 4:11-13). Sési jauati engari prekursori auksiliari úkuarhiaka, inde ambekini jarhuataati parari tátsekua regulari úkuarhini. Ka i ambekini jarhuataati parari sánderu orhepatini tiempu kompletuerini marhuani, komu konstruksionirhu o Beteli. Iámindu erachiichaksï jatsipirindi para jánguarhintani paraksï úni orhejtsïkutiini. Ka Biblia uandasïndi eska iámindu ima enga uékani jaka indeni ánchikuarhitani úni “ambakiti ambesï uékani jati úni” (1 Tim. 3:1). Orheta, erachi ma jatsisti para jánguarhintani para sierbo ministerialiini. I erachiichaksï mámaru jarhuataasïndi orhejtsïkutiichani. Orhejtsïkutiicha ka sierbo ministerialiichaksï kaxumbikua jingoni marhuakuasïndi erachiichani ka tsípikua jingonksï aianhpisïndi. w23.12 28 párr. 14-16

Rei Josíasi ueenaspti andarhierani Tata Diosï Jeobani jiáni enga tumbi sapichu máepka. Uékasïreendi sánderu sési míteni ka úni ambe enga Tata Diosï uékeenga. Joperu para Josíasi, no fásiliispti reini; jimboka imani tiempu jimbo sáno iámindu kʼuiripuechaksï diosï úkatechani kómarhiasïreenga. Ísï jimbo, Josíasi jatsipti para kánikua balori jukani para kuájpini jurhimbitini relijionini. ¡Ka kánikua sési úspti! Nótki jamberi 20 uéxurhini jatirispti enga ueenapka kénditani iámu paisirhu imani ambe enga no jurhimbiti relijioniiripka (2 Crón. 34:1, 2). Nájkirukari tumbi sapichu máeuaka, uaakari ísïini eska Josíasi. ¿Néna? Engari andarhieraska Tata Diosï Jeobani ka jorhenguarhiani imeeri sési járhati kualidadiichani. I ambekini jarhuataati aiakukuarheni Tata Diosï Jeobani. ¿Ka nénakini marhuachea engari aiakukuarheska Tata Diosï Jeobani? Luke enga itsï atakuarhika enga 14 jatiripka, uandaspti: “Iásï uératini, Tata Diosï Jeobani marhuakuni jindeuati ambe engani orheta peeraaka juchiiti tsípikuarhu ka jánguarhintaaka parani kánikua sési pʼikuastani” (Mar. 12:30). Engari májkueni úska, uánikua kóntperatechandi intsïnhauaka. w23.09 11 párr. 12, 13

Ju je eratsentani ambe enga úkuarhipka Tesalónika anapu kúnguarhikuarhu. Enga apostoli Pablu karakuapka ini kartani, i kúnguarhikua nótki andangutaxapti ni ma uéxurhini enga ueenapka jarhani. Jamberi jima anapu orhejtsïkutiichaksï no kánikua eksperiensia jatsipti ka nóksï ueendi sési úni iámindu ambe, peruksï jatsipirindi para janhanharhiani. Jamberichi juchajtu jatsiaka para sánderu mintsikaani kúnguarhikuarhu anapu orhejtsïkutiichani enga na sánderu axuterku jauakia kʼéri miskuarhita, jimbokachi jamberi nóteru uaakia míteni ambeksï uandaa ima erachiicha engaksï Beteli jaka nani enga Jeobaeri testiguecheeri ánchikuarhita exenhajka ka ístu ima erachiicha engaksï Beteli jaka. Ísï jimbo, kánikua jukaparhakuesti eskachi iásï jorhenguarhiaka xénchaani ka janhanharhiani kúnguarhikuarhu anapu orhejtsïkutiichani. Ambe uéjki úkuarhini, ju je sési eratsentani iámindu ambe ka no imani ambejku exeni engaksï orhejtsïkutiicha no újka sési úni. Sánderu sési, ju je miáni eska Tata Diosï Jeoba, tata Jesukristuni peeraska para orhekupaani ini xáni ambakiti achamasïichani. Ísï eska kájtsïkua tiámueri na kuájchakuenga sondadueri éjpuni, ambe engachi míteka eska úkuarhiaka sánderu orhepatini kuájchakusïndijtsïni parachi no no sési ambe eratseni. Míteskachi eska ambe enga i parhakpini aiatspejka ísku ambe máeska (Filip. 3:8). w23.06 11, 12 párr. 11, 12

Iámindu imeecha engaksï kurhaajka ambe enga uandajka “uarhiiti enga no jánhastiika” jatsistiksï para exeni ambe úni: jiókuarhini imeeri pʼímarperakuani o nómbe. Uánikua ambe jarhasti engachi jimbo no jatsika para ísku jándikua ambe niátani. Libru Proverbios jimbo uandasïndi eska “uarhiiti enga no jánhastiika” uandasïnga: “Itsï enga sïpanhajka áspisti” (Prov. 9:17). ¿Ambeni arhikuekasïni “itsï enga sïpanhajka”? Biblia uandasïndi eska engaksï temungurhiriicha relasioni seksuali jatsijka ísïiska komueska itsï enga sési pʼikuastpentajka (Prov. 5:15-18). Acheeti ka uarhiiti engaksï leini japarini tembuperatini jaka, úsïndiksï relasioni seksuali jatsini ísï eska na sési jaka. Peru “itsï enga sïpanhajka” kánikua ménderueniisti. Jamberi i ambe arhikuekajti ísku jándikua ambe niátani, ambe ma enga Tata Diosï no jaiapanhintajka. Sáno méntkisï ima kʼuiripuecha engaksï ísku jándikua ambe niátajka sïpatikuarkuksï ísï úsïndi, ísï eska nema enga sïpani jámajka. Imeecha engaksï no sési ambe niátajka uaatiksï eratseni eska i “itsï enga sïpanhajka” kánikua áspiska, peruksï jandiajkusï enganiarikuarhini jarhajti. Tata Diosï Jeoba iámindu ambe exesïndi, imanksï no uaati enganiarini. No jarhasti sánderu no sési jásï ambe ka eska míteni eskajtsïni Tata Diosï nóteru jaiapanhentasïngia, pori ísï arhini, i ambe no sáni áspisti (1 Kor. 6:9, 10). w23.06 22 párr. 7-9

¿Ambejtsï uaa úni engajtsï exeska eskajtsï nóteru mintsita jingoni kómarhisïngia Tata Diosïni o eskajtsï nóteru xáni tsípikua jingoni aianhpisïngia ísï eska antesi? Asï eratsi je eskaksïni Tata Diosï Jeoba nóteru jaiapanhentasïngia. Ménichanchi chkéni pʼikuarherasïnga jimbokachi no perfektueska. Ísï jimbo, engajtsï exeni jaka eskajtsï nóteru xáni tsípikua jingoni úsïngia ambe ma, eratsenta je apostoli Pablueri ambe. Nájkiruka ima jánguarhinteenga ísïini eska Jesúsi mítespi eska ménisï úkua jukanchapiringa imani ambe úni enga sési jaka. Pablu jatsispti para ísï úni nájkiruka ménisï no káni sési pʼikuarherani japiringa. Ka chájtujtsï uaaka májkueni úni. Méntkisï jánguarhinta je imani ambe úni enga sési jaka nájkirukajtsï ménisï no uékani jauaka ojtsï no sési pʼikuarherani jarhani (1 Kor. 5:11). w24.03 11, 12 párr. 12, 13

Uaakachi xénchperakua xarhatakuani juchaari erachiichani ka pirenchiichani engachi imeecheeri amigu úkuarhiska (2 Kor. 6:11-13). Uánikua kúnguarhikuecharhu, mámaru járhati erachiicha ka pirenchiichaksï jarhasti engaksï kánikua ménderueni tʼarhexeka. ¿Ambejtsïni jarhuataa sánderu xénchaani erachiichani? Exeani imeecheeri ambakiti kualidadiichani. Jiáni enga kánikua no sési nitamakuarhinhaaka, kánikua jukaparhakueuati eskachi xénchauaka erachiichani. ¿Nénajtsïni kuájchakua Tata Diosï Jeoba jiáni enga kánikua no sési nitamakuarhinhaaka? Ju je eratsentani ambe enga Tata Diosï Jeoba arhipka imeeri iretani paraksï úni tsípiti pakarani jiáni enga Babilonia kʼamajkunhapiringa: “Juchiiti ireta, inchanta chiiti kuartuecharhu engaksï incharini jaka ka míkaa puerteechani engaksï tátsepani jaka. Jirikuarhi ma ratu astaka nitamaakia k’éri ikiatapu” (Is. 26:20). Jamberichi juchajtu jatsiaka para májkueni úni jiáni enga kánikua no sési nitamakuarhinhaaka. w23.07 6, 7 párr. 14-16

Uaakachi ini ambe kurhamarhikuarhini: “¿Máteruechaksï eratsesïni eskani kurhangusïnga ka eskani no inchandimesïnga, ka eskani jiókuarhisïnga ambe engaksï máteruecha uandajka? ¿Ojtsïni ísï míteski eskani méntkisï uékasïnga eska iámindu ambe sési úkuarhiaka ka eskani méntkuni no kurhangusïnga? O engaksï máteruecha uandajka na engaksï exejka ambe ma, ¿kurhajchaasïni ka úsïni ambe engaksï uandajka?”. Engachi kurhangujka ka nóchi inchandimentani, májkuenchi úni jarhasïnga eska Tata Diosï Jeoba ka Jesúsi. Enga juchaari irekua mójtakurhiaka, uétarhisïndi eskachi kurhanguaka ka no inchandimentani. Jamberichi niáraaka ma repentku pʼamenchani, ochi no jatsini sentabu o gobiernu jimbochi no sési nitamakuarhini jarhani. Juchaari irekua uaati mátirku mójtakurhini ka i ambe uaati eskachi problemeechani jatsiauaka engachi no erokuarhini japka (Ecl. 9:11). Ístuchi úpiringa kánikua úkua jukanchani engajtsïni Tata Diosï Jeobaeri kúnguarhikua arhipiringa eskachi máteru ambe uaakia o eskachi máteru nanisï marhuauakia. Ambe engajtsïni kánikua jarhuataaka parachi jiókuarhini i ambe, jindeesti ari tʼámu ambe: 1) jiókuarhini eska iásï ménderueniuakia ambe ma, 2) eratsentani ambe enga úkuarhiaka sánderu orhepatini, 3) eratsentani ambakiti ambe engachi jatsika juchaari tsípikuarhu ka 4) jarhuataani máteruechani. w23.07 22 párr. 7, 8

Jiáni enga Danieli tumbi máepka, Babilonia pánhaspti. Peru nájkiruka sapichku japka, ísku pakataaspti Babilonia anapuechani, jimbokaksï imeecha exespka “ambe enga imeecheeri éskuechajku ueenga exeni”: tumbini ma “enga kánikua sési jáxepka” ka enga ambakiti familiarhu anapu máepka (1 Sam. 16:7). Ísï jimbo, iámu ambeksï jorhendaspti paraka ima ánchikuarhipiringa Babilonia anapu palasiurhu (Dan. 1:3, 4, 6). Tata Diosï Jeoba kánikua xénchasïreendi Danielini jimboka Danieli no méni jurajkuspka imani. Ka míteskachi eska i ambe ísïiska jimboka enga Danieli 20 uéxurhinisï jatiriipka, Tata Diosï Jeoba ístu Danieliiri ambe uandaspti enga ima achamasïicheri ambe uandani japka engaksï no méni jurajkupka, komu Noe ka Jobu, engaksï ióni sési marhuakupka imani (Gén. 5:32; 6:9, 10; Job 42:16, 17; Ezeq. 14:14). Tata Diosï Jeoba méntkisï xénchaspti Danielini, ima ióni irekaspti ka sési (Dan. 10:11, 19). w23.08 2 párr. 1, 2

Engajtsï uékaka kʼumanchikua ma piáni, ¿a no eskajtsï orheta tsitipiringa nirani exeni na enga jáxeka? Uaakachi májkueni úni engachi arhintani jauaka ka estudiarini Bibliani. Engachi uiriakuarhu arhintaska, imani ambejkuchisï jorhenguarhiaka “enga ma orheta ueenajka jorhenguarhini ambe enga Tata Diosï uandajka” (Ebr. 5:12). Ísï eskachi na jánguarhintajka exeni kʼumanchikuani ma, ístu uétarhisïndi eskachi sési jorhenguarhiaka Bibliani. Ka parachi sési estudiarini Bibliani uétarhisïndi eskachi exeaka na enga iámindu Biblia terukuntajka. Ísï jimbo, no solu uétarhisïndi míteni ambe engachi jakajkujka, sino ístu jatsiskachi para míteni andichisï jakajkujki indeni ambe. Parachi sésimindu kurhanguni Tata Diosïiri Uandakuani jatsiskachi para jorhenguarhini ima ambe enga úkua jukaka. Apostoli Pablu arhiaspti iámindu kristianuechani eskaksï jánguarhintapiringa estudiarini Tata Diosïiri Uandakuani parakaksï úpiringa “sésimindu kurhanguni na enga xáni kóskaka, na enga xáni ióskaka, na enga xáni iótaka ka na enga xáni jauanhika jurhimbikua ambe”. Engaksï ísï úpiringa, ʻsési jupikuarhitinksï japirindi ka sési uaxastakataʼ (Éfes. 3:14-19). Juchajtuchi jatsiska para májkueni úni. w23.10 18 párr. 1-3

Biblia uandaasïndi uánikua kʼuiripuechani engaksï tekaantstiipka. ¿Andijtsïsï no jorhenguarhijki inde kʼuiripuecheeri ambe? Pori ejemplu, enga Dabidi erakunhapka para Israeli anapu reiini, tumbi sapichu máespti, joperu jatsispti para uánikua uéxurhini erokuarhini para juramukuarhu niárani. Simeóni ka Ana, sésiksï marhuakuspti Tata Diosï Jeobani engaksï jamberi erokuarhini japka eska janopiringa Mesíasi engaksï aiaminhapka (Luk. 2:25, 36-38). Engajtsï jorhenguarhini jauaka Bibliarhu ima kʼuiripuecheeri, kurhamarhikuarhi je: “¿Ambe jarhuataspi ini kʼuiripuni para tekaantstiini? ¿Néna marhuakuspi enga ísï tekaantstiipka? ¿Néna uaa ji májkueni úni eska i kʼuiripu?”. Peru ístujtsï uaaka uánikua ambe jorhenguarhini imeecheeri engaksï no tekaantstiipka (1 Sam. 13:8-14). Úpiringajtsï kurhamarhikuarhini: “¿Andiksïsï no tekaantstiipi? ¿Ambeksï úkuarhinchaspi engaksï ísï no tekaantstiipka?”. w23.08 25 párr. 15

Apostoli Pedru no méni jurajkuspti Jesúsini. Ima no jurajkuspti eska ambe ma ójkutapiringa para nóteru chúxapania Jesúsini. Pori ejemplu, Pedru xarhataspti eska ima no méni jurajkupiringa Jesúsi jiáni enga Jesúsi arhiapka imeeri chúxapatiichani ambe ma engaksï imeecha no kurhangupka (Juanu 6:68). Jiáni uánikuechaksï jurajkuspti Jesúsini, nóksï erokuarhispti eska ima sési aianguapiringa ambe enga arhikuekani japka. Joperu Pedru no ísï úspti. Ima iáminduechani japarini uandaspti eska Jesúsiiri uandakuechajkuksïsï íntspijka “tsípikua para méntkisï”. Jesúsi mítesptia eska Pedru ka máteru apostoliichaksï jurajkupiringa. Peru Jesúsi arhispti Pedruni eska ima mintsikasïreenga eska Pedru ménderu niárapiringa sési marhuakuani (Luk. 22:31, 32). Jesúsi mítespti eska ‘mintsita uékasïnga úni ambe enga sési jaka, joperu kuerpu no úsïndi pʼíngukuarhini’ (Mar. 14:38). Ísï jimbo, nájkiruka Pedru uandapka eska no mítespka Jesúsini, ima no uandaspti eska Pedru nóteru úpiringia marhuakuni. Ísï tátsekua enga Jesúsi tsíntapka, xarhakuspti Pedruni enga jandiajku japka (Mar. 16:7; Luk. 24:34; 1 Kor. 15:5). Seguru eska i ambe kánikua jarhuatapka apostoli Pedruni paraka ima sési pʼikuarherantapiringa. w23.09 22 párr. 9, 10

Tata Diosï mintsita jingoni puákuntasïndi kʼuiripuni engaksï mintsikajka imani, nóteru no sési ambe exekusïndia (Sal. 32:1, 2). Ísïisti Tata Diosï ísï exesïndi indeni kʼuiripuni eska sési jámasïnga jimboka mintsikasïnga. Nájkiruka Tata Diosï ísï exepka Abraánini, Dabidini ka máteru imeeri marhuariichani, indeechaksï seguirixaptiksï pekadoriini ka imperfektueni. Joperu jimbokaksï mintsinharhisïreenga Tata Diosïni, ima nóteru ísï exeasïreendia eska kʼuiripuecha engaksï no sési ambe ueenga, jimbokaksï no májkueniispka eska máteru kʼuiripuecha engaksï no marhuakuenga Tata Diosï Jeobani (Éfes. 2:12). Karta para Roma anapuecha jimbo, apostoli Pablu sési xarhataspti eska uétarhisïnga mintsikani Tata Diosï Jeobani para úni imeeri amigueni. Ka indeni ambesï úpti Abraáni ka Dabidi, ka juchajtuchi uaaka májkueni úni. w23.12 3 párr. 6, 7

Iámindu kristianuechachi kʼéri kóntperata ma jatsiska enga jindeeka kéjtsïtakuni ambe ma Tata Diosï Jeobani. ¿Joperu nénachi uaa ísï úni? Uaakachi íntskuni juchaari tiempu, uinhapikua ka ambe engachi xáni jatsika parachi úni jarhuajpeni Reinueri ánchikuarhitarhu. Engachi sánderu ambakiti ambe íntskuaka juchaari Tata Diosï Jeobani, xarhatani jauakachi eska kʼéri kóntperata máeska imani kómarhini. Apostoli Pablu uandasïndi máru ambe engachi no jatsika para mirikurhini engachi kómarhini jauaka Tata Diosïni (Ebr. 10:22-25). Pori ejemplu, Pablu uandaspti na enga xáni jukaparhakueka kómarhini Tata Diosï Jeobani, eskachi jatsiska para máteruechani aianguani ambe engachi erokuarhini jaka, eskachi jatsiska para tánguarhintani juchaari erachiicha jingoni ka uinhaperperantani, “ka sánderia iásï engachi exeni jaka eska [Tata Diosï Jeobaeri] jurhiatikua axuterku jarhaskia”. Ka Apokalipsisi, últimu kapituluecha jimbo, Tata Diosï Jeobaeri ánjeli uandasïndi: “¡Tata Diosïni kómarhi!”. Tsimani xanhari ísï uandasïndi para xarhatani eska kánikua jukaparhakueska inde ambe (Apok. 19:10; 22:9). Ju je méntkisï miáni jarhani ambe engachi jorhenguarhikia Tata Diosï Jeobaeri templueri ambe ka na enga xáni kʼéri kóntperata máeka kómarhini juchaari Tata Diosïni. w23.10 29 párr. 17, 18

Iáminduechachi uékasïnga kurhajchani ini juramukuani: “ju je seguiriini iáminduecha xénchperani”. Joperu ju je méntkisï miáni ini ambe enga Jesúsi uandapka: “Sáno iáminduechaksï nóteru xénchpeatia” (Mat. 24:12). I uandakuechani jingoni Jesúsi no arhikuekaxapti eskaksï imeeri chúxapatiicha nóteru xénchperapiringia. Joperuchi jatsiska para jingontku jámani parachi no májkueni jámani eska parhakpinirhu anapuecha engaksï nóteru xénchperajkia. Ini ambe miáparini, ju je exeni ambejtsïni jarhuataa parachi míteni na xánchi xénchaasïni juchaari erachiichani. Ma ambe engajtsïni jarhuataaka míteni na xánchi xénchasïni juchaari erachiichani, jindeesti exekuarhini ambechi úsïni jiáni enga úkuarhijka ambe ma (2 Kor. 8:8). Pori ejemplu, apostoli Pedru ini ambe uandaspti: “Joperu ambe engajtsï sánderu jatsika para úni jindeesti kánikua xénchperani, jimboka ima enga xénchpejka méntkisï puátspentasïndi” (1 Ped. 4:8). Jiájkani, jiáni xarharasïndi na engachi xáni xénchajka juchaari erachiichani engajtsïni imeecha no sési pʼikuastajka o engaksï no sési ambe újka. w23.11 10, 11 párr. 12, 13

Engajtsï solu máru erachiichani xénchaaska kúnguarhikuarhu, nóchi kurhajchani japiringa ambe enga Jesúsi uandapka uékperakueri ambe. Ísïisti, jamberijtsï sánderu sési pájperajka máru erachiicha jingoni, ísï eska Jesúsi na úpka imeeri chúxapatiicha jingoni (Juanu 13:23; 20:2). Joperu apostoli Pedrujtsïni miátantasïndi eskachi jatsiska para iámindu erachiichani ísï xénchaani enajkichi “iáminduecha ermanutiipirini” (1 Ped. 2:17). Pedru ini konsejuni íntspisti: “Mintsita jingoni xénchpera je iáminduecha” (1 Ped. 1:22). Ini tekstu jimbo arhikuekaxapti eskachi jatsiska para xénchaani asta imeechani jamberi engachi no úpiringa xénchaani. Pori ejemplu, ¿ambechi úpirini engajtsïni erachi ma no sési ambe úchipiringa ojtsïni no sési pʼikuastani? Jimbokachi no perfektueska, jamberichi juchajtu úpiringa májkueni úkuntani ka nóchi xénchperakua jingoni kámani. Joperu Jesúsi jorhendaspti Pedruni eska Tata Diosï Jeoba no sáni jaiapanhentasïnga indeni ambe (Juanu 18:10, 11). Ísï jimbo, apostoli Pedru ini ambe karaspti: “Engaksïni kʼuiripuecha no sési ambe úchiaka chá asï jáma je májkueni kaani, ka engaksïni no sési ambe arhiaka chájtu asï jáma je no sési arhiani. Sánderu sési, sési arhia je” (1 Ped. 3:9). Engajtsï chá mintsita jingoni xénchpeska, sésijtsï káuaka asta máteruechani ka ístujtsï kurhangukuauaka. w23.09 28, 29 párr. 9-11

¿No ísïiski eska kánikua sóntku kʼuiripesïnga sapi ma? No úkua jukasïndi ka no jánguarhintasïndi paraka sóntku kʼéaka. Joperu parachi jucha ambakiti pájperakua ma jatsini Tata Diosï Jeoba jingoni, jatsiskachi para jánguarhintani (1 Kor. 13:11; Ebr. 6:1). Parachi niárani ambakiti kristianueni, jatsiskachi parachi ambakiti pájperakua ma niárani jatsini Tata Diosï Jeoba jingoni. Ístuchi uétarhinchasïnga eskajtsïni imeeri espiritu santu jarhuataaka parachi ambakiti kualidadichani jatsiani, uánikua ambe jorhenguarhini úni ka tʼuini mítetini jarhania ambe úni engachi responsabilidadichani jatsiauaka sánderu orhepatini (Prov. 1:5). Tata Diosï Jeoba kuerauasti kʼuiripuechani, ima kueraasti acheetini ka uarhiitini (Gén. 1:27). Tatakeechaksï no májkueni jarhasti eska nanakeecha, joperu ístuksï no májkueniisti máteru ambe jimbo. Pori ejemplu Tata Diosï Jeoba ústi eskaksï tatakeecha ka nanakecha nóksï májkueni jásï ambe uaaka, jimboksïsï máteru járhati kualidadichani jatsiati ka máteru jásï ambeksï jorhenani úni (Gén. 2:18). w23.12 18 párr. 1, 2

¿Uékasïreeni Jesúsi eskaksï máteruecha úrapiringa imeeri taati jémbeeri nombrini? Jo. Jamberiksï máru relijioniiri orhejtsïkutiicha engaksï imani tiempu jimbo irekapka jakajkuendi eskaksï no jatsipka para úrani Tata Diosïiri nombrini jimboka jukari pímbinhasïispka. Joperu Jesúsi no jurajkuspti eska inde pʼindekua enga no Bibliarhu jupindaskuarhitini jaka pʼíngupiringa para kʼéri ambe arini imeeri Taatiiri nombrini. Pori ejemplu, ju je eratseni ambe enga úpka Jesúsi ma uelta jimeesïsï engaksï Jerasa anapuecha irekapka, tsinaspti achamasïni ma engaksï demoniuecha incharhitini japka ka kʼuiripu xáni chérakuarhespti enga jamberi kurhakupka Jesúsi eska támisï nipiringa (Mar. 5:16, 17). Joperu ima uékasïreendi eskaksï iáminduecha mítepiringa Tata Diosï Jeobaeri nombrini. Ísï jimbo, ante de kéndikuni, arhispti imani achamasïni enga tsinapka eska aianguapiringa kʼuiripuechani ambe enga úpka Tata Diosï Jeoba imani jimbo ka no Jesúsi (Mar. 5:19). Juchaari Rei tata Jesukristu, uékasïndi eskachi májkueni uaaka eska ima, eskachi iámu kʼuiripuechani jorhendauaka Tata Diosï Jeobaeri nombrini (Mat. 24:14; 28:20). Engachi ísï újka kánikuachi tsíperasïnga imani. w24.02 10 párr. 10

¡Xáni enga sésiika Tata Diosï Jeobaeri kúnguarhikuarhu jarhani! Nájkiruka ini jurhiatikuecha jimbo sánderu úkua jukani jaka, Tata Diosï Jeobajtsïni jarhuatasïndi parachi familia ma jatsini enga májku kʼéri jaka (Sal. 133:1). Ambe engajtsïni jorhendajka Tata Diosï jarhuatasïndijtsïni paraka juchaari familia tsípikua jingoni irekaaka (Éfes. 5:33–6:1). Ístujtsïni jarhuatasïndi parachi jánhaskatiini ka únchi orhepani uérani jiáni engachi imani ambe eratsejka engajtsïni no sési pʼikuastajka ka parachi seguiriini jarhani tsípikua jingoni irekani. Ísï jimbo, uétarhisïndi kánikua jánguarhintani parachi no chkétakuarhini ka seguiriini jarhani marhuakuni Tata Diosï Jeobani. ¿Andi? Jimboka ménisï jarhasïnga engajtsïni no sési pʼikuastajka ima ambe engaksï máteruecha újka ka uandani. Ístuchi úpiringa chkétakuarhini jiáni engachi méntku úndajka no sési ambe úni. Jatsiskachi para seguiriini jarhani marhuakuni Tata Diosï Jeobani jiáni enga i ambe úkuarhiaka: 1) engajtsïni erachi o pirenchi ma no sési pʼikuastaaka, 2) enga juchaari acheeti o uarhiti no ísï uaaka ambe ma eskachi jucha na uékapiringa ka 3) engachi jucha mismu niáraska no sési ambe úni. w24.03 14 párr. 1, 2

Ménisïjtsï kurhauaka na engaksï erachiicha úka ambe ma paraksï sánderu marhuakuni Tata Diosï Jeobani. Pori ejemplu máruksï nirasïndi Jorhentperakuarhu para Aianhpiriicha Reinueri, oksï mótsini imani lugari jimbo enga sánderu uétarhini jaka aianhpinhani Tata Diosïiri ambe. ¿Chá uaa ísï úni? Enga ísïika jánguarhinta je. Erachiichaksï jirinhakuntasïndi néna sánderu marhuakuni Tata Diosï Jeobani (Úku. 16:9). Ka engajtsï iáiasï no úska inde ambe úni, asï eratsi je eskajtsï no ma ambe úxaka. Ambe enga sánderu jukaparhakueka jindeesti seguiriini jarhani marhuakuni Tata Diosï Jeobani (Mat. 10:22). Asï mirikurhi je eska Tata Diosï Jeoba kánikua sési pʼikuarherasïnga enga chá jánguarhintajka sési marhuakuni imani ambe jingoni engajtsï uaaka. Ini ambe úparini, chájtsï méntkisï chúxapani jauaka Jesúsini engajtsï na itsï atakuarhiakia (Sal. 26:1). w24.03 10 párr. 11

Juchaari Taati auandarhu anapu aiachisïndijtsïni eskajtsïni puáchentaaka engachi móantaska (Sal. 86:5). Ísï jimbo, engachi jucha mintsita jingoni móantaska uaakachi seguru jarhani eskajtsïni ima puáchentaskia ka nóchi eratseni jarhani eska ima no uaaka ambe engajtsïni aiachikia. Miáni eskajtsïni ima kurhanguchisïnga, ka eska no nemani uinhamarhikusïnga ka ístu eskajtsïni no méni jukari ambe kurhacheaka. Tata Diosï Jeoba kánikua jukaparharasïndi imani ambe engachi jucha jánguarhintajka úni, nájkiruka sánititu ambeuaka o kánikua ambeni. Pori ejemplu, ju je eratseantani Tata Diosï Jeobaeri marhuariichani engaksï ióntki iámindu mintsita jingoni marhuakupka. Komu, apostoli Pablu kánikua jánguarhintaspti ka iauanisï nirasïreendi aianhpini ka uánikua kúnguarhikuechani uaxastaaspti. Joperu niáraspti ima tiempu enga nóteru májkueniipkia ka ima nóteru úsïreendia ísï aianhpini eska antesi. ¿No sési pʼikuarheraspi Tata Diosï Jeoba? Nómbe. Nájkiruka Pablu sánititu ambeterku ueengia Tata Diosï Jeoba seguirixapti újchakurani (Úku. 28:30, 31). Ka májkueniisti juchantsïni jingoni, nóchi méntkisï uaaka májkueni ambe úni parachi Tata Diosï Jeobani marhuakuni, ka ambe enga sánderu jukaparharajka Tata Diosï Jeoba no jindeesti na engachi xáni marhuakujka sino andichisï ísï újki. w24.03 27 párr. 7, 9

Jesúsi ambakiti ejemplu ma íntsaaspti imeeri chúxapatiichani. Enga aianhpini jámani japka, mémindu kómarhispti Tata Diosïni. Ima arhutaspti tiempu para kómarhini jimboka uánikua ambe jatsisïreenga para úni ka kʼuiripuechaksï méntkisï imani jingoni jarhasïreendi (Mar. 6:31, 45, 46). Pʼindespti xarhentkuechani uandontskuarheni imeeri Taati jingoni jiáni enga jandiajku jarheenga. Ma uelta, erantskutaspti kómarhini ante de úni ambe ma enga kánikua jukaparhakuepka (Luk. 6:12, 13). Ka ima chúrikua ante de uarhini, Jesúsi someni kómarhispti Tata Diosï Jeobani jimboka mítespka eska nitamakuarhipiringa ambe ma enga kánikua úkua jukapka ka enga jimbo jupka Echerirhu (Mat. 26:39, 42, 44). Jesúsiiri ejemplujtsïni jorhendasïndi eska nájkirukachi no andajkuarhini jauaka, jatsiskachi para arhutani tiempu parachi Tata Diosï Jeobani kómarhini. Májkueni eska Jesúsi, jamberi uétarhiati eskachi jánguarhintaaka tiempu arhutani parachi kómarhini, jamberichi uaaka xarhentku jauarani o ióndani sáni kʼuíni parachi kómarhini Tata Diosïni. Engachi ísï úska, xarhatakunchi jauaka Tata Diosï Jeobani na engachi xáni jukaparharajka ini xáni ambakiti regaluni. w23.05 3 párr. 4, 5

Uandakua griegu enga ini tekstu jimbo úrakuarhika, arhikuekaxapti eska inde uékperakua enga Tata Diosï Jeoba pʼikuarherajka erakukateechani jimbo ísïiska eska iurhekua ma. Ísï jimbo, erakukateechaksï mítesti eska Tata Diosï Jeoba kánikua xénchaasïnga (Jud. 1). Iáminduechaksï májkueni pʼikuarherasïndi eska apostoli Juanu na karapka: “¡Exe je na engajtsïni xáni xénchajka Taati jimbokajtsïni arhisïnga eskachi imeeri uájpeeska!” (1 Juanu 3:1). ¿Joperu Tata Diosï Jeoba erakukateechankusï xénchaajki? Nómbe, ju je exeni eska ima iámindu imeeri marhuariichani xénchaasïnga. ¿Ambe úski Tata Diosï Jeoba parajtsïni xarhatacheni na engajtsïni xáni xénchajka? Imajtsïni euajpintasti, ka ísï ústi jimboka no nema jarhaska engajtsïni sánderu xénchajka eska ima (Juanu 3:16; Rom. 5:8). w24.01 28 párr. 9, 10

Ini bersikulu jimbochi exesïngachi máteru ambe enga úpka Dabidi para nóteru chénia jiáni enga imeeri tsípikua peligrurhu japka: eratsentaspti ambe enga Tata Diosï Jeoba úpiringa sánderu orhepatini imani jimbo. Mítespti eska Tata Diosï Jeoba pʼímutantapiringa jiáni enga uétarhipiringa, jimboka aiakuspka Dabidini eska ima jindeepiringa Israeli anapu juramuti (1 Sam. 16:1, 13). Dabidi sési mítespti eska ísï úkuarhipiringa jimboka Tata Diosï Jeobasï aiakupka. ¿Ambejtsïni aiachiski Tata Diosï juchantsïni? Ísïisti, nójtsï aiachixati eskachi no ma uandanhiata jatsiaka iásï. Joperu ambe uéjkichi nitamani ini parhakpinirhu, Tata Diosï Jeobajtsïni aiachistia eska jimbanhi parhakpinirhu kénditauaka iámindu uandanhiateechani (Is. 25:7-9). Jo, ima jatsisti uinhapikua para tsítaantani uarhiriichani, parajtsïni tsinani ka para kʼamajkuani juchaari enemiguechani (1 Juanu 4:4). w24.01 6 párr. 12, 13

Ju je eratsentani andichisï aiakukuarhi ka itsï atakuarhini. Úspkachi ini ambe jimbokachi uékasïreenga apoiarini Tata Diosï Jeobani. Miánta je ambe engaksïni jarhuataka parajtsï seguru jarhani eska i jindeeska jurhimbikua. Chájtsï niáraska míteni Tata Diosï Jeobani ka ísï exeni komueska chaari Taati auandarhu anapu, ístujtsï niáraska janhanharhini ka xénchani. Sánhantsï arhiska mintsikani ka i ambeksïni jarhuatasti parajtsï móantani chaari pekaduecheeri. Chájtsï jurajkuska imani ambe enga Tata Diosï Jeoba kurhunhijka ka ueenaspkajtsï úni imani ambe enga ima sési exejka. Ístujtsï kánikua sési pʼikuarheraspka exeni na engaksïni Tata Diosï Jeoba puáchentaka (Sal. 32:2). Ueenaspkajtsï tánguarhikuecharhu nirani ka aianguani máteruechani ambakiti ambe engajtsï jorhenguarhini japka. Iásï engajtsï aiakukuarhekia Tata Diosïni ka itsï atakuarhini, jámaxakajtsï indeni xanharu jimbo enga tsípikuarhu pájpejka ka eratsetixakajtsï méntkisï jimini jámani (Mat. 7:13, 14). Uékasïngachi méntkisï uiuinhasï jarhani, sési anhaxurhitini ka kurhajchaani imeeri leichani. w23.07 17 párr. 14; 19 párr. 19

Eratsentani eskachi aiakuska Tata Diosï Jeobani, eskachi uaaka ambe enga ima uéjka, inde ambejtsïni jarhuataati parachi úni orhepani uérakuni náki uéjki tsʼéjkukuani. Pori ejemplu, ¿a no eskachi no jámaaka nínharhikuni o jukari sési uandontskuarhekuni imani enga tembuchatini jakaia o uambuchatini? Engachi na aiakujkia juchaari tsípikuani Tata Diosï Jeobani, nóteruchi eratseni jarhasïngia indeni ambe, jimbokachi no jurajkusïnga eska inde ambe juchaari mintsitarhu niáraaka. Jarhuatasïndijtsïni parachi no pʼindekua ma úni, méntkuchi jurajkusïnga indeni xanharuni “engaksï no sési úriicha jámajka” (Prov. 4:14, 15). Jesúsiiri ejemplujtsïni kánikua jarhuataati, ima méntkisï eratsetixapti méntkisï sési pʼikuastani Taati jémbani, juchajtuchi uaaka májkueni úni engachi no jiókuarhiska imani ambe enga Tata Diosï no jaiapanhentajka (Mat. 4:10; Juanu 8:29). Ambe engachi nitamakuarhijka ka imani tsʼéjkukuechani engachi jatsiajka, úsïndi eskachi jucha xarhataaka eskachi méntkisï uékasïnga Jesúsini chúxapani ka míteskachi eskajtsïni Tata Diosï Jeoba jarhuataaka orhepani uérani. w24.03 9, 10 párr. 8-10