Oktubri

¿Úkua jukanchasïntsï kurhandirani? Dabidi ménichani ísï úkuarhinchaspti. Jimbosï kurhakupti Tata Diosïni: “Ú eskakeni uékaaka kurhajchani” (Sal. 51:12). Nájkiruka Dabidi xéncheenga Tata Diosï Jeobani, ménisï úkua jukanchasïreendi kurhajchani ka juchajtuchi májkueni úkuarhinchasïnga. Orheta, jimbokachi no perfektueska ka inde ambe úsïndi eskachi úkua jukanchaaka kurhandirani. Tsimani, jimboka Satanási jánguarhintasïnga parachi jucha no kurhandirani, ísï eska ima na úpka (2 Kor. 11:3). Ka tanimu, jimbokaksï parhakpini anapu kʼuiripuecha méntkuksï no uékasïnga kurhandini ka inde eratsekuasï “juramukuani jati imeechani engaksï xáni no kurhandirajka” (Éfes. 2:2). Ísï jimbo, para kurhajchani Tata Diosï Jeobani ka imani kʼuiripuechani enga ima juramukua íntskuaka, jatsiskachi para kánikua jánguarhintani jimbokachi no perfektueska, jimbokajtsïni Satanási ójkutasïnga ka kʼuiripuechaksï no kurhandirasïndi. w23.10 6 párr. 1

¿Ambechi jorhenguarhisïni indeni milagru jingoni enga Jesúsi úpka? Eskachi jatsiska para kaxumbitiini. Jesúsi no kʼéramakuarhispti enga itsïni, binu úntapka. Ima no méni kʼéramakuarhisïreendi imani ambe jimbo enga ueenga. Sánderu sési, kaxumbitiispti ka méntkisï kʼéri ambe arhisïreendi imeeri Taati jémbani ka uandasïreendi eska imani jimbosï ueenga úni ambe ma (Juanu 5:19, 30; 8:28). Engachi májkueni úska eska Jesúsi, kaxumbitiuakachi ka nóchi jámaka kʼéri ambe exekuarhini imani ambe jimbo engachi uaaka. Ju je no kʼéramakuarhini, sánderu sési ju je kʼéri ambe arhini Tata Diosïni engachi marhuakuni jaka (Jer. 9:23, 24). Ima jukanchasti eskachi kʼéri ambe arhiaka, jimbokachi no ma ambe úpiringa úni engajtsïni ima no jarhuatapiringa (1 Kor. 1:26-31). Kʼuiripu ma enga kaxumbitiika, no uétarhinchasïndi eska sési exenhaaka imani ambe jimbo enga újka máteruecha jimbo. Ima sési pʼikuarherasïndi, jimboka mítetixaka eska Tata Diosï Jeoba exesïnga ka eska jukaparharasïnga ambe enga újka (terukutanta je Mateu 6:2-4; Ebr. 13:16 jingoni). Tata Diosï Jeoba kánikua sési pʼikuarherasïndi enga exejka eskachi uékasïnga májkueni kaxumbitiini eska Jesúsi (1 Ped. 5:6). w23.04 4 párr. 9; 5 párr. 11, 12

Tata Diosïiri jarhuajperata jingoni, apostoli Pablu arhiaspti kristianuechani eskaksï pendienti paapiringa máteruechani. ¿Nénachi uaa ísï úni tánguarhikuecharhu eska i konseju na arhijka? Engachi miántaska eskaksï máteruechajtu uékasïnga komentarini. Ju je eratsentani ini ambe, engachi juchaari amiguecha jingoni jarhajka nóchi juchajku uandani jarhasïnga, sino jurajkuasïngachi eskaksï imeechajtu uandaaka ambe ma, ¿no ísïiski? Ka tánguarhikuecharhujtu sáno májkueniisti. Juchachi uékasïnga eskaksï uánikua erachiicha komentariuaka. Ka ma ambe engachi uaaka úni parachi uinhaperaantani juchaari erachiichani, jindeesti jurajkuani eskaksï imeechajtu uandaaka ambe engaksï jakajkujka (1 Kor. 10:24). Engaksï chaari komentariuecha no xáni kʼéaka, tiempu jauati paraksï ístu máteru erachiicha komentarini. Ístu nori jatsiska para méntku iámindu puntuechani uandaani engaksï párrafurhu ma jauaka. Enga chá uandaska iámindu ambe enga párrafurhu jaka, máteruechaksï nóteru ambe ma uaatiia komentariini. w23.04 22, 23 párr. 11-13

Ju je miáni eska kánikua jukaparhakueska jarhuataani máteruechani, ka uaakachi ísï úni engachi aianhpiaka. Aianhpikuarhu kánikua jukaparhakuesti eskachi kurhangutspiaka jimbokachi uandontskuarhesïnga imani kʼuiripuecha jingoni engaksï mámaru ambe jakajkujka, engaksï máteru naniisï anapueka ka engaksï táchani jásï tʼarhexeranhaka. Ísï jimbo, apostoli Pablueri ejemplujtsïni jarhuataati jimboka ima kurhangukuasïreenga mámaru járhati kʼuiripuechani. Jesúsi apostoli úspti “no Israeli anapuecheeri” (Rom. 11:13). Ka paraka ima úpiringa ini ánchikuarhitani úni, aianguaspti Tata Diosïiri ambe judiuechani, grieguechani, jorhenatiichani, imeechani engaksï echerini ánchiteenga, juramutiichani ka reiichani. Ka para Pablu mintsitarhu niárakuani xáni mámaru járhati kʼuiripuechani, jánguarhintaspti iáminduechani ʻterukukuantaniʼ (1 Kor. 9:19-22). Enga aianhpini jarheenga, apostoli Pablu exesïreendi naniksï anapuespi kʼuiripuecha ka ambe engaksï jakajkuenga. ¿Ka ambechi uaa úni jucha? Uaakachi kurhangukuani kʼuiripuechani ka eratsentani na engachi uaaka aianguani Tata Diosïiri ambe parachi úni jarhuataani, engachi ísï úska sésijtsïni nicheati. w23.07 23 párr. 11, 12

Enga nema sési kámpijka no arhikuekasïndi eska débiliiska, sino eska uinhapitiiska. Uétarhisïndi eska nema kánikua uinhapikuarhintaaka para no sóntku ikiani enga úkuarhini jauaka ambe ma. Espiritu santu úsïndi eska nema “iátsitakuarhu jámaaka” o eska sési kámpiaka (Gal. 5:22, 23). Idioma griegu jimbo, “iátsitakuarhu jámani”, ménichani úranhasïreendi para arhikuekani kabaiuni ma enga mansu únheenga. ¿Úsïntsï eranhaskani na enga xáni mójtakurhienga kabaiu? Nóteru no sési jámasïreendia, sánderu sési, mansuesptia, mansu peru uinhapiti. ¿Ka juchaia? ¿Nénachi uaa iátsitakuarhu jámani, peruchi ístu uinhapitiini? Jandiajku nóchi uaaka indeni ambe úni; uétarhisïndi eskachi kurhakuaka Tata Diosïni espiritu santu. Uánikuechaksï exestia eska nema uaaka iátsitakuarhu jámani. Pori ejemplu, uánikua Testiguechaksï iátsitakuarhu mókukuantasïndi kʼuiripuechani engaksï arhirperani uékajka imeecha jingoni, ka i ambe jarhuataasti máteruechani paraksï sési ambe uandani Jeobaeri testiguecheri ambe (2 Tim. 2:24, 25). w23.09 14 párr. 3

Jánhaskua ma jimbo enga kánikua sési jáxepka, apostoli Juanu exeaspti 24 orhejtsïkutiichani engaksï kʼéri ambe arhini japka Tata Diosï Jeobani auandarhu. Imeechaksï kʼéri ambe arhixapti Tata Diosïni ka uandasïreendiksï eska ima jukanchaska para ʻtʼíntskua intsïnhani ka arhinhani eska kʼéri ambeeska ka uinhapikua jatsiniʼ (Apok. 4:10, 11). Ístuksï ánjeliicha uánikua ambe jimbo kʼéri ambe arhisïndi Tata Diosï Jeobani. Imeechaksï imani jingoni jarhasti auandarhu ka sésiksï mítesti, exesïndiksï na enga jásïika Tata Diosï, ka uékasïndiksï kʼéri ambe arhini imani ambe jimbo enga újka (Job 38:4-7). Juchajtuchi jatsiska para kʼéri ambe arhini Tata Diosï Jeobani engachi kómarhini jauaka. Ka uaakachi ísï úni engachi arhiska ambe engachi tsitijka imeeri ambe ka andichisï xáni janhanharhijki. Engachi arhintaska ka jorhenguarhini jarhani Bibliani, ju je jánguarhintani exeani Tata Diosï Jeobaeri kualidadiichani engachi sánderu tsitiajka (Job 37:23; Rom. 11:33). Tátsekua, ju je aianguni Tata Diosïni na engachi pʼikuarherajka engachi eratseantajka imeeri kualidadiichani. Ístuchi uaaka kʼéri ambe arhini Tata Diosï Jeobani jimbokajtsïni jarhuatasïnga juchantsïni ka ístu iámindu erachiichani (1 Sam. 2:1, 2). w23.05 3, 4 párr. 6, 7

Uéxurhini 1919 jimbo, Tata Diosïiri ireta nóteru úsïreendia ambe enga jorhentpienga Kʼéri Babilonia. I uéxurhini niáraspti jarhani “jántspiri enga mintsinharhikueka” ka jánhastiini, meru jiáni enga uétarhini japka parakaksï kʼuiripuecha engaksï ambakiti mintsita ma jatapka ueenapiringaksï jámani “Xanharu Pímbinhasïkueri” jimbo (Mat. 24:45-47; Is. 35:8). Jimbokaksï máteruecha ánchikuarhispka paraksï prepararini indeni xanharuni, imeecha engaksï ueenapka indeni xanharu jimbo jámani, úsptiksï uánikua ambe jorhenguarhini Tata Diosï Jeobaeri ambe ka ima ambeeri enga ima uékajka úni (Prov. 4:18). Ístuksï mójtakukuarhispti paraksï úni jaiapanherantani Tata Diosïni. Ísïisti, ima no erokuarhisïreendi eskaksï mátirku mójtakukuarhipiringa. Sánderu sési, jurajkuxati eska iámindu ini tiempu jimbo imeeri ireta sánhani arhiaka pʼimbinhasïntani. ¿Úsïnchi eranhaskani na engachi xáni sési pʼikuarheraaka enga niáraaka ima jurhiatikua engachi uaaka iámindu ambe jimbo jaiapanherantani Tata Diosïni? Paraka xanharu ma sési jauaka, uétarhisïndi méntku ambantskantani jarhani. Ka 1919 uératini, “Xanharu Pímbinhasïkueri” ambantskanhantaxati parakaksï sánderu kʼuiripuecha uaaka uéakuntani Kʼéri Babilonia uératini. w23.05 17 párr. 15; 19 párr. 16

Imeecha engaksï Grupurhu jaka enga Orhejtsïkuajka iámindu kúnguarhikuechani jorhendakuarhiaxatiksï erachiichani paraksï jarhuajpeni imeecheeri departamentuecharhu. Ka erachiichaksï sési úxatiia ánchikuarhiteechani engaksï intsïnhaka. I ambe xarhatasïni eskaksï sési jorhendakata jarhaskia paraksï kuidariuani Kristueri karichiichani. Nájkirukaksï erakukateecha auandarhu pánhaakia jiáni enga kʼamarani jámaaka ima jurhiatikua engachi no sési kánhaaka, Tata Diosïiri ireta seguiriini jauati kómarhini imani, jimboka tata Jesukristu jindeeska enga orhekupaani jauaka. Imani tiempu jimbo Gog de Magog, enga jindeeka grupu ma nasionicheri, no sésijtsïni kámaati (Ezeq. 38:18-20). Joperu inde ambe sóntku nitamaati jimbokaksï no uaati úni eskachi jurajkuaka Tata Diosïni, jimbokajtsïni Tata Diosï Jeoba kuidariati. Apostoli Juanu jánhaskakua ma jimbo exeaspti “uánikua kʼuiripuechani” engaksï máteru Kristueri karichiicheeka ka ístu arhinhaspti eskaksï inde uánikua ‘uánikua kʼuiripuecha’ jindeeska engaksï sési uérakuka “jiáni engaksï xáni no sési nitamakuarhika”. I ambe xarhatasïni eskaksï sési kuájchakukata jauaka (Apok. 7:9, 14). w24.02 5, 6 párr. 13, 14

¿Ambechi uaa úni parakajtsïni Tata Diosï Jeoba íntskuaka imeeri espiritu santu? Kurhakuni, jorhenguarhini imeeri Karakatani ka imeeri kúnguarhikuarhu jarhani. Engachi ísï úska, uaakachi úni imani ambe enga “espiritu santu úrpijka” (Gal. 5:22, 23). Parakajtsïni Tata Diosï Jeoba íntskuaka imeeri espiritu santu, jatsiskachi para sési jámani ka imani ambe eratseni enga sési jaka. Peru engachi jucha ueenaska ikichakueni jásï ambe eratseni ka indeni ambe niátani, imajtsïni nóteru íntskuatia imeeri espiritu santu (1 Tes. 4:7, 8). ¿Peru ístu ambechi jatsiski para miáni jarhani? Pablu uandaspti: “Asï jáma je ísku kurhandini ambe engaksï Tata Diosïiri uandakua páriicha uandantaka” (1 Tes. 5:20). Ini bersikulu jimbo, uandakua “ambe engaksï Tata Diosïiri uandakua páriicha uandantaka” arhikuekasïndi imani ambe enga Tata Diosï uandajka imeeri espirituni úraparini. Pori ejemplu, Tata Diosï Jeobaeri jurhiatikueri ambe enga axuterku jakaia. Juchachi no eratsesïnga eska útasï kánikua kuerataxaka paraka niáraaka Tata Diosï Jeobaeri jurhiatikua o eskachi no exeaka enga Armajedoni úkuarhiaka. Sánderu sési, eratsesïngachi eska Tata Diosï Jeobaeri jurhiatikua axuterku jarhaskia ka méntkisïchi miáni jarhasïnga indeni ambe. Ísï jimbo, jánguarhintasïngachi sési jámani ka imani ambe úni enga “xarhatajka eskachi janhanharhisïnga Tata Diosïni” (2 Ped. 3:11, 12). w23.06 12 párr. 13, 14

Enga kristianu ma úrani japiringa aparatu elektroniku ma ka ma repentku xarharani imajeni ma enga pornografieri ambeeka, ¿ambe jatsipirini para úni? Jatsipirindi para no exeni indeni ambe ka sóntku kénditani. Ambe ma engajtsïni jarhuataaka ísï úni, jindeesti miántani eska para jucha sánderu jukaparhakua ambe, jindeeska sési pájperani Tata Diosï Jeoba jingoni. Joperu jarhastiksï imajeniicha engaksï kʼuiripuecha uandajka eskaksï no pornografieska, peru engaksï úpiringa úni eskachi ikichakueni jásï ambe eratseaka, ka i járhati imajeniichantuchi no jatsiska para exeani. ¿Andi? Jimbokachi no uékasïnga ísku jándikua ambe niátani juchaari mintsitarhu (Mat. 5:28, 29). Tailandia anapu orhejtsïkuti ma enga David arhinhajka, uandasïndi: “Méntkisï kurhamarhikuarhisïnga: ‘¿Tata Diosï Jeoba sési exea engani seguiriiska ini imajeniichani exeani, nájkirukaksï no pornografieri ambeeka?’. Ísï eratseni jarhuatasïndirini parani ambakiti ambe úni”. Engachi chénharhiska Tata Diosï Jeobani ka nóchi úni ambe enga ima no jaiapanhintajka, sánderu fásiliuati eskachi imani ambe erakuaka úni enga sési jaka. w23.06 23 párr. 12, 13

Uandakuecha “kuartuecharhu engaksï incharini jaka”, úpirindiksï kúnguarhikuechani arhikuekaani. Imani tiempuni jimbo engachi májku kʼéri jauaka juchaari erachiichani jingoni, Tata Diosïjtsïni kuájchakuati ísï eskajtsïni na aiachikia. Ísï jimbo, no solu uétarhisïndi tekaakuantani juchaari erachiichani, jatsiskachi para meru xénchaani. Engachi no ísï úska, jamberichi no uaaka tsípiti pakarani. Tata Diosï Jeobaeri jurhiatikua jimbo kánikua no sési jánhaskuarhiati para iámindu kʼuiripuecha (Sof. 1:14, 15). Ka ístu para Tata Diosï Jeobaeri marhuariicha kánikua úkua jukaati, joperu engachi desde iásï ueenaska prepararikuarhini nóchi xáni uandanhiauaka ka uaakachi jarhuataani máteruechani. Tekaantskua jingoni, uaakachi orhepani uérakuni náki uéjki problemani engachi niáraaka jatsini. Ka engachi pʼamojkuauaka erachiichani, uaakachi jarhuataani imani ambe jingoni engachi uaaka ka íntsaani ambe engaksï imeecha uétarhinchaaka. Ka engachi xénchaaska erachiichani, uaakachi májku kʼéri jarhani. Tata Diosï Jeobajtsïni kóndentaati íntskuparini tsípikua para méntkisï parhakpinirhu ma enga nóteru no sési ambe úkuarhiakia ka engachi nóteru méni miántaakia no sési jásï ambe engachi nitamakuarhika (Is. 65:17). w23.07 7 párr. 16, 17

Biblia sáno méntkisï uandasïndi eska Tata Diosïiri marhuariicha uinhapitiispka. Peru asta imeecha engaksï kánikua uinhapitiipka niárasptiksï débili pʼikuarherani. Pori ejemplu, ménichanisï rei Dabidi balori xarhataspti ka ísï xáni uinhapiti pʼikuarheraspti komueska “k’éri juáta ma” joperu ménichanisï chéni pʼikuarherasïreendi ka débili (Sal. 30:7). Ka Sansóni kánikua uinhapisïreendi jiáni enga Tata Diosï Jeoba imeeri espiritu íntskuenga, peru ima mítespti eska enga Tata Diosï no íntskupiringa imeeri uinhapikuani “xáni débilipirin[ga] komueska máteru kʼuiripuecha” (Juec. 14:5, 6; 16:17). ¿Naniksï p’irasïreeni uinhapikua i Tata Diosïiri marhuariicha? Tata Diosï Jeoba íntskuasïreendi. Apostoli Pablu ístu jiókuarhispti eska imajtu uétarhinchasïreenga Tata Diosï Jeobaeri uinhapikuani (2 Kor. 12:9, 10). Pablu no sési nitamakuarhinchaspti pʼamenchakuecha jimbo (Gal. 4:13, 14). Ka ménichanisï ístu úkua jukanchasïreendi imani ambe úni enga sési jaka (Rom. 7:18, 19). Ka ménichanisï jukari uandanhiasïreendi ka chésïreendi imani ambe jimbo enga úpiringa úkuarhinchani (2 Kor. 1:8, 9). Nájkiruka ísïipka, ima uandaspti: “Engani ji chkérini jarhajka, jiájkanimendusïni sánderu uíuinhasï pʼikuarherajka”. ¿Néna úsïreeni ísï úni? Tata Diosï Jeoba íntskusïreendi uinhapikuani enga ima xáni uétarhincheenga, ka ísï Pablu uiuinhasï jarhasïreendi. w23.10 12 párr. 1, 2

Engachi ménisï ísï pʼikuarherani jauaka enajkichi no jukaparhakue, ju je miáni eskajtsïni Tata Diosï Jeobasï juaka imeeri ireta jimbo (Juanu 6:44). Nájkirukachi jucha no exejka eskachi ambakiti kualidadichani jatsiaska ka eskachi ambakiti kʼuiripu máeska, Tata Diosï Jeoba kʼóru exesïndi (1 Sam. 16:7; 2 Crón. 6:30). Ísï jimbo, enga ima uandajka eskachi ambakiti kʼuiripuecheska, ju je jakajkuni (1 Juanu 3:19, 20). Jamberichi máru útasï no sési pʼikuarherajka imani ambe jimbo engachi ióntki úpka ante dechi míteni jurhimbikuani (1 Ped. 4:3). Ka máteruechaksï jamberi ióni páni jatiia sési marhuakuani Tata Diosï Jeobani, joperuksï útasï úkua jukanchani jarhani jurajkuni ambe maenga no sési jaka. ¿Tʼujtu ménisï niáraski ísï pʼikuarherani enajkikini Tata Diosï no méni puáchentaa? Enga ísïika, kánikuaksïni uinhaperantaati míteni eskaksï máru Tata Diosï Jeobaeri marhuariicha májkueni pʼikuarheraspka. Pori ejemplu, apostoli Pablu kánikua no sési pʼikuarherasïreendi enga miánteenga ambe enga no sési úpka (Rom. 7:24). Nájkiruka móantapkia ka itsï atakuarhini, útasï ísï pʼikuarherasïreendi eska ‘sánderu sapichuespka iámindu apostoliichani jingoni’ ka eska “ima sánderu” pekadoriispka (1 Kor. 15:9; 1 Tim. 1:15). w24.03 27 párr. 5, 6

Ima amberi enga rei Jeoási erakupka úni, jorhenguarhisïngachi eskachi jatsiska para ima járhati amiguechani jatsiani engaksï xénchajka Tata Diosï Jeobani ka engaksï uéjka tsíperani imeeri mintsitani. Jimbokajtsïni jarhuataati parachi ambakiti ambe úni, ka uaatiksï mámaru jatiriini. Miá eska Jeoási iauani sánderu sapichuespka Jeoiadá jingoni. Eratseanta chiiti amiguechani ka kurhamarhikuarhi: “¿Jarhuatasïntsïni parani sánderu mintsikani Tata Diosï Jeobani? ¿Animarisïntsïni parani kurhajchani imeeri juramukuechani? ¿Tsitisïnksï uandontskuarheni imeeri ambe ka ambe engaksï Bibliarhu jorhenguarhijka? ¿Janhanharhiasïnksï Tata Diosïiri juramukuechani? ¿Jurhimberantasïntsïni jiáni engani no sési újka ambe ma, o imani ambejtsïni arhisïni engani ji uékani jarhajka kurhaani?” (Prov. 27:5, 6, 17). Engaksï chiiti amiguecha no xénchajka Tata Diosï Jeobani, nóri uétarhinchaasïnga. Peru engaksï chiiti amiguecha xénchajka Tata Diosï Jeobani, asï jáma jurajkuani. ¡Índeechaksï kʼóru ambakiti amiguesti para tʼu! (Prov. 13:20). w23.09 9, 10 párr. 6, 7

Alfa primeru letreesti grieguecheeri abesedariu jimbo, ka omega, últimu letra. Enga Tata Diosï Jeoba uandani jaka eska ima jindeeska “Alfa ka Omega”, arhikuekaxati eska enga ima ueenajka úni ambe ma, méntkisï kʼamarasïnga úni. Enga Tata Diosï Jeoba na kueraapkia Adáni ka Ebani, arhiaspti: “‘Kánguaria je sapiichani, ka uánikua úkuarhi je, ka uinira je echerini ka ánchita je’” (Gén. 1:28). Enga arhiapkia ambe enga uékeenga úni ísïispti enajki arhiani japi “Alfa”. Ma jurhiani Adáni ka Ebaeri desendientiicha engaksï perfektueuaka ka kurhandini, uiniraatiksï Echerini ka paraisuksï ma úntaati. Ima jurhiatikua, Tata Diosï Jeoba uaati uandani, “Omega”. Enga na kʼamarapkia kueraani ‘auandani, echeri ka iámindu ambe enga auandarhu ka echerirhu jaka’, Tata Diosï Jeoba uandaspti eska úkuarhipiringa ambe enga ima aiatspepka eska úkuarhipiringa. Ambe enga ima eratsetini jaka úni para Echeri ka para kʼuiripuecha. Enga na kʼamarapiringia septimu jurhiatikua, úkuarhipirindia ambe enga ima eratsetini jaka úni (Gén. 2:1-3). w23.11 5 párr. 13, 14

Para Israeli niárani Babilonia uératini, ma tʼámu mesiicha jimboepirindi ka kánikua úkua jukapirindi. Peru Tata Diosï Jeoba aiatspespti eska ima kénditapiringa ambe uéjki enga úpiringa ójkutaani. Ima judiuecha engaksï sési marhuakuni japka Tata Diosïni, mítesptiksï eska engaksï kʼuanhatsentapiringa Israeli, uánikua kóntperateechanksï jatsiapiringa ka eska engaksï Babilonia pakarapiringa. Sánderu kʼéri kóntperata jindeespti eskaksï úpiringa sési kómarhini Tata Diosïni. Babilonia no ma templu jarhaspti para Tata Diosï Jeoba. Israeliteechaksï no úsïreendi íntspiani imani kéjtsïtakuechani enga Moisésiiri Lei uandeenga, jimboka no jarhaspka altari ma ni saserdotiicha engaksï indeni kéjtsïtakuechani uaapiringa. Ístu, imeecha engaksï janhanharhienga Tata Diosï Jeobani ka kurhajchaanksï imeeri juramukuechani, sánderuksï namunituespti eska iámindu imeecha engaksï no jurhimbiti diosïichani kómarhiauenga. Ísï jimbo, ima judiuecha engaksï janhanharhienga Tata Diosïni, uékaxaptiksïa kʼuanhatsentani imeecheri echeri jimbo ka ménderuksï ísï kómarhini Tata Diosïni eska ima na uékajka. w23.05 14, 15 párr. 3, 4

Engachi uéjka seguiriini “tʼíntskuarhisï jámani”, ístuchi uétarhinchasïnga eskajtsïni jarhuataaka Tata Diosïiri espiritu santu. ¿Andi? Jimboka no fásiliiska sési jámani ini parhakpini jimbo enga xáni ikichakueni jásï ambe únhajka (1 Tes. 4:3-5, 7, 8). Espiritu santujtsïni uaati jarhuataani parachi no jakajkuni imani ambe engaksï parhakpini anapuecha jorhentpijka ka enga méntku no sáni terukuntajka imani ambe jingoni enga Tata Diosï Jeoba eratsejka. Espiritu santujtsïni ístu uaati jarhuatani parachi “sési kámpini, sési jámani ka ísï jámani eska námindu jindeeka” (Éfes. 5:9). Jesúsi uandaspti eska Tata Diosï Jeoba ‘íntsauaka espiritu santu imeechani engaksï kurhakujka’ (Luk. 11:13). Ka íntskusïndijtsïni engachi kurhakujka kómarhikua jimbo. Ka ístu engachi nirajka tánguarhikuecharhu juchaari erachiicha jingoni parachi kʼéri ambe arhini Tata Diosï Jeobani (Éfes. 5:19, 20). Espiritu santujtsïni jarhuataati parachi ísï irekani eska Tata Diosï na jaiapanhentajka. w24.03 23, 24 párr. 13-15

¿Uétarhinchasïniri sánderu tekaantskua? Enga ísïika, kurhaku Tata Diosï Jeobani eskakeni jarhuataaka sánderu tekaantstiini. Espiritu santujtu úsïndi eskachi tekaantstiuaka (Gal. 5:22, 23). Ísï jimbo, uaakachi kurhakuni Tata Diosï Jeobani eskajtsïni íntskuaka imeeri espiritu santu ka eskajtsïni jarhuataaka sánderu tekaantstiini. Engachi nitamakuarhini jaka ambe ma jimbo enga újka eskachi úkua jukanchaaka tekaantstiini, ju je seguiriini kurhakuni imeeri espiritu santu (Luk. 11:13). Ístuchi uaaka arhini Tata Diosï Jeobani eskajtsïni jarhuataaka ísï exeni ambe ma eska ima na exejka. Ka engachi na kómarhiakia, ju je jánguarhintani xáni eskachi xáni uaaka parachi pauani pauani tekaantstiini. Engachi méntkisï kurhakuska Tata Diosï Jeobani eskajtsïni jarhuataaka, ka engachi jánguarhintaska xáni eskachi xáni uaaka parachi xarhatani ini kualidadini, exeakachi eskachi sánhani arhiaka sánderu tekaantstiini. Ístu marhuasïndi eratseantani Biblieri ejempluechani. Bibliarhu uánikua ejempluechaksï jarhasti ima kʼuiripuecheeri engaksï tekaantstiipka. Engachi eratsentaska imeecheri ambe, uaakachi jorhenguarhini ambe engachi uaaka úni parachi juchajtu tekaantstiini. w23.08 22 párr. 10, 11

Jesúsi aiakuspti apostoli Pedruni eska Tata Diosï Jeoba méntkisï kuidaripiringa. Jiáni enga Jesúsi na tsíntapkia, úspti eska Pedru ka ístu máteru apostoliicha, uánikua kurucheechani pʼitamaapiringa milagru ma jimbo (Juanu 21:4-6). I milagru xarhatakuspti Pedruni eska Tata Diosï íntskupiringa iámindu ambe enga uétarhinchapiringa. Jamberi Pedru miántapti ambe enga Jesúsi aiakuapka jiáni enga arhiapka eska Tata Diosï Jeoba kuidariuapiringa engaksï orheta peerapiringa Tata Diosïiri Reinuni (Mat. 6:33). Ini ambe míteparini, Pedru sánderu jánguarhintaspti para aianhpini ka eska imeeri ánchikuarhita úni enga jindeepka kurucha pʼitamaani. Ísï jimbo, kʼuínchikua Pentekostesiiri uéxurhini 33 jimbo, Pedru balori jingoni aianhpispti ka jarhuataasti uánikua kʼuiripuechani jiókuarhini ambakiti aianhperakuani (Úku. 2:14, 37-41). Ka sánderu orhepatini, jarhuataaspti uánikua samaritanuechani ka ístu imeechani engaksï no judiuepka paraksï Kristueri chúxapatiini (Úku. 8:14-17; 10:44-48). Úsïngachi exeni eska Tata Diosï Jeoba, Pedruni úraspka paraka na uéjki jásï kʼuiripu janopiringa kúnguarhikuarhu. w23.09 20 párr. 1; 23 párr. 11

Enga na tsimani uéxurhinisï nitamapkia engaksï Babilonia anapuecha kʼamajkupka Jerusalénini. Rei Nabukodonosori kʼéri estatuani ma tsánharhispti ka kánikua uandanhiataxapti. Tátsekua arhiaspti iámindu Babilonia anapu jánhaskatiichani ka ístu Danielini eskaksï aiangupiringa ambe enga tsánharhipka ka ambe enga arhikuekeenga. Engaksï no aiangupiringa iáminduechani uándikuapirindi (Dan. 2:3-5). Danieli jatsispti para sóntku úni ambe ma; jimbokaksï úpiringa uánikuecha uarhini. Ísï jimbo, “arhispti reini eska tiempu íntskupiringa paraka úpiringa aianguni ambe enga arhikuekeenga imeeri tsánharhikua” (Dan. 2:16). Danieli uétarhinchaspti kánikua mintsikani Tata Diosïni ka balori jukani jimboka Biblia no uandasïnga eska Danieli antesi úsïreengia uandantani ambe engaksï arhikuekeenga tsánharhikuecha. Danieli uandontskuarhespti imeeri tanimu amiguecha jingoni ka arhiaspti eskaksï mintsita jingoni kómarhipiringa auandarhu anapu Tata Diosïni eska pʼamojkuapiringa ka eska aianguapiringa ambe enga arhikuekeenga inde tsánharhikua (Dan. 2:18). Tata Diosï Jeoba mókukuantaspti ka imeeri jarhuajperata jingoni, Danieli úspti aianguni rei Nabukodonosorini ambe enga arhikuekeenga tsánharhikua. ¡Danieli ka imeeri amiguechaksï úspti tsípiti pakarani! w23.08 2 párr. 4

Ju je eratsentani na engajtsïni xáni marhuachejka tekaantstiini. Tekaantskua, kánikuajtsïni jarhuatasïndi parachi tsípikua jingoni irekani ka parachi no sóntku ikiani. Marhuachesïndijtsïni parachi no xáni pʼamenchani ka parachi sési pʼikuarhenhini. Ístu parachi sánderu sési pájperani máteruecha jingoni ka paraka kúnguarhikua májku kʼéri jauaka. Engachi no sóntku ikiaska enga nema uaaka o uandani ambe ma engachi jucha no tsitijka, nóchi sánderu kʼéri uaaka problemani (Sal. 37:8, nota; Prov. 14:29). Joperu ambe engajtsïni jimbo sánderu marhuachejka, jindeesti eskachi májkueni úni jarhasïnga eska juchaari Taati auandarhu anapu ka sánderuchi andarhierasïnga imani. Tekaantskua sési jásï kualidadi máesti ka kánikuajtsïni marhuachesïndi. Nájkiruka no méntkisï fásiliika tekaantstiini, Tata Diosï Jeobajtsïni jarhuataati xarhatani ini kualidadini. Ka engachi jamberi erokuarhini jauaka tekaantskua jingoni eska niáraaka jimbanhi parhakpini, uaakachi seguru jarhani eska “Tata Diosï Jeobaeri éskuechaksï imeechani exeaxa[ka] engaksï janhanharhijka, imeechani engaksï mintsikajka imeeri ambakiti uékperakuani” (Sal. 33:18). Ísï jimbo, iáminduechachi jatsiska para seguiriini jarhani tekaantstiini. w23.08 21 párr. 7; 25 párr. 16, 17

Santiagu uandaspti eska nájkiruka nema uandapiringa eska jakajkusïnga Tata Diosïni, imeecheri úkuecha jimbo, máteru ambe xarhatani jarhasïreenga (Sant. 2:1-5, 9). Santiagu ístu uandaspti nemeeri enga exepiringa imeeri erachini o pirenchini uétarhinchani jarhani takusï o tʼirekua ambe peru no ma ambe úni para jarhuatani. Nájkiruka ima uandapiringa jakajkuni Tata Diosïni peru jimboka no ma ambe úsïnga para jarhuatani, no ma ambe jimbo marhuapirindi ísï uandani (Sant. 2:14-16). Santiagu Raabiiri ejempluni úraspti para xarhatani eska nema enga mintsikajka, úkuecha jingoni xarhatasïnga (Sant. 2:25, 26). I uarhiti kurhaaspti na enga Tata Diosï Jeoba jarhuatani japka israeliteechani (Jos. 2:9-11). ¿Néna xarhataspi eska mintsikasïreenga Tata Diosï Jeobani? Kuájchakuspti tsimani israeliteechani engaksï espiepka parakaksï no uándikuapiringa. Ini ambe jingoni májkueni eska Abraáni, xarhataspti eska sési jámasïreenga nájkiruka imperfektuepka ka no israeliteeni. I ejemplujtsïni xarhatachesïndi eska kánikua jukaparhakueska úkuecha jingoni xarhatani eskachi mintsikasïnga. w23.12 5, 6 párr. 12, 13

Kristianuechachi no jatsiska para konforme jarhani imani ambejku míteparini enga ma ueenakuarhu jorhenguarhijka Biblieri ambe. Uékasïngachi míteni imani ambe “enga Tata Diosïiriika ka enga jískakata jaka” ka espiritu santujtsïni jarhuataati ísï úni (1 Kor. 2:9, 10). ¿Andijtsïsï no eratsejki imani ambe jorhenguarhini engaksïni jarhuataaka sánderu andarhierani Tata Diosï Jeobani? Pori ejemplu, uaakajtsï jirinhantani na enga Tata Diosï Jeoba ióntki xarhatakuapka imeeri jántspiriichani eska xénchasïreenga ka na enga inde ambe xarhatajka eskaksïni ístu xénchasïnga chánksïni. Ístujtsï úpiringa estudiarini ambe enga Tata Diosï Jeoba uaxastapka paraksï israeliteecha kómarhini ka terukutantani na engachi kómarhijkia iásï Tata Diosï Jeobani. O ístujtsï uaaka sési estudiariuani imani profesiechani enga Jesúsi kumpliriuaka jiáni enga ixú Echerirhu japka ka ístu enga aianhpini jámani japka. Seguru eskajtsï chá kánikua tsitiaka estudiariuani indeni temeechani úraparini Índice de las publicaciones Watch Tower ka Jarhuajperata paraksï Jeobaeri testiguecha estudiarini. Engajtsï inbestigariiska, jarhuataatiksïni parajtsï sánderu mintsikani Tata Diosïni ka uaakajtsï exentani “Tata Diosïiri mímixekuani” (Prov. 2:4, 5). w23.10 18, 19 párr. 3-5

Ju je exeni ambe enga uandapka apostoli Pedru. Pori ejemplu, bersikulurhu 8 ima uandasïndi: ‘kánikua xénchpera je’. Uandakua griegu jimbo enga Pedru úrapka para “kánikua”, arhikuekaxapti eska “kánipasïnga”. Segunda parti bersikulurhu uandasïndi ambe enga újka xénchperakua, úsïndi eskachi puákuantauaka juchaari erachiichani. Uékperakua ísïisti eska takusï ma enga újka kánikua pʼirakuarhini asta ójchakurani no solu ma echakua ni tsimani pekaduechani, sino méntku xáni uánikua. Ixú uandakua ójchakurani arhikuekasïndi méntkisï épuátspentani ísï eska takusï ma na ójchakurajka ambe ma enga jáxeka, uékperakua úsïndi eskachi puákuantauaka máteruechani. Jatsiskachi para kánikua xénchani juchaari erachiichani parachi úni puákuantani engaksï no sési uaaka, nájkirukachi ménisï úkua jukanchaaka ísï úni (Kol. 3:13). Jiáni engachi puákuantajka máteruechani xarhatanchi jarhasïnga eskachi kánikua xénchaasïnga ka eskachi uékasïnga sési pʼikuastani Tata Diosï Jeobani. w23.11 11, 12 párr. 13-15

Jiáni enga rei Josíasi 26 jatiriipka, ueenaspti sési jájkuntani templuni. Jiáni enga templurhu ánchikuarhinhani japka, exenhantaspti libru “enga Tata Diosïiri Leini uandeenga ka enga Tata Diosï Moisésini íntskupka”. Jiáni enga rei Josíasi kurhaapka ambe enga libru uandeenga, jirejiresï úspti ambe ma para kurhajchani ambe enga Tata Diosïiri Lei uandeenga (2 Crón. 34:14, 19-21). ¿Tsitipirindi pʼindeni arhintani Bibliani? Engari ísï úni jakaia, ¿tsitixakiri? ¿Úsïniri ambe ma para no mirikurhiani bersikuluechani engaksï jukaparhakueka para tʼu? Jiáni enga Josíasi 39 jatiripka, imani ambe úspti enga no sési japka ka inde ambe jimbo niáraspti uarhini. Enbesi de kurhakuni Tata Diosï Jeobani eska jarhuatapiringa, ima mismu mintsinharhikuarhispti (2 Crón. 35:20-25). ¿Ambechi jorhenguarhisïni iiri ambe? Eska no arhiparini na engachi xáni jatiriika o na engachi xáni páni jakaia Biblieri ambe jorhenguarhini, méntkisïchi jatsiska para andarhierani Tata Diosï Jeobani. Ka para ísï úni, jatsiskachi para méntkisï kurhakuni jarhuajperata, Bibliani estudiarini ka kurhajchaani konsejuechani ima erachiicheeri engaksï ióni páni jakaia marhuakuni Tata Diosïni. Engachi ísï úska, no xáni fásiliuati imani ambe úni enga no sési jaka ka uaakachi tsípikua jingoni irekani (Sant. 1:25). w23.09 12 párr. 15, 16

Biblia uandasïndi ambakiti ejempluechani uánikua nanakecheri engaksï marhuakupka Tata Diosï Jeobani ka engaksï xéncheenga. Imeechaksï úsïreendi ini ambe “jatsistiksï para pʼíngukuarhini iámindu ambe jimbo ka ístuksï jatsisti para mintsinharhikueni iámindu ambe jimbo” (1 Tim. 3:11). Engari pirenchi máeka engari uátsïika, eratseanta máru pirenchichani engaksï ambakiti ejemplu máeuaka para tʼu ka jánguarhinta májkueni úni eska imeecha. Exea imeeri ambakiti kualidadichani ka tátsekua eratsi na engari uaaka tʼu májkueni járhati kualidadichani jatsiani. Kánikua jukaparhakuesti eska kristianu ma kaxumbitiuaka. Enga pirenchi ma enga kaxumbitiijka kánikua sési pájperasïndi Tata Diosï Jeobani jingoni ka ístu máteruecha jingoni. Pori ejemplu jimboka kaxumbitiiska, ka xénchani imeeri Taati auandarhu anapuni, jánguarhintasïndi úni ambe enga Tata Diosï Jeoba uaxastakia, né enga jatsika para orhejtsïkuni kúnguarhikuani ka ístu familiani (1 Kor. 11:3). w23.12 19 párr. 3-5

Tata Diosï Jeoba uékasïndi eska acheeti xénchaaka témbani, eska exeaka ambe uétarhinchasïni, néna pʼikuarherasïni ka eska sési jauaka Tata Diosï Jeoba jingoni. Jorhenguarhini sési eratsentani, janhanharhiani nanakeechani ka mintsinharhikueni, i ambekini jarhuataati parari ambakiti uámba máeni ka sési orhejtsïkuni familiani. Engari na tembuchaakia úpiringari uájpeechani kánguarhiani. Tata Diosï Jeoba ambakiti ejemplu máesti komu taati ka tʼuri uaaka májkueni úni (Éfes. 6:4). Tata Diosï Jeoba uánikua kʼuiripuechani japarini uandaspti eska xénchasïreenga imeeri Uájpa Jesúsini, ka eska jaiapanhentasïreenga (Mar. 1:11). Engari niáraska taatiini, sési japirindi eskari pʼindeaka arhiani chiiti uájpeechani eskari xénchaasïnga ka felisitariuani engaksï sési ambe uaaka. Taatiicha engaksï Tata Diosï Jeobaeri ejempluni seguiriijka, jarhuataasïndiksï imeeri uájpeechani paraksï jindeeni ambakiti kristianuecha. Engari sési kaaska chiiti familiarhu anapuechani ka kúnguarhikuarhu anapuechani ka pʼindeni arhiani eskari xénchaasïnga ka jukaparharaani, jorhenguarhini jauakari parari tátsekua ambakiti taati máeni (Juanu 15:19). w23.12 28, 29 párr. 17, 18

Májkueni eska iámindu kʼuiripuecha, Tata Diosï Jeobaeri marhuariichajtuchi jatsiasïnga uandanhiateechani ka niárasïngachi pʼamenchani. Ístu, jatsiskachi para tekaantani engajtsïni no sési kámajka imeecha engaksï ikiakujka Tata Diosïiri iretani. Ísïisti, Tata Diosï Jeoba jurajkuati eskachi ménisï no sési jásï ambe nitamakuarhiaka, joperu imajtsïni aiachisïndi eskajtsïni jarhuataaka (Is. 41:10). Uaakachi tsípikua jingoni irekani, no méni jurajkuni Tata Diosïni nájkirukachi no sési nitamakuarhini jauaka jimboka ima juchantsïni jingoni jauaka. Bibliarhu uandasïndi eskajtsïni Tata Diosï Jeoba íntskuaka pínandikua (Filip. 4:6, 7). Niárasïngachi jatsini indeni pínandikua jimbokachi sési pájperasïnga Tata Diosï Jeoba jingoni ka ambe máesti engajtsïni sési pʼikuastajka ka nóchi uandanhiani. Xáni kʼéri ambeesti enga “no ma kʼuiripu újka jánhaskani” o kurhanguni. ¿Ménisïjtsï niáraski mintsita jingoni kómarhini Tata Diosï Jeobani ka tátsekuajtsï ísku pakarani engajtsï exepka eskajtsï nóteru no sési pʼikuarheraxapkia? Indesï jindeeti Tata Diosïiri pínandikua. w24.01 20 párr. 2; 21 párr. 4

Imeecha engaksï xénchajka Tata Diosï Jeobani uékasïndiksï iámu mintsita jingoni kʼéri ambe arhini Tata Diosïiri nombrini. Rei Dabidi kurhangusïreendi eska kʼéri ambe arhini Tata Diosï Jeobaeri nombrini májkueniispka eska kʼéri ambe arhini imani. Uandani imeeri nombriiri ambe jindeesti uandani na enga mítekateeka, imeeri sési járhati kualidadicheeri ka ambakiti ambeeri enga úka. Dabidi uékasïreendi xarhatani eska imeeri Taatiiri nombri pímbinhasïiska ka uékasïreendi kʼéri ambe arhini. Uandaspti eska uékasïreenga méntku iámindu imeeri mintsita jingoni ísï úni. Ka lebiteechajtuksï uékaspti ísï úni ka kʼéri ambe arhisptiksï Tata Diosï Jeobani. Kaxumbikua jingonksï xarhataspti eskaksï no jarhaspka uandakuecha engaksï uétarhijka para kʼéri ambe arhini Tata Diosïiri nombrini enga pímbinhasïika (Neh. 9:5). ¡Kánikua tsípini pʼikuarherapti Tata Diosï Jeoba enga exepka na engaksï lebiteecha xáni mintsita jingoni kʼéri ambe arhipka! w24.02 9 párr. 6

Engajtsï no úska úni ambe engajtsï eratsetini japka, jimboka jukari kʼéri ambeeska para chá, Tata Diosï Jeoba no eratseati eskajtsï chá no méni uaaka úni ambe engajtsï eratsetini jaka (2 Kor. 8:12). Engajtsï exeaka ambe engajtsï úkia. Miá je ambe engajtsï xáni úkia úni. Biblia uandasïndi eska Tata Diosï “jurhimbitku úsïnga” ka eska ʻno mirikurhiauaka chaari úkuechaniʼ (Ebr. 6:10). Ísï jimbo, chájtu asï mirikurhi je ambe engajtsï xáni úkia. Eratsenta je ambe engajtsï xáni úkia úni, komu Tata Diosïiri amigu úkuarhini, aianhpini ka itsï atakuarhini. Ambe engajtsï xáni úkia ióntki parajtsï sánderu marhuakuni Tata Diosïni, xarhatasïndi eskajtsï uaaka sánderu ambe úni ka eskajtsï niáraaka úni ambe engajtsï iásï eratsetini jaka. Tata Diosï Jeobaeri jarhuajperata jingoni chá uaaka ísï úni eskajtsï na eratsetini jaka. Ístujtsï uaaka tsípikuarhini engajtsï exeska na engaksïni jarhuatajka Tata Diosï Jeoba ka újchakurani parajtsï úni ambe engajtsï eratsetini jaka (2 Kor. 4:7). Engajtsï no kuatantaska, kʼérati kóntperateechantsï jatsiauaka (Gal. 6:9). w23.05 31 párr. 16-18

Tata Diosï Jeoba kánikua tsitisïndi xarhatakuani imeeri marhuariichani eska xénchaasïnga ka eska jaiapanheantasïnga. Bibliarhu tsimani xanhari uandantasïndi na enga Tata Diosï arhipka Jesúsini eska imeeri uájpeespka ka eska xénchasïreenga ka ístu eska jaiapanhentasïreenga (Mat. 3:17; 17:5). ¿Nénajtsï pʼikuarherapirini engaksïni Tata Diosï Jeoba arhipiringa eska ima sési pʼikuarherasïnga chánksïni jingoni? Míteskachi eskajtsïni no auandarhu uératini uandajpasïnga, sino imeeri Karakata jimbo. Engachi arhintajka ambe enga Jesúsi arhiapka imeeri chúxapatiichani xénchperakua jingoni, ísïchi pʼikuarherasïnga enajkijtsïni Tata Diosï Jeoba juchantsïni arhini jaki. Jesúsi xarhataspti eska meru ísïiska eska Taati jémba. Ísï jimbo, engachi arhintajka na enga Jesúsi arhiapka imeeri chúxapatiichani eska xénchaasïreenga nájkirukaksï no perfektuepka, úsïngachi eranhaskani eskajtsïni Tata Diosï Jeoba májkueni arhixaka juchantsïni (Juanu 15:9, 15). Engachi no sési ambe nitamakuarhini jauaka nóchi jatsiska para eratseni eskajtsïni Tata Diosï nóteru jaiapanhentasïngia, sánderu sési jiánchisï jatsika para xarhatakuni eskachi kánikua xénchasïnga ka eskachi mintsikasïnga. w24.03 28 párr. 10, 11