Nobiembri

Enga chá kaajka sapiichani, jarhuataa je paraksï imani komentariuecha jingoni prepararikuarhini engaksï uaaka íntspiani. Máru tánguarhikuecharhu, ima ambe exenhasïndi enga delikaduejka, komu problemeecha engaksï temungurhiriicha jatsiajka o néna no niátani ikichakueni jásï ambe, nájkiruka i ambe exenhani jauaka, sapiichaksï uaati komentariini ma o tsimani párrafuecharhisï. Ístu, uaakajtsï jarhuataani chaari sapiichani, paraksï kurhanguni andiksïsï no uaa intsïnhani komentariu ma méni engaksï imeecha tarhataaka jájki. Enga chá aianguaska ini ambe chaari sapiichani, imeechaksï no kómu pʼikuarheraati enga máteru nema intsïnhaska komentariu ka imeecha nómbe (1 Tim. 6:18). Iáminduechachi uékasïnga ambakiti komentariuechani íntspiani engaksï kʼéri ambe arhiaka Tata Diosï Jeobani ka engaksï uinhaperantauaka juchaari erachiichani (Prov. 25:11). Nájkirukachi ménichani uaaka komentariini ambe ma engachi jucha nitamakuarhika, nóchi jatsiska para jukari uandani juchaari ambe (Prov. 27:2; 2 Kor. 10:18). Sánderu sési, jatsiskachi para Tata Diosï Jeobaeri ambe uandani, imeeri Karakateeri ambe ka imeeri kúnguarhikueri ambe (Apok. 4:11). w23.04 24, 25 párr. 17, 18

Parachi tsínharhitini jarhani ka sési eratsentani iámu ambe, ístuchi jatsiska para xénchpeni (Mat. 22:37-39). Pori ejemplu, xénchani Tata Diosïni jarhuatasïndijtsïni parachi seguiriini aianhpini nájkirukachi problemechani jatsiauaka indeni ambe jimbo (2 Tim. 1:7, 8). Ístu, jimbokachi xénchaasïnga kʼuiripuechani engaksï no májkueni ambe jakajkujka eska jucha, aianguasïngachi ambe engachi jakajkujka telefonu jimbo o karta jimbo. Nóchi eratsesïnga eskaksï no méni uaaka mójtakurhini. Sánderu sési, erokuarhisïngachi eskaksï mójtakurhiaka ma jurhiani ka eskaksï imani ambe uaaka enga sési jaka (Ezeq. 18:27, 28). Ístuchi xénchaasïnga juchaari erachiichani ka xarhatasïngachi indeni ambe engachi sési ambe arhijperajka ka engachi uinhaperpentajka (1 Tes. 5:11). Sondaduecha engaksï kompanieruejka jarhuajperasïndiksï. Juchachi no méni uékantku no sési úkuapiringa juchaari erachiichani, ka engajtsïni no sési ambe úchipiringa nóchi májkueni úkuantapiringa (1 Tes. 5:13, 15). Máteru ambe engachi uaaka úni parachi xarhatani eskachi xénchaasïnga erachiichani, jindeesti janhanharhiani imeechani engaksï orhejtsïkujka kúnguarhikuani (1 Tes. 5:12). w23.06 10 párr. 6; 11 párr. 10, 11

Ma ambe engachi uaaka úni parachi sánderu mintsikani eska jimbanhi parhakpini ma jauaka, jindeesti eratsentani euajpintskuani. Euajpintskua, jarhuatasïndijtsïni seguru jarhani eska ambe enga Tata Diosï aiatspejka ísï úkuarhiaka. Uétarhisïndi eskachi tiempu arhutaaka parachi eratsentani ambe enga xáni úka Tata Diosï Jeoba parajtsïni euajpintani ka andisï ísï ú. Ísïchi sánderu seguru jauaka eska Tata Diosï Jeoba uaaka eska ambakiti parhakpini ma jauaka, nani engachi uaaka irekani para méntkisï. ¿Andichisï ísï uandajki? Ju je eratsentani ambe enga xáni úka Tata Diosï Jeoba parajtsïni euajpintani. Ima jurajkuspti eska imeeri máechakua Uájpa, enga imeeri sánderu ambakiti amigueka, Echerirhu jupiringa para ísï andajpenuni komueska kʼuiripu ma enga perfektuepka. Enga Jesúsi ixú japka, kánikua no sési nitamakuarhispti ka ístu kómu uarhispti. Ísïisti, Tata Diosï Jeoba kánikua maiampisti parajtsïni euajpintani. Ima kánikua xénchpesïndi, ísï jimbo, no méni jurajkupirindi eska imeeri Uájpa xáni kómu nitamakuarhipiringa parachi jucha ma ratujku sési irekani (Juanu 3:16; 1 Ped. 1:18, 19). Jimboka Tata Diosï Jeoba kánikua maiampiska, ima uaati eskachi uaaka irekani para méntkisï jimbanhi parhakpinirhu. w23.04 27 párr. 8, 9

¿Tata Diosï Jeoba uékasïni tsítaantani uarhiriichani? Jo. Ima úspti eskaksï uánikua achamasïicha engaksï Bibliani karaka uandapiringa tsíntskueri ambe (Is. 26:19; Apok. 20:11, 12; Apok. 20:13). Ka enga Tata Diosï Jeoba aiatspejka ambe ma, meru ísï úsïndi (Jos. 23:14). Tata Diosï mintsita jingoni uékaxati tsítaantani imeechani engaksï uarhikia. Ju je eratsentani ambe enga uandapka Jobu. Ima seguru jarhaspti eska, enga uarhipiringa, Tata Diosï Jeoba kánikua tsitipiringa ménderu exentani (Job 14:14, 15, nota). Ka Tata Diosï májkueni pʼikuarherasïndi imeeri marhuariicha jimbo engaksï uarhikia. Uékaxati tsítaantani ka eskaksï nóteru pʼamenchaakia ka eskaksï tsípikua jingoni irekaaka. ¿Ka ambe úkuarhia iámindu imani kʼuiripuecha jingoni engaksï no andajkuarhika míteni Tata Diosï Jeobaeri ambe? Juchaari Taati enga xáni xénchpetiika ístu uékasïndi tsítaantani (Úku. 24:15). Ima uékasïndi eskaksï imeecha niáraaka jindeeni imeeri amiguecha ka eskaksï irekaaka para méntkisï Echerirhu (Juanu 3:16). w23.04 9 párr. 5, 6

¿Ambejtsï uaa úni parajtsï sánderu mintsikani imani ambe engajtsï erokuarhini jaka? Engajtsï erokuarhini jaka irekani para méntkisï Echerirhu, arhinta je ambe enga Biblia uandajka Paraisueri ambe ka eranhaska je eskajtsï jima jarhaskia (Is. 25:8; 32:16-18). Engachi pʼindeaka eratsentani na engachi irekaaka jimbanhi parhakpinirhu, uandanhiateecha engachi jatsiauaka ‘ariskuksï nitamaati ka no xáni kʼéri ambeuatiksï’ (2 Kor. 4:17). Ambe enga uaaka Tata Diosï Jeoba sánderu orhepatini uinhaperantasïndijtsïni. Ístujtsïni íntskustia iámindu ambe engachi uétarhinchajka parachi uinhapiti jarhani. Ísï jimbo, jiáni engajtsï úkua jukanchaaka kumplirini responsabilidadi ma, engajtsï tsʼéjkukua ma jatsiaka o parajtsï seguiriini tsípikua jingoni marhuakuni Tata Diosï Jeobani, mintsita jingoni kómarhi je Tata Diosïni ka Bibliani jorhenguarhi je parakaksïni ima jarhuataaka. Ístu, jiókuarhi je engaksïni máteru erachiicha uékaaka jarhuataani ka mintsika je imani ambe enga no ióni jimbo úkuarhiaka. Engajtsï ísï úska, Tata Diosï Jeobaksïni íntskuati uinhapikua “enga xáni kʼéri ambeeka” “parajtsï chá seguiriini jarhani tekaantani ka tsípikua jingoni jámani ka parajtsï no kuatantani” (Kol. 1:11). w23.10 17 párr. 19, 20

Uaakachi uánikua ambe jimbo diosmaiamukua arhini Tata Diosïni. Ju je diosmaiamukua arhini Tata Diosïni iámindu ambakiti ambe jimbo, jimboka imasï újka eskachi jatsiaka ambakiti ambe (Sant. 1:17). Pori ejemplu, úpiringachi arhini na engachi xáni agradesidu jaka ini xáni sési jásï Echeri jimbo, xáni sési jásï ambe jimbo enga kueraaka, juchaari tsípikua jimbo, juchaari familia jimbo, juchaari amiguecha jimbo ka imani ambe jimbo engachi erokuarhini jaka. Ístuchi uékasïnga diosmaiamukua arhini, jimbokajtsïni sésikua íntskusïnga parachi jucha sési pájperani imani jingoni. ¿Ambe ka ambe jimbochi uaa agradesidu jarhani Tata Diosï Jeoba jingoni? Jamberichi úkua jukanchajka indeni ambe exeni jimbokaksï iásï kʼuiripuecha no pʼindeska diosmaiamukua arhijpini. Kʼuiripuechaksï sánderu uandanhiasïndi imani ambe jimbo engaksï uéjka jatsini ka eska agradeseriini imani ambe jimbo engaksï jatsikia. Engachi juchajtu májkueni jámaska, juchaari kómarhikuecharhu puro kurhajkuarhini japiringachi ambe ma. Ka parachi no indeni ambe úni, jatsiskachi para jánguarhintani agradesidueni ka diosmaiamukua arhini Tata Diosï Jeobani iámindu ambe jimbo engajtsïni íntskujka (Luk. 6:45). w23.05 4 párr. 8, 9

Tata Diosï Jeobajtsïni kánikua xénchasïndi ka no uékasïndi eskachi no sési nitamakuarhiaka (Is. 63:9). Joperu ima no úsïndi eskachi no jatsiauaka problemechani, enga Biblia ísï terukutantajka komueska iurhekuecha ka chpiri ambe (Is. 43:2). Joperu ambe engajtsïni aiachijka jindeesti eskajtsïni ima jarhuataaka ‘parhikuani’ imani uandanhiateechani engachi jatsiauaka ka no jurajkuati eskajtsïni inde ambe ójkutaaka parachi seguiriini marhuakuni. Ka ístujtsïni Tata Diosï Jeoba íntskuati imeeri espiritu santuni parachi úni tekaantani (Luk. 11:13; Filip. 4:13). Ísï jimbo, uaakachi seguru jarhani eska ima méntkisïjtsïni íntskuaka ambe engachi uétarhinchaaka parachi úni tekaantani ka no méni jurajkuni imani. Tata Diosï Jeoba uékasïndi eskachi mintsikaaka imani (Ebr. 11:6). Ménisïchi uaaka ísï pʼikuarherani eskaksï juchaari problemeecha kánikua úkua jukaska ka úndani eratseni eskajtsïni Tata Diosï Jeoba no jarhuataaka. Joperu Biblia uandasïndi eska “Tata Diosïiri uinhapikua jingoni úsïnga[chi] kʼéri barda ma jimbo karhanharhikuni” (Sal. 18:29). Ísï jimbo, ju je no méni eratseni eska Tata Diosï Jeoba nójtsïni jarhuataaka, sánderu sési ju je kómarhini iámu mintsita jingoni, mintsikaparini eskajtsïni ima mókuchiantauaka juchaari kómarhikuechani (Sant. 1:6, 7). w23.11 22 párr. 8, 9

¡Xáni sési jásï ambe enga Biblia uandajka! I uandakuechaksï xarhatasïndi eska temungurhiri ma uaaka kánikua uékperani ka para méntkisï. Uétarhisïndi eska temungurhiri ma kánikua jánguarhintaaka paraksï méntkisï uékperani. Ju je exeni ejemplu ma. Paraka chpiri ma no patakuarhiaka, uétarhisïndi jatsikuni jarhani chkari, engachi no ísï úska chpiri pátakuarhiati. Májkueni úkuarhisïndi temungurhiri ma jingoni: uétarhisïndi eskaksï jánguarhintaaka paraksï seguiriini jarhani uékperani. Peru ménichani enga uandanhiata ambe jarhajka sentabu ambe jimbo, pʼamenchakuecha ambe jimbo o jimbokaksï úkua jukanchasïnga sapiichani tʼarhexeraani, temungurhiri ma úpirindi nóteru xáni uékperania. Paraka “Tata Diosï Jeobaeri chpiri” no patakuarhiaka, acheeti ka uarhiiti jatsistiksï para jánguarhintani sési pájperani Tata Diosï jingoni. w23.05 20, 21 párr. 1-3

Nájkirukaksï juchaari taatiicha balori jukaaka ka animarintsïni parachi juchajtu balori jukani, imeechajtsïni no uaati íntskuni imeecheeri balori, jatsiskachi para úni ambe ma. Balori jukani ísïisti eska sési jorhenguarhini úni ambe ma. Parari sési jorhenguarhini úni ambe ma, jatsiskari para exeni imani engakeni jorhendani jaka ka májkuendi úni eska ima. Ísï jimbo, parachi balori jukani jatsiskachi para exeani imeechani engaksï balori jukaka ka májkueni úni. Májkueni eska Danieli jatsiskachi para sési estudiarini Bibliani, someni kómarhini Tata Diosï Jeobani ka mintsita jingoni, parachi úni imeeri amigueni, ka mintsikani eskajtsïni Tata Diosï méntkisï jarhuataaka. Engachi iámindu ini ambe úska, jiáni engachi jatsiaka para xarhatani na engachi xáni mintsikajka Tata Diosïni, balorichi jukaaka. Kʼuiripuechaksï respetariuasïndi imeechani engaksï balori jukajka ka ístu úsïndi eskaksï máteruecha uékaaka míteni Tata Diosï Jeobaeri ambe. Ísï jimbo, kánikua marhuasïndi eskachi jánguarhintaaka balori jukani. w23.08 2 párr. 2; 4 párr. 8, 9

Griegu jimbo uandakua enga ixú tradusirikuarhijka “exeni” úrakuarhesïreendi enga kʼuiripu ma exeni jarheenga sini ambe ma meru oruespi o plata. Ka juchajtuchi jatsiska para sáno májkueni ambe úni, jatsiskachi para exeni eska ima ambe engachi kurhaajka o arhintani meru ísïiska. Ka kánikua jukaparhakuesti eskachi jucha ísï uaaka enga na niárani jauakia kʼéri miskuarhita. Enbesi dechi jakajkuni iámindu ambe engachi arhinhajka, ju je sési eratsentani parachi terukutantani ambe engachi arhintajka o kurhaani imani ambe jingoni enga Biblia ka Tata Diosï Jeobaeri kúnguarhikua uandajka. Engachi ísï úska, méntkujtsïni no uaati enganiariini demoniuecha imani ambe jingoni engaksï uandaaka (Prov. 14:15; 1 Tim. 4:1). Míteskachi eska Tata Diosï Jeobaeri kúnguarhikua tsípiti pakaraaka kʼéri mískuarhitarhu, peruchi no míteska ambechi úkuarhinchaa pauani jucha (Sant. 4:14). Iasea engachi tsípiti pakaraaka kʼéri mískuarhitarhu o engachi antesi uarhiaka, Tata Diosï Jeobajtsïni íntskuati tsípikua para méntkisï engachi no méni jurajkuska. Enga jamberi niáraaka inde jurhiatikua, ju je méntku miáni jarhani ambe engachi erokuarhini jaka ka ju je méntkisï preparadu jarhani para Tata Diosï Jeobaeri jurhiatikua. w23.06 13 párr. 15, 16

Nóchi míteska na engaksï kumplirikuarhiaka máru Biblieri profesiecha (Dan. 12:8, 9). Peru nájkirukachi no uaaka sési kurhanguni na enga kumplirikuarhiaka profesia ma, inde ambe no arhikuekasïndi eska no niáraaka ísï úkuarhini. Seguruchi jarhaska eskajtsïni Tata Diosï sánhani arhiaka aianguni ambe engachi jatsika para míteni, ísï eska na úpka ióntki. Jiáni, nasioniichaksï uandaati “Pínandisti ka sésichi nitamaxaka” (1 Tes. 5:3). Ka jiáni, parhakpinirhu anapu juramutiichaksï ueenaati no sési kaani no jurhimbiti reliojiniichani ka kʼamajkuauatiksï (Apok. 17:16, 17). Tátsekuaksï ueenaati no sési kámani Tata Diosïiri iretani (Ezeq. 38:18, 19). Ka jiáni ueenakuarhiati Armajedoni (Apok. 16:14, 16). Seguruchi jarhaska eska i ambe sóntku úkuarhiaka. Enga jamberi niáraaka i jurhiatikua, ju je pendienti jarhani Biblieri anapu profesiecha jingoni ka ístu jarhuataani kʼuiripuechani paraksï májkueni úni, engachi ísï úska xarhatakunchi jauaka juchaari Taati auandarhu anapuni eskachi agradesidu jarhaska. w23.08 13 párr. 19, 20

Enga apostoli Pablu uandapka mintsikakueri, erokuarhikueri ka uékperakueri, kʼamaraspti uandaparini “joperu uékperakuasï sánderu jukaparhakueti” (1 Kor. 13:13). ¿Andisï ísï uandapi? Jimboka sánderu orhepatini nóteruchi uétarhinchaakia mintsikani Tata Diosïiri aiatsperakuechani jimbanhi parhakpinirhu jimboka ísï úkuarhiakia iámindu ambe. Joperuchi méntkisï jatsiaka para xénchani Tata Diosï Jeobani ka kʼuiripuechani, ka inde uékperakua seguiriuati kániipani para méntkisï.Ístu, xarhataakachi eskachi sési jimbo kristianueska. Jesúsi arhiaspti imeeri apostoliichani: “Engajtsï ísï úska, iáminduechaksï míteati eskajtsï juchiiti chúxapatiiska: engajtsï xénchperaaka máteru ka máteruni jingoni” (Juanu 13:35). Ístu, uékperakua úsïndi eskachi márku úkuarhintatini jauaka, jimbosï Pablu uandapti eska “uékperakuasï újka eskaksï iáminduecha uaaka sési pájperani” (Kol. 3:14). Apostoli Juanu karakuaspti imeeri erachi jémbeechani: “Ima enga xénchajka Tata Diosïni, ístu jatsisti para xénchani erachi jémbani” (1 Juanu 4:21). Engachi xénchajka juchaari erachiichani, xarhatani jarhasïngachi eskachi xénchasïnga Tata Diosï Jeobani. w23.11 8 párr. 1, 3

Biblia uandasïndi eskachi kristianuecha karrerarhu ma niraxaka. Imeecha engaksï kʼamaraaka, andaatiksï tsípikua para méntkisï (2 Tim. 4:7, 8). Jatsiskachi para jánguarhintani xáni eskachi xáni uaaka parachi seguiriini uiriini, jimbokachi andakueraxakaia ini karrerani. Apostoli Pablu uandaspti ambe engajtsïni jarhuataaka parachi juchajtu májkueni úni. Ima uandaspti: “Ju je jurajkuni iámindu indeni ambe engajtsïni kuatajkujka ka pekaduni engajtsïni sóntku jupikajka, ka ju je no kuatantani parachi seguiriini jarhani uiriini indeni karrerarhu engachi jimbo nirani jaka”. ¿Arhikuekaxapi Pablu eskachi kristianuecha no ma ambe jatsiska para páni karrerarhu? Nómbe, sánderu sési, arhikuekaxapti eskachi no jatsiska para páni imani ambe engajtsïni ójkutajka. Parachi seguiriini karrerarhu, jatsiskachi para exeni ambechi páxaki ka jirejiresï jurajkuni imani ambe engajtsïni ójkutajka. Joperu jarhasti máru ambe enga uétarhijka eskachi paaka ka nóchi jatsiska para jurajkuni indeni ambe. Engachi jurajkuaska, nóchi uaaka andani karrerani (2 Tim. 2:5). w23.08 26 párr. 1, 2

Engachi kurhangujka ka nóchi inchandimeni, sánderu fásiliisïndi respetariini na engaksï máteruecha eratsejka. Pori ejemplu, máru pirenchiichaksï tsitisïndi atanharhintani ka máteruecha nómbe. Ka máru kristianuechaksï sési exesïndi alkoli sáni arhani, peru máteruechaksï no arhasïndi. Iáminduechachi uékasïnga kuidarikuarhini parachi no pʼamenchani, peruchi no iáminduecha májkueni ambe erakusïnga parachi kuidarikuarhini. Engachi eratseska eska sánderu sési jarhaska ambe engachi jucha újka ka inchandimentanchi paraksï máteruechajtu májkueni úni, úpiringachi úni eskaksï máteruecha no sési exeaka i ambe, ka inde ambe úpirindi úni eska kúnguarhikuarhu nóteru sési pájperanhaakia (1 Kor. 8:9; 10:23, 24). Tata Diosï Jeobajtsïni no íntsaasïndi juramukuecha parajtsïni arhini na engachi jatsika para xukuparhani, perujtsïni prinsipiuechani íntsaasïndi. Na engachi xukuparhajka jatsisti para kʼéri ambe arhini Tata Diosïni, ka eskachi xarhataaka eskachi ima jásï kʼuiripueska engachi kurhangujka, engachi “ambakiti eratsekua” ma jukaka ka ʻkaxumbitiiniʼ (1 Tim. 2:9, 10). Nóchi uékasïnga eskajtsïni máteruecha méntku exeni jauaka juchaari xukuparhakua jimbo. Biblieri prinsipiuechajtuksï uaati jarhuataani orhejtsïkutiichani paraksï no imeecha juramuni na engaksï jatsika para máteruecha xukuparhani ka újtsïntani. w23.07 23, 24 párr. 13, 14

Tata Diosï Jeoba xarhatachesïndijtsïni ambe engachi uaaka úni parachi sési irekani sánderu orhepatini. Imeecha engaksï jiókuarhijka pʼímarperakuani ‘uarhiitiiri enga no jánhastiika’ ka enga uinhachaparini jámajka, uékasïndiksï ísku jándikua ambe niátani jimbokaksï ísï exesïnga komueska áspiti ambe. Ísïisti, imeechaksï ‘Tumbarhu inchatsekurhitini’ kʼamaraati (Prov. 9:13, 17, 18). Joperu, ¡kánikua sési nikuasïndi imeechani engaksï jiókuarhijka pʼímarperakuani ‘ambakiti jánhaskakueri’! (Prov. 9:1). Ísïisti, jorhenguarhixakachi xénchani imani ambe enga Tata Diosï Jeoba xénchajka ka kurhunhini imani ambe enga ima kurhunhijka (Sal. 97:10). Ístu, kánikuachi sési pʼikuarherasïnga pʼímarhiani máteruechani paraksï jorhenguarhini ambakiti jánhaskakueri, ísïiskachi komueska ima jántspiriicha enga Proverbios kapitulu 9 uandajka engaksï “iretarhu iauani karhakua uératini uinhachajka”. Májkueni eska imeecha, juchajtuchi uandasïnga: “¡Iámindu imeecha engaksï nótki jorhenajka, juue je ixú!”. Ísï jimbo, jucha ka iámindu imeecha engaksï jiókuarhijka ini pʼímarperakuani, uánikua kóntperatechanchi jatsiasïnga iásï, joperu no iásïjku, ístuchi sánderu orhepatini uánikua kóntperatechani jatsiauaka. Engachi seguiriska jámani “xanharu jimbo enga jánhaskakua jaka”, uaakachi irekani para méntkisï (Prov. 9:3, 4, 6). w23.06 24 párr. 17, 18

¿Nénajtsï pʼikuarherasïni engaksïni ánchikuarhitarhu o eskuelarhu kurhamarhijka ima amberi engachi jakajkujka? ¿Chésïntsï? Uánikuechachi ísï pʼikuarherasïnga. Peru i járhati kurhamarhikuechajtsïni uaati jarhuatani parachi míteni ambe jakajkusïni ima kʼuiripu ka ambe eratsesïni juchaari ambe. Ístujtsïni jarhuatasïndi parachi úni aianguani Tata Diosïiri ambe. Perujtsïni nema úpirindi kurhamarhini ambe ma nomasi parachi arhirperani. Ka i ambejtsïni no jatsisti para ísku pakatani. Jamberijtsïni kʼuiripu kurhamarhijti indeni ambe jimboka máteruechani kurhajchaska juchaari ambe uandani (Úku. 28:22). Ístu irekaxakachi “últimu jurhiatikuechani jimbo”, tiempu ma jimbo engaksï uánikua kʼuiripuecha ʻnóksï nani máru uékajkaʼ kurhanguni ka ʻno sésiksï jámaniʼ (2 Tim. 3:1, 3). Jamberijtsï kurhamarhikuarhijka nénajtsï uaa iátsitakuarhu jámani ka no sóntku ikiani engaksïni nema ikiatinku kurhamarhiaka ima amberi engachi jakajkujka. Jarhasti kualidadi ma engaksïni jarhuataaka, jindeesti sési kámpini. Nema enga sési kámpijka, no sóntku ikiasïndi ka úsïndi pʼíngukuarhini jiáni engaksï máteruecha ikiatani uéjka o enga no mítejka néna mókuntani ambe ma. w23.09 14 párr. 1, 2

Ménichantsïni Tata Diosï Jeobaeri kúnguarhikua arhisïndi eskachi no tsitiaka jatsikuarhekua ambe ka nijtu máteru ambe engajtsïni uaaka no sési ambe úrani (Is. 48:17, 18; 1 Tim. 6:9, 10). Tata Diosï Jeoba seguiriini jauati úraani kʼuiripuechani paraksï orhekupani imeeri iretani jiáni enga kánikua no sési nitamakuarhinhaaka ka ístu jiáni enga tata Jesukristu juramuni jauakia Mili Uéxurhini. ¿Seguiriinchi jaua kurhajchani Tata Diosïni nájkirukachi jatsiaka para ma ladu peerani imani ambe engachi tsitijka? Engachi iásï kurhandiraaka, sánderu fásiliuati eskachi jiántu kurhandiraaka. Ísï jimbo, ju je seguiriini úni imani ambe engajtsïni Tata Diosï Jeoba arhijka ka ambe engajtsïni arhijka imeecha enga Tata Diosï Jeoba erakuaka parajtsïni kuidariini (Is. 32:1, 2; Ebr. 13:17). Uánikua ambe jarhasti engachi jimbo uaaka mintsikani Tata Diosï Jeobani engajtsïni orhechepajka. Imajtsïni jarhuatasïndi parachi no méni jurajkuni ka parachi úni irekani para méntkisï jimbanhi parhakpinirhu. w24.02 25 párr. 17, 18

Apostoli Pablu kánikua sési pʼikuarherasïreendi marhuakuni Tata Diosï Jeobani, nájkiruka no méntkisï fásiliipka. Mémindu iauanisï niraspti biajarini nájkiruka no fásiliipka. Indeni biajicharhu ménichani peligru pasariispti “iurhekuecharhisï” ka ístu “kuarhukpitiichani jingoni”. Ka ménichani imeeri enemiguechaksï kánikua no sési kámaspti (2 Kor. 11:23-27). Ka ístu, imeeri erachiichaksï no méntkisï agradeserikusïreendi ambe enga ima xáni ueenga para jarhuataani (2 Kor. 10:10; Filip. 4:15). ¿Ambe jarhuataspi Pabluni para seguiriini marhuakuni Tata Diosïni? Ima uánikua ambe jorhenguarhispti na enga jásïika Tata Diosï Jeoba jimboka jorhenguarhisïreenga Tata Diosïiri Karakatani ka ístu imani ambe jimbo enga nitamakuarhipka. Seguru jarhaspti eska Tata Diosï Jeoba xénchasïreenga (Rom. 8:38, 39; Éfes. 2:4, 5). Pablu niáraspti kánikua xénchani Tata Diosïni. Ka indeni ambe jimbo marhuakuaspti Tata Diosïiri míndakateechani ka seguiriispti marhuakuani (Ebr. 6:10). w23.07 9 párr. 5, 6

Sáno méntkisï kʼuiripuechaksï kurhangusïndi eska uétarhisïnga eskaksï jauaka juramutiicha ka eskachi jatsiska para kurhajchaani máru leiichani engaksï ‘juramutiicha’ peeraajka. Joperu engaksï no tsitijka leini ma oksï ísï exeni eska no sési jarhaska, nóteruksï uékasïndia kurhajchaani. Biblia uandasïndi eskaksï kʼuiripuecha kómu nitamakuarhisïnga juramutiicheeri kulpa jimbo, eskaksï juramutiicha Satanásiiri jájki jimbo jarhaska ka eskaksï no ióni jimbo kʼamajkunhaaka (Sal. 110:5, 6; Ecl. 8:9; Luk. 4:5, 6). Joperu ístu uandasïndi eska “ima enga no újka ambe engaksï juramutiicha uandajka, no úni jarhasïndi ambe enga Tata Diosï uaxastakia”. Iásï Tata Diosï Jeoba jurajkuxati eskaksï jauaka juramutiicha paraka iámindu ambe sési jauaka ka ima uékasïndi eskachi respetariuauaka. Ísï jimbo, jatsiskachi para íntsaani ‘iáminduechani ambe engachi jatsika para íntsaani’ ka inde ambe arhikuekasïndi impuestu maiampini, respetariuani ka kurhajchaani (Rom. 13:1-7). Jamberichi ménisï ísï exeaka enajkijtsïni no káni sési nichea engachi kurhajchaaka leini ma o eskachi kánikua maiampiaka, ochi jamberi eratseni eskajtsïni gobiernu jukari kurhachexaka. Joperuchi jucha kurhajchasïnga Tata Diosï Jeobani, ka ima uékasïndi eskachi kurhajchauaka juramutiichani, peru jiáni engajtsïni kurhacheni jauaka úni ambe ma enga Tata Diosï no sési exejka, nóchi jatsiska para kurhajchaani (Úku. 5:29). w23.10 8 párr. 9, 10

Enga Sansóni andajpenupka, filisteuechaksï juramuxapti Israeli ka kánikuaksï no sési kaasïreendi kʼuiripuechani (Juec. 13:1). Jimbokaksï filisteuecha xáni no sési kámpisïreenga, israeliteechaksï kánikua no sési nitamakuarhisïreendi. Tata Diosï Jeoba, Sansónini erakuspti “paraka ueenapiringa pʼímutantani Israelini filisteuecheeri” (Juec. 13:5). Sansóni jatsispti para mintsikani Tata Diosï Jeobani. Ma jurhiatikua uánikua sondaduecha engaksï Filistea anapuepka nirasptiksï Leí, enga jamberi Judáisï pakareenga paraksï Sansónini jupikani. Judá anapu achamasïichaksï kánikua chéspti. Mismu israeliteechaksï uinhamu jótaspti tsimani sïndariicha jingoni engaksï jimbanhiipka ka pásptiksï filisteuecha jingoni (Juec. 15:9-13). Peru “Tata Diosï Jeobaeri espiritu íntskuspti uinhapikua” ka Sansóni úspti katsïkuani sïndariichani. Tátsekua “exentaspti burrueri kʼénchenderakua ma enga nótki kʼarhini japka”, jupikaspti... ¡ka imani jingoni 1, 000 filisteuechani uándikuaspti! (Juec. 15:14-16). w23.09 2 párr. 3, 4

Tata Diosï Jeoba ʻméntkisï ísï eratsekata jatsisptiaʼ ambe enga úpiringa, ka Bibliarhu, imajtsïni sánhani arhisti aianguni ambe enga uaaka. Ka méntkisï sési uérakusïndi iámindu ambe jimboka “ima úska iámindu ambe paraka úkuarhiaka ambe enga ima eratsetini jaka” (Prov. 16:4). Ka ambe enga Tata Diosï Jeoba újka, jindeesti para méntkisï. Peru, ¿ambe eratsetixaki úni Tata Diosï Jeoba, ka ambe xáni mójtakuskia paraka úkuarhiaka inde ambe? Tata Diosï Jeoba arhispti orheta temungurhirini: “Kánguarhia je sapiichani, ka uánikua úkuarhi je, ka uinira je echerini ka ánchita je, ka juramukua je […] iámindu animaliichani engaksï echerirhu jámajka” (Gén. 1:28). Ísïisti, Adáni ka Eba nóksï kurhajchaspti Tata Diosï Jeobani ka indeni ambe jimbo iámindu kʼuiripuechaksï pekadoriisti, peru inde ambe no ústi eska Tata Diosï Jeoba nóteru uaakia ambe enga uéjka. Ima uaati ambe enga eratsetini jaka, joperu iásï ménderuenia. Tata Diosï jirejiresï uandaspti eska Reinu ma uaxastapiringa auandarhu paraka úkuarhipiringa ambe enga ima eratsetini japka ueenakuarhu kʼuiripuecha jingoni ka Echerini jingoni (Mat. 25:34). w23.10 19, 20 párr. 6, 7

Jeoba ístujtsïni uaati jarhuatani juchantsïni parachi no chkétakuarhini. Ménichanisï i ambe uaati kánikua difisiliini, ka sánderia engachi ióni páni jakaia jurajkuni ambe ma enga no sési jaka. Ka jamberichi eratsejka eska inde ambe, sánderu kʼéri ambeeska ka eska ima ambe enga apostoli Pedru úpka. Perujtsïni Tata Diosï Jeoba uaati íntskuni imeeri uinhapikuani parachi úni orhepani uérani (Sal. 94:18, 19). Ju je ejemplu ma exeni erachiiri ma enga antesi de Tata Diosï Jeobaeri ambe míteni omoseksualiipka. Nájkiruka tátsekua ima nóteru niáteengia indeni ambe, ménichanisï eratsesïreendi no sési jásï ambe. ¿Ambe jarhuataspi para seguiriini jánguarhintani jurajkuni indeni ambe? Ima uandasïndi: “Tata Diosïjtsïni íntskusïndi uinhapikua”. Ka ístu ini ambe uandasïndi: “Tata Diosï Jeobaeri espiritu jingoni jorhenguarhiska eska ma úsïnga ísï irekani eska Tata Diosï na uéjka”. Ka ístu uandasïndi: “Tata Diosï Jeobareni jurajkusti marhuakuni [...], ka nájkirukani no perfektueka, imarini seguiriixati imeeri uinhapikua íntskuni”. w23.09 23 párr. 12

Engari tumbi sapichu máeka, miá eskari jatsiska para kánikua jánguarhintani parari úni kristianu máeni enga jánhaskatiika. Jatsiskari para ambakiti ejempluechani exeani, jorhenguarhini sési eratseni, mintsinharhikueni, jorhenguarhini máru ambe úni ka prepararikuarhini para sánderu orhepatini. Engari eratsejka ambe engari jatsika para úni, jamberiri ísï pʼikuarherajka enajkiri no uaa úni indeni ambe. Joperu asï no sési pʼikuarhera, ¡uaakari ísï úni! Asï mirikurhi eskakeni Tata Diosï Jeoba uékasïnga jarhuatani (Is. 41:10, 13). Ístu erachiicha ka pirenchiicha engaksï chiiti kúnguarhikuarhu jaka, méntkisïksïni uaati jarhuatani. Engari niáraaka imani ambe úni enga Tata Diosï Jeoba uéjka, sésiri irekuarhiaka ka kánikuari tsitiaka. Juchaksïni kánikua xénchasïnga ka uékasïngachi eskakeni Tata Diosï Jeoba seguiriuaka jarhuatani parari úni jindeeni kristianu ma enga jánhaskatiika. w23.12 29 párr. 19, 20

Jánguarhinta je sési jásï ambe exekuani máteruechani ka no imani ambejku engaksï no sési újka. Eranhaska je eska chá tsípikuarhixaka máru erachiichani jingoni ka fotuchi ma pʼitasïnga nani engaksï iámindu jaka ka jimboka chá uékasïnga ambakiti fotu ma jatsini, chájtsï tanimu fotuechani pʼitaasïnga. Perujtsï exesïnga eska fotu ma jimbo erachi ma no káni sési uéraska, ¿no ísïiski eskajtsï borrarisïnga ka imeechantsï pakataani engaksï iáminduecha sési uéraka? Sáno méntkisï miántasïngachi ambakiti ambe engachi nitamakuarhika juchaari erachiicha jingoni, peru ju je eranhaskani eska jiáni erachi ma uandaspka o úspka ambe ma enga no sési japka, ¿ambejtsï uaa chá? ¿Andichisï no mirikurhijki ísï eskachi na borrarijka fotu ma? (Éfes. 4:32). Úsïngachi mirikurhini, jimbokachi sánderu miántasïnga na engachi sési nitamakuarhijka imani jingoni. Sánderu sésiisti miántani na engachi sési nitamakuarhika erachini jingoni. w23.11 12, 13 párr. 16, 17

Iásï anapu textu jimbo apostoli Pablu arhikuekaxapti eskaksï pirenchicha jatsispka para sési mórhekuarhini ka eratsentanksï nénaksï pʼikuastaua máteruechani. Kánikuachi sési pʼikuarherasïnga engachi exeajka pirenchichani engaksï jánhaskatiika ka sési xukuparhani. Jánhaskakua, jindeesti máteru kualidadi engaksï pirenchiicha jatsika para xarhatani. I kualidadi májkueniisti eska sési eratseni, i ambe arhikuekasïndi exeni ambe enga sési jaka ka ambe enga no sési jaka ka jiájkani kʼóru imani ambe erakuni úni enga sési jauaka. Ju je exeni Abigaíliiri ejempluni. Imeeri acheeti no sáni eratsekua jingoni úspti ambe ma ka ima exespti eskaksï kánikua no sési kʼamarhukupiringa iámindu imeecha engaksï imeeri kʼumanchikuarhu irekapka. Abigaíli jirejiresï úspti ambe ma ka jimboka sési eratsespka, nóksï ambe ma úkuarhinchaspti (1 Sam. 25:14-23, 32-35). Jánhaskakua jarhuatasïndijtsïni míteni na jatini uandani ka na jatini pínasku jarhani, jiáni engachi uandontskuarheni jauaka máteruecha jingoni parachi no no sési pʼikuastaani (1 Tes. 4:11). w23.12 20 párr. 8, 9

Apostoli Pablu ini ambe karakuaspti Roma anapu kúnguarhikuarhu anapu erachiichani. Imeechaksï jorhenguarhisptia Jeobaeri ka Jesúsiiri ambe, xarhatasptiksïa eskaksï mintsikasïreenga Tata Diosï Jeobani ka niárasptiksïa kristianu úkuarhini. Jimbokaksï mintsikaspka Tata Diosï ísï exeasïndi “komueska kʼuiripuecha enga[ksï] sési jámajka” ka espiritu santu jimbo erakuaspti. Jiánksï uératini jatsispti sési jásï ma erokuarhikua ka enga ísï úkuarhipiringa (Rom. 5:1). Ísï tátsekua, Pablu aianguaspti Éfesu anapu kristianu erakukateechani inde erokuarhikueri enga Tata Diosï íntsaapiringa. Arhiaspti eskaksï intsïnhapiringa ambakiti ambe “enga ima patsakuani jaka pímbinharhatiichani para íntsaani komueska erensia ma” (Éfes. 1:18). Ka Kolosasi anapuechani aianguaspti naniksï intsïnhapirini indeni kóntperatani engaksï erokuarhini japka. Arhiaspti: “Jimbokajtsï chá indeni ambe erokuarhixaka ambe engajtsï míndanhaka auandarhu” (Kol. 1:4, 5). Jiájkanksï kristianuecha erokuarhixati tsíntani ka irekani para méntkisï auandarhu, nani engaksï Jesukristu jingoni juramuaka (1 Tes. 4:13-17; Apok. 20:6). w23.12 9 párr. 4, 5

Uandakua griegu enga ísï tradusirikuarhika komu “kuájchakuati”, sondaduechani arhikuekaasïreendi engaksï iretani ma kuáni jarheenga parakaksï no niárapiringa no sési ambe úkuni. Jima anapuechaksï úsïreendi sési kʼuíni míteparini eskaksï sondaduecha puerteecharhu jarhasïreenga para kuájchakuni iretani. Májkueni, engajtsïni Tata Diosï íntskujka imeeri pínandikua, kuájchakusïndi juchaari mintsitani ka eratsekuani ka inde úsïndi eskachi seguru pʼikuarheraaka ka pínandikua jingoni (Sal. 4:8). Ka nájkiruka no sóntku sési niántaaka inde uandanhiata engachi jatsika, uaakachi nóteru xáni no sési pʼikuarherani jarhania ísï eska na úkuarhipka Ana jingoni (1 Sam. 1:16-18). Ka jamberichi uaaka sánderu sési eratseni ka sési ambe erakuni úni. ¿Ambechi jatsiski para úni? Ísï eskaksï kʼuiripuecha na arhienga sondaduni ma para kuájchakuani, juchajtuchi uaaka kurhakuni Tata Diosï Jeobani eskajtsïni kuájchakuaka. Ju je kómarhini astakachi pʼikuarheraka imeeri pínandikuani (Luk. 11:9; 1 Tes. 5:17). Enga chá no sési nitamakuarhini jaka, asï jurajku je kómarhini Tata Diosï Jeobani ka exeakajtsï na engaksïni ima íntskuaka pínandikua, ka kuájchakuati chaari mintsitani ka eratsekuani (Rom. 12:12). w24.01 21 párr. 5, 6

Paraka Jesúsi pímbinhajkuntapiringa Taati jémbeeri nombrini, jurajkuspti eskaksï no sési kámapiringa, no sési arhipiringa ka eskaksï chkuanderakua ambe jauatakupiringa. Mítespti eska ima kurhandiraspka ka eska no ma ambe jarhaspka enga jimbo kʼuratseni pʼikuarherapiringa (Ebr. 12:2). Ístu mítespti eska Noambakitisï úni japka eskaksï no sési kámapiringa (Luk. 22:2-4; 23:33, 34). Noambakiti uékasïreendi eska Jesúsi jurajkupiringa Tata Diosï Jeobani, joperu méntku no úspti ísï úni. Jesúsi xarhataspti eska Satanási chkuanderari máeska ka eska Tata Diosï jatsiaska imeeri marhuariichani engaksï no méni jurajkujka na uéjkiksï xáni no sési kánhani. Uékasïntsï tsíperani chaari Reini, tata Jesukristuni? Jiájkani seguirii je kʼéri ambe arhini Tata Diosï Jeobaeri nombrini ka jarhuataani máteruechani parakaksï exeaka na engamindu jásïika Tata Diosï Jeoba, ísïjtsï májkueni úni jauaka eska Jesúsi (1 Ped. 2:21). Ka ístujtsï úni jauaka eska Tata Diosï Jeoba tsípini pʼikuarheraaka ka xarhataakajtsï eska imeeri ikiatspiti Satanási kʼéri chkuanderari máeska. w24.02 11 párr. 11-13

Ini sinko uéxurhini jimbo enga nitamakia, jukari ma miioniksï itsï atakuarhistia paraksï Tata Diosï Jeobaeri testigu úkuarhini. Para jucha, aiakukuarheni arhikuekasïndi Jesúsiiri chúxapatiini ka imani ambe orheta úni ambe enga Tata Diosï uéjka. ¿Ka ambe arhikuekasïni inde ambe? Jesúsi uandaspti: “Engareni nema uéjka chúxapuni, eska ísku exekuarhiaka” (Mat. 16:24). Uandakua griegu enga ísï tradusirikuarhijka ‘ísku exekuarhini’ ístu uaati tradusirikuarhini eska ma nóteru ísï irekaakia eska “na uéjka”. Ísï jimbo, enga chá aiakukuarheakia Tata Diosï Jeobani, nóterujtsï uaakia imani ambe enga Tata Diosï no jaiapanhentajka (2 Kor. 5:14, 15). Nóchi jatsiska para jiókuarhini imani ambe enga “kuerpu niátajka”, pori ejemplu ísku jándikua ambe (Gal. 5:19-21; 1 Kor. 6:18). Engajtsï xénchaska Tata Diosï Jeobani ka segurujtsï jarhani eska ambe engaksïni ima kurhachejka sésiiska para chá, nójtsï úkua jukanchaaka kurhajchani (Sal. 119:97; Is. 48:17, 18). w24.03 2 párr. 1; 3 párr. 4

Tata Diosï Jeoba íntskuasïndi espiritu santu imeechani enga ima jaiapanheantajka (Mat. 12:18). Úpiringachi kurhamarhikuarhini: “¿Xarhatasïni ji imani kualidadichani engajtsïni espiritu santu jarhuatajka xarhatani?”. Pori ejemplu, ¿iásïjtsï sánderu tekaantasïnia eska ante de míteni Tata Diosï Jeobani? Engajtsï chá exejka eskaksïni espiritu santu jarhuataxaka indeni kualidadichani xarhatani, uaakajtsï seguru jarhani eska Tata Diosï Jeoba sési pʼikuarherasïnga chánksïni jingoni. Euajpintskua jimbo Tata Diosï Jeoba puákuantasïndi pekaduechani imani kʼuiripuechani enga ima jaiapanheantajka (1 Tim. 2:5, 6). Ísïisti, juchachi mintsikasïngia euajpintskuani ka itsï atakuarhiskachia, joperuchi ménisï úkua jukanchasïnga jakajkuni eskajtsïni Tata Diosï Jeoba jaiapanhentasïnga. ¿Ambechi uaa úni? Ju je miáni eskachi no jatsiska para méntkisï kasu úkuni na engajtsïni pʼikuastani jarhajka juchaari mintsita, joperu kʼóruchi jatsiska para mintsikani Tata Diosï Jeobani. Para ima, ima kʼuiripuecha engaksï mintsikajka euajpintskuani sésiksï pʼikuastasïndi ka uandasïndi eska újchakurauaka (Sal. 5:12; Rom. 3:26). w24.03 30 párr. 15; 31 párr. 17